غنوا معاى .....دوبيت الحردلو

Post: #1
Title: غنوا معاى .....دوبيت الحردلو
Author: HAMZA SULIMAN
Date: 04-25-2002, 08:50 PM

البلد اللبوك عمدو وجفوك نظارو

ذى المتلى قاعد فوقو شن افكارو

اولى الختره فوق جملا تكب فقارو

ما خالقنا زول مولانه واسعه ديارو

هذا الدوبيت عمره اكثر من مئه عام كتب فى زمن الخليفه عبد الله التعايشى بعد ان منع اعيان القبائل مهمتهم وقال انه هو الزعيم السياسى والدينى ومنع كل شى فى المجتمع حتى شيوخ الدين منعهم مريدنهم ففرق الاخوان من بعض والقبائل شتتهم واظنكم تسمعوا بى يحلنا الحله بله من القيد والزله الذى انقذ بنات عمه واخواته من الخليفه التعايشى هل نحن الان فى زمن الخليفه؟

كم شويملهن وقتا كتير فوق ناقه

زمنا فى طرف ريسه وشويه فاقه

عاكسنا الدهر كترت علينا العاقه

ونحن برانا يا عبد الله كيف نتلاقى

عبد الله هو شقيق الحردلو وريسه منطقه فى الشكريه سمح لهم عبد الله التعايشى
كمنطقه حره لهم يمارسوا فيها فياقتم وشراب القهوه والشاى ويسكتوا ساكت
والله كريم علينا

حمزة سليمان

Post: #2
Title: Re: غنوا معاى .....دوبيت الحردلو
Author: khider
Date: 04-25-2002, 11:47 PM
Parent: #1

انا يا حمزة اخوي... جدي .. ود الفراش قال ..

الليلة الصعيد طراني بلدا زينة

مريودة امها البي الخمرة رشو قرينة

ان جيت للجمال زي الريال يا عينا

لكن يا خسارة الفلسة حاصلة علينا

احبك .. جدا .. و واصل عليك اللة
فرحني ... شوية

Post: #3
Title: Re: غنوا معاى .....دوبيت الحردلو
Author: MXB6N
Date: 04-26-2002, 00:43 AM
Parent: #2

الاستاذ حمزة سليمان شرفت البورد والله بحضورك الجميل
ويقال أن ال الحردلو من الشكرية لم يرضو بمجاورة الحلفاويين لهم ولعنوا من هجرهم لحلفا الجديدة فخرب عليهم فياقتهم وما اعتادوا عليه حيث قال قائلهم يندب أيام الابيتر " الحردلو الكبير"

زمناً مو بعيد .. كان الحكم بالايد
فيك اتحكر الدوق الجهامة قليد
قبال اللبيتر راسو يبقى صعيد
ما شافك حلفاوى ولا ترلى حديد

Post: #4
Title: Re: غنوا معاى .....دوبيت الحردلو
Author: HAMZA SULIMAN
Date: 04-26-2002, 06:55 AM
Parent: #1

الاخوان خضر وMXB6N

لكم الحب والسلام والدوبيت فن فيه كقير من الراحه النفسيه

مع تقديرى

حمزة

Post: #5
Title: Re: غنوا معاى .....دوبيت الحردلو
Author: Elkhawad
Date: 04-26-2002, 08:42 AM
Parent: #4

و هاك المربع دة للحردلو

لونهن من بعيد متل البليبلى نضاف
حرد و معصرات من شبة الأكتاف
على الناس البغنولهن بجروا القاف
ماليات الخشم من كامل الأوصاف

Post: #6
Title: Re: غنوا معاى .....دوبيت الحردلو
Author: عزيز
Date: 04-26-2002, 08:55 AM
Parent: #5

اهلنا ناس البطانه فطنين ويمتازون بسرعة البديهه وشعرهم عميق ومعبر وزيدونا من هذا البحر .. ويالحبيب خواض ماتنورها لينا بى ضلمت

Post: #7
Title: Re: غنوا معاى .....دوبيت الحردلو
Author: HAMZA SULIMAN
Date: 04-26-2002, 03:24 PM
Parent: #1

الاخوان خضر وود الخواض وعزيز

كدى نجادع

نهدا دق تبل ماهو المدوشش قرو

يلعب حردفى توو المراقد ترو

فى بوش العصير الناس يقوموا يبرو

فوق ندادها كرباج النصر بتورو

***

لخلوخة تقوم مسايسه ومفروقه

بين التقنتين دفق البصير ماروقه

ان جلست معاك وان سمع منطوقه

على المشببات بلحيل بعيد معلوقه

************

حسرورن زمان انا ضيقنبو خلاقى

طول الليل مساهر وعينى ما بتلاقى

من فرط البجينى الهجعه بالعراقى

وين ما ادور اغلق فوقى يصبح باقى

وابشروا بالخير وزغروده وصوت عنج وبطانه

حمزة

Post: #8
Title: Re: غنوا معاى .....دوبيت الحردلو
Author: Fitoon2002
Date: 04-26-2002, 04:11 PM
Parent: #7

كيف يا حمزة

انا رسلت ليك ايميل قبيل كدى شوفو ؟؟

وتانى شى كدى بالله (ترجم) لى الكلام دة عشان والله العظيم ما فاهمة نصو !!

وانت تعال كدى، الكلام دة حافظوا كلو ؟؟ والله ما شاء الله ، لكن ما اسحرك

لكن تانى اعمل ليك زى شرح للكلمات الما مندرج على استعمالها وكدة عشان نستمتع معاكم كمان ، مش كدة ولا رأيك شنو ؟؟

Post: #9
Title: Re: غنوا معاى .....دوبيت الحردلو
Author: HAMZA SULIMAN
Date: 04-26-2002, 04:55 PM
Parent: #1

سلام

وغبتى كتير واتمنى انه الزمن ما يفرق من جديد وحافظى على الردود لانها بتردنى لى زمن حالم .

وح اترجم ليك كل شى باذن الله

كل هذا الدوبيت غزلى وحاولى اجتهدى تانى واذا غلبك ح اشرح ليك
لك السلام ارسلت ليك ايميل

Post: #10
Title: Re: غنوا معاى .....دوبيت الحردلو
Author: Fitoon2002
Date: 04-26-2002, 05:41 PM
Parent: #9

سلام من تانى يا (خمسة) هىهى(:

والله (اجتهدت) لما راسى لف ، لكن زى ما قلت ليك بس فهمت نصو ،غايتو يمكن

يكون راسى(تخن) من الركلسة و قعاد البيت ، مش كدة ؟؟ معقول برضو !!

وانت قصدك ايميل (تانى) ولا الأول زاتو ؟؟؟

يلا فى حفظ الله

Post: #11
Title: Re: غنوا معاى .....دوبيت الحردلو
Author: banadieha
Date: 04-26-2002, 05:56 PM
Parent: #9

شوف ياحمزة..هذا بوست بدأ ليستمر..فلا تتوقف أنت والأخوان عن الإضافة وراء الإضافة.. وليت في رأسي أو كراسي شيء..ولكن ما يمكن أن أقوله هنا أن الموضوع وإن كان عن الدوبيت إلا إن له بعده السياسي والتاريخي خاصة من ناحية نفي الآخر وإحتكار السلطة والنتائج التي تترتب على ذلك..وربنا يستر

Post: #12
Title: Re: غنوا معاى .....دوبيت الحردلو
Author: HAMZA SULIMAN
Date: 04-26-2002, 06:29 PM
Parent: #1

لك فتون

الاول

الحردلو يصف العقد الذى صاغه الصايغ (تبل) على جيد الفتاة يوم حفل حين نهض الناس للرقص وانتصرت الفتاة على اندادها كما يفعل المنتصر بسوطه فى نشوه الانتصار

التانى ( لخلوخة)

انها تشبه القصبه اللينه التى احسن زراعتها ..ا.ن جلست معك تبين الفرق الشاسع بينها وبين من يدعين الشباب والحسن

اللخلوخه ..القصبه التى تتمايل

مسايسه زرعت بى خبره ومعرفه وسياسه

التقنتين ..التقنت هو الجدول

الماروق السماد معلوقه كنايه عن مكانتها

التالت (حسرورن)

ان فراقهن والم حبهن جعلنى اضيق فابيت ساهرا طول الليل ولم يغمض لى جفن

الحسرور الم الحب وتكون حسارا احيانا من الحسره

اغلق ... اسدد حسابى للحكومه التى فرضت مبلغ على الشيخ فى العهد التركى .

اتمنى ان نعطى ابنائنا فى الغربه جرعه من صوتياتنا اللغويه

حتى ما تكون الغربه حقيقيه والسودان مليون ميل مربع فى وجداننا.

حاولى اقريه كم مره ح تصلى للنطق الصحيح لانه التشكيل صعب فى الكمبيوتر

ولو بكرى ابو بكر دخل صوت كان سجلته صوتيا ولك الشكر الجميل .

حمزة

Post: #13
Title: Re: غنوا معاى .....دوبيت الحردلو
Author: Fitoon2002
Date: 04-26-2002, 07:12 PM
Parent: #12

لك يا حمزة

الشكر الجميل لك انت على سعة صدرك ،،

والله قاعدة احاول من قبيل ٌاِنو اقراهو بالطريقة الصح ، و غايتو يمكن اكون

(بعد شرحك) المسهب انى افهم شوية شوية ، راسى تخين (انا عارفة )

اها قلت لى لقيت ايميلى ليك ؟؟انا رسلتو قبل ساعتين كدة اظن ..

الى الملتقى

Post: #14
Title: Re: غنوا معاى .....دوبيت الحردلو
Author: wadazza
Date: 04-26-2002, 07:18 PM
Parent: #13

ويقول الشاعر مكاشفى فى مسدار:
ملفحة يا بلد بالحر يلاوى النسمة
ضرب المستحيل كتف رموش النجمة
إن صح الكلام فى عينو تصحى الكجمة
يابلد اندفر فى رحلتو المنقسمه
ما تور ان وقع يكتر بياض البسمة

Post: #15
Title: Re: غنوا معاى .....دوبيت الحردلو
Author: Elmosley
Date: 04-26-2002, 07:57 PM
Parent: #14

عزيزي حمزه
ماأجمل هذا ألبوست أنا مستمتع بكل المشاركات فيه يلا واصل هذا
ألعمل ألمفيد

Post: #16
Title: Re: غنوا معاى .....دوبيت الحردلو
Author: Elkhawad
Date: 04-26-2002, 08:02 PM
Parent: #15

ود أب سن
قال
نفخ الشمرة و أدلى الوعير من ضو
ردف الزوغة و اتصعد هبوب الهو
أنسى الغيرة مالى فى الشبابت هو
خلت حلقى قرقدة و لهاتى كرو

Post: #17
Title: Re: غنوا معاى .....دوبيت الحردلو
Author: HAMZA SULIMAN
Date: 04-26-2002, 10:17 PM
Parent: #1

احبتى شكرا لكم وشجعتونى للمواصله

الحردلو بعد المهديه قضى اياما اخلد فيها الى العزله واخلص فيها الى فنه فانتج رائعته فى وصف الظباء التى عرفت بمسدار الصيد وبقى فى البطانه يقرا من القران سبعا كل يوم وهكذا قضى ياته الاخيره بين العباده والفن الى ان لقلى ربه سنه 1916 فى ريره رحمه الله .

مسدار معناها حكايه او قصه او من لفظ سدر مقلوب من سرد العربيه وهاكم المسدار

الشم خوخت بردن ليالى الحره

والبراق برق من منا جاب القره

شوف عينى الصقير بى جناحو كفت الفره

تلقاها ام خدود الليله مرقت بره

تعرف لى مشاهيد الرقاد والفره

فلاخ المصب بيهو بتبين تتوره

فوق حيا فوق محل من الصعيد منجره

شاد الله الكريم ما تلقى فيه مضره

اب عراق فتق قرنو المبادر شره

والباشندى عمت مهششيب الدره

من النقره كل حين فوق عليو منصره

ها الايام محاريها القليعه ام غره

قدمت من هنا مبى ضانها سمعت كره

فوق كارتوت شخيتيرا تخين خره

قلاتو الوهاط بى لشغه قبلو محره

يا باسط النعم تسقيها فى ها المره

قدمت موضوع الدوبيت من خلال سمنار فى معهد الموسيقى والمسرح وقد شجعنى على ذلك زوج اختى الكبيره الشكرى ود الصعيد رحمه الله

واتمنى ان يدرس مسدار الصيد ومسدار المطيرق الذى ساتطرق له المره القادمه فى المدارس اضافه للمعلقات لانها فيها حس سودانى ميه الميه

وطبعا المسدار طويل اديتكم منه مقتطفات

لكم الشكر الجزيل

Post: #18
Title: Re: غنوا معاى .....دوبيت الحردلو
Author: Elkhawad
Date: 04-26-2002, 11:27 PM
Parent: #17

ودي الرضي قال
باَهي وَريدَه عَالي صدَيرَه فَاْقله رَقيقةَ
تَمْشي مَنْ الُترَفْ في كل ثَانيه دَقيقَه
وهَذَا منْ الطبعْ مَا أتْصنعْلو حَقيقَه
مٍقْدارَ ثَانيهَ فَيهَا الحٍنه تبَقْي عَقيقَه

Post: #23
Title: Re: مجادعة.....دوبيت الحردلو
Author: MXB6N
Date: 04-27-2002, 10:46 PM
Parent: #17

شكراً يا ناس ..عتيق قال
الحب يا مناى فى جوفى جزرو ومدو
علق روحى فوق وهيامى جاوز حدو
قاضى هواك أمر اعتقالى ومدو
مايقبل دفاع من سبدرات أو شدو

Post: #19
Title: دوبيت
Author: Ahlalawad
Date: 04-27-2002, 09:28 AM
Parent: #1

الأستاذ حمزة سليمان والأعزاء القراء والمشاركين ، لكم التحية .. هناك بوست في البيت الآخر بعنوان (خيمة الحردلو) تختص المشاركات فيه بفن الدوبيت ، وهذه دعوة لمن لم يزره بالتفضل بالزيارة ، وهذه مشاركة مني في هذا البوست ، حباً واعزازاً :

بت امات حقيبة الجاكة بي فستانا
منك واشقاوة اب دومتن زكمانة
دارة وشك الفوقو النجوم محنانة
خشمة عكة الفوقو الطيور حرقانة

ولكم التحية

Post: #20
Title: Re: دوبيت
Author: ebrahim_ali
Date: 04-27-2002, 10:49 AM
Parent: #19

الاخ الاستاذ المبدع حمزة وكل المبدعين من ابناء بلادي تحياتي بلاحدود
ماهذا الابداع يا مبدعين والله عقدوتنا عديل كده ورجعتونا للوطن والقعدة الضحوية في طل الحيطة والعصرية في الخلاء ونستمتع بهذا الالق والابداع ومزيد من اابداع يا خواض وبمناسبة خيمة الحاردلو وين دي يااخونا ممكن تورينا الموقع بتاعو مع خالص تحياتي

Post: #21
Title: Re: دوبيت
Author: kabbashi
Date: 04-27-2002, 11:15 AM
Parent: #19

قال القائل الذي لم أستدل على اسمه:

سامية أديبة ما بتحمل مشاعرك همسة

حني شوية خلي الروح تجود بي همسة

قسما بي جملك والحروف الخمسة

نيرانك تلهلب فينا تصبح تمسى

وقد أخبرني في من أثق في ثقافته التراثية أن المقصودة لا تحمل اسم سامية كما فهمت أنا بشكل مباشر عند قراءة المربع بل قال لي أن سامية هنا هي صفة للسمو والرفعة.
ودمتم

Post: #22
Title: Re: غنوا معاى .....دوبيت الحردلو
Author: alwardah
Date: 04-27-2002, 10:10 PM
Parent: #1

الرائع المتالق دوما فى سماوات الابداع

حمزة
لك منا كل الشكر00 حقا قد اتحفتنا بتراثنا العظيم 0
وارجو المذيد المذيد 0

Post: #24
Title: Re: غنوا معاى .....دوبيت الحردلو
Author: khider
Date: 04-29-2002, 01:15 AM
Parent: #22

من الهودي قام بي مكندي
وكت جبد الرسن .. جاب راسو عندي
قال لي يا سيدي انعدل اللوريك ذندي
و عقب نحضر مشاط بت اللفندي

Post: #25
Title: Re: غنوا معاى .....دوبيت الحردلو
Author: alwardah
Date: 05-01-2002, 12:32 PM
Parent: #1

العزيز حمزة
اتحفتنا بروايع الحردلو لكننا عطشى فهل من مذيد

Post: #26
Title: دوبيت
Author: Ahlalawad
Date: 05-01-2002, 12:58 PM
Parent: #1

دوبيت من شعر الحردلو :

البارح رقادي كسيدة فوقكا بريش
وراكبوتن تجيب صقطة ومعاها رشيش
الـ حماني ما اشهل جمال العيش
هنهينأً بيسونو الدغش بيشيش

وهذه من غيره :

بالهنا والسرور العيد عليك مبروك
يا ست النجيمي الفي العقل مشبوك
قدمك للمجاربو بيودر ام سمبوك
زولك غير نعال بيفتر بيجيه الشوك

Post: #27
Title: هـــــــــــــــــــــــــاكم الدوبيت دا
Author: shammashi
Date: 05-01-2002, 01:02 PM
Parent: #1

ناس قدر الله قاعدين في الفريق مابخترو
من كبي وكشف حال الحريم مابفترو
أنا البختر براي أسد الرصيمة بنترو
صاحبي إن ضلا مابفشاه ديمة بسترو

................................

أخوك يا ريا أخوك وقت الخيول يدبكن
أخوك ياريا أخوك وقت الرماح يشبكن
أخوك جبل الثبات وقت القواسي يتحبكن
كم بكيت - بتشديد الكاف - وكم قشيت دموع الببكن

............................................

ولدا ما سافر لامن يقولن فات
ماطلع الجمل دل السداسيات
ماكجر الحوايا وفي ضراهن بات
كيف يبكن عليهو دقس العيون إن مات
ولداً ما سافر لامن شهيرو يهل
وماورد البحر عطن شنانو يبل
وقت الشوف يشوف متل الصقير يقدل
واخيبةً على ولدا يعيش بالذل

ود ضحوية دا كان قاصدنا عديل كدا

فاهمين ولا دايرين درس عصر.

Post: #28
Title: Re: هـــــــــــــــــــــــــاكم الدوبيت دا
Author: nafitha
Date: 05-01-2002, 03:22 PM
Parent: #27

دوبيت كل يوم في الحل وفي الترحال
وسهران بيكي جاد شاغلآني فوق البال
الدنيا العبوس اكان بدوملها حال
ما جابت البشير يحكمنا بالبطال

Post: #29
Title: ebda3
Author: almaskoon
Date: 05-01-2002, 05:06 PM
Parent: #1

i haven't read (dobiat)for longtime and thanQ all for (haza alkm min alebd3at). but i believe (al dobiat tasma3oo ma tagra).iam lookin forward to c some realplayer act soon.
hope some one out there 3endo 7aja nasma3a

Post: #30
Title: Re: ebda3
Author: Elmosley
Date: 05-03-2002, 05:34 PM
Parent: #29

عزيزي حمزه ألوحشه حصلت
ماأجمل هذا ألبوست أنا مستمتع بكل المشاركات فيه يلا واصل هذا
ألعمل ألمفيد

Post: #31
Title: Re: غنوا معاى .....دوبيت الحردلو
Author: HAMZA SULIMAN
Date: 05-03-2002, 08:50 PM
Parent: #1

مسدار المطيرق

هذه القصيده عباره عن مطارحه بين الحردلو واخيه الشاعر عبد الله ومناسبه المسدار انو الحردلو واعد جاريه من جواريه الحسان واتفقا على ان تاتيه فى البيت بعد ان يتعشى الناس وترك الحردلو للجاريه تقدير الوقت فتعشى الناس وصلور صلاه العشاء ( والونسه جرت ) وانصرف الجلساء بعد حين وبقى الحردلو فى الانتظار ولما طال به الانتظار غفى قليلا ونام والجاريه لم تكن مقدره انصراف جلسائه فى الوقت الذى انصرفوا فيه وكل هذا الوقت كانت تستعد للوفاء بالوعد ولما اليل الليل حضرت الجاريه فوجدت الحردلو نائمافاستحت ان توقظه فان بقيت لا فائده وان ذهبت قد لا يصدق فاخذت عصاة ( المطيرق) لتكن دليلا على حضورها ونامت معها المطيرق

فلكم المجادعه

الحردلو

ذكرتى بالبنات لا عن مصوع فاحت

ضايق غلبهن من شينتن بتاحت

جديع ودعتن بالليم على ما طاحت

هبرت كفتى وعقب المطيرق راحت

عبد الله

الليله المطيرق فى نعيم وسروره

وات النوم عبدتو وما قريت ليك صورة

ساعتين ان صبر كت تحظى بى البدوره

سعدك اصلو داك ما بجبر المكسوره

الحردلو

غفوت عينى ديك من يومه ماها مريه

واصيح حالى متل ال دخلوا الظبطيه

اترجاك يا ابو التايه اول سيه

ما اتواخذ واكون فى حالة غير مرضيه

عبد الله

مسامح يا ابو يوسف ولو فى ميه

كونك للدغس بتسمح القافيه

ان بقى للمطيرق شيله جاب لو حكيه

مى مسروقه لاكين فيها حكمه خفيه

الحردلو

بعرفك وكت تقوم فى حجازة واجودية

تبذل فيها جهدك بى صفاوت نية

معلوم تصلح البطحانى والشكرية

لاكين المطيرق ما بتجى غير دية

عبد الله

شيلته فى الحقيقه مثبتابه الجيه

خوف مسك الضهر واللوم مع الكليه

فى سبب المطيرق لا تسيلك ديه

انا ملزوم بيها وتلنى الضمانه على

قصيده طويله جدا وهى مجرد ابحار فى دنيا الدوبيت والروح الابداعيه وحقيقة

يا استاذ الموصلى شجعتنى على المواصله واذا لقيت فرصه ح اكتب مسار الصيد

ومسار المطيرق ان شاء الله

والسلام حمزة

Post: #32
Title: Re: غنوا معاى .....دوبيت الحردلو
Author: HAMZA SULIMAN
Date: 05-11-2002, 08:43 PM
Parent: #1

دردرنى الفقر لامن بقيت شنكيت

ودنى الغباين لى جبال فرتيت

امن جبت مالا فرح ام سوميت

وامن فى جبل تقلى انجدع ما جيت

كم من مجدوع الان من اجل الحبيبه

Post: #33
Title: Re: غنوا معاى .....دوبيت الحردلو
Author: alwardah
Date: 05-13-2002, 11:27 AM
Parent: #1

الاستاذ حمزة
لماذا الانقطاع؟

Post: #34
Title: دوبيت
Author: Ahlalawad
Date: 05-13-2002, 02:13 PM
Parent: #1

تقاي المفلخ شلتو في مشهادك
جوط واتجوجا لي هسع بعيد مشوارك
قال لي الهسال كان ترخي منه يسارك
بوريك أدعج النقعة الفتق نوسارك

مستعدين للترجمة (إن كان ذلك ضروريا)

Post: #35
Title: تبسمات يا حمزه
Author: منوت
Date: 05-13-2002, 09:36 PM
Parent: #1

أخوك بتاع إنتكم (منوت) ما بيفهم كتير في مسدار ، لكن بيحس كتير بي شعر (ليموني) ..
حاردلو بيقول :

البارح بشوف يشلع بريق النو
وحس رعداً يكركر في الضمير ، كو كو
داك طير القطا دوّر مشارع الهو
و فرقان البطانه اتماسكن بالضو

_____

منوت بيحس بي كلام لسيس دي زي مويه ليمون

Post: #36
Title: Re: تبسمات يا حمزه
Author: Elkhawad
Date: 05-13-2002, 11:17 PM
Parent: #35

يوماً في بســـــط* عند المزند عاجــــــــــــه*

ويوم غــــــربتبن* من جَنْره* شايل كـــاجه*

لا تهـــــــتاددوني ياقطبي السجن مــو* حاجه

بيش* نرضـــــيها غير البِل جدية الـــباجــــه*

البسط : الفرح

المزند عاجه : المرأة المكتنزة وكانت العرب تكني عنها بخرساء الاساور وهي من علامات الجمال .

العاج : الاساور وهي حلية تلبسها المرأة

غربتبن : أي سرت بهن ناحية الغرب .

جبرة : مكان في منطقة الكبابيش

كاجة : قبيلة في كردفان

مو : بمعنى ليس

بيش : تعني بأي شئ

البل : الإبل

جدية الباجة : الجدية تصغير جدية وهي الظبية

الباجة : اسم منطقة

Post: #37
Title: غنو معاى دوبيت الحردلو
Author: anwar abu gaidaa
Date: 05-15-2002, 07:50 AM
Parent: #1

يا عنتيل سلام مربع
ان شفتها غافية او جالسة يوم فى براحة
كلنا نحن ديل اسبوع تجدنا فراحى
من ام نظرا محور ما بشوف لى راحة
حبها فى ثابت زىالخطوط فى الراحة

علييك اللة رسل كلام الغناء؟
انا فى رجاك؟
من حقى اغنى لشبى
ومن حق الشعب على

Post: #38
Title: غنو معاى دوبيت الحردلو
Author: anwar abu gaidaa
Date: 05-15-2002, 07:50 AM
Parent: #1

يا عنتيل سلام مربع
ان شفتها غافية او جالسة يوم فى براحة
كلنا نحن ديل اسبوع تجدنا فراحى
من ام نظرا محور ما بشوف لى راحة
حبها فى ثابت زىالخطوط فى الراحة

علييك اللة رسل كلام الغناء؟
انا فى رجاك؟
من حقى اغنى لشبى
ومن حق الشعب على

Post: #39
Title: Re: غنو معاى دوبيت الحردلو
Author: eyes of liberty
Date: 05-15-2002, 08:02 AM
Parent: #38

سلام و تحايا الي المبدعين اعلاه

كباس درايزو ام حبر
يا دابي الجبال
قلبك صميم من حجر
يا دود الوعر
****
زينب تجر النم
زينب تجر النم في تور العماص
جارف بالكرف الدم
في محتر بواش حاشاهو ما بينزم
صاتور الرجال جرعك عقود الذم
يا دابي الجبال, قلبك صميم من حجر
يا دود الوعر
*****

Post: #40
Title: و دوبيت تاني يا حمزه
Author: منوت
Date: 05-15-2002, 08:26 AM
Parent: #1

زول من (شعرا ليمون ) دوبيت بيقول :

يواً كر نبيت
ويوماً عشانا ربيت
و يوماً نكتح التابا و عليها نبيت
يا جبت مالاً فرح أم سوميت
يا فوق جبال تقلي انجدعت و ما جيت

Post: #41
Title: Re: غنوا معاى .....دوبيت الحردلو
Author: HAMZA SULIMAN
Date: 05-15-2002, 02:06 PM
Parent: #1

الاخوان الاعزاء

لكم المحبه

منوت اخوى و ود العم

eyes of liberty

ابو غيداء العنتيل انور

الخواض

اهل العوض

وهاكم

كت فى جقدله وفاقه وشويه روقه

على الدنيا راضيه العندى مى ممحوقه

شن معناها هسع نمتى المربوقه

كانت ليك قبيل ما تبقى كده مسروقه

Post: #42
Title: Re: غنوا معاى .....دوبيت الحردلو
Author: HAMZA SULIMAN
Date: 05-18-2002, 01:19 PM
Parent: #1

مما قمتى فوق ساجك مولع ضيك
ما اتبعت لافيه العطاش بى ريك
السرع والنشاط ما بشبهن لى زيك
تاتى المشيه خلى الناس تموت بى غيك

Post: #43
Title: Re: غنوا معاى .....دوبيت الحردلو
Author: Elmosley
Date: 05-18-2002, 03:33 PM
Parent: #42

عزيزي حمزه عشان اخوك مبخر قمت بتاليف المجادعه دي هسع

سارح لي زمن داير افوت بي حيك
لابس فنجري واخر تمام متشييك
ان مابقيت حبيب ممكن اكونلك خيك
وين في دا الزمن نلقاهو سمحا زيك

مع حبي

Post: #46
Title: Re: غنوا معاى .....دوبيت الحردلو
Author: HAMZA SULIMAN
Date: 05-19-2002, 03:28 PM
Parent: #42

استاذى العزيز الموصلى
تحياتى واشواقى
ومتاسف جدا ولك العتبى حتى ترضى ويعلم الله ان الظروف هى الماخره ردودنا وطلتنا على ناسنا الحلوين0
(دوبيتك شديد)
الزول الصباه فات الكبار والقدرو
كان شافوهو ناس عبدالله كانوايعذروا
السبب الحمانى العيد هناك احضروا
درديق الشبيكى الفصلو فوق سدرو0

Post: #44
Title: غنو معاى دوبيت الحردلو
Author: anwar abu gaidaa
Date: 05-18-2002, 11:58 PM
Parent: #1

عنقا فاق وريد الزازة شافلو ضليل
مهدول الكتيف ديسك غزير وضليل
مردة وفاقلةضهرك قصيف وقليل
متبورة القدم ساقك حكاةخليل

اظنك عرفت عذاب المغنى

Post: #45
Title: Re: غنو معاى دوبيت الحردلو
Author: Elmosley
Date: 05-19-2002, 02:34 PM
Parent: #44

هذا البوست يحمل عتابا الي كل من حمزه سليمان وانور عبد الرحمن
اما حمزه فلانه دائما يتاخر في ردوده وظروفه مقدره واخي انور قد طلبت
منه ان يسجل لي دوبيت بصوته الجميل كي استخدمه في احد مؤلفاتي
للموسيقي الاليكترونيه ولم يوفي بعد ان وعد وظروفه ايضا مقدره ولكنه
عتاب المحبه

الي حمزه سليمان
ياود سليمان ماكا بترد قوام
والراجيك كتير بتسوي لي قدام
وقولك تب سمح ديمه بيفوح نسام
الا العطله بس فرقت ودايره همام

الي انور عبد الرحمن
قلنالك تعال غرد وقول دوبيت
كشكر وقت حاضر بالمره مارديت
احسن يابطل تبدا ونقول سويت
قبل الموصلي يحرد يسوي البيت

مع محبتي لكما

Post: #47
Title: Re: غنو معاى دوبيت الحردلو
Author: Elkhawad
Date: 05-19-2002, 03:37 PM
Parent: #45

اللّكة الــــــــــبِِتل* يدو ومكـــــــضّم* ســــــــيفو

واسقي انــــــياقو* من ترعة* وسدر بــــي قيفو*

في تقطيع* مجـــــــالس همّلن من صــــــــــــــيفو

يوم بعنــــــــــــالو* بي الســـــاحر* وابزعِل كيفو*

اللكة : مغلق الفهم

تل : هز ومال وتمدح الرمرأة بتل اليد

كضم : سكت

انياقو : انياق جمع ناقة

ترعة : بركة الماء

قطع : القطيعة هي الغيبة

القيف : شاطئ النهر

الساحر : احد جمال الطيب ود ضحوية

بعنالو : من عنى بمعنى قصد

الكيف : المزاج والسرور

Post: #48
Title: Re: غنو معاى دوبيت الحردلو
Author: HAMZA SULIMAN
Date: 05-19-2002, 04:11 PM
Parent: #47

اخى الخواض
شكرا ليك والله ما قصرته مجادعتك جميله ومشاركاتك كلها رائعه دايما قدامى ربنا يحفظك
واصل معانا0

Post: #49
Title: Re: غنو معاى دوبيت الحردلو
Author: Elkhawad
Date: 05-19-2002, 08:03 PM
Parent: #48

زاد القلب روعه حبيبي وكتنين جانا
نارنا الولعت مالكه القلب سرجانه
بي بال من جهنم في الحشا دارجانا
مو فالنا الثبات الطيبه مي فارجانا

Post: #50
Title: Re: غنو معاى دوبيت الحردلو
Author: HAMZA SULIMAN
Date: 05-19-2002, 08:17 PM
Parent: #49

يا اخوى الطيبه مى فايتاك

ماك قدامى ود قبايل الله يخليك فى الدوبيت متعه خاصه

متعك الله بالصحه والعافيه

Post: #51
Title: Re: غنو معاى دوبيت الحردلو
Author: Elmosley
Date: 05-19-2002, 10:10 PM
Parent: #50

اخي حمزه
انما كنت احاول ان اصحي شيطان شعري الذي تركته نائما منذ
ايام العالي والمراهقة وها انذا ارد عليك بابيات جديده

مشكوره وياكريم محريه فيك الذمه
يالاهلك عزاز مشهودلهم بالقمه
والناس المعاك معروفه فيهم همه
والكايس عداك احسن يفوت ينطمه

مع حبي

Post: #52
Title: Re: غنو معاى دوبيت الحردلو
Author: omarmahdi
Date: 05-20-2002, 10:43 AM
Parent: #51

اضغط علي زر play

Post: #53
Title: Re: غنو معاى دوبيت الحردلو
Author: HAMZA SULIMAN
Date: 05-20-2002, 12:54 PM
Parent: #51

استاذى وصديقى الموصلى
شيطان شعرك كان نائم من الثانوى وصحا الان واوحى ليك بهذه الكلمات الرائعه لو كان صحا من زمان كان بقى مارد كما عظمة موسيقتك لك شكرى وحبى.
ابى يبقالى فوق غيرك اجيب بوباى
لا شفناك ولا خبرنا بيك حجاى
القاف السبق والدايرو من اوجاى
كل القتو فى وصفك اراه دون جاى

Post: #54
Title: Re: غنو معاى دوبيت الحردلو
Author: HAMZA SULIMAN
Date: 05-20-2002, 12:58 PM
Parent: #53

اخى عمر مهدى
شكرا للمشاركه ولكنى لم استطع سماعها ولا ادرى لماذا حاول ساعدنى كى استمتع بها

Post: #55
Title: Re: غنو معاى دوبيت الحردلو
Author: Elmosley
Date: 05-20-2002, 01:05 PM
Parent: #54

اخي الحبيب حمزه
يلا واصل هذا البوست الجميل وماتنقطع

Post: #56
Title: غنو معاي .. دوبيت الحردلو
Author: singawi
Date: 05-20-2002, 03:29 PM
Parent: #1

الأخ حمزة وضيوفه الكرام
فتحتو باب ما بقدر أقاوموا .. أسمحو لي أدخل
ودي بليلة مباشر

مجنون ليلى من جني الجنون عاريهو
وكان جنيت حلالك عقلي شن طاريهو
وكان طشيت فداك عمري السراب باقيهو
إلا يبكـي حالي البـي كـان شفتيهـو

تحياتي

Post: #57
Title: Re: غنو معاي .. دوبيت الحردلو
Author: HAMZA SULIMAN
Date: 05-20-2002, 03:47 PM
Parent: #56

الى Singawi

لك الشكر وواصل

بليله مباشر ولا ....... مكاشر

Post: #58
Title: Re: غنو معاي .. دوبيت الحردلو
Author: HAMZA SULIMAN
Date: 05-20-2002, 04:01 PM
Parent: #57

الاستاذ الموصلى

كلما تكتب دوبيت بحس بتواضع موهبتنا

Post: #59
Title: Re: غنوا معاى .....دوبيت الحردلو
Author: omarmahdi
Date: 05-20-2002, 06:22 PM
Parent: #1

الاخ حمزة عليك بالضغط علي زر play

Post: #60
Title: غنو معاى دوبيت الحردلو
Author: anwar abu gaidaa
Date: 05-20-2002, 06:38 PM
Parent: #1

مى وسيخانة حاجة لطيفة
نفسك تنفتح وكتين تمسة قطيفة
ان جيت شلتها تجيك هى مليهيفة
وتاخد ليها ضحكة وتبردك بى هيفة

Post: #61
Title: Re: غنو معاى دوبيت الحردلو
Author: Elmosley
Date: 05-20-2002, 07:35 PM
Parent: #60

عزيزي حمزه
انتم اهل لها

Post: #62
Title: غنو معاي ..... دوبيت الحاردلو
Author: singawi
Date: 05-20-2002, 08:16 PM
Parent: #1

حالي البـي يازينوبـة حـالاً شيـن
يا زينوبة خاطري كسير وقلبي حزين
يا زينوبـة شهيتيني نـوم العـين
حالـي البـي كمل فرحة الشامتين

مشتاق ليك كتير يالجوة قلبي سكونك
لقيـاك منيتي وقبلة سعادتي عيونك
شوقك شال منامي وشـن حياتي بدونك
حني على الأسير أو حلي قيد مسجونك

Post: #63
Title: Re: غنو معاي ..... دوبيت الحاردلو
Author: HAMZA SULIMAN
Date: 05-20-2002, 08:24 PM
Parent: #62

الاخ انور

بقترح عليك انزال دوبيت بصوتك عشان الناس تستمتع

بهذا الكم الهايل من الابداع ويعيشوا اصاله الدوبيت

ومجادعتك الاخيره نار الله المويقده

الله يخليك

Post: #64
Title: غنو معاي .... دوبيت الحاردلو
Author: singawi
Date: 05-20-2002, 10:45 PM
Parent: #1

معليش أعيد إرسالها لعدم وضوح اللون

حالي البي يازينوبة حالاً شين
يا زينوبة خاطري كسير وقلبي حزين
يا زينوبـة شهيتيني نـوم العين
حالي البي كمل فرحة الشامتين

مشتاق ليك كتير يالجوة قلبي سكونك
لقياك منيتي وقبلة سعادتي عيونك
شوقك شال منامي وشن حياتي بدونك
حني على الأسير أو حلي قيد مسجونك

Post: #65
Title: Re: غنو معاي .... دوبيت الحاردلو
Author: HAMZA SULIMAN
Date: 05-21-2002, 02:40 PM
Parent: #64

يا سلام عليك اريتك تجمع وكدى اللون تمام

بعد سبعين سنه وبيض سبيب عينى

ما بحسب بساهر من طوارق الغى

شوق زينب ترى خلانى منى ولى

اشكى على الغصون لى من يعرف البى

الزول البريدو يا ريتنى كان ردتو

كل ما ازكروه الحال العلى يبتو

اصل الشتله بتشيل الثمار وتحتو

وانا كلن مته فنجان وانكسر عن ستو

ابشر

Post: #66
Title: Re: غنو معاي .... دوبيت الحاردلو
Author: Elkhawad
Date: 05-21-2002, 04:52 PM
Parent: #65

عمده البيت والضيفان
سلام حداي مداي
وهاكم دي

ياجريعه العسل الشارفه لي رشافكْ
نبهتي قوبنا بالعنجه وبروق كشافكْ
ربنا سمحك كيتاً علي من شافكْ
حرقتينا ياشافعه التحرُّق شافكْ

Post: #67
Title: Re: غنو معاي .... دوبيت الحاردلو
Author: HAMZA SULIMAN
Date: 05-21-2002, 08:00 PM
Parent: #66

الاخ الخواض

دوبيتك نار شاف عديل كدى

ياخى انت فنان

يديك العافيه

Post: #68
Title: Re: غنوا معاى .....دوبيت الحردلو
Author: alwardah
Date: 05-23-2002, 12:15 PM
Parent: #1

بت ناس فاطنه زينب فيها عنقا باهى
شن تشبه برا الفى الناله غريد ساهى
حلفوا الضاقو ليمك فوق كتاب الله
احلى نفيسها مالا الزعفران والشاهى

Post: #69
Title: Re: غنوا معاى .....دوبيت الحردلو
Author: HAMZA SULIMAN
Date: 05-25-2002, 02:20 PM
Parent: #68

شكرا ليك يا ورده دايماعبيرك مدهشنا0

********

فى يوم الجمع دايما رطبها عوالى
ماخده النورة فوق الصفصفو الغربالى
ان ثبتت سيادتك للشباب اجمالى
تحكابها الدول لاعن سراية الوالى

Post: #70
Title: Re: غنوا معاى .....دوبيت الحردلو
Author: HAMZA SULIMAN
Date: 05-25-2002, 08:45 PM
Parent: #69

الناس فى العروض ما تقيسه بى تيبانه

ما يغرك لباسم والعروض عريانه

ديل حراس رزق ذى التكنه امانه

ذى ابل الرحيل شايله السقى وعطشانه

................

انعكس الامر عز الرخيص والعانى

والصح والصريح ما بتلقى ليه معانى

المسكين يضيع بقى ينفع الفرعانى

والظالم نبقى عونه ترى هدى الموجعانى

هذا الدوبيت الاخير لى ود الرضى

عمره 100 عام حيث انه ولد بالعيلفون

عام 1884 وكتب الشعر وعمره 10 سنوات

فحفظ القران فى ام ضبان حيث انه كان يقرا

سوره يس عند كل وضوء

يا ترى لو امد الله فى عمره ماذا كان يكتب

Post: #71
Title: Re: غنوا معاى .....دوبيت الحردلو
Author: alwardah
Date: 05-30-2002, 02:20 PM
Parent: #70

البارح طريت ليمك هوية ليل
مسافتك يا ام رشيم لى ابعدت بلحيل
ال خلى صبيب عينى جلبا سيل
ضوق الكمعه مسخ تافح القنديل

معانى
طريت:زكرته
ليمك:اصلها من لم واجتمع
هوية ليل:نصف الليل
ام رشيم:الجاريه
جلبا:جلب السيل ما يجلبه السيل من زبد
ضوق:ذوق
تافح:التافح من الثغر اليانع

Post: #144
Title: Re: غنوا معاى .....دوبيت الحردلو
Author: ABUKHALID
Date: 11-22-2002, 04:06 AM
Parent: #70

حمزة ده كلام منضوم زى السكسك والسوميت
ما تقطعوا الكلام البنشف ريقنا
طريتونااهلناو البيوت والرواكيب والحليب والبركيب
والعرب المبارين الأْْلبل ده السودان الحاص جدا ولو واحد عايز يتكلم عن الخصوصية يبدأ من هنا ولى فوق

Post: #72
Title: الى يوسف الموصلى (ابو هديل
Author: anwar abu gaidaa
Date: 06-01-2002, 08:47 AM
Parent: #1

عزيزى الاستاذ جوزيف كمايحلو لندادتك؟وليتنى اطول؟اولا شكرا ليك لاكن برضو خليت المسؤلية على ابشر بالخير

مقبل الايام القريبة سوف يكون معك الدوبيت والنميم
المو خمج؟
وكما استغلال براكه
لهذا البوست فى طرح اسئلتة استغل سوانح الفضاءات الحره هذة واهديك
رائعة شيخ شعراء الاغنية السودانية
1884--1982 انه محمد ود الرضى
علها تلامس ذلك الشفيف يوسف؟سمعتها ذات مرة فى بواكير صباى من المرحوم خلف الله حمد قادنى فضولى لسؤاله عن سر استعمال الدلوكه بجانب البنقز ذو العلبتيين المصرى +الطبله فقال لا بد من خناقه؟ادركت هذا المعنى بعد فتره .وعن حوجته كمغنى لتلك الخلفيه الايقاعيه المليئه
اعتقد بعدها ولذات الحوجه اتت العبقريه السودانيه بالعلبه الثالثه فى البنقز وصار البنقز السودانى المميز؟
ارجع بك استاذى الى قصيدة انا فى التمنى انها جديره ان تداعب خيال توزيعك وعلمك وانها ساعه لقلبك؟
ان فى التمنى ديمه هديلى ساجع
ما لقيت لى مغيث ولا لقيت لى مراجع
داير اشوف حبيبى اليوم داك شفتو
رايق دمو ناقع
اسود شعرو حالك اما صفارو فاقع
تتلاصف خدودو لا حجاب لا برقع
يفر خيط بسمه يشبه برقا ليلو هاجع
اقيس الفم بودعه والقى الودع واسع
اقيس الليل بشعرو والقى الفرق شاسع
اشوف لعسو ونواعسو
جل البارى صانع
يرفع ناعساتو ويسبل نظرو واقع
اشوف فى خدو شخصى وفى صدره المصارع
داير اشوفو غافل داير اشوفوجازع
محنن بدون قنله وحدو وتوبو واقع؟؟
يتغطى بسواعدو ويحنو كانه واجع
يتلجى بى مرافقو واطراف المضاجع
ويردد لى نغيما تشتاقلو المسامع
وتلب فوق شفاهو لؤلؤة المدامع
اعاين فيه واضحك اجرى واجيه راجع
متلاعب ليس الا ما موضع مطامع
دى ما بلقاها زولا زى انا صيده ناجع
فى المرة القادمة اكتب لك انا فى التمنى 2
لك الود
ومن حقى اغنى لشعبى
ومن حق الشعب على
لا بى ايدك تمنع قلبى
ولا قلبى كمان بى ايدى

Post: #73
Title: الى يوسف الموصلى (ابو هديل)
Author: anwar abu gaidaa
Date: 06-01-2002, 08:57 AM
Parent: #1

عزيزى الاستاذ يوسف
تحيه عطره
لخطاء تكنيكى ارسلت لك بوسث عن طريق الصديق حمزه تجده فى غنو معاى مسدار الحردلو
لك العتبى واتمنى ان يعود التركييز كما يجب؟
لك الموده
من حقى اغنى لشعبى
ومن حق الشعب على
لا بى ايدك تمنع قلبى
ولا قلبى كمان بى ايدى

Post: #74
Title: Re: الى يوسف الموصلى (ابو هديل)
Author: HAMZA SULIMAN
Date: 06-01-2002, 12:13 PM
Parent: #73

لسه فى دروشتك ده يا ابو منتصر

Post: #75
Title: Deaux Beit
Author: Ahlalawad
Date: 06-01-2002, 01:17 PM
Parent: #1

تحيات طيبة من أهل العوض مخصوصة للاستاذ حمزة وبقية حبات العقد

الاخ عمر مهدي الله يعرس ليك معانا . او يعرس لينا معاك .. فقد أمتعتنا فعلا بهذه الرائعة الجميلة معنى وأداء ، اداء سيف الجامعة أداء متفرد مافي شك

وبهذه المناسبة أنقل قول الشاعر

نحن المابقولونا الخلوق وين جيتو
وتاني بنركب الدرشي البجابد خيطو
نحن عشيرنا ما بنخونو نخرب بيتو
الا عدونا بنعصرو ونطلع زيتو

مع التحية

Post: #76
Title: Re: Deaux Beit
Author: HAMZA SULIMAN
Date: 06-01-2002, 04:49 PM
Parent: #75

اهل العوض اقصد اهل الفرحه

كيف الحال كتر من جديدك

لك الشكر

Post: #77
Title: Re: Deaux Beit
Author: Elmosley
Date: 06-01-2002, 07:59 PM
Parent: #76

عزيزي انور الغريد
محريه فيك الكرامة والكرم وانا في الانتظار
واقتراحك حول انا في التمني مي الميه تمام التمام فهي تنضح
بالشعر الوقع وتموج بالرومانسيه الجزله وانا جاهز

Post: #78
Title: غنو معاى دوبيت الحردلو
Author: anwar abu gaidaa
Date: 06-01-2002, 08:32 PM
Parent: #1

سيد الفرحه سلام
سودانيه سود عاليين الهمم
بنسند الضعيف وما بناكل الرمم
مين زينا؟
جعلى ودنقلاوى وشايقى ايه فايدانى
غير جعلت خلاف خلت اخوى عادانى
ويكفى النيل ابونا والجنس سودانى

قدر ما اقول انوم من نومى
اتب حاس ثانى وحبك ياجميل من الدمع حسانى
للاسى والنويح ريدك دوام حسانى
وحالف ما بسيبك حت كان ابوك حسانى
من حقى اغنى لشعبى
ومن حق الشعب على
لا بى ايدك تمنع قلبى ولا قلبى كمان بى ايدى

Post: #79
Title: Deaux Beit
Author: Ahlalawad
Date: 06-03-2002, 02:23 PM
Parent: #1

أبعدنا الزمان من اللهيجو بشيقنا
عاودنا السهر والنوم بقى مو رفيقنا
لامتين نلاقيهو المنشف ريقنا
ناخد بيعة من كف ايدو نحيي طريقنا

Post: #80
Title: Re
Author: singawi
Date: 06-03-2002, 03:25 PM
Parent: #1

الكمساري صفر والتـرام اتحـرك
طار بيهن تركني على القضيب اتعرك
بهواهن هواهن جوة قلبي اتحرك
غابن مـنـي يالكمساري الله يضرك

الجاغريو

Post: #81
Title: Re: Re
Author: HAMZA SULIMAN
Date: 06-03-2002, 07:36 PM
Parent: #80

ابشر بالخير

انت شيلتو... شيلنى يالقطار

وكتير الفاتم القطار

Post: #82
Title: Re: Re
Author: anwar abu gaidaa
Date: 06-03-2002, 08:25 PM
Parent: #81

يا جريعة العسل الشارقه رشافك
نهبتى قلوبنا بالعنجه وبروق كشافك
ربنا سمحك كيتا على من شافك
حرقتينا يا شافغه التحرق شافك؟
0000000000000000000000000

000000000000000000000000
0000000000000000000000000000
ان شاء الله بركت النبى يغلبوك اردافك
كيه عليكى الدوف المردوم يهدل اكتافك
والشعر امشى زايد ويدوخك عسافك
ويجبروك وتطنطنى من بويخة شافك؟
من
حقى اغنى لشعبى ومن حق الشعب على
لا بى ايدك تمنع قلبى ولا قلبى
كمان بى ايدى
حميد

Post: #83
Title: Re: Re
Author: HAMZA SULIMAN
Date: 06-03-2002, 09:04 PM
Parent: #82

هلا هلا يا ابو غيداء

ما قصرت

Post: #84
Title: Re: Re
Author: Elkhawad
Date: 06-03-2002, 09:17 PM
Parent: #83

جمالاُ غير كلف حكمه رحيم وجليل
وجيهك دارة القمر البضوي الليل
ياريت كان بقيت تحت الصويل ضليل
أو عنبر عزيز او هبهان او هيل

Post: #85
Title: Re
Author: singawi
Date: 06-04-2002, 03:19 AM
Parent: #1

ماهو دخيل بيوت حاشاهو ما بتحشر
ماهو كتير كـلام عسـلا لهيجو مقطر
وماهو قبيح قوام مخلوق طبيعي مضمر
وماهو وراء الغمام مسخ نجوم البندر

تحياتي

Post: #86
Title: Re: Re
Author: HAMZA SULIMAN
Date: 06-04-2002, 10:30 AM
Parent: #85

singawi

عقب

Post: #87
Title: Re
Author: singawi
Date: 06-04-2002, 07:49 PM
Parent: #1

العزيز حمزة

ياخوي طاب المقام في دارك الرحبة دي
همبريب يرد الروح والدوبيت أهله لامين وتامين

دحين هاك دي

الليلة الغـرام حكـم علي سلطانو
ذكرني الحبيـب وشواني بي نيرانو
وين الشال قليبي وساقني في حيرانو
واشوقي الشديـد لي ضمتـو وهمسانو
مجبور القدر حتم علي هجـرانو

الليل الطويل زاد الفراق تعذيبو
جمر الشوق يحرق في حشاي لهيبو
وين الشال قليبي وخلى عندي قليبو
ما بنسى ان نسيت ليلة فراقنا نحيبو
معليش يام خدود الحر بيرضى نصيبو

تحياتي

سنجاوي

Post: #88
Title: Re: Re
Author: Elkhawad
Date: 06-07-2002, 01:48 PM
Parent: #87

اهل الدار عوافي

مانـــــي الفاسد ال بي الكِضبْ بِتنبّـــى

سارح بى العــــُروض لي جارتي ما بدبّى

ياستـــار من نضـم الخشوم والسِبـــــّة

انا اخــو الزينة عند حل الرفيق والضّبـــّة

Post: #89
Title: Re: Re
Author: HAMZA SULIMAN
Date: 06-07-2002, 05:43 PM
Parent: #88

عقب

دوبيت فيه كتير من القيم الاخلاقيه

Post: #90
Title: Re: Re
Author: Elkhawad
Date: 06-12-2002, 07:58 AM
Parent: #89

ابشر شيخ الدار

يقول شيخنا الطيب ود ضحوية، تغمده الله برحمته

الليل أمسى و الـبل حررنو مشيهن
عقبن موية و الجبل أب قرود راجيهن
الخلاني فرض الخمسة ما اقضيهن
رزق الدنيا و المحن البصارع فيهن

Post: #91
Title: Re: Re
Author: HAMZA SULIMAN
Date: 06-12-2002, 11:53 AM
Parent: #90

اخى الفنان الخواض الرائع

لك تحياتى ( فامشوا فى مناكبها وكلوا من رزقهاواليه النشور ) صدق الله

العظيم ....ما تنسى الفروض الخمسه

والطيب ود ضحويه فى فراش المرض ضريح مستشفى السلاح الطبى فى زمنا باكر

كتب اخر ابياته وهى

يوم بنشق عتاميرا بعيده وتيه

ويوم بنداور البكره ونمصره ثديه

يا نفس السواد المتعه كملتيها

ابقى لزومه وقت القرعه وقعت فيها.

Post: #92
Title: Re:
Author: singawi
Date: 06-12-2002, 09:46 PM
Parent: #1

أهل الدار سلام

قدر ما قلت أتوب إبليس يلملم ناسو
يقول لي ما تتوب التابو قبلك خاسو
والعيـش اللذيذ ما تنقطع من كاسو
ما ظني الرسول بالنـار يحرق ناسو

Post: #93
Title: Re: Re:
Author: Elkhawad
Date: 06-22-2002, 01:52 PM
Parent: #92

ناس الدوباي
كيفكم وماكم طيبين وغانمين وسالمين
هاكم دي

لي عمنا عبدالله ود شوراني .. الله يرحمه

جميلا كان مطعم لي البلد والديره
شيل وقافا راحل وروحي ساقا اسيره
ياود شيخنا مشن اليوم ظعاينو دميره
غاب وأتلاشى وولع في فؤادي قميره

Post: #94
Title: Re: Re:
Author: HAMZA SULIMAN
Date: 06-22-2002, 01:59 PM
Parent: #93

هاك دى يا الخواض
قصيبةالتقنت المزروعه فى البلدات
من فوق عنجت ومن تحت الفصوص نيات
وا اسفى على ام بطنا تلت طيات
ام شلاليفا متل فقش الكلى النيات

Post: #95
Title: Re: Re:
Author: Elkhawad
Date: 06-22-2002, 02:18 PM
Parent: #94

اخوي حمزة كلامك ضحكني بي الحيل وفقش الكلاوي دي ما مابتتلحق عاد
علا هاك دي

ْبْت الدُّودرن وردن نوادْر الدُّر
ْودور داره دُور دُرت الدخول ماقدر
ْمتيم ياداري لي تدبيري ادي وادر
ودهْده دهْري دردرني انا عمري ضاع وودرْ

Post: #96
Title: Re: Re:
Author: Elkhawad
Date: 11-07-2002, 02:30 AM
Parent: #95

ياحلوين انا ورقي قافل ومستني الخمسين
نزلو ورقكم سريع قبلي ما اقبضكم

Post: #97
Title: غنوا معاى دوبيت الحاردلو
Author: mohmmed said ahmed
Date: 11-07-2002, 08:51 AM
Parent: #1

الفنان الجميل حمزة انا حلفاوى يعنى الدوبيت شى افهمو شى ما افهمو لكن قدر فهمى باستمتع جدا وهاك دى قدر قدرتى

يانفسى ذليتينى الله يذلك
وديتينى للمابيعرف كتيرك وقل
اتعذرتى والعذر ما كملك
اتوكرتى شوفيلك طريقة تحلك

الشى دا انا ما عارفو حق منو لكنه يصور الحال فى غربه السجم والرماد

Post: #98
Title: Re: غنوا معاى دوبيت الحاردلو
Author: HAMZA SULIMAN
Date: 11-07-2002, 10:10 PM
Parent: #97

يا رايع والله دوبيت جميل للغايه وواصل يا ابو حميد

Post: #99
Title: غنوا معاى دوبيت الحاردلو
Author: mohmmed said ahmed
Date: 11-08-2002, 09:46 AM
Parent: #1

الفنان حمزة والله انا زول حلفاوى يعنى الدوبيت دا شىء افهموا وشىء ما افهموا لكن لمن افهم باستمتع جدا بالصور الجميلة واللغة الحميمية الموحيه واساهم بالابيات دى

يا نفسى ذليتينى الله يذلك
وديتينى للما بعرف كتيرك وقلك
اتعذرتى والعذر ما كملك اتوكرتى
اتوكرتى شوفيلك طريقة تحلك

ما عارف الابيات لمنو لكن تصور الحال فى بلاد الغربة

Post: #100
Title: Re: غنوا معاى دوبيت الحاردلو
Author: Tumadir
Date: 11-08-2002, 11:21 AM
Parent: #99

كل ما قت اتوب من البنات وانساهن
عقلى يفرنى
وجوه المنام اطراهن
بى ردحيياً يسونوا الصبح بتناهن
هن ما بتنسن، هن ما بتنسن
وانا ما بخلى غنـــــــاهن

انا طبعا ما شغلتى بتناهن لكن قلت نتشبه بالعارفين

Post: #101
Title: غنوا معاى دوبيت الحاردلو
Author: mohmmed said ahmed
Date: 11-08-2002, 11:44 AM
Parent: #1

فى الصميم ياتماضر وهل يمكن ان تقرا البنات الاولاد والصبيان او الجنيات

يا خالق الوجود انا قلبى كاتم سرو
وما لقيت من يدرك المعنى بيهو ابرو
بهمة منصح الوادى المخدر درو
قعدت قابى تطوى وكل ساعة تفرو

Post: #102
Title: غنوا معاى دوبيت الحاردلو
Author: mohmmed said ahmed
Date: 11-08-2002, 11:44 AM
Parent: #1

فى الصميم ياتماضر وهل يمكن ان تقرا البنات الاولاد والصبيان او الجنيات

يا خالق الوجود انا قلبى كاتم سرو
وما لقيت من يدرك المعنى بيهو ابرو
بهمة منصح الوادى المخدر درو
قعدت قابى تطوى وكل ساعة تفرو

Post: #103
Title: Re: غنوا معاى دوبيت الحاردلو
Author: Tumadir
Date: 11-08-2002, 11:52 AM
Parent: #102

اريل شام شروق
شراكى ما نشابك
وشم نفسك يفوق
مسك العشارى الشابك

عشبة بان قسى، المى فريك نقادة
وارضو البان قسى ديسها المضلم قادة

....

الله يديك العافية ياود سيداحمد، دفرة

جديات العسين قالن لى احمى رهودنا
عن اسد الشرى وامنع ضوارى فهودنا
قالن لى
لو تحفظ مواثيقنا وتراعى عهودنا
تتوسد غدايرنا
وتنام
فى
نهودنا

Post: #104
Title: Re: غنوا معاى .....دوبيت الحردلو
Author: Faisal Salih
Date: 11-08-2002, 06:34 PM
Parent: #1

البارح أنا وقصبة مدالق السيل
فى ونسة وضحك لامن قسمنا الليل
وقتين النعام إدردقنبو الخيل
هى لا بخلت ولا جادت على بالحيل
الحاردلو
النعام والخيل: مجموعات من النجوم يعرفها أهل البادية ويستعينون بها فى سفرهم

Post: #105
Title: Re: غنوا معاى .....دوبيت الحردلو
Author: anwar abu gaidaa
Date: 11-08-2002, 11:06 PM
Parent: #104

امدرمان سلام يا العاصمه الغربيه
امدرمان جمال جيلك ازانى ازيه
وانا قلبى نسيتو فى صينية البلديه؟

Post: #106
Title: Re: غنوا معاى .....دوبيت الحردلو
Author: bit-alkhaleel
Date: 11-11-2002, 08:41 PM
Parent: #1

حمــزة سليــمان وبقيــة العقــد الفــريد أبدعتوا والله
وهاكــم

واوحيحــي وواجع قلبــي
من صيــدة القنص الفتــرت كلبي
القــاري العلم من دينو بتســلبي
والماشــي الحجاز من جــدة بتقلبــي

Post: #110
Title: Re: غنوا معاى .....دوبيت الحردلو
Author: HAMZA SULIMAN
Date: 11-16-2002, 06:10 PM
Parent: #106

يا بت الخليل
من امضاءك روحك متاريفه تعيشى فى زمن الحضاره ولا يهمك
المهم الدواخل التى ما زالت اصيله
وواصلى

Post: #111
Title: Re: غنوا معاى .....دوبيت الحردلو
Author: HAMZA SULIMAN
Date: 11-16-2002, 06:12 PM
Parent: #110

سيداتى سادتى
اقدم لكم الفنان الشعبى الكبير
تماضر شيخ الدين

Post: #107
Title: Re: غنوا معاى .....دوبيت الحردلو
Author: Soumeta
Date: 11-12-2002, 06:58 PM
Parent: #1

دي من جميلات الحردلو القديمه البايته بي كل الجديد،،،
حمزة،،،،، تسلم يا عشا البايتات
أها خليتكم في وداعتو،،
سوميتا
***************
تقول لِى شنو
وتقولى لِى منو ،
أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..
بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا
تقول لِى شنو
وتقول لِى منو ،
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،
تقول لِى شنو
وتقول لِى منو ،
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور
تقول لِى شنو
وتقول لِى منو ،
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
تقولى لِى شنو
وتقولى لِى منو ،
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،
ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،
تقول لِى شنو
وتقول لِى منو ،
ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ ،
تقول لِى شنو
وتقول لِى منو ،
ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ
تقولى لِى شنو
وتقول لِى منو ،
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول
تقولى لى شنو
وتقول لى منو ،
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،
ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى الواطه ..رُقَابه ،
تقولى لِى شنو
وتقولى لِى منو ،
ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،
تقولى لِى شنو
وتقول لِى منو ،
ونحن الدوكه
والضُلاله ، والدونكه ،
ونحن الدانقه ،
والراكوبه ، والواطه ،
ونحن الفَكَه
والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،
تقول لِى شنو
وتقول لِى منو ،
ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،
أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
تقول لِى شنو
وتقول لِى منو ،
وأما عجيبْ
وأما غريبْ ،
وأقيف لسعْ
وأقيف .. وأسمعْ ،
أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو ،

Post: #108
Title: Re: غنوا معاى .....دوبيت الحردلو
Author: بكرى ابوبكر
Date: 11-14-2002, 04:20 AM
Parent: #107

test

Post: #109
Title: Re: غنوا معاى .....دوبيت الحردلو
Author: HAMZA SULIMAN
Date: 11-16-2002, 06:04 PM
Parent: #107

يا سوميتا ابشرى بالخير
وبالحيل

Post: #112
Title: Re: غنوا معاى .....دوبيت الحردلو
Author: ود شاموق
Date: 11-17-2002, 02:00 PM
Parent: #1

قال ود ضحوية

الناس العلي الساحر بشقوا الصي
أمسوا الليلة فوق راياً نجيض ما ني
ناس أب ترمة جاموس النحاس أب دي
عقدوا الشورة ميعادن جبال كربي

Post: #113
Title: Re: غنوا معاى .....دوبيت الحردلو
Author: ود شاموق
Date: 11-17-2002, 02:09 PM
Parent: #1

هذه المرثية هي حقيقة أجمل ما قرأت من مراثي، ووالله ما أظننت أحداً يرثى بمثلها، إنها حقاً مرثية، كتب كلماتها ود البنا في رثاء شيخ العرب حسان أب عاقلة أب سن

,مفقود يا خَرِيفْ دَارْنَا ال... بمِهل النَّجعة
ببكي عليك بكاياً فِيه كمِيَّن وجَعة
آخرهن فُراقاً لا خبَر لا رجْعة
وأولهِن رحِيلاً سَيتُو مِننا فَجْعَة
* * *
ببكِي عليك بُكاياً في ضَمايري جرُوحُو
بي حُزناً كتير غَلَبَن لِسَاني شروحو
درَّاج الضَّعيف ال... خيرُو مُو دُوب رُوحو
مَفقودَاً بشاشُولُو الضُعَاف وبنُوحُو
***
ود أبْ سن وكاملَ الحِن رَحَل فَارقْنَا
ماهل الدَّار وراحة الجار ، رحيلو حَرَقنَا
قَمر اللِّيل ، وصَمَد الخيل ،كفوفو دَرَقنا
مُونَتنَا وخَريف عَامُنا العَليهُو مَرَقْنا
* * *
تبكي عَليهُو أرض أجدادُو تبكي بَطاينُو
يبكي عليهُو جُوُداً مِنْ جِدُودُو مداينُو
ببكيهُ العَشِير ال..كَابِي فوقُو وصَايْنُو
ببكوهُ الضُّعَاف ال.. لي بَشَايرُو بعاينُو
****
ببكنُّو الصِّدِي ال.. فوقهِن حَديدهِن شَكْ
ببكنُّو السِّيُوف ال..ضَرِبَهن لا شَك
ببكيهُ القُطَابي ال.. فُوق مَجسَّفُو رَك
تَبكي بُطَانْة ابُوه ال.. مَا اندنت لي مك
* * *
فَارِس الصَّف ، وطاهر الكَف خبارُو اللَّيلة
ما لاقَانَا بِتبسمْ لَزوم الشيلَة
أبكن يا البُروق كُبَّن دُمُوعكَن سيْلة
رَقَد ال.. بسنِد الهَاكعَة وبِعَادْلَ الميلَة
***
رَقَدْ ال..مَسمِي فوق جَد جدو فُوق حَسَّان
وَدْ ال..لي مَحافل أُمَّات دِرُوع عِرسانْ
رَقَدْ ال.. في النَّشيد فايق علي حَسَّان
رقدْ ال .. وصَفُو في قُصر الكَلام إنسان
* * *
تبكي عليك بُطانتَك بالبروق ال.. لَحَّنْ
ويبكنَّك نَقَاقِير الِجِدود ال.. قحَّنْ
يبكنَّك سيوفاً يُوم طَنَاهِن صَحَّنْ
يبكُوك الضُّعاف وَكتْ المواجيد شَحَّنْ
****
يا فَارسَ النَّقَاقِير ال.. مَحَنضَل رُوزَكْ
الخَيل رَوَّقن يوم مَعركِيبهِن فَوزَكْ
ببكنَّك ودَيَّن كُلَّهِن في حُوزَكْ
ببكيك أبْ علي الجَدْ ال.. عَلَيهُ ركُوزَكْ
* * *
وافر الكَيل،وتِلَب الشيْل وخير العامَّة
صادق القُول ، ومينةَ العُول، ونُوم الهَامَّة
حليلْ حَسَّان حليل ذَاتُو ونَفَايلُو التَّامَّة
حَلحَال عُقدة الحجن الورَاهِنْ طامَّة
****
ما تَبكيهُ يا عَينْ بالدِّمُوع وخلاس
ابكي الدَّم على ال ..شَلَبي وسَخي وْوَد نَاسْ
خيراً عِندو ما كنَّاه للخُنَّاس
مُشرَع للضُّعَاف من كافَّة الأجناس
* * *
سَرَف القَيفْ ، وبَطَر الضِّيف ، ووارْث ابْواتُو
تَامَّ الكَيف ، ونِيل الهَيف ، خريف أوكَاتُو
زايلَة وهَلاَّ يا حليلُو ال.. نَبيهَة صِِفاتُو
يا حليلُو ال ... بِعيش مَرمِي القبيلَة شتاتُو
****
بِبكُوا الناس عَلى النَّاس بالدِّموعْ الجَاريَة
ويبكنَّك نَفَايلاً للمَكَارِم حَارْية
مَغبُونْ السحَابْ تكتُل بِروقُو الفارْية
هَادِي دمُوعُو نَزَلتْ فوقْ بُطانتك سَاريَة
* * *
يبكيك أب علي وحَسَّان ولا كاكُوم
ويتْرزَّم نحاس اجدادَك المَعَلُوم
يا المهَل ال... على ضَهَرُو الولايا تنوم
يبكنَّك خُيولَك عْْْْْْنْ مَلاقِي القُوم ?
* * *
يبكنَّك سِيوف أجدادك القطَّاع
ويبكيك أب عَلي ال..صَدَّ الهَمج مَا طاع
جَنسك مُو مَلَمْلِم بُرقة مُو لُطّاع
نُور في نُور كواكبَك كُلهِن سُطَّاع
****
يبكنَّك نقاقِير القَبيلة ال.. رَزّنْ
?يبكنك سِيوفاً فوق نحاسك هَزَّنْ
?تبكيك الخيول يُوم الرُّقاب ينجزّنْ
?يبكنَّك بطاينَا بي مِطُورهِن عزَّنْ
***
يبكيك الكَرم وايضاً فعايل السَّمْتَة
يبكنَّك همايلاً بي لِزومهِن قُمتَ
ما قَفَّلت بَابَك مِن مِجاورَك ونمتَ
شِلت الشيلْ مَطَبقْ ، للعشير مَا لمتَ
* * *
لا قاني القُطابي ، وقال حَلَفت قَسَمتَ
طرْ في الجو على سَابع القبايل حُمتَ
رَحلوا ال..بشبعُونِي وبي قفاهُم صُمتَ
فاتُو وماتُو هَجُواتي الكِتالِهُن غَمتَه
***
لا قاني القُطابي ، وقال لِي طِر في جَوِّي
حُمتَ وعُمتَ ما لِقيتْ مِنْ وَقَع في هَوِّي
الدُّغُم الكتالهُن بالحديد القوِّي
وكت اتنقُّو مِينْ تَاني ال..بجيبني مخوِّي
* * *
في ودَاعة الله ياحسّان حَسين الخلَّة
نَعَشَك مِنُو فوق أرض الجِنان تَدلي
عَاشرتَك سِنين عُمرَك مِنَافِي الذَّلة
رَادمُو عَلى قَفاك حمل الضَّعيف الكَلَّ
****
مَاكْ دُخرِي بَرَاي ، دخري ال..رَقَد مَغَلُوب
حِملَك شِلتُو جَاهِل مِنُو جاضَّة تلُوب
لاك شَكَّاي ولاك حَكاي ولاك مسْلوب
يا لبَنْ النَّخيبَة ال..للضُيوف مَحَلُوب ?
* * *
يَا اللَّدِر ال.. بَرَزِّم فِي الرضِيمَة أم شُوكْ
مالَهُنْ هِملوا مِنْ امِس اليتَامَى ال..جُوكْ
بتلفت وأعاين لَك وأقول لك غُوكْ
بسَمَع حِسَّي رايِح كُلُّو أُوك فِي أُوكْ
****
جِيتي زيارة فِي البَلَد البَعِيدْ طَلَّيتنِي
شَرَّف قَدري فوق عُليا النِجوُم علَّيتني
مُو خايل عليك يَاود أبُوي خليتني
لي حُزنَاً ببالِيني الدِّهُور وليتني
* * *
كَبدي مَعَلقابَكْ يا صَدِيق شبَّانِي
أولادَك جَنَاي وكلَّكُم حِبَّانِي
وُدَّاً من قديم طَوَّل بَنَاهُ البَانِي
بَتكَرَّفْ نَسيمكُم طِيبُو مَابَغَبَانِي
* * *
وُدَّاً فِي الضَّمير سَاكِن مُقِيم مُو مُبَارِح
خُوَّة وعُشرَة مِن زمَن الشَّبَاب السَّارِح
بَتَذّكر حَديثي معَاك تَقُول البَارِح
وعَينَي بذرِفن دَمْعَ الفُراق الجارِح
****
جِيتنِي زيارة في البَلَد البَعيدْ في الغُربة
بَرَّيتني ورَعَيت حَق الوِِدَاد والقُربَى
كَبدي مِن اليقين تالاكَ بقت مِنْخربَة
وعْدَك لي خَلفَتُو ، وشِلتَ مِنَّي التُّرْبَة
****
حُزنِي عَليك مَسرمَد لاهُ يُوم لاَ لَيلَة
فِيك عَزَّيتهَا نَفْسِ وفيك بعَزيْ قَبيلَة
حَدْ مَا البَرق يسُوق فُوق البَطَايِن نِيلة
تغَرَق عينِي دماع الغبينة يكِيلا
* * *
حُزنِي عَليك مَسرمَد ماه حُزنَاً دُوُنْ
حُزناً عمَّ مِنْ نَاس بيلا لا سِيدونْ
مِنْ عَاديكنا لا كَسَلا أُم جُبالاً كُونْ
الله يعزِي شُكريتَك مَحَل مَا تكُونْ
****
أصلها فَانَية والمُوت فيها ماهُ غَرِيبَة
لا بدُّور مَسَبب لا بِتكوسلُو ضَرِيبَة
سَمُّوها ام قِدود القَايسين تجريبَة
بتِّم العَمِيرة وتمشِي في تخرِيبه
* * *
لا عِنْد ال..بثكَّل فِي سمَاهُ يَحلِّقْ
لا بُد ليهُ يُوماً فِيه عُمرُو يغلِّقْ
مَلَك المُوت بِتبْ حَالِف عَليهُ مطَلِّق
ياخْد الرُوح ويرمِيهُ البَدَن مِطلِّق
****
أبْ رَسْوَة البنترِّ في رَضيمُو وكِرِّو
رِعْيان الحَلال هَابُوهُ مِنُّو انَصرُّو
ملك الموت بُجيهو غير يشاورو بضرو
يا كلُو الطيرْ وعَضَّامُو الحَصَيني يجُرُّو
* * *
جامُوساً بنفج الصُومَعيِّة ويسَرِّح
حَابس أمَّات عِجُولُو وللكتَّال متقرِّح
يجيهُو المُوت نِهاراً قايله مَاهُ تبرِّح
فوق عَضَّامُو جَقدُول والحِصينِي بَمرِّحْ
****
دمَّارة المِلوك الدِنيا مي دار فَايدَة
حَد مَا اتقدَمَت لا بُد بتعَكِس عَايدة
غَبَّارة الرَّجَال سِتْ الفعال الكَايدَة
لا خلَّـت بَليد لا سِيد نَبَاهةً زَايْدَة
* * *
ما تَحدِّثني بيها الدُّنيا شِن معَنَاهَا
خَربَانة ومشَّلَّع يا فَهيم مَبْنَاهَا
مَهمَا تمتعَك ليك الفِرُوع تََحناهَا
لا بُد ليها يُوماً منك بتَاخدُو طَنَاهَا
*****
أصلها فانية خربَانة وبِنَاهَا مَهَدَّم
كسَّارة وعكُوس بِتصدِ بَعَد تتقَدَّم
مفقود العلي ضَهَرو الحِمِل بتردَّم
وحَكم السِّيد مُطَاعْ نَرضاهُ مَا بِتنَدَّم
* * *
حاتِم والسَّمَوْءل ومُعْتَصِم واخوَانهُن م
بركَة نَاسْ ابُوهُن، تَبقَى في ديوانهُن م
تعمر دَار أبُوهُن ويَبقَى زاهِي أوانْهُن م
وأيَّام الدَّهر يبقن جميع أعوانهُن م

Post: #114
Title: Re: غنوا معاى .....دوبيت الحردلو
Author: ود شاموق
Date: 11-18-2002, 09:46 PM
Parent: #1

قال ود ضحوية

الليلة النفس صبحت حزينة وعامدة
وما بتسلى بي برقع حميدة وحامدة
فارقنا الرباعة أبان قلوباً جامدة
ناس طه اللحو ضو القبيلة الخامدة

وقال أيضاً

الدرب البجيب كمش النقود موهين
وما بمشيهو ديك بيتو اب جليدا لين
الولد البيقوم من أم حمد مدين
غصبا عنو ياالساحر يسوقن بين

Post: #115
Title: Re: غنوا معاى .....دوبيت الحردلو
Author: HAMZA SULIMAN
Date: 11-18-2002, 09:58 PM
Parent: #114

يا ود شاموق
يا اريل شام شروق
والله كيفتنى بالحيل
والمرثيه فى غايه الجمال
وجديده على حقيقى
ويا خى عقب عقب
واهلا بيك وسهلا

Post: #116
Title: Re: غنوا معاى .....دوبيت الحردلو
Author: ود شاموق
Date: 11-18-2002, 10:26 PM
Parent: #115

يا ود سليمان
شراكي ما نشابك
وشم نفسك بيفوق
مسك العشاري الشابك
لك التحية

Post: #118
Title: Re: غنوا معاى .....دوبيت الحردلو
Author: HAMZA SULIMAN
Date: 11-18-2002, 10:39 PM
Parent: #116

هاك يا ود شاموق 00000

لاقانى الظبا مارق على اخياتو
محزحز بى دروعه وبى شموع طياتو
شافنى ولبد اندس فى ادياتو
كيه على رصعتى بطبنجياتو

Post: #119
Title: Re: غنوا معاى .....دوبيت الحردلو
Author: ود شاموق
Date: 11-18-2002, 10:52 PM
Parent: #118

وهاك دي يا ود سليمان

الليلة الصعيد نفض السحاب غدارو
ذكرني الحبيب الليا مقطعات أخبارو
بتابع في سهيل حد ما توقفت أسفارو
زي فاقد الوحيد الفرا نوم أبصارو

الهمباتي

Post: #120
Title: Re: غنوا معاى .....دوبيت الحردلو
Author: HAMZA SULIMAN
Date: 11-18-2002, 11:05 PM
Parent: #119

هاك يا الحبيب

من عوج الوكت ما بتركن وانساهن
فوق حيا فوق محل دايما بجر غناهن
ناس ابن الزريح ضربوا المثل بى جناهن
من كل السوام سيدى الحسن يبراهن

Post: #121
Title: Re: غنوا معاى .....دوبيت الحردلو
Author: ود شاموق
Date: 11-18-2002, 11:06 PM
Parent: #119

ودي لي ناس البوست

وكتن تعزموا الضيفان تحلوا القول
سوقو لهم بكاراً من مراح تمبول
يا ناس الله وينكم ما ني شايف زول
هسع جوا داركم لي قريب من حول

Post: #117
Title: Re: غنوا معاى .....دوبيت الحردلو
Author: ود شاموق
Date: 11-18-2002, 10:31 PM
Parent: #1

وهاك دا الرابط بتاع المناحة بصوت الشاعر أحمد البناء

http://home.attbi.com/~mabusin/Complete/InFathersMemory_files/default.htm

Post: #122
Title: Re: غنوا معاى .....دوبيت الحردلو
Author: ابو يسرا
Date: 11-18-2002, 11:24 PM
Parent: #117

لاخ حمزة بصراحة البوست جميل للغاية
اهديك هذا اللحن الجميل

Post: #123
Title: Re: غنوا معاى .....دوبيت الحردلو
Author: ابو يسرا
Date: 11-18-2002, 11:25 PM
Parent: #117

لاخ حمزة بصراحة البوست جميل للغاية
اهديك هذا اللحن الجميل
http://www.m-huether.de/ram/kamb10.ram

Post: #124
Title: Re: غنوا معاى .....دوبيت الحردلو
Author: HAMZA SULIMAN
Date: 11-19-2002, 11:04 PM
Parent: #123

الاخ ابو يسرا
كيف الحال
شكرا لى الاهداء
واتوقع مجادعتك
ويلا دوبى

Post: #125
Title: Re: غنوا معاى .....دوبيت الحردلو
Author: Soumeta
Date: 11-20-2002, 05:16 AM
Parent: #1

حمزه و ود شاموق عليكم الله كان ما واصلتو،، حقيقي مستمتعه بي ردودكم لي بعض النبي عاد كان تقيفو،، أها خسمتكم،،
سوميتا

Post: #126
Title: Re: غنوا معاى .....دوبيت الحردلو
Author: ود شاموق
Date: 11-20-2002, 05:56 AM
Parent: #1

جدا يا سوميتا هاك يا ود سليمان

الليلة طيف الريل حماني الهجعة
من فد نظرة نساني القصيد والسجعة
بي سهم الرميش فقدني درب الرجعة
لي كحل الطريف سالت عيوني الدمعة

في رجاك

Post: #127
Title: Re: غنوا معاى .....دوبيت الحردلو
Author: ود شاموق
Date: 11-20-2002, 04:43 PM
Parent: #1

يا ود سليمان طولن غيباتك
حن علينا أدينا من أوكاتك
لو كنتا مشغول خلصن شغلاتك
يا سمح النضم سمعنا أبياتك

Post: #128
Title: Re: غنوا معاى .....دوبيت الحردلو
Author: ود شاموق
Date: 11-20-2002, 05:55 PM
Parent: #1

وهاك دي جديدة

من منام الميل شبعن عيوني كفاهن
زادن نجوم الليل نجماًً جديد بحداهن
ياللدر اللحو الديمة حامي حماهن
كيفن عيون الصيد تقدر تفوت تنساهن

عاد بعد دا اتلومتا

Post: #129
Title: Re: غنوا معاى .....دوبيت الحردلو
Author: HAMZA SULIMAN
Date: 11-20-2002, 10:06 PM
Parent: #128

يا ود شاموق

شكرا لك يا اصيل ويا حساس
وبجييييييييييك اسى س س س س

Post: #130
Title: Re: غنوا معاى .....دوبيت الحردلو
Author: HAMZA SULIMAN
Date: 11-20-2002, 10:28 PM
Parent: #129

هاك يا ود شاموق
عمر البنا

ماحت بالصدود قلبى وحشاى ذوابه
زى صيدة الخلا المن الرصدهوابه
وسط القامه مقسومه وضميرها هوابه
تتبختر ابت ما ترد على جوابه

Post: #131
Title: Re: غنوا معاى .....دوبيت الحردلو
Author: ود شاموق
Date: 11-20-2002, 11:20 PM
Parent: #1

يا ود سليمان المقسوم من الله حبابه
كان سمح كان شين نفسي راح ترضابه
كان فرت أريل الصيد صيادي ما نشابه
وكان قدر الله الصيد نفسي تتهنابه

Post: #132
Title: Re: غنوا معاى .....دوبيت الحردلو
Author: HAMZA SULIMAN
Date: 11-20-2002, 11:38 PM
Parent: #131

يا ود شاموق

نيران الصدود لازلت اتكوابه
وانوار الخدود ليل هجرى ما ضوابه
يلعب قلبى زى هبابه تتهوابه
مقنيه الضرى البى الحله ما لوابه

Post: #133
Title: Re: غنوا معاى .....دوبيت الحردلو
Author: ود شاموق
Date: 11-20-2002, 11:51 PM
Parent: #132

المابيرضى بيك ياحمزه ما ترضابه
بعد الكبر يدخل تبقى النفس توابه
صوم وحج البيت جاور النبي وعن بابه
وصلي آخر الليل الدنيا ديه خرابه

Post: #134
Title: Re: غنوا معاى .....دوبيت الحردلو
Author: HAMZA SULIMAN
Date: 11-21-2002, 00:08 AM
Parent: #133

يا ود شاموق
وين السلمه وين 000 0000

والله ضحكتنى ياخى انت رائع

هاك
يا ود شاموق حليفه العفه الدايما ملازمه صوابك
ومستوره القناع الخايفه من توابك
اصلها من نشت ما اجتازت البوابك
يلا انظر خدوده والنسمع استجوابك

Post: #135
Title: Re: غنوا معاى .....دوبيت الحردلو
Author: ود شاموق
Date: 11-21-2002, 00:19 AM
Parent: #134

ود سليمان يامراحب يا حبيبي حبابك
رجعتا في قولي وخليكا بين أحبابك
النبي والصيام والحج ماهم اكيد طلابك
عيون الصيد بتزعل كان أذاها غيابك

Post: #136
Title: Re: غنوا معاى .....دوبيت الحردلو
Author: HAMZA SULIMAN
Date: 11-21-2002, 00:26 AM
Parent: #135

لا اله الا الله محمد رسول الله

Post: #137
Title: Re: غنوا معاى .....دوبيت الحردلو
Author: ود شاموق
Date: 11-21-2002, 00:31 AM
Parent: #136

Post: #138
Title: Re: غنوا معاى .....دوبيت الحردلو
Author: ود شاموق
Date: 11-21-2002, 02:16 AM
Parent: #136

ما تزعل، هاك دي من شانك

ياحمزة الكريم القرشو ما اتلما
الوارث الجدود، لي فضلهم تما
من قومة الجهل، في بيتو ما انجما
دراج الهموم، داب نفسو ما اهتما

جيهتك انشاء الله

Post: #140
Title: Re: غنوا معاى .....دوبيت الحردلو
Author: HAMZA SULIMAN
Date: 11-21-2002, 11:30 AM
Parent: #138

ابشر بالخير يا ود شاموق

Post: #139
Title: Re: غنوا معاى .....دوبيت الحردلو
Author: Shinteer
Date: 11-21-2002, 07:02 AM
Parent: #1

كتيوي أب سنبل العنف الدرُُع بي لبّو
كوعو شريت و محجمو لا المضابح كبو
تب الندوتين الصافي رايق صبو
مايق الدوّر القطبي المنور حبّو

يا قارح الدواوير الملوح برقك
في ابو صريصري تلب و انسند بك طرقك
راسك قلو وقّل في كواكب شرقك
و رانفي قوللو جاورت ام لهيب بتحرقك

Post: #141
Title: Re: غنوا معاى .....دوبيت الحردلو
Author: ابو يسرا
Date: 11-21-2002, 03:08 PM
Parent: #139

تأليف ابراهيم العبادى

طه: أخوك يا ريّة أخوك وقت الخيول يدبكن

اخوك يا ريّة أخوك وقت الرماح يشبكن

أخوك جبل الثبات وقت القواسى يتحبكن

كم بكيت وكــم قشيت دمـوع الببكن

ريّه: وراك أسـود علىّ ما نمت أسـع طيب

طه: ها بسم الله قـــولى أخــوك طيب

وشديد وحاضـر وقلبوُ ماهـو مغـيب

إلا الشفتو فى النـوم من هوايلو اشيب

*******

الزول فى الصُحى مهضوم عليه شقاهو

وإن غمد شويه تجى الهموم لحقــاهو

الصف أب لؤيس أنا ما بخاف لقيـاهو

يا ريت الحلم فى صحاي كان بلقـاهو

******

كان خير ولو شر برجاه ما بهـم بـالى

وحارثنى الثبات من الكبـار قُبّـــالى

وقت حســع حسيت وشفتك قاعدة قِبَالى

إن إتلخبط الكـون تـانى مـانى مبـالى

ريّه: كعب نوم النهار أمس العصير كنت نايمه

رأيت قدام فريقن اشوف صقـوراً حايمه

كبير غـار على من نـوم تبين غـايمه

صحيت مهجومه لا مفصل ولا فينى قايمه

طه: إنتى كمان رأيتى صقور

(هنا يشعر طه ان حلمهم مع بعض)

علامة كافيه ظنيت الحكايه قريبه

هاك من الصحيح الما بتدخلو الريبه

هذه الحله بعينىّ أشوف تخريبه

دحين يا اختى يلاك لأرض الجعلين نعيش

هناك باقى حياتنا معاهم

( هنا ريّه قنبت تبكى)

طه: ما بفيد البكى وكلامى احسن تنسى

ريّه: كيف ما ببكى كيف افوت مراتع انسى

افقد كل شىء عزء ورجالى وجنسى

تطلق فوقى ناراً عقباً تقولى أنسى

************

ما ببكى الفريق ببكى الرجال قُبالو

شن طعم الفريق ما بيوت شُقاق وحبال

خرابُُ انت حين ما بمر بالبال

إلا يقع قتالا بعده نلقى وبال

طه: هاْ فأل الخير أخير ما شفنا شيتن جَتَ

كل الشفنا احلام فى طريقَ اتعدت

قبل الليله بيدى حمان قط ما ندت

مانهدم شرفنا لو السماء انهدت

ريّه: ورينى الحلم التورك مذهول

طه: اصبرى لىّ أروق عقد الفكر ممهول

احكيلك شنو الشفتو والله مخول

شفت الوحده..وشفت النار وشفت الهول

احيلك تمام الشفتو ما بتغابه

جاين العصير أنا وانت من الغابه

سايقه ليك بهم قدامك برقابه

بين والفريق اتولعت التقابه

قدر ما نشوف بعيد قدّامن نلقى حريق

وقت النار علت ما شفن تانى فريق

باصرن المروق مالقين لينا طريق

تشكى من العطش واخوك يابس ريق

فترتى قعدتى وانا محتار جلست حداك

حاقب الدركه ختيت سيفى فوق أوراك

وقت بِعد البهم دا كسحتى انتى براك

كسحتى وجيتى ومعاك كور صقور تبراك

تبيت بعجل شافنى جفلن وطارن

غابن من عيونى فى اللعوت إضارن

ما غابت كتير جن إقدلن يتبارن

قدامهم كبيرن عيننى وغارن

سلّ سيف لاقاهم اخوك يالضامرة

تور غنز ام هشيم الفى المجامع دامرة

سيل تلا واندفق فوق السحابه الهامره

حجر الصاقعه فرتاق الصفوف العامره

بادرنى الكبير ، ديلك استعدن وقفن

مامهلتو طار راسو وجناحيه يرفّن

طاراً ديلك وقت بريشو رقد إتكفن

ريّه: عارض ومات الليله يمكن عفّن

طه: نحمد ربنا اليله مات عارضنا

وان كان عمرو طال يا ريّه كان قارضنا

يلحقو بعجل ديش همنا المارضنا

انبدا زواجنا بكرة منو البجى يعارضنا

بطال البعيش فى الدنيا اصلو مناهو

إن كان مالو راح غير اهلو مومدناهو

سمح الفوق اساس ابواتُ تّم بناهو

والزول دون قبيلةُ مناهو شن معناهو

ما بنفرح بمال ونقول كفانا ورثنا

نفخر بالرجال فى الحارة يبقوا ترسنا

نجمع ناسن هيلنا من الكبار حارسنا

يحضروا اهلنا فرحانين يباهوا عرسنا

كل بطحانى يفرح بعرسنا مناهو

ساعت جمعتهم بيتنا بنتم بناهو

عزاب عيش يا ريّه مرض مناهو

سمح الزول حبيبى يلد ويربى جناهو

(كان والدها لم يتم السنه عايزاه كلام ذى دا لا يذكره حكايه العرس)

ريّه : دا الأعوج ترا والشين نهاية حدّو

وان شاع دا الخبر يمل الفريق لآ حدو

يقولو اب كبس من دخل ودّ جدو

فرحوا وعرسوا لا من حزن ولا جدو

وان كان فى الفريق ماتت مرّيه ذليله

للحول يرفعوا العرس البختُ الليله

خليه أب كيس راس الرجال وقليه

لو كان بيقيله تعد تبقى قليله

خليه الكلام وعرسنا سيد الحال

من بالك أمرقُ محال والف محال

على ميتت أبوى الليله حول ما حال

نصبح بكرة ونسه ونشب بشاتين حال

طه: هأ الموت موشمت غايت البفوت والببرو

والجد والحزن ما جابو زول من قبلو

الزول فى الشدايد اول يلزم صبرو

بترج الكريم مولاه كسرو يجبرو

بنخاطر من الوجعه هيلنا برانا

نحن اهل المصاب الناس لُزم جابرانا

فى آخر المراح دايما تجى الفترانا

عات الحد ندوسه الناس عقب تبرانا

ريّه : الناس بالمكارم والفعال تتباها

وينشأ الزول فطرة حسب مرباهو

عادت جِدُ عادتو ومثل أباه نباهو

يلبس توب قبيلتو ان دار والله اباهو

من الليله حول نقضيه تانى اتكلم

الداير يتم رب العباد ان سلم

طه: تانى انا أقضى حول وانا بالحسار أتالم

علىّ حكمك صعب أنا قابلو ما بظلّم

لكن مشيتى للسنه قاسيه وصعبت علينا

ريّه: تمّ الاتفاق من الكلام خلينا

زي عادت البلد لازدنا لا قلينا

إنشاء الله السنه بخير عايده علينا

يا طه البهم قاربن راجوعت الراح

بنات واولاد هديل ناس فريقن الراح

تصبح سمعتها من الكبار الراح

قالوا العربى ما بنعز كما مراح

(هنا تخرج ريه ماشه ويظل طه يعاين ليها ويقول)

طه: آه يا ريت السعادة ان كان بقت بديه

كنت اعيش هنى فى الدنيا بالزنديه

علىّ حكمُ ناس الفيّ طلبوا الدِيه

الموت بالعطش والمويه بين إيدِيّه

ريّه علىّ قاسيه وجايرة فى التفنين

آه يا ربى أرحم صدرى أنس ضنين

يمحق دى السنه ربى الحليم وحنين

يخصم من حياتى رضيت بعشرة سنين

كيف أهن واعيش وانا صبرى ولاّ مودع

وسبب الدخرج المن مامتور مفدّع

جنيت وجنى جنّ وحالى اصلُ مبدّع

اهج فى الجيش اهج فاضلى تانى أجدع

( قامت ماشه على الفريق لاقوها جماعه كدا قدام الفريق بجمالن وبتاع-دا يعنى ملامح من الحلم تقريباً يعنى ديل نفس ود كين ومعاهو جماعه ماشين حِته اسمها ام شديده جات مارة كدا فوقهم ساكت فايته فوقهم ناقم واحد عربى مع شيخ العرب قاليهم)

العربى: بالضيفان تمرّ لا سلام ولا كلام

صدقوا اهل المثل توب العرب صُح لام

(هنا ريه تلتفت اليهم وتقول)

ريّه: حبابكم عشرة من دون كشرة والف سلام

يا وجوه العرب المتلى ما بتتلام

أنا بت الرجال اهل الحدق والسيف

بت الما بهم بحساب الخريف والصيف

بت البيحجزوا المرقوب البكرموا الضيف

انا ريّه ان كان شفتكم افوتكم كيف

العربى: من وين فى الأهل يا بنيه كفاك فخر

ريّه: أنا بنت البيوت المن بعيد معنيه

أنا بت أب كبس فى النسبه بطحانيه

(هنا شيخ العرب عرف زولتو الدايرة لانو قُبال كدا سمعان بيها ساكت ردّ عليها)

شيخ العرب: آآآهـ عبد الله اب كبس عز البطانه وفخرى

وفى رأس العرب بنعدو ما هو الوخرى

كريم وهميم وصميم وكان للقبائل دخرى

بت شيخ العرب هيلك صحيح تفتخرى

توقد نارو ديما الما بكوس الجمره

وفى ضيفان يمين وسكين دايما حمره

بكاس ما عبر لبن يجيك بالعمره

هيل الشكر..هيل الرّآس..هيلُ الأمره

المرحوم ابوك كان للقبيله قطاه

عزاك قديم حسين ابوطه

إنشاء الله يكون اخوك دى السكه ما تخطاه

(دايره تديه كلمه ناقصه فى ودعمها)

ريّه: كما بسد مكانو قدم ليه يطاه

لا يفوت ولا يموت السعى وت مغشيه

تُهابه الفريق يوقد صباح وعشيه

زايد فى الرجال طالق غفايه وغشيه

ضيوف الليل يكفيهم مرارة وشيه

شيخ العرب: مادخلت التراب البركه فى الزرّيه

والخلاك وراه ماهو المات يا ريّه

دايماً فى القبائل سيرت ابوك مطريّه

بيك وبأخوك تزيد ودى المحريه

(تانى العربى داك سأل)

العربى: ما بتسألى لا من وين ولا وين ترسو

ريّه: كيف العربى يسأل ضيفو كيف تنسو

اول بكرمو وبخابرو ساعه انسو

من مغلب حديث تعرف ابوه وجنسو

العربى: عملتى حسابو ضيفك وكرمو وجيتى

ويخجل كان سالتى واسمو ما عرفتى

واسم شيخ العرب سامعابو ما عرفتى

(داير يوريها بان حمد ودكين دا راجل غنى وراجل كذا وكذا..عشان تقبل بيه)

دا خريف البطانه الفيها ما لو مشارك

هيل السارحه...هيل الصاهله..هيل البارك

ماوقع ليك كلامى ساكت لشنو خبارك

فخرك ود دكين جاك فى فريقك زارك

ريه: مرحب بالعز وموهو كفايه

اب ناراً تولع للضيوف دفّايه

بشيخ العرب الافتخار ما كفايه

تابعو ان جانا نفخربو ونخدمو حفايه

شيخ العرب: بارك ربى فيك عقلك يدوم يا ريه

وكرمك موهو كُلفه دى طبعتك فطريه

إياك بت اب تروب والسمت فيك محريه

قديم فوت البطاحين عزّة للشكريه

(هنا فى المحل دا جاء طه ودعمها)

طه: سلام شيخ العرب مرحب خريفن الزارنا

مرحبتيت حبابك واشرفنبو ديارنا

مرحبتين حباب البيه كل مزارنا

تنزل فى الدرب ليه ماتت نارنا

شيخ العرب: حباب طه الضرس الفى الصهيباب راس

الجود والكرم هيلك قديم ميراس

نارك ما بتموت يا ولدة الحُراس

قاصدين أم شديدة ومعانا عوجة راس

طه: لعدوك العوجات فى الكبس سراى

راسك ما بدوس مليان رجاله وراى

باكر لأم شديدة بركب معاك براى

يا شيخ العرب لكن تختو كراى

(كراى دى لخمت شيخ العرب ما قدر يعرفها قال لطه)

شيخ العرب: هادى الشورة يا طه القلبنا دليلا

كل البنزلو فيك نلقاهو قليلا

طه: كراى الدايرو تبقوا ضيوفى انتو الليله

ترقدوا فى الفريق حتى ان عشاى بليله

شيخ العرب: مسكنا الدرب اسرع قوام ما تلعب

ودارك ديمة عامرة والسمح ما بتعب

بكفينا الوصف لا تشد جمل لا تتعب

وهدنا الطريق عقب الوصول ما يصعب

طه: يمين تخشوا الفريق بتفوتو نحن مغابر؟

Post: #142
Title: Re: غنوا معاى .....دوبيت الحردلو
Author: HAMZA SULIMAN
Date: 11-21-2002, 10:11 PM
Parent: #141

يا ابويسرا
تب ما قصرت والله
ابداااااااااااااااع
ما بتقترح معاى شعرنا يكون مقرر بدل المعلاقات
ويا سلام على الحاله الابداعيه الساكنه حكرا ما بى ايجار
تسلم يا ابويسرا

Post: #143
Title: Re: غنوا معاى .....دوبيت الحردلو
Author: ابو يسرا
Date: 11-21-2002, 11:25 PM
Parent: #142

يا استاذ حمزة مادام ود عزة رشح محجوب شريف لرئاسة السودان اتوقع ان ترشحونى وزيراً للتعليم والله ابسطكم للآخر ولن تجد عند طلاب المدارس سوى اشعار هاشم صديق وحميد وخيري ووحسن الدابي والحردلو والقدال وبقية العقد الفريد

Post: #145
Title: Re: غنوا معاى .....دوبيت الحردلو
Author: HAMZA SULIMAN
Date: 11-22-2002, 11:17 AM
Parent: #139

Shinteer

ابشر بالخير عقب

Post: #146
Title: Re: غنوا معاى .....دوبيت الحردلو
Author: المسافر
Date: 11-22-2002, 06:58 PM
Parent: #1

يا حمزة أخوي شيشك علينا شوية
ومن تالا الكلام القالوه كتير ماشوية
شن القول مغص فيه البطون مشوية
من زمن الترك والسادة والباشوية

رمضان كريم

Post: #147
Title: Re: غنوا معاى .....دوبيت الحردلو
Author: WAD ELGAALI#4
Date: 03-11-2003, 00:47 AM
Parent: #146

الله اكرم يا اخوى

Post: #148
Title: Re: غنوا معاى .....دوبيت الحردلو
Author: ود شاموق
Date: 05-26-2003, 08:10 PM
Parent: #1

وين يا حمزة دوبيتك ؟

أها هاك دي

أبوك يالزينة عكاهن قبض في روسن
الهوج والشرق فوق العواتي بكوسهن
أمسوا الليلة في الغوب الكتير جاموسهن
ناوي العودة للغالي ورفيع ملبوسهن

Post: #149
Title: Re: غنوا معاى .....دوبيت الحردلو
Author: ود شاموق
Date: 05-26-2003, 08:30 PM
Parent: #148

ودي من دوبيت الحاردلو سيد المهرجان زاتو

الخبر الأكيد قالوا البطانة اترشت
ساريةً تبقبق للصباح ما انفشت
هاج فحل أم صريصر والمنايح بشت
وبت أم سايق علي طرف الفريق اتعشت

.

Post: #150
Title: Re: غنوا معاى .....دوبيت الحردلو
Author: HAMZA SULIMAN
Date: 05-26-2003, 08:57 PM
Parent: #149

عقب يا ود شاموق
انت احد فحول الشعراء
وكرم الشعراء
قصيده لكل الجوعى
واحساس غير

Post: #151
Title: Re: غنوا معاى .....دوبيت الحردلو
Author: alfatih
Date: 05-26-2003, 09:56 PM
Parent: #1

الاستاذ حمزة سليمان
عاطر التحايا...و كمان الاساتذة المبدعين ديل
الله يخليهم

الحاردلو قال في الشجاعة

انا شوك الكتر الجرجروني
وانا الجن البخلي الزول ينوني

Post: #152
Title: Re: غنوا معاى .....دوبيت الحردلو
Author: ود شاموق
Date: 05-27-2003, 03:15 AM
Parent: #1

يا حمزة يا حبيب

هاك دي معاصرة جداً جداً

البورد النفس عافت مساختو وسخفو
نفس المشكلات غير الأسامي اختلفو
الحجاز يحجّز والمشاكلين حَلَفو
والفراجة كترت في الشبابيك وقفو

.

Post: #153
Title: Re: غنوا معاى .....دوبيت الحردلو
Author: HAMZA SULIMAN
Date: 05-28-2003, 04:07 PM
Parent: #152

جاييك يا ود شاموق

Post: #154
Title: Re: غنوا معاى .....دوبيت الحردلو
Author: عديلة المتوهجة
Date: 05-29-2003, 02:00 AM
Parent: #1

المبدع دائما ابو أواب
فتشت عن كلمات اعبر بيها عن شعورى الان وانا انقر على بابكم العتيق
لاجد من المفاجات ما يدهشنى ولا املك الا ان اقول لكم الله يا مبدعينا جمع الله شتاتكم فى ربوع بلادنا الحبيبة
للاسف ما عارفة للحردلو غير بعض الذى ذكرتوه انت والاخوان وهاكم دى من عمر البنا
الزول ان وقع احسن يقوم بشيلتة
والقدر ان نزل اصلو العبد شن حيلته
فى اليوم الصعيب كل زول يسوى الهيلته
ود الناس بخاف من كلمة ترمى قبيلته

ودى كمان حاجة جميلة
عمر البنا
للعز الرخيص لامن يموت ما بحصل
تلبسه بدلتين وهو للفسالة يفصل
ترفعه من اباطاته ويقع متنصل
درب الصح قريب ودرب الكضب ما بوصل

احمد عوض الكريم ابو سن

الزول النفيس ابعد بعيد من رده
والباب البجيب النقة افضل سده
جلد الحر رهيف واقل حاجة تقده
والوارث الفسل ..ما بخلى عادة جده

وشكرا اخى حمزه على ابوست الرائع روعة بلادنا

ودمتم للمحبة

Post: #155
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 06:51 AM
Parent: #154

يا متوهجه
عديله مشاركتك
الف شكر

Post: #156
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 06:57 AM
Parent: #155

اها يا ود شاموق

لونن من بعيد مثل البليبلى نضاف
حرد ومعصرات من شبت الاكتاف
لى الناس البغنولن يجروا القاف
ماليات الخشم من كامل الاوصاف

Post: #157
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 07:04 AM
Parent: #156

هاك يا عديله المتوهجه

اجمع فى الرزق لى شان رضاهن افاقى
كترتو ومسخ واتعاجزت عرافى
قدر ما ادى قدر مظنونى مانى مكافى
غير متاسف الياخدنو كلو عوافى

Post: #158
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 07:10 AM
Parent: #157

اها يا متوهجه
هاك تانى

مما قمتى فوق ساجك مولع ضيك
ما اتبعت عز لافيه العطاش بى ريك
السرع والنشاط ما بشبهن لى زيك
تاتى المشيه خلى الناس تموت بى غيك

ابشرى

Post: #159
Title: Re: غنوا معاى .....دوبيت الحردلو
Author: Shinteer
Date: 05-29-2003, 07:16 AM
Parent: #1

فرشوت غبّر السبعات و طلق الفوف
و جاب لقلبي وحّاحة و زلازل خوف
عينيْ يا العوض حرمنّي من الشوف
و انقطع الوداد من القناها أب روف

Post: #160
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 03:16 PM
Parent: #159

عقب عقب
يا شنتير

Post: #161
Title: Re: غنوا معاى .....دوبيت الحردلو
Author: عديلة المتوهجة
Date: 05-29-2003, 06:39 PM
Parent: #1

الاخ حمزه شكراااااااايا رائع
هاك دى زغروتة يويييييييييييييي
ومعاها شبال الكترونى
تحياتى لكل الاخوان واهدى كل هذا الجمال لك وللموصلى ولكل من يهتم بهذه الثقافة

ومتين نرجع
ودمتم للمحبة

Post: #162
Title: Re: غنوا معاى .....دوبيت الحردلو
Author: HAMZA SULIMAN
Date: 05-29-2003, 11:05 PM
Parent: #161

تسلمى يا عديله