Post: #1
Title: المتعبون وحدهم يعرفون الاستجمام
Author: DKEEN
Date: 01-30-2012, 01:34 PM
في اختلاف التوقيت سرُ باتع..
واستيقظتُ قبل يومين، فاذا بي في محطة بِن إستيشن في تقاطع الايتس افنيو مع ثرد ثري ستريت ...
البرد قارس والزحام شديد، برطان وفرنساوية وطليان وعترة هنود الاباتشي وبرتوريكان وزنج والناس بين راكض ومتعجل نحو اتجاهات تتقاطع..
شحادين يدفرون امامهم عرباية تسوق جاينت ستور وقد امتلأت بقطع باليات وكراتين تمزقت اطرافها وعلب اغذية فارغة واخرى بها انصاف ماكولات، وراستا فاري ذاهل مضفور الجدائل يبدو لقليلي التجربة وكأنه على حافة الانتحار، مسافرين منهمكون على لابتوبات متكئين على حقائب سفر وعلى آلات موسيقية..وبواليس تتدلى من خواصرهم شنط عدة تكفي لفرتكة مجروس وكلــبهم مترصدٌ بالوصيد..
دكاكين هدايا تكدست بدمي بابا نويل واشجار عيد الميلاد المزينة بنجوم تطفي وتولع، وتولع وتطفي..رجلان من البحرية الامريكية صامتان إلا من سطوة ملامحهما ببنادق مذخرة صعبة الملامح، يثيران توتر المارة والكرة الارضية..
لافتات معلقة تشير الى مواعيد القاطرات والـ"قيت نمبر" بالوان مضيئة حمراء واخرى خضراء..لافتات اخرى تمهد السبيل للقادمين الى هذه المدينة تدل على اتجاهات الشوارع..
برود وي ستريت ..ماديسون افنيو..ماديسون سكوير قاردن.. بن بلازا.. جكن اوت..انجليزي في أي مكان..حروف كابتال واخرى سمول تبدو لي وكانها لعبة اتاري..يبدو انو في حاجات كتيرة ماقرونا ليها في ود عجيب المتوسطة بنين..
اها انا امشي على وين مع كل هذه الممرات والدروب وكل هذه السحنات وكيف يفكون خط كل هذا الالفابتك الانجليزي المتسارع..
ومن متين تحدث كل هذه الحركة الضاجة والاشياء الضاجة والالوان الضاجة الانفعالية ..من متين العالم ده بي جاي في هذا الضجيج وانحنا في ذلك السكون؟!الناس ديل الظاهر من زمن القود فاظر وعربان المورس ضاجين كده والعالم بتاعم لمض وبالطوهات وبيرة باردة...
يعني في كل راس السنين التي مضت وبينما انا اتكي على حجر ساكن على اطراف وادي حنيفة في ليل ساكن وضوء ساكن واخوة ساكنين نجتر سنين التسعينات في اسى ليلي ونرتقب اعواما اخرى من الاسى كانت هذه المحطة تمور بهذه العطور المرسلة من هذه الابط العريانة..تضي بكل هذه الانوار على واجهات الكناتين..تضج بكل هذه السيقان المتينة التي تضرب الارض كربك كربك كربك..
خسارة السنين الاداها ليك ربنا في بطحاء الخليج ياعزيز..عمر واتفرتق في الاحتساب..
عاينت تاني لي المنظر بشكل عام محاولا حبس هذه الصور في الذاكرة... الاتجاهات والشوارع قد لاتفرق مع السولو ترافلر الزيي.. لو مشيت على أي شارع من ديل مابتفرق معاي..كلها ماجيتا قبل كده وكل الشوارع مانهاتن..وكل مانهاتن التايم سكوير ..وانا جيت هذه الليلة صياعة ساي...مين عارفك قاعد وين في زخم هذه الاضواء..مين شغال بيك اصلاً..مين الاضواء دي كلها وبتبقبق كده كيف؟؟
الليلة وهذه الاضواء تشي بان كل الاحتمالات الرائعة ممكنة..مجرد الوصول بالتفكير الى هذه النقطة خلاني افكر في اني عايز الحمام، انا عايز حمام، ترتيب الافكار الرائعة بتكون في الحمامات (حيث يبذل الانسان جهدا من جهة ويتامل في المعنى العام للعالم من جهة اخرى) احتاج لهذا المعنى العام في هذا المكان..
دافرت خلق الله في بناتهم المهيبات، انعصرت على من تيسر"ماكل يوم بلقاكم يابنات مانهاتن".. بنات ذهبيات متوردات الوجوه..حطب النار ياالهي ..موش قتا ليك ياخينا انو الوضع مليء بالاحتمالات الرائعة..حلاة السبي في هذه الاصقاع..لو يعلم عبد الرحمن الداخل مافوته علينا حين عبر شمالاً نحو المضيق بدلا من الاتجاه غربا نحو مانهاتن..
شنطة، كــلب، كوم هدوم، نهد، خصر حتى وجدت علامة الحمام الزرقا القياسية.. نص المحطة في الحمام..الكل يقصد التايم سكوير هذا الليلة..الكل عايز يبول عشان يشرب بيرة تاني..في البوالات الواقفة تشكيلة من بني خلق ..بدل تي شيرتات..بلوفرات برد..يختلفون في الملامح ويشتركون في انهم يصدرون صوت واحد (شررررر) ماعدا البعض الذي يركز على اطراف الحوض حيث الصوت هناك هسيس(شووووو)..
اسوا مافي هذه الحمامات انو مافيها حنفية تزيل بها عنك النجاسة.. هسي الجميلات البقدلن في سوح المحطة ديل كلهن يقضين حاجتهن بي مناديل ياشالت ياماشالت؟ّ
استجمار استجمار.. الفندق قريب ..في وسط المحطة وسط الزحمة وسط الضوء مرقتا ورقة فيها عنوان الفندق (دايز إن- بروود وى ستريت).. انا اسال منها بتاع المارينز اب كــلب ده..مشيت ليهو وانا خايف انجليزتي دي ماتسعفني اوصل ليهو انا عايز شنو..الناس دي هنا بتلفح نص الحروف سايلنت..قتا اختصر القصة وامد ليهو الورقة يقراها بي صمة خشمها وياشر في الاتجاه وانا بتم الباقي كداري.. وحسنا فعلت وحسنا فعل فرد المارينز..بس رفع يدو واشر نحو بوابة محددة ونزل يدو..
وانا ماعارف نفسيات الناس دي شنو بالضبط ولا مستعد..ولو قعدت اافكر حالقى ليهو مبرر لي سخافتو وموضوعيتو دي وحالقى لي نفسي مية سبب استضأل بيهو خلقتي دي لكوني زول من السافنا المدارية ساي ..ربيب دولة نامية بره العالم ده ذاتو وعليها عقوبات من 83 وحامل جواز اخدر عليهو شعار دهبي باهت لـ صقر جديان فاري جناحينو بصورة هندسية ماعندها علاقة بواقع الطيور ..صقر ماصادفناهو في أي سماء، آيل للانقراض او لعله انقرض بالفعل .. مرقتا عدل على الشارع العام الاكثر ضجيجاً..
امك زحمة السنين..
بعد مسيرة مدهشة لمدة ربع ساعة في الاتجاه الذي حدده المارنز سلفاً..وقفت اقرب زول اساله من اتجاه السنترال بارك.. اشار اخر في اتجاه مغاير للاتجاه الاول.. اصدق ده ولا صاحب الكلــب؟! الناس دي كلها ماشة عكس الاتجاه القالو بتاع المارنز، اتذكرتا اتجاه اليد الواثقة بتاعة المارنز واعتقد ان تلك اليد هي الاجدر بالاتباع..
بس واصلت مشيت عكس الناس والزحمة كما هي..الشنطة ..ماكان اصلا في داعي ليها..يوم واحد وليلة واحدة لن احتاج فيها لاكتر من نكس وفنلة كت في زخم اللامبالاة التي يصرفها هؤلاء الناس..
الزقاقات دي قد تختصر الدروب ولا احد يمشي عليها ..
انقطعتا في اقرب زقاق..يبدو اقل اضاءة ..بس لكن شكلو الاسرع..
ترددت فجاة لامن شفتا مكب زبالة معدني ذكرني بي نصيحة..
من ان يخرج رصاص هذه المدينة؟ الكتل قالوا هنا مجاني ياخينا..مالك ومال الزقاق..عنك ماوصلتا الفندق..والاربعماية دولار رايحة..والرصاص قالو زي السكين في الخرا، زوووووط وتلحق امات طه وينبشون محفظتك، عب ومات، تُحدف بعدها في اقرب مكب نفايات..وتبقى جزء من عملية تدوير البلاستيك في مكبات مانهاتن..
ما يعرفوك بعدها ود ناس منو وخيلانك ناس منو وعماتك منو..انا سليل الدناقلة ..تسلسلت نطفتي من اصلاب مسيحين قدماء واصلاب رجالٍ عبرو بيوضة واصلاب مسلمين حديثي عهد بالاسلام ومزارعين اكارم..كابراً عن كابر في نواحي دنقلا والعتمور وعطبرة ..اجي اموت نكرة في شارع جانبي خافت الاضاءة خلف برود واي ستريت في مدينة تقع على الجانب الاخر من المحيط الاطلنطي..مدينة لم تكن تخطر على بال ولا واحد من الجدود المذكورين اعلاه ديل ولو مد الله لهم حياوات اُخر..
لطالما هزتني مأساة السودانين الذين ولدو في عنقريب .. مكثوا اكثر من ثلاثين عاما بالسودان البعيد ثم ماتو برصاصة خلال الخمسة سنين الاولى من وجودهم هنا في هذا المكان القريب.. وعلى بعد اكثر من الاف الاميال من موضع العنقريب الاول وفي فارق التوقيت..
لو يعرف القاتل نسب المقتول ما قدح الزناد..
لو يعرف القاتل مأساة المقتول ماقدح الزناد..
كيفن حيفهم بعدين لو زنقني في هذا الزقاق انو انا فرد مهم ولي من الآمال ماليست لهم..
افهمو كيف انو وجودي مهم للعائلة بصورة حيوية..وانو انا ما زول ساي ممكن اموت كده في زيارة سريعة لامريكا..اموت كده والامور دي تمشي عادي...
افهمو كيفن انو انا جيت هنا فيزة زيارة ما جيت اموت..وانا كلمتا الناس دي كلها اني ماشي وجاي ..وانو الناس دي منتظرة.. وبالتالي يجب ان اعود لا ان اموت ..
انو انا عندي بيت وام وزوجة واصدقاء .. مصاريف بتمرق ومصاريف بتجي وقصص ..
لو بس بدوك فرصة تشرح لي الكاتل البكتلك ده قبل ضغط زناد الكولت المائل تسعين درجة..
لو بس بخلوك توصف ليهو مدى اهمية السوداني المارق من السودان القاعد في امريكا...
الموت كما في قصائد الفيتوري... يأتي .... نتفاً ....نتفاً ....
تاركينه لورثتهم .. نتفاً...نتفاً..ومعه بعض الوصايا وقصص المجد الملفقة وشنطة رحلة سعيدة..
اعتقد انو التفكير ده ايجابي وبخليك تمرق من هذا الزقاق ..طوالي رجعتا الشارع الزحمة..الزحمة ولا كتلة الزقاق..
تشوف العمارة تحترم ابو السقالة الوصلت لحدي هناك ذاتو...
الليلة ..الليلة ياقروية..وقالو لي كان شفتي ..تم ترم تررية...
اشمعنا الغنية دي تجي هسي بالذات..
بعد ربع ساعة اخرى مشي وصلتا السنترال بارك..البنشات تمتد مع امتداد السور..
سعيت في شوق حثيث نجو البنش المقاصد شارع ناينتي فور ..اتامل من ذك المكان عموم مانهاتن بعين خيالي ..احس بان بوب مارلي غنا في هذا المكان تحديداً..
سيد آي رممبر وين وي يوزد
تو سيت إن زه سنترال بااارك إن مانهاتن..
..
ويز قوود بيوبل وي مييت ..
قود فرينذ وي هاف هاد.. اوو.. قود فرند وي هاف لوست الونق زه ويى..
في هذا العالم المشرق لن ننسى الماضي..
عشرين دقيقة في بنش مبلول بالندى في تمام العاشرة بتوقيت العالم الجديد على بنش في ضلام حميم..منها للفندق قصاد الشارع ..إجراءات على الاستقبال سريعة بينما واحد من النزلاء بكورك من فرط سوء الخدمة وانو حيفتح انابيب إيه كده ماعارف ويجي يختها في نص اللوبي ..
اكيد انجليزي..لقد صادفت اسخف انجليزية في مطارهم قبل ساعات..كانت ترمقني في صف طويل للقادمين..من دون الواقفين في الصف كانت تثبت نظراتها علي وحدي في ريبة واستحقار ..وحين جاء دوري تحدثت عن اشياء بلغة سريعة فهمت مع نهاية حركة الشفايف انها كملت العندها وانو يجب ان اتلطِع في المطار حتى موعد البرتش ايرويس الى واشنطن.(الخاشي منو ذاتو ياواطية.. لو بس القاكي في نواحي السليم بي شرايطك دي..لو بس تجي مارة بي حلتنا طالبة الدخول..)
رميت الشنطة في اقل من دقيقة وجيت نازل ابحث عن درب لي التايم سكوير.. الآن جاهز لهذا العالم الجديد..
هذه المدينة تحتاج الى رفيق..اتذكرتا مروان:
الآن يمكننا أن نخطط للبقاء هنا أبداً لنستريح من... هواجسنا...ضنكنا.. لكن.. من يريح قوافينا ؟
الآن ننهك عواطفنا بالذكريات المجبولة ونطمئن لليد العليا...
الآن أدمنا الشغف حتى افتقدنا اندهاشنا بالأنواء وأحببنا التجوال في الشوارع.. الأضواء... الصخب بعد أن هجرنا زقاقات أبوروف الملتهبة بالألفة والنفافيج.. والهمبريب..
المتعبون وحدهم يعرفون الاستجمام وحمى النساء وحب الحشود والالتصاق والغزل...
المتعبون وحدهم يعرفون حتفهم...
وحدهم يحترفون الغرق يصدحون بالشهوة في حِجر الأمهات إذ لا يرجون إلا الله ...
اسقط في يـــــــــــــــــــــــــــــدي...
جاءونا بالعنف المتبقي من غريزة الغابة
جئناهم بما تبقي من غريزة الحضر
أعْطَوَّنا بعض الألقاب
أعطيناهم كل الشرعية والاستسلام
صدق مروان..
المتعبون وحدهم يعرفون الاستجمام يصدحون بالشهوة والاغنيات وحب الحشود والالتصاق والغزل..
ليت ذاك الليل لم يطلع فجره..
عدل في عدة مواضع لان السيستم يرفض اسم الكــلب
|
Post: #2
Title: Re: المتعبون وحدهم يعرفون الاستجمام
Author: السيد أحمد إبراهيم
Date: 01-30-2012, 02:08 PM
Parent: #1
كتابة فخيمة ووممتعة كالعادة يادكين
وسياحة جميلة لم يكدر صفونا فيها إلا
مربعات بكري التي تغطي الرأس وتترك
الباقي ( ميطي ) رغم أنه الأوجب بالستر
وكذلك هذه فقد كدرتنا ولختنا لخ نحن جيران وادي حنيفة
| Quote: يعني في كل راس السنين التي مضت وبينما انا اتكي على حجر ساكن على اطراف وادي حنيفة في ليل ساكن وضوء ساكن واخوة ساكنين نجتر سنين التسعينات في اسى ليلي ونرتقب اعواما اخرى من الاسى |
|
Post: #11
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 06:22 AM
Parent: #2
ابو السيد
مربعات بكري بعدلها..لترى اي ظلم ظلمني اياه السيستم..
عن وادي حنيفة ..لو ان الامر بيدينا لخرجنا غير هيابين..
ولكنه الحال المائل لمن نحب..المعايش الجبارة بتقعدك حيث انت ..تفوتك مباهج الدنيا وتفوتك منحة الحياة..
أما نحن فنقبع في حدود الصمت تسامراً مع الصامت الأكبر عجلين في تقمص شخصية الصخر هادئين تماما بعد الفاجعة
جعلونا نحبو ونرتجي وننمو كما ينمو الأيتام
ويوم اندلاع الصفوة خرجنا بقلوب الأصفياء
لا نملك من الدنيا سوى الاعتقاد وسلامة الحواس
....كثــــــــــــــــــــــــــــــــــــــيراً من تضخم الذات
مع هذا النزق لامعنى للتراجع نحو الحياة ففي البرزخ متسع للأمل ومتسع للحفاة............
ألبسوهم تيجاناً وامنحوهم بعض الثناء ليعودو حافلين بإحتراف الموت
|
Post: #3
Title: Re: المتعبون وحدهم يعرفون الاستجمام
Author: تيسير عووضة
Date: 01-30-2012, 02:26 PM
Parent: #1
منذ أن سمعت بخبر ذهابك للنصف الثاني من هذه المدوّرة وأنا في إنتظار كتابة فادحة كالتي بالأعلى ..
|
Post: #6
Title: Re: المتعبون وحدهم يعرفون الاستجمام
Author: نادر
Date: 01-30-2012, 03:18 PM
Parent: #3
ليها وحشة كتابتك الطاعمة،
وليها مليون وحشة حروفك الملونة بقوس قزح دي،
سلامات يا دكين في حلك وترحالك
|
Post: #13
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 06:41 AM
Parent: #6
سلامات يابو محمود..
الاقل حظا في متع الدنيا، المتعبون في مهمة الحياة، الاكثر استمتاعا بمنحة سفرة ذي دي..
امرق ..العمر تلتو ولا كتلتو
:)
|
Post: #8
Title: Re: المتعبون وحدهم يعرفون الاستجمام
Author: القلب النابض
Date: 01-30-2012, 03:43 PM
Parent: #3
وتدلت ثريا قلمك عى شرفة البورد المظلم ...مذ رحلت اقلام ثريات ... وبقيت اقلام حبرها الدم والوعيد به
اكتب .. اكتب... اكتب
|
Post: #14
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 06:49 AM
Parent: #8
ياقلب ..ناس سودانيز 2002
الطقس الحار..صدقيني انما نحن ضحايا الشمس وحر الاستواء..
الحر يورث حدة في الطبع..ذلك امر لايد لنا فيه..لذلك فنحن الاجدر بالجنة..
------
شكرا ياسهير ياخ.. كلماتك لاتزال في لطفها القديم
|
Post: #67
Title: Re: المتعبون وحدهم يعرفون الاستجمام
Author: خدر
Date: 02-02-2012, 05:50 PM
Parent: #8
|
Post: #12
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 06:32 AM
Parent: #3
فداحة الامر في مالم نتمكن من قوله..
الناس دي بقت تكفر من طرف ياتيسير ..
|
Post: #79
Title: Re: المتعبون وحدهم يعرفون الاستجمام
Author: سفيان بشير نابرى
Date: 02-04-2012, 11:42 AM
Parent: #12
مروان دا زولنا انت ما تجيب سيرتو كلو كلو
|
Post: #85
Title: Re: المتعبون وحدهم يعرفون الاستجمام
Author: سارة علي
Date: 02-06-2012, 05:55 AM
Parent: #84
يا دكين انا ما مشيت السودان..يا ررررريت
لكن سافرت بلداً لعشرة يوم ..مستجدة فيها زيك ..قعدت اطاقش سااااي
الحلبية بقتم تلاتة..وخلت الردحي بيدها الشولة ديك..بقت اخت مسلمة كبيررررررة
لاااااازم تجي في الصيف ..
عبارة عن جنة الله في الارض..
|
Post: #4
Title: Re: المتعبون وحدهم يعرفون الاستجمام
Author: wadalzain
Date: 01-30-2012, 03:12 PM
Parent: #1
عزيزى دكين
يا ابن الشمس والنيل اراك حملت عصاتك وخيالك الملتهب يحن الى مصطفى سعيد وهملند وحططت فى ديار البرد والذين يرمقونك باستحقار ، ليتك تفصح عن مكنونك فى ماذا تود ان تفعل ( لو بس القاكي في نواحي السليم بي شرايطك دي..لو بس تجي مارة بي حلتنا طالبة الدخول..)
واصل فى سردك الجميل الممتع
مع تحياتى
|
Post: #5
Title: Re: المتعبون وحدهم يعرفون الاستجمام
Author: محمد البشرى الخضر
Date: 01-30-2012, 03:15 PM
Parent: #4
يا سلام يادكين
حمدا لله ع السلامة و بالتوفيق ان شاء الله
|
Post: #7
Title: Re: المتعبون وحدهم يعرفون الاستجمام
Author: محمد على طه الملك
Date: 01-30-2012, 03:35 PM
Parent: #5
| Quote: تضج بكل هذه السيقان المتينة التي تضرب الارض كربك كربك كربك.. |
هو أكثر ما كان يثير وجداني ببقية من عهد عاد على أيام قدومي الأولى..
خاصة حين تسبق خطواتها الرشيقة الواثقة خطواتي الثقيلة المرتبكة..
فيدركني احد حفدة ذلك الجان الذي كان يدفع بخالي عنترة ..
ليفرد ذراعيه قسرا فلا يمر سيد عربي الا من تحتهما.
..
كتابة ماتعة وددتها لولم تنتهي..
حمدا لله على سلامتك.
عفوا خطأ إملائي تنبهت له مؤخراً
|
Post: #9
Title: Re: المتعبون وحدهم يعرفون الاستجمام
Author: أم سهى
Date: 01-30-2012, 04:19 PM
Parent: #7
دكين يا صديقي ليك وحشة
بس خففتها بهذه التحفة
اكتب فانا والله تواقون لكتاباتك البترد الروح دي
بقت عملة نادر كتابات زي ده
تحياتي وابقى ظاهر
|
Post: #10
Title: Re: المتعبون وحدهم يعرفون الاستجمام
Author: salah ismail
Date: 01-30-2012, 04:30 PM
Parent: #7
فقط الان...وجدت من يعيدني...بكل تفاصيل اغترابي..الي ارصفة هذه..المدينة الاسفيريه...
كيف بالدهشة او الوجوم...عندما نكتشف نسق دقيق لروتين الحياة...في البن استيشن..الصبوي..الي درجة يصبح فيها زخم التايمز اسكوير..روتين...اشبه برائحة الكرميل المحروق...او اروما قهوة استار بكس ...ليست اشياء عادية يا دكين...ما اجمل تلك الفطرة في سرد تجربة...تآكلت منها عتبات النزول والطلوع من والي اعماق الصبوي..
نفس الزمان...
|
Post: #15
Title: Re: المتعبون وحدهم يعرفون الاستجمام
Author: Emad Abdulla
Date: 01-31-2012, 07:23 AM
Parent: #10
لا إله إلا الله ..
عارف ..
( لو كتبت ليك أنا هسه حاسي بشنو بعد قريت ده .. !! ح تشتمني ، صاح ؟؟ )
إنا لله .
............
آي إيكّا دوللي ياخي
|
Post: #16
Title: Re: المتعبون وحدهم يعرفون الاستجمام
Author: Hisham Ibrahim
Date: 01-31-2012, 07:30 AM
Parent: #15
يا دكين
لا تـكُن من الغائبين ..
فعودتك وحروفكـ نشتاقها ونترقبها دوماً .
|
Post: #55
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 10:32 PM
Parent: #16
ياهشام ماحبسنا عنكم سوى اننا لانملك مانكتبه للناس..الف سلام
|
Post: #17
Title: Re: المتعبون وحدهم يعرفون الاستجمام
Author: اساسي
Date: 01-31-2012, 07:54 AM
Parent: #15
ابو جدة زاتا ,
علي الدين " اتفسحك " معاك الحجل بالرجل
ــــــــ
في التعبير العبقري : "ببنادق مذخرة صعبة الملامح" تكمن المفارقة ما بين الكثير من تضخم ذاتنا كما اسلفت وما يحمله عسكرنا من بنادق " مسكينة" ,لذا ليس لنا بد من ممارسة السكون بكل " حزن نية " علي ما لندرك وجدوه معنا في ذات الحياة ان جاز لنا الوصف ذلك , اي ان نطلق علي سكوننا حياة .
ــــــــــ
شفقتنا علي احبة واصدقاء عبروا الي الساحل الاخرللاطنلطي من تلك الازقة صعبة الملامح او شفقتنا علي حالنا في هذه الصحاري فكل سيان
|
Post: #18
Title: Re: المتعبون وحدهم يعرفون الاستجمام
Author: عمر عشاري
Date: 01-31-2012, 09:53 AM
Parent: #17
| Quote: وانا ماعارف نفسيات الناس دي شنو بالضبط ولا مستعد..ولو قعدت اافكر حالقى ليهو مبرر لي سخافتو وموضوعيتو دي وحالقى لي نفسي مية سبب استضأل بيهو خلقتي دي لكوني زول من السافنا المدارية ساي ..ربيب دولة نامية بره العالم ده ذاتو وعليها عقوبات من 83 وحامل جواز اخدر عليهو شعار دهبي باهت لـ صقر جديان فاري جناحينو بصورة هندسية ماعندها علاقة بواقع الطيور ..صقر ماصادفناهو في أي سماء، آيل للانقراض او لعله انقرض بالفعل .. مرقتا عدل على الشارع العام الاكثر ضجيجاً.. |
ياعزيز
مشتاقين
طبعاً أي كلام على شاكلة إنت كتاب ونحوه معروف ولاداعي لتكراره
والله كتابتك سمحة ومرتبة ورويااانة وشكلو المدام الموقع ده ماسامعة بيهو ...تتصلق في الفرنجة سااااي وهي آمنة من مغامراتك الفقرية يافقري
|
Post: #19
Title: Re: المتعبون وحدهم يعرفون الاستجمام
Author: علاء الدين حيموره
Date: 01-31-2012, 10:01 AM
Parent: #18
والمثقفون وحدهم يعرفون نظم الحروف ....
اكتب فنحن في اشد الحوجة لمثل كتاباتك ...
لا فض فوهك ..
تسلم
|
Post: #23
Title: Re: المتعبون وحدهم يعرفون الاستجمام
Author: عمران حسن صالح
Date: 01-31-2012, 12:23 PM
Parent: #19
وأنا برضو يا وغد : | Quote: آي إيكّا دوللي ياخي |
بعد عشرمية مرة قراية
ويا بكري إجعله مدخل لحوشكـ وسيزداد عدد زواركـ
|
Post: #68
Title: Re: المتعبون وحدهم يعرفون الاستجمام
Author: خدر
Date: 02-02-2012, 05:58 PM
Parent: #23
|
Post: #44
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 12:12 PM
Parent: #19
علاء
سلامات كتار..لسع في رياض الخير راجين الخير؟
مشكور على الاطلالة يامثقف
|
Post: #20
Title: Re: المتعبون وحدهم يعرفون الاستجمام
Author: جدو
Date: 01-31-2012, 10:09 AM
Parent: #17
يا الله يا دكين
ما أجملك حين تكتب ...
أرجعتني لأشهر خلت وانا في محطة فيكتوريا منتصف ليلة الأحد
والمدينة العريقة نصف غافية وأنا وحيد غريب فاقد الدليل أهبط أرضاً انا فيها فيها غريب الوجه واليد واللسان لاول مرة
ولولا الاستعانة بالكابيتال والاسمول (فالشوارع والأندرقراوند والايليفاتور والاسكاليتور كلها مكتًبة)
أخوك كان كب الجرسلين..
سبحان الله ...
...............................
الفرق بين الزول الكتاب والزول الساكت زي كدي...
ليس في التلقي ولكن في عكس ما يتلقاه
|
Post: #21
Title: Re: المتعبون وحدهم يعرفون الاستجمام
Author: تولوس
Date: 01-31-2012, 10:42 AM
Parent: #20
الواطية دي .... لو لقيتها ناحية السليم كنت حا تعمليها شنو غير ما تقعد تدوبي
..........
كل الشوق يا عزيز يا عزيز ...كن بخير
|
Post: #22
Title: Re: المتعبون وحدهم يعرفون الاستجمام
Author: هيثم درار
Date: 01-31-2012, 10:56 AM
Parent: #21
أبدول امبس
حمد لله على السلامة وبركة الجيت راجع طيب وسالم وغانم
منتظرين الصور ،، الصور يا حبة
|
Post: #24
Title: Re: المتعبون وحدهم يعرفون الاستجمام
Author: محمد المرتضى حامد
Date: 01-31-2012, 01:41 PM
Parent: #22
أتحاشى قراءة أي حاجه يأتي بها دكين لأنها ستصل إلى نهاية وبعدها ما تعرف تسوي شنو،
أضف إلى ذلك معاناتي رهاب الأماكن العالية،
عزيز ، كم مره قلت ليك لامن تكون ماشي مع زول يدا بيد قل له أنك على وشك الإقلاع عشان ما تقص ضهرو..
هسه دا شنو دا..
لاتتوقف في برودواي نيويورك أو منطقة الإسثماثونيان في دي سي وخليك مع الكاشف أكتب لي عن كل شي.| Quote: تشوف العمارة تحترم ابو السقالة الوصلت لحدي هناك ذاتو... |
|
Post: #25
Title: Re: المتعبون وحدهم يعرفون الاستجمام
Author: حيدر حسن ميرغني
Date: 01-31-2012, 07:40 PM
Parent: #24
| Quote: آي إيكّا دوللي ياخي |
me too
-----
سلامات ياجميل
|
Post: #26
Title: Re: المتعبون وحدهم يعرفون الاستجمام
Author: نصرالدين صلاح
Date: 01-31-2012, 08:27 PM
Parent: #25
السيد دكين بن شلال
حمد الله علي السلامة
عارف لمن يعرف تلك الاماكن قرربت اقول ليك المارينز دة اسمة منو ..:)
سيدي
نيويورك لازالت تدهشني كل يوم
احس فيها بمعني الحرية الحقيقي و المتعة
تحوم فيها كداري و و تتصادم في الغاشي و الماشي و عينك ما تشوف و تحس الا النور ..
جوازك ابو صقر مهندس دة ما في زول بيسالك منو
الا عندما تهبط من المطية الجابتك بعدها تختو في الشنطة الا ان تغادر ...( ما يقوم يضيع منك)
نيويورك
فيها دروب ( ملتحمة ) و كلشر (culture) ما تديك الدرب الا بس دايرة
المهلة و الصيف
فا أمهل و تعال
-----------
تحياتي
|
Post: #27
Title: Re: المتعبون وحدهم يعرفون الاستجمام
Author: سارة علي
Date: 01-31-2012, 09:03 PM
Parent: #26
ياااا حليلك يا عزيز..
|
Post: #28
Title: Re: المتعبون وحدهم يعرفون الاستجمام
Author: Yassir Tayfour
Date: 01-31-2012, 09:16 PM
Parent: #26
يا دكين
لازم تطبق الجية في الصيف، الشتاء يحجب جمال هذه البلاد وناسها؛ منهاتن مدينة عجيبة، تشوف الناس والقطارات والمحلات تحت الأرض تقول فوق مافي زول..
|
Post: #29
Title: Re: المتعبون وحدهم يعرفون الاستجمام
Author: محمد حيدر المشرف
Date: 01-31-2012, 09:39 PM
Parent: #28
| Quote: وانحنا في ذلك السكون؟ |
وخايفين جدا من قوات مكافحة الشغب !
فتخيل !!!!!!!!!
|
Post: #32
Title: Re: المتعبون وحدهم يعرفون الاستجمام
Author: الصادق اسماعيل
Date: 01-31-2012, 10:01 PM
Parent: #29
المتعبون وحدهم يعرفون الإستجمام
صدقت يا عزيز
فقد تعبنا من الكتابات اليومية والتى لا تضيف إلى "النشيد سوى النشاز"
لذلك حق لنا أن نستجم بكتابة كتلك المنصوبة أعلاه.
المُسْتَجِّمون.
عنهم
أنا
|
Post: #59
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 06:40 AM
Parent: #32
الصادق ود اسماعين..
ازيك ياصديق وعوافي..
اكثر الناس جنة يوم القيامة اكثرهم كفارات في دنيا الله..
متعبون فيها منتمون الى الجنان..
دمتا رايق ياسمعة
|
Post: #60
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 06:43 AM
Parent: #29
المشرف..
سلام كتر يادوك..
انسى بس..دي قصة طويلة..انحنا انتهينا من مرحلة ابادة الهنود في دارفور وقمع البجة في البحر الاحمر وتهجير النوبة في الشمال ويادوب دخلنا في مرحلة الحروب الاهلية..
|
Post: #58
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 06:33 AM
Parent: #28
اب تفة
انتا في كدنا ولا في الهوم لاند؟
تكون بالغتا لو مرمي في واحدة من تلك المدن الصاخبة..
تعرف بعض من اللحظات الودودة التي لاقتني في دي سي ومانهاتن.. فترة الانتظار التي نقضيها معا كجماعة خواويج وافارو امريكان وافرو ساي واسويين بانتظار المترو ..
في انفاق المترو بتعرف فعلا مدى انشغال هؤلاء الناس ومدى جديتهم..جادين حتى في التشرد والعزف على الات نحاسية بانتظار سنتات وعملات حديد ولامبالاة مصروفة كاش من مارة متعجلين..
في انتظام تام وفي ثواني فقط وكانو الناس دي عارفا بي ياتو باب ..تلقاهم زووط انقطعو داخل المترو..
البقرا في كتاب والبقرا في جريدة اعلانات مدوها ليهو عند مدخل المترو ,.,والخاتة هدفون وبتسمع وهي تتكي بصورة مثيرة غير مقصودة على عمود المترو ..
واذا سالتهم عن محطتك ولون قطرك ..اجابوك في همة وبذل وباختصار وافي .. عالمين غاية في الفرندلي..
ولحدي هسي اكرر في بعض الاحيان اسماء محطات في واشنطن جلست فيها طويلا انتظر لاشي وقد اعجبني رسم اسمها ووقعه على الاضان، : فان دورن..فان نيس..فراغوانت نورث ..والمحطة التي تلتقي فيها الالوان مترو ستيشن..
امريكا دي عبارة عن تلاتة مستويات ..مستوى ناس الانفاق ومستوى ناس سطح الارض ومستوى ناسا..
____________________
تاني ماجاي إلا لوتري..
|
Post: #31
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 09:54 PM
Parent: #26
ود الزين ..بن الشمس دي زي بن الحرام ..فانا لازلت على قناعة بانو قدرة الادمي على الابداع والخلق وحسن التفكير والتطور مربوطة بي شدة حرارة الشمس عليه..
اما النيل الذي نراهن عليه..فدونك مالدى عترة الاباتشي في غرة واشنطن دي سي..
عندهم شيتا ماهل على اطرافة شجرات من صنوبر نمت على مهل ..مديدة..سامقة كثيفة الظلال عليها متسلق قد اصبح جزءا منها..واظنه نهر مقدس عند هؤلاء الامريكان..
اسمو ال"بوتوماك" اسم ذاتو شكلو نجرو chـــيف هندي ..او لعلهها اسم قبيلة هندية..
اما عن تفاصيل السليم السالت عنها ..فبتلقاها تحت يا استاذ..
ود البشرى..
الله يقبل حمدك ياخينا..سلامات وامتنان
بعدين توفيق شنو ياخينا..انا رجعتا يامعلم.. مولد وخلص..
بالمناسبة ..مريكا ماعايزة توفيق عايزة علاقات اقتصادية..التوفيق ده هنا ياصحبي..هنا في الحتت الفيها كفيل ..والحتت الممكن تقعد فيها اكتر من خمسة سنة مايدوك جنسية..
الله يوعدك ياصاحب..
وخليك قريب ياصاحب
محمد طه الملك..
ياخ لاقتني جمعية لي ناس دنقلا في نيويورك ..تصدق..
جمعية عديل فيها اشتراكات واندادي وعراريق...
شفتا سماحة السيقان؟ شفتا قدرة الخلق على الابداع؟ شفتا كيف الناس دي بتستثمر سيقانا في شوارع الله اكبر في عز الشتا؟؟
ايامكم طحنية يا اولاد الطقس المداري..
ام سهى
وييييييينك
يعلم الله لو بس تاني اديتني سنة كان نسيتك ذاتو...
:-)
مروق الاصحاب من فجاج القرايات مسالة مفرحة تخليك تتبسم قبل ماتقرا المداخلة..
ليك وحشة وحاة البنوتات ..لم تخففهها هذه المداخلة وانما ذاتها شوق وامتنان قديم متجدد..
دمتي في امان ربك راضية وآمين..
صلاح اساعيل
افدح الاخطاء انو تودر الانطباع الاول للمدينة التي تلج اليها اول مرة..
لانو بعد فترة بتحس بي انو في شي تغير في احساسك بالناس وبالشوارع..
تظل مشتت الذهن بين الصورة الراتبة الروتينية التي تايتك بعد سنة..ومابين ذلك الانطباع الاول الذي داهمك وانتا شايل شنطة (رحلة سعيدة)
لذلك احرص على تسجيل الانطباع الاول لاتجاهات الشوارع والمحلات وعموم الجغرافيا..وتمتع بعدها بسنين غربتك ذات الروتين ..
مشكور ياحبيب على المرور العميق..
|
Post: #45
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 12:18 PM
Parent: #25
عمران
تصورانا اول مرة اتكلم مع بكري كان قبل اسبوعين في تلفون مفاجي ..
ياخ ده قال لي: عزيز مالك ضعفتا كده..
نفس الكلام القالتو لي سوزان رايس على عتبات البيت الابيض..
سوزان دي لو كانت أي شي غير الوظيفة دي كانت حتكون شارطة عديل..
------------
وين فكتوريا دي ياجدو؟؟
ماتقول لي برطانيا
لو ادوني منحة في كوين ميري ماماشي برطانيا دي..
لكن مابعيد تكون في نيويورك..دي ياخ يانا لقيت فيها مرة اسمها ست النسا..معقول ما يكون فيها محطة فكتوريا..
شفتا بلاي اثر حروف اللاتين على نضمي الشوارع؟
اثر نضمي الشوارع على السنة وشفايف اهلها؟
واثر السنة اهلها وشفايفم على شهيتنا العامة؟
والعبرة العامة؟
والدموع المخصوصة؟
-----------------
ابو درار
الصور جاية مع عمك "محد الي"
صور مدهشة زي ما عمك ذاتو مدهش..
------------------
حيدر ياقريبي
سلمتا يامعلم..اخبار زولتي ديك كيف؟
لسع ولا خلاص قنعت من خيرا فينا..
(وش باسم)
--------------
سارة
شفتي بلاهي حظي المهبب..اجي انا دي سي تمرقيها انتي بي غادي..
والله تمنيت لو كان بس القى رفيق من الميين روود في تلك الطرق المذهلة..
من وين بديتي المدائن دي ووين انتهت بيك؟
هسي بلاي ما كان شدينا تلفون لي ام التومات وسمعنا شوية نبذ فارغ ورؤية حلبية لي امريكا دي..
ياخ فوتي علينا فرصة شوفة سمحة..
كوني في خير..الى ان نلتقي
|
Post: #30
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 09:51 PM
Parent: #15
إماد ابدلا..
ياعمدة فاتك مالا يجب ان يفوتك..
انتا تحديدا يشتهيك هذا الانطباع الاول .. انتا مكانك في مثل هذه المدن..قالري منفرد متفرد في الوانه ومدرسة الخرطوم تخالف تيارات السائد في مانهاتن..
بنيات باكفال معقولة..يشاهدون -باعجاب - في الالوان ما نحسبه عادي ومتوفر..بقر ووازا وضهاري رشاد وابو جبيهة ونهايات قيسان والرصيرص..
الوان السافنا الفقيرة المبهرة..
محترفي بورتريهات وناس صعاليق ساي..وساسة ومرشدي شرطة..ونسات تمتد لاخر الليل..واخر الليل في مانهاتن زي اول الليل زي اول الفجر زي اول النهار..
ساعات اليوم في تشابه من كثافة النسمات واختلاف الطباع..
فاتتك بلد ياعمدة في تلتين حياتك الفاتت..
فادرك تلت عمرك الاخير..
وانا احبك عليم الله..
|
Post: #33
Title: Re: المتعبون وحدهم يعرفون الاستجمام
Author: Elawad
Date: 01-31-2012, 10:09 PM
Parent: #30
شكرا يا دكين... أي محاولة لقول شيء آخر لن تنصف كتابتك.
|
Post: #61
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 06:45 AM
Parent: #33
العوض..
والايام الزواهر..كويس انك لسع متذكر الباص ويرد
(وش باسم)
مشكور ياخ على العبارة المادحة..
|
Post: #34
Title: Re: المتعبون وحدهم يعرفون الاستجمام
Author: DKEEN
Date: 01-31-2012, 10:12 PM
Parent: #30
اساسي..
قدر يا معلم..واحسبها كفارة كبيرة تلك التي اتت بي وبك الى تلك النواحي ..احتسب ساي بس..ابتسمت لامن قريت قصة شفقتك على اصحابك..ياخوي اشفق على عمرا وهبه الله لك ..راح ساي مينا في عمرة في بني مالك..
اشغق على الدوام ..ساي ذهابا وايابا مدى الحياة..
زقاق تموت فيهو باختيارك ..ولا الموت بتاع سارتر حق المضطرين ده..
تمتد الحرية في امريكا الى المدى الذي تجعلك تختار كيف تموت..بنحض خيارك..
مرورك مقياس معلمين..بقيس بيهو مدى تدهور الحياة التي تجتاحني مع الحياة...
شكريا يا صاحب
تولوس ..ود الزين..ابو حمودي ..
سلامات يا اصحاب بعد هذه الغيبة..الواحد بقى ماعارف منو الغايب ومنو الماغايب في هذا المكان الضاج بالاسماء الجديدة ...
اها..بالنسبة لي النصرانية بتاعة مطار هيثرو ..فدعني استرسل لكم عن تفاصيل ماجرى..غايتو انا يقيني بس انها تكون قبل تلاقني قفلت صفحة كم وتلاتين من كتاب السفي والنار بتاع سلاطين او قرت لتوها حادثة مقتل غردون..
- وات از يور ناشينالتي؟
- سودانيز
- ليت مي سي زه سيستم ..ثم التفتت الى العسكري التاني (والله اني اذكر وشو ولكأنه قاتلي) بارد الملامح لابس نضارات ..خاتي جل في شعرو: جورج، إز سودان از ون اوف زه مين كده ماعارف كونترز؟
- هه..ليت مي سي..ممم...نو اتز نوت...ثم التفت ونظر لي بشماتة خالصة، ورجع يشتغل ورق الزول القدامو.
(ك... امهاتكم ياعواليق..انا ماكل عشا حبوبتك..بتعاين لي كده مالك؟)
ثم بعدها نظرت الى المرة لي المرة مرة اخرى وقالت:
- كان يو إستى اون زات chــير فور منتس؟
( يعني انا اقيف في الصف مزنوق بول لمدة ساعة ولامن اجي تقول لي انتظر تاني لحدي ما اخلص الصف الباقي؟؟) حسيت بي طعم حامض معوي وحرقان ..
- طيب قبل ما امشي اقعد هناك ..ف يالكرسي دااك..زي ماقتي ممكن توريني الفيزا دي شنو؟
- إتز دايركت اسايد فيزا..
- يعني شنو؟
- إتز اونلي إلو يو تو ستى إن زه تيرمنال تِل يور نكِست فلايت
- طيب ياخواجية.. ما انا ده بالضبط العايزو عايز اكون في التيرمنال ده لحدي ما طيارتي تجي..انا اصلا لامن طلبتها طلبتها كده..لاني عارفا انها كده..
- صو واي دو يو كم تو مي تو اسك فور انترينق UK؟
- انا ماجيبتك اصكِنق فور وات يور آر سيينق ..انا جيت هنا لانو بتاع السيكروتي داك قال لي ممنوع تقعد "هنا" ..وانا ماشايف مخرج تاني لي الحتة السماها بتاع السكيورتي بي "هنا" غير الصف ده...
- يس هي إز رايت ..إتز ا بورهبتد إيريا..يو كانت ويت هير..
- طيب انا اسوي شنو مثلا..الطيارة الجابتني نزلتني هنا..وانتي بتقولي لي ما ممكن تقعد هنا..والاخ المعاك ده بقول لي ماممكن تخش بي هنا..والقنصل بتاعكم اداني الفيزا دي في الدوحة وقال لي دي لي هنا..والسيستم بقول انو دي فيزا بتخليك في الترمنال يعني هنا..
بعدين ياخ انتي بتكلمي بي زعل كده ليه؟ هل تفتكري انو دي مشكلتي انا ولا مشكلة الاخ ده ولا مشكلة القنصل ولا مشكلة بتتعلق بتعريف مفردة الترمنال..(ولا مسالة تاريخية انتي عايزة تحسميها فيني دون كم طاشر الف سوداني في بريطانيا..انا المسكين الجاي عبور ده ..انتو يعني الواحد كان مافكا فيكم حربة ما بتتعظو؟؟) طبعا الجزء الاخير البين القوسين ده انا قتو في سري..
- إتز نوت ماي بروبلم.. يو كانت استى هير إن زيز إيريا..آند يو كانت كم إن.. ومدت لي الجواز الاخدر اب صقر باهت آيل للانقراض..
مسكتا جوازي وانا حاسي بي اني هين من هوان.. مستخسرة فيني حتى الشرح المنطقي .. يالهي.. هنا انا لا اسوى حتى المنطق.. غلبني القى مفردة حقارة بالانجليزي..
كنتا عايز اكورك : زيز إز جصت فكنق حقارة ساي ..
واااا هواني في ماورا المانش..الناس دي لا عايزاني "هنا" في التيرمنال ولاعايزاني "هناك" في ماوراء الكاونتر بتاع العواليق دي..لاعايزاني هنا ولا عايزاني هناك... في حين انو الخيارات المتاحة هي فقط يا هنا ياهناك..
يعني انسف نفسي واختفي عشان لا اكون هنا ولا اكون هناك..انعدم فجاة لانو انا فيني شي ما عجب الانجليز ديل..مع فكرة فيني شي اعجب الانجليز ديل جاتني فكرة استخدم المكيدة بتاعة السود..
قمتا قتا ليها بي صوت عالي يكاد يمسعه كل المسافرين
- يو آر دوينق صش ثينق بكوز ايام بلاك ...رايت؟
سكتت وعاينت لي بي برود الدنيا في ابلغ وصف لي انو السكوت علامة الرضا..(الداير يسالك منو هنا لو قتي: آي عشان انتا اسود معفن ساي ؟)..يبدو انو هذه العبارة تم استهلاكها في هذا الجانب من مطار هيثرو كثيرا بواسطة الاخوان جنوب الصحراء..لانو المرة بعديها ردت بنفس البرود الذي يتعفن مع حركات شفتيها شديدى الإحمرار..
- كان يو استى اون زات chــير فور منتس؟ (حتى كلمة sir البقولوها في العادة ماقالتا) ..
اها ..بت الحـــرام دي عايزة تطرشق لينا رحلة مانهاتن وكورس الجامعة الامريكية، بدون أي سبب معقول..
انتظرتا حوالي نص ساعة..مشيت خلالها الحمام وسرحتا شعري قدام المراية وانا بقول احتمال شكلي عـــــرص اكتر مما يجب.. انا اصلا كان مفروض احلق واسافر بعدين نادتني وشالت الجواز وخشت جوه مكتب ربع ساعة وجات مارقة وقات لي: انا حاديك بس 24 ساعة تخش لندن ولازم تجي تسافر قبل 24 ساعة ..إز ذات كلير؟
- قتا ليها بي لامبالاة مقصودة وانا ماصدقتا لقيت فرصة اتفشى على قدر ضآلة التفشي : ياخ انا اصلا ماعايز اخش لندن ولا جيت عشان اخش لندن..ارخص طيران فقط هو الجابني ترانزيت بي هيثرو ...وشايفة الكنبة ديك ( واشرت لي كنبة ورا ضهرها ورا كاونتر الجوازات البريطانية ) انا حامشي اتخمد هناك لحدي الخمسة ساعات دي تمر..
دنقرت تكتب في الجواز "اونلي تونتي فور اورس" حسيت بي انو هي اتغاظت من قصة ماعايز اخش لندن دي..اجتاحتني راحة وافرة لهذا الاحساس ...وقربتا امد يدي ارفعا وشها من خدودها برااااحة كده واقول ليها بكل برود: ابقى بت تعالي عدي بي بنطون السليم..انا كان ما طهرتك في كثيب رملي شنبي ده يقوم في فيك..
اكيد حتحنسيني اوريك درب اقرب قنصلية عشان ترجعي..
عند ذلك البنطون الوحيد..في ذلك الخلا البعيد..في تلك البلاد البعيدة..عند اولئك القوم الذين تحقرون بهم على الدوام.. حاقول ليك: معليش ما ممكن تعدي لا لي الشرق ولا لي الغرب..ولا ممكن تقعدي هنا ..ما بي أي لغة وانما بالاندادي الفصيح ..وبي نوبية طليقة حاكرر ليك الكلام واناعارف انو انتي مافاهمة دين حجرك..
قطعت سيل خيال المستضعفين ..ودخلتا الى "هناك"..متجها نحو ستار بكس..
|
Post: #35
Title: Re: المتعبون وحدهم يعرفون الاستجمام
Author: أمين محمد سليمان
Date: 01-31-2012, 10:21 PM
Parent: #34
| Quote: آي إيكّا دوللي ياخي |
رغم اني ما عارف كلام عماد دي يعني شنو إلا إنو بعبر عني تماما !!
ياخي أنا ما مكجن لي زول في محل بكري ده قدر هذا الدكين .... الرجل يكتب بمداد من نور و بقلم مغموس في الفراديس و يجينا مرة في السنة !!
قريت البوست ده زي تلات مرات و كل مرة تتسع الدهشة من هذا الوصف الباذخ و هذا السرد الماتع ... ياخي أمشي : عليك من الله ما تستحق !!
|
Post: #37
Title: Re: المتعبون وحدهم يعرفون الاستجمام
Author: سارة علي
Date: 01-31-2012, 10:46 PM
Parent: #35
ههههههههههههههههههههههههههه بالغت مع الموظفة لكن..
هههههههههههههههه التهديدالوعيد في شنو؟؟
|
Post: #38
Title: Re: المتعبون وحدهم يعرفون الاستجمام
Author: هيثم طه
Date: 01-31-2012, 10:54 PM
Parent: #35
Quote: : آي إيكّا دوللي ياخي
| Quote: رغم اني ما عارف كلام عماد دي يعني شنو إلا إنو بعبر عني تماما !! |
|
You are in the bottom of my heart, yakhi
---
اها يا بروف لسع في موقفك !
---
شكرا يا دكين
|
Post: #62
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 06:46 AM
Parent: #38
هيثم طه..
ترجمان النوبة الشغال بي المعنى العام للاشياء..
سلامات ياخ وشكرا لهذا الشرح..فقد اعجبني رغم انفلات معانيه الى نواحي رومانسية..
|
Post: #39
Title: Re: المتعبون وحدهم يعرفون الاستجمام
Author: احمد التجانى احمد
Date: 01-31-2012, 10:59 PM
Parent: #35
اما أنا يا امين يا نوته فيعنيني في كلام دكين دة قصته مع الخواجية لسببين اولا شعرت بالالفه لذات الكرسي الاشارت عليه الخواجة لدكين حين زجرة ، باقي الكرسي ده سبقته عليه في القعدة الصيف الفات ، ثانيا معقول دكين يكون كب كل الكلام القاله مع الخواجية بالانجليزي ، لو صح الكلام دة يبقي الدوحة هي المفروض يكون سرها باتع
حمد لله علي السلامه يا دكين
|
Post: #56
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 10:39 PM
Parent: #39
احمد التجاني..سلام شديد
الكلام المكتوب فوق ده هو الانا قتو..او الانا قصدتا اقولو
بس قتو بي ياتو انجليزي.. او الاخت فهمت الانجليزي بتاعي.. او كنتا بطلسم ليها في لغة الطير دي قصة انا لا اجزم بها.
في الفهم العام ما المهم تقول بي ياتو لغة ..المهم انتا عايز تقول شنو..
بطنك بتبرد ليس من فهم التاني لي لغتك وانما تبرد البطن لانو انتا عبرتا عن نفسك..مرقتا غبينتك
وعلى كل حال ..كان واضح انو هذه الموظفة(وهي بالمناسبة بوليس البوردر) كان واضح انها سلفا ساحبة بساط حسن النية مع الاسود اب شعر مفرتق ده..
امتناني لعباراتك الانيقة ودمتا رايق
|
Post: #36
Title: Re: المتعبون وحدهم يعرفون الاستجمام
Author: أيزابيلا
Date: 01-31-2012, 10:44 PM
Parent: #34
| Quote: المتعبون وحدهم يعرفون الاستجمام |
ولو اصبح عليك صباح آخر فى مانهاتن كان حتلقى روحك انتظمت فى خيط المارة المهرولين بعبثيتهم كيفما اتفق
او كنت جدلت ليك شعر راستافاري تلوذ بيهو كلما مررت الحياة مشطها القاسي على صباحاتك
أو بقيت على اتكاءتك فى البنش قصاد ثيرتى تو استريت لحدي ما ينبت ظلك بندقية قاسية ويد توصف للمارة بلا اكتراث
ولأشتبك في رأسك اكثر من نشيدي علم وخرائط وحسابات وانترست ريت..للفظت عمرك على ذات البنش..نصو بآكسنت ونصو التانى سايلنت
لو قعدت ليلتين بس علي ليلتك دي لما وجدت وقتا تحدثنا عن توقك الحار للاستجمام فى نواحى ابروف او ود السيد او حتى الكلاكلة ذاتا!
واهو!
حمدلله على السلامة برضو !!
|
Post: #40
Title: Re: المتعبون وحدهم يعرفون الاستجمام
Author: Afraa Sanad
Date: 01-31-2012, 11:25 PM
Parent: #36
دكين ياخي مشتاقين والله يشهد علينا المعبد الماسوني ومرسي القوارب والضحكات الصافيات ياخ
|
Post: #41
Title: Re: المتعبون وحدهم يعرفون الاستجمام
Author: حسين نوباتيا
Date: 02-01-2012, 07:28 AM
Parent: #40
| Quote: كنتا عايز اكورك : زيز إز جصت فكنق حقارة ساي . |
صدقّني كان بتفهمك ...بس كنت تخت الرحمن في قلبك:)
لم اضحك منذ ان اشتركت في هذا البورد مثلما ضحكت في هذا البوست ... غايتو لسانك وكيبوردك متبرّين منك:)
حاولت الاتصال بك وخدر اثناء سفرتكم من نيويرك لدي سي بس رقم خدر كان ملخبط عندي...
خيرها في غيرها وحمدلله على السلامة...
|
Post: #42
Title: Re: المتعبون وحدهم يعرفون الاستجمام
Author: ibrahim kojan
Date: 02-01-2012, 09:30 AM
Parent: #41
دي المره الالف امر من هنا ....
وكل مره يغلبني ما أقولو...
(أقول الكلام البيوجع مسامع البيسمع, ويجع صداهو يوجع مسامع البيسمع..
حزينه السواقي البتزقي جروف الريد الموقف قبولو ... أقولو؟؟)
والله عماد شرح لي الرطانة ديك وانا زاتي بحبك لامن تقول كفي ... يا دين ياخ!
وميتين السفر اللعين ياخ...
كم أحببت هذا السلسبيل اللغوي والوصفي... كم من الزمن سأبقي هنا؟؟
دكين والله الحمد!
انا قاعد هنا ....
|
Post: #43
Title: Re: المتعبون وحدهم يعرفون الاستجمام
Author: محمد سنى دفع الله
Date: 02-01-2012, 09:52 AM
Parent: #42
في جزء حا اعملوا في مسرحية حنين
عايزين الموافقة للملكية الفكرية وكده
محبة وسلام وسافر تاني عشان تكتب لينا حاجة كده
|
Post: #46
Title: Re: المتعبون وحدهم يعرفون الاستجمام
Author: طلحة عبدالله
Date: 02-01-2012, 12:19 PM
Parent: #43
والله لكن يا دكين حاجة ما تخلص
أنا كتا قايلك زول ساي زيك وزي ناس ود البشرى والذي منو
حرم تاني كل يوم أقراك.
|
Post: #47
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 12:34 PM
Parent: #46
جبتا بالضبط وجع مدينتين يامرتضى
الاسماثونيان في دي سي
وبروود واي في مانهاتن
كنت بردم فرقات الرفقة وبدندن (والوعد بيناتنا إنّك كل يوم تكتب إليـــــــــــــــــــــــــــــــــــــــــا
هل يجوز والغربة حارة بالخطاب تبخل عليـــــــــــــــــــــــــــــا) وانا في "البا مورلي" ستريت في جورج تاون..برد وبيوت زي بيوت مدينة البط..اسوار خشبية صغيرة حادة الاطراف ومكنة جز الحشائش ومداخن من طوب احمر وباك يارد بنجيلة مهذبة..
واضاءات صفراء حميمة خافتة ترها تنعكس على رفوف كتب عبر الشبابيك المطل على نفس الاستريت..
ولامن اجي الإسثماثونيانميوزيام..تجي تلقى حقارة الامريكان جلية على مشاهد التاريخ..
هياكل وعظاءات العاديات والمنقرضات جنبا الى جنب مع هياكل انسان النيل وانسان الرافدين..
يمرقونا منقرضين مع الديناصورات..تو ستارت نيو ايدج اوف سفلايزشن..
التاريخ يبدا من ستاتيوت اوف لبرتي بي درقة وسيف اعلى مبنى الكابيتول..
هيبة مرة تبدو هدية ورضية ونظرة الى افق لاينتهي إلا في القيامة..
منطقة الإسثماثونيان دي كلها مجاني متاحف ملح ساي.. تماثيل في أي ركن.
درة سياح واشنطن.
وبروود واي في نيويورك..شارع آآسر..إله شوارع نيو يورك بلا منازع ..شارع عبارة عن شورت بريف للمدن الامريكة..
واظنو الشارع الوحيد في مانهاتن المسموح ليهو بالالتواء في عرصات المدنية وجخاخينها..
الله يجمعنا بيهو تاني..
فقد انتظرنا هناك طويلاً ملتفتين نبحث عن اشارةٍ نجتر فيها ذاكرتنا..فما وجدنا شيئاً..
|
Post: #48
Title: Re: المتعبون وحدهم يعرفون الاستجمام
Author: حمد فتح الرحمن
Date: 02-01-2012, 01:39 PM
Parent: #47
قعدتك في البنش دي كانت محتاجة دردمة سفة معقولة كدا و ختها
|
Post: #49
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 02:21 PM
Parent: #48
حمد امبس
عليك امان الله عمك "محمد الي" طلع حافظ دي سي دي طوبة طوبة..
مستعد يصحح العمدة في اسماء الشوارع وياتو شارع هسي زحمة وياتو بودي لي ياتو..
راجل متعة ويتصاحب زيو زيك وزي ابو درار..وفي رواية احسن منكم ذاتو..
المقعدك شنو ربنا يسالك؟
والدستور الامريكي ذاتو بسالك
--------------
تصدق قعدتي في البنش دي كانت عايزة زول..
عايزة الزول مدردم بصورة معقولة كده..
|
Post: #50
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 02:56 PM
Parent: #48
|
Post: #51
Title: Re: المتعبون وحدهم يعرفون الاستجمام
Author: نوفل عبد الرحيم حسن
Date: 02-01-2012, 03:22 PM
Parent: #50
بأمر طبيب العيون ممنوع اقرب من الشاشه
الا دكين دا بعمينا وبقعد
|
Post: #52
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 05:22 PM
Parent: #51
امين سليمان
ياخينا..انا لست كما تقول ..لاني كاتب ولاعندي قدرة على الكتابة..وانما مانهاتن هي التي فعلت..بلد تطلق ليك عنان الانفعالات..يغلبك تتفاهم مع اهلها..فتلجا مضطرا الى وسائل تعبير اخرى..اقربها الكتابة المرتبكة المشتتة الفوق دي..
مانهاتن شديدة يامحمد..شديدة وليضيضة
بالعموم كده امريكا دي دي تدهشك موش لانها بلاد الحرية..بل لان معنى الحرية يتغير فيها ..
انا وطوال اعوام عديدة خلت هذه الحرية هي ان يكون لك الحق في ان تقول ماتشاء وماعارف تفعل العايزو ولايتم الحجر على رايك والعبارات بتاعة حريتك تنتهي عند حرية الاخرين..والحرية مسؤلية وبتاع..
بالجملة كده كنتا فاكر الحرية دي تدور في المعاني المرصوصة في السطر اعلاه..
جيت قبل اسبوعين فقط اكتشف ماذا يعني الامريكان بالحرية..
الحرية هي انك تحس بي انو انتا امريكي طالما انتا في الهوم لاند..برغم انك لست كذلك..
الحرية هي ان تكون جزءا من السيستم بمجرد وصولك مطار دلاس..
ياخ دي قصة كبيرة بدت من كرستوفر ..ومخازي اخرى..ومسحت كلها بالاندبندانت اوف ديكلاريشن وتوجت بالثيرد امندمنت..
-------
آي=انا
إكي=انتا/انتي (بنفكها في المذكر و المؤنث كون الاندادي لايعترف بالفروقات الجنسية)
دوللي= اريدك واحيانا تستخدم لوصف العمق الغريق..بس هنا جات في معنى الريدة..والله والاندادنيون اعلم..
ذلك مع صدق مدلولات الترجمة ساقها ترجمان النوبة اعلاه
.
|
Post: #53
Title: Re: المتعبون وحدهم يعرفون الاستجمام
Author: DKEEN
Date: 02-01-2012, 05:22 PM
Parent: #51
نصر الدين..نضر الله وجهك..قد اضئت فؤادي..ماخسارة فيك البوينتس يارجل..تصدق الأمريكان ديل كسبو بني ادم حقيقي وانسان...من وين مبدأك ياارباب؟ عليم الله أنتا حقك لوتري في اليوتوبيا موش كوينز..بإمارة انك عايز تعمل من جماعات اللحم في نيويورك زمرة صالحين رقيقي الحاشية..يارجل خاف الله وتمثال الحرية، أنتا في نيويورك، اصخب مدينة علي الاطلاق...مدينة اصغر بار فيها بي عمر حلتكم وداير تعمل ثيوري جديد في ثقافة الدليفري ؟ نيو يوووك وعووووك..لو انزل الله نبيا في تلك المدينة..كان دخل السيستم ونزل بعد ان يدفع التاكسس حقت الهبوط..ياصديقي انما الفرج اتٍ ..فشد حيلك..حنتلاقى قطعا ان مد الله في الاجل ياارباب
|
Post: #54
Title: Re: المتعبون وحدهم يعرفون الاستجمام
Author: nadus2000
Date: 02-01-2012, 09:40 PM
Parent: #51
عزيز يضيف للسفر متعة ثامنة....
سااااافر ياااخ وتعال لينا وها نحن في هذا البنش (البوست) قاعدون....
|
Post: #57
Title: Re: المتعبون وحدهم يعرفون الاستجمام
Author: خدر
Date: 02-02-2012, 04:16 AM
Parent: #54
| Quote: بعدين ياخ انتي بتكلمي بي زعل كده ليه؟ هل تفتكري انو دي مشكلتي انا ولا مشكلة الاخ ده ولا مشكلة القنصل ولا مشكلة بتتعلق بتعريف مفردة الترمنال..(ولا مسالة تاريخية انتي عايزة تحسميها فيني دون كم طاشر الف سوداني في بريطانيا..انا المسكين الجاي عبور ده ..انتو يعني الواحد كان مافكا فيكم حربة ما بتتعظو؟؟) طبعا الجزء الاخير البين القوسين ده انا قتو في سري.. |
Quote: غلبني القى مفردة حقارة بالانجليزي..
كنتا عايز اكورك : زيز إز جصت فكنق حقارة ساي .. |
Quote: يعني انسف نفسي واختفي عشان لا اكون هنا ولا اكون هناك..انعدم فجاة لانو انا فيني شي ما عجب الانجليز ديل..مع فكرة فيني شي اعجب الانجليز ديل جاتني فكرة استخدم المكيدة بتاعة السود..
قمتا قتا ليها بي صوت عالي يكاد يمسعه كل المسافرين
- يو آر دوينق صش ثينق بكوز ايام بلاك ...رايت؟
سكتت وعاينت لي بي برود الدنيا في ابلغ وصف لي انو السكوت علامة الرضا..(الداير يسالك منو هنا لو قتي: آي عشان انتا اسود معفن ساي ؟)..يبدو انو هذه العبارة تم استهلاكها في هذا الجانب من مطار هيثرو كثيرا بواسطة الاخوان جنوب الصحراء.. |
| Quote: انتظرتا حوالي نص ساعة..مشيت خلالها الحمام وسرحتا شعري قدام المراية وانا بقول احتمال شكلي عـــــرص اكتر مما يجب.. انا اصلا كان مفروض احلق واسافر |
ده ضحك فاتني والله .. ياريتو لو حصل و انت هنا 
|
Post: #63
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 07:08 AM
Parent: #57
| Quote: ولو اصبح عليك صباح آخر فى مانهاتن كان حتلقى روحك انتظمت فى خيط المارة المهرولين بعبثيتهم كيفما اتفق |
او | Quote: كنت جدلت ليك شعر راستافاري تلوذ بيهو كلما مررت الحياة مشطها القاسي على صباحاتك |
أو | Quote: بقيت على اتكاءتك فى البنش قصاد ثيرتى تو استريت لحدي ما ينبت ظلك بندقية قاسية ويد توصف للمارة بلا اكتراث |
| Quote: ولأشتبك في رأسك اكثر من نشيدي علم وخرائط وحسابات وانترست ريت |
..
| Quote: للفظت عمرك على ذات البنش..نصو بآكسنت ونصو التانى سايلنت |
بالاعلى ياسادتي سطور حكيمة قاصدة..
بالاعلى كتاب يسرد في بلاغ بليغ سفر الولايات المتحدة تجاه المهاجرين ذوي المحنة..الذين هاجروا وفي دمهم جينات المحنة..الذين ضل سعيهم في السودان فطفقوا يحسنون صنعا في غيره..
دي حقو تشيليها تكتبيها في حيط البيت زي ايام الداخلية..او تكتب مصاحبة لبورتريهات..
لدقتها ورصدها الصادق فحقو تكبري من كوم بصيرتك..يمكن تمرقي كاهنة قريب..
والله ياشذى كتابتك دي لو مطيتيها كان عملتي بايبل مهاجرين..
سلامات ياخ ..وشكرا على اللقاء الجميل..
|
Post: #64
Title: Re: المتعبون وحدهم يعرفون الاستجمام
Author: omer osman
Date: 02-02-2012, 08:01 AM
Parent: #63
| Quote: وحامل جواز اخدر عليهو شعار دهبي باهت لـ صقر جديان فاري جناحينو بصورة هندسية ماعندها علاقة بواقع الطيور ..صقر ماصادفناهو في أي سماء، |
يا دكين انتو كيف بتشوفو الحاجات الما بنقدر نشوفه رغم انو كل يوم بنشوفه !!!
يا انتو مبدعين يا نحن قاعدين سااااااي !!!
|
Post: #65
Title: Re: المتعبون وحدهم يعرفون الاستجمام
Author: محمد حيدر المشرف
Date: 02-02-2012, 09:43 AM
Parent: #64
اتنين فشونى تمام فى الموضوع ده ..
دكين ومصطفى سعيد !!
Quote: - وات از يور ناشينالتي؟
- سودانيز
- ليت مي سي زه سيستم ..ثم التفتت الى العسكري التاني (والله اني اذكر وشو ولكأنه قاتلي) بارد الملامح لابس نضارات ..خاتي جل في شعرو: جورج، إز سودان از ون اوف زه مين كده ماعارف كونترز؟
- هه..ليت مي سي..ممم...نو اتز نوت...ثم التفت ونظر لي بشماتة خالصة، ورجع يشتغل ورق الزول القدامو.
(ك... امهاتكم ياعواليق..انا ماكل عشا حبوبتك..بتعاين لي كده مالك؟)
ثم بعدها نظرت الى المرة لي المرة مرة اخرى وقالت:
- كان يو إستى اون زات chــير فور منتس؟
( يعني انا اقيف في الصف مزنوق بول لمدة ساعة ولامن اجي تقول لي انتظر تاني لحدي ما اخلص الصف الباقي؟؟) حسيت بي طعم حامض معوي وحرقان ..
- طيب قبل ما امشي اقعد هناك ..ف يالكرسي دااك..زي ماقتي ممكن توريني الفيزا دي شنو؟
- إتز دايركت اسايد فيزا..
- يعني شنو؟
- إتز اونلي إلو يو تو ستى إن زه تيرمنال تِل يور نكِست فلايت
- طيب ياخواجية.. ما انا ده بالضبط العايزو عايز اكون في التيرمنال ده لحدي ما طيارتي تجي..انا اصلا لامن طلبتها طلبتها كده..لاني عارفا انها كده..
- صو واي دو يو كم تو مي تو اسك فور انترينق UK؟
- انا ماجيبتك اصكِنق فور وات يور آر سيينق ..انا جيت هنا لانو بتاع السيكروتي داك قال لي ممنوع تقعد "هنا" ..وانا ماشايف مخرج تاني لي الحتة السماها بتاع السكيورتي بي "هنا" غير الصف ده...
- يس هي إز رايت ..إتز ا بورهبتد إيريا..يو كانت ويت هير..
- طيب انا اسوي شنو مثلا..الطيارة الجابتني نزلتني هنا..وانتي بتقولي لي ما ممكن تقعد هنا..والاخ المعاك ده بقول لي ماممكن تخش بي هنا..والقنصل بتاعكم اداني الفيزا دي في الدوحة وقال لي دي لي هنا..والسيستم بقول انو دي فيزا بتخليك في الترمنال يعني هنا..
بعدين ياخ انتي بتكلمي بي زعل كده ليه؟ هل تفتكري انو دي مشكلتي انا ولا مشكلة الاخ ده ولا مشكلة القنصل ولا مشكلة بتتعلق بتعريف مفردة الترمنال..(ولا مسالة تاريخية انتي عايزة تحسميها فيني دون كم طاشر الف سوداني في بريطانيا..انا المسكين الجاي عبور ده ..انتو يعني الواحد كان مافكا فيكم حربة ما بتتعظو؟؟) طبعا الجزء الاخير البين القوسين ده انا قتو في سري..
- إتز نوت ماي بروبلم.. يو كانت استى هير إن زيز إيريا..آند يو كانت كم إن.. ومدت لي الجواز الاخدر اب صقر باهت آيل للانقراض..
مسكتا جوازي وانا حاسي بي اني هين من هوان.. مستخسرة فيني حتى الشرح المنطقي .. يالهي.. هنا انا لا اسوى حتى المنطق.. غلبني القى مفردة حقارة بالانجليزي..
كنتا عايز اكورك : زيز إز جصت فكنق حقارة ساي ..
واااا هواني في ماورا المانش..الناس دي لا عايزاني "هنا" في التيرمنال ولاعايزاني "هناك" في ماوراء الكاونتر بتاع العواليق دي..لاعايزاني هنا ولا عايزاني هناك... في حين انو الخيارات المتاحة هي فقط يا هنا ياهناك..
يعني انسف نفسي واختفي عشان لا اكون هنا ولا اكون هناك..انعدم فجاة لانو انا فيني شي ما عجب الانجليز ديل..مع فكرة فيني شي اعجب الانجليز ديل جاتني فكرة استخدم المكيدة بتاعة السود..
قمتا قتا ليها بي صوت عالي يكاد يمسعه كل المسافرين
- يو آر دوينق صش ثينق بكوز ايام بلاك ...رايت؟
سكتت وعاينت لي بي برود الدنيا في ابلغ وصف لي انو السكوت علامة الرضا..(الداير يسالك منو هنا لو قتي: آي عشان انتا اسود معفن ساي ؟)..يبدو انو هذه العبارة تم استهلاكها في هذا الجانب من مطار هيثرو كثيرا بواسطة الاخوان جنوب الصحراء..لانو المرة بعديها ردت بنفس البرود الذي يتعفن مع حركات شفتيها شديدى الإحمرار..
- كان يو استى اون زات chــير فور منتس؟ (حتى كلمة sir البقولوها في العادة ماقالتا) ..
اها ..بت الحـــرام دي عايزة تطرشق لينا رحلة مانهاتن وكورس الجامعة الامريكية، بدون أي سبب معقول..
انتظرتا حوالي نص ساعة..مشيت خلالها الحمام وسرحتا شعري قدام المراية وانا بقول احتمال شكلي عـــــرص اكتر مما يجب.. انا اصلا كان مفروض احلق واسافر بعدين نادتني وشالت الجواز وخشت جوه مكتب ربع ساعة وجات مارقة وقات لي: انا حاديك بس 24 ساعة تخش لندن ولازم تجي تسافر قبل 24 ساعة ..إز ذات كلير؟
- قتا ليها بي لامبالاة مقصودة وانا ماصدقتا لقيت فرصة اتفشى على قدر ضآلة التفشي : ياخ انا اصلا ماعايز اخش لندن ولا جيت عشان اخش لندن..ارخص طيران فقط هو الجابني ترانزيت بي هيثرو ...وشايفة الكنبة ديك ( واشرت لي كنبة ورا ضهرها ورا كاونتر الجوازات البريطانية ) انا حامشي اتخمد هناك لحدي الخمسة ساعات دي تمر..
دنقرت تكتب في الجواز "اونلي تونتي فور اورس" حسيت بي انو هي اتغاظت من قصة ماعايز اخش لندن دي..اجتاحتني راحة وافرة لهذا الاحساس ...وقربتا امد يدي ارفعا وشها من خدودها برااااحة كده واقول ليها بكل برود: ابقى بت تعالي عدي بي بنطون السليم..انا كان ما طهرتك في كثيب رملي شنبي ده يقوم في فيك..
اكيد حتحنسيني اوريك درب اقرب قنصلية عشان ترجعي..
عند ذلك البنطون الوحيد..في ذلك الخلا البعيد..في تلك البلاد البعيدة..عند اولئك القوم الذين تحقرون بهم على الدوام.. حاقول ليك: معليش ما ممكن تعدي لا لي الشرق ولا لي الغرب..ولا ممكن تقعدي هنا ..ما بي أي لغة وانما بالاندادي الفصيح ..وبي نوبية طليقة حاكرر ليك الكلام واناعارف انو انتي مافاهمة دين حجرك..
قطعت سيل خيال المستضعفين ..ودخلتا الى "هناك"..متجها نحو ستار بكس.. |
|
Post: #83
Title: Re: المتعبون وحدهم يعرفون الاستجمام
Author: DKEEN
Date: 02-05-2012, 05:38 PM
Parent: #65
ود المشرف..سلامات يادوك...لو كانت لحقت دخلتنا ربما كان سطنا سواطة الغزاة ..بعدين يأخ صحبتك دي هي الا تفشت فيني ومرقت فيني مكبوت غيظها من فعائل اخوانا جنوب الصحراء وقصص المهاجرين..لكن اصبر بس العافية درجات..أنا جيت ترانزيت..ولدي حيجي مقيم مهذب ،البعديهو حيشد ويركب..ما نحنا برضو كائنات بتطور
|
Post: #72
Title: Re: المتعبون وحدهم يعرفون الاستجمام
Author: DKEEN
Date: 02-03-2012, 00:04 AM
Parent: #54
جليل..
ياخ انا معاك تلاتة سنة..موش تقول لي عندك اخوك بي غادي..
يعني حركات الشوايقة دي انا قايل الدنقلاوية دي عملت ليها ازاحة..
ماعارف..بس وانا بكلمو حيت ذي البتكلم مع اسامة..
شديت ليك سلك امس وكنتا عايز استفسر منك عن شي محدد ا
نت اددرى به..
تخيل نسيتو..
دمتا رايق ودامت المودة ياجليل..مشكور على التعقيب اللطيف..
زي مابتقول ترجمة الافلام بتاعة الخواويج : شكرا للاطراء
|
Post: #70
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 11:27 PM
Parent: #51
يانوفل سلام وتشكرات كتيرة..
اها اسمعها مني : اسمع كلام الببكيك..
دكتور العيون ولا الرفيق الفسل..
(وش باسم)
|
Post: #71
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 11:37 PM
Parent: #43
استاذنا السني
انا غايتو متذكر اني رديت عليك وعلقتا..في البوست ده ..في بوست تاني ..ماعارف
ياخ لك ماتشاء مما تشاء..
خذ ماتيسر ..انا لاقي؟؟
مرة اخرى ناسف لعدم ترديد السلام الجمهوري في ختان اغلى سودانية في الخليج..
دمتا انتا وسام وامو في امان الله
|
Post: #78
Title: Re: المتعبون وحدهم يعرفون الاستجمام
Author: DKEEN
Date: 02-04-2012, 08:07 AM
Parent: #42
كوجان
لامنتكون معلق في سماوات الله دي تمنية ساعات متواصلة..ومن ثم تهبط سالما صدقني ستحمد الله كثيرا وحتقول كلام كتير..ليس اقله الحصل لينا بي غادي..
زحمة الاشياء، وزخم التفاصيل، غيوم الايست كوست، كنايس النصارى مساجد المسلمين، هيبة معابد الماسون، واجهات المحلات وسيقان بنات الناس ..كلها تؤدي الى ذات النتيجة
اعجاب ينقلب لي تعابير في الكتابة والرسم والخيال ..
دمتا رايق ياكوجان ومشكور على العبارات اللطيفة
|
Post: #74
Title: Re: المتعبون وحدهم يعرفون الاستجمام
Author: DKEEN
Date: 02-03-2012, 04:13 PM
Parent: #41
يانوباتيا : هي على اي حال فهمت انو الزول القداما ده بتمنى ليها حاجات ماسعيدة..وهي عارفة انو هي ماحتجينا حلالنا عشان كده كان ممكن تمطمط شفايفا ازدرا وحقارة..بعدين ياخ شنو تلفون خدر مابخش وحنك عاضي..اننا موش عندك تلفون خاص بيك داير بي حق خدر شنو ؟اضرب من حقك ياخ..دمتا ضاحك ياقريبي
|
Post: #69
Title: Re: المتعبون وحدهم يعرفون الاستجمام
Author: DKEEN
Date: 02-02-2012, 11:19 PM
Parent: #40
بت سند..
زيك في هذا العالم قليل شديد ياعفراء..وانا جادي ..
لايتاح لهذا العالم سودانيات زيك..مع كل تلك التراكمات الثقافية المتنوعة الضاربة في عمق التخلف والتناقضات والمروة والهاشميات والمحنات واحلام البنات ونكبات النسوة وسطوة الامهات وقهر الطهور والمساحات الصوفية وتعليم البنات وتشكيل الاباء وحريات الراي في الاسر السودانية..مع كل هذه التقاطعات التي غالبا ماتودر بنات السودان عن مقاصد وجودهن على الارض..والتي غالبا جعلت تسعة من كل عشرة سودانيات يعشن- دون ان يدرين ودون ان يطرف لهن جفن - تجربة امهاتن واخواتن وصحباتن وتجارب اخرى تتقاطع عبر حياتهن القصيرة في دلالة واضحة على انعدام الرؤى الشخصية الخاصة والتجربة الخاصة والابداع الخاص والتفكير المنعزل عن سطوة النقل والتكرار والتنشئة المحايدة..
مع كل هذه الامتحانات التي تعرض لها نساء السودان اقدر اقول بي ثقة شديدة ..انتي مرقتي كما يجب...
مرقتي سليمة الوجدان والخاطر، واضحة المعالم، بره زمن اي زول ، بره من كل ما ذكر اعلاه ..بره تجربة اي كائن، وبتجربة فطرية محكمة في الانسانية ..مرقتي على خلقة ربك كما اراد..
بالمختصر كده انتي تحققتي في هذه الحياة..
ولن يكون لك سؤال في القبر وغالبا ستعبرين دون اي تدخل من الملكين (راجعي كتاب طرف من خبر الاخرة عند تاج السر الملك)
ياخ تشكراتي جت على ما سخرتيه لنا من جولة الكسندريا..
لقد سعدت بصحبتك ..والشاهد مودة وشوق وذكرى سمحة ...
وهذه الصورة..
|
Post: #66
Title: Re: المتعبون وحدهم يعرفون الاستجمام
Author: خدر
Date: 02-02-2012, 05:46 PM
Parent: #1
|
Post: #73
Title: Re: المتعبون وحدهم يعرفون الاستجمام
Author: صديق الموج
Date: 02-03-2012, 00:13 AM
Parent: #66
Quote: المتعبون وحدهم يعرفون الاستجمام يصدحون بالشهوة والاغنيات وحب الحشود والالتصاق والغزل..
ليت ذاك الليل لم يطلع فجر |
شيخ شيوخ الاوغاد فى هذا المكان....هاو آر يوووووووو؟
وسلام بطوووووووووووووول شوارع امريكا حقتك دى...
كتابات تغرى ببعض نزق..
الله اشهد ازالت كثير من هموم ارقت المضاجع هنا
حالنا هنا الرياض كما تركته فى هذه الشهور
تبدأ بصباحات بارده وتنتهى بعشيات ابرد
والقوم هنا يلتحفون السيارات ولا ترى منهم غير الحدق
هذا خبر ما عندنا فزدنا من اخبار هناك
ونحن منتظرون...
قاتلك الله من سراد،،،،
|
Post: #75
Title: Re: المتعبون وحدهم يعرفون الاستجمام
Author: الطاهر ساتي
Date: 02-03-2012, 04:37 PM
Parent: #73
ده كلو كوم وكلتوس كوم تاني :)
..........
إرسي ياخ
عليك أمان الله في البال
لكن شايف براك حال البلد
ابقى واصل، وتحيات للأصيلة، وبالمناسبة : إلقون توسكنكومندو ؟ :)
وان شاء الله 15/3 أشيقي جهيزي تيدو :)
|
Post: #77
Title: Re: المتعبون وحدهم يعرفون الاستجمام
Author: هيثم درار
Date: 02-03-2012, 08:35 PM
Parent: #75
الطاهر أمبس
سرن نوهمندو؟
| Quote: وبالمناسبة : إلقون توسكنكومندو ؟ :) |
الدور تر تود ، تن نها وغدديرو
ترن بروكن؟ تندى دبسكو
أمانه بإويرى
|
Post: #90
Title: Re: المتعبون وحدهم يعرفون الاستجمام
Author: DKEEN
Date: 02-07-2012, 07:45 AM
Parent: #77
Quote: ترن بروكن؟ تندى دبسكو
أمانه بإويرى |
كااااااااااااك..
ابو درار..
بركة اختنا دي ما بتفهم اندادي..كانت رسلت ليك طرد مفخخ..
|
Post: #89
Title: Re: المتعبون وحدهم يعرفون الاستجمام
Author: DKEEN
Date: 02-07-2012, 07:35 AM
Parent: #75
الطاهر امبا نسي تود..
كلتوس انجلس وكده..
:)
تصدق ربما بدا المكان الوحيد الذي لايمكن استبداله بتلك النواحي هي الهمك وكلتوس وإرس وحفرة كوChـــر ..
| Quote: إلقون توسكنكومندو ؟ :) |
ار حداشرنسكورو
دمن، دمن آربٍن برو آآ واندي
:)
|
Post: #76
Title: Re: المتعبون وحدهم يعرفون الاستجمام
Author: DKEEN
Date: 02-03-2012, 04:39 PM
Parent: #73
ايش لون تمشي الاحمسة: ارخ تاج السر للسودامريكان عبر كتاب شيق فريد وشديد العمق ..ومن يقع عنده في مظن السؤ فقد دام فيها ابد دهر آلات الطبع والنشر ما دامت..ولن ينال فهم الكتاب الا من قضى طرفا من الدهر في الدنيا الجديدة..فتفاصيل الكتاب أوضح لمن راي ولمن سمع..اقصد ان الذين قصدوا امريكا هم الاكثر استمتاعا بهذه الاحمسة..وهو في عموم امره وصف يدهش وفي خصوص أمره حالات نفسية لايدركها الا الذين صبروا..بقراية النصوص فتاج مثقف حقيقي يعلم من ان ياتي زول فني سوداني قلوبال شديد يعيش كسوداني مع مراعاة فروق الجغرافيا ويعيش كما يجب..شكرًا ياتاج ..لقد حببتا إلينا فرجنيا وفان دورن ستريت والهندوس والكبرتة على مرمى ضراع من البوتوماك..
|
Post: #80
Title: Re: المتعبون وحدهم يعرفون الاستجمام
Author: Rawia
Date: 02-04-2012, 08:29 PM
Parent: #76
تحية من ساوث فان دورن (إسمو راقي الشارع دا فرنسي فرنسي)
حكاويك وتفاصيلها حلوة وخلتنا ننظر للاماكن ببعد مختلف عادي كنا مارين فيا التقول سرتنا مدفونة هنا ولا على قول المغني (من تبيت في العز متربي).... بالمناسبة إحنا برضو إكتشفناك في الرحلة دي نضيف قلبك وأبيض زي البفتة وأكتر... تتهنوا يارب وتنولوا الفي مرادكم.
ياحمد لاقيت قريبك في الدكان جايب حفيدتو وبيشتري ليها في أيس كريم وهي تحاجج فيهو وشرتو لاختها الفي البيت وبت الجيران وأخو بت الجيران .. طريت محنة أهلنا ودلع طفولة لذيذ ياريت لو دام رحمة الله عليهم.
___________
أمس اليوم كان ناقصك ....
إنت ليه ماحلقت قبل ماتسافر?.... مت من الضحك غايتو
|
Post: #81
Title: Re: المتعبون وحدهم يعرفون الاستجمام
Author: حمد فتح الرحمن
Date: 02-05-2012, 02:10 PM
Parent: #80
تحياتي يا راوية
دي بكون ايه منجضا عم محمد
|
Post: #82
Title: Re: المتعبون وحدهم يعرفون الاستجمام
Author: د.نجاة محمود
Date: 02-05-2012, 04:33 PM
Parent: #81
كتابة سمحة كالعادة مشكور على حمام الروح
|
Post: #86
Title: Re: المتعبون وحدهم يعرفون الاستجمام
Author: حمد عبد الغفار عمر
Date: 02-06-2012, 08:17 AM
Parent: #82
سلام ياخي
Quote: مع كل هذه الامتحانات التي تعرض لها نساء السودان اقدر اقول بي ثقة شديدة ..انتي مرقتي كما يجب...
مرقتي سليمة الوجدان والخاطر، واضحة المعالم، بره زمن اي زول ، بره من كل ما ذكر اعلاه ..بره تجربة اي كائن، وبتجربة فطرية محكمة في الانسانية ..مرقتي على خلقة ربك كما اراد..
بالمختصر كده انتي تحققتي في هذه الحياة.. |
أعلاه أجمل ما قرأت في وصف إنسان (ولا أشك في صدقك)
لأنو بيوصف ما يجب أن يكون عليه كل إنسان
كتابتك مريحة
|
Post: #87
Title: Re: المتعبون وحدهم يعرفون الاستجمام
Author: maia
Date: 02-06-2012, 08:44 AM
Parent: #86
شكرا يا دكين للكتابة العميقة ببساطة
|
Post: #91
Title: Re: المتعبون وحدهم يعرفون الاستجمام
Author: DKEEN
Date: 02-07-2012, 08:19 AM
Parent: #87
نابري
والله يامعلم ايامك الجايات خير الايام..
راجياك بلد تقدل فيها لامن تحب الله شرا وعلانية..
ومنتظراك مرة طباخة ونسابة رؤوميين.. ربنا يوفق ودربك يتسهل..
--------------
حمد امبس
بالضبط دي ايوتا..
قلباااد عدييل..
بس الخال نكر حطب انو لاقا أي زول
:)
-------------
د. نجاة
سلامات شديدة من هنا حدوت الفاصل المداري التاني
شغلتنا عنك اموالنا واهلونا فلم نتمكن من اللقاء.. مع انو كان التخطيط انو نلاقيك يوم اللقاء المشهود.. وجا اليوم النوبي وطبظ ماتيسر..
فثمة تفاصيل كنا نود الاستنارة فيها..
بس اظنك لسع قاعدة وحنتلاقى ..
---------
حمد عبد الغفار
تحقُق الانسان في هذه الحياة هو المقصد من الميلاد..سؤال الملكين سيدور حتما حول هذا التحقق ..بعد السلام والاسئلة التعريفية
-------------
مايا
سرني ان اعجبتك الكتابة فتداخلتي للشكر..ده شي بسطني بصراحة
شكرا للمرور
|
Post: #88
Title: Re: المتعبون وحدهم يعرفون الاستجمام
Author: DKEEN
Date: 02-07-2012, 07:19 AM
Parent: #73
ياموج
سلام كبير يغشاك بقدر مزاجك الممتد إلفاً كما مياديين عبد المنعم عبد العال طرف حي العود..
هذا،، وبعد:
ايامكم في الرياض خبري بها قد ولت.. وتشهد بذلك مكالمة جاتني في فرجينيا كان المتحدث فيها على الطرف الاخر عزاز..
ياموج انتو بقيتو قاعدين ساي..
سهلة وصي ورفاة صحابة وزد على ذلك برنامج نطاقات..
غايتو بس فضل ليكم حمزاوي ده..
لو اخد معاشو واظنو قرب..تاني إلا ارض الميعاد..
اما عن اخبار هناك::
فوربي انه عالم يستحق المشاهدة..انماط مختلفة من التفكير والحياة..
ماقدرنا عليهو فعدنا لكي نكر مرة اخرى عند بلوغ الاذن..
|
Post: #92
Title: Re: المتعبون وحدهم يعرفون الاستجمام
Author: DKEEN
Date: 02-07-2012, 08:22 AM
Parent: #88
رايوة
سلامات كتيرة بطول فان نيس ستريت..
God bless America
اتذكرتا الدعاء ده والطيارة تحلق مُقلعة فوق نهايات دي سي..كل شي يبدو مرتباً من السماء..
البوتوماك..الهاي وييز..بقايا الادخنة المنبعثة من مداخن المصانع..السحب وانعاكساات ضوء المغارب..
ساحل بعيد عن العالم مُصطخب بذاته ولذاته..
عالمين ينعمون وحدهم بهذه البراري
فتح الله عليهم حين اتى كرستوفر كلمبس الى هذه الديار وفتك بمن فتك..وفتح الله عليهم مرة اخرى حين مد جورج بوثيقة التحرير..
وفتح الله عليهم مرة اخرى بالثيرد امندمنت اوف كونستتيوشن..
وفتح عليهم الله سلفاً بهذه الغيوم التي تخلق مزاج عالي يبتدي من زواحف وينتهي الى الاسطول السادس..
شفتي رعاية الله دي كيف مبارية الناس ديل..
بالله بلغي السلام للوالدة وانشالله تكون بقت احسن واحسن.. ومشكورة على حفل الغدا الفخيم وسمك المعلمين والحشائش الاخرى التي كونت تلك السلطة..
|
Post: #93
Title: Re: المتعبون وحدهم يعرفون الاستجمام
Author: صديق الموج
Date: 02-07-2012, 03:46 PM
Parent: #92
.| Quote: ايامكم في الرياض خبري بها قد ولت.. وتشهد بذلك مكالمة جاتني في فرجينيا كان المتحدث فيها على الطرف الاخر عزاز. |
دكين يا وغد دائماً
حتى انت بلغك انه قد ولى المساء؟؟
بعدين مادام كلمت اهلنا الفى فرجينيا معناها الله فرجها عليك على كبر..بختك ابسط ياعم..
واشهد الله كان ما قلت لى كلمت عزاز دى كان قلت ليك حجتك ناقصة
فهذه الناطقه بغيرها هى سدرة منتهى الاصالة..وعرفة حج كل صداقة..حفظها الله حلاً وترحالاً..
اما انت اطنان من الاعجاب بكتاباتك الوسيمة،،،
|
|