Post: #1
Title: وريني من وين ادخلك
Author: عبدالله وداعه الامين
Date: 05-15-2005, 09:31 PM
انتي الخطاوي...
الماشة مني
وطالعة منك ..
و جايه فيك.
متساربة
في الروح اشتهى..
مشدوهة ...
تسأل عني ليك.
هذيني جواك ..
صوت مطر..
جدول فرح ..
منك وبيك.
واديني بحضورك عشم...
خليني ساكنك و مشتهيك.
وريني من وين ادخلك؟
او حتى من وين ابتديك؟
سدي المساحات الندى..
وادي البحر...
من صوت مشيك.
امكن غماماتك تفك..
وش السماء..
وتحضن ايديك.
عبدالله وداعه الامين
لندن 06.05.2005
|
Post: #2
Title: Re: وريني من وين ادخلك
Author: غادة نصر
Date: 05-16-2005, 11:54 PM
Parent: #1
((خليني ساكنك و مشتهيك.))
استاذ عبدالله
الامر يتطلب مهارة فائقة ... تمنيت امتلاكها .. ! حدثني كيف يكون ذلك ؟؟
مع اطيب التحايا
غادة
|
Post: #5
Title: Re: وريني من وين ادخلك
Author: عبدالله وداعه الامين
Date: 05-17-2005, 07:17 PM
Parent: #2
Quote: ((خليني ساكنك و مشتهيك.))
استاذ عبدالله
الامر يتطلب مهارة فائقة ... تمنيت امتلاكها .. !
حدثني كيف يكون ذلك ؟؟ |
منك بتدخل خيوت الكلام
قلوب الحيارى وتخت السلام
لانك حقيقة... بروعة وئام
تغتغت محاسنك وجوه الملام
شكرا محنه لانك.. تمام
عبير التصافي البفج الغمام
الاخت العزيزة غادة نصر
لك الود والتحايا لحضورك الجميل
والمهارة فيك اذا كنتي بتكونيني في كونك واكون منك واكون بيك الجنون
شكرا هطول
عبدالله وداعه
|
Post: #3
Title: Re: وريني من وين ادخلك
Author: Tarig Sidahmed
Date: 05-17-2005, 00:15 AM
Parent: #1
منذ مدة وأنا أبحث عن جمال كهذا الجمال يعيد للروح صفوها وجمالها ... فشكرا أيها الجميل
طارق ع الأحمدي
|
Post: #6
Title: Re: وريني من وين ادخلك
Author: عبدالله وداعه الامين
Date: 05-17-2005, 07:27 PM
Parent: #3
Quote: منذ مدة وأنا أبحث عن جمال كهذا الجمال يعيد للروح صفوها وجمالها ... فشكرا أيها الجميل
طارق ع الأحمدي |
الاخ العزيز طارق
شكرا محنة لانك معاي
محافل بتضحك تزين سماي
سماك البتفرح بتزرع جواي
مداين تلون معالم رضاي
تكوّن عوالم بترسم حشاي
خيوت المحبة البتفضح غناي
شوارعك تصارعك تدفر بكاي
تخت الحقيقة وتغتغت وراي
مصايب تجقلب تعكر صفاي
احبك حقيقة والى منتهاي
لانك حقيقي بتدهش رؤاي
تسلم طارق ويديك الف عافية وسعيدة بك حروفي
وياريتني لو اقدر افج كل الكلام
واديك عقد من بين خيوط فرحك
واطرز ليك معاني البهجة توبين بالتمام
شكرا محنة
عبدالله وداعه
|
Post: #4
Title: Re: وريني من وين ادخلك
Author: ودقاسم
Date: 05-17-2005, 00:27 AM
Parent: #1
إنتي الخطاوي...
الماشّة منِّي
وطالعة منِّك ..
و جايه فيك.
متساربة
في الروح اِشْتِهَى.. ْ
مشدوهة ...
تسأل عنِّي ليك.
هزّيني جُوّاك ..
صوت مطر..
جدول فرح ..
منّك وبيك.
وادّيني بحضورك عشم...
خليني ساكنَِك و مِشتَهيك.
ورّيني من وين ادخلك؟
او حتى من وين ابتديك؟
سِدّي المساحات النَّدَى..
وادِّي البحر...
من صوت مشيك.
امكِن غماماتك تَفِك..
وش السماء..
وتحضن ايديك.
نص جاهز لإضافة بعض الموسيقى إليه ،،، يلا يا ناس الغنا ،،
شكرا أستاذ عبد الله
|
Post: #7
Title: Re: وريني من وين ادخلك
Author: عبدالله وداعه الامين
Date: 05-17-2005, 07:44 PM
Parent: #4
Quote: نص جاهز لإضافة بعض الموسيقى إليه ،،، يلا يا ناس الغنا ،،
شكرا أستاذ عبد الله |
استاذي ود قاسم
وبيني وبينك الاشواق
وحتة الفه لي باكر
وحبة فرحه تملى الجوف
وروعة قلبك الفاكر
دروب الالفة والاحباب
وليهم اصلو ما ناكر
احبك ياخي حب الروح
ويسلم قلبك الذاكر
تسلم حبيبنا ود قاسم وسعيد بي طلتك البهية والقومة ليك يا وطن
شكرا محنة واهلا هطول
عبدالله وداعه
|
|