البــالتوك .. وما أدراك ما أوجاع .. البــالتوك

Post: #1
Title: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 04:15 AM

Post: #2
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 04:20 AM
Parent: #1

طيب
ماذا بعد التحميل وإختيار الإسم المستعار؟
ما الهدف وطريقة تحقيق الهدف ؟

منتظركم

Post: #3
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 05:12 AM
Parent: #2

ياشباب
mic free
المايــك فـــري

Post: #4
Title: Re: البــالتوك .. وما أدراك ما أوجاع .. البــالتوك
Author: soma
Date: 11-18-2005, 05:17 AM
Parent: #3

اخوى ثابت .. جمعتك مباركه
وانت يا يابا تتبارك ما تتشارك
ضحكتنى لوووووووووول (mic free)
ان شاء الله دائما ضاحك
يلا واصل مسلسك انا راجياك
بس اوع من الشوت
اها فى آدمن ولا مافى ؟
نشوفك هناك
ودعتك الله

Post: #5
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 05:34 AM
Parent: #4

ســوما
آدد سريع بالله

تسلمي سـوما ربنا يديك العافية
عشان نخش الموضوع عاوزين نعرف
الطريقـة المُثــلي للإسـتفادة من البالتوك
الأخطاء التي نرتكبها
طريقة تعاملنا مع البالتوك

تحياتي لك ولأسرتك الكريمة
ولصديقنا الفنان المتجول

Post: #6
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 12:20 PM
Parent: #5

معظم الغُـرف السودانية بالبالتوك
تتشابه تماماً
ليس هناك موضوعيـة
أغلبها هرجلــة .. وقت مُهــدر

Post: #7
Title: Re: البــالتوك .. وما أدراك ما أوجاع .. البــالتوك
Author: Masaoud Ali
Date: 11-18-2005, 12:32 PM
Parent: #6

ومنك أحلى مايك

كيف كدة ياشباب .. تمام !!؟
ماعندى أى موضوع بس حبيت أسلم
ليك احلى مايك

مايك فري

***
ملحوظة : أعلاه هى النغمة التقليدية السائدة دائماً أو فى الغالب وفى معظم الغرف وبعدها أو قبلها كثيراً ما تكون فى " شكلة" من نوع ما..

أوافقك فى النقاط التى أوردتها وسأعود لاحقاً بشئ من التفصيل ربما

Post: #8
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 12:48 PM
Parent: #7

مسعود علي
شكـراً على المرور
Quote: ليك احلى مايك .. مايك فري

كويس لو جات على كده
مش أحسن من
مايك فرفوووور ومايك فراشــة

والبسلم كتّر الله خيرو في ناس يمسك المايك
يقول ليك : ممكن أشـغّل ( سونقاية ) من ( song )

الموضوع كبير
والوقت مهــدر .. ربك يعين

Post: #9
Title: Re: البــالتوك .. وما أدراك ما أوجاع .. البــالتوك
Author: Balla Musa
Date: 11-18-2005, 12:53 PM
Parent: #7

السامعنى يكتب واحد

من نكات البالتوك واحد برلوم أخد المايك وقال يا اخوانا سامعنى?
ومنتظر يسمع الرد
والجماعة بكتبوا ليهو فى التكست سامعين
قام خلى المايك وزعلان قال مادام مارديتو أظنكم ما عايزنى.
قام واحد وضح ليهو الموضوع وقال ليهو إنت ماحا تسمعنا لأنو المايك واحد وانت ماسكو.
سلام ياشباب
وتحيات ياsoma25
وإظنو لو بديتو وريتونا النكنيم بتاعتكم فى البالتوك يكون البداية على موية بيضا.

Post: #10
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-18-2005, 01:15 PM
Parent: #9

بلة موسى
مرحب بيك فى الغرفـة

قبل أسبوع
واحد قال لي أعمل لي إضافة فعملت الإضافة
جاني فى البرايفت وقال لي
إنتي داخلة من وين ؟؟؟
قلت ليهو يازول أنا راجل
قال لي رووح يا .... أنا قايلك ( جكس )
زي ده هدفو من البالتوك واااضح

المهم

Quote: وإظنو لو بديتو وريتونا النكنيم بتاعتكم فى البالتوك يكون البداية على موية بيضا

بالنسبة لي أنا
Oxy_nOOn
بس تعمل إضافة
عندي إحساس إنك ( سكوت )

Post: #11
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-19-2005, 08:02 AM
Parent: #10

تأكيداً لعدم الموضوعية
الواحد يجي داخل الغرفة يمسك المايك
يقول ليك :
يا آدمن ( التوبك ) { TOPIC } شنو ؟؟
طيب ما دام مش عارف الموضوع .. أصبر شوية

Post: #12
Title: Re: البــالتوك .. وما أدراك ما أوجاع .. البــالتوك
Author: Deng
Date: 11-19-2005, 10:23 AM
Parent: #1

الاخوة والاخوات الكرام

البال توك يجمع عدد كبير من السودانين فهم يدخلون من جميع انحاء العالم.
انا كنت احد الاعضاء المواظبين , ولكن نسبة لانشغالي وسفري الكثير فلم استطيع دخول البال منذ اكثر من عام.
ميزات البال توك فهو يجمع بين اصحاب الامزجة المختلفة. فمثلا هناك ابو عتيك الذي يصدر فتاوي ويهدر دماء بعض الاعضاء عندما يفشل في نقاشهم. وهناك الاخ نصار الغيور على وطنه, فهوا دائما يدخل ويشارك في النقاش الجاد ولقد كان يتفنن في ادارة الندوات بطريقة فائقة جدا. وهناك الشاعرة سوما وهي عندما تستلم المايك تجذب انتباه الجميع لشعرها السزداني الاصيل وصوتها الخلاب.

JAZZ16

Deng

Post: #13
Title: Re: البــالتوك .. وما أدراك ما أوجاع .. البــالتوك
Author: معتز تروتسكى
Date: 11-19-2005, 10:51 AM
Parent: #12

خالص التحايا الجميع
زى مابقولوا والله ايام يازمان
ايام يادينق..
بالمناسبه خلاف خلافاتنا الهنا اخبارك وصحتك يازول ونعلك بخير..

البــالتوك .. وما أدراك ما أوجاع .. البــالتوك
زى ماذكر دينق تجد الجاد والهزل او فى وصفه لتك الشخصيات ..
انا ايضا لى قرابة السنتين او (حاربتو عديل)..
ربما اكون من رواده منذ دخول النت فى السودان ..
عموما كنت اخش مرات بسيطه باسم trotsky
لكن اسمى الشائع هو
democraty1000

Post: #14
Title: Re: البــالتوك .. وما أدراك ما أوجاع .. البــالتوك
Author: soma
Date: 11-19-2005, 12:23 PM
Parent: #13

سلااااااااام يا الغايبين
والله لكن يا ثابت يا خوى بوستيك ده
طلع المخفى ومستخبى على قول اهلنا المصريين..
حبابك دكتور بله موسى .. ياهوووو زاتووووووووو سيكوت يا ثابت
ولا انا غلطانه
قلت لى السامعنى يكتب واحد ؟ لوووووووول..انا غايتو بقول ليك هنا قول الشايفنى يكتب واحد .. وشفنااااااك عشان كده بنكتب واحد بالعربى عديل
بالله تحياتى لاحلى زهرة روما فى الدنيا .. وكل سنه وانتو طيبين

*** نجى لى دينق .. امانه ما وقع راجل .. سبحان الله ..ده يا انت يا جاز .. والله شوق مولع نار
لكن صورتك فى البال مختلفه تماما عن دينق الزول الانا بعرفو هنا .. هاااااااااااااادىء ومسالم .. طبعا برضو انت هناك مسالم لوول لكن ما زى هنا ..لكن ضحكتنى بى ابو عتيق .. عليك الله ما تجيبوا لينا بى جاى كمان
كل سنه وانت طيب يا جاز والف تحيه

** ديمقراطى كيفك .. كل سنه وانت طيب ..ربنا يسعدكم ويهنيكم ويديكم الفى مراضكم
يلا اكشفوا لينا باقى المستخبيين .. انا غايتو بعرف مجموعه منهم
لكن احسن يفصحوا نفسهم براهم ..ولا شنو ؟
فتكم بى الف عافيه

Post: #22
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-20-2005, 04:38 AM
Parent: #14

ســوما
شايفة كيف الناس بدت تطلع ؟؟
الظاهر أنا عاوز معاي ( آدمـن ) تاني للبوست ده
تعالي برايفت أديك ( الكود )
بس بالله ما تديهو زول تاني ولو طالعة أقفلي ( الرووم )

سوما
أنا متوقع ناس كتيرة تخش هنا
بس إنتي الواحد لو ما عرفتيهو ماتفكي منو ( الرد دوت )

ونلتقي يا مرهفـة

Post: #15
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-19-2005, 03:26 PM
Parent: #12

الأخ العـزيز ديـنق
وفي رواية بالتوكية JAZZ16

لك الشـكر على مرورك

الغرف السـودانية في البالتوك صورة كربونية عن السودان الوطن
ضياع زمن .. إهدار مقدرات .. خصومات وحروب
وأحياناً ســقوط أخــلاقي
أنا أتحدث عن السـواد الأعظم
وهذا لا يلغـي بعض الإضاءات الصغيرة الموجودة

واصل معنا .. ففي النفس الكثير ليقال

لك مودة كاملة الدسـم

Post: #16
Title: Re: البــالتوك .. وما أدراك ما أوجاع .. البــالتوك
Author: الخير محمد عوض
Date: 11-19-2005, 07:30 PM
Parent: #15

الاخ ثابت

لك التحيات النواضـر

بالله ياجماعـة مافي واحـد يعمل(jump)...هههههههههه

والبعمـل كده ما حا نعمل ليهو (آد في الفؤاد)...هههههههههههه

بس انا داير اعـرف الادمن دا( شـاتني) ليه.

وذات مـره سمعـت اباعتيق وهـو منشــرح يغني..فقمت عملت لي (jump) اضطراري

دا شنـو يا مولانا, ما قلت الغنى حـرام؟ فما كان منه الا وأن رد:

ياوليييييييد هوووووووى الحرام شـنو انت نسيت انا (ادمن) ولا الطاقية دي ما عاجباك!!!

ولي عودة.

Post: #28
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-20-2005, 11:58 AM
Parent: #16

الخيــر محمد العوض
بالله أرفع يدك وخلييك في الصف
أو
بعمل ليك ( رد دوت )
ياجماعة بالله ما تنطو العاوز المايك يرفع يدو

الخير أنا اللي عملت ليك ( bounce )
ما كنت قايلك سوداني .. أول مرة أشوفك
وبعدين إنت عارف الأوباش البهاجمو الغرف السودانية

المهم يا حبيب أمسحا لي في وشي

Post: #17
Title: Re: البــالتوك .. وما أدراك ما أوجاع .. البــالتوك
Author: altahir_2
Date: 11-19-2005, 08:28 PM
Parent: #12

هو دا انتا بالله تتجازى يا جاز
تحياتى لك altahir2
وسلام لكل اصدقائنا واحبابنا فى البال
lakeen bi algad alpal biga mskhara ya 7lel ayamo

Post: #30
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-20-2005, 12:08 PM
Parent: #17

يا ســـلاااااام
الطاهر زااتو
يا شباب دقيقــة
بالله يا سوما ممكن دورك لي altahir2 وإنتي تعالي بعديهو

الطاهر بالله سـمّعنا أغنية من بيت الكلاوي

مايك معطّـــر

Oxy_nOOn

Post: #18
Title: Re: البــالتوك .. وما أدراك ما أوجاع .. البــالتوك
Author: عنيده
Date: 11-20-2005, 00:52 AM
Parent: #1

ويييييييين ياانا
البال بجد فيه مافيه
الواحد بكون داخل بكم اسم (اندر كفر )
يقول كلام حنين باسم وبعدا يجي يشاكل ويشتم
باسم تاني ,,,,
عموما" اسم عنيده مريحني لانه منفر
يعني المسنجر الداخلي بكون عندي فااااااااااضي
ودي براها( رحمة قاعد المابتواعد)
لكن في البال تولك الوضع اختلف,,,,
مره اختك زهجانه وبرلومه في البال لقيت لي رووم
شعر بث وحاتك اتحكرت وقعدته وشبكوني ليك ارفعي يدك
ولا انتي اندر كفر ولد مابت,,, رفعت يدي وقلت ليهم والله
برلومه وماعندي الاقولو بث مادام الناس بتتكلم في الشعر
والشعيريه اها هاكم دي ,,,, والله ياثابت حصلت شكله لو الناس كانو
لايف يمكن كان يكون في ضرب,, وخلو الموضوع دا وبقو في موضوع
البت لما يكون صوتا سمح معناها شينه
وبقيت في الطريقه التثبت لي خلق الله ديل
اها اختك ولا عشه الغبشاوي مسكت ليك المايك وقلت ليهم
لا كلو ولا المشاكل واديتم خطبة عصماء
وشعاري البتعرفو داك (ايه الدنيا غير لمة ناس في
خير او ساعة حزن),,,,
وناس اعملي لي اد بالكوم ,,,
,,,, هناك عرفت اناس رايعين جدا جدا"
منهم اناس عرفتهم من من قبل من خلال كتاباتم
ومداخلاتهم او احدي المنتديات
وفيهم الصالح والطالح .....
والاشرار كميات لكن الاخيار اكيد اكتر
وكلو كوم والبت البتجيب ( دلوكتا) كوم تاني!!!
فاصل ونواصل ,,,,
وعلي قول حجه امنه
كان الخرف كتر كلام
السلام ختام وبث

Post: #32
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-21-2005, 06:50 AM
Parent: #18

عنيدة
فكي ( الميوت mute ) عليك الله ولا بشووتك
(أندركفر ) الليلة دا إسم الزهج ولا شنو ؟؟
في ناس لما تكون زهجانة بتخش بي ( نكنيم ) جديد

عنيدة
إنتي صوتك كان ( شين ) ولا شنو ؟
أسمعي دي منو بتاعة الدلوكة ( kelley )

دي بالغتي فيها يا عنيدة

عموماً الروم ترحب بيك

Post: #19
Title: Re: البــالتوك .. وما أدراك ما أوجاع .. البــالتوك
Author: حمزاوي
Date: 11-20-2005, 02:12 AM
Parent: #1

ثابت
سوما
بشار
سواح
د . جون
عتيق
ابوحمزه النوبي
توباك
سي دي
المنصوري
وبقية العقد الفريد لكم جميعاً تحياتي
انا لي اكتر من سنة ما دخلت البال

أخوكم
kordom

Post: #20
Title: Re: البــالتوك .. وما أدراك ما أوجاع .. البــالتوك
Author: معتز تروتسكى
Date: 11-20-2005, 02:59 AM
Parent: #19

خالص التحايا
ثابت والجميع

وينك ياسوما
كفينك والحاله عموما اخبارك وصحتك وكل سنه وانتى طيبه ..
ياهو انتى وبعضهم الواحد طلع بى بصحبتهم التى تشرف..
قلتى لى كنت لابت..لووووووووووول
عموما زى ماذكرتى هم كُتار هنا وعاملين فيها لابدين..
قايتو كان مشيتى سلامى للجميع
ود ابرق -داخ- ويندى -صلاحكو- وو الخ القائمه تطول ..
حتى ابو عتيق ذاتو كان لقيتوه سلمو عليهو
والله ايام لكن...

والتحايا النواضر..

Post: #21
Title: Re: البــالتوك .. وما أدراك ما أوجاع .. البــالتوك
Author: Masaoud Ali
Date: 11-20-2005, 03:21 AM
Parent: #20

من المفترض أن تكون غرف البالتوك واحة ثقافية ترفيهية تجمع الناس فى إخاء ومحبة وتربط المغتربين ببنى وطنهم فى الشتات وداخل الوطن أيضاً بحميمية واحترام وتطرح المفيد .. ولكن بكل أسف أصبحت غالبية مرتادى هذه الغرف من الإنصرافيين والمهرجين والمتعصبين والمتزمتين والمراهقين وأصحاب النزوات وعشاق المشاجرات والسباب .. لذا فقد زهد وابتعد كثيرون كانوا يسهمون بما يفيد ويسلى ويزيل عن الناس بعض مرارات الحياة وأوجاع الغربة.. برأيى لقد صارت أغلب الغرف السودانية " هايفة " وعديمة الجدوى وتخضع إدارتها للمزاجية والإنصرافية ، وسوء الظن والتقديرات الخاطئة والتربص فى كثير من الأحيان .

برجع تانى حسب الظروف

Post: #36
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-26-2005, 03:58 PM
Parent: #21

الأخ مسـعود علي
ســلام
والله كلامك كلو حاااصل
وشكلك كده كرهان البالتوك عن تجربة طويلة
وأنا في إنتظار مداخلتــك
أتمنى أن تأتي حسب وعـدك وليس حسب ( الظروف )
فالظروف دائماً لا تطيعنا ..

لك كامل المـودة

Post: #34
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-23-2005, 03:40 AM
Parent: #20

معــتز تروتسـكي
التحيات النواضــر
كان البالتوك جميـــلاً ومفيداً
لكن ... كيف هو الآن ؟؟
أتمنى أن تعــود لتُشـخص العلــة التي لحقت به
لما عُـرف به قلمك الرصين

أمنياتي

Post: #33
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-22-2005, 06:36 AM
Parent: #19

حــمزاوي
بيني وبينك إنت طولت كتير
وياريت تحكي لينا البالتوك قبل سنة كان كيف ؟
هل كانت هناك فائدة من النقاش ؟
هل كانت المواضيع تستحق إهدار الوقت ؟
ومنتظرين نقول ليك

أحلى بـااااااااك

كامل المـودة

Post: #23
Title: Re: البــالتوك .. وما أدراك ما أوجاع .. البــالتوك
Author: فيصل نوبي
Date: 11-20-2005, 04:58 AM
Parent: #1

سلام يا شباب

تروتسكي امشي نوم

انت اصل البال توك زاااتو

هسي عليك الله في الصورة دي كنت شارب شنو

Post: #24
Title: Re: البــالتوك .. وما أدراك ما أوجاع .. البــالتوك
Author: عنيده
Date: 11-20-2005, 05:21 AM
Parent: #1

يا(ادمن )عندي رد هنا (الشاتو ) منو
بعدين انتو (الرووم) دي قصدي البوست دا مسكون
اول مشاركه لي هنا بث جيت اعدل فيهاحاجه صغنووونه
لقيت في تعديل خرطمية مره
معتز يانوبي(اندر كفر)
يلا ياثابت يا(ادمن) (المايك فراشه)

Post: #25
Title: Re: البــالتوك .. وما أدراك ما أوجاع .. البــالتوك
Author: فيصل نوبي
Date: 11-20-2005, 05:24 AM
Parent: #24

Quote: معتز يانوبي(اندر كفر)

ليه انتي قايلاو عنيدة !!!!

مليون غرفة في وقت واحد

Post: #26
Title: Re: البــالتوك .. وما أدراك ما أوجاع .. البــالتوك
Author: عنيده
Date: 11-20-2005, 05:38 AM
Parent: #25

يا(ادمن) ( شوووت )نوبي بره البوست بالله

تخريمه
انت حاسد ولا غيران

Post: #27
Title: Re: البــالتوك .. وما أدراك ما أوجاع .. البــالتوك
Author: فيصل نوبي
Date: 11-20-2005, 06:04 AM
Parent: #26

عنيدة

فكي المايك ده من يدك سرييييييييييييييع

Quote: يا(ادمن) ( شوووت )نوبي بره البوست بالله

نوبي ده VIP ولا نسيتي

Post: #39
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-30-2005, 02:58 AM
Parent: #25

فيصل نوبي
بطـّـل ونسة في ( التكست )
وشوف لينا توبك ( topic )
لو ما عندك موضوع ممكن ترفع يدك وتشارك
أغنية .. أو تسلم علي الناس
سـمّعنا صوتك ياخي

Post: #37
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 11-28-2005, 02:46 PM
Parent: #24

أحلى مايك من أحلى عنيــدة
ياجماعة معاي تلفــون
.
.
brb وكــدا

Post: #29
Title: Re: البــالتوك .. وما أدراك ما أوجاع .. البــالتوك
Author: Deng
Date: 11-20-2005, 12:01 PM
Parent: #1

الاحوة والاخوات.

من طرائف البال توك كان في واحد اخونا كده كان بدخل من امريكا على ما اعتقد, الراجل ده مشبهني بي واحد جارو في بحري وكان مصر انوا انا من بحري.
قدر ما حاولت اتكلم مع الراجل واقول ليهوا يازول انا ماعندي علاقة ببحري ولا بشتغل في الامم المتحدة, زي ما انت بتقول, اخونا اصر اصرار شديد بانو انا زولو. تدخل الاجاوبد من الاخوان واذكر منهم اوسلي وسيد مرارة,انفردوا باخونا في غرفة خاصة وشرحوا له بان جاز ده زول تاني. اخونا ركب راسوا ودخل ماي في خصام وعداء شديد, وقال انا اتغابيت فيهوا العرفة.

الطريف في الامر انو اخونا ده كان بعمل معاي مشاكل وهو دائما سكران.
الله يطراه بالخير ولو شفتوه يا ناس البال القدام بلغوهو تحياتي وسلامي وقولو ليهو جاز ده ما عنده علاقة بي بحري ولا بي الامم المتحدة.
وتحياتي للخصوم بالبال قبل الاصدقاء.

JAZZ16

Post: #31
Title: Re: البــالتوك .. وما أدراك ما أوجاع .. البــالتوك
Author: soma
Date: 11-20-2005, 02:14 PM
Parent: #29

حبااااااابكم تانى

قلت لى ابقى معاك ادمن يا ثابت ؟
انا لبست الطاقيه دى مره واحده ولما جيت اقوم بالمهام الرسميه
لقيت روحى بره الروم.. يعنى بالاختصار المفيد شت روحى لووووول
وما عرفت ارجع تانى.. لما قفلوا الروم وفتحوا واحده تانيه

اها فى ناس فتح الروم دى عندهم زى فتح الشباك .. شغالين سماسرة اجار بس
والعجب البكون زعلان ليه من زول ويلبد ليه ويجى ادمن معاه ويقفل الروم فى روسينا
ويشتت الخلق فى الشاره شتيت الطماطم
حالة صعبه.. مره كنا فى روم فجأة لا نحرى ولا ندرى الا لقينا روحنا مكومين برااااااااااااااااااا الشكيه لى الله .. وكل زول يكتب للتانى فى البرايفت الحاصل شنو ؟ فى النهايه كل زول قام نفض روحوا ولملم نعيلاته ومشا يكابس بكل سزاجه لى روم تانيه .. نحن السودانيين ديل طيبين طيبه تغبى عديل
ودعتكم الله
جاز احلا شكله كانت بينك انت وابو عتيق .. خاصه مسلس النافذه داك ههههههههههه
سلام لى كل الفوق .. والجايين
سلام

Post: #35
Title: Re: البــالتوك .. وما أدراك ما أوجاع .. البــالتوك
Author: soma
Date: 11-23-2005, 01:26 PM
Parent: #31

اخوى حمزاوى كيفنك .. والله الشوق ليك مدمدم ومعمعم بالمحنه
كل سنه وانت طيب وربنا يحقق كل امنياتك يا رب
وينك يا راجل اختفيت مره واحده .. ان شاء الله تكون طيب بس
تحياتنا ليك وللمعاك ونلتقى باذن الله

Post: #38
Title: Re: البــالتوك .. وما أدراك ما أوجاع .. البــالتوك
Author: عبدالله وداعه الامين
Date: 11-29-2005, 00:20 AM
Parent: #35

اوكسي نون

متين اتجمعتو سويتو ليكم روم هنا

الله يجازيكم

وكمان سيكوت وسوما وجاز

جاز وحات الله مشتاقين وين يا زول

اتذكرتا شكلتك دي وصاحبك النكرتو يا جاز لللللللللللللللللو

ايام والله

Quote: ويييييييين ياانا
البال بجد فيه مافيه
الواحد بكون داخل بكم اسم (اندر كفر )
يقول كلام حنين باسم وبعدا يجي يشاكل ويشتم
باسم تاني ,,,,
عموما" اسم عنيده مريحني لانه منفر
يعني المسنجر الداخلي بكون عندي فااااااااااضي
ودي براها( رحمة قاعد المابتواعد)
لكن في البال تولك الوضع اختلف,,,,
مره اختك زهجانه وبرلومه في البال لقيت لي رووم
شعر بث وحاتك اتحكرت وقعدته وشبكوني ليك ارفعي يدك
ولا انتي اندر كفر ولد مابت,,, رفعت يدي وقلت ليهم والله
برلومه وماعندي الاقولو بث مادام الناس بتتكلم في الشعر
والشعيريه اها هاكم دي ,,,, والله ياثابت حصلت شكله لو الناس كانو
لايف يمكن كان يكون في ضرب,, وخلو الموضوع دا وبقو في موضوع
البت لما يكون صوتا سمح معناها شينه
وبقيت في الطريقه التثبت لي خلق الله ديل
اها اختك ولا عشه الغبشاوي مسكت ليك المايك وقلت ليهم
لا كلو ولا المشاكل واديتم خطبة عصماء
وشعاري البتعرفو داك (ايه الدنيا غير لمة ناس في
خير او ساعة حزن),,,,
وناس اعملي لي اد بالكوم ,,,
,,,, هناك عرفت اناس رايعين جدا جدا"
منهم اناس عرفتهم من من قبل من خلال كتاباتم
ومداخلاتهم او احدي المنتديات
وفيهم الصالح والطالح .....
والاشرار كميات لكن الاخيار اكيد اكتر
وكلو كوم والبت البتجيب ( دلوكتا) كوم تاني!!!
فاصل ونواصل ,,,,
وعلي قول حجه امنه
كان الخرف كتر كلام
السلام ختام وبث

عنيده انا ماكنتا معاكم

ولا قلتليك اعملي اد

شكيت محنكم

شباب

brb

shawgi

Post: #40
Title: Re: البــالتوك .. وما أدراك ما أوجاع .. البــالتوك
Author: ALazhary2
Date: 11-30-2005, 04:00 AM
Parent: #38

الاخ الكريم أوكسي نون تحياتي وتقديري لشخصك الكريم . ويشهد الله تعالى أنكم من الاخوة الأعزاء الذين تشرفت بمعرفتهم في البالتالك وكذلك الإخوة الأفاضل المتداخلين في هذا البوست

الازهري بيدخل البالتالك بذات الإسم في سودانيز اون لاين وكذلك له عدد من الاسماء الاخرى في البالتالك لكنها جميعاً معروفة للإخوة يعني ما (اندركفر) زي الشريف العباسي و 1_1_1956

أتذكر انني في فترة من الفترات أدمنت على البالتالك لإنني للاسف الشديدإنطوائي إلى حد ما فوجدت في البالتالك ضالتي المنشودة لمحاربة هذه العادة فكنت ادخل البالتالك لساعات طوال وكذلك أرهقتني فاتورة الهاتف السعودي حتى من الله علينا بخدمة الدي اس ال.

حالياً أصبح دخولي نادراً بعد ان غلب على البالتالك تيار المراهقين و(الكيدز) وتيار المكفرجية الذين أصبحوا يترصدووني ليصفوني بالنفاق والزندقة والكفر .واخص منهم سئ الذكر أبو عتيق أو إبن حزم قبحه الله وهو من أرداء أنواع البشر ولا يجيد سوى الشتائم وقلة الادب واستفزاز الآخرين فلايدخل غرفة الا وتحول موضوع حوارها وانقلبت رأساً على عقب (وقيمة كل إمرئ مايحسنه ويجيده)، ونعوذ بالرحمن من دين يدافع عنه امثال هذا النكرة الأخرق .

فالقينا حبلها على غاربها وتركنا لهم الجمل بما حمل وأصبحنا لا ندخل إلا غباً للسلام على الأحباب من رواد البالتالك الاوئل وعدد من المتميزين امثالكم ممن إنضموا مؤخراً للبالتالك اخي الكريم اوكسي نون .

واتذكر ايضاً انني حاولت عدة مرات صبغ غرفة في البالتالك (غرفة زرقاء لها عدة مزايا بحوالي(110)دولار في الشهر) باسم سودان هاوس لتكون متلقى لكل السودانيين بجميع أطيفاهم لكن للاسف فشلت التجربة مرتين ولا أعلم حتى الآن ماهو السبب الحقيقي لذلك الفشل .

أتمنى ان نعمل سوياً لعودة الغرف السودانية لسابق عهدها .

أخوكم الأزهري .

Post: #44
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 12-05-2005, 08:07 PM
Parent: #40

عبد الله وداعـــة
يااخ ينصُــر دينك
و...
و.....

يازول وين الحي بيك ؟؟
كدي أمسك المايك ده وقول لينا حاجة
عن إذنـك يا الأزهــري برجع ليك

Post: #46
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 12-24-2005, 00:46 AM
Parent: #40

الأزهـــري
الشــريف العباسي
1-1-1956
بأي الأسماء تريدنا أن نناديك ؟؟
والله وبدون مجاملة أنت من الأصوات المريحة في البالتوك
ومن المشاركين المشهود لهم
بس يا الأزهــري البالتوك مؤخراً أصبح لا يطاق
عدم موضوعية وأسماء تحت سن الرُشــد ومواضيع هايفة
ولي ســؤال :
هل الهروب من غُـرف البالتوك وتركها لكل من هبّ ودبّ يُـعدُ حلاً ؟؟
أعرف أنك بدأت في مشروع الغرفة المصبوغة والمفتوحة
وكم فرحت لذلك المشروع ولكني أعيب عليك أنك تنازلت عن الفكرة وهي في مهدها
هذه أمة كاملة لتغيّرها وتغيّر مفهومها يلزمك الكثير من الوقت أخي أبو الزهــور

عموماً أنا منتظرك هنا وهناك

Post: #42
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 12-04-2005, 10:21 PM
Parent: #35

ســوما
وييييييييينك غائبة ؟؟
لا هنا لا هناك .. ( برايفت ) ؟؟

Post: #41
Title: Re: البــالتوك .. وما أدراك ما أوجاع .. البــالتوك
Author: الزوول
Date: 11-30-2005, 12:55 PM
Parent: #1

السلام عليكم
اها يا جماعة
انا..
أدمنت البال فترة ..بس كنت مواظب على غرفة واحدة فقط
وهى غرفة صديقي العزيز Tahoo وهي غرفة معروفة جداً في البالتوك (VIP) وإن كان روادها قلة قليلة جداً...
وأجزم أن لمعظم رواد البال تجربة (غالباًمريرة) معها..
أحيانا كثيرة اتخيل Tahoo مكان بكري ابوبكر
قايتو كان البورد ده كلو لبس أسود..
افتقد Tahoo بشدة
افتقد صلحة الكارب
وافتقد مهيرة
ومن القدامى افتقد
نيل آ زول
و وجيدة الفنانة..
بجيكم راجع
تحياتي
وما الناس إلا هالك وأبن هالك *** وذو نسب في الهالكين عريق

Post: #43
Title: Re: البــالتوك .. وما أدراك ما أوجاع .. البــالتوك
Author: Masaoud Ali
Date: 12-04-2005, 11:22 PM
Parent: #41

ثابت
تحياتى
صدقنى الظروف قاهرة جداً ، وده هو السبب . آخر مرة
دخلت فيها كانت قبل أكثر من شهر .
اعتكفت لبعض المشاغل الآنية ، ولما ذكرته من أسباب عاليه ايضاً

brb

لكن دى ممكن تاخد ليها كم يوم كدة

سلام

Post: #47
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 12-30-2005, 03:49 AM
Parent: #41

الزوول
في إنتظارك وإنتظار عودة غرفـة
VIP
وعــودة الآدمن الصارم
Tahoo
وفي إنتظار أن تعــود للبالتوك أيامه الخــوالي

ولكن ثمّـة سـؤال :
إلي متي يظل السوداني يحنُ للماضي ؟؟

Post: #45
Title: Re: البــالتوك .. وما أدراك ما أوجاع .. البــالتوك
Author: ابوعبيدة حسن محمد
Date: 12-06-2005, 04:04 AM
Parent: #1

من اوجاع البالتوك 000
كان اول دخول لي لغرفة بالتوك منذ فترة طويلة 00وللآسف الشديد انو(الادمن) كان شخص غريب ودكتاتوري بشكل فظيع 00فمع اول دخول لي سألني :

- انت منو يا زول
ريت : انا واحد حابي اشارك معاكم في النقاش 000ممكن ؟؟
-اول حاجة نعرف انت منو ومن وين ؟
- ضروري ؟
- ايوة ضروري 00لانو الغرفة دي مش ذي اي غرفة دي غرفة مميزة وعندها نظام وسيستم وقواعد00قول سريع انت منو وإلا ح (اشوتك)00
(ما كنت عارفة شنو معني يشتو او ما يشوت)
- تشوتني ؟ 00شوت يا زول!!
- اشوت ؟
- ايوه شوت!!
-طيب هاااااك
( إكتشفت بعد كده انو الشوت يعني المنع تماما من الدخول للغرفة إلا بإذنه00ففهمت الدرس تماما00ودخلت بعد يومين ليهو قال لي
- انت جيت تاني يا زول
- قلت ليهو ايوه جيت !! ح تشوتني تاني برضو ؟
- ما ح اشوتك بس اقعد بأدب واسمع بس 00لغاية ما تعرف الموضوع بتاعنا شنو وبعدين شارك
(بقيت منتظر ساعة ونص عشان بس اعرف الموضوع بتاع النقاش شنو 00ففشلت تماما 00لانو اساساً ما كان في موضوع 000واحد يغني 00ويدخل واحد يخطب بخطب عصماء وآخر يستلم المايك ويكورك 00وثالث يهدد اشخاص مجهولين للجميع 00ورابع يبحث عن فتاه التقى بيها قبل ايام ويأمل في اللقاء مجدداً 00فقررت اتخاذ موقف 00فقلت ليهو :
- يا ادمن 00شوت 00شوت وريحنا 00
- ما ح اشوتك 00فبعد ده الظاهر عليك عرفت الموضوع بتاعنا شنو !! يلا شارك معانا
فشاركت بأغنية قديمة جميلةمشهورة 00فصفقوا لي 00وبقيت (ادمن) بعد يومين !!!

Post: #48
Title: Re: البــالتوك .. وما أدراك ما أوجاع .. البــالتوك
Author: Soumeta
Date: 12-30-2005, 11:22 AM
Parent: #1

Quote: شكيت محنكم

شباب

brb

shawgi

عبدووووووووش،،

بالغت فيها دي،،، ههههه

يا حليل زمن الزمن زين و الزول عندو وكت شوية فاضي،،
عمو ملامح،،
عمو جيلاني،،
شوقي،،
بشار،،
نصار
سوماااااااااااااا،،
ورووووووروك،، و ما أدراك ما ورورووروك،،
عسولة،،
خالتو أمدرمانية،،
عزة السودان،،
Ee

ليكم الشوق و الحب وين ما كنتو،،

ثابت محمد واصل ما بدأت،،

Post: #49
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-07-2006, 11:41 PM
Parent: #48

في الآونـــة الأخيــرة
إعتــاد بعض شُــذاذ الآفــاق فتح غُـرف عبر البالتوك
عناويـن مُخجــلة .. تحمل أدنى كلمات الجنس
وإن دخلت تلك الغـرفة تسمع ما لا تُصدقه
خــلاعة .. سُـقوط مريع ..
حديث لا يمت لنا بصلة
والله لو لا الحيــاء لنسخت لكم عناوينها
.
.

الغريب أن لتـلك الغُــرف روّاد
والأغـرب أنها جميعـاً تتصدّرها كلمة ( السودان )

الله يكون في العون

Post: #50
Title: Re: البــالتوك .. وما أدراك ما أوجاع .. البــالتوك
Author: نادية عثمان
Date: 01-08-2006, 03:33 PM
Parent: #49

محمد ثابت

سلام وعيدك سعيد يارب

اسمعنى :

لو قلت ليك البالتوك ده ولابعرف بدخلوه كيف بكون متخلفة الكترونيا ؟!!!

Post: #51
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-09-2006, 07:27 AM
Parent: #50

Post: #52
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-12-2006, 03:02 PM
Parent: #51

لم يكتفي بعضهم بالسقوط اللفظي والفــراغ
بل
تم إفتتــاح غُـرفة مختصـة في سب الرسول صلى الله عليه وسلم
يُوصف فيها بأقذع الألقـاب
تلصق به كل تُهـم الدنيا
تهـان سيرته الشريفة على مسمع كل المتواجدين في الغرفة
ولو طلبت أن تتحدث يتم إيقاف المايك منك فـوراً
بدعوى الخروج من الموضوع
الغُــرفة تحت مُسـمى ( anwar_101 )

نحن لا نستنكر على صاحب الغُـرفة أن يكون مسيحياً
ولم نطالبـه أن يكون مسلماً
لكن لا نـرضى أن يُسـب الرسول الكريم عليه أفضل الصلاة والسلام

الأمــر جـد خطيــر ولا يُحتــمل
فمـــاذا أنتم فاعلــــــون ؟؟؟؟

اللهم صلي وسلم على سيدنا محمد
وعلى آلـه وصـحبه وسلم تسليماً كثيرا

Post: #53
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-12-2006, 03:54 PM
Parent: #52

الصمـت في مثل هـذا الموضوع خِـذي وعــار
يجب المساهمة بالفكــر والتنظيم
هل يجـدي رفع الأمـر لإدارة البالتوك ؟؟
حتى يتم إغــلاق الغُـرفة ؟؟

هل مقاطعـة تلك الغُـرفة أمــر مُجــدي ؟؟

ما هو رأيــكم ؟؟

Post: #54
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-12-2006, 04:48 PM
Parent: #53

ماذا نحن فاعلـــــــــــــون ؟؟؟
للدفاع عن رسولنا الكريم عليه أفضل الصلاة والتسليم

Post: #55
Title: Re: البــالتوك .. وما أدراك ما أوجاع .. البــالتوك
Author: بكري اسماعيل
Date: 01-12-2006, 05:01 PM
Parent: #54

الأخ ثابت محمد

كل عام وانت بخير والقابلة تتحقق الأماني ،،،

جميع غرف البالتوك السودانية عبارة عن شلليات ما عندها موضوع آخر مرة دخلتها تقريباً غرابة الأربعة أشهر وكان هدفي البحث عن بعض الزملاء ..

wadbahri_1

Post: #56
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-16-2006, 10:44 PM
Parent: #55

وفي كل يــوم جديد
يزداد الســقوط .. وتداس القيم والأخــلاق
كل يوم نـرى العجب العُجــاب
كل يوم تُنتهــك العروض ويتم شتم الأمهــات والآبــاء
هذا كل ما إستطاع السوداني أن يستفيده من البالتوك

وفي كل ساعة نُثبت فشلنا الذريع
وأننا
ظــاهرة صـوتية فقط لا غيـــر

Post: #57
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-18-2006, 08:48 AM
Parent: #55

Quote: جميع غرف البالتوك السودانية عبارة عن شلليات

بكري إسماعيل
بل هي شـيء آخــر يســمى .. اللاشــيء

لك المــودة كاملة

Post: #59
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 02-01-2006, 09:19 PM
Parent: #50

Quote: لو قلت ليك البالتوك ده ولابعرف بدخلوه كيف
بكون متخلفة الكترونيا ؟!!!

نادية الشاعرة المرهفـة
التحيات الجميلة

البالتوك جميل لو أحسن الناس إستخدام الإمكانات الهائلة فيه
أكثر من مرة حضرت لقاء مع شاعر أو شاعرة فى البالتوك
وبهذه المناسبة أترحم على روح الفقيدة صُـلحة الكارب ( بت الخليل )
فقد كانت لها صولات وجولات

كما أرسل عابق المـودة للشاعرة أسماء الجنيد ( سوما )
عضوة المنبر العام فهي تتحفنا كل ليل

لكن
ظهر علي سطح الأنترنت مجموعة من الأوباش
ضربوا بكل هذا الإبداع عرض الحائط ووقعوا في حضيض الإسفاف
رغم ذلك لا تزال هناك غُـرف جميلة في البالتوك

نادية أمسحي الأمية الإلكترونية سريعاً
وانا متاكد من أنك ستكونين إضافة وإضاءة

Post: #58
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 01-27-2006, 00:24 AM
Parent: #1

هــذا المُســمى ( البالتوك ) خطــير وفعّــال
يمكننا الإســتفادة منه كثيراً

نتحدث عن وطنٍ مُسـخن بالجـراح
نتحدث عن آمــال وآلآم أهلنا الغُبش
نُكـرّم مبدعينا .. نسمع أغانينا
نتواصل .. نتقاسم مفردة الفـرح ومجموع الأحــزان

أما أن يكون ( البالتوك ) منبـراً للشتائم والتشـهير والقذف
فليس لنا ســوى أن نقول :
لا حول ولا قوة إلا بالله العلي العظيم

Post: #60
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 02-14-2006, 09:37 PM
Parent: #1

وللحقيــقة
رغم كل تلك الهنّـات والزلات
تبقى هناك غُــرف مضيئـة وهادفة

ونظل ( نحن ) وبنظـرة واقعيــة
محافظون على بعض القيم والمبادئ
مقارنةً بمايقوم به بعض العرب الذين سقطوا تماماً
فهناك غُـرف عنوانها ( الجنس ) ولا موضوع غيره
إســتقلال ساقط لتكنلوجيا الإتصالات
عروض فاضحـة على الهواء من الجنسين
بالصوت والصــورة
.
.

لكن
لن يثنينا سقوطهم عن تتبُـع أخطاء بني وطننا

Post: #61
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 03-16-2006, 12:24 PM
Parent: #1

اليوم
الخميس 16 مارس 2006
قمت بجولة سريعة على كل الغرف السودانية بالبالتوك
ذلك بعـد طول غياب
سنوافيكم بالتقارير لاحقاً
.
.
خليكم قريب

Post: #62
Title: Re: البــالتوك .. وما أدراك ما أوجاع .. البــالتوك
Author: حبيب نورة
Date: 03-16-2006, 01:06 PM
Parent: #61

up

Post: #63
Title: Re: البــالتوك .. وما أدراك ما أوجاع .. البــالتوك
Author: ثابت محمد
Date: 03-18-2006, 04:24 PM
Parent: #1

حبيب نورااا
أنت هنا ؟؟ يا راااجل خليت البالتوك ؟؟
مرحب بيك .. ومعاك المايك سلم على الجماعة

جولة الأمس لاحظت
الحال يراوح مكانه فرااغ في أغلب الغُـرف
لكن
والحقُ يقال : هناك ثمة تقدم ، هناك غُرف مفيدة
توقَّـفت غُرف السفاهة والصفاقة
حتى غُرفة أنور الذي يسُب الرسول ( ص ) لم تعد تفتح بشكل دائم
ولم يعُــد روادها كما السابق

ونعود