افضالِ الضالِ في سلاح الامداد والتموين

افضالِ الضالِ في سلاح الامداد والتموين


12-26-2003, 11:47 PM


  » http://sudaneseonline.com/cgi-bin/sdb/2bb.cgi?seq=msg&board=232&msg=1188115561&rn=0


Post: #1
Title: افضالِ الضالِ في سلاح الامداد والتموين
Author: DKEEN
Date: 12-26-2003, 11:47 PM

الديكُ في منزلنا في فجر قريب نفض جناحيه وصاح جاوبه الصياح ديك ناس ضو البيت جارنا ....
ثم ديك في اول شارع الزلط يصيح مؤكدا عن فجر جديد..
ويتناوب الديكةالصياح حتى يصل الى اخر بيت في جبرة ومنه الى اول بيت في الصحافة زلط يسافر الصوت عبر ديوك نشيطة هميمة بالفجر الى اخر بيت في الصحافة زلط ومنه الى اول بيت في الصحافة شرق ثم اخر بيت فيه لاول بيت في المعمورة وعبر ديوكها الى اول بيت في اركويت ثم الى اخر بيت عند محطة تلاتة ومنها الى بيوت الطائف..
يعاني الصوت هناك في انتقاله فلا البيوت تشبه البيوت ولا الديوك هناك تقيم كثيرا ..
ديوك الغفراء الذين يقيمون في بيوت من الكمرات وقطع الشولات مع ديك ناس ميسون النجومي تنجز صوت الفجر القادم من منزلي ..
وبقدرة صانعِ الفجرِ الواحدِ القيوم يصلُ الصوتُ الى اطرافٍ الرياض ويعاني اكثر من ذي قبل...
ومن ثم بعونه جلت قدرته وعلا شأنه يتناوب المتيسِر من ديوك الرياض ُمهمة الصوت حتى يصل الى اول ديكِ في ناصر عند شارع اوماك..
وتضجُ منازل امتداد ناصر بصوت الفجر ويتواصل عدوى الصياح ويتجه جزء من الحفل شرقا الى بري اللاماب ومنه الى اطراف (المنشية 25) و الديوك هناك تقيم الليل ثم المنشية قباني حيث العز الماهل وحيث ورثَ الوارثين ..
وهناك ينقطع فرع صوت الفجر الذي اتجه شرقا من ناصر ..
الجزء الاخر من الصوت حيث تركناه غربا يلتقطه ديك في بري المحس...
بعدها يستلم الصوت ديك ناس داليا في اول بيوتِ الجامِعة ..
ومن ثم الى ديك ناس ود المكي كاخرِ بيتٍ من بيوتِ الاساتذة وكاخر ديك في اخر منزل يقف على حواف النيل الازرق يصيحُ هميما فينقلة سطحُ النيلِ هادئا قويا الى ديك لصاحب كمينة عند اطراف المزارع في بحري ثم لديكٍ مقيمٍ في اول منازل ذلك السكن الحكومي عند كبري القوات المسلحة ومنه لديوك مزرعة السجن في كوبر ومن ثم لديكٍ ضل سبيله في سلاح الامداد..
ويصل مهرجان الصياح الى ديك ناس معز صديق في الاملاك وعبر ديوك الختمية باعرافِ مهتزة الى ديك لرجل عرف محض جميلِ نعمة ربِه عليه فاجتهد مقبلا لصلاة الفجرِ بماء ُميسر من ابريق.. سائلا الله الاجر سترا وعافية محاولا ان يتذكر اثار الامطار في طريق المسجد عبر بابه المورق بالجهنمية ...
ومن صياح هذا الديك لاخر ديكٍ في المزاد ثم لاول ديكٍ في اول شبمات ..
وعبر اكثر من اربعمائة واربعين ديكاً .. وديكٍ ضالٍ بسلاح الامداد يصل صياح الفجر القادم مِنا الى ديك ناس رباح في شمبات فيصيح عاليا ...
ويضِرب جناحيه..
فتستيقظ رباح العزيزة وتذكُرني دونما سبب..
شفتو دونما سبب دي كيف... ؟؟
بعد كل هذه الاسباب المأمورة لصنع ضجيج اشواق قاصدة في فجر الخرطوم ..تذكُرني الغالية بلا سبب فقط لان ديكا ايقظها فجر ذلك اليوم ....
عندها يهجس هاجسٌ فيني بانني الان قيد ذكراها ..وابتسم واِحن اليها فانام مل جفوني .


في صباح نفس اليوم و بينما انا انتظر التي هي احسن اتية من اطراف شمبات
كنت احكي (لابو اللول) على اقل من مهلي عن اشواقي وعن تأمر الديوك فجر هذا اليوم لايقاظ رباح ..
سالني لؤي الجالس عند عتبات الإكزام هول وقد احس وكانما ريشٌ ينبت عند اطرافه: ليه ياخي ما عندها موبايل ؟؟
ــــــــــــــــــــــــــ
رباح ..
ذلك فجرٌ من اربعين فجرٍ مضت..

لطالما حدثـتُكِ انا..
وحدثـتكِ إسلام ..
وتملل ابواللول من الوقوف على بابك محدثا ومكِلما..
بيوت الناس البصلو على الرسول تكلَمت ..


ياخي الضالين بسلاح الاشارة تفضلو بالكلام يا رباح..

فما بالك عزيزتي لا تبارحين عصر صمتك الممتد مذ عرفتكِ ..

افتحي خشمك ده..
قولي اي شيٍ لتمنحنا الحياة دلالها ..

Post: #2
Title: Re: افضالِ الضالِ في سلاح الامداد والتموين
Author: Adil Osman
Date: 12-27-2003, 01:00 AM
Parent: #1

هذا كلام عجيب يا دكين
هذا خيال بارع ومجنون أو قل واقعية سحرية فيها نفس ماركيزى وروح من بشرى الفاضل صاحب حكاية البنت التى طارت عصافيرها...

الديكة لم تحفظ سرك لا لأنها خؤون ولكن بسبب من الحب الذى ملأك حتى فاض عنك فى ذلك الفجر الذى تواطأت فبه الديكة جميعها،من ديكة احياء الطبقات الشعبية واطراف المدن الى ديكة البوبار والعمائر المسيجات بالحديد المدبب على قلتها....

كووكووووك كووووووك يا ناس الحلة: دكين مكتول فى بيت فى شمبات له ديك حسن الصوت ومتآمر من اجل الحب ...

Post: #3
Title: Re: افضالِ الضالِ في سلاح الامداد والتموين
Author: بت قضيم
Date: 12-27-2003, 10:22 AM
Parent: #1

حمد لله على السلامة يا دكين
بديع ما كتبت ومبدع

يهدي سرك

تحياتي للجميع

Post: #4
Title: Re: افضالِ الضالِ في سلاح الامداد والتموين
Author: بت قضيم
Date: 12-27-2003, 10:23 AM
Parent: #1

حمد لله على السلامة يا دكين
بديع ما كتبت ومبدع

يهدي سرك

تحياتي للجميع

Post: #5
Title: Re: افضالِ الضالِ في سلاح الامداد والتموين
Author: الجندرية
Date: 12-27-2003, 10:56 AM
Parent: #1

مش بالله يا عادل
طيب يا دكين
انت لو بتكتب كدا
مالك قادينا انا بت قضيم وانا العجب
وشغال لي محامي للبنى
نزل لينا من جنس دا بس

Post: #6
Title: Re: افضالِ الضالِ في سلاح الامداد والتموين
Author: AlRa7mabi
Date: 12-27-2003, 11:32 AM
Parent: #1

يا دكين

انتا زول جميل جمال .. منقطع النظير

شفتا منقطع النظير دي كيف ؟؟؟؟

هذا ثاني أجمل نص أقراءه في البورد بعد الصيانة

بس دا كلامك ولا كلام بت قضيم؟؟؟؟

واللا الأتنين سوا؟؟

شكرا بحق هلى هذا الجمال

رحمابي

Post: #7
Title: Re: افضالِ الضالِ في سلاح الامداد والتموين
Author: ابو جهينة
Date: 12-27-2003, 11:42 AM
Parent: #6

و لي دكين له قلم بديع الوصف فنان
و عند الكرب يؤانسنا و طول اليوم ( إنسان )

مع التحية لإبني دكين العزيز

Post: #8
Title: Re: افضالِ الضالِ في سلاح الامداد والتموين
Author: Tumadir
Date: 12-27-2003, 11:49 AM
Parent: #7

قصه فى السلك..

لانو الديك بنوم فى السلك..و لانو الوبايل مشكلته الاساسيه …سلك

انتو متاكدين انه ده دكين…وما ديك الجن؟؟


..جميله يا دكين

Post: #9
Title: موهبة امتزج فيها الخيال بالفكاهه
Author: أم مجاهد
Date: 12-27-2003, 12:04 PM
Parent: #1

الإبن العزيز/دكين
لك تحياتي
مع فارق العمر ونوعية الثقافة ومع بعد جيلي عن جيلكم ..إلا انني تذوقت الموضوع الرائع .. والذي احسبه قد سد الباب امام من يقولون ان الأجيال الحالية اقل حبا للقراءة والكتابه .. بل بالعكس أنا ارى ان هذه موهبة امتزج فيها الخيال الرائع بالأسلوب الفكاهي الجميل ..وهي ان دلت ..انما تدل على ان الوطن ما زال بخير فاليوفقك الله يا بني.. ودمت
أم مجاهد
السعودية

Post: #10
Title: Re: افضالِ الضالِ في سلاح الامداد والتموين
Author: حمزاوي
Date: 12-27-2003, 12:06 PM
Parent: #1

عزيزي الأخ دكين
والاخوة الكرام
السلام عليكم
تذكرت أيام الابتدائية (الأولية)
والحاجات الحلوه والكتب والمحفوظات
قبل طلوع الفجر يصيح ديك بدري
دجاجي يلقط الحب
والفول فولي زرعته وحدي
وطه القرشي في المستشفى
وهاشم في العيد
يا اخوي دكين
قلت
بعدها يستلم الصوت ديك ناس داليا في اول بيوتِ الجامِعة
أحي انا من ديك ناس داليا
ونحن الديك حقنا
حق ناس ستونا وحليمه وستنور وفضلم

Post: #11
Title: موهبة امتزج فيها الخيال بالفكاهه
Author: أم مجاهد
Date: 12-27-2003, 12:09 PM
Parent: #1

الإبن العزيز/دكين
لك تحياتي
مع فارق العمر ونوعية الثقافة ومع بعد جيلي عن جيلكم ..إلا انني تذوقت الموضوع الرائع .. والذي احسبه قد سد الباب امام من يقولون ان الأجيال الحالية اقل حبا للقراءة والكتابه .. بل بالعكس أنا ارى ان هذه موهبة امتزج فيها الخيال الرائع بالأسلوب الفكاهي الجميل ..وهي ان دلت ..انما تدل على ان الوطن ما زال بخير فاليوفقك الله يا بني.. ودمت
أم مجاهد
السعودية

Post: #12
Title: موهبة امتزج فيها الخيال بالفكاهه
Author: أم مجاهد
Date: 12-27-2003, 12:10 PM
Parent: #1

الإبن العزيز/دكين
لك تحياتي
مع فارق العمر ونوعية الثقافة ومع بعد جيلي عن جيلكم ..إلا انني تذوقت الموضوع الرائع .. والذي احسبه قد سد الباب امام من يقولون ان الأجيال الحالية اقل حبا للقراءة والكتابه .. بل بالعكس أنا ارى ان هذه موهبة امتزج فيها الخيال الرائع بالأسلوب الفكاهي الجميل ..وهي ان دلت ..انما تدل على ان الوطن ما زال بخير فاليوفقك الله يا بني.. ودمت
أم مجاهد
السعودية

Post: #13
Title: Re: موهبة امتزج فيها الخيال بالفكاهه
Author: shiry
Date: 12-27-2003, 01:46 PM
Parent: #12

سلام مربع

دكين

لا اظنني في القريب الفائت وقعت عيني على نص
استغرقني كثيرا في تامله
دا فلكبات ماعاديه
حقيقي انت زول ماعااااادي
مجنتر عديل كده

Post: #14
Title: Re: موهبة امتزج فيها الخيال بالفكاهه
Author: ايهاب
Date: 12-27-2003, 02:26 PM
Parent: #12

جميل يا جميل

حمد لله على سلامه وصول صياح ديككم مرورا بمن ذكرت لحدي ديك ناس رباح دون طششان كدي تخيل انو طشا واخد ملف تاني كان اتمقلبا يا لزيز
لكن والله دي لفة مبالغة المفروض يكون وصل العصر كدا
والله لعجيب الصدف الان يصيح ديكا لا ادري كيف وصل الى هذه البلاد كما لا علم لدي تماما باللي رماه الرميه دي شنو شفتاحال الدنيا حتى الديوك اغتربت
المهم انه الان حقيقه يصيح ربما تضامنا مع ديكك اوديكا اخر يبحث عن رباح اخري لدكين اخر
شكرا على الامتاع ولك الشوق ابعاد

Post: #15
Title: Re: افضالِ الضالِ في سلاح الامداد والتموين
Author: DKEEN
Date: 12-28-2003, 00:16 AM
Parent: #1

عادل عثمان

سئل بن غابريال غارسيا ماركيز كتابيا وكان يدرس في مدرسة انكليزية
ماذايمثل الديك في رواية العقيد ليس له من يراسلة
فاجاب:
بعد محادثات مع المولف استطيع ان اؤكد ان الديك ليس رمزا وانما هو مجرد ديك ..
تخيل رسب في الامتحان ..
وابوه اكد مرارا ان الديك لم يكن سوى ديك ..
شفتا كيف يا عادل؟؟
ديوك ماركيز مجرد ديكة
وديوك اخوك دكين ديكة اشواق ..
ماركيز شنو ياخي..
والله ان شاف رباح كان كتب عن شمبات مالم يكتبه عن ماكوندو وعن مرسيدس..
وكان عبر بالديكة الاطلنطي موش كم حلة ونيل ازرق يأسرك بجماله عند كل مساء..


الله يسلمك يا قضاضيمو
وشكرا للطلة الجميلة وتحياتك للجميع ..

بس بتحمد لي سلامة شنو؟؟
انحنا واضعين ولا شنو ؟؟؟

الجندرية يا طيبة
انا ماقاعد اكتب كدة ولا اي شي ..
ولا الجرسة شغلتي..
لكن الناس لامن تتعاور في السكوت ..
بنتجرس ونجرس ديوك العالمين ..
وندق جرس في الخرطوم كلها ..
النايمين لها شنو؟؟
بعدين انتي صارة لي المواضيع القديمة دي لسع ..
غريقة يا جندرية

رحمابي
مشكور لموازرتك لي اخوك فجر أن اشتاق

يوم شكرك ما يجي يا غالي وتشتاق ..

بعدين بت قضيم تخصص غنم وخرفان وكدايس..
واخوك ديوك ..وناس لبنى..
زي ما شايف كل اناء بما فيه بكورك..

مشكور يا بو جهينة
والله انسان انتا ده البنلقاك في جلسات الجالية اينما كانت

بس حكايتة ابنك دي ما معانا..
حمزاوي قال لي عزيزي الاخ دكين
خلى لي تاني شنو ؟؟

تماضر اخت تبارك
نسيبة الغالين
تخيلي انا مرات مرات بلخبت بيني وبين ديك الجن ..
بس بمرقني الجن المعاهو ..
بركة البقت على ديك الجن وما بقت ديك العدة اب سلك عريان ..

و موبايل رباح مشكلتو الاساسية رباح نفسها..

ام مجاهد
شكرا على الاطراء
من الواضح انو الاجيال الان اكثر شوقا واكثر جرسة..
وما ناس غربة..


حمزاوي
سعدني ان اكون مررت بنفس المقرر المريت بيهو..
وبعدين بتعرف شنو عن ديك ناس داليا ؟؟
خبرني الله يسلمك ..
والله انا كتبتا الكلام ده وخايف يطلع لي اخو رباح في البورد
اصلا ما عملتا حساب انو حبيب داليا بوردابي ..

شيري
حبيبة ألبو

مجنتر في عينك ..
سبحان الجاب توقيعك ده هنا..
تخيلي يا منقة رباح دي كانت عادي بتسفهني في الكافتريا عادي وتقرطع الشاي وتشتت وما بتخلي الباب فاتح...
بتخلي عبيط وراها فاتح خشمو ..
بعدين الكافتيرا اصلا مافي ليها باب..

تفعل ما فعلت وهي تعلم انها جميلة داخل قلبي..

الواو في ألبو اعلاه راجعة للذي قرطع الشاي وتاكى الباب وفحط..
والماعارفو يرفع ايدو..

ايهاب
والله ما كنتا قايل ديك بجيبك مارق
طلتك دي والله ما هينة ..
ديك راس السنة عندك كيف؟
ما بقيتو تلاتة ؟?

Post: #16
Title: Re: افضالِ الضالِ في سلاح الامداد والتموين
Author: Munir
Date: 12-28-2003, 00:21 AM
Parent: #1

هذا الدكين انا كنت مراقبه منذ مدة طويلة في سري و ناطي وراء ردوده من بوست لي بوست في صمت، وكنت عارف انه صاري ليهو اسلوب غير مألوف وحايم بيهو ـ لغاية ما أهو فضحته ديكة المدينة من جبرة لشمبات ـ

Post: #17
Title: Re: افضالِ الضالِ في سلاح الامداد والتموين
Author: DKEEN
Date: 12-28-2003, 00:56 AM
Parent: #1

ايهاب تاني
طششان صوت الديك عن بيت ناس رباح امر مستبعد ..
فطالما ان هنالك ديوك بالجوار فالصوت لامحالة واصل…
وتاكد انو نفس الصوت المرق من بيتنا فات اضان رباح بي غادي ووصل للكدرو
وكل الديوك التي صاحت بعد ديك ناس رباح صياحها للفجر ليس لاشواقي..
صاحت سااااي ..
صياح لله في صباحو ..

المهم في الامر يا عزيزي ايهاب انك تعرف عند ياتو ديك الصوت مفروض يقيف ….
وياتو زولة يصحيها ليك الديك المعني بالوقاف ..

منو ذاتو الزمن ده البتصحى ليك بي كوراك ديك ؟؟؟

Post: #18
Title: Re: افضالِ الضالِ في سلاح الامداد والتموين
Author: bayan
Date: 12-28-2003, 05:43 AM
Parent: #17

لكن يا دكين ما بشع بشاعة رجل واحد
خلينا فى المهم
ديوك ماركيز يطيرن ديكك دا شنو؟
والله شكرا ليك يا ولدى
you made my day

Post: #19
Title: Re: افضالِ الضالِ في سلاح الامداد والتموين
Author: Dr.Elnour Hamad
Date: 12-28-2003, 10:16 AM
Parent: #18

الأخ دكين
كل عام وأنت بخير
هذا نص عجيب. وأرى أن سره إنما يكمن في قصره، وإشباعه، في آن معا. هناك كثير من النصوص التي يقرأها المرء، وعند الفراغ منها يحس بشيء ناقص. أعني إحساسا شبيها بذلك الذي يعتري المرء، بعد وجبة من النوع الذي يحس المرء بعده بالحاجة إلى إضافة من نوع ما، مثل(تحلية)، أو (كباية شاي)، أو ما شابه. أما هذا النص، فقصير، ومشبع، ولا يترك في قارئه تطلعا إلى شيء يأتي بعده. لقد (أوتيت مزمارا) أخي دكين. وهذا التعبير استلفته من على المك. وقد عبر به على المك عن انطباعه، حين اطلع على كتابة بشرى الفاضل أول مرة. وقد قصد علي المك بذلك التعبير، الكتابة السهلة، البسيطة، التي تأخذ بألباب القارئ، وتسوقه معها في سلاسة ويسر، ودونما أي إعنات.

شكرا لك على هذا النص الحي، والموحي، ولا تحرمنا من هذه الجرعات الأدبية المروية.





Post: #23
Title: Re: افضالِ الضالِ في سلاح الامداد والتموين
Author: DKEEN
Date: 12-28-2003, 11:41 PM
Parent: #19

دكتور النور
وجودك في هذا البوست اسعدني جدا..
شكرا يا دكتور لكلماتك الجميلات

وشكرا لاطلالتك في مقامات فجري
وكل عام وانت بخير

منير
رقم صفر
شكرا شديد ياخ
فرحت بيك والله
مشكور على كلماتك اللطيفات

بيان العزيزة

تحيات عطرات
وين صاحبتك ما باينة ..
تخيلي فالحة بس تقول لي بيان صحبتي سوت وبيان صاحبتي عملت

المرة دي انتي لحستي مخها عديل

بقت تهاتي بيك

الله يصبرك عليها



سعادتو
تبلدي

دي عشرة دقايق صفا في سلاح الامداد

في عشرة دقايق صفا في جبل اولياء



ترقب اخبار سلاح المظلات

تسلم على جيتك الطولت

Post: #20
Title: Re: افضالِ الضالِ في سلاح الامداد والتموين
Author: Tabaldina
Date: 12-28-2003, 10:47 AM
Parent: #1

..
.
والله قوود لاك يا ود دكين
عليك دينك ادينى جقمة معاك ..
عارف بالجد انت عضو الصباحية البجو يمتعونا
لكن انت كنت شغال سواق حافله ..

عجيييييييييييب والله ..


تعيش انت وتدوم ديوك الحله

Post: #21
Title: Re: افضالِ الضالِ في سلاح الامداد والتموين
Author: ايهاب
Date: 12-28-2003, 07:20 PM
Parent: #20

دكين تاني

بالمناسبةلقد اثبت بما لا يدع مجالا للشك انك قد حيرت الديك زاتو
يا زول ما تركز ولا نطيت؟

Post: #22
Title: Re: افضالِ الضالِ في سلاح الامداد والتموين
Author: DKEEN
Date: 12-28-2003, 11:33 PM
Parent: #1

اليكم جميعا ايها الاكارم

والله يا خوانا انا ما قاعد اهظر ولا بستهتر بي مشاعري ..

ولا عاجباني تلتلة ديوك العامة واستخدامها لمآرب خاصة ..

انا هزني الشوق اليها فجرئذ بما لا يقاس
وكنتا راقد فوق ..
والتلفون تحت جوة الصالة والمفتاح تحت راس ابوي..
وابوي في الحوش الوراني ..
يعني شغلة عديل ...وبعدين ما كانت في ضمانات دالة على انو رباح حترفع السماعة ..

صدقوني فتشت لي حاجة ابلبل بيها شوق الفجر الفقري مالقيت ..

قتا اشيل حجر من طوب السطوح الكتير داك
وافنو تجاه بحري واعاين ليهو متمنيا ان لا يسقط الاعندهم ..
ولسذاجة فكرتي فوق السطوح مع فكرة نيوتن تحت التفاحة ما اتحركت من السرير ذاتو ..

اتملمتا من شوقي ..عاينت بي جاي اخوي نايم على ضهرو كما كل يوم ..

قتا في سري اظنو لسع ما شاف رباح ود الذين ..

وبي هناااااااك اولاد ضو البيت شادين الملايات فوقم وراقدين في سطوح بيتم ..ما عدا ضوة كانت شادة توب لم استبن الوانه ..
من الواضح انو العالم دي كلها ما قاعدة تمشي جهات بحري..وان شئتم الدقة ما شافت رباح ..

والله يا حِبان ما لقيت إلا الديك الواقف طرف السطوح مادي قدومو تجاه بحري كبوصلة..
واستنادا على مبدا عدم فناء المادة
والمادي قدومو ده عندو صوت مديد ..وتهيا لي حينها انو الصوت مادة ذلك الفجر
مديت يدي كرفست باقي جريدة الوان تحت السرير
وعجنتها عجنة من لا خيار لديه
وفكيت العجين تجاه الديك عسى يحل مشكلة ..
فصاح ديكُنا بفصيح اشواقي مستيقظا ببقايا الوان ..

الشكُر لي حسين خوجلي برضو يا خوانا..

Post: #24
Title: Re: افضالِ الضالِ في سلاح الامداد والتموين
Author: Adil Osman
Date: 12-28-2003, 11:48 PM
Parent: #22

وأيّم الحقّ أنت مجنون يا دكين
وهذه التوضيحات فى حد ذاتها نصّ آخر يكشف عن خيال عاتى وقلم مطلوق وفيه جدة - لا اقصد جدة السعودية وانما اقصد جدة من جديد Newness - ولئن واصلت يا دكين هذا المشروع القصصى الحضارى فانى اضمن لك اشبارآ كتار فى وجدان هواة الابداع الروائى والقصصى فى هذا البورد ومادونه...

ياخى انت عجيب..

Post: #25
Title: Re: افضالِ الضالِ في سلاح الامداد والتموين
Author: ASAAD IBRAHIM
Date: 12-28-2003, 11:49 PM
Parent: #22

الاخ دكين
والله يا اخي ما دام شترت الديك بجريدة الوان انت في مشكلة ليه؟ لانو الديك اكيد جراء
هذه الشترة الالوانية يكون اصيب بلوثة في دماغو ويقول كلام دراب يوديك انت وهو ستين داهية.( بعد الشر)

Post: #26
Title: Re: افضالِ الضالِ في سلاح الامداد والتموين
Author: ودقاسم
Date: 12-29-2003, 12:33 PM
Parent: #1

دكين
أنا شايفك ، أنت زول فيك حاجة غير كثير من الآخرين ، وعارف أنو السر حا ينكشف قريبا ، مش أنا خبرتي طويلة وأكبر منك بكثير ،
الفجر يا دكين يبدأ انطلاقته من غرب الخرطوم ويتجه إلى الشرق ثم يأخذ شكل نصف دائرة ويعود للاتجاه غربا حتي يصل شمبات ،،هذا فجر ديكي حقيقة ، وانبلاجه يشبه انبلاج وجه رباح يوم لقيها دكين أول مرة ،
دكين ممكن تديني سوسيو من ظهر ديككم هذا ؟

Post: #27
Title: Re: افضالِ الضالِ في سلاح الامداد والتموين
Author: tabaldy
Date: 12-29-2003, 02:27 PM
Parent: #1

دكين
يا زول الزول قاعد يجي البورد يتاوق من برة ساي كدة , لسة في طور تعلم الكتابة
الف باء تاء ثاء الإنتماء للبورد
بس جيت لقيت أِشواقك إتغمست صيحة ديك
غلطك الأكبر بعد الشوق إنك ما ضبحت الديك ده وأكلتو
وغلطك التاني بعد غلطك الأكبر إنك لخبطت بيني وبين تبلدينا
يا زول تبلدينا داك بتاع إنقلابات زيي كدة بس الفرق الما واضح ليك إنو بقلب العربات بس وانا عشمان أقلب حيكومة , ولو حصل وقلبت الحيكومة ليك علي أمسكك وزارة الثروة الحيوانية بي كل ديوكا
سمعنا بي الحمام الزاجل وأهو عشنا وشفنا الديك النايح , الديك النايح إسم رومانسي ؟
خليهو عوعاي ورسول شوق دكين
ديكنا بكورك فينا لي صلاة الصبح يا ثعلب , وعندو هواية تانية , بياكل شدرة الجهنمية , كل ما تقوم فيها وردة جديدة بيلحقا ويقطعا , ما عارف السر شنو ,
يا زول انا حردان الكتابة في بورد تكتب فيهو زي كأنك كتبت تم البوست بحمد الله , قلت لي بكري خلي إسمي كدة , منها دكين والناس ما تلخبط ومنها تكون النهاية السعيدة لي البوستات .
وين دافي ؟ عندك فكرة ؟
يا ناس دافي داك عالم تاني , أسألوا تمبس لو دكين ما رد
قول وراي يا دكين أب ديك
تاء ديك
باء ديك
لاء ديك
داء دكين
ياء شوق
ولحدي هنا ولو حبيت تلخبط زيد ياء ونون نسوة حلوات والف شوق
أو أبنوسي

Post: #28
Title: Re: افضالِ الضالِ في سلاح الامداد والتموين
Author: DKEEN
Date: 12-29-2003, 11:00 PM
Parent: #1



Post: #29
Title: Re: افضالِ الضالِ في سلاح الامداد والتموين
Author: AlRa7mabi
Date: 12-30-2003, 06:57 AM
Parent: #1

الللللللللللللللللللللللللللللللللللللللللللللللللللللللله

دي خشت جووووووووووه في عضامي

يا دكين لكن ما مقطوعة ..

والله إن اسميتها رباح تو .. ولا حليمة تو
أو القمر في كنانة .. لكن شغل راااااقي (عديل ) كه

تعرف يا دكين اليومين ديل مسيطرة على فكرة سماع موسيقى ( بحته ) دي

ولامي ليك في أغناني أم كلثوم ( عمار الشريعي ) وغيرهم

ساخي دى أ؛لى من الغني

هذه الهدية ( بزت ) النص .. اسمح لي

شكراااااا



رحمابي

Post: #30
Title: Re: افضالِ الضالِ في سلاح الامداد والتموين
Author: hala guta
Date: 12-30-2003, 07:06 AM
Parent: #1

يا دكين
مدهش
مدهش ..بحق!!

Post: #31
Title: Re: افضالِ الضالِ في سلاح الامداد والتموين
Author: DKEEN
Date: 12-31-2003, 00:26 AM
Parent: #1

تسلمي يا هالة قوتة
ده جزء من الحصل في اجازتنا وحاتك
لا خيال ولا شتين
ما تورونا اجازتكم عملتو فيها شنو؟؟

ايهاب
ديك شنو الحيرتو انا؟؟
ما تورينا انتا شايت وين يا خوي ؟؟
كلامك ده كلام زول قاصدنا عدييييييل.
انتاعارف لحدي وين بالضبط كده والوراك منو ؟

ود قاسم ابو قاسم
مشكور لتشريفك لينا بهذه النواحي ..حكاية او الفجر ببدا بي الغرب وبنتهي بي الشرق دي عجبتني
تصور يا ود قاسم لو الاشواق دي كان جاتني قبل نصف عام.. الديك ده كان حيبداها االبيت ويختما في مدني..البني ادم ده ما رياد خلاس .

تبلدي ياوجيه
والله انا من زمان خايف الخبت بينك وبين تبلدينا ..وتوهجست قبل ان اكتب لك ردا..
ومع ذلك لخبتا
يا زول امسحا في وش اخوك الاغبش ده..
هسع جاي تقول لي ابنوسي
موش في واحد اسمو ابنوس في هذه النواحي ..
انتا يا سعادتو حكايتك شنو ؟؟
عموما عميق ودي وبالغ اعتذاري يا تبلدي انتا الكبير برضو .. بعدين انتا الكلام البتكتبو ده بتجيبو من وين..انتا عارف كلمة سر الليل ولا ساي بتتكلم؟

Post: #32
Title: Re: افضالِ الضالِ في سلاح الامداد والتموين
Author: DKEEN
Date: 12-31-2003, 00:43 AM
Parent: #1

رحمابي يا تاني زول مستفيد من البوست ده..

قبل شهرين ونص تقريبا تمبس وابا نزلو درس عصر في كيف تنزل غنية في البورد
طبعا كل الامة ديك نجحت في درس العصر ..
إلا اخوك..
الدرس داك بقى ليهو درس العصر والليل والصباح والنهار والعصر تاني ودرس بكريتو وعصر بكريتو وبعد بكريتو وهكذا ..
منذ ذلك العصر وانا احاول واجرب واناقش واجادل واغالط واغلظ في القسم فيما يتعلق بتنزيل الاغنيات في البورد من اجل ان انزل ما يأسرني ..وفشلت
تخيل الدرس الجضمتو دومة في يوم انا قعدتا فيهو حتى امس؟؟
وبعد ده كلو جا تمبس طق طق طق سلمني ليهو جاهز بعد ان غلبني الفهم ..

ثمانون يوما وانا اساسق وراء انزال مقطوعات لدكتور الفاتح حسين اهديت لي قبيل خروجي الاخير وفي مراسم خاصة للوداع والجقلبة .
توقعت كل شي في ذلك المرسوم ..
توقعت ان تهديني الغالية كتاباتها ، وهي بالمناسبة تعتقد فيما تكتب واعتقد انا فيما تعتقد ..

توقعت ان وداعا رومانسيا ينتظرني وتخيلتها تهديني منديلا به عطر كارولينا هريرا ون تو ون الذي طالما جمل مساءاتنا ..

توقعت ان تحدثني عن منسوب النيل الازرق مساء ذلك اليوم وهي تعلم جيدا ان ذلك النيل يسيطر على حالات الحب عندي ..

ولانها قبل ثلاثنين يوما من ذلك اليوم غنت لي( نحنا اهل الفرحة جينا) توقعت ان تغني اخر المقطع (الروح مشتحفة في البلود الفيها ريحتك.. للبعود من فزعة الغربة البساسق فوقها مو راجع ولا بالحيل قريب ) بوجعها المالوف تحيلُ المساء خمراً ..
توقعتُ الكثير يومها ..
كما ترى يا عزيزي توقعتُ كل شي ..
إلاهذا الاشواق الواصلة الخارجة من بيز جيتار الفاتح حسين …
كانت هدية كالحلم ..ولم تزل
ومن الموسف ان الاشواق يا رحمابي تذداد ..ولا يزال الخريف بي بروقو يمثُل امامي كل ما سمعته وسمعتها..


احبتي الطيبين
ابو اللول صاحبي ضرب لي تلفون امس من السودان - كان طاشم طشمة زول جاي من طرف البلد كعادته عند دلوكِ الشمس - قال لي : قريت موضوعك بتاع الضلال يا ضال …وسكت مسااااااافة وقال تاني : بس تخيل يا عزيز المسألة ما مسالة الصوت بيبدا كيف..او الفجر بطلع بي وين؟ المسالة مسألة البت بتبدا من وين ذاتو ؟
ياخي ما سمعتا الشاعر قال شنو .. قال ابداكي من وين؟؟
قلت ليهو : هسع يا لؤي كان عرفتها ليك بتبدا من وين بتقدر تعرفا لي بتـنتهي وين؟؟
ابو اللول صاحبي في طشمتو المعتادة رد قائلا لي: هي شنو البتبدا ؟؟
بلاي يا خوانا في زول فيكم عندو صاحب مرتاح اكتر من صاحبي ابو اللول ده ؟؟

Post: #33
Title: Re: افضالِ الضالِ في سلاح الامداد والتموين
Author: Ridhaa
Date: 12-31-2003, 00:50 AM
Parent: #1


دكين
تعابير عجيبة وجننت الديك دا جن عديل
يجب توثيق هذا البوست
ويجب ارساله لاحدى الصحف السيارة
وايضا يجب أن ترسله الى
www.sudanile.com


بوست 2003 بلا منازع

ولي عودة

Post: #34
Title: Re: افضالِ الضالِ في سلاح الامداد والتموين
Author: بدرالدين شنا
Date: 01-02-2004, 05:08 AM
Parent: #1

إنت الحاجات الجميلة دي مدكنها وين يا دكين؟؟؟
غايتو شوف والله ديكك دا يلم فيهو ديك من ديوك رباح إلاّ يخلي ريحته دياكا دياكا
إنت بدل السعال الديكي دا ما تعمل ليها موبايل
سمعنا بالحمام الزاجل لكن الديك الزاجل دا أول مرة نسمع بيه
إن شاء الله كلامي دا ما يكون دايكك؟؟؟
لك حبي وتقديري وأنت توهبنا الجمال والأفكار الحلوة
واصل

Post: #35
Title: Re: افضالِ الضالِ في سلاح الامداد والتموين
Author: HOPEFUL
Date: 01-02-2004, 05:48 AM
Parent: #1

دكين ..
يا مسخر الاربعمائه واربعه واربعين ديك وديك في خدمه شوقه

ارقتم منام دجاج صبرنا الحاضن
---
تحتاج لطبيب بيطري لتفادي انقطاع الارسال

ما تنسي يا دكين يا اخوي تربي ليك كم "سوسيو" اسبير

ارجو أن يكون ديكنا ذو الصوت الجهور مشتركاً في هذا الكرنفال النفير "الديكي". ما معروف ممكن الواحد تجيهو صحيه من نومي ويكون الموبايل ما مشحون.



دكين ابدعت واحسنت

Post: #36
Title: Re: افضالِ الضالِ في سلاح الامداد والتموين
Author: اساسي
Date: 01-03-2004, 12:54 PM
Parent: #35

وانا اعود من اربعين مثلها.. دكين ..احدي لياليها انبأني ذلك الجوال الذي اخذته حين الاربعين ( بتسلط ذكوري ) ان هناك رسالة ظننتها من صديقي هشام الذي (عبأ) هاتفه بالاسكراتش خصيصا لمواصلتي حين اجازتي فهو بمثابة ابو لولي ولكن وجدتها رسالة تخبرني عن هذا البوست الصياح من خارج حدود المليون ميل ولمعرفته بهوسي بما تكتب لم يالؤ جهدا ان يخسر سبعون هللة ثمن تلك الرسالة ليخبرني عن هذا الصياح الدكيني
حينها لم استطع او تكاسلت ان ادخل النت ( الفتة كانت في طريقها الينا ونحن نجلس امام الدار فلم اجازف واستبدلها بقراءة بوست مجنون لدكين فالمنبر موجود ولكن الفول محدود
حين عدت وسالت اليوم وارشدتني الجندرية اليه وجدتني اسير تلك المعزوفة التي لا ادري من الذي اخذ بناصيتك ليدلك عليها فكما الطبع الصحراوي الرياضي معروف لديك هذه الرياضي الي الرياض وليس النطيط
اسرتني قبل ان ياسرني عوعاي ديوكك والتي وصلتنا في امتداد ناصر وتفرعت منها حيث استبدلتك بتك الفتة الكاربة يا لرخصتك
ولكن ايها المجنون ما ذلت اراهن عليك ومافتات لا تخزلني
بعد ان انهيت قرائتي فكرت ان من اثملها اذا كانت تشرف بورسدان او كوستي بسكنها كيف اقنع كمساري افراس ان يركب ديكي الي احدي تلك المدن فيعوعي في حي النصر او يصيح في حي العرب
فحمدت الله كثيرا علي نعمة العشق في الخرطوم

Post: #37
Title: Re: افضالِ الضالِ في سلاح الامداد والتموين
Author: DKEEN
Date: 01-04-2004, 00:11 AM
Parent: #1

بدر الدين شنا

كلامك ما دايك دكين لكن ديك دكين يبدو لي ادايك شديد ..

كدي قولا خمسة مرات كده؟؟

هوبفل يا خطير
تحتاج لطبيب بيطري لتفادي انقطاع الارسال
عرفتا كيف انو ابوها مهندس معماري ؟؟

اساسي
(ال...... ولات ساي )
عودا حميدا ..

اسمع حاول تسلف اخوك سبعةالف ريال ..
انتا ما عارف ظروفنا بقت عاملة كيف ؟؟
اخوك واقع لي الله في جيبو..



بالمناسبة يا خوانا شايفكم كلكم مسكتو الديك وخليتو رباح ..
النقة الحتيتا فوق دي كلها عشان خاتر رباح موش عشان تمسكو لي قصص الديكة ..

رباح يا خوانا تنسوها لي بي ديك ؟؟

جبتو لينا الكلام مع الناس القيافة..
صحي والله بورداب..

Post: #38
Title: Re: افضالِ الضالِ في سلاح الامداد والتموين
Author: ترهاقا
Date: 01-04-2004, 09:59 AM
Parent: #37

حبيبنا دكين

كل عام وإنت بخير

ايه اللوحة الجميلة دى يا راجل

وزى ما قال صديقى النور حمد تاكل منو وبرضو تقوم جيعان

باين عليهو ديك كويتى .

وتسلم

Post: #39
Title: Re: افضالِ الضالِ في سلاح الامداد والتموين
Author: AlRa7mabi
Date: 03-04-2004, 09:57 AM
Parent: #1

افضالِ الضالِ في سلاح الامداد والتموين

....

Post: #40
Title: Re: افضالِ الضالِ في سلاح الامداد والتموين
Author: معتصم دفع الله
Date: 03-04-2004, 01:12 PM
Parent: #39

الحبيب دكين

جيت ماري بي هنا سمعت صياح ديكم قلت أجي داخل وأشوف الحكاية شنو .
بس أوعه الديكة ديل يقوموا يتمردوا عليك وتصحى الصباح تلقاهم عملوا عليك إنقلاب .
قصة في منتهى الروعة والجمال وربنا يديك الصاحة والعافية .

تحياتي وسلامي

Post: #41
Title: Re: افضالِ الضالِ في سلاح الامداد والتموين
Author: DKEEN
Date: 03-04-2004, 11:42 PM
Parent: #1

مشكور يا معتصم على المرور الجميل


يا خوانا
من الامور المؤسفة ..ان تقصد شيئا بالضجة فتضج اشياءا اخرى غير مقصودة ..

الديك صاحب النداء المذكور اعلاه اثار اهتمامكم وضجة اكثر من رباح نفسها
حتى انه نال اوسكار اساسي ..

وقد سمعت فيما سمعت ضمن مكالمة مع اصغر اخوتي قبل اسبوعين او يزيد ان ذلك الديك المقدس بمنزلنا قد تحول الى جلايكوجين وكريات دم حمراء ..

وفي رواية اخرى تحول الى فضلات استقرت في بئر بالمنزل حفر لاغراض ( نداء الطبيعة )لا مواخذة ...

هكذا ببساطة تحولت اشواقي واهتمامكم وسعيكم وباندوث بكري واوسكار اساسي الي نداء الطبيعة الانسانية ...

ارايتم- يرحمكم الله - كيف النداء يتحول الى نداء اخر



صحي والله المادة لا تفنى ولا تزول ..