البحث عن عشيرى فى الفضاء الاسفيرى!

الاحباب اهلى الطيبين , ان بصد السؤال عن صديقى
الجميل وفردتى ودائما كلما ذكرنا بشئ ذكرنا هكذا
بكرى وعشيرى....او عشيرى وبكرى, كمنجتين متلازمتين
فى الحل والترحال. وهنابعض المعلومات عنه:

الاسم: محمد عثمان عشيرى
المدينة: مدنى ,بانت مقابل مصنع التلج( دا لو المعلم لم تتغير)
الدراسة: معهد الموسيقى والمسرح
التخصص:الة الكمان.

من الؤسسين الاساسيين لفرقة السمندل الموسيقية.
اخر معلومة انه كان بالسعودية ودا كان سنة 1993.

ولذلك بورداب السعودية هم المعنيين بالبحث والسؤال
ولكن لاباس من اشتراك الكل فى البحث. حتى الزوار غير
المسجلين يمكنهم مراسلتى على الايميل.
امنى نفسي بالعثور على صديق الروح عشيرى.
اين انت ياصديقى??
[email protected]

يا بكــور ..

Quote: من الؤسسين الاساسيين لفرقة السمندل الموسيقية.

Quote: بكرى وعشيرى....او عشيرى وبكرى, كمنجتين متلازمتين

..

Quote: ولذلك بورداب السعودية هم المعنيين بالبحث والسؤال

فيك الخير يا بكــور .. بتلملم في اخوان الزمن الجميل ..
والله الواحد مشتهي يغمض ويفتح بس يلقى نفس اللمه القديمة ديك .. لكن الظاهر لي دي بقت من عجايب الدنيا التمنية ..
عشيري دا كان في السعودية بجيب ليك خبرو .. واريتو يكون في السعودية..

الجميل / بكري

الف تحية ووينك يا زول

انا برضو ببحث عنو وكل ما اشوف شنطة كمنجة اتذكر سخريته من حجمه ..

ويومها قال انا ماشي السعودية عمرة ولو حسيت باي كشة افتح شنطة الكمنجة وادخل فيها ..


سوف نبحث سويا ..

سوف اتصل اليوم بالاخ عادل الصديق ولو في السعودية بنلقاه يا بكري

كل سنة وانت والاسرة بخير وعافية

مودتي

يا بكور ليه كده ؟
ياخ عشيرى دا ماصاحبك براك دا فردة ليها عشرات السنين
لمن شفت البوست لمن حيلى مات قلت عشيرى جا ؟
يا ... سلام عليك
انقر ما مشيت سالت منه فى السودان ؟ ومن عثمان سنط ؟لكن مافى زول عارف وين ؟سالت الناظر (عبدالرحمن قسم الله باعتباره من اولاد مدنى )
طبعا انت عارف حميمية الناس ديل معاى ومعاك
مشتاقة لعشيرى فى (الضل ) متذكر الضل يا بكور ؟
الضل الكنا بنقعد فيهو ورا المسرح وفيهوواقفة عربية (ميكائيل ) البيجو
كنا بنقعد فيها بين البروفات فى قصر الشباب والاطفال
بجى قاسم نصر بغنى (لو بهمسه ) بطريقته
وبكون شايل ( الصولجان ) المعروف
اها العربية ديك بتشيلنا نحنا التلاته قاسم وعشيرى وكنت ثالتهم العلمهم ما اى حاجة غير الحب لاحدنا الاخر طبعا هم ضعاف وكنت سمينه لكن ما فرقت كنا متحابين
اها عشيرى دايما بكون بفتش على حاجات ما بعرفا منها سؤاله الدائم عن (الجلفونيا )
واخيرا بعد مليون سنه حتى عرفت انها حاجة بنضفو بيها القوس
المهم العربية ديك ذاتا كانت حقت عمر بانقا قام باعا لميكائيل الضو
وبقت حقتنا نقعد فيها اتعلمنا من قاسم كيف يكون الزول منفتح على العالم رغم اى حاجة كان يمر بها
لا انسى صيحاته الضاحكة لمن تجى حبيبته المزعومة (وااااااى جات ) ويزجره عشيرى بضحك ايضا
ـ يا قاسم اكبر
يا بكور ياخ انشا الله نتلاقى كلنا اصحاب تلك الايام التى بطعم ذلك الزمن الذى لن يعود
غايتو كان لقيتو بجيكم ناطة وين ما كنتو وخلونا نبكى ونضحك ونتلاقى ونحب بعض زى ما كنا اخ يا بكرى تعرف انى قاعدة ابكى هسى وحات الله الدموع عشرة عشرة
لك حبى ابدا

Quote: يا ... سلام عليك انقر ما مشيت سالت منه فى السودان ؟ ومن عثمان سنط ؟لكن مافى زول عارف وين ؟سالت الناظر (عبدالرحمن قسم الله باعتباره من اولاد مدنى ) طبعا انت عارف حميمية الناس ديل معاى ومعاك مشتاقة لعشيرى فى (الضل ) متذكر الضل يا بكور ؟ الضل الكنا بنقعد فيهو ورا المسرح وفيهوواقفة عربية (ميكائيل ) البيجو كنا بنقعد فيها بين البروفات فى قصر الشباب والاطفال بجى قاسم نصر بغنى (لو بهمسه ) بطريقته وبكون شايل ( الصولجان ) المعروف اها العربية ديك بتشيلنا نحنا التلاته قاسم وعشيرى وكنت ثالتهم العلمهم ما اى حاجة غير الحب لاحدنا الاخر طبعا هم ضعاف وكنت سمينه لكن ما فرقت كنا متحابين اها عشيرى دايما بكون بفتش على حاجات ما بعرفا منها سؤاله الدائم عن (الجلفونيا ) واخيرا بعد مليون سنه حتى عرفت انها حاجة بنضفو بيها القوس المهم العربية ديك ذاتا كانت حقت عمر بانقا قام باعا لميكائيل الضو وبقت حقتنا نقعد فيها اتعلمنا من قاسم كيف يكون الزول منفتح على العالم رغم اى حاجة كان يمر بها لا انسى صيحاته الضاحكة لمن تجى حبيبته المزعومة (وااااااى جات ) ويزجره عشيرى بضحك ايضا ـ يا قاسم اكبر يا بكور ياخ انشا الله نتلاقى كلنا اصحاب تلك الايام التى بطعم ذلك الزمن الذى لن يعود غايتو كان لقيتو بجيكم ناطة وين ما كنتو وخلونا نبكى ونضحك ونتلاقى ونحب بعض زى ما كنا اخ يا بكرى تعرف انى قاعدة ابكى هسى وحات الله الدموع عشرة عشرة لك حبى ابدا

وحاتك يالسمحة عارفك حنينة وقليبك رهيف!لكن نسوى
شنو عاد, انتو ونحنا وهم يانا الباقين لى بعض
وذكرانا هى الممشيانا على البسيطة, نحنا لازم نسال
ونعرف احوال بعض ,هسى شوفى تلفونى معاك دا بالدنيا
كلها,اشوفك بخير ياصديقتى الوفية!

still looking 4 HIM!

اووه حيمورة , بالله تتذكر ايام زمان لما سكنا جيرانكم
اااه ياريت تعود ايامنا المشرقة وجميلة ,عليك الله
بالمرة كدا قول لى عادل سلام واشتياق وذكرو بايام بروفتنا
لاغنيتى لى زمن بنادى ومن زمان انا فى رجاك رائعة عثمان
مبارك (كمنجويليجي) عارفك مابتقصر االاخدر!

حبيبنا علوبة, والله ماتتصور انو انا اليومين
ديل عندى مرض الذكرى والتذكر, هو زول حكيم
ودايما من اقوالو الماثورة انك تدى الدنيا
دى تديها شلوت عشان تمشى معاك عديييل كدا
شكرا للاهتمام مع امنياتى بالحصول على خبر

sorry, repeated

الاخ سمندلاوى انا عرفت بكرى وين, الكلام عشيرى اكان لقيتو كلمنى مع اشواقى ليك انتتتتتتت اين انت هل انت معى ؟؟؟؟؟؟؟؟؟؟؟؟؟؟؟؟؟ و ايضا اين كمال طه و الفاتح القاش ابحث معى عن ناس زى الطوب

حاتم ( رزق)من فصيل الكوفنجيةفى الزمن الجميل

مافى جديد!ياتمبييييز!

سمندلاوي الجميل
تحياتي واشواقي
عشيري هذا من الطف الشخصيات التي تعرفت عليها.آخر مرة إلتقيته فيها كنا شغالين حفلة( ضاربين عداد) مع عمر بانقا في الدلنج ومعانا جراهام عبد القادر وعمر المنصوري وابراهيم سنادة وفتحي عبد الجبار
وووووووووووو
التحايا له اينما كان والتحايا لهؤلاء المبدعين والتحايا لك على وفائك للاصدقاء





صادق مودتي

النظام يا سادة

الألقاب و المقدمات و الحواشي و لزوم ما لزم في هذا المقام الرفيع

مقام السيد الوجيه صاحب المعالي و السمو و السعادة

السيد: عشيري بك الدفتردار

عليه:

لزم الجميع الإعتذار و إعادة الإعتبار

الأسم بالكامل محمد عثمان بك عشيري
و بتلقاها مكتوبة اول ما تدخل المعهد لم كان في عمارة مكافحة المخدرات في المقرن
بخط الصديق الحميم عبدالعظيم محمد طيب
بالخط العريض

عمــــــــــــــــــــــــــــــــــــــــــــــــارة محمـــــــــــــــــــــــــــــــد عثمــــــــــــــــــــــــــــــــــــــــــان بك عشيري
سلام للكل الأصدقاء من ذلك الزمن اللذيذ
يغشاك يا بكري و يا سلمي الشيخ سلامة
يا حمادة مع السلامة

Quote: الأسم بالكامل محمد عثمان بك عشيري و بتلقاها مكتوبة اول ما تدخل المعهد لم كان في عمارة مكافحة المخدرات في المقرن بخط الصديق الحميم عبدالعظيم محمد طيب بالخط العريض عمــــــــــــــــــــــــــــــــــــــــــــــــارة محمـــــــــــــــــــــــــــــــد عثمــــــــــــــــــــــــــــــــــــــــــان بك عشيري سلام للكل الأصدقاء من ذلك الزمن اللذيذ يغشاك يا بكري و يا سلمي الشيخ سلامة يا حمادة مع السلامة

هييا بقة ,لاحولااا ,يازول انت جيت مقلع من وين!!!!!
اصلولو ماقادر اصدق!
كدى تعال راجع تانى عشان اتاكد!!

Quote: مقام السيد الوجيه صاحب المعالي و السمو و السعادة

حاضريين ياسعادة الباشكاتب! لا ياااخ..
ناسف لعدم النداء بالبروتوكول المعروف
وياعشيرى بك مطلوب حضورك وظهورك!

Quote: : وعليكن (النبق) كان لقيتو خبر عشيرى ان ما طمنتونا عليهو وحتى كان ساكن فى بيت الكمنجة برضو قولو ليهو تعال

ياسلام عليك ياود ميرغنى,ازيك وعيدك مبارك,شفت الزمن
دا تافه كيفن? لو الواحد بقدر يرجعو تانى يووتيرن!
لك الود مع امنياتنا باخبار جميله عنه!
تحياتى!

بكور والمتداخلين سلام والله الشوق مطر ووين يا سلومة الشيخ سلامة

والله زكرتونا بعشيرى الظريف ، عليكم الله لمونا فيهو لا اعتقد إنو فى الرياض
لو فى السعودية لانى قعدت فترة ولو كان موجود كان ظهر ،إلا يكون ساكن فى بيت الكمنجة بتعته

يا ناس المعهد برى منكن الا يشركوا ليكن كدى ؟
هسى يا بكور بعد الكلام دا كلو ما لقيت لينا زولا يدلنا على عشيرى بك ؟

ويا ساطور انت دا الوينك انا ساكنة فى بيت بكرى ابوبكر دا سكنه

ويا ابو الزهور ما تجوا ياخ

شوق للايام ديك

امس كنت مع بكور فى التلفون بكينا وبكينا وضحكنا واتونسنا لمن الواطة صبحت
(حندوكة ) دى لى (بقة) لانه بقى ما بتصل
مالك اخوى
تعال ياخ بالتلفون بالدرب بالنص باى حاجة مشتاقين

وعليكن (النبق) كان لقيتو خبر عشيرى ان ما طمنتونا عليهو
وحتى كان ساكن فى بيت الكمنجة برضو قولو ليهو تعال

شباب ال(بعهد) شوق وحب شديد

Quote: وعليكن (النبق) كان لقيتو خبر عشيرى ان ما طمنتونا عليهو وحتى كان ساكن فى بيت الكمنجة برضو قولو ليهو تعال

لاحولا ....ساطور ....انت ذاتك جيت من وين? اها شفت
عشيرى بك كان ماظهر لينا او عرفنا خبارو وين اصلو
ما حاخلى البوست دا يقع واطة....بصراحة انا فى بوست
حنان فقدت الامل للاسف..حنان النيل...نعم انت الرحيق لنا!!! هل من عودة تانى؟؟؟

تتذكر حفلتنا مع الباشكاتب فى الابيض...

Quote: تتذكر حفلتنا مع الباشكاتب فى الابيض

لوووووول بكورى ودى حفلة بتتنسى ؟ مع الموية المقطوعة فى الفندق ؟ يعنى ناس سلى الشيخ
الوضع كان عندهم كيف لو الموية قاطعة فى الفندق؟


وفووووق عشان نجيب باقى المفقودين

Quote: لوووووول بكورى ودى حفلة بتتنسى ؟ مع الموية المقطوعة فى الفندق ؟ يعنى ناس سلى الشيخ الوضع كان عندهم كيف لو الموية قاطعة فى الفندق؟ وفووووق عشان نجيب باقى المفقودين

ياخوانا .....الشغلانة دى ماطالت!

يا حبه وين قاسم نصر دسيتو منى عشان افتش عليهو فى الفضاء الاسفيرى ؟
ياخ ياخ يااااااخ منتظراهو على مقلاية من النوع الشديد
وقول ليهو ما تروح تانى يا اجمل زول
واديهو تلفونى يا بكور ريقى نشف من المهاتا بقاسم نصر
هسى اخر كلام متين حتدينى تلفونو ولا ..... اتصرف ياخى
والله بالجد بحبكم ومشتهية اقعد اتونس واطربق يوم كامل
يوم شنو دى سنوات ما بتكمل ونستنا
خلاس اتفقنا ؟
يلا منتظرة قاسم نصر الجنرال على التلفون

بالله انا قايل روحى اديتك ليهو...
خلاس جدعتو ليك بهناك ...ونسة ظريفة..

Quote: وعليكن (النبق) كان لقيتو خبر عشيرى ان ما طمنتونا عليهو وحتى كان ساكن فى بيت الكمنجة برضو قولو ليهو تعال

مازلت أأمل فى العثور على صديقى

بكور ياجميل سلام وشوق

وحب وحاجات كتيره فى القلب

طبعا لو تذكر عندما إلتقينا قبل كم عام فى هولندا أول حاجه سألتك منها عشيري ..

وده لأنكم أرتبطم فى ذاكرتي مع بعض أيام غرفتكم فى قصر الشباب والأطفال وأنتم تكمجنون تتمرنون..

ومن طرائف عشيري المحفورة فى الفكرة ..

فى يوم رجع من حفله والجو الظاهر كان لطيف خالص .. أول ما طلع السلم لقي أخونا ناجي حسن ( جيتار )

نايم ومتغطي بي فردة دومور ( ناجي من شندى ) !!!!!!!!!!!

وقف عشيري وصاح بأعلي صوته ..

بالله ديل شباب!!شوفوه نايم كيف؟؟؟

الشباب هناك فى أمريكا..

مافيا .. موترات .. أيدز ....

ومازال رنين صوته حتي هذه اللحظة فى مسامعي..

يارب يسمع ويظهر عشيري لعشيرته الفنية..

وكمان الأستاذ الفنان (المتفرد) عثمان سنط لم نسمع عنه منذ أن تخرج وترك الداخليه غافلا للسنط..

محبتي لجميع أهل الموسيقي

عبدالعزيز خطاب

سمندلاوى

سلامات

غايتو بوستك ده نكت ليهو جنس ناس لى بهم معرفة..
1) شقيق اختنا الجمهورية احسان عشيرى.. لقذ ذهبت الى منزلهم عديد من المرات مع الأستاذ محمود محمد طه لتلبية دعوات والقاء محاضرات.. كما ذهبت اليهم مع الأستاذ سعيد الطيب شايب طيب اللة ثراه ونفعنا بجاهه.. المهم فى الموضوع صاحبك فى على بعد ساعة من الرياض.. ولقيت ليهو تلفون من اولاد اخته فى فورت ورث سوف ارسله ليك عبر الايميل.. لكن قد يكون قديم اذا طلع ما يهو افيدنى

2) قاسم نصر يا سلمى الشيخ هو طبعا ود عم زوجتى وفاء همت.. برضو اخبارو مقطوعة.. فهل من رقمه يا سمندلاوى

3) عثمان سنط هو ايضا قريبنا استقر به المقام فى قريته الوراق مزارعا من كبار اعيان البلد

لكم ودى

لطفى

عزو الغالى يالها من ذكريات وايام
القائمة تطول وكم نكون سعداء للسماع
عن باق الشلة والاصحاب00 دمت ياعزيزى0

************************************

ياابا الطيب يابلديات .. اولا دعنى اشكرك وان كانت
متاخرة , دعنى اشكرك وباقى الناس الحلوين لحسن الضيافة
وحفاوة الاستقبال لنا فى بلادكم العامرة عندما اتينا اليكم
حاملين النغم فى دواخلنا هناك فكنتم نعم الاخوة والاخوات00

Quote: ) شقيق اختنا الجمهورية احسان عشيرى.. لقذ ذهبت الى منزلهم عديد من المرات مع الأستاذ محمود محمد طه لتلبية دعوات والقاء محاضرات.. كما ذهبت اليهم مع الأستاذ سعيد الطيب شايب طيب اللة ثراه ونفعنا بجاهه.. المهم فى الموضوع صاحبك فى على بعد ساعة من الرياض.. ولقيت ليهو تلفون من اولاد اخته فى فورت ورث سوف ارسله ليك عبر الايميل.. لكن قد يكون قديم اذا طلع ما يهو افيدنى 2) قاسم نصر يا سلمى الشيخ هو طبعا ود عم زوجتى وفاء همت.. برضو اخبارو مقطوعة.. فهل من رقمه يا سمندلاوى 3) عثمان سنط هو ايضا قريبنا استقر به المقام فى قريته الوراق مزارعا من كبار اعيان البلد

ياالله يا الله.. احبك ياخى وازيدك حب ياخى
دا خبر بالدنيا.. ياسلام يالطفى
سمندلاوى
تلفون قاسم نصر 01146737646320

I sent you the number via [email protected]
please inform me if you receive jt or not? stay well.

Lutfi

يا الله عليك يااباالطيب , التلفون طلع صحيح
واخيرا لميت فى صديق الروح ودا من فضل الله
وفضلك ,, كم ارحتنى اليوم واليوم دا بالذات
حايكون يوم السعد والهنا 00 الله الله..
اها ياناس سلمى وازهرى وعزيز ونادر لقيت صاحبى
والعايز يكلمو اجينى بى جاى ولا يرسل ايميل للتلفون
ايوو يوو يوووويييي!!
معليش دى فرحة عارمة...
شكرا ليك ولدنا لطفى وكل الناس الحلوين...

Quote: الاخ سمندلاوى انا عرفت بكرى وين, الكلام عشيرى اكان لقيتو كلمنى مع اشواقى ليك انتتتتتتت اين انت هل انت معى ؟؟؟؟؟؟؟؟؟؟؟؟؟؟؟؟؟ و ايضا اين كمال طه و الفاتح القاش ابحث معى عن ناس زى الطوب حاتم ( رزق)من فصيل الكوفنجيةفى الزمن الجميل

لاحولااا... حاتم صشخيا اصلو مابصدق.. حاااتم(العضير)
تتذكر لمن مشينا جبنا القلة...................
انت ذاتك جيت من ويين.. مشتاقين للعضارات والسريلة
الماخمج ... اهو اخيرا لمينا فى عشيرى بك وهسى كنت
بتكلم معاهو وعرس كمان وعندو تلاتة الله يخلهم ليهو واخلى
شفت السعادة اانا فيها دى...
بعدين حقو تفتح لينا بوست مناداة للشلة الطاشة دى
عشان نقدر نتلمى بيجاى00000 سعيد للطلة00