Post: #1
Title: ساخر سبيل : فاكى فلتر !
Author: الفاتح يوسف جبرا
Date: 10-01-2008, 06:25 AM
صحيفة الرأى العام
عدد الأحد الموافق 28 سبتمبر 2008م
موقع الكاتب (مؤقتاً) : www.sudanona.wordpress.com
_________________________________________________________________________________________
أثناء فترة تواجدى بالقاهرة فى شهر مايو الماضى لإجراء عملية (قسطرة) بالقلب قدم لى (قاسم) مرافقى المقيم بمصر الدعوة للجلوس على محل (قهوة سودانية) كما أطلق عليه قائلاً :
- تعال يا استاذ عشان تشوف السودانيين هنا عايشين كيف
كانت القهوة تقع فى (وسط البلد) وكان الوقت عصراً ..معظم الرواد شباباً ما عدا قلة من (العجائز) .. الجو سودانى تماما .. هذا يضع (طبلية) عليها سجائر (البينسون) والبرنجى وآخر يضع أمامة (تربيزة) عليها ( حقت سعوط) وقد قام برص أكياس (التمباك) أمامها .. بينما ست (الشاى) تلبس (فستاناً) محذقاً ذو ألوان صارخة وتنتعل (سفنجه كحلية) وقد (مشطت) رأسها (مشاط أفريقى) وهى تجيب على طلبات الزبائن ذوى السحنات والألوان والأزياء المختلفة .
- الناس ديل شغالين شنو هنا؟
- والله يا أستاذ الغالبية منهم عندهم لجؤ؟
- هو اللجؤ بقى شغل ؟
- يعنى بيدوهم قرشين تلاته كل شهر يعيشو منها
- بتكفيهم ؟
- ما بتكفيهم عشان كده بيقومو يشتغلو حاجات كده !
وأخبرنى (قاسم) بالحاجات (البشتغلوها) الجماعه ديل والتى لم أندهش لها .. ولم أستبعدها (كما يفعل البعض) وذلك لعلمى بأن (الجوع كافر) وأن (الإقتصاد) يتناسب (طرديا) مع الأخلاق ! ولكن أكثر ما إندهشت له هو قوله لى بأن فئة كبيرة منهم (عاوزة تفك فلاتر) !
- أجبته متسائلاً فى إستغراب : يعنى شنو (تفك فلاتر) ؟
- أجابنى فى (بساطة) : يعنى عاوزين يبيعو (الكلى) بتاعتهم ! يعنى الواحده كده بتجيب ليها ذى (كم ألف جنيه) إحتمال (يصرفا) لمن تحصل ليهو (مضاعفات) !
وهنا فقط ... فقط.. أدركت حجم المأساة .. مأساة أن يبدأ الإنسان فى (تشليح) نفسة , المرة دى (كلية) وبكرة (شويت بنكرياس) وبعد بكرة (حتت فص كبد) ويلا .. لا (جمارك) ولا يحزنون (الزول) يكون شايل بضاعتو جواهو وماشى بيها لا من شاف لا من درى ! لم يقطع حبل تفكيرى إلا صوت (قاسم) وهو يقول لى :
- شنو يا استاذ ؟ الحكاية دى شغلتك وإلا أيه؟
- هى من ناحية شغلتنى شغلتنى لكن يا قاسم (سوق الكلى) ده وين؟
- (ضاحكا) : سوق شنو يا أستاذ السماسرة ديل بيعملو فى شنو؟
- (مندهشا) : سمااااسرة ؟
- أيوه يا استاذ مش فى سماسرة (شقق) وعقارات .. وسماسرة (عربات) كمان فى سماسرة (كلى) وسماسرة (كبد) وبنكرياس !
- يعنى هو البيطلع بالكلية (تيستا) اقصد هو البتأكد من إنو شغاله كويس !
- أيوه يا أستاذ ما (السمسار) ده بيودى (البائع) يفحص بضاعنو ويعمل تحليلاتو عشان تكون أوراقو جاهزة !
ولمن يظهر(زبون) والبيعه تتم يمشى لأقرب (حته بتعامل) معاها ويسلم الزبون البضاعه ! والزول البائع بعد داك بيقولو عليهو (فاكى فلتر) !
قلت فى نفسى (أما شغلانية وسخة بشكل) والله (السماسرة) ديل خطرين خلاص عرفنا الواحد يقنعك تبيع (بيتك) الفى (الواحة) عشان يجيب ليك بيت فى (زقلونا) وتطلع ليك بشويه (فرق) يريحك شويه وبعد شويه يقنعك تبيع بيت (زقلونا) عشان يجيب ليك بيت فى حى (أخنق فطس) وتطلع ليك بقرشين حلوين تسدد بيهم (الديون) العليك وتدفع للأولاد رسوم (المدارس والجامعات) وآخر حاجه يقنعك بأنو (البيت) لزومو شنو؟ بيعو عشان الأولاد ما يموتو بالجوع وأجر ليك بيت فى (الربع الخالى) ! لكن يسمسرو فى (أعضاء بشرية) ؟ يعنى الواحد يقتعك (تفك فلتر) وبعد شويه سماعه ( أضان) وشويتين لمبة أمامية يمين (عين يمين) ... لا .. لا دى شغلانية وسخة شديد !
بعد أن أفقت من مخاطبة نفسى قلت (لقاسم) :
- والسماسرة ديل بيكونو قاعدين وين؟
- شوف يا استاذ ديل بيكونو (بيشركو) للضحايا قدام معامل (التحاليل) و(المستوصفات) وكمان فى (القهاوى) – مستطرداً- هسه شفت الزول القاعد هناك بيعاين لينا داك و بيشرب فى الشيشة ولابس ليهو (ساعه دهبية) داااك ونضارة سوداء ؟
- أيوه مالو ؟
- ده متمركز فى (القهوة) دى وبشيل زباينو من هنا !
لدهشتى ما أن إنتهى (قاسم) من جملته الأخيرة حتى قام ذلك الشخص بإرتشاف (فنجان القهوة) الذى أمامه وقام بزح ً (الشيشة ) جانباً ونهض متوجهاً نحونا وهو يرسم على وجهه إبتسامة مصطنعه وقال يخاطبنى:
- البيه مش برضو عاوز (يفك فلتر)؟
- لا والله أنا بس جاى (أسلك فونيه) وراجع بلدى !
كسرة :
ما مشكلة (ربع) الشعب الفضل (يفك فلاتر) ويفضلو (التلتين) – أو كما قال !
|
Post: #2
Title: Re: ساخر سبيل : فاكى فلتر !
Author: Emad Abdulla
Date: 10-01-2008, 06:36 AM
Parent: #1
شيخ الفاتح ..
عيدك سعيد يا مواطن ..
الكلام على المقنيتا و البوبينا ..
ديل أنا ما بفرّط فيهم ..
الدنيا ما معروفة ياخوي ..
أما الجربوكس .. فده رميت طوبتو من زمان .
الواحد مع ناس ( يفكون ) ديل .. بقى شاقي راس مكنة ..
الله لا كسّب العطشقية .
إنا لله ..
بلد حوش خردة صحي .
|
Post: #20
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:19 AM
Parent: #2
Quote:
الكلام على المقنيتا و البوبينا ..
ديل أنا ما بفرّط فيهم ..
الدنيا ما معروفة ياخوي ..
|
قرط يا (عمدة) على كده ً!
|
Post: #3
Title: Re: ساخر سبيل : فاكى فلتر !
Author: عبدالكريم أحمد الامين
Date: 10-01-2008, 09:09 AM
Parent: #1
البروف ابو ناجي
*** كل سنه وانت والاسره الكريمه بصحه وعافيه***
حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل..
علي من اوصولونا الي هذه المرحله من التشرد والضياع وبيع الاعضاء ,, وبيع ماهو أكثر من الاعضاء ,, وظلوا يمتصون ثروة الوطن ودماء هذا الشعب الفضل بالجبايات والضرائب والزكاه والدمغات وكل مايجلب لهم دخلاً ويزيدنا فقراً ومسغبه…
*** ببركات هذه الايام المُباركات ياعلي ياعظيم أنقذنا ممن أتو لإنقاذنا ,, فما اوصلو اليه شعبنا لم يصله في ظل إى نظام كان من قبل …
|
Post: #21
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:27 AM
Parent: #3
عزيزى عبدالكريم
كل سنه وانت والاسره الكريمه بألف خير
Quote:
*** ببركات هذه الايام المُباركات ياعلي ياعظيم أنقذنا ممن أتو لإنقاذنا ,, فما اوصلو اليه شعبنا لم يصله في ظل إى نظام كان من قبل … |
اللهم تقبل !
|
Post: #4
Title: Re: ساخر سبيل : فاكى فلتر !
Author: Badr Edinn Abdul Rahman
Date: 10-01-2008, 10:27 AM
Parent: #1
استاذنا الجليل الفاتح جبرا أول حاجة كل سنة وأنت طيب وإن شاء الله العيد هذا يكون مليء بسيناريوهات سعيدة ومليئة بالآمال العراض، وإن كانت هذه أمنية صعبة ولكن على المولى عز وجل ليس هناك شيء صعب، ولكن بالجد من مرارات الحياة أنك تسمع لهذه المآسى قاتل الله الغربة وقاتل الله الفقر فعلاً الجوع قد يجعل الكثيرين أن يتاجروا بأعضائهم البشرية، وبالله عليك الله شوف الشعب السوداني دا لطيف كيف في كثير من الأحيان يتعامل مع المآسي بظرف واستوقفتني عبارة فاكي فلتر لدلالة على بيع أحد كليته، شكراً يا استاذ فعلاً السيناريوهات هي انعكاس عن حالة الشعب السوداني عن نفسه خارجاًوإليك هذا المقطع عشان نشوف منو المتسبب في خروج خيرة الشباب عن الوطن العزيز:هي أبيات جميلة لشاعر الوطن الجميل محجوب شريف من قصيدة الرائعة "غويشاية"
ضاقت ولما استحكمت حلقاتا
ياللاسف ... كم من ولد فاتا
سهولا ، جبالا ، غاباتا
ونيلا جاري
في حزة مفازاتا
هديك لجة موانيها
و فوق رحمة سماواتا
ضاقت و لما استحكمت حلقاتا
كم من ولد فاتا ؟؟
|
Post: #22
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:31 AM
Parent: #4
عزيزى بدرالدين
كل سنة وإنت طيب
| Quote: وإن شاء الله العيد هذا يكون مليء بسيناريوهات سعيدة ومليئة بالآمال العراض، وإن كانت هذه أمنية صعبة ولكن على المولى عز وجل ليس هناك شيء صعب، |
هى من ناحية إنها أمنية صعبه فصعبة جدا مع الوضع الحاصل ده لكن (التغيير) ليس على الله بعزيز! تحياتى
|
Post: #5
Title: Re: ساخر سبيل : فاكى فلتر !
Author: شريف شريف
Date: 10-01-2008, 12:10 PM
Parent: #1
شكرا جزيلا الاستاذ الفاتح يوسف جبرا علي اضاتك المهم لظروف عدد كبير من الشباب السودانيين المقيمين بالقاهر وكيف وصلت بهم سؤ الاحوال ( اسو ما يمكن ان يتصورة انسان هو بيع اعضاك الداخلية حتي تحفظ نوعك من الفنا من
من الفنا
قبل حوالي عشرين كنت في القاهرة لظروف علاج الوالدة ودهشت حتي البله في نفس القصة
اللة يجازى الكان السبب (الكيزان طبعا )
|
Post: #6
Title: Re: ساخر سبيل : فاكى فلتر !
Author: عبد العظيم احمد
Date: 10-01-2008, 12:38 PM
Parent: #5
عندى زول صاحبى
دايما يقول ليك
المشكلة وين
|
Post: #24
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:36 AM
Parent: #6
Quote: عندى زول صاحبى
دايما يقول ليك
المشكلة وين |
وأنا عندى واحد صاحبى يا عبدالعظيم ما قاعد يقول (المشكلة وين) !
|
Post: #7
Title: Re: ساخر سبيل : فاكى فلتر !
Author: عبدالكريم أحمد الامين
Date: 10-01-2008, 12:43 PM
Parent: #5
*** سوف يتم يوم الاحد 05/10/2008 بعد صلاة الظهر إفتتاح مركز فلترناالإسلامي للتوجه الحضارى (شركة مُساهمه خاصه بالوالي وأخوانه واخوان الرئيس) ,, فلاترنا لم تتذوق طعم الكحول ,, إشترى فلترين والتالت هديه مع خدمة التوصيل للمقابر برسوم مُخفضه..(واهو برضو قرشين حلوين) بدل مايستفيدو المصريين بكل الغله..
** من المتوقع حدوث هذا السيناريو ,, لو ما يكون هو حاصل بالفعل !!!
|
Post: #8
Title: Re: ساخر سبيل : فاكى فلتر !
Author: Abdlaziz Eisa
Date: 10-01-2008, 04:56 PM
Parent: #7
sbl سلام
يا سبحان الله
هذا شئ غريب!!
|
Post: #25
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:38 AM
Parent: #8
Quote: يا سبحان الله
هذا شئ غريب!! |
فعلاً عبدالعزيز الأشياء وصلت حد (الفجيعة) !
|
Post: #23
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:33 AM
Parent: #5
| Quote: قبل حوالي عشرين كنت في القاهرة لظروف علاج الوالدة ودهشت حتي البله في نفس القصة |
حاجه محزنة يا شريف !
|
Post: #9
Title: Re: ساخر سبيل : فاكى فلتر !
Author: Nasr
Date: 10-01-2008, 05:05 PM
Parent: #1
زي ما قلت ليك كم مرة كدة
شر البلية ما يضحك
كل سنة وإنت طيب ومعافي
|
Post: #26
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:41 AM
Parent: #9
Quote:
زي ما قلت ليك كم مرة كدة
شر البلية ما يضحك
كل سنة وإنت طيب ومعافي |
بالفعل شر البلية ما يضحك .. كل سنة وإنت طيب !
|
Post: #10
Title: Re: ساخر سبيل : فاكى فلتر !
Author: ياسر شبيكة
Date: 10-01-2008, 05:29 PM
Parent: #1
كل عام وأنتم بخير جميعا
والله يديك العافية والصحة أبو ناجى ويكفينا شر الفلترة وتفييش الهوامش والتفييص وخلافه
|
Post: #27
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:44 AM
Parent: #10
Quote:
ويكفينا شر الفلترة وتفييش الهوامش والتفييص وخلافه
|
ياسر .. كل سنة إنت وأفراد الأسرة الكريمة بألف خير ... غايتو الفلترة دى عرفناها لكن الباقى ده ما عرفناهو بس الله يكفينا شرو !
|
Post: #11
Title: Re: ساخر سبيل : فاكى فلتر !
Author: طارق جبريل
Date: 10-01-2008, 05:35 PM
Parent: #1
كل عام واتا بالف خير
والله الواحد لا عارف يبكي لا عارف بضحك
|
Post: #12
Title: Re: ساخر سبيل : فاكى فلتر !
Author: MAHJOOP ALI
Date: 10-02-2008, 04:12 AM
Parent: #11
Quote: متوجهاً نحونا وهو يرسم على وجهه إبتسامة مصطنعه وقال يخاطبنى:
- البيه مش برضو عاوز (يفك فلتر)؟
- لا والله أنا بس جاى (أسلك فونيه) وراجع بلدى ! |
|
Post: #28
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:45 AM
Parent: #11
| Quote: والله الواحد لا عارف يبكي لا عارف بضحك |
نبكى أحسن !! مش كده يا طارق !!
|
Post: #34
Title: Re: ساخر سبيل : فاكى فلتر !
Author: saber alhawatti
Date: 10-03-2008, 08:18 AM
Parent: #28
أستاذ الفاتح
نبكى كيف ؟ الكيزان حتى الدموع نشفوها ما خلوها لينا
|
Post: #13
Title: Re: ساخر سبيل : فاكى فلتر !
Author: الفاتح يوسف جبرا
Date: 10-02-2008, 06:46 AM
Parent: #1
الأخوة الأحباء الأعزاء
كل سنة وإنتو طيبين ولم نقنط من رحمة الله الذى بيده كل شئ .. كل شئ !
لكم الود والتحايا الطيبات ....
|
Post: #14
Title: Re: ساخر سبيل : فاكى فلتر !
Author: زهير الزناتي
Date: 10-02-2008, 07:16 AM
Parent: #1
عادل شاب في الرابعة والعشرين من عمره ، توفي والده منذ عشر سنوات ، عملت والدته في المنازل من أجل أن توفر لهم قليل من الخبز والكرامة ، التي دوماً ما يحس بأنها تمسح بها منازل الناس لذلك دوما يحس بأنه كسير النفس ، حقق نجاح هزيل في الشهادة السودانية ، حتي إنه الآن لا يذكر نسبته علي وجه التحديد ولكنها أعلي من الخمسين بالمائة قليلاً ، عمل ميانيكي في سوق الكلاكلة اللفة مع الأسطي كربرتير ، تعلم منه المهنة علي الطريقة الجربندية ، كان دخله إضافة لدخل والدته لا يكفي إلا لضروريات الحياة ، ثلاث من أخوته في المدارس ، وأختيه في الجامعة ، الكبيرة تدرس الحقوق في سنتها الأخيرة والصغري تدرس تربية في السنة الثانية ، أصر عادل علي إكمال إخوته لتعليمهم مهما كلفه ذلك من رهق ولكن عمل والدته في المنازل يزيد أزمته النفسية يوماً بعد يوم ،، بدأ المرض يتسلل لجسد والدته حتي اقعدها عن العمل تماماًٍ ثم عن الحركة ، وبدأت كل مسئوليات المنزل تقع علي عاتقه ، وتحاصره الأزمات من كل جانب ، الأخت الصغري توقفت عن الدراسة لأجل أن تكمل الكبري تعليمها فما تبقي لها عام ، والأولاد الصغار الثلاث ، يعملون بعد الدوام المدرسي في سوق اللفة تحت عين أخيهم ، وكل ذلك لم يبعث العافية في جسد والدتهم المريضة أو يعبر بالعائلة من تحت خط الفقر ... يسمع أحاديث المدينة واسرارها من عملاء الورشة الذين يزورون الخرطوم يومياً فيأتوا بأخبار الفساد والثراء التي اجتاحتها في سنوات قليلة ، مني نفسه بالمنزل والعروس والعربة ،، وقبل كل ذلك شراء العافية لوالدته من أطباء المدينة ،
سمع أن احدهم باع كليته لتاجر ثري ، ففتحت له طاقة من النعيم ، وبدأ يسأل كل من يعرفه عن آثار التبرع بكلية والعيش بواحدة ، وما قد يسببه ذلك من مشاكل صحية ، عرف من أحد الأطباء الذين يترددون علي الورشة كل صغيرة وكبيرة تخص الأمر ، حتي باغته الطبيب ، هل تنوي أن تتبرع بكليتك لقريب لك .؟ فصمت عادل صمت القبور ، ونزلت دمعة ساخنة في دواخله ،، قرر أن يبيع كليته لأول مشتري مهما كانت المخاطر ، ولكن كيف السبيل لهؤلاء الأغنياء الذين تتعطل كلاهم من كثرة وغني ما يأكلون ، عكس فقراء منطقته الذين تتعطل كلاهم من سوء وقلة ما يأكلون مرت الشهور كئيبة علي عادل ، حتي رأي إعلان في أحد الصحف اليومية التي وجدها علي عربة أحد الزبائن ومر علي صدورها أسبوع ، صيغة الإعلان تفيد بأن هنالك مريض يحتاج لمتبرع بكلية ومن فصيلة كذا ، وان المريض يتحمل كافة نفقات العملية والسفر والإقامة لأن العملية ستتم خارج السودان ، اخرج جزلانه سريعاً ، وقرأ علي خلفية البطاقة فصيلة الدم ولفرحته كانت نفس الفصيلة المطلوبة ، جري عادل نحو محل إتصالات بعيداً من الورشة حتي لا يتلصص عليه أحد ، وإتصل بالرقم الموجود علي الإعلان ، جاءه صوت شحمان وعرف بأنه والد المريض ، وإنهم يسكنون في أحد ارقي أحياء الخرطوم شرق ، رغم أن الرجل أشترط علي عادل أن تكون كل أوراقه الثبوتية متكتملة ، ولكنه كان يعرف أن الفصيلة التي يطلبونها نادرة ، ولم يتصل بهم منذ نشر الإعلان الأسبوع الماضي ...لذلك وصف لعادل المنزل جيداً ، علي أن يتابع معه بالتلفون حتي يصل للمنزل ، غادر عادل الكلاكلة اللفة فوراً بعد أن إستأذن من الأسطي كربريتر بحجة البحث عن دواء لوالدته في مستشفي الخرطوم التعليمي ،،، وصل عادل لمنزل المريض بعد أن أتصل بهم من كل محلات الأتصالات القريبة من المنزل ، ووصف لهم نفسه وما يرتديه ولون شعره وطوله ، حتي تم التعرف عليه بعد لأي ،،
أشمئزت الأسرة من منظر عادل وصحته ومستوي نظافته ، إلا إنهم مضطرون لإنقاذ حياة إبنهم ، أتفقوا معه علي البدء في التحاليل ، وتطابق الأنسجة وغيرها من صباح الغد ، ومني نفسه أثناء الخروج (بغمتة) كاربة ، ولكنهم خيبوا أمله ، وذلك لتجاربهم مع كثير من المحتالين .....
خلال إسبوعين أكتملت كل الترتيبات والفحوصات وإجراءات السفر لباكستان حيث ستجري العملية ، وأصبح لعادل جواز سفر به تاشيرة للمرة الأولي ، كل ذلك تم في سرية تامة ، من الجميع لم يخبر أحد حتي والدته المريضة أو الأسطي كربريتر ، أخبرهم بأنه سيسافر بورتسودان ، للعمل في أحد الورش مع أحد أصدقائه هناك ، وإذا كان العمل مجدي سأرسل لكم وإذا حدث العكس سأعود لكم بأسرع ما يمكن ، تحدث مع والد المريض بأنه يحتاج لمبلغ من المال يتركه لوالدته المريضة ، رفض الرجل إعطاءه أي أموال قبل السفر ، وفي حل وسط أقترح له بأنه سيتصل بإبنه الآخر والذي تركه في محله بالسجانة وهم في صالة المغادرة أن يعطي الأخ الأصغر لعادل مبلغ مليون جنيه ، وقد نُفذالأتفاق كما في الأفلام ، أتصل عادل بأخيه ووصف له المحل بسوق السجانة ، فذهب الأخ علي التو ، وحينما كانا علي أبواب البص المؤدي للطائرة ، أطمئن عادل علي مصروف والدته ، كما أطمأن ذاك الرجل علي أمواله بأنه لم تذهب لمحتال ،
بعد إنتهاء العملية أستلم عادل كامل مستحقاته المالية 15.000 دولار قبل العملية ومثلها بعد العملية ، وخصم منها مبلغ ألف دولار لأن اهله أستلموا مبلغ مليون جنيه أخري بعد مدة من سفره ، رجع عادل ، إزدادت حسرته علي فقره ، فها هو يمنح كليته لشخص لا يعرفه مقابل مبلغ مالي كان يراه قبل العملية كنز سمين ، وها هو الآن لا يساوي شئ ، حتي لا يمكنه أن يشتري لهم منزلاً ، وفجأة تذكر والدته المريضة ، والتي قد تحتاج لسبب ما لنقل كلية ، فماذا يقول لهم ..
دخل عادل في دوامة من الصراع النفسي بعد عودته ، ولم يعرف حتي ماذا يفعل بالمبلغ الذي بحوزته ، توقف عن العمل حتي ورشة كربريتر كان يتحاشي الذهاب بشارعها حتي لا يتعرض لتحقيقات كربرتير عن بورتسودان فيكتشف كذبته ، أدمن الجلوس في المنزل ، كان لا يخرج إلا للخرطوم ليصرف بعض من الدولارات ، للمصروف اليومي ثم مصاريف علاج والدته عند أحد الإخصائيين في الخرطوم ، والذي أخبره بعد أن صرفوا قرابة السبع مليون بأن علاج والدته مستحيل لأنه قد تأخر ، فكر عادل في المستشفي الذي أجري به العملية وكيف يهتمون بالإنسان رغم أن ذلك المستشفي خاص ، وكيف ,, وكيف ، فكر في أن يسافر بها لمصر أو الأردن ولكن الدكتور نصحه بالا يسافر فلا بصيص من الأمل ،،، تبددت ثروة عادل التي حسبها لن تنتهي في فترة وجيزة ، ولم تتعالج والدته ، ولم تنقل أسرته من خط فقرها ، وفقد كليته ...
تجارة الأعضاء تدخل سوق الله اكبر في السودان
|
Post: #29
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:48 AM
Parent: #14
| Quote: تبددت ثروة عادل التي حسبها لن تنتهي في فترة وجيزة ، ولم تتعالج والدته ، ولم تنقل أسرته من خط فقرها ، وفقد كليته ... |
زهير .. كل سنة وإنت طيب .. مثل هذه القصة التى سردتها تتكرر كثيراً .. شوف بالله وصلنا وين ؟
|
Post: #15
Title: Re: ساخر سبيل : فاكى فلتر !
Author: elfadl abdellatif
Date: 10-02-2008, 08:50 AM
Parent: #1
الاستاذ الفاتح جبرا
كل عام وانت وكل السودان واهله في خير وسلام
والتحية لك وانت تسرح بخيالك في الواقع الذي نصطدم به كل يوم .. فتخرج منه بتلك السيناريوهات وتخرجها بأسلوبك الممتع .. والسهل الممتنع ..
ولي تعليق بسيط (زي ما بقولو) على مسألة المتاجرة بالاعضاء .. حيث اعتقد ان تلك الفئة التي ذكرتها على بؤسها الا انها اسعد حظا ممن تسرق منه كليته دون وعي منه ودون ان يتلقى مقابلا لها .. حينما يدخل المريض الى غرفة العمليات لاستئصال الزائدة الدودية ليخرج منها وقد استؤصلت جميع الزوائد ..
وهناك فئة اخرى .. تلك التي تتم نقل عملية اعضاء لها .. وتكون قطعا غير اصلية او تقليد .. كمن تزرع لهم اعضاء من حيوانات ..
عشان كدة يالفاتح ياخوي أصلك ما تفتح بطنك لي دكتور .. الا اذا كانت عملية بدون بنج ... وبكامل قواك العقلية .. وكل واحد يحاسب على لغاليغو
|
Post: #16
Title: Re: ساخر سبيل : فاكى فلتر !
Author: مهيرة
Date: 10-02-2008, 12:14 PM
Parent: #15
Quote: حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل.. حــســبي الله ونـعم الوكيل..
علي من اوصولونا الي هذه المرحله من التشرد والضياع وبيع الاعضاء ,, وبيع ماهو أكثر من الاعضاء ,, وظلوا يمتصون ثروة الوطن ودماء هذا الشعب الفضل بالجبايات والضرائب والزكاه والدمغات وكل مايجلب لهم دخلاً ويزيدنا فقراً ومسغبه…
*** ببركات هذه الايام المُباركات ياعلي ياعظيم أنقذنا ممن أتو لإنقاذنا ,, فما اوصلو اليه شعبنا لم يصله في ظل إى نظام كان من قبل … |
آميييييييييين
وعيدكم مبارك
|
Post: #31
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:53 AM
Parent: #16
شكراً على المتابعة مهيرة وكل سنة وإنتى طيبه
|
Post: #30
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:51 AM
Parent: #15
| Quote: عشان كدة يالفاتح ياخوي أصلك ما تفتح بطنك لي دكتور |
هو قالو ليكا يا الفاضل قروش (فتح البطن) دى ذاااتا هينه ؟
|
Post: #17
Title: Re: ساخر سبيل : فاكى فلتر !
Author: Adel Sameer Tawfiq
Date: 10-02-2008, 12:36 PM
Parent: #1
الأستاذ الرائع أبو ناجي..
ما عرفت أبكي و الا أضحك..
ربنا يلطف بالعباد..
Quote: أما الجربوكس .. فده رميت طوبتو من زمان .
الواحد مع ناس ( يفكون ) ديل .. بقى شاقي راس مكنة .. |
عليك الله ما بتلقى لينا جربوكس سكند هاند إستعمال دبلوماسي من ناس (يفكون) ديل ؟؟!!
|
Post: #32
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 06:57 AM
Parent: #17
عادل إذيك .. كل سنة وإنت طيب وأفراد الأسرة الكريمة ..
| Quote: عليك الله ما بتلقى لينا جربوكس سكند هاند إستعمال دبلوماسي من ناس (يفكون) ديل ؟؟!! |
يعنى ناس (يفكون) ديل (عويرين) يفكو ليهم (جربوكسات إستعمال دبلوماسى) !
|
Post: #18
Title: Re: ساخر سبيل : فاكى فلتر !
Author: Adel Sameer Tawfiq
Date: 10-02-2008, 12:36 PM
Parent: #1
حذف للتكرار
|
Post: #19
Title: Re: ساخر سبيل : فاكى فلتر !
Author: عبداللطيف حسن علي
Date: 10-02-2008, 11:48 PM
Parent: #18
في كتابة سابقة،لك،اندهشت،من هول مايمكن ان يقدمه الترميز.
اليوم،لا اجد شئ يستفز معرفتي السابقة!
هناك بيع للخصية في القاهرة، دي فلاتر برضو؟
ـــــــــــــــــــــــــــــــــــ
مخاطبة الطبقة الوسطي،عبر النت،تحتاج قراءة ما لنجيب محفوظ، مع الاعتذار!
|
Post: #33
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 07:02 AM
Parent: #19
| Quote: مخاطبة الطبقة الوسطي،عبر النت،تحتاج قراءة ما لنجيب محفوظ، مع الاعتذار! |
ما عرفتك قاصد شنو؟ يا ريت لو شرحت ليا بالمسنجر ياعبداللطيف ... تحياتى وكل سنة وإنت طيب
|
Post: #35
Title: Re: ساخر سبيل : فاكى فلتر !
Author: الفاتح يوسف جبرا
Date: 10-03-2008, 10:17 AM
Parent: #1
Quote:
أستاذ الفاتح
نبكى كيف ؟ الكيزان حتى الدموع نشفوها ما خلوها لينا
|
صابر إذيك وكل سنة إنت وأفراد الأسرة الكريمة بألف خير ... هو الما نشفوهو شنو يا (صابر) !
|
|