Post: #1
Title: قصيدة(ثوب العِـزَّة) لكل من عشق هواها
Author: طه حسن عبدالله
Date: 04-10-2004, 04:36 PM
ثوب العِـزَّة شعر/ طه حسن عبد الله
متين يا عـّزة أرجـع ليك تقـولى عشـاى لى تسـلم
أشـد توب عـِّزتِكْ تالاى أفـاخر بيهــو و أتعمعم
و أسَّتِفْ أسَفِى فى الدمعات أقـيف قـِّدامِك أتنـَّدم
أبـوح بالكـاتمو فى جواى وأنسـى معاك كـل ألهـم
نبضـك عـَّزة شايلو دماى جنيـاتك عُـزاز من جـم
وأقـالد أهـلك الطـبين ونرجـع من جديد نتلـم
و أشـوف الفـَزعة للمحتاج و ناساً باشـّا خاتية الـذم
و معـدوماً بـِتِبْ حفـيان على الضيفان و يقول حرَّمْ
و شيخاً يذكـر المنـّان وسـِط ْ حـيرانو و إتحـَّزم
ليالى أم در غناوى زمان سـنين بنقـولا مـا بتقدم
وأشوف الخضرة فى الحيضان و رعـَدِكْ فى سـماك رَزَمْ
و سـاقيتاً تدور بالحـل قـَدُرْ مـا تدور بنعشـَّم
تَخـِّدر قيف تـَبِلْ الشوق صِـبِحْ ريقـا البسيل بلسـم
و نحصد هيبة عِـّزةْ روح وبيها نهـوش نـَجُرْ النـم
و بيك يا عـزَّ نحنا فصاح لِسـانا معـاك مـا إتلعثم
شِـعارنا محـبة الأوطان و بيها جميـعنا نتوسـم
و أسـاهر ليلك الهـيمان تسـوقنى نجـيمة تتقـَّـدم
و تفـتح فى غناى الشوق تغــنى معاى و أتلــَّذم
و حِـسِـك من طرب ساطع بــدور فى ليلك ا لأظــلم
كفـاك يا غـّزة من ها اليل صباحك مـالو إتعســَّم
و خـايف فى إختلاف الراى حِمَاك علــينا يتقسـَّم
نبـيت جـوانا مهـزومين و من هفــواتنا نتـألـَّم
و فى خلـف السُـتُر أحقـاد مكــائد فينـا تترسـَّـم
بى كـُرْهـاً سوادو شـديد و فى إصـرار أكيد مُحْـكَمْ
أُنـاسـاً فوق خرابنا تشـيد عــلى وجـعـاتنا تتيسَّمْ
متين ياأخـوانا نصحى نفيق عـلى توب عـَّزة نتضمضم
نزيل من توبا كـل عقوق لزم تكــفيرا و إتحـَّتم
و نذكـر كلمة قالا خـليل نعيــش أشعـارو نتعــَّلم
و كل عاشق هواها يبيـن و يبــين الغــايتو يتحـَّكم
و صبرك عـَّزة أحلى نشيد نغــم فى صمــــتو بيتكـلم
ومهمـا الهــم عليك يذيد و ليــلك سـرمد إتعتـَّمْ
صـباحك بـُكرة طالىِّ جديد و من نفحــاتو نتنســَّمْ
|
Post: #2
Title: Re: قصيدة(ثوب العِـزَّة) لكل من عشق هواها
Author: طه حسن عبدالله
Date: 04-11-2004, 02:12 PM
Parent: #1
up
|
|