في كل شتاء ذاكرة تتصل بما توقف في اخر شتاء.. يمس هواء الشتاء البارد الجسد فتتقد الذاكرة باشياء محددة تخص الشتاء.. دغلٌ من الجهنميات واقباط وحوش وباب حديد مزين بي حديد ..ثم بخور لبان وضل الشتاء وحيطة مهملة لي بيت من بيوت البعثة المصرية في نواحي الخرطوم غرب.. ومن ثم بيوتاً اخرى: بيت ناس داليا خيري في العمارات.. حوش السيدة الفضلى سعدية الصلحي بنباتٍ متسلق يزحف على مغرب العباسية وجدرانها..طرفٌ من مدخل بيت ناس مي عاطف في نمرة اتنين واشجار متشابكة شديدة الخضرة عند المدخل في بردٍ شديد وليلِ بعيد.. الحاجات الفوق دي بتجي عند كل شتاء منذ ان غادرتُ الخرطوم ..بس بي صورة ما قدرتا اربط وجودا مع بعض او ارتبا كما يجب.. وربط بينهم الشتاء.. والشتاء عموما فرصتي في كل عام لكي اعيد تذكر ما مضى من هذه المذكورات في زمانها من زمانىَّ الجديد وفرصة اخرى لاعيد ترتيب اسباب ذهاب حبيبات مضين في عثرات الزمان التي توالت..
اعاد شتاء الدوحة وخط الطول الجديد الذي اتخذته مؤخرا والذي ابعدني اكثر عن خط 30 درجة شرق.. اعادني الى بوست قديم تعلق نصفه بالشتاء ونصفه الاخر بشرح بعض المعاني ... فقد اسلفت قبل عامين او يزيدون ان القسمة والنصيب مترادفتان ضل الناس عن معناها الاول فصارت تجري في عموم احاديث الناس بلا ضابط. تماما كاستخدامات اللغة الفوضى التي حلت سودانيز اون لاين الفوضى التي يديرها غوغاء، والتي هم لها اخينا الفالح محسن..وهم لها مولانا المغني خدر.. وخدر رجلُ وهبه الله صوتاً عميقاً حزيناً وشجي.. كما استغاثة المتروك في بئر..بيد ان صوته في المنبر طغت عليه اصوات الفوضى والبنات الساي.. وهي فوضى بتاعة ملافظ عجيبة ، ومن مثال امرها اذا ما اعجبت احدهم كتابة لشخص ما، تداخل فقال ( شكرا جميلاً) او (احبك حتى تستغيث) او(ايها الجميل) (لك الدهش) (شراشف الروح) وان من امر تلك الفوضى ايضا اذا اراد احدهم كتابة شيٌ يتوسل به الى الحب قال فيما قال( الخصل الذهبية) و(الشواطي الفضية) و(العيون الكحيلة) و(اللازورد) و(البنفسج) مكررا عبارات تمت لواكتها الوف المرات حتى غدت قوالب ثابتة في ادب المتادبين، مملة وحاجات اخرى كمثل ما ذُكر رصاها الكاتب مما علق في ذاكرته من قراءات معاصرة ، تجدون مرجع ذلك في رسالة الـ(محسن) التي بعث بها الى عصام جبر الله في معرض شروحات احوال الانحطاط. وذكر من رهطٌ من جماعة الفوضى المقيمين بالمنبر المتعجلين الى الشر...اخونا حميدة مثال، والحق به وصفاً ظنه الناس بذيئاً وتزامر الزمارة يستهجنون الوصف حتى اذا ما استحكم الفخ اعمل فيهم محسن سيف لسانة السليط وصعلكة لغته التي قيل انه حفظ بها القران في قراءاته السبع... وشرح معنى عبارة الوصف سالف الذكر مع انه لم يكن مضطرا الى ذلك، فاصلاح لغة البعض هنا ليست فرض عين على البعض الاخر... ولعل احد اسباب رحيل الكثيرن من هنا انهم ظلو يكتبون بلغة ويشرحون بلغة اخرى.. فلما عظم عليهم امر ماكتبو وكثر شرحهم له، وقد افترضو في القراء حسن الدبار ابتداءاً، غادروا ..
قلت فيما قلت ان القسمة القتها ليكم قبل كده طشت عن مدلولات معانيها ..وانا ذاتي مالقيت زولاً يصلحني فيها فاستسلمت الى فكرتي وركنت إليها .. واعود شارحاً القسمة وهي: ان يقسمَ الله لكَ من الشي الذي يقبل القسمة مِـقدارُ ُ معلوم. كأن يقسم الله لك من المال مليون او من البقر اثنين ومن النخل وشجر الليمون كذا وكذا او كأن يجعل الله لك في عصمة ذكرك فرجٌ ومثنى وثلاث او اربعة فروج.. فالمقسوم هنا ولدا كان ام بقراً ام فرجاً تجد في صفاتهم التعدد اوالكثرة ومما يقبلون القسمة.. فكان حظك منهم قسمتك منهم .. فهم اكوامٌ مكومةٌ معدودة في عمومِ الدنيا ..ومقدٌر لكَ منهم كوماً او عدداً ولغيرك كوماً او عدداً وهكذا.. قال الشاعر ( قسيمتك يارقيق الحال ومكتوب ليك تعيش رحال) والناس بتقول ود ناس فلانة تغرب عدة مرات.. وحال الرحّـال (بتشديد الحاء) حال من داوم على الرحيل.. لحدي وقبل اقبل واشرح "النصيب" أي زول عندو اعتراض على هذه الشروحات يتفضل يسجل ملاحاظاتو..انا بصراحة عايز احددها مع فكرة (القسمة والنصيب) التي يبرر الناس بها شططهم وسوء اختيارهم .. وفاكي الكورة في حيطة المنبر ده عساها تجيني راجعة بشكل اكثر انتظاما..
اما النصيب فهو ان يعطيك الله نصيباَ في الاشياء التي لا تقبل التقسيم والتجزءُ.. كأن يعطيك الله نصيبا في الصحة ونصيبا في الجمال اونصيبا من الولد والاخلاق.. فهذه المذكورات ليست موزعة في نواحي الارض تاخذ منها قدر همتك وُتحرم منها بمقدار تقاعسك.. ولكنها اشياء ممنوحة من عند خالقك لا اجتهاد لك فيها مع نص الله البليغ فيك.. فهي كقضاء الله الماض.. قلتُ ماقلت قبل عامين او يذيدون وانا – للمعلومية- قليل العلم كثير التقول والتغول ومع اني سعيت الى التصحيح والتقويم والخروج من حال الجاهل الى حال المستنير ما غالطني في ذلك احدٌ . ولا قيل لي اني ابربر بما لا ادري.. ولايعني – بالطبع- عدم الغلاط والنقد صحة الافتراض فيما بالاعلى..
تقول الخالة (الرسالة) والدة احمد فتح الرحمن، وهي رباطابية فصيحة البيان واحمد هذا صديق طفولة مقرب جيد الصنعة، افضلة على اكثركم، التقينا بين فلنكات السكة حديد وفريق الحلة والمقرن الثانوية وحكمة ابيه "فتح الرحمن الطيب"حكمدار الدرايسة في سكك حديد الشجرة .. كان ابيه رحمه الله مستقصياً بارعاً لحيل العلوم في شؤون استواء الارض وتصريف المطر.. تقول "الرسالة" في اخر زيارة لمنزلها في نواحي الكلاكلة الوحدة: "ماجيتـنا الدور ده مِـنكَرِب ياعبد العزيء"..هكذا دون نطق الحرف الاخير(ز) بوضع همزه مكانها، فالرباطاب لاينطقون اخر الكلمة !! اقول لها : لسع مالقيتا ياخالتي الرسالة . فتقول: ( ياولدي بتك دي ظني شقوبا العتاميْر) كناية عن وداري عن فتاتي وودارها عني..والعتمور ده صحراء وخلا تجدونه في شرق النيل ابتداءا من ابو حمد وانتا ماشي.. وجا في اثار الشيخ ود الماحي انه قال فيما قال قبل ان يكتح اللبن الفي القدح ويسلك طريق القوم: (شالا ود كلية الخبير ساقا شقابا العتماير..) يشرح المادح كيف اخذ ود الخبير البنية السمحة التي اختصم المحبين حولها وارتحل مختفيا بها عن العالمين وسكن قرية (مشو) في شمال دنقلا...
وباصطحاب صحة الافتراض الاول اعلاه ..اعيد نشر رسالتي نداءً اخيراً سحاً غدقاً مُـجـلجِلاً طبقاً : ياطاش فطشنيا يا جاب المزنى وعجل بالنصر وبالفرج.. والفرج هنا مقصود بيها الفرج : لو ان لي في الزواج منك نصيب ..فهل مضى مايكفي من عمري لكي تاتين؟ هل تدرين انني اطلت البحث حتى اكتفيت بالانتظار.. الى متى تعتقدين انه ُيمكنني انتظاركِ؟ بلا شك انتي مولودة واكزست على الارض.. إذ ليس من الامكان ان اتزوج من مواليد هذا اليوم او من مواليد يوم غدٍ.. لذا فانتي في مكان ما.. البحث عنكِ وسط هذ النسمات المهولة من سكان العالم امر غير مستحيل.. بيد انه امر ُمرهق ومضيعة للعمر وهدرٌ له فيما يمكن توفيره لاوقاتٍ طيبة.. فالعمرُ ماعاد فيه مايكفي كما ترين.. فقد بلغت ال34 وانتا ماشي.. واستغرب كيف لا اجدك .. سيما وان الفرز مؤخرا بقى واضح.. فالبنات في كل الشوارع ..وماتبقى في الخدور سوى القليل.. افعجزت ان اجدك من بين هذا القليل؟؟ ما يا كمان القاك او.. ماالقاكي عشان الواحد يحسم قصتو ويعرس من طرف.. بس هل لو انا قمتا اتزوجتا (من طرف) حتكوني انتي (اعني قسمتي) الزولة الـ(من طرف) دي.. واكون ساي ودرتا سبعة سنين بحث وفتيش بينما قسمتي كانت موجودة في (المن طرف) ؟!! ولا حتكوني انتي برضو رايحة في وسط هيلمانة الدنيا دي وانا خشيت في ناس المن الطرف شفقة مني ساي.. وحاقوم بالتالي اضيعك وراي بي شفقتي دي وسط متاهات الكثافة السكانية.. لا تلقيني مع غيري.. ولا انا مع غيرك القى نفسي.. امانة بلاي .. لو قريتي الكلام ده سيبي الفي يدك وقولي عوووك او مرينا .. انا لي سبعة سنين بفتش فيكي.. كلفي نفسك مرة وفتشي معاي.. الناس بدت تاكل وشي ياخي.. يسالونني الى متى اظل هكذا دونكِ ..دون زوجة.. ُمعظم الاهل يظنون ان هنالك خللا في مكانِ ما.. ومؤخرا ساورت بعضهن الشكوك حول علاقتي بالرجال.. احدى العزيزات جدا - قبل عامين - قالـتَّـا لي في اضاني:انتا بتمرق يوم الخميس الخلا مع اصحابك بتعمل شنو؟؟ قالتا في صوت متردد خجول باحث عن اجابة ولو غير مقنعة.. واظنها حين قالت ماقالت كانت تتخيلني في اوضاع فاضحة .. لم تكن تدري عزيزتي ان اهل تلك البلاد يستمتعون برفقة الصحراء وبالبرد والحجارة.. ونحن كنا في خلانا داك بنحاول نواكب وسيلة المتعة الوحيدة المتاحة هناك (الخلا والحجارة) وللعلم تلك "العزيزة" انا حبيتا باحثا عنك فيها.. اتذكرها الان بلا صبرٍ ولا سلوان، افتقدها كثيرا وكم كنت اخشى يوما فيه اغاث فيه واتعصر من شوقي لها..وهانذا معصور وابحث عن مغيث .. وحبيت سارا وسناء وفلانة وفلانة الاخرى ونهال ونهال التانية ..اتشتـتا فيهم باحثاً مُـتنسما رياح جنتك وورد الجهنمية في خشوم باب احواشم فما ُطلت غير سرابٍ خلته انتي.. حبيتم في الشتاء محاولاً جبر خاطر الشتاءات التي فيني.. اللاقيت فيهم حبيباتي..فطفقن يجئن عند كل شتاء. انا ضقتا بصراحة من هذه العُـزلة ومن هذه الليالي التي تخلو منكِ.. ومن هذا الخميس الضكران.. ومن التامل والتودد الى اجسادٍ لا تخصني ولاتخص احدا غيري ومن كلام الناس.. 2555 ليلة موش كتيرة الواحد يرقدها براهو؟؟ الا ترتقبين الفرق بين ان تناميها وحدك وانا ننامها معا؟ الآ فاعلمي ان لي معك احاديثَ وفعائلَ كثيرات.. وان حنيني اليك ممزوج باشراطٍ لايدركها غيري وغيرك..وما انا ببالغٌ اشراطي هذه في سواك.. ولاكي لاقياها في غيري.. فان تزوجتي بغيري ُتهتي وان تزوجت بغيرك تهتُ .. والخرطوم بمدنها الثلاثة وسكانها رقيقي الحاشية شرطُ ُ فيها .. والابوابُ المعروشةِ بالجهنميات شرطُ ُ فيها.. والنيل الازرق بظلاله عند النقل المكانيكي وحي الوابورات شرط فيها.. وبؤبؤ عيناك اللتان لاتبصران سوى المحبوب شرطٌ فيها.. ومن ثم المزهريات ونباتات الظل واغنيات الكابلي .. ولابد من الصبر والاخلاص وعدم المكابرة فما تلك بشروطِ هينة.. وبحسابات قلة الصبر عند البنات والرواشة التي دوما صاحبت خياراتهن فلم يعد يهمني ان كنتي طليقة احدهم.. فصبركُـن قليلٌ وحنانكُـن غشامة .. وربما نفد الصبرَ منك في انتظارك الطويل لود الحلال .. وتغشتكِ غاشيةٌ من حنانٍ فطمست بصيرتكِ فتشابهَ الاحبابُ عندك....فوقعَ عليكِ غيري، فوطأ نصيباً من قسمتي.. اها انا ماني زعلان من القصة دي لو حصلت..وقبلانبَها.. بالعربي كده (مع انو الفوق ده اظنو عربي) ماعندي اشكالية لو هسي مطلقة وقاعدة فمن المؤكد انه تم الولوغ في ريقك بخطا دنيوي وشفقة بني ادمين.. والادمي خُـلق هلوعا ً جزوعاً وشفقان.. الا واعلمي ايضا انه لن يكون هناك مايكفي من العمر والمروة إن اوغلتي في هذا الغياب.. سيفنى في قلبي حنيني إليكِ.. ويتبدل حال عافيتي فلا يصلُكِ مني إلا اللمم.. اولا تتابعين شرودي؟ قد اختلطت علىَّ الازمان وتشابهت الدروب.. اعود فاقول انني في هذه الدوحة الجميلة استيقط كي انام ..كترت النوم حتى ظننتي مريض. وفي طرف الكورنيش قبالة متحف الفن الاسلامي وبالمناسبة لاعلاقة لتصميم هذا المتحف بالفن الاسلامي المتحف يبدو للناظر اليه من مكاني كصومعة غلال.. انظر اليها فاتذكر مزارع الدجاج في طيبة الحسناب ونواحي الدخينات.. المهم قبالة المتحف تعودت اتقي غربتي بشاي المغرب هناك في كل مغرب وقبل يومين اتكركبت عديل لامن شفتا مؤخرة منسقة في جسد نحيل.. بوصلاتُ زماني غدت طائشة.. غدا حالُ بالي شاردا.. فمتى؟؟ متى تمتد اغصان شجرةُ العمرِ الجميلِ بيننا؟ متى نمِـدُ جذورها في تربة الذكرياتِ الخصيبة..ونتفرع روض احاديث غضة..ويبسط كل منا لرفيقة من ثمرِ الإلفة والمودة ما يشتهي.. انا لو ظللتُ اكتب اليكِ هكذا اردد هذا الكلام كل عامٍ عند الشتاء. فمتى اتوقف عن الكتابة ومتى ينتهي شتائي!! لو ظللنا هكذا حبيبانِ في الغيبِ وقـلِـقانِ في السنينِ لايلتقيانِ.. فمتي سنتزوج؟ متين الاقيك وتبقى سيرتك هي الكلام والرؤى الحلوة البعيشا في صحوتي .. او حتى في عز المنام ..ويبقى اسمك هو الغنا... هو البخفف لي عذابات الضنا.. الشفتو منك يا مُـنى الروح يا انا ..وصفو بصعب ياجميل..
حبيبك دكين عشا البايتات صفحات من رسائل (الصبر والملامة)
Quote: 2555 ليلة موش كتيرة الواحد يرقدها براهو؟؟ الا ترتقبين الفرق بين ان تناميها وحدك وانا ننامها معا؟ الآ فاعلمي ان لي معك احاديثَ وفعائلَ كثيرات.. وان حنيني اليك ممزوج باشراطٍ لايدركها غيري وغيرك..وما انا ببالغٌ اشراطي هذه في سواك.. ولاكي لاقياها في غيري.. فان تزوجتي بغيري ُتهتي وان تزوجت بغيرك تهتُ .. والخرطوم بمدنها الثلاثة وسكانها رقيقي الحاشية شرطُ ُ فيها ..
Quote: وللعلم تلك "العزيزة" انا حبيتا باحثا عنك فيها.. اتذكرها الان بلا صبرٍ ولا سلوان، افتقدها كثيرا وكم كنت اخشى يوما فيه اغاث فيه واتعصر من شوقي لها..وهانذا معصور وابحث عن مغيث .. وحبيت سارا وسناء وفلانة وفلانة الاخرى ونهال ونهال التانية ..اتشتـتا فيهم باحثاً مُـتنسما رياح جنتك وورد الجهنمية في خشوم باب احواشم فما ُطلت غير سرابٍ خلته انتي.. حبيتم في الشتاء محاولاً جبر خاطر الشتاءات التي فيني.. اللاقيت فيهم حبيباتي..فطفقن يجئن عند كل شتاء. انا ضقتا بصراحة من هذه العُـزلة ومن هذه الليالي التي تخلو منكِ.. ومن هذا الخميس الضكران.. ومن التامل والتودد الى اجسادٍ لا تخصني ولاتخص احدا غيري ومن كلام الناس..
يا عزيز خير الخطاؤون التوابون ,,,, أشك أن يرتفع مؤشر الإحساس عندك للأحمر كما كان هو الحال معها كما ذكرت,,,
دق الياى يا عمّك,,,, وجّنا تعرفو أخير من جّنا لا شفتو لا سمعت بيهو,,ولا أدوك ليهو,,, من طرف دا يا صاح بطيخ فيهو الحلو وفيهو المسيخ,,,,
تخش من طرف وتتبدا تتعرف عليها بعد الدخول..عرفتك بيها تكون طااااازجة
تكون قاعد ترقص معاها يوم حفلة العرس كده وماسك يدها تقوم تهمس ليها برااااحة : ابوكي وينو في الناس الورا اللابسين عمم ديل؟؟
ياعمار اتلاقينا في العمارات في شارع 25 في رمضان الذي انصرم وانتا راكب عربية ناظر المسيرية على ما اذكر.. سعدت بذاك اللقاء..ولو شفتا لي من نواحي المسيرية واحدي مزيونة..ينتم المراد
نوصي اخونا ضحية واونا بشير جبريل بي جاي في الدوحة.. ونمرقا في رشاد
Quote: ياعمار اتلاقينا في العمارات في شارع 25 في رمضان الذي انصرم وانتا راكب عربية ناظر المسيرية على ما اذكر.. سعدت بذاك اللقاء..ولو شفتا لي من نواحي المسيرية واحدي مزيونة..ينتم المراد
ذلك الرجل كان هو شقيقى آدم العمار وعرفتك به وهو ايضا من بورداب الرياض الجدد ( بس انت عطشان شديد عشان كده ما كنت مركز معاى وطبعا معذور)
بخصوص بناتنا حبابك الف انا غايتو عندى اتنين واحدة فى الثانوي دا انت ما بتفع معاها والثانية فى الابتدائى دى لو بتنظرها غايتو نحاول من الان نجهزها لتقبل المصير المجهول ، وفى الوقت داك حتنطبق عليك قصيدة( ياعمو لا شن جاب شجرة القرض للسوسنة ).
Quote: وتبقى سيرتك هي الكلام والرؤى الحلوة البعيشا في صحوتي .. او حتى في عز المنام ..ويبقى اسمك هو الغنا... هو البخفف لي عذابات الضنا.. الشفتو منك يا مُـنى الروح يا انا ..وصفو بصعب ياجميل..
الدكن التعبان,,, أخوك بفتكر إنو إنت تحاول ترفه عن نفسك شوية,,, وبعدها تقرأ ما كتبته هنا,,
وجهز ليك كرتلّة,,,,,,,,
Post: #6 Title: Re: النداء الاخــير Author: محمد الطيب يوسف Date: 01-22-2009, 12:00 PM Parent: #4
Post: #9 Title: Re: النداء الاخــير Author: كمال سالم Date: 01-22-2009, 12:41 PM Parent: #7
والله يادكين حننتنى شديد ,, حالتك صعبه والله ,, دكين الليله الخميس ده عايزين نعقد ليك رأئك شنو ؟؟ عرس بدراسة جدوى ,, سيبك من الاوهام بتاعة بفتش ليك ومنثظرك عند كل شتاء دى .
نجهز الماذون ؟؟
بعيدا عن بيت العرس ,, نصك باذخ فى الجمال وفيه لغه جديده لحكايه عويصه ,, الكل يبحث عن حواءك هذه ,, لكنها صعبة المنال ,, لانها غير موجوده ,,
Quote: (شالا ود كلية الخبير ساقا شقابا العتماير..)
Quote: وارتحل مختفيا بها عن العالمين وسكن قرية (مشو) في شمال دنقلا...
ها .. نعم .. هكذا تورد الإبل يا مأفون .. سمعت ؟ قال ليك ( قرية مشو في شمال دنقلا ) .. ده الكلام .. ظهر الحق فأُنصِفنا بعضمة لسانك عن سيدنا حاج الماحي .. و أيم الرحمن نصفتنا ياحاج ..
.... ثم ياخي في شأن النداء الأخير ، قالت بت ود حامد عن آمنة بتول عليهما الرضوان و الرحمة : أنه كان فأرا مفترياً من جهة صواردة .. عاجباهو روحو ، و قد عاث ما عاث فيما عاث حتى طمح بحر انفلاته و طار اسمه بالبلاد : وغداً حريفا و قنديفاً بلسان حالٍ : يا دنيا ما فيك إلا أنا.. ثم كان أن وقع صاحبنا على قدومو فأحب ( سِت النِسا ) .. و هي فأرة غادة غنوج بت لزينا و شديدة نار بس .. فعزم صاحبنا على وضع حدٍ لفسوقه و مشيهو البطال فيشان عيون البنية البَقاقة .. تفكّر و تفكر حتى استقام على سديد رأيٍ عزم عليه و توكل .. فقال في سر نفسه : فهو الحج إذن .. أحج فيجُب حجي ما قبله ، فأعود طاهراً منزهاً من الغوايات الفائتة و ما هي آتية .. و توبةٌ توبة . و هكذا .. سارع فغذّ السفر إلى الحجاز بالقوافل - و هي أيامئذٍ تقطع العتامير شهورا .. ثم بحر المالح شهورا أخرى - ، و كان قد استودع صاحب الوداعة حبيبته ( ست النسا ) مشهداً الله أمامها بأنه راجع راجع ، معرسك معرسك مافي كلام ، بس أرجيني النحج و نجيك يا بت .. و أدلعك .. علي الطلاق أدلعك و أدلعك و أدلع أبو أهلك زاتو . فأقامت من بعده - المسيكينة - تمني النفس بالدلع في أحضان " حاج فاره " الذي قصد الحجاز ليتطهر و يرجي الله و رحمتو من بعد قلة الأدب التي عملها . أخدت بت ود حامد - عليها الرحمات - أخدت نَفَسَها الذي قام ثم استطردت تحكينا : هذا ، و روح يا زمان تعال يا زمان حتى كان يومٍ فيه نزل المدينة فارٌ شابٌ وجيهٌ و مليح و حلاة الدنيا عليهو ، و قعد يرازي في ( ست النسا ) حتى جاب راسها ففصلت و أناخت برواحلها الهيمانة و المردمة انتظاراً لصاحبنا حاج فارة ، أناخت بها عند الولد التفتيحة الجديد ، و أكل حاج فاره نيمه و هو في بلاد الحجاز نايم في الطراوة و يا مؤمن يا مصدق البت حارسا سيادتو .. المهم ، نختصر ليك الشغلة عشان أنا رامي طوبة عشقك دي من زمان و زهجت منها و منك . قالوا قامت تاني الزلال بت ود حامد حكت فقالت : يوم من الأيام جا البلد تاجر جلابي راكب جملو و شايل شيلتو و قال مارقها في الحجاز . صاحبتك " ست النسا " ياخينا قالوا كانت قررت تشرد مع الولد القيافة الحنّاك أبو حاجات واضحة و جاهزة و ما عندو وكت للكلام البيش و الندامات و العوعوة و رجيان الري . الولد قالوا - و العهدة علي الزلال بت ود حامد عن آمنة بتول - قالوا كان الولد الفار شادي طيارتو و مجهز حالو للفرتقة السريعة مع البلومة الأصلية الراقدة سلطة و ندمانة ندامة الكُسعي على مويتها الدفقتها على الرهاب إنتظاراً لحاج فارة و توبته النصوح و جلده للذات و سككانه للبيش .. أها .. مما شافت الزول أب جمل متوجه الحجاز ، قالوا اشرأبت بعنقها و عينها بيضا .. و طفقت تكورك علي عينك يا تاجر و على رؤوس الأشهاد من ناس البلد : ( هوووووي يا راكب عينو حمره و رقبة طويلة ، قول لي حاج فاره .. ست النسا شالتا الطيارة ) . .. فذاك ما كان من أمر ( النداء ) الأخير .
...... قُم إلى كتابتك يا أبدلزيز .. فقد شفيتني بها من حال القحط اللزج الذي أقام علي نفسي ياابن اللزينا .. الله يحلحل حاجاتك ياخي بركة النبي و أهل بيتو ، و تلمك زولة تريحنا من لهلهتك السمحة دي .
إماد ابدلا.. ياصديقا في اطراف شمبات عمت صباحا اومساءا او كيفما كان حال الزمان بطرفك..
ياخي عندي ليك نص شعري نوبي مفصل عليك..اخدتو من العزيز تيسير زيادة وهو من اولاد (مشو) وجده ادريس ابتر الدنقلاوي من العصر المهداوي ورافق الخليفة.. يقول النص فيما يقول:
emad trn ten nenge jelea seka hela nhake yeyake kadil gaskdo kena gashkdo sbr nrngi noodi bela
والترجمة العربية لهذا النص النوبي البليغ:
وعماد لايفتا يتذكر زوجته والاسرة.. ويتمحرك يمنة ويسرة.. يتنهنه بحرقة وحسرة.. دلعوه اهل الصبر مرة.. دللوه حتى فات حد الصبر وجرا.. (انتهى)
والحق يقال يا عماد...ذكر ود الماحي قرية( مشو) في كذا قصيدة القتها فوق دي واحدي وبرضو في قصيدة (بريدك يا البشير) انشد رضي الله عنه وارضاه: ياخواني لا البااقير لا قوز البسابير مويس والسناهير السيال مع الجوير كرقوس والمغاوير قبروسي والكمير الدامر والعشير الباوقة و السنقير مقرات مع اب سدير بي دار المناصير جيراني الكجاجير قريب الكوروير جريف الحواج نير سقاي ولاد شبير دويم ود حاج شهير عمراب و السواعير والدتي والحجير تنقاسي و القرير حلة ولاد صبير جزيرة ود سرير لاتنس الجبابير يبقو الستة اجاجير عربان الهواوير شوايق والبدير ولا أرقو و الحفير..(انتهى)
سلامو ساقو الماحي يا عمدة ..ساقو الماحي معبا بعلم الحال والآل والصحبا.. سلامو جاكم حدوت ارقو وحدوت الحفير.. هذا ما كان من امر الحفير ومشو..
والنحدثك ياعمدة في شان اخر..وكل يوم صرنا في شأن.. على المك صحبك مرة قال متغزلا في واحدة من جهات الصحافة: ست شعرات بيضاوات ظهرن في راسها مثل الوباء قلت اداعبها انظري مليئا فقد يكن تسعا غضبت وحملت معها الورد والكستناء واشجار الرمان.. (انتهى) يعني على المك تغزل فزعلت وحملت وردها وغابت..
شكا لي صاحبي في الدوحة وكنا عند ( راس الشوعة)في شاي مغرب وقال في حسرة: الدنقلاوية الهجين صحبة عماد.. تلك التي تحمل خصلا مكومة شديدة السواد شديدة الوضوح.. حين تغزلت فيها ذات نهار .. غضبت وحملت معها خصلها وصباح وجهها ومضت.. قالت حين اختارت لجملة نهاية الصحوبية وليتها ماقالت: (انتا فعلا زول مؤذي) ومضى يحدثني فقال: ازعجتني كلمة (فعلا) كونها تستوتجب فكرة مسبقة معلبة موجودة سلفا.. وانه بهذه ال(فعلا) فقد تم تاكيدها...اي تاكيد الفكرة التي جاتني وهي تحملها تجاهي.. ازعجني الامر كوني كنت في سوء ظنها على حافة هذا التوكيد.. وصمت برهة ونظر في اتجاه السودان وقال: لم يزعجني ان يغادرني صاحب قط.. فالناس تتعارف ثم تمضى حين لاتلتقي الكيمياوات.. ولكن من المؤسف ان نلتقي بافكار مسبقة ونجتهد لتاكيدها..ومن ثم نمضى تاركين الالم..
انا مازعلتني قصة انها مشت ياعزيز بس زعلتني فكرة اني كنتا في حافة هذا الظن الشين.. والحمد لله على كل حال..
قتا ليهو انتا المزعلك انو هناك فكرة مسبقة بانو انتا مؤذي ولا زعلان لانها قالتا؟ قال لي: كنت احسن فيها الظن ياعزيز..افتكر دي اجابة كويسة..موش؟؟ قتا ليهو : ماموش.. فقال: الناس دي مااكبر همي.. قتا ليهو: كده انا فهمتا.. قال لي: طيب ممكن تجيب لي شاي ياغبي.. مشيت اجيب ليهو الشاي وانا بضحك واقول ليهو : انتا فعلا مؤذي ..
الان ياعمدة احدثك عن صواردة
فاقول لك . لاعلم لي بموقعها غير انها في ارض المحس.. وتقول امي للمحس(مسي) واظنهم يقصدون حلاوتهم فهم حلوين و(مس) في معنى السمح... ودونك عزاز التحت دي..سماحة تفاصيل وشها دليل صدق الوصف.. ولاشك عندي في انو ست النسا مسمسمة وسمحة.. وقال والسمح فات الكبار والقدرو.. والفاتك ياعمدة فوتو...
وسلامي يغشاك في نواحي شمبات ودال .
قتا لي زهجتا من قصص عشقي التي لاتنتهي ياخي هي لسع بدت؟؟ :)
يا جماعة دكين ده قال ليكم كتب الكلام ده قبل عامين او يزيدون .. الما كتب ليهو قبل سنتين انو كلامك ده رائع وجمييل اوووعا يجي يكتب اسة ... الحال في حالو دكين لسة ما لقاها وهي في مكان ما ممكن في جبال الالب وربما في بربر واحتمال كبييير تكون في أم مقد .. الكلام مكتوب بي اثر رجعي مسموح فقط للاعضاء الجدد ومن هم دون العامين بالتعليق .. اما نحن ناس قريعتي راحت فعلينا فقط بي العكننة ..
تخريمة : دكين زولتك دي اخالها في درب التباااانة ..
لا عجب ان ما قسم لك أو لك فيه نصيب ايا كانت التسمية من هرطقاتك و فقاعات افكارك أعلاه قد ضلّ عنك و ضللت عنه و بت تسكلب في المنتديات و الاسافير ... احسب و العلم عند ربي المطّلع، انها دعت بليل أن يرد عنها القضاء و الامتحان أو احسنت بلا من أو أذى فدفع الله عنها ما كان ليصيبها و ابدلها خيرا مما قسم في الأزل و الدعاء يغير القدر و هناك الكثير من الخير كما تعلم لا يشمل وجودك فيه ... و العرس ياها واحدة منها ... ناهيك من فراشك ...
يا دكين،
اعجب لحالك و اذكر ما قاله احد البايرين لا أفضله عليك إلا بالعلم و سعة الأفق، قال ذلك البائر المخضرم: (ظننت الآتي محملا بأفضل من الآني لقيت روحي بورت و بقيت اقبل من عفت في الماضي) و يمكنك تبديل الضمائر لتوافق من تعرف من البائرات الظانات الحسن بالآتي و يعمين عن ما تحت انوفهن من رجال حافظين السر كاظمين الغيظ انفع للعرس وهم سند في الدنيا أم قدود و أخير و افضل من قادم لا يأتي و مستقبل معلق في قمصان الكستور و الشعر المسبسب و باضرب ليك بكرة و احكي لي عن مشاعرك فضفضي لي .. و بعدين بتذلها من حسي و هي ما لمت فيك لهسي و تقول ليها حبيتك في فلانة و فرتكانة و فتشتك في ريدتي لـ لولة ام سكاكس؟ انت يا ود مهضرب؟
انت كان جيت حاجي بيت الله زي زول عماد عبدالله، و جيت متوضي، و صايم ديمة، و معاك زوادة عام من المحبة و شيلتك 24 و معرش بيت، بنت رديك ام قسمتن قليلة تقيف تعاين و تحمد الله و تستغفر و تقول: شن سويت في حياتي يا الله استحق نوع ده؟
Post: #24 Title: Re: النداء الاخــير Author: ibrahim kojan Date: 01-23-2009, 01:09 AM Parent: #22
كين
عليك السلام
Post: #25 Title: Re: النداء الاخــير Author: محمد على طه الملك Date: 01-23-2009, 01:40 AM Parent: #24
أعلم قدر ما رْكبت به من صدق .. وما ركبته من حياء .. فأنت فيما علمت ابن بيئتي .. أرضها معطاءة وحليب سقيها يفتل الرجولة .. غير أن عرقها وغرقها كثير .. حددت موقعك في الخارطة .. فسم .. واقم النية .. ثم انهز بعيرك ليسابق حظ الملوح .
Post: #30 Title: Re: النداء الاخــير Author: الوليد محمد الامين Date: 01-23-2009, 11:07 AM Parent: #25
Quote: ايمن الطيب بداية الاغنية جاتني في جرح.. وعليه نود ان نعبر لك عن امتنانا.. بس ياخوي دعوتك بتاعة جيب ليك كرتلة دي شرك.. يضاف لي شركك بتاع الترفيه عن النفس.. انا لو اصلا برفه عن نفسي ما كان جاتني هذه الهتاويل.. اخوك بعد ده حيقالع الايام والناس وهذا الزمان الردي..
شكرا ياحبيب تاني وتالت على هذه الغنية الموجعة
دكيكين,,
تسلم يا حليو على حلو كلماتك,, الشرك يا صاحبى كان فى (عشرة) البارحة,, لقيتك عندك عمى ألوان,, وطششان شبكات,, ومقدرة ضعيفة على تحديد الأهداف,, وتركيزك تعبان,,,, وضعف شديد فى ضرب الأهداف المستترة,, خاصة تلك التى تحتمى بالحيطان,, فأكثر من التمارين,,
وبعد علاج ما ذكر أعلاه,, كلو ببقى هين,,,
ويمكنك أن تنسى موضوع (الكرتلّة),, لكن الترويح عن النفس مهم كما اسلفت,,,
ولا تعيب الزمان يا صاح فما لزماننا عيب سوانا,,
تحياتى,,,
Post: #31 Title: Re: النداء الاخــير Author: خضر حسين خليل Date: 01-23-2009, 11:17 AM Parent: #1
والله يا دكين انا متابع البوست دة من اول ما بديت تكتبو لحدي مداخلة الزول القدامي ولي هسي ماعارف الممكن يتقال في المقام دة شنو ؟
بالواضح كده يا عمر الفاروق أنا دخلته هنا عشان محمد ميرغني ده لانوقبل سنتين كان ناقص في الكتابه دي
أما موضوع دكين فلله عباد يأتون للحياة ويلجون فيها لهم سيماء في ملكة محددة لايقفون لها علي أثر ويخوضون في سكك متشابكة ولان السر سر ناموس علوي فلابد أن يتحقق بطريقة أو اخرى لذا السر لدي دكين هو سر الكتابة وليس الحبيبة الغايبة ولانه درويش ساي فاكر انو الموضوع حبيبة . اذاً سيطول شقاه وشقائنا في هذا الدرب إذا لم ينتبه . فقم إلا كتابتك يرحمنا ويرحمكم الله
يا دكين اها قول لقيته تاني ح تكتب شنو ؟
Post: #35 Title: Re: النداء الاخــير Author: عصام علي أحمد Date: 01-23-2009, 01:49 PM Parent: #1
Quote: تقول "الرسالة" في اخر زيارة لمنزلها في نواحي الكلاكلة الوحدة: "ماجيتـنا الدور ده مِـنكَرِب ياعبد العزيء"..هكذا دون نطق الحرف الاخير(ز) بوضع همزه مكانها، فالرباطاب لاينطقون اخر الكلمة !!
دكين الخترى تكون قاصدة عبدالعزى (أبولهب) يلزمك أم جميل وآيتها فى جيدها حبل من مسد! القراءة لك متعة ما بعدها متعة! العرس ملحوق مادام 34 بس! ___________________ حاتم يوسف ليك وحشة! علومك شنو! قول لى دكين المطرطش دا فى ناس حنة الطهور أول حنة وآخر حنة ليهم! جنى
Quote: بخصوص بناتنا حبابك الف انا غايتو عندى اتنين واحدة فى الثانوي دا انت ما بتفع معاها والثانية فى الابتدائى دى لو بتنظرها غايتو نحاول من الان نجهزها لتقبل المصير المجهول ، وفى الوقت داك حتنطبق عليك قصيدة( ياعمو لا شن جاب شجرة القرض للسوسنة ).
قلت لي تدوير مربعات تربيع داوئر ؟
اتفضل ... تدوير نفس النظرية الفلسفية بتاعتي الواردة اعلاه مع مثال حي: بناتو واحدة ما بتنفع معاك و التانية احتمال ايوه احتمال لأ...
فرصك بدت تقل ... إلا اعرسك انا لوجه الله تعالى بعد ده ...
____________
يا دكين، ليه ما رديت علي قبيل؟ تغى منك ولا انا فهمتك صح كالعادة؟
يشهد الله كتبت ليكـ رد مطول شارحا ما التبس في ظني منكـ و مصححاَ لبعض هناتكـ هنا و هناكـ علي نحو
Quote: والفرج هنا مقصود بيها المهبل:
و شامتاَ في خطوطـ دفاعكـ الذكيات و داعماَ للمذيد منها في
Quote: والشتاء عموما فرصتي في كل عام
كما و قسوت عليكـ في حنانكـ المدفق وراء ذكريات لحِسان تفرقن في أنحاء المعمورة ولاذلن يذكرنكـ بكل خير و هن يرفلن في حِوي الـ ( شقابن العتامير) , هنا
Quote: دغلٌ من الجهنميات واقباط وحوش وباب حديد مزين بي حديد ..ثم بخور لبان وضل الشتاء وحيطة مهملة لي بيت من بيوت البعثة المصرية في نواحي الخرطوم غرب.. ومن ثم بيوتاً اخرى: بيت ناس داليا خيري في العمارات.. حوش السيدة الفضلى سعدية الصلحي بنباتٍ متسلق يزحف على مغرب العباسية وجدرانها..طرفٌ من مدخل بيت ناس مي عاطف في نمرة اتنين واشجار متشابكة شديدة الخضرة عند المدخل في بردٍ شديد وليلِ بعيد..
و عرجت مع لغتك|ـ العالية الي ادب ابونا حاج الماحي وتجاذبنا اطراف حديث لطيف لكن , بدون مؤاخذه, حضر خالد و(خالد طفل حاقد لم يتجاوز السنتان ) وهو يحمل اصبعه الشهير مصوبه نحو الكمبيوتر حيث اجلس منهمكاَ, و اظنكـ متفهم لما حدث بعدها.
__ 95% ساقضي معاكـ ويكـ اند طويل في ابريل القدامنا ده في داركـ بدوحه طويل العمر آلـ تاني !؟
الذين تداخلوا لهم الشكر الجزيل.. والذين كتبوا بعد حين لهم وافر الشكر الجزيل.. والذين استنكفوا اهو المؤتمر انشالله ينفعكم..
Post: #47 Title: Re: النداء الاخير Author: محمد المرتضى حامد Date: 01-28-2009, 09:45 AM Parent: #46
Quote: ( اللواتي تولين عنا وضيعننا كن خير النساء).
دا بعض من كلام الشاعر الشلال ودالمكي يا دكين ، ودالمكي قال ( ويُكذِبُنا الحزن حين يعلمــــنا أن خير الليالي مضت دون أن يطلع الفجر فيها.. حتى وصل إلى : أن اللواتي تولين عنا وضيعننا كن خير النساء ) بمعنى أن تلك المقولة بعض من كذِب الحزن ومن ثم يكون صدق الحزن، وفقا للقصيدة ، هو أن اللواتي تولين عنا لم يكنَ خير النساء ، ولكن بعضهم يرى ، فيما يرى الحالم، غير ذلك تماما . يا عبدالعزيئ ، كلامك كلو عاجبني ، وعاجباني الحاله الإنت فيها دي لأني بَدورا للزول البِريد ، فالضريبة الإسمها البهدله هي بعض من الآدد فاليو للوله VAT وبرضوعاجبني كلامك لأنو(النداء) صِيغ بلغة تركُل النضمي العادي وأنا زي ما قُتَّ ليك بيعجبني الكاتب البيخُج بُخسَة الكلام لامن يطلِِّّع سمن النضمي الخام و (فُرصَتو) ، الكاتب البيأشِّر شمال ويلف يمين ويصحِّي الراكبين جُوّه اللوري ويدفِّق الراكبين في التَنده * ، يعجبني الذي يتبنى اللهلهه في انتظار المعشــوق أين كانت إحداثيات المنتظَر والمنتظِر، مشرور في العتمور أو في ركن المدرسه ، يعجبني الذي يشاقق بين البيوت يجاهر بحالو زي آرثر ميللر يكورِك بين شوارع هوليوود : ياناس أنا مكتول في بيت مونرو ، زي الزين لما يجري حفيان في جيبو بركاوي ويبكي وينوح ويصيِّــح رافعا راية استسلام ريتشارلز مع عرضحال فحواه Unchain my heart , set me free. يا عزئ ، كلام الناس الفوق دا ما ترميهو البحر ساي رغم أن بينهم من لم يمر بحالتك ، فليس من سمع عن الحرب كمن خاضها ، بس داير أقول ليك على رسلك يا هذا، نحن أصلنا ناس محبّه زول نعـزو وزول ( نزيدو) حتى لو لم يكن الزول دا موجود أصلا ، مش متذكر وداللمين قال قلبي عاشق ودربي خالي من حبيب ؟ نحن بنعيش (حالة) مستدامة إسمها الحب وبنعمل ليها بروجكشن على أول واحده تبتسم لينا حتى لو كانت مستهبله، إصبر وصابر ورابط ، ياخ إنت هسه كان كنت عرستها ما كان أنا كتبت ليك ولا كنت إنت كتبت في الموضوع الخطير دا زاتو ، يمكن كان هسه تكون في سوق الخدار، أنا عايز ليك البنت (المغنسيوم) التي تشع من الداخل كما قال أحدهم ، لكن في الوقت ذاتــه يجب أن تتذكر أن العناصر الكيماوية في الجدول الدوري كلها قابلة للتحول. _______ * التنده يا (عزاز) هي (بلكونة) اللوري سفنجة كان أو فارقو أو أبيض ضميرك قبل ما يجي النيسان والزد واي و .. اللوفتهانزا.
الأستاذ دكين لك التحية والتجلة والإحترام رغم إنني من الأعضاء القدامى بالمنبر ولكن دخولي للرد قليل جداًً فبكل صدق كل شتاءآتك بتفاصيلها الدقيقة قد إستوقفتنى معجباً ومستمتعاً بالسرد واللغة رغم انني قليل سرد وضعيف لغة ..تحية لك وأنت بتلقائيتك تفرض على الآخرين التواجد هنا للقراءة وذلك من أجل الفائدة والمتعة معاً.. تمنياتي بأن تسمع هي هذا النداء الصارخ ..
اخونا ود المسيد صدقني انا كاتب كلامي ده راجي الخير.. لا قاصد السرد ولاقاصد الادب.. مشكور على مرورك بهذا النداء املا ان تمرره لمن ترى انه اهلٌ له وتكون خدمتني
:)
Post: #49 Title: Re: النداء الاخير Author: إيمان أحمد Date: 01-28-2009, 10:25 AM Parent: #46
Quote: الهكر اظنو كوراكي ده جاهو في صمة خشم بتو..
الذين تداخلوا لهم الشكر الجزيل.. والذين كتبوا بعد حين لهم وافر الشكر الجزيل.. والذين استنكفوا اهو المؤتمر انشالله ينفعكم..
يادكين والله رديت ليك رد بي مزاج، وقريت كتابتك دي يمين شمال لما اتمحنت. بس الرد شالو السيل (ما المؤتمر)!! غايتو بعيد ليك منه:
أحسن الله عزاءكم يا عبد العزيء. There you go
Iman (مبروك عليك بت الهاكر، أهو البوست جاب تمنه. ان شاء الله هكر مال وعيال :))
لامني فيك الوالي واللّ ما بيسوى وكل من يأوى لي لست اعبأ بى زخرف الأقوال برضي في التبريح والبكى المتوالي
قسما بها التي لم تأت بعد يا عزيز , كلما اقراء نحيبكـ هنا و هناكـ اخربش اضابير حاسوبي الاخرق علني اعثر علي ضالتكـ فيه ولا مُغيث . غنيتها و انا في عز ازماتي السابقات حتي صرت لها كارها و لايامي تلكـ من فرط تطابق الحافر فما اقسي ان نتودد او حتي نتوق لهن و هن عالمات , حينها يتدللن و تنساب أنهر القصائد مِنا و تسير بسيرتنا الركبان و نصبح حينها نهبا لقطيع الاوغاد آكلي لحوم البشر.
فلا تبتئس يا صديقي فصاحبتكـ آتيه لا ريب فيها ان تبقي فيكـ رمق و قطعا حا تطلع دينكـ (دلال و نقه و رومانسية مٌبتسرة ) تماما كما رسمت لهن الدراما المصرية خارطة الطريق و عبدتها بوقتنا الثمين فتسلح قدرما استطعت لتلكم الايام
النسيم هبالي يا حسينة الذات الجمر هبى لي ياحبيب رحماكـ لا تزيد بلبالى ولا تكون شكواي موية في غربال
قالوا وما خطبكم يادكين الوغد والشمشرجية أهل الشمار دراشه وناعمه! قال دكين لافض فوهه: سنجهجهم بالمسنجر! جنى
Post: #56 Title: Re: النداء الاخـير Author: أحمد الشايقي Date: 02-01-2009, 08:15 AM Parent: #55
كيف أنساه دكينا,
مذ لقانا كان فينا, وافر الصبر مكينا
مشرئباً للمعالي باذل النصح ثمينا
كان صنواً ألمعياً كيساً رحباً حنونا
غاب عنا وتناسـى زمناً فـاق سنينا
وسألنا ما دهـاه ماالذي أردى دكينا
فتخلى عن ريـاض هي خير من مدينة
قيل يا هذا تعزوا وخذو الصبر قرينا
أو سلوا عنه جلالاً فهو بالسـر قميناً
أحمد الشايقي
Post: #57 Title: Re: النداء الاخـير Author: محمد المرتضى حامد Date: 02-01-2009, 10:16 AM Parent: #56
إعادة يا خدر:
Quote: وأن الأماني إذ نشتهيها تعلقنا من سراويلنا في الفضاء
تعرف يا خدر ، ودالمكي دا زي إبن الحنفية وتلامذته ، كان يفتي في الفقه لمسائل لم تقع بعد ، كان يتنبأ لأمثال دكين كنوستراداموس ، أها هسه موضوع الأماني التي نشتهيها وتعلقنا من سراويلنا في الهواء وتخلينا في حالة شهقة ناقصة ، دا بالضبط الحصل لدكين وحاصلة لناس كتار فايتِّنو بالصبر ساي. بالفعل ودالمكي قَلَب الهوبه وألحقها بسمرسولت في التشبيه ، بس دكين زولتو دي قريبه منو وبعيده ما قادر يصلا ، تُدنيها منه الأماني والأخيلة ويبعدها عنه الواقع الفاجر السادي السادر مدا وجذرا فيما يعرف بال tantalization على موجة بث طولها جنبك ومشتهيك ياعيون وقال عنها جمَّاع أنت السماء بدت لنا ومدت لينا لسانا ، حالتو تريِّح يا خدر ، القاعد وسط روحو وضهبان ومُعَلَّق من سراويله في الهواء ، رددت صدى صيحاته الأسافير وما من وجيع أو مجير . اللهم اغسله بالماء والثلج والبرد.
امانيكم دي مشبكية يا مولاناز -كما تجمع في الانجليزية..استاذ الموصلي ينهنه امانيه السندسية و انتو تمرقوها في التدبير المنزلي و السربادوب، عفيت منكم! يا عزيء اخوي..لقيتها ليك بس كلمني اول، اي حبيبة لك كانت تستطيب قول المفردة(اكزست)؟
انشاء الله نهاية الشتاء هذا تكونا زوجين تحت بطانية واحده وتنزل من السرير بي اتجاه واحد فقط وخميساتك ما ح تكون ضكرانة تاني ح تشم رائحة البخور والدخاخين من مسافة ميل والبوصلة بتاعتك ما ح تخطئ ا لهدف
ربنا يلم شملك انشاء الله مع من احببت بعدين ما في حاجة اسمها من طرف
I posted this the night of the hurricane aka hacker attack & I am not sure if you’ve got the chance to read it .... Although I am not quite keen on your reading neither your interpretation, I am just placing my words form a “literary” point of view so to speak .. Just to keep the flow.. or let’s say an attempt to have some cohesive chaos Note: I am sorry for writing in English but I do not have Arabic keyboard. I hope below is explicit enough _____
أيا دكين، أراك مستمرءا مطايبة الصحاب، و تقلب شماتة الآخرين في يدك حتى تستدير و تقذفها كرة على حائط مبكاك الذي بنيته بيدك ... فاتني المولد يا جنى، وهاهي يداي مرفوعتان للفاتحة بعد ان ملت الانتظار معلقة، الفاااااااااااتحة في احلامك و ما حوت ... عظم الله أجرك، والفقد جلل، وإن لم تنله يوما، إلا انه فقد ما دمت استبشرت به دوما حتى ظننته آت لا محالة ... اعرف تمام المعرفة صدمة اجهاض الأحلام وهي لسة صغيرة بتفرفر جوانا .. وموت اليوم في أوله ... بعرف التكة دي كويس ..زي جوع بطني ... أما فيما قد كان من جفا منكور و حردة مخطئ لا يلوي مبررا لما فعل، فقد عفينا عنك ... و نعتذر عن جريمة العشم و نبدي الندم فيما قد كان من ملية يدين بأن الاخوة باقية ما بقت الأرض و ظللتنا السماء و تسير بيننا يوم الموقف العظيم ... و نتوب من جهلنا بأن زوال الأخوة و العشرة قاب قوسين أو أدنى من فهم متعسر من لدن من ظننا اننا نعرف، و ان كان لا ناقة لنا في تلكم الظنون ولا جمل .... و قدر الله وما شاء فعل .. و لكنها الدنيا بنت اللذينا ..! التي سلبتك فتاة احلامك و اهدتها للسعادة عوضا عنك ... هي الدنيا بنت (......) خليني ارمي بلاي عليها زيك امكن اريح الطايوق الفوق ده من الحسابات و ملامة النفس .. ياها الدنيا بنت اللذينا الخاتية علينا ... زي ما هي ضنت عليك، هي تلك الدنيا زات نفسها التي تظل تلقي في طريقي خلان من ورق، و اخوان شمّات، و فرد ما هم فرد ...و العجب الثقاة اللي بيدونا للتعب على طبق من فضة .. فضة شنو .. طبق من ذهب و فوقنا رشة مكسرات و فستق حلبي .. الدنيا قاصداها معانا يا عزيز تصدق؟ قاصدانا عدييييييييييييييل كده .. و انحنا ما مفروض نسكت .. المفروض نقعد نجدع حجار كلامنا الحار للكل، و للقريب قبل البعيد، و نحرق بنارنا البيطوله يدنا، والغريبة دايما بيكونوا قراب .. المفروض ما دام انحنا مدونين رسمي بالحبر الشيني في كشف المستفيدين من خصومات الأحلام، المفروض نفكها في أي شباك فاتح على الضوء، ونجيب الضلمة لغاية عندنا ... جوك جوك ده ما بنفع معانا .. نمشي ليهم انحنا و الترميهو السما تتلقاهو الواطة .... فهم يا معلم .. فهم يا مكسب، يا كبير، يا أخوي ... فهم...!! هو مدام ده فراش وبكى، و ناس تقدم ناس للباب، و القهوة مدورة .. حقو اجر كرسي ابكي انا كمان، وكما هي الحال دوما، نبكي في أحزان الآخرين حزننا نحن، نستلف منهم المناسبة نمسح فيها الاسى و نقش دموعنا في حضرة اساهم و نظهر حنونين .. حساسين، قلبنا رهيف و بكايييين ... قمة الانانية .. موش؟ نفس الاناينة بتاعتنا لما نردم اصحابنا لوم على خطا ما كنا حنعرفه لولا عشمهم فينا في زنقة فضفضة ، وننسى انهم سكونا سك علشان يورونا محل الجرح وما كانوا عارفيت انو حندوسوا ليهم بعدين ... علشان ننتصر لـ (فاوست) المعشعش جوانا ... فاوست تطير عيشتو! و الصاحب تطير عيشتو ...المهم نخلي ليهم خشمهم ملح ملح من الشماتة، وننسى انو الناس دي عشمت فينا، ووثقت فينا، وورتنا الكان مستور في الحشا، بس طـــــــــــــــــــــــــــــــــــز كبيرة .... حريقة فيهم و في همهم و بكاهم ... المهم نطلع احنا الأبطالن المقرمين، البنفهما طاااايرة و نديها ليهم حارة ما بردت ما هي خربانة خربانة، شنو يعني لما نجي نليسها ليهم بحبة شماتة؟ اها يا حبوب، يا فردتي، انا ما فارقة من الناس السالف ذكرهم، و بناء عليه، جيت ليّست ليك همك بحبة شماتة، لعلو ما حرقك يا صاحب؟ اعفي لي ... النبي ... ما على قدر المعزة بتكون الشماتة ... و انت عارفني بعزك قدر شنو ... و قس على ذلك ... و ادعناك الله و رسوله و الانبياء ... .... ابقى عافية ومجنون، و الجنون قبل العافية، لان العافية تستوجب الجنون وإلا فهي فرفرة روح ساي ...
ياخي يا سلام ياخ .. دكين و عزاز و مرتضى .. شوشوتونا كلام سمح .. أريتو الوجع الجميل صاحبكم كان بيمرق منكم دي السماحة .. أريتك يا الوجع تتحمد أخوتنا دكين و عزاز و اللي يمشي مشيهم حتى يطلع زيتهم فيطلعوا زيتنا ... فنطرب ياخ .
القراية ليكم متعة متعة .. مقدرتكم على جرجرة الزول من لهاة روحو و سدحو أرضا لا تعدلها إلا ......................... لذلك .. لكل ذلك , شاحد الله الكريم تكتبوا و تنعصروا قدر ما الله يدينا .
..... يا عز .. ياخي لله و الرسول أحبك .. فتقبل مني ياخي .. و لمرتضى مثل نصيبك في الحب .. أما عزاز .. أما عزاز .. أما عزاز .. آمنتُ بالله .
وحيطة مهملة لي بيت من بيوت البعثة المصرية في نواحي الخرطوم غرب.. ومن ثم بيوتاً اخرى: بيت ناس داليا خيري في العمارات.. حوش السيدة الفضلى سعدية الصلحي بنباتٍ متسلق يزحف على مغرب العباسية وجدرانها..طرفٌ من مدخل بيت ناس مي عاطف في نمرة اتنين واشجار متشابكة شديدة الخضرة عند المدخل في بردٍ شديد وليلِ بعيد..
يادكين : يخيل لي في حالتك دي الطريق الي البيت أجمل من البيت .
والا شنو ؟
يازول انا كل ما اتذكر ساقا شقابا العتامير دي تأخذني شنو كده ما عارف !
Post: #69 Title: Re: النداء الاخــير Author: محمد المرتضى حامد Date: 02-02-2009, 10:04 AM Parent: #68
Quote: النداء الاخــير
لا أظن.
--------- (كلنا قد تاب يوما ثم ألفَى نفسه قد تاب عمَّا تاب) - مظفر النواب -
Post: #70 Title: Re: النداء الاخــير Author: Baha Elhadi Date: 02-02-2009, 10:14 AM Parent: #69
دكين : قليل من اليقين وكثير تهور يفيدان في مثل حالتك التوبة مشروع مفتوح زمانها أبدي ما تتوب قريب وإلا الجنون ... الجنون محمدك لا أؤمن بالنداء الأخير الطائر لم يزل يحلق فما في داعي للسربعة وتقفل الأبواب مادام هناك طرقات وزقاقات و شوارع متاكي فيها الجنمية ما أظن الرجعة صعبة عليك
عتاميرك شايلها معاك في روحك شقها بتصل لبنت الذين نحبهم عشانا بهاء/طوكيو كلنا ذاك الرجل الشتوي
الرقم كالاتي: من اليمين للشمال 00974 ده مفتاح قطر الدايما شغل بالك وبال ناس عبادي .. بعد ده كالاتي: عدد حروف الحتة الكانت ساكنة فيها صحبتي وصحبتك العرفتني عليك.. ده الرقم الاول.. الرقم التاني صفر الرقم التالت عدد حروف الاسم نفسو الرقم الرابع عدد حروف الاسم - 2 الرقم الخامس عددحروف الاسم - 3 والرقم السادس نفس الرقم الخامس وحسب معزتك لي الاصحاب حتعرفي الرقم.. ولو امريكا نستك صحبتك وماعرفيتها اناذاتي تلفونك ماعايزو..ولو قدرتي عرفتيهو ياكي سارة اخت البنيات العرفتها..
كان ممكن ارسلو ليكي في المسنجر الداخلي بس السيد الهكر وغد زيي وزيك واحد.. وانا رقمي ده بعتبرو عورة.. وانا ماعندي ايملك اصلك من مشيتي الارض الجديدة طغيتي ..
يبدو وصفا جميلا جذابا ويغري بالحلم والانتظار..بيد انه يظل حلم ..فليس ثمة بما وصفتت.. والالم انو كل البنات شايفات انهن بشعن من الداخل وانهن الامل المنتظر لكل زي رايحة.. والبؤس انو كلناكرجال شافين انو نحنا بنستاهل احسن من ماهو موجود وماهو مقسوم..
وربما لو لم يتولين عننا لما كن خير النساء.. ان خير النساء لاوجود لها ..وانما هي في خيالنا الجميل.. وكل من تولى يظل علقا بذاك الخيال الجميل كوننا لم ندركه.. وربما لو ادركناهن لكن زيهن زي غيرن..
يامحمد ان القناعة بالمقسوم رضىً ونعمة.. واذا اراد الله بعبدِ بؤساً زين له فيمن مضين من النساء الخير كله والاماني..
كل ما ظل بعيدا عن متناول اليد فهو رهين الخيال الجميل..
فماتبرا الخيال..انا اكتويت منه ولا ازال
محبتي يا مرتضا.. فانا قد احببت مالا يجب ان اصبو إليه..
أثنان يستفيدان من ظلام الليل البهيم، الحرامي ... وأنا (ينفع عنوان بوست) قرأت هذا البوست على مراحل خلال نهاري الطويل المكرر المملل.. حتى وصلت لردود عزاز شامي،، وتساءلت بيني وبين شيطاني اللئيم.. عزاز دي مرة واللا راجل واللا كافي بلا؟؟ الصورة السمحة دي حقتها واللا حقت إعلان واللا حقت جارتها الحليوة قاشرة بيها؟؟؟ فكر مخي بأنها صورة أي داهية ما إلا أن تكون هي نفسها "عزاز شامي" قرأتها المرة الأولى وضحكت وقرأتها المرة الثانية فخرج شئ لا هو ضحكة ولا هو بكاء خشم معوج تنازعني شعوران متناقضان،، أني اعجبت -لا شك- بما كتبت،، وأني – لا محال- انغظت منها،، وتعز عليا نفسي المغرورة بنفسها دوماً أن أخونها – نفسي- فاعترف وأقول أني شعرت بغيرة أنثوية منها.. وها ذا الليل البهيم ازف.. وزفت معه طقوسي الجنونية،، ارمي الجزمة – لامواخذة- هنااااك وانكش شعري فأحس براحة من يمد لسانه لعالم غياظ يحكم دوماً على الأشياء بمظاهرها الخداعة الزائفة اتحدث صراحة،، يفك الليل ساجور لساني فاحق القول واحق المشاعر وأحق الحق وانا هانئة بإطمئناني مرتاحة بتأكدي أن كلام الليل حتماً يمحوه النهار،، امد لساني لعالم ثقيل،، سمج،، يتشدق بلغويات،، كلام عن الدواخل وأشياء من نوع جمال النفس وحقيقة العاطفة وبند الحنان والعشرة وزفت الطين وال.. ميتين.. ثم وعندما تحين ساعة النطق بالحكم،، يحكم بما يرى ،، وبما يرتدى ،، بما يلبس ، بطريقة الكلام تصنعاً كان أو خيال،، يحكم حتى على كيف يؤكل الطعام،، لا ما هو الطعام،، إن شاء الله يكون تركين حتى.. بصراحة وإحقاقاً لحق الليل عليا يا عزاز شامي،، أنا كرهت جمالك لله فالله.. أنا الأنثى بداخلي،، اعترف،، وانا اعلم اني في الصباح حافاجأني واضايقني باعترافي العلني بأني كرهت حنانك.. عذراً إذ لازم اقول،، ينعل جمال كلماتك كرهتينا الحنان يا منقة وأما قبل يعز عليا والنوم يداعبني بشراسة أن افكر،، يدهشني في تلك اللحظة العذبة في بداية النوم أن اكتشف أن عقلي ما زال يعمل ويئن ويلح ويصر ويصرصر يلعن أبوه إن شاء الله يعز عليا أن انط من عز بداية النوم اللذيذ وانا مدهوشة أني حقيقة بصراحة أفكر في بت ناس لا اعرفها أول مرة أقرأها بغيرة وكراهية لجمال تميزها يعز عليا أن أكتشف بعد تشدقي الكثير نهاراً وجعيري وهبوب صوتي في كل من هب ودب عن الرحمة والعدل والمساواة والحق.. والحق اني حقودة لئيم اقوم كمن نام ثمان ساعات كاملات وبنشاط لا اعهده في نفسي وشيطاني الصغير يمازحني بأن هيييييييييييييه سأجوط اللوحة الجميلة هذه،، هييييييييييييه حاشخبط،، كنت أفضل أن اقول كطفل صغير يعشق اللاءات والمعاكسات والممنوعات فتمنعني نفسي الثانية الداعية للحق بأني لا طفل ولا يحزنون،، أنا زول كبير وعوير مسكين مدمر يغالبه نعاس من ناحيه ويشده صحيان آثم ليدمر من ناحية أخرى يا الفكي هاشم،، يا الشيخ البدوي جن رسمي واسمع يا دكين تعال يا ولد نقعدوا ليك أنا قلت صباحاً،، اني اقرأ بتصرف وتصور،، تصورتك معها،، تلك الضايعة التايهة ال.. .. قليلة الأدب الما لقيتها لسة واحتراماً للمصداقية،، كرهتكما معاً،، كرهت أن يعيش أحداً ما في دنيا ما تلك الصورة الدافئة التي رسمت كرهت أن تذكرني بهذا الحلم الجميل بعد أن عشته برجاء وإذ يدمره فجأة كابوس الحياة لازم اصحيك،، واكورك فيك،، اديك بوكس في وشيك الشين ده هذه الأماني العذبة لن تتعدى كونها أماني،، هذا الحلم الجميل المنمنم ،،كطفل برئ،، يجري هنا ،، يلعب هنا ،، ينطط هنا،، اناظره بحنان،، وحزن عميق،، واتنهد،، وادعو له عسى أن لا تصدمك حياة يا ولدي،،يصدمك الشيطان إن شاء الله دكين أنا بكرهك يلعن ذاتك زاتو ياخ قومي طيري نومي يا بت تطير عيشتك إن شاء الله
Quote: أثنان يستفيدان من ظلام الليل البهيم، الحرامي ... وأنا (ينفع عنوان بوست) قرأت هذا البوست على مراحل خلال نهاري الطويل المكرر المملل.. حتى وصلت لردود عزاز شامي،، وتساءلت بيني وبين شيطاني اللئيم.. عزاز دي مرة واللا راجل واللا كافي بلا؟؟ الصورة السمحة دي حقتها واللا حقت إعلان واللا حقت جارتها الحليوة قاشرة بيها؟؟؟ فكر مخي بأنها صورة أي داهية ما إلا أن تكون هي نفسها "عزاز شامي" قرأتها المرة الأولى وضحكت وقرأتها المرة الثانية فخرج شئ لا هو ضحكة ولا هو بكاء خشم معوج تنازعني شعوران متناقضان،، أني اعجبت -لا شك- بما كتبت،، وأني – لا محال- انغظت منها،، وتعز عليا نفسي المغرورة بنفسها دوماً أن أخونها – نفسي- فاعترف وأقول أني شعرت بغيرة أنثوية منها.. وها ذا الليل البهيم ازف.. وزفت معه طقوسي الجنونية،، ارمي الجزمة – لامواخذة- هنااااك وانكش شعري فأحس براحة من يمد لسانه لعالم غياظ يحكم دوماً على الأشياء بمظاهرها الخداعة الزائفة اتحدث صراحة،، يفك الليل ساجور لساني فاحق القول واحق المشاعر وأحق الحق وانا هانئة بإطمئناني مرتاحة بتأكدي أن كلام الليل حتماً يمحوه النهار،، امد لساني لعالم ثقيل،، سمج،، يتشدق بلغويات،، كلام عن الدواخل وأشياء من نوع جمال النفس وحقيقة العاطفة وبند الحنان والعشرة وزفت الطين وال.. ميتين.. ثم وعندما تحين ساعة النطق بالحكم،، يحكم بما يرى ،، وبما يرتدى ،، بما يلبس ، بطريقة الكلام تصنعاً كان أو خيال،، يحكم حتى على كيف يؤكل الطعام،، لا ما هو الطعام،، إن شاء الله يكون تركين حتى.. بصراحة وإحقاقاً لحق الليل عليا يا عزاز شامي،، أنا كرهت جمالك لله فالله.. أنا الأنثى بداخلي،، اعترف،، وانا اعلم اني في الصباح حافاجأني واضايقني باعترافي العلني بأني كرهت حنانك.. عذراً إذ لازم اقول،، ينعل جمال كلماتك كرهتينا الحنان يا منقة وأما قبل يعز عليا والنوم يداعبني بشراسة أن افكر،، يدهشني في تلك اللحظة العذبة في بداية النوم أن اكتشف أن عقلي ما زال يعمل ويئن ويلح ويصر ويصرصر يلعن أبوه إن شاء الله يعز عليا أن انط من عز بداية النوم اللذيذ وانا مدهوشة أني حقيقة بصراحة أفكر في بت ناس لا اعرفها أول مرة أقرأها بغيرة وكراهية لجمال تميزها يعز عليا أن أكتشف بعد تشدقي الكثير نهاراً وجعيري وهبوب صوتي في كل من هب ودب عن الرحمة والعدل والمساواة والحق.. والحق اني حقودة لئيم اقوم كمن نام ثمان ساعات كاملات وبنشاط لا اعهده في نفسي وشيطاني الصغير يمازحني بأن هيييييييييييييه سأجوط اللوحة الجميلة هذه،، هييييييييييييه حاشخبط،، كنت أفضل أن اقول كطفل صغير يعشق اللاءات والمعاكسات والممنوعات فتمنعني نفسي الثانية الداعية للحق بأني لا طفل ولا يحزنون،، أنا زول كبير وعوير مسكين مدمر يغالبه نعاس من ناحيه ويشده صحيان آثم ليدمر من ناحية أخرى يا الفكي هاشم،، يا الشيخ البدوي جن رسمي واسمع يا دكين تعال يا ولد نقعدوا ليك أنا قلت صباحاً،، اني اقرأ بتصرف وتصور،، تصورتك معها،، تلك الضايعة التايهة ال.. .. قليلة الأدب الما لقيتها لسة واحتراماً للمصداقية،، كرهتكما معاً،، كرهت أن يعيش أحداً ما في دنيا ما تلك الصورة الدافئة التي رسمت كرهت أن تذكرني بهذا الحلم الجميل بعد أن عشته برجاء وإذ يدمره فجأة كابوس الحياة لازم اصحيك،، واكورك فيك،، اديك بوكس في وشيك الشين ده هذه الأماني العذبة لن تتعدى كونها أماني،، هذا الحلم الجميل المنمنم ،،كطفل برئ،، يجري هنا ،، يلعب هنا ،، ينطط هنا،، اناظره بحنان،، وحزن عميق،، واتنهد،، وادعو له عسى أن لا تصدمك حياة يا ولدي،،يصدمك الشيطان إن شاء الله دكين أنا بكرهك يلعن ذاتك زاتو ياخ قومي طيري نومي يا بت تطير عيشتك إن شاء الله
لا حولااااااااااا ود المرتضى / عماد عبد الله/ خدر / عزاز / بت قضيم .... رفقاً بنا ياأحباب .. إنتو بتكتبوا عشان دكين .... ولًلا عشانا نحنا كلنا؟؟؟؟؟؟ مالكم مصحين الحاجات دي وبتفاصيلها عند الناس ؟؟؟؟ دكين ... أشجعنا وأشجعهم ... على الأقل ... صرخ ... أما البقية الباغية (بالغين وليس بالقاف) ... فقد جنت(بفتح النون) على نفسها... كبراقش ... ... .. أقترح أن يتم إغلاق البوست بالضبة والمفتاح ... وإرساله الى مأواه ... ..
بت قضيم ,,, تاني ما تكتبي إلا في هجعة الليل الظليم وخلي كتابة النهار للمؤلفة قلوبهم ولا يمتلكون حق النت في بيوتهم .. وناموا متوسدين باكر ..
هؤلاء المفلسيّن بيتعاملوا مع صباح أي باكر انو ممكن يجي شايل بخت وبالعدم صبر، و كعادة البخت و الحظ ومن لف لفهم في التفنجط و التغى بيجو زي البوسطة بتاعت الأقاليم .. مكبوب فيها موية أو زيت ماسحة الكلام أو الظرف مفتوح و خلو ليك طابع البريد تذكار ...
ما قاصدة امسخ عليك باكرك الشمسو تسيّح زبدة صدقك بليل ... بس لو مسختو ليك برضو مكسب، و شيطوني بيكون قادل فرحان ... كلنا ذلك الشيطون يا بنية من نور، انت فاكرك روحك هينة؟ انت زاتك بتتكرهي في حنانك زاتو من سماحة كتابة تغيييييييييييظ و حسي كمان جابت ليها صفاء سريرة ... عاد النصيحة كان بقى شعرك ناعم زي دعايات الشامبو ياهو الواطاتك اصبحت و ياهو الكملت و استحكمت حلقاتها و حلت عليك غضبتي يا هناية ...
أما بعد،
كرهك لي أريتو كره السرور يا يمه .. نكشة الشعر محمودة أكان بتطلق خيل الفكر تصل أبواب انفسنا المتلتلة في اغلال حديد ...
عاد جيتيني في جرح في العالم الثقيل المسيخ اللزج اللاصقين احنا في اركانه زي الضبانة الرّاكة في حيطة جالوص في عز الصيف ...
عاد ما بطني طامة طمومية العدو من الدنيا دي و العجب النمل الجاري فيها لابس هدوم و عمم و جلابيات و فساتين و قمصان مشجرة .. و بيطلع في التلفزيون و بيشك اقلام في الجيب الفوقاني ... النمل ده تحديدا بحس بيهو ماشي جوة نخريني و بيطلع دينــ ... حسي نتمها يقولوا (اصو المحس ما ليهم دين زاتو ) و كلام نوع (طبعهم ولا حيشتروه ..) غايتو انا نصيبي من تركة الدين اتنازلت عنو راضية للقائمين على بسط الأمن الشامل و الحادبين من ذوي الدقون المستديرة المستغفرين في النهار و الدّاكين في الليل، و الليل أبو الاسرار ,,, و ايضا تبرعت به للاتي لا يجدن غضاضة في نهش اللحم الحي و ايديهن تجر الطرحة تخنق شعرتين تلاتة مارقات للهوا و الشمس ...
العالم ده يا بتي لا بيحكم لا سجم رماد ... ماشي على الـ autopilot على قولة الفرنجة و المتنطعين ...
امبارح القريبات دي كنت في حديث مطول معاي و اتفقنا (انا) و (انا) انو العالم دي جنت خلاص وانو لا فايدة ترجي من محاولة فهم اسباب حكمهم أو عدمه .. (مافيش فايدة) على قولة سعد زغلول الله يرحمه و يبشبش الطوبة اللي تحت دماغه ...
انا تعبت من السؤال و محاولة الفهم لتصرفات ناس راكبة فيل هندي كبير و ما دايرة تنزل تقعد معانا في الواطة ... ما تفتكري انا ما حاولت اتفاهم معاهم ... حاولت و جيت شالة جثة العشم في كتفي تنزف ندم ...
وبصورة اكثر وضوحا ... محاولاتي اليائسة للتفاهم كانت اشبه بمحاولة شرح الديالكتيك لرضيع .. حيسمعني للآخر و ما حايقاطعني بس في النهاية حيقول لي (هيييغ هيييغ اغا اغه ... نيييي ) نفس الرد الكان ممكن يقولوا لأي عوير تاني بيلعبهو و يطيرو في الهوا ..
ده قمة الاحباط .. مش دكين اللي بيقول ما لاقي عروس ...
Quote: وبصورة اكثر وضوحا ... محاولاتي اليائسة للتفاهم كانت اشبه بمحاولة شرح الديالكتيك لرضيع .. حيسمعني للآخر و ما حايقاطعني بس في النهاية حيقول لي (هيييغ هيييغ اغا اغه ... نيييي ) نفس الرد الكان ممكن يقولوا لأي عوير تاني بيلعبهو و يطيرو في الهوا .. ده قمة الاحباط .. مش دكين اللي بيقول ما لاقي عروس ... سنا يا أنا .. خلاص جاي مجدد للدعوة انت و حتم الما عملو نيوتن ... ياخي عرس من طرف ,,, انت بتهددنا ولا بتهدد الطرف ولا بتهدد العروس ولا بتهدد بت خيالك دي؟ الناس دي كلها عرست من طرف بشكل أو بآخر و جابت شفع و صبيان و بنات حتعرس هي كمان من طرف بشكل أو بآخر .. فرقك شنو؟ ابن سبعة؟ ولا طرفك على راسه ريشة؟ كلللللللللنا قاعدين في كنبة الاحتياطي راجين المدرب يكورك (نمرة 12) نجي ناطين نخش الملعب نشوت الكورة .. يا خشت جون .. يا قالو عليك مجنون ...!!
وههنا تبدو قضية,,,, وما أكثرهن بنات أفكارك,,,,,يا دكين,,, وعزاز قطعت قول كل خطيب,, وايضا يبدو أن عندها الخبر اليقين,, صدقنى أحسن حاجة تتقال هنا,,بعد الروشتة الفوق دى,, (No Comments) (...................................) يعنى أكل نارك يا مان,, الكلام كمل يا صاحبى,,
نشوفك بعد ما تعرس حا تعمل شنو !!!!!!!!! عامل كرعينك الإتنين شمال ديل,,,
لا وثقة ثقة عظيمة لهجة إنذار قائد نبيل يتواضع للعالمين يتنازل بأنه رغم القدرة على إبادة الشعب الكريم،، هناك نبل مقيم،، وهذا هو (النداء الأخير) ،، أن أخير ليك،، أحسن ليييييييييييييييييييك،، أن تضيع الفرصة العظيمة التي لو أمك كانت راضية عليك،، وادتك قدوم يوم حضورك للدنيا تتنهدين وتسكلبين،، سيقسمني الله لك ،، سأكون من نصيبك يا انتي أبشر يا ولد أيويويويويويويويو جيد لامك يا هناية ثقة كمساري وهو ينادي .... (درمان درمان درمان درمان ..) فلو لو لم يمتطي الراكب صهوة جواد الحافلة الجميل فسلن يمشي امدرمان. شفتي كيف؟؟!!! وفوق ده كلو يا دي يا ثغيلة تصدقي!! طلع النهار ورغم أن شهرزاد سكتت عن الكلام المباح !! رغم اني لبست الجزمة،، ما زلت أكره حنانك.. لسه تنكرهي يا دي ووحات الشيخ هاني كان تردي علي.. ماش اتسمم اتغدا
الايام دي شابكة فيني "صباحك مالو واحبابك جفوني ومالو ياليل" "شوف صاحبك فقد راسو مالو ..لا بعرف يمين لاشمالو ياليل" بدندن بيها مع المختارين..
قتالي اول ابريل؟؟
Post: #88 Title: Re: النداء الاخـير Author: محمد المرتضى حامد Date: 02-04-2009, 02:55 AM Parent: #82
Quote: يامحمد ان القناعة بالمقسوم رضىً ونعمة..
ليه يا دكين؟ قناعة شنو ومقسوم شنو في الحب يا دكين ؟ ياخ كان جاتك رصاصة طايشه معليش بنآمن بالقدر، أو ضرب خيمتكم نيزك نقول قسمتك ولو وزّعوا ليك ورق مِدَبِّل نسميهو حظّك ، لكن زولتك كان ما عرستها دي ما تبقى قسمه ، ده إهمال وتقصير مع سبق الإنهيار والتخثر ، أوعا تسمع كلام القسمه والنصيب والروليت الروسي إذا ما كان الحديث في العشق ، يا دكين إسع في الأرض وابحث عن ليلاك زهرة الليلاك تلك وما تخليها لراجل زيَّك وخليني من سالفة القدر وقصة انت لوداير بكاي ألف أهلاً بي خشوع ، ياخ المولى قال لمريم هُزي إليك بجزع النخلة في الوقت اللي كان ممكن يردم القنديله والرُطَب جنبها من الأرض للسِماك الأعلى ، لكنه استحثها أن تبذل جهدا معقولا، جل جلاله أنبت ليونس شجرة اليقطين شفاءا وهو الذي لو أراد له الشفاء قبل أن يرتد إليه طرفه إنت براك عارف البسويهو، ما قال ليهو يا يونس عد لنينوى وانتظر مراهِم أسترا زينيكا و فايتزر ، لاترضى بأنصاف الحلول والتسويات في الحب ياالعزيز، ما تتنازل عن زولك سجيلك ، كدا بتخون البينك وبينو والبينك وبينك ، دي خيانة الخليل المابتشبهك وخلّت خدر يخلخلك بي هوى الخلخال . يا دكين أنا معاك تتنازل في المال لأنو قليلو رايح وكتيرو رايح لكن الكرامة والحب ما فيهم قصة (تِلتو ولا كتِلتو) ، الحب يا كلُّو يا كتِلتو ، أوعا تعرس ( من طرف) ، قَسَماً عَظَماً تتنازل قيراط من زولك القيراط دا يزيد كل ليله حتى يتعملق ويتفرع كالهايدرا ويغدو قارة من الأسى ، ستُثقل بقية حياتك أطنان الفجيعة ياولدي وتنطوي في قلبك حسرة ألف ميجاواط . دور الكومبارس دا في السينما والمسرح بس ، أوعا تلعبو في القلب يا دكين ، كن رمزا للمصطفِّين خلفك ودعهم يهتفون بالطول بالعرض دكينا يؤدي الفرض ، فرض الجهاد وأي جهاد غيرهن تريد؟ مُش قلنا لنا الصدر دون العالمين أو القبر حتى كدنا نناديك دكين بني صدر؟ ألم تهتف معنا في سابق العهود : بالروح بالدم نفديك يا ... أحيييييا؟ ما تشمِّت الناس عليّا أم أنك صبأت يا هذا؟ كدي نرجع شويه ليومية التحري ، مش قلت ليها : يا حبيبي عشت لي وعشت ليك هاك عهدي يا ست الريد ولم تترك كونتراتو وإلا قمت بتوقيعه وبصمت عليه بقلبك خليه خليه فتمددت فيه من الأذين إلى البطين؟ أها بتودي وشّك وين من العهود دي؟ افتدي حبك بالصمود واستعن على مرارة الصبر بالوخز بالإبر واليوجا والصدقات وفي رواية أخرى بالإيروفيد وآخر العلاج الكي ، القال ليك الرضا بالمقسوم نعمه غشّاك والعلَّمك ظلمك ظلمك ، تقعد باقي عمرك كلو وفي قلبك حاجه زي السريحه في الجِلِد وشعور كدا زي بذرة جوافه بين ضروسك ، تحس حجابك الحاجز يلطِّش في قلبك طالع نازل ، يجيبو سيرتا يجيك إحساس زي لماالطياره تهبط ألف قدم فجأة ومن الوحيح ما تستريح ، صدقني باقي عمرك كلو تتنخَّج مباري القيف زي ما بقول العارف بالحب عماد عبدالله رضي العشق عنه . أنا طوَّلت عليك ودا ما لوم لكنه العشم وبذل النصح قبل الغد للحؤول دون احتمالات النكوص والإرتخاء لأني سمعتك بتقول تعرس من طرف، حذاري يا دكين فالعرس من طرف عمل ثلاثي الإبادة ، يميتك ويميت الرفيق ويفني المسكينه العرستها من طرف التي تظل بقية العمر تلعب دور الدوبلير وتترى زفراتها حرَّى كلما دندَنتَ في حضورها ككولونيل ماركيز في عزلته الأخيرة ( جدله مملوخه وفي معالق الجوف موسو مجلوخه). معليش ، عارفك موجوع ومتَّفِق معاك إنو الحب الحقيقي أن تحب الشخص الوحيد القادر على أن يجعلك تعيسا زي ما بقولوا ، وأهو إنت ماشاء الله تبارك الله مهرجان من التعاسة يحتشد بؤسا ويقطِّر فجيعة ، عسل يا دكين وشهد ، يشهد الله ،عيني عليك بارده، ربنا يغتِّيك ، حالتك لا يُلقَّاها إلا ذو حظ دكين ، بس رجائي يا دكين ما تخذل دكين.
Quote: قَسَماً عَظَماً تتنازل قيراط من زولك القيراط دا يزيد كل ليله حتى يتعملق ويتفرع كالهايدرا ويغدو قارة من الأسى ، ستُثقل بقية حياتك أطنان الفجيعة ياولدي وتنطوي في قلبك حسرة ألف ميجاواط .
سلامات يا أبوأيمن,,, وكيفنو هو أيمن,,, لقد قسوت على دكينا قسوة ما بعدها قسوة,, فقد وضعت يدك على مكان الألم وموضع الجرح والشرخ!!!! وفى الحقيقة أن الكولونيل لم يجد من يكاتبه فى النهاية تقتله الوحدة حيناوإنفضاض السٌمّار أحيانا أُخر,,
Quote: أنا طوَّلت عليك ودا ما لوم لكنه العشم وبذل النصح قبل الغد للحؤول دون احتمالات النكوص والإرتخاء لأني سمعتك بتقول تعرس من طرف، حذاري يا دكين فالعرس من طرف عمل ثلاثي الإبادة ، يميتك ويميت الرفيق ويفني المسكينه العرستها من طرف التي تظل بقية العمر تلعب دور الدوبلير وتترى زفراتها حرَّى كلما دندَنتَ في حضورها ككولونيل ماركيز في عزلته الأخيرة ( جدله مملوخه وفي معالق الجوف موسو مجلوخه). معليش ، عارفك موجوع ومتَّفِق معاك إنو الحب الحقيقي أن تحب الشخص الوحيد القادر على أن يجعلك تعيسا زي ما بقولوا ، وأهو إنت ماشاء الله تبارك الله مهرجان من التعاسة يحتشد بؤسا ويقطِّر فجيعة ، عسل يا دكين وشهد ، يشهد الله ،عيني عليك بارده، ربنا يغتِّيك ، حالتك لا يُلقَّاها إلا ذو حظ دكين ، بس رجائي يا دكين ما تخذل دكين.
وبعدين دكين دا من طرف دى عندو معناهاغزوات جديدة و حسان من نسج خياله يتمنى ويحلم أن يتقافزن يوما أمامه ليشير لإحداهن أن تتبعه!!! لكن الجبناء يموتون آلاف المرات والشجعان يموتون مرة واحدة وأن تعيش ملازما خوفك ورعبك خير منه أن تذهب إلى معركتك جريا وكتلوك ولاجوك جوك,,,, ,,,,,,,,,,(فى حالة الرجفى الشديد زى صاحبنا دا),,,,,,,,,,,,,,,,,,,, صاحبك دا خياراتة ضاقت ضيق ما بعدو ضيق,,,وحين يقلب دفاتره القديمة كثيرا ما يجد العدد فى نقصان وعجلة الزمان تفعل فعلها بتلك الدفاتر التى إهترأت وأكلت أطرافها العتّة!!!!وأصبح معظمها بعض من تأريخ ما زال صاحبكم يستدعيه ليلا ليوانس عليه وحدته ,,,, والدوبليرات أحيانا قد يكونوا أكبر موهبة من الأصل,,,, وأين هم الدوبليرات فى الأساس؟؟؟؟؟؟؟؟ وهو كان لقى دوبلير كان جا يكورك هنا ويصرخ وينادى نداءه الأخير أو كما قال؟؟؟ ودا كلو من دوحة العُرب دى,,, ففيها تضيق خيارات المرء ويقابلها إرتفاع كل مؤشرات الإرهاق الإنسانى ,,,,,,,,
الأستاذ دكين 34 بس ..بدري عليك لسه ما طعنت ... سيف اليزل أبوصلعة أكبر منك بكتير ولسه حردان.
نصيحة لله: أقع السودانيات مواليد الدوحة : سمحات متعلمات مؤدبات وينطبق عليهن شرط الالتحاق بالعمل ( يتطلب الالتحاق بالعمل للمقيمين/ات أن يكون/تكون من مواليد الدوحة)
Post: #92 Title: Re: النداء الاخـير Author: أحمد الشايقي Date: 02-04-2009, 07:50 AM Parent: #90
Quote: ليه يا دكين؟ قناعة شنو ومقسوم شنو في الحب يا دكين ؟
Quote: نصيحة لله: أقع السودانيات مواليد الدوحة : سمحات متعلمات مؤدبات وينطبق عليهن شرط الالتحاق بالعمل ( يتطلب الالتحاق بالعمل للمقيمين/ات أن يكون/تكون من مواليد الدوحة)
بس المشكلة بتكون حاجز اللغة!!!!!!!!!!!!! دكين دا لما يتكلم عربى بكون برضو بالرطانة والرندوك!!!!!!! دعك من عامل الخلفيات والموروث الثقافى ,,, بالنسبة لمواليد خارج الحدود ومدن الشتات (إلا من رحم ربى(*))
يا عم جعفر ياخ قال ليك (شقوبا العتامير)
_______________________________________________________________________ هيثم أبوالقاسم وصالح أصيل وخالد حسن يقرءونك السلام وكل أهل طوكيوويوكوهاما...
بنن الحبيب أيمن يا ســلام عليك ياخ .. جبت لي الأحباب ديل في فيلم واحد.. بالله بلغهم تحياتي وتحيات ناس طوكيو وقول لهيثم فريق الأسود فاقدك شديد.. خالد ده جا تمرين واحد وبعداك طفش... قول ليهم مشتاقين كتـــــــــير.
قـول لدكين : اللغة ما مشكلة.. مع قليل من البصارة الأمور بتمشي.
Quote: قـول لدكين : اللغة ما مشكلة.. مع قليل من البصارة الأمور بتمشي.
المشكلة بتبقى فى بت الناس!!!!!!!تفهمو كيفن رندوكو دا !!!هو ما عندو عوجة الراجل Multiligual ويتحدث عدة لغات ولهجات,,,
Quote: يا ســلام عليك ياخ .. جبت لي الأحباب ديل في فيلم واحد.. بالله بلغهم تحياتي وتحيات ناس طوكيو وقول لهيثم فريق الأسود فاقدك شديد.. خالد ده جا تمرين واحد وبعداك طفش... قول ليهم مشتاقين كتـــــــــير.
هيثم ماشاء الله عليهو مواصل بشدّة أما صاحبك خلدونا صاحبك عزموهو تمرين وافق ولما الجماعة مشو النادى وضربو ليهو تلفون قال ليهم يا جماعة إنتو جنيتو كورة شنو فى الصقط دا,,,,,يعنى لحد هسه طافش,,,
Quote: ليه يا دكين؟ قناعة شنو ومقسوم شنو في الحب يا دكين ؟ ياخ كان جاتك رصاصة طايشه معليش بنآمن بالقدر، أو ضرب خيمتكم نيزك نقول قسمتك ولو وزّعوا ليك ورق مِدَبِّل نسميهو حظّك ، لكن زولتك كان ما عرستها دي ما تبقى قسمه ، ده إهمال وتقصير مع سبق الإنهيار والتخثر ، أوعا تسمع كلام القسمه والنصيب والروليت الروسي إذا ما كان الحديث في العشق ، يا دكين إسع في الأرض وابحث عن ليلاك زهرة الليلاك تلك وما تخليها لراجل زيَّك وخليني من سالفة القدر وقصة انت لوداير بكاي ألف أهلاً بي خشوع ، ياخ المولى قال لمريم هُزي إليك بجزع النخلة في الوقت اللي كان ممكن يردم القنديله والرُطَب جنبها من الأرض للسِماك الأعلى ، لكنه استحثها أن تبذل جهدا معقولا، جل جلاله أنبت ليونس شجرة اليقطين شفاءا وهو الذي لو أراد له الشفاء قبل أن يرتد إليه طرفه إنت براك عارف البسويهو، ما قال ليهو يا يونس عد لنينوى وانتظر مراهِم أسترا زينيكا و فايتزر ، لاترضى بأنصاف الحلول والتسويات في الحب ياالعزيز، ما تتنازل عن زولك سجيلك ، كدا بتخون البينك وبينو والبينك وبينك ، دي خيانة الخليل المابتشبهك وخلّت خدر يخلخلك بي هوى الخلخال . يا دكين أنا معاك تتنازل في المال لأنو قليلو رايح وكتيرو رايح لكن الكرامة والحب ما فيهم قصة (تِلتو ولا كتِلتو) ، الحب يا كلُّو يا كتِلتو ، أوعا تعرس ( من طرف) ، قَسَماً عَظَماً تتنازل قيراط من زولك القيراط دا يزيد كل ليله حتى يتعملق ويتفرع كالهايدرا ويغدو قارة من الأسى ، ستُثقل بقية حياتك أطنان الفجيعة ياولدي وتنطوي في قلبك حسرة ألف ميجاواط . دور الكومبارس دا في السينما والمسرح بس ، أوعا تلعبو في القلب يا دكين ، كن رمزا للمصطفِّين خلفك ودعهم يهتفون بالطول بالعرض دكينا يؤدي الفرض ، فرض الجهاد وأي جهاد غيرهن تريد؟ مُش قلنا لنا الصدر دون العالمين أو القبر حتى كدنا نناديك دكين بني صدر؟ ألم تهتف معنا في سابق العهود : بالروح بالدم نفديك يا ... أحيييييا؟ ما تشمِّت الناس عليّا أم أنك صبأت يا هذا؟ كدي نرجع شويه ليومية التحري ، مش قلت ليها : يا حبيبي عشت لي وعشت ليك هاك عهدي يا ست الريد ولم تترك كونتراتو وإلا قمت بتوقيعه وبصمت عليه بقلبك خليه خليه فتمددت فيه من الأذين إلى البطين؟ أها بتودي وشّك وين من العهود دي؟ افتدي حبك بالصمود واستعن على مرارة الصبر بالوخز بالإبر واليوجا والصدقات وفي رواية أخرى بالإيروفيد وآخر العلاج الكي ، القال ليك الرضا بالمقسوم نعمه غشّاك والعلَّمك ظلمك ظلمك ، تقعد باقي عمرك كلو وفي قلبك حاجه زي السريحه في الجِلِد وشعور كدا زي بذرة جوافه بين ضروسك ، تحس حجابك الحاجز يلطِّش في قلبك طالع نازل ، يجيبو سيرتا يجيك إحساس زي لماالطياره تهبط ألف قدم فجأة ومن الوحيح ما تستريح ، صدقني باقي عمرك كلو تتنخَّج مباري القيف زي ما بقول العارف بالحب عماد عبدالله رضي العشق عنه . أنا طوَّلت عليك ودا ما لوم لكنه العشم وبذل النصح قبل الغد للحؤول دون احتمالات النكوص والإرتخاء لأني سمعتك بتقول تعرس من طرف، حذاري يا دكين فالعرس من طرف عمل ثلاثي الإبادة ، يميتك ويميت الرفيق ويفني المسكينه العرستها من طرف التي تظل بقية العمر تلعب دور الدوبلير وتترى زفراتها حرَّى كلما دندَنتَ في حضورها ككولونيل ماركيز في عزلته الأخيرة ( جدله مملوخه وفي معالق الجوف موسو مجلوخه). معليش ، عارفك موجوع ومتَّفِق معاك إنو الحب الحقيقي أن تحب الشخص الوحيد القادر على أن يجعلك تعيسا زي ما بقولوا ، وأهو إنت ماشاء الله تبارك الله مهرجان من التعاسة يحتشد بؤسا ويقطِّر فجيعة ، عسل يا دكين وشهد ، يشهد الله ،عيني عليك بارده، ربنا يغتِّيك ، حالتك لا يُلقَّاها إلا ذو حظ دكين ، بس رجائي يا دكين ما تخذل دكين.
لعلها دعوة لنا لمراجعة هيبس من دفاتر المواجع والجراحات
مولانا أحمد الشايقي، أريتك تبقى طيب انت أنا البي كُلُّو هيِّن،
يا العزيز واحد اسمو جون برادشو عندو كتاب سمح بعنوان Creating Love الزول ده قال: I learned that love cannot happen unless I am willing to commit myself ) To making it happen. And I learned that love is a process that requires hard work and courage) ورغم إعتقادي أن هناك حبا يأتي كإعصار جونو الذي لاتجدي معه المتاريس والحواجز وأكياس الرمل لحماية الشرايين إلا أن في كلام الزول الفوق دا بعض من المعقوليه فالريده كنباتات الظل الجميلة تحتاج الرعاية والموالاة بالسقيا والمخصبات وماتخليها 24 ساعه في القلاّيه والهجير اللافح أو الزمهرير البيشقق الرجلين داك. الهارد ويرك مطلوب يا بَرَكه، الشجاعه والرعايه ضرورية يا أبوحميد، أما زمرة الإتكاليين الماخدين الموضوع فورقرانتد ديل فمستقبلهم حائط المبكى مع أغاني الرائع هاشم ميرغني ، استريو. بالله ما تغيب
Post: #99 Title: Re: النداء الاخـير Author: انعام عبد الحفيظ Date: 02-04-2009, 10:40 PM Parent: #98
Quote: فالريده كنباتات الظل الجميلة تحتاج الرعاية والموالاة بالسقيا والمخصبات وماتخليها 24 ساعه في القلاّيه والهجير اللافح أو الزمهرير البيشقق الرجلين داك. الهارد ويرك مطلوب يا بَرَكه، الشجاعه والرعايه ضرورية يا أبوحميد، أما زمرة الإتكاليين الماخدين الموضوع فورقرانتد ديل فمستقبلهم حائط المبكى مع أغاني الرائع هاشم ميرغني ، استريو.
غايتو يا دكين مرقت لينا بالبوست دا درر من الناس ديل
Post: #101 Title: Re: النداء الاخـير Author: محمد المرتضى حامد Date: 02-05-2009, 10:39 AM Parent: #100
Quote: لقد قسوت على دكينا قسوة ما بعدها قسوة,, فقد وضعت يدك على مكان الألم وموضع الجرح والشرخ!!!!
بالعكس يا أيمن، تجاه دكين لم أفعل سوى ترديد مقولة ودالرضي ( لاتزيد بلبالي ولا تكون شكواي مويه في غربالِ)، دكين يا أيمن كلامي القلتو دا كلو شاربو شراب وهو رجل ذو إرادة ماسية يرفض مقولة شكسبيـــر بأن يهمس عندما يتحدث عن الحب وتخطى محطة أبوصلاح في رواية أخفي ريدتك مره وأجهرا منحازا إلى خط الجهر المستمر و مبدأ الشفافية بتاع قريبنا قيس بن الملوح (اللهم زدني ليلى حبا و بها كلَفاً ولا تُنسني ذكرها أبداً ) بس هو عملا في شكل نداء بمضمون تهديدي زعم أنه الأخييير، تخيَل ، يادوب حفر الساس وداير يسقف على كدا. ياأيمن دكين دا يمتلك مهارات فرديه عاليه في المناورات الجويه وشغل الأكروبات وأنا زول غشيم مرات مرات بحس إنوالبوست بتاعو دا تكتيك تحليق منخفض مع إطلاق بالونات حراريــة من خلالــها يكتشف مواقع المضادات الأرضيه وشبكات الرادار ليتبع ذلك بتحليــق شــاهق يتيح له تحديــد أهدافه بدقة لتبدأ الألعاب الناريه، بس أنا خايف عليهو من الباتريوت. وكلام الناس .
Post: #102 Title: Re: النداء الاخـير Author: ibrahim kojan Date: 02-05-2009, 11:35 AM Parent: #101
Quote: وأجهرا منحازا إلى خط الجهر المستمر و مبدأ الشفافية بتاع قريبنا قيس بن الملوح (اللهم زدني ليلى حبا و بها كلَفاً ولا تُنسني ذكرها أبداً )
وتحدث بعيني رسام مجنون .. وقال قولا علي ذاكرته منحوت..
قال (أظن أن بريقها قد خفت... بريقها خفت ..) فخفت ذلك اليوم علي ام اللغة من بهائه ومن عيني عماد التي تري ما لا نري ولله عليك الحمد يا خالق العباد
Quote: بالعكس يا أيمن، تجاه دكين لم أفعل سوى ترديد مقولة ودالرضي ( لاتزيد بلبالي ولا تكون شكواي مويه في غربالِ)، دكين يا أيمن كلامي القلتو دا كلو شاربو شراب وهو رجل ذو إرادة ماسية يرفض مقولة شكسبيـــر بأن يهمس عندما يتحدث عن الحب وتخطى محطة أبوصلاح في رواية أخفي ريدتك مره وأجهرا منحازا إلى خط الجهر المستمر و مبدأ الشفافية بتاع قريبنا قيس بن الملوح (اللهم زدني ليلى حبا و بها كلَفاً ولا تُنسني ذكرها أبداً ) بس هو عملا في شكل نداء بمضمون تهديدي زعم أنه الأخييير، تخيَل ، يادوب حفر الساس وداير يسقف على كدا.
لهذ نحن نحب قلمك ويبدو واضحا أن بعضا من تكتيكات دكين الوغد لم تنطلى عليكم بحسب ما خبرتموه عنه مسبقا ولكن,,,
Quote: ياأيمن دكين دا يمتلك مهارات فرديه عاليه في المناورات الجويه وشغل الأكروبات وأنا زول غشيم مرات مرات بحس إنوالبوست بتاعو دا تكتيك تحليق منخفض مع إطلاق بالونات حراريــة من خلالــها يكتشف مواقع المضادات الأرضيه وشبكات الرادار ليتبع ذلك بتحليــق شــاهق يتيح له تحديــد أهدافه بدقة لتبدأ الألعاب الناريه، بس أنا خايف عليهو من الباتريوت. وكلام الناس .
يا مولانا مع كامل إحترامى لرأيك وتحليلك لكن دعنى أختلف معك قليلا,,,,, زولكم دا رقد القش المرة دى,,وراح ليهو الدرب فى الموية وهو عارف إنو مسّاك دربين ضهبان ضهبان ,,,الباتريوتس كما ذكرت إن مرقت ما بترجع لكن صاحبك دا جرى جرى الجن ولماإتلفت وجد لا أحد يطارده!!!!!وأيضا قد تشتم رائحة المكيدة فى هذا النداء لكنه بعض من خبث الرّطانة ولا يود صاحبنا إعلان الإنكسار والإستسلام للمصير المحتوم وهو لولا (الرجفى) لعرف أن مصيره جميل مثله,,
زولك دا أدخلناه بالونة إختبار صغيرة الفيهو كلها جات مارقة,,,, شى عمى ألوان وشى طششان والنوع البجلى الكورة واقفة زاااااتو,,, تقول لى تكتيك!!!!!!
تكتيك دا كان زمان وصاحبنا لم يبقى له من المؤونة والذخائر غير طلقات الصوت السامعنو بيضرب فيهن ديل,,ليطلقهن فى الهواء الطلق وبعدها أحسن تجى منو عديل كدا ويرفع راياتو البيضاء ويعلن إستسلامه غير المشروط البتة,,,
ازيك وازاي الرياض يا حبوب ماظنيت يوم انا ممكن احن لي الرياض بس تخيل بتحن.. تحن لي طريق الملك فهد والملز وبر الديوان الملكي وسوق الخضار في عتيقة ..الجموس ونهارها الصاخب الصيخود..
نجد وطريق الحجاز والجبال عند عرفة واطراف جدة .. ليكم وحشة ياشباب وكم سرتني ابياتك المنتقاة..
انا من صابر من 1998 على هذا الانتظار .. انا من ترقب القدوم.. راقب الاسواق وسعاها في الشوارع والمحطات وبيوت الاصدقاء والمغاني والبنات الساي.. انا الذي حرق الحشاشة في هواها .. فلا هوىً اصبتُ ولاحشاشتي بردت..
والذي خلقها ثم اخفاهايامرتضى انا ماقصرت تب .. ان المثال الذي تفتقده ليس موجودا يامحب.. فلا تجعلني رهن مثال لن ياتي.. اتحب ان ترى اخيك ضحية هذا المثال الغايب؟؟ اتود ان تراني في ارزل العمر بلا انيس؟ انما الدبار في الولف والايناس.. خش من طرف ثم وانسها وتالف..واسعى فيهامن بعد ذلك بالمعروف وبالمودة ..
صحي زي ماقتاانتا مافي اجمل من زولك لامن تلقاهو.. بس ان زولك طاشي في برليون نسمة تناديها بي ياتو نداء.. تلاقيها وين في دنيا في دنيا فيها ترليون شارع وزقاق..
انا اخوكم دكين ولست نبيا.. انما ارى في دايرة نصف قطرها مترين تلاتة ولايتنزل على وحي من سماء.. فماتعملو مني ماسعيتم لان تكونوا..
بعدين انتا يامرتضى قايني ارجل زول في الدنيا دي ارجل زول زمان اخدها ثم اولدها عيالا ثم استكان..
اقعد انا اباري الكواريك الى متى؟؟ الى متى يامرتضى؟؟
اسمعوا ياخوانا هوي البوست ده انسو موضوعو خلاص.. كل زول يبكي ليلاه في ليلتو براهو وبي طريقتو براهو..
انا قد كفاني مابكيت..
Post: #106 Title: Re: النداؤ الاخير Author: ibrahim kojan Date: 02-06-2009, 10:51 AM Parent: #104
كتب الولد الكتاب وهو يقنع من الغنيمة بالأياب وب الثقاب عندما إنحدرت خياراته قائلآ :
Quote: وبحسابات قلة الصبر عند البنات والرواشة التي دوما صاحبت خياراتهن فلم يعد يهمني ان كنتي طليقة احدهم.. فصبركُـن قليلٌ وحنانكُـن غشامة .. وربما نفد الصبرَ منك في انتظارك الطويل لود الحلال .. وتغشتكِ غاشيةٌ من حنانٍ فطمست بصيرتكِ فتشابهَ الاحبابُ عندك....فوقعَ عليكِ غيري، فوطأ نصيباً من قسمتي.. اها انا ماني زعلان من القصة دي لو حصلت..وقبلانبَها.. بالعربي كده (مع انو الفوق ده اظنو عربي) ماعندي اشكالية لو هسي مطلقة وقاعدة فمن المؤكد انه تم الولوغ في ريقك بخطا دنيوي وشفقة بني ادمين..
غايتو بما تواتر لنا من انباء ووصلنا من معلومات مقرؤوة مع كتابة تلك التي نفضت يدها من خيرآ فيك و مع شكوك تلك التي لاحظت مرقاتك الخلوية مع الأمثال ف احذرك من المطلقة لأنها ستطفق تقارن بينك وبين ما قد سلف وانا ما بقبل ليك الخسارة لما بيننا من ملح وملاح وتواطؤ وبعض التحرشات
بتنفضح يا صاحب
ثم إحتمال وخيار المطلقة سيجر معه بالضرورة والتداعي والإفتراض والحساب سيجر معه إحتمال إنها لم تتطلق بعد ولا غشاها موسم فك تسجيلات ومازالت ضمن المطايا فماذا انت فاعل بازاء تلك الحالة
ماتقول لي الشراكة الذكية دي انا مكجنها في الصحافة وحكومة الشريكين
Quote: ثم إحتمال وخيار المطلقة سيجر معه بالضرورة والتداعي والإفتراض والحساب سيجر معه إحتمال إنها لم تتطلق بعد ولا غشاها موسم فك تسجيلات ومازالت ضمن المطايا فماذا انت فاعل بازاء تلك الحالة
ماتقول لي الشراكة الذكية
ياصاحبنا بركات..
مؤخرا فعلا لقيت انو البت دي قد تكون متزوجة وغير مطلقة .. وقد لا تتطلق اصلا..
القصة بصراحة استحمت والخيارات وسعت..
اخوم يا صاحب لايؤؤمن بالشراكة الذكية بتاعتك دي.. ولا امدن عيني إلى ما تمتع به غيري زينة الحياة الدنيا ..
على مافيني من علات ووغدنة اتعلمتها منك بس الشي الوحيد المااخدتو منك تفكيرك فيما يخص الشراكة الذكية دي..
بالمناسبة الخيارات قد تزيد وتصل بالاضافة الى البت الفتاة المطلقة وغير المطلقة والارملة ..والتي مات زوجها في حرب ضروس..
يعني بصراحة اخير اعرس من طرف طالما خياراتي وسعت الدنيا ومن فيها..
Quote: واكورك فيك،، اديك بوكس في وشيك الشين ده هذه الأماني العذبة لن تتعدى كونها أماني،، هذا الحلم الجميل المنمنم ،،كطفل برئ،، يجري هنا ،، يلعب هنا ،، ينطط هنا،، اناظره بحنان،، وحزن عميق،، واتنهد،، وادعو له عسى أن لا تصدمك حياة يا ولدي،،يصدمك الشيطان إن شاء الله
للاسف كلامك ده نجيض وصاح مجرد امنيات.. مافي شي اسمو الانتا دايرو في شي اسمو (انا التي اقنعك بماعندي)
يا دكين، باكتب ليك بيد مبلولة ، كعادة جمعاتي هنا، مخضبة بالعجين و التركين و برعاية شريط عرس ما يحمل وجوهنا شاخت بعيداً عنا المرة دي حضرنا حنة ود اختي، تخيل ما عرفت زول؟ امشي اجي أقول حسي بفرز لي وش ولا وشين، ولا حتى ملاية و لا توب كافي البلا غلبني ! الصغار كبروا و شالوا ملامح المدينة و الهرتوم و الكبار لفتهم عجاجة غربة في وطن و بقوا نسخة من بعض و انا النسخة الأصلية دي ما بعرفها، يا حليلهم .. تاهو مني زي ما تاه منهم درب بيوت الطين و شالهم سيل السد ... فاعفي لي لو سقط حرف بيجاي ولا فقدت نقطة بيجاي ولا بيجاي... عجزنا يا دكين و بقينا متكين عل الحرف نوصل فهم كان بيصل براهو بدربو عاد الفهم فاقد ليهو زول الايامات دي، بس تقول شنو ...
ايامنا مواسم كما هو حال الأرض يا صاحب صيف فخريف فشتاء ... فزهر و ربيع و الآن هناك فصل جديد طاغ: فصل الضرورة
نمر بخريف يغسل أوراقنا عنا، يسقط عنا ما شاخ من شخوص و ذكريات و ألم ظننا اننا وارثيه خريف زي حمام الشتا، بااااااااااااااااااااااااااارد في أوله بس أخرتو دفا و نعس لذيذ انا وصلت النعس ده ... وعديت البرد و طقطقة الاسنان و لعن الموية و السخّان و مد كراع و تأخير التانية ولمس الموية بالنخرين ... دردلوب، وقعنا ما عاينا ورانا و اتلقينا السقط غير هيابين، هييييع و قربنا نعرض و سوط الموية يجلدنا جلد ... وبعاين حسي في الموية الجارية شايلة بعض مني ... وكل يوم الموية بتروق أكتر، أكتر، أكتر ...
و بيدخلنا الشتا، بيلمنا في بعضنا لو كنا دفا، لو ما دفا، سبحان خالق قانون الشتا البعيد، نتنافر زي شرارة الحطب نرك مسافات من بعض ونترك أثر قدر النقطة (.) بس بحررررررق حرق! وبيعدي الشتا، كان في حضن كان في بطانية من شوك، بيعدينا، و بمرق بدربه تصحبه الغيوم
وفي الربيع بينبت جلد جديد، و تتفتح مواسم زهر، و بترجع طيور ترك على اغصان شققها الشتا وفي أوان اكتمال الفرح بيدخلنا صيف، ياهو حلو بحلاوة summer love و الطيش و الرعونة السابقة للجرح الوشيك، الجرح مرادف كونك تكون غض، جذل، مآمن و متعشم في الدنيا خير ... بيسخنا في فرن يمرقنا منفوخين زي العيش نقرمش من برة و هشين من جوة، و الهشاشة هي نكهة الانسان يا دكين ... يااااااه يا حليل الزمن، شال أخضرنا و تركنا لينا اليباس، نتلفت نعاين تحتنا نخاف الحفر تجينا الضربة من السما الضمناها و اديناها الأمان ...
و نرجع ندور، لخريف لشتا لربيع لصيف ... لغاية ما تدخل فصل الضرورة و تتحكم في الشمس الجواك ...
وعليه، و عطفا على ما قد قلنا و ما قد كان ،
وحاة غلاوة شاي المغرب و عيون بخيتة و ضحكات الحجة، وانت تعرف تماما معزة كل ما سبق ذكره، لا شككت يوم لا ساورني ظن في معزة وقرت في القلب بس بقينا في نوع العشم وكتين يموت ... والغصة تطعن فى الحلق ...
بقيت حامض يا ود أمي وحموضتك فاتت الحد تب ... وقيل في الأثر الصاحب للصاحب 3 وانا عندي خمسة آخرهما: تحمل ما حمض من صاحبك و رد له الحموضة باحسن منها فيتعض ولا يتحامض مرة أخرى .. عاد حملنا حموضتك و اتحامضنا لمن ما عرفنا روحنا و ذوبنا الاسيد ...
بس برضو شارين وما بنبيع ... ما لانو البيع صعب علينا و انت سيد العرفين انو اختك ما بتعاين وراها و بياعة وممكن تعمل اوكازيون و تبيع العشرة بقرش ... بس ما بنبيع لانو اشترينا بالغالي، و فاكرين روحنا بنعرف معادن الناس، فالنبي فيك .... خصمتك، ما تطلعني صفر كبير في الحتة دي، لانو شايلة معاي مواد و دايرة اتخرج من الهَلُمّة الهَمَلة دي و فاضل لي مادة (مدخل علم عرفة الناس) ...
و تاني، أبقى طيب يا فردة و ابقى عشرة على روحك ...
Post: #117 Title: Re: النداء الاخــير Author: Ishraga Mustafa Date: 02-07-2009, 00:05 AM Parent: #116
Quote: اسمعوا ياخوانا هوي البوست ده انسو موضوعو خلاص.. كل زول يبكي ليلاه في ليلتو براهو وبي طريقتو براهو..
انا قد كفاني مابكيت..
عليك الله ما تحرد لينا البوست اللذيذ دا يا دكين... خليهو طوالي فووووق لوجه الله...! أو كما قالت أحلام مستغانمي..
أكبر لغزين في الحياة هما قطعاً الموت والحب...كلاهما ضربة قدر !!! لا أحد عاد من الموت ليخبرنا ماذا بعد الموت .... لكن الذين عادوا من (الحب الكبير ) ناجين أو مدمرين في أمكانهم ان يقصوا علينا عجائبه... ويصفوا لنا سحره وأهواله ...وأن ينبهونا الى مخاطره ومصائبه.. ... لوجه الله ............ أو... لوجه الأدب !
Post: #145 Title: Re: النداء الاخــير Author: محمد المرتضى حامد Date: 02-11-2009, 07:42 AM Parent: #118
Quote: أكبر لغزين في الحياة هما قطعاً الموت والحب...كلاهما ضربة قدر !!!
والإتنين ممكن يقعوا بقرار شخصي القدر منه براء يا ممكونه.
هسي يافردة غلاوتك في محلها وشاي مغربنا ضمن مغارب الشتاء معزز مكرم ..وبخيتة في اسمرا..والحاجة في عيونا.. بس تاني (الكلك) دي اعفيني منها..
Quote: بس برضو شارين وما بنبيع ... ما لانو البيع صعب علينا و انت سيد العرفين انو اختك ما بتعاين وراها و بياعة وممكن تعمل اوكازيون و تبيع العشرة بقرش ... بس ما بنبيع لانو اشترينا بالغالي، و فاكرين روحنا بنعرف معادن الناس، فالنبي فيك .... خصمتك، ما تطلعني صفر كبير في الحتة دي، لانو شايلة معاي مواد و دايرة اتخرج من الهَلُمّة الهَمَلة دي و فاضل لي مادة (مدخل علم عرفة الناس) ...
نحنا بقى اصلا قصة نبيع ونشتري دي قتا ليكي ما بتجي في بالنا ولا بنراهن بيها ولا بنختها في بورد فيهو عاهات وعالمين مامعروف اخرها كيف وبنات ساي..
معزتي دي ولا بنساومو بيها.. واظنك عارفة.
رجاءا لو مصرة على اي تاكيدات داخلة في خصوص هذه المعزات عندك المسنجر حقي.
ولسه (الصاحب لي الصاحب تلاتة).. رقم تلاتة لسع منتظرنو :)
يا دكين .. صباح الخير طال عمرك .. اشلونك الله يحيك .. ___ و الله الدوحة دي جات علينا بالخسارة، قلنا تبقى زول و تنفتح على ثقافات بقيت لينا صفوي و ديرنا نقفل الخط بالمواعيد و نقدم طلب .. بالله قوم لف ... من متين يا دكين كنا بنقول لبعض (مع السلامة) (اقفلي انتي) (لا اقفل انت الأول) (لا لا لا اقفلي انت الأول) ؟؟؟ ما ياهو درلووووب في حنان التاني بغض النظر التم كلامو منو ما دام في طرف داير يتفكفك و يلحق النهار أو الليل من أوله ..
جاوبني بصراحة ... دكين ..... أنت جنيت؟ راسك المقلوز ده اتحلج؟ بعدين شابكني بورد عام و اسافير تقول انا قاعدة اكورك و افلق حجار حسي الفت الشمار بتاع قفلة السماعة هنا منو؟ - اللي كانت بتحصل عادي زي الزبادي منك و مني و بنتكلم تاني زي الترتيب – تخيل ابوي ده لحدي ما مات ما في يوم قال لي مع السلامة ... شابكني زوزة زوزة و بتي و حبيبتي بس ما حصل يوم استنضفني و قال لي (مع السلامة) تفتكر انا ما اتربيت في الحتة دي؟ يعني محتاجة إعادة رباية في النقطة دي تحديدا ؟ امي طول الله في عمرها ما حصل يوم قالت لي مع السلامة، قدر ما شرقت و غربت و مشيت و جيت، ما حصل يوم يا كافي البلا قالت لي مع السلامة حوارنا كالآتي: ماما كيف يا فردة! مشتاقين ياخ! اهلا منو؟ اها .. زوزة انت كيف؟ بتصلي؟ خلاص... كويس كويس وتااااااااااااااااخ تقفل السماعة تمشي تحضر هارموني ولا مسلسل نور... و بافضل انا بتها حشاشة الجوف و بتفضل هي امي في نن العين .. مرات كمان بتختصرني و تجاوب أي حوار بـ (الحمدلله)... امي انا طقشتني عربية (الحمدلله) امي انا مسكوني في البولييس (الحمدلله) أمي انا ما جاية الرياض تاني (الحمدلله) أمي قروشي اتسرقت رسلو لي قروش (الحمدلله) و تاني تديني ليك تاااااخ بكل محبة و حنان .. يا ربي اقطعو معها لانها بتقفل في وشي؟ حقو احسمها معاها علشان تآمن ... انا عندي كرامة و ما لازم امشي الدوحة علشان ابقى زولة عندها كرامة .. حاعمل لي كرامة هنا في الرياض و اعملها ليها ترخيص كمان .. شوف يا فردة، انت اصلا متسبب معاي، لانو انا اصلا قلت ليك (مع السلامة) عشرومية مرة انت مصر تتكلم وما تسمع انت غالبا متحسس من (مع السلامة) اكتر من القفلة المحتومة لان وكلامك كان هضربة ساي بعدين انت فعلا متسبب معاي .. لانو ضربت ليك تاني عملت نايم، و جيت هنا في البورد القاعد في السهلة ده و فكيت غبينتك معاي ... خلاصة الفهم و الهضربة انو طلعت ليك حساسية مؤخرا ... بس لما جيت قلت اني قفلت السماعة في وشك وما كان في بورد عام فيهو الغاشي و الماشي و لا انت فتك كعكة بسكر و انا حقي مر و حامض... خيار و فقوس في الفت ولا صفوية ذكورية و لا فهمك شنو يا فردة ؟ ولا هي الثقة الطرأت عليك مؤخرا القالتها بت قضيم .. انت ورثت من ورانا ولا شنو يا صاحب؟ بقيت ابن بارم ديلو تعمل الدايرو و انحنا نمشي على كيف ؟ مرة نجاوب ندائك و مرة نستجيب لعدم ندائك و حسي كمان طالب نقفل البوست ... هو على كيفك؟
دكين، بسألك تاني انت جنيت؟ هضربت ولا طقتك شمس ولا قعدت كتير في الرطوبة ؟
Quote: رجاءا لو مصرة على اي تاكيدات داخلة في خصوص هذه المعزات عندك المسنجر حقي.
ده شنو حسي المكتوب فوق ده؟ مصرة .. تأكيدات ... الماسنجر حقي .. المعزات دي جمع معزة ماااء ماااء ولا جمع شنو؟ حسي انا اختك مع اعز اتنين نفر في الدنيا امي و بخيتة تجي تقول لي (الماسنجر حقي) حنكشة دي يا مرسي؟ طب ارفع قوصتك من عيونك يا عشاي ..
طيب هاك دي (رجاء لو داير تبقى صاحبي و اخوي عندك رقم الموبايل حقي)
___ مقولة الصاحب للصاحب دي اديناك بنودها كاملة ما عدا ما لم تستوف انت له الشروط، قدر الله و ما شاء فعل ..
قالوها زمااان ورموها في جدنا سقراط لمن قال: النساء ثلاث ..إمرأة تحبها ..وإمرأة تحبك ..وإمرأة تتزوجها .. يعني يا حبوب بي الدارجي في بت في مكان ما انت مسكر فيها وهي ما شغالة بيك وانت بتكون جاري وراها لمممن كرعينك حفن ..وفي واحدة تانية بتكون مككككككسرة فيك وعينا طالعة وانت عامل غالي ورافع السعر ..وفي نهاية المطاف لا دي ولا دي حا تلم فيهم وحا تظهر ليك واحدة من مكان ما في زمان ما وجمممممبلغ تعرسا .. طبعا الكلام ده نظريات وكده لكن وكما نقول ايام كنا اولاد حلة ساي هو كما الجبادة مرة تصيب ومرة تخيب .. نحن الاولاد ديل غريبييين ياخ البت البتدينا في راسنا بنتكيييف ليها للكتااااش وفي ذهننا شئ من امرين : يا إما ياخدنا شموخ الرجال وعنفوان الشباب ونقوووم نسكها لا لاننا وقعنا في حبها بقدر ما يكون الغرض مقولة انا ماااف بت بتقدر علي وبعد ما ترميها في حبالك ممكن تقطع فيها كفين عاااادي وتقول ليها الله معاك .. يا إما بنقتنع انو دي فعلا الزولة القدرت علينا وعليه تستااااهل يجرو وراها لانها ما خفيييفة ولفيييفة زي فلانة وعلانة وفرتكانة ..
اما بنات حواء لعنة الله تغشاهن ففي ايديهن ذمام الامور :D والله نحن كضابييييين البنات ديل بيحركونا زييي قطع الشطرنج انا زعلانة منك قلبك يدق وتقفل معاك سنة ..يا هناي معليش انا مصالحك بنجي طايرين طيراااان :D
عشان كده يا دكين صدقني القصة ما نداء ولاااا كوراك لانو ممكن تكورك من هنا لحدددي يوم القيامة العصر وربما وقتها وانت طاير في السما تقوم تشوفك وتكورك ليك دكييين دكيين انا هناية الناديتني ديييك تتزكر؟؟؟ :D القصة مزاجية وقبول بتجي ربااااها كده لا إحم ولا دستور وصدقني يوما ما في مكان ما وبدون ما تكورك وتنادي حا تلقا روحك همست همسة بس وظهرت ليك واحدة تانية ما كانت في الخاطر ولا في البال ..
يا سر مكتوم في جوف أصداف .. فتشت عليك بقليب نزاف لا خبير يهدي لا دليل وصاف .. أنا ألفاك وين؟
لا تيأس وإن غليك اليأس فأمض في طريقك وأنت يائس ..
أبحث حتى يعجز البحث عن بحثك ويعلم البحث بأنك باحث .. أجعل من قوقل مثلك الأعلى .. إلى أن تلقى الرفيق الأعلى
وأنا من جانبي أطممك إنك لن تجدها أبداً .. رغم إنها أقرب إليك بكثيييير من شارع حمد الكبير ..
ونصيحتي ليك أكمل نصف دينك من طرف أو دينك كله.. في حالة عدم وجود النصف الأول ..
وواصل بحثك وكفاحك إلى أن تكتشف أن البحث عنها أمتع من اللمة فيها وحينها يكون البحث هدف .. وكل النساء من طرف .. إلا تلك التي تبحث عنها .. ( حاجة مافيشة )
دكين أخبارك .. __________________________________________________________ بعدين يا وغد النكات دي ما ببلاش على الأقل بردو على المس كول ..
ومثلك الفوق دا لمو عليك بكون من دار الرياضة مادار المسيرية
ناسف للتاخير.. بس حرم في ناس فوق انا من شدة دوشتي مارديت عليهم بس ما اولى منك بالردود.. على الاقل ماكلانهاانا وانتا كسرة وملاح في (خليفة).. كسرة وملاح وطرايف كردفانية مهببة..
بت قضيم كيف حالك يا سِت، شكرا لاهتمامك ودعواتي ليك ومعاك ربنا يعلِّي مقامك ويسرِّع الإنترنت طرفك, كنت عايز أدي الموضوع دَفرَه لي قدام لأجل التوصل إلى رؤية مشتركة أو حتى (إتفاق إطاري) مع صاحبنا الفي الدوحه ، قصدي دكين مش (التانيين) ، لكن شايف دكين ختّاها لي عديل وقال قارة الأسى أحسن ليهو من جزيرة روبنسون كروزو ، و يلاَ قفِّلوا وقرِّضوا البوست على كده وخلاص شطّبنا بتاعت المطاعم ديك الكان بيقولوها لينا الجرسونات بدون ما يكلفوا نفسهم مجرد النظر لينا وهم بيغسلوا الطرابيز، ومن البدهيات يا العزيزة ما ممكن أكون كاثوليكي أكتر من بندكت ذاتو، فقلت أحسن أراقب من المنصه رغم تعاطفي المكشوف مع قضية دكين المصيرية وهي تمر بمنعطف خطير وظرف تاريخي دقيق فتريته زي ما بيقولوا في الراديو. وجهة نظري أبَنتُها لحبيبنا دكين وأوجزتها في مناشدتي إياه بذل جهد نضيف في سبيل الوصول إلى عتبات محبوبته المقدسة حتى لو كانت في بعقوبه أو تلعفر وألا يدَّخِر أي سعرات حرارية في هذا الإتجاه لأنو زي ما كانت حبّوبتي بتقول لي : يا ولدي مافي حلاوه بدون نار، ويتفرع على هذه المقولة أن إيكال أمورنا للقدر مدعاة للإسترخاء الأفيوني وتحريض صريح للخلايا النعسانه أصلا بأن تقوم تنوم . بالله يا بت قضيم الحياه القصيره دي قيمتا شنو لما الواحد يعيشا بدون الزول البريدو والمريود حي يرزق؟ يعني لما تخصمي من العمر سنوات النوم وجهاز المغتربين ومتابعة مفاوضات الفصائل والحكومة بيفضل كم من العمر الأخضر؟ ما يتبقى من لحظات يا سيدتي هو الحياة الحقيقية ، اللحظات التي تلتقي فيها مع زولــك البتجيهو بانبساط شان يتمم كيفك وتحلِّق معاهو في مجرات أُخَر زي ما بيقولوا المسغفين وبعض اليساريين والمنظرين، ناس المرأة الوطن وعبارات من عيار بوح، وتماهي روح، وبلابل الدوح ونديم الراح ونديد الروح ، وياروح ما بعدك روح إلخ.. قلت له لاتترك البنت المشعة لغيرك لأن غيابها ظلمة وغيابة جُب لا يغشاه السيّارة، تلك التي إن فارقتك تخليك قميص وبنطلون ساي ، بنت زي ما قال ديكارت (إنت في يا عشاي إذاً أنا موجود). كنا نبتغي من دكين أن يكون قدوة لغيره من الذين ينتظرون ويراقبون من الجيل اليلينا وأن يُبقِي على اللواء مرفوعا و يبقى عنوان للشباب كما قال سيف الدسوقي في رائعته المصير. والله الدنيا دي بدون اشتياق ونار حرَّاقه ماعندها معنى فقد خُلقنا في كبد وسنظل نكابد حتى النفس الأخير ، فلماذا لا نكابد في الخير المتمثل في البحث عنها في المجرات المجاورة فما أجمله من عسر وعنت ذلك اليلاقينا بسبب الحبيب، فالعشق كله خير محض حتى لو انتهى بالإنسان إلى اللحد ، قلت ليهو ساعدا بي جكَّه يا دكين وما تفطر على بصله لكن حسّيت من كلامو كأني بضللو وهو خلاس داير يعرس (من طرف )، حتى لو كان الطرف الأغر ، أها ،أسوي ليهو شنو؟ بالله كلِّميهو, لَوِّميهو اللاهي، قولي ليهو. الحب دا شي طبيعي، إلهي.
Post: #134 Title: Re: النداء الاخــير Author: أحمد الشايقي Date: 02-10-2009, 07:56 AM Parent: #133
Quote: بت قضيم كيف حالك يا سِت، شكرا لاهتمامك ودعواتي ليك ومعاك ربنا يعلِّي مقامك ويسرِّع الإنترنت طرفك, كنت عايز أدي الموضوع دَفرَه لي قدام لأجل التوصل إلى رؤية مشتركة أو حتى (إتفاق إطاري) مع صاحبنا الفي الدوحه ، قصدي دكين مش (التانيين) ، لكن شايف دكين ختّاها لي عديل وقال قارة الأسى أحسن ليهو من جزيرة روبنسون كروزو ، و يلاَ قفِّلوا وقرِّضوا البوست على كده وخلاص شطّبنا بتاعت المطاعم ديك الكان بيقولوها لينا الجرسونات بدون ما يكلفوا نفسهم مجرد النظر لينا وهم بيغسلوا الطرابيز، ومن البدهيات يا العزيزة ما ممكن أكون كاثوليكي أكتر من بندكت ذاتو، فقلت أحسن أراقب من المنصه رغم تعاطفي المكشوف مع قضية دكين المصيرية وهي تمر بمنعطف خطير وظرف تاريخي دقيق فتريته زي ما بيقولوا في الراديو. وجهة نظري أبَنتُها لحبيبنا دكين وأوجزتها في مناشدتي إياه بذل جهد نضيف في سبيل الوصول إلى عتبات محبوبته المقدسة حتى لو كانت في بعقوبه أو تلعفر وألا يدَّخِر أي سعرات حرارية في هذا الإتجاه لأنو زي ما كانت حبّوبتي بتقول لي : يا ولدي مافي حلاوه بدون نار، ويتفرع على هذه المقولة أن إيكال أمورنا للقدر مدعاة للإسترخاء الأفيوني وتحريض صريح للخلايا النعسانه أصلا بأن تقوم تنوم . بالله يا بت قضيم الحياه القصيره دي قيمتا شنو لما الواحد يعيشا بدون الزول البريدو والمريود حي يرزق؟ يعني لما تخصمي من العمر سنوات النوم وجهاز المغتربين ومتابعة مفاوضات الفصائل والحكومة بيفضل كم من العمر الأخضر؟ ما يتبقى من لحظات يا سيدتي هو الحياة الحقيقية ، اللحظات التي تلتقي فيها مع زولــك البتجيهو بانبساط شان يتمم كيفك وتحلِّق معاهو في مجرات أُخَر زي ما بيقولوا المسغفين وبعض اليساريين والمنظرين، ناس المرأة الوطن وعبارات من عيار بوح، وتماهي روح، وبلابل الدوح ونديم الراح ونديد الروح ، وياروح ما بعدك روح إلخ.. قلت له لاتترك البنت المشعة لغيرك لأن غيابها ظلمة وغيابة جُب لا يغشاه السيّارة، تلك التي إن فارقتك تخليك قميص وبنطلون ساي ، بنت زي ما قال ديكارت (إنت في يا عشاي إذاً أنا موجود). كنا نبتغي من دكين أن يكون قدوة لغيره من الذين ينتظرون ويراقبون من الجيل اليلينا وأن يُبقِي على اللواء مرفوعا و يبقى عنوان للشباب كما قال سيف الدسوقي في رائعته المصير. والله الدنيا دي بدون اشتياق ونار حرَّاقه ماعندها معنى فقد خُلقنا في كبد وسنظل نكابد حتى النفس الأخير ، فلماذا لا نكابد في الخير المتمثل في البحث عنها في المجرات المجاورة فما أجمله من عسر وعنت ذلك اليلاقينا بسبب الحبيب، فالعشق كله خير محض حتى لو انتهى بالإنسان إلى اللحد ، قلت ليهو ساعدا بي جكَّه يا دكين وما تفطر على بصله لكن حسّيت من كلامو كأني بضللو وهو خلاس داير يعرس (من طرف )، حتى لو كان الطرف الأغر ، أها ،أسوي ليهو شنو؟ بالله كلِّميهو, لَوِّميهو اللاهي، قولي ليهو. الحب دا شي طبيعي، إلهي.
اخوي يا محمد صعب جدا نصل لي رؤية اطارية مشتركة فيما يتعلق بي حبيبة غايبة.. مرتكزاتنا ما واحد,,وشتان مابينك وبيني انتا زول بتتكلم من مقام المطمئن المجرب اياً كانت نوع التجربة..اضف الى ذلك بتتكلم من مكان المرتاح الرايق الـ....والمنتج. لذلك بتكون مستصحب في رؤيتك اولا الطمانينية الناتجة عن استيفاء جميع حوائجك من اكل، شراب، نوم، ومانحو ذلك.... يعني بني ادم مطمئن. ثانيا بتكون مستصحب في رؤيتك العايز (تلقى روحك فيني فيها دي) بتكون مستصحب تجربة سنين وافرة سواء على مستوى الحبيبة او على مستوى الزوجة من ناحية او على مستوى الخبرات الناتجة من شتى وسائل المعرفة من ناحية تانية(روايات عن محبات عظيمة- نصوص عن حب عظيم ظل متقدا لسنين طويلة- شعر منظوم عن من ظل يبحث عنها حتى ابيضت عيناه من الحزن ومقاربات اخرى). يعني بتكون ماسك معيار الدهب القالوهو لينا زمان في سنة اولى قانون في المقايسة بتاعتك دي. مقايس الرجل المطمئن الرايق الشارب النايم الماكل الـنـ... المرتاح.. عشان كده لازم تجي بعيدة عن حال الزول الزيي..وطبعا ما محتاج اشرح ليك فحالي لايخفى عليك .. قارة الاسى القتها دي اكيد فيها متر مربع سمح .. تخير مترا جميلا ثم تعهده بالعناية والسقاية والرفادة..على الاقل لو مافيهو ذاتو بتقدر تمرق منو ثمار جميلة بتلقى في ضالتك وممكن تغرس فيها عزايمك الجميلة.. وتلوذ بهم عند احتدام الحياة.. بس وحشة ربنسون دي اقع بيها وين؟؟
قال احمد عبد العال ربنا يرحمو قدر ما كتب وقدر ماخط ورسم قال: (انها زينب عماد العزايم عند الملمات الكبيرة) ده اجلّ وصف وصفت به إمراة لاقاني خلال ال 34 سنة المنصرمة ..عماد عزايم في ملمات. اها الوصف ده بقابل عندي فكرتك بتاعة المغنسيوم.. وين نلقى زينب دي؟؟ بعدين ياخي قضيتي دي انا ماعايز ابقى فيها زي المثال الذي يُحتذى به.. يعني انا اكون عاشق هذا العصر واموت بي هذا البحث النبيل.. طــز يامان ..كل الناس الهنا ديل عرسو منهم من عرس من طرف ومنهم من ظن ان الخير فيما اختار ..واتحدى واحد فيهم كان لقى ضالته!! خلاص بقت علي انا الحالقاها؟؟ هي اصلا ما اتلقت موش لانها رايحة في (مكان ما) زي ما انا قتا فوق وانا قي قمة شجوي وشجوني..هي ما اتلقت يا محمد لانها "نوت اكزست"( نوت اكزست دي عاجبا ليها زول هنا) ماف.. لاتوجد..انفاليد بت.. غير مخلوقة.. يامحمد خذها مني وانا اخوك "مافي زول بلقى ضالتو لانو الضالة دي دالة في الخيال.." ده اسمو الــ نداء الاخير.. مجرد زيطة في زمبريطة هذا العالم الذي لم اصله في مرمى النظر القريب.. الشاشة الانتا شايفني منها دي يطل منها الان ما اقلا من =/17,000 بت سمحة ، ناهدة، مكحلة، رقيقة الحشا.. وترتدي نضارات ساينتفك.. انا لا اقصدهم بهذا النداء لانهم قطعا ليسو البت الرايحة لي.. ولكني اشهدهم على اني دقيت نقارتي اكتر مما يفعله المسيرية حين الدواس..
Quote: مناشدتي إياه بذل جهد نضيف في سبيل الوصول إلى عتبات
قبيلك كانت جهد معقول هسي بقت نضيف يامحمد؟؟..للضمان كده ياحبيب كلاها انا بذلته ..نضيف واكتر من معقول وازيدك من الشعر بيت مابذلته من جهد شمل ضمن ماشمل باكستانيات وبقايا تراكوة من جهات شندى ودناقلة بيور ودناقلة مهجنات مع جعليين وجعليين مهجنيين مع حبوش وفلاليح من دنقلا وفلاليح دناقلة تربو في شمبات.. وصوماليات بيور تربن في زنزبار.. وشوايقة ساي.. وشوايقة مهجنين في سواحل بورسودان مع ارتريات ..وارتريات صافيات كأن خدودهن الزجاج والبلور ..ارترية والله لو شفتها لرايت كرومزوم ُنبلها في عرق وشيها ماشي يقدل زي فرع اللبلاب .. انا يامحمد مافكيت اخرى هنا ساي عشان يجي فرتكان يقول لي ده كلام ساي وحركات اولاد حلة زي ما بقول الـ (دهل كول) عمر الفاروق ومافكيت هذا الاخر عشان تجي عزوز تفتح لي موضوع ماعندو علاقة بي هذا الاخر.. كما ومافكيتو عشان الناس تقرا وتستمتع وتجي تقول لي (ياسلام يادكين بركة الماعرستا لانو لوكنتا سويتا ما كان قرينا الكلام السمح ده) ياخي بلاي ده هسي كلام يتقال لي زول مازؤم؟ وانا مالي ياخي ومال استمتاعكم.. عماد عبد الله قال لي انا مبسوط وبحبك..اها انا اعرس عماد عبد الله ده ولا كيف؟؟ قدم لي شنو في محنتي دي(بكسر الميم وفتح النون)؟؟ ياخي حتى صحبتو السمحة القتها ليهو جات زي الماسوت شي وختت شتلة محنتا في شباك ايامي وما اشتغلت بي الشغلة.. انا يامحمد سطها زين ..شرقتا وغربتا.. سكيت شغلتي دي في العذراوات.. وفي حبيبات سابقات لناس سابقين... وفي فتوات صغار ومطلقات كبار.. وقيل ارامل ..ياخي مافضل لي إلا النسوان اللواتي في حياتهن نغائص زوجية.. ودي حرم لولا قول الله تعالى(لا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ وَلَا تَحْزَنْ عَلَيْهِمْ وَاخْفِضْ جَنَاحَكَ لِلْمُؤْمِنِينَ) لحزنت على ما فاتني منهم الى احضان الرجال حزناً شديداً.. وتجي تقول لي جهد نضيف وجهد معقول؟؟ اصلو انا عايز اعرس اميرة ويلز؟؟
Quote: قلت له لاتترك البنت المشعة لغيرك
غيري ما اخدها لانو هو الاولى والاحق وانما انفرد بها لانو لما فيها... لانو طلع قريبا او لانو كان ود جيرانم او لانو لاقاها في شرق النيل واناقريت الخرطوم او ...الخ وانتا عارف يامحمد انو انا لسع ما قام لي جناحين وماعندي عيون معلقة في قمر صناعي .. ودعوتي شملت حتى اللواتي خرجن من عصمة الرجال..يعني برضو ما مقصر ومادي حبل قسمتى..
Quote: كنا نبتغي من دكين أن يكون قدوة لغيره من الذين ينتظرون ويراقبون من الجيل اليلينا وأن يُبقِي على اللواء
لواء؟؟ الكلام ده انا ناقشتو فوق.. وكان ليكم ..انا لستُ فالانتاين هذا الزمان.
بت قضيم شنو وبتيخ شنو؟؟ بت قضيم دي اسالا قدامك هسي قول ليها دكين ده زمان ما قال ليك شوفي لي عروس انتي قفلتي المسنجر في وشة.. بعدين انتو شنو قصة القفل في وشي دي..وش ده ولا باب حمام؟؟
دقيقة يا فردتي اول من امس دايرة اركن الاغنية دي هنا ...
ياعازة الفراق بي طال وسال سيل الدمع هطال طريت برق الفويطر الشال وساح دمعي البكب وشال كمل صبري ومنامي انشال لبس من ناري عمه وشال ارض امالي في امحال ومن الهم بقيت في اوحال وبعدك عزه ساء الحال منامي وصبري اضحي محال
حليل الناسا وناس طريت ام در حليل ناسا وكيف انساها واتناسا ومفتون بي ظبي ناسا ولع جوفي جمري الحي وما بتطفيه ووووووووب واحييييييي فيا زينة ربوع الحي لي دياركم يعود الحي
____ يا اخوانا ساعودنا بالتقنية و جيبوها لي بصوت ود البادية علشان انطرب و ارمي شبال و أكمل ما بدئنا في اضابير البحث
Post: #139 Title: Re: النداء الاخــير Author: حمد فتح الرحمن Date: 02-10-2009, 11:00 AM Parent: #138
اسفة دكين إذ انا مستمتعة أيما استمتاع بوجعك ده ، ببوستك هذا الأنت عايز تقفلوا وما اظن تقفلوا انا بشتريه منك كان داير شرط حضورك الدائم فيه وفي واحد حكيم كان ببيع باسطة في عربية ناس زمان ديك عارفها؟! قال لو اتنين قفلوا ليك اي حاجة في وشك يبقى العيب ما فيهم العيب في وشك والله ورسوله أعلم
محمد بجد جد الريدة عندي شئ عقلي خيالي،، احساس لا يوصف ولو وصف فيصبح شئ عادي لا روح فيه الريدة عندي امل لو تحقق بطلت نشوته الريدة بالنسبة لي حالة عقلية تستطيع ان تعيشها بكامل وعيك والاحلى لا وعيك انا اختلف معك تماماً فالحياة عمل والريدة خيال جميل الحياة التزام،، كد وجهد وحسابات وواحد زايد واحد يساوي اتنين الريدة أمل لا يخضع لحسابات عقلية ولا التزام (اللهم لا تلمني فيما املك)
اجمل الأشياء في الحياة يا محمد بالنسبة لي، واجمل الأيام تلك التي لم تأت بعد فلو اتت تلك الأيام انتفت حلاوتها وبالتالي الأفضل ان لا تأتي لا بأس لو أن الريدة امل والامل يمنحنا الرغبة في الحياة!! ذي مسألة النار والجنة حالة عقلية نخافها أو نحبها فننتظرها أو نتجنبها ولا تتحقق إلا عند الموت فلو تحققت يعني اننا متنا ؟؟؟ وبعدين انا جعانة وهذه عندي حالة طوارئ ممكن اغير بعدها اي كلام قلته واسوي روحي ذي ما انا قلته فما تستغرب بكرة اكتب شنو ثم الكي بورد بطارياته خلصت وكتبت الكلمتين ديل في ساعة في داعي اتفلسف واشتري كي بورد وايرلس ؟؟! بجيك صادة
Quote: قال لو اتنين قفلوا ليك اي حاجة في وشك يبقى العيب ما فيهم العيب في وشك
شححححححححححح
يا سلام ياخ !!!
اديتني شعور الفرحة المصاحب لشرب الموية الباردة لما تجي داخل من برة في احد ايام شهر اربعة و الشمس لاصقة ليك في قورتك و في فرن شايلو في كتفك بيبخ ليك في وشيك .. وفجأة تلاقي زير بااارد ياخدك بالحضن و يديك موية بكوز استانلس ستيل مبخر ...
على سيرة الوشوش، يا دكين لا تعيب اصدقائك و العيب في وشك أ وبالأحرى ما يقبع في قاعه من الجهة الخلفية و بذلك أقصد المخ أو المخيخ أو كما قالت مدرسة العلوم في زمن مضى سريعا ...
ما علينا،
أنا باختلف معاكم يا اخوانا .. ورسمت دائرة بيد واحدة و ختمتها باشارة نحو رأسها مستفسرة: انتو طايوقكم ده ماف؟
ما سمعت لي ناس بتحب التشحتف زيننا احنا السودانين، بيقعدوا في ضل الضحى يرسموا ليكم محبات و هيامات و هنابيك حب و غرام وشعر ما عندهم ليهو رقبة و أول ما تجيبهم في المحك تلاقيهم أول الذائبين في موية الدميرة ... حسي انت يا دكين اللي بعرفو احلف بغلاوة مق القهوة أب وردة بمبي انو انت لا حاولت لا سجم رمادك و اقصى ما فعلت هو التفكير فيها وإلباسها كل ما رأيت من بناء حواء و اعجبك وانت نفسك دنية و بالعجبك ما شوية .. يعني بنت ريدك دي تكون طويلة قصيرة سمينة ضعيفة خضرا حلبية عيونها كبار صغار وشعرها طويل قصير ... زولة مشخبطة ساي بركة الما لقيتها زاتو الحبيبة البعاتي دي ...
المشكلة ما في عدم جية من رغبنا بقدر رجوعنا عن ما اقسمنا بأغلظ الايمان ان نفعل لو تبسم القدر و مال و حن و جا ... حركات منكم ساي ... علشان ما تقوم تعمل القلت حتعملو لما تلاقي ريدتك تقوم تقول انو اللي حصلت علية ما ياهو تقوم تسقط البند الملزم بالهيام و تجو تملو لينا البندويث ده هرطقات و يكثر ترديد (في الليلة ديك) ولو امعنا النظر قليلا لوجدنا انو ليلة داك ديك كانت ممكن ما تحصل لو حبيبة داك ما باعت حنانو لانو خاف و دايرها تبقى سعيدة حتى لو مع غيرو و لو عرستو كان ما سمعنا بالليلة ديك ولا ازدهرت تجارة العرقي في الشوارع الخلفية ... الكلام ده ليست له علاقة مباشرة بالموضوع قيد النجر ولكني دايرة اقوله من باب اللهم ني قد بلغت اللهم فاشهد ..
جني و جن التباكي و حركات شحاتين السيدة زينب دي، حياتك دي ملكك و قراراتك ترسم بعضا من حاضرك ومقبل أيامك ... التشكي و التبكي و وووب احي دي ما بتحلك من انك تعيش حياتك زي ما داير ... ما لاقاني زول بيشكي من قلة حب أو حظ وامسى محبوبا أو حظيظا لانو ببساطة الشكية بتجيب الكج و الزمن احب ما عليهو يردمك عوراض علشان الشواكيش تاكتر وتلاقي الناس مضّايرة من بعض في الأعراس لانو عرسو توافيق تباديل و لقو روحهم في صقيعة الوحدة و أرضا يباب من المحب و صادق الشعور ... ويجي شاعر يبكي: اغالب دمعي و اتصبر و اقول يا الله صبرني ..على فراقك يا أغلى الناس ..سواد حظي الملازمني ..
عاد الحظ ما ظالمنو انتو!
هي واحدة من الاثنين ...
يا الحب ده زي ما قالت بتنا بت قضيم، و مجرد حالة عقلية وبالتالي الدوشة دي فوق كم؟ قوم اشعر ليك بشيء عليهو القيمة ... انك زول سمح مثلا؟
يا اما الحكاية دي قسمة و نصيب و بكده نرجع لهرطقتك السابقة ديك و الفلكبة دي اعتراض منك على القسمة ودي حركة ما حلوة منك و حقو تراجع نفسك تاني ...
يا دكين، الوصيّف بتاع حالات صفاك تفترض انو البت دي جات الدنيا جملغ (حقوق الملكية الفكرية لعمر الفاروق) كايسة دكين و مبرمجة سلفا تحبك زي انت عايز و بالتالي انت لاغي ليها حقها في الاختيار .. انت داير تلاقيها فجأة تقوموا تحبو بعض؟ كده؟ بالساهل؟ ما داير تسعى و تبذل جهد في بنى حوائط و فتح نفاجات و تعريش الثقة؟ ياها كلمة مولانا المرتضى .. حفرت اساس و داير تعرش .... المشكلة حافر اساس في جرف السيل ...
الحب يا اخوانا بحسب ما حبينا و عرفنا و خبرنا، لا قانون له لا يحزنون، بيجي و بمشي بأمر من لدنه مقلب القلوب ...و آخر دعائنا انه اللهم يا مثبت القلوب ثبت قلبي على حبه و شوقه لا احيد عنهما ما حييت ...
وقتين الله يرضى عليك و يرمي في قلبك كلمة/أمر (حب) اقع البحر لغاية ما تصل منتهى الريد و اضرب برجلك القاع تطلع طافي على وش الموية يا شالتك موجة جديدة يا ناداك البحر نفسه تاني ...
Quote: انا يامحمد مافكيت اخرى هنا ساي عشان يجي فرتكان يقول لي ده كلام ساي وحركات اولاد حلة زي ما بقول الـ (دهل كول) عمر الفاروق ومافكيت هذا الاخر عشان تجي عزوز تفتح لي موضوع ماعندو علاقة بي هذا الاخر.. كما ومافكيتو عشان الناس تقرا وتستمتع وتجي تقول لي (ياسلام يادكين بركة الماعرستا لانو لوكنتا سويتا ما كان قرينا الكلام السمح ده) ياخي بلاي ده هسي كلام يتقال لي زول مازؤم؟ وانا مالي ياخي ومال استمتاعكم.. عماد عبد الله قال لي انا مبسوط وبحبك..اها انا اعرس عماد عبد الله ده ولا كيف؟؟ قدم لي شنو في محنتي دي(بكسر الميم وفتح النون)؟؟ ياخي حتى صحبتو السمحة القتها ليهو جات زي الماسوت شي وختت شتلة محنتا في شباك ايامي وما اشتغلت بي الشغلة.. انا يامحمد سطها زين ..شرقتا وغربتا.. سكيت شغلتي دي في العذراوات.. وفي حبيبات سابقات لناس سابقين... وفي فتوات صغار ومطلقات كبار.. وقيل ارامل ..ياخي مافضل لي إلا النسوان اللواتي في حياتهن نغائص زوجية.. ودي حرم لولا قول الله تعالى(لا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ وَلَا تَحْزَنْ عَلَيْهِمْ وَاخْفِضْ جَنَاحَكَ لِلْمُؤْمِنِينَ) لحزنت على ما فاتني منهم الى احضان الرجال حزناً شديداً.. وتجي تقول لي جهد نضيف وجهد معقول؟؟ اصلو انا عايز اعرس اميرة ويلز؟؟
يا دكين,,,كازانوفا(*) يا صاحبى تدفقت كما لم تفعل من قبل,, فقط سؤالى لك وأنت فى عمق وعز محنتك ومأساتك المصطنعة هذه!!!
Quote: قبيلك كانت جهد معقول هسي بقت نضيف يامحمد؟؟..للضمان كده ياحبيب كلاها انا بذلته ..نضيف واكتر من معقول وازيدك من الشعر بيت مابذلته من جهد شمل ضمن ماشمل باكستانيات وبقايا تراكوة من جهات شندى ودناقلة بيور ودناقلة مهجنات مع جعليين وجعليين مهجنيين مع حبوش وفلاليح من دنقلا وفلاليح دناقلة تربو في شمبات.. وصوماليات بيور تربن في زنزبار.. وشوايقة ساي.. وشوايقة مهجنين في سواحل بورسودان مع ارتريات ..وارتريات صافيات كأن خدودهن الزجاج والبلور ..ارترية والله لو شفتها لرايت كرومزوم ُنبلها في عرق وشيها ماشي يقدل زي فرع اللبلاب ..
جهودك ديل يا اللخو!!!! من أى نوع كنّ يا حبيب,,, وجيت مارق منهن كيت وكواريكك تجيب الرايحة الأبت تجيك دى!!!
يا اللخو,,,
أنا ما زلت مصرا,,, أن زوايا الرؤى عندك قد تتغير ولو قليلا,,,, إذا رفهت عن نفسك,,,,,,,,,,ولو قليلا أيضا,,, وأفكارك المضطربة وهضربتك تحتاج ذاك الترفيه,,,
وتناقض أقوالك أصبح يرجح كفة إتهامك,, جايط جوطة لا حصلت لا بتحصل,,,
داقى ليك إعلان قدر دا,,,,
لاقينى كان جاب حاجة,,,, غير بنات أفكارك,,,
وركّّب ترانسفورمر جديد القديم شكلو ضرب,,, وأقرأ الروشتة الكتبتا ليك دكتورة عزاز دى كوييييييييييييس!!! إحتمال الحال يتحرك معاك شوية,,,,
Quote: وازيدك من الشعر بيت مابذلته من جهد شمل ضمن ماشمل باكستانيات وبقايا تراكوة من جهات شندى ودناقلة بيور ودناقلة مهجنات مع جعليين وجعليين مهجنيين مع حبوش وفلاليح من دنقلا وفلاليح دناقلة تربو في شمبات.. وصوماليات بيور تربن في زنزبار.. وشوايقة ساي.. وشوايقة مهجنين في سواحل بورسودان مع ارتريات ..وارتريات صافيات كأن خدودهن الزجاج والبلور ..ارترية والله لو شفتها لرايت كرومزوم ُنبلها في عرق وشيها ماشي يقدل زي فرع اللبلاب ..
دي مجهودات امرئ القيس زاتوا ما بذلها,
تلقى مرادك يا دكين أخوي ,
ولما تلقاهو أجي وأجيب معاي محسن خالد ندوبي ليكا هنا, ونسوي لك البنينة يا بنينة هوي
ايمن الطيب اتحداك تلقى زول من فردك - غيري- سكا درب العايزو قدر ماسكيت..
نص الناس الهنا ديل كان مناهم يلقو الكايسنو بس ما لقو.. نصهم روشتة عواز دي كان وصفتم بس كانت الزوجة الجديدة دخلت اللحم الحي وانتشرت في باقي الجسم
سمبك وركب.. ونفس السمبك راجيني ..بس اخوك هسي بوسع محل ركوب السمبك.. مين عارف يمكن قبل البوست يصل الصفحة التالتة تطله هالة التحت دي صاحبة النصيب..
Post: #154 Title: Re: النداء الاخــير Author: كمال سالم Date: 02-11-2009, 09:21 PM Parent: #151
إنت يادكين بقيت كضاب ولاشنو ؟؟؟ قبل إسبوع ماجيتنى مهرول وقلت لى وجدتها وجدتها ,, هسه الزوله دى لو متابعه المنبر ده تقول عليك شنو ؟؟
ولا أقول ليك : سيبك منها ,, وواصل فى هذا النداء ,, هسى بالله لو مانداءك الاخير ده , زى السهل الممتنع والممتع بتاع عزاز شامى ومحمد المرتضى ده كنا حنقراهو وين ؟ ,, إنشاء الله ويابركة جاه النبى ماتلقاها .
عزوز يعلم الله اشتقتا ليك..ياخي ماتعمل نعمل (مانيوال بولسي) لي ونستنا عبر التلفون ونحترم هذا المانيوال ..
Post: #156 Title: Re: النداء الاخــير Author: أحمد الشايقي Date: 02-12-2009, 01:11 AM Parent: #155
Quote: حلوة يا شايقى وملعوبة,,,
Quote: واصـل مفحماً محاوريك
يا حبيب صاحبك دا أحسن يشوف ليهو واحدة من طرف ولا من نص ولا من الآخر ويفحما,,,
البسوى فيهو دا ما بحلو من مواجهة الواقع,,,,
ياخ البحصل ليهو هنا أخير منو الدقّّّّ!!!
تعرف يا أيمن
في ناس كتير عرسوا وما اتشتحفوا زي دكين دا,
بعرسوا وبيلدوا وبموتوا كمان ومافي زول بسمع بيهم ولا في زول بيستفيد من تجاربهــم
ياخي روميو نفسه لو ما اتشحتف زي دكين دا ما كان سمعت بروميو ولا بجوليت كمان,
جوليت دي ممكن تكون واحدة زي أي واحدة تلقاها واقفة في مواصلات الصحافة ولا راكبة النيسان ماشية الابيض ولا في بمبة لوري وحلان في دلتا القاش,
الالهام الحقيقي والابداع في الشحتفة دي , شوف الولد دكين دا مشحتف ليك البورد والبوردات المجاورة دي كيف, والناس مخلية أوكامبو وأوباما والمامبو وكنا برضو مخليين غزة وأنفاقها لمصيرهم ومتابعين شحتفة دكين وغزواته الامرئ قيسية وناس مولانا مرتضى يسكبوا عصارة ما اعتصروه من سنين
أنا قلت فوق إنه كلام مولانا مرتضى دا هو الشعر بعينه بس تعرف كلام دكين وعزاز وبت قضيم دا يكون شنو ؟
ياخ دكين دا فاقد الإتجاه والبوصلة الداخلية وحار بيهو الدليل وفاض بيهو الشجن وأشاء أُخر,,,
Quote: ياخي روميو نفسه لو ما اتشحتف زي دكين دا ما كان سمعت بروميو ولا بجوليت كمان,
روميو وإمرئ القيس وعنترة وجميل ديل كلهم ناس كانت أهدافهم واضحة ومرئية وظاهرة للعيان أما صاحبنا فلاهدف واضح ومحدد لديه,, أي حبيبى ود الشايقى صاحبك دا حائط المبكى المسويهو دا فىىىىىىىىىى شنو,,, ألله ورسوله أعلم!!!!وما زلت عند ظنّى أن الأمر لا يخلو من مكيدة ما Smoewhere أو بعض دردرة,,,
Quote: الالهام الحقيقي والابداع في الشحتفة دي , شوف الولد دكين دا مشحتف ليك البورد والبوردات المجاورة دي كيف, والناس مخلية أوكامبو وأوباما والمامبو وكنا برضو مخليين غزة وأنفاقها لمصيرهم ومتابعين شحتفة دكين وغزواته الامرئ قيسية وناس مولانا مرتضى يسكبوا عصارة ما اعتصروه من سنين
وجاء صاحبنا قائلا أن الجميع جاء يعزّى نفسه!!! وطالب بإغلاق البوست بالضبّة والمفتاح!!!!!تخيل!!!أوكان يود أن يأتينا بهرطقاته وأضعاث أحلام يقظته المرهقة ويوجع لينا عيونا ويودنا لو نُمّر مرور طيور!!!!,,,بما قال وكتب نناقشه فبدأ يطلق الشلاليت يمينا ويسارا,,,,فقط أنظر لردوده الأخيرات تجده قد بدأت قواه تخور وإعترف ضمنا أن كان غلبك سّدها وسع قدّها نظرية موضوعة نصب عينيه الآن!!!والخوف أن يكون هذا هو مثل مرحلته المقبلة وأقولها له الآن إن كان كذلك !!!! خُمّ وصُرّ يا دوبك الخايفو يحصل,,حصل!!!ولن تجدى محاولات توسيع تلك الأماكن الضيقة,,
Quote: أنا قلت فوق إنه كلام مولانا مرتضى دا هو الشعر بعينه بس تعرف كلام دكين وعزاز وبت قضيم دا يكون شنو ؟
عزاز هى ملكة تفنيط وتمحّيص إدعاءآت الدكن صاحبى من واقع قراءتها وقربها وفهمها للشخصية الدكينية وهى تناقش ما يقول وهو يرد على أفكارها,,, دكين فنان ومبدع صحيح لكن جرستو وبكاهو هناهو عبارة عن تفكير بصوت عالى وهى ميزة فى دكين أى المقدرة على التفكير بصوت عال وطرح ما يدور برأسه الخمجان على الملأ دون حتى التفكير فيه وتلك يا صاحبى شجاعة لأنك قدتجلد بأفكارك غير المرتبة تلك,,,ياخ الزول دا ما قاعد يحب,,,الراجل دا تعبااااااااااااااااااااان وداير يعرس لكن ملاوز يعنى زى المشتهى الآيسكريم وخايف اللوز كدا القصة ما حب ولا هيام,,,حسب رؤيته فقد ظن أن السن قد طعن ولزاما عليه أن يجد من يشاركه ما يمكن أن يُقتسم عنده ويولدها صبيانا وصبايا!! لم يقل أنه يود أن يكتب فيها شعرا ويقضى العمر متبتلا فى محراب عشقها!!!!ياهؤلاء مابالكم كيف تحكمون!!!!!! وكمان جابت ليها غزوات وصولات وجولات!!!فى ظنّى أن كلها إسفيرية وأثيرية أو فلنقل معظمها!!!!وفشلها واضح للعيان ولا حوجة لمناقشة الأدلّة,,,
مولانا ابو أيمن(ود المرتضى) حاول أن يضعه فى الطريق الصحيح لكن صاحبك العامل راسو زى كربريتر الأتوس دا عامل حميل وأبى أن يأخذالحكمة من أصحابها ,,,نشوف آخرو شنو إن كان يملك واحدا!! هنافى هذاالبوست الملغوم,,, الروعة كادت أن تكتمل بما كٌتب فيه,,, إمتاع حتى الإشباع ,,,وأخوك لإمر فى نفسه يضحك ملء شدقيه كلمافتحته ووجدت أن الخناق قد ضاق حول رقبة أبولسان طويل,,,
يا شايقى يا صاحبى التدوير وإعادة التدوير صنعة أتقنها البعض هنا!!!!! والبعض بكل الطيبة والنقاء يضع نفسه تحت مكائن الطحن والعفص,,,والمحصلة دائما جيدة فمن بعض الأشياء ليست ذات القيمة يمكن إنتاج ما يمكن أن يكون ذو قيمة ونفع!!!!!
وصاحبك دا أنا فترت من تدويرو(*)
ولك ولصاحبك (التعبان دا) أعظم التحايا وكل الإحترام,,
Quote: عزوز يعلم الله اشتقتا ليك..ياخي ماتعمل نعمل (مانيوال بولسي) لي ونستنا عبر التلفون ونحترم هذا المانيوال ..
يا سلام .. يا سلام ..
بكل أريحية كده زي البيحشي ليهو في ساندوتش جبنة و تاكي على التلاجة بيقول لي تعالي نعمل مانيوال بوليسي ...
كلام زول مطمئن ... يرفل في الأمان ... ضامن العيش و الجبنة و الكفتيرة جنبو بتقول (صييييييييييييييي) انت مالي يدك من اتصالي المحتوم و بقت على المانيوال...
لا بالله؟!
خلاص يعني ؟ نعرش "سوء التفاهم" ده على كده؟ و اقدل فرحانة انو غفرت لي "قفلتي السماعة المست غرورك و فرقتنا يا فردة ... خلاص كفرت عنها بتسهدي و نحيبي و مداخلاتي.." و ننسى حموضتك القبيل و اشرب سفن اب ، و نقفل دفتر حسابات الاتصالات الي ما لقت رد إلا من بنية ما بتعرفك لا بتعرفني تقول لي الرقم ده ما تدقي فيهو تاني و لملمي ونستك عليك و شتتي و اقطعي وشيك ... و المعزات ديلاك (مااااء مااااء) رجعن تاني من مرقة الصباح في الحلة و عرفن درب بيوتهن و الضل البعرفهن؟ يعني بقيت رضيان تسامح يا عشاي؟
لا بالله؟
النبي؟
بالجد؟
مرحى .. مرحى ..
استجابت السماء لابتهالي ...
دقيقة ماشة اصلي ركعتين شكر و اجي اتم المداخلة دي ..
Quote: سيد البيت، ضيوفه الكرام، أسياد الشى ذاااتوو،،
يا جماعة يعز على البوست دة جاية ماشة فيه، و أرجع أعاين ليه تانى،،،
و أقول لالا لأ، خليه بكرة،،،
الشى دة داير ليه قعدة بمزززاج،،
و قدر ما أنتظرته يجى، (المزاج طبعا..)
قعد يتعزز على!!!
أها تنصحونى أجى من الاخر، و لا لازم إبدا من الاول، وواحدة واحدة،،،
أتعايش مع كل السبقونى....
و أشوف الشافوه،، و اضوق الضاقوه،
حبابك ياخي اعتبري البوست بوستك بعدين البوست ده اصلا موجه لي البنيات.. غير متزوجات ومتزوجات ومطلقات وارامل نداء عام يعني.. كل زول يجي خاشي هنا يشوف هل الامانة دي حقتو ولا لا كان حقتو يبذل فيها الربنا قاسمو ليهو وكن مرقت ماحقتو يتركها فهي امانة والله تعالي يقول.. وادو الامانات الى اهلها.. فانتي قومي اديها لي اهلها لو حسيتي بانو اهلها قريين منك..
أكبر نجاح للشاب دكين إنه خلا الناس دي تحلل وتحلل ويصلوا فيهو لمذاهب شتى ومدارس شتى ومظان شتى واتجاهات فهم شتى
زي ما انت شايف إنه ولد فاقد البوصلة وزي ما مولانا المرتضى شايف إنه دكين دا ما بذل مجهود كافي لتحديد بؤرة التفكير العاطفي أنا شايف إنه زول متفرد في حبه وإنه يبحث عن أنثى فريدة تستحق الحب الفريد الذي يحلم به دكين في تخلقاته المرحلية كلها,
واكبر دليل على كدا الجدية الواضحة لدرجة الفداحة والمفردة الخارقة (المخترقة) لحجب اللاواضح في مفرداتنا التي تتلبس بالحياء فلا تنتهى إلا بالنقل المخادع لحقائق مواقف الناس.
الحوار دا يا أيمن ربما كان محبوباً لي شخصيا لسبب آخر هو إنه أنا وزملاء كثر هنا عجزنا عن إدارته بنفس هذه الاختراقية لأزمنة طويلة
وهانحن نجد أنفسنا فيه وعبره ونتوسل لعباراته أن تنقل عنا ولو بعد حين
الأكيد هنا أننى قد تشرفت بمعرفتك وإلى أن أجد ما يناسب جميل كلماتك أرجو ألا نسمح لهذا النداء بالتدحرج إلى الخلف فمشكلة حبيبنا دكين حسب علمى ما زالت قائمة,, والرايحة ما جات,,,
تحياتى,,
أين أنت أيها التيتل!!!!
Post: #171 Title: Re: النداء الاخــير Author: أحمد الشايقي Date: 02-18-2009, 11:05 AM Parent: #170
