مربع كاي

مربع كاي


09-11-2009, 11:00 PM


  » http://sudaneseonline.com/cgi-bin/sdb/2bb.cgi?seq=msg&board=299&msg=1257804008&rn=554


Post: #1
Title: مربع كاي
Author: الرشيد بابكر
Date: 09-11-2009, 11:00 PM
Parent: #0

مربع كاي هو حوض كبير للزهور محاط بحائط قصير و يقع في وسط كلية الزراعة...هذا الحائط القصير أو حافة الحوض كانت عبارة عن مسطبة كبيرة يجلس فيها طلبة الكلية في أوقات فراغهم في يومهم الأكاديمي المزدحم بالمحاضرات...يمارسون فيه اجتماعياتهم..يتعارفون و يتسامرون...يغنون و يشعرون...و حتى يعظون..يتبادلون المذكرات الكتب و الروايات و دواوين الشعر وحتى أشرطة الكاسيت...يأخذون فيه الصور التذكارية...
كل من مر عبر كلية الزراعة..طالبا كان أو زائرا...يعرف مربع كاي جيدا...سمي مربع كاي بهذا الاسم بواسطة الطلاب السودانيين و قد أخذ الاسم من أحد دروس علم الوراثة...
كان المربع شعلة من النشاط..لا يخلو أبدا من الطلاب...خصوصا السودانيين..فهم رغم تفوقهم في الدراسة الا أنهم الأكثر تواجدا بالمربع...
ماذا أردت بهذا البوست؟
شعرت بالوحدة و الوحشة اليوم و أنا جالس لوحدي مهرولا بين المنبر العام و منبر ناس الزقازيق لعلي أجد من أتسامر معه..فلم أجد...فكتبت على البوست في المنبر العام...ليتنا لم نبلغ المائة...معبرا عن ضيقي من هذه الحالة الغريبة التي يمر بها تجمعنا بعد احتفاليتنا بالمئوية...فقررت أن أن أفتح حوشا تحت مظلة هذا الحوش الكبير ليجتمع فيه الناس ليتسامروا كما كان الحال من قبل...شعرا و قصة و غيرة من المداخلات كما كنا نفعل من قبل...

أرجو أن لا يكون للتسمية أي مغزى غير أنه مكان يجتمع فيه الناس كل الناس وليس ناس زراعة فقط بحكم التسمية...انه حوش ستجدون فيه العناقريب من العصر و الحوش مرشوش بالمحبة...فتعالوا نتسامر كما كنا..ستجدوني كل يوم هنا في انتظاركم...

Post: #2
Title: Re: مربع كاي
Author: الرشيد بابكر
Date: 09-11-2009, 11:05 PM
Parent: #1

أدعوا محمد عيد وياسر نجيلة...محمد صديق..البرنس...و طارق جبريل...و غيرهم لاصدار أول اصدارة أدبية من خلال هذا البوست...
كلكم مدعوين للحضور...للتسامر...للدردشة...لعقد جمعيات أدبية وجلسات استماع...جلسات ونسة و فكر وفن...جلسات اخوة و محبة...

تعالوا جميعا...و ان اخترتوا تغير الاسم لغيرناه ان كان لا يعجبكم...

Post: #3
Title: Re: مربع كاي
Author: الرشيد بابكر
Date: 09-11-2009, 11:26 PM
Parent: #2

أدعو أخي و صديقي منصور للاندياح هنا...

أدعو فافي صاحبة التمائم الرائعة...لنثر دررها ها هنا...و معها الحبيب حاج الركز..

أدعوا زوبة لتنداح بتلقائيتها المعتاده...

أدعو أخي و صديقي زهير ليجمل المكان بروحة الجميلة..

و جلا لمباركة المكان بعد عودته سالما...

جلال اللطيف الظريف...صديق الليل...

قدورة الحبيب الشفيف...

عمر بسكو ...الأزرق الدفاق..
عثمان الجدي....الاضافة الجميلة..

وبالقيادة الرشيده للريسين ميسرة و معتصم...و السيده الأولى منى يونس...

مبارك جادين...من دونه لا يحلو السمر...

عبدالحفيظ....ليطل و يجمل كعادته...

سامي الأنيق..

و عصام دهب صاحب الحوش الكبير و الصغير...

حاتم جبارة..بباندات أو من غيرهم...

د. أحمد أمين...

صالح تبلدينا...و أسامة أبتر...دكتور الصادق...جمال السنوسي...

الدي جي...السهيلي...

صلاح الأمين..الذي لم يشاركنا الاحتفالية...حضورك خلف المسرح..

موسى عيسى ...أحمد اسماعيل

مدثر با يزيد...وعبدالدائم النضيف...

سمؤال و حيدر...العود أحمد....

اخلاص محمد أحمد...سناء الصباغ...و حتى ياسمين

بهجة....البهجة...

و كل من لم يستطيع عقلي الذي يحتاج الى الكثير من الكركم و أنا حاولت أن أكتب كل الأسماء من الذاكرة و كدت أن أنسى بنت شيخي من شدة حرصي أن لا أنسى أحدا...

كلكم مدعوين للحضور يوميا و على مدار الساعة للتسامر...

Post: #4
Title: Re: مربع كاي
Author: Hatim Gubara
Date: 09-11-2009, 11:50 PM
Parent: #3

يا رشا متابع والله..
لكن في الشغل.. ما ماخد راحتي..

Post: #5
Title: Re: مربع كاي
Author: زهير الزناتي
Date: 09-11-2009, 11:57 PM
Parent: #4

دون دعوة ستجدنا جلوساً من يرفض رفقة الجمال ...والبهاء ... وناس زراعة الجميلين ... البوست فكرته جميلة ولذيذة .. ومرحب بناس زراعة ومربع كاي ... حضور ومتابعة .. وأكيد إستمتاع ،، التحية لكل أصدقاءنا من ناس زراعة منذ عهد ما قبل صلاح علي صالح ,, يعني ناس الحج منصور إلي إبناءنا البرالمة عفاف ومحمد حسن البرلوم ومن لف لفهم من أهل الزراعة ...

Post: #6
Title: Re: مربع كاي
Author: الرشيد بابكر
Date: 10-11-2009, 07:21 AM
Parent: #5

Quote: يا رشا متابع والله..
لكن في الشغل.. ما ماخد راحتي..


حاتم يا جميل...عارفين الأمريكان ديل صعبين في الشغل...ما تشغل بالك يا حبيب حتى تتفرغ...
حاتم...حدثنا عن الحياة في أمريكا...على صعيد العمل و الحياة الاجتماعية...و ما الفرق بينها و بين العيش في اي مكان آخر في الدنيا...

Post: #7
Title: Re: مربع كاي
Author: الرشيد بابكر
Date: 10-11-2009, 07:25 AM
Parent: #6

Quote: دون دعوة ستجدنا جلوساً من يرفض رفقة الجمال ...والبهاء ... وناس زراعة الجميلين ... البوست فكرته جميلة ولذيذة


دي المحرية فيك دايما يا صديقي...أي مكان تمضي اليه يا أبو الزوز يزداد جمالا و بهاء...بس عليك الله يجب أن تستصحب معك دائما فكرة ان هذا البوست (قومي)...و ليس حكرا على ناس زراعة...

Post: #8
Title: Re: مربع كاي
Author: جلال عثمان
Date: 10-11-2009, 07:30 AM
Parent: #7

ما بسألك لكن .... معقولة؟؟؟
تنسى تدعو اهم زول !!!

ضحكك
شرح قلب السماء

لون سحاب كل الفضـــاء

عطر الصحراء ولمس عصب الجبل

ضحكك وصول حزمة رسائل من أهل

أضحكي

أضحكي


شيل شيلتك وارجى الراجيك

Post: #9
Title: Re: مربع كاي
Author: الرشيد بابكر
Date: 10-11-2009, 07:43 AM
Parent: #8

Quote: شيل شيلتك وارجى الراجيك


جلال...ضحكتني و فضحتني في المكتب...

أنا خايف يوم الخميس ضحكك شرح قلب السماء...تتحول لي الضحك شرطني...الله يستر غايتو...لكن أنا عارف بت شيخي مسامحه...

Post: #10
Title: Re: مربع كاي
Author: سامي عبد الوهاب إدريس
Date: 10-11-2009, 08:25 AM
Parent: #9

سلام... رشيد القوم

يا زول بنجيك تب

نحن قعاد المساطب دا بنحبو جدا

من أيام مسطبة الجاويش... (ياها الدخّلت فينا حب المساطب والزحزحة)

Post: #11
Title: Re: مربع كاي
Author: عصام دهب
Date: 10-11-2009, 10:51 AM
Parent: #10

Quote: نحن قعاد المساطب دا بنحبو جدا

من أيام مسطبة الجاويش...


قول تلاتة يا رشيد .. *

عايزين البوست دة يكون ( اندياح صاح ) *

ــ
* مصطبة الجاويش : و هي المصطبة خلف مستشفى الجاويش و قبالة دار الإتحاد و التي لو تكلمت يوما الله يستر ..

* 3 = سامي و أنا و ثالثنا الفي بطنو حرقص .

* اندياح : و تعني فت و مفردها إندياحة و هي مجرد ( فتة ) و شيئ لله يا حسن .

...... فاصل و نواصل ..

Post: #12
Title: Re: مربع كاي
Author: الرشيد بابكر
Date: 10-11-2009, 11:20 AM
Parent: #11

Quote: يا زول بنجيك تب

نحن قعاد المساطب دا بنحبو جدا

من أيام مسطبة الجاويش... (ياها الدخّلت فينا حب المساطب والزحزحة)


سامي الأنيق..تعالوا و ما تجيبو معاكم أي حاجة...الشاي و القهوة موجودين...و اللقيمات على محمد صديق حيجيبها معاه....تاني باقي ليكم شنو...

Post: #13
Title: Re: مربع كاي
Author: الرشيد بابكر
Date: 10-11-2009, 11:25 AM
Parent: #12

Quote: قول تلاتة يا رشيد .. *

عايزين البوست دة يكون ( اندياح صاح ) *


عصام دهب...تعال انداح و فت الفتة أم توم حمتنا النوم عند ناس كلتوم...نحضر ليك الشيشة و لا بتجيبه معاك....و جيب لينا معاك أغنية لذيذة كده لعبدالرحمن عبدالله..جدي الريل أبوكزيمة...تعال نتمشى في الغيمة...دي غيمة ريد تصب في الرهيد...

Post: #14
Title: Re: مربع كاي
Author: عفاف علي ميرغني
Date: 10-11-2009, 11:25 AM
Parent: #11

رشا يا رشا يا كحيل العين


مربع كاي00 مربع كاي 00


فرق بين مربع كاي لما جينا برالمة



من كتر الضجة الفيهو كنت بشيل الهم اسلم متين واحصل السكشن( الشطارة وكدا)


ولما بقينا خريجين مافي غيري زول بيقعد فيهو (بكا على الاطلال ,وكدا برضو)

ولي عودة لقفشات مربع كاي

Post: #15
Title: Re: مربع كاي
Author: منصور عبد الرازق
Date: 10-11-2009, 12:39 PM
Parent: #14

القانون الرياضى البسيط
يا رش يا حبيب
ويا جلساء مربع كاى
والمارين المتاوقين من البياطرة
طارق جبريل وحاتم جبارة
ومن لف لفهم
حتى سناء الصباغ ذاتها
لو متاوقة
برضو معاهم
بطة الطردوها من المحاضرة لمن قبضوها بتضحك مع الود حاتم
كمان معاهم
اها كنت بقول فى شنو ؟؟!!
ايوة , القانون الرياضى
بتاع مساحة المربع , ومحيطه
قال ليك المساحة
الضلع فى نفسه
والمحيط
الضلع فى اربعة
ما دام الشغلة مسألة ضلوع وكده
المربع الوحيد الفى الدنيا دى
الما عنده لا مساحة ولا محيط
هو المربع كاى
لأنو اى زول قرأ زراعة الزقازيق
كاسر ليهو (ضلع) هناك
ناس بيطرة من الخوف و(القحط )
بيكونو كاسرين ضلعين
اها عليك الله مربع الجن ده
ما (خستك ليكم ) قوانين الرياضيات
قال الضلع فى نفسه قال
مش لمن يكون فى (ضلع) اساسا

Post: #16
Title: Re: مربع كاي
Author: الرشيد بابكر
Date: 10-11-2009, 01:29 PM
Parent: #15

Quote: ولما بقينا خريجين مافي غيري زول بيقعد فيهو (بكا على الاطلال ,وكدا برضو)

ولي عودة لقفشات مربع كاي


فافي يا فافي...جبت ليك المربع لحدي عندك..انتي جيبي معاك الأطلال...و منتظرين بشوق لقفشات مربع كاي...

Post: #17
Title: Re: مربع كاي
Author: الرشيد بابكر
Date: 10-11-2009, 01:34 PM
Parent: #16

Quote: ما دام الشغلة مسألة ضلوع وكده
المربع الوحيد الفى الدنيا دى
الما عنده لا مساحة ولا محيط
هو المربع كاى
لأنو اى زول قرأ زراعة الزقازيق
كاسر ليهو (ضلع) هناك
ناس بيطرة من الخوف و(القحط )
بيكونو كاسرين ضلعين


أنا غايتو كسرت ضلوعي في الكافتيريا...بس بحب مربع كاي برضو...أسوأ حاجة في مربع كاي...تكون الدنيا شتاء و المربع مرشوش و المساطب مبلولة و انت ما جايب خبر...و انت جاي قاشر...تقوم تقعد ليك في مسطبة مليانة موية و انت ما جايب خبر...أها اليوم داك حتكون بردان لحدي آخر اليوم...

Post: #18
Title: Re: مربع كاي
Author: الرشيد بابكر
Date: 10-11-2009, 02:00 PM
Parent: #17



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">


وطنا حبيبنا رغم البيك
هي الأشواق
حنينا إليك زين يازين
يظل دفاق
ما حوجتنا ونديك
وغيمنا إليك دوم ساساق
يلاقى البينا من واديك
اناقى غزيرة ماها فراق
نحبك من طرف من جم
برغم قطائع الإملاق
ما بتنذم علاقة دم
وفا وتاريخ على الإطلاق
إذا ما الغربة لمتنا
على ذات الخلق واخلاق
وطن وين كان في ذمتنا
فكيف يبقى الزمن فراق
هي الأشواق
وما بين السما والأرض
مدي الأشواق
ما طال المطر بيصب
طبيعي انه البحر ما راق
كما انه العكار من طين
كمان من طين يجى الرواق
صحيح انه البحر رايق
ولكن السحاب قد ضاق
خبارو الريح بشن سايق
وكت كبد التراب مشتاق
إذا ما العشق منسابق
ومطابق على الأعماق
كذلك حضره العشاق
مع غيبوبة الأشواق
وطنا الزين لا تنضرا لا تنعاق
نظل في حبلك الواحد
حبيبين ما في بينا فراق
وهيط شايلنا شيله السيبى
سعن الباشا والمعلاق
لا فينا الضلالي العاق
ويا حاسب سكاتنا رضاك
أمانة بطونا ماها غراق
صدورنا على البعادى زقاق
ضهورنا إلى المنادى رقاق
رضينا بلا قرن ننساق
وحين نحرن جبل يا ساق
الجرب يطير ما بيمشى
لو حرت عليه الأشواق
ومن قولب لهيب الشمش
ما كوش من الرقراق .


Post: #19
Title: Re: مربع كاي
Author: الرشيد بابكر
Date: 10-11-2009, 05:17 PM
Parent: #18

تطلع العناقريب من العصر و ترش الحوش...تجيب ليك تربيزة كبيرة تخت فيها الشاي و القهوة...بتاع اللقيمات أتأخر...الظاهر الخميرة ما كويسة ولليلة العجين ما فار...ترانا قاعدين منتظرين كان جاء اللقيمات خير و بركة و كان ما جاء بنشرب شايينا ساكت...
يا ربي الأغنية دي طفشت الناس..قايلنو ركن نقاش ولا شنو...كدي النقوم نغير الأغنية..نجيب لينا أغنية ناعمة كدة...و لا أغنية بتاعت مكسرين تمرق لينا الناس الحنينين ديل لي برة...

أمشي أغير الأغنية و أجي...امكن يجي زول مارق...

Post: #21
Title: Re: مربع كاي
Author: الرشيد بابكر
Date: 10-11-2009, 05:28 PM
Parent: #19

طيب ايه رأيكم تسمعوا رائعة الراحل أبراهيم عوض و سيف الدين الدسوقي...المصير...بس بصوت نانسي عجاج..عندي تسجيل بصوت أبراهيم عوض بس للأسف قديم...



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">


Post: #20
Title: Re: مربع كاي
Author: محمد صديق
Date: 10-11-2009, 05:26 PM
Parent: #18

سلامات يا ناس

رشيد يا حبيب...موفق

ده..العربون حقنا :



[ 1 ]

ويُحكى فى القديم بأنك

قد حشدت جيوش شوقك

كى تُعانق هلة الذكرى

وتنثر فوق جبهتها الازاهر والطيوب

وتنهل من دنان التوق...

مثنى أو ثلاثآ او رُباعْ


[ 2 ]

فيمْ اصطيارُك ؟

واحمرار الافق يخضُب حُلّة الدنيا

بالوان التشتت والفراق

وفى القريب يجىءُ ليلُك فى أسىَ

كيما يوقّع آخر الالحان فى وتر الضياعْ

[ 3 ]

والآن ليس يُقيدك التذكار

الآن ليس تُغيثك النجوى

ولا حتى التسكّعُ بين أقبية الليالى

حينما كانت بوجهتك الرياحُ تسيرُ طوعآ

بل تحت امرتُك المقاود والشراع

الآن لا .....

كل المحاور لا تقود نحو النّور

كل المراكب لم تعدْ....

تُدركْ تباشير المراسى..

لم تعدْ تُبصر تفلصيل القلاعْ

[ 4 ]

رؤاك الآن يطاردها التعتيم

تُهيم بليل فى عمق الصحراء

تستجدى من ذرات دواخلها قطرات الماء

وتبكى فى حُرقة...

هلمّ الىّ الآن وآوينى ...

هلمّ الىّ الآن وأسقينى ..

هلمّ الىّ وأغسلنى بمياه التسنيمْ

[ 5 ]

آخر الحكاية ....

حدّث من رأى ..

فى ظُلمة المساء

وأشهد الآذان أنْ قد سمعْ

وصوتك المحزون يخرق السماء :

يا من تملك من نفسى ....نفسى

غثنى ....

غثنى يا من تسكنُ فى أعماقى ...

نبضآ...

وحروفآ.....

وشعاعْ

Post: #22
Title: Re: مربع كاي
Author: عبد القادر بابكر
Date: 10-11-2009, 05:28 PM
Parent: #18

أها جيتك يارش ...

ياخوي انت نسيت تدعو أهم زول في مربع كاي ... أسعد المصوراتي ( أب كرنك ) .... ياخي بالغت والله .. هو في جلسة في مربع كاي بتحلى من غير فلاشات أسعد .. كما قال أسلافكم القدام : يا أسعد ياخي نشفت علينا الشجر بي فلاشك ده ...
( الزول ده وين يا جماعة ... حي ولا ميت ... الافادة بواسطة فافي والناس البعدها ... ) لسه عندي باقي صور عندو عايز ألقطهم منو وحقهم مدفوع ....

Post: #23
Title: Re: مربع كاي
Author: عبد القادر بابكر
Date: 10-11-2009, 05:33 PM
Parent: #22

كان ما جبت لينا أسعد ما جاييييييين ...

Post: #24
Title: Re: مربع كاي
Author: الرشيد بابكر
Date: 10-11-2009, 05:34 PM
Parent: #22

يا كوتش لكن عربونكم ما طاعم..عليك الله جيب باقي اللقيمات دي و تعال بي هنا...شوف الهمبريب ده كيف..

Post: #25
Title: Re: مربع كاي
Author: الرشيد بابكر
Date: 10-11-2009, 05:39 PM
Parent: #24

قدورة يا حبيب...و الله أسعد ده نشف الشجر و نشف جيوبنا معاها...تجيب البريزة و تديها لي أسعد و تقعد ساااااكت...
تعال ياخي أنا جبت ليك نانسي عجاج زاته..تقول لي أسعد..عليك الله أسمع انتهينا دي..حسه التاء دي مربوطة ولا مطلوقة في السهلة ساكت...

Post: #26
Title: Re: مربع كاي
Author: الرشيد بابكر
Date: 10-11-2009, 05:39 PM
Parent: #24

نص جميل و أنيق يا كوتش....لمن هذا العمل الجميل...

Post: #27
Title: Re: مربع كاي
Author: محمد صديق
Date: 10-11-2009, 06:00 PM
Parent: #26

سلامات يا ناس

الرشيد ...شكرآ على الاعجاب ...

النص وحات اولادك ...حقى برااااااااااى .

Post: #28
Title: Re: مربع كاي
Author: الرشيد بابكر
Date: 10-11-2009, 06:09 PM
Parent: #26

Quote: رؤاك الآن يطاردها التعتيم

تُهيم بليل فى عمق الصحراء

تستجدى من ذرات دواخلها قطرات الماء

وتبكى فى حُرقة...

هلمّ الىّ الآن وآوينى ...

هلمّ الىّ الآن وأسقينى ..

هلمّ الىّ وأغسلنى بمياه التسنيمْ


يا كوتش أحس بنزعة صوفية في هذه القصيدة...هل صحيح هذا...

Post: #29
Title: Re: مربع كاي
Author: محمد صديق
Date: 10-11-2009, 08:09 PM
Parent: #28

سلامات يا ناس

الحبيب الرشيد...
Quote: ...ويُحكى فى القديم بأنك

قد حشدت جيوش شوقك

كى تُعانق هلة الذكرى

وتنثر فوق جبهتها الازاهر والطيوب

وتنهل من دنان التوق...

مثنى أو ثلاثآ او رُباعْ


نحن اهل التوسسط...والتوسط سماحة..والصوفية هى مسالك المتسامحين

لانها تقترب من القلوب...ابصارآ وسمعآ ورؤيا...والشوق هو احد المراقى

فى الغالب تكون الكتابة انعكاسآ او مرآة للدواخل..انت لا تخطط لتكتب

كلامآ محددآ بحدود تعلمها ...يأتى غيرك ليكتشف شيئآ ما ...ماكان يدور

بخلدك...

صدق اول مرة انظر ليها من الناحية دى...

نشوف ناس تانيين يقولوا لينا شافوا فيها شنو؟؟

لك محبتى

Post: #30
Title: Re: مربع كاي
Author: الرشيد بابكر
Date: 10-11-2009, 08:53 PM
Parent: #29

Quote: فى الغالب تكون الكتابة انعكاسآ او مرآة للدواخل


لقد أصبت كبد الحقيقة يا كوتش...فالكتابة هي انعكاس للدواخل...و نحن السودانيين متصوفة أو غالبيتنا متصوفة...طيبون مسامحون و فوق كل ذلك زاهدون و نسعد كثيرا عندما نسعد الآخرين...

Post: #31
Title: Re: مربع كاي
Author: طارق جبريل
Date: 10-11-2009, 11:05 PM
Parent: #30

الفكرة سمحة شديد يا الرشيد

Post: #32
Title: Re: مربع كاي
Author: الرشيد بابكر
Date: 10-11-2009, 11:14 PM
Parent: #31

سمح انت يا جبريلا...و الله بندورك و بشتهيك عديل كده...تعال لينا كل يوم أكتب لينا هنا و حتلاقي مسطبتك مليانة معجبين بكلامك السمح اللذيذ..و أنا أول المعجبين..و ده ما كلام مجاملة..ده كلام نابع من القلب...

Post: #33
Title: Re: مربع كاي
Author: زهير الزناتي
Date: 11-11-2009, 00:05 AM
Parent: #32

22121.JPG Hosting at Sudaneseonline.com


تعادل عادل

Post: #34
Title: Re: مربع كاي
Author: زينب التجاني
Date: 11-11-2009, 00:08 AM
Parent: #32

العزيز بلا حدود رشا
اول ما دخلت المنبر ولقيت مربع كاى ختيت شنطتى فى الناحية المواجهة لوقاية
وقدامى مجموعة شايفة حسان ومحاسن وعاطف وصفوت قاعدين فى مسطبة وقاية
عايزة ادخل سكشن لكن ناسية اللب كوت
نانى شايفانى فاكرانى زايقة وجاية تهرشنى
اما قلت ليها ماعندى لاب كوت
اتناولت من امل المصرية الكوت ومسكتنى من ايدى وعلى السكشن

[
Quote: red]أدعوا زوبة لتنداح بتلقائيتها المعتاده...[/red
]
رايك شنو فى الاندياح دة
يا داك منصور
يا منصور تعال
شنو مالك قاعدة فى المربع براك
نتيجة الانتخابات لسة ماظهرت
ما عارف بس ممكن نسال
طيب بدل نسال مانمشى منشية البكرى نسال

يلا





وكان اجمل احتفال

سلام يا منص وشكرا يا رشا


يلا ناخد صورة عند اسعد

Post: #35
Title: Re: مربع كاي
Author: الرشيد بابكر
Date: 11-11-2009, 12:33 PM
Parent: #34

Quote: العزيز بلا حدود رشا
اول ما دخلت المنبر ولقيت مربع كاى ختيت شنطتى فى الناحية المواجهة لوقاية
وقدامى مجموعة شايفة حسان ومحاسن وعاطف وصفوت قاعدين فى مسطبة وقاية
عايزة ادخل سكشن لكن ناسية اللب كوت
نانى شايفانى فاكرانى زايقة وجاية تهرشنى
اما قلت ليها ماعندى لاب كوت
اتناولت من امل المصرية الكوت ومسكتنى من ايدى وعلى السكشن


رايك شنو فى الاندياح دة


رأي انك بعد كده مافي داعي تدخلي اي سكاشن أو محاضرات...خلاص كفاية الاتعلمتيهو لحدي كده..تعالي طوالي شوفي ليك ركن و أقعدي و جيب معاك بسكويت من الكشك قبل ما تجي....

Post: #36
Title: Re: مربع كاي
Author: الرشيد بابكر
Date: 11-11-2009, 12:35 PM
Parent: #35

Quote: تعادل عادل


زهير ده تعادل خواطر (على وزن توارد خواطر) بين البوستين...

Post: #37
Title: Re: مربع كاي
Author: منصور عبد الرازق
Date: 11-11-2009, 01:29 PM
Parent: #36

سكشن الحشرات
ولكاشر الوقاية بتاعت احمد زكى
يا حليلو احمد زكى
كان هارشنا هرشة عدوك
لمن تزهج من فوق وتتاوق بالشباك تلقى الجماعة متلمين
وانت غرقان بين الصراصير والعناكب
تتلخبط ليك الدنيا
تشوف احمد زكى صلاح التيجانى
ويجيك صوت المعيد بتاع السكشن يصحيك
انئل
(والمقصود انقل يعنى امشى اتفرج فى الشريحة البعدها )
زمن


زينب التيجانى
يا صديقة احلى زمن
على الله فى احلى من ركوب البيجو فى الكنبة الورا
والست تغنى ليك برااااك
اغدا القاك يا لهف فؤادى من غد
احمد حلمى
الأجرة لو سمحت
مقشطين كالعادة
طلعى جزلانك وادفعى
سندوتشات كبده كيف ؟؟


ليه بنهرب من مصيرنا
ونقضى ايامنا فى عذاب
ليه تقول لى انتهينا
نحن فى عز الشباب

Post: #38
Title: Re: مربع كاي
Author: محمد عيد
Date: 11-11-2009, 03:30 PM
Parent: #37


كان صباحا شتويا باردا فى اواخر كانون الثانى .. والزمهرير الذى تشهده ايام هذا الشهر يعرفها جميع من حباهم الله بالدراسة والحياة فى تلك البلدة الوادعة .. الزقازيق ...
صحوت باكرا لأجهز نفسى للذهاب لكليتنا الجميلة .. نهضت مسرعا نحو الحمام لتشغيل مفتاح السخان الكهربائى .. ولكن سرعان ما اصابنى الحــنق والغيظ ..! فقد وجدت الحمام مشغولا .
جلست على مقعد فى الصالة ملقيا برأسى على كتفى ممنيا النفس بأخذ غفوة صغيرة اتذوق فيها جمال آخر النوم - تماما كما اصطلح عليه فى حلاوة نهاية كل شىء .. سواء كانت آخر شفطة فى كاس الشاى او آخر نفس فى السيجارة . ويبدو ان غفوتى طالت او هكذا خيل الىّ فدلفت مجددا نحو الحمام ولكنى وجدته ما زال موصدا .. طرقت بعنف على الباب وانا اصيح :
- يلا يا أخينا ســاعة فى الحمام ؟ خلصنا ورانا كلية ..
جائنى صوت من الداخل متثاقلا ينبىء بأن المتحدث ما زال امامه وقت لكى يخرج ..
• يعنى انحنا عندنا حفلة سماية ؟ ما كلنا عندنا كلية ..!

عندها أسقط فى يدى وهويت يائسا بجسمى كله على الكرسى مجددا ..! فقد كان المتحدث هو عاطف القوز ..! ولما كانت الثقافة السائدة فى شقتنا الواقعة بشارع المكتبات تتحدث كثيرا عن ارتباط عاطف بالحمام فى انهاء معظم او كل حاجاته الملحة - ولا أقصد بها هنا الحاجة المرتبطة بالمكان - بقدر ما أقصد التفكير العميق لحل معضلة ما تواجهه او لاستذكار درس معين استصعب عليه فهمه او فى أحسن الاحوال مطالعة الجريدة اليومية التى تحضرها معها ام احمد الشغالة كل صباح .. فقد اوقنت بأننى لا محالة قد فقدت فرصة اللحاق بالمحاضرة المستهدفة وطفقت أفكر فى مآلات هذا الغياب القسرى .. خاصة وقد هددنى دكتور المادة بالحرمان من دخول امتحان العملى حال تكرر غيابى ..
ولم اخرج من حالة التوهان التى أدخلنى فيها اخانا عاطفا الا على صوت حاج الركز قادما من غرفته
وهو يلف فوطته حول عنقه وابتسامته الصافية تملأ وجهه فى حين عيناه ما زالتا شبه مقفولتان ..
- عيييييييد صــباحووو ..
- صباح شنو ياخى الليلة شكلها العصرية ما بتحلنا .. بعدين انت ياخ ما عارفنك زميل .. شنو حتى الفوطة لافيها على رقبتك ؟
- هىء .. هىء .. مالك مكربّن من الصباح ؟ منو الجوه الحمام وشاحطك بره ؟
- صاحبك ابو طويلة ..
- ها .. ها .. ها ... الللـ قووووزر ..؟ طيب ما واطاتنا أصبحت . أأأأنا عندى سكشن أمراض نبات مع الزول المرض داك .. وطبعا انت عارفو بيقعد يهزىء فى العالم لمن تتأخر ..
- طيب .. وصاحبك ده مش معاك فى القسم ؟ يعنى برضو لازم يمشى السكشن ؟ أمشى كلمو خلليهو يتخارج ..

وبعد مشوار طويل من الجدل اللفظى الضاحك والمألوف بين الاثنين خرج عاطف بضحكته التى ما تكاد تراها حتى تزداد حبا له وتغفر له كل شىء حتى لو مد أصبعه السبابة وفقأ عينيك ..!

تجاوزا لكثير من التفاصيل الأخرى نزلنا ثلاثتنا من العمارة وتجادلنا حول تجميع أجرة التاكسى للكلية .. حيث كان بامكاننا امتطاء الميكروباص بخمسة قروش لكل واحد اى 15 قرش للجميع بينما يحتاج التاكسى الى ربع جنيه اضافة الى امتعاضة وحنق من السائق باعتبارنا ثلاثة وسنحتل المقعد الخلفى كاملا .. وقفنا امام شارع الجلاء وأعطينا ظهورنا للحبيب الشرقاوى وروائحه الذكية تملأ الآفاق .. وقفنا برهة وكأننا نملأ فشافيشنا بحاجتها من تلك الروائح الى ان يقيض الله لنا وجبة فى هذا البرد القارس .
وصلنا الكلية واتجه كل منا الى مدرجه .. ولكن فى خلال ثلاث دقائق كنا مجتمعين مرة أخرى فى مربع كاى وقد بدا خاليا الا من بعض الاخوة المصريين ..! كان الطرد من المحاضرة مصير كل منا وبالتالى كان امامنا اكثر من ساعتين للمحاضرة التى تليها .. و لم يكن امامنا سوى الانتظار بالمربع الجميل .. وكان رأى عاطف القوز ان معدته خالية وبطاريته نازلة وطالما ليس معنا نقودا للأكل فلا مناص من شحن البطارية معنويا بخلطة او خلطتين حتى يحين موعد المحاضرة
صحت فيه :
هســه انتو قاعدين كده وقرش واحد ما معانا .. الخلطة الكايسنها دى لو قالت ليكم دايرة بس كباية شاى من عم فكرى حتخشوا فى حيص بيص ..طيب لو قالت جيعانة وعايزة تمشى الكافتيريا كيف يكون الوضع ؟

هنا هتف عاطف وقد لمعت عيناه وأوشك ان يصيح بأعلى صوته كما صاح اخونا نيوتن فى زمانه
خلاص يا شباب انا لقيت الحل بس انتو اتصرفوا وجيبوا لينا الخلطة وبعد داك انا بأحلها ليكم .

والتزم حاج الركز بالقيام بمهمة استجلاب الخلطة وذلك لقناعاته الكاملة فى دهاء ومكر عاطف القوز ..
انتظنرنا قليلا ثم ظهرت مجموعات من الطلاب الخارجين من قسم وقاية النبات ، وطفقنا نتفرس فى الوجوه لنرى من من زملاءنا السودانيين فيها ... وكان ان ظهر عادل عبد العظيم بأناقته المعروفة واضعا سيجارته فى فمه وفى معيته زميلاتنا قند اليمن وهالة وانعام .. فقام اليهم حاج الركز هاشا باشا واستقبلهم من على سلالم قسم الوقاية يستفسر منهم فى خبث عن المحاضرة التى فاتته .. وسرعان ما قادهم ليجلسوا جوارنا بمساطب مربع كاى ثم أطلق عاطف القوز قنبلته حين اعتتدل فى وقفته نافخا ريشه ومتحدثا بعبارات تنبى عن الثقة والفشخرة ..
- الجو بارد خالص يا جماعة وانا بصراحة ماسكانى جوعة شديدة يلا يا جماعة نمشى على الكافتيريا ..
اصابتنى دهشــه كبيرة حاولت مسرعا اخفاءها وتوجهت بنظرى ناحية أسعد المصوراتى كى لا يلاحظ احد الضحايا هذا الارتباك .. وتحركنا جميعا نحو الكافتيريا وانضم الينا فى الطريق كل من مجدى عبد الله وامانى حسن الهادى وحنان القطينة .. وحرصت الا أمشى بجوار عاطف حتى لا أؤخذ بجريرته المرتقبة ولكن لفت انتباهى انه امسك بيد مجدى وتقدما الجمع وكانا يتهامسان ويضحكان وكأنهما يرتبان الامر سويا ..
جلسنا الى طاولتين فى الكافيتيريا وطلبنا عدد مقدرا من سندوتشات السجك والبسطرمة بالبيض واللانشون والمربى ... والجميع يتسامرون فى مرح .. وقبل ان اكمل نصيبى من الساندويتشات سألنى مجدى عبد الله ان كان لدى سجائر ( واستعجبت لسؤاله فقد أخذ منى علبتى قبل دخولنا للكافتيريا ) واجبته بالنفى ، فصاح فىّ
يلا نمشى نجيب سجاير من الكشك ..

وسحبنى من يدى وبقية الساندويتش فى اليد الأخرى ... وعندما خرجت فهمت منه بأننا سنزوغ تماما من الكلية وسيلحق بنا عاطف وحاج الركز وبالتالى يتدبس عادل عبد العظيم فى الموضوع .. وبالفعل مررنا بالكشك وذكر له مجدى بأنه اذا سأل منه أحد ان يقول له بأنه غادر الكلية لأنه مسافر للقاهرة الآن ..
وكان مكان انتظار بقية عصبة التحايل خلف قسمى الاقتصاد والانتاج الحيوانى .. وسريعا ما التأم شملنا وغادرنا الكلية من البوابة المواجهة لكلية بيطرة .
بقية القصة كما رويت لنا فيما بعد كان ان استبد القلق بعادل واستأذن من البنات وذهب للكشك ووجد الاجابة المفجعة وثارت ثائرته .. وطفق يفتل الكلية جيئة وذهابا لتجميع مبلغ الكافتريا من الزملاء والذى وصل الى ما يقارب الاربعة جنيهات ... ونجح فى ذلك ولكنه فى ذات الوقت كان قد أسهم فى نشــر الطــرفة على اوسع نطاق وفى اضيق وقت .. وصارت ملحـــة تحاكوا بها كثيرا !


كيف كان انتقام عادل عبد العظيم ؟ ومن هم الضحايا الذين طالتهم سياط الدفتردار فى حملته ؟
• ما هو المقلب الذى صنعه مجدى عبد الله فى اخونا يزيد العركى وما هى قصة السكاكين التى كادت ان تسيل الدماء فى لكوظ ؟
• ما قصة ذلك المقلب الذى اقتضى بسفر احد الزملاء الى القاهرة للبحث عن هدف مزعوم ؟
• وما هى قصة الفتاة التى حضرت من السودان وادعت انها ابنة عم احد الزملاء وجعلته يطوف طوال الليل يبحث عنها فى بيوت الطالبات وشقق الزميلات ؟
• ما هى قصة العفريت او الجنى الذى هاجمنا فى جوف الليل بحضور عادل الجعلى ومنتصر حقوق وحاج الركز ؟
تلك رؤوس لحكاوى أخرى - اعلم تماما انها لا تحتاج الى سمكرة .. ولكن ربما الى التشليح - ولكنى سأوردها متى ما اتاح لنا الزمان والمزاج ذلك .. ( بوســـت موفق يا رشـــا )

Post: #39
Title: Re: مربع كاي
Author: الرشيد بابكر
Date: 11-11-2009, 03:51 PM
Parent: #38

يا سلام يا محمد عيد...شعرت بالراحة و أنا اقرأ الجريد في الحمام عندما وضعت نفسي مكان عاطف القوز...و تخيلت وجوه ناس وقاية و هم خارجون من مبنى القسم...و عاطف القوز و هو يحيك مؤامرته..تلذذت بسندوتشات السجق و البسطرمة...و شعرت بالحنق و ارتفع ضغطي و أنا أضع نفسي مكان عادل عبد العظيم...

تسلم يا حبيب...

مافي سمكرة هنا...ده مكان بوح ساكت...

Post: #40
Title: Re: مربع كاي
Author: محمد صديق
Date: 11-11-2009, 05:52 PM
Parent: #39

سلامات يا ناس

عيد...عشنا معاك اجواء القصة واندمجنا مع الشخصيات

الحكى بديع ...واللغة عالية النقاء...

الحمام والجريدة ذكرونى حاتم جبارة ...لو خشّ قدامك

تنوم بس..

Post: #41
Title: Re: مربع كاي
Author: الرشيد بابكر
Date: 11-11-2009, 08:09 PM
Parent: #40

ليل الشجن والشوق

فى ليل الشجن والشوق ... سألت عليك وناديتك
لقيتك فى السماء نجمة ... لقيتك فى الصفاء نسمة
لقيتك فى الصباء كلمة ... وناجيتك وما رديت
* * *
شكيت لى طيفك الايام ... وحدثتك حديث الروح
سالتك وين .. وين وكيف .. هواك اوهام .. ووعدك زيف
وطول ايامى بلقاك طيف ... وناجيتك وما رديت
* * *
سهرت مع ملاحم شوق ... وفى احضانى نام الليل .. صحيتو
صحيت نجمة ترعى حبيب
وصحيت شمعة تشقى لهيب
تمنيت وانت طيف ما تغيب
وناجيتك وانت ما رديت

Post: #42
Title: Re: مربع كاي
Author: عفاف علي ميرغني
Date: 11-11-2009, 08:12 PM
Parent: #40

والله يا رشا قصة محمد عيد ضحكتني لمن بكيت

عليك الله ياعيد تعال واحكي تاني

Quote: .. ما قصة ذلك المقلب الذى اقتضى بسفر احد الزملاء الى القاهرة للبحث عن هدف مزعوم ؟



يلا ياعيد بدون تشليح 00 القصة كاملة

Post: #43
Title: Re: مربع كاي
Author: الرشيد بابكر
Date: 11-11-2009, 08:45 PM
Parent: #42

فافي وينك انتظرناك كثيرا و ما طليتي...و أين التمائم لا أراها...جيبيها هنا و تعالي...و أين حكاويك بتاعت مربع كاي التي وعدتينا بها....بالله عليك ما تغيبي...

Post: #44
Title: Re: مربع كاي
Author: عفاف علي ميرغني
Date: 11-11-2009, 09:23 PM
Parent: #43

رشا يا رشا

مساء العافية00

وهاك تميمة نور

نور

نور

لمحها مثل غزالة تركض على استحياء00

اشعلت داخله قناديل عمر اخضر000

استوقفها على عتبة بوحه00

امتلات الحكاية دفء00

تمت ولادة قصيدة

Post: #45
Title: Re: مربع كاي
Author: الرشيد بابكر
Date: 11-11-2009, 09:29 PM
Parent: #44

فافي هذه تميمة رائعة بحق...

لقد تعلقنا بهذه التمائم كما قلت من قبل فلا تهمليها...

فافي

شرفنا بك و استطالت هاماتنا بمقدمك السعيد...


Post: #46
Title: Re: مربع كاي
Author: عفاف علي ميرغني
Date: 11-11-2009, 09:37 PM
Parent: #45

يا رشا باقي نحن الحرسين البورد الليلة(حراس سنار)

ونجاة شايفاها حايمةفي الحوش التاني

اكيد بتبحث عنك 000

دا الانا خايفة منو00لو حاج الركز ادوهو الباسوورد
اقعد احوم الحيشان 00مشى مشى وين (بفرضيات عامل السن00 والحوجة الماسة للكركم)

Post: #47
Title: Re: مربع كاي
Author: الرشيد بابكر
Date: 11-11-2009, 10:15 PM
Parent: #46

Quote: ونجاة شايفاها حايمةفي الحوش التاني

اكيد بتبحث عنك 000


كلمتها في التلفون و قلت ليها تصبحي على خير...قالت لي أنا نعسااااانه ماشة أنوم...أجي القاها ليك لافة بي هناك...قلت الظاهر الباسورد ده حيجيب اللوم...

مشيت بي هناك شوية مرقت ليك طارق جبريل...و جاء الزناتي سلم علينا و مشى...عليك الله البياخة الحاصلة دي من شنو يا فافي...

Post: #48
Title: Re: مربع كاي
Author: طارق جبريل
Date: 11-11-2009, 10:20 PM
Parent: #47

غالي والطلب رخيص يا حبيبنا الرشيد:

Post: #49
Title: Re: مربع كاي
Author: الرشيد بابكر
Date: 11-11-2009, 10:28 PM
Parent: #48

تسلم ان شاء الله يا جبريلا من كل بلى...ياخي أغنية رائعة...

Post: #50
Title: Re: مربع كاي
Author: ياسر نجيلة
Date: 12-11-2009, 08:15 AM
Parent: #49

مراحب بناس مربع كاي ...
فقط اليوم بدأت الحوامة بين البوستات ...

تسجيل حضور ومتابعة ...


محمد عيد يارائع ... الكل منتظر باقي "الاندياح"




نخاف على البوست الاساسي من " الانيميا "

Post: #51
Title: Re: مربع كاي
Author: الرشيد بابكر
Date: 12-11-2009, 08:23 AM
Parent: #50

Quote: نخاف على البوست الاساسي من " الانيميا "


ياسر نجيلة....بيتنا نور ...شرفتنا ياخي...

لا تخشى على البوست الأساسي فعدد الأعضاء اصبح كبير و لو تداخل كل الناس لوصلنا الصفحة مائة في أيام معدودات...لذلك وجود البوستات الجانبية تخفف على البوست الأساسي....

أتحفنا بالله بأشعارك الجميلة هنا...

Post: #52
Title: Re: مربع كاي
Author: عفاف علي ميرغني
Date: 12-11-2009, 09:56 AM
Parent: #51

صباح الخير في مربع كاي


في اول سنة وفي اول ايام انتظامنا بالكلية

جينا انا وهناء دفعتي من الصباح وكالعادة المربع يضج ضجيجا وبدينا السلام

ونحن لافين نسلم اذا باحد الزملاء يقول لينا عهدت على عدم مصافحة النساء

ونحن لسه مادين ادينا ونقول ليهو (اها00أها) وهو خايف يرجع مننا لوراء
ويردد عهدت على عدم مصافحة النساءولوما جاتنا النجدة من انتصار وداعة في لحظتها وفهمتنا
انه ما بيسلم 00 كان لهسه نكون فاتحين خشمنا ومنتظرينو يمد ايده00

هناء تلون وشها 00 وانا لمحت محمدالمرتضى بشناتو ميت من الضحك00





تعرف يا الرشيد كانت اول مرة في حياتي اعرف انو في ناس ما بيصافحو

حسب اعتقادي انو لما يجئ الصباح وتتفتح دنيا جديدة المفروض الناس تلاقي بعض بالاحضان

Post: #53
Title: Re: مربع كاي
Author: منصور عبد الرازق
Date: 12-11-2009, 02:05 PM
Parent: #52

اعجاب شديد بى قصة محمد عيد
انها اول حالة دخول مباشر الى اجواء كاى المربع
بامكان الجميع فعل ذلك
فلكل مربع (كايه)
مسارح الكليات مابين اللكاشر والسكاشن
تعرض هنا
جهزوا الكراسى

Post: #54
Title: Re: مربع كاي
Author: مبارك جادين
Date: 12-11-2009, 03:24 PM
Parent: #53

استقليتنا من موقف احمد حلمي بيجو
كانت اول مرة اركب ليك البيجو واعرف بعد زمن طويل ان هذا المكان يسمى احمد حلمي في القاهرة .البيجو تحرك بعد ان ركبنا طوالي كنت فيهو انا وصيقي محي الدين اسحاق الحسن راجل اجتماعي وزعيم من الدرجة الاولى يعني من اتلاقينا في المطار وبحثنا عن ناس الاتحاد الكانوا منتظرين فيالمطار حتى وصلنا الاستقبال بتاع الطلاب الجدد كان محي الدين هو قائد الركب يعني ناس مدني المفتحين ديلك ممكن يتكلم ويتونس معاك ويصاحبك في دقائق اولاد مدن وكدة( فيما بعد عرفت بعد ان سكنا سويا ومعنا السنابر عبد الحميد احمد المصطفى ود.سعيد ابرهيم هارون عرفت انه حفيد للاميرالاي شنان صاحب الانقلاب الشهير على نظام عبود) . ومعانا مولانا اسامة جادالله وابن عمه الشاعر الزقازيقي الفحل عبد الهادي وهم طبعا من ام سنط كما عرفت بعد داك اثناء التعارف .الاثنين يبدوا عليهم الطيبة الاتية من الريف .ومعنا صديقي امجد المرضي من الدويم طبعا راجل من الزمن داك بتاع امن غموض وحديث بسيط ولكن ابتسامة دائمة .هؤلاء هم من اتيت معهم من القاهرة وانحنا برالمة في مساء قاهري شتوي من العام 84 من القرن الماضي



دي بداية وصولي الزقازيق
ويا صاحب المربع شكرا على الدعوة ونواصل

Post: #55
Title: Re: مربع كاي
Author: مبارك جادين
Date: 12-11-2009, 03:43 PM
Parent: #54

القصة عجيبة يا محمد عيد
وانا من الخرطوم بسجل اشتادتي بهذا الاندياح الحر والذي ذكرنا بناس زراعة الجمييلين
يا ناس بسال وين الاخت قند البمن ؟؟؟؟

Post: #56
Title: Re: مربع كاي
Author: الرشيد بابكر
Date: 12-11-2009, 05:39 PM
Parent: #55

Quote: وانا لمحت محمدالمرتضى بشناتو ميت من الضحك00


الليلة يا فافي شيلي شيلتك...و لا محمد المرتضى ده يختك في قائمة الاغتيالات مع منصور...قال لي في التلفون من كم يوم كده والله أنا يدوني باسورد أبهدل ليك منصور بهدلة في البوست...منصور ده شال حسي ...

مره أنا ومحمد المرتضى و المرحوم ياسر الزين كنا بايتين عند ناس خالتي الله يرحمها في بري...صحينا الصباح أنا و ياسر و محمد المرتضى نايم...ياسر قام كشف وش محمد كان متغطي بي بطانية و قال أجري تعال شوف ده...جيت جاري..قلت ليهو في شنو....
قال لي عليك الله الزول ده أمه قبلته لمن ولدته...و الله أشك في كده...

Post: #57
Title: Re: مربع كاي
Author: الرشيد بابكر
Date: 12-11-2009, 05:51 PM
Parent: #56

Quote: دي بداية وصولي الزقازيق
ويا صاحب المربع شكرا على الدعوة ونواصل


شكرا ليك يا بركة يا جميل على الاندياح اللذيذ...مزيد من الاندياح....وواصل الكلام الجميل...

Post: #58
Title: Re: مربع كاي
Author: الرشيد بابكر
Date: 12-11-2009, 08:56 PM
Parent: #57

يا مفتونه بصدق الوعد
يا مسكونه بحلم الغد
انا خيرتك بين الشهد
وبين البّن الفطره
وانتي اخترتي سواد البّن
وطعم القهوة البكره
انا خيرتك
وانتي اخترتي
هل قدرتي الرقعه الواقعه
بين الليله واحلام بكره
وكيف حتملي الحته الواسعه
بين الواقع وبين الفكره؟
وين حتلقي المويه الناقعه
يوم نصطاد في المويه العكره
انا بديك موانع الصاقعه
انتي اديني الموت والستره
انا خيرتك
وانتي اخترتي
واقف جنبك لو احترتي
بايع نفسي وشاريكي
دافنك بيني مواريكي
واصلك مني اتاريكي
لو تعرفي يوم شاهدتك
من روحي بتدخلي في نفسي
باريتك خلسه وغازلتك
سمعتك وما سامع همسي
كضبت عيوني وصدقتك
غيبت احساسك في حسي
وناديتك
يا مطمنه في قلبي الخوف
بتونسي روحي وبتحجي
بترجعّي لعيوني الشوف
اتلوّمي دايما واحتجي
مشتاقلك جدا وملهوف
واقف في دربك مترجي
وحجيجك بي قلبي يطوف
جواي بتعمري وبتحجي
وانا جيتك
مكسور الخاطر
جيتك مجروح
ولقيتك مفضوح الصمت
الفي عيونك بالبوح
ممحوق الزمن البين ضحكك والنوح
سكنتك كل الانفاس الحيه
وسلمتك مفتاح الروح
لو تعرفي يوم هدهتك
في ليل بستجدي الغمضه
اقدامك كانت في الصحرا
وايديك في البحر بتتوضا
كم حائط ينهض بيناتنا
كم حائط من بينا اتهدّ
قاومت الرهبة وناديتك
والصوت من عندك ما ردّ
طاوعت الرغبه وغنيتك

غنيت للمراءه الورد

Post: #59
Title: Re: مربع كاي
Author: الرشيد بابكر
Date: 12-11-2009, 09:37 PM
Parent: #58

انتو عارفني بحب النكد آخر الليل و أقعد أتذكر الذين رحلوا عننا و تسيل دموعي و تصبح حالتي حاله...لكن هذه المره سوف أحكي لكم عن رجل كان له الدور الكبير في استقراري في السنة الأولى و تعلمت منة كرم الأخلاق قبل أن أتعلم منه كيف أعيش في مجتمع طلابي متعدد التوجهات الحزبية...أنه قريب الله حسن عشم الله...قريب يعرفة الناس من جيل قدورة و ربما منصور..و هو شخص يتفق عليه الكل..تربطني أيضا صلة قرابة به وهذا السبب وراء سكني معه في السنة الأولى لي و الأخيرة بالنسبة له...كان قريب الله لا يسكن مع أحد كان يسكن لوحدة دائما..و شقته قمة في النظافة والنظام...في السنة الأخيرة بدأ يشعر بأعراض غريبة فعرض نفسة على أطباء في القاهرة و طال التشخيص و البحث...و لكن شخص المرض أخيرا بأنه أحد أمراض الدم أو سرطان الدم ولكن في مراحلة الأولى ولا يحتاج الى أي نوع من أنواع المعالجة الكيميائية أو الأشعاغية...فأخذ يتناول أدوية باستمرار ويعرض نفسة بصورة دورية على طبيبه في القاهرة...تخرج قريب الله و سافر الى الامارات مباشرة و عمل بها...رغم ان أسرته كانت ميسورة الحال الا أنه فضل الذهاب حتى يلقى العناية الطبية التي تناسب حالته...عمل ببلدية دبي في قسم رقابة الآغذية و هو قسم يعمل على رقابة الجودة لكل المنتجات الغذلئية التي تصنع و تستورد الى دبي وكذلك كل المحلات التي تتعامل في المنتجات الغذائية...و العاملون في هذا القسم اذا لم يتحلوا بالأمانة و الأخلاق فانهم يكونون كابوسا على المتعاملون في المنتجات الغذائية....
توفي قريب الله بعد ذلك في الامارات بعد أن قضى فيها فترة ليست بالطويلة...
بعد عدة سنوات أتيت الى الامارات وجاء قريبي معاوية و عمل معاوية ببلدية دبي و في مجال قريب من المجال الذي كان يعمل به قريب الله و له دور رقابي أيضا على الصحة العامة للمحلات التجارية...كان معاوية يمر على سوق معين في دبي ويعرفة معظم الناس هناك باخلاقة العالية..في أحدى المرات سأله أحد التجار...يا أخ معاوية من أي مكان انت...قال له أليس واضحا من السودان طبعا..قال بل قصدت أي مدينة اي قرية..قال معاوية وهل تعرف قرى و مدن السودان...قال نعم هنالك أخ سوداني عرفني بهم...قال له معاوية أنا من الكوة وهي............و قبل أن يكمل معاوية احتضنه الرجل بقوة و أخذ يبكي و يقول له لقد عرفت ذلك...لقد عرفت ذلك...و معاوية يحاول أن يتخلص منه...و بعد أن هدأ الرجل قال لمعاوية...أنا سألتك لكرم أخلاقك و أحسيت أنك لا بد تكون علاقة برجل عظيم عمل هنا ببلدية دبي و كان لنا نعم الأخ والصديق و حمانا من المفسدين....

انه قريب الله حسن عشم الله...

Post: #60
Title: Re: مربع كاي
Author: عفاف علي ميرغني
Date: 12-11-2009, 09:47 PM
Parent: #58

من حاج الركز

يللا ياعيد واصل ،، مربع كاى غنى بالاحداث ،المواقف الطريفة

أنا ح أبدأ ليك من آخر شهور لينا فى المربع عندما حضرت لدور نوفمبر بمادة امراض نبات كنا مجموعة

شايلين المادة دى وكان عاطف القوز بيضخك علينا لانه جاء من السودان وقال عندهدور نوفمبر بمادة

الوراثةوهى مادة خفيفة ولما طلع جدول موعد الجلوس للامتحان لقى عنده مادتين امراض نبات ووراثة

انا ومجدى عبدالله قلنا ليهو يالقوز من يضحك اخيرا يضحك كثيرا.

بعد الانتهاء من الامتحانات بقينا نسجل حضور يومى فى مربع كاى لغاية ماوصلوا البرالمة

وصلت اول برلومة ومعاها زهرة ابوعلى وعرفتنا عليها وكان معاى صلاح على صالح ومحمد حسان وزاهد

وبدأنا التعارف المعهود ، بعدها اخدناها فى جولة بالكلية .

فى اليوم التانى وفى نفس المكان وصلت مجموعة اخرى وبرضوا تعرفنا عليهم ، ثم جاءت البرلومة بتاعة

امبارح وبعد الحديث قامت عزمتنى فى الكافتريا أنا ومحمد حسان وزاهد وبعد ماانتهينا وقضينا على كل

الاخضر واليابس همس محمد حسان فى أذنى وقال لى (الوصول لقلب الرجل عن طريق معدته)

(ولى عودة)

حاج الركز

Post: #61
Title: Re: مربع كاي
Author: الرشيد بابكر
Date: 12-11-2009, 10:27 PM
Parent: #60

حاج الركز يا حلو...لابس النضارة ولا لابس عيونك...

عليك الله أحكي ليناكيف كانت جرسة القوز لما اكتشف انه عنده مادة الأمراض و الوراثة بدل الوراثة بس...

أنا بجيكم لي قصة الناموسية مع عاطف القوز ودي على فكرة ما في الزقازيق دي بعد ما اتخرجنا من الزقازيق في ابوزمام..

طبعا وجهت الدعوة من قبل لكل الأخوان ويبدوا ناس زراعة عجبهم الاسم وسيطروا على الوضع...لكن و كما قلت من قبل انما هي مجرد تمسية و الغرض هو ركن للذكريات أينما كانت ركن للدردشة ..ركن للثقافة للفن و الرياضة...للشعر والقصة...ركن لكل شخص و لكل شئ...

سامي ...عصام دهب وعدتونا و ما جيتو راجعين...

Post: #62
Title: Re: مربع كاي
Author: عفاف علي ميرغني
Date: 13-11-2009, 09:07 AM
Parent: #61

Quote: الليلة يا فافي شيلي شيلتك...و لا محمد المرتضى ده يختك في قائمة الاغتيالات مع منصور



اقر واعترف ان محمد المرتضى سممممممح يشبه هاني سلامة









تخريمة000

عنده مقدرة عجيبة على اضحاك قلبك مهما كان الموود بتاعك

Post: #63
Title: Re: مربع كاي
Author: الرشيد بابكر
Date: 13-11-2009, 11:31 AM
Parent: #62

Quote: عنده مقدرة عجيبة على اضحاك قلبك مهما كان الموود بتاعك


فافي...

ظرفاء و ظريفات زراعة كثر...و لكن أظرفهم على الاطلاق...محمد المرتضى و عاطف القوز...فحيما تواجدوا فان الضحك مضمون...تتمنى أن تجتمع بهم كل يوم....و لهم طرائف كثيرة يحفظها ناس الزراعة عن ظهر قلب...و لا يحكي لك أي واحد من كلية الزراعة موقف طريف الا و كان بطله محمد أو عاطف...

عندما تخرجنا عملنا أنا و القوز...مالك..خالد..حنان...صفاء...أحمد صالح..هالة...و صفوت..بجمعية أبو زمام الزراعية..
كنا بالليل نركب الناموسيات لنفي أنفسنا شر الباعوض...قبل أن تغرب الشمس حتى لا يتسلل الباعوض الى داخل الناموسية اذا تم تركيب الناموسية بعد الغروب..في تلك الليلة و بعد صلاة العشاء أوينا الى أسرتنا و احتمينا بناموسياتنا و أخذنا نتجاذب الحديث حتى استسلمنا للنوم العميق بعد يوم متعب...ثم صحينا فجأة على أصوات غريبة حولنا و أجسام ضخمة تضرب في الأسرة و أعتقدنا أننا لا محالة هالكون...و لم يجرؤ أحد على فتح ناموسيتة الا أن الأخوان فتح الناموسية وقال بفر يا جماعة...فتحنا الناموسيات بعد ذلك ووجدنا عدد كبير من الأبقار و العجول تحيط بنابعد أن كسرت الزريبة القريبة مننا و هامت بالليل...

كلنا كنا منزعجين و قلقين...حتى أطلق عاطف القوز تعليقة الظريف كالعادة.........و قال..

و الله البلد دي دايرة ليها عاجولية..مش ناموسية..

Post: #64
Title: Re: مربع كاي
Author: زهير الزناتي
Date: 13-11-2009, 12:25 PM
Parent: #63

إخلاص في باب بيتكم هل من مؤرحب

يا جماعة الزولة دي لقيتها عند الجيران ... بهناك ،، وروها الدرب


بوست مبالغة ...

Post: #65
Title: Re: مربع كاي
Author: عفاف علي ميرغني
Date: 13-11-2009, 12:53 PM
Parent: #64

رشا يا رشا جمعتك طيبة مع ام امنيتك وهنودي وامنيتك


مرة ايام محمد المرتضى كان في الرياض

كانو مجتمعين عندنا محمد المرتضى وفايز حسن التوم وعاطف القوز

ومجدي عبد الله

قمت قلت اتجدع واظبط اللحمة الما خمج 00

اللحمة في النار ساعة حلفت ما تستوي

جاني عاطف في المطبخ قالي بطريقته الساخرة

جيبي لينا لحمة الاسد دي كفانا

Post: #66
Title: Re: مربع كاي
Author: الرشيد بابكر
Date: 13-11-2009, 01:07 PM
Parent: #65

Quote: جيبي لينا لحمة الاسد دي كفانا

فافي...ضحكتينا أنا و أم أمنية حتى بانت نواجذنا...و اهتزت كرشي براي...أضحكك الله و أسعد أيامك...

أختنا الفاضلة ابتسام مرغني تسكن في الخرطوم اتنين في بيوت الحكومة... بالقرب من شارع بيويو كوان ويعرف بشارع الخور...كان عاطف يسكن هناك مع أحد أقرباءه عندما يذهب الى الخرطوم وذلك عندما كنا نعمل معا في ابو زمام...فاتفقنا معه أن نقله من المنزل عند عودتنا الى المشروع ...فسألناه عن نقطة الالتقاء فقال لنا...تلقوني واقف عند تقاطع بيو يو كوان مع ابتسام ميرغني...

Post: #67
Title: Re: مربع كاي
Author: الرشيد بابكر
Date: 13-11-2009, 02:21 PM
Parent: #66

أود أن ارحب ترحيبا خاصا بالأخت و الصديقة الصدوقة اخلاص محمد أحمد...و اخلاص لمن لا يعرفونها من أجدع السودانيات اللاتي مررن على كلية الزراعة ان لم تكن على رأسهم لما تملكه من صفات تؤهلها لذلك..جمعنا سكشن واحد بالسنة الأولى و الثانية...فوجدت نفسي أتعامل معها بسهولة ويسر و شفافية وصدق...و هي التي تجبرك بأدبها و ذوقها على ذلك...
سعدت كثيرا بانضمام اخلاص للمنبر...فهي لا شك اضافة متميزة و علامة فارقة و سوف تثري البوست بثقافتها العالية ان شاء الله...بس تصلح طباعتها العربي بعد عاشت أمدا طويلا في بلاد الخواجات...

مرحبا اخلاص...

Post: #68
Title: Re: مربع كاي
Author: Elsuhaili Magzoub
Date: 13-11-2009, 05:20 PM
Parent: #67



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">




To ALL WITH LOVE


Post: #69
Title: Re: مربع كاي
Author: Hatim Gubara
Date: 13-11-2009, 07:07 PM
Parent: #68

مرور سريع وسلام عابر زي أيام زمان جارين نحصل السكشن..

تحياتي عبركم للأخ مجدي عبدالله..
تزاملنا في العمارات المتوسطه..
وأكيد لايذكرني لأني زميل محمد أخوه..
ولطالما انتشرنا في منزلهم العامر في العمارات بحجه الأستذكار..
التحيه عبره لمحمد وكل الأهل..

Post: #70
Title: Re: مربع كاي
Author: الرشيد بابكر
Date: 13-11-2009, 09:43 PM
Parent: #69



أمنية و مهند يلقون بالقصاصات الملونة على رأس ابوهم الذي لم يشيب بعد...أتاري 24 سنة دي كتيرة كدة

Post: #71
Title: Re: مربع كاي
Author: الرشيد بابكر
Date: 13-11-2009, 09:50 PM
Parent: #70

http://www.sudaneseonline.com/uploadpic/Nov09upload/Birthday3.jpg

مزيد من القصاصات الملونة والمفرقعات...غايتو قطعو قلبي بالمفرقعات دي

Post: #72
Title: Re: مربع كاي
Author: الرشيد بابكر
Date: 13-11-2009, 10:02 PM
Parent: #71



تورتة الحفل ...واضح من شكلها و لونها منو القام باختيارة...أمنية و أم أمنية...

سألني مهند مغيوظا يا بابا انت التورتة دي عجبتك...و لا كنت عايز واحدة تانية...قلت ليهو كنت واحدة تانية...قال لي تكون شنو...و حتى ينبسط قلت ليهو تكون تورتة BEN 10 فانشرحت أساريره...

Post: #73
Title: Re: مربع كاي
Author: الرشيد بابكر
Date: 13-11-2009, 10:05 PM
Parent: #72




هذه الصورة...و التعليق بالأعلى...

Post: #74
Title: Re: مربع كاي
Author: الرشيد بابكر
Date: 13-11-2009, 10:15 PM
Parent: #73



استراحة محارب...

Post: #75
Title: Re: مربع كاي
Author: عفاف علي ميرغني
Date: 13-11-2009, 11:38 PM
Parent: #74

untitled4.bmp Hosting at Sudaneseonline.com



كل سنة وقلبك اخضر

وعمر طويل يارب

ويخلي ليك افراحك الحلوة(مهند وامنية)

والرقيقة ام امنيتك

Post: #76
Title: Re: مربع كاي
Author: Hatim Gubara
Date: 13-11-2009, 11:39 PM
Parent: #74

وجيه.. والله.. (بعين بارده)

Post: #77
Title: Re: مربع كاي
Author: زهير الزناتي
Date: 14-11-2009, 01:56 AM
Parent: #76

الرشيد يا رائع ,,, تستحق أن يحتفل بك كل الكون ... كل الناس .. تفرح ليك وتبارك ليك .. عيد ميلاد سعيد , وكل سنة وإنت طيب .. عمر مديد .... صحة حديد ... حب شديد ... ومال عديد ,,, ...

Post: #78
Title: Re: مربع كاي
Author: عبد القادر بابكر
Date: 14-11-2009, 06:01 AM
Parent: #77

Quote: ...أتاري 24 سنة دي كتيرة كدة


ما عندك عوجة يا وجيه .. (( أنا صدقت والله .. ))
عيد ميلاد سعيد وعمر مديد .. ربنا يخلي ليك العيال وأمهم ويبارك ليك فيهم
ويخليك ليهم ..

عقبال تطفي الشمعة المية ...

Post: #79
Title: Re: مربع كاي
Author: عفاف علي ميرغني
Date: 14-11-2009, 11:02 AM
Parent: #78

sudansudansudansudansudan2.bmp Hosting at Sudaneseonline.com



اخلاص انا جيت قبالك جارية

فرشت ليك مربع كاي ورد

بس جيبي الزميلات الجميلات المعاك ديل

وابداوا اتصفحوا في كتاب اجمل الازمنة

Post: #80
Title: Re: مربع كاي
Author: الرشيد بابكر
Date: 14-11-2009, 02:30 PM
Parent: #79

Quote: كل سنة وقلبك اخضر

وعمر طويل يارب

ويخلي ليك افراحك الحلوة(مهند وامنية)

والرقيقة ام امنيتك


تسلمي يا باسقة...ربنا يخليك و يخلي ليك الزول الحبيب الجميل و الجيفارات ويحفظكم بحفظه..

Quote: وجيه.. والله.. (بعين بارده)


تسلم يا حاتم...ما قلنا 24 ما صدقت..نزلنا ليك الصور عشان تآمن..

Quote: الرشيد يا رائع ,,, تستحق أن يحتفل بك كل الكون ... كل الناس .. تفرح ليك وتبارك ليك .. عيد ميلاد سعيد , وكل سنة وإنت طيب .. عمر مديد .... صحة حديد ... حب شديد ... ومال عديد ,,, ...


أبو الزوز يا صديقي..عندما تحتفلون أنتم بي فكأنما احتفل بي كل الكون...

Quote: ما عندك عوجة يا وجيه .. (( أنا صدقت والله .. ))
عيد ميلاد سعيد وعمر مديد .. ربنا يخلي ليك العيال وأمهم ويبارك ليك فيهم
ويخليك ليهم ..

عقبال تطفي الشمعة المية ...


قدورة الحبيب...شكرا يا وجية...ربنا يخليك و يخلي ليك عيالك ان شاء الله...

Post: #81
Title: Re: مربع كاي
Author: الرشيد بابكر
Date: 14-11-2009, 02:34 PM
Parent: #80

Quote: اخلاص انا جيت قبالك جارية

فرشت ليك مربع كاي ورد

بس جيبي الزميلات الجميلات المعاك ديل

وابداوا اتصفحوا في كتاب اجمل الازمنة


يا سلام عليك يا فافي...أصغرنا و أكبرنا في نفس الوقت...دائما سباقة...

Post: #82
Title: Re: مربع كاي
Author: محمد عيد
Date: 14-11-2009, 03:27 PM
Parent: #81

تســـخينة على خط التماس ...

وين صوت الجمهور والمشجعين ؟؟


sudansudansudansudansudan47.jpg Hosting at Sudaneseonline.com

Post: #83
Title: Re: مربع كاي
Author: الرشيد بابكر
Date: 14-11-2009, 03:55 PM
Parent: #82

يا سلام يا محمد عيد....لقد تأخرت علينا كثيرا...لكن أن تأتي متأخرا خيرا من أن لا تاتي....

وااااااااااااااو ....صوت جمهور

Post: #84
Title: Re: مربع كاي
Author: عفاف علي ميرغني
Date: 14-11-2009, 08:57 PM
Parent: #83

scan12.jpg Hosting at Sudaneseonline.com



يا رشا مساءات نديات

قلنا ننشط الزاكرة من مدرج تجارة

Post: #85
Title: Re: مربع كاي
Author: الرشيد بابكر
Date: 14-11-2009, 09:13 PM
Parent: #84

فافي...لو تعرفي شنو البحصلي لما الليل يفلل...بردد آهة و أعقب آهة...خصوصا لما أكون بعيد عن أمنية و مهند و أمهم...

الصورة عرفت فيها...التي انسربت الى مسارب الروح عندما وجدت باب الروح مشرعا...ياسمين...الراحلة رابعة..مامون مهاجر وهو معنا هنا بالامارات...عبدالرحمن...و قيس..و الذي يشع نوره من الصف الأخير هو حاج الركز..

Post: #86
Title: Re: مربع كاي
Author: عفاف علي ميرغني
Date: 14-11-2009, 09:26 PM
Parent: #85

Quote: الصورة عرفت فيها...التي انسربت الى مسارب الروح عندما وجدت باب الروح مشرعا...ياسمين...الراحلة رابعة..مامون مهاجر وهو معنا هنا بالامارات...عبدالرحمن...و قيس..و الذي يشع نوره من الصف الأخير هو حاج الركز..




صحي الليل يخليك ططشش

ننتظرك للصباح
وكلك نظر

Post: #87
Title: Re: مربع كاي
Author: الرشيد بابكر
Date: 14-11-2009, 09:59 PM
Parent: #86

Quote: صحي الليل يخليك ططشش

ننتظرك للصباح
وكلك نظر


فافي...مطششين بالليل و النهار...

أضفت ابو بكر الصديق بعد جهد جهيد...كده كم من عشرة؟؟؟

Post: #88
Title: Re: مربع كاي
Author: محمد عيد
Date: 14-11-2009, 10:33 PM
Parent: #87

غايتو انا زدت عليك بى عشوش وعبد السلام العارف

او كم خيل الى ّ

السؤال : شنو القعـــّد حاج الركز للوقت داك هناك ؟؟!!

Post: #89
Title: Re: مربع كاي
Author: محمد عيد
Date: 15-11-2009, 03:31 PM
Parent: #88

sudansudansudansudansudan52.jpg Hosting at Sudaneseonline.com




هجرة الشموس
###############

كل شىء مصطبغ بوجه السقم
احدق فى الفراغات ...
صامت النغم..
متجاوز اللحظات .. منداحا فى الوهم ..!
متوغلا فى ظلمات ..مصلوبا على الالم ..!
لوحة للاحزان ، رسمتها..كالحة بدمى ..
لحظات تناثرت .. ابحرت لمرافىء العدم ..!
&&&& &&&&&&&& &&&&
ألا ترى نجومنا ..
فى دربها للافول ..!؟
وبعد هذا لازلت تسألنى الصباح ..؟!
فكيف لشمس ان تسطع من خلف سحب كلها جراح ..؟
فى كل الاتجاهات ليل يطغى .. لاينزاح ..
لكننا يوما سنحاول الرحيل ..
لمشارق الشموس..لمدائن الصباح .
.
&&&&&&&&&&&&&&&&

محمد حسان سعد الدين

Post: #90
Title: Re: مربع كاي
Author: محمد عيد
Date: 15-11-2009, 03:37 PM
Parent: #89

المشــهد الأخيـــر

حياء .. تأتلف النجوم
وباضاءة الانوار ..
.تختتم المشاهد كل يوم
حتما ستضاء الانوار
فى الركن
الهادىء فينا
ستذوب البسمة فينا
نتجاذب بعض الصمت
لكى نختم
ونفترق ..وكلانا ..يترنم .. يترنم
نردد...
نبضنا ..صوتنا .. حلمنا
.... اضاف لروحى بعض الصور
اشاع علينا الشعور
بينى وبينك ..
ازدواجات الرؤى والمساحة والمصير المسافة
والمستحيل
والصمت جاء مؤخرا" ..
ضيّعه الفؤاد بما يضجّ
وحيرة القلب الذليل
بينى وبينك ..
كانت الاحداث تنتهك
نسجت ببعض عقلى
وكل اخيلتى وشكّى
أنت الملك المفدى ..
وأنت منى تاج عرشى
فوق رأسى يتجلى
بل انت سلطنتى وملكى
لكننى..ادركت فيك الشك شكّى
فمزجت بين الصمت فى قلبى الذليل
بازدواجات الرؤى
وعرفت ان المستحيل ..لمستحيل
لكننى ..
رددت يوما بعد يوم
دوما عند اكتمال البدر
بلا الجميل ..
سنى يشع كسحر الدرر ..
خشينا ضياع الجمال الاخير
فدفناه يوما بضوء القمر..![/
green]

الرشيد بابكر

Post: #91
Title: Re: مربع كاي
Author: محمد عيد
Date: 15-11-2009, 03:43 PM
Parent: #90

اطلالة على ذكريات باقية


وكانت محاولة يائسة منى للوقوف على حقيقة العلاقة الغريبة بين الذكرى والالم مستلهما اياها فى دواخل النفس المتألمة بالذكرى ..كما أن للذكرى احيانا شروقا فى صدورنا ..وبين هذه وتلك تكون اطلالتنا على ذلك الظلام الذى اذبل وردتنا وأمات فجر الكلمة فينا والانسان ..فنتهاوى فى هيام لنرددتلك العبارة ونحن فى عربة الذكرى ..
وتلك ايام..
فما أقسى ان يتعذب المرء .. ولا يستطيع حتى ان يئن ..! وما أفظع ان يئن ولا يسمعه أحد ..فيصبح خائضا فى بحر حزنه التى لا ترحم تلاطم امواجه ،فيندثر الانسان فى كهوف الضياع .. وتلك مأساة ..
فيبقى وحيدا بين اطلال الذكريات ..والبحيرة والصحراء باقيتان فى ذلك المكان من الانسان ..والانسان .. وهذه الصخرة .. فالشروق غروب ..الفرح مأساة والكلمة .. الخيال سراب مصطبغ بلون الدم ..! الانسان يحتضر والحياة صحراء .. ليستحيل المكان الى زمان .. وهذه خاتمة المطاف ..عندها يبقى ذلك الصوت فى صداه مرددا .. عندما يعايش الانسان الجميل تستحيل اتعس الأمكنة الى جنان
..!وحين نفتقده تصبح كل مباهج الحياة ..شيئا كريما .. وموحشا..لتغدو الذكريات ..الانسان الحزين .. الرمال قرب البحيرة .. وهذه الصخرة .. .. وتلك أيام

صدر الدين

Post: #92
Title: Re: مربع كاي
Author: محمد عيد
Date: 15-11-2009, 03:46 PM
Parent: #91

رجع الصدى
#########


[green
].. وظلت آخر الكلمات محفورة فى غياهب الذاكرة ..واوتارها ترن فى دواخلى الكلمى ..وأنين الصدى يصر على ارجاعها ..!
كيف كان مولد القصيدة..؟! .. حقا لا أدرى كيف وأين ومتى !!.. ولكن ما أعرفه اننى أحسست نموا يتراقص فى حنايا فؤادى وكأنه جنين يتحرك فى أحشاء امه ..حاولت ان اتناساه ..فلعله بعض أنغام تداعب آلامى ..! ولكنه ازداد نموا .. وأخذ يؤرقنى ويضجع منامى ..!! وأصبحت أتلذذ بعذاباته ولا اقاومها ..!
سألته ذات يوم من أنت .. ومن أين أتيت ..؟ .. ضحك ساخرا وترددت أصداء ضحكاته فى دواخلى حتى ظننته وهما يتلذذ بعذابى .. وطفقت افكر فى حالى وقد أصبحت ملاذا لكل هازل .. ولكنه استدرك فى جدية .. يبدو أنك يا عزيزى لم ترتو بعد من الرحيق الذى داومت على اسقاءك ..! يا عزيزى انما أنا رسالة تنقل صامتة ..أثيرها الدم ..فحواها تنقله ذبذبات تترجمها خفقات القلب ..فهى تنتقل من القلب واليه .. أجبته وقد صغرت فاهى ..كيف؟.. اننى لم أفهم ..! أجاب .. هو قلب قلب قسمته الطبيعة الى نصفين والمهارة فيمن يجمعهما ليلتئما من جديد ..!
آه ..فهمت .. اذن سأقبل الرهان .. وسيلتئم قلبى ويزهو باكتماله بدرا .. فتعال يا نصفى .. تعال لنجمع أصداف اللقاء ..ونرصها فى عقد احلامنا ليشع بسناه فى غياهب الظلام .. اقبل فالظلام سينقشع وسنجعل الصبح مولدنا ..اقبل ولا تخف فالنور موعدنا والاحلام لقيانا ..
ولكن كلماتى ضاعت فى البعيد ....واعادها الصدى بخفىّ حنين ..!!


محمد عيد

Post: #93
Title: Re: مربع كاي
Author: محمد عيد
Date: 15-11-2009, 04:02 PM
Parent: #92

0393.jpg Hosting at Sudaneseonline.com



اذا اعطيت السائل سمكة ..
فقد اطعمته اليوم ..
اما اذا علمته الصيد ..
فقد اطعمته العمر كله ..![/
center]

Post: #94
Title: Re: مربع كاي
Author: الرشيد بابكر
Date: 15-11-2009, 06:08 PM
Parent: #93

حمادة يا جميل لقد حركت فينا كامنا وأثرت شجونا...

قلت يا ربي القصيدة دي حقت منو لحدي ما لقيت اسمي تحت...استغربت قلت دي أنا كتبتها بتين ووين...يا سلام يا محمد عيد حاجة عجيبة ياخي...أتاري زمن طويل ياخي قد مر علينا لدرجة ان الواحد لم يتعرف على عيالة ويتغابى فيهم العرفة...القصيدة دي بالذات قدر ما حاولت ما قدرت أتذكر...سبحان الله...

شكرا يا حمادة على التوثيق الجميل...طبعا زوبة تلح علينا باصدار اطلالة جديدة و برؤى جديدة من كتاباتنا الجديدة...فما رأيك...

Post: #95
Title: Re: مربع كاي
Author: الرشيد بابكر
Date: 15-11-2009, 09:38 PM
Parent: #94



صورة جميلة تجمع عدد من الأعزاء...و الراحلة نوال.....هدية لهم جميعا...

Post: #96
Title: Re: مربع كاي
Author: الرشيد بابكر
Date: 15-11-2009, 10:14 PM
Parent: #95

كنت من ضمن فريق للانذار المبكر التابع لمفوضية الاغاثة و اعادة التعمير بالسودان...و كنا نغطي ما يعرف بالاقليم الأوسط وقتها..وكان اقليما واسعا شاسعا ممتدا الأمر الذي أضفى متعة حقيقة لعملنا...فتجولنا في أرجاء الاقليم و غطينا معظم المناطق المتأثرة بمشاكل نقص الغذاء و الخدمات الصحية...
انتقلنا بعد جولة طويلة الى سنار لتغطية المجالس الريفية التابعة لها...و سنار مدينة لذيذة تشبة غالب مدن السودان الأوسط في شكل بيوتها و شوارعها وطيبة أهلها...سوقها و مطاعمها الشعبية...
تم وضعنا بمعسكر تابع للقوات المسلحة...سلاح المدفعية على ما أذكر...كان السكن آمن جدا و هادئ جدا خاصة بالليل..لكن به مشكلة واحدة ألا وهي امكانية الخروج ليلا..للذهاب للسوق أو لزيارة اي معارف في سنار..فانه من الضروري أن تكون ملما بكلمة السر للدخول الى المعسكر عبر الحرس الذي يحرس بوابة المعسكر...
كنت ولا زلت مرضان كورة...و كان الهلال يلعب وقتها في مجموعة مدني...كنت أركب الحافلة من سنار أحضر المباراة في مدني و أعود في نفس الحافلة مرة أخرى الى سنار...
كانت هنالك مباراة مهمة بين الهلال و أحد فرق المجموعة...بعد نهاية العمل أخبرت الزملاء بأنني ذاهب الى مدني لحضور المباراة...ذهبت الى موقف الحافلات ووجدت مناديا ينادي...مدني ...مدني...الماشي الكورة و جاي راجع...يالله...يالله...باقي مقعدين بس...جريت نحو الحافلة وأخذت مكاني..ثم دفعت الأجرة كاملة ذهابا و ايابا..وصلنا الى مدني و حدد لنا سائق الحافلة أين نلتقي بعد المباراة..ثم الى داخل استاد مدني...حدثت أحداث كثيرة في المباراة ولكني لست بصددها الآن...لكن أهم حدث..ان الهلال لم يخذلني كعادته في تلك الفترة و فاز بتلك المباراة ...و رجعت منتشيا الى مكان الحافلة و ركبت الحافلة عائدا الى سنار...
وصلنا الى سنار ونزلني سائق الحافلة مشكورا قريبا من معسكر الجيش...مشيت في ليل مظلم تكاد لا ترى يدك من شدة ظلمته...و لكن رغم ذلك مشيت واثق الخطوة أمشي ملكا وتقدمت بثقة نحو البوابة لأنطق بكلمة السر التي حفظتهاعن ظهر قلب قبل توجهي الى مدني...
مشيت بتؤدة و تروي أتحسس الأشياء حولي حتى وصلت تماما أمام البوابة...فاذا به أرى العساكر الموجودين بالبوابة يوجهون بنادقهم نحوي مع أصوات تعمير للبنادق...و صرخ في أحدهم...ثـــــــــــــابت
ارتعدت فرائصي و تجمد الدم في عروقي و اشرأب شعر رأسي و أصبحت أسمع صوت دقات قلبي و هي تدق بعنف في أذني...و بحثت عن كلمة السر فلم أجدها...ساري الليل...لا..لا...ما ساري الليل...كاب الجداد...لا...لا...
زادت دقات قلبي عنفا و أصابني مغص في بطني...و لا أستطيع أن أجزم بأنني لم أفعل شيئا آخر...مثل خروج أي سوائل من أي مكان...
فطن العساكر لربكتي فنادوني بضحكة أراحتني قليلا...انت يا زول بتاع الاغاثة...وقعت لي في جرح...ايوة...ايوة ...ايوة أنا...نسيت كلمة السر ولا شنو...نسيت اسمي ذاتو مش كلمة السر...يالله ...يالله..اتفضل...
أرتحت وتفقدت بنطالي.....

ناشف يا شمشارين....

Post: #97
Title: Re: مربع كاي
Author: محمد عيد
Date: 16-11-2009, 07:54 AM
Parent: #96

Quote: طبعا زوبة تلح علينا باصدار اطلالة جديدة و برؤى جديدة من كتاباتنا الجديدة...فما رأيك...


بالفعل اطلعت على دعوة زوبة ( رئيس رابطة مشجعى الاطلاله ) فى الزمن الجميل .. واقوم

بالتنسيق مع حسان وصدر الدين .. وارجو ان تتولى انت - باعتبارك كبيرنا الذى علمنا - دعوة

واقناع الكوتش ونجيلة ومن لف لفهم من مبدعى البوست .

Post: #98
Title: Re: مربع كاي
Author: الرشيد بابكر
Date: 16-11-2009, 12:13 PM
Parent: #97

Quote: واقناع الكوتش ونجيلة ومن لف لفهم من مبدعى البوست .


حاضرين يا محمد...ديل اقناعهم ساهل.... المهم هل هنالك أفكار معينة عن شكل الاصدراة و هل ستكون شهرية اسبوعية أو نصف شهرية...و هكذا أمور..

Post: #99
Title: Re: مربع كاي
Author: محمد عيد
Date: 16-11-2009, 01:13 PM
Parent: #98

Quote: المهم هل هنالك أفكار معينة عن شكل الاصدراة و هل ستكون شهرية اسبوعية أو نصف شهرية...و هكذا أمور..


انا شايف نسمع أراء الكل ..

وخذ رأيى ..


ارى ان تكون مبدئيا نصف شهرية .. على ان ترسل المواد بالبريد الالكترونى

يوم الخميس مثلا .. ليتم تنظيمها فنيا فى عطلة نهاية الاسبوع

وتصدر يوم السبت مثلا فى ثوب جديد .. يكون متلائم مع القاعدة الاسفيرية

يعنى مثلا ممكن تكون على شكل ملف power point بس الواحد محتاج لتأكيد

من بكرى بامكانية تنزيله .. وحأشوف الموضوع ده مع زهير


Post: #100
Title: Re: مربع كاي
Author: الرشيد بابكر
Date: 16-11-2009, 01:23 PM
Parent: #99

كلام جميل و كلام معقول مقدرش اقول حاجه عنه...طيب أنا سأقوم بالتحدث مع ياسر نجيلة و الكوتش و نشوف رأيهم ان شاء الله...

انت البوست في المنبر العام نايم مالو...و عدد المتداخلين و المتاوقين كذلك قليل جدا...

Post: #101
Title: Re: مربع كاي
Author: محمد عيد
Date: 16-11-2009, 01:39 PM
Parent: #100

يا ريت كده وكمان مريحيننا ..!!

امبارح فى اتنين بيض كده غايتو ما خلوا لينا جهة نرقد عليها

ومنزلين بوست مخصوص كمان ..

بعد ما انفعلت وقربت اعمل زى سامى ..

رخوا الحبل وقالوا بيهظروا !!!

لكن انا شايف انو ايقاع بوست المنبر العام كويس كده

يعنى هو مهم يكون موجود دائما وبس .. لكن الاهم التركيز على

البوستات الداخلية .. لأنو بخلاف الاحساس بالكيونينية والذاتية

المواضيع فيهو موجهة ومركزة يعنى النقاش والتحاور غالبا بيكون فى صميم الموضوعات

وبيريحنا شوية من مسائل الشــوت الضفارى !!

Post: #102
Title: Re: مربع كاي
Author: الرشيد بابكر
Date: 16-11-2009, 06:04 PM
Parent: #101

يا حمادة ان مثل هؤلاء لا أهتم بهم كثيرا و بمهاتراتهم...فأنا عندما آتي الى المنبر آتي لقضاء وقت طيب و ليس لحرق أعصابي..لذلك تجدني لا ابدي أي اهتمام بهم و لا أشارك بالرد عليهم...يكفينا أن نعلم من نحن و لا يهمني كثيرا أن يعلم الآخرون من نحن...و قالوا أهلنا (العارف عزه مستريح)...

سيبك منهم وخلينا نعمر المنبر من الداخل بما يفيدنا و يرفه عنا أيضا...و قد فتحت هذا البوست خصيصا لهذا الغرض...و لكني ربما لم أكن موفقا في اختيار الاسم..فلقد بدا و كأن البوست خاص بناس زراعة و هو ليس كذلك..فهو بوست لكل الناس...و قلت تعالوا دردشوا و أشعروا و غنوا و أعمل كل حاجة ترجعكم للزمن الجميل و تعيشكم في زمن أجمل...

اختار لينا كده أغنية ننزله ليك تبرد ليك أعصابك شوية و بعدين نكمل النقاش حول الاطلالة..

Post: #103
Title: Re: مربع كاي
Author: الرشيد بابكر
Date: 16-11-2009, 06:25 PM
Parent: #102



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">



لو أعيش زول ليه قيمه

كلمات / قاسم الحاج

لو اعيش زول ليهو قيمة اسعد الناس بوجودي

زي نضارة غصن طيب كل يوم يخضر عودي

ابقي دار لكل لاجئ او حنان جوه الملاجئ

ابقي للاطفال حكاية حلوة ضمن الاحاجي

بيها يتهنو وينمو واحرسهم طول ليلي ساجي

والقي في راحة نفوسهم بسمتي وطول ابتهاجي

لو اعيش طول عمري نسمة لو مع الايام سحابه

اهطل ادي الدنيا بسمة اوري وادي واسقي غابة

لو اعلم طفل واعد لسه ماعرف الكتابة

ببقى شجرة ظلالها ورافة تحتي نايمين ناس تعابة

اشقي والقي وابقي بهجة في النفوس لكل مناضل

ابقي لمعتل علاج وابقي للفلاح سنابل

ابقي للثوار سلاح اعتي من قذف القنابل

وابقي للكداح الملوح كل حد موفور وعادل


Post: #104
Title: Re: مربع كاي
Author: محمد صديق
Date: 16-11-2009, 07:31 PM
Parent: #103

سلامات يا ناس

Quote: فلقد بدا و كأن البوست خاص بناس زراعة و هو ليس كذلك..فهو بوست لكل الناس...و قلت تعالوا دردشوا و أشعروا و غنوا و أعمل كل حاجة ترجعكم للزمن الجميل و تعيشكم في زمن أجمل...


الحبيب الرشيد...سلام

انت صاح فى الحالتين فقد يبدو كذلك ولكنه ليس كذلك بالفعل فهو للجميع والدليل

على ذلك وصوله للصفحة الثانية.

بلا تعالوا كلكم.

Post: #105
Title: Re: مربع كاي
Author: الرشيد بابكر
Date: 16-11-2009, 07:39 PM
Parent: #104

شكرا يا كوتش...عرفت أنك كنت خارج الخرطوم...أرجو أن يكون لخير...

نفكر في عمل اصدارة أدبية كالتي كنا نصدرها في الكلية و نريد منك مساهماتك القيمة و الجميلة..نرسلها لمحمد عيد و الذي سيقوم بدوره باخراجها بصورة جيدة و جميلة و من ثم اعادة نشرها هنا...فما رأيك؟؟؟

Post: #106
Title: Re: مربع كاي
Author: محمد صديق
Date: 16-11-2009, 08:00 PM
Parent: #105

سلامات يا ناس

خارج الخرطوم..خير ان شاء الله.

Quote: نفكر في عمل اصدارة أدبية كالتي كنا نصدرها في الكلية و نريد منك مساهماتك القيمة و الجميلة..نرسلها لمحمد عيد و الذي سيقوم بدوره باخراجها بصورة جيدة و جميلة و من ثم اعادة نشرها هنا...فما رأيك؟؟؟


فكرة جميلة ولا مانع لدىّ.

Post: #107
Title: Re: مربع كاي
Author: محمد عيد
Date: 16-11-2009, 08:22 PM
Parent: #106

رشا والكوتش ...

ميرسى أوى على التجاوب الجميل ...

اقترح ان يصدر العدد الاول مع اطلالة عيد الاضحى المبارك ...

ارجو متابعة استقطاب مزيد من المبدعين ...

وارسال المساهمات لى على الفور

والدعوة لجميع اعضاء البوست للمشاركة وارسال مساهماتهم على الايميل

[email protected]

ونطمئن الجميع بعدم وجود ورش للسمكرة هنا والكل يشارك بانفعالاته الطبيعية

Post: #108
Title: Re: مربع كاي
Author: الرشيد بابكر
Date: 16-11-2009, 08:27 PM
Parent: #106

Quote: فكرة جميلة ولا مانع لدىّ.




هذا ما توقعته يا كوتش...علينا الآن دعوة ياسر نجيلة للانضمام ثم نحدد متى نرسل المساهمات لمحمد عيد ليقوم باخراجها...

Post: #109
Title: Re: مربع كاي
Author: الرشيد بابكر
Date: 16-11-2009, 09:46 PM
Parent: #108

هذه هي قصة حاج اللمين التي دار حولها حديث كتير...أخضعت للسمكرة ولكني لم أجد نفسي مرتاحا أو متوافقا نفسيا مع السمكرة...أحدثت عليها بعض التعديلات التي اقترحها الأخوان محمد صديق و زهير الزناتي بالقدر الذي أحسست أنه يتلائم مع القصة...و ما زلت أشعر بأنها ليست على ما يرام...و لكنني قررت نشرها بدلا من وادها...و انزلها هنا للمناقشة و الفائدة العامة ولا تتحرجوا من ذلك افادكم الله..

حاج اللمين


حاج اللمين شيخ سبعيني نحيل الجسم أبيض اللحية تبرز عروقه من ساعدية و كفيه خشنتين نتيجة عمله الطويل لقرابة الأربعين عاما في الحياة البرية...تنقل خلالها في كل أرجاء السودان شرقه وغربة وجنوبة..عمل في حظيرة الدندر الشهيرة و في الأنقسنا و في جنوب السودان..ثم استقر به المطاف في حدائق الحيوان بالخرطوم بعد أن بلغ من العمر عتيا و أصبح غير قادر على التنقل مثلما كان في شبابة..عمله هذا أكسبة معرفة كبيرة بالحيوانات و الطيور اكتسبها و هو يجول مع أفراد فرقتة يحاربون الصيد الجائر للحيوانات...كما أكسبه عملة هذا الانضباط و النظام...
كان يبدأ يومه باكرا مع صلاة الفجر قبل أن يقهر ضوء الفجر ظلام الليل وينتهي بعد عشرة ضمنه مع أصدقاءه من بعد صلاة العشاء في الحي الشعبي الذي استطاع أن يبني فيه بيتا له و لعائلته المكونة من زوجته حاجه النعمة وأربعة من البنين و ثلاثة من البنات..كلهم تزوجوا و استقلوا ببيوتهم الا خضر الذي تخرج من الجامعة و ما زال يبحث عن عمل...
أحيل حاج اللمين للمعاش فحزن لذلك كثيرا و كان يقول انه عندما استلم خطاب احالته للمعاش (و الله كنت زي المحكوم عليه بالشنق يجي واحد يقرأ ليه الحكم و بعدين يسحبو الخشبة التحت رجلينو فيكون معلق بين السماء و الأرض..حسة أنا زي المعلق على حبل المعاش ده...لا طايل سماء و لا لاحق أرض)...
بالاضافة الى المعرفة و الانضباط الذان اكتسبهما حاج اللمين من عمله..كان اجتماعايا وله روح حلوة و ظرف عرف به في الحي..و كانت لتعليقاته الساخره و حس الفكاهة عنده أثر طيب عند سكان الحي...فلقد اعتاد أن يعود ليشرب شاي الصباح مع حاجه النعمة بعد تسلل أول ضوء للشمس عائدا من المسجد القريب و هو يردد أورادة التي حفظها عن ظهر قلب..يجلس و رفيقة عمرة حاجة النعمة ملاطفا و مناقرا..كانت الحاجه تبره أحيانا ببعض اللقيمات مع الشاي...فيستحسن ذلك ولكنها لا تنجو من دعاباته ايضا..ثم يغفو قليلا قبل أن يصحو ليصلي الضحى ثم يطلب من خضر أن يخرج له الكرسي تحت ظل الشجرات أمام المنزل قبل أن يخرج خضر في تجوالة اليومي باحثا عن العمل...فيخرج الى الشارع متأبطا الراديو و مثبتا المؤشر على اذاعة أم درمان ليسمع الأخبار و أغنيات الحقيبة التي يعشقها...يداعب المارة من نساء و أطفال و شباب..و ينادي الشباب بأسماء الحيوانات..
يا مرفعين الخلاء..تعال جيب لي تمباك من دكان حسن...يا الأسد النتر تعال خش جوه خلي الحاجه تعمل لي شاي...الكل يستجيب لطلباته الا أحمد ولد شيخ التوم الذي كان دائما في عجلة من أمرة...فكلما ينادية حاج اللمين تعال يا النمر جيب...و قبل أن يكمل الحاج جملته يقاطعة أحمد و الله أنا مستعجل أتاخرت على الجامعة عندي لكشر...
انت طوالي متأخر...الولد الثقيل العامل زي أبو السعن ده...
يدخل الى البيت ليستعد لصلاة الظهر..ثم يرجع من المسجد الى البيت و ينتظر حتى عودة خضر لتناول الغداء...في العصر كان خضر يحمل له كرسية الى ميدان الكورة ليتفرج على أولاد الحي و هم يلعبون...و هو يطلق تعليقاته الساخرة التي تجمع جمهورا كبيرا...كل الناس تحضر ليستمتعوا بتعليقات حاج اللمين الساخره أكثر من اسمتاتعهم بمشاهده الأولاد وهم يلعبون...
انت يا ولد ما تجري...عليك الله شوف الولد ده التقول مربط...ما تعكس الكورة دي..هو انت تعكسه كيف كراعك الزي كراع الفيل دي..الولد ده لقى مقاس الكدارة دي وين...كورة شنو البتلعبوها انتو...هو في كورة بعد صديق منزول و دريسة والقطر...حسة دي كورة..شوف الأولاد ديل ميتين كيف..انتو يا أولاد ماكلين ويكة....
أو اذا كان هنالك أحد اللاعبين يتلاعب بالكرة بحرفنة..كان يصرخ (ككو انت...و الله الولد ده ككو بس)..ثم يعود الى الزاوية مباشرة لصلاة المغرب...يجلس فيها حتى صلاة العشاء ...ثم يلعب عشرة ضمنة مع أصدقائة تحت عمود الانارة ...و هكذا ينتهي يومه ليبدأ من جديد على نفس المنوال...
اشتهر حاج اللمين كذلك باهتمامه بالاحلام...فكثيرا ما يقوم من نومه أو غفوتة الضحوية..ليحكي لحاجه النعمة حلمة ان كان حلما سعيدا ينعكس ذلك على معنوياته طوال اليوم...
اليوم حلمت يا النعمه بي بحر كبير و أنا عندي مركب كبير..عديت البحر ده لقيت قصر كبير و حوله كلو أخضر..جاء واحد قال لي يا حاج اللمين القصر ده حقك...و فجأة صحيت من النوم...
خير و بركة يا أخوي...الموية في الحلم معناها خير كتير...و القصر و الخدار...برضو خير...تقوم حاجه النعمة بتفسير أحلام حاج اللمين..بمعرفة و دون معرفة...
والله يا حاجه حلمت لي حلم كعب الليلة..
خير يا أخوي..
و الله حلمت زي أنا ماشي لي في غابة كبيرة...و حيوانات الغابة دي كلها جارية وراي عايزه تاكلني...
ها يا أخوي انت طول عمرك تجري وراها..حسة أظنها جاية تتسدى حقها...ها ها ها ها...قول بسم الله أظنك تقلت في العشاء اليوم داك..دا ما حلم ده كابوس عشان أكلت كتير...
كابوس..و الله معاك حق...ده كابوس...
هنالك يوم في كل شهر لا يغفو حاج اللمين بعد أن يشرب الشاي بعد صلاة الفجر كعادته..بل يحضر مرآته و عدة الحلاقة ويبدأ في حلاقة ذقنه ثم يأخذ حماما بعد ذلك ويطلب من النعمة أن تعجل له بالفطور...
الليلة ماشي تجيب المعاش يا حاج...
ايوه...عايزه حاجة..
لا بري...لكن انت كان اديت خضر يجيبوا ليك معاهو ما كان أحسن...
لا ..ما أحسن...بمشي بجيبوا براي ...و بمشي أزور الأولاد ديل أشوفهم...
هن شن القريشات...حسه تمشي تكملن تمباك وتجي..
أكملن تمباك و لا أكملن عرقي انتي مالك..عليك الله شوف الولية الزي القرنتية دي...
في هذا اليوم..و الذي يعرفة الجميع بيوم المعاش..يفتقد سكان الحي حاج اللمين..يفتقده الماره بالشارع..و جمهور الكرة..و أصحاب الضمنة...فكلهم يعرف ان يوم المعاش يوم ثقيل في الحلة..لعدم وجود حاج اللمين في الحلة....

خرج حاج اللمين باكرا وذهب الى مكتب المعاشات لصرف معاشة...سجل اسمه في قلئمة الحضور و جلس في كنبة خشبية خشنة تحت مظلة تخترقها الشمس من كل الجهات...جلس وسط مجموعة من المعاشيين المنهكين...الذين قدموا للوطن سني عمرهم النضرة بكل اخلاص..و ها هم يزحفون تحت الشمس الحارقة منتظرين دورهم في الوصول الى الصراف...منهم من يصل الى الشباك فيجد أن معاشه لم يصل بعد فتعلو الأصوات ويتجمع حوله الناس منهم يهدئ و منهم من يتعاطف و أكثرهم يعبر عن سخطه و ضيقة... والصراخ الجائع لشيوخ تجاوزوا ارذل العمر ليس هو المظهر الوحيد من مظاهر السخط...بل أحيانا كثيرة يتظاهر هؤلاء الشيوخ محتجين على المعاملة السيئة التي يلقونها ...كل ذلك يؤثر على حركة الصف و يزيد من معاناة المنتظرين...وصل حاج اللمين بعد انتظار و زحف طويلان الى الشباك و أعطاه بطاقته المهترئة و قام الصراف بطلب توقيعة على القائمة ثم مد له بضعة أوراق تناولها حاج اللمين بحسرة ووضعها كلها في جيبه... ثم قام بجولتة المعتادة الى أبنائة...وعاد بعد ذلك متأخراالى البيت خائر القوى..منهك جدا..
و الله يا حاجه النعمة الليلة ما عارف مالي...تعبان شديد...
انت و الله يا أخوي ما بتسمع الكلام...كلام القصير ما بتسمع...تتعب نفسك ساكت..المعاش ده خدر بجيبو ليك..و الأولاد كل جمعة بيجو يقيلو معاك..
أسوي ليك العشاء و لا تنتظر خدر..
لا أنا ما عايز عشاء خليني أرتاح شوية...
طيب نوم يا أخوي..ارتاح...
ثم غطتة (بالفردة) وعدلت له الوسادة...
دخل خدر و سأل عن والده...فأخبرته أمه بأن أباه قد عاد متعبا و نام...
استيقظ حاج اللمين من نومة ولم يستطع أن يذهب الى الصلاة من تعبة...و نادي على النعمة فحضرت مسرعة..
مالك يا حاج...ان شاء الله تكون أصبحت كويس ...
و الله يا حاجه لسه تعبان...و كمان حلمان لي حلم غريب...
أها....خير
حلمان يا حاجه بي غراب واقف لي فوق راسي...
والله يا حاج انت داير سيدنا يوسف عشان يفسر ليك أحلامك دي...غراب شنو كمان يا حاج...
ضحك حاج اللمين ثم شخر و اسلم الروح لبارئها...
فشيعة زملائة في الحياة البرية...أصحاب الضمنة و كل الذين يمرون أمام منزله يوميا...و جمهور الكرة...

Post: #110
Title: Re: مربع كاي
Author: الرشيد بابكر
Date: 17-11-2009, 09:52 PM
Parent: #109



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">


تشوف الغيمه

في مقلة مراية السَهَلَة راخيه رموشا

تنَتْ في ام شديده القهوه

جاتا الدوشه

في طاقة منام هلواسا لاوذ ود قُزَح

طربان وشايلا الهوشه

خَطَفت توبا

قالت... أخ!

نِست باب حوشا .. فاتح

والمطور الليله كيف مَلبوشه

دسيهو منك فيهو

أو سميهو في الخيل الصحاب

البِخشو الحَضره دون مانوبه

من غير ما يدقوا الباب

البَدَسو الفكره في ضحكة بنات نَعَشْ

البِنادَن قمره, تغسل جمره,

في ريق السحاب

البحرسو الخمره, في النخل

البَصَحي التمره, نص الليل

إذا نقص الشراب

دِسيهو منك فيهو

أو همباتي
غارِز في أتّر شوفتِك

على رمل المناظر ناب

دسيهو منك فيهو

جملة أولياء النحت

سابقين الحواس بي ركعه

نهاضين وينقِفوا من حلوق الشوف

حصان في ضحكتك مربوط

مرق من ليلى ليلك جَنَ

من دُبُرْ اليقين مقدود

كل ما الموج راودك عن نفسو

تعطشي فيني؟!

تفتحي أطلس الخوف

كل ماالليل زاد نجمةفي كتف العسس

جرت العصافير المطار

دخل الشِعِر وَكَر المباشره

والبنات ..

طَفوا الرتاين و....وَلَعَنْ؟!

الخَمَروك فتحوك إنداية ومَشَنْ

الكلما صابحتهِن

سرقَن نهارك ومغربن

الفي صدور هرطقه

وإشلاق حليب

بت الذين أحبهم

أنة صريف في كُرنُق الروح

المطر ما ببقى لي زول

المغارب لابسا أقصر من خيال المُفترِي

ونحن مديونين نسيم

تلقاها في أول شريعتا غافيه

فارده شرودا

في الموج الحَتَلْ في بالا ظنّهَاطافيه

غامْتَه حنانا

في إيدا وينقع عافيه

تشبه في الوقع من عشو,

خوفو وكت يطير,

لا يلقى قِبله

لا طفل في إيدو نبله

ولا غصن ذو شوك رحيم..

والبادي أجمل


Post: #111
Title: Re: مربع كاي
Author: الرشيد بابكر
Date: 17-11-2009, 10:51 PM
Parent: #110

أجواء مباراة مصر و الجزائر غدا بالخرطوم...تسيطر على كل شئ...و أصبحت الشغل الشاغل لكل الناس هنا في الامارات...في العمل...في الشارع و في كل مكان..لا حديث الا عن مباراة الغد...
قمنا مساء اليوم بجمع كل مجموعة العمل وذهبنا الى شاطئ الخليج و أقمنا حفل شواء في جو جميل تتسم به هذه الشهور من السنة...الجمع كبير و غالبيتهم من المصريين و السودانيين و جنسيات أخرى غير مهتمين بكرة القدم و لا بالمباراة...أما المصريين فلم يكن لهم حديث الا عن المباراة و كانو مهتمين جدا بمتابعة القنوات الفضائية السودانية و ما تعكسة عن المباراة...و أكاد أجزم أن ما عرفة المصريين عن السودان في خلال هذيت اليومين لم يعرفوه طوال حياتهم...
حضرت و أنا البس تي شيرت أخضر و كان ذلك محض مصادفة ليس الا...و لكنني استغليت ذلك وعند حضوري هتفت (ون..تو..ثري...فيفا للجري) مثلما يهتف الجمهور الجزائري مداعبا اخواننا المصريين...فقالوا كيف تشجع الجزائر و أنت درست بمصر وكل أصدقائك من المصريين...قلت لهم انها كرة القدم و ليس لذلك اي علاقة بالعلاقات الانسانية...و أخذت أداعبهم و أغيظهم...فكانوا يتحدثون عن أدبهم في التشجيع عكس شراسة المشجعين الجزائرين...فقلت لهم لا تحدثوني عن أدبكم في التشجيع...فلقد تم ضربي في أستاد القاهرة بعمود من الخشب في ظهري و أنا أشجع الهلال ضد الزمالك في مباراة أنهزم فيها الهلال بالأربعة....رغم انني مشجع زملكاوي و كنت كثيرا ما أحضر مباريات الزمالك و أشجعة في الدوري و تنتهي المباراة بفوز الزمالك فيقبلني كل المدرج مرددين (وشك حلو علينا يا سوداني) الا في مباراة الهلال فلقد القى مشجع زملكاوي خشبة في ظهري...
أمتد الونس حتى وقت متأخر و انتهى بروح رياضية و محبة يحسدون عليها اخواننا المصريين...و خلصت الى أن المصريين رغم الحساسيات التي تحدث بيننا و بينهم الا أنهم لذيذين و روحهم رياضية و رغم كل شئ هم الأقرب الينا و يستحقون تشجيعنا لهم...

و لكني أقول ليكن الفوز للأجدر...سواء ان كانت مصر أو الجزائر...

Post: #112
Title: Re: مربع كاي
Author: محمد عيد
Date: 17-11-2009, 11:02 PM
Parent: #111

Quote: لكني أقول ليكن الفوز للأجدر...سواء ان كانت مصر أو الجزائر...


نتمنى ذلك يا رشا ...

واتفق معك فى ازدياد الاهتمام ببلادنا فى هذه الايام ..

بل ان الكم المعلوماتى لدى الشعبين حتما قد حقق معدلات لم تكن متوقعة على الاطلاق

ولعلك تذكر ما كنا نعانيه من جهل يثير الحنق ايام الجامعة فيما يخص بلادنا من قبل اخواننا المصريين ..

واذكر هنا فى احدى تلك السنون ان لاعب الاهلى فريقا من غينيا او السنغال لا اذكر بالتحديد .. وفاز الاهلى بخماسية

فى اليوم التالى كان زملاءنا المصريين فى القسم يكيدوننا وكأن المهزوم هو الهلال او المريخ ...

وعندما تصدى لهم اخونا جمال مصطفى بأن هذا الفريق ليس سودانيا .. اجابه أحدهم ببلاهة ..

يا عم ما كلكم افريقيا ..!!

وطبعا لا احتاج لاحكى لك كيف كان رد فعل جيمى لفظا وفعلا ..!! ولكنه بكل تأكيد .. برررررد قلوبنا ..!!

Post: #113
Title: Re: مربع كاي
Author: الرشيد بابكر
Date: 17-11-2009, 11:11 PM
Parent: #112

و الله يا حمادة لنا قصص كثيرة عن جهل أخوانا المصريين بالسودان...الأمر الذي أدى الى نشوء حالة من الحنق و الغضب و التحدي أيضا بيننا و المصريين..لأنهم دائما ما يعتبروننا أقل منهم رغم انها حقيقة الا أننا لا نقبلها...كنت أتمنى أن يكون هذا التحدي دافعا لنا و أقصد هنا الحكومات المتاعقبة للحاق بركب الدول التي تسبقنا...و لكننا و للأسف تخلفنا عنهم كثيرا..بل و تخلفنا عن دول أخرى كانت أقل مننا كثيرا...
و لكن أيضا يا حمادة و لأننا لم نحتك بشعوب أخرى مثلما احتكينا بالمصريين فلا نعرف عنهم الكثير غير الذي نعرفة بحبنا كسودانيين للمعرفة...أليس من الممكن أن يكونوا هم كذلك نفس الشئ...

Post: #114
Title: Re: مربع كاي
Author: زينب التجاني
Date: 17-11-2009, 11:14 PM
Parent: #100

سلامات يا ناس يا ابداع

شوق مطر يا رشا والصور ماشاء الله ربنا يديكم العافية ويخليهم ليكم وقول لنانى I AM WAITING

عيد يا مبدع والله عاينة اصفق ليك والناس دى كلها تصفق معاى والله مبدع
وشكرا على الاطلاله
كنت وما زلت من المعجبين بيها لانها اسهمت فى توصيل موهبه بتاعة مجموعة مميزة

اتحفونا وممكن تكون كل ثلاثاء ذى ما كانت لو ما خانتنى الذاكرة
المهم تصدر
الى الامام

اخلاص محمد احمد صديقة الزمن الجميل مليون سلام وتحية
منورة ومضيئة

شايفاك راكبة امجادى

فافى يا الق شوق مطر
انتو زناتى دة ما بجى بهنا كتير

سلام

Post: #115
Title: Re: مربع كاي
Author: الرشيد بابكر
Date: 17-11-2009, 11:20 PM
Parent: #114

زوبة الشوق مطر والله...وينك اختفيتي...و الله في بالي و كنت عايز أكتب قبل شوية و اقول أين أنتي يا زوبة...

Post: #116
Title: Re: مربع كاي
Author: الرشيد بابكر
Date: 17-11-2009, 11:24 PM
Parent: #115

Quote: انتو زناتى دة ما بجى بهنا كتير


و الله يا زوبة زهير ده..نزلت ليهو قصة ما عبرني...جبت ليهو عاطف خيري و ما اشتغل بي..ما عرفت أعمل ليهو شنو عشان يعبرنا...بس بقول ليهو يا زهير من لقى أحبابه نسى أصحابه..و برضو تدلل و أطلب اي حاجه عشان نجيبك بيها..

Post: #117
Title: Re: مربع كاي
Author: زهير الزناتي
Date: 18-11-2009, 00:29 AM
Parent: #116

هلا يا ناس مربع كاي ,,,, والله الواحد مشتاق ليكم عديل كده ، البوست بره بقي إيقاعه بطئ ،، المهم كورة مصر دي شاغلانها شغلة شديدة .. تقول الواحد في الجهاز الفني بتاع مصر ...
اها جيناكم تاني بتفرغ شبه كامل

Post: #118
Title: Re: مربع كاي
Author: الرشيد بابكر
Date: 18-11-2009, 12:43 PM
Parent: #117

Quote: اها جيناكم تاني بتفرغ شبه كامل


أبو الزوز حبابك...دي جيناكم ولا جاينكم...بتفرق معانا شوية...

Post: #119
Title: Re: مربع كاي
Author: زهير الزناتي
Date: 18-11-2009, 09:43 PM
Parent: #118

يا رشا يا كحيل سلام إنت وضيوفك ... زي ما قلت الكورة دي حا تقصر عمري ، ما تتخيل إنه كورة مصر والجزائر كنت عايشها كل الأيام الفاتت دي ، ما قادر أفكر في حاجة غيرها ... بس أكتر حاجة مزعلاني الأصوات التي تنادي بكراهية مصر ... وديل ناس غريبين جداً .. أي زول من حقه يشجع الجزائر .. ويحب لجزائر بس من غير ما يكره مصر ... ويدعونا لكراهية مصر ... الكورة دي حالة خاصة .. تحب الفريق البتحبه من غير أي اسباب تانية إلا لأسباب رياضية ... وتقيف ضد فريق برضو لنفس الأسباب ... يعني ممكن تشجع فريق عشان لاعب واحد وإنت بتشجع ضده علي طول ، يعني الكورة دي عندها قوانينها براها ، ما عندها أي علاقة بأي حاجة تانية ..... المهم في النهاية فازت الجزائر وإنهزمت مصر ... ما الذي تغير ... لا شئ ... تظل الأشياء هي الأشياء ...

اها دي كيف جيناكم ولا جاينكم

Post: #120
Title: Re: مربع كاي
Author: الرشيد بابكر
Date: 19-11-2009, 06:56 AM
Parent: #119

أبو الزوز يا صديقي...أشعر بحزن شديد لهذا الكم من التشوهات التي أصابت عدد ليس بالقليل من السودانيين أو ذلك ما بدأ لي من خلال ما كتب قبل مباراة مصر و الجزائر...و أسميها تشوهات لأن كل ما قيل كان لا يعبر عن ما كنا نتصف به...الانسان السوداني الطيب الكريم و المحايد أيضا...تلك الحيادية التي أكسبتنا حب و احترام الآخرين على الدوام...و الذين كرهوا مصر نظروا الى النصف بل قل الربع الفارغ من الكأس و لم ينظروا الى الجزء الممتلئ..عكس ما فعلوه في أمر الجزائر...و نسوا و كما قلت أنت في مقالك أنها مجرد مباراة لكرة القدم تنتهي بهزيمة أحد الطرفين...
لم أستطيع تشخيص هذه التشوهات أوادراك مسبباتها....و لكني أخشى و أحذر من الانحدار السريع لنا في كل المناحي...

نسأل الله اللطف بنا...

Post: #121
Title: Re: مربع كاي
Author: محمد عيد
Date: 19-11-2009, 09:11 AM
Parent: #120

Quote: لم أستطيع تشخيص هذه التشوهات أوادراك مسبباتها....و لكني أخشى و أحذر من الانحدار السريع لنا في كل المناحي...


اعزائى الرشيد وزهير ...

بهدوء كده وبدون اية ردود افعال ..

انا الآن استطيع وبرضاء كامل من ضميرى ان احمـّل كامل مسئولية ماحدث

ويحدث الآن للاعلام المصرى الســـألب ..!!

وذلك باستغلاله لامكاناته الكبيرة وخبراته المتراكمة فى تحويل وتأويل الامور

والاحداث بطرق مســـرحية هزليــة لا تخفى على أحد ...

ويكفيكما - اذا لم تتابعا ماحدث عقب المباراة - الاسلوب الذى اتخذه المدعو

عمرو أديب فى اوربت .. وذاك النكرة الموجود فى النيل للرياضة حتى الصباح

وتوجد فى المنبر العام تسجيلات مصورة لاحاديثهما ..

الآن انقلبت الحرب على السودان ومنذ ليلة البارحة يتعرض البلد سياديا وتاريخيا

لحملات تريقة واستهزاء مقيتة ومخجلة .. وفى كل هذا يأتى عجز الاعلام والرسميين

السودانيين ليزيد من استمراء تلك الفئة من الاعلام المصرى لهذه الحالة واستراره

فيها ...

تخيلوا فى وسط كل ذلك الهراء ومداخلات بعض مسئولى الشرطة السودانية الذين رضوا

بأن يخضعوا على الهواء لاستجوابات عمرو أديب وزميله الوقح وهم يفتقدون لابسط مقومات

الناطق الرسمى ...

ولولا مداخلة مزمــل ابو القاسم فى نايل سبورت والذى الجم مذيعها حجرا غليظا

اراح به قلوبنا لنمنا ليلتنا فى المستشفيات من جراء ما سمعناه من سواقط القول فى

حق وطننا ومواطنينا وقاتنا الامنية بل وتاريخنا ..!!

ما العمل .. قد نستطيع تسليط بعض الاقلام والالسن اللاذعو مثل مزمل والرشيد على عمر

وعمرابى و.... حتى نستطيع جلب يونس محمود من جديد ... ولكن هل نملك مثل آلتهم

الاعلامية الضخمة التى يمتلكون ؟ بل وهل نستطيع مجاراتهم فى اساليبهم تلك ؟


Post: #122
Title: Re: مربع كاي
Author: الرشيد بابكر
Date: 20-11-2009, 11:45 AM
Parent: #121

و الله يا حمادة قبل المباراة قلت لبض الأصدفاء ان المصريين سيسيئون الينا بعد المباراة رغم اختيارهم لنا سواء أن فازوا أو خسروا...و لم يفعلوا ذلك لما كانوا مصريين...لذلك تجد أن كل العالم العربي كان يشجع الجزائريين...و لقد خسر المصريين معظم أراضيهم بسبب ازدرائهم للآخرين...فتجد مصريا لا يعرف القراءة و الكتابة يحدثك عن فشل السودان في التعامل مع الجمهور الجزائري...فكنت كل ما أفعله هو أن أدير له ظهري و أذهب...
أمس في غياثي خرج جزائري بسيارتة و معه زوجته و كانت تحمل العلم الجزائري...تعاطف معهم كل الناس و شجعوهم...و هذا ما قصدته..حتى الذين شجعوا مصر كانت قلوبهم مع الجزائر...
كل القنوات الفضائية غير المصرية أقرت بنجاح التنظيم من قبل السلظات السودانية خاصة و ان الوقت الذي تم فيه أختيار السودان كان ضيقا...و لقد شاهدت في الجزيرة الرياضية مساء البارحة في برنامج عن الفرق المتأهلة...ضيوفة المغربي سعيد شيبا و المدرب الفرنسي جيرار جيلي...كيف كانت الاشادة بالسودان...و تم استضافة حمادة صدقي مساعد حسن شحاتة وتم سؤاله عن سبب الهزيمة...فبدأ حديثة عن الروح الرياضية و أن ما حدث بعد المباراة...فقاطعة مقدم البرنامج قائلا ان المباراة انتهت في الملعب وليس خارجة و ان التنظيم كان جيدا وما حدث خارج الملعب كان عاديا و تم تهويلة من قبل الاعلام المصري.

نحن نشجع كرة القدم دون النظر الى أي شئ آخر...كرة قدم فقط و نقف مع من تميل معه عواطفنا لا لشئ آخر غير كرة القدم...

مبروك للجزائر مرة أخرى و هاردلك لمصر من أمنتياتنا لها بالتوفيق في مقبل الأيام...و نرجو منهم و من اعلامهم أن يراجع نفسة و الا سيخسرون كثير من الشعوب ولن يجدوا من يساندهم اينما حلوا...

Post: #123
Title: Re: مربع كاي
Author: الرشيد بابكر
Date: 20-11-2009, 12:16 PM
Parent: #122

هذه الصورة تعجبني كثيرا عشان كده قلت أبراكم ببيها تاني...جعل الله كل أيامكم أفراحا..



Post: #124
Title: Re: مربع كاي
Author: زينب التجاني
Date: 20-11-2009, 03:13 PM
Parent: #123

يا رشا يا جميل مليون سلام ليك وللحلوين المعاك
الصورة دى رهيبة وحاجزاها للبروفايل بتاعى بس فى مشكلة ابت تنزل قول لنانى ما تشيلا

سلام يا عيد وفى انتظار الاطلالة


عمر مسافر بكرة الحج ادعوا ربنا يتقبل منو ويجيبو بلسلامة

زناتى دة ما براهو مختفى

التحية ليهواين ما كان

Post: #125
Title: Re: مربع كاي
Author: محمد عيد
Date: 20-11-2009, 06:11 PM
Parent: #124

زوبة سلام وتحية ...

ربنا يتقبل من عمر الحج ويرجعه ليكم بالسلامة

والسنة الجاية انشاء الله معاهو ...

غيبتك طالت .. واطلالتك جات فى موسم بيات شتوى للبوستات ..

انشاء الله بنحاول ننزل الاطلالة قبل العيد بس الشباب شوية يطلعوا من حالة الدبرسه ..

اعتقد .. واتمنى ان تزول هذه الحالة باشراقة صبيحة الغد

Post: #126
Title: Re: مربع كاي
Author: نجاة حوفي
Date: 21-11-2009, 10:11 AM
Parent: #125

سلام لاجدع ناس.. بدون فرز ليكم كلكم.
اسفة للانقطاع غير المقصود..بصراحة احسن شى انزل ليكم جدول الامتحانات ينتهى هنودى بعد يومين تبدا امنية..يعنى المتابعة ذاتها محرومة منها لكن مستمتعة باحساسى بيكم..
عيدى يا مبدع ما تنسانا من الدعوات فى الايام الطيبة دى.
زوبة ذى ما ودعتى عمر تلاقيه ويرجع سالم وحجة مقبولة يا رب.
عليكم الله شوفواابو هنودى عاجباه الصورة شديد.زوبة عايزة تنزلها فى بروفايلها.. وحقوقى مهضومة يعنى اسعد المصوراتى ده (شخصى الضعيف ) مافى اى تحية ليه؟؟ صورة استخدمت فيها كل ابداعاتى وضبط الزوايا الفنية لا شكرا ولا كثر خيرى.. بصراحة الكلام على الناس الفى الصورة (قولوا ما شاء الله)
حا ارجع ليكم متين ما عارفة.. اليوم يوم الدلع لانه عندنا ذى ما بقول هنودىSaturday is the sad day
مهمتى اليوم هى الاصعب .
فافى ومنص مشتاقين.. زناتى !!! الله يسامحك وشكرا تانى على الباسوورد...
ودمتم سالمين

Post: #127
Title: Re: مربع كاي
Author: الرشيد بابكر
Date: 21-11-2009, 02:53 PM
Parent: #126

يوم السبت الذي يكرهه صديقي منصور هو بمثابة بداية اغتراب بالنسبة لي...حيث أودع عيالي و أم عيالي على امل أن ألتقيهم بنهاية الأسبوع...هو يوم لا أستطيع أن أقول بأنني أكرهه...و لكنه يسبب لي الكثير من الحزن الناتج عن مفارقة أسرتي...و لكن من يرى مصائب غيره تهون عليه مصيبته..هكذا دائما ما أذكر نفسي...الحمد لله الذي جعلني مستقرا في عملي أستطيع من خلاله تلبية احتياجات أسرتي الصغيرة و الكبيرة حتى ولو كان هذا العمل يفرق بيني و بين أسرتي...

عندما أحضر الى العمل أذكر نفسي بأنني في مهمة ما و يجب علي أن لا أشعر بالملل و لا بالغربة انما أنا بحكم واجبي...فيعطيني ذلك دافعا كبيرا للعمل حتى نهاية الأسبوع و يمر الأسبوع بسرعة حتى عودتي الى أبوظبي مرة أخرى بنهاية الأسبوع...

Post: #128
Title: Re: مربع كاي
Author: الرشيد بابكر
Date: 21-11-2009, 06:40 PM
Parent: #127

يا جماعة البوست ده نقفلوا ولا شنو...البوست ما جايب راسماله...خسرنا فيهو أغاني و شعر و صور واطلالة من محمد عيد و محاولة اطلالة....وبرضو مافي جمهور...بالطريقة دي حيخسر معانا...يعني الواحد لو كان فتح ليهو محل عجلاتي كان أحسن ليهو...كان على الأقل جاب راسماله...
قلت لي موسى عيسى يا موسى لو الواحد قعد يتكلم براه في البيتش...الناس مش حتقوم من جمبك..و تبلغ عليك الشرطه و يجو يلبسوك البدله البيضاء و يودوك السرايا الصفراء...قال لي أنا ما فاهم انت بتقول في شنو...كلام واضح وضوح الشمس في منتصف الظهيرة وبرضو ما فاهمني...يقولو ليك عودة الروح للبوست...طيب و المنبر ده مقطوع من شجرة..ما تزوروه شوية كمان معاكم...مش قلتوا عايزين منبر و بوست...و طيب عملوا ليكم منبر و بوست...لا عمرتوا منبر و لا بريتوا بوست...و الله الحكاية دي دايره ليها جن كلكي عديل كده...كل يوم تجي تنضم براك و تؤلف و تنجر ليك كلام ساكت..يا قالوا مجنون يا حنوا عليك و جو قعدوا معاك...

يا زول كفاية كده...بعد شوية بتجن جد جد...

Post: #129
Title: Re: مربع كاي
Author: الرشيد بابكر
Date: 22-11-2009, 09:29 AM
Parent: #128

في اتصال تلفوني مع الأخ و الصديق الأستاذ حمزة سليمان حدثته عن أغانيه التي أهداهني اياها في سي دي مؤخرا...يحوي السي دي 26 أغنية من عيون الشعر السوداني و العربي و قد أضفى اليها حمزة اروع الألحان...و ذلك ليس بالأمر الغريب..فحمزة صاغ أجمل الألحان لفرقة عقد الجلاد...و لا ابالغ اذا قلت انني لم أسمع لحنا يمكن أن نقول عنه أنه لحنا جديدا منذ رحيل مصطفى سيدأحمد و حتى استمعت الى تلك الأغاني...
عاتبت حمزة على على عدم اجتهادة في نشر أغنياتة و التي تعتبر ثروة قومية...و كلمته عن أهمية الأمر...فهو كفنان تقع على عاتقة مسئولية كبيرة في الارتقاء بالذوق العام للمستمع السوداني...و هذا يستوجب منه القيام بجهد اضافي لنشر أغانيه الجميلة...و وصيتة أن يختار بدقة من يقوم بالعزف معه...اذ أن مجموعة العازفين لا بد يكونوا بمستوى الغناء العالي المستوى...
شكرني حمزة بتواضعه المعهود عنه وو عدني بأنه سيقوم بتسجيل أغانية في السودان في عطلة عيد الأضحى ان شاء الله و بصورة تنال اعجابي...ووعدني كذلك باهدائي ذلك الشريط بعد الفراغ من تسجيلة...
و لحرصي الشديد بأن تصل هذه الأغاني الى الناس بصورة جيدة..أقول لصديقي حمزة لن أجاملك يا صديقي اذا كان التسجيل ليس بالمستوى الذي أتمناه...

Post: #130
Title: Re: مربع كاي
Author: منصور عبد الرازق
Date: 22-11-2009, 01:13 PM
Parent: #129

رشا يا حبيب
والله انت زول حساس حساسة
ياخى بوست زى ده تقول ما جايب راسمالو
انا شخصانيا , مستمتع بيهو جدا
بس تعرف , وجود بوست ومنبر فى نفس الوقت
عايز ليهو وقت اطول
لسه يتخيل لى معظم الناس ماقدروا يوزنوا معادلة الوكت الأطول المطلوب
من الأنقسام الأنشطارى الجديد بتاع بيتنا القديم ده
لكن البوست موضوعا ومتابعة
اكثر من رائع
ولا تنسى انك دائما
تمارس ما يشبه الكتابة الصحفية الراتبة
يكتبها القليلون
ينسجها نادرون
ولكن يطلع عليها ويستلذ بها
الكثيرون الكثيرون
تأكد تماما يارش
ماضاع حرف , ولا ضل الطريق
ولكن صداه سياتيك , وان تاخر

Post: #131
Title: Re: مربع كاي
Author: محمد عيد
Date: 22-11-2009, 02:45 PM
Parent: #130

رشيد ...

حتى لو مافى زول جاء واتداخل بى هنا ...

البوست ده لازم يبقى و يبقى ويبقى ...

حتى لو باقى الناس اعتبروه شأنا زراعيا بحتا وقاطعوه

برضو لازم يكون قاعد وزاهى بوروده ورياحينه ...

حتى لو انشغلنا عنه شوية .. زى انشغالنا عن المربع سيد الاسم ايام الامتحانات

برضو لازم نمشى ونجيهو مرة ..مرة ...

ياخى مش ايام الامتحانات الواحد مرات يزهج من الكسر والمعسكرات

ويجى يشحن بطاريته فى المربع ؟؟

وتييييييب ...!

Post: #132
Title: Re: مربع كاي
Author: الرشيد بابكر
Date: 22-11-2009, 06:44 PM
Parent: #131

منص ...حمادة...

الدار نورت بمقدمكم السعيد...و لا شك أنكم و مهما تأخرتم فانكم تأتون...لتضيئوا ليس دارنا فحسب بل قلوبنا أيضا...بيتنا نور و الله نور و كلوا زينة وبي فرح عودتكم زغردت كلمات حنينة...
شفتوا كيف بتعمل زيارتكم فيني...بتخليني أفرح و تزداد رغبتي في الكتابة و التواصل معكم و الآخرين وهذه هي طبيعتي...فأنا تزداد رغبتي و قدرتي على الكتابة بالتداخل معي...أستطيع أن أكتب كل يوم في هذا البوست ولكنه و كأنه موجه لي...و لقد فتحنا هذا البوست للدردشة و التسامر...و هذا يعني أن يشترك عدة أطراف في الأمر...
على اي حال أشكر لكم حضوركم و نتمنى المزيد من الزيارات التي تبهجني و تفرحني كثيرا...

Post: #133
Title: Re: مربع كاي
Author: زينب التجاني
Date: 22-11-2009, 10:27 PM
Parent: #132

يا رشا ياخ انا يوميا بجى بهنا لمن القى البيت فاضى بشد الملايات وانضف واملا الموية وامشى


دة متكا جميل الاندياح فيهو عايز تكية

Post: #134
Title: Re: مربع كاي
Author: الرشيد بابكر
Date: 22-11-2009, 10:45 PM
Parent: #133

و الله يا زوبة مرورك يسعدنا...و نشكرك على على فريش الملايات و ملي الموية...انت عارفة عايز شوية تنسيق بين الناس لأن معظم تركز على البوست في المنبر العام و بتنسى هذا المكان...بتنسيق بين الناس سيكون متكأ لذيذ يجتمع فيه الناس كل مساء و يدردشوا مع بعض...بدل المساسقة بتاعت كل يوم...أنا انتظركم مساء كل يوم بعد التاسعة مساء ان كان يناسبكم هذا التوقيت...

و ما زالت الدعوة مفتوحة للجميع..

Post: #208
Title: Re: مربع كاي
Author: إخلاص محمد أحمد
Date: 27-11-2009, 04:34 PM
Parent: #95

يا حليل نوال محمد علي يلرشيد ربنا يرحمها ويحسن اليها فقد كانت من اعزا صديقاتي واحباهن

Post: #207
Title: Re: مربع كاي
Author: إخلاص محمد أحمد
Date: 27-11-2009, 04:27 PM
Parent: #79

كل سنة وانتم بالف خير
شكرا الرشيد علي اختيار اجمل موقع ملتقي لكل الاحباء من زراعة واصداقائهم الاعزاء
عفاف ياحبيبة شكرا علي الطريقة الحلوة في المنادة وانا واللة قريبة ومستمتعة بي كتاباتك انتي والرشيد
مربع كاي بجيب اي زول وين ما كان فاجمل ايام الكلية كانت في هذا المربع السحري لي عودة بكمية من الزكريات

Post: #206
Title: Re: مربع كاي
Author: إخلاص محمد أحمد
Date: 27-11-2009, 03:57 PM
Parent: #16

الرشيد ياصديق الزمن الجميل سلام من عندنا لمربع كاي هناك كلعهد بيك دائما
سباق للاقتراحات الجميلة . لمربع كاي زكريات كثيرة وجميلة فهو المكان البنتلم فيهو دائما نسأل فيهو عن حالنا واحوالنا بدون فرق بينا في لونا السياسي اي زول صاحب اي زول. لي عودة يارشيد ببعض من الذكريات

Post: #135
Title: Re: مربع كاي
Author: قيس جمال الدين
Date: 22-11-2009, 11:13 PM
Parent: #1

سلام ...
أنا لاحق سيكشن ... بس أخلص و أرجع ليكم ...
باي .. كاي ..

Post: #136
Title: Re: مربع كاي
Author: الرشيد بابكر
Date: 23-11-2009, 05:53 AM
Parent: #135

نرحب ترحيب كبير بالأخ قيس جمال الدين...و الله لو عارفين انك جاي علينا كان انتظرناك لحدي الصباح...لكن ما فات شئ...أمشي أحضر سيكشنك و تعال...تلقانا قاعديييين....

Post: #137
Title: Re: مربع كاي
Author: عبد القادر بابكر
Date: 23-11-2009, 08:17 AM
Parent: #136

يا رشدي ....

فاضي ؟؟؟؟؟؟؟

ولا وراك حاجة ؟؟؟؟؟؟؟؟

Post: #138
Title: Re: مربع كاي
Author: عبد القادر بابكر
Date: 23-11-2009, 08:31 AM
Parent: #137

نعرف يا أبو الرشد

أنا كل يوم قبل ما أمشي المنبر العام بدخل على حوشك ده ...
الليلة غايتو كثر خيرها زوبه فرشت لينا الملايات وملت الأزيار ورشت الرملة
يعني الجو مهيأ للترطيبة ..

دخلت المربع وشايف أخونا أسعد أب كرنك مجدوع في النجيلة بي هنااااك ورامي عكازتو جنبو والكاميرا معلقة في رقبتو في حالة استعداد لوصول الجماعة ... لكن المربع فااااضي ما عارف الناس دي داكين ولا داخلين سكاشن ؟؟؟ ... غايتو قلت آخد لي معاهو قعدة واتفرج على الصور العندو لحدي ما يظهر لينا زول نطق لينا فلاش معاهو ....

جاييييييك ومعاي صور من الزمن الجميل !!!!!!

Post: #139
Title: Re: مربع كاي
Author: عبد القادر بابكر
Date: 23-11-2009, 08:47 AM
Parent: #138

أهم شيء في مربع كاي ...

الصور ...

كذي غايتو لحدي ما يجيني زول أجدع لي شوية صور من العصر الحجري
نشوف الناس ديل مستحضرين معانا ولا الزمن عمل عمايلو ؟؟؟؟

331.jpg Hosting at Sudaneseonline.com


يتخيل لي دي ساااهلة ...

شباب حلوين والخلفية كمان حلوة .. قسم الوقاية ..
وذكريات جميلة وعزيزة ..
سلالم الوقاية دي كانت بمثابة المقصورة كنا نطل منها على جميع مربع كاي
وكانت هي المقر المحبب لنا معشر السناير نشرف منها على المربع ونراقب الجميع
..... ولا نفس ......

Post: #140
Title: Re: مربع كاي
Author: عبد القادر بابكر
Date: 23-11-2009, 09:14 AM
Parent: #139

هاكم دي كمان ..

وسط النجيلة !!!

332.jpg Hosting at Sudaneseonline.com


كيف الديناصورات ديل يا رشدي ؟؟؟؟؟
يلا ورونا شطارتكم وعيشوا معانا الأيام الحلوة ..

Post: #141
Title: Re: مربع كاي
Author: عبد القادر بابكر
Date: 23-11-2009, 09:26 AM
Parent: #140

يا خوي حوشك ده مالو ناشف كدي ؟؟؟؟؟؟

لي ساعتين قاعد براي أبرى في نفسي ..
بتنا زوبة ختت لينا جك الموية ومشت .. قلت تمشي بي هناك تشد الجبنة ولا الشاي !!!
لي حسه ما جاتني ريحة ... يكون عصير يا ربي ؟؟؟

يا أخي خت ليك ميزانية ضيافة في حوشك ده ..........



بجيك صاد ....

Post: #142
Title: Re: مربع كاي
Author: الرشيد بابكر
Date: 23-11-2009, 10:59 AM
Parent: #141

قدورة الحبيب...أنا يا أخوي النهار ده و الله صعب علي تلقاني قاعد هنا...بطلع من البيت الصباح و أول حاجة بتصل على أم العيال عشان لو دخلت المكتب تاني مافي طريقة...ثم أدخل المكتب و مع قهوة الصباح بقوم أعمل مداخلة في البوست و تاني عينك ما تشوف الا النور...مكتبي زي السوق الشعبي...واحد داخل و اتنين طالعين و هكذا حتى أذان الظهر...ثم بعد صلاة العصر و حتى الساعة الثالثة ظهرا...ثم يبدأ كل واحد في الانسحاب...
أنا بروق بعد ذلك...أحيانا بلقى لي خمسة دقايق كده بخش فيه...
بعدين سيد بيت ياخي...يعني ما تنتظر مواجبة مننا...أدخل و قلع نعلاتك و اتشنقل في اقرب عنقريب...و كورك لي ناس جوه يجيبوا ليك الفطور و الشاي...و الزير قريب بايت من البارح ملان...يعني موية باااااردة...

أرجع لي صور الديناصورات...غايتو تفف التابا...انت التفة دي كانت موضة و لا مافي حلاقين كانو...أنا صوري كمان كلها كانت التفة ما تديك الدرب حاجه كده مالية الراس...زمان في الكلية كنت لما أجي الصباح يتلموا حوالي المصريين و يقولو لي بالله يا رشيد بتوقف شعرك كده ازاي...أقول ليهم خلقت الله يا أخوانا...و لا موقفو و لا حاجه بقوم من الصباح أنفشو ليك بالخلال وبجيكم...مرات كنت بقيف قدام المرايا براي و طق طق طق بالمقص أشرتم ليك الشعر...حلاقة مجهبزة...لكن الغريبة لما وصلنا سنة رابعة قصرنا التفة شوية...و حسة بقينا نحلق رقم واحد..

كانت أيام جميلة يا قدورة

Post: #143
Title: Re: مربع كاي
Author: منصور عبد الرازق
Date: 23-11-2009, 11:26 AM
Parent: #142

قدورة شكرا لأنعاش الذاكرة بهذه الصور الجميلة
الصورة الأولى وقوفا
اول واحدة اسمها يجى ويروح , معاوية يحى , امال خضر , قمر الدولة عبد المطلب
الباكستانى محمد عيد ,
جلوسا , طارق البيض , عاطف القوز الأبيض منو , الطيب سلمان الأبيض منهم الأتنين , قدورة اب تفة
هشام , احمد صالح تربيع
الصورة التانية
جمال الخليفة , قمر الدولة, قدورة بنفس التفة (الصورتين ديل يكون اسعد اب كرنك اداهم ليهو فى عرض تسويقى
اشترى واحدة وخذ الثانية مجانا buy one get one free , حاتم امام
جلوسا , جليتو , الطيب التكو , جليتو , حسن خاطر اب شنبر

Post: #144
Title: Re: مربع كاي
Author: منصور عبد الرازق
Date: 23-11-2009, 11:26 AM
Parent: #142

قدورة شكرا لأنعاش الذاكرة بهذه الصور الجميلة
الصورة الأولى وقوفا
اول واحدة اسمها يجى ويروح , معاوية يحى , امال خضر , قمر الدولة عبد المطلب
الباكستانى محمد عيد ,
جلوسا , طارق البيض , عاطف القوز الأبيض منو , الطيب سلمان الأبيض منهم الأتنين , قدورة اب تفة
هشام , احمد صالح تربيع
الصورة التانية
جمال الخليفة , قمر الدولة, قدورة بنفس التفة (الصورتين ديل يكون اسعد اب كرنك اداهم ليهو فى عرض تسويقى
اشترى واحدة وخذ الثانية مجانا buy one get one free , حاتم امام
جلوسا , جليتو , الطيب التكو , جليتو , حسن خاطر اب شنب

Post: #145
Title: Re: مربع كاي
Author: الرشيد بابكر
Date: 23-11-2009, 11:40 AM
Parent: #144

قدورة أجيك راجع للصور و التي أعتقد أن منصور ما كان لابس نضارة.....

الصورة الأولى

وقوفا: نهلة...معاوية...آمال خضر..قمر الدولة...محمد عيد

جلوسا:الأول ما عرفته لكن ما طارق...عاطف..الطيب سلمان...محمد ابراهيم...على الحسن...أحمد صالح.


الصورة التانية:
وقوفا:جمال عبد الطيف...عبدالمنعم...قمر الدولة..حاتم أمام..

جلوسا:ععبدالرؤوف..الطيب سلمان..علي الحسن...عثمان...


صحح و طلع النتيجة بسرعة ...ولا أقول ليك خلي محمد عيد يجي يقول كلمته...

Post: #146
Title: Re: مربع كاي
Author: محمد عيد
Date: 23-11-2009, 02:32 PM
Parent: #145

والله يا قدورة محنك عجيبة ..؟

انت ياخى ما عارفنا معمشين من يومنا ..؟

الصور دى نيجاتيف ولا كانت مدفونة فى خور المطرة بتاع الحارة الثانية ؟

عموما برضو اظن انا احسن من منص والرشيد .. شوف ..

الصورة الاولى : نهلة - معاوية - امال خضر - قمر - ( سيد الناس )

جلوسا : الطيب رجب - القوز - ......... - محمد ابراهيم - على ميرغنى - احمد صالح


الصورة التانية : جمال عبد اللطيف - قمر - قدورة - حاتم امام

جلوسا : عبد الرؤوف - الطيب تكو - على حسن -ماعرفتو لكن ما حسن خاطر

Post: #147
Title: Re: مربع كاي
Author: عبد القادر بابكر
Date: 23-11-2009, 03:11 PM
Parent: #146

والله لكن حكايتكم حكاية يا برالمة يا عجائز !!!!

غايتو منصور بالرغم من انو صايم لكن قرب يقفلها ..
غلطاتو كلها بسبب الطباعة السيئة لورقة الامتحان ..
أما أنت يا سيد البيت ..
عملتها شينة عدييييل كده والله ..
يعني يا راجل تجليني أنا بالظاط !!!!!!!!!
وانا من قبيل قاعد وحارس ليك البيت وتجي في النهاية تجليني ..

الباكستاني كثر خيرو كان ماشي كويس
لكن برضو جلاني في الصورة الأولى !!!
ده نقول عليهو شنو يا جماعة ...

هاكم الحل يا برالمة يا طاشين ...
الصورة الأولى :
وقوفا : نهلة - معاوية - أمال خضر - قمر الدولة - ( سيد الناس )
جلوسا : على حسن علي - القوز - فيصل محمد الحسن - قدوره - صفوت - احمد صالح

الصورة الثانية :
وقوفا : جمال عبد اللطيف - عبد المنعم اسماعيل - قمر - قدوره - حاتم امام
جلوسا : عبدالرؤوف محمد بشير - التكو - علي حسن علي - عثمان حسب الرسول

انت يا رشدي تجي دور سبتمبر ..
بس كده كيه ليك عشان جليتني !!!!!!!

Post: #148
Title: Re: مربع كاي
Author: محمد عيد
Date: 23-11-2009, 03:19 PM
Parent: #147

قدورة والله فى الصورة الاولى ما عرفتك ( النضافة ليك من وين ؟ ) رغم انو منصور عرفك

لكن القلت عليهو صفوت ده مليون % غلط ... هو يا على بجة او هشام عثمان !!


Post: #149
Title: Re: مربع كاي
Author: عبد القادر بابكر
Date: 23-11-2009, 03:50 PM
Parent: #148

لا والله وحياتك يا باكساني
صفوت بي لحمو وشحمو ..
طلع النظارة بتاعة السواقة وركب النظارة بتاعة القراية !!!!
أنا ذاتي بستغرب كيف ما عرفتوه ...






برلوم مطشش بس !!!!!!!!!!!!!!!!

Post: #153
Title: Re: مربع كاي
Author: عبد القادر بابكر
Date: 23-11-2009, 04:02 PM
Parent: #149

كدة كيييف ؟؟؟؟؟

121421.jpg Hosting at Sudaneseonline.com

Post: #150
Title: Re: مربع كاي
Author: محمد عيد
Date: 23-11-2009, 03:53 PM
Parent: #148

قدورة ومن لف لفه ..

عامل فيها سنير ومفتح

كان راجل اعرف ديل ( كلهم حضرتهم ما عدا واحد بأعفيك منو )


sudansudansudansudansudansudansudansudan018.jpg Hosting at Sudaneseonline.com

Post: #152
Title: Re: مربع كاي
Author: محمد عيد
Date: 23-11-2009, 03:57 PM
Parent: #150

وديل كمان يا كبير ..

منهم 3 كانوا ساكنين معاك


Picture007.jpg Hosting at Sudaneseonline.com


انت كان باريتنى بتتعب

Post: #151
Title: Re: مربع كاي
Author: الرشيد بابكر
Date: 23-11-2009, 03:55 PM
Parent: #148

Quote: لكن القلت عليهو صفوت ده مليون % غلط


أنا مع محمد عيد...و ضربت حسه تلفون لي صفوت عشان يشوف الصورة و يأكد الكلام لقيته نايم..لكن بيرجع لي بعد شوية...أنا اتخيل ده العاقب...و لا عبدالحليم...

أما صورتك يا قدورة في الصورة الأولى...انت السبب...ضللتنا بي قميص عبدالله اللابسه ده ياخي...

Post: #154
Title: Re: مربع كاي
Author: الرشيد بابكر
Date: 23-11-2009, 04:13 PM
Parent: #151

Quote: كدة كيييف ؟؟؟؟؟


هي والله ياهو صفوت ذاااااااااااتو....شفت يا قدورة السبب صورتك...


محمد عيد الامتحان ما ساهل على فكرة...بعض الأسماء طارت...خاصة في الصورة التانية...الزول اللابس الوشاح في الوسط وقوفا نسيت اسمه...و تحت من بعد القوز يسارا برضو جلا....

أما الصورة الأولى عرفتهم كلهم لكن نسيت اسم ازميلة في وسط البنات فوق...أظنه ايمان...

Post: #156
Title: Re: مربع كاي
Author: محمد عيد
Date: 23-11-2009, 04:22 PM
Parent: #154

الرشيد اقعد بعيد انت ..

خلينا النشوف حاج كرتووووب ده ..!

Post: #155
Title: Re: مربع كاي
Author: عبد القادر بابكر
Date: 23-11-2009, 04:21 PM
Parent: #151

يا رشدي موضوع التفة جاييك ليك بعدين..
خلينا نشوف الباكستاني ده
وكمان كبرت ليكم الصورة عشان تتأكدوا انو صفوت ..
لما يصحى بالله سلم عليهو وقول ليهو قدورة قال ليك
الجماعة طلعوا مطششين وطاشين كمان ..

الصورة الأولى :
الواقفين : احمد صالح - يتخيل لي اسمها خالده والله اعلم - الكذب حرام - الكذب حرام - نهلة - عبد الحليم والله اعلم
المدنقرين :: حنان القطينة - ( الباكستاني )
جلوس :: الكذب حرام - معاوية العميان - والله اسمو يمشي ويجيني ..

الصورة الثانية :
الواقفين : اب سيجارة ده يتخيل لي برة الصورة - الكذب حرااام - ( الباكستاني ) - بعرفو والله لكن اسمو طار بعرفو حق المعرفة - علي بجة - مجدي عبد الله
القاعدين : حسين كوش - عاطف القوز - بعرفو والله لكن الاسم طااااار - صفوت ( النايم لسه والمغرب راح عليهو ) ....

كده كيف يا برلووووووم ...

Post: #157
Title: Re: مربع كاي
Author: الرشيد بابكر
Date: 23-11-2009, 04:28 PM
Parent: #155

محمد عيد عليك الله خليني أصحح ليهو...

في الصورة الأولى....لقيت ايمانك قوي...عشان عرفت كل الكذب حرام الفي الصورة...

و في الصورة التانية...لقيتك أولاد حاج الماحي...ده طار...و داك طار....ما نوبة...

Post: #158
Title: Re: مربع كاي
Author: محمد عيد
Date: 23-11-2009, 04:31 PM
Parent: #155

والله يا قدورة التيرم الاول مقبول بس عشان عرفت المرحومة خالده يوسف


لكن التيرم التانى تربيتة بالمزيكا .. عارف ليه ..؟

لأنك جليت كمال الطيب الكان ساكن معاك فى سفن أب وهو قريب التكو

ودى كانت حفلة تخريجه فى تجارة ...

هسه انا أٍوى فيك شنو ؟

الرشيد عرفوا بالباقين بالله ...

* انا ماشى البيت بعد ده والنت هناك كان قاطع الصباح

فاذا لقيتو ما رجع ما تقولوا شردت ... وان غدا لناظره قريب

Post: #159
Title: Re: مربع كاي
Author: الرشيد بابكر
Date: 23-11-2009, 04:35 PM
Parent: #158

محمد عيد و انت ماشي للبيت أغشى معاك زوبة شيل منها الDSL ...عشان ما شايفه متلحلحة...تجي يااك و تمشي...

Post: #160
Title: Re: مربع كاي
Author: عبد القادر بابكر
Date: 23-11-2009, 04:44 PM
Parent: #158

Quote: لأنك جليت كمال الطيب الكان ساكن معاك فى سفن أب وهو قريب التكو


والله بعرفو لكن قدر ما حاولت اتذكر الاسم ما قدرت ... كيمو ....
لكن والله كثر خيري عرفت حسين كوش .. الشخصية العجيبة وكان ليهو مواقف ظريفة مع عبدالله الدبجة
الله يديهم العافية ..

يا خوي كان معتمد علي الرشيد واطاتك اصبحت ......


أمشي وتعال بالسلامة وياما في الجراب يا حاوي ....

أما الرشيد ده ..
حأجيب ليهو ناس الصين عشان يعد لي أسمائهم وأوعى تقول لي الكذب حرام ولا ده اسمو طار مني ...

Post: #161
Title: Re: مربع كاي
Author: الرشيد بابكر
Date: 23-11-2009, 04:47 PM
Parent: #160

جاهزين يا قدورة ...بس انت جيب ساكت...حتلقى الذاكرة حديد....

Post: #163
Title: Re: مربع كاي
Author: الرشيد بابكر
Date: 23-11-2009, 04:57 PM
Parent: #161

هاك شوف العيشة دي...دي لي زول واحد...بس يكون جعان شديد...لأنك لو ما جعان ربعها ما حتكمله..


Post: #162
Title: Re: مربع كاي
Author: عبد القادر بابكر
Date: 23-11-2009, 04:54 PM
Parent: #160

عاملين صوركم الكلها تفف دي !!!!

ياخي طفشتوا مننا البرالمة
يعني هسه ناس زوبة ونجاة حوفي وفافي يجو يقولوا علينا شنو ؟؟؟
أكيد حيقولوا محمد معانا ما تغشانا !!!!! ويقوموا جارين يخلونا ...
كلم زوبة خليها تجي تفرش لينا الملايات ديل ..
وبالله لموا خلالاتكم المجدعة دي !!!

فضحتونا مع البرالمة يا مساخيت ..

Post: #164
Title: Re: مربع كاي
Author: الرشيد بابكر
Date: 23-11-2009, 05:02 PM
Parent: #162

انت ما جاوبت على سؤالي بتاع التفف يا قدورة...زمان كلما تكبر التفة الواحد يشوف نفسه مكمل الأناقة و الجمال...حسة التفف شايفة رجعت تاني لكن ما عندنا...نحن طبعا بتجينا الموضة متأخرة شوية..حسه الموضه حلاقة الشعر قريب للصلعة...

Post: #165
Title: Re: مربع كاي
Author: عبد القادر بابكر
Date: 23-11-2009, 05:04 PM
Parent: #162

في طاري التفف يا مسخوت ..

شوف الصورة دي ..

23232323.jpg Hosting at Sudaneseonline.com


أمال خضر كانت جارة شعرة من راس العبد لله .. شوفها بالله طويلة كيف ..
وطبعا هي مستغربة وبتضحك ...
أنا ما عارف شنو الكان عاجبنا في التفة دي ..
الله يطراها بالخير أختنا أمال خذر .. وين أراضيها بالله ؟؟؟؟؟؟

Post: #166
Title: Re: مربع كاي
Author: الرشيد بابكر
Date: 23-11-2009, 05:13 PM
Parent: #165

تعرف يا قدورة لو كان ضفرت شعرك كان بقيت رود خوليت...هاك الشعر الطويل ده..

آمال خضر ..كانت أخت فاضلة و من أظرف بنات دفعتنا...أعتقد أنها في السعودية...كان من المؤمل أن نلتقيها في الاجازة مع نهلة نجم الدين...و لكني لم ألتقيها...

Post: #167
Title: Re: مربع كاي
Author: عبد القادر بابكر
Date: 23-11-2009, 05:13 PM
Parent: #165

Quote: هاك شوف العيشة دي...دي لي زول واحد...بس يكون جعان شديد...لأنك لو ما جعان ربعها ما حتكمله..


دي اسمها عندنا هنا .. تميس ...

والله لكن يا ناس أبوظبي عليكم حنكشة عجيبة ..
ياخي دي الواحد بيقوم بيها عااااادي وممكن نطلب زيادة كمان !!!
خصوصا لما تكون حاااارة ومقرمشة ....

Post: #168
Title: Re: مربع كاي
Author: الرشيد بابكر
Date: 23-11-2009, 05:17 PM
Parent: #167

Quote: دي اسمها عندنا هنا .. تميس ...


دي و الله تقرمشه براك تميس ليك مصرانك الأعور...

Post: #169
Title: Re: مربع كاي
Author: الرشيد بابكر
Date: 23-11-2009, 05:23 PM
Parent: #168

معاي صفوت في التلفون ...بيسلم عليك سلام شديد...و قال ليك وينك ووين ايامك...انت عارف صفوت بيحب ليك سيرة البناء و الأراضي حيه عندي حصة في الشقق و الأراضي...عايز أي معلومات...

Post: #170
Title: Re: مربع كاي
Author: عبد القادر بابكر
Date: 23-11-2009, 05:27 PM
Parent: #168

يا خوي الصفحة دي مالها ما دايرة تنقلب ؟؟

هاك ناس الصين ديل قزقز فيهم لحدي الصباح .. عندك وقت كفاية قبل ما يجيك الباكستاني

338.jpg Hosting at Sudaneseonline.com


عامل تفتك دي .... !!!!!!!

Post: #171
Title: Re: مربع كاي
Author: عبد القادر بابكر
Date: 23-11-2009, 05:35 PM
Parent: #170

تحياتنا بالله للزول اللذيذ صفوت وقول ليهو والله مشتاقين ..
وكان حيين بنتقابل انشاء الله .. قريب جدا حأسجل ليكم زيارة وعايزين لمة كااااربة بالله ..
كذي بالله أسألوا لينا من أسعار الأراضي عايز لي قطعة أرض في امدرمان درجة أولى ما يهم الموقع بس يكون حي كويس .. بفتش والله وكلفت أخواني بي هناك .. أو بيت مشطب الطابق الأرضي تشطيب عادي ... أفيدونا أفادكم الله .....

Post: #172
Title: Re: مربع كاي
Author: الرشيد بابكر
Date: 23-11-2009, 05:38 PM
Parent: #170

الله يا قدورة...و الله دي صورة لامه بي شكل...دي بيني و بينك عايزه ليها مقاول عديل كده...

و الله لكن صورة جميلة جدا...دي أديني أسبوع عشان أعرفهم ليك واحد واحد...

Post: #173
Title: Re: مربع كاي
Author: الرشيد بابكر
Date: 23-11-2009, 05:45 PM
Parent: #172

Quote: عايز لي قطعة أرض في امدرمان درجة أولى ما يهم الموقع بس يكون حي كويس .. بفتش والله وكلفت ناس هناك لكن يظهر عليهم مشغولين وما فاضين .. أو بيت مشطب الطابق الأرضي تشطيب عادي ... أفيدونا أفادكم الله .....


قال ليك صفوت في حاجة أسمها مدينة الريحان السكنية و عندهم موقع في النت ..أبحث عناالريحان...و الشركة المطورة أسمها سوقطرة للانشاءات...و قال ليك بتتباع في سفارة السودان بالرياض..و كمان رسلوا رسائل على الموبايلات للسودانيين في الرياض...قال ليك انت مسجل في سفارة تشاد و لا شنو....

Post: #174
Title: Re: مربع كاي
Author: عبد القادر بابكر
Date: 23-11-2009, 05:51 PM
Parent: #172

يا خوي بعد ده بدقوني في البيت ..

ما تنسى بالله تملا معاك الأزيار عشان تبرد لحدي بكرة ..
وزوبة كان جات بي جاي خليها تجرجر معاها الملايات ديل ...
وبكرة الجبنة علي أم مهند ..

نشوفك الصباح ...

Post: #175
Title: Re: مربع كاي
Author: عبد القادر بابكر
Date: 23-11-2009, 06:00 PM
Parent: #174

والله أنا السفارة دي ما قاعد أحب أمشي ليها ..
لكن حأدخل الموقع وأشوف الحاصل شنو وممكن أخطف رجلي وأمري لله علي سفارتنا الميمونة ..
بس المخططات دي الواحد بلاوز منها لأنها أغلبها بتكون في سقط لقط ومناطق عجيبة كده ..

بالله غرغره السلام والأشواق ..

Post: #176
Title: Re: مربع كاي
Author: الرشيد بابكر
Date: 23-11-2009, 06:06 PM
Parent: #175

و الله ما قصرت الليلة معانا يا قدورة..ان شاء الله يا يابا تجيك العافية...أمشي خلاص عفيت ليك دربك أخدر...بس أوع تمشي تقول لي بت الشيخ كله من القشير ده...أخرني و طلع روحي..

تعال بكره بدري..تلقى الموية باااااردة و الجبنة بره....

Post: #177
Title: Re: مربع كاي
Author: محمد عيد
Date: 24-11-2009, 08:48 AM
Parent: #176

Quote: هاك ناس الصين ديل قزقز فيهم لحدي الصباح .. عندك وقت كفاية قبل ما يجيك الباكستاني


والله يا قدورة صورك البتجيب فيها دى دليل دامغ انك من العهد الديناصورى ...

يعنى حتى الصور يخيل لى تم تحميضها وتجفيفها فى حبل الغسيل فى البلكونة بعد ان

تم غسلها مع الفنيلة الحمراء بتاعت الدبجة ديك ..!!

لكن تخيل انا قلت بسم الله لقيت نفسى متذكر مجموعة ما بطالة ... رغم انها أخذت قبل

مجيئنا الزقازيق ...

غايتو يخيل لى الصورة دى فى تاريخها انا كنت ما زلت أحبو فى الخرطوم القديمة

الثانوية ...! بس فيليب ده الجابو معاكم شنو ؟ يكون جاء يزور منقستو ؟؟

المهم هاك .. وبعدين صحح بى ضمير شوية ...

نبيل البطل - سيدة عبد القادر ابوسم ( رأيك شنو فى الذاكرة دى ؟) - نهلة - الرشيد

- محمد ابراهيم - ابراهيم مختار - المرحومة سميرة سيد - حاتم امام - عشة محمد دين -

جمال عبد اللطيف - عماد محجوب - عبده مضوى - على البيه - اب تفة - فدوى - عثمان ابو شوك -

مبارك احمد على - على حسن ..

أها قصرت معاك ؟ يلا صحح زى الناس وما تبقى زى دكتور فايز مرعى ..!

Post: #178
Title: Re: مربع كاي
Author: الرشيد بابكر
Date: 24-11-2009, 09:22 AM
Parent: #177

نجيك للصورة الأخيرة يا قدورة...

وقوفا:
اخلاص عمر الأمين...؟...؟...نهلة...حنان الأمين...سامية عبدالعزيز...محمد أبراهيم...الطيب...أبراهيم مختار...الراحلة سميرة....حاتم امام...جمال عبداللطيف...عماد محجوب.

الوسط:
أنا....حاتم عكاشة

جلوس:عبدالرحمن...علي...قدورة...رتيبة...أبو شوك...مبارك...؟

الصف الأخير:
عثمان....مبارك...علي

Post: #179
Title: Re: مربع كاي
Author: عبد القادر بابكر
Date: 24-11-2009, 09:26 AM
Parent: #177

حبيبنا الباكستاني ...

بركة الجيت ..

قلنا ليكم ذاااااااكروا كويس ..
بجيك العصر بي رواقة كده .. انت عاوز ليك قعدة يا خوي

Quote: انا كنت ما زلت أحبو فى الخرطوم القديمة


قال ما زلت أحبو قال ....
لا وانت الصادق كنت تحبو في سلالم سفن أب




يا رشدي ..
ما تلحقنا وتفزعنا ياخي !!!!!!

Post: #180
Title: Re: مربع كاي
Author: محمد عيد
Date: 24-11-2009, 09:37 AM
Parent: #179

قدورة هاك التفف دى ..! وجاهات ..

السؤال .. أعرف مناسبة هذه الصورة ..

وما هو الكورال الذى قدمته كتيبة الأناقة الفى الصورة


sudansudansudansudansudansudansudansudan33004.jpg Hosting at Sudaneseonline.com


Post: #181
Title: Re: مربع كاي
Author: منصور عبد الرازق
Date: 24-11-2009, 11:02 AM
Parent: #180

قال حاتم عكاشة قال
عندنا زول قرا معانا فى الزقازيق اسمه حاتم عكاشة ؟؟؟
يتخيل لى ده العاقب بلة
ده مجرد تخيل
فى صورة محمد عيد الأولى , يا قدورة نسيت جلوسا ياسر ياسين وجمال مصطفى
اما فى (صورة الصين العظيم )
بداية وقوفا نهلة , نبيل البطل , نسيتها , حسن صالح, ماجدة عبد الرحمن على ما اظن , هدى عبد الله , المرحومة نجاة خليفة , محمد ابراهيم , الطيب التكو , ابراهيم مختار , المرحومة سميرة سيد ,حاتم امام , عائشة محمد دين,جمال عبد اللطيف , عماد محجوب
فى منتصف الصورة الواقفين وزى قاعدين ديل الرشيد والعاقب
جلوسا , عبده مضوى , جليتو , قدورة , الكذب حرام , محمد ابو شوك, مبارك محمد على , نسيت اسمه مع انى بعرفه
المفرجخين ديل كلهم جليتهم
صورة محمد عيد بتاعت الكورال انا مقفلة عدييييل
عبد الحميد رحمة الله ,عادل عبد العظيم , صلاح على صالح (الجابو هنا شنو ؟؟), ابوبكر ابوزيد , الباكستانى محمد عيد , الطيب سلمان
برضو الجابو هنا شنو ؟؟)واخيرا محمد ابراهيم
مناسبة الصورة ما يا استقبال يا وداع
حايكون عرس الرشيد ونجاة حوفى يعنى ؟؟!!

Post: #182
Title: Re: مربع كاي
Author: الرشيد بابكر
Date: 24-11-2009, 12:39 PM
Parent: #181

Quote: قال حاتم عكاشة قال
عندنا زول قرا معانا فى الزقازيق اسمه حاتم عكاشة ؟؟؟


يا منص حاتم عكاشة ده ما حتذكره الا لما تمشي جده و تجي...بعد ما يضربك هواء جده اللذيذ داك بتاع الشتاء...يا أخي حاتم عكاشة ده من أولاد عطبرة و دفعة قدورة..

محمد عيد الصورة ساااااهلة...لكن السؤال...الناس ديل عملوا الكورال ده كيف...الواقفين ديل كلهم أصواتهم شينة...و العجب الطيب سلمان....ان أنكر الأصوات صوت الطيب سلمان...

Post: #183
Title: Re: مربع كاي
Author: منصور عبد الرازق
Date: 24-11-2009, 01:21 PM
Parent: #182

بديت اتذكر طشاش طشاش
لكن يا رش
اسمه حاتم ولا ماهر
قدورة عنده الكلام الفصل

Post: #184
Title: Re: مربع كاي
Author: محمد عيد
Date: 24-11-2009, 02:48 PM
Parent: #183

والله يا رشيد منص صاحبك ده شكلو داقى الدلجة عديل كده

حررررم لمن يجى جدة الا نوديهو ليك الكرنتينا ..!!

يا منصور .. يا اباحمد .. يا بشير عباس ...

ماهر خضر بتاع عطبره ده دفعتك انت ذاتك ..

وحاتم عكاشة انا اتذكرتو لمن الرشيد كتب اسمو بس هو كان زول مسكين

يعنى ما حنفوش زيك يا منص ..

* بعدين تعالوا انتو الاتنين يا اولاد المساكن ...

انا وجهت السؤال لى قدورة .. انتو الحاشركم شنو ؟؟ غايتو جنس لقافة ..

انا قاصد أحشــر العجوز حاج كرتوب ده عشان امبارح هرانا بى صوره

المطمســـة فى عصير القمردين دى ..

بس صاحبكم شرد وما ظهر لى هســه ؟!

والسؤال قائم ليهو هو وبس !!!

Post: #185
Title: Re: مربع كاي
Author: محمد عيد
Date: 24-11-2009, 03:01 PM
Parent: #184

وبعدين انا ما زلت مصرا على ان هذه الصورة اخذت قبل حضورنا للزقازيق

واننى فعلا كنت أحبو فى الخرطوم القديمة وأفك البيرك من حسن عبيد الشايقى الله يرحمو

وأملــّح الفطور فى البركس مع ناس الجامعة ... ونكتمها بى سيجارة برنجية تحت كوبرى بحرى

وظهور عبده مضوى فى الصورة .. ببساطة لأنو عبده كان راجع من روسيا وجاء زار منقستو ود

خالتو فى الزقازيق ... ومن هنا جاءت التسمية التى اشتهر بها حينها ... فيليب ..

Post: #186
Title: Re: مربع كاي
Author: عبد القادر بابكر
Date: 24-11-2009, 03:16 PM
Parent: #183

هاكم النجيضة يا برالمة يا عجائز .....

341.jpg Hosting at Sudaneseonline.com


الأسماء مكتوبة عليها فردا فردا ....

Post: #187
Title: Re: مربع كاي
Author: عبد القادر بابكر
Date: 24-11-2009, 03:26 PM
Parent: #186

Quote: أعرف مناسبة هذه الصورة ..

وما هو الكورال الذى قدمته كتيبة الأناقة الفى الصورة



المسرح ده مااااا غريب علي ...

دحين يا ود أخوي ده ما مسرح الكلية ؟؟؟؟؟؟

المناسبة يتخيل لي استقبال برالمة أو وداع خريجين .... صاااااح ؟؟؟؟

الكورال ... طلع البدر علينا .... !!!!


((( عليك الله ما داير أسماء الحاضرين ))))) ؟؟؟؟؟؟؟؟؟




برلوم حقار !!!!

هههههههههههه

Post: #188
Title: Re: مربع كاي
Author: محمد عيد
Date: 24-11-2009, 03:57 PM
Parent: #187

Quote: المسرح ده مااااا غريب علي ...

دحين يا ود أخوي ده ما مسرح الكلية ؟؟؟؟؟؟

المناسبة يتخيل لي استقبال برالمة أو وداع خريجين .... صاااااح ؟؟؟؟

الكورال ... طلع البدر علينا .... !!!!


((( عليك الله ما داير أسماء الحاضرين ))))) ؟؟؟؟؟؟؟؟؟


عشان تعرف نفسك فعلا خرفت ولحقت حاج كرتوب

دى حفلة تخريجك انت بالذااااات .. وكان معاها سواء استقبال البرالمة اللى هم انحنا

والحفلتين اتعملوا سواء لأننا جينا متأخرين ايام امتحان التيرم

وده مسرح المدرسة العسكرية ...

والكورال : ثــوار اكتوبر

وجاييك بعدين بى صورة كورال الخريجين ...

ما قلت ليك ما تبارينى ..؟؟

Post: #189
Title: Re: مربع كاي
Author: عبد القادر بابكر
Date: 24-11-2009, 04:29 PM
Parent: #188

زي دي كده يعني ؟؟؟؟؟

1234.jpg Hosting at Sudaneseonline.com


Quote: دى حفلة تخريجك انت بالذااااات .. وكان معاها سواء استقبال البرالمة اللى هم انحنا


الصورة كانت في مارس 84 ..
حفلة تخريجي دي معاك فيها والدليل الجاكيت الأحمر والبنطلون الأبيض ...
كمان عايز تقنعني انك كنت برلوم سنة 84 ؟؟؟؟
يا خي انت أقدم من عبد الله الدبجة في الزقازيق ؟؟؟؟

عامل تفتك دي ......

Post: #190
Title: Re: مربع كاي
Author: الرشيد بابكر
Date: 24-11-2009, 04:36 PM
Parent: #188

و الله يا قدورة الحقار انت ده...منصور ده يغالط فيني من قبيل في حاتم عكاشة..ما قلت بغم...عرفت ليك كمان علي...دي مش ضربت معلم...غايتو انتو البدوروهو بتقولو عليهو بخيت و الما بتدوروهو ما بعرف بتقولو عليهو شنو.....

محمد عيد بالله الكورال كان ثوار اكتوبر...ان شاء الله يكون ناجح بس...غايتو أنا الجماعة الشايفهم ديل...الله أعلم يكونو نجحوا ليهم كورال...يطرشني ما سمعت زول فيهم بيغني...

Post: #191
Title: Re: مربع كاي
Author: عبد القادر بابكر
Date: 24-11-2009, 04:52 PM
Parent: #190

يا رش وين انت ..


انت غايتو مشيت كويس وكونك تعرف علي البيه برضو برافو عليك .. لكن تجلي حاتم عكاشة ؟؟؟

الصورة لامة والله وفيها اسماء كثيرة مختفية نتمنى والله نسمع منهم ....

Post: #192
Title: Re: مربع كاي
Author: الرشيد بابكر
Date: 24-11-2009, 05:13 PM
Parent: #190

محمد عيد الجاكيت الأحمر ده جبتو معاك من السودان و لا اشتريته من بورسعيد..

بمناسبة المدرسة يا حمادة...اذكر انني و عندما كنت في الصف الثاني الثانوي أصبت في أسفل الساق في مباراة لكرة القدم...هذه الاصابة أدت الى تكون خراج تطلب اجراء عملية جراحية...تم عمل العملية بواسطة دكتور يسمى أحمد الرشيد..يقال ان لأحمد الرشيد هذا مقابر تعرف باسمه عندما كان يعمل بالأبيض...هكذا سمعت من بعض الناس...فكنت خايف جدا أقوم من العملية ألقى ليك رجلي مافي من كترة ما سمعت عن الدكتور...المهم أول ما صحيت من البنج اتفقدت رجلي فوجدتها في مكانها...قلت الحمد لله رجلي نجت من مقابر الأبيض..
أعطاني كالعادة ورقة للمدرسة حتى أحضر الى المستشفى كل صباح للغيار...فكانت هذه الورقة في جيبي على الدوام...لأننا عندنا في مدرسة مدني الثانوية صول صعب جدا...حملت هذه الورقة في جيبي زمنا و كنت أدخل المدرسة متأخرا فأمشي بكل ثقة بينما كان زملائي يجرون هنا و هناك خوفا من سوط الصول...و عندما يأتي الي متوعدا أطلع الورقة فأمشي اقدل لحدي الفصل...
كان منزلنا قريب من المدرسة...و كنت أحضر للبيت للفطور...و أرجع متأخر بعد أن أسمع جرس المدرسة...فأحضر الى المدرسة و أمشي بي مزاج و الزملاء يركضون...فأقطع ورقة من أي كراس و أدخل المدرسة و بمجرد أن أشاهد الصول ألوح له بالورقة..و كان ذلك بعد عدة شهور من العملية...

Post: #193
Title: Re: مربع كاي
Author: الرشيد بابكر
Date: 24-11-2009, 05:17 PM
Parent: #192

و الله يا قدورة الظاهر عليك انت مجلي...أنا العرفت حاتم عكاشة و منصور البغالط...مش قلت ليكم البتدوروهو بتقولو عليهو بخيت...

Post: #194
Title: Re: مربع كاي
Author: الرشيد بابكر
Date: 24-11-2009, 05:31 PM
Parent: #193

Quote: واننى فعلا كنت أحبو فى الخرطوم القديمة وأفك البيرك من حسن عبيد الشايقى الله يرحمو

وأملــّح الفطور فى البركس مع ناس الجامعة ... ونكتمها بى سيجارة برنجية تحت كوبرى بحرى


شوف يا قدورة صاحبك كان بيحبو بملح في البراكس وبيتمها ببرنجية...حبيكم كده مشيكم كان كيف...

Post: #195
Title: Re: مربع كاي
Author: منصور عبد الرازق
Date: 25-11-2009, 11:17 AM
Parent: #194


انتوا يالرشيد ومحمد عيد
زول نسى وبخر مداخلات حصلت امبارح
منتظرينوا يصحح ليكم احداث من سنة حفروا البحر
ولا كمان محمد عيد
برلوم قال جارى من حسن عبيد الشايقى
وفى يده سيجارة برنجى تحت الكبرى
يا زول انا لا بعرفكم ولا قدركم
انا بس حا انادى ليكم القدركم
ناس ابراهيم مختار واخمد المعتز
يجوا يتفاهموا معاكم


تليشة ؛-
اسماء عادت الى الذاكرة بفضل (صورة الصين العظيم )
اخلاص عمر الأمين , سيدة ابوسم , حاتم عكاشة , حامد على يحى , مبارك عبد الرحمن , نوال آدم نمير
عثمان حسب الرسول , امانى اسماعيل , عادل عطا نعمان
ولكنى لم اتذكر عوضية , ولم استبين اسم الزميلة الجالسة اسفل الصورة , قلت لى منو ؟؟؟

Post: #196
Title: Re: مربع كاي
Author: محمد عيد
Date: 25-11-2009, 03:35 PM
Parent: #195

هســـه بالله يا عمو عموش ...

دى ما هى نفس الحفلة .. ونفس اللبسه الماخمج

ونفس الحنجره الذهبية ؟؟!

sudansudansudansudansudansudansudansudan33004copy.jpg Hosting at Sudaneseonline.com



1234copy.jpg Hosting at Sudaneseonline.com



وبعدين صاح الحفلة فى مارس او ابريل 84 ...

وانا يا عجوز جيت برلوم فى ديسمبر 83 ...

هسه دى دايره ليها مغالطة ولا حساب ؟؟

والله انت الكركم ذاتو ما بينفع معاك ... لكن أصبر شوية بلقى ليك دواء ...!

امشى عامل راسك كده زى محل الشكله ..!! ( متذكر دى ؟)

Post: #197
Title: Re: مربع كاي
Author: الرشيد بابكر
Date: 25-11-2009, 05:52 PM
Parent: #196

يا شباب الليلة غشيتكم دي ما عجبتني...غشية زول مستعجل كده و باله مشغول بي حاجه تانية...ناس البيت يقولو ليهو عليك الله ما تقعد أشرب ليك كباية شاي...يقول ليهم لا معليش بفطر قدام...يا أخوي الجاب ليك سيرة الفطور منو....قلنا ليك أقعد أشرب شاي....
لكن برضو كتر خيركم الجيتو مارين...الكلام في أبو تفة داك الليلة ما جاء ماري بي هنا قاعد يتحاوم بره بي هناك...هوي أسمع المره دي مشيناها ليك لكن تاني تكرره بجي أمعط ليك شعرك العامل زي محل الشكلة ده...

Post: #198
Title: Re: مربع كاي
Author: عبد القادر بابكر
Date: 25-11-2009, 06:23 PM
Parent: #197

مساء العسل يا عسل ...

الليلة والله متلومين معاكم ياشباب ..
أخوك متجدع في المنبر العام بي هناك وآخر ذكريات حلوة مع شبيهة الورود
كان ما جيتني بي هناك ما عافي عليك سهري وقعادي في بيتك ده ومن غير قهوة ولا شاي ...


ليلى المغربي ...... سيدتي .. أنتِ امرأة لا تتكرر في تاريخ الورد !!!

Post: #199
Title: Re: مربع كاي
Author: محمد عيد
Date: 25-11-2009, 06:27 PM
Parent: #197

رشيد ...

الليلة والله يوم ما حصل ...

تخيلوا انو جده المعروفة بندرة امطارها وبســوء خدماتها وانعدامها

هطلت عليها امطار من بعد الفجر وظلت لغاية الساعة 2 ظهرا ...

سيول عارمة نزلت من وديان كبيرة فى شرقها .. جعلت منها فينيسيا أخرى

ولكن على وساخة ..!!

بأمانة جده كادت ان تغرق وتغوص فى البحر ...

ياربى منو الكراعو حارة ده ؟ منصور ما تحمّر لى .. انت مرحب بك ..!

تخيل اننا اتزنقنا زنقة ما اعتيادية ومن الصباح لى هسه انا ما رجعت البيت

وفى عمل متواصل لازالة آثار اضرار عديدة فى المول .. وطبعا العيد بعد بكره

ولازم كل حاجة ترجع لاصولها قبله ...

غايتو الله يعينا الليلة ...

اما اب شعرا زى محل الشكلة فانا شايفو عامل ليهو حوش جميل بى غادى ..


Post: #200
Title: Re: مربع كاي
Author: الرشيد بابكر
Date: 25-11-2009, 06:41 PM
Parent: #199

أنا يا دوب دخلت المنبر لقيت منصور انتهز فرصة عزاز علينا و قعد يكب الغزل في ندى القلعة و كان ما كلامكم ده ما كنت عارف حاجة عن البوست بتاع قدورة بتاع الرقيقة الراحلة ليلى المغربي...و أها أنا من دربي ده ماشي ليهو بي هناك....
قلت لي منصور اعلن جيتة ساكت المطره كابه من الصباح...يعني لما يصلكم حيغرقكم ولا شنو...و العجب لو......ما في داعي....يقوم يزعل مني ساكت....صاحبي ده كراعو خدره...

Post: #201
Title: Re: مربع كاي
Author: الرشيد بابكر
Date: 25-11-2009, 07:48 PM
Parent: #200

جلست و أحد الأخوان السودانيين يعمل منذ قرابة الثلاثين عاما بالامارات...كنا نتحدث عن التزاماتنا تجاه أسرنا بالسودان...فأخذ يحدثني عن الالتزام تجاه الوالد و الوالده لا يعلو علية التزام ثم يتبعة الأخوان و لكن حتى الأخوان يجب أن لا تزيد عن الحد المعقول...و هذا لا يعني أن لا نساعد من يحتاج الى مساعدتنا شريطة أن لا يعتاد شخصا على المساعدة و يعتمد عليها كليا...ثم استرسل قائلا كان خالي يدرس في يوغوسلافيا و خالي الأكبر كان يعمل وقتها في السعودية...فيراسل خالي الصغير خالي الذي يعمل بالسعودية طالبا مصاريفا...و في احدى المرات طلب منه أن يزيد مصاريف لأن أصدقائه لم تصلهم تحويلاتهم...فقام بارسال نفس المبلغ الذي يرسلة كل مرة دون أي زيادة مع رسالة طويلة...فيها الكثير من الموعظة حول كيفية التعامل مع أصدقاء الغربة...فكان أهم ما قاله له في رسالتة....أخي ان أصدقاء الغربة لا وزن لهم...فهم فارغون...أصرف عليهم الكثير من حلو الكلام و لا تصرف عليهم الكثير من المال...
قلت ليهو خالك ده عنده كم بيت في السودان....فأجابني بأنه يملك و يملك ....قلت له ليتني عرفت خالك هذا أو التقيت به منذ أن وطأت قدماي الى الآمارات لكنت استثمرت السنوات التي قضيتها هنا استثمارا جيدا...اذا كنت أعرف أعمل مثلة...و لكنني أعتقد أنه يجب علينا الآن أن نتعلم كيف نكون مثل خال صديقي هذا..

Post: #202
Title: Re: مربع كاي
Author: الرشيد بابكر
Date: 25-11-2009, 08:35 PM
Parent: #201

انا ماشى راجع لى بيوت
تفتح لى ادق او ما ادق
من غير تقول الزول منو
ولا حتى عل الداعى خير
لا مالك الجابك شنو
لى بيوت بجيهن اى يوم
ان جيتا ليل ان جيت دغش
طوالى ادفر الباب واخش
مرت اضيق اختا الطريق
من بيت لى بيت
فى بيتنا كربش
ذى نسيمه معدى شيمه
لا اش لا كش
لا قطعت نوم النايمين
لا الباريه للحيشان تقش
عند شوفتى تجرى على هدم
فى محلها الشوق يترسم
تنجهنى حتان بالاسم
تندهنى عقبان تبتسم
البيت ده بيتك يا الحبيب
ادخل مخير وماك غريب
انمد فى اقرب عنقريب
مبهول فى حوضو الهمبريب
النيمه يا العنابه ضل
اغشى التكل خرمان فى شاى جيعان اكل
وداك التمر والزير قريب
بايت من البارح ملان
بايت فى صدر الهمبريب
در تقرا ديك كتب الولاد
قلقت او طال الرجا
كورك نقولك هوى بعاد
رسل لنا المرسال نجى
يا روق باحساس المحب
سيد بيت وعننا ما ضهب
الهيلنا هيلك شن ندس
ما طال عمرا ينحسب
يا السمح
يا الفنجرى القدامى
يا المامون
على بنوت فريقو
بهار ملاحن والملح
ما انذكرن لو شلخو كم
ويوماتى بينن منطرح
الدغرى
يا دخرى الطيابه
الماشرب
لا فك ريقه من الغلابه
وكلو صح
الصفا دمك
وكان سبب فى ها الجرح
انشاء الله
لا مسى لا صبح
وان شاء الله
يا بلدى المعمر بالعشم
من سف خيرنا
يكبو مح
وان شاء الله
لا فاق لا نصح
بى الله ينكر العوج
والصاح يصح

Post: #203
Title: Re: مربع كاي
Author: زينب التجاني
Date: 25-11-2009, 10:35 PM
Parent: #202

ازيكم يا شباب كيف الحال
والله من امس الجهاز بعمل حركات كرهنى فى المداخلات
قدورة
ماممكن داكى لكاشر وسكاشن كدة بتشيل ليك على الاقل مادتين

الصور دى غايتو احنا كنا فى الابتدائى

يالرشيد براحة على مهند دة حنكوش ود حنكوش خليهويطلع وسوق ليهو العجلة انت

عيد موعدنا فى العيد اهو منصور جاييكم بلدرب

بعدين لما تمشو تانى ما تخلو الانوار اطفوها معاكم ولمو عدة الشاى دى

Post: #204
Title: Re: مربع كاي
Author: الرشيد بابكر
Date: 27-11-2009, 06:02 AM
Parent: #203

أول أيام عيد الأضحى المبارك...كل عام و أنتم بخير...أحياكم الله و أبقاكم و بلغكم أمانيكم جميعها...

العيد في أبو ظبي...ما به و ما عليه...
رغم السهر الى وقت متأخر و حتى ساعات الصباح الأولى بسبب الحمى التي اصابت مهند...الا أنني حرصت على أداء الصلاة في المسجد...و كان ذلك...التهليل و التكبير وسط الجماعة في المسجد أعطاني قليل من الاحساس بعيد السودان رغم ان آخر عهدي بالعيد في السودان انه أصبح يشبه العيد في أبو ظبي كثيرا و ليس هو نفس العيد الذي كنا نعرفه زمان...
صلينا صلاة العيد والتفت الى أقرب الجالسين لأصافحه مهنئا فوجدته غير مهتم بذلك فسحبت الفكرة من رأسي قبل أن أضطر الى سحب يدي محرجا...أحد العرب يجلس قريبا مني بدأ مثلي يبحث عن مصافح..يبدو أنه أسير أشواقه مثلي...صافحته فصافحني بقوة و حب و كأنه يعرفني منذ ألف عام...أكتفيت به مهنئا و أخذت سجادة الصلاة التي لم أحتاج اليها...كنت أحسب انني سأصلي خارج المسجد...فوجدت نفسي في الصف الرابع أو الخامس داخل المسجد...أين ذهب المصلون هذا العام...ربما ذهبوا الى مسجد آخر...ربما..و لماذا كل هذه الأسئلة طالما وجدت لنفسي مكانا داخل المسجد...سألني صديقي زهير البارحة عن أسماء الروايات التي تعلق بالأذهان لموسيقية الاسم...خطر ببالي اليوم...مائة عام من العزلة...لا أدري لماذا..انه مجرد خاطر...
الخروف أو الأضحية...قمت باتصالاتي التلفونية قبل يومين من العيد لترتيب مسألة الخروف هذه..بعض الأصدقاء لهم معرفة بالمسلخ الموجود بمنطقة بني ياس خارج أبوظبي وعدوني بأن يصلني الخروف في مكاني و لا داعي للحضور...ذكرتهم أن يكبروا الله و يذكروا اسمي عند الذبح...هل تريدون أن تعرفوا اسم أمي..لا لا لا أظن ذلك فلا حاجة له هنا...لست من المؤلفة قلوبهم و لكن أحيانا تجد بعض الممارسات هي ليست من الدين في شئ ولكن مجرد عادات أو اعراف تجعلك تتشكك في ما هو من الدين و ما هو مجرد عادات أو أعراف..
حضرت الى البيت...ما زال مهند يعاني و لكنه تحسن كثيرا...نجاة يبدو عليها السهر و الارهاق..أما أمنية فهي نائمة مطمئنة و الحمد لله...ألقيت بالعمة على أول كرسي قبل ألقي بالتحية و التهنئة على أم أمنية...نجاة تركز كثيرا على الحج السنة القادمة باذن الله...هل هي أشواق...أم أنها قد حققت كل الأماني وتبقى لها منها الحج فقط...نسأل الله أن يحقق أمنياتها جميعا يا رب...
هذه خواطري عن العيد حتى الآن...أتوقف لأبدأ اتصالاتي للسودان مهنئا و معايدا الأهل و الأحباب و ألأصدقاء و من لم يصله اتصال مني يكون الرصيد كمل قبل أن أتصل به...و كل عام و كلكم بخير و عافية و يحفظكم الله و أسركم..

Post: #205
Title: Re: مربع كاي
Author: الرشيد بابكر
Date: 27-11-2009, 08:15 AM
Parent: #204

عيد لن أنساه
كانت السنة الدراسية قد انتهت في الزقازيق
حمل معظم الطلاب حقائبهم و سافروا الى اهلهم
بقينا أنا و رفعت و كيمو و حمادة
رفعت و حمادة سيقضون بعض أو معظم الاجازة بالاسكندرية..
يوم وقفة العيد سافرت الى الاسكندرية لأرافق غادة صبيحة يوم العيد الى القاهرة..
كان عمي أحمد السيد رحمة الله علية وقتها بالقاهرة ويجب تناول وجبة الافطار معه..
وصلت الى الاسكندرية و الى بيت الشابات المسيحيات بالأزريطة حيث تسكن غادة..
وجدت أن غادة قد ذهبت الى القاهرة دون أن تنتظرني...
ذهبت الى رفعت بمنزل خالته...و تحركنا أنا و هو لأسافر الى القاهرة...
لم أوفق في أن أجد وسيلة تقلني الى القاهرة..فذهبنا سويا الى محطة الرمل...
حجزت بالسوبر جيت في اليوم التالي...ثم ذهبت للمبيت معه في بيت خالته...
قضينا الليل بأكمله دون نوم خوفا من أن يفوتني البص و الذي يقوم السادسة صباحا..
عند الخامسة توجهنا الى محطة الرمل...و جلسنا مقابل البحر نبثة شجوننا...
كان أول أيام العيد...كان بائسا..حركة الناس في الشارع لا توحي بشئ..
التلفزيون الرسمي ينقل الصلاة من احد المساجد...صورة الرئيس مثبتة على الشاشة..
رغم أنه لا يؤم المصليين...الرئيس يلبس الزي الأفرنجي...شئ غريب..أين جلبابه الأبيض
أين عمامته...بعضهم يلبس العمامة هنا..ربما لا ينتمي الرئيس الى هؤلاء...
كنت أردد كم فتاة مثل ليلى و فتى كأبن الملوح...قضيا الساعات تشكو وهو يشرح
كلما حدث أصغت و اذا قالت ترنح...أحديث الموج سر ضيعاه...لست أدري...
ظللنا هكذا حتى حان موعد تحرك البص...ثم ودعت رفعت...فلن ألتقية الا في العام القادم..
فأنا مسافر الى الكويت ثم الى السودان..
ركبت البص الى القاهرة...الى شقة عمي أحمد السيد...تناولنا الفطور هناك...
كنت أنا و غادة وبنت عمي تماضر..شئ من طعم العيد و لونه و رائحته هنا...
ان رائحة العيد لا تكون كاملة الا في وجود أمي...و عصيدتها مع ملاح التقلية و النعيمية...
أما السكسكاينة فلأمي طريقتها التي تشبهها طريقة..
قضيت معطم اليوم في القاهرة و تحركت عصرا الى الزقازيق...لم يكن هنالك غير كيمو...
هنئته بالعيد...ثم ألقيت بجسدي في السرير في شقة كانت موحشة جدا من غير منصور وحمادة و رفعت..
كان لبقاء كيمو كبير الأثر في احتمال ما تبقى من أيام..

Post: #209
Title: Re: مربع كاي
Author: الرشيد بابكر
Date: 27-11-2009, 04:44 PM
Parent: #205

وجدت مداخلتين للصديقة العزيزة اخلاص محمد أحمد بالصفحة الثانية...كل عام و أنت بألف خير يا اخلاص أنت و أسرتك....نحن في انتظار عودتك و معك أجمل الذكريات...

Quote: كل سنة وانتم بالف خير
شكرا الرشيد علي اختيار اجمل موقع ملتقي لكل الاحباء من زراعة واصداقائهم الاعزاء
عفاف ياحبيبة شكرا علي الطريقة الحلوة في المنادة وانا واللة قريبة ومستمتعة بي كتاباتك انتي والرشيد
مربع كاي بجيب اي زول وين ما كان فاجمل ايام الكلية كانت في هذا المربع السحري لي عودة بكمية من الزكريات



Quote:


الرشيد ياصديق الزمن الجميل سلام من عندنا لمربع كاي هناك كلعهد بيك دائما
سباق للاقتراحات الجميلة . لمربع كاي زكريات كثيرة وجميلة فهو المكان البنتلم فيهو دائما نسأل فيهو عن حالنا واحوالنا بدون فرق بينا في لونا السياسي اي زول صاحب اي زول. لي عودة يارشيد ببعض من الذكريات

Post: #210
Title: Re: مربع كاي
Author: الرشيد بابكر
Date: 29-11-2009, 12:35 PM
Parent: #209

العيد تحول بقدرة قادر من عيد بايخ الى عيد جميل...بعد الصلاة و التي وصفتها سابقا انتظرت حتى تم احضار الخروف...أخدت لي نومة ثم صحيت لصلاة الجمعة...صليت الجمعة و رجعت لأجد البيت قد امتلأ بأقربائي المتواجدين بأبو ظبي...كانت تلك نقطة التحول...
أصوات القهقهات العالية و الونس أحالت سكون شقتنا الى ضجيج و حركة...و ظهرت الائتلافات هنا و هناك...تجمعن النساء بالمطبخ و الغرف الداخلية...يتحدثن بأصوات لا تميز معها ما يقولون ثم تتعالى الضحكات فجأة...و الأطفال في الغرف الداخلية و قد تجمعوا حول البلاي ستيشن يجلسون بهدوء شديد حتى اذا ما فاز أحدهم في لعبة ما بدأ الصراخ و الهرج...أما الرجال فتعالت أصواتهم في الصالون يتذكرون و ينكتون و يضحكون...
استمر الحال هكذا حتى ابتدأت أول الصحون في الخروج من المطبخ و معها تأتي روائح الشواء...وعاء تلو الآخر حتى امتلأت الطاولة الكبيرة عن آخرها و أصبحت لا توجد بها أي مكان لوعاء آخر...تم وضع ما تبقى في طاولة مجاورة حيث يتم احضارهم متى ما جاء وقتهم...كل الأكل كان شهيا و لكن الذي تسيد المائدة لم يكن غير صحن الشطة...و ليتة كان صحن شطة واحد بل هي عدة صحون شطة متنوعة في طرق اعدادها...شطة حمراء و شطة خضراء بالدكوة ومن غير دكوة...كان للشطة الدور الأكبر في أن يلتهم الجماعة كل ما نأت الطاولة بحملة في دقائق معدودة...و أجزم ان لو كانت نجاة ظبطت الخروف كاملا لكان الآن في خبر كان...أما الشطة و ما أدراك الشطة فلقد كانت السبب في سهري حتى وقت متأخر من الليل...فلقد قضيت الليل بطوله أتلوى من المغص...و لا أعرف أي نوع من الأنواع الذي كان وراء المغص...

احذروا الشطه خصوصا غير المقلد منها....

Post: #211
Title: Re: مربع كاي
Author: الرشيد بابكر
Date: 30-11-2009, 07:47 PM
Parent: #210

البجونا مساء...مساكم الله بالخير
و البجونا صباح ...صبحكم الله بالخير..

حكايتي عن عيد لا ينسى دي..تجر ما بعدها...و الذكريات تصف بأوصاف كثيرة مثل أنها ككرة الغزل اذا سحبت منه خيط جررته حتى آخره...كان أن كنت مسافرا الى الكويت لزيارة خالي رحمة الله علية...هذه الحكاية حكيتها في مقام آخر ولكن لا بأس من التكرار لمن هو في مثل سني...و ليس لأن التكرار يعلم الحمار...
ما قبل وصولي الى مطار القاهرة لأتوجه الى الكويت حدثت أحداث كثيرة ابطالها أنا و كيمو و كلها بسبب الفلس...و لكن في المطار قدمت تذكرتي لموظفة الطيران الكويتي فأخبرتني بأن سعر التذكرة قد زاد 10% يجب علي دفعهم و الا لن أتمكن من السفر...كان المبلغ 18 جنية مصري و أنا و كيمو الذي كان في وداعي لا نملك الا 2 جنية مصري وهي لرجوع كيمو الى الزقازيق...نظرت حولي فوجدت كويتيا يخرج رزمة من المال ليدفع عن الوزن الزائد الذي يحملة معه...تقدمت نحوه و أخبرته فما كان منه الا أن أخرج من جيبه عشرين جنيها فدفعت منها ال18 جنية و أعطيت الباقي لكيمو...ثم أكرمني الرجل و نحن في الصالة بكيك و عصير...
ما أرديت حكايته و تعجلت في السرد السابق هو انني ركبت أكبر طائرة و كانت من طراز حامبو...و أعفن طائرة...
كانت الطائرة شبه خالية و ذلك لكبرها وكان معظم المسافرين عليها من أبناء الفلاحين و الذين حسب اعتقادي يسافرون لأول مرة...كنت أجلس لوحدي في صف من المقاعد مكون من أربعة مقاعد...بعد أن استقرت الطائرة في طيرانها فوق السحاب...قدمت لنا وجبة خفيفة ثم قامت المضيفات بتوزيع كروت تعبأ لأجراءات الجوازات بالكويت...كان الوقت ليلا و أطفئت أنوار الطائرة لمن يريد أن ينام...كنت أحمل كتابا معي و لأني لم أستطع النوم أضئت النور فوقي لأقرأ في كتابي..فجأة جلس في المقعد المجاور أحد المسافرين و أظنه قد خلع حذائه قرب مقعده و ذلك من الرائحة الخطيرة التي تنبعث من قدمية...طلب مني أن أساعدة في ملئ الاستمارة...ففعلت و ساعدته...فماذا حدث بعد ذلك..بمجرد أن انتهيت من هذا جاء آخر و كان كالأول قد خلع حذائه قرب مقعدة...و استمرت الحالة هكذا...و نظرت من خلفي في الممر الطويل فوجدت عدد من الرؤوس تطل ليروا ان كنت قد فرغت من الذي يجلس بجانبي ليأتي آخر...لم أتضايق من مساعدتهم ولكني كنت في غاية الضيق من خلعهم أحذيتهم قرب مقاعدهم...قررت أن أنقذ نفسي و قررت أن يكون الجالس بجانبي وقتها هو آخرهم...و كان ذلك...حنسوني كما فعلنا مع منصور و لكن لم يفلح تحنيسهم....
لقد كانت أكبر ,اعفن طائرة...تلك الجامبو التي أقلتني و أخواني الفلاحين الصعايدة...

Post: #212
Title: Re: مربع كاي
Author: الرشيد بابكر
Date: 01-12-2009, 08:34 AM
Parent: #211


Post: #213
Title: Re: مربع كاي
Author: الرشيد بابكر
Date: 01-12-2009, 08:37 AM
Parent: #212






الشباب و البحر

Post: #214
Title: Re: مربع كاي
Author: الرشيد بابكر
Date: 01-12-2009, 09:28 PM
Parent: #213

هضربة لي هضربة أحسن الواحد يجي يهضرب براهو في الركن الحنين ده...لا تزعل زول و لا زول يصر ليك وشو...
الليلة طاري علي بجة والله...و علي بجة ده زول قلبه أبيض و مجامل من الطراز الأول...تقعد تحكي ليهو في حاجه و تكون بايخة جدا...يقعد يقول ليك يا سلام...و لا حاجة تكون ما بتهمه يقعد يقول ليك مش معقول أصلو ما ممكن...و دي من لزمات بجة...و لي مع بجة حكايات لذيذه و طريفة...لأن بجة يدخل القلب من أول وهلة...و علي مثلة مثل من زاملناهم دخلنا منزلهم بحي 114 بمدني و تعرفنا على أسرتة و هم ناس في منتهى الذوق و الكرم...
بجة أشتهر بنكاته عن الحلفاويين...ففي احدى الرحلات حكى نكته عن امام حلفاوي و خلفة مصلون حلفاويين لا يحفظون شيئا من القرآن...بدأ يصلي و قرأ سورة الفاتحة ثم سورة المسد و عندما وصل الى في جيدها حبل من مسد...نسي في جيدها...فأصبح يقول...في...في...حتى ينجده أحد المصليين ليكمل السورة...فكان أن قال له أحد المصليين من خلفة...يا أخي ما تربط في أي مكان و تريحنا...
هذه النكتة جابت لعلي بجة الهواء مع أخوانا في الاتجاه الاسلامي و اعتبروها تطاولا على سور القرآن...و أعتقد أنه سمع محاضرات كثيرة في هذا الموضوع و لم يشفع له سوى أنه كان برلوما وقتها...
عرفت عثمان حسين من خلاله..فعلي كان يعشق عثمان حسين و معظم أشرطتي التي اقتنيتها كانت من اهداء علي بجة...
من أين جاء اسم علي بجة...ياقل أن هنالك شيخا في كسلا أو القضارف يعرف بحسن بجة...فأطلق علي على حسن صالح اسم علي بجة و صار ينادية حسن بجة...و لكن حسن صالح كان ناصحا فأخذ ينادي علي بنفس الاسم حتى أصبح الناس ينادون علي بعلي بجة و نسوا صاحب الاسم...و كانت المرحومة سميرة سيد أول من ردد الاسم في الكلية ثم تبعها الجميع...
و لعلي حكايات مع عماد محجوب...كان علي يعرف كيف يغيظ عماد...فيرمي الكلام ثم يعمل و كأنه لم يقل شيئا فيغتاظ عماد و يشتم...و لكن علي باله طويل فلا يهتم كثيرا بشتائم عماد...كنت في شقة ناس علي مرة نلعب كوتشينة...فرمى علي كلمات و أخذ الجميع يضحك فأخذ عماد يشتم الجميع دون فرز...و أكثر من السباب لدرجة أنني انفعلت و قلبت الطاولة و كدت أن أضربه بها...الا أن علي هدأني بانتسامته المعهودة..

نشتاقك كثيرا يا بجة.....

Post: #215
Title: Re: مربع كاي
Author: أبوبكر حامد الأمين
Date: 02-12-2009, 00:05 AM
Parent: #214


أول حاجة يارشيد مربعك طاعم زى شربوتنا ، الله إسامحك ساهرت بى من خلال 3 صفحات من مربع كاى ، أثناء قراءتى خطر ببالى بعض الزراعيين من أبناء مدنى ، وكان على بشير حمد دافورى (بجة) فى مطلعهم ، فقد كنا برالمة وكان على بروحه السمحة يزورنا ويتفقدنا بدافع الإستقطاب الإنسانى فكانت زياراته لنا كبرالمة تغسل عنا الكثير من الأحزان سواء ماكانت نتاجاً لغربة فى صبانا الباكر أو بسبب ماكنا نظنه تجاهل السناير ( تبين لنا فيما بعد أنه بعد السنة الثالثة يزداد المرء زهداً فى التواصل عدا مع دفعته فوجدنا للسناير كل العذر) ، على رجل جميل تسربل بالإبتسامة فى كل الظروف ولاشئ البتة يستدعى الضجر فكل مشكلة وإن استعصت فهى محلولة وسهلة ، لقد (ختَّ) على ملامحه جوّاى وبداخل معظم البرالمة آنذاك ، مما جعلنى أحرص فى الإجازات الصيفية على زيارته بمنزلهم بحى 114 بمدنى وأسرته كما أسلفت أروع من كل مفردات الروعة ، أرجو ان تبلغه سلامى وتحاياى إن كنت على إتصال به ، والتحية عبرك لبت حوفى ومهند وأمنية ولكل من حولك ، ولى عودة عن أدب المساطب ومصطبة حقوق (ركن السودان) .

أحزننى نبأ وفاة خالدة يوسف ، وقد درسنا مادة الفنون بمدرسة مدنى الثانوية على يدى والدها أستاذ يوسف ، لها الرحمة والمغفرة ، لازلتُ أذكر إبتسامتها الرزينة وسؤالها الدائم عن البرالمة من أبناء مدنى ، فقد كان الحنان والوداد يشع من عينيها .

Post: #216
Title: Re: مربع كاي
Author: الرشيد بابكر
Date: 02-12-2009, 05:14 PM
Parent: #215

أبوبكر...شكرا على مرورك الجميل و الذي أضفى ألقا و جمالا على حوشنا...
جمعتنا أربعة
الزقازيق
علي بجة
مدني الثانوية..درست بها و امتحنت منها الشهادة...في السنوات الثمانية التي قضتها أسرتي بمدني...
أستاذ يوسف...فلقد درسني الفنون أيضا..

ربما نضيف اليهم خامسة وهي حبنا للمساطب...
وسادسة هي حبنا للشعر...حسبما أخبرنا به كولومبو (الزناتي)...

و عند السادسة لا نتوقف...بل نرجو أن تجود علينا بما عندك ها هنا...

نسعى لاكتشاف مزيد من الأشياء التي تجمعنا و ستجدها كثيرة جدا رغم فارق العمر...
لو عملت مقارنات مماثلة لوجدت أنك تتشابه في عدد ليس بالقليل من الأشياء مع الكثيرين من الزقازيقاب...

شكرا أبوبكر...ننتظر عودتك...

Post: #217
Title: Re: مربع كاي
Author: أبوبكر حامد الأمين
Date: 02-12-2009, 06:10 PM
Parent: #216

السادسة يارشا البنت الجدعة المدناوية الأصيلة حرمكم المصون نجاة حوفى ورفيقة دربها عزة التجانى والسابعة حب العضّة حسب حجم التميس الذى تنوء به العصبة أولو البأس ، والثامنة حب الونسة والتواصل وقد تعدّلت هذه الصفة بناءاً على توجيهات القائد خال صديقك هههههه.

تعرف يارشيد (شكلى رفعتَ الكلفة خالص) ولضرورات عملية لاتبحث عن نقاط الإتفاق بين ناس الزقازيق ففيها هدرٌ للوقت وعنت ، بل الأسهل أن نبحث عن نقاط الإختلاف ( أوجد الفروق بين الرسمين ) ، نحمد لكم ولمن سبقكم أن مهّدتم البنى التحتية لعميق الصلات وأنبلها ، فجاء انسرابنا عبر المسارات التى مهدتم ، فأشبه حالنا توصيف عمر الطيب الدوش فى غنائيته التى صدح بها وردى :

ساحات لى فرح نوَّر

وجمَّل للحزن ممشى

هذا المقطع يمثل لدى غاية ما أصبو إليه من تسامح ، ما أجمل تعبيد وتجميل ممشى للحزن.

من المفارقات أننا حين تخرجنا توجهنا للعمرة بمعية عادل الجعلى ونفر كريم من أبناء الزقازيق ، وأستأجرنا ميكروباص ليقلنا للسويس ، تجمعنا بشارع القومية وتجمع حشد من الزملاء لوداعنا ، آه يارشيد ما أقساه من فراق ، فقد أجهشنا جميعنا فى بكاء ونشيج ، تذكرت حينها كمال الشادى حين يتغنى بضنين الوعد :

وافترقنا وبعيننا المُنى

قالها الدمعُ فما أبصرتُ شيئا

وفى مرحلةٍ تالية شعرت بغربة حقيقية وأنا بين الأهل فى مدنى ، وزرت القاهرة فى العام 1991 وحرصتُ على زيارة الزقازيق والوقوف على الأطلال ، فوجدتها دون صحبى هياكل أسمنتية لاتفرح ولاتغنى من شوق ، لله در القائل :

وماحبُّ الديار شغفنَ قلبى

ولكن حب من سكن الديارا

فى العام 2003 إرتحل عن دنيانا الفانية شقيقى عمار ووارينا جثمانه الطاهر بالمدينة المنوّرة ، وغفلنا عائدين لخميس مشيط حيث استودعها أرملته وصغاره ، وقضيت أيام العزاء بخميس مشيط وفى رحلة عودتى للسودان لتلقى واجب العزاء توقفتُ بمطار جدّة ، وكانت دهشتى حين تنادى خيرة أبناء الزقازيق للمطار وهم عصام دهب وعروة على موسى وحسن سليمان وعوض عبده خليل ، كان حضورهم أكبر من إحتمالى فبكيت حزناً على أخى وفرحاً بهذه الأخوة الصادقة التى جمعتنا بالزقازيق ، فسبحان الذى أضحك وأبكى.

Post: #218
Title: Re: مربع كاي
Author: زهير الزناتي
Date: 02-12-2009, 07:04 PM
Parent: #217

والله يا الرشيد الله أداك زول حاكي وكلامه طاعم ... وإبن نكتة وخفيف الظل ... بس شايفك قلت ليهو فارق العمر وما عارف شنو داك ... عليك الله شد ليهو تلفون في البحرين إن ما لقيتو الدفعة القدامك في مدني الثانوية ... تعال لومني ... وأحسن يعترف ويقول دفعتك قبل ما تقوليهو يا عمو علي طريقة البادي ... عجبتني مداخلة بكري حامد عشان كده عايز أوديها البوست العمومي ...

Post: #219
Title: Re: مربع كاي
Author: أبوبكر حامد الأمين
Date: 02-12-2009, 07:48 PM
Parent: #218

http:// بس شايفك قلت ليهو فارق العمر وما عارف شنو داك ....عمو علي طريقة البادي

قبل ما أرد على شغب زيناتى هاك يارشيد واحد من المفارقات الحلوة ، زوجتى مولودة فى 11 نوفمبر ، وأنت مولود فى 13 نوفمبر ( قِريتا "بكسر القاف وقبله انكسر الخاطر بفراق المحبوبة ودمدنى" فى صورة عيد ميلادك - مدناوى صاحى ومفتّح )، 11 + 13 = 24 وهو تاريخ ميلادى فى شهر نوفمبر 1965 م (حتى لايظن الزناتى والمرجفون بالمدينة أنها ق.م ).

زيناتى مسئول من الخير : وين ود أختك عبدالوهاب الرجل الكارثة هههههههههههه.

والله يازيناتى أتمنى أن تشرفنى الليالى بنيل وسام (دفعة الرشيد) أفديك الساعة اليوم داك أنقشط فى فل سوت والفلاشات تشلع كشش كشش كشش - ولد ده إنت بكرى حامد ولا أوباما الملامة علَى - تررم ترم تررررم ترم

Post: #220
Title: Re: مربع كاي
Author: الرشيد بابكر
Date: 02-12-2009, 09:53 PM
Parent: #219

أبو بكر....أبو الزوز

البيت محروس وستو تكوس...
خرجنا أنا ونجاة و العيال...أنا و نجاة استهدفنا مآرب عدة...المشي على كورنيش أبو ظبي الجميل في جو شتوي رائع...انقاص الوزن واستعادة بعض الرومانسية المفقودة مع ايقاع الحياة السريع...أما أمنية و مهند فقد كانوا يحتفلون بعيدهم الوطني...فاليوم العيد الوطني لدولة الامارات العربية المتحدة...
حمل أبنائي الأعلام و رددوا النشيد الوطني لدولة الامارات و ابتهجوا للألعاب النارية التي أضاءت السماء بألوان علم الامارات...
شعرت بطعم مر في حلقي...الامارات 38 عاما من الانجاز و الاعجاز...و ها هي تضع كلتا قدميها في المستقبل بثقة و كبرياء...و قارنت حالهم بحالنا...ما زلنا نحن نرزح تحت وطأة الجهل والمرض و التخلف...و ما زالت أقدامنا تقف على رمال متحركة...

بكري نسأل الله الرحمة والمغفرة لشقيقك عمار...

بكري...لست لأني من مواليد نوفمبر...و لكن معظم مواليد نوفمبر يتميزون بميزات خاصة...لا أظن ذلك محض مصادفة...تصور في كثير من الأحيان و من خلال سلوك بعض الناس أتوجه اليهم بالسؤال...هل أنت من مواليد نوفمبر..و لدهشتي أجده كذلك...رغم برودة الجو في هذا الشهر الا أن معظم مواليد الشهر يتميزون بالسخونة و الاعتداد الشديد بالنفس...اعتقدت و لزمن طويل انه عندما يجتمع زوجين من مواليد نوفمبر فانه لا بد من تواجد قوات فض النزاعات على الدوام في هذا البيت..نترك لك الاجابة..

أبو الزوز نشكرك على تعريفنا بشخص مثل ابو بكر...

Post: #221
Title: Re: مربع كاي
Author: الرشيد بابكر
Date: 02-12-2009, 10:49 PM
Parent: #220

Quote: تعرف يارشيد (شكلى رفعتَ الكلفة خالص) ولضرورات عملية لاتبحث عن نقاط الإتفاق بين ناس الزقازيق ففيها هدرٌ للوقت وعنت ، بل الأسهل أن نبحث عن نقاط الإختلاف ( أوجد الفروق بين الرسمين ) ، نحمد لكم ولمن سبقكم أن مهّدتم البنى التحتية لعميق الصلات وأنبلها ، فجاء انسرابنا عبر المسارات التى مهدتم ، فأشبه حالنا توصيف عمر الطيب الدوش فى غنائيته التى صدح بها وردى


أبو بكر ان الكلفة دائما مرفوعة بالضمة ها هنا في هذا الحوش...ضمنا الوجد و الحنين لأيام كنا نعتقد و حتى وقت قريب بأنها لن ترجع...فرجعت هنا...ضمنا هذا المكان و نحن نحمل أشواقنا لأيام كان كل شئ فيها غض نضير...حتى مشاعرنا..
البحث عن نقاط الاتفاق هي طريقتي في تسليط الضوء على الجيد من الشياء...أعدد كل ما هو جميل و أصرف النظر عن غيره...فأقول الحب و الجمال و الاخاء...و لا أذكر الجفاء مثلا..فهو لا يستحق أن يذكر و أهمله متعمدا ختى لا يبدو و كأنه ينتقص من الكثير الجميل..
عصام دهب و عبد الحميد البرنس هم من وضعوا حجر الأساس لهذا التجمع الطيب...سبقوني آخرين في وضع البني التحتية في مقدمتهم زهير...ساهمت و معي آخرون في اعلاء الشأن...و تركنا باب الروح متاكى كما قال عاطف خيري حتى انسربتم أنتم الى دواخلنا...الى أرواحنا...لن تجدوا صعوبة في الدخول..فنحن دائما ما نسعد بمقدم النور...

Post: #222
Title: Re: مربع كاي
Author: البادي النور
Date: 03-12-2009, 06:44 AM
Parent: #221

رشيد القوم وأهل مربع كاي عموم ... كل عام وأنتم بألف خير
وربنا يحقق أمنياتنا وأمنياتكم جميعا ...
في كل الكليات كان هنالك مربع/ركن للسودانيين يتقابلون فيه يوميا
وقد كان لنا بالمعهد التجاري ركن جميل جدا ضم كل الحلوين من
البنات والبنين وكان لنا فيه أخوات وزميلات مصريات مواظبات على الحضور
والونسة في ركن السودان وكانت علاقتنا معاهم جميلة جدا وكانوا مبسوطين
معانا جدا وكان تلاقح ثقافي إجتماعي جميل خالص ...
سلام مربع لمربع كاي وكل سكانه الحلوين ...

Post: #223
Title: Re: مربع كاي
Author: الرشيد بابكر
Date: 03-12-2009, 10:50 AM
Parent: #222

البادي الجميل...سلام مربع ليك من مربع كاي...مربع كاي كان منتدى ثقافي و اجتماعي لكل ألوان الطيف في الزراعة و غير الزراعة...حتى الضيوف من خارج الزقازيق كانوا يأتون الى مربع كاي و يقضون فيه أوقات لا أظنها قد انمحت من ذاكرتهم...
و لأن لمربع كاي مكانا عزيزا في دواخلنا اردناه أن يكون ملتقى لكل أهل الزقازيق و ليس لناس زراعة فقط...لذا نرجو زيارتكم التي تسرنا و تشرح صدورنا...

نشكرك على المرور و نرجو أن لا تنقطع عنا...

Post: #224
Title: Re: مربع كاي
Author: الرشيد بابكر
Date: 03-12-2009, 05:27 PM
Parent: #223

ليلة سقوط حاج عبد الله

الجزء الأول

في صباح شتوي بارد تم تسخين الماء لمدة ليست بالقصيرة حتى يتسنى لحاج عبدالله أخذ حمامه الصباحي المعتاد...أخذ حاج عبدالله بشكيره الأزرق الكبير وجعله يتدلى من كتفه على كرشة الكبيرفيغطيه كله و لكنه لم يخفية فما زال تكور البشكير من مقدمة البطن يدل عليها...
دخل حاج عبدالله الى الحمام و تلذذ بالماء الدافئ أيما تلذذ...و كان يسمع صوته من داخل الحمام و هو يقول الله الله كلما سكب على جسده العجوز دفقة من الماء ..
أخذ وقتا طويلا و هو يستحم ثم أخذ يجهز نفسه للخروج..حرص على تدفئة نفسه جيدا حتى لا يصاب بنزلة برد من لفحة الهواء البارد وهو خارج من الحمام...تدثر بالبشكير ثم فتح باب الحمام و خرج متلافيا التيارات الهوائية الباردة...خطا خطوتين ثم فجأة...طار في الهواء ووقع على ظهره و رجله تحت جسده الثقيل و صدر صوت عالى كررررررررررج....
أخذ حاج عبدالله يصرخ...ألحقوني يا أولاد ...أنا مت ...أنا اتكسرت....هرع كل من في البيت لنجدتة...أبنائة و أخواتة و حتى أحفادة....و حاولوا اخراج رجله من تحت جسدة فكان يصرخ بأعلى صوته...تقدم محمد حفيدة و هو طالب بكلية الطب في السنة الأخيرة و تحسس رجل جده فأخبرهم بأنها قد كسرت ويجب أن تخرج من تحت جسده بطريقة صحيحة و توضع في وضعها الصحيح...ثم طلب من جده أن يتحمل قليلا و أخرجها دفعة واحد مع صرخة عالية لجده ثم قام بربطها الى جسده و طلب منهم تجهيز العربة لنقل حاج عبد الله الى المستشفى بسرعة...
تم وضع حاج عبد الله في ما يشبه النقالة وسط بكاء بناته و حفيداته وتم نقله على وجه السرعة الى المستشفى...و هناك و بعد أت تم أخذ صورة الأشعة قرر الطبيب الاختصاصي اجراء عملية بسرعة لترميم الكسر...
امتلأت المستشفى عن آخرها بكل من كان حاضرا أثناء وقوع حاج عبدالله و كل من سمع بالخبر فحضر على وجه السرعة للاطمئنان عليه...و أثناء ما كان الحاج بغرفة الطوارئ يخضع للكشف و معاينة الطبيب كانت الباحة الخارجية للمستشفى قد فرشت بها المفارش و جلسن النسوة متكدسة حولهم أعمدة الطعام و ترامس الشائ...كيف تسنى لهم عمل كل ذلك في هذا الوقت الوجيز و كيف أمكنهم الخروج من ذهولهم و هول المفاجأة ليعدوا كل هذا الطعام و الشاي...انها جاهزية تحسدهم عليها أعتى الجيوش في العالم...أنها سرعة في التحرك و التجهيز لا قبل لأي كان بها...
في مفرش كبير جلست بتول و زينب و سكينة شقيقات حاج عبدالله ..أمسكت كل واحدة منهن بمسبحتها المصنوعة من الموسكي و أخذن يرددن أورادهن ويدعين بم ايعرفن من أدعية...بتول كانت أكبرهن و كانت تتوسطهن و هي تمد رجليها الممتلئتين و تمسك بالمسبحة بيد و بمساير شعرها الأبيض و الأسود بيد...وبالرغم تقدم بتول في العمر الا أن ملامحها ما زالت جميلة...ويبدو أنها كانت شابة فاتنة و معتدة بنفسها...هذا الاعتداد يظهر في سلوكها حتى الآن..بتول ممتلئة الجسم أيضا و ربما تعود سمنتها لحبها الشديد للقراصة بالسمن و العسل...
أما زينب و سكينة فهما يتبعنها في كل حركاتها و سكناتها..ان قامت بتول يقمن و ان جلست يجلسن...فهن قد سلمن القيادة طائعات لبتول...
كان أحمد ابن حاج عبدالله و الذي يبدو من جلبابه الأبيض الناصع و عمامته الكبيرة البيضاء المطرزة باللون الأخضر أنه يعمل خارج السودان ...كان يبدو عليه القلق و كان يذهب الى حيث يرقد والده ويرجع ليقف بالقرب عائلتة الكبيرة ثم يعود من حيث أتى..تحولت اجازته السنوية بقدرة قادر الى مرابطة بالمستشفى...
في مفرش آخر جلسن فيتات متفاوتات في الأعمار..يبدو على اثنين منهن أنهم طالبات جامعيات ...قالت احداهما للأخرى ..ماذا سنقول لدكتور الزين...فانه لن يغفر لنا غيابنا عن محاضرته...فأجابتها الأخرى ..حنقول ليهو جدنا كان بيعمل عملية في المستشفى...و أظنه حيغفر لينا...
هنالك صبية و شباب توزعوا بين المفرشين..بدأ معظمهم متأثرا بالحدث...و لكن مصطفي و عبد الله بديا الأكثر تأثرا من غيرهما...مصطفى و عبد الله هما حفيدا حاج عبد الله و هم الأقرب اليه من بقية أحفاده....
جاء أحمد ابن حاج عبد الله الى حيث يجلس افراد أسرته و أخبرهم أنهم يريدون متبرعون بالدم فمن كان يعرف فصيلة دمه فانهم يريدون من كانت فصيلة دمهم (A)...قام ثلاثة من الشباب و الصبيان و بنتين و كلهم دمهم من الفصيلة المطلوبة...عندما قامت ندى الطالبة الجامعية نهضت أمها و مشت اليها و جذبتها من يدها قائلة لها...انتي ماشة وين يا غبيانة....ماشي أتبرع بالدم لي جدي يا أمي...هو انتي عندك دم تتبرعي بيهو معصعصة و كملانه من لحم الدنيا...
يا أمي الدم ما بالسمن...أنا ممكن يكون دمي أكتر من دمك...عليك الله خليني..أنا عايزة أتبرع لي جدي...
أمشي جاك مشش يكسرك...
قامت بتول بصعوبة من قعدتها على الأرض و أخذت تعدل من ثوبها و مشت الهوينى تتقدم الجميع و عندما همت سكينة و زينب بالنهوض لتلحقا بها أشارت اليهم بيدها قائلة انتو خليكم هنا ....فجاء اليها أحمد مسرعا...انتي يا عمتي مافي داعي خليكي...فنظرت اليه نظرة جعلته يتراجع الى الخلف...انت في زول سألك...مالك و مالي...
يا عمتي الناس ديل كفاية..
يا ولد أمشي كده هه...انت بالذات ما تدخل..
ليه يا عمتي عملت ليك شنو أنا...
ما عملت لي أنا ...عملت لي ابوك ده..حسة كان ما السيراميك الركبتو ده كان أبوك وقع...الحمد لله الما كتلته...
ضحك أحمد ضحكة أخفاها عن عمته...و تركها تمضي في طريقها الى حيث يأخذون عينات الدم للتحليل قبل أن تؤخذ كل الكمية المطلوبة...
في المختبر و بعد اجراء التحليل اللازم تم اختيار اثنين من الشباب و اثنين من البنات لأخذ الدم منهم...أما بتول فقد اسبعدت لأسباب صحية لم يفصح عنها الطبيب بالمختبر...تضايقت بتول كثرا لذلك و هاجت و ماجت..بل و ظنت أنها مؤامرة من ابن أخيها لأنها لم تستجيب لرغبته بالبقاء...

Post: #225
Title: Re: مربع كاي
Author: الرشيد بابكر
Date: 03-12-2009, 05:30 PM
Parent: #224

ليلة سقوط حاج عبدالله

الجزء الثاني

تم ادخال حاج عبد الله الى غرفة العمليات و قضى فيها قرابة الأربعة ساعات...كان الجميع في توتر تام في هذه الأثناء ...لم يقرب أحدهم شاي أو أكل طول هذه الفترة...شقيقات الحاج يسبحن و جلس أحمد بعيدا يدخن سيجارة تلو الأخرى في قلق بادي...كذلك البنات و الأولاد صامتون ...بعضهم يتحدث في هاتفه المحمول أحيانا .ربما يتكلم مع صديق أو قريب لم يتمكن من الحضور و يريد أن يطمئن ....
خرج اليهم الطبيب بعد ذلك ووقف مع أحمد طويلا يحدثه عن كيف كان الكسر مركبا و كيف كانت العملية صعبة بالنسبة لهم و لكنه في الآخر طمأنه بأن العملية قد تمت بنجاح تام و أن اباه بخير و سيخرج من غرفة العمليات الى الغرفة بعد قليل و نصحة بأن لا يترك أحد يزعجه على الأقل في الأربعة أو الخمس ساعات القادمة...سر أحمد لقول الطبيب و نقله الى الحاضرين فانفرجت اساريرهم و أخذوا يحمدون لله ويشكرونه على سلامة الحاج...
نقل حاج عبد الله الى غرفته و عمل الجميع بنصيحة الطبيب و كان أحمد هو الناقل للأخبار يدخل و يجلس بالقرب من أبيه ثم يخرج و يخبر الجميع بحالته..أفاق حاج عبد الله من المخدر فتالم كثيرا و قام الطبيب بحقنه بجرعة من المخدر مرة أخرى فنام مرة أخرى...
بالخارج صب الشاي و القهوة و فتحت أوعية الأكل المتنوع ...العصيدة بملاح النعيمية أو التقلية و الشعرية وتحولت باحة المستشفى الى صبحية عرس بقدرة قادر...تحول الحزن و القلق الى نهم و اقبال على الأكل بشهية مفتوحة...
في هذه الأثناء استدعى الطبيب بالمختبر احمد ابن حاج عبد الله..ذهب أحمد متوجسا لمقابلة الطبيب...و دخل اليه مبتدرا...خير في شنو....
خير...خير...أقعد
ياخي الحاجة الجات تتبرع بالدم...
عمتي...ماله خير
عمتك؟...أشك في أنها مصابة بالسكري...أنصحك تعمل ليها فحص تاني للتأكد...
طيب خير ان شاء الله...أيه رأيك نعمل ليها فحص هنا عندكم...
لو كانت صايمة و ما أكلت حاجة من أمبارح ..جيبه ..غير كده خليها تجي بكره صايمة...
.............
أفاق حاج عبد الله من المخدر و شعر بتحسن و خف الألم للحد الذي مكنه من استقبال أهله للاطمئنان عليه مجموعة تدخل ثم تخرج و تدخل مجموعة أخرى...و كانت بتول أول الداخلات كالمعتاد...ثم تبعها آخرون و عند دخول مصطفي و عبدالله حفيدا الحاج تهلل وحهه و انشرحت أساريره ...و أشار اليهم أن يجلسوا بالقرب منه..جلسا قريبا من جدهما...و أخرج عبدالله قلما من جيبه و قال لجده سنوثق لتلك الوقعة يا جدي..
وثق يا مسخوت...رد حاج عبد الله باسما...
أخذ عبد الله يرسم على الجبس الأبيض و جها لشخص بضفائر تدلى على الجانبين ثم كتب ويوووي...ويو يوو...
سأله جده ما هذا..
هذا بوب مارلي يا جدي....مغني جامايكي يغني هذه الأغنية ويوووي يو يوو...
و لماذا بوب مارلي
عشان جرستك الاتجرستها لما وقعت يا جدي...تعال امسح المسخره دي يا ابن الكلب .و.كان يضحك من داخل قلبه ثم تألم قليلا...
يا جدي نخليك ترتاح شوية نحن قاعدين بره...
أقعدوا...اقعدوا...حسة يجن حبوباتكم ديل يعملوها مناحة...
............
جلس أحمد بالقرب من عمته بتول و حكى لها ما قاله الطبيب و سألها ان كانت قد أكلت شيئا من البارحة...
كسرت أبوك عايز تجيب لي السكري كمان...
خلينا بس نتأكد يا عمتي...أكلتي حاجه من أمبارح..
آكل بي وين...الهجمة الهجم لينا أبوك دي بتخلي الزول يآكل...علي لحم بطني من أمبارح...
طيب خلاص كويس خلينا نمشي نفحص...
بري...وحات الله ما بباريك انت...
وحتى تبر حاجه بتول حليفتها كلف محمد طالب الطب أن يرافقها الى المختبر للفحص...و في المختبر كان التحليل ايجابيا مرة أخرى...و اقامت حاجة بتول الدنيا و لم تقعدها...بكت و ناحت و استدعت شيوخها و أمها و أبيها الذين ماتا منذ زمن طويل...ثم عادت لتجلس في مكانها متوسطة شقيقاتها وهي تضع يديها على خدها تفكر في محنتها الجديدة...
حاول الجميع مواساتها دون جدوى فلقد امتنعت عن الكلام لا تحدث أحدا من الذين جلسوا حولها...حاولت سكينة معها ...بتول ياختي هاك القراصة بالسمن البتريديها دي...
قراصة شنو ياختي...أنا تاني وين و القراصة وين...يا حليلي أنا...
أنتي يا بتول ياختي القراصة دي مش عملتيها انتي الصباح دحين
انتبه أحمد للحديث الجاري بين عمتيه في هذه الأثناء..
تابعت سكينة...دحين يا بتول ما أكلتي ليكي قرص قرصين بالعسل...انتي باقي ما بتقدري تمرقي من غيرها..
بري و الله..بس أكلت لي حبيبات كده خربن في الصاج...كبيت عليهم شوية سمن و عسلو قلت آكلهم قبل ما أمرق....

Post: #226
Title: Re: مربع كاي
Author: أبوبكر حامد الأمين
Date: 03-12-2009, 07:58 PM
Parent: #225

ياسلام عليك يارشيد ياخى ، تابعت بشغف بالغ ليلة سقوط حاجة عبدالله وأمتعنى سردك المشوق ، توجست خيفةً حين استدعى الطبيب أحمد بن عبدالله ، خشيت على حاج عبدالله ولكن الحمد لله جات على حاجة بتول الكاتلاها الدناوة ، تذكرت والدتى متعها الله بالصحة والعافية حين تجزم أنها لم تنم ليلة البارحة بينما شخيرها يغرى لصوص الأحياء المجاورة ، متعها الله وكل أمهات العالم بالصحة والعافية فهن بحق مواقيت للعشق.

Post: #227
Title: Re: مربع كاي
Author: الرشيد بابكر
Date: 03-12-2009, 10:40 PM
Parent: #226

بكري شكرا يا حبيب...قصصي عبارة عن حالة تعتريني فأكتبها هكذا دون مراجعة أو تصحيح...عادة ما تكون نجاة صاحبة النظرة الأولى و التعليق الأول..ثم يأتي بعدها السمكرجية زهير و الكوتش محمد صديق فيضيفون اليها ويحذفون حتى أكاد لا أتعرف عليها في بعض الأحيان كما حدث معي في قصة حاج اللمين التي تجدها في هذا البوست...و طالما أن هذا البوست ملتقى اجتماعي أدبي و ثقافي فلقد قررت أن أنشر ما أكتب مباشرة و أن أردتم السمكرة فلتكن سمكرة علنية...أضع عري بين يديكم كما قال جويده و انتم تسمكرون...فمرحبا بك في فريق السمكرجية...فزهير اختصاصي مساعدين يايات...أما الكوتش فهو متخصص في الاكسسوارات و الدهان...و يشترك الاثنان في الفرش الداخلي معا...
فلك أن تقرر بعد هذا اختصاصك..و لكني أحذرك من منافسة الكوتش في الاكسسورات و الطلاء...أما شغل اليايات فدعك منه فانه للحلب من أمثال زهير...و أنصحك بالكهرباء و الأنوار...فهي تكسب الأشياء بريقها و ألقها...

دمت طيبا...

Post: #228
Title: Re: مربع كاي
Author: أبوبكر حامد الأمين
Date: 04-12-2009, 05:47 AM
Parent: #227

أنا أسمكر ليك إنتَ يا الرشيد ، بحكى ليك القصة دى وهى حصلت بالفعل فى موقف مواصلات الخرطوم بمدنى بالسوق الجديد قبل انتقال الموقف للسوق الشعبى ، كان بص التيسير يهم بالمغادرة وكان باب البص مفتوحاً ، عبر أحد الأعراب أمام البص ولفحته الكندشة الما خمج ، فنادى على رفيقه قائلاً:

( أُمحُمَّد .... تعال شوف الهوا المَغَسول ) .

أها يارشيد أنا لو إستوعبتَ هوا كتابتك المغسول ده بدرج إسمى فى قائمة المستنيرين وربما أطالب بجائزة نوبل للآداب ، فإن حُجبت عنى الجائزة فسيكون ذلك بفعل الصهاينة والقوى الإمبريالية التى تكالبت من قبل على زميلى فاروق حسنى فى انتخابات اليونيسكو .... لقيتنى كيف؟

Post: #229
Title: Re: مربع كاي
Author: محمد صديق
Date: 05-12-2009, 06:40 AM
Parent: #228

سلامات يا ناس

رشيد يا حبيب سلام

تجدنى متعجلآ ومشوشآ...لم استطع قراءة القصة

آثرت ان اسجل حضورى واقول سآتى للقصة برواقة

واحى عبرك حبيبنا بكرى حامد...

سأعود ...

ولك الشوق كله

Post: #230
Title: Re: مربع كاي
Author: أبوبكر حامد الأمين
Date: 05-12-2009, 01:03 PM
Parent: #220

http://اعتقدت و لزمن طويل انه عندما يجتمع زوجين من موال...ت..نترك لك الاجابة..

والله يارشيد حرورية الطبع شرفٌ لا أدعيه ، أحاول قدر المستطاع النأى عن مايغضبنى فلا أقود السيارة فى الويك اند إلا لضرورات ملحة ، أتجنب أى شخص ربما يزعجنى سلوكه ، أفارق بالإحسان أى شخص بدى لى أنه لايصلح لإصطحابه فى الإطار الإنسانى وأتجنبه قدر المستطاع ، أمقت الفجور فى الخصومة وتتبع عورات الغير .

أها أجيك للأحوال الأمنية لدىَّ بالبيت ، زوجتى أعدها إحدى نعم الإله علىَّ فله الحمد والمنة، تزوجنا قبل نحو خمسة أعوام وهى أرملة شقيقى الراحل عمار ولديه منها أربعة من البنين وأفنان آخر العنقود وهى بالصف الخامس إبتدائى ، حرصت زوجتى على تنشئة الأولاد وتربيتهم على قيم فاضلة ، عزّ على أن تتحمل هذا العبء بمفردها ، ربط بيننا رابط من المودة والتحنان هو بلا شك مدد ربانى ليتربى العيال فى كنف أسرة متماسكة متراحمة ، وزوجتى على فكرة تربطها صلة قرابة بسامية يوسف إبراهيم من ناحية أمها ، بينما تربطنى قرابة بعمنا الراحل يوسف ابراهيم ، الحديث عن زوجتى يحتاج أسفاراً لإيفاءها بعض مابحوزتى لها من ود وتقدير.
أما عن حدة الطبع فى مجيرة لدينا عطاءاً متصلاً شان عيون أطفالنا ماتضوق الهزيمة ، تصور يارشيد حين أغتم أفرغ هذه الشحنات فى أعمال النظافة والمساعدة فى الأعباء المنزلية.
الجماعة جهزوا الغدا ، بجيك بى رواقة.

Post: #231
Title: Re: مربع كاي
Author: الرشيد بابكر
Date: 05-12-2009, 03:14 PM
Parent: #230

Quote: سلامات يا ناس

رشيد يا حبيب سلام

تجدنى متعجلآ ومشوشآ...لم استطع قراءة القصة

آثرت ان اسجل حضورى واقول سآتى للقصة برواقة


محمد صديق يا حبيب...تعال بالمهله للقصة و لكن مجرد حضورك سرني كثيرا...

Post: #232
Title: Re: مربع كاي
Author: الرشيد بابكر
Date: 05-12-2009, 03:35 PM
Parent: #231

بكري الحبيب...عندما قرأت نجاة ما كتبتة عن تميز مواليد نوفمبر...قالت لي و ماذا عن مواليد مايو...قلت لها انهم أكثر تميزا..خشيت أن أختبر ما يمكن أن يحدث بين زوج من مواليد نوفمبر و زوجة من مواليد مايو...فان كنت لا أستطيع تجنب القيادة في الويك اند فمؤكد يمكنني تجنب أشياء أخرى...
بكري هنيئا لك بزوجتك...فهي بلا شك تستحق ما قلته بحقها و الا لما قلته...و أنت كذلك تستحق ما تفعله من أجلك فلقد رأيت فيك أخلاق الصحابة و عزمهم...و شخص مثلك يستحق كل الخير...
مؤكد بعد أن تكفي نفسك شر بطنك ستأتينا بما هو أروع و أبدع...كل حواسي في انتظار أوبتك..فلا تغيب كثيرا...

Post: #233
Title: Re: مربع كاي
Author: أبوبكر حامد الأمين
Date: 05-12-2009, 08:53 PM
Parent: #232


إليك يارشيد أهدى قصيدة الخيل لأمل دنقل أو الجنوبى كما كان يحلو لزوجته عبلة الروينى مناداته

القصيدة أدناه هى للشاعر أمل دنقل - وهى منشورة بمجلة الشعر العدد 112 الصادر فى أكتوبر 2003 .

الخيول – للشاعر أمل دنقل


(1)
الفتوحات فى الأرض – مكتوبة بدماء الخيول
وحدودُ الممالك
رسمتها السنابك
والركابان : ميزان عدل يميل مع السيف
حيث يميل
**************
اركضى أو قفى الآن .. أيتها الخيلُ :
لستِ المغيرات صبحا
ولا العاديات – كما قيل – ضبحا
ولاخضرة فى طريقك تُمحى
ولاطفل أضحى
إذا مامررت به ... يتنحَّى
وهاهى كوكبة الحرس الملكى..
تجاهد أن تبعث الروح فى جسد الذكريات
بدقِّ الطبول
اركضى كالسلاحف
نحو زوايا المتاحف..
صيرى تماثيل من حجرٍ فى الميادين
صيرى أراجيح من خشبٍ للصغار – الرياحين
صيرى فوارس حلوى بموسمك النبوى
وللصبية الفقراء حصاناً من الطينِ
صيرى رسوماً ... ووشماً
تجف الخطوط به
مثلما حفَّ – فى رئتيك – الصهيل !

(2)
كانت الخيلُ - فى البدءِ – كالناس
برِّيَّةً تتراكضُ عبر السهول
كانت الخيلُ كالناس فى البدءِ ...
تمتلكُ الشمس والعشب
والملكوتِ الظليل
ظهرها... لم يوطأ لكى يركب القادة الفاتحون
ولم يلنِ الجسدُ الحُرُّ تحت سياطِ المروِّض
والفمُ لم يمتثل للجام
ولم يكن ... الزاد بالكاد
لم تكن الساق مشكولة
والحوافر لم يك يثقلها السنبك المعدنى الصقيل
كانت الخيلُ برِّيَّة
تتنفس بحرية
مثلما يتنفسها الناس
فى ذلك الزمن الذهبى النبيل
**************
اركضى ... أو قفى
زمنٌ يتقاطعُ
واخترتِ أن تذهبى فى الطريق الذى يتراجعُ
تنحدرُ الشمس
ينحدرُ الأمس
تنحدر الطرق الجبلية للهوَّة اللانهائية
الشهب المتفحمة
الذكريات التى أشهرت شوكها كالقنافذِ
والذكريات التى سلخ الخوفُ بشرتها
كل نهر يحاول أن يلمس القاع –
كل الينابيع إن لمست جدولاً من جداولها
تختفى
وهى ... لاتكتفى
فاركضى أو قفى
كل دربٍ يقودك من مستحيل إلى مستحيل !!

(3)
الخيولُ بساط على الريح ...
سار – على متنه – الناسُ للناسِ عبر المكان
والخيولُ جدارٌ به انقسم
الناس صنفين :
صاروا مشاةً وركبان
والخيول التى انحدرت نحو هوة نسيانها
حملت معها جيل فرسانها
تركت خلفها : دمعة الندى الأبدى
وأشباح خيل
وأشباه فرسان
ومشاةٍ يسيرون- حتى النهاية – تحت ظلال الهوان
أركضى للقرار
واركضى أو قفى فى طريق الفرار
تتساوى محصلة الركض والرفض فى الأرض
ماذا تبقى لكِ الآن ؟ ماذا ؟
سوى عرقٍ يتصببُ من تعبٍ
يستحيل دنانير من ذهبٍ
فى جيوب هواةِ سلالاتك العربية
فى حلبات المراهنةِ الدائرية
فى نزهة المركبات السياحية المشتهاة
وفى المتعة المشتراة
وفى المرأة الأجنبية تعلوكِ فى ظلالِ أبى الهول
( هذا الذى كسرت أنفه *** لعنة الإنتظار الطويل )
إستدارت – إلى الغربِ – مزولة الوقت
صارتِ الخيلُ ناساً تسيرُ إلى هوَّةِ الصمت
بينما الناسُ خيلٌ تسيرُ إلى هوَّةِ الموت !!

Post: #234
Title: Re: مربع كاي
Author: الرشيد بابكر
Date: 05-12-2009, 09:06 PM
Parent: #233

يا سلام يا بكري...انها من القصائد الجميلة للجنوبي...كنت أحفظها كاملة عندما كانت الذاكرة غضة...و كنت أحب كثيرا هذا الجزء منها....
اركضى أو قفى الآن .. أيتها الخيلُ :
لستِ المغيرات صبحا
ولا العاديات – كما قيل – ضبحا
ولاخضرة فى طريقك تُمحى
ولاطفل أضحى
إذا مامررت به ... يتنحَّى
وهاهى كوكبة الحرس الملكى..
تجاهد أن تبعث الروح فى جسد الذكريات
بدقِّ الطبول

أشكرك على أمتاعنا بها....

Post: #235
Title: Re: مربع كاي
Author: الرشيد بابكر
Date: 05-12-2009, 09:54 PM
Parent: #234

بكري ما يعجبني أيضا لأمل دنقل هذه القصيدة...



فى غرف العمليات ،

كان نقابُ الأطباء أبيض ،

لونُ المعاطف أبيض ،

تاجُ الحكيمات أبيض، أرديةُ الراهبات ،

الملاءاتُ ،

لونُ الأسرة ، أربطةُ الشاش والقطن ،

قرصُ المنوم ، أنبوبة المصل ،

كوبُ اللبن .

كل هذا يشيع بقلبى الوهن .

كل هذا البياض يذكرنى بالكفن !

فلماذا إذا مت ..

يأتى المعزون متشحين ..

بشارات لون الحداد ؟

هل .. السواد ..

هو لون النجاة من الموتِ ،

لونُ التميمةِ ضد .. الزمنْ ،

ضد منْ .. ؟

ومتى القلب – فى الخفقان – اطمأن؟!

بين لونين : أستقبل الأصدقاء ..

الذين يرون سريرىَ قبرا

وحياتى .. دهرا

وأرى العيون العميقةِ

لونَ الحقيقةِ

لونَ تراب الوطنْ !

Post: #236
Title: Re: مربع كاي
Author: محمد عيد
Date: 05-12-2009, 11:19 PM
Parent: #235

تك .. تك .. تك

شنو يا اخوانا ناس البيت ديل ناموا ولا شنو ...

يا الرشيد اها جينا نساهر معاك ... سيد الدكان الجنبكم قال لينا

الجماعة ديل ضربوا الرز باللبن بعد الكورة طوالى ...

اها بعدين تعال قول لينا ما محسوبة ...؟!

اذا كان بكرى ابو بكر زاتو حاسبها ومسجلها كمان ..!

عموما .. باكر الصباح انشاء الله جاييك ومعاى واحد من الزراعيين القدامى .. وعاشق كبير لمربع كاى

وكمان خلى قدورة يقعد يستنانا معاك .. عشان زولنا ده عندو تار بايت معاهو ... !!1

Post: #237
Title: Re: مربع كاي
Author: منصور عبد الرازق
Date: 06-12-2009, 12:52 PM
Parent: #236

اهل المربع سلام
تتصور يا رشيد شايف قصة عمنا الحاج عبد الله بى جزيئها , لى كم يوم كده
ولكن لم يتيسر لى قراءتها الا قبل قليل
احببتها
القصة طبعا
واحببت شخوصها , الحاج عبد الله نفسه , ابنه احمد , احفاده , اخواته البلابل آكلات قراصة السمن
القصة فيها قيمة حياتية عالية , وفيها اشارات تفصيلية ذكية , اشارات ابوبكر حامد الأمين اللطيفة
على حياته الأسرية مع بت شيخه ام العيال , لم يكن لتقفز الى ذهن بكرى لولا زخم قصة الحاج عبدالله
وازدحامها بمعانى واشارات الحياة وقيم العائلة , تعرف ان هذه الأشياء تنتقل كما العدوى , تشاهد
المسلسل او الفيلم من هنا وما تدرى كيف ظبطت نفسك وقد اغرورقت عيناك بالدموع , لومقف تمثيلى هنا
او عبارة من عبارات السيناريو حملت بعدا حياتيا او اسريا دافئا , وتاثيرات الوقائع الحية تانى تباعا
وبأتصال موضوعى آخاذ , تتحول باحة المستشفى الى ساحة فطور عريس , مناكفات الحاجة بتول لى ود اخوها
المغترب واتهامها اياه ان (سيراميكه هو سبب الأذية ) , اربط بينه موضوعا واحساسا مع محاولات احمد ثنى عمته
عن التبرع بالدم ثم اصرارها والحاحها حتى اتهامها (بالسكرى ) من الدكتور الفاحص , اتهام عن اتهام (يفرق)
ولكنى هنا ازيد على الأتهامين اتهاما ثالثا جديدا (من الورقة) , الأتهام هذه المرة موجه الى بكرى حامد
بأنه يتعمد الكشف الجزئى المتدرج عن (صورته الخائف عليها ) باشارات لماحة , جميلة , ذكية , مليانة احساس
ومشبعة بالمعانى , بدات باشارات شقتنا وبيتنا عند ربوة الشبان المسلمين , واستمرت الى اشارات زميلته الحقوقية
المقيمة فى جدة , ووصلت الى حالته الأسرية التى وصفتها يا رش بانها فيها (لمحات صحابية ) اؤيدك فيها , اوشكت صورتك
عندنا على الأكتمال يا بكرى حامد يا جميل رغم ان البادى النور قال غير ذلك
يديك العافية يا رش
لا تحتاج قصتك الى اى سمكرات كانت
تحتاج فقط الى (وزنة ) بلوف العواطف المتدفقة من بين السطور
ولى خاطرة متداعية من قصة الحاج عبد الله ساعود اليها (ذات فرصة مواتية )

Post: #238
Title: Re: مربع كاي
Author: الرشيد بابكر
Date: 06-12-2009, 01:21 PM
Parent: #237

Quote: يا الرشيد اها جينا نساهر معاك ... سيد الدكان الجنبكم قال لينا

الجماعة ديل ضربوا الرز باللبن بعد الكورة طوالى ...


محمد عيد...دكان شنو الجمبنا...نحن ما جمبنا أي دكان...انت تكون كتبت ورقتك و ختيتها في باب بيت تاني...بس المجهجهني الجابها عندنا هنا شنو...عموما حركاتك دي أحسن ليك تخليها...و تجينا عديل و تتحكر في واحدة من العناقيب المفروشة دي..لكن دي وحات الله ما بحسبه ليك...حسه أنا لو جيت جده و لقيتني كاتب ليك في باب الشقة حقتكم ورقة (حضرنا و لم نجدكم) و ركبت طيارتي و رجعت ابو ظبي حتعمل شنو...حتسبها لي...

ما محسوبة...

Post: #239
Title: Re: مربع كاي
Author: الرشيد بابكر
Date: 06-12-2009, 01:35 PM
Parent: #238

منص تذكر كتب كولن ويلسن (اللا منتمي) و ما بعد اللا منتمي عن سقوط الحضارة...كدت أن أن أسمي مداخلتك ما بعد سقوط حاج عبد الله و أنسبها لنفسي...فلقد أعجبني تحليلك لها لهذه الدرجة...لماذا اللا منتمي بالتحديد...لأن المضامين الفلسفية التي تطرقت اليهافي مداخلتك ذكرتني به و بكتاباته الكثيره المثيرة للجدل...و لكنك تختلف عنه في أن كل كتاباتك تلقى عندنا أهتماما كبيرا و شوقا أكبر...
أشكرك على كلماتك الطيبة بحقي و حق تلك اللحظة التي ولدت فيها قصة سقوط الحاج عبدالله..

Post: #240
Title: Re: مربع كاي
Author: عبد القادر بابكر
Date: 06-12-2009, 05:23 PM
Parent: #239

مساء الخيرات عليكم مرابطي مربع كاي ....

تابعت بشغف شديد كمية التدفق العاطفي الذي إنهال على المربع ابتداءا من الخواطر الرشيدية الراقية واندياح الخواطر الذي ألم به بمناسبة حلول العيد والذي احسب أنه عيد لحمة وملي بطون أكثر منه مناسبة للتداعي العاطفي ولكن رش حبيبنا وكما تعودنا منه متداعيا دائما ومنداحا في كل المناسبات والأحوال .. فقد كان عيده في قمة البهجة والسعادة له ولأسرته الجميلة ربنا يحفظهم ويغطيهم ويديم عليكم السعادة يا حبيب ... لا تبتئس أخي رش فما رأيناه من تكرش ( بسيط ) لديك ما هو إلا لإفراطك في اللحمة والشربوت ((( وش خبيث )))) ...

سعدت بمرور الأخ أبو بكر حامد وأعجبني ذلك الدفق الراقي والسرد الجميل وأتمنى أن يتواصل معنا دائما في مربع الرقي والجمال ...

سقوط حاج عبد الله .... سرد رائع يا رش وتسلسل جميل ومترابط أخذني في سياحة عبر الخاطر والذكرى واستحضرت معي أدبيات المستشفيات والزيارة فالموضوع لم يكن بالنسبة لعموم السودانيين مجرد زيارة لمريض وتأدية واجب بل كان جزء لا يتجزأ من سلوك الناس مثلها مثل كل المناسبات التي كانت تمر علينا تزخر بالطقوس والأدبيات والأجواء الخاصة ... وقد طافت بخاطري وأنا أقرا قصة سقوط عمك عبد الله (( الشليق )) أغنية المرحوم ابراهيم الكاشف ... يوم الزيارة .... أنا فصيلة دمي A لكن برضو ما حأتبرع لعمك عبد الله ((( الشليق ))) .....

منص حبيبنا الأبنوسي الرائع وكعادته دائما يشع جمالا وبهاءا واندياحا في كل الإتجاهات ... طلته تريح القلب وتبرد الحشا زي ما قالوا حبوباتنا الزمان .. الله يديك العافية وانشاء الله ما تغيب بي شينة ...

الباكستاني طل علينا طلة خفيفة كدة وقام جاري عموما أنا في انتظار مفاجأته الزقازيقية ومستعد ليه بكل أسلحتي .....

Post: #241
Title: Re: مربع كاي
Author: الرشيد بابكر
Date: 06-12-2009, 06:46 PM
Parent: #240

قدورة الحبيب...الله يديك العافية و ان شاء الله ما تغيب بي شينة...شكرا على التشجيع الطيب...تعال نقعد ننتظر زولنا القال جاي و معاهو مفاجأة...حسة يجيك الساعة أربعة صباحا و يقول ليك وين ناس المربع جيت و لقيت الدار خلاء...أربعة صباحا أكيد حتكون الدار خلاء...تعال بدري شوية حتلقانا قاعدين...

Post: #242
Title: Re: مربع كاي
Author: عبد القادر بابكر
Date: 06-12-2009, 07:03 PM
Parent: #241

مساء العسل عليك يارش يا حبيب ...

والله أخدت لي كم يوم كده كنت منتشر بي هناك في بوست ظريف بتاع المصممين دخلت عليه واندمجت فيهو بس اندماجي لم ينسيني الطلة من حين لآخر والمتاوقة لناس المربع واشوف الجاء منو والغاب منو ...
الباكستاني ده بيني وبينك زي السمعتو بيقول انو برنامجو اتقلب من الليل لي النهار .. وما عارفين ظروفو شنو لكن برضو منتظرين على أحر من الجمر ...

تحياتي ومنتظرين معاك ....

Post: #243
Title: Re: مربع كاي
Author: الرشيد بابكر
Date: 06-12-2009, 07:48 PM
Parent: #242

Quote: عموما .. باكر الصباح انشاء الله جاييك ومعاى واحد من الزراعيين القدامى .. وعاشق كبير لمربع كاى

وكمان خلى قدورة يقعد يستنانا معاك .. عشان زولنا ده عندو تار بايت معاهو ... !!1


صاحبك قال سيول جده أثرت في الخطوط و حرمته من التواصل ليلا من البيت...و بقول بيجي بكره الصباح...ان غدا لناظره قريب...

Post: #244
Title: Re: مربع كاي
Author: زهير الزناتي
Date: 06-12-2009, 07:52 PM
Parent: #242

يا رشدي القصة جميلة مكتملة للحد الكبير ... الجزء الأول أنضج من الجزء الثاني ... كلاهما يمكن أن يشكل نصاًً منفرداً بكامل مقوماته .. السرد جميل .. الوصف بديع ... تطور للإمام .. ومزيداً من التجويد ...

مربع كاي مدهش ... وجميل ... ومظلوم ...

Post: #245
Title: Re: مربع كاي
Author: الرشيد بابكر
Date: 06-12-2009, 08:22 PM
Parent: #244

شكرا يا أبو الزوز....

أحاول استقطاب الجميع الى المربع و لكن ما زال الجميع مرتبطون بالبوست الرئيسي...مروركم اليومي يضفي (ألقا) و يشجع الآخرون على الاهتمام بالمنبر بوجه عام و بالبوستات الموجودة به...

Post: #246
Title: Re: مربع كاي
Author: عفاف علي ميرغني
Date: 06-12-2009, 08:29 PM
Parent: #244

ازيكم 000

يا ناس مربع كاي الرائعيين

متابعة باستمتاع جدا

Post: #247
Title: Re: مربع كاي
Author: الرشيد بابكر
Date: 06-12-2009, 08:59 PM
Parent: #246

يديك العافية و يسكنك الصافية يا فافي...أين أنت و أين صديقي العجوز...أما زال اللحم يشغلكم...و الا الحكاية شنو..

Post: #248
Title: Re: مربع كاي
Author: عبد القادر بابكر
Date: 06-12-2009, 09:08 PM
Parent: #247

سلالالالالالام كبير لبتنا فافي ..
تحياتنا ليك وللعجوز حاج الركز والعيال ... انشاء الله تكونوا كلكم تمام التمام ..

يارش والله انا حكاية التار البايت دي كنت عايز أحسمها قبل ما أنوم وما كنت عايزو
يبيت أكثر من كده .. لكن معليش بكرة قريبة ....

أبو الزهور ..
تحياتي وسلامي ليك ....

Post: #249
Title: Re: مربع كاي
Author: عفاف علي ميرغني
Date: 06-12-2009, 09:09 PM
Parent: #247

يا رشا 00
مساء الخير

دا الشريوت وانت الصدق

Post: #250
Title: Re: مربع كاي
Author: الرشيد بابكر
Date: 06-12-2009, 09:24 PM
Parent: #249

فافي شربوت عاشر يوم ده بيعمل أكتر من كده...الله يفكها...

و صاحبي ده لسه غاتس في الجردل و لا شنو...صحيهو قول ليهو خلاص الدوام بدأ...


قدورة يا حبيب...طول بالك فغدا لناظره قريب...أسمع كلامي...

Post: #251
Title: Re: مربع كاي
Author: محمد عيد
Date: 06-12-2009, 09:48 PM
Parent: #250

رشا وقدورة ...

والله انا ما طنشت لكن زولكم ده ورطنى قدر ما قعدت منتظروا

لسه ما جهز اسلحتوا او كما قال ...

بعدين مشيت أحلق التفــّة الفوق راسى دى ...

جيت لقيتوا قاعد يكتب وينظر ..

عموما انتو ما كبار وشياب .. كان نعستوا انبطحوا فى عناقريبكم

وانا بجيكم انصاص الليالى واخت ليكم كلامو فى صينية العشاء واغطيها ليكم

بطبق السعف الملون .. عشان الضبابين والضببة وكده ..

Post: #252
Title: Re: مربع كاي
Author: الرشيد بابكر
Date: 06-12-2009, 10:00 PM
Parent: #251

و الله لكن انت زول بياع...مش انت بس...انت و صاحبك الجايبو لينا ده...هو ينمق في الكلام و انت تمشي تحلق تفتك و نحن قاعدين...قصدي و أنا قاعد منتظركم...أعتقد قدورة قرش قبيل و عمل بنصيحة الكوتش..قضى حوائجة بالكتمان و مشى نام...أنا غايتو بنتظرك نص ساعة تاني..جيت جيت و كان ما جيت ياني الماشي ألحق صاحبي...

عليك الله ما تكركب..

Post: #253
Title: Re: مربع كاي
Author: محمد عيد
Date: 06-12-2009, 10:04 PM
Parent: #252

يا زول امشى نوم نومك ...

زولى ده دغيل دغالة ... ولميض لماضة ...

رغم انو الشى الجايبو ده بيفرفش ويبهج البوست ده بالذات

غايتو معليش كمان هو عشان السن وكده الواحد لازم يعذرو شوية

والله يا رشيد لوشفت نظارتو تقول بس تلسكوب ..!!

Post: #254
Title: Re: مربع كاي
Author: الرشيد بابكر
Date: 06-12-2009, 10:08 PM
Parent: #253

كبير في السن و نضاراتو تلسكوب...ده الا يكون جمال عبد اللطيف....أحمد صالح أكبر مني غايتو لكن و نضاراتو تلسكوب بس مستبعد يكون معاك....

ألحقني بالكركم...

Post: #255
Title: Re: مربع كاي
Author: محمد عيد
Date: 06-12-2009, 10:17 PM
Parent: #254

يا ريت يا رشيد لو الواحد لقى جمال عبد اللطيف ...

هو زول تانى .. لكنك برضو قربت ..

قدورة العجوز لو ما نام كان عملتها ليكم مسابقة هسه

عموما امشى نوم وباكر انشاء الله الصباح .. يكون الجلكين ده خلص هضربته ..!

Post: #256
Title: Re: مربع كاي
Author: الرشيد بابكر
Date: 06-12-2009, 10:22 PM
Parent: #255

هو بيهضرب في شنو جلكين الجن ده...أها طيرتو النوم من عيونا...منتظركم نشوف آخركم شنو...و الله بكره لو رفدوني من الشغل تكون انت و هو السبب..

Post: #257
Title: Re: مربع كاي
Author: الرشيد بابكر
Date: 06-12-2009, 11:28 PM
Parent: #256

بعد كدة أفتكر ما قصرت معاكم و عملت حق الضيافة و زيادة...البيت بيتكم تعالوا أدخلوا وقت ما انتو عايزين و كان عايزين تنومو العناقريب مالية الحوش و كان الجو برد..كا واحد يجر ليهو بطانية من العناقريب الفاضية...

أها ودعتكم الله...

Post: #258
Title: Re: مربع كاي
Author: الرشيد بابكر
Date: 07-12-2009, 08:17 PM
Parent: #257

تواصُل....كلمات هاشم صدّيق

شقشقت عصفورة
من جنة عيونك
صحصحت نجمة
وزهت فى ليل عنيه
من سلامك
طرقع الفرح الأصابع
وانتبه وترى النعس
فى برد ايدى
هش صوتك
سكسكت نحلة وسرت
من بين شفايف
ورده لى حضن الخلية
وشكشكت مطرة
وبرق عبادى
فى الافق الرمادى
واستحمت خاطرة فى موج العشية
جيتى من وين يا بينة
تدى للشمس الكبارى
تلغى تعسيلة العصارى
وتدسى حاجات للطوارى
وتلمحى النبضة الخفية
جيتى من وين يا بنية
قاطعة وديان الخرافة
ضامة الواح الشرافة
طايرة بجناح المخافة
عاطنة ثغرك فى الظرافة
ناقعهة داندرمة وطرافة
وشايلة للجايات هدية
كلمة فالحة وبندقية
غابة حنة وصندلية
جيتى من وين يا بنية
وقبلك الساعات حوافى
والاسف عشق القوافى
المنافى تلد منافى
وكل سمحا شين ومافى
والزمن خطواتو
ماسخة ودائرية
جيتى من وين يا بنية
بى سلامك
طرقع الفرح الأصابع
وانتبه وترى النعس
فى برد ايدى
فى حضورك
ما وعيت سفر النهار
إلاّ ساعة المغربية .

Post: #259
Title: Re: مربع كاي
Author: الرشيد بابكر
Date: 07-12-2009, 09:00 PM
Parent: #258

مرت 24 ساعة دون أن يحضر محمد عيد أو ضيفة..
هل ما زال ضيف محمد عيد ينمق في الكلام؟ لست أدري...
هل هنالك مشاكل تقنية تقف بين محمد عيد و انزال الفايل الضخم الذي أعده ضيفه؟
أم انهما قد صرفا النظر عن انزال ما وعدنا به محمد عيد؟؟؟

هي اسئلة مشروعة تدور في ذهني و أنا ما زلت أعاني من سهرة البارحة منتظرا محمد عيد و ضيفة...
هذه الليلة ليس لي نفس القدرة على السهر و الانتظار...لذلك سأغلق عني الحوش في الوقت المناسب اذ ليس من المناسب أبقاء الباب مواربا طوال الليل في ظل الظروف الأمنية الراهنة...

شغلت نفسي بالاستماع الى أغنيات الصديق حمزة سليمان و حاولت انزال أغنية تواصل للأستاذ الشاعر هاشم صديق و لكن باءت محاولاتي كلها بالفشل الذريع ولا أدري ما هي المشكلة..هل هي في كمبويري أم أن حجم الملف أضخم من المسموح به...فاكتفيت بانزال كلمات الأغنية الجميلة و التي ان قرأتها دون الاشارة الى اسم شاعرها لعرفت أنه هاشم صديق...فمثل تلك المفردات لا يأتي بها الا هاشم صديق و هو صاحب مدرسة متفردة خاصة به...

الحزن يسود البوست على المنبر العام...و كنت قد تحدثت الى الأخ صالح تبلدينا مساء اليوم عبر تلفون الأخ زهير الزناتي فوجدته حزينا...و أنا له أن لا يحزن...فلقد والده و لا شك ان من يفقد أحد والدية يحزن حزنا شديدا...ليتنا نستطيع مواساته بقدر فقده و لكننا لا نملك الا أن نواسيه من على البعد...قلوبنا مع صالح و هو يعيش هذه الأيام الحزينة عليه و نسأل الله أن يجعلها آخر أحزانه..

Post: #260
Title: Re: مربع كاي
Author: أبوبكر حامد الأمين
Date: 07-12-2009, 10:08 PM
Parent: #232

http://و أنت كذلك تستحق ما تفعله من أجلك

ياسلام عليك يارشيد وعلى فهمك الراقى ، حقاً أفعل مافعلته لأجلى ، لا أحبذ الحديث عن ظروف زواجنا خشية أن أشكر على مالايستوجب الشكر ، غير أنى فى هذا المقام لم أتردد لحظة فى إثارته لهاتف داخلى طمئننى ان الوعى هنا جد مختلف ، ولم تخيب ظنى فيك ، فيا سعداى بك.

Post: #261
Title: Re: مربع كاي
Author: الرشيد بابكر
Date: 08-12-2009, 06:26 AM
Parent: #260

Quote: ياسلام عليك يارشيد وعلى فهمك الراقى


بكري الحبيب...عندما نتعرف على أشخاص مثلك و تجارب مثل تجربتك فلا شك انها ترتقي بنا الى آفاق أرحب...لكنها ليست كآفاق كسودانير...و تسمو بنا...و درس بل دروس نتعلم منها الكثير...ان تجربتك يجب أن تحجب الظروف المحيطه بها حتى تبقى نموذج نادر نتعلم منه كيف نتحرر من أنانيتنا...
أسعدني جدا التعرف اليك و التحاور معك في هذه المساحة الضيقة و أرجو أن نلتقي في مساحات أوسع.. و لربما التعرف اليك يعيدني يوما ما الى المكان الذي أحببته و بعدت عنه لزمن ليس بالقصير ألا و هي مدني الجميلة...مدني التي فارقتها قبل تخرجي من الجامعة و كنت أزورها كلما تسنى لي ذلك حتى انقطعت عنها انقطاع المحبين و فارقتها فراق الطريفي لي جمله..
لا شك ان عودتي الى مدني ستكون عودة ظافرة...ظافرة بك و ظافرة لأني سألتقي ان شاء الله ياسر لورد و أمين فريجون و صلاح حسن حسين...و هؤلاء ربما تعرف منهم ياسر لورد فقط...و لكن ان قدر لك أن تتعرف على هؤلاء أيضالعرفت لماذا يمتلئ صدري بهذا الكم من الأشواق لمدني الجميلة و لربما رددت معي أبيات حميد...وطنا حبيبنا رغم البين هي الأشواق...حنينا ليك زين يا زين يظل دفاق...

شكري بكري...و الى لقاء

Post: #262
Title: Re: مربع كاي
Author: الرشيد بابكر
Date: 08-12-2009, 07:45 AM
Parent: #261

بعدي عن أبوظبي ساعدني كثيرا في التخلص من مشكلة كبيرة ألا و هي التسوق...و كلما دخلت سوقا للتسوق تجدني أبحث فيه عن مكان بيع العطور...و بالرغم من أنني أصبحت لا أذهب الى السوق كثيرا كما كان الأمر من قبل الا انني أقتني عدد مقدر من زجاجات العطر موزعة بين شقتنا في أبو ظبي و سكني في مقر عملي...و كثرة التسوق من محلات بعينها ساعدني في استخراج بطاقات عضوية تمنحني تخفيضا عند الشراء لدي احدى المحلات الكبيرة المشهورة عالميا و محليا...تتنوع عندي العطور و لا أستقر على نوع واحد...فكثيرا ما أتعطر بنوع ما فأجد كثيرا من الناس يسألونني عنه فأقرر أن أستمر فيه و لكن ما أن أذهب لشراء عطر جديد الا و تجدني قد أحضرت غيره...الا الأرامس ديفين فلم أستطيع تغيرها ابدا...هنالك العديد من العطور التي تفوق الأرامس...و لكن الرامس دائما تعلو عليهم...و السبب في ذلك عاطفي ليس الا...
ما هو الحب الشديد الذي ربط بيننا و الأرامس...الحقيقة عندما أتينا الى مصر كنا نعرف بعض أسماء العطور أما الرامس فيرجع الفضل في معرفتنا بها الى أخي و صديقي رفعت نور الدين...

سوف أكمل......

Post: #263
Title: Re: مربع كاي
Author: محمد صديق
Date: 08-12-2009, 08:33 AM
Parent: #262

سلامات يا ناس

رشيد الحبيب ...سلام وشوق

القصة ..جميلة

موجودة فى الواقع...الشخصيات معروفة لدينا

وتصادفنا كل يوم ونراها ونتعامل معها....

رسل لى قراصة بالعسل..واعفينى من فحص السكر.

صلاح حسن حسين ...هل هو الدكتور الصيدلى؟؟؟

Post: #264
Title: Re: مربع كاي
Author: الرشيد بابكر
Date: 08-12-2009, 10:07 AM
Parent: #263

Quote: صلاح حسن حسين ...هل هو الدكتور الصيدلى؟؟؟

نعم هو الدكتور الصيدلي...درسنا معا في الأميرية مدني ثم مدني الثانوية...ثم افترقنا أنا الى الزقازيق و هو الى العراق...

القراصة بالعسل جاياك في الطريق....و ما تطول الغيبة يا كوتش رغم مشغولياتك...

Post: #265
Title: Re: مربع كاي
Author: منصور عبد الرازق
Date: 08-12-2009, 12:14 PM
Parent: #264

وانا ايضا اعرف الدكتور صلاح حسن حسين
بالرغم من اننى قابلته لمرة واحدة فقط
الا انها كانت كافية لأن تنطبع صورته عندى واتذكر حتى طريقته فى الكلام
تعرفت عليه فى زيارة لمدنى انا والرشيد
هذه الزيارة اسميها بينى وبين نفسى
زيارة فول الجزيرة
لأنى اكلت فيه فولا فى نادى الجزيرة
هو مقياس الفول عندى
ترمومترات التقييم الفولى عندى تنسب الى فول نادى الجزيرة
اى فول بعده ياخذ درجته القياسية من ذلك الفول
لعلمكم كان الفول مدسوسا بين صحون الكبد والكلاوى
ومحاطا بالأسماك واللحوم والشطوط
لكنه بزاها جميعا وقال ليها , قومى وانا اقعد محلك
يا ربى لأنو المطرة كانت رزاز ؟؟جائز
يا ربى لأنو كانو معانا ناس مها عبد الرحيم محمود واحسان عوض
والمرحومة نور الشام , برضو جائز
ثم ذهبنا الى بيت ناس صلاح حسن حسين
فى الدرجة , ولا الحى البريطانى , ولا الأتنين نفس الأسم لنفس الحى ؟؟!!
قعدنا مع صلاح حسن حسين فى بيتهم وكان ما اخاف الكذب بتنا كمان
اين هو يا رشيد ؟؟؟

Post: #266
Title: Re: مربع كاي
Author: الرشيد بابكر
Date: 08-12-2009, 01:24 PM
Parent: #265

Quote: اين هو يا رشيد ؟؟؟


قبل ما أمشي أنوم أرد على منصور باختصار عشان يمشي هو كمان يلحق بت شيخه الشفافة أختي أماني...يا منص لقد انقطعت أخبار صلاح حسن حسين عني منذ زمن ظويل...و الله كم أشتاق اليه..أرجو أن أجد من يصلني به..

أختي أماني شفافة بالمعنى الذي قصدته و بالمعنى المجرد...فهي عندما تزاملت مع أختها بعد أن تحولت الى كلية الاقتصاد من الزراعة بعد زواجها من منصور رأت أنه لن تنضبط أحواله الا اذا درست له الاقتصاد...تزاملت أماني مع أختها و كانت تحضر من السعودية لأداء الامتحانات..فكانت تشف من أختها حتى تنجح غي الامتحانات لذلك فان أماني شفافة بالمعنى المجرد...
كذلك تزاملت أنا و أخت أماني في الدبلوم التمهيدي للماجستير بجامعة الخرطوم...لم أكمل الماجستير فلقد قررت وقتها أن أغتنم الفرصة و أهاجر الى الامارات...فلم تستمر زمالتنا و لم تبدأ شفافيتي ولكن استمرت شفافية أماني...
أماني هي نصف منصور ان لم تكن كله الحلو...

أماني لو قرأت هذه المداخلة لقالت لمنص صاحبك الشليق ده عرف من وين اني منتظراك...انتو بتقطعوا فيني ولا شنو...

Post: #267
Title: Re: مربع كاي
Author: حنان مجمر
Date: 08-12-2009, 02:02 PM
Parent: #202

سلامات ياالرشيد قصيدة الحلمنتيش الظريفه دي فيها احلى تجسيد للحياة البسيطه والرائعه في السودان بترجعك لاحلى احساس لايمكن ان تصادفه في كل المحطات والمتاهات العريضه

ياالمامون علي بنوت فريقه والله بالجد ذكرتني اخوتي الاعزاء الزقازيقاب كانوا تجسيد للمعاني الساميه والاخاء الحقيقي عشان كدا هم دائما على بالنا اينما حللنا ونزلنا

Post: #268
Title: Re: مربع كاي
Author: زهير الزناتي
Date: 08-12-2009, 03:25 PM
Parent: #267

Quote: فكثيرا ما أتعطر بنوع ما فأجد كثيرا من الناس يسألونني عنه فأقرر أن أستمر فيه و لكن ما أن أذهب لشراء عطر جديد الا و تجدني قد أحضرت غيره...الا الأرامس ديفين فلم أستطيع تغيرها ابدا...هنالك العديد من العطور التي تفوق الأرامس...و لكن الرامس دائما تعلو عليهم...و السبب في ذلك عاطفي ليس الا...


والله يا الرشيد الموضوع ده غلبني افوتو ليك كله كله .... بتاع العطور ده ... المرة الأولي قلنا معليش تقوم تجيبوا لينا تاني ... ياخي ما تراعي مشاعرنا انا وأخوي الكاشف (بكري حامد) يعني عشان ما بنعرف انواع العطور ... طبعاً الواحد بقي يتريح قريب ده .... اها الاولاد في نمرة (2) حايميين بالريحة السمحه دي القارورة بعشرة جنيه ... اصلية ولا تقليد ما تعرف ... مهربة ولا مجمركة الله اعلم ... المهم تشوف أسمح فتيل وتتوكل علي الله .... وأكيد بتطلع سمحة ....

الرشيد يا حنكوش ... ياخي ما تعقدونا ....
أحب الأرامس ذاتو ....

Post: #269
Title: Re: مربع كاي
Author: الرشيد بابكر
Date: 08-12-2009, 03:37 PM
Parent: #267

حنان المجمر...شرفتينا بزيارتك الكريمة...نحمد الله أت غيض لنا هذا المكان لنلتقي فيه مرة أخرى بعد سنوات طويلة...أخوات و أخوان اشتقنا ليهم و تمنينا أن نلتقي بهم..فها نحن نلتقيهم اسفيريا كل يوم و نعرف أخبارهم و ندخل بيوتهم و نتعرف اخوة لم يجمعنا بهم المكان فنلتقيهم هنا...
زي ما شفتي الحوش مفرش و الترامس مليانه بالقهوة و الشاي فأرجو أن تمري علينا كل يوم فستجدي ما يسرك و تلتقي باخوة و أخوات أعزاء...

Post: #270
Title: Re: مربع كاي
Author: الرشيد بابكر
Date: 08-12-2009, 03:59 PM
Parent: #269

Quote: اها الاولاد في نمرة (2) حايميين بالريحة السمحه دي القارورة بعشرة جنيه ... اصلية ولا تقليد ما تعرف ... مهربة ولا مجمركة الله اعلم ... المهم تشوف أسمح فتيل وتتوكل علي الله .... وأكيد بتطلع سمحة ....


و الله يا أبو الزوز ضحكتني من جوه قلبي...لكن انت ما صبرت علي يا أخوي...أنا بديت الموضوع الصباح و لصعوبة الكتابة بالصباح لم أكمل الموضوع...الموضوع كان مدخل للكلام عن رفعت نور الدين...و هو من أبناء الخرطوم 2 ..كان بيفهم في الأرياح و الموضة أكتر مني أنا و أخوي الكاشف منصور...أنا و منصور كنا زيك كده...و قت خلاص اتحضرنا و عرفنا الريحة كنا بنجيب حاجه اسمها Open و هي موجودة حتى الآن...و لكننا تعلمنا من رفعت أسماء العطور زي الأرامس و الجاكومو و الباكوربان...و أسماء بناطلين الجينز و الحاجات دي...
و لحدي ما جيت الامارات لم أزد على هذه السماء الا اسم أو اسمين...و لكن بمجرد أن وصلت الامارات و احتكيت باللبنانيين و السوريين وغيرهم من الشعوب التي سبقتنا كثيرا في هذه الأمور ابتديت يا دوب أتعرف على الأسماء المشهورة للعطور و الساعات و الملابس...هي ثقافة مهمة جدا هنا وو جدنا أنفسنا ننهل منها...
مرة يا أبو الزوز راكب لي تاكسي في أبو ظبي...فسألني سائق التاكسي الباكستاني و هم على فكرة من أفقر فئات المجتمع هنا...الباكسانيين و السودانيين و الصوماليين...سألني عن العطر الذي أستعمله..قلت له و الله ما عارف اسمه و لكنه عطر غالي...بمقاييسي في ذلك الوقت..كان غاليا..قال لي بي كم...قلت ليهو بي أربعين درهم...فضحك حتى كاد أن يفقد السيطرة على عربيتة...فأخرج لي زجاجة عطر و قال لي بلهجته العربية المكسرة...هذا بي سبعين درهم...فسكت حتى أوصلني الى وجهتي...
الحنكشة دي بدت قريب يا صديقي...لكن حسة خلاص بقيت أستاذ في الفشخرة...و الحمد لله الذي أنعم علينا و بقينا نعرف الماركات العالمية و نتفشخر...

Post: #271
Title: Re: مربع كاي
Author: محمد عيد
Date: 08-12-2009, 06:33 PM
Parent: #270

حبيبنا الحنكوش الفرفووووش ابو الروش ..

عارف انى زعلتك ...

وعارف انى نرفزتك ..

وعارف انى دبرستك ..

لكنى كمان عارف انو ...

أبيض عارفو قلبك ...

وكلو حنان وطيبة ...

&&

اتأخرنا عليك انا والضيف العجوز ..

اول من امس ليلا .. بسبب السن وضعف ديناميكية الحركة والانجاز ..

وامس بسبب الظروف المحزنة لاخونا وحبيبنا صالح تبلدينا ..

واليوم نهارا ... تسببت ظروف تقنية خارجة عن الارادة فى التأخر

الآن .. اتيت ووجدته قد رمى بكل أوراقه وشتتها فى كل الانحاء ...

وخرج طفشانا يهيم بوجهه الى أين لا أدرى ..!!

سأحاول فيما يلى ان اجمع لك بعضا من شتاته المبعثر ما بين هنا وهناك ...

Post: #272
Title: Re: مربع كاي
Author: محمد عيد
Date: 08-12-2009, 06:43 PM
Parent: #271

ألف شوق
وميّة باقة من الذوق ..
ومليون حب منى ليكم يمشى يوصل
من أهلكم .. من بلدكم
من ترابكم .. من أرضكم
دون يكل لو لحظة يكسل
والف تحية الف سلام
من الاعماق من الوجدان
للاخوات وللاخوان

Post: #273
Title: Re: مربع كاي
Author: محمد عيد
Date: 08-12-2009, 06:48 PM
Parent: #272

ويواصل معكم عجوزنا الظريف ..

&&&&&&&&&&&&&

عاد بى الزمن كم وكم حول
رجعنى كم خطوات
ذكرنى كل الفات
وكت ما كنتو و كنا معاكم
بنشرب من شراب الغربة وزادها كم نقتات
وكت ما نغادر السودان
حنين فياض بيتدفق
حين ما نودع الاخوان
ونركب فوق جناح الشوق
نودع بالدموع حبان
وننزل جوه فى القاهرة
وفى قلب المدينة كمان
ونتفرق جوه فى ارض الكنانة نروح
بعد سفرا طويل ومسيخ يســل الروح
بيننا تدور الايام ويتم العام
ونبدا الرحلة للسودان
رحلة عودة للاوطان
رحلة عوده للاهل الحنان وحنان
وليلة الرحلة نتأرق مضاجعنا
ويمر الليل طويل وتقيل
ونتخيل وصلنا بلدنا خلاص
واخدنا الناس وكل الناس وبالاحضان
نسالم ده ونقالد داك
دموع اماتنا تجرى تســيل
وفوق هدماتنا تتقطر
حنين فياض سيوله شديده تتحدر
براكين شوق تطق جوانا تتفجر
وفجأة تهزنا الواطة
ونلقى نفسنا لسه هناك وما أكثر ...
ولسع مدة من السد .. سفر ايام بيرجانا متحكر
ويزيد الشوق كتير واكتر
وحبل الصبر يتمدد ودروب الرحلة تتمدد
متين يا الله بس تقصر
وفجأة تبين ملامح ارضنا الطيبة
ونحس بقليبنا دقدق دق
لما الصدر صابو الشق
وده العنوان وصلنا خلاص
وده السودان وديل الناس أهل بلدى
وتطول أكثر مسافة الرحلة
لمن تظهر بوادر حلفا فى الســكة
وكت نوصل بنتسابق
وننزل ارض حلفا .. نشيل من طينها نتعفر
ويهدأ الشوق ونحس اعماقنا مرتاحة
وجبال الهم قصاد عينينا تتكسر
حلاة بلدى واهل بلدى وتراب بلدى

Post: #274
Title: Re: مربع كاي
Author: الرشيد بابكر
Date: 08-12-2009, 06:49 PM
Parent: #271

يا محمد عيد يا أخوي الفيك اتعرفت و لي حسه ضيفك ما اتعرف...أنا قاعد منتظركم لملموا شتاتكم و تعالوا...أنا قاعد من كورة لي كورة ما وراي حاجة...

Post: #275
Title: Re: مربع كاي
Author: محمد عيد
Date: 08-12-2009, 06:54 PM
Parent: #274

Quote: أنا قاعد من كورة لي كورة ما وراي حاجة...


يا رش انا قاعد انزل ليك شتات الجلك ده بى نص عين

عين مع الكمبيوتر وعين مع الكوره فى التلفزيون ..

**********

جاييك لى اسم الضيف ... لكن اولا بانزل ليك ليهو صورة

واذا ما عرفتو يانى الشاحن ليك الكركم مع السيول

Post: #276
Title: Re: مربع كاي
Author: الرشيد بابكر
Date: 08-12-2009, 07:01 PM
Parent: #275

غايتو ضيفك كلامه سمح بالحيل..ان شاء الصورة تتستر معانا...شكله كده خالد سقد...

Post: #277
Title: Re: مربع كاي
Author: محمد عيد
Date: 08-12-2009, 07:03 PM
Parent: #275

يستمر عجوزنا فى التسفار والحنين الى مآلاته وأشواقه التى فارقها منذ القرن الماضى ..!!
&&&&&&&&&&&


شريط الذكرى بيرحل بى
ويذكرنى مربع كاى
معلم فكرى سيد الشاى
وعم عمر وكت يوصل ويجينى جواب
أفطر شوق يفور جواى
وعمى الخير .. سيد الخير فى معمل نباتو هناك
قلب عمران بكل الخير
فؤاد مليان
شتول عزه وصفات انسان
وخفة روح .. بر وتقوى عظيم ايمان
وشيخ أسعد ...
صاحب الكاميرا والالوان ..
وأخو الاخوان
أصلو مبدع وكمان فنان
وقسم الصناعات كمان
زباديهو وعصيره الطاعم الفنان ...
وحفلاتنا وكتين نقيف نستقبل الاخوان
رفاق الدرب والسكة
الجداد جايين ولسع فيهم الريحة
ريحة الارض والسودان
والامات والاخوات والاخوان
والاعمام والخلان
والجدّات والحبّان ..
وكت ما نودع الخريج
نتوج هامته تاج العز
ويرجع للبلد رويان ..
بموية العلم ويسقى الارض والطين
ويروى الجرف الفضل نشفان
ولســع بيتنقل بى شريط الذكرى يا الحبان ..
ويذكرنى كل الناس واحلى الناس واغلى الناس
أهل بلدى ، ولاد بلدى وبنات بلدى
وهسه من بره البلد ..
وفوق جناح الفجر والأنسام ..
بارسل ليكم أخوانى واخواتى ..
ألف شوق ..
ومية باقة من الذوق
ومليون حب ...
يطير ليكم من كل مكان ..
وينقل ليكم اسمى غرام
يفيض بالخاطر الجياش
وأحلى كلام ..
وأغلى حنان
وفى خاتم القول بحييكم
وأخليكم بألف سلام ..

Post: #278
Title: Re: مربع كاي
Author: محمد عيد
Date: 08-12-2009, 07:15 PM
Parent: #277

اها انشاء الله عرفتو يا رشيد

قدورة طبعا عامل نايم ...!


Picture054.jpg Hosting at Sudaneseonline.com

Post: #279
Title: Re: مربع كاي
Author: الرشيد بابكر
Date: 08-12-2009, 07:24 PM
Parent: #278

يا سلام يا سلام يا سلام...يا سلام...يا محمد عيد...تجيب لي حسن بجة زاتو...ياخي و الله غفرت ليك كل الجهجه الجهجهتني ليها و الانتظار الممل الطويل...حسن بجة الذي أطربنا و أمتعنا...اخ و صديق عزيز كنت أزوره عندما كان يعمل معلما في مدرسة بالجريف بالقرب من كلية الخرطوم التطبيقية و اذكر أنه كم كان معلما محبوبا و كان أبويا و تربويا مع تلميذاته...و لا زلت تلك الرحلة في أحد المزارع و التي صدح فيها و معة فرقة الفنان علي أبراهيم اللحو...فأبدع فيها أيما ابداع و ذكرناها فيها بالأيام الخوالي...

يا سلام يا محمد عيد...ألف مرحب بي حسن صالح...مرحب بي بجه سيد الاسم...و الله الحوش نور..يالطليت فرحت قلوبنا و يا الهليت الليلة و جيتنا...

Post: #280
Title: Re: مربع كاي
Author: الرشيد بابكر
Date: 08-12-2009, 07:37 PM
Parent: #279

مرحب بي حسن صالح الانسان الفنان...الأخ و الصديق...الانسان المؤدب المهذب اللطيف...و الله مشتاقين شوق شديد...كنت أعرف أنه بمنطقة القصيم شنو الجابو جدة...بالله بلغه تحياتنا الحاره و أشواقنا الشديدة و قول ليهو بركه الظهرت و بنت و ان شاء الله نتواصل معاك و تتواصل معانا من خلال هذا البوست و غيره ان شاء الله...

شكرا يا محمد عيد على المفاجأة الجميلة...

Post: #281
Title: Re: مربع كاي
Author: محمد صديق
Date: 08-12-2009, 08:01 PM
Parent: #280

سلامات يا ناس
Quote: انقطعت أخبار صلاح حسن حسين عني منذ زمن ظويل...و الله كم أشتاق اليه..أرجو أن أجد من يصلني به..


الرشيد الحبيب....شكلك ما مركز ؟؟؟انا سألتك هل هو الدكتور الصيدلى؟؟

يعنى انا بعرفو ...

كنت متوقع تسألنى انا من اخبارو...لانو واضح من كلامى انى بعرفو...الرجل

نسيبى متزوج من ابنة اختى...سآتيك برقم تيلفونو.

Post: #282
Title: Re: مربع كاي
Author: الرشيد بابكر
Date: 08-12-2009, 08:10 PM
Parent: #281

و الله يا كوتش افتكرت جمعتك به احدى الصدف الجميلة و انتظرتك تجي راجع تقول لي أنك بتعرفه من وين...لكن والله ده يوم مليان مفاجأت سارة...الأولى من محمد عيد و حسن صالح و التانية منك...أشكرك يا كوتش على هذه المفاجأة الجميلة...بالله عليك بالتلفون خلينا نتواصل مع الزول الجميل ده...

Post: #283
Title: Re: مربع كاي
Author: عفاف علي ميرغني
Date: 08-12-2009, 08:16 PM
Parent: #282

ازيكم 00

يا الرشيد ومحمد عيد

حسن صالح دا لميتو فيهو وين 000

لينا زمان بنبحث عنه000 ضايع مننا0000

Post: #284
Title: Re: مربع كاي
Author: الرشيد بابكر
Date: 08-12-2009, 08:22 PM
Parent: #283

Quote: حسن صالح دا لميتو فيهو وين 000


لما فيهو الشليق ده...محمد عيد ده غايتو شليق شلاقة يا فافي...ما عارف نكتو لينا من وين...غايتو مفاجأة من العيار الثقيل...

Post: #285
Title: Re: مربع كاي
Author: عفاف علي ميرغني
Date: 08-12-2009, 08:44 PM
Parent: #284

تعرف يا رشيد القوم حسن خليفة

تجمعه صلة قرابة مع حاج الركز

انسان جميل جدا ومتواصل جدا

ولغاية ما انتقل من الرياض للمدينة ومن ثم للزلفي كان متواصل معانا وزوجته الجميلةايمان

000 وتاني سافر السودان على ما اعتقد لفترة طويلة واخباره اتقطعت مننا 00

واله يارشا صحي نحن في مربع كاي 00

Post: #286
Title: Re: مربع كاي
Author: الرشيد بابكر
Date: 08-12-2009, 08:56 PM
Parent: #285

Quote: تجمعه صلة قرابة مع حاج الركز


و الله يا فافي لا أستغرب ذلك فانهم يملكون نفس الصفات الجميلة...ان شاء الله الحوش ده يجمع كل الأحباب الذين انقطعت أخبارهم عنا طويلا...

Post: #287
Title: Re: مربع كاي
Author: عفاف علي ميرغني
Date: 08-12-2009, 09:14 PM
Parent: #286

لجمال مربع كاي 00

سعادة

اختبات في دواخله00

وتعمقت في دواخلها 00

فكان تمثال عجوة00 وهي في محرابه

اشتهته مدت يدها وتذوقته00

فاشتهته مرة ثانية 000
وعلقت تميمة رسالة0

Post: #289
Title: Re: مربع كاي
Author: الرشيد بابكر
Date: 08-12-2009, 09:21 PM
Parent: #287

يا سلام علي تمائمك يا فافي..

ان عودتها هنا بعد أن كنا نستمتع بها هناك...بمثابة مفاجأة سارة أخرى يكتمل بها عقد مفاجأت الليلة...يبدو انني سأنام ملئ جفني الليلة من فرط سعادتي...

Post: #288
Title: Re: مربع كاي
Author: محمد عيد
Date: 08-12-2009, 09:18 PM
Parent: #286

والله يا رشيد ..

حسن صالح لم التقه منذ اكثر من عام

وطبعا عندما كان بالمدينة المنورة كنا تقريبا نلتقى اسريا كل يوم خميس

لكنه بعد عودته من استقراره السريع بالسودان الشقيق ( 6 اشهر فقط )

عاد واستقر بمدينة الدمام بالمنطقة الشرقية ...

ومشاركته هذه اقتلعتها منه بالهاتف ... تخيل ...ّ؟

فقد عجزت عن اجتذابه للبوست لعدة اسباب اهمها ...

ان علاقته بالنت والكمبيوتر مثل علاقة قدورة بحراسة المرمى ..!!

وابياته التى انزلتها سبق لقدورة انزالها فى السندس منذ اومان بعيده ...

واخضعتها الآن للسمكرة والبوهية وبعض الشمشرة ...


Post: #290
Title: Re: مربع كاي
Author: محمد عيد
Date: 08-12-2009, 09:41 PM
Parent: #288




طبعا يا رش ..

الصورة المنشورة لحسن هى فى قيدومة عملت لى ايام زواجى فى منزلنا وقد نظمها زملاءنا فى وزارة الزراعة حينها ومنهم معاوية وخالد موسى وابراهيم مختار ونهلة وعواطف وحنان القطينة وصفاء وايمان محجوب وآخرون لا استطيع حصرهم هذا بخلاف مجموعة مميزة من زراعىّ الجامعات الأخرى .. وطبعا كان حسن هو فنان الحفلة .. وكالعاده بدأ الحفلة بــ بعد الغياااااب ( الفرمالة ) .

عموما تلفون حسن الجوال للتواصل هو : 00966540880013


وهذه صورة الحفلة كاملة



Picture26.jpg Hosting at Sudaneseonline.com

Post: #291
Title: Re: مربع كاي
Author: الرشيد بابكر
Date: 08-12-2009, 09:48 PM
Parent: #290

محمد عيد هنالك خطأ بالرقم أرجو اعادة كتابتة مرة أخرى...حالف الليلة أصحي ليك الراجل العجوز ده و أجهجه ليك بالليل ده...كان ما غنى لي بعد الغياب ما حأسيبه..أخلي ليك زوجته تشكك في مقدراته العقلية الليلة..

Post: #292
Title: Re: مربع كاي
Author: عبد القادر بابكر
Date: 09-12-2009, 05:53 AM
Parent: #291

صباح الخيرات عليكم يا طلبة ....

أعمل ليكم شنو ما رحعتونا طلبة تاني الواحد يصحى من الصباح يجي داخل المكتب كأنو داخل مربع كاي سيد الإسم يلقى الشباب والعجائز كلهم مقنطرين وقاعدين .. الله عليكم ...
تعرف يا باكستاني أنا كان عندي احساس انو جرابك فيهو حسن صالح وقلبي كان ماكلني عشان كده كنت بحاول أتصل عليهو قبل يومين في نفس الرقم ده عشان أشوفو مشى جده بي وين لأنو الراجل ده كل ما يجي ماري بالرياض كان بيجي ماري علي ولو ما مر علي كان بيديني تلفون قلت الراجل ده المرة دي عمل خيانة ومر بالرياض من غير خبر لكن للأسف كل ما أضرب الرقم يديني رسالة انو الرقم خطأ حتى في العيد لما ضربت ليك كنت ناوي أسألك منو لكن سبحان الله ما عارف النساني شنو .... ومن أول ابيات من قصيدته العصماء تأكد لي بما لا يدع مجالا للشك بانني أمام الحبيب حسن صالح ... رفيق سفن أب والأيام الحلوة والصديق الذي يملأك وفاءا وصدقا ويغمرك جمالا وفرحا .. ياريت والله تتأكد لي من الرقم ده لآنو يظهر عليهو ما صحيح ........

لله درك يا أبا العيد .....!!!!!!!!!

Post: #293
Title: Re: مربع كاي
Author: عبد القادر بابكر
Date: 09-12-2009, 06:11 AM
Parent: #292

يا باكستاني ....

تستاهل سيجارة من الصباح !!!!

1231321.jpg Hosting at Sudaneseonline.com

Post: #294
Title: Re: مربع كاي
Author: محمد عيد
Date: 09-12-2009, 08:42 AM
Parent: #293

قدورة ورشيد ...

صباحكم عسل متعاص فى قشطة ...

صحيح رقم حسن صالح فيهو مشكلة وسأحاول اليوم احضار رقمه الجديد من زوجته

والعجوز ده من شدة ما مطشش الظاهر عليهو بيروح كل شى ...

&&&&&&&&&&&&&

الجراب ما زال مليئا بالمفاجآت ...!!!

مقلب او حاجة شبيهة به نفذت فىّ من يومين ...

ولك ولأنى - شليق - كما قال رشيد .. مبارى الموضوع والا اجيب آخره ...

والمقلب وراءه أيضا سنيــر عجووووز وجميل من ذلك الزمن الجميل ...

خليكم معانا ... ما تمشوا بعيد ...

Post: #295
Title: Re: مربع كاي
Author: محمد صديق
Date: 09-12-2009, 11:10 AM
Parent: #294

سلامات يا ناس

يارشيد ...سلام

تحدثت قبل قليل الى الاخ صلاح حسن

وقلت ليه فى زول روحو دار تطلع

فيك وفى خبر منك ..وبخلت عليهو

بالاسم وقلت ليهو انتظر منو تلفون

0916895371

0122044213

قصرت معاك؟؟؟

Post: #296
Title: Re: مربع كاي
Author: مدثر أبا يزيد
Date: 09-12-2009, 02:02 PM
Parent: #295

سلام لجميع الاخوان والاخوات
بإذن الله دائما بخير وعافية


Quote: ومصطبة حقوق (ركن السودان) .

غاطس وين انت يا ابوبكر
زولنا ولا واحد تاني الخرف زارنا
يا حليل الايام الجملية

Post: #297
Title: Re: مربع كاي
Author: محمد عيد
Date: 09-12-2009, 07:37 PM
Parent: #296

اين انت يا شيد طوال هذا اليوم

انا جاهز لك بالمفاجأة الثانية ...!!

Post: #298
Title: Re: مربع كاي
Author: الرشيد بابكر
Date: 09-12-2009, 08:35 PM
Parent: #297

Quote: قصرت معاك؟؟؟


و الله يا محمد صديق ما عارف أقول ليك شنو...
فقدت حتى القدرة على التعبير...
أشكرك...ما كفاية
أعمل ليك شنو...ما عارف والله...
اليوم كان يوم ماراثوني...و ما فتحت الكمبيوتر الا قبل شوية...
أول حاجة عملتها بعد أن وجدت تلفون صلاح...اتصلت عليهو...
نقلني لي عوالم تانية...حلق بي في ماضي لا تصفة كلمة جميل...
دور بينا البلد ده..و حرق الجازولين كلو الفي التنك بتاعي..
خلاني زي المصدق و ما مصدق...
قال لي الليلة عيدت لي عيد تاني يا الرشيد...
و هو ما عارف انه العيد الأول و التاني كان عيدي أنا...
روحه المرحة و شخصيتة الآسرة...و الله ما عرفت أضحك و لا أبكي...
بقيت في حالة كدة بتاعت ذهول...
لقيته متذكر أدق التفاصيل...لقيته كان بيفتش علي في كل مكان...
كل ما يمر بي مكان جمعنا يتذكرني...
عرفت ليه أنا بفتش عليه يا محمد صديق...
بتكون عرفته من خلال علاقتك به...و بتكون عرفت ليه أنا بتكلم عنه كده...
يا كوتش انت عرفت صلاح و ياسر لورد...ماذا لو قلت ليك كان في عشرة
زيهم كده أو يزيد في محيطي القريب جدا من نفس النوع..
أكون شنو أنا...عليك الله ما محظوظ...و مش لي حق لو قعدت أفتش عليهم..

يا كوتش الله لا جاب يوم شكرك...لكن صدقني كلمة شكرا لا تكفي...

شكرا يا كوتش....

Post: #299
Title: Re: مربع كاي
Author: الرشيد بابكر
Date: 09-12-2009, 08:41 PM
Parent: #298

Quote: اين انت يا شيد طوال هذا اليوم

انا جاهز لك بالمفاجأة الثانية ...!!


اليوم كان يوم ماراثوني يا محمد عيد...
حيث لم يتسنى لي فتح الكمبيوتر الا قبل قليل...

أنا الآن جاهز للمفاجأة التانية...

رغم زحمة العمل الا أن أمس و اليوم كانا من اليام السعيدة جدا....

لك الشكر يا حمادة...

Post: #300
Title: Re: مربع كاي
Author: محمد عيد
Date: 09-12-2009, 09:22 PM
Parent: #299

sudansudansudan5.bmp Hosting at Sudaneseonline.com


يا ترى من هو هذا الفارس الجحجــــاح ..؟!

من هو ذاك الآتى الينا على صهوة الماضى الجميل ..

مستشرقا معنا رؤى الايام القادمات الجميلات ..باذن الله ...؟

من هو الطارق لباب حوشنا هذه المرة ... وهو يحمل بردية العشق القديم ..ّّ؟؟

Post: #301
Title: Re: مربع كاي
Author: محمد عيد
Date: 09-12-2009, 09:25 PM
Parent: #300

نقــرّب الصورة شوية للعجائز أصحاب العيون الناعسة ...

ام نكتفى بقلب الصفحة انتظارا لاجتهاداتكم ...ّّ ؟

وراء ظهور هذا الفارس واحدة اخرى من حكاوى ناس الزقازيق الطاعمات ...!!


Post: #302
Title: Re: مربع كاي
Author: الرشيد بابكر
Date: 09-12-2009, 09:31 PM
Parent: #300

محمد عيد كبر لي الصورة يا أخوي...نضارتي في المكتب...

خلينا نعالج حتة الشوف دي في الأول و بعدين نشوف الكركم..

Post: #303
Title: Re: مربع كاي
Author: الرشيد بابكر
Date: 09-12-2009, 10:03 PM
Parent: #302

محمد عيد أبيت تكبر الصورة...

طيب أدينا أمارة ياخي....

Post: #304
Title: Re: مربع كاي
Author: محمد عيد
Date: 09-12-2009, 10:13 PM
Parent: #303

اها يالرشيد كده كيف ؟


sudansudansudan6.bmp Hosting at Sudaneseonline.com

Post: #305
Title: Re: مربع كاي
Author: الرشيد بابكر
Date: 09-12-2009, 10:20 PM
Parent: #304

محمد عيد كان دي أكبر حاجة عندك...
خليني أقول ليك بصراحة...غلب حصاني...سوري غلب حماري...

كدي شيل لي الطاقية و النضارة ديل بعيد...و لا أقول ليك أديني صورة قديمة شوية..

الزول ده شكلو اتنفخ قريب...و ما قدرت أعرفه...

Post: #306
Title: Re: مربع كاي
Author: محمد عيد
Date: 09-12-2009, 10:22 PM
Parent: #304

زولك ده الزمن جرّ فيهو حبالو ... ودخل نادى العظام ذوى الجباه العريضة

sudansudansudan7.bmp Hosting at Sudaneseonline.com

Post: #307
Title: Re: مربع كاي
Author: الرشيد بابكر
Date: 09-12-2009, 10:28 PM
Parent: #306

الزول ده بيشبه لي الطيب تكو...ياهو و لا أنا غلطان...

الطيب تكو في الشارقة يعني بينك و بينه مسافات...لكن الدنيا دي ضيقة...

ياهو ولا ما ياهو....

Post: #308
Title: Re: مربع كاي
Author: الرشيد بابكر
Date: 09-12-2009, 10:54 PM
Parent: #307

محمد عيد ما تبطل الثقالة دي و تجي تقول لينا حاجة...

قول كضبا كاضب...

قول برافو...عرفته كيف...

قول أي حاجة..انت قايل الساعة كم عندنا هنا...كل يوم تساهر بينا...

Post: #309
Title: Re: مربع كاي
Author: محمد عيد
Date: 09-12-2009, 11:06 PM
Parent: #307

عفارم عليك يا رشا ...

الطيب محمد صديق عاليب

تخيل قصة الجبان ده كالآتى : -

يوم الخميس الماضى واثناء جلستنا الحالمة فى الساوث مول بصحبة جلا وفارح وناس جده

جاءنى اتصال على الموبايل من رقم من الامارات ...

المتصل اسمعنى تسجيلا لاغنية سودانية من اغانى البنات وسط ضجيج وزغاريد وصخب

اعتقدت فى البداية انك انت المتصل او نجيلة وتريدا مفاجئة الموجودين وتحيتهم ..

لكن المتصل ابى الا ان يكمل الاغنية ويقفل السماعة فى برود عجيب دون ان ينطق ..!!

اعتقدنا انه سيعاود الكرة وتناسينا الحاصل وسط حكاوى جمال فارح ..

قبل يومين جاءنى فى الصباح اتصال آخر من رقم اماراتى ..

وأخذ المتصل ينادينى .. كيفك يا باكستانى ؟

افتكرته فى البداية عبد الحليم ولكنه نفى ذلك .. عندها اشتغل مفعول الكركم جيدا ...

وتبينت نبرات صوته جيدا وقلت له انه الطيب تكو .. فنفى ذلك وحاول ان يستدرجنى بعيدا

بل انه حاول ان ينفى انتماءه الزقازيقى ...

ولكن طبعا لقب الباكستانى لا يعرفه سواهم وبالذات سكان سفن أب

ورغم امتداد المكالمة رفض هذا العجوز ان يبرد لى بطنى ...

وطلب منى مراجعة الايميل ...

وعلّقنى يومين قبل ان استلم دعوته على الفيس بوك وأجده نفسه الطيب تكو

هذا الرجل رغم علاقتى الوثيقة به ايام الزقازيق الا اننا لم نلتق منذ زمن بعيد ...

آخر لقاء كما أذكر قبل حضورى للسعودية اى ما يقارب العشرين سنة ..!!

حبث كان فى اجازة سنوية بالسودان وكان موجودا بمنزل خالته الى جوارنا فى شمبات ...

ومنذ سفرى وارتحال اهله من حلتنا انقطعت اتصالاتنا ...

حقا سعدت جدا جدا بلقياه من جديد وسنحاول سحبه معنا الى المنبر ...

فهذا الرأس الاصلع يخفى وراءه جبالا شامخات من الجمال .


sudansudansudan8.bmp Hosting at Sudaneseonline.com


اعتقد ان صورته هنا أوضح ..

Post: #310
Title: Re: مربع كاي
Author: الرشيد بابكر
Date: 09-12-2009, 11:18 PM
Parent: #309

كنت على تواصل مع الطيب منذ أكثر من ثلاثة سنوات...حيث تواصلنا بالتلفون فقط رغم أننا في دولة واحدة...و لم نلتقي ابدا وجها لوجه...و ربما يكون هذا السبب في عدم معرفتي به من خلال صوره الحديثة...و كنت أتحدث معه و صورتة القديمة في ذهني...هو في الشارقة و أنا في أبو ظبي..و كنا نتواصل كثيرا حتى أضعت تلفونة مع تغيري لموبايلي...

الطيب انسان كاسمه فهو طيب للحد البعيد..زبل و للحد الغريب...برئ طيب و قلبه أبيض للحد البعيد...و الله لا اقول هذا مجاملة له و لكنه كذلك...هذه الزقازيق جمعت مجموعة من الناس و كأنهم تم اختيارهم من عجينة واحدة...

انت عارف يا حمادة أنا عرفته من الفلجة في أسنانه..فهي أكثر ما يميزه..هو دائم الابتسام...

بالله مدني بتلفونة و خليني أتسدى ليك العمله فيك...حأشغل ليهو أغنية عزاز علينا و أقفل التلفون...و أضرب ليهو تاني بعد أسبوع..

Post: #311
Title: Re: مربع كاي
Author: محمد عيد
Date: 09-12-2009, 11:38 PM
Parent: #310

رغم استقبالى للمكالمة من هذا الرقم الا انه لم يجمّع معى ...

واظنه مبرمج التلفون على عدم استقبال مكالمات من ارقام غير مسجلة ...

دى طبعا حركات الناس البتكون شارده ليها من بلاوى ..!!

+ 971508694202

غايتو جــرّب واذا نجحت قول لينا عووك ...

النشوف فردته الازليـــة قدورة بكرة يقول شنو ؟!

Post: #312
Title: Re: مربع كاي
Author: زهير الزناتي
Date: 10-12-2009, 09:14 AM
Parent: #311

مربع كاي تسجيل حضور ...

لا غير

Post: #313
Title: Re: مربع كاي
Author: الرشيد بابكر
Date: 10-12-2009, 09:22 AM
Parent: #311

Quote: غايتو جــرّب واذا نجحت قول لينا عووك ...


عوووك...

نجحت في الاتصال بالطيب و كأنه متوقع تلفوني فلم أنجح في تضليله...فابتدرني معتذرا أنه اضاع تلفوني و لم يتواصل معي..قلت ليهو عرفتني قال لي طبعاعرفتك.. انت صوتك مميز و ما بتنسي ...قلت ليهو صوتي مميز أنا أصلي أم كلثوم...
غايتو أسمع صوتك أصدقك أشوف صورتك أستعجب يا الطيب...

Post: #314
Title: Re: مربع كاي
Author: محمد عيد
Date: 10-12-2009, 10:37 AM
Parent: #313

Quote: نجحت في الاتصال بالطيب


هل هو نفس الرقم يا رشيد .. ؟

ارجو سؤاله لماذا هو locked امام اتصالاتى ..؟ او دعه يخزن رقمى كى

يقبل استلام الاتصال ...

غايتو جنس عنكبه ..!!

Post: #315
Title: Re: مربع كاي
Author: الرشيد بابكر
Date: 10-12-2009, 09:08 PM
Parent: #314

محمد عيد...اليوم كان رفيقي في الطريق الى أبو ظبي الطيب...تحدثنا فلقد وصلني لمسافة (مقدرة)...انت عارف انه وجد عند واحد قائمة بأسمائنا و أرقام تلفوناتنا...أنا و أنت و عبد القادر و منصور...فحاول الاتصال بالتلفونات فلم يجمع معاهو الا تلفونك...قلت ليهو الحمد لله ان الزول الأداك تلفوني ده كتبه غلط...ده منو و بيعرفنا من وين...المهم يا صديقي لما جمع معاه تلفونك كان في حفلة فأسمعك الغناء و قفل التلفون...و انت تعرف باقي القصة...
قال بتصله تلفوناتك بس بتقطع و هو حاول أيضا الاتصال على تلفونك و عندو نفس المشكلة التي تواجهك معه...على أي حال رقمه عادي و ليس به اي حجز...

Post: #316
Title: Re: مربع كاي
Author: زهير الزناتي
Date: 10-12-2009, 09:45 PM
Parent: #315

نحن هنا

متابعة ... وحضور .... ووجود بكثافة ... بس إنتو ما قاعدين تشوفوا

Post: #317
Title: Re: مربع كاي
Author: الرشيد بابكر
Date: 10-12-2009, 10:52 PM
Parent: #316

أبو الزوز و الله شايفك..بل و أكاد أكون قرأت كل ما أنزلته على بوست الجمعية و تابعته باهتمام شديد ولكني لم أشأ أن اقاطع حتى لا أقطع التسلسل أو التتابع في الحوارات التي أنزلتها و هذا هو المهمم و الأهم...

Post: #318
Title: Re: مربع كاي
Author: الرشيد بابكر
Date: 10-12-2009, 11:13 PM
Parent: #317

موضوع أحلام العودة سوف أكمله هنا بعد أن أنزلت في البوست العام هذا الجزء...

Quote: قبل احتفالنا بالمئوية كنت قد أوردت في احدى الصفحات تساؤلا عن ماذا بعد هذه السنين الطويلة من الغربة...متى تنتهي و كيف السبيل الى الخروج منها...و تجدني في كل مرة عاجزا عن الاجابة و يبقى السؤال قائما أو مؤجلا الى أجل غير مسمى...
أنا لا أكف عن طرح هذا السؤال على نفسي و لكن تخف وطأته أحيانا و تزداد أحيانا أخرى...هذه الأيام المؤشر في الأحمر...و السؤال يؤرقني للحد الذي يبقيني صاحيا طول الليل...
تعمل شنو...تعمل شنو...
تمشي تشوف ليك بنك في السودان يمول ليك عمارة عشرو طوابق..فيها عشرين شقة...تأجر الشقة بي تلاتة مليون في الشهر في عشرين بي ستين مليون في الشهر...تدفع للبنك خمسين مليون شهريا...يعني في خلال كم سنة كده بتكون سددت للبنك قروشه و بعد داك تلبس جلابيتك البيضاء و عمتك المطرزه و تمشي تقدل في الشارع من بيت عزاء لي بيت عرس...من العصر تقعد في ضل العمارة تجيب ليك كراسي و تربيزة و تكتر القهوة و الشاي و يجوك الأصحاب تقعد تدق الحنك لحدي الساعة عشرة مساء و بعد داك تمشي تنوم...و هكذا تاني يوم...
تعمل ليك مكتب صغير في احدى الأحياء الراقية (الحتانة مثلا)...و تقعد تسلي نفسك تشتري و تبيع...ان شاء الله تبيع ترمس...شي أراضي و شي بيوت و شي كراسات و أسمنت...و لو جوك ناس الضرايب آخر السنة تقول ليهم يا جماعة تجارة شنو و ضرايب شنو..أنا المكتب ده و الله فاتحه تسلية ساكت...في زول بيدفع ضريبة على التسلية...المفاجأة طبعا لما يقولو ليك أيوه في ضرايب على التسلية...نحن الهواء عملنا ليهو ضرايب لما التسلية...ياتو الضروري الهواء و لا التسلية..
كان اتلايقو علي بدفع ليهم...أعمل شنو...اقفل مكتبي المسليني و مونسني و مدخل لي حق الملاح...كل تاجر في السودان ده تلقاهو شغال شغل بالملايين و بعدين يجي يقول ليك و الله الانت شايفو ده عشان حق الملاح..طيب اذا كان ده حق الملاح...حق الما ملاح بيكون كيف...غايتو نقول ما شاء الله بس...
فكرة البفالة دي ما راكبة لي في راسي ما عارف ليه...عندي احساس البقالة دي زي ساقية جحا تشيل من البحر و تودي البحر...يعني البقالة دي تجيب بضاعة تبيعها تمشي تشتري بالقروش بضاعة تاني...تلقى سيد البقالة شايل ليه رغيفة وواقف جمب صفيحة الطحنية يحشي ليهو حتة طحنية في الغداء و حتة في العشاء و الفطور بيقطع ليهو عيشة و يكب ليهو فيها شوية موية فول و موية جبنة و زيت...عشان كده بتلقى بتاعين البقالات بيشحتفو ليك الحاجات دي...تقول ليهو يا أخوي دي طحنية بي خمسماية يقول ليك نحن نتغدى بي شنو يعني...
أها أنا أقعد أسوي في جنس ده...بقالة دي خارج حساباتي...جني و جن غداء و عشاء الطحنية ده...فطور البوش لا بأس به..
لما الأمور كمان تمشي لي قدام شوية بعد ما أسدد لي البنك قروش العمارة بعمل لي أسطول ركشات و أمجاد بالرغم من أن بعض الأصدقاء نصحوني قالوا لي أبعد من الأمجاد و خليك في الركشات...أشغل فيهم كل الخريجين...خاصة خريجين الزراعة تعاطفا مني معهم...و حأحترمهم ليك غاية الاحترام...الليلة دخلت كم يا باشمهندس...50 ألف بس...الليلة ما شاققت و الله شنو يا باشمهندس...أنصحك تقوم بدري انت ما سمغت أهلنا قالوا ود البدري سمين...و بعد داك الزارعة الله في الحجر بتقوم...

استراحة لحدي ما أجيكم لي باقي المشاريع حقت العودة من الهجرة...

Post: #319
Title: Re: مربع كاي
Author: الرشيد بابكر
Date: 11-12-2009, 10:44 AM
Parent: #318

جمعة مباركة

اليوم ربما نواصل في طرح مشاريع المستقبل التي تمهد للعودة الى السودان...لا بد من الاستعانة ببت الشيخ الأستاذة نجاة حوفي...قلربما لديها من الأفكار التي تستحق أن تكون خطة كاملة أو جزء من خظة...لننتظر و نرى فما زال الوقت مبكر الآن...

Post: #320
Title: Re: مربع كاي
Author: ميسرة سيد أحمد
Date: 11-12-2009, 01:25 PM
Parent: #319

Quote: موضوع أحلام العودة سوف أكمله هنا بعد أن أنزلت في البوست العام هذا الجزء..


سلام يا مربع كاي

طبعاً ذهبت إلى الزقازيق ولكية الزراعة ولكني لم أهتد

لمربع كاي ،،،،،،

تابعت يا رشيد القوم بداية طرح مشروع العودة

في المنبر العام ودحين جيت وراك لمربع كاي

الإحساس ده ينتاب كثير من المتابعين ونحلم بالعودة

الطوعية لبلد آمنة وكلمة آمنه دي ليها معنى ودلالات كبيرة

وتعني عندنا الكثير والكثير في كل نواحي الحياة حتى السياسية

منها ،،،،،،،

نتابع معاكم الحلم الجميل ،،،،،،،،،،،،،،،،،،،،،،،،

Post: #321
Title: Re: مربع كاي
Author: الرشيد بابكر
Date: 11-12-2009, 04:09 PM
Parent: #320

يا ريس أشكرك على المرور...ما سمعت أصوات المواتر و السرينة بتاعتها...يبدو اني كنت نايم و لا حاجة و الا كنت جيت مارق و قعدنا نهتف ليك لحدي ما الموكب يمشي...و كنت جبت ليك معاي محمد عيد يقول ليك يعيش الرئيس عبود...
قالوا أيام التهجير يا ريس...أهلنا الحلفا نظموا مظاهرة في الخرطوم و رددوا هتافاتهم الشهيرة....حلفا دغيم و لا باريس ... و غيرها من الهتافات...و مرت المطاهرة من أمام مستشفى الخرطوم و صعدوا الى كبري الحرية فحاصرهم البوليس داخل الكبري من الطرفين...البوليس يحمل البنادق و الهراوات أيضا...عرف الجماعة أن مخرج لهم من هذا...فغيروا هتافاتهم الى....عملت الكبري يا عبود...عالي واطي يا عبود...عشان نزحلق يا عبود...فخرجوا من المشكلة...

جاييك لي أحلام العودة..

Post: #322
Title: Re: مربع كاي
Author: الرشيد بابكر
Date: 11-12-2009, 04:57 PM
Parent: #321

يا ريس و كل المهتمين باحلام العودة...وصلنا وين...انتهينا بي موضوع جرريدة الكورة...و هي فكرة مربحة مافي شك اذا وجدت الكادر الجيد...و لأن هذا الموضوع يحتاج الى تخصص فسأكتفي بطرحة كفكرة دون الخوض في تفاصيله...
المشاريع التي أنا بصددها و لا أقصد هنا أن أدخل في تفاصيل مشروع أخونا كمال الشادي...المشروع الجاد و الذي طرحة من خلال بوسته المميز شركة الزقازيق القابضة...أنا هنا أتناول أحلام مغترب أضناه الاغتراب و أخذ يمهد للعودة...
المغترب العائد لو الله قسم عليهو بتحويشة عمر يكون كويس...لأن أحلامه لا بد و أن تكون بحجم تحويشة العمر و هذه التحويشة هي الانطلاقة الحقيقية لمشروعاته...الدخول في مشاريع يجب أن يتم بحذر شديد دون أي مجازفات...عشان بصراحة البضيع تاني ما بيرجع...يعني الواحد البقضي ليهو عشرين سنة و يلم ليهو بضعة دريهمات و في السنة و لا السنتين الأخيرات من فترة اغترابه مع مكافأة نهاية خدمتة...يا دوب كدة تعمل ليك خمارة...يعني تشيله و تمشي لي البنك القلت ليك عليهو..
البضيع ما بيرجع...مافي عشرين سنة تاني ترجع بيهم تاني الخليج و المهاجر التانية و تمشي ترجع...و دي علي فكرة حصلت كتير...ناس قرروا يمشوا يرجعوا السودان...قدموا استقالاتهم و باعوا القدامهم و الوراهم بثمن بخس...و رجعوا السودان...لموا فيهم أولاد الحلال خلوهم يد وراء و يد قدام...قرروا يرجعوا تاني...طبعا الوظيفة الأولى ذات المرتب العالي مافي تاني خلاص راحت...لا يرغب المشغلين فيهم لأسباب كثيرة أهمها ان المشغل يمكنه أن يوظف عشرة هنود مكانه و بأقل مما كان يتقاضاه..فيعمل في أي وظيفة و ربما يتقاضى ربع ما كان يتقاضاه سابقا و بهذه الطريقة ربما يحتاج الى ثلاث أضعاف عمره لينجح في تحصيل المبلغ الضايع...

مشروع المزرعة مع عمل بيوت بلاسيكية للتحكم في المواسم و الانتاج في ما يسمي Off Season ...مع عمل وحدات دواجن و أبقار للتسمين و لانتاج الألبان...هذا مشروع جيد و لكنه يحتاج لرأسمال كبير و لا ينفع فيه اي تمويل و الا لبقيت طول عمرك تحت رحمة البنوك..من جدولة و الى جدولة حتى يجبرك البنك الى بيع أحلامك في المزاد العلني...هكذا مشروع يجب أن يمولة المغترب العائد من جيبة من الألف الى الياء...و يجب أن يكون قد مهد له منذ زمن بشراء المزرعة قبل العودة...تجهيز البئر..شراء المعدات...شراء البيوت البلاستيكية و هكذا يكون قد تبقى له القليل و يمكن أن يبدأ الانتاج على مراحل ابتداء من الانتاج النباتي ثم الدواجن و الأبقار بمستوى معقول...

بجيكم تاااااني....

Post: #323
Title: Re: مربع كاي
Author: محمد عيد
Date: 11-12-2009, 05:48 PM
Parent: #322

رشيد ... ما داير اقاطعك

ولا اعمل كروس على افكارك ..

لكنى قبل كده حاولت أجـــرّب مشروع يحمل ربع او عشر ما أشرت اليه

وذلك احتراسا من تلك المحذرات التى اشرت اليها فى طرحك ...

فكرة المشروع كانت عبارة عن معمل صغير لتصنيع منتجات الالبان ...

وكل مكوناته كانت فقط .. كم ثلاجة عادية وديب فريزر وشوية عده

الاهم هى فرّازة ألبان حديثة تسهم بتقسيم اللبن المدخل فيها الى أجزاء معالجة ..

بعضها يصلح للزبادى والمش وآخر للقشطة وثالث للأيسكريم ... ورابع للجبنة .. وهكذا ..

حسب طرق معايرتك للفرّازة ...

وما كان سيحتاج لأكثر من شخص واحد يقوم بالعمل الفنى والنظافة والترتيب وايضا التسويق

او التوصيل بالبوكس او الامجاد للبقالات المتفق معها ...

وحاولت انشاء المعمل فى غرفة منزوية فى منزلى .. هربا من متعطشى الدماء والحليب .. ناس الضرائب ..

واتفقت مع عدد مقدر من البقالات ومنافذ التوزبع وطفقت راجعا الى مغتربى لارسال الفرّازة ...

حيث كانت هى اهم أصول العملية وأكثرها تكلفة ...

وقبل ان اتورط وأشتريها .. جاءنى التحذير من هناك بوصول ناس المحلية وناس اللجنة الشعبية لموقع المشروع

وتقديمهم طلبات بتسديد التزامات العوائد والمحلية وفتح الملف الضريبى ...!!!

.....

أقول ليك ماذا كان رد فعلى أم اترك ذلك لفطنة القارىْ.. ؟؟!!

Post: #324
Title: Re: مربع كاي
Author: عبد القادر بابكر
Date: 11-12-2009, 06:21 PM
Parent: #323

لآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآلآحولا يا باكستاني ..!!!!!

والله العظيم دي بالغت فيها عدييييل كده ...
الطيب التكو بي شحمو ولحمو ؟؟؟؟؟؟؟؟؟
تصدق أنا لما شفت الصورة قلت ده أكيد هارون ود الجبل
أصلو ما كنت متوقع يكون ده التكو
الله يخرب مطنك ياااااخي
لكن بيني وبينك البلد نفعت معاهو الجبان
والله العظيم لي فترة طويلة جدا عايز أعرف أخبارو شنو الزول العسل ده !!!
الطيب الحبيب راجل رقيق زي النسمة يأسرك بي ابتسامتو الحلوة
وضحكتو النابعة من قلبو وصدق مشاعرو ....
كانت لنا أيام ما زالت تترائ لي أمام ناظري
وذكريات لم يغشاها النسيان ولم تعتدي عليها أسلحة الزمان
أحمد الله إذ طمأننا عليه
وتبقي لي شخص آخر غاية أملى ومناي أن أعرف أخبارو
الفردة الرائع والأخ الجليل
عبدالله علي عثمان الشهير بالدبجة
آخر عهدي به في منتصف التسعينات عندما زرته بمقر عمله في أروما

يلا بركاتك يا باكستاني إتحرك معاي بالله في موضوع البحث عن الدبجة
وليك سيجارة برنجية .....!!!!!!

من دربي ده ماشي اتصل علي الولد التكو اللذيذ ...!!!

Post: #325
Title: Re: مربع كاي
Author: محمد عيد
Date: 11-12-2009, 07:07 PM
Parent: #324

Quote: الطيب التكو بي شحمو ولحمو ؟؟؟؟؟؟؟؟؟


تخيل يا قدورة صاحبك الجبان الليلة من الصباح فى ميدان سباق الخيل

ما عارفو بقى رأسمالى واقطاعى ولا ســـاكّى تربيزة القمار ..؟!
Quote:

عبدالله علي عثمان الشهير بالدبجة


والله يا قدورة الدبجة ده دايرين نفتش ليهو بالجد

وغايتو نشوف ناس كسلا ... زهير وجلا ممكن برضو يساعدونا وممكن برضو اسامة ابتر لانو بوليص وممكن يعمل ليهو امر قبض

لانو اظن شغال فى بساتين كسلا

وقبل سنوات قليلة مجدى عبد الله قابله وكان عندو اخوهو اتوفى ..

عموما سنعمم نشرة بأوصافه ونحاول كمان نطلـــع جمال عبد اللطيف من جحره ( راجل الـ 3 نسوان ) ..!!

بعدين يا حبيب برنجيتك دى خليها ليك .. اخوك بقى بتاع ســيجار هافانى ...!!

Post: #326
Title: Re: مربع كاي
Author: عفاف علي ميرغني
Date: 11-12-2009, 07:12 PM
Parent: #324

عبدالله علي عثمان الشهير بالدبجة 000


قدورة العجوز تحياتي ولاسرتك

يا اخبار عبد الله نفيد عندي وقبل كدا حكيت ليك عنه

لكن طبعا اثبت لي انه الزهايمر تملكك 00

يا عيد اجدعه بشوال كركم

Post: #327
Title: Re: مربع كاي
Author: محمد عيد
Date: 11-12-2009, 07:23 PM
Parent: #326

Quote: اخبار عبد الله نفيد عندي وقبل كدا حكيت ليك عنه

لكن طبعا اثبت لي انه الزهايمر تملكك 00

يا عيد اجدعه بشوال كركم



معقولة يا عفاف ..؟

كدى اولا ادينا اخبار عبد الله ...

وبعدين بافضى للعجوز ده وأشوف ليهو مركب كركم كومبليكس ..!!

Post: #328
Title: Re: مربع كاي
Author: الرشيد بابكر
Date: 11-12-2009, 08:22 PM
Parent: #327

Quote: وقبل ان اتورط وأشتريها .. جاءنى التحذير من هناك بوصول ناس المحلية وناس اللجنة الشعبية لموقع المشروع

وتقديمهم طلبات بتسديد التزامات العوائد والمحلية وفتح الملف الضريبى ...!!!


يا حمادة بالرغم من اني مع اتباع الاجراءات الرسمية في أي نشاط و ذلك حتى تتم مراقبة الجودة...الا ان عندنا هناك مبالغة شوية في الرسوم الحكومية و غير الحكومية الأمر الذي يثقل كاهل أي صاحب عمل...

الجاتك في فرازتك سامحتك...و المرة الجاية فكر كيف تفرز عيشتك من الناس ديل قبل ما تبدأ المشروع...


أعتقد ان لدي الطيب أخبار عن عبدالله فلقد التقاه قريبا كما أخبرني...

Post: #329
Title: Re: مربع كاي
Author: الرشيد بابكر
Date: 11-12-2009, 08:45 PM
Parent: #328

Quote: رشيد ... ما داير اقاطعك

ولا اعمل كروس على افكارك


يا أخوي قاطع و أعمل كروس...دي هضربة ساكت و تزداد الهضربة حلاوة لما يجي واحد يهضرب معاك... تعال هضرب معاي...

Post: #330
Title: Re: مربع كاي
Author: عبد القادر بابكر
Date: 12-12-2009, 06:48 AM
Parent: #329

التكو قبل التعديل والصنفرة ........

55555.jpg Hosting at Sudaneseonline.com



التكو بعد التعديل والصنفرة .......

sudansudansudan9.bmp Hosting at Sudaneseonline.com

Post: #331
Title: Re: مربع كاي
Author: عبد القادر بابكر
Date: 12-12-2009, 07:24 AM
Parent: #330

يا باكستاني ..
قلت لي بقيت كوبي ؟؟؟؟؟؟

تعرف يا خوي والله من أمبارح وأنا عايش في ذكرى
الأيام الجميلة والرفقة الطيبة مع أخوانا التكو والدبجة والمدعو جمال عبد اللطيف
وكل نقابة المنتحرين بسفن أب ..
فعلا والله الذكرى الحلوة ما بتموت ولا بغشاها النسيان ..
جمال عبد اللطيف لاقيتو قبل سنتين بالسودان .. الراجل زي ما قلت بقى
محمووووووول شديد ( من عمايلو وعينو الطايرة - ثلاثة يا مفتري ) ..
لكن تصدق لسه في شكلو الزمان ما اتغير كثير ؟؟ ..

اتصلت علي التكو أمبارح جرس طويييل ومافي رد
لكن عملت ليهو دعوة في الفيسبوك ولقيتو اليوم عامل رسالة كاتب فيها :
.... وتعطلت لغة الكلام ...
فعلا تعطلت لغة الكلام ..
فما في القلوب أكبر من أي كلام ..
وما تحمله الدواخل من مشاعر طيبة
وأخوة صادقة .. وذكرى حلوة ..
أكبر من كل تعابير الحروف ..

Quote: اخبار عبد الله نفيد عندي وقبل كدا حكيت ليك عنه

لكن طبعا اثبت لي انه الزهايمر تملكك 00


فافي يا بتنا ...
والله لا زهايمر ولا حاجة أنا أذكر ذلك كان قبل سنوات
لكنني لم أتحصل منك على تلفونو ولا عنوانو ولا أي وسيلة تواصل ..
ياريت لو عندك أي وسيلة تواصل معاهو يكون جميل
لأني عايز أعرف أخبارو وأين إستقر به الحال ...
ياريت والله تجتهدي لي في الحصول على تلفونو ينوبك ثواب يا أم علي ..
والكلام موجه ليكم يا ناس كسلا أبو الزهور وجلا وأبتر
يدكم معانا بالله ...


Post: #332
Title: Re: مربع كاي
Author: عفاف علي ميرغني
Date: 12-12-2009, 10:30 AM
Parent: #331

ازيكم 00

يا قدورة العجوز هاك رقم عبدالله نفيد

0024912298806

وعبد الله متزوج من بت عمي 000

Post: #333
Title: Re: مربع كاي
Author: عبد القادر بابكر
Date: 12-12-2009, 10:43 AM
Parent: #332

يا فافي يا بتنا ...

عاد يا بتي انشاء الله يوم شكرك ما يجي ..
وعافي منك عفوا يكبرك ويغنيك ويطرح البركة فيك
وفي عيالك ويخلي ليك حاج الركز ابوهم ...
قولي آآآآآآآآمين ... وخليني أسمعها ...

مش بتقولي علي عجوز أها دي دعوة عجايز !!!!

Post: #334
Title: Re: مربع كاي
Author: عبد القادر بابكر
Date: 12-12-2009, 10:51 AM
Parent: #333

يا فافي ..

الرقم ايتخيل لي غلط لأني ضربتو
قال لي فضلا تأكد من الرقم الصحيح
قمت أضفت 9 بعد 249 جاني واحد وقال لي
معليش أنا ما عبد الله ..
ياريت تتأكدي لي من الرقم ..

تحياتي ....

Post: #335
Title: Re: مربع كاي
Author: عفاف علي ميرغني
Date: 12-12-2009, 10:55 AM
Parent: #333

Quote: وعافي منك عفوا يكبرك ويغنيك ويطرح البركة فيك
وفي عيالك ويخلي ليك حاج الركز ابوهم ...
قولي آآآآآآآآمين ... وخليني أسمعها


آآآآآآآآمين

والله احلى دعوة قلبية استقبل بيها يوم مزحوم شغل

الله يخليك ياعمو قدورة يا قلب الشباب

Post: #336
Title: Re: مربع كاي
Author: الرشيد بابكر
Date: 12-12-2009, 01:07 PM
Parent: #335

شوف الدنيا دي ضيقة كيف....عبدالله النفيد طلع متزوج بنت عمة فافي...كل يوم يتضخ لي ان هذه العبارة صحيحة مائة بالمائة....الدنيا ضيقة...

و لكن يبدو ان البحث عن عبدالله اصطدم بحاجز الرقم الخطأ...طمأنا على آخر الأخبار يا قدورة...

Post: #337
Title: Re: مربع كاي
Author: الرشيد بابكر
Date: 12-12-2009, 01:13 PM
Parent: #336

بعد أن طرحت ما سميتة أحلام العودة..لنرى كيف السبيل الى تحقيق ذلك..كيف للمغترب أن يبني تحويشة العمر...ما هو البرنامج الناجع و الناجح لعمل تحويشة عمر تكون سندا لك في المستقبل...كيف نبدأ بالادخار...

هذا ما سأتي اليه ان شاء الله...محاولا تقديم النصح لنفسي أولا..لأني أكبر المبذرين كما تتهمني نجاة حوفي...و ما سأحاول طرحة لن أبنية على أي طرق علمية معروفة في الادخار..بل مجرد هضربات مغترب..

الى اللقاء

Post: #338
Title: Re: مربع كاي
Author: محمد عيد
Date: 12-12-2009, 03:12 PM
Parent: #337

Quote: ما هو البرنامج الناجع و الناجح لعمل تحويشة عمر تكون سندا لك في المستقبل...كيف نبدأ بالادخار...


دخيلك يا زلمى ... شو عم تستنى ...

كلامك ده واقع لينا فى جرح ..!!

ســير ســـير .. يا أمير ..

Post: #339
Title: Re: مربع كاي
Author: الرشيد بابكر
Date: 12-12-2009, 04:32 PM
Parent: #338

Quote: دخيلك يا زلمى ... شو عم تستنى ...

كلامك ده واقع لينا فى جرح ..!!

ســير ســـير .. يا أمير ..


يا حمادة ما سأقوله معلوم لدي معظمنا و لكنه غير مفعل...و دائما ما يصطدم بطبيعتنا كسودانيين...فنحن شعب مبذر و لا نعرف كيف نؤمن مستقبلنا..لأننا ببساطة لم نكن بحاجة لذلك سابقا و لكن الآن و قد تغير الوضع فلا بد أن نغير من سلوكياتنا...

..........

عندما حضرنا الى الامارات أنا و نجاة كنت أقول لنجاة لو وجدت عمل بأي مبلغ سأكون في غاية السعادة..فرفت علي العروض..قبلت باحداها دون دراسة فلقد كان هدفي البقاء فقط و كان أن فقدت عملي بعد ثمانية أشهر فقط و بقيت ثمانية أشهر أخرى أبحث عن عمل..في تلك الثمانية أشهر و كانت نجاة معي..عملت نجاة بالتدريس بمبلغ بسيط...و لكن استطعنا تدبير أمورنا بهذا المبلغ البسيط حتى انفرجت الأمور و عملت براتب ضعف الراتب الذي كنت آخذه في البداية...
لم ندخر أي شئ رغم أنه من المفترض أن راتبي هذا اضافة الى احتياجاتنا...نجاة مدبرة للحد البعيد فهي لا تنفق الا ما هو ضروري...
تضاعف راتبي و ظلت مدخراتنا صفر...عملت نجاة براتب أفضل...و أصبحت مدخراتنا صفران...كل ذلك و نجاة تلومني على التبذير و تنبهني الى أن الزمن يمر و نحن لم ندخر شيئا....صحيح ان أمنية و مهند كانا الجديد في حياتنا فأضفا اليها ألقا ليحفظهم الله...و زادت مصروفاتنا تلقائيا بقدومهما...و لكن و الحمد لله تضاعف مدخولنا كثيرا أيضا...فكان من المفترض أن تزداد مدخراتنا ولكن ذلك لم يحدث..
عندما خرجت من أبوظبي و عملت في غياثي و ابتدأت أستمع لنصائح نجاة..مع ادارة نجاة لأمور البيت في أبوظبي أبتدأنا في عمل مدخرات لنا و لأول مرة في حياتي كلها...هذا الأمر جعلني أبحث عن الأسباب التي أدت الى تلك النقلة في حياتي و لماذا الآن بالتحديد..لا شك في أنني كنت السبب وراء حالة التبذير السابقة تلك...
السؤال الأول...من يمكنة أن يدخر...أي شخص بامكانه أن يدخر مهما كان راتبة و مهما كان المبلغ المدخر حتى لو كان جنيها واحدا اليوم..دعه لا تمسه..أتركه حتى يأتي الآخر لينضم اليه...لا تقل انه جنية واحد ماذا سأفعل به...
اذا زاد راتبك عن احتياجاتك بجنية واحد فالأولى لك أن تدخر هذا الجنية الآن..عليك أن تكون حاسما جدا مع نفسك و أبدأ الآن...

هذه هي المقدمة و سوف آتي الى التفاصيل...

Post: #340
Title: Re: مربع كاي
Author: الرشيد بابكر
Date: 12-12-2009, 05:09 PM
Parent: #339

لنبدأ أولا...ما هي أوجه صرفنا...

هنالك ما هو الذي لا يمكنك التحكم فيه أبدا...
السكن...مدارس الأولاد...

تحكم نسبي
التزامات تجاه الوالدين أو غيرهم...يجب أن تثبت مبلغ محدد لا يزيد في حالات الضرورة القصوى...فحسب تجربتي في هذا الشأن انه هذا البند واسع جدا ويمكنه أن يقضي على كل ما يمكنك أن تدخرة حتى تتخذ قرارا حاسما بأن تثبت مبلغا محددا كما قلت...

العلاج...و القصد بالتحكم النسبي هنا أن تخرج مبلغ محدد شهريا للطوارئ حتى و ان لم تكن هناك أي حالة مرض في هذا الشهر...يبقى هذا المبلغ جانبا...هذا المبلغ من المدخرات و لكن لظروف معينة...مثله مثل التأمين الصحي المعروف...

مصروفات يمكن التحكم فيها...
مصروفات المعيشة...الأكل..اللبس...الترفيه..

بعد أن حددنا المصروفات...لنسأل هل ترون أي مصروفات أخرى أغفلت عن ذكرها...لننتظر قليلا اذا حتى نسمع منكم قبل أن أواصل...
لن أخوض في أمور مثل أن تكون خياراتنا دائما منطقية...مثل أن لا ندخل أولادنا مدارس غالية أو نسكن في مناطق معروف عنها غلو مساكنها لمجرد الفشخرة..هذه لن أخوض فيها رغم أهميتها لمن يريد الادخار...فهي أول الدروس...و لا أعتقد أننا نعاني من مشاكل كتلك رغم ان بعض السودانيين هنا يفعلونها بحجة أنهم قادرون على تحمل مثل هذه مصروفات...و ينسون أن ما يصرفونه سوف يندمون عليه غدا...

أكرر قولي أنني لم أكن أجيد الادخار و لعل أول المندهشين لهذا الموضوع ستكون نجاة حوفي...أظنها ستنظر اليها باعتبارها اعترافات أكثر من كونها دروس في الادخار...

نواصل بعد تداخلكم معي....

Post: #341
Title: Re: مربع كاي
Author: الرشيد بابكر
Date: 12-12-2009, 06:33 PM
Parent: #340

أغفلت وسيلة التنقل....سواء أن كانت المواصلات أو السيارة الخاصة...حسب تجربتي ان كان الوضع يسمح بشراء سيارة خاصة فذلك أفضل...فلا شك أنها توفر كثيرا و في نفس الوقت تبقى كأصل...أي جزء من المدخرات أيضا...
قلت أن السكن و المدارس بندان مغلقان لا يمكن عمل أي تغير فيهم شريطة أن نختار المدارس التي توفر تعليما جدا لأبنائنا و برسوم معقولة كذلك نختار السكن المناسب و بالسعر المناسب و الفرش المناسب...

البرنامج....البرنامج هذا لأي دخل و لأي واحد...الاغترب أمبارح و الليهو عشرين سنة مغترب..
أول حاجة...تحديد الدخل و المصرفات...يعني تجيب الورقة و القلم و تقعد تكتب مصروفاتك كلها الشهرية...الدخل ده ترى ما بيغباك حافظه صم...لكن المصروفات هي المشكلة...و أنصح هنا الاستعانة ببت الشيخ خاصة فيما يتعلق بالمعيشة و الدلاقين...و الدلاقين دي جاييكم ليها بعدين...
طبعا معظمنا بيخجل يعمل كده...يجيب ورقة و قلم دي يقول ليك ليه أنا بقيت شنو و ما عارف أنا بخيل و أنا شنو...لكن دي أهم خطوة...الورقة و القلم أهم خطوة...

الالتزامات...هذا بند خطير جدا وواسع كما قلت...و ان لم يضبط فانه يأتي على مدخراتك دون أن تدري بذلك...يجب أن تحدد التزاماتك التي لا مناص منها...زد عليها قليلا اذا توفر ذلك...هذه الزيادة عاملها كمدخرات و لكنها مستقلة و للضرورات التي تأتي فجأة و تستدعي أحيانا أن نتسلف حتى نوفيها...فيجب أن يبقى هذا المبلغ بعيدا ان استدعى الأمر فهو هناك و ان لم تستدعي فهي مدخرات...
أحذر من هذا البند..فمعظمنا يعاني منه كثيرا...و بحكم اننا عاطفيون فاننا نصرف كثيرا على هذا البند...و أنا لا أقول بقفل هذا البند و لكن يجب الحسم فيه و الالتزام بما هو ضروري فقط...

العلاج..لا أزيد كثيرا على ما قلتة سابقا...هنا في الامارات أصبح لزاما على المؤسسات التي نعمل لها أن تغطينا بتأمين صحي ساهم كثيرا في رفع العبئ عن كاهل العاملين هنا...و لكن يمكن عمل تأمين خاص بنا كما أسلفت و ذلك باقتصاص مبلغ محدد للعلاج لا نمسه ابدا الا دعت ضرورة مرضية سلمنا الله و اياكم من كل شر...

نجي للحاجات الفيها البعزقة...ألا و هي الأكل و اللبس...و الترفيه..
لاحظت كراتين الملابس الشبه جديدة و التي نتبرع بها للهلال الأحمر من وقت لآخر...لاحظت عدد قمصاني التي لا ألبسها و التي عندما يأتي عليها الدور للبسها يكون ذلك بعد عدة شهور...لاحظت كمية البقالة التي نشتريها و لا نأكلها و اسأل نفسي لماذا أشتريناها في المقام الأول...
هذه الأسئلة قادتني الى الآتي...
تحدد بت الشيخ المواد التي تحتاجها شهريا...واضعة في الاعتبار الأشياء التي يركز عليها و يحبها الأولاد..ثم يبدأ الشوبينغ...فلا نذهب الى السوبر ماركت دون أن نعرف ماذا نريد أن نشتري و لماذا...فأحيانا كثيرة نتبضع دون خطة فنشتري أشياء لا نحتاج اليها فتتكدس عندنا بالشهور حتى تنتهي صلاحيتها و نرميها في الآخر..هكذا كان الحال عندنا سابقا حتى تولت نجاة الأمور فأعتدل الحال عندنا...
كذلك الحال مع الملابس...كلما ذهبت الى السوق حضرت و معي لبستين لأمنية و مثلهم لمهند...حتى فارقت أبوظبي..و تولت نجاة هذه الأمور فأصبحت تشتري ما يحتاجة الأولاد فعلا..خاصة و أنهم يكبرون بسرعة و تصغر عليهم ملابسهم بنفس السرعة...أحتاج أن أطبق هذه الاستراتيجية على نفسي ايضا...يبدو أنني سأوكل هذه المسالة لنجاة أيضا...
الترفيه من البنود المهمة جدا للأسرة...يمكن أن يتم ذلك بأقل التكاليف...يمكن أن نأخذ سندوتشات من البيت و نجلس على البحر مثلا...يمكننا أن نأخذ الأولاد مرة في الشهر الى أحد المراكز الترفيهية...
وضع برنامج ترفيهي له نفس أهمية أخذ قائمة الى السوبر ماركت...الحياة المبرمجة منظمة و في نفس الوقت تلبي كل احتياجاتنا..

بجيكم راجع...تعالوا مارقين..

Post: #342
Title: Re: مربع كاي
Author: محمد عيد
Date: 12-12-2009, 08:24 PM
Parent: #341

Quote: بجيكم راجع...تعالوا مارقين..


قاعدين معاك يا رشا ... خش فى الغريق

Post: #343
Title: Re: مربع كاي
Author: الرشيد بابكر
Date: 12-12-2009, 09:15 PM
Parent: #342

Quote: قاعدين معاك يا رشا ... خش فى الغريق


حمادة...في شك...

Post: #344
Title: Re: مربع كاي
Author: الرشيد بابكر
Date: 12-12-2009, 09:32 PM
Parent: #343

رغم عدم المتابعة الا انني سأتابع الوصفة....

احذروا بطاقات الاعتماد...اياكم أن تحلوا مشاكلكم عن طريق اقتناء بطاقات الاعتماد...فانها السم الزعاف مغلف بشكل جميل..و اذا سبق لكم و تورطتم و أصبحتم عاجزون عن التخلص منها فأنصكم لاتوقف فورا عن استخدامها أو حملها معكم حتى و تركها بالبيت أو تسليمها لبت الشيخ و ابدأ في دفع الحد الأدنى زائدا عليه الفوائد و زد قليلا اذا أمكن ذلك..فأنا اضمن لك التخلص منها نهائيا بعد حين...
احذروا القروض الربوية و غير الربوية فانها تربطكم بسلسلة مجنزرة لا تعرفون كيف الفكاك منها...اعتمدوا فقط على مواردكم في حلحلة مشاكلكم...و من يفكر فيكم في حل مشكلة ما فعلية التفكير في حل دائم و ليس الحل بخلق مشكلة أكبر من النشكلة نفسها...معظم المغتربين أضاعوا سني اغترابهم يدفعون للبنوك فوائد القروض و بطاقات الاعتماد...

و أخيرا اذا كنتم عاجزون عن ادخار الأموال (الكاش) حتى و ان كانت في حسابات و لا تستطيعون منع أنفسكم من سحب الأموال كل مرة تحتاجون اليها...أنصحكم بشراء الذهب...و لا أوصي بالذهب المشغول فان قيمته تقل عند بيعه..أوصيكم بشراء السبائك و هذه تعلمتها من المصريين...فان السبيكة تحافظ على سعرها...بل يمكنك أن تبيع عند ارتفاع سعر الذهب و تشتري مرة أخرى عند انخفاض السعر...و هذه العملية تدر ارباحا لا بأس بها...

اذا اخوتي لقد وصلت الى نهاية ما أردت قوله دون الخوض في أي وصفات علمية..بل هي مجرد سلوكيات و ممارسات حياتية أردت أن أوصلها اليكم علها تفيد..

Post: #345
Title: Re: مربع كاي
Author: محمد عيد
Date: 12-12-2009, 09:56 PM
Parent: #344

رشيد ... مشكور على المجهود ... وما قصرت

أتفق معك فى كثير من رؤاك ... بل اننى اعتقد انها خطوط عامة لا يختلف عليها اثنان

لكن المشكلة ليست فى الفكرة ...! المشكلة حقا فى التطبيق ...

بمعنى ان نمط الحياة الاستهلاكية المفروض علينا فى كافة مواقع الاغتراب ...

يصبح مثل نار الهشيم .. تبقى ولا تذر ...

ببساطة المصروفات الثابتة لا غبار عليها ... مدارس .. ايجار .. علاج ...

لكن الاستنزاف الحقيقى يحدث فى بند المصروفات المتغيرة .. وهى تشمل بالتحديد المصاريف المعيشية ...

لدىّ تجربة ادخلت نفسى فيها كامتحان .. وبكل أسف كانت النتيجة ... احباط مقدر زاد الطين بلا" ..!

كنت - كما الكثيرين - اعتمد فى توفير المستلزمات الحياتية يوما بيوم ... يعنى كل يوم تتصل قبل عودتك

متسائلا السؤال التقليدى .. دايرين شنو اجيبو معاى ..؟

فى يوم ما فكرت بأن هذه الطريقة غير منظمة وبها عشوائية بائنة فى الصرف ...

فقررت ان أعمل دفتر جرورة لدى المينى ماركت القريب .. على الا أقدم على شراء اى شىء من مكان غيره ...

بعد ثلاثة او اربع ايام من بدء التجربة طلبت من البقال ان يرينى دفتر الحساب ..

وصعقت من اجمالى الصرف فى تلك المدة المحدودة ..!!

ولولا ان كل المشتريات مدونة فى الدفتر بخط يدى لشككت فى ذمة الرجل ... !!

حينها ايقنت ان النزف الرعاف ( حبه .. حبه ) افضل من نزف الشريان مرة واحدة ..!!!


Post: #346
Title: Re: مربع كاي
Author: الرشيد بابكر
Date: 12-12-2009, 10:26 PM
Parent: #345

Quote: ولولا ان كل المشتريات مدونة فى الدفتر بخط يدى لشككت فى ذمة الرجل ... !!

حينها ايقنت ان النزف الرعاف ( حبه .. حبه ) افضل من نزف الشريان مرة واحدة ..!!!


محمد عيد..لقد وقعت في خطأ استراتيجي...بل هو أحد الأخطاء العشرة...أنا أطلب منك الآن أن ترجع الى هذا الدفتر الذي ذكرته لمراجعة ما تم طلبة من الدكان مع الأخذ في الاعتبار ان الدكان تزيد أسعارة كثيرا عن السوبر ماركت أو المول...نحن لا نهتم بالريال و الريالين و هذه هي أهم مشكاكلنا...
المهم ستجد ان معظم الذي تم جرة من الدكان مواد غير اساسية...
لماذا لا تشتروا المواد بالشهر من محل معروف بانخفاض أسعارة..لماذا تشتروا المكرونة و الصابون و المعجون و السكر والصلصة بالتجزئة..لماذا لا تشتروها بالجملة...كمية تكفيكم الشهر و تزيد عنه...ستجد أنك بعد ذلك غير محتاج الا لشتراء القليل جدا يوميا...مثل الخبز و أحيانا بعض الخضر و الفاكهة...حتة الفاكهة و الخضر يمكن شرائها بالجملة..
جرب ما أقوله لك و ستجد أنك قد وفرت مبلغا مقدرا...

Post: #347
Title: Re: مربع كاي
Author: الرشيد بابكر
Date: 12-12-2009, 10:44 PM
Parent: #346

حاولت أعمل ليك استراحة و أنزل ليك أغنية لكن فشلت محاولتي مثل كل محاولاتي من فترة طويلة....

Post: #348
Title: Re: مربع كاي
Author: الرشيد بابكر
Date: 12-12-2009, 10:47 PM
Parent: #346

النعاس حصل و الكمبيوتر بقى ما مساعد....

المهم انت قاعد و لا خلاص شطبت...

Post: #349
Title: Re: مربع كاي
Author: الرشيد بابكر
Date: 12-12-2009, 10:48 PM
Parent: #346

انت الليلة وين قدورة....

كنت عايزه يدخل معانا في موضوع الادخار ده...

أول الغيث قطرة...لا بد أن نبدأ اليوم قبل غدا...

Post: #350
Title: Re: مربع كاي
Author: الرشيد بابكر
Date: 13-12-2009, 06:21 AM
Parent: #349

يوم جديد و صباح جديد و أمل جديد...

سوف أترك موضوع المدخرات للنقاش لبعض الوقت ثم ننتقل الى موضوع آخر ان شاء الله...أفكر في تنزيل قصة قصيرة لكسر الرتابة ثم نواصل مرة أخرى...

Post: #351
Title: Re: مربع كاي
Author: الرشيد بابكر
Date: 13-12-2009, 07:05 AM
Parent: #350

مين علمك انتي العذوبة و سكنك في الأوردة




pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">


Post: #352
Title: Re: مربع كاي
Author: عبد القادر بابكر
Date: 13-12-2009, 10:03 AM
Parent: #351

الحبيب الرشيق رش ..
تحية صباحية معطرة بفوح الأرامس ...

ياخي والله انت فتحت لينا موضوع خطير جدا الواحد ما عارف يتصرف فيهو كيف من سنين .. تعرف يا رش أنا كنت شغال في وزارة الزراعة براتب لو قيمته بالوضع الحالي ممكن أقول ليك بكل صراحة انو بيساوي ثمن الحلاوة البشتريها للعيال في الشهر .. بغض النظر عن القوة الشرائية في الوقت داك ... وبالرغم من كدة ما حصل الواحد اشتكى من فلس وكان الشهر بعدي على الأقل والواحد بيكون خالي من الديون .. اي نعم ما كان في توفير يقولوا عليهو لكن الحال مستور .. السبب الرئيسي في اللجوء للإغتراب هي بغرض الإسراع في اكمال نصف الدين وبيني وبينك حتى دي الواحد ما كان مفكر فيها كثير يعني تقدر تقول السكينة كانت سارقانا وكنا مستمتعين بالحرية كل اسبوع في بلد وكل شهر في ولاية والحسابة بتحسب والبدلات ماشة زي السكر .. لحدي ما ناس البيت قلبهم أكلهم وقالوا الزول العامل زي ابن بطوطة ده أخير نشوف ليهو طريقة نلمو على بت حلال قبل ما يسرح بي وشو وبكرة يلقى عمره بقى خمسين سنة وقاعد عزابي .. فما كان منهم إلا أن بدأوا في التفكير من وراي في فكرة الاغتراب دي بالرغم من علمهم بأنني غير موافق عليها وما مقتنع بيها ... المهم عشان اختصر ليك الحكي .. تم لهم ما أرادوا واشترطت عليهم أن آخذ إجازة بدون مرتب لمدة شهرين وفي خلالها إذا لم أوفق سوف أرجع بدون أي تردد ( نظام تعجيز وكده ) وافقوا وقالوا خير وقلت معاهم خير .. وجات الفيزا وقطعت التذاكر وسافرت وفي بالي العودة أكثر من الإستقرار .. المهم أراد الله أن أوفق في العمل في اقل من شهر ومن ديك وعيييييييك ....
لو سألتني بكل موضوعية ماذا أنجزت خلال هذه السنين وماذا حدث لحياتي من تغيير أجاوبك بكل صراحة التغير الوحيد كان هو زواجي وده كان بعد أقل من سنتين تقريبا من اغترابي بالرغم من انو المرتب ما كان كبير لكن قلت بيني وبين نفسي طالما انو الهدف من غربتي دي هو الزواج خلينا ننتهي منو سريع سريع وارجع بلدي واواصل في وظيفتي العاجباني ديك والباقي يهون كان بيت ولا قفة خضار كلو ساهل .. فعلا زنقت نفسي وضغطت مصروفاتي شديييد ولملمت لي قرشين ومشيت كبيتهم في المرة وتعال بعد كده عينك ما تشوف إلا النور .. تحت ضغوط الصرف وتكاليف الزواج وما تبعه طارت فكرة الاستقرار في البلد وتأجلت فكرة العودة للوظيفة القديمة ... ركبت الطيارة وصديت راجع !!!! لم أفهم وقتها أن القصد لم يكن الزواج في حد ذاته فما يلي الزواج من إلتزامات ومتطلبات واجبة التحقيق أهم بكثير وأخطر بمراحل من الزواج نفسه .....
قبل ما أخوض معاك في موضوع الصرف والتوفير قلت أديك فكرة عن مسببات الإغتراب والخلفيات النفسية الكانت مرافقة للفكرة .. ومن البديهي طبعا ان تتطور الأمور وتتعقد الأهذاف من هذف واحد في البداية إلى كمية من الأهذاف التي يصعب تحقيقها بمنظور الوضع الراهن وما حدث من تطور وزيادة في عذذ أفراد الأسرة فكلما يأتي مولود كان ذلك كفيلا بإضعاف فرص تحقيق الأهداف إلى نسبة مقدرة وكبيرة .. أضف إلى ذلك ضعف القدرة على الإدخار والتوفير بالرغم من تضاعف الراتب مرات عديدة خلال هذه السنوات إلا أن الحال في حالو .. وبالرغم من انو الحال مستور والحمد لله مافي ديون يقولوا عليها إلا إنو الواحد كل ما يخت راسو في المخدة يبدأ في التفكير والعقل يبدا يودي ويجيب وتبدا الأسئلة المجنونة تتقافز في الدماغ .. حتى متى ؟؟؟؟ .. ما هي المحصلة ؟؟؟؟ ... كيف المخرج ؟؟؟؟

جاييييك يا رشا ............

Post: #353
Title: Re: مربع كاي
Author: عبد القادر بابكر
Date: 13-12-2009, 10:50 AM
Parent: #352

أها وقفنا وييين ..

الموضوع يارش يا خوي لم يعد موضوغ توفير وادخار وبس الموضوع بقى أكبر من كده الموضوع بقى موضوع حسابات وتقييم فعلي لما تم إنجازه وما لم يتم إنجازه وكيفية المقاربة والتقييم استنادا لما بين يدينا من مدخول وما علينا من إلتزامات ومصروفات ... لكن على العموم خلينا نفكر في التوفير وكيفية الإدخار كخطوة أولى وكوسيلة ضرورية لتحقيق الإنجازات والأهداف شبه المستحيلة القدامنا دي ....
أولا من رايي لابد من حصر أوجه الصرف وتبويبها بطريقة منظمة وحسب أهميتها وترتيبها الزمني وبالتالي توزيع الراتب عليها يعني مثلا ..
بالنسبة لي يمكن أن أرتب منصرفاتي كالتالي :
.. منصرفات المنزل ( الميز بلغة العزابة ) يعني زي اللحمة والخضار والفواكه والمستلزمات التموينية الأخرى الضرورية في البيت وهي معروفة طبعا زي الزيت والصابون والسكر والبامبرز وغيرها ..
.. أقساط المدارس حسب تواريخ إستحقاقها ..
.. أقساط السيارة ..
.. إلتزامات تجاه الأسرة بالسودان ..
.. فاتورة التلفون والإنترنت ..
.. فاتورة الكهرباء ...
.. المنصرفات اليومية من خبر وفواكه ومياه واحتياجات المدارس وبنزين وخلافه ..
.. ميزانية معقولة للترفيه والفسح ..

دي تقريبا أوجه الصرف المعتادة لكل شهر ولمعظم الأخوان المغتربين .. لو في حاجة تاني ذكروني يا رش ..

نجي بعد داك لكيفية الصرف على هذه البنود من الراتب ..



جاييك يا رشا ....



Post: #354
Title: Re: مربع كاي
Author: الرشيد بابكر
Date: 13-12-2009, 12:48 PM
Parent: #353

قدورة...يا دوب جيت داخل و قريت كل كلامك و الذي يتشابه مع مع ما قلته في كثير من الأمور و هذا ليس بغريب فالقصة تتشابه عند كل المغتربين المهم قصة الخروج من المأزق اذا تشابهت الحالات الجيدة فهذا جيد أما اذا تشابهت كل حالات الفشل فهذه المشكلة...

واصل و دعنا نتعرف على رأيك في المخرج....

Post: #355
Title: Re: مربع كاي
Author: الرشيد بابكر
Date: 13-12-2009, 01:52 PM
Parent: #354

Quote: دي تقريبا أوجه الصرف المعتادة لكل شهر ولمعظم الأخوان المغتربين .. لو في حاجة تاني ذكروني يا رش ..


قدورة أظنك نسيت ايجار البيت....انت ساكن ملح و لا شنو يا أخوي...

Post: #356
Title: Re: مربع كاي
Author: الرشيد بابكر
Date: 13-12-2009, 06:09 PM
Parent: #355

قدورة قال ماشي و جاي... و مشى ولكنه ما جاء...

هو براهو جابو لي نفسه...قال يا جماعة ذكروني أنا ناسي حاجه...قلت ليهو ناسي الايجار يا حبيب...ضرب جبهته و قال اللــــــــه معقول أنسى الايجار...و مشى يدفع الايجار و ما جاء راجع...
طبعا قدورة الشهر ده جاب الماهية وقعد يقسم فيها...
ده حق البقالة...
و ده حق المدرسة..
و ده حق الكهرباء..
و ده حق الصندوق..

طيب معقولة فضل كل المبلغ ده من الراتب...و الله الرشيد على حق الواحد ممكن يوفر براحة....لنبدأ التوفير من الآن...يا سلام يا رشدي الله يحفظك و يخليك...و يقوم ينادي أم العيال..تعالي شوفي المرة دي حنوفر...رأيك شنو...نفتح حساب بعيد عن اليد و ما نقرب للقروش دي أبدا...حساب شنو يا أخوي أشتري بيها دهب...القروش لو عايزها ما بتمشي تجيبه...غايتو الرجال ديل ما بيعرفوا أبدا يوفروا قروش...

يخلد قدورة الى النوم و هو في غاية السعادة ثم يصحو للدوام التاني...يفتح المنبر...بوست مربع كاي حتى يبشرني بالتوفير...يجدني و قد كتبت له...نسيت الايجار يا قدورة...اللــــــــه و أنا أقول معقولة أنا أوفر...الله يقطعك و يقطع توفيرك يا رشيد...توفير شنو البنوفره نحن...نحن غير الشقاوة و الجهجه بنوفر شنو....تلفون للبيت...آلو..أيوه اشتريت الدهب و لا مصر تفتح حساب...حساب شنو و دهب شنو يا بت الناس...أنا نسيت الايجار...وووب علي كنت عايز تبيتنا في الشارع و لا شنو...قلت ليك القروش دي مسكني ليها أنا و أنا بديك كل ما يجي وقت الايجار و قروش المدرسة...ما رضيت و عملت لي حركات الرجال دي...أنا راجل البيت و أنا البعمل و أنا البسوي...

يا حنين يا فؤادي و ا شقاي أنا وا عذابي....

Post: #357
Title: Re: مربع كاي
Author: الرشيد بابكر
Date: 13-12-2009, 07:34 PM
Parent: #356

هاكم الاستراحة دي...خلونا من موضوع التوفير و شوفو الشفع الروس ديل بيعملوا في شنو...كان ديل أولادنا كان زمان السكاليب تجيب الطاشي...سجمي الولد كسر رقبته وووب علي البت اتفقهت...



pluginspage="http://microsoft.com/windows/mediaplayer/en/download/"
id="mediaPlayer" name="mediaPlayer" bgcolor="#000000" showcontrols="false"
showaudiocontrols="false" showtracker="-1" showdisplay="0" showstatusbar="0"
videoborder3d="-1" enabletracker="false"
src="/nsdoc/06ece687-494b-4c47-811e-b39392434543/?id=1158825828424"
url="/nsdoc/06ece687-494b-4c47-811e-b39392434543/?id=1158825828424"
autostart="-1" designtimesp="5311" loop="false">


Post: #358
Title: Re: مربع كاي
Author: محمد صديق
Date: 13-12-2009, 07:48 PM
Parent: #357

سلامات يا ناس

الرشيد...فيديو ...ابداع

غايتو ...عمر بعمل معاهم حركتين

الباقى امو حتقول حيقص رقبتو

Post: #359
Title: Re: مربع كاي
Author: عبد القادر بابكر
Date: 13-12-2009, 07:51 PM
Parent: #356

Quote: قدورة أظنك نسيت ايجار البيت....انت ساكن ملح و لا شنو يا أخوي...


والله ضحكتني يا رش .....
إيجار شنو كمان البنشيل همه نحنا انت قايلنا زي حناكيش أبوظبي ولا شتو ؟؟؟
وحاتك الايجار كلو علي الكفيل وكمان بنوفر منو مبلغ محترم جدا جدا ...
يعني بيني وبينك وما تكلم زول أنا بنتظر يجي وقت الايجار عشان أحل مشاكلي .. !!!
آآآآآآآآي ساكن ملحححححح وحياتك ..... شفت كيف يا حبيب !!!!!
عشان كده أصلو ما جبت سيرة الإيجار ضمن أوجه الصرف وده حال معظم المغتربين في المملكة العربية السعودية .. هع .. عاش الملك ... عاش الملك ..!!!! لكن مافي مانع من إدراج بند السكن ضمن المصروفات عند محاولة النظر في كيفية الصرف على هذه البنود .. عشان ناس الأمارات وما جاورها ما يزعلوا مننا .......

Post: #360
Title: Re: مربع كاي
Author: الرشيد بابكر
Date: 13-12-2009, 07:57 PM
Parent: #359

يا كوتش شفت الأولاد ديل كيف بالله...النضافة و الكلام ده غير الحركات بتاعت المحترفين البيعملوا فيها...و الله فعلا التعليم في الصغر كالنقش على الحجر...
أولادنا يلبسوهم ليك جماعتنا الستان الأحمر و الأصفر و يعملوا ليهم رقصات لا هي لامه هنا و لا هناك...

Post: #361
Title: Re: مربع كاي
Author: الرشيد بابكر
Date: 13-12-2009, 08:00 PM
Parent: #360

قدورة شفقتني والله...قلت الزول ده ناسي الايجار و أنا ذكرته بيهو...

عاش الملك....

وين الباكستاني الليلة...

Post: #362
Title: Re: مربع كاي
Author: محمد عيد
Date: 13-12-2009, 09:16 PM
Parent: #361

رشيد ما تسمع كلام قدورة ده ...

وتقول ناس السعودية كلهم بيوفروا من بدل السكن ..!!

الوضع فعلا كذلك فى الرياض والقصيم والمناطق النائية بتاعت ناس على بجة ...

لكن وحياتك جده والدمام لو ما ختيت دبل بدل السكن ما بتقدر تلقى ليك غرفتين تخت فيهم اولادك ...

وانا مرررت بالتجربة دى اوائل التسعينات عندما كنت فى الرياض ...

اما جده ... فهى شوية وتبقى زى دبى ...!!

Post: #363
Title: Re: مربع كاي
Author: الرشيد بابكر
Date: 13-12-2009, 09:29 PM
Parent: #362

عارف يا حمادة السكن في الامارات من أكبر هواجس المغترب...فلو أردت أن تستأجر غرفتين و صالة في أبو فانك تحتاج الى ما لا يقل عن 150 ألف ريال سنويا اي ما يعادل 14 ألف ريال في الشهر..لذلك أجبر معظم الناس على اعادة أسرهم الى السودان...فبعضهم لا تبلغ مرتباتهم نصف هذا المبلغ...


انت وينك الليلة مدسي...

Post: #364
Title: Re: مربع كاي
Author: الرشيد بابكر
Date: 13-12-2009, 10:34 PM
Parent: #363

في لقاء بتلفزيون النيل الأزرق مع المذيعة السودانية نشوى بابكر و التي تعمل بتلفزيون قطر...ذكرتني ملامحها بالعزيزة الراحلة المذيعة و المهندسة الزراعية رجاء حسن حامد...رجاء التي غيبها الموت عنا و هي في ريعان شبابها بعد معاناة طويلة مع المرض...رجاء كانت ذات صوت رخيم و طلاقة و حلاوة و جلاوة...يكفي أن من شجعها للدخول للاذاعة هي الراحلة ليلى المغربي...
ربطتنا أنا و نجاة علاقة طيبة بالراحلة و ذلك من خلال وزارة الزراعة...فكانت تطلق علينا لقب جوز اللوز...فكلما رأتنا معا الا و تهلل وجهها و رسمت ابتسامتها المعهودة عليه...تفاجأت بعد موتها بأنها كانت تعاني من المرض و لفترة طويلة فأحزنني ذلك كثيرا و تعجبت كيف لم أسمع بذلك الا بعد موتها....

ألا رحم الله الراحلة رجاء حسن حامد و أسكنها فسيح جناته....

Post: #365
Title: Re: مربع كاي
Author: محمد عيد
Date: 13-12-2009, 10:42 PM
Parent: #364

رحم الله أختنا الراحلة رجاء حسن حامد

ورجاء كانت صديقة عزيزة وزميلة فى وزارة الزراعة وفى مشروع ابو نعامة الزراعى

وكانت من اوائل الخريجات اللائى امتطين صهوة الجرارات الزراعية ومخرن عباب البساتين بجهدهن ...

قبيل وفاتها بقليل زارتنا فى السعودية ومكثت معنا وقتا ليس بالقليل ,,,

رحمها الله واسكنها فسيح جناته ...

Post: #366
Title: Re: مربع كاي
Author: أبوبكر حامد الأمين
Date: 13-12-2009, 10:51 PM
Parent: #363

ياروش وفاءاً بالعهد ها أنذا أتداخل رغم بطء النت والساعة قربت لى واحدة ، بجيك بى مهلة لى موضوع التوفير والإدخار ، وناوى أواصل معاك فى موضوع تقديمنا لأنفسنا كسودانيين ، والتدهور الذى طال حتى ملبسنا ومظهرنا، ويحضرنى موقف لأحد أبناء جيراننا بمدنى وكنت حينها محامى تحت التمرين ، وأتجول بين المحكمة الجنائية وبين المحكمة المدنية والمحكمة الشرعية ويفصل كلا المبنيين شارع الجمهورية ، فى المساء ذهبت للبقالة ففاجأنى إبن جيراننا وعمره لم يتعد العشر سنوات قائلا: ( شنو يا أستاذ شايفك متقندف بى الكرفتة قدّام المحكمة ) حين رددت بداخلى أبيات لعاطف خيرى:

أعفينى من هذى البلاد الزهللة
أعفى الجبال من الصدى
والشارع التحتانى من خمج النسيم

بجيك باكر بى رواقة وصاحى

Post: #367
Title: Re: مربع كاي
Author: الرشيد بابكر
Date: 14-12-2009, 06:43 AM
Parent: #366

صبحكم الله بالخير

الجو عندنا ربيعي جميل و ليس شتوي...يذكرك بخريف لندني جميل و أنت تعبر الهايد بارك مستمتعا بالخضرة و الماء و الوجه الحسن...
و الخريف في بابنوسة بجنوب كردفان...تهطل أمطار لو هطل ربعها هنا لأدت الى كارثة تفوق كارثة جدة...و لكن بمجرد أن تتوقف الأمطار لا تتبقى نقطة ماء في الشوارع...تصريف طبيعي...
و الخريف في مدني...و أقصد مدني و ليس الجزيرة...الجزيرة مطرة واحدة توقف البلد شهر...طين لايوووووق...لكن مدني...يا سلام يا سلام....


بكري الحبيب....تعال برواقة كلمنا عن الادخار و عن القندفة...و ما تنسى تستصحب معاك بدلته الكحلية من فراق تومي فراقه قاسي علي يا وسيم الريد الريد فوقك النبي...

Post: #368
Title: Re: مربع كاي
Author: عبد الدائم سيد أحمد
Date: 14-12-2009, 07:36 AM
Parent: #367

ممكن لو سمحت اقعد فى طرف المربع اقرأ البوست ده بهدو
من غير ازعاج من جكس زراعة

Post: #369
Title: Re: مربع كاي
Author: محمد عيد
Date: 14-12-2009, 10:14 AM
Parent: #368

يا دودى .. نأبك طلع على شونه ..!!

الجكس نص النهار ده بيكون كلو ملوم فى الكافتيريا او جنب عصائر قسم الصناعات

او فى سلالم قسم الاقتصاد .. او فى تكعيبة العنب فى المشتل ...

انت غايتو أخد راحتك ... بس اعمل حسابك بعد شوية بيجوك الخناشير ...

ناس محمد المرتضى وعاطف القوز وحاج الركز ... شيل شيلتك وما تقول الروووب ..!!

والمشكلة لو استعانوا بصديق وجاء معاهم عبد الدائم الوسخان

Post: #370
Title: Re: مربع كاي
Author: الرشيد بابكر
Date: 14-12-2009, 10:25 AM
Parent: #369

Quote: ممكن لو سمحت اقعد فى طرف المربع اقرأ البوست ده بهدو
من غير ازعاج من جكس زراعة


يا سلام يا دودي و دي عايزالها استئزان...يا بيه انت تشرف مربع كاي و ناس مربع كاي و كل اللي في مربع كاي...اذا حد سألك أولو أنا ضيف عند رشيد...

Post: #371
Title: Re: مربع كاي
Author: محمد عيد
Date: 14-12-2009, 03:17 PM
Parent: #370

مهداة للحبيب رشيد ...

تســجيل نادر للقاء اذاعى للراحلة العزيزة رجاء حسن حامد

ايام مرضها ...

رحمها الله رحمة واسعة ..


http://images.google.com.sa/imgres?imgurl=http://www.s...26sa%3DN&safe=active

ارجو ان يفتح معاك ...

Post: #372
Title: Re: مربع كاي
Author: الرشيد بابكر
Date: 14-12-2009, 03:54 PM
Parent: #370

أمي متعها الله بالصحة و العافية و أمد الله في عمرها كانت اذا ما أرادت شيئا كانت تدخل الى حيث أجلس و تخرج...تعدل من غطاء السرير و هو اصلا معتدلا...ترفع أشياء و تضع أشياء و هكذا...تسألني عايز شاي...فأريحها بي عايزة شنو يا أمي أدخلي في الموضوع طوالي...فتضحك ثم تقول ما تريد...ضحكة أمي هذه هي أجمل ضحكة في الوجود...
دخلت علي في يوم من ايام خريف العام 86 الشهير...بعد أن رجعت من تمريم مسخن و أخذت حماما تمددت في السرير اقرأ في جريدة...كنت مرهقا جدا..عملت أمي عدة حركات جعلتني أعرف أنها تريد شيئا...سألتها ماذا تريد...ضحكت ثم قالت...ممكن توديني أشوف حبوبتك في أم درمان...حاولت اثناءها عن المشوار لتعبي و ثانيا لأن السماء كانت ملبدة بالسحب و كانت تنذر بأمطار غزيرة...قالت لي ان شاء الله ما حنتأخر نمشي و نجي بسرعة...لم أشأ ان أجادل فقلت لها لنذهب...طلبت من أخي مرافقتي للطوارئ وكان أن ذهبنا الى حي العرضة بأم درمان حيث كان يسكن خالي في ذلك الوقت...
ما أن جلسناحتى بدأت الأمطار بالهطول...مكثنا لنصف ساعة فتوقفت الأمطار قليلا فطلبت من أمي أن نرجع الى البيت...طلب مني خالي أن نسرع في العودة...
ما أن ركبنا داخل العربية حتى بدأت الأمطار في الهطول بغزارة غير معتادة...سرت ببطء في شارع العرضة ثم الى شارع الموردة...زادت الأمطار غزارة...و عند اقترابي من قصر الشباب و الأطفال وجدت السيارات تعود من جهة الكبري و هم يلوحون لي بأن أرجع...أوقفت أحدهم و سألته فأخبرني بأن النيل ارتفع حتى وصل لمستوى الكبري و أصبح يتدفق بقوة من فوق الكبري...لم أصدق هذا و قررت المضي قدما تحت رجاء أمي و اخي بالعوده...اتخذت المسار الأوسط للكبري و تقدمت فوجدت ان كل ما في الأمر أن الأمواج العالية كانت تصطدم بحافة الكبري فترش بعض الماء داخل الكبري و ليس كما وصفة الناس من شدة ذعرهم نتيجة لشدة الأمطار...مضيت بشارع النيل ثم انحرفت يمينا بعد القاعة و منها الى شارع الحرية وهناك وجدت عدد كبير من السيارات المتوقفة لأن الماء دخل الى داخلها و عطلها...من المشاهد التي لا أنساها أن موظفي السفارة الأمريكية و المارينز أخرجوا سياراتهم ذات الدفع الرباعي و قاموا بمساعدة كل من تتعطل سيارتة تحت المطر الغزير غير عابئين بالمطر...
تجاوزناهم ثم الى مستشفى الخرطوم و الى شارع المطار في اتجاهنا الى أركويت...كان شارع الأسفلت الوحيد الذي يدخل الى أركويت في ذلك الوقت هو شارع القسم الشرقي ثم هنالك ردمية حتى المركز الاسلامي الأفريقي..دخلت من ذلك الشارع ثم توقفت كثيرا عند نهايتة...ناقشت الأمر مع أخي و أمي فقلت لهم سوف أمشي حتى تتوقف السيارة ثم نكمل مشيا الى البيت فوافقا...فسرت في الطريق حسب معرفتي به..تخيرت الأماكن الأكثر ثباتا...لحسن حظنا توقفت السيارة تماما عند بداية شارعنا...فترجلنا و أمسكنا بالوالدة كل منا بطرف و مشينا بها نخوض الماء...فجأة وجدت نفسي أمسك كف أمي فقط...لقد سقطت في حفرة لم نفطن لها لأن كل الأرض مغطاة بالماء...لم يظهر من أمي الا رأسها...سحبناها بسرعة و قد ابتلت ملابسها تماماثم سحبناها حتى أوصلناها الى المنزل....

أصبحت كلما دخلت علي أمي بعد ذلك لتطلب الذهاب الى مشوار ماء...أقول ليها يا حاجة ماشه الحوض و لا شنو..

Post: #373
Title: Re: مربع كاي
Author: الرشيد بابكر
Date: 14-12-2009, 04:00 PM
Parent: #372

Quote: مهداة للحبيب رشيد ...


شكرا يا حماده على الهدية....

رحم الله رجاء حسن حامد...

Post: #374
Title: Re: مربع كاي
Author: الرشيد بابكر
Date: 14-12-2009, 08:17 PM
Parent: #373

أهنئ الهلال بفوزة بكأس السودان و نقول هاردلك للمريخ و جمهور المريخ و على رأسهم الحبيب محمد عيد..

فوز الهلال لا يمنعني من التعبير عن استئائي الشديد للتدهور الملحوظ في السلوك...علاء الدين يوسف يستحق أن يعاقب من قبل ادارة الهلال حتى و ان أغفل الحكم السيئ الضعيف عن ذلك...علاء الدين يوسف يجب أن يعاقب عقابا شديدا لتأكيد أن الرياضة سلوك و أخلاق قبل أي شئ...
ضرب علاء الدين لاعب المريخ مصعب اللاعب صغير السن الواعد الفنان...ضربة على مرأى و مسمع من الحكم و لكنة لم يحرك ساكنا...
لا لفوز الهلال أو المريخ بهذه الأساليب و لتسمو الأخلاق الرياضية...

المباراة كانت من شوط واحد أما الشوط الثاني فحدث و لا حرج...


أول من هنأني بالفوز صديقي المصري محمد ندى الذي أتصل بي بمجرد أن أطلق الحكم صافرة النهاية...

Post: #375
Title: Re: مربع كاي
Author: أبوبكر حامد الأمين
Date: 14-12-2009, 10:14 PM
Parent: #374

Quote: لا لفوز الهلال أو المريخ بهذه الأساليب و لتسمو الأخلاق الرياضية...


ياسلام عليك يارشيد ياراقى ، التهانى للهلال بكأس السودان وقبله الدورى الممتاز ، ليتنا نرى تنافس حقيقى يسمح لتريعة البجا بنيل كأس السودان وأن تزول لغير رجعة سطوة الهلال والمريخ.

صاحبك المصرى ده قول ليهو ( الجزائر كيف) - ماتشوّرش ياكابتن أحسن معانا عوايل ههههههه

Post: #376
Title: Re: مربع كاي
Author: محمد عيد
Date: 14-12-2009, 11:51 PM
Parent: #375

رشيد يا كبير حقا " ..

مبروك الكاس ..

وما جاء فى حديثك من استياء من لغة قطاع الطرق التى سادت فى الملاعب