عوض هارون ....

ماشلنا جمرك وأنطفي
جوانا نارك والمطر



...........................

خضر

الخرطوم

حرث حرث حرث

صديقي الجميل أنت علي موعد مع حواديت وسوالف خرطومية خليك الاقرب

خضر

صديقنا خضر

الزول ده وين ?

وقت طويل مر ولم نتلاقي !

حتي حين كلانا بالخرطوم إختفي فترة

لكنه عاد وظهر ذات يوم من سنة 1992 ببيت

أشباح الواحة معتقلا ومعذبا فيما بعد علي المسلمين

بقسوة تشبههم ولن تحيد عنهم .

كان عبد الله جابر الشاويش يتهمني كلما لاقاني في

أقبية جهاز الأمن بأنني ضمن مجموعة تكتب الشرارة

صحيفة الجبهة الديمقراطية في بيت ناس عوض هارون !

في الوقت الذي لم ألاقي عوض فيه إلا مرات قليلة

في الشارع مع آخرين .

ومع ذلك فأنني أعرفه مناضلا وإنسانا نشد سعادة

بلاده وشعبه .

أبوعبيدة

أبو عبيدة كيفنك ياجميل
ساعة كتابتي لهذا البوست كان عوض هارون وآخرون يلتفون حولي لا أنكر إذا قلت لك بأنني كنت في قمة تعاستي وكنت في حوجة ماسة للزول العجيب . عل ضحكاته المجلجلة تزيل عني الهم والغم . هذا البني آدم جميل بالحيل ياابو عبيدة ظلل غربتي بونساته الطاعمة لاذال يذكر أيام كوبر وأحس حينها بثأر قديم ينتفض .
هذ البلاد ياصديقي أبو عبيدة كثر فيها الآن المرابون والادعياء ( بالاضافة للكيزان) البقوا يتناسلوا بشكل غريب . تصحي من النوم تلقي كوز جديد وعربية جديدة ومرة جديدة وشكل جديد . هكذا هي الخرطوم .
غابت ملامح وسط هذه الزحمة ملامح عوض أنت ود العبيد ملايين الشيوعيين الصادقين الذين لم يضنوا علي هذا الشعب يوماً سرقتهم المنافي واحداً تلو الاخر .
ومابين الامنيات ياصاحبي وأيام كوبر ذكريات وتضحيات جسام .

أبو عبيدة عمت مساءً ياصاحبي وتعال أحكي عن الشاب والبوست بوست ذكريات .

خضر

العزيز خضر
تحايا الورد
عوض ده عايز ليه صنه
بمشي وبجي

ya man ita wean ya HAROOOON

: shahto
تحياتي الحارة

شاكرين جميل سؤالك عن هذا الصديق وإنشاء الله يستجيب

خضر

خالد ياعبيد
إذيك يازميل

عوض يزكرني دوما ببيت شعر لحميد يقول فيه

(يانبي الثورة الغشاهو برداً أكبر من غتاهو
يا أمة فرسانك تموت مطعونة دايماً من قفا )

وأنا لاذالت أمالي عريضة عوض سيحضر يوماً ما هو يقرأ هذه الكلمات وأدري ثم أدري أنه يلوز بالفرار خوفاً من تفضحه المفردات . خليك قريب ياخالد وتعال ياخينا .

خضر

الحبيب خضر حسين

وينك يا منثة وكيف البلاد ضمتك اليها؟؟

عوض هارون ده اخو غادة هارون ولا واحد تاني؟؟

دكين الوغد

سواي المشاكل

الضمة لم تكتمل بعد ياصديقي ولك أن تتخيل في أحضان هذه البلاد العريضة
بعدين ياخينا (منثة ) دي شنو مفردة جديدة علي ما أظن عموماً عوض هارون
هو زولك بتاع الدمام ذاتوو .. بتزكر أتونس معاك مرة في تلفوني .

دكين

ماذا عن غبيرة ؟

تحياتي لغبيرة جداً

خضر

بداية

الي عوض هارون وآخرون في المعايش

تعال قص البلد وأرجع
(محمد الحسن سالم حميد)

تعال قص البلد وارجع
تعال ادي الغبش طلة
بقالا اليل غطى ومقنع
سترتك يا صباح الله
ضراعك مدو لي رضع
ضروع اماتا قطن قط
مراكب شوفا لا مشرع
ولا بان في مداين شط
تعال يا شافي يا كافي
شموخاً في زمن منحط
من الفي تعال بجي المافي
معاك وهطنا نتوهط
تعالنا نحن من شفع
نفك الحيرة بي حيرة
متين ما الليل نصن
نسمع وراء الاهات غلب نوره
ابوى قالولنا جيبن ده
صباحات الله بخيرها
تويب امي الزمن هدا
صباحات الله بخيرها
وصباحات الله لاقيتا
لا كراسا لا قلما
صباحات الله لاقيتا
ململم في العيون الما
صباحات الله لاقيتا
تجود في الضحى وتضفر
صباحات الله لاقيتا
تليس في شقوق بيتا
صباحات الله لاقيتا
اكان لاقيتا في مشرع
محل لاقيتا تنذمر
مكان خليتا تتوجع
اكان لاقيتا في مستشفى
في طندايا جامع سوق
محطة ملمة اكان في بيتا أو مصنع
محل لاقيتا تنذمر
مكان خليتا تتوجع
تكد تكدح تباصر كم رجاء اتقطع
ابت تطلع طلع خازوق
خوازيق البلد زادت
طلع نمراً وراهو ضباع
وضاع ما ضاع
وكان ما كان
طلع خازوق
يفيض النيل نحيض نحن
يظل حال البلد واقف تقع محنة
طلع خازوق
خوازيق البلد زادت
سالت عليها
مشيت ومشيت
مشيت خشيت على حلة
لاقيت شعاع ضال
من ضو صباح الله
لاقيت شعاع اسمر
قاعدلو فوق بنبر
كابي المرس يسكر
قنبت جنبو معا
دار الحديث ما دار
حدثني بحرقة
حبيتا من جواي
حبيتا حبيتا
في الحلوة والمرات
شايلا القداحا معاي
ادتني واديتا
حبيتا حبيتا
في يوم من الايام
هلوست مع الفجاج
هلوست دون احلام
من دكة الحجاج
ضلوا الشمس ريحين
واحد عماك يا ام زين
والتانى شالك وطار
باعوني للفرقة
ملعون ابو الدولار
ان الشعاع الضال
انينا انينا
غنا الشعاع الضال
صنينا صنينا
غنالي بحرقة
غنالى يا هاجر
عقبت يا باكر
قاطعني يا هاجر
رددت يا هاكر
في الضلمة اولادك
في الفيها طول اليوم
لازادا لازادك
يا مرمى لا ضل بيت
لا ارث من اجدادك
يلا وجراحاتك
طحلب ضلام الليل
دهده صباحاتك
السولبك خلاك
برد الخمور مفتون
في افقر وضع ختاك
فاجر وسخ مافون
يلا وهياك يلا
لا عن صباح الله
صبح الغنا الميمون
صن الشعاع الضال
غنا الشعاع الضال
ما صن غنا وقال
يا هاجر التسعى
بين الوطن والبال
باب الفجر بفتح
فتح القلب موال
فتح اللبق في الصيف
تالا الشتل تربال
باب الفجر بفتح
يا وضع يا دجال
باب الفجر بفتح
عند دقة الرجال
غنا الشعاع الطال
غنينا طلنا سوى
شال النغم عتال
بايتين عيالو قوى
باكرنا سترة حال
ياكر رغيف وروى
باكرنا بقة فال
باكر كتاب ودوا
باكرنا للاجيال
ينشر نور وهوا
لا تلاقي فيهو وبال
لاهم بعاد لاجوى
باكرنا يا ضلال
لسع بلال ما زال
وما دام بلال لسع
على الرمضا وهجير يلسع
ما دام في اطفال بتتوجع
صباحات الله يا بيضا
لحيحة نوره لاهسع
فجيعة يا نوره يا فقرا
ترف من شدره لشدره
تلف الدنيا كايسلكم
صباحاتو ما انتو
بقوا من الارض مطره
تعالى وشى الوطن دركان
عساكر اخر الزمن واطه
تعالى وما على كيفك
تعالى وريحي الواطه
بلدنا أن جيتي دي الكوكب
تعالي من اليسار شمساً
تشرق الغربوا المركب
تغربي يا غرب يا باني الكلب
يا تجار الموت والرعب
لو ريح ليلكم طف الصحوة
نسل الصحوة في جوف الشعب
بق وضو نواحى الدرب التالا الفجر
الوطن القلب
القلب الشايلك وما ختاك
وكان ختاك ابداً ما خطاك
بس يا نوره الصاح و الصبر
لمي معانا قطنة البدري
نغزل منها كفن الليل
ننسج منها توب الفجر
فجر تكسو محنتو الفقرا
من التعب البلا صالح
يجبد الكدح الاجرا
يلا بوليس بلا اجرا
شنو الخايفينلو يا فقرا
بيوتا جنها المطره
دقيقاً ما يفك الريق
سمكة مافي في بحرا
شنو الخايفينلو يا فقرا
شديراتن بقت حطبها
تمرة ما تفك طلبها
شنو الخايفينلو يا فقرا
بهيماتاً تسوى الميع
مغبش كالترب بصرا
شنو الخايفينلو يا فقرا
كلبةً لا قلب لا حيل
وهوت في شبح فوق خيل
كان يتداعر اخر الليل
نجرت والشبح حدرها
صدت للصريف فى ترى
كان صوت الرصاص قفرها
انت والخلق نايمين
صنت والخلق نايمين
عفنت البلد يومين
كلب العمدة جاب خبرا
شنو الخايفينلو يا فقرا
شنو الداخرنو في متره
ابو الاربل لابو الواسوق ابو المحرات
وساقية تسوق لابو بقرا
يا بقر السواقي السايقى للامرا
شنو الخايفينلو يا فقرا
ابو البوليس اذا ما كان
اباتم من طرف فقرا
يحرسوا القصر للتلفان
وللفي الليل زنى ودعره
ويقوموا مع النهار وزراء
ابو اذا ما كان اراضيهم
يبس شدرا
يحرسوا طلمبة الجازولين
يقيفوا على الينوك غفرا
اذا ما الشارع استنفر
غبش عزل بستنكر
على القيصر خساستو
تقول للغيم محل مطر
قراب منك دالفينك
يضم صدر الوطن حاني
يهز للظلم ساساتو
تحن لباكر الاخضر
يعم بخيرو ناساتو
تنادى الفارس الاسمر
تطالب بي قصاصاتو
من الفجار من العسكر
ابو البوليس اذا فكر
يفك فيهم رصاصاتو
ايابوليس يا نازل من المريخ
جباة الدم من التاريخ
أيا واقفهم كالسيخ
تقيفلنا لامتين دغري
حقارتك تبقى فى فقرا
فضيحة فجيعة يا بوليس
وجايين من فرد شدرا
جنانا العاق متين تصحى
تشوف الحاصل المذري
متين تدري
يانو الصوت ده ما مكري
معتق للوطن دغري
و بانو الجاري
ما منك
على صدر الوطن يجري
وخطاهو التيربت
بس قدرها
تلاقى الفجر والفقرا

خضر
واحشنا جد والله
دخلت اتاوق... باقي لي زمن من الحوش ده ووجدتك تفتش عن عوض
دقيقة اناديه ليك واجي
ولحدي ما يجيك لك كثيف الود

أم سهي
إذي حالك يازولة

يومياً في البال منزلكم الجميل الذي ضمني مع ملايين المشردين ( صداح , بدري, عزو , الشفيع, ) كان قبلة من لاقبلة له وكنتم الاهل والسند في غربة مهما ذكرت عنها لن أكفي الكلمات تعاستها . ماذا عن زهير (موعود بليالي خرطومية جميلة ومدهشة ) خلي يجينا بس . يا إقبال بالله سلامي المدفق لاحمد عبد القادر ( وخلي يزح من السكرية , وال,,,, الخ) الحلويات , لاذلت أتحسس وجوهكم سيدتي صدقيني والخرطوم مليئة دوماً بالانيقين علي الرقم من تناقصهم الملحوظ في الأونة الاخيرة كلهم (شتتوا) المعايش يا إقبال أذلها الله .

خليكي قريب وأنجهي لينا عوض وجيبوا خالد وإبتسام وزهير وكل الجميلين .

إقبال

الوهم الداير يسوقنا
أصبح مفضوح الحال


تهانينا لكم جميعاً

خضر

خضر حسين خليل
بدون حروف تاكسي الخرطوم

ولما بلغني إنك مستاء
إحترمت نفسي وعمري الآئل للزوال
وتحاشيت
{ دخول المزالق }


لغاية ماوجدت مخرج في
عوض هارون

وعوض عزيز وغالي
كما جميع الزملاء

بس أمشي مشواري
{ ليس للمشوار المزمع علاقة بمشوار ودالعبيد }
وبرجع تاني

يا بلد


فنجان جبنة عند ست شاي

مشوار صباح مبلول

من عرق خبة

وسريعاً مارش

خضر أيها الجميل..أديها صنه

شوقي إدريس
إذيك ياخينا

أدرك جيداً أنك مثقوب القلب حزاري ياصديقي من الحنين (الغربة والحنين ) تعجلان بالرحيل ونحن نشتاقك ياصاحبي لونسة تحت ضل نيمة . لجبنة عند ست شاي لمغربية مع الولاد

شوقي سلامي للجميع بدون فرز

خضر

أبو ساندر
تحياتي ياجميل

حسناً فعلت بتحاشيك المزالق ( العمر مافضل فيهو كتير) إستدعائي لعوض هارون هو إستدعاء لذاكرتي المجبولة بالحنين وعوض زول حكاي وحنين . كنت ساعة كتابتي لهذا البوست في قمة تعاستي (وكنت محتاج لعدد واحد عوض هارون مصلح) لذا أكتفيت بالحرث أعلاه ويقيني أنه كان سيأتي (مهما هم تأخروا لكنهم يأتون) .
الثامن والعشرون من هذا الشهر سنستقبل مارسيل وسنغني معه منتصب القامة أمشي وأنا يوسف يا أبي وغيرهاً من الاناشيد (البتركز) في العضام . سنفتقدكم حينها رفاقي ستفتقدكم أمسيات مارسيل كما أفتقدتكم أمسيات درويش ومروة و و وووووو .
أبو ساندرا دعوة مفتوحة لنصطحبك معنا لمارسيل .

خليك قريب وتحياتي لساندرا ست الاسم .

خضر

أنا المتكلّم الغائبْ
سأنتظُر انتظاري. كنتُ أعرفني
لأنّ طفولتي رجلُ أُحِبُّ...
أُحبُّ إِمرأةََ ًً تمرُّ أمام ذاكرتي ونيراني ,
ولاتبقى ولاتمضي.
أُحبُّ يمامةً سمَّيتُها بلدا .
أنا ضدّ العلاقة, والبداية, والنهاية, ضدّ أسمائي.
أنا المتكلّم الغائبْ درويش "تلك صورتها وهذا انتحار العاشق"


كلنا متورطون ,,وها انت ياخضر , تفتح رحما مجروحا .. هل كان لابد ان تكون في ذلك اليوم في قمة تعاستك لتستدعيني لبيوت طيننا وانت تدري انني الوذ بالفرار خوفا من فضيحة الكلمات ,
كلنا متورطون حين هربنا وبقي المحظوظين الذين قاوموا الفقر , وعنت العسكر
كلنا متورطون حين استاذنا الوطن وقلنا له سنآتي اليك في اي وقت تريدنا
تورطنا مرة اخرى حين وعدناك وقلنا اذهب وسوف نلحقك ... ولم نأتي في الموعد لنظلل الوطن بونساتنا الطاعمة وضحكاتنا المجلجلة ... احكي لي سوالف وحواديت خرطومية هدهدني بها فانا هنا, اصبحت استطيع النوم بدون حكاوي الحبوبة . هل كبرنا ولم نعد بحاجة الي الحكاوي , ام نسينا الحبوبة ... الوطن
احكي لي ياخضر .... ذكرني

ابوعبيدة
الزول دة قاعد في حتة اسمها الخبر في السعودية . هرب أو زهج او خاف أو جاع أو بنزينهو كمل أو طرد او قوتل في لقمة عيشوا او اتهم بأن صحيفة الجبهة الديمقراطية الشرارة كانت تكتب في بيته لذلك صادروا بيته في زمن عبدالله جابر الشاويش ومع ذلك هو مازال كما تعرفه مناضلا وانسانا نشد سعادة بلاده وشعبه

خالد عبيد
امشي وتعال منتظرنك

ليست الايام امتعة لارحل
لا أعود ....
لانها تمشي امامي في يدي...
تمشي امامي في غدي.
تمشي امامي في انهياراتي .
وتمشي في انفجاراتي
اعود
لانها كفني .
اعود لانها بدني
اعود لانها وطني
اعود
.
.
.
وغنى : ايها الندم اختصرني بندقية
قالت : لتقتلني ؟
فقال : لكي أُعيد لي الهوية
درويش

شحتو
دكين
ام سهى
ابو ساندرا
شوقي
اصدقائى في المنافي لكم الله ..... منتظركم

Quote: كلنا متورطون ,,وها انت ياخضر , تفتح رحما مجروحا .. هل كان لابد ان تكون في ذلك اليوم في قمة تعاستك لتستدعيني لبيوت طيننا وانت تدري انني الوذ بالفرار خوفا من فضيحة الكلمات , كلنا متورطون حين هربنا وبقي المحظوظين الذين قاوموا الفقر , وعنت العسكر كلنا متورطون حين استاذنا الوطن وقلنا له سنآتي اليك في اي وقت تريدنا تورطنا مرة اخرى حين وعدناك وقلنا اذهب وسوف نلحقك ... ولم نأتي في الموعد لنظلل الوطن بونساتنا الطاعمة وضحكاتنا المجلجلة ... احكي لي سوالف وحواديت خرطومية هدهدني بها فانا هنا, اصبحت استطيع النوم بدون حكاوي الحبوبة . هل كبرنا ولم نعد بحاجة الي الحكاوي , ام نسينا الحبوبة ... الوطن

The game is still ,not finished keep up the good mode , will get them , if they did not want to come down and open the way for the will of the Sudanese nations.,its jusy the first tearm, its Darfour then Kourdafan

عزيزي شحتو
تحياتي

معركتنا ستستمر حتي نعيد لهذا الوطن عافيته . شكراً لحضورك ولثباتك الجميل

خضر

بالامس مثلاً

ذهبت الي نادي بالقرب من منزلنا لمشاهدة مبارة الهلال السوداني والرجاء البيضاوي دهشني كمية الحضور تناقشنا أنا ومن جاوروني مساء الامس عن إمكانية تحول هؤلاء المشاهدين الي متظاهرين مثلاً رفضاً لسياسات السلطة . أحد الاصدقاء وهو بالمناسبة هلالابي جداً (ومفروض يكرموهو لوقفته الصلبة مع الهلال في حالتي الهزيمة والنصر) قال بهدوء أن الكرة السودانية أصبحت آخر المعالم الوطنية وحدثني عن الهلال وتغول صلاح إدريس وعن الكثير من الامور الرياضية والتي كنت علي جهل تام بها في هذا الوطن المبتلي . المهم غلبنا ليك ناس الرجاء ديل زي الماحصل رجاء زاتو . المباراة طبعاً إنتهت بغيرما يرام (جنس فليق والميدان أتحول لي مظاهرة وإحتجاج ضد الحكم اللبناني بالمناسبة اللبنانيين دي قصتهم معانا شنو ؟) .
أجتمعنا نحن الاصدقاء بعد الكورة مباشرة للتنسيق لعمل أحتفال يليق بأبريل وإنتصار الهلال أفترشنا الزكريات كل واحد فينا كان يغني بدأ أشرف وميمي وأنا وفاروق وووو كلهم كانو نجوماً في سماء ستة أبريل .
المعايش لم تثني ذاكرة هذا الشعب من الاحتفاء بما يليق وشهداء أبريل الشارع أياً كان محتفلاً وجمهور الهلال الغاضب كان محتفياً بأنتصارين .


سأعود مساءً للمواصلة

خضر
الخرطوم

أنت لم تغادر هذا الوطن (بأخوي وأخوك) ياصديقي

أستمع الان لمارسيل والمجموعة (إني أخترتك ياوطني سرا وعلانية) وربما شابهت هذا النشيد ببكائيتك التي سكبتها هنا عن وطن حلمنا به جميعنا فنام في أحضان الغير تماما مثله مثل الحبيبات (البحرقوا القلب وبفورو الدم) بي مزاج عالي هذا المساء للكتابة للحبيبة رغماً للظروف والحال الحرن كل تفاصيل هذه البلاد تترتب بخبث نحو تفاصيل لا أتمني مجرد تسطيرها يوماً في خيالي ناهيك من كتابته بمداد الدمع .هذه بلاد تسير بوتيرة غريبة ياعوض أعمل حسابك , ماتبقي من ديون الحلم حتما سننجزه سوياً ووين ماكان .
ودرويشك الذي أتيتني به كان بدراً في سماء ليالي الخرطوم الحالكة بفعل فاعل وعلي ضيق قاعة الشارقة فقد تمدد في قلوب الملايين (العطاشي) مثله مثل حلم تحقق أحتضنته عيون الملايين شباب وشابات والاعور كان شايل المكسر في الليلة ديك . كان مزاجي عالياً وكان برفقتي أحد الاصدقاء الذين حتماً ستزول شمس أيامهم عما قريب , هو نفسه حكي لي ذلك ياخضر تصدق المؤسف أنو الواحد حيشتت من الدنيا دي قبال ما يحصل التغيير ال..... طلع عشانو . كان فمه وهو يحدثني مليئاًبالغضب ولاول مرة أشوف زول زعلان من خشموا لي عروقوا رائحة الخمر كانت شديدة الاسكار أخرج لي من ثنايا روحه صورة لم تعد ملامحها بذات الوضوح ربما لكثر (المشاهدة) هذه هند ياخضر حبيتا لامين ماتت جواي . سافرت ببساطة بعد أن كلت الانتظار وملت من إنتظار الفرج البعيد . مازحته إنت كمان ماممكن تونسا طول حياتك بالثورة . أقلاها ماعملت حاجة واضحة عشان تكون معاك حتي لو في أمسية زي دي .
قرأ لي ماتيسر قبل بداية درويش ماتيسر له من قصائد درويش (ها أنا كلي مذلة في مطار القاهرة ليتني حر طليق في سجون الناصرة) . عارف أنا ناوي علي شنو الليلة . أها شنو ياشقي الحال , حأهدي قميصي لي درويش وأمشي بيتنا أو أمشي معاك الكلاكلة ,, هذا هو الشعب الذي أنجبكم أول مرة قبل أن تمد الإنقاذ وظرف الحياة اليومات انفسكم لغربة تكوي القلب قبل النفس .
ياعوض ياهارون مالي ومالي الكتابة .

سأعود ياصاحبي ثق في ذلك تحايا للدمام الخبر .

خضر

مالم يقله مالك في الخمر (قاله الاخرون) بالضبط ياصاحبي

صباح هذا اليوم كنت موعوداً بتعب (السبت) كله ضف الي ذلك مجابداتنا من أجل الحياة والتي تبدأ غالباً منذ مساء الخميس حتي الساعات الاولي من صباحات الجمعة غادرت الفراش أإذ أستقبلتني أولي نسمات الصباح بأغنية لها معزة القلب عندي كانت جميلة ومستحيلة تنطلق من إحدي الحافلات في هذا الصباح . صباح بهي بطلعة محجوب وبلون الاماني السندسية ( بالمناسبة ماهي علاقة السندس بالاماني هم يقولون ذلك كثيراً بدوري ألصقت هذه المفردة دون أن ترمش لي جفن) أم ندعها علي غرار الناس بالناس والكل لي رب الناس فالتكن المفردات أيضاً بالمفردات وكل المفردات الي الجحيم طالما لن تحس بما نصنع .
بداية تفاجأت بوجود هذا البوست في أسفل السافلين تكاسلت في رفعه (ياخي هو ذاتو نقول شنو عليك الله) لاأود أن أسرب أدني أحباط لهذا الجسد (الفيهو مكفيهو) فعلي مانشستات الصحف التي صدرت في الخرطوم قرأت خبراً يؤسفني نقله الي هنا كان عن نفوق الاف الدواجن في أربعة مزارع بمدينة بحري (أنفلونزا الطيور ياصديقي والكلام دخل زريبتناعلي عينك ياصحة) والاعجب ياسيدي هارون أن السلطات تعاملت مع هذا الخبر بأقل مستويات المسؤلية بداية يحكي أحد المزارعين أن وزارة الصحة جاءت بعدد من الموظفين للنظر في الجداد الميت ده ولم تكن معهم واقيات ولا حتي كمامات . ببساطة ياعوض نحنا ممكن يجينا أنفلوزا الطيور بواسطة موظفي وزارة الصحة شفت العلة وين ؟ الوعي بتاع أصحاب المزارع خلاهم يشتروا للشباب ديل واقيات وكمامات ومافضل الا يفحصوا الدجاج ده .
وزارة الثروة الحيوانية لم تتحرك حتي كتابة تلك الاسطر بما يفيد عن تلك الحالات رغم مرور ثمانية أيام علي الحالات المزكورة (وتقول لي وحدة وطنية) هذا هو حال الجداد ياصديقي . فما بالك بالانسان ...........؟
تركت ماتركت من الابتسامات بعضها القيت بها علي وجوه صادفتها لاول مرة في هذا الصباح الخرطومي وبعضها لوجوه مكررة إذ لاتفسد الابتسامة هنا للحزن قضية كل شئ ماشي ياصاحبي الا إتفاقية السلام والركود الركود الركود حتي السلطة كسابق عهدها تمشي علي قدم وساق قدم الاستهبال وساق الاستعباط ومابينهما قضايا بحجم الفواجع الكثيرة .
أتمني أن لا أصحوا غداً لافاجأ بوفيات جديدة والتحية لجداد جماهير شعبنا علي ما أصابها من محن ولا أراكم الرب مكروهاً في (فراخ لديكم) .

ماشي ياصاحبي للشموار إياه .........

حأجيك باكر كان الله أراد

خضر

الخرطوم

خضر امس كنت حاضرا ....

كنا انا وابراهيم الماحي " ساورا" وهشام الحاج , وطارق الحسن, وعاطف خيري ايضا كان حاضرا ... ففي احد الجخانين اكتشفت واحد ببيع صعوط ويبيع اشرطة منسوخة ايضا طبعا " زي ماحصل حاجة لاحماية الملكية الفكرية ولايحزنون" .. عندو اشرطة رهيبة - من سيف الجامعة مرورا بالهبر ومارسيل حتى وردي بالعود _ وفي الشعر من الفيتوري حتى الصادق الرضي بتسجيل واضح زي القاعد معاك . والله بعد مارصة زي مية شريط كدة قدامي من البتفتش عليهم , سألتوا يأخي بالله ماالقى عندك قصة لمحسن خالد أو عادل القصاص !
يأخي ده عندوا اي شئ .
كنا نستمع الي شريط من بيت كلاوي عاطف خيري , وابراهيم الماحي كان منتشيا بعاطف وماتبقى من عرقي الخميس حتى دندن بعوده وتعرف المجهود الذي كنا نبذله لنجعل ابراهيم يمسك العود .
كنت معنا تشاركنا تلك المتعة , اكتشفت ان لك قراء معجبون بكتاباتك اكثر من اعجاب حسن موسى وعبدالله بولا بها
سأعود بتفاصيل تلك الليلة

سيناريو اليابسة

الهدهد:
مخدوش الفضا
طويل الحزن مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان شهيق
لونو زى سرك تكلمبو الصديق
أمو تتوحـّم على طين البحر
قبال تقابل والدو صدفة على الطريق
عمرو ستة شهور حِلِم
إنو الأرض مسجونة فى موية وكل الناس مراكبية
اليابسة فِركة مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة مجدوع فى الفراغ
والرقصة لى البت فينا
فوق كل المسامير الندقها فى البساط
والرياح حكـّامة بى دلوكة مرّقت الشياطين منها
إتجنن فقير الحلة دقيناهو بى نفس السياط
كل المجرات النيازك والشُهُب
ودع راميهو الله على السما
والدنيا زار
ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون والصرير
منهوبة مقبرة الفواكه فيكى
قولى معاى يا شرف القبايل جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة
وأدنقر ألبِّسا شبط أخضر
وأبيت مبلول وأصلِّح فى الرباط
أنا ليه شبابيك البيوت الواجمة والناس البُساط
وليه يرجانى النخل
فى السكة يفتح قلبى خمارة وخلاوى
وبيت بكا
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
الهدهد تميمة الموت
معلّق فى بيوت الناس نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك نمت
كل الطيور غنت منك يجينى سكوت
مين الهداك للناس
أو هدّ فيك الموت؟
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة بالنسيج
وصيوان عزا نوح
المكفّن بالوعود
هدهد يرك فوق دفــّة المركب يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
الشموس فاقت
ونوح بعاين فى مفاتن اليابسة
تغسل فى حصا ومتبرجة
سبحانك الأديتنا من ملكك سلاطين وإختفيت
هاك أنبياءك سالمين
وأنزل مسافة توجعك غابة
رقيصنا الحى
طبولنا
وليك شبال
من اليابسة الممشّطة بالملح
وهدهد

وهكذا دائماً أنت لاتخاف في الحياة لومة (منافق)
طابتم خميساتكم كلها

شاء الرب ياصديقي لاعود مرة أخري للكتابة وهذه المرة من قلب خرطوم الهزيمة والعزيمة أكاتبك ياعوض من مركز (وازا) لعلوم الكمبيوتر والانترنت إذ تجلس ثلاثة شقراوات حد الدهشة علي الكمبيوتر إحداهن ترتدي اللون الازرق لتضيف لهذا المكان (سمبهاراً آخراً) أزرق فاتح ياعوض ولك أن تتخيل هذا الجمال الانثوي .
بالقرب من موقف مواصلات جبرة مروري من هنا زكرني صديق الغربة (أبو ساندرا) الديامي جد جد السخانة كعادتها تلسع لسع العقارب في شتاء مظلم . الخرطوم تعاني من الحر والحر اضافة لعربات الكجر صحف الخرطوم حملت ماحملت من أنباء وأنا لاذال قلبي مفطوراً علي مصير الدجاج . علي عثمان يتوجه الي أبوجا الأخوة الجنوبيين يستعدون للعودة الطوعية وعلي ما أظن أستعداداً لانفصال أراه يتمدد في قلب هذا الوطن شبرا شبر وعلي كل أنا لم أحضر الي الخرطوم في هذه السخانة لاي من الاجندة أعلاه حضرت لمقابلة تلك الشابة (أومن تمثل مجموع العصافير في هذا الوطن البائس ) كوجوه حكام هذا الزمان .
من شدة الحر أكتفيت بالدخول الي هنا في هذا المحل يوجد (مكيف) نص كم أسمع بشكل واضح نقيط المياه نقطة نقطة وعلي الشارع الخلفي باعة متجولون وناس متجولين ومتجولين ساي بالاضافة لسايرات اليونايتد نيشن) دبل قبين .
لم أحدثك ياصاحبي عن ليلة أمسنا قضيتها مع الاصدقاء قتلنا الليل نقاشاً ثم تركتهم نائمين لاعود الي مستقر سريري كان النقاش محصوراً حول دور الطرق الصوفية في المجتمع السوداني مسالبهم وإيجابياتهم وللامانة أنتهينا جميعنا الي حديث الرسول صلي الله عليهم وسلم إذ يقول الساكت عن الحق شيطان أخرص (اللهم أنر بصيرتهم ) الشارع السوداني تجاوذز التصنيفات القديمة (كوز وماكوز) .
أنطلق الان من أحدي الكافتريات صوت (ود الامين) نحنا حالفين بالمشاعر قلنا ماممكن تسافر ولا أدري هل هو تآمر الحرف مع الاذن أم الامنيات المن زمان .
نصف ساعة هي عمر ماتبقي لي هنا في هذا المقهي (البارد). سلامي الي أن نلتقي لابراهيم ساورا الذي يظلل أمسياتكم بنقرشات العود ولطارق العزيز ولهشام الحاج ماتبقي من كاسات هذا المساء .
حأجيك باكر ياعوض حأجيك

خضر
السوق العربي _ موقف جبرة _ عمارة السلام

خضر الشيوعي سلامات يا حبيب


يا خضر عوض نوعية كلامك دا بقى ما بقسم معاهو الراجل بقى راجل رأسمالي وقبل يومين اشترى ليهو باثفايندر وبما انك ضيعتا غربتك كلها ورا بندو ولطيف وصداح عبيد وماهر اندومي فبالتأكيد ما بتعرف الباثفايندر يعني شنو عشان كدا جايب ليك الصور ( شفتا أخوك بفهمك كيف ؟؟)

75.000 ألف ريال ألف ينطح ألف ( أبو الزفت زاتو على قول هشام شيخ الدين )أسي عليك الله الرقم دا مش كان حقق كل أحلامك يا خضر ... ليت عوض يعلم يا صديقي انك ما عندك الخمسمية حقت المواصلات للسوق العربي ... دنيا قاسية يا صديقي

وأسي داير يرحل من جنب الصادق خليفة تجي تقول ليهو غبش وطين؟ الزول دا بزعل منك كدا براهو زعلان من لطفي عشان قال ليهو جيب سحبة في الباثفايندر.



خضر بلاهي ارين ويدا كركا اليلن كراكا هتيقجلوني.

خ ح خ
نكاية بك
قضيت الليل مع جيل جلالة وناس الغيوان أفضل الفرق المغربية للغناء الجماعي
عشان أعمل معادل يناهز مارسيل في مداه

ولو ماسجلتو لي
بتكون { أنت إتلومت فينا }


عوض هارون :
أول بالتبادي سلم لي على
إبراهيم الماحي
طارق الحسن
وقول لي طارق ما شاركت في بوست الديم مالك ؟
ممكن بالإيميل بتاعي

وتاني هام
مبروك النيسان / فايندر الأنيقة
وياريت تقطع بيها { المسافة البيني بينك }

دع بشرى المكي بيننا

يا ولد يابدري يامقطع
تعال هاك سحبة بيها يوم الخميس الجاي انا جاييكم في البيت اول ماأدخل حاديك المفتاح
عشان تلعب بيها لحدي ماأكمل ونسة مع ابوك. بعد داك انت جيت صورتها متين ياشقي الفوق دي نفس اللون


ابوساندرا
والله جاييكم قريب هل زرت شقيقي محمد هارون
اجازة الصيف معاكم اكيد بس بالطيارة

صديقي عوض هارون

Quote: 75.000 ألف ريال ألف ينطح ألف ( أبو الزفت زاتو على قول هشام شيخ الدين )أسي عليك الله الرقم دا مش كان حقق كل أحلامك يا خضر ... ليت عوض يعلم يا صديقي انك ما عندك الخمسمية حقت المواصلات للسوق العربي ... دنيا قاسية يا صديقي

ألف مبروك السيارة الجديدة
بالمناسبة خضر قال ليك هو اشترى شراب جديد من السوق العربي كيتأً في سيارتك

صديقي عوض
سنحتفي بمارسيل خليفة وبليالي الخرطوم البهيجة
لا تأسف صديقي
ولنا لقاء في الخرطوم المعافاة والجميلة

الاخ خضر تحياتي
ده عوض هارون بتاع عطبرة وجامعة القاهرة الفرع واللا اسم علي اسم وفي كل الاحوال له التحية .

اشراقة صاحبتي
كيفك
وكيف البنية السمهرية سلمى

بالله سجلوا لي مارسيل

صديقي عوض
لا يجتمع نهار السعودية وليل الخرطوم في مكانٍ معاً
لك نهار السعودية وحرها الخانق ولك أيضاً فلوسها وعرباتها الفاخرة
.........
لنا الخرطوم بنهارها التعس وفلسها الحارق
وأيضاً لياليها البهية
.......... ولك أن تختار

(ما حنسجل ليك أي شيء)

صديقي عوض
اليوم سنحتفي بمارسيل وستحتفي الخرطوم بالليالي البيضاء
والبهية
لا عزاء لك صديقي ولكن.............
سننقل لك ما دار (بأي طريقة)

علشانـك يا خـضـر وعلشان الناس البتحـبهم..

فـوق...

مـني