ساخر سبيل : عارف؟

ساخر سبيل : عارف؟


02-07-2008, 07:58 AM


  » http://sudaneseonline.com/cgi-bin/sdb/2bb.cgi?seq=msg&board=226&msg=1224587978&rn=6


Post: #1
Title: ساخر سبيل : عارف؟
Author: الفاتح يوسف جبرا
Date: 02-07-2008, 07:58 AM
Parent: #0

نصح الأطباء (الحاج سليمان) بالسفر إلى الخارج لإجراء بعض الفحوصات ، بما أن (الحاج سليمان) من الرعيل الأول الذى عاصر الحركة الوطنيه وشارك فيها بصفته كان أحد (عمال السودان) فقد إختار (الناقل الوطنى) إذ أعتبر أن إختياره لأى (خطوط طيران ) أخرى يعد عملاً يفتقر إلى ادنى مستويات (الوطنيه) ، لم ينس حاج سليمان عند مغادرته منزله ووداعه لأبنائه أن يقوم بتسليم زوجته (قروش المعيشه) خلال فترة غيابه وأن يدس فى يدها بعض (القريشات) لزوم الإستعانه بهم عند إقامة (ليالى المأتم) ، توجه سليمان إلى مبانى الخطوط وقف أما موظف الحجز الذى قام بتزيين مكتبه بصدر الحكمة التى تقول (ما طار طائر وإرتفع) :
- والله يا إبنى عاوز ليا حجز (الليله) ماشى الأردن إتعالج
- والله يا حاج عندنا الليله سفريه وااحده (عمان)
- مطار أربعه .. إقلاع سته .. (دفن) أقصد وصول تسعه !!
- طيب خلاص أقطع ليا ماشى وجاى !!
- (شخص خلفه) : يا حاج أحسن تقطع ذيى كده بس (ماشى) عشان (الورثه) يستفيدو من (الجاى) دى
- (غير مهتم لما سمعه) : خلاص يابنى أقطع ليا ماشى وجاى !
- طيب يا خال إنت عاوز مقعد إستواء ولا نص (إستواء)
- مش فاهم !
- لا يعنى أنا بقصد إنت عاوز مقعدك قريب من أبواب النجاة ولا بعيد منها
- أكيد قريب منها.. وإلا أقول ليك (مافى حاجه أحسن؟)
- والله إلا نحجز ليك (مقعد الكابتن) !

بعد أن قام موظف الحجز بتسليم (سليمان) التذاكر اشار عليه بالذهاب إلى (كاونتر) أخر مكتوب عليه (السلامة الشخصيه) ، طلب الموظف من (سليمان) التذكرة التى فضاها أمامه ثم خاطبه قائلاً :
- شوف يا حاج كل مسافر على خطوطنا دى أنحنا لازم نتأكد من سلامتو
- والله دى الخطوط وإلا بلاش
- عشان كده لازم كل راكب يشيل (أنبوب) الرغوة بتاعتو معاهو
- ومالو يابنى نشيل
- تشيل ساااكت لكن إنت عارف الأنبوبه بتاعت الرغوة دى بى كم
- يعنى ما مع التذكرة يعنى بى قروش؟
- أكيد بى قروش يا حاج هو نحنا مسئولين من سفرك وإلا من سلامتك قالو ليك
- كيف يعنى؟
- أفهمك يا حاج .. الطيارة دى مش ممكن تقع فى البحر؟
- ممكن
- أها يعنى نصرف لى كل راكب (قارب نجاة)
- طبعن لا
- أها والطيارة دى مش ممكن تتعرض لى عمليه (قرصنة) أو إرهاب أو عصابه تختفا
- ممكن
- أها يعنى نصرف لى كل راكب مسدس وسكين
- طبعن لا
- والطيارة دى مش ممكن تنزل أضطرارى فى الإسكيمو
- ممكن
- يعنى نصرف لى كل راكب بالطو وبطانيه
- طبعن لا
- والطيارة دى مش ممكن تتعرض فى الجو لى ضغط عالى والشباك بتاعا ينشق
- ممكن
- أها يعنى نصرف لى كل راكب (مكنت لحام)
- طبعن لا
- الحاجات دى يا حاج مش كلها ممكن تحصل ؟
- أها يا إبنى يعنى عشان سلامتى أنا هسه أشترى منكم شنو ؟ إنبوبة رغوة ولا قارب نجاة ولا بالطو وبطانيه ولا مكنت لحام ولا مسدس وسكين ؟
- والله يا حاج لو عاوز تضمن وصولك سالما غانما تشترى (الباقه) دى كلها وح نعمل ليك عليها تخفيض و نديك ليها بى سعر معقول
- أقول ليك حاجه يا بنى ؟ ما عندكم (باراشوتات) ؟
- الباراشوتات فى يا حاج لكن المشكلة إنك بعدين تطلع بى وين؟
أقتنع الحاج بكلام موظف مبيعات أدوات السلامة الشخصيه حيث عدل عن (الباراشوت) وقام بإقتناء أنبوبة (رغوة ضد الحريق ) ، وبعد أن قام الحاج بحمل الأنبوبه أشار عليه الموظف بالمرور على كاونتر (وصايا المسافرين) حيث قابله الموظف مبتسما وهو يسأله :
- يا حاج وصيتك دى عاوز ناس البيت يستلموها بالسريع ولا عادى ولا بالنت ؟
- والفرق بيناتم شنو؟
- بالسريع يعنى ح يستلموها قبل ما تبقى (فحمة) يعنى قبل ناس المطافئ ما يطفو النار (بالمويه) وعادى يعنى عادى بعد ما تمشى المشرحة ويتم التعرف عليك والشغلانيه تطول
- طيب ده كلو عرفناهو قصت (بالنت) دى شنو؟
- أيوااا بالنت دى يعنى إنت بس تدينا الوصيه والإيميل بتاع ناس البيت ومع (الوقعه) طوااالى نرسلا ليهم بالإيميل
- والله يا ولدى (تكنولوجيا الكوارث) ما عندكم !
- وبعدين يا حاج فى حاجه مهمة لازم توضحا فى الوصيه بتاعتك دى؟
- اللى هيا أيه يا إبنى
- اللى هيا يا خال إنك لازم تكون (عارف) منو الح (يستلم) التعويض من (أحفاد أحفادك) ! إنت قايل يعنى سمونا (عارف) كده ساااكت ؟

Post: #2
Title: Re: ساخر سبيل : عارف؟
Author: الفاتح يوسف جبرا
Date: 02-07-2008, 01:38 PM
Parent: #1

دفرة وكده !

Post: #3
Title: Re: ساخر سبيل : عارف؟
Author: ناهد بشير الطيب
Date: 02-07-2008, 01:40 PM
Parent: #1

الاستاذ الساخر ....جبرا

اولا حمدلله على سلامة العودة وبركة الجيت طيب من (مرض القلب ) و(مرض الناقل الوطنى )
وربنا يديم عليك نعمة الصحة والعافية يااااارب ....تصدق بالله كنت خاته فى بالى انه اول موضوع
حتكتبه عن الطائرات ...بعد ماكنا مفتكرين اثناء سفرك وفى الفترة الفاتت انك حتجى تكلمنا عن العمليات والمستشفيات ..والاسكندرية وشم الهواء النقى ..


لى عودة باذن الله ...حبيت اسلم ......

Post: #4
Title: Re: ساخر سبيل : عارف؟
Author: محمد سنى دفع الله
Date: 02-07-2008, 01:44 PM
Parent: #3

ابو ناجي
شوف الأسم كيف لايق الايام دي
اسم لي زول في منظمة قدر الضربة
نقول شنو سفرة وعودة
ولا سلامة وكرامة
ولا شنو وشنو
غايتو شيل كل السلامات
والكرامة علينا
كن بالف خير وعافية
ورجعنا للقراية الجد
والمتعة المبهجة

Post: #5
Title: Re: ساخر سبيل : عارف؟
Author: ناهد بشير الطيب
Date: 02-07-2008, 02:02 PM
Parent: #4

شوف الأسم كيف لايق الايام دي
اسم لي زول في منظمة قدر الضربة
نقول شنو سفرة وعودة
ولا سلامة وكرامة
ولا شنو وشنو
غايتو شيل كل السلامات


السنى ....
عارف؟

حقوا الواحد بعد مالحديد فى العالم كله غلا .....
يعمل ليه شركة ....لشراء اسكراب الطائرات البتقع
كل يومين دى .....وحفاظا على تلوث البيئة ...والمنظر العام...
(بالله ياناس القروش الجاهزة ...مافى زول يسبقنى على الصفقة دى )



عارف؟
ياجبرا...زميلة لينا فى المنبر امبارح كلمتنى بانه واحد
قريبها عارض بيته فى اركويت للبيع قال خايف يوم يصحى من النوم
يلقى مضيفة واقعه ليه فى الحوش......

عارف؟

يعنى تانى الواحد يسافر بالقطاعى للسودان ....هو براه.... والبت الكبيرة براها
والولد الفى النص براه ...والباقين كل زول فى طيارة ....(عشان الاسرة
الصغيرة ماكلها تنعدم عن الوجود فى يوم واحد..)وياريت زول من الاسرة مايسافر..
. عشان يستلم التأمين وكدة ....

عارف ؟
والا اقول ليك ....
اللهم انا نسالك ....البر والتقوى فى سفرنا هذا ....ومن العمل ماترضى
اللهم انت الصاحب فى السفر والخليفة فى المال والاهل والولد .....

Post: #6
Title: Re: ساخر سبيل : عارف؟
Author: NEWSUDANI
Date: 02-07-2008, 02:29 PM
Parent: #1

الأساذ الساخر أبدا الفاتح المؤتمرات في روتانا كيف؟؟ ولا رمضان والخيمة الرمضانية ؟؟

Post: #7
Title: Re: ساخر سبيل : عارف؟
Author: الفاتح يوسف جبرا
Date: 02-07-2008, 04:57 PM
Parent: #1

Quote: تصدق بالله كنت خاته فى بالى انه اول موضوع
حتكتبه عن الطائرات ...بعد ماكنا مفتكرين اثناء سفرك وفى الفترة الفاتت انك حتجى تكلمنا عن العمليات والمستشفيات ..والاسكندرية وشم الهواء النقى ..



الغاليه ناهد
تصدقى بالله لأنو أنا ذاتى كنت عاوز أكتب عن العمليات والمستشفيات و
(الشاليهات) و(البلاجات) لكن نعمل لى ناس (الطيران المدنى) ديل شنو ؟ حقو بعد ده (الراكب) يحجزو ليهو فى الطيارة الح تقع قريب من (بيتهم) !

كسرة :
الجيه أخبارا شنو؟ ما خلاص ؟

Post: #16
Title: Re: ساخر سبيل : عارف؟
Author: ناهد بشير الطيب
Date: 03-07-2008, 00:09 AM
Parent: #7

Quote: الجيه أخبارا شنو؟ ما خلاص ؟




بى ياتو خطوط ؟

Post: #8
Title: Re: ساخر سبيل : عارف؟
Author: الفاتح يوسف جبرا
Date: 02-07-2008, 05:07 PM
Parent: #1

Quote: غايتو شيل كل السلامات
والكرامة علينا


الأخ الحبيب السنى
ياخى الله يخليك ويديك الصحة والعافية إنت ما بتقصر والله .. ربنا يجيبك لينا بالسلامه يارب ونقعد فى (المورده) بى مزااااج !!

Post: #9
Title: Re: ساخر سبيل : عارف؟
Author: الفاتح يوسف جبرا
Date: 02-07-2008, 05:11 PM
Parent: #1

Quote:
عارف؟ ياجبرا...زميلة لينا فى المنبر امبارح كلمتنى بانه واحد
قريبها عارض بيته فى اركويت للبيع قال خايف يوم يصحى من النوم
يلقى مضيفة واقعه ليه فى الحوش......


على كده يا (ناهد) تكون دى (قريبتا) العارضه البيت للبيع !!

Post: #15
Title: Re: ساخر سبيل : عارف؟
Author: ناهد بشير الطيب
Date: 03-07-2008, 00:00 AM
Parent: #9

Quote: على كده يا (ناهد) تكون دى (قريبتا) العارضه البيت للبيع !!



طبعا اكيييييد ...مضيفة جوة بيتها..وفى الحوش ....











لستك العجل بتاع الطيارة الاخيرة وقع فى مدرسة الكيبس....
هو...ليه ماقال
لستك العجل مثلا ليه طوالى مضيفة ....(فاتح نفسو)
غاااااااااااايتوا

Post: #10
Title: Re: ساخر سبيل : عارف؟
Author: الفاتح يوسف جبرا
Date: 02-07-2008, 05:16 PM
Parent: #1

Quote: الأساذ الساخر أبدا الفاتح المؤتمرات في روتانا كيف؟؟

العزيز NEWSUDANI

مش ح تقدر تغمض عينيك !!

Post: #14
Title: Re: ساخر سبيل : عارف؟
Author: Salahaldeen Nadir
Date: 02-07-2008, 11:03 PM
Parent: #10

سيدي البروف

اولا حمد الله على سلامتك و تقبل مني هذا الطشت المملؤ بناعم الثلج المدروش (كسير ايديا وحياة عينيا)

وتانيا ده كراسي
http://www.facebook.com/topic.php?uid=12901349558&topic=7687
وزي ما حتشوف انا اشتغلت التمرين ده براي والله يعني يمكن ترست حاجة وللا حاجتين وللا تلاته منك
فياريتك تصحح لي وكده

مافي تالتا لكن اخيرا
تحياتي واحترامي

Post: #11
Title: Re: ساخر سبيل : عارف؟
Author: الزبير صالح الزبير
Date: 02-07-2008, 06:41 PM
Parent: #1

استاذنا سلامات
حمد لله علي السلامة
اتصلت عليك بالقاهرة لكن يبدو انك كنت مشغول
حمد الله علي السلامة مرة اخري

Post: #12
Title: Re: ساخر سبيل : عارف؟
Author: حسين محي الدين
Date: 02-07-2008, 07:30 PM
Parent: #11

قريتها قبيل في الراي العام قربت اموت من الضحك

تشكرات يا استاذنا وأوعه من الطيارة وكدة!

Post: #13
Title: Re: ساخر سبيل : عارف؟
Author: محمد فضل الله المكى
Date: 02-07-2008, 08:14 PM
Parent: #12

يعنى عشان عرفتنا مسافرين....قُمت تهضرِب

Post: #17
Title: Re: ساخر سبيل : عارف؟
Author: الفاتح يوسف جبرا
Date: 03-07-2008, 06:23 AM
Parent: #1

الأحباء الأعزاء

شكراً على هذا الشعور الجميل ربنا يخليكم وإن شاء الله ما تشوفو شر .. تحياتى

صلاح : إبداعستان حلو شديد .. يا زول إنت جاهز تب وما دايرلك تمارين
الزبير : عرفك والله ما بتقصر .. الله يسلمك ويديك العافية .. مودتى

Post: #27
Title: Re: ساخر سبيل : عارف؟
Author: Salahaldeen Nadir
Date: 03-07-2008, 03:39 PM
Parent: #17

تشكريابروف على كلامك الجميل

انا طبعت الصفحة وماشي اوثقها في التعليم العالي والخارجية بس اول قالو لي لاااازم اطلع اذن توثيق لانو خلو الطرف بتاعي محتاج تجديد و انا ما عارف التجديد ده معناهو امشي المعسكر تاني يعني؟ وللا كيف؟

تسلم يابروف

من غير مناسبة:

انت يابروف معناها حايم معانا في الfacebook صاح؟

Post: #18
Title: Re: ساخر سبيل : عارف؟
Author: Nasr
Date: 03-07-2008, 06:26 AM
Parent: #1

حمد لله علي السلامة
وسلامة قلبك وقلمك يا مبدع

Post: #19
Title: Re: ساخر سبيل : عارف؟
Author: الفاتح يوسف جبرا
Date: 03-07-2008, 06:33 AM
Parent: #1

Quote:
حمد لله علي السلامة
وسلامة قلبك وقلمك يا مبدع


الله يديك العافيه يا ناصر .. شكراً يا حبيب على الشعور الجميل ده .. ألف شكر

Post: #20
Title: Re: ساخر سبيل : عارف؟
Author: خالد العطا
Date: 03-07-2008, 08:27 AM
Parent: #1

واااااااااصـــــــــــل ايها المبدع


وسلامات

Post: #22
Title: Re: ساخر سبيل : عارف؟
Author: Nader Abu Kadouk
Date: 03-07-2008, 08:38 AM
Parent: #20

حبيبنا الفاتح
ما اروعك

ودابكدوك

Post: #23
Title: Re: ساخر سبيل : عارف؟
Author: ابراهيم محمد الحسن
Date: 03-07-2008, 08:38 AM
Parent: #20

ألف حمدا لله على السلامة أستاذ الفاتح ..
وواصل إبداعاتك
وما تنسانا في بوست مدرسة المؤتمر ..

Post: #21
Title: Re: ساخر سبيل : عارف؟
Author: Adel Sameer Tawfiq
Date: 03-07-2008, 08:37 AM
Parent: #1

حمدالله على السلامة يا حبيب !

Post: #24
Title: Re: ساخر سبيل : عارف؟
Author: Hala Hassan
Date: 03-07-2008, 11:37 AM
Parent: #1

الأستاذ الفاتح جبرا،

أولاً ألف حمدالله ع السلامة،

ثانياُ: أقول ليك قولة، أنا شخصياً بقيت أخاف من السناريوهات بتاعتك دى، بالذات (الفنتازيا بتاعة جمهورية مين كدة مش "عارف")لأنها بتتحقق،

أما عن الطيارات، فحدث ولا حرج،

لسه ما فقنا من طيارة 10 يونيو(راحو فيها ناس أعزاء، ندعو لهم بالقبول و المغفرة) جات طيارة 30 يونيو، و خلى بالك (الأولاد فى كيبس)و الشارع هو طريقنا اليومى للعمل، و الفسحة كل يوم بنقطعها.

يعنى صحى الما وقعت بيه طيارة، بتقع ليه فوق راسه، و الله يستر...

Post: #25
Title: Re: ساخر سبيل : عارف؟
Author: الفاتح يوسف جبرا
Date: 03-07-2008, 01:36 PM
Parent: #1

- الله يسلمك يا خالد ويديك الصحة والعافية .. شكراً لهذا الشعور الجميل .. ألف شكر

- العزيز نادر أبوكدوك .. ياخى والله ما عارف أقول ليك شنو؟ تسلم ياخى تسلم ..

- إبن المؤتمر البار أخونا إبراهيم محمد الحسن .. الله يسلمك يا أبراهيم وتحياتى لكل أبناء المؤتمر فى كافة أصقاع الدنيا وإن شاء الله أدخل عليكم بى هناك أشوف الحاصل شنو إحتمال ألاقى ليا واحد من أولاد دفعتنا الما ظهر منهم ولا زول ديل .. تحياتى وحبى

- أبوالنسب الحبيب عادل سمير .. الله يسلمك يا رائع .. تحياتى لجميع أفراد الأسرة الكريمة .. منتظرين نحنا الجيه بفارغ الصبر!

- العزيزة هالة : الله يسلمك ويديك العافيه .. والله الواحد يا هالة خايف يوم يصحى الصباح يلاقى ليهو (مضيفه) واقعه فى (الحوش) !!

Post: #26
Title: Re: ساخر سبيل : عارف؟
Author: ناهد بشير الطيب
Date: 03-07-2008, 02:41 PM
Parent: #25

والله الواحد يا هالة خايف يوم يصحى الصباح يلاقى ليهو (مضيفه) واقعه فى (الحوش) !!





حتبيع البيت ؟....اقصد حيبيعوك البيت

Post: #28
Title: Re: ساخر سبيل : عارف؟
Author: عمر الحبر
Date: 03-07-2008, 04:07 PM
Parent: #1

الله يديك العافية يا جبرا يا اخى لكتاباتك الرائعة دى
وربنا يكون فى عون السودانيين لان كثير من الاحداث الكارثية
الكبيرة تمر بدون محاسبة وبدون استفادة من الاخطاء وربنا
ينهى لينا فلم غلطان المرحوم ونتطور لى قدام