(ســــيناريوهات) : تصـديق عـدم إقـامة حفـل

(ســــيناريوهات) : تصـديق عـدم إقـامة حفـل


22-11-2006, 07:45 AM


  » http://sudaneseonline.com/cgi-bin/sdb/2bb.cgi?seq=msg&board=226&msg=1190671941&rn=0


Post: #1
Title: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 22-11-2006, 07:45 AM

لم تسع (عبد العال) الفرحة وهو يستقبل مولوده (الذكر) الأول بعد ستة من البنات (الإناث) لدرجة أنه قام بطلب إجازة (بالخصم) لمدة ستة أيام من المصلحة ليتفرغ بالاحتفاء والاحتفال بهذه المناسبة السعيدة التي ظل ينتظرها لمدة عشرين عاما هي سنوات زواجه السعيدة بابنة عمه (نفيسة).
علي الرغم من ضيق ذات يد (عبد العال) لكونه من ( الموظفين في الأرض) الإ أن جهات عدة قد قامت بتقديم الدعم و (المواجبة) له احتفاء بالمولود الفارس المنتظر فجيرانه في الحي ما أن علموا باليوم المحدد (للسماية) الإ وقاموا بعمل كشف (مدنكل) يكفي لإقامة (صيوان) محترم بملحقاته من (غسالات الأيدي) و (حفاظات المياه) كما قام صندوق العاملين في المصلحة بإرسال (هايلوكس هايلوكس) ملئ بباغات الزيت وأكياس الشاي والدقيق والسكر إضافة إلي خروف (مدغلب) لزوم المشاركة في هذه المناسبة السعيدة.
في اليوم الأول لخروج (نفيسة) من الدايات، وبعد انقطاع سيل المهنئين تم عقد اجتماع اسري لمناقشة موضوع (السماية) وقد دار نقاش مستفيض حول كيفيتها حيث تعددت الآراء فبعضهم يري أن تكون غداء (ضلع) وآخرون يرون أن تكون عشاء (كوكتيل) وحيث أن الجميع لم يصلوا إلي أتفاق وحتى يرضى (عبد العال) الطرفين فقد قرر أن تكون (السماية) يومين ، اليوم الأول (غداء ضلع) واليوم الثاني (عشاء كوكتيل).....
يوم الغداء:
قام صبية الحي برش أرضية الصيوان وربط لمبات (النيون) .. وغسل (الكراسي) البلاستيكية في حين إنبرت النساء في تجهي(صواني) الغداء بينما كان (عبد العال) يرتدي جلابيته (بتاعت المناسبات) ذات اللون الرمادي الفاتح ولم ينسي أن يضع علي رأسه (طاقية) من نفس اللون والقماش، وكذلك الشال المزركش ( المصاحب للطقم) حيث وقف بعدها في مدخل الصيوان يستقبل المهنئين وهو يتابع عملية إنسياب صوانى (الغداء) وينادي علي (الأولاد) بين الفينة والأخرى:-
- يا ولد جيب (صينيه) هنا
- يا ولد جيب زيادة (رغيف) هنا
وبينما هو كذلك إذ بعربة ذات لوحة حكومية صفراء فاقع لونها تقف بقرب الصيوان ويترجل منها ثلاثة أشخاص يرتدون بدل سفاري (زيتية اللون) ظنهم (عبد العال) للوهلة الأولي أنهم زملاء من (المصلحة) الإ أنهم لم يكون كذلك
- السلام عليكم
- وعليكم السلام أتفضلوا
- لا شكرا.. لو ممكن بالله عاوزين (الزول) العامل المناسبة دي
- (فى إستغراب) أنا ذاتي في حاجه؟
- أيوه انحنا بس بنسأل انتو عملتوا تصديق؟
- نعمل تصديق لشنو؟؟ الليلة غداء وبكره عشاء وما عندنا حفله !!
- ما دا إلا نحنا بنقصدو ذاتويا حاج
- كيف؟
- مش أنتو ما ح تعملوا حفله بكره ؟
- أيوه
- يبقي مفروض تجو عندنا تعملوا (تصديق) بعدم إقامة حفله
- (فى إندهاش )والله حاجه عجيبة... كيف يعني؟ حفله وما ح نعملها نعمل تصديق بعدم إقامتها كيف؟ ولشنو؟
- أيوااا يا حاج .. أنا أوريك لشنو.. يعني إنت عاوزنا نقعد نراقب فيكم الليل كلو عشان نشوفكم حتعملوا حفله ولا ما ح تعملوا حفلة؟؟؟ نحن فاضين ليكم..(ثم واصل فى جدية) التصديق دا يا أستاذ عشان (السلطات) تعرف أنكم ماح تعملوا حفلة وما
( تختكم في حساباتا).. هسع عرفت ؟
- (في امتعاض وعاوز يخلص) والمطلوب شنو هسع ؟
- المطلوب تمشي معانا المكتب وتعمل التصديق دا

في مكتب التصديقات:
- أها (يا عبد العال) قلت لينا ما ح تجيبو فنان؟
- أيوه ما ح نجيب
- طيب ماح تجيبو منو؟
- (مستغربا) كيف ماح نجيب منو ؟ ... ماح نجيب كل الفنانين
- لا يا أستاذ لازم (تحدد) لينا ماح تجيب منو .. هسع ممكن تقول ماح تجيبوا (فرفور) تقوموا ما تجيبوا ( ترباس) أها بعدين يكون الموقف شنو؟
- يعني هسع لازم أحدد ليكم؟
- أيوه طبعا
- ودي طيب أعملها كيف ؟؟
- (فى لا مبالاة) أ تـصرف
- طيب يا جماعة أدوني فرصة لحدي بكره أصلو عزومة (العشاء) بكره...
خرج (عبد العال)من مبني (التصديقات) عائدا للمناسبة وكلمات المسئول ترن في أذنيه:
- *** لازم تحدد لينا الفنانين الماح تجيبهم ***
- ***افرض حددت لينا أنك ما ح تجيب (فرفور) وقمت ماجبت (ترباس) ***..
وحينما وصل للصيوان كان الجميع يسألونه ( كنت وين يا عبد العال ) الإ انه ظل صامتا يفكر في حل لتلك المشكلة خاصة وانه شخص (مسالم) ولا يحب (مواجهة السلطات) !!.
نزار يجد الحل :
عندما وجد (نزار) خطيب ابنة (عبد العال) الكبرى أن عبد العال ساهما طول الوقت وصامتا اقترب منه متسائلاً :
- مالك يا حاج ؟؟
- لا ما في حاجه.. مشكلة بسيطة
- مشكلة شنو يا حاج؟
وحكي (عبد العال) لنزار المشكلة الإ أن الأخير قد فاجأ (عبد العال) قائلاً :
- هسع دي مشكلة يا حاج؟ دي حلها بسيط جداً
حل المشكلة :
في صباح اليوم التالي كان (نزار) يقود عربته (الأتوس السوداء) وبجانبه (عبد العال) وهو يحمل قائمة تحتوي علي الأماكن التى يفترض أن تساهم معهم فى حصر جميع (المغنواتية) وكانت هذه القائمة تحتوى على :
1- مكتبة الإذاعة السودانية
2- دار فلاح لتطوير الأغنية الشعبية
3- دار الغناء الشعبي
4- شركات الإنتاج الفني
5- جميع مراكز الشباب
6- إضافة إلي التلفزيون القومي (سم المنوعات).
وقبل أن تنتهي ساعات العمل الرسمية تحصل (عبد العال) بمساعدة خطيب إبنته (نزار)علي أسماء جميع (الفنانين) و(الفنانات) المسجلين منهم والمسجلات بكل هذه الاتحادات ومراكز الشباب وكان بحوزته 50467 اسماً مرتبة ترتيباً هجائياً .
فى مكتب التصديقات تانى:
وضع (عبد العال) هذه (الرزم) من الأوراق التي بها (أسماء الفنانين) أمام المسئول وهو يقول:
- شوف يا سعادتك ديل كلهم ما ح أجيبهم
- (المسؤول فى إستغراب)ديل شنو ؟
- ديل فنانين
- إنت متأكد انو الما ح تجيبهم كلهم هنا؟ يعني ما في زول ماح تجيبو ما هنا؟
- أيوه متأكد – ثم مواصلاً-وكمان أنا عملت صورة من القوائم والأسماء دى عشان بعدين ما تغالطونى !!
- طيب شيل أورنيك ت/ع/ا/ح أملاهو وامشي أدفع الرسوم.
لم يوضح المسئول (لعبد العال) أين يدفع الرسوم لذلك كان لابد لعبد العال أن يقوم بسؤال أحد الموظفين
- يا أخ داير أدفع (رسوم تصديق بعدم إقامة حفل) ... أدفعها في ياتو شباك؟
- شوف الشباك الأول داك بتاع (تصديقات أقامة صيوانات العزاء) تخليهو.. الشباك البعدو بتاع (تصديقات عدم إقامة صيوان عزاء) تخليهو.. الشباك البعدو.. يعني الثالث داك شباك ( تصديقات دفن ميت) والشباك البعدو داك الفيهو (الهنودالكتار الواقفين ديك) .. داك شباك (تصديقات عدم دفن ميت) خليهو .. أها الشباك البعدم طوالي دا حق (التصديق بعدم إقامة حفل).. !!! لحظ (عبد العال) فقد كان الشباك خالياً من أي شخص.. وبعد أن ملأ (عبد العال) الأورنيك ت/ع/ا/ح وأرفق معه قوائم وكشوفات أسماء الفنانين (الما ح يجيبهم) سلمه للمسئول الذي بالشباك والذي قام بتحرير الإيصال وسلمه (عبد العال) قائلا:-
- خمسة وسبعين ألف...
العشاء :
توقفت أرتال وفود المهنئين.. وخرجت آخر صينية للعشاء.. وبدأ عدد من كانو بالصيوان فى التناقص حتى بقي (عبد العال) ونزار خطيب ابنته وجارهم (سليمان) الذى استأذن أن ينصرف بعد أن قام ومعه (نزار) بلم الكراسي والترابيز وفك (حديد الصيوان) وتوضيب الحته حيث كان (عبد العال) قد سبقهم لداخل المنزل ليأخذ قسطاً من الراحة من عناء تعب اليومين السابقين والجري وراء إستخراج مختلف أنواع (التصاديق) .. وعندما كان الجميع يحاولون النوم إذا بجرس الباب يرن :
- منو في الباب
- أفتح
وعندما قام (عبدالعال) بفتح الباب رأى ذات الشخص الذي سلمه (التصديق بعدم إقامة حفله)
- أتفضلوا يا جماعة أن شاء الله خير
- لا خير.. انحنا بس عاوزين نعرف
- تاااانى !! عاوزين تعرفوا شنو ؟ انحنا حفله وما عملناها.. وكل الفنانين القلنا ما ح نجيبهم ما جبيناهم ...وكمان ما جبنا ولا فنان أها تأني في شنو ... عندكم معانا حاجة؟ ؟
- يا حاج كدى أهدأ شويه ... وامشي جيب لينا (النسخة) بتاعت الفنانين العندك القلت ما ح تجيبهم !!
قام (عبدالعال) يالخول للمنزل وغاب برهة ثم جاء وقد أحضر (نسخة) الكشف الذى معه وأعطاها للمسؤول :
- لا إنت خلى نسختك دى معاك وتابعنى
.. بينما كانا المسئول يقلب فى صفحات النسخة التي معه توقف فجأة فى إحدى الصفحات وقال مخاطباً (عبدالعال) فى حزم
- امسك نسختك دى وأفتح حرف السين يا (عبد العال)
(بدأ عبدالعال فى تقليب صفحات صورة الكشف الذى معه ثم بعد بحث قصير توقف وقال مخاطباً المسؤول)
- يا هو دا (حرف السين) فتحتو
- طيب هسع الفنانة (سعدية دكوه) موجودة عندك ؟
- (بعد أن إستعمل سبابته فى تتبع الأسماء التى تحت حرف السين) ..لا ما موجودة
- طيب مش كان ممكن ما تجيبا.. ما كتبت اسمها مع الفنانين الماح تجيبهم ليه؟ ؟
.........................................................................................
.........................................................................................تم دفع (أيصال الغرامة) بواسطة (نزار) إذ أن (عبد العال) لم يستطع ذلك نسبة لوقوعه مغشياً عليه أثر أصابته بجلطة فى (الشريان التاجى) كادت لولا عناية الله أن تؤدى بحياته قبل أن يفرح بقدوم مولوده (الذكر) الذى جاء بعد ست (بنات) .
بعد سته أيام قضتها أسرة (عبدالعال) فى مستشفى (القلب) وهو فى حالة غيبوبة تامة ، إستيقظ (عبدالعال) فى اليوم السابع فوجد كل أسرته بجوار سريره ..نظر إليهم وفى صوت خافت قام بسؤالهم :
- أها الولد (ما) ح تسموهو منو؟
وهنا أدرك الجميع أن (عبدالعال) ما ح يطلع منها !!!!!

Post: #2
Title: Re: (ســــيناريوهات) : تصـديق عـدم إقـامة حفـل
Author: Adel Sameer Tawfiq
Date: 22-11-2006, 07:55 AM
Parent: #1

Quote: وهنا أدرك الجميع أن (عبدالعال) ما ح يطلع منها !!!!!

وييييييين ؟؟!! لازم يعمل تصديق خروج روح ويدفع الرسوم !!

Post: #3
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 22-11-2006, 08:01 AM
Parent: #2

شلت الصورة القديمة وختيت لينا (صورة الهيلتون) كم يوم أتاريك إنت بايت ليك فوق راى وجبت لينا الصورة الوجيهه دى يا مولانا ؟؟ يعنى أنحنا بعد ده نعمل لينا (سمكرة) وبوهية وإلا شنو؟؟

Post: #23
Title: Re: (ســــيناريوهات) : تصـديق عـدم إقـامة حفـل
Author: ابوبكر يوسف إبراهيم
Date: 25-11-2006, 04:13 AM
Parent: #3

طيب يا الفاتح ده لو كان الصيوان لي طهور واللآ سماية واللآ عرس .. طيب الوضع يكون كيف لو كان الموضوع طلب عدم إقامة صيوان عزا؟!! نقوليهم شو؟! المرحوم سبَلْناهو واللآ شنو؟!!

Post: #4
Title: Re: (ســــيناريوهات) : تصـديق عـدم إقـامة حفـل
Author: محمد فرح
Date: 22-11-2006, 08:55 AM
Parent: #1

تسجيل حضور وإستمتاع بالسيناريو

لاعدمناك ياحبيب

معاكم سلااااااامه

Post: #5
Title: Re: (ســــيناريوهات) : تصـديق عـدم إقـامة حفـل
Author: nazar hussien
Date: 22-11-2006, 10:29 AM
Parent: #4

اها دي معناها


جايينا رسم وتصديق جديد...


وعبدالعال ما بطلع من المستشفي ان ما دفع تصديق بعدم خروج الروح...


مرة قريت في لوحة اعلانات هناك...مع ضرورة دفع رسوم تنقل...
دي عندكم ليها فتوي يا شيخنا.

Post: #15
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 04:57 AM
Parent: #4

Quote: تسجيل حضور وإستمتاع بالسيناريو

لاعدمناك ياحبيب



الله يخليك يا محمد فرح ويديك العافية

Post: #6
Title: Re: (ســــيناريوهات) : تصـديق عـدم إقـامة حفـل
Author: abubakr
Date: 22-11-2006, 10:35 AM
Parent: #1

الفاتح ومولانا
Quote: (التصديق بعدم إقامة حفل)..


ما شفتو اسمي في لستة الفنانيين الماجو الحفلة ؟؟ الواحد يمشي يطالب باجرو في الحفلة ...وحاديكم كوميشن...

Post: #7
Title: Re: (ســــيناريوهات) : تصـديق عـدم إقـامة حفـل
Author: Mohamed E. Seliaman
Date: 23-11-2006, 07:25 AM
Parent: #1

عرب وين وطنبورة وين؟؟

Post: #8
Title: Re: (ســــيناريوهات) : تصـديق عـدم إقـامة حفـل
Author: Mannan
Date: 23-11-2006, 01:25 PM
Parent: #1

اخى الفاتح
انت كاتب ساخر وموهوب.. لا ادرى لماذا تذكرت تلك البت الشينة التى طلبوا منهافى الانترفيو ذكر اسماء المليون شهيد فى الجزائر.. هل طلبوا من عبدالعال برضو اسماء الفنانين الميتين وشهادة منهم تؤكد بانهم لن يشاركوا فى الحفلة؟؟؟؟عجـــــــــــــــــــبى!!!!!

نورالدين منان

Post: #9
Title: Re: (ســــيناريوهات) : تصـديق عـدم إقـامة حفـل
Author: حسين يوسف احمد
Date: 23-11-2006, 02:46 PM
Parent: #8


الأستاذ الرائع ، الفاتح ..
الله يسامحك لو متنا ضحكا !!!
لقد غفرنا لك ما تقدم من ذنبك فينا وما تأخر ..

Quote: يبقي مفروض تجو عندنا تعملوا (تصديق) بعدم إقامة حفله


الشـكية لي أب يدا قـويـة !!!

Quote: طيب شيل أورنيك ت/ع/ا/ح أملاهو وامشي أدفع الرسوم.


مبـااااالغـة ..

Quote: شوف الشباك الأول داك بتاع (تصديقات أقامة صيوانات العزاء) تخليهو.. الشباك البعدو بتاع (تصديقات عدم إقامة صيوان عزاء)[BLACk تخليهو.. الشباك البعدو.. يعني الثالث داك شباك ( تصديقات دفن ميت) والشباك البعدو داك الفيهو (الهنودالكتار الواقفين ديك) .. داك شباك (تصديقات عدم دفن ميت) خليهو .. أها الشباك البعدم طوالي دا حق (التصديق بعدم إقامة حفل).. !!!


لا أملك إلا أن أقـول لـك :

أ. الفـاتـح جـبرا : إتـق الله فـي هـذا الشـعب !!!!

مـع التقـديـر ...

Post: #10
Title: Re: (ســــيناريوهات) : تصـديق عـدم إقـامة حفـل
Author: فاروق حامد محمد
Date: 23-11-2006, 06:16 PM
Parent: #9

بسم الله والصلاة والسلام على رسول الله


السيد المواطن الفاتح يوسف جبرا

المحترم


تتقدم لجنة التصديقات بتقديم أحر تصديقاتها لسيادتكم

وترجوكم التكرم بالحضور الى مقر اللجنة ومعكم قائمة

بأسماء المواطنين الذين لن يقرأوا مقالكم عاليه,,,,,,,

وذلك للتصديق والتدقيق من قبل اللجنة والقيام باجراءات

تصديق عدم قراءة ,,,, علما ان الأسماء يجب أن تتضمن كل

أسماء المواطنين المتوفين خلال السبعة عشر عاما المنصرمة

وفاة قهرية طبيعية أوالذين توفوا خلال عمليات التعذيب

الروتينية ... وكذلك أسماء المواطنين الذين سيتوفون خلال

السنوات الخمس القادمة بالقهر أو بغيره ... مع ذكر سبب الوفاة

بالتاريخ والساعة .... ودمتم حماة لوطننا الغالي ولأهله

الأحرار في طريقة اختيار موتهم ,,,,,

تهليل !!!!!!!!!!

تكبير !!!!!!!!!!!

مخلصكم
حوت الدين البلاع

رئيس اللجنة

Post: #11
Title: Re: (ســــيناريوهات) : تصـديق عـدم إقـامة حفـل
Author: Adel Sameer Tawfiq
Date: 23-11-2006, 06:31 PM
Parent: #10

الفاتح أخوي وقع في شر أعماله وراح فيها !!

Post: #12
Title: Re: (ســــيناريوهات) : تصـديق عـدم إقـامة حفـل
Author: Khalid Osman Jaafar
Date: 24-11-2006, 00:50 AM
Parent: #1


سلام،

بس حبيت أقول:

إبداع!

خليتني أضحك براي





Post: #13
Title: Re: (ســــيناريوهات) : تصـديق عـدم إقـامة حفـل
Author: حيدر حسن ميرغني
Date: 24-11-2006, 03:18 AM
Parent: #12

حبيبنا الفاتح

جيت اقول ليك سلام

لكن راقد لي فوق رأي ... وما بقولو ليك إلا بعد تسمية المولود

Post: #14
Title: Re: (ســــيناريوهات) : تصـديق عـدم إقـامة حفـل
Author: Yassir Tayfour
Date: 24-11-2006, 03:31 AM
Parent: #13

شكرا أستاذ الفاتح
على الإمتاع
يازول ياطاعِم
دخلنا عليك بدون
"تصديق عدم دخول)
لتأذن لنا به أوبعدمه

Post: #16
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 05:00 AM
Parent: #1

Quote: مرة قريت في لوحة اعلانات هناك...مع ضرورة دفع رسوم تنقل...
دي عندكم ليها فتوي يا شيخنا.


إنت دى ما مرت بيك الحكاية دى يا نزار ؟؟ ما لازم تدفع رسوم تنقل من (مكتب) لى (مكتب) تانى ... يعنى دايرين تدخلو فى (مكاتب الدولة) دى وتطلعو ملح سااااكت !!!

Post: #17
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 05:13 AM
Parent: #1

Quote: لكن راقد لي فوق رأي ... وما بقولو ليك إلا بعد تسمية المولود


كدى يا حيدر أول حاجة خلى عمك (عبدالعال) ده يطلع من (الإنعاش) وبعدين تسمية المولود هينه !!!

Post: #18
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 05:22 AM
Parent: #1

التحية للأعزاء :
- محمد فرح
- أبوبكر
- محمد سليمان
- نورالدين منان
- حسين يوسف
- خالد عثمان جعفر
- ياسر طيفور
على (المرور) و(المتابعة) و(التعليق) ... شكرا ليكم كتير ،،،


الفاتح جبرا

Post: #19
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 05:26 AM
Parent: #1

Quote: وكذلك أسماء المواطنين الذين سيتوفون خلال

السنوات الخمس القادمة بالقهر أو بغيره


تعرف يا فاروق ياخوى الفوق ديل الواحدإحتمال يقدر (يخمنهم) ليك .. لكن الناس (الماتو) فيهم ناس ما يعرف (مكان وزمان) موتهم إلا (اللا نام ولا أكل طعام)!!!

Post: #20
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 05:32 AM
Parent: #1

Quote: الفاتح أخوي وقع في شر أعماله وراح فيها !!


إنت يا مولانا خلينى من (شر أعمالى) أخبار (لندن) شنو؟؟؟

Post: #21
Title: Re: (ســــيناريوهات) : تصـديق عـدم إقـامة حفـل
Author: معتصم الطاهر
Date: 24-11-2006, 06:22 PM
Parent: #1

استاذى جبرة

أجلت السفر للبلد على مسئولية بوستاتكم

أنا ما ( مسالم) زى عب عال ...

Post: #22
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 24-11-2006, 06:42 PM
Parent: #1

أنا ما ( مسالم) زى عب عال ..

القال ليك منو يا معتصم ياخوى (عب عال) ده مسالم ؟؟؟ هو بس كان ما عاوز (سماية) الوليد تبووظ ساكت !!

Post: #24
Title: Re: (ســــيناريوهات) : تصـديق عـدم إقـامة حفـل
Author: Nasruddin Al Basheer
Date: 25-11-2006, 06:06 AM
Parent: #22

الأخ العزيز الفاتح
لك التحية والاحترام،،
حقيقة هذا النص هو أروع وأمتع وأبدع نص قرأته في هذا المنبر.
والله العظيم ضحكت لما بكيت، وشر البلية ما يضحك..
أنا سعيد بأن أهدى الله منبرنا كاتباً ساخراً مثلك.
وأعتقد أن التناول الساخر لأي مشكلة أو ظاهرة هو أجدى وأنفع
من التناول الجاد لأن السخرية أمضى سلاحاً وأكثر تأثيراً
وهي موصل جيد للمشكلة، ويكون صاحبها قد تشبع بالقرف والضيق
ولم يجد متنفساً إلا في التناول الساخر لهذه المشكلة..
الموضوع مسبوك بحرفية عالية وغني بدراما المواقف والتراجيكوميديا
(إن صح التعبير)
متعك الله بالصحة والعافية
ولا أسكت الله قلمك..

Post: #25
Title: Re: (ســــيناريوهات) : تصـديق عـدم إقـامة حفـل
Author: اسامه هاشم
Date: 25-11-2006, 07:03 AM
Parent: #24

استاذ الفاتح

حقيقة انت راجل جد موهوب وعندك ملكة

لوضع المعاناة اليومية للمواطن السوداني

في صور ادبية فائقة الجمال والحق يقال ان

سيناريهوات امس الجمعة كانت اية في الروعة

والجمال وانت تجسد معاناة العم خضر مع بوليس

الحركة وكيف انه سلب هذا العجوز معاشه الذي

لم يتجاوز الستون الف جنيه ... انه مقال يستحق

ان تفرد له بوست منفصل لانه يتناول عدة قضايا اهمها

مشاكل ارباب المعاشات
مخالفات المرور وقيمتها وكيفية تحصيلها
الكباري والشوارع الحالية وكفاءتها مع ازدياد اساطيل
السيارات في الخرطوم.

ولك شكري
ودهاشم

Post: #26
Title: Re: (ســــيناريوهات) : تصـديق عـدم إقـامة حفـل
Author: awadalla agabna
Date: 25-11-2006, 03:22 PM
Parent: #25

الأستاذ / الفاتح
متعك الله بالعافية قدر ما أمتعتنا
فقط أتمنى أن تزود الفنان / جمال حسن سعيد بكل ما تكتبه ( والباقي عليهو)
تحياتي مع صادق حبي و تقديري

Post: #27
Title: Re: (ســــيناريوهات) : تصـديق عـدم إقـامة حفـل
Author: الفاتح يوسف جبرا
Date: 25-11-2006, 05:09 PM
Parent: #1

الإخوة الأعزاء

أسامة هاشم
نصرالدين اليشير
عوضالله عجبنا

شكرا جزيلا على المرور والمتابعة ... ما تكتبونه هذا هو الوقود الحقيقى الذى يجعلنا (نكتب) هذه (المحاولات) لكم منى كل الحب والتقدير وربما يتم قريبا تحويل هذه السيناريوهات إلى (دراما) ... هنالك محاولات من قبل بعض الأخوان ... شكرا ليكم كتير

الفاتح جبرا