Post: #1
Title: بنشتاقك
Author: عبدالله وداعه الامين
Date: 08-05-2007, 06:17 AM
بنشتاقك وانت هناك
ونشتاق ليكا زي اول
وما نقص البعاد نارك
وجمرك فينا كم طول
جراحك ساكنة يا غالي
وحنينك لوبيتاول
ما شلناكا في ذاتنا
وهواك جوان ما اتجول
***
بقولوا الغاب عن العينين
بعيد عن سكة الرادو
وانا بعادك بزيدني حنين
ودربك فيني ابعاده
بتفتّح فيني كون افراح
وشوق لي ناس بيترادوا
وعيون اديها كل عمري
واخضّر بيها اعياده
***
بنشتاقك اكيد واكتر
وانا الشايلك ملاذا لي
وادسك من عيون الناس
الاقي عيوني تغدر بي
اكون مفضوح وهو الحاصل
اذا الحاصل فضح ايدي
قروك في دمي كل الناس
وشافوا هواكا في عيني
عبدالله وداعه الامين
لندن - صباح الاحد
05.08.2007
|
Post: #2
Title: Re: بنشتاقك
Author: مجاهد عبد الرحمن
Date: 08-05-2007, 06:24 AM
Parent: #1
بنشتاق ليك
وأنت هناك رافل في حلل سعدك
بنشتاق ليك
ونحن يمين محال نهوى ونريد بعدك
ولا بنتمنى زول غيرك
ولا في لحظة هان بعدك
ونبقى وراكا منتظرين
متين ترجع تبر وعدك
شكراً يا عبد الله
|
Post: #4
Title: Re: بنشتاقك
Author: عبدالله وداعه الامين
Date: 08-05-2007, 01:40 PM
Parent: #2
Quote: بنشتاق ليك
وأنت هناك رافل في حلل سعدك
بنشتاق ليك
ونحن يمين محال نهوى ونريد بعدك
ولا بنتمنى زول غيرك
ولا في لحظة هان بعدك
ونبقى وراكا منتظرين
متين ترجع تبر وعدك
شكراً يا عبد الله |
مجاهد يا رقيق وانيق
يديك الف عافية حبيبنا وتسلم
دوما تتحفني بجمالك وروعة روحك وقلمك
لك محبتي وشكري يا سيد السماحة
ولك التحايا انهار
|
Post: #3
Title: Re: بنشتاقك
Author: هند محمد
Date: 08-05-2007, 06:40 AM
Parent: #1
Quote: بقولوا الغاب عن العينين
بعيد عن سكة الرادو
وانا بعادك بزيدني حنين
ودربك فيني ابعاده
|
قاسية وحاتك الآيام
وكيف ترحل بعيد تقسى
وانتَ ولو جفيت الريد
أنا وأشواقى مابننسى
قِدِرِتَ تفوت تخلينا
وما همّاك لو نشقى
عليك نسأل نجوم الليل
نفتش ليك وما نلقى ..
شكراً على الصباح الجميل بجمال القصيدة ..مودة
|
|