Post: #1
Title: يـــــــ مالياني ـــــا
Author: عبدالله وداعه الامين
Date: 06-08-2007, 07:09 AM
Parent: #0
يا مالياني محبة وطيبة
وسادي هواك بالهم شرياني
ندهتا عليك يا ما سامعاني
سالتك دم لي ريق العافية
مداين حال... ترحال ...ومرافي
جيبي هواي من شهقة وزفرة
وكل الكان جواكي ومافي
ومستور بيك متسف غيمة
وما داسيك جوايا منافي
صحي الايام بتنسّي الغايب؟
ولا الغايب هو الناسينا
وناكر انو بنبقى قرايب
دي الاشواق جواي بتصفق
يا مالياني محبة وطيبة
ومن جوايا بتطلعي تاني
سالتك و اسم العرفة البينا
ما تتاخري عني ثواني
******
يا مالياني محنة عجيبة
وفي عينيك مكتوب عنواني
وانا مكتوب في ايدك بسمة
كتبك مين واداكي زماني؟
وجابني عليك من سكة بتبدأ
وتختم بيك السكة عشاني
نكرتا غناي ورضيتك قسمة
فرحتا وبيك طرزتا حناني
نحتك في جواي الفكرة
ختمتا وبيك كملتا معاني
بتدي الناس ترياق العشرة
وقلب حنين يملاكي اماني
ملاني هواك يا مالية حنيني
وسارة الروح الفيك تبراني
بريتك روح تشتاقك انتي
وتشتاق ليك ايدين بتعاني
وتنده ليك يا ماليه شجونك
خلي عينيك بالحب تملاني
عبدالله وداعه الامين
لندن 07.06.2007
|
Post: #2
Title: Re: يـــــــ مالياني ـــــا
Author: تماضر الخنساء حمزه
Date: 06-08-2007, 08:55 AM
Parent: #1
ياماليني..بيك..لوتعرف..
أنا في عشقك ببقى أناني
وبرضو بعيش الفرقة تواصل
أصلو الريد الفيكا حواني
جدّد فيني إحساسك طيبة
وسمّى الحب جوّايا كياني
سيب الشوق في بحري إعدي
سيبو إعيش جوّايا ثواني
سيبو إطوف في قلبي الرادو
ويعرف كيف غطّاو وجداني
بوصِّي عليو شريان اللهفة
أوعك يغرق في أشجاني
بوصِّي عليك المطر الشايل
من عينيك أعذب ألحاني
تبقى الحوجة حقيقي مرافي
وأنا بيناتا البرضي بعاني
برسم بيك الوعد الوافي
وإنتا الغيم الكلّو معاني
أنا بي ريدك عايش الدهشة
وحتّى الفرحة بتبقى مكاني
وأنا في حبك ناسي الوحشة
قليل..لو شلتو إليكا حناني
قليل..لو صوتك نادى الرعشة
وإنتا بتسأل  ماسامعاني؟؟)
الأيّام لو كان بتنسي..
كان الموت نساني زماني
عارفو غيابك لينا بزيد
إحساس الشوق الزاد من تاني
وعارفو حنينك برضو بصحي
اللقيا الفيها رسمنا أماني
سألتك روح لي زول بهواك
تجي بي عشقك لحظة عشاني.
|
Post: #5
Title: Re: يـــــــ مالياني ـــــا
Author: عبدالله وداعه الامين
Date: 06-08-2007, 06:17 PM
Parent: #2
Quote: ياماليني..بيك..لوتعرف..
أنا في عشقك ببقى أناني
وبرضو بعيش الفرقة تواصل
أصلو الريد الفيكا حواني
جدّد فيني إحساسك طيبة
وسمّى الحب جوّايا كياني
سيب الشوق في بحري إعدي
سيبو إعيش جوّايا ثواني |
يا مليانة جمال ومحنة
منو الاداك اصلا عنواني؟
وما قال ليك يا ساكنة خيالي
انا سكنتك في وجداني
وقلتا عليك مافيشة وقاعدة
وما صدقتا خيالي التاني
شكرا تماضر وشكرا لحرفك الانيق
ولكي المودة والتحية.
|
Post: #3
Title: Re: يـــــــ مالياني ـــــا
Author: abubakr
Date: 06-08-2007, 10:16 AM
Parent: #1
معليش ...ان قطعت ارسالكما الجميل ...
انتو الاتنيين بهجة
|
Post: #4
Title: Re: يـــــــ مالياني ـــــا
Author: Muna Khugali
Date: 06-08-2007, 10:39 AM
Parent: #3
Quote: معليش ...ان قطعت ارسالكما الجميل ...
انتو الاتنيين بهجة |
انا كمان بقول كده..
شكرا علي الجمال..
|
Post: #6
Title: Re: يـــــــ مالياني ـــــا
Author: هاشم أحمد خلف الله
Date: 06-08-2007, 10:27 PM
Parent: #4
عبدالله وداعة شكراً
|
Post: #9
Title: Re: يـــــــ مالياني ـــــا
Author: عبدالله وداعه الامين
Date: 06-10-2007, 11:42 AM
Parent: #4
Quote: انا كمان بقول كده..
شكرا علي الجمال.. |
الاخت العزيزة منى
كل التحايا لك والمودة
شكرا لكي عزيزتي وشكرا على جمالك انت
كامل الاحترام والود وتسلمي يا بنت خوجلي
|
Post: #8
Title: Re: يـــــــ مالياني ـــــا
Author: عبدالله وداعه الامين
Date: 06-09-2007, 12:08 PM
Parent: #3
Quote: معليش ...ان قطعت ارسالكما الجميل ...
انتو الاتنيين بهجة |
الاخ العزيز ابوبكر
البهجة هي وجودك هنا
شكرا لك عزيزي وشكرا لحضورك الجميل
مودتي وكل الحب
|
Post: #7
Title: Re: يـــــــ مالياني ـــــا
Author: هند محمد
Date: 06-08-2007, 10:31 PM
Parent: #1
تصفيق حار واعجاب .. تسلموا لينا ..
|
|