منحة الرب لاهـــــل السودان

(الحياة منحة الرب لعبده - يستحق عليها شكرا جزيلا وحمدا لانظير له) دكين - كتاب القيامة


كوت/
* محافظ بنك السودان..هذا المحافظ تعاقد بتاريخ الفاتح من يوليو العام الفائت براتب قدره ( 16.923.82 جنيه)، أي بالبلدي القديم ( ستاشر مليون وشوية)، والرقم ليس بخرافي على من يدير بنك البلد المركزي..موش كدة؟.. نعم، ولكن تأمل خرافة لم تنسب من قبل لغير الديناصور والبعاتي..لهذا المدير، بدل لبس قدره ( مرتب سبعة شهور)، تفتكر بيلبس شنو؟..وحافز سنوي حسب تقدير مجلس الإدارة..وبدل عيدين قدره (مرتب ستة أشهر)، ومع ذلك يشارك العاملين في أي حافز أو منحة، ربما (كنوع من المساواة وكدة).. يسدد البنك - انابة عنه - فواتير الكهرباء، التلفون، المياه، صيانة حديقة المنزل، وحراسة المنزل..ويسدد البنك - إنابة عنه أيضاً - الضرائب المفروضة على راتبه وبدلاته .. ثم علاج بالكامل، له ولأسرته، خارج وداخل السودان.. !!
نهاية الكوت/
- * منقول من الطاهر ساتي.

يعني ده راجل عندو عيال زي ما الاستاذ العادي عندو عيال
واحد بياخد 16 مليون مضروب في 12 في السنة والتاني بياخد 500 الف مضروب في 12..
الاول بشتري شيلة بتو من دبي والتاني مافقادري يجيب بت اصلا ..ولو عندو، كيس خدارو من سوق اللفة بشيل ليهو هم..
وكلاهما سودانيين..تجمعهم الجنسية السودانية والعقد الاجتماعي لدولة واحدة..في مسمى هذه الدولة يكون المحافظ محافظ والمعلم معلم..

الاول ماقادر يدير سعر الدولار في السوق والتاني شغال لي ابجديات التعليم في اجيال السودان..
البخلي معلم السجم ده يحتفظ بهذه الجنسية شنو؟؟
البخليني انا الشايف الوضع ده احافظ على هذا العقد الاجتماعي شنو؟؟
ليه انا اكون حريص على هذا العقد الاجتماعي؟؟
ماهي فرص املي في هذا العقد الاجتماعي لمنحة الحياة التي منحني اياها رب الحياة؟؟

ليه ماتتفرتق القصة دي واحتفظ انا بما لدي من امكانيات واسعر خدمتي وفق الذي يجعل الحياة منحة؟
كل زول او زولينخوارج في الحلة يعملو جمهورية بيت ناس فلان وفلان ويعملوا علاقات اقتصادية ومنافع فيما بينهم ويمارسوا انشالله المقايضة..لو اكلتا وشربتا وتغوطا ونمتا من خلال هذه العلاقة الاقتصادية فانت دون شك بتعيش احسن مما تعيش في منظومة العقد الساري في هذا الوضع السوداني..او مايسمى مجازا بدولة السودان..

ماعلاقتي انا بالجباية والعوائد والنفايات والملاوطـــات التي تقدمها منظومة العقد الاجتماعي في شكل خدمات طالما انا ما قادر اجيب هذه الخدمات من الاساس بما هو متوفر لدي من راتب منظومة العقد الاجتماعي(الدولة)؟
ليه اديهم فرصة انهم يركبوني زيادة على الركوب المتاح لهم من اذعاني لهذه الجنسية وهذا العقدغير العادل؟؟
ياخي ليه ما تتفرتق وكل زول يلم حاجاتو ونشوف لو هو بيقدر ياخد الستاشر مليون دي مع امتيازتا في الفرتقة ونشوف كان بتو بتقدر تسافر دبي ؟؟

ياخ رجعونا بدائيين فمؤكد ان فرص ممارسة منحة الرب في الحياة حينها لن تكون اسؤا مما هي عليه كما هي الان..
انا شخصيا اؤكد واتعهد بان اعيل اسرتي واسرتين تاني بصورة مناسبة تحسسهم بان الحياة منحة لو بس رفعوا عني هذه الملاوطــــات ووفرو لي فرص الكد وفق امكانيات وموارد افراد اسرتي والاسر التي اعيلها والتي ورثوها من جراء وجودهم على هذه الارض بدون اي جباية او رسوم او ضرائب او مضايقات ..إذا يجب التنبيه على اننا اكزست على تلك البقعة من الارض قبل وجود هذه المنظومة..نحنا اصل هذا الفرص..
انا قادر اني ادير حياوات هؤلاء الخلق بصورة افضل مماهي عليه..
ياخ منظومة فكرة الدولة لايمكن ان تكون بهذه الطريقة التي يدار بها هذا السودان.. دي مسالة غريبة مزعجة وغير عادلة ومقلقة وغير عادلة لمجرد انو انا يجب انا التزم بما تم تقنينه سلفا من قواعد ومنظومات حتى ولو كان هذا التقنين يحرمني من منحة الحياة بالبدائية بتاعة الالتقاط العاشا قبلا جد جد جد جد جد جد جدي قبل سبعة الف سنة في نفس البقعة في نفس الارض بامكانياته وحينما كانت افضل سبل اكل اللحم هي الركض وراء الحيوان...
يعني هسي وحاة الله ما ممكن عشان تاكل لحم تركض وراء كل شي حولك ويا اكلتا وياما اكلتا..والادهى انو تركض ركض الوحوش في البرية لياكل اللحم طرف مرتاح لم يركض وانما منحته المنظومة امتيازاتك في حق متحصلات ركضك..

مالذي يجب ان نتراضى عليه لاجل هذه الجنسية الخدراء من الاول خاتين في بالنا انو اي زول فينا عندو باي ديفولت حق انو ممكن يعيش ياكل يشرب يخرا يتناســل عادي وبي ضراعو دون يكون عندو هذه الورقة الاسمها جنسية؟
وخاتين في بالنا انو هذه الوثيقة تؤهل حاملها لاستخراج جواز والسفر والبرطعة والجديع وانو هذا الخيار متاح فقط لفئة محددة تبني هذا الخيار على التراضي الصامت الذي تقره انت كسوداني بصمتك وجهالتك بما يمكن ان يفعله الرضي الصامت بهذا العقد الاجتماعي...
فالذي يجري في السودان شي مريع يقلق منام صاحب منحة الحياة لاهل مايسمى بالسودان..

Quote: ماعلاقتي انا بالجباية والعوائد والنفايات والملاوطـــات التي تقدمها منظومة العقد الاجتماعي في شكل خدمات

و يا ريت بعد داك لو كانت موضوعية .. السنة الفاتت و على محل صغير لا يتجاوز
الخمسين متر كانت رسوم الخدمات السنة الفاتت 500 ألف السنة دي جابوها عشرة مليون!

الخدمات فقط .. دا غير العوائد و النفايات و الضرائب و البيئة و بقية ما أشرت إليه؛ مع
العلم إنو مبيعات المحل في الشهر - المبيعات و ليس خالص الأرباح – لا تبلغ العشرة مليون!

اعمق ما وقعت عليه عيناي مؤخرا في هذا البورد


يستحق الرفع عالياً



شكرا يا استاذ

دكين خليك كدا دايمن ، أصلك ما تغيِّر قماشات الفرامل،
لو كنت تعرف أن هناك من تخرج في هذا العقد وينال أضعاف ما ذكرت أعلاه حا تقول شنو؟
حاتقلع جهاز الفرامل زاتو!!
في واحده من الإجازات مشيت لحلاق إريتري في شارع الأربعين ، قعدت في كرسي منتظر الحلاق (يحسم) الزبون،
لحظت أن الكرسي مربوط إلى الكرسي الملاصق له بطريقه سياميه وملصق عليه ورقة مكتوب عليها :
( محجوز بأمر ديوان الزكاة)
قلت ليهو السالفه شنو يا ابن معديكرب المصوعي؟
قال لي سيد المحل ما دفع الزكاه ،
قلت ليو وهي كم ،
قال لي مبلغ وقتها كان خرافي ، يعني لو المحل حلق راس فيرد أوراس تنوره ما بجيب دخل يغطي تلك الزكاه..
اللجازه الجايه لقيتو مقفل ،
يكون مشا راس بوتين.
إنهم القياصره زاتم يا هذا.

سلامات يا دكين ورمضان كريم


انا شايف انو المخصصات والرواتب ابدا ابدا ما مشكلة وشايف انو منصب زي محافظ البنك المركزي يستحق هذا واكثر

ولكن الاهم هو الانجاز يعني الراجل دا يخم المال دا كلو ومايقدر يعالج اشكالات سعر الصرف والاشكالات الاقتصادية الاخرى يعني هو اخذ الاجر ولم ينجز العمل دي هنا المشكلة










....

أنا معاك ياحذيفة مليون في المئة..
والبوست ده اصلا ليس لمناقشة الرواتب ولا الجبايات ولا المخصصات..
أنا قصدتا منو انو يجب خلخلة فكرة الحياة عند اهل السودان اولا وبعدين نكوس نعمل دولة..
ما ممكن الناس دي تخش في شي مرتب سلفا وماتفهمو ولا تعرف وضعها كمخلوق في نظام الموجودات لمجرد انهم اتولدو من فصاية...

كم واحد في السودان ده مؤخرا اتولد ساي كده ومات ساي كده..
ذي طيرة دخلت من الشباك وطلعت بي الشبك التاني..كمثل نكتة المسطول..




أنا قصدتا ان نحيا من جديد بشكل منحة الرب الديفولت..
بس الاخوان هنا أظنهم مسكو الجزء غير المقصود..لأنو الأفكار عندهم بتلف داخل فكرة السائد..

يامرتضى..
قالو يافرعون مين فرعن دينك..قال ليهم مالقيت حد يقول لي انعل دينك..
مرد مايحدث ياصاحب لقلة في وعي الخلق بفكرة الدولة والحقوق الموهوبة من الخالق والحقوق التي يمنحها حق المجاورة والقصاد وحقك عند من تفوضه لأمر معين ..
مساكين اهل السودان إذ يحسبون ان الدنيا مجاهدات وان الاصل في الأنسان الأنين والمطاردة...
ان الله خلق الانسان طريدة..
اي مظلمة يرزح فيها اهل تلك البلاد؟
ياتو ناموس هذا الذي يسير ناس جنوب خط 22؟؟
سبحانك ..أنا قد غرر بنا وتم تحوير عطاياك..
سبحانك عبادك في ارض السودان مسلوبين بجهالة فاحشة وقد اختلطت عليهم التعاريف..
سبحانك انزل لنا من لدنك رحمة وتعريف جديد لميلاد ابن ادم،فقد طشت الاشياء في زحمة سلاطينك.
سبحانك الاديتنا من ملكك سلاطين واختفيت

...

الامين..
يمكن ان نبدأ أنا وانت ومن تعولهم ومن اعولهم منظومة ذات منافع حياتية وفق مواردنا المتاحة ونتفق على عقد اجتماعي اقتصادي قائم على معايير العدل المعياري و الوجدان السليم ..
خلينا برضو ندعو للعصيان ولملمة مزيد من البشر ..
نحنا والله مابغلبنا نعيش كما يجب ..بس اليختونا..

Quote: الامين.. يمكن ان نبدأ أنا وانت ومن تعولهم ومن اعولهم منظومة ذات منافع حياتية وفق مواردنا المتاحة ونتفق على عقد اجتماعي اقتصادي قائم على معايير العدل المعياري و الوجدان السليم .. خلينا برضو ندعو للعصيان ولملمة مزيد من البشر .. نحنا والله مابغلبنا نعيش كما يجب ..بس اليختونا..

ايه رايك يا استاذ دكين ان تبسط هذه الفلسفه التي قصدتها انت في هذا البوست..


الفكره عميقه وتروقني جداً -شخصيا-

فموضوع العقد الاجتماعي اياه ، والذي في حالتنا يعتبر عقد اذعان (لو صحً التعبير) موضوع دسم وفيه ماده دسمه للاخذ والرد

والدتى رحمها الله ، كانت شهيدة هذه الملاوطات ..

حيث فرضوا عليها أن تدفع ملياردينار سوداني ملاوطة على وكالة السفر التى تملكها ..
فوقعت من طولها ضحية ذبحة قلبية .

يا دكين كيفنك ياخ

انا غايتو بقيت جاهز لو عايزين ضريبة في قبر ابوي وامي عليهم الرحمة
الباقي خليتو ليهم
ديل ما بقدر اخليهم

up

هذا ما كان يتقاضاه امين ديوان الأوقاف

وافاد الوزير بأن الامين المقال ومساعديه ابدوا «مقاومة شديدة» لمنع فريق ديوان المراجعة العامة من مراجعة أوقاف الخارج.
واتهم الوزير في بيانه امام البرلمان امس، الامين العام المقال الطيب مختار، بوضع يده على اموال اوقاف السودان بالخارج دون وجه حق، وقال ان الامين العام كان يتقاضى مرتبا شهريا بالمملكة العربية السعودية قيمته 633.000 الف ريال سعودي، منها مبلغ 60.000 ريال سعودي بناءً على عقد سري موقع بينه وبين الوزير السابق ازهري التجاني «بدون شهود، وصيغته مخالفة لعقود وزارة العدل واشترط في العقد السرية وعدم اطلاع طرف ثالث عليه الا بموافقة الطرفين»، وبلغ المرتب الاساسي 20.000 جنيه سوداني مع مخصصات اخرى بنفس قيمة المرتب الاساسي.

Quote: والتاني ما قادر يجيب بت اصلا

اقعدو اتلككو بالدولة الفاسدة كمان !!

معليش يامشرف..
نسيت استثني الصيادلة البلقو الحبة الزرقا مجاني...:-)
عامة الشعب ده يلقاها وين؟؟

مرة يا ود الزين وبينما اللغط حول هجليج في ونسات الصوالين والجرايد والمنتديات في أوج احتدامه حول ضرورة تحريرها وما تعرف منو الفرض كان الجيش..
قام دينق نزل بوست عنوانه (هج ليج مدينة تابعة لجنوب السودان وليس الشمال)

قام جني عمل مداخلة في البوست قائلا:
(عفيت منك،لقيت أمها ميتة)

ضحكتا تلاتة يوم بصورة غير متواصلة..


إها والله ماف شي بلفق في شان الطيب مختار الا عبارة جني:
( عفيت منو لقا أمها ميتة)

هذا ما كان يتقاضاه امين ديوان الأوقاف

وافاد الوزير بأن الامين المقال ومساعديه ابدوا «مقاومة شديدة» لمنع فريق ديوان المراجعة العامة من مراجعة أوقاف الخارج.
واتهم الوزير في بيانه امام البرلمان امس، الامين العام المقال الطيب مختار، بوضع يده على اموال اوقاف السودان بالخارج دون وجه حق، وقال ان الامين العام كان يتقاضى مرتبا شهريا بالمملكة العربية السعودية قيمته 633.000 الف ريال سعودي، منها مبلغ 60.000 ريال سعودي بناءً على عقد سري موقع بينه وبين الوزير السابق ازهري التجاني «بدون شهود، وصيغته مخالفة لعقود وزارة العدل واشترط في العقد السرية وعدم اطلاع طرف ثالث عليه الا بموافقة الطرفين»، وبلغ المرتب الاساسي 20.000 جنيه سوداني مع مخصصات اخرى بنفس قيمة المرتب الاساسي.

Quote: هذا ما كان يتقاضاه امين ديوان الأوقاف وافاد الوزير بأن الامين المقال ومساعديه ابدوا «مقاومة شديدة» لمنع فريق ديوان المراجعة العامة من مراجعة أوقاف الخارج. واتهم الوزير في بيانه امام البرلمان امس، الامين العام المقال الطيب مختار، بوضع يده على اموال اوقاف السودان بالخارج دون وجه حق، وقال ان الامين العام كان يتقاضى مرتبا شهريا بالمملكة العربية السعودية قيمته 633.000 الف ريال سعودي، منها مبلغ 60.000 ريال سعودي بناءً على عقد سري موقع بينه وبين الوزير السابق ازهري التجاني «بدون شهود، وصيغته مخالفة لعقود وزارة العدل واشترط في العقد السرية وعدم اطلاع طرف ثالث عليه الا بموافقة الطرفين»، وبلغ المرتب الاساسي 20.000 جنيه سوداني مع مخصصات اخرى بنفس قيمة المرتب الاساسي.

ورورووووووووووووووووووك
يا ناس حرام , ما تكتبو لينا الكلام الزى ده , والله نموت ليكم هنا مغصة
بعدين بصراحة فى ملاوطة غريبة من الشعب السودانى زاتو, ناس ريحه هراهم طاقه من حلفا لى جودة
والناس حايمة زى الغنم مستسلمة زى النعاج فى المسلخ

كوت/ والناس حامية زي الغنم.../كوت
ماجد حسون..برجاء احترام الغنم..ياخ التيس لأمن يجئ يعشر غنماية فانه إذ يفعل ذلك فانه يفعلها في موسم حش الغنم..وفي جو محدد سلفا بواسطة أمة الغنم..
نحنا في كل المواسم بعشرونا...

اها يا ملاسي بطل الالتفاف
انت بتسال عن البديل
ودا البديل الدكيني
جنى

ياطارق سلامات..
ومشكور لرفع هذه المسغبة..

ويازول حقك لاتخلي..حقك تقاوي وتقلعو..
ما ودرنا غير خليتو لي الله،والله في،واحتسبتو في جاه الرسول...
يركبنا الغير لأنو نحنا بتتنازل عن ماهو حق لنا بمحض جهالتنا واحيانا اظرط بمحض اختيارنا..
تعرف ياجبريل وإصرارا على قلع حقي خلال الأعوام الاخيرة لزيارتك للخرطوم،كنتا بشيل معاي نسخة من قانون المرور في العربية عشان قلع الحقوق الحاصل من المرور ..
يا آلتك وتغالتو ويغالتك وتغالتو وفي النهاية برب امرق ليهو القانون واللائحة وأقول ليهو بلاي كلامك ده وين في الناموس ده؟
تركبو العزة بالإثم ويقول لي ياخ انزل تعال معانا أنتا عايز تورينا القانون؟
واضح انو القصة اتلاكت واتلاكت لحدي ما البوليس نفوس نسى انو مفروض يعمل شنو..

انقر بقيت اعمل سنو مؤخرا؟
بقيت انزل السودان بدون عربية مع أني عارف انو طالما الناس ما عايزة تعرف ماهو الحق وماهو الباطل وماهو حد الدولة حيجيني زول يوم ويقول لي ماش كده مالك؟

لها الرحمة يا آمنة..
بلاي بي ياتو حق تتم هذه المطالبات..
ماهو المقابل الموضوعي تجاه مبلغ حتى ولو بسيط..طالما أنتا لو عايز تفتح بلاغ ساي بتدفع وفق إيصال شرطة..
وشوارع مبنية بالدين وكباري مبنية بالدين ومصنعين بالدين.
لو عايز تتعالج بتدفع قروش
لو عايز تقرا بتدفع قروش
لو عايز تهر بتدفع قروش
لو عايز تكب وساخة بتدفع قروش
لو عايز تسكن في بيتك قافل عليك بيتك بتدفع قروش..
لو عايز تشرب بتدفع قروش..
تتولد بي قروش وتموت بي قروش
وبين ميلادك وموتك شقا واسى وحيرة...





شقيش تقبل وين تمش
ياإنسان رخيص .....
تلقى ناس طالباك جنا
صاحبة أسية مصبرالك كم سنه
سنن طواريهن رماح
ياريح نقد بإسم السمايم
إستباح
قصقص فروع شجر البلد
يبس ضروع الفي المراح

ياملس..
لا خلاص ياملس..انتهى زمن نزلا وخليها معقولة ومحلي ده بجيب دخل محدود والتبريرلت العاضة التي يسوقها شعب السودان للحيكومات..
ماداير ادفع عديل ..لاجبابة لاعتب لاكوش..
23 سنة تدفع على امل انو الدولة تقدر تحسسك بي انك مخلوق مكرم مانفعت..
بس خلاص ماعايز اكون طرف في هذا العقد الباطل..
اعفونا من هذي البلاد الذهللة..

بيدنا زرعنا في نفوسهم الرضا عما يفعلون
فطال واستطال أمد ملاوطتهم
وسيظل إن ظللنا في صمتنا قابعين


تحياتي واحترامي دكين

تحياتي يا دكين ...

في ذات السياق:

Quote: دوما ما يختلط عند شعوب العالم الثالث ممن أذلتها الدكتاتوريات ما هو من حق المواطن واجب على الدولة توفيره وماهو رفاهية تمنها عليه أعطته أو منعته. يفرح عندنا الناس بمقعد في المواصلات بعد طول إنتظار أو مدافسه وتلهج ألسنتهم بالشكر عند عودة الكهرباء أو سريان الماء أنصاص الليالي بدفرة الموتور. بقيت الإتقاذ طويلا لا لأنها قوية ولا لأن المعارضة خائبة الرجاء. بقيت لأنها إستطاعت إختزال أحلام الناس وآمالهم في رغيف خبز وحق مواصلات ورسوم المدارس. نجحت بقدرة قادر في جعل الشعب يلهج بشكرها إن هي قدمت عشر ما له عليها من حقوق في مقابل أخذها كل ما عليه من واجبات، وفي تحويل أساسيات الحياة المتفق عليها بين شعوب الأرض إلى عناصر رفاهية تحسد الشعب عليها وتمن عليه إن حصل على بعض منها.

وحسب (البطاقة) أن تكون أمانيا !

عزان المتكي على مهوقني المين.

Quote: مدهش كيف أنه- في السودان- تتقازم أحلامك أحيانا لتبلغ حدا لا يتسق و الكلمة نفسها، وتنحصر تطلعاتك جميعا في قضاء أمر ما يعده الناس من توافه الأمور أو في الحصول على غرض ما ربما عددته أنت نفسك في ظرف غير ذات الظرف من سقط المتاع

طبعا ده كلامك انتا عزان الدكتور المطلع والذي يدري كيف تسير احوال الامم لذلك انتا قتا "اشياء تعد سقط المتاع" اها ياعزان وصل التجهيل بهذا الشعب الى ان الغالبية يرون ان ماتعدة انت سقط متاع ووسيلة لي غاية، قد اصبح بقدرة فهلوة السلطان الى غاية متى مانالها الناس هللوا الى سلاطنيهم حامدين شاكرين..

ما ابلغ قول الشاعر (حقك تحرسو ولا بجيك..حقك تقاوي وتقلعو)
بس لو عرف الناس مايستحقونه ونهضوا له..


انا شخصيا لم اكن اتصور يوما ان اناقش بصورة جادة -يحسبها الناس هظار- امر دك السودان.. والاكتفاء بجمعيات المناطق وانشاء تعاونيات في الحلال ..

Quote: ليه انا اكون حريص على هذا العقد الاجتماعي؟؟

هو وينو العقد الإجتماعي دا؟! أنا غايتو ما موقع فيه
دكين ما بالغت ياخ.

Quote: والبوست ده اصلا ليس لمناقشة الرواتب ولا الجبايات ولا المخصصات.. أنا قصدتا منو انو يجب خلخلة فكرة الحياة عند اهل السودان اولا وبعدين نكوس نعمل دولة.. ما ممكن الناس دي تخش في شي مرتب سلفا وماتفهمو ولا تعرف وضعها كمخلوق في نظام الموجودات لمجرد انهم اتولدو من فصاية... كم واحد في السودان ده مؤخرا اتولد ساي كده ومات ساي كده.. ذي طيرة دخلت من الشباك وطلعت بي الشبك التاني..كمثل نكتة المسطول.. أنا قصدتا ان نحيا من جديد بشكل منحة الرب الديفولت.. بس الاخوان هنا أظنهم مسكو الجزء غير المقصود..لأنو الأفكار عندهم بتلف داخل فكرة السائد..

وكيف اخبارك؟

استذ دكين كيف حالك

عندى صديق عاد من السودان وسالته متى استطيع ان ارجع واستقر فى السوان ؟؟؟
فاجابنى عنما تحس انك بقيت دولة

قلت ليه كيف يعنى ؟؟؟
قال لى لانو الدولة تخلت عن البشر واصبح كل شخص يقوم مقام الدولة

تانى بغباء قلت ليه كيف ؟

قال لى اقوليك مثلا العلاج بقروشك

المدارس بقروشك

الامن والامان بقروشك ( فى اشارة للشركات الامنية والدوريات بتاعة شباب الحله فى الليل لحماية الفريق من اللصوص )

اها دا شغل دولة ولا شغل مواطن ؟؟

قلت ليه صدقت والله واها انا من يومه داك بحاول ابقى دولة براى ولكن ما قادر حسع انت وريتنى طريق ساهل تب

نتقايط وما نتلايط احسن

مع تحياتى

عادل عبد العزيز

كده بقينا تلاتة انا وانتا والامين..
مزيدا من الشعب يا الهي..

السنجك..

ازيك ياعريس..

سلم لي على صحبك الساحر..اظنو هسي بلع كل كلامو زمان عن الزوجة والحياة وصياغات القرار النهائي..

Quote: فموضوع العقد الاجتماعي اياه ، والذي في حالتنا يعتبر عقد اذعان (لو صحً التعبير) موضوع دسم وفيه ماده دسمه للاخذ والرد

ياخ سمى الاشياء باسمها الحقيقى
عقد نكاح وليس عقد اجتماعى انت ما شايف الرئيس طالوالى حالف طلاق موش هو عاقد علينا عقد اذعان والسودان هو بيت الطاعة واى عنكبة معناها نشوز افقي!
عقد بدون مقدم صداق واكيد ما فى مؤخر!
جنى

أمس دخلت الجمعية (جمعية سمت أشو مسل ناب كباجة بالمنطقة الشرقية - الدمام)
قالوا لي فرع الجمعية الرئيسي في السودان فارض على كل أبناء المنطقة في الاغتراب مبلغ 300 ريال عشان يشتروا بنطون جديد للبلد بمبلغ وقدره 80 مليون جنيه،
قلت ليهم أمشوا قولوا ليهم أطلعوا مظاهرات، اسقطوا الحكومة وجيبوا حكومة تخدمكم، مش تتصرفوا للحكومة وتحلحلوا ليها مشاكل هي مفروض تحلحلها، نحن ما بنك باركليز عشان ندفع راتب المساعد الطبي، نعمّر مكنة الاسعاف، نصين المدراس المكسرة!!
المشكلة يا عزيز إنو الشعب ده بتصرف للحكومة في حدود امكانياتو وأكتر، شعب بيدلع حكومتو وما بيخليها تقوم بواجباتها يوم ورا يوم لغاية ما الركوب الأنت بتقولوا ده حصل! وأظنهم استحلوا موضوع الركوب ده لمن بقة البشير وأخوانوا أرجل رجال في البلد دي، زول هبنقة، أي واحد شابكنا ليك جدع وسوداني أصيل وود بلد!!! بالله؟
والله موضوع ندكها ده أكتر حاجة مناسبة للوضع الكريه الوصل ليهو حال البلد.

لزمن طويل أنا كنتا مفتكر حركات اهلنا في الشمالية بتاعة نلم نعمر الفصل الوقع او نلم عشان نحفر الكديك او نكلم الجميح يعمل لينا مركز صحي دي واحدة من محاسن أهلنا بيد انها وكما ذكرت فضيلة مطيزننا بيها..

وبالمناسبة ده واحد من اهم الاسباب والمشجعات على انو انحنا قادرين ندورا برانا..
الجمعية دي ذاتا ماياها حكومتنا..ده بديلنا للذي يسال عن بديل..وهو وبالتجربة بديل ناجح وسائر المفعول وشاغل سلفا..

ندكها وندك أمها يانادر...ندكها ونخلي ناس سمت والهمك وكلتوس يرسلو حق النفايات وعوائد النخيل ورسوم المدرسة دايركت لي الجمعية في الرياض وجدة ..وشوف كان ما رجعنا ها سيرة أمها الاولى..

سلام يا دكين:
• تعرف.. وقعت لي حادثين ودعتُ بعدهما هذا السودان، غير مأسوف عليه:
أولاً: بعد تخرجي من الجامعة حُرمت من العديد من الوظائف رغم أنني كنت من بين الأكثر تأهيلاً لها، وتم تعيين من كل مؤهلاته لحية!!
ثانياً: رأيتُ بعيني ما حل بدياري في دارفور من إبادة وحرق وتدمير، وما حل بأسرتي الكبيرة التي ما يزال يعيش جزءً كبيراً من أفرادها في معسكرات النازحين.
• إضطررت، والحال كذلك، أن أبحث عن بلاد توفر لي الرزق والأمان، وفي سبيل ذلك دفعتُ رشوة كبيرة لأحصل على جواز سفر سبب لي الكثير من المتاعب بعد ذلك في المطارات الأجنبية، حيث تم احتجازي، كالأجرب، في إحداها لأكثر من خمس ساعات فقط لأنني أحمل جواز هذه البلاد التعيسة بينما من جاءوا معي في نفس الرحلة ينظرون إلى بريبة، بعضهم من بلاد لا تكاد تراها على الخريطة!
• لحسن حظي فزتُ قبل أسابيع قليلة بجواز سفر من دولة (كـافرة) وفرت لي الأمان والكرامة.
• السودان، يا دكين، بلد تعيس، ممزق، منكوب، منهوب، زاده خراباً الكيزان المناكيد فأصبحت الحزازات تسيطر على نفوس جميع سكانه الذين يتبادلون العداوة والريبة والكراهية: جلابة ضد غرابة، كيزان ضد "خونة" و"عملاء" و"طابور خامس"، هامش ضد مركز، أنصار سنة ضد صوفية، أولاد عرب ضد "عبيد"، وأدروبات وحلب وأهل العوض.... عييييييييك.
• الحمد لله الذي أخرجني من هناك غير آسف ولا ندمان.
• (إن الذين توفاهم الملائكة ظالمي أنفسهم قالوا فيم كنتم قالوا كنا مستضعفين في الأرض قالوا ألم تكن أرض الله واسعة فتهاجروا فيها فأولئك مأواهم جهنم وساءت مصيرا)- قرآن كريم.

كدي زول يعيب لي النموذج الصومالي ... بلد ما فيها حكومة لمدة 30 سنة، ما في زول اقتطع منها أي جزء، ولا في دولة الله قدرها تحتلا أي جزء منها، لا توجد حركات انفصالية، كل قبيلة/حلة/مدينة لديها جيش صغير يضمن وجودها، يتكون أفراده من أبناءها، وسلاحه ممول ذاتياً. التعليم بقروشك، والصحة - ان وجدت فهي - إيضاً بقروشك، الموية، والكهرباء قطاع خاص، شركات الإتصالات تعمل بكامل قواها العقلية، والنظام المالي يمكنه أن يحول لك 10 مليون دولار من/إلى واق الواق في 10 ثواني، إلخ ! اليوم ينتهي، كل قرد يطلع جبلو، حاسس بالغبن تجاه الأوضاع والظروف، ولكن في المقابل يكون في كامل الرضى عن نفسه كإنسان حر، غير خاضع لأي عقود ملكية، اجتماع، نكاح، سمها ماشئت .

ود شاموق..
ازيك ياوجيه وكيف حال ايامك وكيف انتهى بك العالم؟


تعرف لعل القلق الوحيد في مسالة سيادة الحكم الذاتي التي اسوق لها عن طريق الجمعيات والتعاونيات هي مسالة الحدود دي..يعني غالبا حنكون نهبا لاطماع الخارج..مع اننا الان كذلك فعلا والحدود اتنهبت سلفا..

لو صح كلامك حول النموذج الصومالي ده فنحنا لاخوف علينا ولا نحزنون..
يمكن ببساطة اقامة نموذج الدك المقترح.. ونبدا من البرايمري ستيت اندرستادن..



الوضع الصومالي الان ياشاموق هو الوضع المثالي لضنع دولة متماسكة..
بعد كل قرد يعرف ياكل من سدرتو براهو بعد داك تعال قول ليهو تعال نتلم نعمل غابة لايسود فيها حكم الغاب وانما كل زول عارف شدرتو وين وماهي ثمارها ..
لكن موش تتولد تلقى الغابة فايرة ماتعرف انتا قـــرد ولا حــمار كبير !

ياسر الله مرقك..

انحنا لينا الله وجرب السوق..


انحنا عندنا كل مقومات انسان الكهف..بس لا اجري لماذا يصر القادة على قصورهم بدل اللجوء الى الكهوف وانتظار المطر والتربص باسراب الحمر الوحشية...




امنياتي بالتوفيق حيث قسم الله لك مكان للحياة..
الحياة قصيرة فاجتهد لتنال عطاء ربك غير منقوص..

مرتضى لو ماموقع ..وقع على انك ما موقع..

ولو ماعايز توقع وقع على انك ماعايز توقع..
المهم لازم توقع..

يجب ان يكون ثمة عقد..
كيف يعني مافي عقد؟؟
نحنا قمنا من فراغ ولا نحنا غنياك غلط؟

سلامات يابلة..
اصلا ملفات شي..ندكها بس

بوست لم تُدفع "قبانته" بعد

Quote: لمجرد انهم اتولدو من فصاية...

لا حولا

يا ولدي والعملية القيصرية كان سويتوها بتجيبو حي ؟

Quote: والدتى رحمها الله ، كانت شهيدة هذه الملاوطات .. حيث فرضوا عليها أن تدفع ملياردينار سوداني ملاوطة على وكالة السفر التى تملكها .. فوقعت من طولها ضحية ذبحة قلبية .

عجبى لكم يا اهل البورد
ماذا حل بكم ؟؟

حسبي الله ونعم الوكيل

دي لو كانت في السودان كا شالوا منها ضريبة إضاءة ذاتية

أو ضريبة فتنة أو أي حاجة من أمثال تلك التسميات الشاذة التي يبتدعونها

يافقيري دي شينة ومجوقلة..حطب النار..

تبكي على اهل البورد ياقرشو وماعارف الميت منو..

يامسافر ..انا كنتا قايلا حاكورة لغويات نوبية..

الأخ / دكين سلامات
تحضرني قصة يا سيدي تفضح سايكلوجية المواطن السوداني المطحون ،،
في آخر إجازة لي بالسودان العام الماضي ،،
أحد أصدقائي يمتلك فرن لبيع الخبز البلدي ،،
لقافة مني قلت أساعده وأبيع معاه ،،
كيف البيع يادوك / قالي أربعة رغيفات بألف جنيه،،
جاء واحد من البلد أنا عارف والله ظروفه جدا وعدد أفراد أسرته وطلب رغيف بألف جنيه
محنة مني وعدم شغلة غافلت صاحب الفرن ودسيت ليهو في الكيس ثمانية رغيفات بدلا من أربعة
أخد رغيفاتو وأتوكل على الله وتبسمت في داخلي ،أن أنجزت شيئا
عليك أمان الله بعد نص ساعة جاب الرغيف راجع وقالي يا خي الرغيف ده زائد ،
صديقي صاحب الفرن ظنني متواطئي ضده وطردني تطاردني لعنات لطيفة وصديقة ،،
ثم وكحل لكل هذا الغبن الماثل البشير يبشرنا بتطبيق الشريعة الإسلامية في منو ؟ في صاحبي ده . مقابل مزرعة في السليت وشقة في برج وين .وبيت في كافوري .... دكوها يا خي دكوها ونوزعها تاني من تاني ،،،، يمكن صاحبي يعيش زمن المنحة الألهية ،،،،

مضوي

الشعب الذي يتفاخر بان قال ذات مجاعة (نحنا نقفل علينا بيوتنا ومانشحد) عند هذا الشعب فان مصدر الرزق اتنين: ياتشتغل يا تشحد..

هي نفس المعادلة بتاعة الانسان الاول..
يا يطارد الحيوان بالركض خلفة ابتغاء مزعة لحم، ياكمان ينتظر في الكهف مع النسون ينتظر صيد القادمين..


لذلك نحن امة لاتفهم لغة الدولة..

وليد..
انا ماعارف غرامك بي جميلات الحبش ده يحنتهي بيك وين..

الله يستر..

هسه الحبش الدخلهم شنو فى "القبانة"
ولا دى كمان حقارة جديدة !!!

Quote: السودان، يا دكين، بلد تعيس، ممزق، منكوب، منهوب، زاده خراباً الكيزان المناكيد فأصبحت الحزازات تسيطر على نفوس جميع سكانه الذين يتبادلون العداوة والريبة والكراهية: جلابة ضد غرابة، كيزان ضد "خونة" و"عملاء" و"طابور خامس"، هامش ضد مركز، أنصار سنة ضد صوفية، أولاد عرب ضد "عبيد"، وأدروبات وحلب وأهل العوض.... عييييييييك. • الحمد لله الذي أخرجني من هناك غير آسف ولا ندمان.

والله أضحكتني لدرجة الثمالة ....الموضوع قوي والمعالحة تتم في نظام ديموقراطي

Quote: والله أضحكتني لدرجة الثمالة ....الموضوع قوي والمعالحة تتم في نظام ديموقراطي

• ما داير أحبطك يا عبدالرحمن، لكن بين السودان والديمقراطية عدة قرون! لأن الديمقراطية، ببساطة، ليست مجرد صندوق انتخابات.
• الديمقراطية تتطلّب، ضمن ما تتطلب، قضاء مستقل، خدمة مدنية غير مسيسة، مؤسسات مستقلة وقوية كالجيش والشرطة و الجامعات ووو الخ، سيادة حكم القانون، صحافة حرة، دستور مُجمع عليه يضمن "ضوابط وموازنات" بين أجهزة الحكم المختلفة. والأهم من كدا أن تنتشر في المجتمع ثقافة التسامح والإنفتاح وقبول الآخر"السياسي، الديني، الثقافي، الإجتماعي، والعرقي".
• ما ممكن نتصور ديمقراطية في بلد زي السودان الواحد ما قادر يختار فيهو دينه أو لبسه أو زوجه أو أو .... الخ
• كما أن الديمقراطية في السودان هي مطلب للنخب فقط، الشعب ما عنده شغلة بيها بتاتاً. عشان كدا الشعب دا ما بيكترث لو تمت الإطاحة بحكم ديمقراطي في السودان، لأنه الموضوع ما بيعنيهو "فقط تخيّل ردة فعل الشعب البريطاني مثلاً لو وقع انقلاب عسكري هناك!".
• الناس في السودان دايرة تاكل وتشرب وتتعالج وتتعلم وتسكن في أمان، عشان كدا ممكن يصبروا على البشير وعصابته أو نميري وتخبطه لو قدروا يوفروا ليهم بعض من الحاجات دي، وما طلعوا ضدهم إلا لما فشلوا في دي. السودانيين ما طلعتهم إبادة دارفور ولا الإذلال في بيوت الأشباح ولا التقتيل في بورتسودان وكجبار ولا ولا ... الخ لأنهم ما وصلوا مرحلة النضال عن حقوقهم السياسيةوالإجتماعية والمدنية. ودي مرحلة بعيدة، لأننا لسه ما حسمنا قصة الأكل والشراب دي.

هاك يا دكين ...






يا دوب الحاجات استعدلت..

Quote: يافقيري دي شينة ومجوقلة..حطب النار..

يا دكين يعني إن أسلمت سلمت وتزوجونها البشير ؟

Quote: ياخ رجعونا بدائيين فمؤكد ان فرص ممارسة منحة الرب في الحياة حينها لن تكون اسؤا مما هي عليه كما هي الان..

لا تستبعرني لا استبعرك
امساك بمعروف .. او تسريح باحسان













---------

وكت في ناس ذاتو غلبا تبعر زي الناس التانين!

وقديمن قيل : " الغلبتو خمساتو، ميتو ولا حياتو!"
العايشين ليها شنو .. اصلو التفاءل دا ما ليو حد!؟

يعني بالعربي كدا لا منحة ربانية لمستبعرٍ في الارض ذاتو .. بل محنة صرفة من صنع (اخيه) الانسان!

زور السودان يا دكين تجد أن ما كتبته بإحباط يمثل قمة التفاؤل إن رأيت ما يحدث على الأرض. أنا معاك في دك الحكاية لكن أملك في أن نكون كالصومال دا تفاؤل شديد! ياخي دي بلد فيها ناس كرام ساكنين المعسكرات ليهم سنوات و ناس ساكنين في بيوت أرضياتها أحواض سمك. ناس بموتوا في العاصمة عشان ما عندهم حق الدوا و ناس الأقاليم لهم الله و ناس بتدخل جيوبهم المليارات من حق المساكين ديل. كتبت كلام و شطبته ما داير أغرق الناس معاي اليأس. ربك يستر بس.

Quote: الناس في السودان دايرة تاكل وتشرب وتتعالج وتتعلم وتسكن في أمان، عشان كدا ممكن يصبروا على البشير وعصابته أو نميري وتخبطه لو قدروا يوفروا ليهم بعض من الحاجات دي، وما طلعوا ضدهم إلا لما فشلوا في دي. السودانيين ما طلعتهم إبادة دارفور ولا الإذلال في بيوت الأشباح ولا التقتيل في بورتسودان وكجبار ولا ولا ... الخ لأنهم ما وصلوا مرحلة النضال عن حقوقهم السياسيةوالإجتماعية والمدنية. ودي مرحلة بعيدة، لأننا لسه ما حسمنا قصة الأكل والشراب دي.

ده كلام واضح جلي لايحتاج اي اضافات..
نحتاج اولا قبل ان نقيم دولة ان نعرف ماهي الدولة..مامعنى ان تكون جزءا من دولة..
ما معنى ان تفوض امرك الى قيادة منظومة الدولة
مالك وماعليك تجاه القيادة في هذه المنظومة..
مالك وماعليك تجاه المجتمع في ظل منظومة الدولة..


ولانو هذه الاشياء ليست هم اصلا لغالب السودانيين..فالله غالب..

Quote: ماعلاقتي انا بالجباية والعوائد والنفايات

الجبايات هذه ضرورة توفير الامن و الحماية حتي لا يحكمنا من لهم ليسو اولاد بلد.


____________________
ضروريات توفير ميزانية شراء طائرات حربية ... صواريج كعتاد لهذه الطائرات ... تدريب سواقين لتطييرها ثم تدريب مصوبين لاصابة هدف قرية نائية في اي جزء اخر من اطراف السودان ولكنها ضروريات المرحلة

______________________________
(خمسون عاما من هكذا ملاوطات)

Quote: إليكم الطاهر ساتى ليه ندفع ضرائبكم ..؟؟ ** آخر تقرير للمراجع العام، صادر قبل شهرين، أبدى ملاحظة مهمة للغاية - ومعلومة في غاية الخطورة - بعد أن راجع العقود الخاصة بالسادة الذين يديرون البنوك والشركات والهيئات الحكومية.. إذ يقول محتوى الملاحظة : السواد الأعظم من هؤلاء السادة لايدفعون الضرائب كما يفعل أي مواطن صالح، بل تدفع ضرائبهم - انابة عنهم - تلك البنوك والشركات، يعني بالبلدي كدة : بتدفعها إنت يا المبروك..وهذا لايحدث إلا في السودان، إذ دفع الضريبة بمثابة فريضة على كل مواطن ومواطنة، مسؤولاً كان أو من العامة، أوهكذا الحال في الدول التي أنظمتها وقوانينها تقدس المساواة - بين الناس - في الحقوق والواجبات..ولكن في السودان، حيث الغنائم للولاة والغبائن للرعية،كل الذين يديرون بنوك العامة، تدفع لهم تلك البنوك ضرائبهم المفروضة على رواتبهم وبدلاتهم، وهذا موثق في عقوداتهم.. ثم الأدهى والأمر، حتى بعض الذين يديرون شركات العامة أيضاً يتهربون عن دفع الضرائب، وذلك بإلزام تلك الشركات بالدفع إنابة عنهم ..!! **على سبيل المثال، شركة السكر السودانية .. وبالمناسبة، بعد إعلان تحرير سعر السكر، يجب أن تلحق هذه الشركة (أمات طه) عاجلاً غير آجل.. نعم، لم تعد ذات جدوى بعد تحرير السكر، بل هي - أصلاً - لم تكن ذات جدوى حتى قبل التحرير.. ومهمة جلب السكر من المصناع ثم توزيعه للتجار، يمكن أن يؤديها أي ( شركة نقل).. تخلصوا من شكر السكر، مالم يكن جدواها كفالة حتى الذين لايدفعون الضرائب..علما بأن دفع الضرائب أقل عطاء يمكن أن يقدمه أي مواطن صالح لبلده وشعبه، ( انا طبعا إتأثرت بالثقافة الغربية في دنقلا وكدة)، وهذا منعاً لهجوم التجار الذين ترهقهم (ضريبة الوطن)..المهم، نرجع لعقد مدير شركة السكر، وهو بتاريخ 28 يونيو 2009، ولايزال سارياً، ويستمد مشروعيته من مجلس الإدارة، وهذه ثغرة أخرى..مجلس الإدارة يجب ألا يكون طرفاً في أي عقد، فالجهة التي تعين مجلس الإدارة - وزارة كانت أو رئاسة - هي المسؤولة، وكذلك يجب توثيق أي عقد حكومي في إدارة العقودات بوزارة المالية، حسب قانون الخدمة..وهذا ما لم يحدث في العقودات التي راجعها المراجع العام، وكلها بطرفي، كل الشركات والبنوك والهيئات، وفيها من المزايا ما يشيب لها الولدان.. تابعوها بصبر..!! **على كل حال، إنفراد مجالس الإدارات بتوقيع العقود مع المدراء، قد يحدث نوعاً من (المصالح المشتركة)، بين الإدارات ومجالس الإدارات، وستظهر تلك المصالح - وملياراتها - حين نعرض حوافز ومخصصات بعض (رؤساء وأعضاء مجالس الإدارات)، قريباً إن شاء الله.. ياخ نرجع لعقد المدير، إذ تقول نصوص العقد بأن راتبه (18.332.31 جنيه)، ومع ذلك : تدفع له الشركة فواتير الكهرباء والماء والتلفون.. بدل مأمورية بالداخل ( مرتب خمسة أشهر)..إحتمال بيمشي الجنيد وكنانة كداري، ولذلك يستحق ( مرتب 5 شهور)، وبدل مأمورية بالخارج (300 دولار يومياً)، إفتكر معقولة مع غلاء المعيشة في أمريكا مثلا..ويمنح علاج وتذاكر - له وللأسرة - وحافز سنوي وعربة ومكأفأة..ثم - فجأة كدة - تتحمل الشركة كل الضرائب المفروضة على الرواتب والبدلات..لنعم، سيادته يهنأ بكل تلك المزايا، وسيادتك - أيها المواطن المنكوب - تدفع ضرائبه مكرهاً.. لماذا..؟؟ ** يعني بالواضح كدة يا سيدنا المدير : ليه ندفع ضرائبك؟ ، ذنبنا شنو؟، لاك مسكين ولاك فقير، ماشاء الله مرتبك يهز ويرز، وكهربتك مدفوعة من عرقنا ومويتك مدفوعة من تعبنا وتلفوناتك مدفوعة من كدنا وتذاكر سفرك مدفوعة من جوعنا، وعندك عربية بي سواقها خصما من مرضنا، وكمان بتمشي عسلاية وتجي راجع تأخد ( 5 شهور كاش)، أها : ليه بعد ده كلو ندفع ضرائبك ؟..علماً بأن أي عامل بالبلد ملزم بدفع ضريبة الدخل الشخصي خصماً من راتبه، حتى ولو كان راتبه (750 جنيها فقط لاغير)، بحيث يدفع (5%) في ال(500 جنيه)، ويدفع (10%) عما يتجاوز ال (500 جنيه)، أى من كان راتبه (750 جنيه) يدفع للدولة ضريبة دخل شخصي مقدارها (50 جنيها)..إن كان هذا حال المواطن ، فذاك السؤال - ليه نحن ندفع ضرائب دخلك الشخصي؟ - ليس لمدير شركة السكر فقط، بل هذا المدير محض نموذج من نماذج قادمة، ولكن السؤال لكل من حدثته نفسه بأن يصيغ عقداً كهذا.. وما أكثر التوقيعات غير العادلة والتي تلزم المواطن بدفع الضرائب إنابة عن أصحاب (العقودات الخاصة)..!!

تكوين شركة السكر السودانية حسب ماهو موجود في موقع الشركة

Quote: شركة السكر السودانية شركة قطاع عام تعمل وفق قانون الشركات الخاصة لعام 1925م وتقع تحت مظلة وزارة الصناعة وللشركة مجلس إدارة يرأسه وزير الصناعة وتمثل في مجلس الوزارات الهيئات المختصه مثل وزارة المالية – وزارة الري وهيئة الكهرباء

.

أهداف الشركة حسب ماهو موجود في الموقع الخاص بالشركة

Quote: 1- انتاج سكر أبيض بكمية وجودة وسعر يرضي تطلعات المستهلك . 2- الإستفادة القصوى من مخلفات صناعة السكر بحيث يتم تحويلها الي سلع وخدمات صالحة للإستخدام . 3- المساهمة في تنمية المجتمع السوداني حتى يصبح مجتمع معافى ، متحضر ، منتج . 4- العمل علي تأمين مستقبل العاملين بالشركة بما يضمن حياة كريمة

شركة حكومية عديل..تبع حكومة السودان..
اهو ده مثال حي لواحد من اشكال العلاقات الاقتصادية بينا وبين الطرف التاني في منظومة الدولة (نموذج العقد الاجتماعي الفي السودان)
بياخد فيها مدير الشركة التي تم تاسيسها بموارد سودانية مشاعة لكافة نفرات العقد الاجتماعي السوداني..
مزارع السكر هي اراضي سودانية لم تملكها الدولة إلا بموجب منظومة الدولة..
يعني ليس لاحد عليها اي say إلا وفق مايمسى بالدولة..وربما كانت في ماقبل براري تابعة للرحل من قبائل الصبحة والهبانية..
قروش التمويل بتاعة المصانع قروض باسم الحكومة (منظومة العقد الاجتماعي) يعني تسدد من الاموال التي تنتج من الفائض الناتج من فكرة رفع الدعم عن الوقود او زيادة سعر السكر للمستهلك..

وباعتبار ان فكرة السودان هي فكرة ذي ماقنا تراضت عليها مجموعة من البشر في رقعة جغرافية محددة واتفقت على ان يسمى المكان سودان وان تدار العلاقات الاجتماعية والاقتصادية بين المتراضين وفق ميثاق متفق عليه..
عليه فان السكر بتاعة شركة السكر يزرع على ارض السودان..
ويسقى من ماء السودان..
يرحل عبر اراضي السودان..
والسودان ده ملكية مشاعة..
ويجو جماعة محددة تاكل خير القصة..

اسر محددة تتنعم على حساب ارض السودان المشاع وماء السودان الشماع وفق مشاريع مبنية على اجماع باطل قائم على التجهيل ..
تنتج الاسر نفرات مرتاحة تقرا بارتياح وتنمو بارتياح وتتعلم بارتياح وتجي تشتغل تاني بارتياح في نفس الشركات المنتجة من غبار وعرق الارض..
تدور ساقية العز هذه بين اولاد العز هؤلاء الى ماشاء ربك..
ونقعد نحنا انا وناس نادر والحلاوي وياسر احمد محمود والطيور الزينا ديل نكتب ونكورك ونخربش بلا طائل..

ياكلها باااردة كده عمك بتاع السكر..وتقول لي مانكدها؟؟

انتو بتخوفونا من الفقر والفوضى والمرض والفرتكة؟؟
بتخوفونا من حالنا؟؟












___________
اخشى انني اتحول بسرعة الى مشروع حاقد حاسد او حاجة بالشكل ده..