Post: #1
Title: (هكذا تورد النجوم)
Author: مجدي عبدالرحيم فضل
Date: 04-05-2009, 07:07 AM
(هكذا تورد النجوم)
************
تدافر جوة شوارع الروح
بي الطعم الأول للريد
ساعة ميلاد
تدي الأولاد ......... روح الأجداد
نصراً غالي وكاسر القيد
نجمة تحنس في القمرة
شان ترجع لي دين الضي
تتوشح بي الأحمر زي
تظهر بي الأصفر في السهرة
ما تهل مرة ... وتتواري
ما تتضاري
ناقصة ومتباقصة و أطلال
تتخلقن خجلاً تبقي هلال !
يا هيبة و عظمة
يا حاضر وماضي وتأريخ
يا صفوة
يا البيكا وصلنا تماس النشوة
يا وطنناً نهوي
يا سودان المريخ !
يا فجراً بشرق لمّن تغرب
شمس أمجاد أوطاننا
يا نجمة بتلمع
يا معني بيسطع
في كل مربع من سوداننا
مريخ الوالي
عالي ومتلالي
يا قيمة و سطوة و هوية
شايلك جواي
عزة وجنسية
بالميلاد كوكب أحمر
مولود في رحم الوطنية
نجمة بتعلن لينا حضورا
زاهية تمثل أجمل صورة
منعـــــة ورفعــــــــــة
كورة و مقصورة
تدي الأحلام طابق تاني
واقع ملموس ..... ما ماســــــورة !
بين قوسين
عفواً بين فرحين !
بهجة مكتوبي هذا وانا بين ظهراني أكتمال نصاب المجموعة الشمسية
ألي أقصي حدود الأبهار والبهرجة القادمة تواً من رحم النجوم
و سعادتي وسودان المريخ يتدلي من الثريا معنيً جديداً للفرح
ولي قدام عشم ممدود قدح كسرة فرح بنوتة بالسترة
كلام ناساً حنان بالحيل و لي قدام
حبيب نورة
|
Post: #2
Title: Re: (هكذا تورد النجوم)
Author: حمزاوي
Date: 04-05-2009, 07:14 AM
Parent: #1
تهانينا والـــ1000ـــف مبروك للصفوة
هيبة يا المريخ هيبة يا النجمة
|
Post: #3
Title: Re: (هكذا تورد النجوم)
Author: الكباشى البكرى
Date: 04-05-2009, 07:18 AM
Parent: #2
الف مبروك انصار الاحمر الوهاج .
|
Post: #4
Title: Re: (هكذا تورد النجوم)
Author: مدثر محمد ادم
Date: 04-05-2009, 08:51 AM
Parent: #3
حمدالله علي السلامة ابوقصي
وتسلم يارائع
|
Post: #5
Title: Re: (هكذا تورد النجوم)
Author: عبدالله كع
Date: 04-05-2009, 09:45 AM
Parent: #4
مبروك يا قريبك ولكن ....... علي مضض
انها النهايه ..
هذا الطريق لهو من عركه وعرف المسير فيه يا مريخاب .. ما قصرتو تب !!
وان هناك اشياء عزيزة لديكم وهي مكانكم الطبيعي .. نسال الله
ان يوفقكم فيها ... وان تاتو لنا بكأسها محمولا ..
وفقكم الله في المحلي .. وتجميلا (( الممتاز))
لك احترامي ابو قصي
|
Post: #6
Title: Re: (هكذا تورد النجوم)
Author: مجدي عبدالرحيم فضل
Date: 04-06-2009, 09:07 AM
Parent: #5
الخال حمزاوي هذا هو مريخ الدهب المجمر
الكباشي البكري كل يوم تطلع النجوم مساءا وتزين السماء فرحا وألقا
شاعرنا الرقم الصعب مدثر محمد آدم هكذا ننثر الأحلام أماني ونزين كبد السماء بروجا
الكع عبدالله بتلأمس كنا نقبض علي الجمر بالذات في الدقيقة 27 من عمر المباراة وكاد هلالكم أن يغرق في جزيرة
،،،،أبوقصي،،،،
|
|