الفنانين الشباب - نقد في حته صغيرونة

خلال مشاهدة سهرة من ثلاثة من الفنانين الشباب بقناة النيل الازرق

ذكر الفنان صلاح الامين على ما اعتقد ان الهجوم على الفنانين الشباب والامكانيات القليلة تحول دون انتاجهم اعمالهم كي يعرضوها على المستمعين

تعليقي على هذه النقطة وكل من يحمل هذه الفكرة من الفنانين الشباب لان الاخ المذكور غير عضو في البورد يمكن ان يجاوب عنه من يحمل نفس الفكرة .

اقول يا اخي الكريم ان الامكانيات التقنية والمادية المتاحة اليوم كانت غير متوفرة بالامس ومع ذلك كان انتاج فناني الامس افضل بكتير من انتاج فناني اليوم من ناحية الكلمة واللحن والاداء لذلك كان لابد للمستمعين من ايجاد فنان مفضل او مجموعة من الفنانين المفضلين وشراء اشرطة الكاسيت الخاصة بهم
وكتاب الاغاني وكذلك الحفلات العامة .

لو مسكت اي فنان من الحقيبة مثلا تجد انه كان يسافر الى مصر لتسجيل اسطوانة ويمكن هذه السفرة تستغرق شهر كامل .

فناني الامس على ما اعتقد انهم بذلوا مجهود كبير للظهور واجازة صوتهم اولا ثم بعد ذلك في تقديم الافضل والحفاظ على فنهم .

ذكر الاخ الفنان حادثة ان احد الفتيات جاءت الى استريو وسمعت الكاشف يغني اغنية خاصة به وذكر الاخ الفنان على لسان البت قالت البت ده منو ده البوظ اغنية عصام محمد نور كان رده ان هذا الفنان هو صاحب الاغنية الاصلي وان عصام محمد نور هو البوظ اغنيته

يا اخونا الفنانين الشباب خلونا من الاعذار الواهية البتقولوها دي العايزنا نسمع ليهو يقدم غناء جميل وبس

تحياتي

زاتوووو

التعديل لتغيير اسم الفنان

صاح.

حبيبنا المر

صح لسانك

ما اضحكني وكاد يبكيني عندما ذكر الاخ الفنان ان الفنان عصام محمد نور هو البوظ اغنية الكاشف

فقلت بالله الزول ده من قبيل بيحاول يوجد اعذار للفنانين الشباب يقوم يرمي ليهو درابة قدر دي طيب ده مابرضو فنان شاب يمكن يكون ماري بي نفس الظروف البتقولها انت يعني كيف تنتقد واحد وتوجد العذر لي نفسك

مع العلم ان الفنان عصام محمد نور له جمهور كبير .

بالله يا المر مش حاجة تحير ، يعني الزول ده لو مره بي ظروف فنانين زمان ماكان غنى خالص

لانو اول حاجة زمان لو قلت انا فنان ممكن بعض الاسر تطردك من البيت ، وكثيرا من الفنانين مارسوا الفن من وراء حجاب .

تحياتي

زاتوووو

Quote: بالله يا المر مش حاجة تحير ، يعني الزول ده لو مره بي ظروف فنانين زمان ماكان غنى خالص

انا كمستمع من منازلهم..........يعنى زول رادى ساكت....

اتفق مع كلامك............


لغاية مايجو النقاد

حبيبنا المر ،

ياخي شفت ليك يوم برنامج اسمو مايطلبه النقاد

لكن اكيد سمعت بي برنامج مايطلبه المستمعون وانت اهم زول طبعا في قبول الاغنية وعدم قبولها

انا برضو زيك كده مستمع من منازلهم ومن المواصلات العامةوالخاصة .

طبعا مسالة النقد دي مهمة جدا يعني مفروض الفنان يعرض فنو لي نقاد ومن سبقوه في هذا المجال بعدين يعرض فنو بعد التنقيح والتهذيب من قبل المذكورين اعلاه

لكن الزول البيجي جاري عشان يلحق البضاعة السوق في الحته دي البضاعة في اذن المستمع على مسئولية صاحبها لوووووووووول يكه

تحياتي

زاتووووو

Quote: ياخي شفت ليك يوم برنامج اسمو مايطلبه النقاد

نقاد المنبر

حبيبنا المر

فاهمك ياحبيبي تماما بس برضو المستمعون ليهم الحق في القبول والرفض

في انتظار النقاد وكبار القوم

تحياتي

زاتوووو

Quote: ذكر الاخ الفنان حادثة ان احد الفتيات جاءت الى استريو وسمعت الكاشف يغني اغنية خاصة به وذكر الاخ الفنان على لسان البت قالت البت ده منو ده البوظ اغنية عصام محمد نور كان رده ان هذا الفنان هو صاحب الاغنية الاصلي وان عصام محمد نور هو البوظ اغنيته

حبيبنا زااااتو ..

سلامات

رغم انك ممكن ترميني بتهمة الشبابية وكدة .. لكن عليك امان الله اضاني وقفت عند جيل ابراهيم عوض وعثمان حسين ومن الشباب ديل ما بنلّقط الا الحوت محمود عبد العزيز والمبدعة نانسي عجاج..

بس بعشق الكاشف واغانيهو واسلوبه والزاد عشقي ليهو زيادة كمان الاستاذ عصام محمد نور وكمان عصام دا ذاااتو زدت عشق ليهو بعد ما عرفت انه بيشبه حمور زيادة لووووووول

اها زولك القال بوظ اغاني الكاشف عصام محمد نور تاني ولا كلمة ما بسمعها ليهو ويبقي تحليلو الفوق داك يبلو ويشرب مويتو ( ما ناشف زي ما قال البشير ) هههه


تحياتي يا ملك

حبيبنا حيدر الزين

قصة انت شاب دي مافيها شك لكن قصة انك فنان دي لسه ما ماشفناها

ياخي الفنانين السودانيين ديل كلهم اغانيهم حلوة بس لحدي فترة معينة كده كان في فجوة كبيرة

يعني الفرق بين جيل الاربعينات والخمسينات ماكتير من الستينات لكن الفرق بين السبعينات والثمانينات والتسعينات والالفية التانية عيييييييييييك فرق كبير خلاص

من الجيل الجديد انا بسمع لي محمود عبدالعزيز وعصام محمد نور نانسي برضو سميرة دنيا بس للاسف الاغاني البسمعها منهم كلها اغاني مابتاعتهم .

الغريبة ياحبيبنا الفنان ده لمن غنى اغنية لي حيدر بورتسودان صوتو جميل

تحياتي

زاتوووو

الزول زاتو، سـلام،،
في الحقيقة مرّت بي عدة نماذج للبت المذكورة، فليس جيل الفنانين الشباب ولكن جيل المستمعين الشباب هم الذين لم يسمعوا بالكاشف وعثمان حسين وإبراهيم عوض ناهيك عن سرور وكرومة ويعتقدوا أن أغاني محمود أو عصام هي ملك خاص لهم وأنهم ناس مبدعين لأنهم أتوا ما لم تستطعه الأوائل، وأجد لهم كل العـذر.. لكن دا بأكد لي فقط عظمة الفنانين السابقين، فمحمود عبدالعزيز أو عصام عملوا عشرات الشرايط التي تحوي أغاني جديدة لهم، لكن حتى المستمعين الشباب زي البنت دي ودفعتها ما عجبتهم ولم يستسيغوها بدليل أنها لم تجد رواج وإنما إشتهرت بينهم الأغاني القديمة رغم أن الشباب زي ما واضح بسمعوها لأول مرة.. ومثال ذلك نفس ما ذكر عن البنت،، فعصام عندو شرايط كتيرة جدا، لكنها لم تجد شهرة ورواج الشريط الإسمو عبقرية الكاشف، لاحظ رغم أن المنتج ما قصر وأسمى الشريط عبقرية الكاشف مش عبقرية عصام لكن لسع الشباب يسموها أغاني عصام!.. طبعا سبب الإنتشار فعلا لأن الكاشف عبقري مش لأن عصام غناي،، أنا هنا لا أنفى عن عصام إجادته للغناء ولكن أدلل على عدم الإشادة بأغانية الجديدة من نفس المستمع (الشاب أيضا) رغم أنها بنفس الصوت الذي غنى به أغاني الكاشف وغيره..

Quote: يا اخونا الفنانين الشباب خلونا من الاعذار الواهية البتقولوها دي العايزنا نسمع ليهو يقدم غناء جميل وبس

شكرا يا زاتو

حبيبنا خدر

انت من اسياد الشئ ذاتووو كنت عشمان مشاركتك تكون اكبر من كده لانها تمثل الجانب النقدي وتفيدنا نحن كمستمعين بالنصائح والارشادات المفروض يتبعها الفنان الشاب عشان يكون شخصيتو الفنية واعمالو الخاصة

نتمنى ان تراجع تاني بي مداخلة من اصحاب الباع الطويل عشان نستفيد ويستفيدو الشباب وتنقل لينا كمان الخبرات الاجنبية الاكتسبتها من الغربة

تحياتي

زاتووووو

اخونا الزوووووووووووول زاتو

الحمد لله انك فتحت البوست ده لأني من امبارح مغيوظ شديد وداير اتنفس .

اول حاجه سعد مقدم البرنامج لم ينزل بلغته الى مستوى الضيوف فكان الفارق واضحا فهما وردا ومجاراة وأجزم انه لم يرد اي من ضيوفه على واحد من اسئلته . وان سعد لم يجن ما سعى اليه والحصول على اجابة لسؤاله الكبير الذي قام عليه الحوار في السهرة ، فخسرنا نحن .
ثاني حاجه انا كنت قايل ان الأغنية الشبابية دي حقت ناس وليد زاكي الدين ومحمود عبد العزيز وعصام محمد نور والمبدع اسامه الشيخ ، والمرهف الفنان ياسر تمتام ، وصاحب اجمل تطريب حسن صبره .
لكن لقيت ليك في اغنية تانية اسمها اغنية الشابين ( جاية من الشببان ) والشببان هو انك تحاول ان تصل لشئ لا تطاله الا بالمشااااااااااااااااااااااااااااااابه .
التناقضات كانت كثيره جدا :
وسعد هو السبب فيها ووقوف الضيوف موقف المدافع عن اغنياتهم ونهجهم بالتقليل ممن سبقوهم لرفع رصيدهم .

فمثلاً سعد يقول ليهم الأغنية السودانية ما معروفة للشباب من عمر 15 - 25 سنة وهم مهتمين بالغناء الغربي والعربي .

يقوم واحد ( صلاح دراب ) يقول ليهو انت داير الشباب يسمعوا منو اذا كان عندو ريموت في ايده وهو قاعد في غرفته بجيب ليهو 250 قناة . طيب انت دورك شنو يا ( شابي )

نواصل

الحبيب محمد الواثق

شكرا للمداخلة القيمة

فعلا الفرق كان واضح ذي ماقال الفنان اقيس الفم بي ودعة والقى الفرق واسع الفرق كان واضح وبين بيونة كبرى بين مقدم البرنامج والاخوة الشباب حتى انو لاحظت ان سعد ضحك في كم مرة كده عشان الجماعة الشبكة بتاعتهم طشت من السؤال بعدين في ختام الحلقة فيما معناه ادينا اغنية ختامية قصيرة كده اها الشاب مافهم الحته دي وقعد يتكلم لحدي سعد ماضحك .
بعدين صاحبك برضو نفض بنطلونو والكاميرا موجهة ليهو دي نقطة خارج النقد .

بعدين الحته بتاعة ال 250 قناة دي كانت اجابة غير موفقة بالمرة والدليل الووولووو ياخي بس خلي صاحبك ده يعاين هنا في البورد يشوف العناوين الرئيسية شنو تكريم عاصم البناء في امريكاونانسي عجاج في امريكا و ايمان لندن في الدوحة وياسر تمتام يصل الدوحة وعبدالقادر سالم يصل الرياض يعني الفنانين ديل كلهم سافروا للعلاج ولا شنو لوووووووول يكه اكيد عندهم جمهور هناك بالرغم من وجودهم في امريكا واروبا والخليج.

بعدين ياحبيبنا الشباب ديل المستمعين عايزين منهم مجهود بسيط بس واكيد ح يملو الساحة لكن بي حالتهم دي الله اعلم .

في لقاء مع الفنان محمد الامين ذكر انو في اغنية تلحينها اخد معاهو كم سنة كده وواحدات معاهو من زمان لسع ماوجد ليهم اللحن المناسب عشان يطلعوا للمستمع بي صورة جيدة ده محمد الامين شوف بيقول شنو

تحياتي

زاتوووو

حبيبنا عيسى

اولا شكرا على المداخلة الظريفة

اكيد ليس عيبا ان يغني الفنان الشاب لاي فنان عملاق في بداياته فقط لكن بعدما يمسك الدرب مفروض تدريجيا يخلي غناء الفنان العملاق ويبدا مسيرتو الفنية الشعراء كتار والملحنين كتار بس وين الفنان الجادي عشان يعمل شغلو الخاص .

نتمنى انو الفنانين الشباب مايعتبرو الشغلانة اكل عيش وبس وتقلد فنان وتطلع حفلات وتغني غناء مابتاعك وتركب عربية . الشغلانة اكبر من كده بي كتير

تحياتي

زاتووووو

زاتوووووووووووووو
جميل انك فتحت البوست دا

ياخى

صلاح الامين واحمد بورتسودان كويسين نوعا

لكن الثالث الذى يسمى قرقورى دا

لا بعرف كلام لا بعرف عناء

وفى دواخله شخصية فرفور,,عليه ان يقلد فرفور
او ان يترك الغناء
وشكرا

Quote: زاتوووووووووووووو جميل انك فتحت البوست دا ياخى صلاح الامين واحمد بورتسودان كويسين نوعا لكن الثالث الذى يسمى قرقورى دا لا بعرف كلام لا بعرف عناء وفى دواخله شخصية فرفور,,عليه ان يقلد فرفور او ان يترك الغناء وشكرا

حبيبنا ابوقوته
قرقوري ده اظنو الحالق صلعة

فعلا من خلال الغنية الغناها احساسك بفرفور لن يخالجه شك ، الفنان لو مابعرف يتكلم لكن لمن يغني بتتكيف الكلام زاتووو انت بتشوفو مضيعة للزمن لكن لمن واحد مايقدر يتكلم ولمن يغني تقول ده احسن منو كلامو القبيل دي المشكلة هنا لا كورة لا غنى ياكافي البلاء

تحياتي

زاتوووو

Quote: يا اخونا الفنانين الشباب خلونا من الاعذار الواهية البتقولوها دي العايزنا نسمع ليهو يقدم غناء جميل وبس

زول ذاتو

فى واحد من الفنانيين اعتقد اسمو احمد بورسودان
بتعزر بأنو الاغنية الواحد يتعب فيها بروفات ويخسر
فيها قروش وارهاق بدني وزهني ومادي وفي النهاية
يرميها لانو فى الحفلة لمن يقدمها الشباب بطلبو
منو اغنية تانية وعلى حد تعبيرو انو حيرميها تجاوبا
منه لرغبة المستمعين فى الحفلة؟؟؟؟؟؟؟؟!!!!!!!!!!

لا عرفت ازعل منو ولا من سعد ولا اسعد ولا النيل الازرق

ياخ انت كفنان قناعتك بالاغنية التعبان فيها دي وووووين؟؟؟؟
هي انت لمن تعبت فيها كانت بتستحق ام لا؟؟؟
ما ممكن تنصب لي نفسك معيار لتحديد زوق الشباب والعايز يسمعوالشباب

طيب الشباب دا ذاتو كان وين لحظة اختيارك للكلمات والالحان
كان وين وانت تعبان فى البروفاااات؟؟؟؟؟؟؟؟؟؟؟؟؟؟؟؟؟؟

عليك الله اسي دا ما كلام يمرض ويرفع الضغط.

اسي نزعل من منو من مقدم البرنامج ولا من الضيوف
حتى متى نحن نتحمل جنس التردي دا؟؟؟
لا تعرف تزعل من الفانيين الشباب ولا من مقدم الحلقة
هل هو بجامل فيهم على حسابنا نحن كمشاهدين ولا الموضوع
كله ما فارق معاهو؟؟؟؟؟
يازول ذاتو مالك رافع ضغطي اليوم اربعاء ويكند عندي وماشي
البيت بمزاج انا الخلاني افتح البوست دا شنو بعد ما نسيت
الحلقة دي.
الله يسامحك

السنجـــك

الزول زاتو سلام

جاييك بى مهلة

الموضوع ليس غناء جديد وقديم وظروف مختلفة

لا بد من اخذ الموضوع كاملا وفى عدة اتجاهات ومن ثم

تلخيصها لتحقيق الغاية المنشودة.

ضياء ميرغني

حبيبنا ضياء الدين ميرغني

Quote: الزول زاتو سلام جاييك بى مهلة الموضوع ليس غناء جديد وقديم وظروف مختلفة لا بد من اخذ الموضوع كاملا وفى عدة اتجاهات ومن ثم تلخيصها لتحقيق الغاية المنشودة. ضياء ميرغني

منتظرين جيتك لانها تهم الموضوع من النواحي الفنية والنواحي الاخرى لكي تعم الفائدة

انا شغال فقط من ناحية كمستمع جيد والسبب البخليني اصادف الحاجات دي لاني عايز اربط الاولاد بالوطن العزيز من خلال القنوات الفضائية السودانية .

تعال يازول واخد راحتك وانا ح اكون متفرج فقط لانو مادارس موسيقى وكده

تحياتي

زاتوووو

زااااااااتو

قبل التعقيب على كلامك والدخول في منهجية تخريب ذوق المستمع كيف ولماذا؟

لدي سؤال واحد هل هناك لجنة لإجازة الأصوات ؟ وإن كانت هناك لجنة هل هذه اللجنة شايفة شغلها

مظبوط أم أن الواسطة وأكل الباسطة تلعبان دورا في هذا الجانب ..

موضوع مهم جدا زاتو..

العزيزة عواطف

عارفة بتمنى ان واحد من المختصين يجي يقول ليك في الفترة الحالية لاتوجد اجازة اصوات بكون متكيف

للطيش لانو بي صراحة الاصوات الحالية يستحيل كلها تكن عملت باااص في الامتحان.

عارفة لمن كنت في رابعة ابتدائي ودونا من المدرسة للتسجيل في قصر الشباب والاطفال

اها قلت اسجل موسيقى مليت الطلب وكتبت موسيقى اها عملوا لي مقابلة نفرين واحد يعمل صوت بي الة موسيقية ويقول لي قلد الصوت وواحد عزف ليك قال لي صفق واعتقد انو فشلت في كل المحاولات اها واحد
قال لي شوف ليك حاجة تانية غير الموسيقى لوووووووول يكه اخدت كلامو محمل جد ومشيت سجلت في الباسكت بول وكنت من اميز اللاعبين لكن باين الصراحة انتهت الزمن ده عشان كده المجاملة بتضيع كل حاجة

تحياتي

زاتووووو

Quote: يازول ذاتو مالك رافع ضغطي اليوم اربعاء ويكند عندي وماشي البيت بمزاج انا الخلاني افتح البوست دا شنو بعد ما نسيت الحلقة دي. الله يسامحك

وماشى البيت بمزاج ياولد لا

عبد اللللللللللله الشوق مطرة بونا
لما تهطل على الكامب,,وانا قاعد فى الماهيناز
بقزقز فى سامبوسة يش

ياصديقى اكيد بتكون شفت بوست اللمة

طبعا قابلت ليك الساحر بقى سمين
عدم الكتابة فى المنبر خلاه كدا
لووووووووووول


صحيح كلامك لو اغنية كلماتها ما اقنعتك مغنيها لى شنو
لكن ناسك ديل بتشيل بواقى الشعراء
يعنى لما الواحد تجيه كلمات من ناس كبار زى الحلنقى
لازم يغنبها ,,والشاعر بكون مررها لكم فنان ماقبلها

قالو اغنية ياحبيبى نحن اتلاقينا مرة فى خيالى الف مرة
الشاعر اداها للكاشف ,,رفضها قال ليه انا ما شغال محاسب
لكن لما اخدها المسيقار العاقب ولحنها
الكاشف اعجب بها شديد
تحياتى للزول ظاتووو

حبيبنا السنجك

كدي قبل كل حاجة حمدالله على السلامة وين الغيبة الطويلة دي

بعدين اسفين لي رفع الضغط كلنا ضغطنا مرفوع نعمل شنو

نرجع حق محور حديثنا

صاحبك ليهو حق يتعب لانو مامتعود على التعب عندو اغاني جاهزة كلمات وتلحين وجمهور كمان لانو الاغنية بتكون بتاعة فنان تعب فيها وعمل للاغنية هو ماعليهو الا ياخد ليهو دش ويلبس احسن لبس ويمشي حفلة زواج ويقبض العداد ولا يترحم على الفنان الاصلي اها زي ده يتعب لي شنو .

بعدين معظم الفنانين الشباب مفتكرين انو الجمهور هم الناس الموجودين في حفلات الاعراس والتخريج وكده وبيعتبروا طلبهم في الافراح المتزايد هو دليل على جودتهم للغناء .

لكن زاتوو بيقول ليهم الناس الموجودين في الاعراس والتخريج وبيرقصوا وفرحانين ديل مش عشان غناكم ديل مبسوطين للمناسبة لوووووول طبعا ماممكن زول عزموهو لي عرس يقول ليهم فنانكم منو لو فنانكم فلان انا ما ح اجيكم او ما ح اتخرج معاكم

بعدين قصة الطلب المتزايد دي لانو انتو رخاص ماديا يعني بتغنو بي مبلغ زهيد مازي الفنان الاصلي بعدين بتغنو لي كل الفنانين في حفلة واحدة وتختارو من كل فنان اجمل اغنية .

طيب لو ده المقياس بتاعكم انتو ح تكونوا احسن من محمد وردي زاتووو لووووووووول يكه

بعدين انتو راس مالكم قرار شجاع بس من وزارة الثقافة لو صدر قانون بمعاقبة كل من يغني اغاني فنان ا خر في حفلة او تسجيل اغاني ملك فنان اخر شوفو منو تاني البجيبكم في حفلات ولا يشتري ليكم شرائط كاسيت او سيديهات .

عشان كده عندكم فرصة كويسة قبل القرار الشجاع ده مايصدر في الفترة دي مشو اموركم كويس واجتهدو عشان لمن القرار يطلع تكونوا جاهزين بي حقكم الخاص

ان شاء الله اكون نزلت ليك الضغط شوية لووووووووول يكه

تحياتي

زاتوووو

والله يادكتور الزول.. الليلة ظهرت ليك مواهب جديدة..
وأضان موسيقية..
ونقد فني..
الله يدينا من خيرك..

خلال مشاهدة سهرة من ثلاثة من الفنانين الشباب بقناة النيل الازرق

Quote: ذكر الفنان صلاح الامين على ما اعتقد ان الهجوم على الفنانين الشباب والامكانيات القليلة تحول دون انتاجهم اعمالهم كي يعرضوها على المستمعين تعليقي على هذه النقطة وكل من يحمل هذه الفكرة من الفنانين الشباب لان الاخ المذكور غير عضو في البورد يمكن ان يجاوب عنه من يحمل نفس الفكرة .

انا ساجاوب لاننى احمل نفس الفكرة ولا ادرى ان كان الاخ صلاح الأمين يحمل نفس الاسباب ام لا.

بداية اكرر التحية اخى العزيز الزول زاتو

طيب نبداها من اول نقطة وافترض ان يكون السؤال كالآتي:-

وهل يملك الفنانون الشباب(الجدد) بمعنى أصح ، مؤهلات فنية سواء كان ذلك من صوت او اداء او الحان او اشعار كى يقدمونه للجماهير ؟

والاجابة :- نعم ونعم مُفخمة .

اذا لماذا لا يقدمون الجديد المطلوب ويُشكلون امتدادا طبيعا للنغم السودانى الجميل التى اتى به الاولون من الفنانين ؟ رغم توفر الامكانيات فى التسجيل والإنتشار عبر القنوات وشركات الكاسيت؟

اقول لك ولأن الفنان ابن بيئته وظروفه ومرحلته كذلك لا يمكن أن تخلق من الفسيخ شربات . كل الظروف المحيطة بالفنانين الجدد تخنق الإبداع وتواصُل العطاء . أقلها فى ابسط الاحوال (التحجر وعدم الإنفتاح على الجديد من المستمعين فى غالبهم الأعم ، إلاّ من بعض الصفوة الذين ينتقدون بعقل مفتوح ومواكبة للتحديث الموسيقى. وهذه مشكلة ازلية واجهت كل الفنانين جيلا بعد جيل . ففى بداية إنطلاقة الفن السودانى واجه الفنانون الاوائل حربا شرسة وكان كل من يمتهن الفن يُعتبر (صائعا او صعلوكا) . وعندما بدأت الدفعة الثانية فى الغناء من جيل الرواد امثال الاساتذة حسن عطية واحمد المصطفى وابوداؤود وغيرهم فى فرض وجودهم فى الوسط الفنى والإجتماعى السودانى بدأ الفنان السودانى فى أخذ مكانه فى المجتمع السودانى وهكذا مضى الحال حتى اصبح الوسط الفنى يستقبل عناصر لها مكانتها الوظيفية والمحترمة فى المجتمع السودانى مثل الاستاذ وردى والدكتور عبد الكريم الكابلي والاستاذ محمد ميرغنى والاستاذ الطيب عبدالله وغيرهم وهذا لوحده جانب مهم من النضال من اجل الفن . ولكن من ناحية أخرى كان هؤلاء جميعا وحتى من أتى بعدهم يواجهون نضالا من نوع آخر وهو تقديم الجديد .

فكل من أتى بجديد ظل متهما (بتبويظ الغناء) والهبوط بالفن . فإن قدّم القديم بشكل جديد فهو متهم بالتهمة اعلاه ، وان قدّم الجديد فهو متهم بالهبوط وعدم القدرة على مجارة الماضى التليد ، مهما كان جودة الغناء الذى يقدمه او إمتلاكه للإمكانيات الفنية التى تؤهله لذلك . وللأسف لا يتلقى هذه التهمة من المستمعين فقط بل يمتد ذلك من بعض قدامى الفنانين. يعنى فى الحالتين هو الضائع.

Quote: لو مسكت اي فنان من الحقيبة مثلا تجد انه كان يسافر الى مصر لتسجيل اسطوانة ويمكن هذه السفرة تستغرق شهر كامل . فناني الامس على ما اعتقد انهم بذلوا مجهود كبير للظهور واجازة صوتهم اولا ثم بعد ذلك في تقديم الافضل والحفاظ على فنهم .

وعودا على بدء اقول ان الفنان هو ابن بيئته وظروفه . فلنسأل ضمن السقوط العام للمجتمع وتحت هذه الظروف السياسية والاقتصادية والذوق العام، كيف يمكن للفنان تقديم فن راقى ومحترم وكل الابواب موصدة امامه؟

الم يواجه الفنان العظيم الراحل مصطفى سيد احمد نفس هذه الظروف فى بداياته وواجهها بشد أحدّ بعد رسوخ اقدامه وفنه الراقى والمؤثر من جانب هذه السلطة .

هل تعلم ان الفنان القامة الاستاذ على السقيد قد تمت اجازة صوته قبل اقل من شهرين؟( صدق او لا تصدق ).

قد يعتقد البعض إن هذا الحديث مبالغا فيه ولكننى اؤكد انه اقل من الواقع بكثير. وربما يشك كثير من الناس اننى ارمى التهم جزافا، وان النظام يدافع عن الفضيلة والقيم الجميلة ولذلك فهو لا يرضى بسيادة هكذا نوع من الفن إن جاز ان نسميه فنااساسا، ولكنى اقول هذا يحدث من باب إتاحة بعض الحريات الغير ضارة بالنظام طالما ان الناس يجدون فيه بعض متنفس لهم ويلتهون به بسبب الضغوط السياسية والاجتماعية ولذلك يمكن ان يطال تكميم الافواه كثير من المجالات السياسية والإعلامية ولكن بشكل غير مباشر تغض السلطة الطرف عن كل هذا الهرج والمرج.

Quote: اقول يا اخي الكريم ان الامكانيات التقنية والمادية المتاحة اليوم كانت غير متوفرة بالامس ومع ذلك كان انتاج فناني الامس افضل بكتير من انتاج فناني اليوم من ناحية الكلمة واللحن والاداء لذلك كان لابد للمستمعين من ايجاد فنان مفضل او مجموعة من الفنانين المفضلين وشراء اشرطة الكاسيت الخاصة بهم وكتاب الاغاني وكذلك الحفلات العامة .

ثم نأتى لمسالة الإمكانيات التى لم تتوفر فى السابق مما ذكرت من قنوات فضائية وشركات انتاج فنى وغيرها.

ورحم الله شاعرنا الكبير سيد عبد العزيز حين قال :-

كل شئ ميسور والظروف سامحة

ودعنى اقول لك أن الفنانين الاوائل كانوا قٍلة وكانوا احرار وكان التنافس الشريف بينهم هو بعض من اسباب تقديمهم ذلك العطاء الثر ، ولذلك ظهر كل ذلك الكم المجّود من الغناء . وكان الفن فى بداياته حيث لا الحان مكررة ، إلاّ من باب المجارة كما حدث فى عهد الغناء الأول .

اما الآن بعد كل هذه السنين من إنطلاقة الفن السودانى فإن ظهور اغنية جديدة شكلا ومضمونا فى سماء الأغنية يُعد لوحده انجازا فى زماننا الحاضر، وهذه لاينتبه لها إلاذ الفنانين الحقيقين المهتمين بمسألة الغناء (طبعا هناك الكثير من المغنين والمغنيات الذين امتهنوا الفن من اجل طلب الرزق او الشهرة او خلافه ، من غير أن يكون ذلك محّل إهتمامهم الحقيقى بما هية الفن). فالأجهزة الرسمية لا تسمح تحت مختلف الظروف بتقديم هكذا نوع من الفن الجاد. ولأن المسألة مسألة ترّبُح عند الكثيرين وبضمنهم شركات الانتاج الفنى التى تقوم بالتسجيلات فإن الفنان الحقيقى مواجه بالكثير من المصاعب والعراقيل
حين يريد أن يقّدم فنا راقيا وجميلا وذو مضمون لايجارى الموجة السائدة ، إلاّ من رحم ربى . وحدها حصاد كانت سبّاقة فى هذا المجال وبالطبع هنا لا انسى دور الاستاذ يوسف الموصلي الذى علمنا ان نسمع الموسيقى بشكل نظيف وعلمى . ومن اعيته الحيلة قام بمحاولات انتاج فنه بنفسه وهى مغامرة كبيرة وشجاعة لا تتوفر مادياتها ولا اسبابها للجميع.

Quote: ذكر الاخ الفنان حادثة ان احد الفتيات جاءت الى استريو وسمعت الكاشف يغني اغنية خاصة به وذكر الاخ الفنان على لسان البت قالت البت ده منو ده البوظ اغنية عصام محمد نور كان رده ان هذا الفنان هو صاحب الاغنية الاصلي وان عصام محمد نور هو البوظ اغنيته يا اخونا الفنانين الشباب خلونا من الاعذار الواهية البتقولوها دي العايزنا نسمع ليهو يقدم غناء جميل وبس

هل رأيت كيف تتحول الامكانيات المتاحة لخصم على الفنان الجاد

دمت بخير

تحياتي
ضياء الدين ميرغني

Quote: اقول لك ولأن الفنان ابن بيئته وظروفه ومرحلته كذلك لا يمكن أن تخلق من الفسيخ شربات . كل الظروف المحيطة بالفنانين الجدد تخنق الإبداع وتواصُل العطاء . أقلها فى ابسط الاحوال (التحجر وعدم الإنفتاح على الجديد من المستمعين فى غالبهم الأعم ، إلاّ من بعض الصفوة الذين ينتقدون بعقل مفتوح ومواكبة للتحديث الموسيقى. وهذه مشكلة ازلية واجهت كل الفنانين جيلا بعد جيل . ففى بداية إنطلاقة الفن السودانى واجه الفنانون الاوائل حربا شرسة وكان كل من يمتهن الفن يُعتبر (صائعا او صعلوكا) . وعندما بدأت الدفعة الثانية فى الغناء من جيل الرواد امثال الاساتذة حسن عطية واحمد المصطفى وابوداؤود وغيرهم فى فرض وجودهم فى الوسط الفنى والإجتماعى السودانى بدأ الفنان السودانى فى أخذ مكانه فى المجتمع السودانى وهكذا مضى الحال حتى اصبح الوسط الفنى يستقبل عناصر لها مكانتها الوظيفية والمحترمة فى المجتمع السودانى مثل الاستاذ وردى والدكتور عبد الكريم الكابلي والاستاذ محمد ميرغنى والاستاذ الطيب عبدالله وغيرهم وهذا لوحده جانب مهم من النضال من اجل الفن . ولكن من ناحية أخرى كان هؤلاء جميعا وحتى من أتى بعدهم يواجهون نضالا من نوع آخر وهو تقديم الجديد . .

الاخ ضياء الدين ميرغني ،

اتفق معاك تماما في السطرين الاول والثاني واختلف معاك في السطر التالت وانا كاحد المستمعين منفتح تماما لكي اسمع اي اغنية جديدة جادة جادة بمعني جميلة في كلماتها ومعانيها بغض النظر عن الفنان بعدين الدور الكبير يقع على عاتق الفنان لتوصيل فنه ورسالته وهو الذي يفرض فنه على الجمهور من خلال الامتياز بالاداء لا بالتطبيل من اصدقائه او من تربطه به اي صلة .
والدليل على ذلك قد تجد فنانا شابا متاحة له كل الامكانيات من شعراء وملحنين وشركات اعلان وانتاج لكن اداء الفنان غير جيد فتجد المستمع على الرغم من كل هذا الزخم لا يطيق ان يسمع لهذا الفنان
ومن الناحية التانية تلاقي واحد فنان صغيروني من منطقة الشايقية عندو طنبور وبيغني الدنيا كلها بتسمع ليهو .

وعندي تعقيب بسيط على الظروف المحيطة وخنق الابداع في هذه الظروف التي ذكرتها كمية الفنانين الذين ظهروا في هذه الفترة تكاد تكون اكثر من ظهور الفنانين منذ بداية الفن في السودان الى بداية عهد خنق الابداع التي ذكرتها وانا اعتقد والعلم عند اهل العلم ان معظم من يمارسون الفن يمارسونه اقتصاديا فقط وعندي نموزج بسيط ذهب اجازة الى السودان وجدت كل الفاشلين توجهوا الى الغناء والعزف
مع العلم انهم قبل فترة وجيزة لا يربطهم بالفن اي رابط وعندما تسال من احد منهم تجيك الاجابة انو فلان بقى ترطيبة العدادات شغاله وكل يوم طالع حفلة .

يجي السؤال البفرض نفسو هل الشباب حاليا يمارسون الفن من اجل الفن ام ان الشغلانة مصدر دخل يومي وانتهت الشغلانة.

ماذكرته من الفنانين من جيل الرواد ومن اتى بعدهم كانت ولا تزال بصمتهم موجودة في الفن السوداني
كانوا مطالبين بالجديد نعم وقد فعلوا واتوا بالجديد الشديد. يعني لو مستكت اي فنان من الجيل الذي ذكرت تجد له اكتر من عمل في غاية الروعة .

Quote: فكل من أتى بجديد ظل متهما (بتبويظ الغناء) والهبوط بالفن . فإن قدّم القديم بشكل جديد فهو متهم بالتهمة اعلاه ، وان قدّم الجديد فهو متهم بالهبوط وعدم القدرة على مجارة الماضى التليد ، مهما كان جودة الغناء الذى يقدمه او إمتلاكه للإمكانيات الفنية التى تؤهله لذلك . وللأسف لا يتلقى هذه التهمة من المستمعين فقط بل يمتد ذلك من بعض قدامى الفنانين. يعنى فى الحالتين هو الضائع.

هذا ان دل على شئ انما يدل على اهتمام الناس بالفن الاصيل بعدين المستمعين ماعايزين ليهم واسطة عشان يقبلوا الفنان الفن الجميل تسمعه الاذان ويدخل الوجدان طوالي بدون توصية من احد والدليل على ذلك ان بعض المستمعين يستمعون الى اغاني هندية او اجنبية ويكونوا ماعارفين الكلمات زاته بتقول شنو لكن اللحن والاداء في اروع مايكون . اما نقد الفنان القديم للفنان الجديد هو ميزة حسنة اذا كان الفنان الجديد يريد التطور بعدين من حق الفنان القديم نقد الفنان الجديدة من النواحي الايجابية فقط
اما الحسد والخوف من سحب البساط فهذا شئ نتفق معك فيه ونختلف مع اي من كان من الفنانين الكبار .

Quote: وعودا على بدء اقول ان الفنان هو ابن بيئته وظروفه . فلنسأل ضمن السقوط العام للمجتمع وتحت هذه الظروف السياسية والاقتصادية والذوق العام، كيف يمكن للفنان تقديم فن راقى ومحترم وكل الابواب موصدة امامه؟ الم يواجه الفنان العظيم الراحل مصطفى سيد احمد نفس هذه الظروف فى بداياته وواجهها بشد أحدّ بعد رسوخ اقدامه وفنه الراقى والمؤثر من جانب هذه السلطة . هل تعلم ان الفنان القامة الاستاذ على السقيد قد تمت اجازة صوته قبل اقل من شهرين؟( صدق او لا تصدق ). قد يعتقد البعض إن هذا الحديث مبالغا فيه ولكننى اؤكد انه اقل من الواقع بكثير. وربما يشك كثير من الناس اننى ارمى التهم جزافا، وان النظام يدافع عن الفضيلة والقيم الجميلة ولذلك فهو لا يرضى بسيادة هكذا نوع من الفن إن جاز ان نسميه فنااساسا، ولكنى اقول هذا يحدث من باب إتاحة بعض الحريات الغير ضارة بالنظام طالما ان الناس يجدون فيه بعض متنفس لهم ويلتهون به بسبب الضغوط السياسية والاجتماعية ولذلك يمكن ان يطال تكميم الافواه كثير من المجالات السياسية والإعلامية ولكن بشكل غير مباشر تغض السلطة الطرف عن كل هذا الهرج والمرج. .

كل الفنانين يعانون من معاناة مختلفة في الجيل القديم كانت المعاناة من الاسرة والمجتمع كون ان احد افراد الاسرة صار فنانا

بعد قبول الفن وظهور الفنانين الكبار اكيد واجهو صعوبات في طريقهم الفني

الفنان محمد وردي عانى كثيرا وابتعد جسديا عن مستمعينه ومعجبيه ولكن كانت اعماله تصل الى ا لمستمع

الفنان مصطفى سيداحمد واجه صعوبات وكانت اعماله تصل الى المستمع وهنا تذكرت مثل بيقول انما يتم حسب البلبل دون غيره من الطيور لحسن صوته
الفنانين الشباب لم يواجهوا ماواجهه مصطفى سيداحمد ولم يبتعدوا كثيرا عن المستمعين ولكن للاسف لم يقدموا شيئا يذكر طبعا انا اعني السواد الاعظم منهم .

انا شخصيا بعتقد انو التكنلوجيا الحديثة وفرت جميع السبل للاتصال والتعلم السريع لكن هذه التقنيات الجديدة لم نر لها اثر

اسع لو اي فنان شاب عمل بوست كبير يا اخوانا انا فنان صاعد عايز بعض التوجيها وبعض الاشعار

تاني يوم ح تلاقي البوست كلو اشعار وموسقيين وملحنيين وفنانين كبار مستعدين للتعاون . او يشيل تلفون اي شاعر ويضرب ليهو مافيها حاجة .

اها زمان عشان تلاقي شاعر يمكن يصادف تلاته سنة ماتقابلوا.

بخصوص الاستاذ علي السقيد مش قلت الراجل ده صوتو ماكان مجاز لكن تصدق معظم دفعتنا في الجامعة كانوا بيسمعو للسقيد بي صورة ماعادية . ده دليل على ان الغناء الجميل يصل للمستمع حتى لو كان غير قانوني

نرجو من الاخوة الفنانين الاجتهاد اكثر لتقديم فن افضل انا هنا في الخليج كل سنة يمكن بيظهر فنان جديد بي اعمال جميلة جدا ويضرب السوق وماحصل سمعت فنان جديد بيغني اغاني مابتاعتوا

تحياتي الغالية وشكرا على المداخلة الجميلة التي عكست مايواجهه الفنان الشاب ونرجو من الفنانين الشباب ان يحاولوا بشتى السبل لتطوير انفسهم .

تحياتي

زاتووووو

Quote: والله يادكتور الزول.. الليلة ظهرت ليك مواهب جديدة.. وأضان موسيقية.. ونقد فني.. الله يدينا من خيرك.. .

حبيبنا ايمن دياب

لا ياخي مش قصة مواهب ونقد فني لكن ممكن تقول اذن موسيقية او مستمع جيد

القصة ماقصة رغيف القصة قصة شباب ظريف

شكرا ليك كتير بس ماوريتنا رايك شنو

تحياتي

زاتوووو

رأيي يادكتور كالآتي:
الناس لا تقبل الجديد.. بل لا أرى أن هناك أغنيات جديدة نجحت
واستلطفها الناس بمثل القديم المعتق الذي سرى في الوجدان..
والجيل الجديد والصاعد من الفنانين..
لا يركزون على التجويد والإتقان..
بقدر ما يهمهم الانتشار والمكسب السريع..
لذلك يأتي إنتاجهم ضعيفاً وباهتاً ومشوهاً..

Quote: رأيي يادكتور كالآتي: الناس لا تقبل الجديد.. بل لا أرى أن هناك أغنيات جديدة نجحت واستلطفها الناس بمثل القديم المعتق الذي سرى في الوجدان.. والجيل الجديد والصاعد من الفنانين.. لا يركزون على التجويد والإتقان.. بقدر ما يهمهم الانتشار والمكسب السريع.. لذلك يأتي إنتاجهم ضعيفاً وباهتاً ومشوهاً...

طيب ده ما مربط الفرس ذاتووو

لكن معظم الناس بتقبل الجديد بس لازم الجديد يكون شديد يعني مابنتوقع فنان جديد يقدم اغاني بي مستوى محمد وردي او محمد الامين لكن كمان تكون حاجة مقبولة .

عندك مصطفى سيداحمد اغانيهو ضربت اذان المستمعين وكل واحد اغتنى شريط للراحل المقيم كذلك الفنان سيف الجامعة برضو شريطو بتاع التسعينات ضرب اذان المستمعين

اها نحن برضو عايزين فنان كده يكون ليهو اسلوبو الخاص انا احترم جدا الفنان البيكون اعمالو الخاصة ويبدا في تطوير اغانيه وانتاجه . انا اسع بحترم الفنان عمر احساس جدا لانو عندو اعمال خاصة ولون خاص

قالوا في العجلة الندامة وفي التاني السلامة

السوق ملحوق بس كيف البضاعة تكون جيدة .

تحياتي

زاتوووو

ما سمعت الفنان ابو صلعة لما قال حاغنى ليكم اغنية
تعتبر للاجيال السابقة والحالية والقادمة كمان
وفى الاخير غنى ليهو حاجة كده بعرفها براهو ...

وبعدين حكاية ( الصولة ) شنو فى كل اغنية بغنوها
الصولة بعملوها فى الحفلات عشان الناس ترقص
اها فى التلفزيون عشان شنو ... ننزل بيها الدغت

واخيرا" ما ملاحظ اى فنان جديد يقول ليك الاغنية من كلمات كوبانى
غايتو بذكرونى ( معهد صلاح ) فى الصحافة العايز يمتحن الشهادة
لازم يدخلو فى الاجازة ..... اجازة الاصوات لوووول من غير يكه .

الزول ذاتو!

التحايا

اعتبر ان البوست قيم جدا

في اعتقادي ان هناك ظلم للفنانين الشباب ، نتج ذلك عن صعوبة التقبل وصعوبة استيعاب ان لكل مرحلة ولكل جيل لحن ومفردة بغض النظر عن ما يسمى هبوط.

فمثلا يا سعادة الزول ذاتو انا امثل جيل وانت تمثل جيل وامي في البيت جيل براهو ، فباي حال نتفق في فنان واحد واداء واحد.

انا في تقديري الساحة الشبابية تعج بالاصوات المميزة خالص والاداء الجيد ، فنجوم الغد استطاعت ان تخرج زبدة الصوت السوداني صراحة والامثلة كثيرة للمتابعين نجوم الغد لكن كيف لهم الوصول بدون رعاية ودعم
بس هنالك مشكلة المفردة ان صح التعبير ، فمشكلةهذا الجيل هي ازمة المفردة خلاف ذلك انا ماشايفة مشكلة وهذه تحتاج لتعاون من قبل الشعراء الجيدين ، ففي رايي الشعراء المميزين غير متعاونيين مع الشباب وهذا يجعل الفنان يلجأ لاى شاعر او متشوعر!
(بعدين زي في شاعر واحد متعهد للفنانيين الشباب)

فمثلا انا بحب اغاني الحقيبة جدا لكن لااسمعها باصواتها الاصلية ولا تطربني حتى لانها تغني باحساس غير احساسي وحتى الموسيقي لا تحركني ، لذا الجا الي صوت شاب



ربما اواصل

Quote: في اعتقادي ان هناك ظلم للفنانين الشباب ، نتج ذلك عن صعوبة التقبل وصعوبة استيعاب ان لكل مرحلة ولكل جيل لحن ومفردة بغض النظر عن ما يسمى هبوط. فمثلا يا سعادة الزول ذاتو انا امثل جيل وانت تمثل جيل وامي في البيت جيل براهو ، فباي حال نتفق في فنان واحد واداء واحد. انا في تقديري الساحة الشبابية تعج بالاصوات المميزة خالص والاداء الجيد ، فنجوم الغد استطاعت ان تخرج زبدة الصوت السوداني صراحة والامثلة كثيرة للمتابعين نجوم الغد لكن كيف لهم الوصول بدون رعاية ودعم بس هنالك مشكلة المفردة ان صح التعبير ، فمشكلةهذا الجيل هي ازمة المفردة خلاف ذلك انا ماشايفة مشكلة وهذه تحتاج لتعاون من قبل الشعراء الجيدين ، ففي رايي الشعراء المميزين غير متعاونيين مع الشباب وهذا يجعل الفنان يلجأ لاى شاعر او متشوعر! (بعدين زي في شاعر واحد متعهد للفنانيين الشباب) فمثلا انا بحب اغاني الحقيبة جدا لكن لااسمعها باصواتها الاصلية ولا تطربني حتى لانها تغني باحساس غير احساسي وحتى الموسيقي لا تحركني ، لذا الجا الي صوت شاب

اتفق مع رأي الاخت شمائل النور في اغلب ما ذكرت

وما تحته خط هو زبدة المداخلة وإن اختافت معها قليلا فى النقطة الثالثة وهى تعاون بعض الشعراء الكبار مع الشباب فنجد مثلا مجموعة مميزة من الشعراء اثرت الساحة الفنية ولا تزال مستعدة لمثل هذا التعاون مثلا الاساتذة اسحق الحلنقى وعبدالوهاب هلاوى وسعد الدين ابراهيم والتجانى حاج موسى وسوركتى عبد القادر الصادق جميل وغيرهم على حسب التجربة الشخصية فهم مستعدون لهذا التعامل .

فمثلا يا سعادة الزول ذاتو انا امثل جيل وانت تمثل جيل وامي في البيت جيل براهو ، فباي حال نتفق في فنان واحد واداء واحد.

وهذا يجعل الفنان يلجأ لاى شاعر او متشوعر!

(بعدين زي في شاعر واحد متعهد للفنانيين الشباب)

تخريمة :-

شمائل انت رباطابية؟وجه ضاحك نسوى شنو مع بكرى المعطل الاكواد

Quote: الزول ذاتو! التحايا اعتبر ان البوست قيم جدا في اعتقادي ان هناك ظلم للفنانين الشباب ، نتج ذلك عن صعوبة التقبل وصعوبة استيعاب ان لكل مرحلة ولكل جيل لحن ومفردة بغض النظر عن ما يسمى هبوط. فمثلا يا سعادة الزول ذاتو انا امثل جيل وانت تمثل جيل وامي في البيت جيل براهو ، فباي حال نتفق في فنان واحد واداء واحد. انا في تقديري الساحة الشبابية تعج بالاصوات المميزة خالص والاداء الجيد ، فنجوم الغد استطاعت ان تخرج زبدة الصوت السوداني صراحة والامثلة كثيرة للمتابعين نجوم الغد لكن كيف لهم الوصول بدون رعاية ودعم بس هنالك مشكلة المفردة ان صح التعبير ، فمشكلةهذا الجيل هي ازمة المفردة خلاف ذلك انا ماشايفة مشكلة وهذه تحتاج لتعاون من قبل الشعراء الجيدين ، ففي رايي الشعراء المميزين غير متعاونيين مع الشباب وهذا يجعل الفنان يلجأ لاى شاعر او متشوعر! (بعدين زي في شاعر واحد متعهد للفنانيين الشباب) فمثلا انا بحب اغاني الحقيبة جدا لكن لااسمعها باصواتها الاصلية ولا تطربني حتى لانها تغني باحساس غير احساسي وحتى الموسيقي لا تحركني ، لذا الجا الي صوت شاب ربما اواصل

العزيزة شمائل

في الجزء الاول ليس هنالك عدم تقبل بالصورة التي تجعله ظلم نعم يمكن ان يكون هنالك لكل مرحلة كلمتها ولحنها لكن لانقبل ان تكون الكلمة واللحن غير جذاب للمستمع .

بعدين قصة الاجيال دي برضو ح نختلف فيها لانو انا كل يوم جمعة بقوم قبل الساعة عشرة عشان احضر حقيبة الفن مع انو ناس الحقيبة ديل مامن جيلي ولا دفعتي لووووووووول يكه لكن بستمتع بي فنهم مع انو بعض الاغاني مابفهم بعض الكلمات تصدقي بعد ما احضر الحقيبة بستمتع بالاخبار بي صوت عبدالرحمن احمد
بعدين انتي من ياتو جيل لانو لا ما اظن ان الجيل 30 او 33 سنة اذا افترضنا انو والدتك من جيل البطولات وانا من جيل طيش الدوري برضو ممكن تربطنا كلمات والحان عندك خير مثال الفنان محمد وردي
كل الاجيل بتعتبرو سيدالشئ ذاتووو مع انو الراجل من جيل سابقنا واغانيهو قديمة لكن برضو في القمة .

الساحة الفنية تعج زي ماقلتي بالاصوات وبرنامج نجوم الغد برنامج منظم وبه نقد من ناس الشئ ذاتووو

لكن طبعا نقد ايجابي يساعد في تطوير الاداء وبرضو كان في برنامج اسمو فوتغراف او اوتغراف ماعارف
برضو كان فيهو اصوات جميلة جدا خاصة بتاعة عائشة الفلاتية .

اذا افترضنا ان هنالك ظلم او عدم اهتمام طيب وين دور الفنان عشان يلاقي ليهو مخرج من المصائب دي
بعدين كثرة القنوات الفضائية يمكن يكون ليهو اثر ايجابي للفنانين الشباب .

زمان في الراديو كان في برنامج مامتذكر اسمو بيجي الساعة واحدة ونص وكان بيهتم بالشباب واغانيهم كانت هنالك اغانية جميلة واصوات نادرة .

المفردة موجود كما قال لك الاخ جعفر لكن تبقى مشكلة ان هنالك فنان يبحث عن الكلمة وفنان عايز واحد يجيهو في البيت يجيب ليهو الكلمة واللحن ويقول ليهو قوم غني مابتجي طبعا

تحياتي ومداخلتك ادت البوست نكهة خاصة

زاتووووو

Quote: ما سمعت الفنان ابو صلعة لما قال حاغنى ليكم اغنية تعتبر للاجيال السابقة والحالية والقادمة كمان وفى الاخير غنى ليهو حاجة كده بعرفها براهو ... وبعدين حكاية ( الصولة ) شنو فى كل اغنية بغنوها الصولة بعملوها فى الحفلات عشان الناس ترقص اها فى التلفزيون عشان شنو ... ننزل بيها الدغت واخيرا" ما ملاحظ اى فنان جديد يقول ليك الاغنية من كلمات كوبانى غايتو بذكرونى ( معهد صلاح ) فى الصحافة العايز يمتحن الشهادة لازم يدخلو فى الاجازة ..... اجازة الاصوات لوووول من غير يكه .

حبيبنا عبد الدائم سيداحمد

للاسف سمعتو وبس ماعرفتو بيقول في شنو يمكن الزول ده بيغني للجن مش للانس

بعدين حكاية الصولة والجولة دي لانو زول مامتعود على الغناء في غير الحفلات او يكون عايز يديها كوز موية لوووول

انا غايتو بعتبر دكتور كوباني زول شجاع جدا ومتعاون مع الشباب بس معظم الشباب ماعايزين يتعاونوا مع نفسهم ودكتور كوباني معانا هنا في البورد انشاء الله يضيف لينا حاجة بخصوص الشباب وعدم الامكانيات
بالمناسبة دي رائيك شنو في سلامتك ياندى العنبر لووووووووووول يكه

ياريت لو كان في معهد نسميهو معهد صلاح للغات لاجتياز الاصوات

تحياتي

زاتوووو

معليش يا اخوانا يمكن اختلف معاكم شويه
في عصرنا الحالي المال اصبح يشكل عصب الحياه
الفنيه
اولا الفن الجاد ماعاد يصلح لبيوت الافراح
لذا يحتاج الي نظام التسجيل
والتسجيل دخل فيما يسمي بصناعة الاغنية او الفن
وده داير قروش والقروش عند ال::::::::::: مافي داعهي نقول
===========
هسع انا عندي عشرين اغنيه جديده
وقاعد اوفر لاني الحمد لله شغال كويس عشان اسجل البوم واحد ارجعو للسودان قبل وصولي هناك
وقد لا يجيب رآسماله نسبة للموقف الاقتصادي الفردي هناك
============
ضياء الدين انت ذاتك عنك زخم من الالحان وما قادر توصلها لنفس السبب
يا اخوانا لازم تكون هنالك بعض التضحيات مع المساعدة الممكنة عشان الجيل الجديد المبدع يقدر يستمر في ظروف الانحدار الصعبة دي
========
في رآيي اذا استمر الفنان الجديد في التغني باغنيات الاخرين لاكثر من سنتين دون الاضافات من الاغنيات الجديدة
فهو مجتر ليس الا ولن يفيد الفن السوداني باي حاجة

أخى العزيز الزول ذاتو

أشكر أخى ضياء لفت أهتمامنا لهذا البوست الجد راقى

رجائى أن ينتقل هذا البوست للربع الثالث فهناك الكثير
أنا شخصيا من الذين يدعون للأخذ باراء المستمعين ولو صغير مأخذ الجد فالغنا رسالة تهم الجميع
لمزيد المعرفة هاك عنوان موقعى لتستمع لبعض أعمالى

www.ibrahimsud.net

إبراهيم عبد الحليم

Quote: في رآيي اذا استمر الفنان الجديد في التغني باغنيات الاخرين لاكثر من سنتين دون الاضافات من الاغنيات الجديدة فهو مجتر ليس الا ولن يفيد الفن السوداني باي حاجة

كلام صح

هذا الموضوع شغلني كثيرا ومن مده وانا اجهز لموضوع قريب من هذا البوست.

اتمني نقل البوست للارشفة حتي نستطيع ان ندلو بدلونا مع تقديري للجميع.

الاخ الزوول ..سلمات

مداخلتى الاولى معك..اسمح لى

انا مستمع كيرى ساكت

Quote: [بعدين انتو راس مالكم قرار شجاع بس من وزارة الثقافة لو صدر قانون بمعاقبة كل من يغني اغاني فنان ا خر في حفلة او تسجيل اغاني ملك فنان اخر شوفو منو تاني البجيبكم في حفلات ولا يشتري ليكم شرائط كاسيت او سيديهات . عشان كده عندكم فرصة كويسة قبل القرار الشجاع ده مايصدر في الفترة دي مشو اموركم كويس واجتهدو عشان لمن القرار يطلع تكونوا جاهزين بي حقكم الخاص

لا توجد رعاية بالمعنى من الدولة لكل الثقافات والفنون..وزارة الثقافة عليها توفير المناخ المناسب لكل الفنون . والدولة لازم تدخل وتقيف ورا كل المبدعين .وزى ما قال الاخ ضياء فى سياق كلامو لكن بصيغة اخرى ..الظروف المحيطة ووو.اما حكاية حفلات الاعراس المفروض تكون حاجة ثانوية للفنان زى ما فى بلدان كتيرة

ناس المسرح والفنانيين الشباب على سبيل المثال لا الحصرقاعدين تحت نيمة قدام التلفزيون(القومى) وحالتم بالبلا ( pathetic) ,مشردين بفعل فاعل

فى البلادالتانية..نقول مصر القريبة دى الانتاج الازاعى والتلفزيونى ورعاية الفنون بكل اشكالها افضل بمئات المرات من السودان..و شوف الغربيين ديل بيستغلوا ابداع حتى الاطفال كيف؟؟ ياخى تقيف فى الشارع وتشيل جيتارك تدندن بيهو فى شارع الله تكسب حب الناس وكمان قروش (busking)

السودان بلد واقف فى حتة واحدة..والفن بيحتاج لتهيئة المناخ والتشجيع من الدولة بأكثار دور الثقافة والفن..للاسف تلقى عندنا مثلا الاحزاب التاريخية والفنانيين العمالقة والرموز ماعارف الوطنية مجرد انتقاد طيارتك تقوم..وانا ما عارف ليه فى شريحة عايزة تثبت القديم والمحافظة على شكل معين مع احترامنا لكل الكبارات والاحتفاظ بحقوقم..ومتين الفنانيين الشباب ديل حيبقو كبار وعمالقة ؟؟؟والاحزاب الصغيرة حتكون عندها مجال عشان تصنع تاريخا ؟؟؟و الدكاترة الكبار ما بيدوا فرقة للدكاترة الضغار من المبدعين ..ويلا بعداك بيفتشو ا يتخارجوا من البلد.. المشكلة يا عزيزى بلدنا ومجتمعاتنا الفنية والثقافية والسياسية فيها احتكار وعدم انصاف واضح..كلامى فيهو ريحة سياسة لكن للاسف هذة هى الحقيقة وليست هناك فواصل بين السياسة والفن..شخصيا استمع للفنانيين الشباب اكثر من للكبار


وليك شكرى

Quote: معليش يا اخوانا يمكن اختلف معاكم شويه في عصرنا الحالي المال اصبح يشكل عصب الحياه الفنيه اولا الفن الجاد ماعاد يصلح لبيوت الافراح لذا يحتاج الي نظام التسجيل والتسجيل دخل فيما يسمي بصناعة الاغنية او الفن وده داير قروش والقروش عند ال::::::::::: مافي داعهي نقول =========== هسع انا عندي عشرين اغنيه جديده وقاعد اوفر لاني الحمد لله شغال كويس عشان اسجل البوم واحد ارجعو للسودان قبل وصولي هناك وقد لا يجيب رآسماله نسبة للموقف الاقتصادي الفردي هناك ============ ضياء الدين انت ذاتك عنك زخم من الالحان وما قادر توصلها لنفس السبب يا اخوانا لازم تكون هنالك بعض التضحيات مع المساعدة الممكنة عشان الجيل الجديد المبدع يقدر يستمر في ظروف الانحدار الصعبة دي ======== في رآيي اذا استمر الفنان الجديد في التغني باغنيات الاخرين لاكثر من سنتين دون الاضافات من الاغنيات الجديدة فهو مجتر ليس الا ولن يفيد الفن السوداني باي حاجة

حبيبنا الموصلي ،

سلامات وحضورك يشرف البوست

في الجزء الاول نعم المال اصبح كل شئ والفن الجاد ممكن نقول يصلح لبيوت الافراح بس للناس البتعرفو

المطلوب حاليا في بيوت الافراح ماخف وزنه ( العداد ) وكثرت حركته ( التطريب ) عشان كده نادرا تلاقي واحد جاب محمد ا لامين او وردي في عرس لانو محمد الامين ممكن يغني اغنية واحده وحظر التجول يبدا لكن لو جبت واحد من الفنانين البيكلموهم العصر ممكن في الساعتين ديل يغني اغاني الحقيبة كلها ويخش علي جيل الرواد وممكن يرقص العروس كمان .
القروش عند الجماعة قولها مافيها حاجة كلنا عارفين

===================

انا شخصيا واثق انو شغلك بيكون نضيف لانو قبل ماتنزل شغل بتعمل الف حساب لي كل حاجة وبتكون سمًعتو لي كم واحد عشان يديك رايو شنو من ناحية بيجيب حقو دي ماعندي علم لكن اذا ماجاب حقو مش عشان الظروف الاقتصادية لانو لمن كنا طلبة واحدين يرسلو ليهم المصاريف يمشو يشترو بناطلين جنز وكاسيت
بس في مشكلة هي حقوق الطبع غير محفوظة يعني ممكن واحد ياخد ليهو كاسيت ورب كاسيت انبت سبع كاسيتات
في كل كاسيت عشرون اغنية لوووووول والغريبة النسخ بيتم في بعض محلات البيع نفسها

====================

السنتين ذاته كتيره ممكن سنة واحده كفاية وقالوا من لم يتقدم تقادم

نتمنى ان نشوف البومك قريبا

تحياتي

زاتوووو

اخي زاتو

الامه هي التي تصنع الفنان وليس العكس.

فهل الهبوط في الذوق العام ام في ما يقدم الشباب من اعمال غنائية؟

بين الزمن الفني الجميل وزمن اليوم، يرى البعض أن الفن تدهور، والذوق العام بات يميل للأعمال السريعة والخالية من القيمة الفنية

الحقيقية، بينما يعتبر البعض الآخر أن الفن يتغيّر مع الزمن بشكل طبيعي، حاله في ذلك حال كل شيء، وان تطور الأعمال لا يعني بالضرورة

فقدانها أصالتها وقيمتها

فهل المشكل اقتصادي اجتماعي ثقافي ام سياسي؟

هذا هو السؤال ....وهذا هو الكلام الجميل والمقنع ولكن والف لكن ...

اخي حيدر حرام عليك ظلمت زياده حمور .. منوالقال ليك بيشبه عصام محمد نور الشين ده..جد جد

الاصوات الجميله موجوده وكما ذكر الاخ اعلاه امثال سميره دنيا وابوبكر سيد احمد ونميري حسين وشكر الله عز الدين

المشكله ايضا في التلحين لا توجد الحان قويه لتنافس ولا اظن لعدم وجود ملحنين بقدر ما هو لعدم وجود الحان تفرض نفسها

في ظل ظروف ضاغطه مما جميعه.

لا ننسي شيئ مهم جدا وهو شركات الانتاج وهي من اكبر معوقات انتشار الاغنيه الشبابيه وساعود لهذا الموضوع ..

Quote: اخي زاتو الامه هي التي تصنع الفنان وليس العكس. فهل الهبوط في الذوق العام ام في ما يقدم الشباب من اعمال غنائية؟ بين الزمن الفني الجميل وزمن اليوم، يرى البعض أن الفن تدهور، والذوق العام بات يميل للأعمال السريعة والخالية من القيمة الفنية الحقيقية، بينما يعتبر البعض الآخر أن الفن يتغيّر مع الزمن بشكل طبيعي، حاله في ذلك حال كل شيء، وان تطور الأعمال لا يعني بالضرورة فقدانها أصالتها وقيمتها فهل المشكل اقتصادي اجتماعي ثقافي ام سياسي؟ هذا هو السؤال ....وهذا هو الكلام الجميل والمقنع ولكن والف لكن ... اخي حيدر حرام عليك ظلمت زياده حمور .. منوالقال ليك بيشبه عصام محمد نور الشين ده..جد جد الاصوات الجميله موجوده وكما ذكر الاخ اعلاه امثال سميره دنيا وابوبكر سيد احمد ونميري حسين وشكر الله عز الدين المشكله ايضا في التلحين لا توجد الحان قويه لتنافس ولا اظن لعدم وجود ملحنين بقدر ما هو لعدم وجود الحان تفرض نفسها في ظل ظروف ضاغطه مما جميعه. لا ننسي شيئ مهم جدا وهو شركات الانتاج وهي من اكبر معوقات انتشار الاغنيه الشبابيه وساعود لهذا الموضوع .

حبيبنا طارق ميرغني

خلينا نقول الفنان هو الذي يصنع نفسه بمساعدة الامة

يعني الفنان عليهو الخطوة الاولي والامة بتوجد ليهو ارضية مستمعين ومعجبين

بالنسبة لي سؤال الهبوط في الذوق العام

انا بعتقد انا هناك بعض الاستعجال من قبل الفنانين الشباب بالنسبة لاصدار اغانيهم يعني الواحد مهما كلف الامر عايز يعمل عمل خاص بيهو مهما كان مستوى هذا العمل . على العكس في جيل الفنانين الكبار هنالك اعمال لم تر النور بعد نسبة لعدم وجود اللحن المناسب الذي يتناسب مع الكلمات وسمعة الفنان

خليك من ده كلو ياخي في بعض الفنانين الشباب بيغنوا غناء موجود وملحن يتم تاديته بصورة باهته فهل تنتظر من هكذا فنان ان يكون له عمل خاص وجمهور

بالنسبة للمشاكل الاجتماعية والاقتصادية والسياسية والثقافية

هي موجودة ولكن تاثيرها متفاوت من شخص لاخر ومن تخصص لاخر مثلا اذا نجح الفريق القومي للوصول الى كاس العالم مش معناها مافي مشاكل بس بتفرق من الكورة الى الفن الى الاخلاق

في مجال الفن مثلا التاثير قوي ومع ذلك نجد كمية الاعمال( الفنانين والفنانات) التي ظهرت في فترة التسعينات اكثر بكثير من الفترات السابقة.
حاليا توجد برامج متخصصة للمواهب ( نجوم الغد ) وتوجد تقنيات يمكن ان تساعد اكثر من ا ي وقت مضى
ومع ذلك مانزال نسمع الاعذار المختلفة من امكانيات مادية ومعنوية .

في اعتقادي العمل الجميل يُجبر المهتمين يعني لو في فنان قام بي سنونو شركات الانتاج كلها تجري وراهو لكن ناس قريعتي راحت ربنا يكون في عونهم لووول .

تحياتي

زاتوووو

الزول زاتوووو سلام

ما تنسى تنقل البوست للربع القادم حتى نكمل النقاش

اها المرة الجاية بجييك بالدلائل يعنى بيان بالعمل

اوكى ؟

ضياء