الزوله دي كلاما قاسي يا ودالصايم..

الزوله دي كلاما قاسي يا ودالصايم..


09-04-2014, 02:54 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1398700883&rn=0


Post: #1
Title: الزوله دي كلاما قاسي يا ودالصايم..
Author: محمد المرتضى حامد
Date: 09-04-2014, 02:54 PM


(ليت أصوات من نحب تباع في الصيدليات لكي نشتريه لأننا نحتاج إلى أصواتهم لكي نعيش ونحتاج
أن نتناوله ثلاث مرات قبل الطعام وقبل النوم ومرة عندما يهجم علينا الـفرح أو الحزن فجأةً،
فلا نتذكر سواهم..
أي علم هذا الذي لا يستطيع أن يضع أصوات من نحب في حبات الدواء أو زجاجاته كي نتناولها سراً
عندما نصاب بوعكة عاطفية بدون أن يدري صاحبها كم نحن نحتاجه )

- أحلام مستغانمي -

Post: #2
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 09-04-2014, 03:06 PM
Parent: #1


سبق أن كتبت في بوست ( تصفية حسابات) كلاما إن لم أمارسه في واقعي فهو في حده الأدنى يعزيني ويواسيني ، فحمل سلال الضغائن ) ( أو بقج الغبائن كما يسمها البعض هنا ) ردحا طويلا يهد أكتافنا ويُشيخ خلايانا ويدمرها الواحدة تلو الأخرى بأسرع مما تفعل الجراثيم والمتلازمات ، فقط علينا أن ننسى حتى نستطيع أن نتنفس ، النسيان كويس يا صايم ، لأننا إذا استصحبنا على الدوام حقيقة أن الهواء الذي يدخل رئاتنا والغذاء الذي ينزل في أحشائنا يحتشد بكائنات قبيحة المنظر والأثر لما تنفسنا ولهلكنا جوعا وعطشا وهذه سنة الله في الكون فهل من مدكِّر.
بالطبع لا أذكرك بآيات تنزلق عيوننا عليها في صفحة المصحف دون أن تقوم قلوبنا ، في كثير من القراءات ، بعملية اسكاننق لسبر معان عميقة عن فوائد العفو وكظم الغيظ والصبر والصفح حتى نصل إلى موالاة الذي بيننا وبينه عداوة وكأنه ولي حميم، طبعا دي دايره شغل تقيل يُلَقَّاه أصحاب الحظ العظيم فادع لنا أن نحشر في زمرتهم.

Post: #3
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 09-04-2014, 03:15 PM
Parent: #2

أنا ذاتي ما عارف بكري بجيب لينا الناس ديل من وين

يعني هسي زي المقطوعه العاجبه ناس عزازا علينا برضو ندفقا لود الصايم ساااي كده!!
غايتو..

wassaom.jpg Hosting at Sudaneseonline.com


Post: #4
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 09-04-2014, 03:20 PM
Parent: #3


أخوك يا محمد ملفوف في بطانية عيوب وآثام وذنوب وأحوج للنصح منك لكنني عندما تتقمصني الروح الطيبه وتزورني في الطيف أو في الصحيان أعلنها بصوت عال كي تلزمني أخلاقيا بالثبات عليها خوف أن أوصف بالنكوص ، وإنت عارف الإلتزام المعلن أمام الكافة خير وأبقى وأقدر على الإستمرارية من ذاك الذي تقطعه بينك وبينك.. أها يا مولاي ، كان يمكنني أن أردد مع عبدالعظيم حركه ( عشان خاطرنا ترجع) أو مع وداللمين ( تعال فرِّح ليالينا) أو أكتفي بمقولة مستغانمي أعلاه وزي ما كتب واحد عن جون قرنق أيام سوار الدهب وقال الزول دا لازم تغني ليهو حنان بلو بلو (تعال لي وما تشمت الناس علي) وكان ما جا يبقى ما حا يجي كلو كلو ، الله يرحمو في النهايه جا ، أها في حالتك يومين شهر سنه والناس تنسى ، بس حالتي معاك غير، قلت ما أسكت وأفضفض شويـه معاك لأنني أعلم انك بتواصلك ، كمعظم الأعضاء هنا ، تعمل للخير والمساعدة بالمسنجر( الدرب التحت) بأكثر مما تكتب في العلن.

Post: #5
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 09-04-2014, 03:26 PM
Parent: #4


أنت تعلم قبلي بأن سودانيزأونلاين ليست مساحة استعراض لعضلات الألسن و ( رص) للكلمات ولا ساحة للصراع والعنف اللفظي لأن تلك حيلة العاجز ، وتعلم جيدا بأنه يوجد بهذا المنبر نفر ينأون بأنفسهم عن مجرد الرد على من يسئ إليهم في الوقت الذي يمكنهم الرد بما لاقبل للمسئ به وبأربع لغات حية معتمدة في الأمم المتحدة، لكنهم يصفحون ويعلمون أن مجاراة المسئ السادر في غيِّه تنزل برصيدهم حد إشهار الإفلاس ، وبوعيك تعلم أن سودانيز ليست ( يوتوبيا زمان وإرث أوان بعيد المجئ عنيد الحضور - كما قال الراحل سند) سودانيز عينة عشوائية من مجتمعنا ، لكنني أراها بعين الرضا كبانيه وبيت عرس وصيوان عزاء ومشفى ومجلس شورى وقاعة درس وراكوبه وعايزنها تبقى كشف تبرع خير ما كشف حال.. إنت قايل لو إتأخرت أنت وبقية الأحباب في شوفتنا ضامن نتلاقى تاني؟.
وبرضو زي ما قالت أحلام القاسيه:
أنحتاج إلى موتنا كي نحب...ونعرف أن ثمة من أحبونا....؟؟


Post: #6
Title: Re: الزوله دي كلاما قاسي يا ودالصايم..
Author: د.محمد حسن
Date: 09-04-2014, 03:26 PM
Parent: #4

اخونا الشاها
المن غير شاهنشاه

نفسي افهم انت قاعد تتصور وين

بعدين عليك الله يا محمد هي فضل فيها ضغائن
اذا كان المريخ بقى مؤتمر وطني
والهلال
بتغلب في شندي
وصلاح ادريس عايز يبقى رئيس اي نادي فيه حرف الهاء
وشعيرية قال لي ما تجي السودان
وعادل قال داير يعرس تاني
واييييييييييييك
خلينا ننوم خفيفين

Post: #35
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 10-04-2014, 10:54 AM
Parent: #6

Quote: وشعيرية قال لي ما تجي السودان
وعادل قال داير يعرس تاني

كلام (شعيريه) كلام زعل ساكت يا محمد، وإحتمال عايز يحذرك من ود حلتك حسين خوجلي ،
شعيريه يقول ليك مسافر للدوله الفلانيه شهر ويقعد يومين يرجع..
ويقر أنه أمدر ما بتنفات..يعني معقوله يكمل اسبوع ما يتونس مع الهادي نصر الدين ؟

وعادل برضو كلامو كلام زعل ، إلا إذا أصبح من المقرشين ودي مستحيله ..

الصور دي في صحراء (بديـــَّه) بسلطنة عمان مع الجِمال والرمال ..
الأماكن دي بالليل تحت ضوء القمر والنجوم عالم تاني حيث لا واتساب ولا ألقاب ولا كائنات تمر..
ممكن يصفها لك عزيزنا السنوسي بدر ومحمد الماحي أحمد جحا ..

Post: #42
Title: Re: الزوله دي كلاما قاسي يا ودالصايم..
Author: د.محمد حسن
Date: 10-04-2014, 02:57 PM
Parent: #35

Quote: ومحمد الماحي أحمد جحا ..


الكارثة ده حي ؟
بالله بلغو عطر التحايا

Post: #7
Title: Re: الزوله دي كلاما قاسي يا ودالصايم..
Author: محمد على طه الملك
Date: 09-04-2014, 03:43 PM
Parent: #4

والله يا مولانا حقو الواحد يحرد المنبر عشان على الأقل قبال يفارق فراق ابدي يقرأ تقييم فارع بعبارات أنيسة زي دي ..
غايتو أبراس دا لو ما بين مع التداعي والدعوة الأنيقة دي يبقي فعلا المنبر دا هزمنا وجدانيا.

Post: #8
Title: Re: الزوله دي كلاما قاسي يا ودالصايم..
Author: ismeil abbas
Date: 09-04-2014, 03:51 PM
Parent: #7

Quote: أنت تعلم قبلي بأن سودانيزأونلاين ليست مساحة استعراض لعضلات الألسن و ( رص) للكلمات ولا ساحة للصراع والعنف اللفظي لأن تلك حيلة العاجز ، وتعلم جيدا بأنه يوجد بهذا المنبر نفر ينأون بأنفسهم عن مجرد الرد على من يسئ إليهم في الوقت الذي يمكنهم الرد بما لاقبل للمسئ به وبأربع لغات حية معتمدة في الأمم المتحدة، لكنهم يصفحون ويعلمون أن مجاراة المسئ السادر في غيِّه تنزل برصيدهم حد إشهار الإفلاس ، وبوعيك تعلم أن سودانيز ليست ( يوتوبيا زمان وإرث أوان بعيد المجئ عنيد الحضور - كما قال الراحل سند) سودانيز عينة عشوائية من مجتمعنا ، لكنني أراها بعين الرضا كبانيه وبيت عرس وصيوان عزاء ومشفى ومجلس شورى وقاعة درس وراكوبه وعايزنها تبقى كشف تبرع خير ما كشف حال.. إنت قايل لو إتأخرت أنت وبقية الأحباب في شوفتنا ضامن نتلاقى تاني؟.
وبرضو زي ما قالت أحلام القاسيه:
أنحتاج إلى موتنا كي نحب...ونعرف أن ثمة من أحبونا....؟؟



يا جماعة أنا ألأثنين بحبكم.......كلام درر...

Post: #40
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 10-04-2014, 02:18 PM
Parent: #8


Quote: يا جماعة أنا ألأثنين بحبكم ....

ولك أضعافها يا اسماعيل فأنت من نفر نحبهم بلا قيد أو شرط....
على بياض ( كارت بلانش)
نسأله أن يديم الود والمحبة بين عباده..
عارف إيدك لاحقه وواصله..
جيب لي الباقين..


Post: #9
Title: Re: الزوله دي كلاما قاسي يا ودالصايم..
Author: ismeil abbas
Date: 09-04-2014, 04:05 PM
Parent: #7

حذف للتكرار

Post: #10
Title: Re: الزوله دي كلاما قاسي يا ودالصايم..
Author: ناصر احمد الامين
Date: 09-04-2014, 04:13 PM
Parent: #9

Quote: إنت قايل لو إتأخرت أنت وبقية الأحباب في شوفتنا ضامن نتلاقى تاني؟.
وبرضو زي ما قالت أحلام القاسيه:
أنحتاج إلى موتنا كي نحب...ونعرف أن ثمة من أحبونا....؟؟

النجيضة يا ود الصايم ......... حصة كلام و موسيقي و شجن النوع الكبار كبار داك

الجميل محمد المرتضي حامد .... لك كل الود و شوق كتبر ... تعال لينا ياخي

Post: #11
Title: Re: الزوله دي كلاما قاسي يا ودالصايم..
Author: عثمان الأمام
Date: 09-04-2014, 04:28 PM
Parent: #10

الراسل والمرسل اليه من أجمل الناس فى سودانيز
أدام الله بينكم المحبه لتنثروا التفاؤل والمحبة فى هذا المكان

Post: #12
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 09-04-2014, 05:14 PM
Parent: #11

ربح البيع .. ربح البيع!!



لو عارف وقفتي بتطلع المرتضى .. وكلامو السمح ..
بقيف ليكم كل شهر ..ياخ كل يوم عديل كـدا ..


حبابكم ..
والكلام كلامكم ..

Post: #13
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 09-04-2014, 05:24 PM
Parent: #12

والله يا مولانا .. غلبني الأقولو في الحتة دي .. وفي موقع الجَمال دا ..
ياخ شكرا .. شكرا شديد ..
شكرا ليكم كلكم .. الهنا والفي البوست اللول داكـ .. المقرش في مكتبتي!!

Post: #50
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 11-04-2014, 10:27 AM
Parent: #11

أدام الله بينكم المحبه لتنثروا التفاؤل والمحبة فى هذا المكان

الله يحفظك يا عثمان..
في الحياة ما يكفي من منغصات والدنيا معبأة بالكراهية والشرايين تكلست بالكولسترول والكبد مردوم بالدهون الشيطانية المشبعة..
دعواتك يا ود الإمام أن يوفر لنا مزيلات الكدر ومذيبات الكلس .

Post: #95
Title: Re: الزوله دي كلاما قاسي يا ودالصايم..
Author: AlAmin AlMubarak
Date: 15-04-2014, 11:52 AM
Parent: #50

اخي الغالي محمد المرتضي تحية وشوق شديد


كلام عسل من انسان نبيل ....... علمتنا معني القروب.....مافي طريقة تكتب هذه الكلمات الصادقة للاخ الريئس عمر البشير كان ينقل كفالة

تحياتي و تقدير ي لاعزائي بالسلطنة

Post: #43
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 10-04-2014, 03:31 PM
Parent: #10

Nasser.jpg Hosting at Sudaneseonline.com

إنت بس أقعد كتِّف لينا يديك كده..
الزول دا جاي للمره التالته..

Yanni.jpg Hosting at Sudaneseonline.com

(الحب هو ذكاء المسافة، ألّا تقترب كثيراً فتُلغي اللهفة، ولا تبتعد طويلًا فتُنسى، ألّا تضع حطبك دفعةً واحدةً في موقد من تُحب،
أن تُبقيه مشتعلًا بتحريكك الحطب ليس أكثر، دون أن يلمح الآخر يدك المحرّكة لمشاعره ومسار قدره.)

عليك الله يا ناصر الزوله دي مش قاسيه..مش كلام زي الأندروس للحيرقان؟
حكِّم ضميرك..

Post: #36
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 10-04-2014, 11:10 AM
Parent: #7


عزيزنا ومولانا الملك..
أشكر لك كلامك الطيب ..
ودالصايم عندو رساله وأظنها وصلت للبريد المعني وهي كتبت في ظرف نتمنى ألا يتكرر..
ظللنا هنا نؤكد على أمر هام ألا وهو أن لا أحد فينا يملك الحقيقة كاملة ومن ثم
لايجوز أن نلجأ لمدفعية الميدان والهاوتزر عيار 122 مم في تثاقف أو نتبنى قانون جزاء العين
بعينين والسن بالفك كاملة ، تفاديا لخراب سوبا.
لابد أن يختلف البشر فهم لم يجتمعوا حتى على وجود الله فما بالك بما هو أدنى..
نسأل الله أن يهدينا سواء السبيل.


Post: #14
Title: Re: الزوله دي كلاما قاسي يا ودالصايم..
Author: الطاهر عثمان
Date: 09-04-2014, 05:31 PM
Parent: #1

ياسلام عليكم ... الواحد ما متخيل تاثير الكلام والكتابة دي قوي كده ... :)

Post: #15
Title: Re: الزوله دي كلاما قاسي يا ودالصايم..
Author: معروف حمدين
Date: 09-04-2014, 06:58 PM
Parent: #14

الحبيب محمد المرتضى
غايتو بعد كلامك ونضميك السمح دا ودالصائم لو ما جا براهو اجيبو ليك من اضنيو الكبار ديل ..
ودالصائم والله كلنا بنحبك ..
وكبرت فى نظري اكتر بجيتك عشان خاطر محمد المرتضي ..
كلام أخير الأثنين حلوين

Post: #16
Title: Re: الزوله دي كلاما قاسي يا ودالصايم..
Author: وضاحة
Date: 09-04-2014, 07:22 PM
Parent: #15

مولانا مشتااااقين
عليك الله يا مولانا ود الصائم ابو راس غليد دا يشتاقوا ليه لى شنو يا حلينا نحن نغيب ونجى ما حد بتذكرنا




ود الصائم مشتاقيين يا ابو قلب دهب
والله يا محمد انت فاكهة المنتدى ربنا ما يحرمنا من طلتك
ربنا يعطيك العافية ويملاك صحة
وابقى واصل علشان الناس الحلوين الزى محمد المرتضى و الناس القلوبة نقية فقط

محبتى للجميع

Post: #17
Title: Re: الزوله دي كلاما قاسي يا ودالصايم..
Author: اسامة محمد ابوبكر
Date: 09-04-2014, 08:06 PM
Parent: #16

يعلم الله وحده كيف دمعت عيناي وانا اقرأ هذه المناجاة بين احلي اثنين في هذا المنبر و ادب الكلام الذي امني نفسي ان يسود هذا الصرح ( الصرح و ليس المنبر ) ....... يا الله على هذا الجمال منك يا مولانا .......... يا الله علي استجابتك يا ود الصايم و تبشيرك لنا بالبيع الرابح .......... آن الاوان ان أهنئ نفسي بانضمامي لهذا الصرح و اشهد الله اني احبكما في الله لحبكما لبعضكما

Post: #18
Title: Re: الزوله دي كلاما قاسي يا ودالصايم..
Author: Gaafar Ismail
Date: 10-04-2014, 02:39 AM
Parent: #17


أخي الحبيب مولانا محمد المرتضى
أسعد الله أوقاتك
عندما قرأت رسالتك الأنيقة البليغة المؤثرة للحبيب ود الصايم تأكدت دون شك أن ود الصايم سيستجيب لرجائك
لأنني أعلم يقينا أن ود الصايم رجل قلبه ابيض من (دبلان) ، صافي السريرة ، نقي القلب وإنسان لطيف وظريف.
لكما التحية والتجلة .

تحياتي ومودتي
---------

للشباب الما عارفين
الدبلان قماش اشتهر ببياض اللون

Post: #19
Title: Re: الزوله دي كلاما قاسي يا ودالصايم..
Author: صديق الموج
Date: 10-04-2014, 03:12 AM
Parent: #18

Quote: ربح البيع .. ربح البيع!!



لو عارف وقفتي بتطلع المرتضى .. وكلامو السمح ..
بقيف ليكم كل شهر ..ياخ كل يوم عديل كـدا ..


حبابكم ..
والكلام كلامكم


النجيضة انا محمد المرتضى ماعارفه لكن انا شخصياً لسه ما وحشتنى شديد
ياخى احب ضحكتك وشيشتك،،،

Post: #20
Title: Re: الزوله دي كلاما قاسي يا ودالصايم..
Author: يحي قباني
Date: 10-04-2014, 03:23 AM
Parent: #19

Quote: ود الصايم رجل قلبه ابيض من (دبلان)

يا شيخ جعفر ...

كدي خليني من ود الصايم و مولانا مرتضي ديل ...

ديل ناس ما بتخبر زعل ...

لكن بمناسبة ( الدبلان ) دي ...

ما بتلقي لي 5 امتار ( سكروتة ) قديمه ... الاصليه حقت زمان ؟

Post: #21
Title: Re: الزوله دي كلاما قاسي يا ودالصايم..
Author: بشير حسـن بشـير
Date: 10-04-2014, 05:08 AM
Parent: #20

.
.
.
تخيل اصحي من الصباح
وافتح سودانيز

القي الجميل / محمد المرتضي

والقاهو بيتكلم عن محمد الصائم
ويجي الصائم

ياخي يومي قطعا جميل
احمدك يا رب
.
.
.
.
.

Post: #22
Title: Re: الزوله دي كلاما قاسي يا ودالصايم..
Author: haroon diyab
Date: 10-04-2014, 05:44 AM
Parent: #21


اسعد الله صباح الجميع

وعندما اصررنا ونصر علي البقاء هنا

فلاننا نعلم بان وسط كل القبح الذي نراه

يوجد جمال انساني متدفق يقوده الكثيرون

مولانا وصديقي محمد المرتضي

والحبيب العائد محمد الصايم

انتم تحملون اسم ازكي خلق الله

فاتت صفاتكم واخلاقكم نبيلة وعالية

كونوا كما انتم ... فريحان المنابر

وعطرها ونرجسها سيتغلب دائما

علي كل قبح وسوء .

كل الود لكما

Post: #23
Title: Re: الزوله دي كلاما قاسي يا ودالصايم..
Author: حيدر بشير
Date: 10-04-2014, 06:40 AM
Parent: #22

هو الرائع محمد المرتضى و الذى كان دومآ على لسان صديقى و أخى المرحوم مولانا طه سورج
كان فى كل ليلة يسمعنى عنه و عن شخصيتيه و اريحيتيه و طيبة قلبه و نقاء معدنه و جمال اسلوبه

و ذاك هو الرجل الجميل اخونا ود الصايم و الذى عرفته عبر كتاباته هنا مبتسمآ فى وجه الجميع مناصرآ لهم
استحوذ على حب الجميع و نال رضى الكل

فلكم منى التحية و التجلة و الاحترام و هذا هو المنبر الذى ننشده و هذه هى العلاقات التى نسعى اليها

Post: #24
Title: Re: الزوله دي كلاما قاسي يا ودالصايم..
Author: عمران حسن صالح
Date: 10-04-2014, 07:24 AM
Parent: #23

أها ..
كدي بالتبادي الدوام ملحوق ، اصلو كباية شاي الصباح - سبحان الله - مربوطة بعناوين الحوش ابو فايروس ده ، مولانـا خلاني اضغط كلكـ الفتح ، ومنها لقيت ليكـ خيابتي فايته الحد لأنو قسما بالله عيوني رقرقن لامن كلمت نفسي يا ود أنجض :) .
.....
صاحبنا المصري بيصُر الريالات صرا عجيباً ، اخوهو جنو يمسكل ليهو من مصر ، أها هو رغم خوفو من ضياع الريالات إلا أنو قلبو رهييف ، يقوم يتصل ولامن يلقى الموضوع ما موضوع يقول لأخوهو ألو ألو ألووووو ، التلفون بيوش " يعني الصوت ما واضح " ويقفل على طول .
نحن الحنين بخلينا نملأ بطارية التلفون ريالات ونشوف وين الصوت النشاركو فرحنا واللا حُزنا .
انطبق تماما قول المستغانمي العجيبة دي "
Quote: (ليت أصوات من نحب تباع في الصيدليات لكي نشتريه لأننا نحتاج إلى أصواتهم لكي نعيش ونحتاج
أن نتناوله ثلاث مرات قبل الطعام وقبل النوم ومرة عندما يهجم علينا الـفرح أو الحزن فجأةً،
فلا نتذكر سواهم..
" .
أها مولانـا ده واحد إن أنا لقيت حبوب صوتو في صيدليات نجد دي ياني الشاري دون أن يوش تلفوني تماماَ :) .
وذلكـ ما افعله معه ومع عماد عبد الله المؤفِّن * حينما يداهمني فيروس الحكي وتفريق شحناتي العاطفية المردّمة في صحراء نجد دي .
الكلكـ حقت فتح الصفحة اداني احساس انو ود الصايم سيرفع لافتة العودة دون حتى ان يتذكر قسمو ، والأنا أصلاً قلت ليهو راس مالو صيام تلاتة أيام :) .
......
يا صديقي طالما هذا الحوش رغم الكدر الذي يسببه ، ورغم أني ممن قرروا في داخل روحم انو يختوهو طالما حتى الله صار ما ليهو قيمة عند احد الأعضاء ـ إلا أن اصوات بعض الراضي عليهم الله قاعدين فيهو
فو الله ما في أي طريقة نمشي نخليهو
.....
تباً لدموعي

Post: #25
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 10-04-2014, 07:34 AM
Parent: #24

تباً لأي حاجة زاتو ..

أصعب المواقف أن تتحدث في احتفائية بهذا الحجم ..
احتفائية يقودها مولانا محمد المرتضى .. رمز الجمال ..

النجيضة: ردمتوني ردم والله ..

Post: #26
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 10-04-2014, 07:37 AM
Parent: #25

معادلات صعبة ومتعددة ..
طرق كثيرة ومتشعبة ..

بين خيار البقاء هنا ومحاربة القبح ..
وتسجيل موقف في (موقف) يستحق (الوقوف) فيه ..


يقني التام أن كل صاحب كلمة بمعنى (الكلمة) كما مولانا المرتضى
لو نثر عبيره لزال القبح تماما .. وتوارى أصحاب القبح ..

Post: #27
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 10-04-2014, 07:38 AM
Parent: #26

غايتو كلام المثقفاتية دا صعب خلاص ..
ياخ حبابكم ألف ..
خلونا نقعد هنا .. ونتش الضلام بالضو ..


غايتو يا مولانا ماف كلمة مقاس شكركـ .. فخليها على الله!!

Post: #30
Title: Re: الزوله دي كلاما قاسي يا ودالصايم..
Author: Sidig Rahama Elnour
Date: 10-04-2014, 07:45 AM
Parent: #27

أها أقعدوا كبروا للزول دا في رأسو الأصلو كبير لامن يطرشق لووووووووووووووووول



Quote: ماف كلمة مقاس شكركـ


أستعين بمورتا يا ود الصائم


وحبابكم عشرة والله أنت ود المرتضى دا

Post: #28
Title: Re: الزوله دي كلاما قاسي يا ودالصايم..
Author: باسط المكي
Date: 10-04-2014, 07:42 AM
Parent: #25

محمد المرتضي حامد
الانسان الشفيف علمتنا السمو فوق كل الاشياء
قريت كلامك اكتر من مرة يعلم اله وماشبعت
ود الصائم حبابك كما عودتناااا الاريحية ######رية طاعمة
عليك الله ماتغيب يااااااااااخ

Post: #29
Title: Re: الزوله دي كلاما قاسي يا ودالصايم..
Author: معاوية الزبير
Date: 10-04-2014, 07:42 AM
Parent: #25

بالله هي فيها قسم يا عمران، آمنت بالله، يا ود الصايم غيب وتعال ساكت ولا عليك
أها بالمناسبة الوضع كيف من البلكونة؟
يا مولانا ود المرتضى سلام عليك ياخ
وسيرتك الطيبة كل كم يوم كدا مع الجار العزيز مولانا ود حمدنا الله
فتقبل تحياته وتحياتنا

Post: #31
Title: Re: الزوله دي كلاما قاسي يا ودالصايم..
Author: Jamal Mustafa
Date: 10-04-2014, 08:05 AM
Parent: #29

شكرا مولانا / محمد المرتضى فقد كنت دوما:
ذي الطيور من عش لعش
موسم العطش ترحل دغش
يبرن مواطن قوس قزح
والخضرة و ألوان الفرح
وحتى أحزانا وخيباتنا تحقنها حرف أنيق فتعود لها عافية إلهنا
وكأنها لا كانت حزن ولا شافت شقى
هنيئا لك بهذا الجمال الذي يغمرك يامولاى
وشكرا محمد الصائم وأنت تستجيب
لهذا النداء الذى يشبهك والمحتشد إنسانية ونقاء

Post: #33
Title: Re: الزوله دي كلاما قاسي يا ودالصايم..
Author: البشير دفع الله
Date: 10-04-2014, 08:27 AM
Parent: #31

من أجمل البوستات التي كتبت بهذا المنبر

لكما التحايا محمد المرتضى وود الصائم

Post: #32
Title: Re: الزوله دي كلاما قاسي يا ودالصايم..
Author: سامى عبد المطلب
Date: 10-04-2014, 08:11 AM
Parent: #29

Quote: أخوك يا محمد ملفوف في بطانية عيوب وآثام وذنوب وأحوج للنصح منك لكنني عندما تتقمصني الروح الطيبه وتزورني في الطيف أو في الصحيان أعلنها بصوت عال كي تلزمني أخلاقيا بالثبات عليها خوف أن أوصف بالنكوص ، وإنت عارف الإلتزام المعلن أمام الكافة خير وأبقى وأقدر على الإستمرارية من ذاك الذي تقطعه بينك وبينك.. أها يا مولاي ، كان يمكنني أن أردد مع عبدالعظيم حركه ( عشان خاطرنا ترجع) أو مع وداللمين ( تعال فرِّح ليالينا) أو أكتفي بمقولة مستغانمي أعلاه وزي ما كتب واحد عن جون قرنق أيام سوار الدهب وقال الزول دا لازم تغني ليهو حنان بلو بلو (تعال لي وما تشمت الناس علي) وكان ما جا يبقى ما حا يجي كلو كلو ، الله يرحمو في النهايه جا ، أها في حالتك يومين شهر سنه والناس تنسى ، بس حالتي معاك غير، قلت ما أسكت وأفضفض شويـه معاك لأنني أعلم انك بتواصلك ، كمعظم الأعضاء هنا ، تعمل للخير والمساعدة بالمسنجر( الدرب التحت) بأكثر مما تكتب في العلن.


جنننت الكتابة جن يا محمد الله يخضر ضراعك الله يخضر ضراعك الله يخضر ضراعك

هسع كاروشة دة الجابو هنا شنو حارمنا من جنس النضمي السمح ده ، أول مرة غيابو يكون عندو فائدة

حمداً لله علي السلامة

Post: #34
Title: Re: الزوله دي كلاما قاسي يا ودالصايم..
Author: طارق عبد اللطيف نقد
Date: 10-04-2014, 08:46 AM
Parent: #32

شكرا مولانا محمد المرتضى حامد
على الحروف الانيقه و الكلمات المعبره
وده درس غي ادب الحوار و التواصل بيناتنا

النجيضه
ود الصايم ما بكون فهم الكلام الكبار ده
عشان كده خجل و رجع

يا خي اعلن عليكم الحب كلكم
و دمتم بعافيه

Post: #37
Title: Re: الزوله دي كلاما قاسي يا ودالصايم..
Author: احمد الأمين على إدريس
Date: 10-04-2014, 12:56 PM
Parent: #34

ياسلام يا سلام
هذا هو البورد الذى نحب ونهوى
تداعي حميم بلغة رفيعة وفخيمة وبسيطة فى نفس الوقت
محمد المرتضى بلا شك وبشهادة الجميع واحد من اركان الجمال بهذا الفضاء الاسفيرى
والركن التانى طوالى هو الزول ابو ضحكة جنان دا رغم التلاجة والبطيخ وكمية الكااااك الفكاها هنا ....
ود الصائم شفيف بما يكفى لانك تحبو من غير ماتشوفو وتحس بانو صاحبك وصاحب صاحبك زاتو ..
وما موقفو السابق ورجعتو لتطييب خاطر مولانا الا اكبر دليل ..

حباب محمدالمرتضى ونعم البوست والله بما حواه من جمال ..

Post: #38
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 10-04-2014, 01:07 PM
Parent: #37

صادف هذا البوست وكت زنقة جد .. لكن معاو للحول!!
فرصة زي دي ما بتتلقي بي أخوي وأخوكـ

Post: #39
Title: Re: الزوله دي كلاما قاسي يا ودالصايم..
Author: Hassan Makkawi
Date: 10-04-2014, 01:29 PM
Parent: #38

أيامك يا عم.........



sudansudansudansudan34.jpg Hosting at Sudaneseonline.com

Post: #41
Title: Re: الزوله دي كلاما قاسي يا ودالصايم..
Author: محمد درار
Date: 10-04-2014, 02:56 PM
Parent: #39

Quote: Yosri Kami
أففففففففففففففففففففففف ............
ياخ ما عصرتو علينا .... اها بعد دا بضاعتنا دي نوديها وين؟ .نقع بيها البحر؟؟؟؟؟؟؟
التوقيع: عنصري بن متطرف بن مهاتر بن قاذف بذيء هماز

فعلا يا يسري لا مكان للقبح مع هذا الجمال ... لايك ونص وخمسة
والله يا جماعة السلوك والاحترام معدي (اعضاء وقراء) فبالله الناس الجميلة مثل صاحب البوست وضيوفه خليكم قراب

Post: #44
Title: Re: الزوله دي كلاما قاسي يا ودالصايم..
Author: ASHRAF TAHA
Date: 10-04-2014, 03:58 PM
Parent: #41

إندغينا فكر إندغينا من الاغاني العظيمة للراحل محمود احمد

هنا المقطوهة



وهنا الاغنية


Post: #45
Title: Re: الزوله دي كلاما قاسي يا ودالصايم..
Author: محمد علي شقدي
Date: 10-04-2014, 04:08 PM
Parent: #44

في ناس بتغسل متاعب تراكم الهم والأسى وفي ناس بتجلى الوضوح بريق أمل
مولانا المرتضى والجميل ود الصايم لكم كل الود

Post: #46
Title: Re: الزوله دي كلاما قاسي يا ودالصايم..
Author: ASHRAF TAHA
Date: 10-04-2014, 04:11 PM
Parent: #45

Quote: مولانا المرتضى والجميل ود الصايم لكم كل الود


وكذلك قال ما عندنا

Post: #47
Title: Re: الزوله دي كلاما قاسي يا ودالصايم..
Author: محمد البشرى الخضر
Date: 10-04-2014, 04:21 PM
Parent: #46

يا سلام يا مولانا
ما في كلام غير "يا سلام"

أمّا أنت يا حمّودي فزعلي منك يخلّيني اعمل ما شايفك :)

Post: #48
Title: Re: الزوله دي كلاما قاسي يا ودالصايم..
Author: اساسي
Date: 10-04-2014, 06:40 PM
Parent: #47

جيت راجع يا العشا ..! كان اخليك للحول اضحك علي يا اب رويس غليد


ود المرتضي انا زهجان منك ومن حركاتك دي
تطش سنة وترجع في صمت ووقت الله يفتح عليك وتتجلي تدلق كلام من الماس في جنس كاروشة دا



شد حيلك يا كاروشة الجاياك ما بتختاك

Post: #49
Title: Re: الزوله دي كلاما قاسي يا ودالصايم..
Author: عمران حسن صالح
Date: 10-04-2014, 11:45 PM
Parent: #48

Quote: شد حيلك يا كاروشة الجاياك ما بتختاك
مع خلفية الساكسفون دي ؟؟ والله إلا غايتو حروفكـ تكون من عالم تاني عشان تقنعنا بالعكس :)

Post: #51
Title: Re: الزوله دي كلاما قاسي يا ودالصايم..
Author: عبدالمجيد المقابل
Date: 11-04-2014, 11:22 AM
Parent: #49

من أجمل البوستات
مولانا محمد المرتضي و العزيز ود الصائم , أحسنتم

Post: #112
Title: Re: الزوله دي كلاما قاسي يا ودالصايم..
Author: Nazik Eltayeb
Date: 17-04-2014, 11:22 PM
Parent: #41

لزهاء عام او اكثر وانا افكر بترك سودانيزاونلاين لغير رجعة و في ظني انه قد مات و شبع موتاً.. وربما ان هنالك من فكروا مثلي.....لكنه هاهو ينهض من جديد من الرماد ....شكرا لكل من خط حرفا هنا.
وزي ما قال ود الصايم خلونا نتش الضلام بالضو...(التقول حقتك هههههه )

قرأت رسالة الاستاذ محمد المرضى حامد وكأنها للجميع داخل و خارج المنبر به او بغيره فله التحية

----------
بس لو المنبر يستمر كدا

Post: #52
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 11-04-2014, 01:52 PM
Parent: #14

Quote: ياسلام عليكم ... الواحد ما متخيل تاثير الكلام والكتابة دي قوي كده ... :)

أهلا بالطاهر..
ألفين سلام يا الدال على الخير ورباي اليتامى..
أهو يا الطاهر لولا سودانيز لما عرفنا بأمر محيي الدين وأسرته وآخرين..
عشان كدا بنقول أن التواجد هنا كثيرا ما يكون لأجل أناس يحتاجون أمثالكم..
جعلها الله في ميزان حسناتك.

Post: #53
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 11-04-2014, 02:26 PM
Parent: #52

ود الصايم،
ربح البيع؟
أقول ليك السوق كعب يا أميه بن أبي الصلت تقول لي ربح البيع؟
أتعلم يا Messi بن معديكرب كان علي التريث خارج سوق عكاظ هذا ريثما يتكأكأ عليك بنو أساسي وود البشرى ورهطه
حتى تكون عظة لبورداب بني قريظة وكيبوردات مضارب بني هلال وشبكة بني النضير العنكبوتية وكافة قبائل الواتساب ( لامن تعرف حاجه) ..

شكرا يا جبار الكسور والخواطر..


(نحن عندما نصمت فإننا نجبر الآخرين على تدارك أخطائهم).

- أحلام مستغانمي -

قاسيه مش؟

Post: #54
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 11-04-2014, 03:31 PM
Parent: #53

Quote: الحبيب محمد المرتضى
غايتو بعد كلامك ونضميك السمح دا ودالصائم لو ما جا براهو اجيبو ليك من اضنيو الكبار ديل ..
ودالصائم والله كلنا بنحبك ..
وكبرت فى نظري اكتر بجيتك عشان خاطر محمد المرتضي ..

والذي نفسي بيده يا معروف عندما تجيل النظر في ما حولنا وتتفكر في أحوالنا تبلغ بك السغربة حد الإنفلاش..
نحن يا ودحمدين نعيش غربة مضاعفة ، تفرقت أجسادنا ومشاعرنا وأهلنا وأحبابنا وأحلامنا وطموحاتنا في أطلس الجغرافيا
حتى لم نعد نعرف إلى أي مجرة ننتمي، نحن أمة كأنما التجزء فيها جزاء كما قال مظفر النواب. لذا تجدنا نفرح ونحتفي بأي موقع أو موضع
يلمنا ويلملم خواطرنا ورفاتنا أيا كانت إحداثياته، يغطينا بدثار نحس معه – ولو على سبيل التأقيت – أننا التقينا واجتمعنا درءا لحالة اليتم الفادح
التي هتكت أستارنا حتى أصبحنا ( فتلة في الرياح وثرثرة في الصخب – كما قال ودالمكي) ، أها يا المعروف ، لامن نلقى مكان زي سودانيز
وما بذله صاحبها لنلتقي حتى لو للبكاء على أكتاف بعض ، يجب أن نُبقي على هذا المكان الجامع ونواليه بالرعاية والعناية والنظافة
ونضع في زواياه الزهور وفي أجوائه البخور ثم نغني عشناك غنا يا أجمل منى إن شا الله في عشه هاديه..
ياها عشه تلمنا في البرهة القليلة التي نلتقي فيها ..
إنت قايل شنو..

Post: #55
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 11-04-2014, 08:07 PM
Parent: #54

Quote:
يا حلينا نحن نغيب ونجى ما حد بتذكرنا

وضاحه ..
إنتي بس غيبي شوفي نجيبك كيف..
جربينا .. سنغني لك هذه الأغنية..



شكرا لك يا عزيزة فأنت أيضا ممن يضيفون لونا لهذا المنبر .. وشكرا أخرى أنك الوحيدة من الزميلات التي شرفت هذه المساحة الصائمية..

Post: #56
Title: Re: الزوله دي كلاما قاسي يا ودالصايم..
Author: Hafiz Bakhit
Date: 12-04-2014, 00:04 AM
Parent: #55

التحية لك مولانا ود المرتضي وكلماتك الرائعة...
ود الصائم يعلم الله نحبك في الله...
ابقي عشرة علي الشيشة ورمضان قرب....والمترصدين كثار

Post: #57
Title: Re: الزوله دي كلاما قاسي يا ودالصايم..
Author: خالد العبيد
Date: 12-04-2014, 00:54 AM
Parent: #56

مرتضى
سلام
زي بوستاتك دي بنقراها بي رواقة في "الويك اند"
المعفن ده خذلني
ناس الكورة مش بقولو في اللحظة الكان شايت
اتفقت معاو وأخرين نشوت بوست في اول ابريل
اها في اللحظة الكان شايت حرد وطلع من الملعب براوو كده
بعدين يا مولانا كفارة اليمين في الحالة دي شنو؟
عليهو اطعام وكساء عشرة مساكين ام عتق رقبة؟
لو فيها ضبيحة علي اليمين اضبح ليهو كنغارو سمين
والله بكتني عودتك يا محمد
شكرا ليك يا الحبيب
واكيد بنتلاقى

Post: #58
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 12-04-2014, 07:41 AM
Parent: #56

Quote:
يعلم الله وحده كيف دمعت عيناي وانا اقرأ هذه المناجاة بين احلي اثنين في هذا المنبر و ادب الكلام الذي امني نفسي ان يسود هذا الصرح ( الصرح و ليس المنبر )
....... يا الله على هذا الجمال منك يا مولانا .......... يا الله علي استجابتك يا ود الصايم و تبشيرك لنا بالبيع الرابح ..........
آن الاوان ان أهنئ نفسي بانضمامي لهذا الصرح و اشهد الله اني احبكما في الله لحبكما لبعضكما


تسلم يا أسامه على الكلام الطيب رغم إني عارف إنو ودالصايم حا يجي يقول ليك (عصرت علي شديد) يا ود بابكر..
يا سيدي الكريم لو يعلم الناس ما نحن فيه لما ادخروا وسيلة لجمع المتفرق المتشظي أصلا..
بقينا يا العزيز في حال لو سمعت به فرقة James Last لعزفت لنا مقطوعة يا شعبي اللتشتت وغلب اللقاط..

Post: #59
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 12-04-2014, 08:38 AM
Parent: #58

Quote: للشباب الما عارفين
الدبلان قماش اشتهر ببياض اللون

دي في التمانيات يا جعفر الحبيب ..
الونسه مع جيل اللِنغاز صعبه ، هم لايعرفون جل القاموس بتاعنا ونحن لاندرك الكثير من مفرداتهم
ك ( وهمه) و ( الفهم شنو ) و (الحنك شنو) و (الزيت شنو) يعني ممكن تضع (شنو ) خارج القوس عشان تتونس معاهم
ثم تبحث عن معاني المفردات،
لكنها سنة الحياة ، جيلنا تعرض لذات الحال أيام ( دبرسه) و ( كتاس) و ( كابِّي الكتاش) .. إلخ. أها عمدة شباب
ميساساقا المهندس قباني طمبجا وقال ليك شوف لينا 5 متر سكروته في زمن ال sagging pants التي أصبح معها
مطربو هذا الزمن يغنون (الناصل) فؤادي ومولع جوفي حر.
.. لكن ما يسعد في الأمر بما يرقى لدرجة الفضيلة في معظم أبناء هذا الجيل أنهم ، رغم بيانات المراجع العام السنوية عن اللهط الحكومي ، يتحلوا
بمكارم الأجداد واليد النظيفة والطرب حد الغيبوبة لأيام صفانا مع استبدال التفاحه والبرتقانه بالآيفون فايف جوار (الجكسي) و ( الجالاكسي).
.دنيا..



محبتي يا أباسعد وتحايا تصلك في طوكيو الخير وأنت أهدأ بالا..

Post: #60
Title: Re: الزوله دي كلاما قاسي يا ودالصايم..
Author: معتصم دفع الله
Date: 12-04-2014, 08:40 AM
Parent: #1





يمين البوست دا داير ليه حجر كاااارب ..
نفس نفسين من هذه النفوس الطيبة الشفيفة ..
نفوس خصها الله بحسن المعشر وقيمة الأصل ..
شكراً محمد المرتضى حامد لجمال حروفك ونقاء دواخلك ..
شكراً ودالصائم لإستجابتك لهذه الدعوة الكريمة وأنت كريم وجميل ..
شكراً للجميع فهذا إستفتاء لمحبة هؤلاء الأخوين وشكراً لكم لأنك حاضرين وأهل خير ..

دتم بخير ..



Post: #61
Title: Re: الزوله دي كلاما قاسي يا ودالصايم..
Author: Ahmed al Qurashi
Date: 12-04-2014, 08:59 AM
Parent: #60

رجعت سودانيزاونلاين الى سابق عهدها

شكرا محمد المرتضى

ولك التحية عزيزي ود الصائم

Post: #62
Title: Re: الزوله دي كلاما قاسي يا ودالصايم..
Author: الطيب شيقوق
Date: 12-04-2014, 09:27 AM
Parent: #61

اااه بوست كالعسين المفرهد بنسام الشتاء في ارض انقطع عنها مطر العواء والسماك
لله درك يا ابا اكرم
كمان جاب بروف المقابل ذاتو؟

Post: #63
Title: Re: الزوله دي كلاما قاسي يا ودالصايم..
Author: اسعد صلاح البدري
Date: 12-04-2014, 09:44 AM
Parent: #62

كلام جميل ومؤثر جدا بصراحة
شكرا للرجل الجميل محمد المرتضى
شكرا للحبيب ود الصايم
نورت الديار وانت تنثر اجمل
البسمات في قلوبنا
ومنك نتعلم ونستمد الوقفه
الصلبة في كل المواقف


كل احترامي

Post: #64
Title: Re: الزوله دي كلاما قاسي يا ودالصايم..
Author: ABUHUSSEIN
Date: 12-04-2014, 10:20 AM
Parent: #63

أزرار الكي بورد و أصابعك و وقتك ديل ذنبهم شنو ....؟؟؟؟
الأزرار تلقاها الآن تبكي و تشكي
و أصابعك تلقاها بتقول الزول دا لو نضف بي عدس ما كان أحسن
و وقتك يكون بندب حظوا و آمالو ...
الله يسألك ما لقيت إلا الشين دا عشان تكتب فيه الكلام دا
ياخ أحلام مستغانمي لو عارفاك بتجيب الكلام دا لي الزول الشين دا كان قضت عمرها كلو تلعب صفرجت
أها نحن نمشي وين بعد كدا ....؟؟؟
قبل بوستك دا الزول دا ما مريحنا...
*********************************
سلامي و تحياتي و إحترامي للجميع

Post: #65
Title: Re: الزوله دي كلاما قاسي يا ودالصايم..
Author: بدرالدين الطائف
Date: 12-04-2014, 10:38 AM
Parent: #64

مولانا محمد المرتضي غيابك والكثيرين من أمثالك هو ما جعل بقعة القبح تكبر فى هذا المكان .

وجودكم مهم بيننا لتزيد مساحة الحب والجمال .

تحياتى لك ولود الصائم .

Post: #66
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 12-04-2014, 02:30 PM
Parent: #60

Quote: Galal E Omar · Scottsdale, Arizona

سعيدين بي عودتك من خلوتك و عودة الضحكة الجذابة و الجابك يجيب عقابك .. شكرا عزيزنا المرتضي ..

شكرا جلال..
عزيزنا ودالصايم رغم أني أناديه ميسي إلا أنه لاعب ليبرو بمعنى الكلمة في هذا المنبر،
لايبتدر البوستات بشكل ثابت لكنه يعمل على تغطية الزملاء في الفريق ويضيف المنكهات
بصورة تعتقد معها أن البوست افترع بتحريض منه ..
هسه الحمدلله تاني ما جا راجع البوست دا ..

Post: #67
Title: Re: الزوله دي كلاما قاسي يا ودالصايم..
Author: وضاحة
Date: 12-04-2014, 03:33 PM
Parent: #66

Quote: شكرا لك يا عزيزة فأنت أيضا ممن يضيفون لونا لهذا المنبر .. وشكرا أخرى أنك الوحيدة من الزميلات التي شرفت هذه المساحة الصائمية..


يا مولانا
حبكم كاتلنى اسوى شنو ما بقدر بلاكم
لولا وجودكم هنا لقادرنا هذا المكان زماااااان
ولكن انت واحمد وخالد المنسي والمسنوح شيقا سبب وجودى هنا

رغم غيبتهم ولكن اطل هنا للطمئنان عليكم من على البعد
كيف لا وانتم من يحمل كل جميل وتعيدوا لينا الثقة في انوا لسة السودانين بخير وفيهم من الرجال ما يكيل العين
رغم الجروح التى تعرض لهنا هنا من اصحاب النفوس المريضة

جيب لى المسنوح طيب عليك الله



دى رشوة للمسنوح علشان يجى عارفة بموت فى الحبش



Post: #68
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 12-04-2014, 04:52 PM
Parent: #67

Quote: Yosri Kami • الأكثر تعليقا • Heerbrugg, Sankt Gallen, Switzerland
أففففففففففففففففففففففف ............
ياخ ما عصرتو علينا .... اها بعد دا بضاعتنا دي نوديها وين؟ .نقع بيها البحر؟؟؟؟؟؟؟
التوقيع: عنصري بن متطرف بن مهاتر بن قاذف بذيء هماز

عزيزنا يسري،
لك الشكر على اهتمامك بالبوست ، ورغم أني لم أشأ الذهاب بعيدا في الشأن السياسي
إلا أن كلامك الساخر على بساطته يعبر بصدق عن بعض مثالب المنبر التي نأمل
من الأعضاء الكرام الوقوف عندها لحسمها ولو جراحيا..
يا يسري العنف الكيبوردي والشتم وفوضى المصطلح الناتجة عن (قدود) الدلالات اللغوية
شئ غير مقبول ، وليت بعض المهمومين بالشأن السياسي لو يعوا أن الطفل الرضيع لاتعوزه
الحصافة ليعرف أنك إذا مارست نحوه العنف اللفظي وأنت خارج السلطة
فلا شك أنك قاتله حين تتمكن منها ، هذه ألف باء التاريخ قديمه وحديثه.
يعني هسه الضرب بالكيبورد وبعدين الدِروه بس..

مودتي يا كامي

Post: #69
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 12-04-2014, 05:33 PM
Parent: #68

Quote: النجيضة انا محمد المرتضى ماعارفه لكن انا شخصياً لسه ما وحشتنى شديد

النجيضه يا موج الزول دا طلع شعبيتو ساحقة وسمعت تحت تحت أنه يفكر في الترشح لرئاسة الجمهورية
وربما أكون موعودا بوزارة أو ولايه أو حتى معتمد ، فقط أسأل الله ألا يكون مصيري كجوشوا انكومو مع موقابي
أو المنشيه مع كافوري ..
بس ودالصايم أخو أخوان ما بسويها..

شعارنا : نحن لانكسِّر الثلج بل نذيب أنتاركتيكا نفسها

-
(ثمة قبل إن لم تمت أثناءها فأنت لست أهلا لأن تعيش بعـــــــــــــــــدها)

- مستغانمي الخمجانه -

Post: #70
Title: Re: الزوله دي كلاما قاسي يا ودالصايم..
Author: حمد عبد الغفار عمر
Date: 12-04-2014, 05:57 PM
Parent: #69

تحياتي يا مولانا ما قادر ادخل البورد

بوستك دا ذكرني الزول القالوا ليهو السعودية انتهت ما تجي، أصر إنو يجي ولقى البيبسي الحجم العائلي يا دوب ظاهر مسك قزازة كاملة بنفس واحد لحدي ما كملها ودق الفاضي بالتربيزة وقال ليهم تقولوا لي السعودية إنتهت؟ هسة أن بدق الكيبورد وبقول ليكم تقولي لي البورد إنتهى؟ كتابة تجنن وتحنن تحياتي للجميع

Post: #78
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 13-04-2014, 07:45 AM
Parent: #70

Quote: ما بتلقي لي 5 امتار ( سكروتة ) قديمه ... الاصليه حقت زمان ؟

يا قباني السكروته قاعده لكن بس مركوب النمر معدوم والحمدلله لأنو النمور مشت مع نيفاشا لكن جزم التماسيح على قفا من يشيل.
بعدين إنت بتسأل عن السكروته لشنو؟ عايز تترشح لرئاسة مجلس إدارة هلال أونتاريو ول حاري ليك وزاره مع ستيفن هاربر؟
أتاريك بطنك غريقه يا يحيى..

Post: #72
Title: Re: الزوله دي كلاما قاسي يا ودالصايم..
Author: ABUHUSSEIN
Date: 12-04-2014, 06:01 PM
Parent: #69

Quote: Ummoayad Moayad · الأكثر تعليقا
يعلم الله الكلام دا دخلني في حتة كدا على ما اعتقد البيسموها تسارع ضربات القلب ولواعج الشوق وعبرة كدا تخنق الواحد لين ما يقدر يتنفس بس وصلت مداخلة ابوحسين دي دموعي جرن حتن العبرة فكت . ود الصايم غضبو جميل زي ضحكتو وجبرو للخاطر كمان جميل .
رد · أعجبني · متابعة المنشور · منذ ‏6‏ ساعات


سجل عندك بالله....
بوستك بتسبب في تسارع ضربات القلب و لواعج الشوق و بعمل خمة نفس .......
و مداخلة واحدة من أبو حسين بتزيل كل هذه الأزمات وكل هذا التأليم على قول البنا.....

يديك العافية أم مؤيد

Post: #81
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 13-04-2014, 11:26 AM
Parent: #72

عزيزنا بشير حسن،
أريتك تبقى طيب إنت..
براك عارف المنبر دا ، ومنذ سنوات ، وسيلتنا للتواصل في الأفراح والأتراح
وفي بعض (المواسم) تكون قاعد ما بين 30 دقيقة إلى ساعه في اليوم ولو حسبتها
في الشهر حاتلقى إنو دا وقت ما هيِّن، بالتالي لازم مكان زي دا يكون مريح
وفيهو (مساند) وثيره وشاي وقهوه ( شيشه ما معانا) وزغني بالأنجيرا والزِلزِل تبسي
على أنغام أستير أويكي وساكس Yared Tefera لناس شيقوق وأشرف طه وعشاق
فن الهضبة ، وهذا جو يتعارض مع الإزعاج العام والضوضاء والضجيج ، والتلوث بشكل عام ..
فلنوقف كل ما يثقب غلاف أوزون المنبر ونسأل عن الغايبين البتمموا الكيف....
وقع ليك كلامي يا بركه؟

مودتي المعروفة يا بشير..

Post: #71
Title: Re: الزوله دي كلاما قاسي يا ودالصايم..
Author: الطيب شيقوق
Date: 12-04-2014, 05:59 PM
Parent: #68

وضااااحة

دى رشوة للمسنوح علشان يجى عارفة بموت فى الحبش

يا تدى والله المسنوحة دي انا بريدا ريدة ( ناسنا) مش ريدة ناس حلاوة لكوم ديل

Post: #73
Title: Re: الزوله دي كلاما قاسي يا ودالصايم..
Author: saidahmed shami
Date: 12-04-2014, 06:14 PM
Parent: #71

شكرا للجميل مولانا محمد المرتضي

ونهدي للحبيب ود الصايم


Post: #74
Title: Re: الزوله دي كلاما قاسي يا ودالصايم..
Author: وضاحة
Date: 12-04-2014, 07:28 PM
Parent: #73

Quote:
وضااااحة

دى رشوة للمسنوح علشان يجى عارفة بموت فى الحبش

يا تدى والله المسنوحة دي انا بريدا ريدة ( ناسنا) مش ريدة ناس حلاوة لكوم ديل


المسنووووووووح شوق الشوق

هههههههههههههههههههه
والله انا كمان بريدك وبريد الككو الفجخ الطين وبريد احمد ومحمد المرتضي
بريدك في الله وخوة من جوووووة القلب
شوفت كيف

الرسول ما تغيب المنتدى بلاك ماعندوا طعم

وهاك دى كامن علشان تديك طاقة ههههه



Post: #75
Title: Re: الزوله دي كلاما قاسي يا ودالصايم..
Author: وضاحة
Date: 12-04-2014, 07:31 PM
Parent: #74

Quote: رجعت سودانيزاونلاين الى سابق عهدها

شكرا محمد المرتضى

ولك التحية عزيزي ود الصائم



احمد حمد لله الشوفناك طيب ياخى مشتاااقين

عليك الله ما تغيبوا ياخى
بركة الجابك مولانا ياخى الله يخلي لينا ابو قلب مليان خير وحب للجميع

Post: #76
Title: Re: الزوله دي كلاما قاسي يا ودالصايم..
Author: الطيب شيقوق
Date: 12-04-2014, 07:35 PM
Parent: #74

مسنووووووحة وضاحة

Post: #77
Title: Re: الزوله دي كلاما قاسي يا ودالصايم..
Author: علي محمد الفكي
Date: 12-04-2014, 08:13 PM
Parent: #76

الجميل انيق الحرف محمد المرتضى
التحايا الزاكيات تغشاك
حاولت كثيراً الدخول الى هذا البوست
ولكن العسل المتقاطر من كل جوانبه كان يشرق حرفي
فيرتد الي
وجودك استاذي يعيد للمنبر عافيته
ويرتقي بالحرف والكلمة
فوجودك هنا رسالة وامانة
وهو حقنا عليك من اجل ان تبشرنا وتعلمنا قيم المحبة واحترام الاخر
فاستحلفك بالله ما تغيب
والتحية للعزيز البشوش محمد الصايم
وكل الجميلين الذين تداخلو

Post: #79
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 13-04-2014, 08:36 AM
Parent: #77

غايتو يا مولانا .. ختيتني في حتة ضيقة شديد يعلم الله ..

Post: #80
Title: Re: الزوله دي كلاما قاسي يا ودالصايم..
Author: عبيد الطيب
Date: 13-04-2014, 08:46 AM
Parent: #77

ويا مولانا ود المرتضي إنت شايل فالك من إسمك
وأظنك من ناس أحمد السمحين.....
وإليكم مقتطف من ما كتبه الشاعر حنفي حاج الطيب
في حالة مُشابهة ، فصبر لأنه تذكَر أصدقاءه ورفاقه من أمثالكم
من الجميلين والسمحين فكانوا العزاء
أصدقاءه ناس أحمد وأحمد السَّمحين....
سلااااام ومعزة لود القرشي ولأبوي الطيب

"عما قريب يا زين أكتُب في كراسَك
ناس احمد السَّمحين حايكُونو جُلاسَك
والسكَّة بِتْودِّي
يبقي الخبر في كان همَّاً رِكِب راسَك
تزهر شتول ريحان تَمْلابَا انفاسَك
ضاحِك مع الخلاَّن المُبدعين ناسَك
شايِف الجِزِو المليان ما الفاضي من كاسَك
كاس الهنا الوَرْدِي
املاهو عبّي وكُبْ ما تخلِّي عنَّابه
وزّع كبابي الشُب لي البرضي واليابا
ومن المباهج عُب حال السرور يابا
وقول لي المهازل تُب واكتبلها كتابه
قول ليها هاك رَدّي
صابر في بطن الجُب راجيلي جَلاَّبا
سِبت المياه الرُّب يصطادو طُلابا
مالي المساحات حُب في الصحراء والغابه
وهُب هيلا هيلا وهب بشرانا بي سحابه
يازهرة بتْنَدِّي

دعونا نملأ كل السهول والتلال والقفار والعتامير جمالا ومحبة
الدنيا أُم قدود حسب الله قال" "ما بتستاهل ترقد منها يوم واحد وانت مغبون"
محبتي للجميع

Post: #82
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 13-04-2014, 03:14 PM
Parent: #77

هارون دياب مشكور على الكلام الطيب ياعزيز ، لكن كمان مرات بكري ابوبكر ببالغ..
شوف العضويه دي بالله..

797757481.jpg Hosting at Sudaneseonline.com

بالله مش أخير بص شندي؟

1353742_291x448.jpg Hosting at Sudaneseonline.com


Post: #83
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 13-04-2014, 04:10 PM
Parent: #82


Quote: محمد المرتضى و الذى كان دومآ على لسان صديقى و أخى المرحوم مولانا طه سورج
كان فى كل ليلة يسمعنى عنه
العزيز الراحل طه سورج كان رجلا وحيد نسجه،
كنت محاميا تحت التمرين بمكتب الأساتذه أدهم وأبوالريش فأرسلتني معلمتي الأستاذه د. أسماء محمد عبدالحليم (عضو هذا المنبر) بملف في أول ظهور لي
بالمحكمة الجزئية الخرطوم للقيام بإجراء كنا نسميه (إستعلام) ، دخلت قاعة المحكمة متهيبا الموقف الذي وضعتني فيه أستاذتي لأنها المرة الأولى التي (أظهر)
فيها وأنا لست في صحبتها.. كانت القاعدة تضج بالصمت، دخل أحد المحامين الكبار وحاول تخطي دوره بأسلوب مسرحي لايخلو من استصغار وتهميش لصغار المحامين
والمتدربين الذين سبقوه في الحضور ووضع الحاجب ملفاتهم وفقا لأسبقية الحضور ، فما كان من مولانا طه إلا أن حدجه بنظرة تكفي لإعادة ترتيب الهيئة القضائية
بكاملها، وبالطبع كانت النظرة الليزرية تلك كفيلة بوضع الأمور والحضور والملفات في نصابها الصحيح وما كان أمام ذلك المحامي خيار سوى انتظار دوره ودعم الصمت الرهيب.
لا أخفيك أني إتكيفت لدرجة كدت معها أدوبي عوضا عن طلب الإستعلام.
كان هادئا لا يسمع له أو لمحام صوت في محكمته التي تدار فيها الأمور همسا وباقتدار وجدارة وحتى عند عمله بمسقط لفترة وجيزة كان الهدوء هو الملازم لطه في كافة
حركاته وسكناته.. عاد للسودان ثم انتقل إلى السعودية لينتقل إلى دار البقاء فجأة لعلة لازمت ذلك القلب الجميل النظيف.

حكى لي صديق مشترك قائلا: قامت حكومة اللنغاز بإحالة طه وآخرين من ضمنهم الأخ العزيز سيف الدوله حمدنا الله إلى (الصالح العام) في
أول (كشف) شمل 57 قاضيا على ما أذكر ، وعندما سئل طه : يا مولانا ، إنت إسمك مع الناس الشالوهم؟؟
فأجاب: طبعا ، هسه كان إسمي ما جا معاهم كنت أودي وشي وين؟

اللهم اجعله في عليين

إلى جنات الخلد مولانا طه سورج .. (عضو المنبر).

شكرا أخي حيدر بشير..

Post: #84
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 13-04-2014, 09:59 PM
Parent: #83

Quote: Mohammed Osman Elhag • Institute Of African and Asian Studies
يا جماعة الخير أنا والله بفتح الموقع دا يمكن يوماتي عشان جنس النضمي الحلو دا بس لأننا محرومين من المشاركة فيهو ....
أها براك قريت كا ما كتب عنك يا ود عمنا حامد فبالله لا تحرم معجبيك من مداخلاتك .... وبعدين وينو المسنوح ... مالو كمان مختفي !!!!!!!

Salah Hussain• Khertoum sudan
محمد المرتضي
رايع -- لا تكفيك
لله درك -- ربما
وبرضو شويي
بيك الفريق اصبح خلا


الأحباب محمد عثمان الحاج وصلاح حسين..
لكما الشكر والتقدير..
يا محمد عثمان،
السيد المسنوح أصبح السيد المزنوق في عمل قانوني حساس شيقوق حساس..
يمكنك تقدير وضع عربي البردانه في الاستوك ماركت والتبادل الإلكتروني ..
دعواتكم له..

Post: #85
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 14-04-2014, 08:20 AM
Parent: #60

(أها أقعدوا كبروا للزول دا في رأسو الأصلو كبير لامن يطرشق لووووووووووووووووول )



ويطرشقنا معاهو..

بالله مش كدا يا صديق؟
الواحد يكون بيلعب دافوري في أحد أزقة ودنوباوي وفجأة يجد نفسه راس حربه في ماتش في سانتياغو برنابو ..ههه
ياخ علي الحلال يا ود رحمه ودالصايم اتضح إنو أكبر من الكامب نو وبشعبية تفوق حضور فاينال الكلاسيكو..

تحياتي يا عزيز


Post: #86
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 14-04-2014, 10:10 AM
Parent: #85

(ومنها لقيت ليكـ خيابتي فايته الحد لأنو قسما بالله عيوني رقرقن لامن كلمت نفسي يا ود أنجض)

عمران،
حاشاك الخيبه يا العزيز..
أوعى تكون فاكر الرجال ( النجيضين) هم الذين لادموع لهم، اللهم إلا إذا كانت غددهم الدمعية جفت بسبب
ما سكبت في مسيرها، أو كانت تعاني علة جفاف العين ومتلازمة جوغرن، الدموع يا أبا محمد نعمة إلهية ، تؤنسن العيون،
وطبيا تساعدنا على وضوح الرؤية نحو رمادية الموائد المستديرة ، ودينيا هي منظف فعال ومجرب للآثام ومذيب للتطرف،
و(عندهن) تفوق قوتها التدميرية 22 كيلو طن، وعاطفيا لها فعل السحر في غسل الأسى والوجع المغربل حتى لو غالبناها
بالتصنقع وغرغرة المآقي..
زولتك القاسيه زاتا قالت :أحتقر الناس الذين لا دموع لهم، فهم إما جبابرة..أو منافقون. وفي الحالتين هم لا يستحقون .

أما أنا يا عمران فلا أثق في أي إنسان لاتدمع عيناه، ولو بالتيمم..

ياخ برضي ليك المولى الموالي..

Post: #87
Title: Re: الزوله دي كلاما قاسي يا ودالصايم..
Author: waleed dawash
Date: 14-04-2014, 11:08 AM
Parent: #86

انت جيت يا رمضان ؟ انت مالك خفيف كدة يا رمضان ؟

والله انا لو منك يا رمضان ما اجي كلو كلو
و اخلي محمد المرتضى دة يكتب و يكتب و يهاتي بيك
كدة و انت برضو ما تجي و نحن نخش نقرا و انت تقرا
هو يكنب و نحن نقرا و انت ما تجي .
.

Post: #89
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 14-04-2014, 02:00 PM
Parent: #87

(ود الصائم حبابك كما عودتناااا الاريحية ######رية طاعمة
عليك الله ماتغيب يااااااااااخ )

حبيبنا باسط..
نفسي أعرف كومبيوتر بكري شخَّت ليك شنو..
كومبيوتر ظالم ومعه من حشده بالبيانات التي ينبغي حذفها..
سألتك بالله (الكــلب) يستحق الشتم والحذف في صمَّة خشمو حتى لو كان باسطا ذراعيه بالوصيد؟
ما أظلم الإنسان ..

ودالصايم دا أمسكوه كويس يا ود المكي تراهو جبر الخاطر لكن هناك من (الممتنعين) من
الغنا ليهم أبوداؤود (جفوني الأحباب) يطالعوا هذا البوست وبنقول ليهم (بِلُّوا "شعوركم") ..
وفي عقيدتنا الداؤوديه ذاتها إنو أي مشكلة ( بسيطه بالريد بتُحَل)..

Post: #121
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 19-04-2014, 04:50 PM
Parent: #89

Quote: مرتضى
سلام
زي بوستاتك دي بنقراها بي رواقة في "الويك اند"
المعفن ده خذلني
ناس الكورة مش بقولو في اللحظة الكان شايت
اتفقت معاو وأخرين نشوت بوست في اول ابريل
اها في اللحظة الكان شايت حرد وطلع من الملعب براوو كده
بعدين يا مولانا كفارة اليمين في الحالة دي شنو؟
عليهو اطعام وكساء عشرة مساكين ام عتق رقبة؟
لو فيها ضبيحة علي اليمين اضبح ليهو كنغارو سمين
والله بكتني عودتك يا محمد
شكرا ليك يا الحبيب
واكيد بنتلاقى


إنت يا خالد ما سمعت بالمثل الردئ القائل: اليضمن الرجال يضمن المويه في الغربال؟
صاحبك دا ألقبه ب ( ميسي) وهذا يكفي..
كنت عايز أقول ليك ربنا يحفظكم في غربتكم لكن أستراليا دي غربتها نص كم..
الغربه بقت جوه البلد ربنا يقيل عثرتها وترجع بالسلامه وترجع أيامها الجميلة..


Post: #88
Title: Re: الزوله دي كلاما قاسي يا ودالصايم..
Author: الطيب شيقوق
Date: 14-04-2014, 11:11 AM
Parent: #85

استاذ المرتضى

كيفك طيب؟

تحياتي عبركم للاخوين االعزيزين العبيد الطيب ( شيخ العرب) ومحمد عثمان (ادروب)

التحايات العطرة لكل الاخوة والاخوات الذين اسهموا في امتاع متصفحي هذا البوست بمداخلاتهم الحلوة

وتمتد التحايا لتطال الاخوة الاكارم الذين يشاركون بكتاباتهم على صفحات الفيس بوك بتعليقاتهم الطيبة

وعليك الله يا مرتضى اديهم من بيت الكلاوي بس

Post: #90
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 14-04-2014, 03:28 PM
Parent: #88

(بالله هي فيها قسم يا عمران، آمنت بالله، يا ود الصايم غيب وتعال ساكت ولا عليك
أها بالمناسبة الوضع كيف من البلكونة؟
يا مولانا ود المرتضى سلام عليك ياخ
وسيرتك الطيبة كل كم يوم كدا مع الجار العزيز مولانا ود حمدنا الله
فتقبل تحياته وتحياتنا)

المشكله يا معاويه مافي قعاد البلكونه بل في الماشين في الشارع زيَّنا،
ناس البلكونه قاعدييين يشربوا في شاييهم ونحن لينا البوري والبنبان وناس (زِح)..

عقب إنتفاضة أبريل مباشرة لم يبق ميدان واحد في العاصمه أو ودمدني بدون ندوه سياسيه وكيما يشجعوا الشعب المنتشي، دون أن يعلم ما يخبئ الغد من كآبة ،
كانت لافتات الأحزاب عن الندوات يكتب عليها ( الحزب الشيوعي السوداني يقيم ندوة سياسية كبرى يعقبها حفل ساهر بالفنان وردي ) ، وكذا كان
حال الناصريين ( الحزب الإشتراكي العربي الناصري يقيم....والحفل بكابلي) ولا أذكر فنان الإتحاديين لكنه ربما كان أحد المحسوبين على
تيار (الوسط الفني) يراوغ على طريقة أندرياس أنييستا ، وبالطبع لم يكن لما يسمى بالجبهة القومية الإسلامية مطربا فمنسوبيها تطربهم أشياء أخرى .
لكن بعد وضوح الرؤية وانقشاع سحب التحالفات السياسية وإعلان الطلاق بينهم وحزب الأمه وتحالف الأخير مع الإتحادي أصبح بعضهم يردد في
سره ( خلاس ارتاح يا قليبي ارتاح ... إرتاح من النسانا وما طرانا وقصد أذانا وملانا جراح .. إنت ارتاح ... آحح)..

أها يا معاويه ، المقدمة الأطول من الموضوع دي سببها أن الزملاء من قبيلة القانون في مسقط كانوا ومازالوا يتجمعون على الغداء أيام العطلات في
منازلهم ، الواحد يعزمك ويقول ليك : ضروري تجي يوم الجمعة غداء وندوه ، تقول ليهو : ياخ عندي ألف شغله ، فيرد: ياخ حايكون معانا سيف الدولة ،
بس بدون (كيبورد)..هه.

الأخ سيف الدوله كان يعطي التجمعات تلك نكهة بطُرَف ومِلَح وتعليقات ساخرة لاتُمَل ولا تنتهي رغم تسجيل لاعبين ( مطربين) جدد كمولانا حيدر شنقره الذي بعد انتقال
سيف لبلد آخر كمهاجم صريح أصبح حيدر جوهر صدر المحافل..

سلِّم لي عليهو يا ود الزبير..

Post: #91
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 14-04-2014, 10:09 PM
Parent: #90

ahlam-mostaghanmi1.jpg Hosting at Sudaneseonline.com

شكرا Jamal Mustafa دي أسمعا وإتحصَّن وأنت على شفا (مرض النوم الجميل) ..
أو كما قالت..



Post: #92
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 15-04-2014, 07:01 AM
Parent: #91

Quote: Mohammed Taher · الأكثر تعليقا

هكذا يجب ان يكون هذا الموقع . . . دوحة من الجمال في زمن يحيط بنا القبح احاطة السوار بالمعصم

لك الشكر محمد طاهر ، من الفيسبوك ، على كلامك رغم قناعتي أن بالمنبر مئات الأقلام الكفيلة بجعله خميلة..
بعض رسالة هذا البوست أن أذكِّر نفسي بأن ( الأنا) وال Ego الأمارة بالسوء والفايته حدها هي أس جل أدوائنا للحد الذي
يدفع البعض لسحق الحقيقة تحت جنازير تلك الأنا فقط للإنتصار للذات..
هنا فقط لايكون ثمة فارق بين المنبر وتيانانمين..

ربنا يحفظ..

Post: #93
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 15-04-2014, 10:33 AM
Parent: #92

(من أجمل البوستات التي كتبت بهذا المنبر

لكما التحايا محمد المرتضى وود الصائم )

أخي البشير..
هذا الإطراء يحفز على المواصلة لكن (فاتورته) عاتيه يا مولاي..
فاتورة تبدأ ب (البقاء والمواظبة) ولاتنتهي بال ( صبر) و محاحاة الوقت الضنين والمشاركة بما يستأهل..
( نَعَّمتو) علينا الغربال يا البشير..
تسلم.

Post: #94
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 15-04-2014, 10:36 AM
Parent: #92

تعرف يا مولانا ..
في الواتساب لي كم يوم عامل الاستيتوس (ادفع بالتي هي أحسن) ..
واحد من الدهماء قال لي عندكـ إيجارات متأخرة ولا شنو!!

دي أمّة دي!!


أها النجيضة ..
ادفع بالتي هي أحسن ياخ!!

Post: #96
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 15-04-2014, 01:42 PM
Parent: #94

بهاءالدين برعي الصاحب • Omdurman

(ياخ انا كزول مشاهد من المساطب الجانبيه قربت الملم عفشي و اعتزل سودانيز, لكن يا ود المرتضي بوستك حقيقي ابكاني
و زي ما قلت "سودانيز عينة عشوائية من مجتمعنا ، لكنني أراها بعين الرضا كبانيه وبيت عرس وصيوان عزاء ومشفى
ومجلس شورى وقاعة درس وراكوبه وعايزنها تبقى كشف تبرع خير ما كشف حال"...
تجدني من المتابعن لكتاباتك دوما...و سعيد بعودة ودالصايم)

شكرا يا صاحب من نواحي الفيس..
يبدو أن بعضهم سعى لنفي حقيقة أن سودانيز لايمثل عينة عشوائية من المجتمع السوداني
لكنني ما زلت على قناعتي تلك ولعدة أسباب لاتنحصر في قوس قزح السياسي أو
الجهوي أو الجندري بل النفسي أيضا..
ما ناقصها إلا كشك ناصيه لودعماري الجيد..
-
بعيدا عن ود الصايم ومن لف لفه ، طالما أنك أمدرماني و ( صاحب) فلا شك أن لك صلة قربى بمحمود الصاحب ..

مودتي يا بهاء..



Post: #97
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 15-04-2014, 02:06 PM
Parent: #96

(Ummoayad Moayad · الأكثر تعليقا
يعلم الله الكلام دا دخلني في حتة كدا على ما اعتقد البيسموها تسارع ضربات القلب ولواعج الشوق وعبرة كدا تخنق
الواحد لين ما يقدر يتنفس بس وصلت مداخلة ابوحسين دي دموعي جرن حتن العبرة فكت . ود الصايم غضبو جميل
زي ضحكتو وجبرو للخاطر كمان جميل .
رد · · ‏12 أبريل‏، الساعة ‏03:44 صباحاً‏)

أم مؤيد حبابك لكن زي ما شايفه أبوحسين إلتقطها بسرعة وعمل لينا بيها لافته في العلالي كتمثال المسيح في الريو..
باختصار قال أنا سبب الخفقان واللواعج والعَبرة التسد الحلق وكل انفعالات السافنا الفقيرة وهو ال pacemaker ومطر الرشاش الرشه..
يلا يا دعاش ، تاني ما معاك راحه..
لك الود والإحترام يا أم مؤيد ونكلم بكري يديك باسويرد أبوحسين الشايل بيهو حسِّي دا....

Post: #98
Title: Re: الزوله دي كلاما قاسي يا ودالصايم..
Author: إدريس محمد إبراهيم
Date: 15-04-2014, 11:19 PM
Parent: #97

بالجد يا جماعه البوست ده عامل زي بوكيه الورد البتشيلو العروس في اجمل ليالي عمرها ... جمع كل الجمال وجميلي الدواحل في فجه واحده ....

وكمان فيهو لعة غاية في الرقي ... نثر بديع هو للشعر الصادق الجميل اقرب ... ينبي عن ثقافة عاليه ...واهم ما يزينه جمال الروح يا ناس يا بهجه انتو ...


وبالجد كمان غلبني اكمل ... فقد غلبتني دموعي .....


ان شاء الله تسلم محمد المرتضى اخوي ... انت وكل الجميلين الدين مروا من هنا ... يا من منحتمونا كل هدا البهاء ....


مغ صادق الحب الدي تعرفون ... وهو حقيقة اقل كثيرا مما تستحقون ....

Post: #99
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 16-04-2014, 06:49 AM
Parent: #98

Quote: النجيضة : ود الصايم طلع رهيف وخفيف



رهيف ممكن يا خالد .. لكن خفيف دي فيها نظر

Post: #100
Title: Re: الزوله دي كلاما قاسي يا ودالصايم..
Author: محمد عبد الماجد الصايم
Date: 16-04-2014, 06:51 AM
Parent: #99

شكرا للناس التحت .. السادة الفيساب ..
وزي ما قال أبونا القدال:
الناس التحت خابرين عمايل اليانكي

Post: #101
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 16-04-2014, 10:17 AM
Parent: #100

Quote: أول مرة غيابو يكون عندو فائدة

طبعا يا سامي وضعتني في حته أضيق من أفق حكومة وثبستان ، لو وافقتك فهذا يعني أن كتابتي فيها ما يفيد
وإن لم أوافقك فهذا يعني أن غيابه السابق أيضا كان مفيدا، ف يقوم يكررا وفي الحاله دي سنضطر ننزل ليهو
(غيب وتعال ) autorun .. لكن مما لاشك فيه أن الأمر هذه المرة جاء مختلفا فقد كتب لنا
محمد غارسيا الصايم ماركيز رسالة في المنبر بعنوان ( أحداث طفشان معلن) ، أخافتني تلك الرسالة
وكأنني سانتياغو نصار لأنها ربما تغري الغير ممن تسوِّل لهم أنفسهم الإنزواء ويتخذوا قرارات مشابهة
فكتبت ما كتبت كيما تتحرك المدينة وتمنع ما سيحدث ،
هسه أنا قلت كأنه قال لبكري لأحتَنِكَن عضويتك؟

Post: #102
Title: Re: الزوله دي كلاما قاسي يا ودالصايم..
Author: محمد المرتضى حامد
Date: 16-04-2014, 01:50 PM
Parent: #101

مافي كلام ( كبار كبار) يا طارق ، الكبار والكبار عند ناس السياسه الله يزيدم ويطرِّق ألسنتم ويطقطق أصابعم،
وبمناسبة الكلام (الكبار كبار) دا حكى لي عضو المنبر الساخر الخرافي الأمين مبارك(اللمين آخر دبرسه) أنه في أحد
مساءات الخرطوم الودودة التقى شحادا تبدو عليه مظاهر نتائج عرقي العيش ( أبو مقشاشه) واضحة جلية ، يتمركز جوار
مسجد الخرطوم الكبير في ثمانينيات القرن المنصرم طلب إليه (كرامه) فدار بينهما الحوار التالي:
الشحاد : يا استاذ ، كرامه بللاهي،
اللمين: شوف ، أنا ممكن أديك كرامه تتم بيها الناقصه لكن في رأيي إنو يجب عليك تسجيل دخلك اليومي في الموقع الجغرافي
المحدد وإحداثياته ثم تقوم بحصر المنصرف عن ذات الفترة كيما تتمكن في فترة معيارية من رسم خط بياني واضح تستطيع
معه الوصول لتحليل علمي يمكِّنك من إيجاد معالجة مؤقتة إذا كان الخلل موسميا وذلك باستبعاد السلع ذات المنفعة الحدية
الجامدة من مشترواتك لدعم إدخارك والإبقاء على السلع ذات المرونه العالية أو إجراء تغيير نمطي وسلوكي شامل جذري
لمعالجة ميزان المدفوعات إذا كان الخلل هيكليا و...
الشحاد: أمشي يا شيوعي ..

أها يا طارق نقد ، دعواتك معانا الله يجيب باقي الأوكرانيين ونغني مع ( الكييفين) وناس تورتشينوف يجو عايدين..

شكرا يا عزيز على حديثك الطيب.

Post: #103
Title: Re: الزوله دي كلاما قاسي يا ودالصايم.. اخر دبرسة
Author: AlAmin AlMubarak
Date: 16-04-2014, 02:35 PM
Parent: #102

بللاهي،
اللمين: شوف ، أنا ممكن أديك كرامه تتم بيها الناقصه لكن في رأيي إنو يجب عليك تسجيل دخلك اليومي في الموقع الجغرافي
المحدد وإحداثياته ثم تقوم بحصر المنصرف عن ذات الفترة كيما تتمكن في فترة معيارية من رسم خط بياني واضح تستطيع
معه الوصول لتحليل علمي يمكِّنك من إيجاد معالجة مؤقتة إذا كان الخلل موسميا وذلك باستبعاد السلع ذات المنفعة الحدية
الجامدة من مشترواتك لدعم إدخارك والإبقاء على السلع ذات المرونه العالية أو إجراء تغيير نمطي وسلوكي شامل جذري
لمعالجة ميزان المدفوعات إذا كان الخلل هيكليا و...
الشحاد: أمشي يا شيوعي

مشكور مرتضي بركة اللي ماذكرت الكلمة بعد يا شيوعي.........

Post: #104
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 16-04-2014, 06:51 PM
Parent: #103

Quote: مشكور مرتضي بركة اللي ماذكرت الكلمة بعد يا شيوعي.........



معقوله بس؟
داير تزعل مننا أحبابنا البلاشفه والمناشفه؟
باللاهي إنت حايم بهنا يا أبيض اللون؟
كيفك يا أبا سارة؟
لو تأخرت قليلا وتركتني أطلق مزيدا من المبالغات والدجل فهذا زمن إطلاق الحريات..
تحاياي للأسرة الكريمة..

Post: #105
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 16-04-2014, 08:28 PM
Parent: #104

Quote: ود الصائم شفيف بما يكفى لانك تحبو من غير ماتشوفو وتحس بانو صاحبك وصاحب صاحبك زاتو ..

هذا قول حي يتنفس يا أحمد يصدُق في حق ودالصايم وكثيرين غيره ، لكأني به يجري فرِحا في شوارع المنبر ملوحاً للسواد
الأعظم من عضوية البورد مرددا مع صالح الضي (نحن ما ناسك) ، حتى الماشفناهم لهم في النفس معزة
وتخاطر بتردد 30 ميقاهيرتز، كذا القابلونا بأحضان كملاجئ حصينة في زمن القصف البذئ وفتحوا لنا أفئدتهم
ويانا قرَّشنا فيها ، يعلم الله كتيرين إتوهطوا في النفوس والقلب متوسدين الشريان التاجي مشنقين الطواقي يتوكأون
على عصا الود هاشين بها على خاطر بشتنته الدياسبورا وشلهتته المنافي ..

أدام الله الود والمعروف بين الناس يا وداللمين.

Post: #106
Title: Re: الزوله دي كلاما قاسي يا ودالصايم.. اخر دبرسة
Author: عمر مصطفى مضوي
Date: 16-04-2014, 09:09 PM
Parent: #105

حاجة زي ما تكون محلق في العواصف فجأة تهبط في السكون ،،
شكراً يا أحباب على الحب المبثوث كالفراشات والخير المدلوق كشربات الفرح في هذه الكتابات اليانعة
و هذا المنتوج الإنساني الصرف الممزوج بسوداناوية فريدة .
شكراً محمد المرتضي ومحمد الصايم وكل من مر هنا ونفس من رحيق نفسه أكسجين سوداني صرف
يعيد للنفس بعض من شتاتها ويزكي شوارع الروح بعطر الصدق والمحبة وسوالف الزمن الراح .
كلمات ليست كالكلمات تعيد ترتيب الفوضى في الدواخل الشاربة من لون الشفق وحزن المغيب
والبكاء المر على وطن وحب وقضية . وتربت على أسى نتنفسه يومياً في غربة شوهت معالم الطريق وملامح المستقبل
وأحلام الصغار .
شكر كثيف وعميق ومزيد من الكتابة والجمال ،،،،،،،

Post: #107
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 17-04-2014, 09:22 AM
Parent: #106

Quote: أيامك يا عم.........

أيامو بس يا مكاوي؟
أصبر خليهو الأسافير بتوريهو.

Post: #108
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 17-04-2014, 10:07 AM
Parent: #107

Quote: والله يا جماعة السلوك والاحترام معدي (اعضاء وقراء) فبالله الناس الجميلة مثل صاحب البوست وضيوفه خليكم قراب


آي بالله كلمم يا درار.. وألكزم بالحته الفيها المهماز زي ديجانقو ورينقو.. وقول ليهم الموده معديه زي التثاؤب و (كورونا) ما براهو..
..
أعجبني بروفايل صقر الجديان ، إعتبرها نوستالجيا تعيدنا إلى زمن الطلائع المايوية وجيتنا وفيك ملامحنا بعد أن صرنا إلى زمن (شُزاز اللافاغ) ،
عارف يا محمد ، عندما غيَّروا الشعار من الخرتيت إلى الطائر السكرتير وتغير العَلَم من علــَم ناس الأزهري وودالصاحب إلى العلم الحالي ،
دار لغط كبير أهرق فيه حبر لو كتب أشواقي ليك ما عدَّدا، أضعنا زمنا ثمينا مثلما يحدث اليوم ، تلاقي إتنين سودانيين من المسغفاتيه يتجادلا حول
عروبة وإفريقية السودان و الهوية 14 ساعه وهم على متن ال Airbus A 380 بكل مافيها من إبهار في رحلتها من دبي إلى JFK الجافي ونفور
وبعدما الواحد فيهم يكون شرب جردل من السوائل وغنى الندامى والندامه وانزنق يقول ليك بالله يا بن العم الواحد يلقى حمامات الناس ديل وين..
الحمامات الحزينه.

Post: #109
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 17-04-2014, 01:54 PM
Parent: #108

أشرف طه إنت زول بتاع مشاكل..
هسه جايب سيرة الناس بتاعين الهضبه دي لشنو؟
عملت عنهم بوست http://www.sudaneseonline.com/board/219/msg/1288019240.html إضطرني لأن أطلب
إلى بكري نقله للمكتبه بصورة عاجلة ..
لكن محمود أحمد غناي وموسيقاه عجيبة وزي ما قال صديق أحمد لو الأغنية الحبشيه بقت بالرتبه مشهوره محمود فوق الرتبه زادوهو دبوره..
المقطوعة التي أوردتها في الصفحة الأولى لهذا البوست هي من عزف الساكسفونيست الإثيوبي Yared Tefera ولها قصة طويلة عجيبه وغريبه
لكن هي في الواقع لحن أغنية الراحلة بيزونيش بيكيلي وأصبحت بعد أن غنتها الفرقة الأثيوبية في المسرح القومي بأمدرمان ، عندما كان كعبة للثقافة،
أصبحت الأغنية ولحنها في كل مكان وكان أشهر من يؤديها عازف الساكسفون بفرقة جاز المدرعات (عبدالله دينق) لأن فيها صولو ساكس
على إيقاع تم تم يمكنه إلغاء أي إمكانية للتماسك والوقار ، يا تبكي يا تغمر سيما إذا نزلت حسناء ورقصت إسكيستا ايام الماكس وقماش الخرطوم بالليل
عندما كان للخرطوم ليل يغار منه الرشيد ويحسده عليه زرياب.

الله يوسدك البارده يا النجاشي..



لك الشكر عزيزي أشرف على المشاركة الحميمه..

Post: #110
Title: Re: الزوله دي كلاما قاسي يا ودالصايم.. اخر دبرسة
Author: جمال ود القوز
Date: 17-04-2014, 04:30 PM
Parent: #109

Quote: شكرا للناس التحت .. السادة الفيساب ..
وزي ما قال أبونا القدال:
الناس التحت خابرين عمايل اليانكي





أمانتاً في ضمتكـ ..
يا ود الصايم ..
هو العارفينو الناس التحت شيتاً ساهل ..
عموماً ..
إنت تستاهل الزفة الكاربة دي ..
وأريتو حالنا يايمه ..
والاداركـ بالكوريكـ يأخ ..
يدينا بالقطاره ..

ــــــــــــــــــــــــــــــــــــــــــــــــــــــــــــــــــ

نثرتم هاهنا جمالا يخلب الألباب ..
وحرفاً تتقاطر أمامه عبارات الاعجاب ..
وتتقاصر لديه كلمات الثناء والاطناب ..
حقاً ..
فليتوارى القبح ..
فلا مكان له في معية كل هذا الجمال ...


Post: #111
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 17-04-2014, 10:50 PM
Parent: #110

Quote: (استفيدوا من اليوم الحاضر لتكن حياتكم مذهلة خارقة للعادة
..اسطوا على الحياة امتصوا نخاعها كل يوم مادام ذلك ممكنا
فذات يوم لن تكونوا شيئا..سترحلون وكأنكم لم تأتوا...)

بالله يا شقدي الزوله دي مش ساديه؟
على العموم مقولتها أعلاه لا تبتعد كثيرا عن محور فكرة كتاب الزول الكتَّاب إيكارت تول
في مؤلفه العجيب The Power of Now والذي يفتح فيه عين القارئ على حقيقة أننا ،
دون أن ندري ، نهدر جمال اللحظة بين سندان الماضي ومطرقة المستقبل .. نبيع أجمل لحظات العمر
لقاء أوهام تنسب للماضي أو المستقبل وربما لاتوجد إلا في أخيلتنا..
نحن دائما ما نكون أسرى قلق لايتصل بالحاضر وألم يسكن الماضي وتمضي الأيام والسنين دون
أن نكون عشناها كما ينبغي ولامن نلتفت نلقى الحفله انتهت ولملموا الكراسي ، أو كما غنت
فيروز ( لما التقينا لقينا العمر ولَّى وعبر) ولذلك كان بيان بازرعه الإنقلابي في قبِّلي ثغري الظامئ
فقد لاتنفع الذكرى وهو ينتمي لذات الفصيلة ( فصيلة الآن الآن وليس غدا)،
لذا ننادي بإقالة الغبائن عن أكتافنا للمحافظة
على السلسله الشقيانه وشايله هم الدنيا زادا والتي نسمها جحودا ب (السلسله الفقريه)..
والله الفقريين نحن ديل..

Post: #113
Title: Re: الزوله دي كلاما قاسي يا ودالصايم.. اخر دبرسة
Author: ABUHUSSEIN
Date: 17-04-2014, 11:39 PM
Parent: #111

Quote: لك الود والإحترام يا أم مؤيد ونكلم بكري يديك باسويرد أبوحسين الشايل بيهو حسِّي دا....


زمااااااااااااااااااااان أنا قلت إنو أنا أبو حسين دا مستهدف و أهي الأيام بتثبت صحة مقولتي ....
بعدين أبو حسين دا متواجد يومياً ليه عايز تقصيه بالطريقة الملعوبة دي
ياخ إنت زي يوم 29 فبراير إتجود بما تملك ....
بعدين ياخ بوست واحد زي بوستك دا كل شهر بس كفاية و إعتبروا صدقة جارية تنفعك بعدين
عليك الله شوف الناس اللي دعوا ليك ديل كم واحد و شوف دعواتهم دي ...
لو دعوة واحدة ضربت معاك تريحك دنيا و آخرة
بس بالله أبعد لي من كاروشة و أشباه كاروشة عشان بتبوظ علينا السوق ..
غايتو كان لقيت طريقة برجع ليك تاني عشان أغلغلك شوية
عسى و لعل أسترد ما سلبته مني في موضوع الـCar Wash


.

Post: #114
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 18-04-2014, 11:00 AM
Parent: #113

Quote: يا سلام يا مولانا
ما في كلام غير "يا سلام"

أمّا أنت يا حمّودي فزعلي منك يخلّيني اعمل ما شايفك :)

إن كانت هناك حسنة واحدة تحسب لصديقي المدعو DKEEN عشا البايتات وغدا الضيفان وفطور أبناء السبيل فهي إتاحته لي لقاء ودالبشرى
ضمن نفر كريم من قبيلة سودانيز، فعند دخولي باب القاعة الفخمة التي امتلأت على سعتها بأحباب دكين ونهال ابتهاجا بزواجهما إتجه نحوي
ذلك الشاب الوجيه وعند اقترابه لم يخطئ رادار خاطري أنه محمد البشرى الخضر ، أقول خاطري لأني كنت أعرف أناسا بالخاطر عندما يخذلني
البصر الخؤون ، والخاطر في إحساسي يمثل منطقة متنازع عليها بين جمهورية القلب ودولة الفؤاد ومملكة البصيرة ، قام قالدني ( كما قال نميري
عندما التقى ياسر عرفات في مخبئه أيام أيلول الأسود ) فأزال عني وعثاء سفري وكآبة منظري كأنه ميدوزا ميثولوجيا الإغريق المعروفة، ( أبو التلج زاتو ياخ)
وكانت ليلة لاتنسى جرى على إثرها توقيع مذكرة تفاهم على هامش قمة دكين تلك أن (يحجز ) لينا كريمته آيه وتبقى الصداقه قرابه ونكسب الودين والدراهم
رغم مناوشات المهندس محمد الشيخ نواحي أبها.

لزمن كنت أعتقد أن ودالبشرى يساكن ودالصايم وأنهما يجمعهما منزل واحد عندما يتبادلا الباصات البينية في المنبر بأسلوب هو أقرب للدويتو وبمستوى
تظن معه أنهما قاما بإجراء بروفات لأداء يذكرك بأيام بيبيتو ورماريو عندما كان للعالم كأسا يُسكِر..

أدام الله الود ياود البشرى وزي ما شايف تخطينا مرحلة تكسير التلج إلى توزيع الآيسكريم والعاقبة عند الباقين في المسرات..



(إن أجمل الأشياء هي التي يقترحها الجنون ويكتبها العقل)
- أحلام-

Post: #115
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 18-04-2014, 03:57 PM
Parent: #114

Quote: ود المرتضي انا زهجان منك ومن حركاتك دي
تطش سنة وترجع في صمت ووقت الله يفتح عليك وتتجلي تدلق كلام من الماس في جنس كاروشة دا

يشهد الله يا أساسي ما كنت عارف..
صدقني لو ما الصبر تكليف أندريه دا كان نخليهو مزروع في الصريف للخريف زي ما قالت الحَمَريه..
على أية حال تهديدك ليهو أكيد في محله وأنا بعرف إنك زول حقاني وحقك ما بتخليهو..

الغياب جَبُر يا العزيز ، الوكت بقا ممحوق زي الفرح ، والأسبوع حلاوه قطن ، زي الديمقراطيه في السودان تذوب في اللسان قبل ما تفهم حاجه..

Post: #116
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 18-04-2014, 04:46 PM
Parent: #115

Quote: Khalid Haimoura • جامعة القاهرة الفرع
كمتابع من خارج الملعب ومشجع للعبة الحلوة .... هذا البوست ( أجمل لعبة حلوة للعام 2014م الى حين إشعار اخر) ....
متعك الله بالصحة والعافية استاذ محمد المرتضي .... شكرا جميلا للاخ ود الصايم للاستجابة العاجلة وتقيرك للاستاذ
وهو ما سيمنحك مزيدا من المحبة من الجميع ..... النجيضة : ود الصايم طلع رهيف وخفيف

شكرا يا حيموره على كلامك ،
وجودك يذكرنا بالأعزاء علاء وإشراقه وإنعام حيموره ، نتمنى أن نراهم هنا قريبا..
العزيز ودالصايم كما قال قباني ( ما بيخبر زعل) أما رهافة القلب الآبري ( كما قال أبعاج ) فهي سمة الإنسان الإنسان،
كان لابد أن يعود .. لابد أن يعود ( وإن تهامس البعض أنه هناك بجانب التل ينام .. إلخ) ..
ربنا يديهو العافيه الرهيف الحريف..

Post: #117
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 18-04-2014, 05:15 PM
Parent: #116

Quote: Suad Hasabo

بوست عميق جداً وله ابعاد انسانية اتمنى أن يكون الجميع تلمسها واحاط بها ، لم يخيب الأخ محمد العشم لنبله واخلاقه وهذه الدعوة لا تصدر
الا من انسان واعي ويمتلك القدرة على فرز الخبيث من الطيب ، لكما احترامي الأكيد ووجود امثالكم ضروري لهزم القبح الذي استشلرى في هذا المنبر

شكرا يا سعاد،
في أكثر من مناسبة كتبت في هذا المنبر أن العمر لايكفي لأن ننهل من الجميل في هذه الحياة ومن ثم يكون من الجحود بنِعَمِ الإله
أن نبدد لحظة منه في الشناة القولية والفعليه..
مررت في موضع آخر بقول ينسب للراحل ماركيز بعد أن أيقن بدنو أجله :



كلام زول أطربنا أدبه حد الشعور بالجزالة والخدَر فأبى إلا أن يوصينا بأصدق ما يكون وهو يودعنا إلى حيث لا رياء ولا ادعاء..
نسأل الله له الرحمة..

Post: #118
Title: Re: الزوله دي كلاما قاسي يا ودالصايم.. اخر دبرسة
Author: عبدالكريم أحمد الامين
Date: 18-04-2014, 08:39 PM
Parent: #117

** مولانا ود المرتضى ..
** فاكهة الحوش ود الصايم..
** سلام ومساءكما خير..
** من غيركما يُجمل هذا الحوش ويجعله جاذباً بعد أن أضحى طارداً وعزف الكثيرون عن التواجد فى جنباته ,, تحاشياً من صدى ووقع اللغه المتدواله التى تُصيب العين بالرمد وتجعل النفس تتراجع قبل أن تدخل الى بوابة الحوش مرةً أُخرى **
## لكما كُل الحُب والتقدير بقدر ماعطرتم هذا الحوش وماتطولو الغيبه ##
(ودام الود بين الجميع)
(ابو محمد فؤاد) – الماكيكى.

Post: #119
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 19-04-2014, 10:27 AM
Parent: #118

د. عبدالمجيد المقابل حبابك..

الوالد - متعه الله بالعافية - دائما يقول لي يا محمد عندي أمنيه واحده قبل ما ربنا ياخدنا لجواره وهي أن تكون لي جوله كردفانية
يمر فيها على بلداتها وقراها سيما جبال النوبه ثم دارفور ليجرد فيها مخازن الذكريات، وهو يصر أن تكون كما كانت في الزمن الأخضر ،
بالقطار وبَف نَفَسو ومرور بسنار وربك وكوستي وأم كويكه وسليمه والوساع وتندلتي والغبشه وودعشانا إلى نهاية الخط
باتجاه الرهد والأبيض مع ترديد ( يازمان هل من عوده هل) ، أها محطة (ربك) أصبح فيها متكأ مغريا حكى لي عنه
الأصحاب ، ودالقرشي قالوا لي الماشي والغاشي لازم ياخد (سنده ) عند المقابل عشان يعرف كيف يحوز السمك المقلي شهادة الإيزو ،
غايتو خريف كردفان الجاي دا كان الله هون يانا المِتلَهِمِنَك زي ما بيقول صاحبك شيقوق قدس الله أسراره..

مودتي يا مجيد ..

Post: #120
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 19-04-2014, 04:03 PM
Parent: #119

Quote: لزهاء عام او اكثر وانا افكر بترك سودانيزاونلاين لغير رجعة و في ظني انه قد مات و شبع موتاً.. وربما ان هنالك من فكروا مثلي.....
لكنه هاهو ينهض من جديد من الرماد ....شكرا لكل من خط حرفا هنا.
وزي ما قال ود الصايم خلونا نتش الضلام بالضو...(التقول حقتك هههههه )

قرأت رسالة الاستاذ محمد المرضى حامد وكأنها للجميع داخل و خارج المنبر به او بغيره فله التحية

----------
بس لو المنبر يستمر كدا

نازك الطيب ..
ألفين سلام..
كتاباتي - دون تواضع - أقل من أن تعيد للمنبر ألقه وهي بالطبع تقصر عن بلوغ ما نريد أن
يكون عليه هذا المكان الحميم ، لكن أرجو ألا أكن كمن ينادي بواد و (أن الخوارق ليست تعاد)..
ثمة أقلام لو عاد بعضها لتلاصفت أنوار هذا المنبر على صفحات النيل..
لك مودتي واحترامي.

Post: #122
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 19-04-2014, 05:00 PM
Parent: #120

Quote: يمين البوست دا داير ليه حجر كاااارب ..
نفس نفسين من هذه النفوس الطيبة الشفيفة ..
نفوس خصها الله بحسن المعشر وقيمة الأصل ..
شكراً محمد المرتضى حامد لجمال حروفك ونقاء دواخلك ..
شكراً ودالصائم لإستجابتك لهذه الدعوة الكريمة وأنت كريم وجميل ..
شكراً للجميع فهذا إستفتاء لمحبة هؤلاء الأخوين وشكراً لكم لأنك حاضرين وأهل خير ..

دتم بخير ..


شكرا حبيبنا المعتصم..
بمناسبة (الحجر الكارب) عندي صورة لصاحبك دا مع صاحبو داك مع (حجر كارب) أعتى أخصائي أشعه ما يفرزم
من هول الدخاخين والخراطيش ، صورة كفيلة بشرح معنى العهن المنفوش..
أنا ما عارف ناس الدفاع المدني كانوا وين في ذلك اليوم..

Post: #123
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 19-04-2014, 05:13 PM
Parent: #122

Quote: ود الصائم يعلم الله نحبك في الله...
ابقي عشرة علي الشيشة ورمضان قرب....والمترصدين كثار

أهو زي كلامك دا يا حافظ يخلي زولك مع النسيم العليل يقيف في نص البحر ويقول لبكري كتَّحتنا....

Post: #126
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 19-04-2014, 05:32 PM
Parent: #123

Quote: رجعت سودانيزاونلاين الى سابق عهدها

شكرا محمد المرتضى

ولك التحية عزيزي ود الصائم

أحمد القرشي ..
زي بوستاتك الماراثونية وأمثالها هي التي تجعل هذا المكان أكثر جاذبية وتدعم مغناطيسيته..
واحد من المبدعين سألته: ياخ ليه وقفت من الكتابه؟ قال لي: يا محمد هسه لو جيت داخل النادي
ولم تجد زملاء الويست البيفهموها طايره و (يقصوا بتسعه) وزملاء الهارت البيوزنوا الطربيزه بتلعب؟
هذا لايعني أن المتواجدين ما شفوت لكن يبدو لي أن هناك درجة من الحذر في ملاعبة من لاتعرف من الناس..
يعني ممكن تلعب باص لواحد وتفتح خانه ويلف ويلعبا في اتجاه ما أنزل الله به من سلطان يعمل ليك ديسك.
عارفك مشغول لكن لنا عليك حق ..
وين الفلاش اللي أداك ليهو ودباره؟
عساه ما لحق دوبيت ود ام سياله!!

Post: #124
Title: Re: الزوله دي كلاما قاسي يا ودالصايم.. اخر دبرسة
Author: محمد البشرى الخضر
Date: 19-04-2014, 05:21 PM
Parent: #122

Quote: أدام الله الود
آميييين يا مولانا .. آمين
من حسنات هذا المكان - التي تخفف من الأذى الذي نالنا منه - هي جمعنا بكرام و أحباب مثلكم يا مولانا
الواحد يسعد ويتشرف بمعرفتهم و كثيرين آخرين نتمنى ربنا يجمعنا بهم

طبعا جهجة باكات ثقافتي :) بقصة ميدوزا دي, حتى حسمت الأمر بقوقلتها طلت ياها زاتها الفي بالي أم شعيرات و عين (تفلق) الحجر :)
بقى السؤال الضمير في "لكأنه" عائد لمن كان للشاب الوجيه ما جاية وكان لمنظرك بسبب وعثاء سفرك فا .. بطّل تواضع يا مولانا :)

الإتفاقية زي ما قلت ليك بالأحرف الأولى حتى يبلغ أصحاب الشأن أشدهما و الباقي على حنكهما بقى :)

Post: #130
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 20-04-2014, 08:19 AM
Parent: #124

Quote: اااه بوست كالعسين المفرهد بنسام الشتاء في ارض انقطع عنها مطر العواء والسماك

لا والله..
فهمنا وعرفنا وانشرح بالنا ( بالأوردو)..
يا شيقوق.. ألف مره قلت ليك اكتب لينا بالعربي أو الإنجليزي لأنو المنبر دا فيهو ناس شهاده عربيه..
فيهو ناس الشهاده زاتا من الشمال لليمين، ناس ال GCSE وسستر سكول وسانت ميري وسان جيمس وسان سواها كما قال عبدالله الطيب..
إنت من زمن المدارس المجلسيه والريفيه يا العشا..
الله يرحم أيام ال KG بتاعتكم الفي البردانه..
-
بالمناسبه ، بير البترول القالوا ناس اللنغاز إنها لصق بيتكم في الدندر حصل فيها شنو؟
أوعى يكون ( مزيج البردانه) وعقالك والشماغ راحوا شمار في مرقه زي إطلاق الحريات..

Post: #125
Title: Re: الزوله دي كلاما قاسي يا ودالصايم.. اخر دبرسة
Author: عبدالعزيز عثمان
Date: 19-04-2014, 05:21 PM
Parent: #122

ياسلااااام..
بالله شوف الناس ديل سمحين كيفن...
ذي ناس زماااان...
يمين لا زال الشعب بخير...

Post: #127
Title: Re: الزوله دي كلاما قاسي يا ودالصايم.. اخر دبرسة
Author: MOHAMMED ELSHEIKH
Date: 19-04-2014, 06:56 PM
Parent: #125

Quote: وكانت ليلة لاتنسى جرى على إثرها توقيع مذكرة تفاهم على هامش قمة دكين تلك أن (يحجز ) لينا كريمته آيه وتبقى الصداقه قرابه ونكسب الودين والدراهم
رغم مناوشات المهندس محمد الشيخ نواحي أبها.

اولا نأمل ان يكون الجميع بخير وصحة جيدة لاينقصنا شيء الا سوى عدم نقرالت كيبورداتكم الحانية

اوكي يا استاذنا محمد المرضى
ياخ عاوز تستغل غيابي الإجباري من البورد وتلخص لي هذا الكم الهائل من الوجد والود في مكالمة هاتفية مدتها خمس دقائق مما يعدون؟

لا لا انا مابتغش
انا قريتو حرف حرف ونقطة نقطة حتى لاحظت ام يوسف على وجهي ازدياد مؤشر حالتي الثقافية والعاطفية بصورة لاتخطئها البصيرة!
التحية لكل من مر من هنا وبي هنا وهناك
ولنا عودة

ود الشيخ/ ابو العريس
نواحي ابها

Post: #128
Title: Re: الزوله دي كلاما قاسي يا ودالصايم.. اخر دبرسة
Author: ABUHUSSEIN
Date: 20-04-2014, 06:10 AM
Parent: #127

Quote: Ummoayad Moayad · الأكثر تعليقا
الحالة انا لسه ما وافقت الغاغا في شنو يابو حسين .ههههههههه ( عليك الله كبشر لي وانتظرني في الباب ) .
رد · أعجبني · متابعة المنشور · ‏18 أبريل‏، الساعة ‏08:30 صباحاً‏


يا أم مؤيد صاحب البوست نزل أغنية فوق بتقول :-

قام إتعزز الليمون ....

دي أسمعيها مرتين في اليوم
واحدة على الريق
و التانية قبل العشاء بي ساعة

قلتي لي لسه ما وافقتي ....
يعني إحتمال ما توافقي ...؟؟؟؟؟

Post: #129
Title: Re: الزوله دي كلاما قاسي يا ودالصايم.. اخر دبرسة
Author: khaleel
Date: 20-04-2014, 06:27 AM
Parent: #128

انت يا ليمون ويا الخدرتك ليمون كل العيون حباك


بس انت حبيت مين وريدتنا ما شاغلاك


صباحكم ليمون يا حلوين




Post: #131
Title: Re: الزوله دي كلاما قاسي يا ودالصايم.. اخر دبرسة
Author: محمد عبد الماجد الصايم
Date: 20-04-2014, 11:03 AM
Parent: #129


Post: #132
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 20-04-2014, 12:55 PM
Parent: #125

Quote: شكرا للحبيب ود الصايم
نورت الديار وانت تنثر اجمل
البسمات في قلوبنا
ومنك نتعلم ونستمد الوقفه
الصلبة في كل المواقف

عزيزنا أسعد..
عساك سعيد ومرتاح..
عبارة ( الوقفة الصلبة في كل المواقف) دي ذكرتني أيام الجامعة، كانت الدعاية الانتخابية لمنسوبي
ما سمي بالإتجاه الإسلامي وقتها تقول ( أصلب العناصر لأسوأ المواقف - زي مواقف المواصلات العامه في السودان - أو شئ من هذا القبيل)
طبعا كانوا بيقولوا على مرشحيهم ( رجال يتغرغرون بماء النار والسلفيوريك أسيد ويستاكون بالرصاص) ، صديقي الراحل بشير الخواض قال ديل
طلبه ومارينز.. طبعا كلام الدعايات الزمان داك طلع كلو مثنى وثلاث وسندس واستبرق..
لكن حاشاه ودالصايم وحاشاك..
ياخ أيام الجامعه كانت ظريفه خلاس...
شعارات وفلس وتنظير ورومانس..

يا حليلا.

Post: #133
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 20-04-2014, 03:32 PM
Parent: #132

Quote: الله يسألك ما لقيت إلا الشين دا عشان تكتب فيه الكلام دا
ياخ أحلام مستغانمي لو عارفاك بتجيب الكلام دا لي الزول الشين دا كان قضت عمرها كلو تلعب صفرجت
أها نحن نمشي وين بعد كدا ....؟؟؟
قبل بوستك دا الزول دا ما مريحنا...


ههه..
صدقت يا أبا حسين ..

مبالغه..
سبحان الذي سمك السماء بلا عمد..
بس هسه في فمي ماء.. والله يا الحبيب ودالصايم نظر في طلبنا وجبر خاطرنا وقطع غيبتو
فتغاضينا عن مسألة الشنا دي وما بنقدر نقول فيهو غير القالو الصادق ود آمنه :
رفع أبصارو حتى النظرة لي خصَّاها
فرَّ فاطرو تمرة فؤادي كَع قصَّاها
(حردتو) قدر ما يطول أوان أقول أنساها
مجلوخه تقابِض في البدن داساها
هيييع..
لكن خلي الخريف دا يعدي وألاقيهو حايم في شوارع المنبر بالليل..

Post: #134
Title: Re: الزوله دي كلاما قاسي يا ودالصايم.. اخر دبرسة
Author: طارق جبريل
Date: 20-04-2014, 05:00 PM
Parent: #133

هنا في جمكسين ولا مافي
ولا نمشي ناكل باسطة

Post: #135
Title: Re: الزوله دي كلاما قاسي يا ودالصايم.. اخر دبرسة
Author: عمر علي حسن
Date: 20-04-2014, 06:34 PM
Parent: #134

Quote:
** مولانا ود المرتضى ..
** فاكهة الحوش ود الصايم..


بس .

وان شاء الله تاني ما يتعزز الليمون .. عشان عارفنا بنريدو

عمر علي حسن

Post: #136
Title: Re: الزوله دي كلاما قاسي يا ودالصايم.. اخر دبرسة
Author: محمد عبد الماجد الصايم
Date: 21-04-2014, 07:18 AM
Parent: #135

أووووو حبيب الكل ..
سعادتو عمر .. حبابكـ مليون ..
في حضرة جلالكـ يطيب الجلوس ..

Post: #137
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 21-04-2014, 01:25 PM
Parent: #136

Quote: Mohammed Ahmed · جامعة جوبا كلية الطب

يا مولانا : بتكون بتعرف مامون عباس رحمة اللْه عليه .. كان ترزي أفرنجي محلو جنب الأوكروبول .. تجيب ليهو كتالوج باريسي و تورِّيهو بدلة يعمل ليك زيَّها
بهدوء عجيب يبدا يشرح ليك إنّو البدلة الإنت اخترتها ما مناسبة معاك لأسباب تتعلق بلونك، طولك … و حتى مقاس قدمك ! تصدِّق !
يقوم يعمل نفس الديزاين العجبك و يضع شيئاَ من حبِّه للتطريز !! تدْي ربّك العجَب واللّه
أها الرسالة بتاعة ماركيز دي منتحَلة .. انتشرت في نهاية التسعينات و نفاها ماركيز.
إلّا الكتبا نجيض نجاضة مامون عباس .. اللّه يرحمو

إنت ذاتك خطير في التشبيه يا محمد،
يعني مامون عباس دا لو قالوا ليهو الكلام المنسوب لماركيز دا قول لينا فيهو قول سيشير إليك..
مأمون عباس دا لناس الخرطوم يا ابوحميد ، ناس أمدر كان زولم الشيخ أحمد الشيخ ، بذات
وصفك الدقيق ، لو زاره زول قال ليهو عايز وعايز ، يعني النوع اللي عايز الترزي يغيروا
من ودحامد لألان ديلون بجاكيت ، حايقول ليهو روق يا شيقوق، إنت ما يناسبك كذا وكذا
عشان ما تكون الحاجه شترا فيك وتقول عملا فيني الشيخ.. ديل ناس كان عندهم أصول للمهنة.

عودة لماركيز لو لحظت أنني كتبت ( مررت في موضع آخر بقول ينسب للراحل ماركيز)
ولم أقل أن ماركيز قال ذلك كاحتياط للخطأ ، وبالطبع إفادتك حسمت أمر تلك المقولة لكن من كتبها لايقل
في مقامه عن مأمون ، بالله جابا قميص عامر.. تشبه ماركيز نصا ورحا..
شكرا يا عزيز.

Post: #138
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 21-04-2014, 05:49 PM
Parent: #137

Quote: مولانا محمد المرتضي غيابك والكثيرين من أمثالك هو ما جعل بقعة القبح تكبر فى هذا المكان .

وجودكم مهم بيننا لتزيد مساحة الحب والجمال .

تحياتى لك ولود الصائم

عزيزنا ودالطائف..
هذا لطف منك وكرم ، صدقني لا أرى في هذه الكتابة ما يؤهلها لمراقي الجمال لكن (الحب) دا يا بركه ما عندنا فيهو تسويات ولايخضع لمضاربه ، نتطرف
فيهو ونجاهر بيهو، تلقانا مع هاشم صديق واقفين وسط البلد شايلين الهتاف إياه..
الغياب عن المنبر تفرضه ضرورات العمل والسفر والشقا اللاينتهي.. رغم ذلك أراني متواجد بكثرة ، ففي هذا الربع وحده كان لي بوست عن الراحل مبارك حسن
بركات وآخر عن الراحل محجوب شريف وهذا عن الراسخ ودالصايم أمد الله في أيامه عشان يساهر بينا..
مودتي يا بدر..

Post: #139
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 21-04-2014, 07:40 PM
Parent: #138

Quote: تحياتي يا مولانا ما قادر ادخل البورد

بوستك دا ذكرني الزول القالوا ليهو السعودية انتهت ما تجي، أصر إنو يجي ولقى البيبسي الحجم العائلي يا دوب ظاهر مسك
قزازة كاملة بنفس واحد لحدي ما كملها ودق الفاضي بالتربيزة وقال ليهم تقولوا لي السعودية إنتهت؟ هسة أن بدق الكيبورد
وبقول ليكم تقولي لي البورد إنتهى؟ كتابة تجنن وتحنن تحياتي للجميع


ههه
كنت أعتقد أنك ستكمل النكته على طريقة صاحب الكشك المصري يا حمد الغائب ، لكنك أشَّرت شمال ولفيت يمين ورميتني من التَندَه..
حبابك ود عبدالغفار..
إنت قايل ود الصايم براهو؟ القائمة طوييييله يا حمد، فيها 1000 تقول قائمة شيندلر.. هسه من الناس البفتش ليهم أخ إسمه عادل البدوي ،
بيعمل العايزو بالكلمات، يمين لامن تزغرد، هناك أديبات وشاعرات يقمن بألعاب بهلوانية مفرحة لم نعد نراهن وقد شغلتهن الحياة العادية
واجتذبهن ثقب أسود يترصد معظم المثقفات في بلادنا، ثمة آخرين تخصصوا بعروض الألعاب النارية التي كانت تضيئ سماء المنبر لم
نعد نراهم فانحسرت الكرنفالات ومهرجانات البشاشة..
هنالك عامل آخر هو اعتقاد الكثيرين أن المنبر خصص للكتابة في السياسة بمعناها العريض وهذا الإعتقاد المغلوط دفع الكثيرين ممن أثروا
هذا المكان بالفنون والآداب إلى المغادرة مفسحين المجال للمتعاركين فما أن تدخل المنبر وتعمل كليك حتى تنبجس ألف عين فلا تعرف أين مشربك..
كن وجود هذا التناقض ضروري ومطلوب ، الكتاتيح والنسيم والمطر والهبوب والبرد والحر كلها في خلايانا فهل (نأبق من ملك ربنا
فنخرج من ) صيف لنا وشتاء؟ طبعا كو.. بس باحترام..

Post: #140
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 21-04-2014, 09:19 PM
Parent: #139

يا الشامي..




هذه دنياي ..
مالي في الأسى ضاعت سنيني

فإذا مت اذكريني..

رحم الله مصطفى والعطبراوي ورحمنا..

Post: #141
Title: Re: الزوله دي كلاما قاسي يا ودالصايم.. اخر دبرسة
Author: ABUHUSSEIN
Date: 22-04-2014, 06:06 AM
Parent: #140


Up

Post: #142
Title: Re: الزوله دي كلاما قاسي يا ودالصايم.. اخر دبرسة
Author: محمد عبد الماجد الصايم
Date: 22-04-2014, 08:22 AM
Parent: #141

النجيضة يا المرتضى ..
عارفكـ شايل البوست براكـ .. لكن شيلتكـ سمحة والله ..
أنا ذاتي مستمع مع الناس ديل ..

أبقى مارق ^_^

Post: #143
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 22-04-2014, 10:51 AM
Parent: #142

عزيزنا علي الفكي..
السلام يا روح البدن..
كما سبق وذكرت أعلاه أنني لست بكاتب راتب ولست ممن يقدرون على الكتابة الماتعة ولا أحسب نفسي في زمرة أهل
المفردة المغنسيوم أو المقال الروضة بل مجرد قارئ أحرض المحترفين من أصحاب الحناجر الماسية على التغريد
في جنبات الخميلة هذه في زمن التحاريق المريب..
إنت مش حاسس إنو الإحتباس الحراري وشغل النينو وصلت آثاره المنبر فتكاثرت البراكين وانداحت اللافا والرماد.. أها يا بركة ،
زي ما شايف قاعدين ننادي ونناجي الشايلين اسطوانات الأكسجين وحايمين بيها بره نستنجد قبل أن نلاقي حتفنا الإسفيري بإسفكسيا البُعاد والهجر..
دعواتك معانا عسى يعود الأحباب الأفذاذ بحروف راقصة تعلم (الغصن الرتالا)..

Post: #144
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 22-04-2014, 01:30 PM
Parent: #143

Quote: Abdalaziz Hussain

http://www.youtube.com/watch?v=J9ounfgyI1o[/QUOTE]

عزيزنا عبالعزيز حسين
مش بيكتبوا في المطارات Unattended Items will be confiscated
عليه قمنا بمصادرة الرابط الجدعتو لينا تحت دا..


ياخ شئ جميل ويستحق بوست لوحده
سبق وعرضت للموريتانيين في بوست ( المعلومة بنت الميداح) ولم أبتعد كثيرا في بوست ( بنات أودادن) ..
المغرب العربي لنا معه وشائج حميمة ، وسنطلق عما قريب دعوة للوحدة مع أهلنا الموريتانيين تحديدا..
سبق أن التقيت برجل أعمال موريتاني في مطار الكويت وكان متجها لباريس فأدهشني بحبه للسودان ومعرفته
بتفاصيل حياتنا وتاريخنا ..
شوف الزوله القيافه لما تفتخر وتقول لسانها سوداني..



عرفت سبب ريدتنا ليهم؟

Post: #145
Title: Re: الزوله دي كلاما قاسي يا ودالصايم.. اخر دبرسة
Author: عبيد الطيب
Date: 23-04-2014, 07:22 AM
Parent: #144

Quote: دعواتك معانا عسى يعود الأحباب الأفذاذ بحروف راقصة تعلم (الغصن الرتالا)..


الرتالا الرتالا......
دي يا ود المرتضي جاتني مرة من الأخ بلّة البكري لشاعر بدوي مجهول.......

كان قَدَلَت معاهن منهن تتلي
وكان مشت معاهن منهن رَتلا
البنوت بلا أم خُلبةً تَندي
يَبقَن لي فَطِير عيشاً عَفِن بي ماْء
وكان مشت معاهن منهن رَتلا

محبتي

Post: #146
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 23-04-2014, 12:20 PM
Parent: #145

Quote: وإليكم مقتطف من ما كتبه الشاعر حنفي حاج الطيب
في حالة مُشابهة ، فصبر لأنه تذكَر أصدقاءه ورفاقه من أمثالكم
من الجميلين والسمحين فكانوا العزاء
أصدقاءه ناس أحمد وأحمد السَّمحين....
سلااااام ومعزة لود القرشي ولأبوي الطيب

"عما قريب يا زين أكتُب في كراسَك
ناس احمد السَّمحين حايكُونو جُلاسَك
والسكَّة بِتْودِّي
يبقي الخبر في كان همَّاً رِكِب راسَك
تزهر شتول ريحان تَمْلابَا انفاسَك
ضاحِك مع الخلاَّن المُبدعين ناسَك
شايِف الجِزِو المليان ما الفاضي من كاسَك
كاس الهنا الوَرْدِي
املاهو عبّي وكُبْ ما تخلِّي عنَّابه
وزّع كبابي الشُب لي البرضي واليابا
ومن المباهج عُب حال السرور يابا
وقول لي المهازل تُب واكتبلها كتابه
قول ليها هاك رَدّي
صابر في بطن الجُب راجيلي جَلاَّبا
سِبت المياه الرُّب يصطادو طُلابا
مالي المساحات حُب في الصحراء والغابه
وهُب هيلا هيلا وهب بشرانا بي سحابه
يازهرة بتْنَدِّي

دعونا نملأ كل السهول والتلال والقفار والعتامير جمالا ومحبة
الدنيا أُم قدود حسب الله قال" "ما بتستاهل ترقد منها يوم واحد وانت مغبون"
محبتي للجميع

البصير عبيد الطيب أبكلاما سمح..
مرحبتين حبابك وزي ما قال النعام آدم (البوست) السعيد الليله جابك ..
أي تعليق أو زيادة على كلمات حنفي حاج الطيب مع ناس أحمد السمحين دي بتخرب الشغل المزركش حتى لو كان التعليق بنضما سمح ..
وعشان أعمل نفسي ما بعلق على كلام حنفي أقول الصحبه و (الرِفقة) شئ لايمكن التعبير عنه ، هذا حديث يتطلب (بوست) براهو يا عبيد ،
الأصحاب الحكَّايين النسور الذين تحلِّق في حضرتهم لارتفاعات تعلو وتنخفض .. الذين يشعروك أنك محور حياتهم وهم محور حياتك لامن
تجيهم بانبساط وتذوب فيهم وتتماهى مجالاتكم غير المنظوره في بعضها على طريقة أحبك وانسى فيك ذاتي ، أولئك الذين يصدق في حقهم
معنى ( صاحبي المتمم كيفي) ، الزمرة القادمة من مجرات أخرى ، ديل ونستهم لا علاقة لها بالزمان والمكان وقصص الأرض ، زمرة تذكرك
بأغنية Eagle في جزئية:
They came flyin' from far away, now I'm under their spell
I love hearing the stories that they tell
شئ يتراوح بين الحقيقة والخيال وهو للأخير أقرب..
قلت ليك الرِفقه الرِفقه يا عبيد..
الرفقه لامن تروح مافي روح..

بجيك صاد كان العمر فيهو باقي ..

Post: #147
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 24-04-2014, 09:27 AM
Parent: #146

Quote: انت جيت يا رمضان ؟ انت مالك خفيف كدة يا رمضان ؟

والله انا لو منك يا رمضان ما اجي كلو كلو
و اخلي محمد المرتضى دة يكتب و يكتب و يهاتي بيك
كدة و انت برضو ما تجي و نحن نخش نقرا و انت تقرا
هو يكنب و نحن نقرا و انت ما تجي .


أهو زي ما شايف يا محمد ، جابت ليها ( مهاتا) ،
والله يا دواش ( الصايم) حقيقة جا مع (رمضان) وما قصَّر وهسه أنا بفتش للرائعة الحكَّامه فاطمة الباتيل تديهو غنيتين تلاته ويعرض فيها شيقوق
مع صقريه كاربه كان الله هوَّن ، كل ذلك تثبيتا لموقفه المشرف وخلق بيداء دونه ودون الزعل والحرد مستقبلا (مع احترامنا للموقف) ،
زي ما قلت فوق يا وليد ، في ناس بالنسبه للبورد أصبحوا كبعض العلامات التجارية المعروفة ولايمكن إنتقالها بالتسجيل لجهة تدعي امتلاكها
زي البيبسي والمرسيدس وغيرهما، عليه فإن ودالصايم وآخرين ماعندهم خيار غير يعودوا ، وكمان أزيدك من الشعر خصله
إنو وزنة الطربيزه تتطلب عودة ناس آخرين سيأتي أوانهم ، ممكن هسه نقول أنهم في استراحة محارب ..
( بس ما زي بتاعت وزير الدفاع بالنظر)..





Post: #148
Title: Re: الزوله دي كلاما قاسي يا ودالصايم.. اخر دبرسة
Author: محمد عبد الماجد الصايم
Date: 24-04-2014, 10:51 AM
Parent: #147

فعلا .. الجمهور مبسوط وبقول هنياً

Post: #149
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 24-04-2014, 01:32 PM
Parent: #148

Quote: بالجد يا جماعه البوست ده عامل زي بوكيه الورد البتشيلو العروس في اجمل ليالي عمرها ... جمع كل الجمال وجميلي الدواحل في فجه واحده ....

شكرا يا إدريس على الوصف وياعزيزي ( سقتك القوافي صفوها السلسل العذبا) ومناي أن يفرش دربك بالورود والأزهار ما حييت....
هناك من السمحين من آثر المشاهدة والإطلاع من حزب الشامخ أحمد الجابري ونحن فرحانين بسماع أصواتهم
عبر الهاتف بسبب هذا البوست ونحن قاعدين ندندن في الزهور بسمت لينا لكن أعدك بعودتهم ليقدموا أعمالا يعتزل
بعدها كريس أنجل عروضه وهاروت يخُت الخمسه في اللتنين ..

Post: #150
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 24-04-2014, 10:04 PM
Parent: #149

Quote: أمانتاً في ضمتكـ ..
يا ود الصايم ..
هو العارفينو الناس التحت شيتاً ساهل ..
عموماً ..
إنت تستاهل الزفة الكاربة دي ..
وأريتو حالنا يايمه ..
والاداركـ بالكوريكـ يأخ ..
يدينا بالقطاره ..

ــــــــــــــــــــــــــــــــــــــــــــــــــــــــــــــــــ

نثرتم هاهنا جمالا يخلب الألباب ..
وحرفاً تتقاطر أمامه عبارات الاعجاب ..
وتتقاصر لديه كلمات الثناء والاطناب ..
حقاً ..
فليتوارى القبح ..
فلا مكان له في معية كل هذا الجمال ...


بالفعل يا جمال ، الناس التحت عارفين عمايل اليانكي..
ودالصايم ( أحيانا) بقول حكم وإشارته لناس الفيس بكلام القدال في هذا الإتجاه في محلها..عسى ما نكون نحن اليانكي..
بلا مجاملة وتواضع زيوف أقول أن كل الأضداد هنا يمكنهم أن يبدعوا فيما لو تبنوا الجدل الموضوعي فنفيد نحن
في مقاعد المتفرجين ويفيد أطراف الحوار بمعرفة ما جهلوا لدى بعضهم..
القبح يتأتى فقط عندما نصنف من يخالفنا الرأي في خانة العدو الصريح ومن هنا تنكشح الشنا في وجوهنا.
من أكثر الأقوال المناسبة التي مررت بها مؤخرا ( عندما تنمو الأظفار نقوم بقصها هي وليس أصابعنا وعندما تكثر
المشاكل يجب علينا قطعها وليس علاقاتنا)..

Post: #151
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 11:23 AM
Parent: #150

o
Quote: Yousif Bashari • الأكثر تعليقا • Stratford Career Institute
يامولانا ودالمرتضى خلاص (أسكت ) لاأسكت الله لك حسا .. كلام وكأنه وحى ( جن ) من وادى عبقر .. عذبتنا ياخ !
رد • أعجبني

• منذ ‏7‏ ساعات
كنا صبية بمدرسة أمدرمان الأهلية السودانية الثانوية الحميمة العامة المجيدة الإشتراكية الجماهيرية العظمى وخميرة النوستالجيا في قلبي
التي جمعتني بأفذاذ يردوا الروح وكمثال لذلك ، وفي فصلي تحديدا ، كان معي من (أبناء) هذا المنبر طراوه وكوستاوي وحسن أحمد الحسن
وعضو موسمي صامت د. محمد الفاتح إبراهيم.. أمدرمان الأهليه دي قطع شك كان فيها غابريل ماركيز والدفعه القبالو السمحة الكتَّابه
إيزابيلا الليندي ( إيزابيلا دي في مخيلتي زي بت بتي تجبر الخاطر بحركة عكسية خاطفة لمفاصل الكلمات )، ودرس فيها جورج أمادو
الذي أبدع (غابرييلا قرفة وقرنفل) ، غابرييلا تلك الخلاسية القادمة من مزارع الكاكاو في باهيا ، الكاكاو الذي انعكس على بشرتها
مع لون أمها (البرتغالية الحليب ) وكوَّنا تحالفا يقول للناتو أمرق خليك في الكنب احتياطي وأنا ألعب مطرحك.. النظرة إلى جسد بحسناء
بذلك اللون نتيجته لاتقل عن لدغة المامبا وهذا ما جعل (نسيب) العربي يتفصد عرقا فقط لمرور صدرها بمخيلته ،
أستغفر الله ، هسه أنا سرحت وين .
خرجنا بعد نهاية اليوم الدراسي إلى محطة مكي ، ( مكي باي نايت) بص الشركه ال FIAT المخطط بالأبيض والأزرق الذي كان يتوقف
لكسر من الثانية عند صينية مكي مغادرا شارع أبروف والمزالق متجها نحو اليسار حيث الركابية وعمر شعيريه، يا سلام على يسار تلك
الأيام قبل أن يُلهنا التكاثر، كنا (شليقين) وبسرعة الككو نقفز إلى سلم الباب الخلفي ، قفزت أنا ويوسف باشري وقفز خالد إلى سلم الباب
الأمامي وبعد ثوان – والبص متحركا- سمعنا صراخا ينفطر له فؤاد الفوهرر ، توقف بعدها البص، قفزت ويوسف إلى الشارع مرة أخرى ،
كان هناك طالبا بزيه الكاكي وشورت الإستاكبورد ملقى على الأسفلت واقتربنا منه وجلين أنا ويوسف باشري.. كان الرأس قد مسح مع الأسفلت
وكان (الأبونيه) الأخضر ملقى جواره ، رفعه يوسف بحركة تشبه الزومبي ، وفتحه وتطلعت فيه بخوف ممزوج بالصدمة والكهرباء والغيبوبة..
كانت عليه صورة خالد.. لاأعرف من أوصلني إلى البيت حتى الآن وغبت بسبب الحمى لثلاثة أيام عن الأهلية الحزينة المتحدة المكلومة
الأمدرمانية الجامعة الثكلى..
لاشك أن عائلة باشري ممتدة وربما فيها مائة يوسف وبنيامين وسيرة أسباط.. فهل أنت أنت معي كما قال أبو داؤود؟

Post: #152
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 03:16 PM
Parent: #151

Quote: Faisal Hamza · Dammam, Saudi Arabia

سعادة المستشار .. بعد السلام بشهادة كيبوردك كتبت ( أتحاشى قراءة أي حاجه يأتي بها " ------ " لأنها ستصل إلى نهاية
وبعدها ما تعرف تسوي شنو، ) الزول ده جاهلينو مالكم وصلنا حد الادمان في قراءة ما يكتبه و انقطع الامداد (عندئذ ) صارت
مكتبته ظلنا الظليل الذى نلجأ اليه عند الحاجة . فبالله كشكشو لينا حتى يخرج من قوقعته فنحن له مشتاقون .

نعم يا فيصل،
كتب دكين أثناء زيارته لبلاد اليانكي وهو يحكي عن ناطحة عجاج ( تشوف العمارة تحترم ابو السقالة الوصلت لحدي هناك ذاتو) وعلقت
في ذلك البوست قائلا (أتحاشى قراءة أي حاجه يأتي بها دكين لأنها ستصل إلى نهاية وبعدها ما تعرف تسوي شنو،
أضف إلى ذلك معاناتي رهاب الأماكن العالية،
عزيز ، كم مره قلت ليك لامن تكون ماشي مع زول يدا بيد قل له أنك على وشك الإقلاع عشان ما تقص ضهرو..
هسه دا شنو دا..
لاتتوقف في برودواي نيويورك أو منطقة الإسثماثونيان في دي سي وخليك مع الكاشف أكتب لي عن كل شي.)
ومرة أخرى أقول أن دكين غير مرغوب فيه هنا ، يعني بالواضح persona non grata وهو عارف وأنا عارف والله عارف،
..

Post: #153
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 03:34 PM
Parent: #152

Quote: حاجة زي ما تكون محلق في العواصف فجأة تهبط في السكون ،،
شكراً يا أحباب على الحب المبثوث كالفراشات والخير المدلوق كشربات الفرح في هذه الكتابات اليانعة
و هذا المنتوج الإنساني الصرف الممزوج بسوداناوية فريدة .
شكراً محمد المرتضي ومحمد الصايم وكل من مر هنا ونفس من رحيق نفسه أكسجين سوداني صرف
يعيد للنفس بعض من شتاتها ويزكي شوارع الروح بعطر الصدق والمحبة وسوالف الزمن الراح .
كلمات ليست كالكلمات تعيد ترتيب الفوضى في الدواخل الشاربة من لون الشفق وحزن المغيب
والبكاء المر على وطن وحب وقضية . وتربت على أسى نتنفسه يومياً في غربة شوهت معالم الطريق وملامح المستقبل
وأحلام الصغار .
شكر كثيف وعميق ومزيد من الكتابة والجمال ،،،،،،،

عمر مصطفى مضوي

لو كنت بكتب كلام زي كلامك دا ما كنت غبت عن المنبر.
ولأنو الشغل دا عاجبني بالحيل قلت عمر لو عنده سماعات غير مزوره أرسل ليهو الغنيه دي عشان يستمتع
بثقافات الشرق الساحر المسحور ، من التبت والشام والهند والشافعه عازفة البيز جيتار ،
عالم يجن من الخمج.



ناس أبروف سمع وشوف
لكن بدون سماعات أنساها تماما

Post: #154
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 04:48 PM
Parent: #153

Quote: بس بالله أبعد لي من كاروشة و أشباه كاروشة عشان بتبوظ علينا السوق ..
غايتو كان لقيت طريقة برجع ليك تاني عشان أغلغلك شوية
عسى و لعل أسترد ما سلبته مني في موضوع الـCar Wash


بمناسبة كاروشه دي يا (أبوحسين )، كنت أتدرب في المحكمة الجزئية أمدرمان مع الرجل المهذب مولانا محمد احمد عبدالله سعد ،
قدم المتحري ملف بلاغ حيازة بنقو وجئ بالمتهم وقدم الشرطي عدة لفافات على ورق أكياس أسمنت صغيره كل منها بحجم البصلة الصغيرة
( قاوورما ساااي) وضعها على الطاولة أمام القاضي،
أفاد المتحري بأن تلك المعروضات كانت بحيازة المتهم عند القبض عليه متلبسا.. سأله مولانا محمد أحمد: دي قبضوها معاك؟
تقدم المتهم قليلا نحونا وكان بساق واحدة ويستخدم عصا للسير؟ أمسك بإحدى اللفافات بحنان وبدأ بفتحها الواحدة تلو الأخرى ثم اشتمها
بموده وإلفة ورد على المحكمة بزعل بدّل أساريره قائلا ما معناه أن تلك اللفافات فيها بنقو مضروب من نوعية (تعبانه) وربما
خُلِط بنشارة خشب وهو لاينزل لهذا المستوى..
لا ضرورة لسرد الباقي لكن عندما سأله مولانا : عندك شاهد أخلاق؟ أجاب: كاروشه.
بسؤاله عن (كاروشة) ذلك أجاب بأنه فلان الفلاني والذي أعلن لجلسة أخرى كانت قطعة فنية لحالها..
هسه كاروشه الصايم دا نجيبو شاهد محكمة في موضوع الكارووش؟

وتفريعا على هذه القصة المسطوله أقول ليك أبوحسين إتصلح معانا يا معلم,,

Post: #155
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 05:19 PM
Parent: #154

Quote: ياسلااااام..
بالله شوف الناس ديل سمحين كيفن...
ذي ناس زماااان...
يمين لا زال الشعب بخير....

بالتبادي تعازينا في رحيل ماركيز وأعرف أنك سيد وجعه ،
مصيبتنا مع الكتاب العماليق يا عبدالعزيز أنهم يتسربون إلى خلايانا كالأشعة المقطعية دون أن نشعر ، يتركوا في أنسجتنا
أثرا كالسيانيد الحميد ونعرف بعد زمن طويل أننا من المدمنين ، بعد رحيلهم نظل في حالة اجترار وبنهايته لاتجد جديدا
فتعتريك حالة تشبه الأعراض الإنسحابية ، لكن نعود تارة أخرى لما خلَّفوا لنا من ثروة ونحسب أنفسنا من الورثة لأننا
أقارب لهم من الدرجة الأولى نَحجِب في الميراث حتى أبنائهم الذكور ..
العلاقة هنا بحت شخصية ومعقمة بمستوى لايمكنني معه كشفها للهواء..

بالنسبه للشعب السوداني يا ودعثمان ، فعلى الرغم من أننا من أنصار سيف الدسوقي ندندن صباح مساء بأننا
قلب الدنيا ديه ونحن عز الدنيا بينا وبنقول للغاشي والماشي تانى ما تقول إنتهينا لكني أرى في كثير من شبابنا
خيرا كثيرا سيجعل من القفر اليباب ساحات للفرح تهتز وتربو وتنبت من كل زوج بهيج..

Post: #156
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 08:34 PM
Parent: #155

Quote: من غيركما يُجمل هذا الحوش ويجعله جاذباً بعد أن أضحى طارداً وعزف الكثيرون عن التواجد فى جنباته ,, تحاشياً من صدى ووقع اللغه المتدواله التى تُصيب العين بالرمد وتجعل النفس تتراجع قبل أن تدخل الى بوابة الحوش مرةً أُخرى **

أستاذنا الجليل عبدالكريم (الماكيكي)..
سعيد بشوفتك في هذا البوست يا أبا فؤاد..
نحمده تعالى أن في هذا الحوش من يهمه تغيير اللغة التي سادت لفترة بل هناك من يستطيع إلغاء قانون جريشام في هذا الصدد..
يا مولانا الدنيا بخير وظني أن بعض من يعتقدون أنهم يمارسون السياسة تسببوا في حالة أراها عابرة وإلى زوال وستثبت لك الأيام هذا..

لك التقدير على كلامك وحسن ظنك بنا..

Post: #157
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 25-04-2014, 10:40 PM
Parent: #156

يا محمد الشيخ لاوزت لي ياخ..

شايف ودالبشرى رترت وقال داك كان توقيع بالأحرف الأولى وأطراف المذكرة لسه سغار وحسابي معاو بقا كلو كسور..

-

(أنـــا أنتمي إلى جيل يعاني أزمة عمر ..وأنفق حياته حتى قبل أن يعيشها)


- أحلام-

Post: #158
Title: Re: الزوله دي كلاما قاسي يا ودالصايم.. اخر دبرسة
Author: محمد يوسف الزين
Date: 25-04-2014, 11:00 PM
Parent: #157

دا سودانيز اون لاين الاشتهيناهو

Post: #159
Title: Re: الزوله دي كلاما قاسي يا ودالصايم.. اخر دبرسة
Author: ABUHUSSEIN
Date: 26-04-2014, 08:00 AM
Parent: #158

Quote: لفافات على ورق أكياس أسمنت صغيره كل منها بحجم البصلة الصغيرة ( قاوورما ساااي)


عمرك كلو من محكمة لي محكمة و تقول لي لفافات ....؟؟؟؟؟؟؟
ياخ إسمها الوزنة
مرة إتذكرت النكتة بتاعة .... حاجة عجيبة يا ناس حي السيد المكي الواحد يديكم طرادة تدوهو بنقو ...؟؟؟
و نسيت ليك تسمية اللفافة على قولك و قعدت أتذكر في إسمها كم يوم لم جاتني حالة نفسية و أصبح حالي حال
في واحد من بوستات أخونا رأفت ميلاد الله يديه العافية قام جاب سيرتها بالإسم و الله إتكيفت كيف.. و دعيت ليه دعاء كتير
أها يا أخونا إسمها الوزنة و هي أصغر عبوة من البنقو و كان سعرها طرادة...

Quote: بص الشركه ال FIAT المخطط بالأبيض والأزرق


كانت مخططة بالأبيض و الأخضر على ما أظن ... الأبيض و الأزرق دا شعار الهلال ...

أعرج ليك على بصات ودنوباوي الدومة و ود البصير .....؟؟؟؟؟؟؟

.

Post: #160
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 26-04-2014, 08:21 AM
Parent: #158

Quote: انت يا ليمون ويا الخدرتك ليمون كل العيون حباك


بس انت حبيت مين وريدتنا ما شاغلاك


صباحكم ليمون يا حلوين

خِلِّي العيش حرام..
khaleel حبيب الشعب..
شكرا على أحد الأصوات الحبيبة إلى النفس والتي تعيدني إلى ربوع كردفان الحميمة..
إبراهيم حسين وإبراهيم موسى ابا وصديق عباس وودباره الخرافي وأيام لن تعود إلا في الجنة..

عودة لناس أمدر ، واحد يا خليل قال لي (هزاز صدره ميل فادع الخصر النحيل ... بالرجاج يقلع شبه المهر الوحيل) دا
بيت تاني ما حا يجي زول يبني زيو حتى بمساعدة ميتسوبيشي ..
تصوير ما بتقدر عليهو يونيفيرسال استوديوز وتشبيه بسوفتوير إلهي لايتأتى إلا من بشر عشان شركة Canon تقيف تتفرج..
سئيلي الله المهر الوحيل دي لامن الزول يجي ماري بيها يقول للمساعد نزل الصاجات ..
يا وليد يا حبيب ركز لي مع الشغل السمح والهلال دا مفروض تكون تجاوزته.. بالذات بعد شندي..
بتاع المهر الوحيل ال 4WD برضو قال العنقاء والخل الوفي والهلال يجيب كاس من بره..
المستحيلات..

تسلم يا العزيز

Post: #161
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 26-04-2014, 06:44 PM
Parent: #160

Quote: هنا في جمكسين ولا مافي
ولا نمشي ناكل باسطة

سبق وكتبت إنو الجمكسين دا بيذكرني طرفة حكيت لي وهي أن جماعه ما في بلدة ( ضهاري وكده) يشهدون حفلا
تغنى فيه وردي وغيره وعندما جاء دور فرقة الجاز وشرعوا في ركيب آلاتهم قال أحد الحضور لصاحبه : العوض اخوي يلاّكا ناس الجمكسين جونا..
الجمكسين يا طارق معاك.. عارف، مرات كتيره أسأل نفسي ماذا لو قيض لودالرضي وأبوصلاح وعتيق وعبدالرحمن الريح
وسيد عبدالعزيز أن يمتد بهم العمر حتى أيامنا هذه وتوفر لهم الواتساب والفيسبوك والكاميرات الديجيتال وشافوا الحاصل دا..
ياخ ديل مع حبوباتنا المقنَّعات ومبلَّمات قالوا العجائب فما بالك مع كرنفالات أشواريا راي وكيم كارديشيان أصحاب عثمان موسى!!
النجيضه يا ودجبرين الناس ديل ما كان كتبوا شئ لأن الأخيلة المجنحة تتجاوز حدود الأندروميدا وآخر زقاق في المجره
في ثواني بينما الواقع لايتعدى بك باب الحجرة..


من شُفتا الحُسن الفتانى .. قلبى تَرحل ووجدى أتانى
ومال جيش حبك غتانى .. بسهامو الما بتختانى
ومال صدرك لحشاك تانى .. وكتفك مال بيهو فريع بستانى
يتَكـَّـل فى دروعو ويبوس تانى



يا اخوانا مستغانمي رأيها شنو في درس الميكانيكا دا..

Post: #162
Title: Re: الزوله دي كلاما قاسي يا ودالصايم.. اخر دبرسة
Author: عمر مصطفى مضوي
Date: 26-04-2014, 08:19 PM
Parent: #161

Quote:
لو كنت بكتب كلام زي كلامك دا ما كنت غبت عن المنبر.
ولأنو الشغل دا عاجبني بالحيل قلت عمر لو عنده سماعات غير مزوره أرسل ليهو الغنيه دي عشان يستمتع
بثقافات الشرق الساحر المسحور ، من التبت والشام والهند والشافعه عازفة البيز جيتار ،
عالم يجن من الخمج.


لاقتني هي قالت تعال
كبرت كراعي من الفرح
نص في الارض ونص في النعال

باالذي سمك السما من غير عمد أنتابتني نفس حالة الدوش وأنا أطالع ردك على مداخلتنا المتواضعة وعشمنا في أن يصبح المنبر فعلاً منطقة محررة من القبح ومساحة للجمال والحب والتسامح .
هديتك مقبولة وعلى الطلاق لو ما كان في سماعات كنت هاجرت ليها ولتكن هجرتي إلى ماهاجرت إاليه لان الهدية كانت مشروطة بذلك .
أكتبوا ياخ والله نحن كبدنا مش رطب والله مهرود عديل كدة وفي الحالة دي عندكم أجرين أجر الكبد الرطب والمهرود .

Post: #163
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 27-04-2014, 08:22 AM
Parent: #162

Quote: Quote:
..
** فاكهة الحوش ود الصايم..


بس .

وان شاء الله تاني ما يتعزز الليمون .. عشان عارفنا بنريدو

عمر علي حسن


أبو أمير ، يشهد الله أنا بيك سعادتي مؤكده..
على الرغم من أني انتخبت الشاب محمد الصائم رمزا للغياب المقنن والمعلن إلا أن رسالتي هنا – كما أسلفت -موجهة لعدد
من الحواة الموهوبين للعودة إلى هذا الحوش فقد كنا ننتظر كتاباتهم بذات لهفة قريش وهي تهفو لملاقاة عير أبي سفيان ..
يا سعادتك ما زلنا ننتظر على ناصية الوعد كتابات عن تجربة تستحق أن نقرأ عنها في بلد (ملك لايظلم عنده أحد وعادل
في حكمه كريما في خُلقه) ، ليس هذا وحسب ، فأنتم كنتم على رأس شرطة السودان وقايد رسن هلال الملايين وما في
كنانتكم من معرفة لايتوفر إلا لقلة في هذا المكان أو في السودان عامة..
الله يديك العافيه أفتح لينا صوامع غلالك ومطاميرك ودعنا نقتات منها في (سنة ستة) هذه..

السقام مسَّاني ، أبقى لاتنساني..

محبة غير مشروطة..

Post: #164
Title: Re: الزوله دي كلاما قاسي يا ودالصايم.. اخر دبرسة
Author: ناصر احمد الامين
Date: 27-04-2014, 10:27 AM
Parent: #163

Quote: من التبت والشام والهند والشافعه عازفة البيز جيتار ،
عالم يجن من الخمج.

اها جنس دا البجنن بوبي زاتو !!
خمة نفس جات في وكتها .. و كاورشه كدا


___________
ابقي مارق نكوسهم
برجاك

Post: #165
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 27-04-2014, 02:52 PM
Parent: #164

Quote: دا سودانيز اون لاين الاشتهيناهو

ربنا يفتح عليك يا ود يوسف..
نبهتني ألا أقول أني أنتظر عودة الناس الكتابين بل أنتظر عودة الكتابة الرائعة ، الكتابه التسُر العين
المانعة لإنفصال الشبكية..
ببساطه وهدوء بعيدا عن التشنج والصنعة..

Post: #166
Title: Re: الزوله دي كلاما قاسي يا ودالصايم.. اخر دبرسة
Author: ABUHUSSEIN
Date: 27-04-2014, 03:28 PM
Parent: #165


يا أبو أكرم ياخ إنت صاحب المقولة الصادقة إنو نحن شعب مستهدف
و برضو إنت يا أبو أكرم زول إستفزازي حد الإستهداف ...
ياخ هديتك دي خلتني أمشي و أجيهو راجع
ياخ دا إبداع ما عادي و بعدين ياخ القال ناس أبوروف سمع و شوف برضو قال في ود أرو الشباب الحلو
أها أسي ناسك ديل عاين ليهم
سمحين إذا غنو
و سمحين إذا رقصو
و يقتلوا عديل لم إبتسموا
و تصديقاً لي مقولتك إنو نحن شعب مستهدف
شعوب العالم كلها تغني و ترقص إلا نحن
كل الشعب يغني و الرئيس بس يرقص.........

Post: #167
Title: Re: الزوله دي كلاما قاسي يا ودالصايم.. اخر دبرسة
Author: محمد المرتضى حامد
Date: 27-04-2014, 04:43 PM
Parent: #166

Quote: Mohammed Ahmed · الأكثر تعليقا · جامعة جوبا كلية الطب

يا مولانا : مشكور على الرد .أسمح لي أضيف على كلامك في موضوع كاردشيان البغني عليها سرور !
يقول رولان بارت في (لذة النَص) : أنا ضد ثقافة المغزى .. و : أكره النٌص الذي يحمل مغزى .. إلى أن يقول : أكثر أجزاء الجسد إثارة هو المكشوف وسط مستور ! = خطوة ولا اسكيرت قصيِّر !!
أها دحين ناس ودالرضي وأبوصلاح وعتيق وعبدالرحمن الريح
وسيد عبدالعزيز لو شافو قنابل عثمان موسى ديل لأصابتهم هاء السكتة القلبيّة !!
قنابل عثمان موسى ديل .. لم يتركن للخيال شيئاً

( صعَّبت علي الأسئلة) كما قال دريد لحام في رائعة محمد الماغوط (كاسك يا وطن)..
يا محمد ، الزول دا ببساطة يقول أن هناك خيطا رفيعا بين الجمال والإبتذال، عندما أوردت كارديشيان نموذجا لفرضية أن أحد سحرة الحقيبه شافا
فقد استصحبت الوصف الحسي في أشعارهم وسبق أن أوردت في موضع آخر أن ودالرضي إختصاصي Anatomy فيما يتصل بوصف
أجساد الحسان وقلت أنه مايكل أنجلو الحقيبة بلا منازع، ولكن يا مولاي انتهيت في مداخلتي أعلاه إلى أنهم لم يكونوا ليكتبوا ما كتبوا لو
أنهم شاهدوا بت كارديشيان الممسوخه أو أشواريا زميلتنا لأن في ذلك تحجيم للأخيلة المبدعة ، أولئك العماليق – في ظني - كتبوا عن روح
المرأة السودانية الملهمة وليس جسدها بأي حال من الأحوال سيما أن ذلك الجسد ظل مخفيا بموجب قانون الطوارئ وقرارات حظر التجوال
المعلنة وقتها ، تدل على ذلك يومية الأحوال الموجزة في حاول يخفي نفسو، وإفادة الشاهد سيد عبدالعزيز شفناهو شفناهو ، نحن يا سيدي
نعشق الروح وكما يقال أنك إذا أحببت روح امرأة فلن تعشق غيرها أما إذا عشقت وجه جميلة فمحنتك لانهاية لها مع ملايين الوجوه الأجمل ،
،بس تغني نوم عيني البقا لي سهر.. نحن يا محمد لامن نحب بصدق نعشق روحا لاغير وعندما نتماهى في سودانية فإننا في الواقع نحتضن
تاريخا وثقافة وأمكنة بمساحة مليون وجع مكعب وأهلا وحزنا وفرحا وفشلا ونصرا وثراءا ومسغبة وكل قوس قزح الشعور منذ ما قبل الكنداكة
وليس انتهاءا بالظبي الفي مقيلو غافل...

قسما عظما بناتنا في الريده ناس أشواريا وكارديشيان ما بياكلن معاهن فتريته..


كلو كلو..