Post: #1
Title: عصـــابة امدرمان .....فى ابـــقوتة_
Author: abuguta
Date: 09-22-2004, 05:19 AM
عصابة اب ستة تنقل نشاطها لولاية الجزيرة
بخطة محكمة انطلقوا من امدرمان وسرقوا «28» مليونا من خزانة مزارع
تحقيق: حافظ الخير
كان سكان قرية قوز الناقة التابعة لريفي الجزيرة يغطون في نوم عميق ليلة الاربعاء ويتمتعون بالهواء الطلق وهم نيام على ساحات المنازل.. ولا يدرون ان عصابة « اب ستة» تحركت من سوق ليبيا بامدرمان قاصدة القرية لسرقة اموال المزارع حسين محمد عبد الرافع الذي باع « تراكتره» بمبلغ 30 مليوناً تسرب نبأها الى اب ستة ومجموعته «وهو شخص ما لم تطله ايدي العدالة»، ذاع سر نقود حاج حسين المزارع البسيط والرجل في الخامسة والستين من العمر فقام ابو ستة ومجوعته باستئجار عربة بوكس دبل كابينة لسرقة اموال حاج حسين وتحركوا عند المغيب حتى وصلوا قرية «ابوقوتة» كبرى قرى المنطقة وراحوا يتجولون في سوقها حتى يهجد الناس وبالفعل اضاعوا الوقت هنا وهناك حتى حانت ساعة الصفر وحوالي الثانية والنصف صباحا تحركوا الى قرية «قوز الناقة» واوقفوا عربتهم قرب مجموعة شجيرات في حافة القرية وترجلوا حتى وصلوا وسط القرية حيث منزل حسين المكون من عدة غرف وتسلقوا السور ودخلوا مباشرة الى الغرفة مكان الخزانة وفتحوا ابواب الدولاب الموجود داخل الغرفة بحثا عن الخزانة كما كانوا يعلمون واخذوا المفتاح من اول ضلفة بالدولاب واتجهوا نحو الخزانة واخذوا نحو «28» مليونا ولاذوا بالفرار نحو سيارتهم ووصلوها وركبوا على ظهرها وتحركوا خارجين من القرية.. لكن القدر لعب دوره وتعطلت بهم السيارة عند مخرج القرية وتركوها وتبعثروا في المزارع الموجودة في اَخر القرية بينما ذهب احدهم الي السوق لاحضار ميكانيكي لاصلاح العطب وفي هذه الاثناء استيقظ حاج حسين ليرى عجلا من ابقاره كان قد تعرض لمكروه وعندخروجه من الغرفة الي زريبة المواشي استيقظت ابنته ودخلت الى الغرفة ووجدتها مبعثرة فصاحت اليه وفي لحظات حضر ومعه ابناؤه الى الغرفة و كشفوا امر السرقة فجمعوا نفرا من اهالي القرية وخرجوا في فرق الى المزارع بحثا عن اللصوص فعثروا على سيارتهم من ثم القوا القبض عليهم الواحد تلو الاَخر دون مقاومة عدا اثنين من اللصوص استلوا سكينين هددا بهما الاهالي لكن ذلك لم يثن الاهالي عن القبض عليهما فلاحقوهما حتى سقطا في ترعة المياه وسقطوا خلفهما ومن ثم القوا القبض عليهما وسلموهما الى الشرطة مع بقية افرادها بعد جمع المبالغ التي بعثروها بين المزارع وعلى سقوفات بعض المنازل في اطراف القرية وجمع مبلغ «26» مليونا.
المقدم اسامة الطيب يوسف رئيس قسم شرطة ابوقوتة قال انه تلقى بلاغ السرقة في صباح الخميس بان المواطن حسين حدثت له سرقة فقد فيها مبلغ «28» مليوناً و«500»الف جنيه كانت بخزانته بالمنزل، واضاف على الفور امرت فريق المباحث بالتحقيق وثم القبض على اللصوص عدا واحد منهم لاذ بالفرار وهو المتهم الثاني وذكر ان ثلاثة من المتهمين البالغ عددهم «5» قد اعترفوا بالسرقة وقالوا انهم تحركوا للسرقة من منطقة سوق ليبيا بامدرمان ورفضوا الافصاح عن من دلهم على المنزل لسرقته، قال ان ادارته بعثت خطابات الى ادارة المباحث الاتحادية لافادتهم حول سوابق المتهمين من خلال البصمات والفيش.
حسين محمد عبدالرافع قال انه لم يزر امدرمان التي وفد منها اللصوص وانه يود ان يعرف من اين علم اللصوص بنقوده ومكانها وشكر فرع اهالي القرية لقبضهم على اللصوص قبل ان يغادروا القرية.
|
Post: #2
Title: Re: عصـــابة امدرمان .....فى ابـــقوتة_
Author: ودقاسم
Date: 09-22-2004, 06:42 AM
Parent: #1
أشيد بشجاعة أهلي في أبوقوتة ، وهم هكذا دائما يتنادون في ليل أو في نهار لينصروا المظلوم ويردوا الحق المغتصب ،،
وليتعظ مثل هؤلاء الأنذال ، وليعلموا أن هذه القرى الآمنة تحرسها عناية الله وشجاعة أهلها،،
والعار للجبناء ..
|
Post: #6
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 09:23 PM
Parent: #2
| Quote: أشيد بشجاعة أهلي في أبوقوتة |
شكرا قريبى ود قاسم
عموما اهلنا سلموها للشرطة لكن ...الحرامى كان ثقة فى نفسه
وقال المعاه ديل كلهم ناس لقاهم فى الطريق ...انا الحرامى
لكن ..بطلع منها زى الشعرة من العجين...
شكرا عزيزى ود قاسم
|
Post: #3
Title: Re: عصـــابة امدرمان .....فى ابـــقوتة_
Author: willeim andrea
Date: 09-22-2004, 07:13 AM
Parent: #1
ياسلام علي ابو قوته وناس ابوقوته بالحيل بتذكرها لقد زرتها في فتره ماضيه ناس حلوين وطيبين بيكرموا وبيخدموا الضيف ككل اهل بلدنا الطيبين
|
Post: #8
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 09:56 PM
Parent: #3
وليم اندريا
ياخى
تحياتى
شكرا ليك لما تجى هنالك مرة تانية اسعال من اخوك
وقتها بكون رجعت ومليت دهاليز الغربة
شكر كتير
ولك ودى
|
Post: #4
Title: Re: عصـــابة امدرمان .....فى ابـــقوتة_
Author: Elnasri Amin
Date: 09-22-2004, 07:47 AM
Parent: #1
الاخ العزيز ابوقوته
سلام و تحيه
ياخى خليتنى اشعر كانى عضو فى العصابه دى
ياريت لو كان العنوان "عصابه من امدرمان فى ابوقوته"
لانو امدرمان دى ما بندور فى ايها اى شي كعب
تحياتى
النصرى امين
|
Post: #5
Title: Re: عصـــابة امدرمان .....فى ابـــقوتة_
Author: Esameldin Abdelrahman
Date: 09-22-2004, 12:11 PM
Parent: #4
الاخ ابوقوتة
| Quote: حسين محمد عبدالرافع قال انه لم يزر امدرمان التي وفد منها اللصوص وانه يود ان يعرف من اين علم اللصوص بنقوده ومكانها |
تعرف يا اما الحرامية ديل عندهم موبايلات ومعاهم طابور خامس من حلتكم هو الاتصل بيهم , ولا يكونوا شغالين فى المخابرات وبتبادلوا المعلومات.
والله فرحت للمزارع المسيكين ده وبركة الجمع فى قريشاتو اللقطة قطرة عرق وراء التانية , هو لو ما الدنيا عوجة والحاجة ما بترحم فى زول مزارع وساكن فى الجزيرة ببيع التراكتور حقو ؟ ملعون ابو الحكومة الخلتو يبيع وسيلة انتاجو.
|
Post: #7
Title: Re: عصـــابة امدرمان .....فى ابـــقوتة_
Author: خضر عطا المنان
Date: 09-22-2004, 09:39 PM
Parent: #5
الحبيب : أبوقوتة
ياخوي دي ماعصابة .. ديل CIA عديل ومدعومة بأقمار أصطناعية كمان
يعني كيف من سوق ليببا الى أبوقوتة ديك ؟؟؟؟؟.. وبيت كمان
يعني مش بنك ؟؟؟؟؟!!!!!.
تحية لاهلنا الابطال في أبوقوتة .
خضر عطا المنان
|
Post: #10
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 10:41 PM
Parent: #5
| Quote: تعرف يا اما الحرامية ديل عندهم موبايلات ومعاهم طابور خامس من حلتكم هو الاتصل بيهم , ولا يكونوا شغالين فى المخابرات وبتبادلوا المعلومات. |
عصام الشبكة بتاعة الجوال معدومة عندنا لكن صدقان لى حديثك كان معاهم جوالات
كلمو بيها من السجن ..لما سالوهم قالو دى الثريا
سنة يابقوتة ياتكنلوجيا....كان كدا امانة يام ابقوتة ما ولدتى...بكرة نعمل مقاهى انترنت وير ليس ...ونجلس ونشرب الكبتشينو فى قنطرة عشرين فى ضل النيمة الجرجرتى
وتسلم ياشفيف
|
Post: #9
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 10:29 PM
Parent: #4
| Quote: ياخى خليتنى اشعر كانى عضو فى العصابه دى |
النصرى يارجل الفكرى
انتو فوق القوافى والشعرى
ام در الحب والهجرى
والصباح والفجرى
تاريخا من زمن عصرى
الموضوع منشور فى الراى العام عصابة اب ستة تتسلط على مزارع
بسيط فى الجزيرة...وانا ذاتى ما جيت ليه خبر لما فتحت الموضوع
لقيت ابقوتها ذاتها والزول عمنا من دمنا
وانا ذاتى خلخبططنى كلمة اب ستة...افتكرته اب سته ودعم الجدول والتقنت واب عشرين
عشان كدت غيرت العنوان...وقلت على الاقل يجونى ناس ام درمان ديل ناطيين
واسمع منهم
ليك سلامى يام در
او كان اسمها امدر
او لمتين اعود
واشياء كنت بتمنى اسمعها واشوفها...انت عارف يالنصرى انا بحب اى زول بحب ام درمان
ودى مدينة مجنونة
جن الحرامى المشى يسرق فى قرية مجدوعة فى بطحاء الجزيرة
لك حبى
|
Post: #12
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 10:52 PM
Parent: #9
| Quote: ياخوي دي ماعصابة .. ديل CIA عديل ومدعومة بأقمار أصطناعية كمان |
استاذ خضر
كم انا سعيد بطلتك...والله زى ما قلت ديل مخابرات عديل
لكن ما شافو التجار ديل ...الزول المسيكين دا ما محتاج
شكرا لك شكراا
|
Post: #11
Title: Re: عصـــابة امدرمان .....فى ابـــقوتة_
Author: بدرالدين شنا
Date: 09-22-2004, 10:45 PM
Parent: #1
الصديق الصدوق أبوقوتة
سلامي وفخري بأهلي في الجزيرة
نسأل المولى عز وجل بسط الأمن بين أهلنا في السودان وخاصة اهلنا في الجزيرة الناس الطيبين المكافحين وقد حزنت لما جرى لذلك المزارع خاصة أنه من قرية قوز الناقة وهي قرية صديقي وحبيبي الصحفي المميز عبدالمجيد عبدالرازق
لكم جميعاً ودي وتعاطفي
|
Post: #13
Title: Re: عصـــابة امدرمان .....فى ابـــقوتة_
Author: abuguta
Date: 09-22-2004, 11:50 PM
Parent: #11
| Quote: قرية قوز الناقة وهي قرية صديقي وحبيبي الصحفي المميز عبدالمجيد عبدالرازق |
البدرى
عبد المجيد ياسلام....ومنها ايضا القنصل السودانى بالرياض ...الاستاذ احمد يوسف
هو من الجماعة...لكنه رجل طيب يحب الخير...وقالى فى اخر لقاء لو بتعرف زول مسكين
عنده مشكلة فى السفارة ...اناشدكم بالله لو ما رفعت لى مظلمته...
شكرا
بدرى
وين نجرك
وين فارات توما
|
Post: #14
Title: Re: عصـــابة امدرمان .....فى ابـــقوتة_
Author: يازولyazoalيازول
Date: 09-23-2004, 02:54 AM
Parent: #13
عفارم عليكم يا رجال ابقوته
رجعتوالقروش الحزموها الفوطه
شالوها العواليق اب سته ما منقوطة
عطلتو الحديد والمكنه ساطت سوطه
مالك مال حلال ياحاج حسين بالنوته
بيرجع ليك أكيد مادام سكنت ابقوته
وحت لو جاتك امدرمان عديل بتجوطه
تقر عينك وتشرب ليك سيجاره سعوطه
ويروح الحرامى حزين معطت ريشتو معوطه
ويتوب كل اليفكّر يسرق ولاد ابقوته
|
Post: #15
Title: Re: عصـــابة امدرمان .....فى ابـــقوتة_
Author: abuguta
Date: 09-25-2004, 09:28 PM
Parent: #14
هشام مزاجه زبط...
والحاجة جاءت بالزلط...
شايلين شوق بالربط...
شمارت وحاجات للهط...
ويكة وتركين وحاجات بسط...
انا جايككم فى جدة...
وفى الطائف باخد سندة
وبجيب معاى العمدة...
بنشرفكم فى حى بن مالك...
وفى القراصة ليكم بنشارك...
وبنعزم معانا اساسى...
وانا عارفه زول حساسى...
حبيب نورة لينا بواسى
وقرشو الرجل الراسى....
وانا بحبكم وانتو من ناسى....
القراصة وقعت فى الويكة...
وتركينا عامل مزيكة....
واساسى لابس برميطة...
وحردان ومقبل على الحيطة
|
Post: #16
Title: Re: عصـــابة امدرمان .....فى ابـــقوتة_
Author: أحمد الشايقي
Date: 09-25-2004, 09:50 PM
Parent: #1
الرائع أبو قوته
كيف الأحوال
ياخوي الجماعة ديل هــم هنباتتنا الزمــان
بس ياخي والله هنباته أشرف من هنباته
ولا يقتلني إلا خلط المساوئ دون قياس نسبيتها.
لك ودي
المخلص
أحمد الشايقي
|
Post: #17
Title: Re: عصـــابة امدرمان .....فى ابـــقوتة_
Author: abuguta
Date: 10-14-2004, 06:25 AM
Parent: #16
الشايقى
تحياتى
انا كايس ليك انت تراكا فى بيتنا
لك ودى
ولقدام
|
|