خليكّ ساكت..ما تَ قول بالله ...شئ!

خليكّ ساكت..ما تَ قول بالله ...شئ!


01-07-2008, 08:06 PM


  » http://sudaneseonline.com/cgi-bin/sdb/2bb.cgi?seq=msg&board=268&msg=1242738378&rn=0


Post: #1
Title: خليكّ ساكت..ما تَ قول بالله ...شئ!
Author: تماضر الخنساء حمزه
Date: 01-07-2008, 08:06 PM

خليكَ ساكت,
وماتَ قول بالله شئ!

أخاف لو انفرط حلق الغُنا
الساكن..حروفك ..والكلام..
أبقى مشدوه ..برضي .. زيّك..
خطواتي
تاباها
الأرض
جنحاتي مابتعرف تطير شان تهبش الغيمة وتجيك.
وإنت تديني ..الملام.


يرضيك أبقى شان ريدك ..مُلام؟؟



خليكّ ساكت.
ماتقولّي كيف؟؟
انت ياموسم خريف مرّات تجينا مع المطر
نسمات تخاطر بين رذاذو ال حِِس..حريف
ومرّات طيوفك.. تبقى لي أحلامي..ضيف ..
طوّالي مستعجل نسيمو
كيفن يسيبنا بلاهو ..صيف!

ولاتقولّي كيف.
ذي سكات الحِس إذا نطق الغرام.


ماتنده الأشواق كمان..
أنا شوقي ماقدر المشي..
الواطة مابتحمل ..خُطاهو..
ده الغيم بخاف لو شال غُناهو دُّعاشو يدفق ريدة شَو.
أصلو مابحويهو سرّك..
إنت سرّك فاح ..نداهو
وانت سِر الاحتوا
كلّي خط الإستوا
حنيني سايقو عليكَ ...نَو.

خليك ساكت.
ما تَ قول بالله شئ!

كان قلت بتغيب الحواس وياني بلبسني الخدر.
بيصيب وداري
حنين
و
ماس
بِبقى متكهرّب قليبي..هناك ممدّد ..ومنبسط.


لو تقول
تبقى جد مسؤول
عن كل شعور
الليلة حام
جوّايَّ ..صفّق..وإحتفل.
الريدة لو سبب الكلام
أعرف كمان
انو شوقك
كان دليلو حروف تسوقو على مَهل.
الحرف ماوحدو البشيقك
كان معاهو الشوق ..طريقك
قبل ماقلبك..يعدّي..
كان بريدو..علي..وريدو ..إليّ ..وصل.

واجعني جداً ..أطرح الأشواق..إجابة.
لي كل سؤال الليلة قلتو ..ومُحتمل.

Post: #2
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 01-07-2008, 08:09 PM
Parent: #1


بت يا تماضر ،،،



أسكت إذا طلع الصباح
وأنا بين يديك غرقان
وما كايس المروق
لاني قادر أقول كفاي
لا شوقي هاجس ودار يروق
الشوق بصحي الروح أنينو
وفي الوكت
أصلو ما راعى الفروق
يشلع بروق
جواي تهضرب فرحتك
ومني بتبلل عروق
يا بت موَشَح سمرتك
تعالي نتلاقى المسا
في صحو أشواقي ونداك
خليو نهارنا وإفتراقك
وإنتشار الشلهتة
الليل بتاوقك كل ما اتأخر صباح
وأنا كيف بصُم خشم الحنين ؟؟
لو هو صنقر في ضليل الروح
وصار ينده عليك
شتت حروف الإشتهاء
وفرتق حناياهو وطلعتي
كيفن بصُم خشم الحنين ؟؟
والإشتها
فارض بدايتك إنتها
وانا شلتها
نبرات حنانك
صميتا جوايَّ ولبدت
وأصلي ما غنيتا شان الإلتها
فريتا شوق
ضميتا حِن
فرتقتها
وصميتا في جملة غناي
بدر إكتمل
يوم بُحنا بالعشق الغرام
وسكتنا عن باقي الكلام
مين اللي قال
مني بيجيك الملام
يا سلااااااااااام
كان يوما تاريخ اندهاش
أو قولي كان
موسم الرشاش
يوم مطرت غميات هواك
بلّت عروق اللهفة فيني
وإنتشت
كل السماوات الملانات قهقهة
ونفت الطشاش
لتَّق رشاشك خضرتي
واست حروفك نبرتي
شافت رويحتك فرحتي
وإنتي وبنيات الكلام
تتشاورن
مين البصابقني الضحك
ماااااااااا بتقدرن ...
أنا أصلي مبسوط فوق شعوركن
بتقدرن تلفنِّي لي آخر الضحك ؟؟
مااااااااااا بتقدرن ...
وحيات عويناتكن هديك
ماااااااااا بتقدرن ...
هسة الضحك
ما ضحك كل الخلوق
فوق التساب إنفرَّ شوقي وفي الأرض
كل النسيمات
بتشيلو وشوقي وتنفرد
ما بتنطرد
الداخلة لي
بتقدرن ؟؟
مااااااااااا بتقدرن ...
وحيات عويناتكن هديك
ماااااااااا بتقدرن ...



مرفق :
كل المحبة وغنيتين
بـــــادي

Post: #3
Title: Re: خليكّ ساكت..ما تَ قول بالله ...شئ!
Author: عصام عبد الحفيظ
Date: 01-07-2008, 08:42 PM
Parent: #2

Quote: ولاتقولّي كيف.
ذي سكات الحِس إذا نطق الغرام.



وزى ما قالوا بت تماضر
ازييييك

Post: #4
Title: Re: خليكّ ساكت..ما تَ قول بالله ...شئ!
Author: عصام عبد الحفيظ
Date: 01-07-2008, 08:50 PM
Parent: #2

عدل للتكرار

Post: #5
Title: Re: خليكّ ساكت..ما تَ قول بالله ...شئ!
Author: عمران حسن صالح
Date: 01-07-2008, 10:04 PM
Parent: #4

Quote: خليك ساكت.
ما تَ قول بالله شئ!
كان قلت بتغيب الحواس وياني بلبسني الخدر.
بيصيب وداري
حنين
و
ماس
بِبقى متكهرّب قليبي..هناك ممدّد ..ومنبسط.


Post: #6
Title: Re: خليكّ ساكت..ما تَ قول بالله ...شئ!
Author: baha eassa
Date: 01-07-2008, 10:10 PM
Parent: #5

Quote: انت ياموسم خريف مرّات تجينا مع المطر
نسمات تخاطر بين رذاذو ال حِِس..حريف
ومرّات طيوفك.. تبقى لي أحلامي..ضيف ..
طوّالي مستعجل نسيمو
كيفن يسيبنا بلاهو ..صيف!

ولاتقولّي كيف.
ذي سكات الحِس إذا نطق الغرام.


اختي تماضر .. ياايتها الخنساء ..
انحني لهذه الكلمات السامقة ..
انها تعطي الدفء .. وتسري في الدواخل تحطم كل المتاريس ..
كلماتك فيضان جميل .. يتخطي كل الحواجز .. ربما القاش في
قمة غضبه الجميل .. .. شكرا لك

Post: #13
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 12:31 PM
Parent: #6

بهاء
شكراً كتير على احساسك ومرورك الجميل من هنا
أسعدني تواجدك


كل الود

Post: #12
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 12:30 PM
Parent: #5

عمران



حنين
و


ماس

Post: #8
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 01-07-2008, 10:24 PM
Parent: #4

عصام عبد الحفيظ
يازول وينك انت؟؟


كان قلت ليك مشتاقين شوية ومابتكفي..

لك البكفي كلّو

Post: #7
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 01-07-2008, 10:18 PM
Parent: #2

Quote: أسكت إذا طلع الصباح
وأنا بين يديك غرقان
وما كايس المروق
لاني قادر أقول كفاي
لا شوقي هاجس ودار يروق
الشوق بصحي الروح أنينو
وفي الوكت
أصلو ما راعى الفروق
يشلع بروق
جواي تهضرب فرحتك
ومني بتبلل عروق
يا بت موَشَح سمرتك
تعالي نتلاقى المسا
في صحو أشواقي ونداك
خليو نهارنا وإفتراقك
وإنتشار الشلهتة
الليل بتاوقك كل ما اتأخر صباح
وأنا كيف بصُم خشم الحنين ؟؟
لو هو صنقر في ضليل الروح
وصار ينده عليك
شتت حروف الإشتهاء
وفرتق حناياهو وطلعتي
كيفن بصُم خشم الحنين ؟؟
والإشتها
فارض بدايتك إنتها
وانا شلتها
نبرات حنانك
صميتا جوايَّ ولبدت
وأصلي ما غنيتا شان الإلتها
فريتا شوق
ضميتا حِن
فرتقتها
وصميتا في جملة غناي
بدر إكتمل
يوم بُحنا بالعشق الغرام
وسكتنا عن باقي الكلام
مين اللي قال
مني بيجيك الملام
يا سلااااااااااام
كان يوما تاريخ اندهاش
أو قولي كان
موسم الرشاش
يوم مطرت غميات هواك
بلّت عروق اللهفة فيني
وإنتشت
كل السماوات الملانات قهقهة
ونفت الطشاش
لتَّق رشاشك خضرتي
واست حروفك نبرتي
شافت رويحتك فرحتي
وإنتي وبنيات الكلام
تتشاورن
مين البصابقني الضحك
ماااااااااا بتقدرن ...
أنا أصلي مبسوط فوق شعوركن
بتقدرن تلفنِّي لي آخر الضحك ؟؟
مااااااااااا بتقدرن ...
وحيات عويناتكن هديك
ماااااااااا بتقدرن ...
هسة الضحك
ما ضحك كل الخلوق
فوق التساب إنفرَّ شوقي وفي الأرض
كل النسيمات
بتشيلو وشوقي وتنفرد
ما بتنطرد
الداخلة لي
بتقدرن ؟؟
مااااااااااا بتقدرن ...
وحيات عويناتكن هديك
ماااااااااا بتقدرن ...


شِن قدّرِن؟؟
أنا لسّه في آخر الليالي
بهدهد حنينك شان يمِش
مني ماداير يفوت
لسّه في التلت الأخير
جارّي تسبيح الغياب
ذِكرة وجودك..ترتعش
ياليل كفاك
هذا الحضور
أديهو لي باقي الصباح.



انت مني
كل الكان زمان
قبال ..تَجيني علي مراكب الريد ..أمان.
الكنتو ..بدري..
عارفك تريدو وبس عشان
والمابتريدو لاكنتو لامن أصلو ..كان.
وياسلاااام.
كان يومها كل الوكت نام
صحتني أشواقك..آذان..
قمت صليتك ..غُنا..
وفرشت مصلاية..حنان.

Post: #9
Title: Re: خليكّ ساكت..ما تَ قول بالله ...شئ!
Author: مصطفى السني
Date: 02-07-2008, 00:26 AM
Parent: #7

شى عجيب
حاجه تجنن عديل كده
بتباااااااااااااالغى

جدعه:
عينى بارده

Post: #10
Title: Re: خليكّ ساكت..ما تَ قول بالله ...شئ!
Author: عامر تيتاوى
Date: 02-07-2008, 01:04 AM
Parent: #9

ياسلااااام
جمل حروفك والغمام
بلاهى قولى كل شىء
وزيدى الجمال
بمتعة الحرف
الانيق



سلمتى استاذة تماضر

Post: #11
Title: Re: خليكّ ساكت..ما تَقول بالله ...شئ!
Author: ابوبكر يوسف إبراهيم
Date: 02-07-2008, 07:28 AM
Parent: #10

الشاعرة الرقيقة الأخت تماضر

سلام على روحك الطيبة

ولأنك أشعلتُ فينا توق الصبابةِ و الاحلامْ لانك مليكةٌ العشقُ وهوفي اصابعك ويراعك طيعاً كغلامْ نامُ في الغمامْ وأربك السحاب والبروق قد تختفي النجوم ُ والمدى في ياسمين راحتك .. في خافقك الولهان للمزن الهتون .. ستهبط الصباحات في صباحك وينشر النخيل للورى صدحك ويرتدي جناحك .. وقد قلت يوماً للقمر : ( إن شئت فأنزل علني أمنحك الاقامةَ أو ربما امنحك السفر في نميقي المسحور بالسحرْ .. الشمس نصف قامتي وعندما أطل ُ تختفي في غابةِ الأصيل) .. تعجز عباراتي في شرح دهشتي واعجابي بطلاوة وحلاوة الكلمات وجرسها الموسيقي المغنى

Post: #19
Title: Re: خليكّ ساكت..ما تَقول بالله ...شئ!
Author: تماضر الخنساء حمزه
Date: 02-07-2008, 02:34 PM
Parent: #11

سلامات أبوبكر ..

Quote: وقد قلت يوماً للقمر : ( إن شئت فأنزل علني أمنحك الاقامةَ أو ربما امنحك السفر في نميقي المسحور بالسحرْ .. الشمس نصف قامتي وعندما أطل ُ تختفي في غابةِ الأصيل)


أظنه الآن بين راحتيك مسافراً على بساط السحر الذي منيّته به*.


* القمر.

Post: #15
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 12:35 PM
Parent: #10

تيتاوي

كان قلت بيضيع الكلام
مابين مواقيت الرذاذ
واعلان مواعيد الغمام


شكرا على الطلة السمحة

Post: #14
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 12:33 PM
Parent: #9

مصطفى عينك دي انا عارفة حروريتا كويس ماااابتقنعني



لقفة
ليك وحشة وكمين شوق

Post: #16
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 02-07-2008, 12:39 PM
Parent: #7


مين كبَّرك ؟
وإنتي واقفة
علي مقامات العشق
مين رتَّلك ؟
وكتين وقوفك كان خشوع
والعين بتتأمل
قدرة الخالق جمالك
ومين سبحك ؟

كنت بفرض لي غرامي يسبحك
ساعة الصحو
ومنامك

بت يا تماضر ،،

قدرتي
سويتا في ريدك قصيد
ولسة مازال الكلام مدفوق
تفتكري ممكن ينتهي ؟
ما بينتهى ..
مادام هواك ممدود درب
تمشيهو أشواقي
وتونسا لهفتك
وتفر رجول الكلمة تسبقنا
ونحصلا إنكراب بالدندنة


مرفق :
شوقي الشديد
بــــادي

Post: #21
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 04:42 PM
Parent: #16

Quote: مين كبَّرك ؟
وإنتي واقفة
علي مقامات العشق
مين رتَّلك ؟
وكتين وقوفك كان خشوع
والعين بتتأمل
قدرة الخالق جمالك
ومين سبحك ؟


قُدرة الريد البشيلك من مشاغلك
قُدرة الزول كان تسيبو .. يكون ..هو ..كل الوكت شاغلك
قُدرة اليوم ..البِعدِّي..تتمنى لو ذكراهو بس غابت حقيقة..
قبال .. تتم..تلقاها واجعاك ..الدقيقة..في كل ثوانيها..بيشاغلك.

Quote: كنت بفرض لي غرامي يسبحك
ساعة الصحو
ومنامك


ماكنت بفرِض ليهو شئ
لاكان هو مجبور ..في المشي..
براهو اختارك عدد
قبال يعد شان يلحقك
بلقى صبرو إليك..نَفَد.

Quote: قدرتي
سويتا في ريدك قصيد
ولسة مازال الكلام مدفوق
تفتكري ممكن ينتهي ؟
ما بينتهى ..
مادام هواك ممدود درب
تمشيهو أشواقي
وتونسا لهفتك
وتفر رجول الكلمة تسبقنا
ونحصلا إنكراب بالدندنة


وقصيدي نذرتو لي ريدك..قدر..
فردت ليهو غُنا الخدار وشفتو بيصفِّق..شدر
وأنا شوقي ..شفتو كمان ..حلف
محِل تقبّل ليك يفوت
محل تمش..
ومحل تلِف..
يرجاك في كل البيوت
مترصِّد الحضن.. الوِلِف
بي وين حتختاهو الدرب؟؟
منِّي مابتعرف ..تروح..
مني مابتجيك..جروح
مني ..مابتحزن ..أكيد..
فرحي ساهل..وما...صعب..
بس إنت أديني الإذن..
خلّيني أعلن..إقترابك..
تضحك أحزانك...زمن.

Post: #27
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 02-07-2008, 05:18 PM
Parent: #21


بت يا تماضر ،،


وقدرتي
سويتا في عشقك وزدت
وأنا فيك ما وفرت حيل
مشيتو دربك
وشلتو ريدك
ومليت وريدك
وللملانين بالصبر
من ضحكتك فرحتهم
وللمطافيش البدقشو في الدروب
الضهابى اللسة ما لمو الغروب
ضويتلهم من نور عيونك
مدن الوصول
ولسة فيني القدرة شان أمشيك طرب


أحزاني ملّت للدموع
مشتاقة تنفر ابتسام
إلا الدموع
واقفالا في شفتينا ضيق
متل اللجام
هاك الإذن
إتمددي
وأمليني حن
وإتوسدي
كل البكانات التريح مرقدك
وجددي
الروح التريدك وتشتهيك
منتظرة إيش
يلاكي يا بت يا ملاك


مرفق :
كل الأماني التشتهيك
بـــــادي

Post: #28
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 05:52 PM
Parent: #27

ماكان تأشّر ليّ بس!
أو حتى ترسل لي شذاك
كنت عطّرت الحزن
جبت أشواقي ..ل حِداك
كنت وفّرت ..المشي..
ماكان بهد حيلك..طريق
لاكنت بديك السكك
التساسق في مشيها وكنت ببقالك مكان
باقي أوسع من خيالك
باقي أجمل من حكاياتنا الزمان
كنت ببقالك وطن
ممدود علي لحنك غُنا
متوسّدك ..وحدك..براك
وأنت ضاميك الجميع
ماكان بفرزك ..بيك أنا
كنت بفرز بيك ..ريد
كلماتدور السواقي
فيها تتقلّب مواجع
ألقى تربالك نشيد
ألقى شوقك..حيّ ..وباقي
ذي ضمير أبيض وسايق
سيدو من حرفو ..التولّع
منّو تقاب الخلاوي
وهي بتسبح بيوتك
ناشرة خرزك في القصيد
قول ليّ ياوطني البراي
لو قلت ليك مشتاق ربوعك
لو قلت ليك
راجع عشانك
كنت تديني الأمان؟؟
كنت ح تقالد حنيني
الكان بشيل منك ..حنان
ولا كنت بتضاير حدودك
والحقيقة الجاية ليك
صدقني ريدك فيني زايد
لسه خالد وفي أمان
مهما قلبك انت يبعد
باقي في الحالتين..سيان

Post: #17
Title: Re: خليكّ ساكت..ما تَ قول بالله ...شئ!
Author: محمد عبد الماجد الصايم
Date: 02-07-2008, 12:57 PM
Parent: #1
















_______
آز يو سيد

Post: #22
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 04:43 PM
Parent: #17

Quote: آز يو سيد


يعني برضو إتكلمت؟؟
مابتقدر مابتقدر

Post: #18
Title: Re: خليكّ ساكت..ما تَ قول بالله ...شئ!
Author: abdelgadir mustafa
Date: 02-07-2008, 01:00 PM
Parent: #1

خليك ساكت.
ما تَ قول بالله شئ!
يبدو انو سمع كلامى وما اهتم انشاء الله بس جيب ليكم الاكل والشراب واصلو ما يهتم
عموما سيدتى اجمل ما قرات لك فى الفتره الاخيره
دمتى تماضر

Post: #23
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 04:44 PM
Parent: #18

عبد القادر ..مش بالله؟؟



خليهو ساكت
لايقول..بالله..شئ!

Post: #20
Title: Re: خليكّ ساكت..ما تَ قول بالله ...شئ!
Author: عبدالله داش
Date: 02-07-2008, 03:35 PM
Parent: #1

Quote:
ولاتقولّي كيف.
ذي سكات الحِس إذا نطق الغرام



خليها ساااي إتفرّتقت
من أيّ باب دخلت على الحِس وإنتهت
ما تقولي كيف ..؟
زيّ أيّ انسان في العيون
ما ظـــن يغافلني الهُدي
وأسرح مع الحال كيف ..؟ كِدا
وأقدر وأشوف نضم الكلام
كان يا ســــلام
ما تشرحينا....
وتفّلحي الروض ياسمين
ما قِدرتَ أرجــع للمدى
وحتي المداخل غافلت حِسي
وتعداها الحنين
إتعكّرت خليها ساااي


Post: #24
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 04:53 PM
Parent: #20

داش..


من كل أبواب الحقيقة..
ومرات كمان..بعض ..الخيال..
خيالو..طيّب..ومُفتري.

من الضحك.
ساعة يجر الفرحة من آخر الدروب
ويجيبا لي عندك ..جري.


من أيِّ شئ.
لحظة تكون في بالو وحدك..كل شئ
وتبقى في لحظاتو..شئ
أبعدما يكون من بالو إنو ..حيتمشي.

Post: #25
Title: Re: خليكّ ساكت..ما تَ قول بالله ...شئ!
Author: محمد البشرى الخضر
Date: 02-07-2008, 05:03 PM
Parent: #1

Quote: خليكّ ساكت..ما تَ قول بالله ...شئ!
ولا سلام عليكم ...حتى

Post: #26
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 05:11 PM
Parent: #25

البشرى كان سبنا الكبكبة بسلم
لكن تقول شنو بس

Post: #29
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 02-07-2008, 06:27 PM
Parent: #1



بت يا تماضر


كان الوطن
عشم اللي راحو بلا بلود
عشم المسافرين في الأرض
لسع بيحلموا بي سقف
يجمع شتات الإلفة فيهم
وهمَّ يبقولوا الحدود
فكرة يكون جواك وطن
متوطنك
وتتوطنيهو بلا حساب
يحضن أساك
ويفرِّحك
يجبر كسر خاطر دواخلك
ويسمِّحك
تتلفحيهو في كل وكت
وتشمِّي ريحة إلفتو
ويتلفَّحِك
تتغازليو
وتعومي في بحرو العشق
ويطفِّحِك
تزرعيو بالخضرة
ألوان السلام
ويسالمك
وتسفي هينين من ترابو
الإنتي منو
ويفرحِك
يسمع أنين روحك
قبل يمرق صدى
يقعد يواسيك أن أفيقي من الحزن
باكر بيبقالك سمح ...
أخخخ
ياإنتي فيني وطن وضل
كاسيني من عشقك تياب
مادِّيك تراب
ينضح خصوبة وأرض بور
وأنا ليك راح أبقى البذور
تيراب عشق
مجبول عليك
ينبت حدائق من محبة
ومن زهور

يا بت طن
بت يا وطن
آهٍ إذا كان الهوى
وتراً تغازله الأنامل
كلما هزته أشجان المحبة
يستفيض
لحناً كما لحن السماء
نغم الملائكة الرسل
تسبيحهم
تبجيلهم
ومديحهم للمرسلين

ونزلتك
دارين وبراح
ليلين وصباح
وطناً ممدود
بي حجم ضيوف العشق الفاتو
والما طاريين الجية َقَبُل
واللسة رحالم في أطراف الأرض
مشدود
والهسة هِنا
باريتك رغم طشاش الشوف
والخوف
غازلت خطاك
وقصِّيتا
ووصلتك مرهق
من وعثاء السفر الطال
ممكن أنجم حداك
وأبيت ؟
أشيل أنفاس الرحلة شهيق
أو ....
دايرك تبقيلي وطن وبيوت
أرتاحا وكت تمتد وتضيق
أبقيلي فريق
انضلل فوقو
إبرد لي هجير الدنيا
وفيو أنجم
ممكن ؟؟
ممكن ؟؟


مرفق :
حنين قدر هذا الاشتهاء
بــــادي

Post: #30
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 02-07-2008, 06:49 PM
Parent: #29

عشم اللي راح
مني فيك ولااااابعود
ولاراجيالو عودة ولابقول
يالله بس جيب ليّ تمنّي
عشان..يعود
أريتو رايح كلّو فيك
وشن بفيد لو كان بيرجع من دروبك ليّ شوق؟؟


قلت الوطن؟؟

أصلو الوطن مابس تراب
والناس تشيل بي ايدا تغرف من حنينو وماتعيد
الوطن ماكان رهاب
شان نجري بس شان مويتو بانت في السراب
الوطن انك تكون من البُعاد
ذي القُراب
انك تشوف كل اللفيو أخوك..ومنك..والصحاب
ولو قلت ببقالك وطن..
يبقى الحنين جوّاي..أخوك..
ويبقى القلب القالوا قطعاً جزء مني..حتّة منك
ودماهو ..قاسم..مشترك
وطنك..شرك.
وطنك..حبيب
وقعت قبلك..فيو أنا..
وناديتو شوقك ..ليّ ..قريب
مني..أوعك..تبتعد..
بالله ماتنسى البيوت
الكان تحوم جوّاك تطلب ..راحتا
بالله ماتنسى الخلاوي الفيك تفتّش..قِبلتا
وبالله ماتنساي ..أنا...الفيك..بتعرف..حِتتا..


يمكن..هِنا..
جوّه الحلق؟؟
مرّات تقول برضك كلاماً
كلامك بشبه ليّ ..أنا

يمكن هناك؟؟
جوّة ..القلب..
مرّات بِضخ دمّا بشابه لون حنيني كمان ..أنا
ومابراك
القلت آآآخ

Post: #31
Title: Re: خليكّ ساكت..ما تَ قول بالله ...شئ!
Author: سمية الحسن طلحة
Date: 02-07-2008, 08:40 PM
Parent: #30


Post: #33
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 03-07-2008, 11:11 AM
Parent: #31

سمية صباحاتك ورد ياورد انتي

Post: #32
Title: Re: خليكّ ساكت..ما تَ قول بالله ...شئ!
Author: محمد عثمان
Date: 02-07-2008, 08:59 PM
Parent: #1

Quote: كان قلت بتغيب الحواس وياني بلبسني الخدر.
بيصيب وداري
حنين
و
ماس
بِبقى متكهرّب قليبي..هناك ممدّد ..ومنبسط.


مافى كلاااام تاانى..

شكرل تمااضر...

Post: #34
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 03-07-2008, 11:14 AM
Parent: #32

لا
بعدك مافي كلام


محمد تسلم

Post: #35
Title: Re: خليكّ ساكت..ما تَ قول بالله ...شئ!
Author: انعام عبد الحفيظ
Date: 03-07-2008, 11:49 AM
Parent: #1

Quote: ماتنده الأشواق كمان..
أنا شوقي ماقدر المشي..
الواطة مابتحمل ..خُطاهو..


وحنيني اليك وليل الغربة أضناني

تسلم أشواقك يا طم طم

Post: #36
Title: Re: خليكّ ساكت..ما تَ قول بالله ...شئ!
Author: عصام عبد الحفيظ
Date: 03-07-2008, 04:52 PM
Parent: #35

تماضر
هاك صورة










Post: #38
Title: Re: خليكّ ساكت..ما تَ قول بالله ...شئ!
Author: عبد المنعم ابراهيم الحاج
Date: 03-07-2008, 06:19 PM
Parent: #36

مجانين..

Post: #40
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 03-07-2008, 06:22 PM
Parent: #38

منعم..


كبيرنا

Post: #43
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 05-07-2008, 10:32 AM
Parent: #38



منو ديل ؟؟


(
..
..
..
)



مرفق :
حبي الكبير
بـــادي

Post: #39
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 03-07-2008, 06:21 PM
Parent: #36

عصام الليلة ووب

بتوع لاهاي ديل قراب
أخير بتوع السودان باهتين وبعاد كده وساترين حالنا

Post: #42
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 05-07-2008, 10:29 AM
Parent: #36


شكرا عصام






مرفق :
كل المودة
بـــادي

Post: #37
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 03-07-2008, 06:18 PM
Parent: #35

ناعومي
تسلمي انتي كلك

Post: #41
Title: Re: خليكّ ساكت..ما تَ قول بالله ...شئ!
Author: مهند الجيلي بادي
Date: 05-07-2008, 10:26 AM
Parent: #1






ساوينا بين فكرة نغيب
ونكون هنا
رتبنا أشواق الزمن
والمننا
وخواينا أرواحنا وقعدناك
ننضلل الإلفة ومجيك
نستغرب الغربة
المسافات الفواصل
ولسة بنواصل
إنداهاش الرحلة ليك
يا فينا منك فكرتك
إضنينا مازلت بتسمع نبرتك
يا وكتين يرافقنا التذكر
لي طلة القمرة
ومجالسة الحراز والنيم
الغيم
ماسك سقايتو ومعترض
كيفن تفوتي بلا سلام
عطَّش رويحاتنا
وسكت
بعد الكواريك النداءات
وإنتي ماسمعة الحلوق
الليك بتنده
أن تعالي علي البيوت الروح
تشمِّك
تقلدك
كل البيوتات تشتهيك
أدخلي
شفع الحلة البنادوك هودنة
قرِّبي
جرية المغرب
ونطيط الحبال
بت من حشاهم صوروك
قمرة سمر
ضل الهجير
بت يا مصير
وينك
تفتشك الحواس


مرفق :
شوقي الشديد
بـــادي

Post: #44
Title: Re: خليكّ ساكت..ما تَ قول بالله ...شئ!
Author: الطيب شيقوق
Date: 05-07-2008, 10:48 AM
Parent: #41

الاستاذة الرائعة تماضر


ما أجمل قلمك الذي خط كل هذه الحروف

مشاعر في منتهى الرقة

في مننتهى الوفاء والإحساس



تقبلي مرورى واحترامى

Post: #45
Title: Re: خليكّ ساكت..ما تَ قول بالله ...شئ!
Author: salma subhi
Date: 05-07-2008, 10:54 AM
Parent: #44

Quote: خليكَ ساكت,
وماتَ قول بالله شئ!

سكتنا يا تماضر...بالذات بعد دما قرينا دي..
Quote: لو تقول
تبقى جد مسؤول
عن كل شعور
الليلة حام




معزّتي

Post: #46
Title: Re: خليكّ ساكت..ما تَ قول بالله ...شئ!
Author: مدثر محمد ادم
Date: 05-07-2008, 08:04 PM
Parent: #45

بعدك كمل الكلام

سلامات تماضر


تيف تيف

Post: #50
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 07-07-2008, 03:26 PM
Parent: #46

مدثر يسعد مساك
شكرا على القراءة.

كل الود

Post: #49
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 07-07-2008, 03:25 PM
Parent: #45

Quote: سكتنا يا تماضر...بالذات بعد دما قرينا دي..


معقولة بس؟؟
أسي انتي كان سكتي بحلّك؟؟
بنريدك بنريدك


Quote: معزّتي


محبتي

Post: #48
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 07-07-2008, 03:24 PM
Parent: #44

ود شيقوق لك الود والمحبّة

شكرا كتير

Post: #47
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 07-07-2008, 12:26 PM
Parent: #41

Quote: ساوينا بين فكرة نغيب
ونكون هنا
رتبنا أشواق الزمن
والمننا
وخاوينا أرواحنا وقعدناك
ننضلل الإلفة ومجيك
نستغرب الغربة
المسافات الفواصل
ولسة بنواصل
إندهاش الرحلة ليك
يا فينا منك فكرتك
إضنينا مازالت بتسمع نبرتك
يا وكتين يرافقنا التذكر
لي طلة القمرة
ومجالسة الحراز والنيم
الغيم
ماسك سقايتو ومعترض
كيفن تفوتي بلا سلام
عطَّش رويحاتنا
وسكت
بعد الكواريك النداءات
وإنتي ماسامعة الحلوق
الليك بتنده
أن تعالي علي البيوت الروح
تشمِّك
تقلدك
كل البيوتات تشتهيك
أدخلي
شفع الحلة البنادوك هودنة
قرِّبي
جرية المغرب
ونطيط الحبال
بت من حشاهم صوروك
قمرة سمر
ضل الهجير
بت يا مصير
وينك
تفتشك الحواس


وساوينا بين فكرة نغيب .. ونجيك هنا
ماأصلو في الحالتين معاك
نحنا بنعيش الغياب
برضو في الحالتين .. أنا
لسّه مسكون بي هواك

الغربة ماغربة بلاد
كنا عايشين في ربوعا..
يوم فتنا أشقانا البعاد..
الغربة انك في البلاد
تبقى وسط الناس وحيد
ترمي شوقك للديون..
وتبقى ماقدر السداد.


الإلفة ماعرفت تفوت
ضايرت منك كم وشي
لي زول سواك وماغريب
لو كنت بنده ليها تمشي
للناس بعزوها وشديد
وهيّ ..تاباهو .. المشي.

Post: #51
Title: Re: خليكّ ساكت..ما تَ قول بالله ...شئ!
Author: محمد عثمان
Date: 07-07-2008, 03:48 PM
Parent: #47

يا ريت السكات ينفع...!!

Post: #52
Title: Re: خليكّ ساكت..ما تَ قول بالله ...شئ!
Author: تماضر الخنساء حمزه
Date: 07-07-2008, 03:50 PM
Parent: #51

أنا في السكات
بسمع
غناك
بسمع
تراتيلم
تَهِش
جوّاي
تباريح
الغرام
وخطاك
في قلبي ..بتمش
ترسم على البعد
الحرام
تصاوير
اقترابك
ليّ
تَحِل!