احــــوال سـوما

الليلة لا بهاء ابهى مما كانت عليه..
ولا اريج مما فاح ازكى..
ان القلوب التي عميت عن الشعر كان ذاك اوان إبصارها..
لقد رأينا نهراً من الشعرِ ..يخلع عباءته عند المنعطف..
وكما الأغنيات القديمات حين انسابت في ليالي الخرطوم في اوائل الثمانيات..
انساب نهر الشعر هادراً يزخر بالمعاني والاشواق..

دوما ظللنا نردد ان بؤساً مقيما ُيلازمنا هذه المدينة ..
ذلك البؤس الذي لامرجع له..
ابؤسُ ُ من غربتنا عن من نحب ..ام هو بؤسُ ُ من غربتنا بين من لانحب..
ام هو من فقرنا وقلة الحيلة رغم سنين الغربة التي خلت..
ام ذلك بؤس مستمدُُُ ُ من حال بؤس البلاد ..

بالامس تمكن منَّـا فرحُ ُ في المدينة..
تدخلت المعاني الجميلة في ليلة عجولة هاربة .. فمال عنا البؤس الى جهات جنوب الرياض فتزينت شمالها ...
زينتها صاحبة الحنان الضيفة العزيزة اسماء الجنيد (سوما)
فكانت احوالُ ُ من سوما ومن قطع الليل الجميل..
ومن احوال سوما قدرتها على الابتسام الدائم..
ومن احوال سوما فرحُ ُ يلازم السامعُ والناظرُ والمدينة التي تحل بها..
ومن احوال سوما بهاء الطلعة وحضورها المتألق ..
ومن احوال سوما صناعة الحنان في قوالب الكلام..
فوالله لو احتفت ايام بورداب الرياض بلياليها التي اُقيمت ما تزينت إلا بليلة (سوما)
كنا جماعة وكانو جماعة..
اقامو لها حفلاً وتكريماً فاستلمه (البورداباب) غير هيابين..
اكرمونا بالدعوة فكان جزاء رد جميلهم ان تمكنا من حفلهم ..
نأسف لذلك الاقتحام الجميل ..
ولكن المعاني الجميلة يا احبابي كما الحب والمحنة ونسائم النيل من على كبري بحري، هي معانٍِ لايمكن احتكارها ..
ولا اسحب اسفي للجماعة الكريمة من ابناء الجنيد ولكني اتسبب بالملكيات العامة في اسفي..
فسوما يا اهل الجنيد كما المعاني الجميلة لايمكن احتكارها ..
ملكيةً عامة ومعنىً يضيف الى الجمال قيمة..لذلك وجدتمونا في حال تلك الاشواق وحال ذلك الفرح..

واستغرب كيف لا تُضاف سوما الى مناسيب النيل الازرق او كبري بحري او حتى نشيد العلم ..*

يااحبابي ..
تزينت ليلتنا امس بسوما وزوجها المفضال وعائلتها الكريمة واهل الجنيد الافاضل..
تمكنا بفضل الله وحضورهم المتألق من بؤس ليلةٍ في الرياض..
جعلوا هذه الغربة اكثر احتمالا وليلاً ليهو ضل..

كم اتمنى لهم رحلة عودة سعيدة ..


















حاشية:
- ود الموج ..ذلك الادمي..كم ُيجيد التالق..
مافي شك انو ود الموج هو رائعتنا.. قدرنا الجميل وصاحب الصولجان في جماعة بورداباب الرياض..
- التحدث عن الفنان مرزوق هو فن لا اجيده..والبني ادم ده ربنا ختاهو في الرياض مسرة لينا..
ود الموج بسميهو موهوب وانا حاسميهو (مسرة)



ـــــــــــــــــــــــــــــــــــــــــــــ
شرح حالات المعاني:

*مناسيب النيل الازرق وكبري الحديد : هما مايسيطران على كل جميلٍ عندي.
*نشيد العلم : هو نشيد العلم.

الحبيب دكين

لك التحية

ما اجملك وانت تحدثنا عن نبع الجمال سوما
تلك الرائعة التى لطفت عالمنا الاثيرى هنا بحلو قصائدها وحلاوة كلاماتها وطلاوة عباراتها
انها تهدينا الشعر وكانها تنقلنا الى عالمنا الحقيقى فى الوطن الجميل فنرحل بكلياتنا الى هنالك لانها تحدثنا بلغة اهلنا البسطاء فتسكب كل حنينهم فى دواخلنا فنذوب رقة وحنينا وننسكب بكل جوارحنا حبا للوطن ...
والله ما اقرأ لها قصيدة الا واحس اننى سودانى واعيش سودانيتى كلها وانسى اين انا فلا يبقى الا السودان فى دواخلى ...

هنئيا لكم
ولعلنا نحسدكم على ذلك اللقاء وتلكم البهجة وذلكم الحنين الذى غمرتكم به والالفة التى عشتوها معا
ما اجملك ايها السودان
وما اجمل مبدعيك
ليت من يدعون قول الشعر قراءة شعر سوما ليعرفوا ان الشعر رسالة وان الشعر ان لم يتغلغل فى وجدان المتلقى فعلى صاحبه اعادة النظر فيما يكتب ...

انها سوما
وانها مدرسة متميزة فى حب الوطن وفى نقل مشاعر الوطن واهله بكل صدق واخلاص

التحية لها والتجلة والامنيات بالتوفيق والسداد وان تلمع دوما فى سماءنا بلا اختفاء....

والتحية لك اخى الحبيب دكين على هذا الجمال يا جميل الروح ...

بادئ ذي بدء
دكين متى صحوت من نومك يا وغد أم أن النوم قد فارق عيناك وما زلت مواصل ليلك بنهارك.
سوما يا ديكو زولة من زمن خاص.. تعرف كيف تختار حرفها بعناية وبلغة تتغلغل دونما إستئذان، لغة الأم والحبوبة.. وفي هاتين كل معاني الحنان.
قلنا أن حرفها واحة نتكيء على ظلالها وكلماتها امل نعبر عبر إلى جزر الحياة مرة أخرى.
لسوما ولزوجها الخلوق محمد الفاتح مليون تحية.. فالرجل كذلك شاعر مجيد.. ولأهل الجنيد مليون سلام.

قاتل الله رابطة ابناء الجنيد في المنطقة الغربية ..

Quote: قاتل الله رابطة ابناء الجنيد في المنطقة الغربية ..

اكضب عليك..
ايوه قاتل..

















تاني إلا في المائة عام القادمة..
انما هي كما المذنب يا هالك..

Quote: دكين متى صحوت من نومك يا وغد أم أن النوم قد فارق عيناك وما زلت مواصل ليلك بنهارك

وراق
نوم شنو البجيك بعد ليلية زي ديك يا وراق؟؟
انا توووش من هناك لي المرعى..

Quote: زولة من زمن خاص.. تعرف كيف تختار حرفها بعناية وبلغة تتغلغل دونما إستئذان، لغة الأم والحبوبة.. وفي هاتين كل معاني الحنان. قلنا أن حرفها واحة نتكيء على ظلالها وكلماتها امل نعبر عبر إلى جزر الحياة مرة أخرى

افتقدنا اخونا البعيو ..
وهمزاوي ..

العزيز المحترم العمدة قرشو..

اسعدتني كلماتك الانيقة يا انيق..
سوما يا قرشو بستان محنة وكلام جميل..
شعرها منجور من اخشاب دغلٍ حنينٍ موغلُُ ُ ُ في الياسمين..

Quote: ولعلنا نحسدكم على ذلك اللقاء وتلكم البهجة

وحُــق لكم ان تحسدونا..
فانا قد حسدت ماتبقى من ليل ..

إذاً فعلتها يا وغد..

كدنا نفقد تلك الإتكاءة ما بين هرطقتك وفقدان المخارج حينما إتهدينا انه لا بد من (يو تيرن) حتى نبلغ مقاصدنا ..فكسبنا فرحاً عظيم اوشك ان يتسرب من بين أيادينا..
هذه أسماء الجنيد حقيقة كاملــة وبذات شعرها المكحل بالمحنّة الذى إنساب فى رفق كما الرحيق فى قلب الشجيرات ...شُكراً شاعرتنا أسماء على بهاء حضورك ..شُكراً الأستاذ محمد الجنيد ..شكراًأهل الجنيد الكرماء..شكراً حمد فتح الرحمن الذى لولا فارهته لكنت قد إستيقظت ميكراً أستقبل يومى بصباح صيفى جاف ..فحمداً لله
التحية مرة أخرى للأستاذة أسماء وتشرفنا بوجودك وسط بورداب الرياض

Quote: فوالله لو احتفت ايام بورداب الرياض بلياليها التي اُقيمت ما تزينت إلا بليلة (سوما)

دكين .. سلام .. أحتفى الزملاء بآل الجنيد وبالشاعرة
سوما .. التي أسعدتهم بشعرها وتلقائيتها .. فسعدوا
يومين متتابعين .. كان قريبك حمزاوي بطل اليوم الأول
وإستكنه معاني الشعر لأول مرة .. فكثيرا ما قال عندما
يقرأ صديق الموج الشعر (ده بقول شنو ده؟) .. كـــان
حمزاوي سعيدا وصفق لكجبار وكشف عن أحواله .. وعن إسمه
الحقيقي (الرباعي) .. وقال مبارك .... .... الشريف
وقال: والله وحده يعلم ماذا بعد هذا الشريف .. أما حمزاوي
فهو إسم الأم .. وقال أن بخت الرضا منحته إسمه الحركي
(كردم) الذي كان يكتب به .. (يكتب بلسان ويحيا بلسان)

شكرا للشاعرة أسماء الجنيد التي جمعت البورداب على
الفرح .. وشكرا لك ولحمزاوي وصلاح شتات ومعتصم دفع
الله وصديق الموج ولتمبس حامل الكاميرا للإمساك بكل
لحظة جميلة .. والشكر للبورداب .. وقبلهم لأل الجنيد
الذين أهدوا بورداب الرياض يومين شعريين جميلين..

ياخي ما قلنا ليك شوف لينا احوال القيامة ... عامل فيها ما سامع يعني...

استاذ محمد عبدالجليل..
جد نحنا كنا سعيدين جدا بي حضور ال الجنيد
الاستاذة اسماء والاخ الفاتح والجنيداباب على وزن ماقاله اخونا ابو االبنية ام ابتسامة تشبه النجوم الجميل / مهدي الصادق ..
حضورك ياجليل ومعاك الاستاذ عبد المنعم ختا نكهة وختم البورداب والجو المشرف االغارق في عراقته..

Quote: وقال مبارك .... .... الشريف وقال: والله وحده يعلم ماذا بعد هذا الشريف ..

الشريف هواخر نسب السيدحمزاوي منها وسيدنا نوح..
حمزاوي سقط من ثقبُ ُ في التاريخ يا جليل..


حقيقي فقدنا الخال حمزاوي في تلك الليلة ..
حمزاوي دوما اول المشجعين لي على دخول حلبة الهجيج..
طبعا ود الموج اصلا كاسر عمود طوالي في حلبة الرقيص..
منها مابزح..


ــــــــــــــــ
خاص الي حمزاوي
تبيع اخوك في الليلة الاولى ياحمزاوي ؟؟
جاء الخريف ..ونحنا هنا وقفنا..

وليد طه

انا دوما من يتحفك بالمعاني الجميلة..وقريبا انا الزول الحيرسل ليك مصاريفك هناك ويمكن اضيفك في اقامتي مامعروف..

وتُتحفني بالكلمات اللطيفة..

Quote: هذه أسماء الجنيد حقيقة كاملــة وبذات شعرها المكحل بالمحنّة الذى إنساب فى رفق كما الرحيق فى قلب الشجيرات

اتحفنا حمد بكرمة واسعدنا بحضورة ..فقد كان على غير العادة متالقا من غير سوء..

استيقظ دكين من نومه الدفين

وقد بهره ضوء شديد

صرخ

اهي ليلة القدر ام انه الكهربا جات عشان نملى الباقات

قيل له

اصحى يا بريش

انهما برقا الجنيد

الفاتح وسوما

والكواكب احتفلوا بالقمر

Quote: استيقظ دكين من نومه الدفين وقد بهره ضوء شديد صرخ اهي ليلة القدر ام انه الكهربا جات عشان نملى الباقات قيل له اصحى يا بريش انهما برقا الجنيد الفاتح وسوما

دكين
لو في صور يا ريت تختها نشوف المناسبة الحلوة دي !!!

وكمان مرور لالقاء التحية

Quote: لو في صور يا ريت تختها نشوف المناسبة الحلوة دي ]

دوما في صور ..
ودوما انا في الخدمة..

ديل كانو الضيوف


وده جزء من الحضور

وانا ماقاعد اهظر ..

انهما برقا الجنيد
الفاتح وسوما
والكواكب احتفلوا بالقمر



ـــــــــــــــــ

صدق دكتور محمد

ازيك يا دكين

شفت ديل تحديداً مقام سوما مش احوالها

Quote: قدرتها على الابتسام الدائم

و

Quote: صناعة الحنان في قوالب الكلام..

محبتي تغشاها وين ما كانت

وامانة عليك تقول ليها في شارع سفلت من السلطنة لحدي صنعاء
ما سمعتو بيهو يعني ؟

دكين ازيك

يوجد رقم موبايل في البوست الخاص بالترحيب بسوما وأسرتها الكريمة
اتصلت مخصوص عشان أهنيكم على هذا السبق
والاحتفاء بآل الجنيد
خاصة وانني أول من قدمت الشاعرة المتفردة لسودانيز أون لاين
لكن مافيكم خير ياناس الرياض
فكيتونا في الهواء
المهم برضو قلنا نتصل عليكم
رد واحد اسمو عبد الله
بس ما يكون دا تلفون الاستراحة لأنو الظاهر في مقلب كبير
قلت ليهو يا خي انتو ناس سودانيز أون لاين
قام قال مافي اسبيرات هنا
قلت ليهو معليش انا معناها شايت ضفاري وخارج الشبكة

قال اسبيرات قال
نهائي ماعرف سودانيز أون لاين دي شنو ياكافي البلاء !!

Quote: خاصة وانني أول من قدمت الشاعرة المتفردة لسودانيز أون لاين لكن مافيكم خير ياناس الرياض

فيك الخير يابو حراز بهذا التقديم ..
ويوم شكرك مايجي..

الجماعة جو على عُـجالة وزي ماشايف البوست بتاع د. محمد تم القبص عليهم في عجالتهم ..
ثمة بوست خاص بحضور آل الجنيد تم انزاله من قبل العزيز مهدي الصادق
في متنه دعوة عن طريق جميل السجايا معتصم بن دفع الله ..
انتا بس نضارتك لودت ياب حراز..

اخوك ذاتو لقطها صدفة وحياتك ..





انا غايتو لو منك ابكي..

وليد شريف ..

وحياتك ليك شوق..
موش انا قاعد اتصل بيك..قصرتا معاك؟؟
في الحقييقة انا دوما البتصل بيك .
انتا طيب ليه ما بتتصل..

سجى كيفنها؟؟
شوق كتير ودمتا رايق والمنبر فاقدك والحفلات فايتة سجي وامها ووود الباوقة وآله..

العزيز وليد شريف..
شوقنا بتحداك..

دوما انا البتصل بسال..مرة اسال مننا..
سلاماتي لي سجى ..

Quote: وامانة عليك تقول ليها في شارع سفلت من السلطنة لحدي صنعاء

ابرهة نقل الكعبة بي غادي ولا شنو؟؟








انتي ياجندرية في زول قال ليك الناس ديل شغالين في (المرور السريع) ومبارين شوارع الظلط؟؟
ديل جو لي اشواق قاصدة الله والنبي..
نحنا بس كنا زي الطرمبات في نص الخلا ..
استجمو عندنا وواصلو ..








ــــــــــــــــــ

والله ياجندرية انتي اكتر زولة تستاهل سوما والفاتح ديل يجوها ..
انا ادعم شحدتك المهذبة الخجولة دي بشدة ..
دومي في الف خير
ودعواتي الصادقة لي العزيز عثمان تراث بتمام العافية والشفاء ..

دكبن

ذلك ألأحساس الدفين


صاحب الكلام الرصين.....وتلك حقيقة وأنا شاهد عين...

إنفلق الصباح...ووأكد الديك صحوى يالصياح.....هل أنا فى حلم أم علم؟

كل ليلة أحلى من أختها.وأمس إستمتعنا بجد بكل الحضور..صديق الموج هذا ديدنه.نشط كما العصفور يحلق فى كل سماوات المنابر غناء فكاهة شعر.

معتصم وتمبس ألمتلازمين فى إلأبداع دومآ تصوير وتوثيق ما شاء الله حبور وحضور.

خالد سعيد ألأرباب ما تلتقيه إلا وتبتسم أو تضحك.

ألأخ/خالد المحرب وحرمه المصون ألأخت عفاف أبوحريرة وأسرتها الكريمة .حفظكم الله لنا أنتم أهلنا فى هذه الغربة القاتلة.

عادل جبارة عبدالله داش.د/محمد حسن صلاح شتات.إسماعيل وراق.مهدى الصادق.وليد طه.نجوم تتلألأ فى سماء الحفل بالحضور ألأنيق.
محمد عبدالجليل ذلك ألأدب الجميل.
كل الحضور شكلوا باقة من الزهور.كان أريجها وعبيرها ألأستاذة أسما الجنيد وزوجها محمد الفاتح الجنيد وأسرة الجنيد بالرياض.

كانت أسماء وكانت.كانت الحضور الجميل ألأنيق...أعجبنى فيها تواضعها زتعاملها مع الناس بفن وحضور وتوحد..

حفظكم الله بورداب الرياض.ومتعكم بالصحة والعافية.وزادكم توحدآ وتضامنآ وإلفة.

إسماعيل محمد أحمد عباس........

الاستاذ اسماعيل

Quote: كل الحضور شكلوا باقة من الزهور.كان أريجها وعبيرها ألأستاذة أسما الجنيد وزوجها محمد الفاتح الجنيد وأسرة الجنيد بالرياض

ده الكلام الصورتو فوق لي صاحبة المودة سلمى صبحي ..
كان الحضور وردا واسماء وزوجها محمد الفاتح اريجُ تلك الليلة..


انما كانت ليلةً في بستانٍ حريف انيق مُـعتني به..

للتكرار .عفوآ

عزيزي دكين
وصديقي د. محمد حسن
لم يستيقظ دكين لأنه فيما يبدو لم يذق للنوم طعماً ،
فقد أخذته ليلة البهاء الثانية وأيما مأخذ ...
لم يتحمل هذا الكم الهائل من الألق وأسكرته الجرعة
العالية من الإبداع والإمتاع ... ولربما كان محظوظا
ًأن فاتته ليلة البهاء الأولى لأن قلبه الرهيف وإحساسه
الشفيف لا يستطيعان تحمل كل هذا الإشعاع من الجمال والبهاء ...
مفاجأة ليلة البهاء الثانية أن كشف لنا الأخ محمد الفاتح الجنيد
عن إبداع لم يكن مستغرباً ... قرأ أبيات من شعره وكشف عن سر
تعمقه في أدب المناحة والرثاء ....
وإن انطوت ليالي البهاء الأولى والثانية فسيبقى الإحساس بطعم
الرحيق ولون الشفق مرسوماً على وجوه بورداب الرياض ردحاً من الزمن ...
وقد تكون الشمس أحلى حينما تحاول الغيابا ...
لك الشكر أخي مهدي الصادق نيابة عن كافة بورداب الرياض لما أهديتنا
من أيام لا تنسى وذكريات لن تنمحي ...
والتحية والتجلة لأهل الجنيد الكرام العظام فرداً فردا ...

عادل جبارة ...

ابو آمنة

Quote: ياخي ما قلنا ليك شوف لينا احوال القيامة ... عامل فيها ما سامع يعني...

واحد قال لي انتا في الشرقية وانا بين مصدق ومكذب..

معقولة بس ياخ...
انتا مابين الظنون وانا هناافتقدك بشدة..

الاكثار منك غير صحي بس التخلص منك مرة واحدي كده قاتل..

مشتاقون يامدهش وليك وحشة..

وده طرف من احوال الاخرة..
طرف من خبر الاخرة

خم وصر اريتو حال اخرتك..

Quote: حاشية: - ود الموج ..ذلك الادمي..كم ُيجيد التالق.. مافي شك انو ود الموج هو رائعتنا.. قدرنا الجميل وصاحب الصولجان في جماعة بورداباب الرياض..

انت يا سجم الرماد
مالقيت غير سجم الرماد الزيك دا
اتلم المتعوس على خايب الرجا

حاشية
احسن ما حاشيتك
وجع وجع انا كمان حضرت الحفلة الاولي في مخرج 18
ولكن الاستاذة سوما تحتاج التكرار والتكرار

العزيز حمزاوي صاحب المحبة الخاصة المحمولة قلباً

Quote: انت يا سجم الرماد مالقيت غير سجم الرماد الزيك دا اتلم المتعوس على خايب الرجا

ونعم التعاسة كان حال ودالموج ده حاتل تعاسة..

الهي تنتعس زيو قادر ياكريم..

Quote: ولكن الاستاذة سوما تحتاج التكرار والتكرار

سالتك منك سوما بالمناسبة
ومن ثم القت ملحمتها عن كجبار ..

النبي فوقك يا دكين
حاجاتكم السمحة دي ما تجيبوها وتجوا عندنا المغرب
البلد هنا رغم جمالها لكن تفتقد لألق سوداني أصيل

محبتي الاكيدة للجميع

طارق جبريل

انتا ياخوي قاعد وين ؟؟

حتة مافيها سودانين دي عايزين نودي فيها زول اسمو بكوري عشان مايعاني من تخلفنا ..

محبتي ليك يا غالي..

على كل حال

لم أذق للنوم طعما حتى الآن
يصارعنى النعاس
ولم يفلح

لانى مليان فرح
...

..

.


دكين

كان وصفك للحدث كاملاً


فقط أمنْى النفس
بليال عشر


آل الجنيد شكراً
فكرمكم نشهده علنا
وحفاوتكم فى البال

داش

الشاعر الثوري..
ذكرتني قصيدتك بايام ليالي الجامعة الشعرية في قاعة البغدادي ودار النشر..

شيئا من الحب شيئا من الثورة..
كانت قصيدة رائعة وقصةَ حبٍ جميل..


دمتا رايق ياحبيب..

قال المهذب ذو التهذيب العالي عادل جبارة:

Quote: لم يستيقظ دكين لأنه فيما يبدو لم يذق للنوم طعماً ، فقد أخذته ليلة البهاء الثانية وأيما مأخذ ... لم يتحمل هذا الكم الهائل من الألق وأسكرته الجرعة العالية من الإبداع والإمتاع ... ولربما كان محظوظا ًأن فاتته ليلة البهاء الأولى لأن قلبه الرهيف وإحساسه الشفيف لا يستطيعان تحمل كل هذا الإشعاع من الجمال والبهاء ... مفاجأة ليلة البهاء الثانية أن كشف لنا الأخ محمد الفاتح الجنيد عن إبداع لم يكن مستغرباً ... قرأ أبيات من شعره وكشف عن سر تعمقه في أدب المناحة والرثاء .... وإن انطوت ليالي البهاء الأولى والثانية فسيبقى الإحساس بطعم الرحيق ولون الشفق مرسوماً على وجوه بورداب الرياض ردحاً من الزمن ... وقد تكون الشمس أحلى حينما تحاول الغيابا ... لك الشكر أخي مهدي الصادق نيابة عن كافة بورداب الرياض لما أهديتنا من أيام لا تنسى وذكريات لن تنمحي ... والتحية والتجلة لأهل الجنيد الكرام العظام فرداً فردا ...

وماقال عادل جبارة إلا كل الكلام ..
وفعلا لك الشكر اخونا مهدي الصادق نيابة عن كافة بورداب الرياض لما أهديتنا
من أيام لا تنسى وذكريات لن تنمحي ...

عادل مودتي كلها ودمتا رايق ..

الرائع دكين
افتقدناك فى الليلة الاولى واجتهدنا لكى نتصل بكم لحضور الليلة الثانية والمناشدة موجودة
فى بوست د/ محمد حسن .
التحية والتقدير لكل ابناء الجنيد لانهم منحونا هذا الابداع الثر والكرم الحاتمى فعلا كانت
ليلة ابناء الجنيد امتدادا لليلة الاولى بل هى مكملة لها لاننا اطلعنا على جزء من الديوان الجديد للشاعرة سوما كما التقينا باخوة اعزاء من بورداب الرياض بقيادة الحبيب دكين فهذا زاد اللقاء القا وبريقا .
ليس بيننا شكر احبتى عادل جباره وداش فنحن نمثل جسدا واحدا مترابطا برباط الاخوة الصادقة والشكر الجزيل للاخ العزيز الفاتح الجنيد ابو رامى والى شاعرتنا المجيدة ام رامى ولكل ابناء الجنيد بالرياض الذين اكرمونا ايما اكرام . ستظل تلك الليلتان (السبت والاحد ) من اجمل ليالى سودانيز اون لاين وشكرا بكرى ابوبكر الذى ربطنا بكم .
شكرا يارايع يادكين

الرائع دكين

Quote: افتقدناك فى الليلة الاولى واجتهدنا لكى نتصل بكم لحضور الليلة الثانية والمناشدة موجودة

ابو النجوم مهدي :

والله ماشفتها يا مدهش..

بس ربنا عوضنا ..
سعدت اكتر بالتعرف على البنات الشاعرات وام النجوم..

بصراحة يا مهدي سوما وزوجها ديل كانو هديتك انتا وزوجتك لي ناس الرياض ..

دمتم ودامت محباتكم ونجيماتكم ..

Quote: قاتل الله رابطة ابناء الجنيد في المنطقة الغربية ..

السؤال المنطقى جدا هو هل اقاموا لها ليلة فى المنطقة الغربية ؟؟؟؟؟
وهل يعرفون انها منضوية تحت كيان آخر يحوى افرادا فى المنطقة الغربية ؟؟؟؟
وهل يعرفون افراد هذا الكيان او هل فيهم من هو منضوى لهذا الكيان ؟؟؟

اسئلة يجب معرفة اجاباتها قبل ان نشن عليهم هجوما كاسحا

فكلنا غضب لمرور شاعرتنا من بين ظهرانينا دون ان ندرى

شكرا حبيبنا دكين وانتوا تستاهلوا كل جميل وطيب
اخونا قرشو تحياتى
ظروف الاستاذ محمد الفاتح والاسرة كانت ضيقة جدا بعد اداء عمرة 27 وزيارة مدينة الرسول
عليه افضل الصلاة والتسليم والعودة سريعا الى الرياض والتى كانوا يودون العودة منها مباشرة الى السلطنة ولكن لوعدهم الذى قطعوه لنا جبرو بى خاطرنا ولعلمك كان مخططا لهذا اللقاء مساء الجمعة ولكن طول الطريق من مكة الى الطائف ثم الى الرياض اديا الى تأخير هذا اللقاء الى يوم السبت ثم جبروا بى خاطر اهلهم ناس الجنيد اهل الكرم والشكرة يوم الاحد وكان هذا من حظ دكين والشلة التى لم تحضر اللقاء الاول .سوف يعوضكم معتصم بتنزيل الصور والفديو .

الوغد المشوطن دكين تحياتى
لا اظن ان بوستا واحدا كفايه على زيارة اسماء الجنيد للرياض
فكل شىء فى اسماء يحتاج لبوست منفرد...
والله لم ارى وجها باسما يعلوه البشر ويفيض بالسرور كما رايت ذلك عندهاماشاء الله (عين حمزاوى فيها عود وكمنجه)
برغم سماجة اسالتنا وحرارة طقس الرياض هذه الايام
استطاعت اسماء ان تكيف الرياض تكييفا مركزيا عالى الجودة
بكلماتها التى تغطس الى الاعماق باردة لتنزل لطيفة كحلمات الشفاه على ظامى الخدود
او عنيفة كاطراف الخناجر على رقاق الاكباد او مزجا بين هذا وذاك
وفى الحالتين كلنا مندهش..
ظلت المراة ملهمة الشعراء على مر العصور ولكن ان تسمع شعرا من احد الملهمات
ففى ذلك عجب...
الشعر عند اسماء حنين كان شفاها قد لونته
فيه ريحة طرقة حبوبه مع عبق كسرة معيوسه بى حطب
مما يجعلك تستاف ارج كركار لتملى رياك من هذا العطر...
كلنا تطيبنا من حق كبير لاسماء
وتعطر معنا ليل الرياض مما حدا به يسترق النظر الى انفاس البطانه
ممنيا نفسه بان تندغم معه فى كبسولة الفرح التى تخلقت يومئذ...
واخيرا دعونى احدثكم عن المهذب الفاتح الجنيد زوج سوما
وشريكها فلولاه ما كان ذلك ممكنا.
فهذا رجل من معدن لا يصدأ...لطيف كنسمه..رقيق لايشبه الغربه
ولا يشبهه الاغتراب..
يسلم عليك فتحث بحرارة سلام تفتقدها الا من ام..وشحنات كهرومغناطيسيه
من الود تكفى لدرء خطر انقطاع التيار الكهربائى عن العاصمه وضواحيها
المبرمج منه والغير..
وابناء الجنيد بكرمهم وتواصلهم وبساطتهم يكفوك مئونة التكلف..
اقاموا ليله ودفعوا اكلافها دراهم معدودات وكانوا فيها من الزاهدين
لم نفسح لهم مساحة لالقاء كلمة قصيرة يرحبون فيها باخوانهم....
بانانيتنا المفرطه نحن البورداب لم نحس بثقالتنا عليهم
ولكن هل نحن فى تلك الليله غير هم؟؟ وفيهم الفاتح الجنيد الثانى وهو ابن عم الفاتح الجنيد زوج اسماء
وخالها فى وقت واحد..فنعم الاخوان هم لا مستثنيا احدا من الكرام...
دكين كان يجب علينا ان نكتب عن تلك الليلتين فى وقت يسوده الصفاء اكثر
ولكن انى لنا؟ فى هذه الغربه الملعونه...
الشكر لكل بورداب الرياض ،شتات معتصم،تمبس،د.محمد حسن ،داش ،المحرب،عفاف ابوحريرةحنين،مهدى الصادق،ايات الصادق
الهلباوى،وليد طه،يوسف حمد النيل،عبد المنعم عمر،محمد عبد الجليل
محمود بكر،حميضة،يوسف السمانى،مصدق،الوجيه،ادريس خليفة،اسماعيل عباس،عادل جبارة،
علاء حيمورة،حمد فتح الرحمن،ود وراق،خالد سعيد،
وعشان خاطر اسماء الشكر لك حتى انت يادكين مصحوبابكبير الاوغاد حمزاوى،،،،

دكين فتحت لى الود حيشان وابواب ضلفتين
تاكيت غناك فى ضرا البيت الكبير
لميت الصغير والكبير
خمشنا بالهين والاتنين وادينا الجيران برا فرز
باقى الفضل حجينا بيه اللسه بتاوق فى الحكر
ولمينا الباقى لى يوم باكر
والسماحه لسه مشتته فى كل الديار
اتاوق جاى بلقاك محكر دوبيت
واتاوق جاى القاك موهط مسدار
ساعدنى الملم حجاى معاك
شد حيلى كان اقدر اقيف وسطكم واجاريكم فى سماحتكم
فقدتك فى الليله الاولى ناغمت تمبس الحنين
حنين بى بسمته المرسومه ديمه
وونستو السمحه لامن مكملة السماحة
قال لى يا سوما بفتشو بكوسو عقاب الليل
وبجيبوا من مافى .. ونجح ود الاصول
وباقى الاخوة ما قصروا ضمه ..
وجيت تميت اللمه باريحيه وسماحة نية
عارف يا دكين يا خوى .. كنت قايلاك زولا كبيـــر وماااااكن
وده انطباع اخدتوا من بوست قديم لى اساسى الله يطراه بالخير
( دكين دى كفك ولا حيطه ) هههههههه
كل ما اقراه بضحك فى التعبير السخرى
من الزول اساسى كان نفسى الاقيه عشان
اعرف سر التسمية .. لكن يا اساسى انابقول ليك
دكين كفو الشايله الحنين
وحاضنة الزهور جرفين
بى سلامو بيحتويك
وبى حجاهو يلولى فيك
سمح غناه يسرى فيك
والبشاشه تنادى ليك
شكرا دكين شكرا مارقة من الجوف
اسماء الجنيد / مسقط

Quote: شكرا دكين شكرا مارقة من الجوف

يستاهلا ..

تحية ليكم كلكم

سكرت تب من محبتكم

العمده قرشو
كم تمنيت ان تكون ضمن الكوكبة الرائعه من بورداب الرياض
وحقيقى كنت فاكراك انت والاخ المطر والاخ ابو حراز بالرياض
وفعلا سألت منكم بقية الاخوة اكدوا لى وجودكم بجده
ومن خلال مداخلات البعض عرفت انكم مجموعه بجده
عذرا لكم ايها الحنين قرشو ..
حقيقى الزياره كانت غير مخطط لها
بالنسبه لبورداب الرياض ..
لكن بفض تكاتفهم واصرارهم نجح اللقاء نجاحا
مشهود له من الجميع ..
وعد منى ليكم يا ابناء المنطقة الغربية اقرب مناسبة لكم
ادونى خبر بجيكم جاريه بى شوقكم الجواى
اخوى قرشو الحنين .. عار فاك من زمان موشحنى محنة
ومتوجنى سماحة بى سماحة كلامك المن دهب
انت معدن لا يصدأ ابدا اخى قرشو
رغم معرفتنا الاثيريه لكننى احسك اخى القريب وابن بطن امى يعلم الله
شكرا اخى قرشو واتمنى دوماان يسعدنى الحظ
واسعدكم قدر السعاده البشيلا منكم فى كل لقاء
حتى ولو عبر السطور
شكرا قرشو الاصيل شكرا قدر الطيبة الساكنه قلوب اهلنا
***
اسماعيل وراق حبابك من تانى يا سقف الاهل
شفت طيبتك واصلك
وين ما امشى بلقاك محكر مع الطيبين
زى لمتنا فى الليلتين .. سماحة الحفلتين كانت نابعه منكم
ومن طيبتكم وتكاتفكم .. اتمنيت فى اللحظه ديك
ولى هسه اكون من ضمن بورداب الرياض الحلوين
شكرا يا ملك شكرا بعمق نيلنا الخالد
***
اساسى يا اساسى كيفنك يا العشا
والله يا اساسى ما بلومك ولا بعاتبك
عارفاك داير اللمه والفرحه
لكن الظروف القاهره نعالجا كيف
زى ما شرحت لى اخونا قرشو
والله ما عارفاكم مجموعه متجمعين فى المنطقة الغربيه
ولا ما كان غلت عليكم كراعنا يابا
يعلم الله بندور اللمه والفرحه الكبيره
لكن حقك علينا انا وود الجنيد ولك العتبى حتى ترضى
وشيل عذرنا معاك لى بقية الاخوة والاخوات
والوعد بينا واقف ان شاء الله
شكرا اساسى شكرا حواشات واعتذارنا جداول موية صافية
***
وليد طه الزول الهادى البشوش
حبابك بى قلدة محنة واشواق اهلنا
شرفتنا يا الطيب بى زيارتك ومشاركتك الروتنا حد الطوفان
كنتم حقيقة نعم الاخوان ونعم الاهل
لحظه ما حسيت انه اللقاء كان اول مره ..ولم تسبقه معرفة قديمه
احساسكم جيتوا طاوينوا محنه فى كفوفكم
وفى ملامحكم محكر الفرح قمر دورين
وليد طه شكرا غيمه ومطرتين
وتسلم يا الحنين

حبابك من تانى اخوى الجميل محمد عبد الجليل
نورتنا وشرفتنا وبتعبيرك الظريف عن اخونا حمزواى ضحكتنا
والله صدقت فعلا كان اخونا الظريف اللطيف حمزاوى نجم الحفل بلا منازع
تعليقاته العفويه خفيفة الظل اضحكت الجميع من الاعماق
والله لما قال اسم حمزاوى ده اسم الوالده ضحكت كما لم اضحك من قبل
حتى اللحظه انا بضحك فى التعبير الظريف
شكرا اخوى محمد وشكرا لى حمزاوى طيب القلب
شكرا ليكم بلا حدود
***
الاخ جعفر بشير
مرحب بى طلتك معنا يا ود البلد
وحبابك عشرة
****
التحيه للجميع ولى عوده مع بقية الاخوة والاخوات المتداخلين
شكرا قدر سماحتكم يا اهل

سوما..
شكرا لعباراتك التي تفيض رقة وامتنان..



وزي ماقال محمد حسبو ..
نبحث عن ترحيب يليق بكم..فامهلونا الى يوم ُيبعثون..

Quote: اساسى يا اساسى كيفنك يا العشا والله يا اساسى ما بلومك ولا بعاتبك عارفاك داير اللمه والفرحه لكن الظروف القاهره نعالجا كيف زى ما شرحت لى اخونا قرشو والله ما عارفاكم مجموعه متجمعين فى المنطقة الغربيه ولا ما كان غلت عليكم كراعنا يابا يعلم الله بندور اللمه والفرحه الكبيره لكن حقك علينا انا وود الجنيد ولك العتبى حتى ترضى وشيل عذرنا معاك لى بقية الاخوة والاخوات والوعد بينا واقف ان شاء الله شكرا اساسى شكرا حواشات واعتذارنا جداول موية صافية

اكيد دايرين اللمة والفرح يا سوما
ابداً لا نرمى لوما عليكم اختي ولكن ان كان هناك عتابا فما نزال نعاتب رابطة الجنيد بالغربية
فان لم يعرفوا بقدومك فهم يستحقون العتاب
وان عرفوا ولم يجتمعوا فايضا يستحقون العتاب
وان كانوا لا يعرفوك فهم اهلا للعتاب
ولكن ان شاء الله تتكرر ما دامنا بين ظهرانين ارضه الحرام فاكيد ستعودين مرات ومرات
لا كما قال الهالك مثل المذنبات
تحياتي لود الجنيد وكل الاسرة

Quote: دكين كان يجب علينا ان نكتب عن تلك الليلتين فى وقت يسوده الصفاء اكثر ولكن انى لنا؟ فى هذه الغربه الملعونه...

ماخاتي السماك ود الموج..غرقنا بحر كلامك ومرقنا درر وصفك يا موج..
وجودك كان كنجم السعد ياموج ..حركة دائبة ومرح قاصد..
كل شي تم على عجل ..
ومر سريعا كحلم عسير المنال..
ناس طيبة وسمحة مرت من هنا..
حاولنا ان نختزل تلك السماحات في ليلتان متتابعتان ..
فهمزتنا سماحة ال الجنيد ..
فلا الليل اسعفنا ولا السماحة اوفيناها حقها..

-

دكين ترانى اعود مجددا لهذا البوست المنقوع فى بحر سماحه
والعود احمد....
انا الليله عرفت ليه ناس عبود زمان اختارو الجنيد عشان يشيدوا
مصنع السكر ولم يختارو اى منطقة اخرى من مناطفق الجزيرة!!!
ياخى انا متاكد بعد الشفنا من ال الجنيد واهلها كان ممكن السكر
ينتج بدون قصب...
ناس نضمن سكر..وسلامن سكر...وضحكن سكر...وترحابن سكر
فما حوجة المصنع للقصب..
سوما والفاتح ليلتين مازالتا حديث البلاد والعباد
وردا يلوكه البورداب هنا دبر كل صلاة او اجتماع..مازالتا
تمطران فى احشاءنا عهدا من الود الجميل...
شكرا لكما الحضور البهى...
ياريت الحج لو يكون كل تلات اشهر والعمرة فرض عين كل جمعه
واوصيكم كما الحج عرفة فالعمرة الرياض، لا تكتمل الا بزيارة مماثلة
فهلا استجبتم،،،،

الغالية سلمى صبحى حبابك من تانى
نورتى كل الامكنه يا حنينه
شكرا زهور فى جنينه

****
الجندريه البنيه الفنجريه
طلتك بتجيب الخريف باكريه
مشتاقين يا غالية من عز الاهل
والجيه ما كتيره عليك تب يمه
نشحد الله الهونها علينا نتلب بى غادى مع ناس الرياض
يسهلها علينا نجيكم ولا تجونا وحبابك عشرات يا ام الخيرات

متاوقة
دكين سؤال فى محلو دحن انت رباطابى ؟
ضحكت من الاعماق لتعليقك عن ابرهه والكعبه
الجندريه دى حنينه حركاتك دى اعملها مع ناس اساسى

تسلموا الاتنين والشكر ليكم قمر دورين
***
وازيك انت كمان يا وليد شريف واريت حالك زين
حبابك معانا واتفضل يا جوه
***
ابو حراز ود اهلى العزاز
كيفنك يا الدخرى يا سند ضهرى
والله .. والله ما طالبنى حليفه سألت منك بالاسم
قالوا لى انت فى الطايف زعلت زياده لانى غشيت الطائف من الشضهر
ورجعت منها بالليل لانه اهلى فيها
قابلنا بعض الاخوة والاحبه
لكن كنت متأكده انك فى الرياض ما عارفة ليه
حقك على انا ما على زول تانى
والزعلنى اكتر بالتلفون ما قدرنا نلاقيك
الله غالب ياخوى ..ان شاء الله نتلاقى كلنا ومعاك ست النفر فى البلد قول آمين
ضحكتنى طبعا لما قلت رد على بتاع الاسبيرات لووووووووووول
حظك مكعوج جد يعنى .. وبرضو تقول لى لموا عليكم رماد سكركم مننا
هسه كان رضيت بيه كان نفض منك غبار الحظ العجيب ده
تسلم ابو حراز يا فاكهة البورد ويا دليلى النير لى حوش بكرى الوسيع
شكرا ليك ولى ست النفر
***
اخونا طارق جبريل
سلام بحجم الوطن
يا ريتك كان كنت قريب واتلمينا كلنا مع بعض
الجايات اكتر ان شاء الله وخيرها فى غيرها
رد الله غربتنا جميعا
***
الاخ المفضال حيدر حسن مرغنى
حبابك بين خيانك نورت وشرفت يعلم الله
ان شاء الله دائما مبسوط ومنتشى فرح
جعل الله ايامك كلها افراح يا ود القبائل
شكرا قوس قزح
****

ود الموج اهل الذوق الناس الفوق
فوق بى بشاشتهم وطبعهم العالى فوق للثريا
موجك انطرح بالوان قزح لون ساحتنا تياب وطرح
شرا الفرح جوانى وبرانى هز الكون طرب وقدلت كل الحسان
تب العديل والزين واتجرتقت ساحاتنا بى عرضتكم الصقريه
ود الموج موجت الليلتين بلطافتك وظرافتك ومع اسرتك الكريمه
ما شاء الله وعينى بااااااااارده عليكم
منك بدت كل المعانى الساميه ومشاركتك حسيناها فرحه جوانيه
لا مجامله ولا مباهاة .فرحت وطربت لما رقصت معاك كل الشرايين والعروق
خجلتنا بى احساسك الدافق انت وست الحسن والصون والعفاف
ربى يخليها ليك ويخليك ليهاويخلى ليكم وليداتكم الحلوين بركة رب العالمين
كم تمنيت ان تطول اقامتنا ..لنتمكن من زيارتكم بالدرب يا اهل الكرم والادب
لكن الظروف حالت دون ذلك .. وما قصرتوا معانا تب ..
حاشاكم التقصير يا اهل الجود والخير
عزانا الوحيد انه الظروف تجمعنا من تانى ويا ريت المره دى تقبلوا تجونا
حبابكم بالكتير ما شويه يا اهل من قلب البلد
التحايا عبرك للعقاب وكل الاحبه والاصحاب
وشكرا تيراب
تيراب جدود يا ود الاصول
شكرا ود الموج قدر سماحتك وطبعك الفريد من نوعو وعصرو
شكرا قدر فرحى بيكم

الاسم: دكين عشا البايتات
سنة الميلاد :1974
مكان الميلاد :دنقلا - كلتوس انجلوس
الابتدائية : الهمك بنين وبنات
المتوسطة: الكدور - الري المصري
الثانوي : المقرن الثانوية
المؤهل : جامعة الخرطوم - كلية الفلك
الخبرة العملية: مجلس العدل
اضافات اخري مهمة:

Quote: فتحت لى الود حيشان وابواب ضلفتين تاكيت غناك فى ضرا البيت الكبير لميت الصغير والكبير خمشنا بالهين والاتنين وادينا الجيران برا فرز باقى الفضل حجينا بيه اللسه بتاوق فى الحكر ولمينا الباقى لى يوم باكر والسماحه لسه مشتته فى كل الديار اتاوق جاى بلقاك محكر دوبيت واتاوق جاى القاك موهط مسدار ساعدنى الملم حجاى معاك شد حيلى كان اقدر اقيف وسطكم واجاريكم فى سماحتكم فقدتك فى الليله الاولى ناغمت تمبس الحنين حنين بى بسمته المرسومه ديمه وونستو السمحه لامن مكملة السماحة قال لى يا سوما بفتشو بكوسو عقاب الليل وبجيبوا من مافى .. ونجح ود الاصول وباقى الاخوة ما قصروا ضمه .. وجيت تميت اللمه باريحيه وسماحة نية عارف يا دكين يا خوى .. كنت قايلاك زولا كبيـــر وماااااكن وده انطباع اخدتوا من بوست قديم لى اساسى الله يطراه بالخير ( دكين دى كفك ولا حيطه ) هههههههه كل ما اقراه بضحك فى التعبير السخرى من الزول اساسى كان نفسى الاقيه عشان اعرف سر التسمية .. لكن يا اساسى انابقول ليك دكين كفو الشايله الحنين وحاضنة الزهور جرفين بى سلامو بيحتويك وبى حجاهو يلولى فيك سمح غناه يسرى فيك والبشاشه تنادى ليك شكرا دكين شكرا مارقة من الجوف اسماء الجنيد / مسقط

سوما
الكلام ده انا شلتو ختيتو في الـCV
بقى ضمن السيرة الذاتية ..


تسلمي يا حنينة..

والتحية ليك انت يا دكين منقوعه فى شهدك
تسلم يا ود ملوك النيل
شكرا فرحانه بيك
***
داش الشاعر المرهف الانسان الوديع
لك منى كل المنى وانت متابع معنا هنا وهنا
يا فرحتنا بيك والله
شكرا للجميع ومبروك للاهلة الفوز السمح
من امس نحن معيدين
شكرا نيلين

Quote: فتحت لى الود حيشان وابواب ضلفتين تاكيت غناك فى ضرا البيت الكبير لميت الصغير والكبير خمشنا بالهين والاتنين وادينا الجيران برا فرز باقى الفضل حجينا بيه اللسه بتاوق فى الحكر ولمينا الباقى لى يوم باكر والسماحه لسه مشتته فى كل الديار اتاوق جاى بلقاك محكر دوبيت واتاوق جاى القاك موهط مسدار ساعدنى الملم حجاى معاك شد حيلى كان اقدر اقيف وسطكم واجاريكم فى سماحتكم فقدتك فى الليله الاولى ناغمت تمبس الحنين حنين بى بسمته المرسومه ديمه وونستو السمحه لامن مكملة السماحة قال لى يا سوما بفتشو بكوسو عقاب الليل وبجيبوا من مافى .. ونجح ود الاصول وباقى الاخوة ما قصروا ضمه .. وجيت تميت اللمه باريحيه وسماحة نية عارف يا دكين يا خوى .. كنت قايلاك زولا كبيـــر وماااااكن وده انطباع اخدتوا من بوست قديم لى اساسى الله يطراه بالخير ( دكين دى كفك ولا حيطه ) هههههههه كل ما اقراه بضحك فى التعبير السخرى من الزول اساسى كان نفسى الاقيه عشان اعرف سر التسمية .. لكن يا اساسى انابقول ليك دكين كفو الشايله الحنين وحاضنة الزهور جرفين بى سلامو بيحتويك وبى حجاهو يلولى فيك سمح غناه يسرى فيك والبشاشه تنادى ليك شكرا دكين شكرا مارقة من الجوف اسماء الجنيد / مسقط

والله يا سوما طيلة سنوات منبريتنا واثيريتنا وبالتوكتنا دي كلها براهن بيقين لا ياتيته الباطل من بين يديه ولا من خلفه علي حسن تقديرك وتقيمك للبشر الامر الذي كنت اتلمسه في شاعريتك العالية ومقايسك الموزونة بميزان الذهب .. ولكن؟؟
خاب ظني كثيرا في هذه الكتابة اعلاه عن دكين !! وكأنك تتحدثين عن دكين اخر لم نرأه يسعى بيننا حتي الان
ان كنت تقصدين دكين هذا الذي نعرفه جميعا .. فاهل بيته لا يقوون علي ان يقولوا فيه نصف ما كتبتي
حتي ولو تجلوا في لحظة مجاملة يريدون من ورائها به خيرا لما قالوا ربع ما كتبتيه
ولكن اعود واقول ان هذا من حسن تأدبك وسماحة نفسك وعزوبة منبعك
غاليته التي تعشقه نفسها لو قرأتحديثك هذا لتعجبت عن اي دكين تتحدثين.؟
عموما هي روحك الشفافة التي صورت لك هذا
اللهم لا نسألك رد القضاء ولكن نسالك اللطف فيه

اساسى لووووووووووووووووووووووووووووووول
تتجازا انت يا يابا
بالخير طبعا ما غيره
(((اللهم لا نسألك رد القضاء لكن نسألك اللطف فيه ..)))
دى بااااااااااااالغت فيها عديـــــــــــــل

كدى لامن اكمل ضحكى بجيك صاده

اساسي
صدقني يا حبيب لامن بتك تكبر وتقرا تاريخ البورد في المدونات..
حتندم على كونها ولدت في غير زماني..




انتا اعمل برنت لي البوست ده واديهو ليها بعد 19 سنة من اليوم..
وقول ليها دنقلاوي..
وكان يقدس الحياة الزوجية..

أها
الفاتني شنو تاني يا تمبس !!!!!!!!

دكين كيفنك ....

طولت ...

ابو حمودي

الفاتك مابتلحق ولو في بورد حياة اخرى..



وينك.. فاقدنك في المحافل...
لا تأبين بتجيهو ولا سماية بتجيها ولا طهورة بت حنين ماجيت..







لو ماضربتا لينا لحدي اخر هذا اليوم شاي المغرب معاك..
لذا النصحية بقولا ليك..
حاول اتكافاني واضرب تلفون..

Quote: اللهم لا نسألك رد القضاء ولكن نسالك اللطف فيه

اساسى كل ما قلت عن دكين صحيح
الله لا جاب يوم شكرنا..
انت عارف كلام سوما فى دكين ذكرنى بنعى المصالح الحكومية زمان
يقولو ليك وقد كان المرحوم دمث الاخلاق حسن السيرة ..الخ..
ويكون المرحوم النوع البجى المصلحة يومين فى السنه
وينعل سلسفيل ابو الزملاء والمدير ويطلع...
غايتو ارزاق يا دكين،،،