المتواجـدون الآن بالمنبر العـام .. دعـوة للتـآلف

الســاعة الآن
الثانية والنصف صباح الأثنين حسـب توقيت لمكة المكرمة

مدينة الخبـر ( شرق السعودية )
ترقد هادئة على شـواطئ الخليج العـربي
لا يكسر نُعاسها سوى
أزيز إطارات السيارات يتسلل ليُشـعرني بالوجود
يقاتل معي شبح الوحـدة
يقتل فيني سـفر الروح نواحي السعادة
ترتفــع ( حُــمى ) البعـد عن البلـد
أنهض وأصـنع كأس قهـوة لينبّـه زمـاني أنني لا أستسلم

وحيد غيرُ ما شجن بلوح الصدر يعتمل
أصارع الدهر في جلد فيلويني وأعتدل
.
.
ثم يلويني فأعتدل

وأنا أغني بصوت لا يعجب ســواي ( ولا يهمــني )
كل طائر مرتحل عبر البحر قاصد الأهل
حمّلتو أشواقي الدفيقـة

فضـفضـوا معي بما تحسُـون الأن
أو أجيبوني :
لمــاذا أنا هنا ؟

لا يوجــد خيار ثالث

كل المــودة
ووردة لكل واحد فيكم ومعاها ( نيل ) عشان ما تموت

الأخ ثابت

الثالثة وعشر دقائق بتوقيت مكة المكرمة وبورتسودان كذلك

من جدة سيدى عروس البحر الأحمر وبوابة الحرمين الشريفين اهتف عل صوتى يصلك واناشدك ان تبقى على هذه الدعوة وتفرد لها مساحات اكبر لاننا فى اشد الاحتياج لها ..

بيننا احباب رائعون بحق والله كتاباتهم بلسم يشفى الجروح ويبعث السرور ولكن يحرمنا من كل ذلك اشياء واشياء ..

نقول لمن يعكر صفوهم اتركوهم لنا فنحن نريدهم أكثر منكم والمنبر يريدهم ليوزعوا زهرات نادية تفيد الاخرين ..

السلام عليّهم اليوم ، وغداً ..
السلام عليّهم هنا وعند أبواب القلوب المغلقة ..
السلام عليّهم هنا وعند عتبات السماء ..
والسلام عليهم في يومٍ مضى ..
والسلام عليهم خلف أبواب قلوب " موصدة " !
السلام عليهم حين كانوا ينثرون كلاماً جميلا ..

قرشــو
كلنا في الغربــة ( شــرق )
جعل الله أيامك كلها تضحك
مثل ذلك الإحساس الذي سـرى فيني بتواجدك هنا
قلنا نفتـح طاقة ونسة ونفّـاج محبــة للناس المتواجـدة
نتونس ونخفف وطأة الزمـن اللئيم
نتـآلف ونقول الجوانا

والله يا قرشـو مرات وأنا بقرأ بحس أني وسط أهـلي
ولما ألقي مشّـادة بين إتنين والله بســتحي
شـكراً لجرعـة المودة
شـكراً لعالي إحساسك

لك الإنحـناءة وما تحوي

شكرا اخى
ثابت محمد
لهذا الطرح الجميل وها نحن معك يدا بيد من اجل هذه الدعوة النبيلة .
والتحية كذلك للعميد قرشو (اقصد عميد البورد ) ما اجونا الجماعة ناطين بفهم مختلف

altahir_2
الطاهــر
يازول أنا برتــاح ليك من البالتوك
ما تشـرقني زيادة من كده
والله في حالتي دي محتاج أسمع أغنيـة
بشرط أكون مغمّـض

قلت لي ( عميــد )
لالا مافي زول بجيك دي محل ونسـة ومحبـة
حتي العميـد لو جاء ( هنا ) بقعـد معانا وبنسى هو لابس شنو
تصـدّق يا الطاهر
من أول مشاركة لحد الآن شارب ( 4 ) شاي بالنعنـاع !!

الطاهر ربنا يديك العافية

Quote: كل طائر مرتحل عبر البحر قاصد الأهل حمّلتو أشواقي الدفيقـة

لا دي حالة صعبة محتاجة إسعاف من راكوبة أو تمبس أو عم تنقو..
حاول خليك " ثابت " و الحال من بعضو !

المعــز كيفنك ؟؟
الحكاية مافيها ( أو )
أنا محتاج راكوبة بعـد الفطور
وتمبس بعد الغداء وعمك تنقو جرعـة أخيرة
وياريت كلو يجيب فائدة في زول قاعد براهو
عين فى الكمبيوتر وعين في التلفزيون
وقلبو فى البــلد
والله الغربة دي بشتنت بينا يا المعـز

الحالة صـعبة ونردد دائماً رائعـة العطـبراوي
إليكم في السودان اطير شوقاً ويحملني أريج الذكريات
فما أمـّـلت عيشاً في سواه ولا في غيره أرجو مماتي
ولكن للحياة بنا صُـروف فآآآآآآه من تصاريف الحيـاة
أحبائي بحق صـلاة ودّي وأقدسُ ما عرفت أنا صلاتي
إذا ما إلتام سـامركم وجالت أحاديث السنين الماضيات
فأخلو مقعـدي فأنا عليه بروحي بالنشــيد بمعطياتي
ولا تنسوا أزاهيري بأرضي أفيضوا بالنميـر على نباتي
وإن جاء الربـيعُ أتيتُ حتماً سآتي يارفاقي غداً سـآتي

لك المـودة يا المعــز وربنا يدينا الفي مُـرادنا

الحبيب الطاهر

اهلا بك فى منتدى السهرانين يا سيدى

وشكرا لحلو كلامك عنى ولكن اخى الحبيب ايام العمودية ولت وانتهت

الان تدور ايام أٌخر فى المنتدى ... ليتها تولى وتدبر

وليت ايام الود والحب تعود وتدوم ابدا

شكرا وشكرا للاخ ثابت الذى جمعنا حول فانوسه المنير فى هدأة الليل البهيم

تكونت اليوم مجموعة السهرانين

هنالك من يراقب ايضا بصمت فاهلا به كذلك

قرشــو الله يديك العافية
إنت عارف ؟ الله يفتح عليكم والله فتحتو لي طاقة راحة في هذا الليل
الغربة دي حتى لياليها ما بتشبهنا
لكن دا الله ودي حكمتو

إيه الدنيا غير لمّـة ناس في خير أو ساعة حـزن
وإيه الإنسان غير كلمة طيبة ونفس متسامحة ووجه بشوش
وصدر واااسع يتسع للجميع
الغضب ينهك الجسـد
وكلها قـدُر شنو عشان نزعل ونتهاتر فيها ؟
والله يا قرشو لمتكم دي حسيت بيها طقّـة حنك مش طقـة كيبورد

نتمني من الجميع الحضور كل ما سجلو دخول
خلونا نفضفض عشان الواحد ما يلقوهو فطيسة فى الشـقة

التحيــة للجميع البشارك والبتاوق والكلام يفرفر في حلقو

انتم بكرة
قصدي
الليلة(اليوم)
الجمعة ولا شنو ؟؟؟؟؟؟؟؟!!!!!!!!!!

هــوزي الرائعــة بتاعة المســلسل ؟؟
أول حاجــة جبتي معــاك طوبــة

الليلــة الإثنين يا هــوزي
بس كلو محصـل بعضـو
الأيام والليالي كلها تتشابه وتتشابك في مؤامـرة واضحــة ضدنا
ونحنا ما جايبين خــبر
كل يوم نقضــيهو خارج البـلد حقو ما يتحسب من عمرنا

إنتي مسـاهرة مالك ؟؟
حتى لو ما شـغالة نومي عشان تقومي تعملي شاي الصباح لي رفيق الحياة
الســهر ده خليهو لينا نحنا أصلنا ( عاقدين ) عليهو من زمان

بالجـد نورتي يا هـوزي
الله يحفظـك

تسلم والله

أصله انا متعودة انوم الساعة 3 صباحا

لكن الليلة طلعت في راسي ما انوم خالص لحدي بالليل عشان اظبط نفسي وانوم بدري

وبمناسبة المسلسل لأنه شكلته مدورة عشان النهايةعكس الريح فبكتب شوية

عشان ما احنا خارج البلد
الصاحيين ليها شنو
مفروض نتخمد ننننننوم

بعدين ما تذكرني بموضوع شاي الصباح ده عليك الله

هــوزي
إنتي عارفة كده أخدتي مقلب كبير!!!
أنا متأكد بطريقتك دي ح تنومي بعـد الغـداء
وح تصحي حوالي عشرة مساء بتوقيت الأمارات

والحـل
تنومي ليك ثلاثة ساعات من ( 9 ) حتى (12 )
عشان يساعدوك على برنامجك
وقصـة شـاي الصباح تقومي من دربك دا تعمليهو
وثيرمس وكباية وسكر وملعقة
وما تنسي تكتبي ورقة
حاولت أكون صاحية وما قدرت

بعدين عكس الريـح دي قلبتي فيها هـوبة
بس فى ( لحظـة شــهيق ) نقشت الحكاية

هــوزي
ما تقولي لحظـة شهيق بتعمل ليك كتمـة نفس

شكلي اصلا بطاريتي فضت
مضطرة فعلا انوم لي ساعتين تلاتة بس خايفة تبقى 12 ساعة

علييك الله حكاية سيرمس الشاي دي سامحتك فيها
لكن حكاية الورقة دي امسحها من هنا
بتجيب لي الهوا

إحنا ما عندنا كلام ذي ده والله
كله زول بطريقتو
الشاي كل شي جاهز جنبه وفي غلاية شاي معلقة ومليانه موية
يعني ما قصة هي
قال ورقة قال
انا ما بحب الشقاوة اصله


غايتو خلينا في موضوع (لحظة شهيق ) دي
لانه بصراحة ما فهمتك قاصد شنو غير كتمة النفس

هــوزي
الحـكاية شـنو ؟؟ self service
يعني أمريكان ســيستم ؟؟

Quote: غايتو خلينا في موضوع (لحظة شهيق ) دي

والله ياهـوزي ذاكرتك ضعيفـة
راجعي الماســنجر سـريع
ماتبقو عليّ إتنين ذاكرتك والغـربة

الله يديك العافية

Quote: قرشــو الله يديك العافية إنت عارف ؟ الله يفتح عليكم والله فتحتو لي طاقة راحة في هذا الليل الغربة دي حتى لياليها ما بتشبهنا لكن دا الله ودي حكمتو

ثايت العزيز

عمك الحاردلو زمان قال:

الخبر الاكيد الليلة احمد جابو

قال الوادى سال واتقرنن تقابو

كان سألونا قعادنا شن اسبابو

لامصروف ولازولن بنتسلابو

كانه قرأ ذلك الشتات برؤية مستقبلية رحم الله امير شعراء السودان الحاردلو.لم نستبين

الامر الا ضحى الغد والله يا ثابت اخوى هذه غربة رحاها ضاربة على النفس.. تصدق انا اكملت

27 عاماوانا فى هذا الشتات,,,الله كريم،،،،

صــديق المــوج
يا زوول يا جميـل

ياخ بطلتــو بوست الحقيبـة مالكم ؟؟
بتاع تيـــه وإتاكا .. عليك الله ترفعـوهو كان يرفع معنوياتنا

Quote: لم نستبين الامر الا ضحى الغد

يعني باقي لينا سبع عجاف عشان نستبين ضُـحى الغـد

صـديق المــوج
والله الغربــة دي عندها وجع براهـو
وكان ما الجميلين الزيكم كده الواحد بتنفس معاهم كان طرشق
خليكم قريب
وبالله لو جابك الدرب ( بالخبر ولا الدمام ) قول عووك

ياااارب سترك وعفوك ورضـاك

المتواجدون الان بالمنبر العام 287 شخص » (24 )عضو و (263) زائرا

»ABDELMAGID ABDELMAGID
»Al Sunda
»bayan
»elhilayla
»Ibrahim Adlan
»Kamel mohamad
»MASSOUB
»Mohamed Suleiman
»Mutwakil Mahmoud
»NAZIM IBRAHIM ALI
»Shams eldin Alsanosi
»Walid Safwat
»ابنوس
»الزوول
»الكيك
»امبدويات
»صديق الموج
»صلاح شعيب
»عبدالرحمن الحلاوي
»عبدالله
»عبدالله وداعه الامين
»محمد السر
»محمد عيد الله
»منتصر عبد الماجد

السّـاعة الآن في الخرطوم السابعة إلا ربع صباحاً
ومافي زول فايق يدخل ليهو نت
الناس يا نايمة يا في الطريق للعمل
يعني ( أغلب ) المتواجدين الآن خارج السودان
بالله بصراحة متحملين الغـربة كيف ؟؟
وهسي في اللحظـة دي بتفكروا في شنو ؟

الله يديكم العافية كلكم
ويدي كل واحد الحاجة الفي نفسو

الاح ثابت. سلام
يعني ما برانا المساهرين!!
ربنا يرد غربتنا جميعا
محمد عبد الله

محمد عبدالله
الســهر أصبح الأصــل والإسـتثناء أن ننـوم
أو حتى أن تغفــو همومنـا
فكل ما إلتـام جُـرح جــدّ بالتذكـار جُـرح

لا أدري أي خيط يربطنا بتراب البـلد
رغم طول الفتـرة التي قضيناها فى الغربـة ما زالت هذه المـُـدن لا تشبهنا
ولم نتوالف معها ولا أظن أننا سوف نستطيع

السلوى تلفزيونات السودان .. الفضائية والنيل الأزرق
وقناة الجزيرة
وشاشات الكمبيوتر الصماء أصبحت وجبة رابعـة في ليالينا
ورغم ذلك لا نعـرف كيف نستخدمها
أنا بسأل في كيبورد عندو عضـلات ؟؟
ولا الحكايـة جهل وبس ؟؟
ويبقي الخير ما بقيت أمـّة محمد عليه الصلاة والسلام

أرقد عافيـة

الاخ ثابت
شكرا يا رائع

Quote: أنا بسأل في كيبورد عندو عضـلات ؟؟

سبحان الله .. انت ما عارف ..اذا ما كان عندو
عضلات وكمان مفتلة كان خلاني ندقدق ونعافر فيهو الليل
كلو !!! يعتي مسهرنا رغم انفنا وما هاميهو
مودتي
محمد عبد الله

العزيز ثابت
لم أكن ضمن المتواجدين.. لكن ما صغتموه جعلني اقرب اليكم من زر الكيبورد
لك ودي

نشأت الإمــام

نشأت بيني وبين الليل مــودة
لأنه يُـجلي الحـزن في دواخلي
أنتم أهـل نهار ومرتاحين في صـدر الخرطوم
ترضعون من أي نهــد تحبون
تعيشون كما أراد الله للبشـر .. الليل لباسا والنهار معاشا
أما نحن فحياتنا مقلوبة

لولا ما تتركونه هنا في نهاراتكم لإفترسنا ليل الغربـة أكثر

خليك قريب ونهارك ضاحك

محمــد عبد الله
الليلة مالك تأخرت على الســهرة ؟
إن شاء الله المانع خيـر
في بطن هذا الليل أنتظر ضــوء قدومك
.
.
المــودة الكاملة

المتواجدون الان بالمنبر العام 375 شخص » (42 )عضو و (333) زائرا

»Al Sunda
»ALHALAWI
»Ali Alhalawi
»anwar abu gaidaa
»ASHRAF ABUELHASSAN
»EL fahal Abdelatif
»Foetus
»gamal elsadig
»Hassan Abdoun Mohamed Ahmed
»Kamel mohamad
»Mahadi
»Mahathir
»Masaoud Ali
»Mohammed Elhaj
»Muna Khugali
»nour tawir
»Omar Bob
»Othman H. Al-Hori
»saadeldin abdelrahman
»shammashi
»Yousif AHMED
»أبو ساندرا
»إسماعيل حميم
»احمد معتصم الطيب
»الجندرية
»الزوول
»ايوب عبدالرحيم
»برهان تاج الدين
»بكرى ابوبكر
»ثابت محمد
»خالد عويس
»خدر
»دفع الله خطاب
»زول ساكت
»شروق على فضل
»عبد الحميد البرنس
»عبدالرحمن عبدالله أبوشيبة
»عبدالله
»عبير خيرى
»معتز تروتسكى



صباح / مساء الخير على الجميع

رغم أن صباحات ومساءات البعد عن الوطن كلها تتشابه
حتى أيامه تتشابه فقط نعرف ( الجمعـة )

للمتواجدين داخل الوطن .. طــوبى لكم
ولأمثالي .. أحسن الله عــزاكم في أيام ضائعات
والزهج 1000 والله

كامل المـودة

المتواجدون الان بالمنبر العام 295 شخص » (19 )عضو و (276) زائرا

»ABDELMAGID ABDELMAGID
»Al Sunda
»Deng
»Dia eldin khalil
»Khalid Kodi
»Masoud
»salah elamin
»Waeil Elsayid Awad
»أحمد
»الكيك
»ثابت محمد
»حيدر حسن ميرغني
»خالد العبيد
»سهام نابرى
»عبدالرحمن الحلاوي
»عمر ادريس محمد
»محمد السر
»محمد عيد الله
»ولياب


صباح / مســاء الخير للجميع
السـاعة السابعة وخمس دقائق بتوقيت مكة المكرمة
مدينة الخبر بشرق المملكة تنهض من فراش الأمس باكراً
.
.
طمنونا عليكم
الإثنين الخامس من ديسمبر 2005 م

وحــيد غير ما شـجن بلوح الصـدر يعتمل
أعارك الدهـر في جلد فيلويني وأعتـدلُ
ثم يلويني وأعتــدلُ
.
.
أها لي متين نحن في المصارعة الخاسرة دي مع الهموم
والضجر
والقلق
والغُــربة
؟؟؟

قد تضحك

عاجباني القمرة بتاعتك البتلف وتم شهر في ثانية.


انتو بتجيبوا الحاجات السمحة دي من وين.

بعد دا النوم وجب الساعة 1:53 ص

القلب النابض
ســلام
وهل ينــام النبض ؟
لما تكوني داخل ( الشبكة ) ح أوريك من وين الحاجات دي


بس إنتي عارفة ؟
الزمن أصبح أسرع من هذا القمر
أصبح يكمل ( السنة ) في ثانية
وكلو من أعمارنا .. ربنا يدينا حُسن الخاتمة

كامل المـودة

السبت
بداية الأسبوع ... يوم ثقيل الظل .. يمر ببطء
كل الهموم والواجبات تنتظر صباح السبت عند آخر بوابات ليل الجمعـة
بقية أعمال مؤجلة من الأسبوع المنصرم
هموم المكتب لأسبوع قادم
بعض الإتصالات الضرورية
رغم ذلك
مازلتُ حتى الآن في المنزل .. وليس هناك رغبة في الذهاب للعمل
والساعة الآن التاسعة وخمسة دقائق صباح السبت 24/12/ 2005م
توقيت الخُـبر شرق السعودية
اليوم يقابل أعياد الكريسماس

عندما يمـر يوم السبت يتبقى فى الأسبوع يوم واحد
وبالكثير يومين
حتى أنني أتخيل ( أحياناً ) أن السبت لوحده خمسة أيام

محتاجة لنومة الحوش وجنبى فى السرير التانى ابوى وبى هنا وهنا وهنااااااك اخوانى حبابيبى !!!

قطار الشوق متين ترحل تودينا نزور بلداً حنان أهله ترسه هناك ترسينا ..
قطار الشوق ده ليل الغربة كله ودار .. متين توصل هناك وتكمل المشوار ..
..
لك التحية الأخ ثابت
خالد الأرباب

الثالثة إلا خمس دقائق من صباح الإثنين
مدينة الخُـبر السعودية
راجع قبل ربع ساعة من كورنيش الخُـبر
والحال ياهو نفس الحال
لا طااب لا بدور يبرا
فهو جُـرح الروح المتلهفة للإستقرار بتراب آخـر


خالد سعيد
لما تسمع صفارة قطار الشوق أحجز لينا معاك

نادية عثمان
إن شاء الله الهترشة والجن راحو منك ؟؟
لو ماراحو تعالي
نُـطبق الجُـرح على الجُـرح ونتحرى النتائج
فقد تُثمــرُ راحــة ( حتى مؤقتــة )

ولجميع المتواجدين بالمنبر العام
هل فيكم من يعرف في أي جهة تُطعـن الغُربة ؟؟

أشاهد الآن قناة LBC نغــم
مسابقة إسـتار اكاديمي
كمية من التيشيرتات وبناطيل الجيــنز
ولعلمكم بنطال الجينز لا يلتقي بالتي شيرت أبداً
هناك منطقة فارغة .. لا أدري لماذا
غنــاء ورقص
رقص
فوق الحد الصقيل الفاصل بين
الذنب والمغفـرة
كل حياة _ نجوم المستقبل _ منقولة بالكاميرا
حتى نومهــم
.
.
دعـوة للمتابعة والتعليق

اليوم الجمعـــة
الثلاثون من ديسمبر 2005
آخِــر جمعــة في هذا العــام
نتمنى لكم عاماً جديداً جميــلاً مليئاً بالحب والســلام
بعيداً عن الخــلاف والمناكفات الجوفــاء والمهاترات
.
.

كل عــام وأنتم بخير

مساء الجمعــة
30 ديسمبر 2005
والعالم يســتعد للإحتفـال بالعام الجديد
في فقـرة حصاد اليوم بقناة الجزيرة الفضائية ( 11 مساء )

خبر أول :
مقتل ( 25 ) من اللاجئين السودانين بالقاهرة على أيدي الأمن المصري
صور مؤلمة دماء على الوجوه .. معاملة خشنة وركل بالأحذية

خبر ثاني :
السودان قد يُغـلق سفارته ببغداد تلبية لطلب خاطفي الرهائن

كل عام وأنتم والوطن بألف بخير

الجمعــة السادس من يناير 2006
السابعة والنصف إلا خمس دقائق توقيت شرق السعودية
مرت ستة أيام من العـام الجديد .. ولا جـديد
تبقت ثلاثة أيام على عيـد الأضحـى
لا ندري بأي مكان سنكون ؟؟

وقلّبت كل قنوات التلفزيون
الفضائية السودانية : حلقة عن تونس مخلوطة شعر سياحة وسياسة
النيل الأزرق : حوار سـياسي أطرش وأماني ســراب
الجزيرة : إنهيار عمارة في مكة المكرمة و ( 53 ) ضحية
إيه آر تي الرياضية : ليس هناك بث مباشر إنما العام الماضي يعيد نفسـه

أغلقت الصوت وتركت التلفاز خلف ظهري
أغلقت كل أبواب الأمـاني المتعلقة بالعـام الجديد
.
.
فتحت نافذة همــومي وسندت ظهري للكرسي
وآآآآآآآآه طويلة

عيد جديد؟؟!!!
سلام من اقاصى الدنيا والزمان لو ابرقت فيه سحابات حوامل لم يكن فيها جنين كالتى من بلادى...
عيد جديد؟؟!!
دعونا الان نقترح القوانين المواكبة لاترباك الموج ؛ نلغيها احاسيسنا..ونصنع من زغاريد النواح المحتدم انشودة للارتياح او شهوة للانسجام..
عيد جديد؟؟!!
وعرس العيد مدخرُُ ليوم عرسهُ نحن .. شربنا كاس ماضيه ..هضمنا كل حاضره.. طبخنا الاخر الاتى وسقنا هذه الوقفه لليل الحزن فى بلدي ..شعاع الموت يابلدى ..ذهاب الماء بعد الماء كارثة ..خيول الشمس دون صهيل كارثة...
وعيد جديد؟؟!!
وتمنياتى لكم بالتمتع بالشوق عند الخفقة العليا ؛ بى همسة التوليف فوق الحاسة العليا..
و بالصحة وترا يدندن كى يزيد العافية اصرارا..وانتعاش الامسيات...
لكم مقعد الفرح ؛ولوحة الطفولة ؛ وفرح للتصفيق..
تعالوا نجرب الضياع المتجرد خلف صورة ماهولة بالمعانى.. ربما صورة ماهولة بالصور التى ودعت مفهوم التقيلد وازدهرت....
كل عام وانتم بخير وصحه ..
والسنه دى قبل الجاية تحقق الامانى ..
دمتم بعافية ويحقق الامانى للجميع ..
من كل قلبى لك الحب..(ثابت محمد)..
اول ايام عيد الاضحى
معتز تروتسكى

كل سنة وانتم بخير

ســيف مســاعد
كل عــام والحب والجمـال يغطيانك

الخامسة إلا ربع مساء الأربعاء 18 يناير 2006 توقيت شرق السـعودية
هكذا بدأ العام الجديد يتسلل من بين أصابعنا
لم تبدو حتى الآن ملامح جديدة
الأيام والليالي تتشـابه كعادتها
الغُـربة تتمكن من العظـم وترتاح في النخـاع
الأمــاني مازالت كثيرة لا يسعها ما تبقى من العمـر
والتقصـير والفشل واضحين على كل الأصـعدة
لكن
لا زلنا نتنفس المحبـة

ربنا يكون في العـون

معــتز تروتسكي

خوالص المـودة
شـكراً لهذا ( البنفسج ) الذى نثرته كالملح فوق جروح البُعـد
تباً لهـذه المدن التي لا تترك إضاءاتها أي إحساس بمتعـة الليل
وتباً لهذه الحوائط الأسمنية التي لم تختلط بطين البحر
وتباً لتك الأشجار التي لا تشــبه أنوثـة نخلنا وكبريائه

وتباً لنا نحن إن فارقنا النيل بدون أن نهمس في أذنه بسبب رحيلنا
أوففففففففف

معتــز
ندعو الله أن يهبنا ريش وجناح يضعنا هناك حيث رائحـة الأهل
هناك حيث يعانقنا التراب فكل شىء هناك يعشقنا
تعشقنا كل الأشياء وكل الأماكن فقد عاشرناها جميعاً ومازلت تحفظ الـود

معــتز تروتسكي
سأفتح نافذة الروح الآن .. كم أحتاج أن أرى مكان عزيز عليّ
حيث يطبع الأزرق الثائر قُبلـة على خد الأبيض الرزين
هناك خفيـة تحت أشجــار توتي

على غير عادة الحياة معـي
ولعُــدة أســباب
منها وجـود شـقيقتي معي في زيارة
وأسباب آخـرى منها .......
يغمــرني فـرح غامــر

جعل الله كل أيامــكم أفـراح

عندما تُثــار المشاكل والمهاترات في المنبر
نعيش حالة ضيق وإحباط
نتمنى أن تنقشع السحابة بالسرعة التي جاءت بها

وعندنا يعم السكون
نكون في حالة تأهب للمشكلة القادمة ونتمناها خفيفة
وفي الحالتين نحن ضائعيين
المراقبة والإنتظـار

متى تصـفو النفوس ؟؟
متي يأتينا اليقين بأن لا مــزيد من التهاتر والتّسـاب ؟؟

يااارب تصلح حالنا

الرابعـة والنصف من صباح السبت 29 يناير
والتفكيــر لا ينقطع في الأهــل والأقارب بالوطن

كيف باتوا ليلة البارحـة ؟؟
متي نقابلهـم؟
هل سيغفو القدر قليـلاً لنجتمع مع من نُحب ؟
كل ما تطـول بنا أيـام الغُربـة والبعـد عنهم
يتملكني هاجس أن لن ألتقيهم كلهـم أو أن يفقــدوني
كيف تغــلظُ قلوبنا لنغيب كل هذا الغياب؟
ماهي أسباب البعـد وأهدافه ؟؟
هل تحققت الأهداف وهل ستتحقق لو أطلنا الغيـاب ؟

رأس يضـج بالأسـئلة وقلب يضـج بالأشــواق
وبين الضجيجين نعيش أيام متشابهة ..آلآم تتراكم .. وآمال تتهاوى

والأمـر لله من قبل ومن بعـد

خمسة دقائق بعد منتصف الليل
الثلاثاء يطلُ صباحها
الضغوط النفسية تتزايد
الضغط البدني يتكاثر
الهموم تتراكم
والعون من عند مليك مقتدر

أحتاج صديقاً صادقاً نبيلاً
أشكو له بلواي ويسمعني
ثم على صدره أبكي وأبكي حتى أضحك
عندها أظن أن الدنيا ستورق من جديد

عطـّر الله أيامكم بالجمال

تعـال ياثابت صـديقي,,
اشـكي لي عن همـومـك,,
اتقاسـمها معك لأخـفف عنـك..

الخامسة وأربعون دقيقة صباح الخميس
سعيد جداً بتواجد شقيقتي التي لا تزال معي بمدينة الخُبر
سعيد أكثر أنّ نوبات الصداع النصفي اللئيمة بدأت تتناقص

عدتُ لتوي من الخارج
تملأني السعادة على غير العادة
لألتقيــكم وأقول لهــؤلاء جميعــاً

المتواجدون الان بالمنبر العام 280 شخص » (24 )عضو و (256) زائرا
»Abd Alla Elhabib
»Abomihyar
»Ahmed Khalil
»ali elhassan
»ASAAD IBRAHIM
»Biraima M Adam
»Elkhawad
»Elmoiz Abunura
»Gazaloat
»kamalabas
»Marouf Sanad
»Mohamed Doudi
»Mohammed Haroun
»Najat Al-Bashir
»NAZIM IBRAHIM ALI
»Sabri Elshareef
»Yassir Tayfour
»ابوعسل السيد احمد
»الطيب بشير
»القلب النابض
»بكرى ابوبكر
»ثابت محمد
»عبدالعزيز حسن على
»فارس موسى
جعل الله كل أيامكم سـعيدة