مش عيب عليكي؟

مش عيب عليكي؟


05-04-2010, 09:21 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1279781411&rn=0


Post: #1
Title: مش عيب عليكي؟
Author: محمد المرتضى حامد
Date: 05-04-2010, 09:21 PM



قلبي عليك يا دكين

Post: #2
Title: Re: مش عيب عليكي؟
Author: محمد المرتضى حامد
Date: 05-04-2010, 09:25 PM
Parent: #1

دنيا مسعود،

صوت أصيل صادق يأخذك إلى ضرب من الفن كاد أن يتلاشى في زمن الأصوات البلاستك
التي تصفع آذاننا صباح مساء وتلك النماذج الغنائية (مجازا) التي تخّيرت أعضاء أخرى في الجسد
غير الحنجرة لتنفث أدرانها بزعم أنها تغني ، وليس بغائب ما قاله المبدع أحمد فؤاد نجم عن المسماة روبي
التي في صددها قال أحد الكتاب : إن حالنا لن ينعدل بعد أن تخلينا عن مقدمة إبن خلدون واتجهنا لمؤخرة روبي.

Post: #3
Title: Re: مش عيب عليكي؟
Author: محمد المرتضى حامد
Date: 05-04-2010, 09:31 PM
Parent: #2

خريجة مسرح آلت على نفسها إحياء التراث المصري الأصيل ، وتحديدا النوبي منه ، بدون
ضجيج أوركسترالي ، فقد اكتفت بالطبل والناي كآلتين تصاحبا أدائها الاسر لأغاني التراث سيما تلك الأغنيات
التي نسميها في السودان أغنيات البنات أو الأهازيج الشعبية الخفيفة ، فأعادت إلى الواجهة ما كانت تترنم
به بيسر بسيط فلاحات مصر أثناء إنجاز أعبائهن اليومية في البيت والغيط.

Post: #4
Title: Re: مش عيب عليكي؟
Author: أمين محمد سليمان
Date: 05-04-2010, 09:44 PM
Parent: #3

عادت للبورد عافيته !

ياخي حمدالله علي سلامتنا والله !!!

Post: #6
Title: Re: مش عيب عليكي؟
Author: وليد عبد اللطيف
Date: 05-04-2010, 09:53 PM
Parent: #4

Quote: عادت للبورد عافيته !

ياخي حمدالله علي سلامتنا والله !!!

امين محمد سليمان
بالله العب لي السلام ده باص
لحبيبنا محمد المرتضى حامد

Post: #8
Title: Re: مش عيب عليكي؟
Author: عبدالمجيد المقابل
Date: 05-04-2010, 09:58 PM
Parent: #4

عودا" حميدا" أستاذنا الجليل محمد المرتضي حامد

و عقبال عودة حبيبنا دكتور قرشي ( الذي علمت أنه متوقفا" تضمانا" معك)


الآن حق لنا أن نفرح...

تسلم

Post: #17
Title: Re: مش عيب عليكي؟
Author: محمد المرتضى حامد
Date: 05-05-2010, 00:23 AM
Parent: #8

طبيبنا الماخمج ودالمقابل،

تلك (الطقات) أو (الطقاطيق) ، يا مجيد ، تعكس ثقافة حقيقية من خلالها نعرف الكثير من أحوال تلك الأماكن وأولئك
الناس ، وطقطوقة (دنيا يا دنيا ) نموذج ناصع عن سطوة الرجل الأسواني ، السطوة التي لاتقبل التسويات ولا القسمة على
إتنين أو أي نوع من أنواع القِسَم (استغفر الله) ، شوف الراجل الفي بيت حاكماهو مَرَا ده نزل إلى حضيض السلم
الإجتماعي عند أولئك الناس حتى أن المرأة نفسها استهجنت ذلك ( الضعف) فأضحى سُبة ومذمة تجري على لسانها.

بيني بينك يا دكتور الواحد ذاتو ما عارفن دايرات شنو!!!


----------

خندق ومتراس وخط رجعه:

ما كُلَّهِن..

Post: #13
Title: Re: مش عيب عليكي؟
Author: محمد المرتضى حامد
Date: 05-04-2010, 10:24 PM
Parent: #4

عارف يا أمين ، هذه ال (دنيا) أعادت إلي ببساطة أدائها شيئا خفيا
جميلا ذكيا ظللت ( أفتش عنه وأحلم كيف يجئ) محمولا على صوت الناي
الذي يضارع مفعوله أي pacemaker ، الناي الناي يا نوته ، هو والساكس
يعيدا للجهاز العصبي المركزي توازنه وللكبد حيويته ولعلك لحظت
أن تعابير دنيا الذكية تنقل إلى الرائي نضارة البشرة والضمير معا.
مش شايف؟


أمين محمد سليمان، مافي عيشه بلاكم بتبقى.

Post: #5
Title: Re: مش عيب عليكي؟
Author: الطيب شيقوق
Date: 05-04-2010, 09:47 PM
Parent: #3

هلا هلا مرتضى الف مرحب بيك

في انتظار اولاد وبنات البندر للتعليق

Post: #7
Title: Re: مش عيب عليكي؟
Author: محمد المرتضى حامد
Date: 05-04-2010, 09:54 PM
Parent: #3

(مش عيب عليكي) نموذجا قدمته دنيا يعبر عن واقع مضمونه – كما فهمت - أن للحب فئة عمرية محددة يتوجب بعدها
اعتزال المشاعر أو ، على الأقل ، إبقاء دقات القلب كحالة سرية وبالعموم كتم الإختلاجات الحميدة التي تنتاب
ناس الريده الشديده كتلك التي كانت في الزمن الأخضر.
منذ عقدين من الزمان سألت أحد خؤولة صديق لي ، وهو رجل ساخر صادق يحمل في حناياه مخزونا من العشق يكفي لإضاءة بصيرة
حكامنا ، سألته : ياعم (.....) الزول ممكن يحب لحدي ما يصل سن كم؟
أجابني ( وهو يحكي البرق مبتسما) مع إسبال جفون أضناها سهر ليالي الوله الطوال مشيرا إلى فؤاده:
يا مرتضى يا ولدي ، القلب دا ما بقيف من الحب إلا لما يقيف.
سرا هتفت في دواخلي : الله يبشِّرك بالخير.

شغل نهايته اللحد.


Post: #9
Title: Re: مش عيب عليكي؟
Author: كمال سالم
Date: 05-04-2010, 10:11 PM
Parent: #7

Quote: أجابني ( وهو يحكي البرق مبتسما) مع إسبال جفون أضناها سهر ليالي الوله الطوال مشيرا إلى فؤاده:
يا مرتضى يا ولدي ، القلب دا ما بقيف من الحب إلا لما يقيف.
سرا هتفت في دواخلي : الله يبشِّرك بالخير.


لكنه عندما يصل هذه المرحله من العمر قطعا سوف يكون
من طرف واحد . ويا لحسرتنا !






كتابة طاعمه يابن خالتى ,, إفتقدناك كثيرا فى الفتره
الماضيه .
بـس ماتعصر شديد على ناس ( روبى ) ديل .

Post: #10
Title: Re: مش عيب عليكي؟
Author: الطيب شيقوق
Date: 05-04-2010, 10:12 PM
Parent: #7

Quote: يا مرتضى يا ولدي ، القلب دا ما بقيف من الحب إلا لما يقيف.


المرتضى في بوست (بعد ايه) وما قالته الاستاذة احلام اسماعيل حسن عن سر هذه الاغنية كتب احد المتداخلين ما يلي

Quote: حكى لي قريب أيضاً انه كان برفقة جد لنا (فاق التسعون)... للسلام على زيارة بعض الأهل حينما حضر من البلد وحينما خرجا من الدار ... طلب منه جده أن يمنحه عشرة جنيه (زمن كانت بتساوي 20 استرليني) ... وهما خارج البيت .... آب الجد راجعاً لوداع إمرأة عجوز في الدار مجدداً بالرغم انه ودعها ولم يكن يوجد غيرها ... فمنحها العشرة جنيه ... وحينما خرج قال لحفيده وهو يداوي جراح الماضي... مهدياً حفيده وحزنه بسمة مردداً ... (دي زمان كنت بحبها ...!!!) بس القسمة ما تمت ... يا ترى الحب في زمنهم كان كيف؟ ... ولو ده واحد مننا هل سيتذكرها بعد مضي هذه السنين ...



تقول لي الحب بقيف متى كمان؟

الحب معاك للعامرات ( لناس مسقط)

Post: #11
Title: Re: مش عيب عليكي؟
Author: الطيب شيقوق
Date: 05-04-2010, 10:14 PM
Parent: #10

قال لها اسماعيل: بعد إيه، ثم أدار ظهره وواصل السير .. إ...لا يدري - توجد دموع

Post: #12
Title: Re: مش عيب عليكي؟
Author: Kostawi
Date: 05-04-2010, 10:22 PM
Parent: #11

أموت ركن

Post: #14
Title: Re: مش عيب عليكي؟
Author: البدري عبد الله
Date: 05-04-2010, 10:28 PM
Parent: #12

مرحب حبابك ..وحمدا لله على السلامة

Post: #15
Title: Re: مش عيب عليكي؟
Author: محمد المرتضى حامد
Date: 05-04-2010, 10:53 PM
Parent: #12

يا الوليد،


وللحديث بقية

Post: #16
Title: Re: مش عيب عليكي؟
Author: وليد عبد اللطيف
Date: 05-04-2010, 11:57 PM
Parent: #15

استاذنامحمد المرتضى حامد
Quote: أسأل المولى أن أعود،
( وإن تهامس الرفاق أني هناك بجانب التل أنام نومة اللحود .. أسُفُّ من ترابي وأشرب المطر) يا سيَّاب.
سلم يراعك يا عزيز والخاطر

تعود وكلك صحة وعافية يارب
نحن هنا ناس بنفتش عليهم وننتظر يفتحوا بوست
او مجادعة او مداخلة لكي نستمع بمجادعاتهم
ننتظر محسن خالد لم يهجم عليهو دكين
او دكين لما يكون في صحبتك مردوف
تلاقي النوم غلبنا ونفجل عويناتنا
ونشوف الوسط الكلام مدسوس
دحين ماني نعسان عٍلا الطفلة أسيل ليها علينا احكام
لازم نقوم مع الاذان .







تحياتي







Post: #18
Title: Re: مش عيب عليكي؟
Author: OSMAN SAYED MOHAMED
Date: 05-05-2010, 00:30 AM
Parent: #16

حمدا لله علي السلامه يا استاذنا

و عودا حميدا مستطاب

Post: #19
Title: Re: مش عيب عليكي؟
Author: Gaafar Ismail
Date: 05-05-2010, 04:04 AM
Parent: #18

أخي الحبيب الأستاذ محمد المرتضى
عودا حميدا وألف مرحب بعودة الروح إلى المنبر..كعهدنا بك جئت تحمل كل جميل وتنثر البهجة بهذا الصوت الجميل...حقيقة صوتها رائع رائع فوق الوصف ..تسلم يا حبيب.

-----
أخي الحبيب عبدالمنعم خليفة غائب عن المنبر ، لعله والأسرة بخير

تحياتي ومحبتي

Post: #20
Title: Re: مش عيب عليكي؟
Author: هواري نمر
Date: 05-05-2010, 04:33 AM
Parent: #19

الاستاذ\محمد المرتضي..
تحياتي واحترامــي..
جميلٌ صوت هذه الانسانة,بديع ...ومعتّق..
اللكنة الصعيدية و الأسوانية,تزيد صوتها عذوبة وطلاوة..
ياتي صوتها مريحاً..وطبيعياً ,دون أي اضافات أو حتي..تكلف مُصّطنع
صوت الناي والطبل,أعطاها تميزاً وشكلاً مختلفا للغناء, دونا عن بقية الفنانات الأُخريات....

_____________
أري أن هنالك...تقاربا مع أداء ولونية...الملك محمد منير
أحب هؤلاء القوم(أهل اسوان)...فهم مننا ونحن منهم....


شكراً لك يا أستاذ....
عاطر احترامي

Post: #21
Title: Re: مش عيب عليكي؟
Author: Amira Elsheikh
Date: 05-05-2010, 05:26 AM
Parent: #20

ياسلاااااااااااااااااااام
دا اجمل صباح ....الواحد يفتح المنبر ويلقى اسمك مزين الصفحة

ليك وحشة ....

سعيدين بعودتك ...


مرحب ودالمرتضى
شكرا دكين ....

Post: #22
Title: Re: مش عيب عليكي؟
Author: saadeldin abdelrahman
Date: 05-05-2010, 05:35 AM
Parent: #20

مرور للتحية..
ما قدرت أشوف حاجة.. الظاهر اليوتيوب -حيث أنا الآن- معطل
بقيت عامل زي الشافع البتاوق برة الدارة.
لي عودة أكيدة إن شاء الله!

Post: #23
Title: Re: مش عيب عليكي؟
Author: عبدالحفيظ حسن
Date: 05-05-2010, 06:10 AM
Parent: #22

.

Quote: ما قدرت أشوف حاجة.. الظاهر اليوتيوب -حيث أنا الآن- معطل
بقيت عامل زي الشافع البتاوق برة الدارة.


نفس الشى......

و لكن لما زولنا(ناسنا) يقول كلام..
والا يجيب غنا....ما فى شك....يا هو
الكلام....ويا هو الغنا!!!






.

Post: #24
Title: Re: مش عيب عليكي؟
Author: عبدالرحمن إبراهيم محمد
Date: 05-05-2010, 06:22 AM
Parent: #22



أخـــى مـحـمــد الـمــرتـضــى حــامـــد

تـــحــياتى وعــودا حــميـدا.

لــقــد تـأكـد لــى الــيــوم بــمــا لايــدع مـــجــالا للشــــك

أنـك ذواق مــنــتــق

ولــذا فـإنــنــى عـــلى يــقــيـن بأنــك

ســــتـعــى أبــعاد وتـســتـمــتـــع بـعــمــق هــذا الصــوت الــنادر

http://fr.truveo.com/video-detail/radio-maganeen-/362658026

مــع الأســف لــم أســـتـطـع الـــتـحــمـيـــل



Post: #25
Title: Re: مش عيب عليكي؟
Author: عمر الفاروق عبد الله الشيخ
Date: 05-05-2010, 06:34 AM
Parent: #24

هلا يا استاذ سائلين عنك

Post: #65
Title: Re: مش عيب عليكي؟
Author: محمد المرتضى حامد
Date: 05-07-2010, 03:59 PM
Parent: #25



أهلا بالمسالمه وحي العرب
عمر الفاروق سلام،
صحة النفس وسماحتا ،
منبت الفن والجمال والرياضه ،
فريقين عايش عليهم غنا السودان حتى المليون القادمة.
دا كان القيامه ما قامت قريب.

تحاياي العاليه لك ولعزيزنا د. علي وربنا يرد غربتنا المضاعفة جميعنا.

Post: #26
Title: Re: مش عيب عليكي؟
Author: وليد عبد اللطيف
Date: 05-05-2010, 07:07 AM
Parent: #24

سعادة البروف الكابتن /عبد الرحمن ابراهيم محمد (البحراوي الاصيل )
قلنا ناخد اجر المناولة

Post: #27
Title: Re: مش عيب عليكي؟
Author: عبدالرحمن إبراهيم محمد
Date: 05-05-2010, 07:27 AM
Parent: #26



كابــتـن ولــيـد ياعــــظـيــم

تســــلـم.

بالله أنا عــاوزك تــعـلـمـنى دى بــيـعـمــلـوها كـيــف.

بالله شـــفـت الــصــوت دى كــيــف؟

يـاخــى ربــنــا قـادر.

لك الــــود أبـــدا.



Post: #28
Title: Re: مش عيب عليكي؟
Author: محمد المرتضى حامد
Date: 05-05-2010, 07:33 AM
Parent: #26

شيقوق (نعناع الجنينه المسقي في حيضانو)،
سألتك بالذي سمك السماء أن تطفئ نور غرفتك ليلا
وتتخلى عن كل ما مضى وما سيأتي وانصت إلى صوت دنيا
وهي تؤدي (نعناع الجنينه) كما أتي بها وليد، حتما ستكتفي
بأنوار أخرى تمكِّن ليس ناظريك وحسب من الشوف ، بل ستكتشف أنك
يمكنك أن ترى بأصابعك كالطفلة الروسية روزا كوليشوفا.
(نعناع الجنينة) لم تؤدها كاملة كما هي في الأصل مثل الملك محمد منير
على حد تعبير الفنان هواري نمر الذي بالفطرة الفنية ربط بين دنيا
وبين منير، وأتمنى أن يكون قد استمع ايضا إلى المرحوم بحر ابوجريشه في
عمل مصاحب للناي.
الناي يا هواري الذي يحيي ويميت.
اللهم اغسلنا بالماء والثلج والبرد.

Post: #29
Title: Re: مش عيب عليكي؟
Author: ندى عثمان حسن
Date: 05-05-2010, 07:37 AM
Parent: #28

وفوق دة كلوو عندنا مطرة اليوم.






سلامو.

Post: #30
Title: Re: مش عيب عليكي؟
Author: هواري نمر
Date: 05-05-2010, 08:07 AM
Parent: #29

Quote: .
الناي يا هواري الذي يحيي ويميت.


الناي,,
له فعل السحر..
يدغدغ الاحاسيس,بيدخل جُوه العضم,يستفذُ المشاعر ياخي
أنغامه حزينه صـــــــــــــادقة,
وبسرح بيك ويسوقك لي عوالم تانية..
يا الله...يا الله

احترامي وتقدير يا استاذنا ود المرتضي
_______
وين يا أخوانا الفنان الجميل\عماد عبدالله,البوست ده عايز عماد,يجي يتمحن معانا في الجمال ده.

Post: #31
Title: Re: مش عيب عليكي؟
Author: محمد المرتضى حامد
Date: 05-05-2010, 09:26 AM
Parent: #30

عاجل لعبدالحفيظ حسن وسعد الدين عبدالرحمن.
http://www.youtube.com/watch?v=uBQZxRzhVl8

Post: #33
Title: Re: مش عيب عليكي؟
Author: وليد عبد اللطيف
Date: 05-05-2010, 09:55 AM
Parent: #31

من الاستاذ / محمد المرتضى حامد
الى
Quote: عاجل لعبدالحفيظ حسن وسعد الدين عبدالرحمن.


Post: #32
Title: Re: مش عيب عليكي؟
Author: الطيب شيقوق
Date: 05-05-2010, 09:41 AM
Parent: #30

شكرا يا مرتضى شوقتني لهذه الاغنية التي لم اسمعها قبل اليوم مما اضطرني البحث عنها في قوقل -

قالتلى بريدك يا ولد عمى
تعالى دوق العسل سايل على فمى
على مهلك على ما بحمل الضمى
على مهلك على دة انا حيلة ابوى وامى
نعناع الجنينة المسقى فى حيضانة
شجر الموز طرح ضلل على عيدانة
***
فى عشق البنات انا فقت نابليون
طرمبيلى وقف عجلاتة بندريوم
قدمت شكوتى لحاكم الخرطوم
اجل جلستى لما القيامة تقوم
***
سألت ايش الاسم قالو البنات نعمات
ام صبعين رطاب والباقى بلح امهات
يوم ندهت علينا بيدها الناعمات
قلت نعمين تلاتة واربع خمس نعمات
***
خضارك زى جنينة وطرحت تينات
عودك فى مشيتة عاملّو منحنيات
عضامك لينة لايقين على التنيات
تانية واتنين تلاتة واربع خمس تنيات
***
يا ام عقدين دهب تلاتة وتلاتين طارة
ما عيناً رأت ما وردت على بكارة
يوم طلت علينا الكل وقعو سكارى
سقطت فى الحليب ما بينتلو عكارة
***
يا ست البنات ماحلى الجمال الفيكي
مهما اعمل واسوّي ف الوصف ما يكفيكي
الروح والجسد تاخدي وما يكفيكي
بسْ خلي العيون علشان تعاين فيكي
***
رايد اكلمك كل ساعة ف وَسَعتنا
من بعد الضُهُر نركب ضهَر ناقتنا
قالت نعمل ايه لو العرب شافتنا
قولي وليد عمي وساقته جار ساقتنا
***
قالت تَقصُد ايه يا اللي انت بتغازَلنا
واقف في طريقنا ان كان طلعنا نزَلنا
مواعدين بعضَنا من صغرَنا وما زلنا
ما نفوت بعضنا حتى التراب يعزلنا
***
نعناع الجنينة المسقي في حيضانه
شجر الموز طرح ضلل على عيدانه
***
قالت تَقصُد ايه يا اللي انت بتغازَلنا
واقف في طريقنا ان طلعنا نزَلنا
صاينين عهدنا من صغرنا ولا زلنا
إوصلنا حبيبنا ألا الفراق يعزلنا
***
يا خولي الجنينة الفاكهة فيها أشكال
عنقود العنب على شجره طل ومال
والتين الخضّير من سحره بقى رمان
قوم الحق يا خولي ده أنا اللي قلبي مال
***
نعناع الجنينة عطرك فريد يتغنى
وصفوك للحبايب من روايح الجنة
والماشي معاك يحلم يا ناس يتمنى
وان ضاع عمري ضاع مايهمنيش أتهنى
***
والعنب البناتي طالل على المحبوبة
واللي داقه مرة ما يعرف أبدا توبة
ويعود له تاني النوبة بعد النوبة
ما دامت قسمته على الجبين مكتوبة
***
يا خولي الجنينة عندي طلب وسؤال
تعيني في جناينك أزرع يروق الحال
وبستانك الزاد ومايهمنيش المال
ولا السكن والهدمة مادم فيه راحة البال
***
تلتك من دهب تلتك من الفيروز
تلتك من عقيق من مكة جاني مفروز
لوين نويتي الرحيل يا نور عيوني الجوز
باصرخ من قليبي والله الفراق ما يجوز
***
يا رايد الجمال قبّل على الخرطوم
تلقى هناك بنات كيف السمك بيعوم
أما بناتك يا***فوسطهم مبروم
يحنوا للغريب وابن البلد *****
***

راكبة الأوتومبيل في اسكندرية تصيف
لابسة قميص النوم لونه برتقاني خفيف
جننتي الخواجة قلبه الكُفر متكيف
وإيش حالي أنا المسلم اللي قلبي رهيف
***
يا ست البنات على ايه ما انتي نويتي
عايني وأنظري كيف الشباب سويتي
جننتي قلوب والعيون بكيتي
حرام أكبر حرام جرحتي وللا داويتي
***
نعناع الجنينة المسقي في حيضانه
يوم سافر حبيبي سبت البلد علشانه
***
نزل الوز عام فى ليل مضلم هاسى
قلت أنا أعوم وراكى يالى جمال ميراسى
قالت لى تعوم وراى أنا عارفة من أحساسك
موجنا تقيل عليك تغرق تزعل ناسك
***
جالت يابا يابا ريت هناك خياله
تسعين ناجه لجح والرجال شياله
جلتلها عريسك جانى فى الجياله
ارفضله طلب ولا انتى ليه مياله
***
يا شاغل جليبى ليلى ويا نهارى
اطلعلك على راس النخيل والصارى
واطولك منين شبكتنى فى عزالى
بيراهنو عليك انك حتفضل ناري

Post: #34
Title: Re: مش عيب عليكي؟
Author: DKEEN
Date: 05-05-2010, 12:03 PM
Parent: #32

العزيز صاحب البهاء والابهة والاحزان

محمد المرتضى

ياخي في شي غريب في هذا الفديو وهذا الصوت وربما امتد وتعلقت الغرابة بالمغنية نفسها..

ثمة ولف يامحمد..
البت دي تحن ليها سااااي ..ماتعرف هل للصوت المعجون بالنوبية ولا لجمالها ولا لي خلعة كده في العيون..
ام انه لقاح النخل بيننا ..ام هو اعجاب زي بتاع المؤتمر الوطني هي لله هي لله.. ودي طبعا حدها السرير (وش باسم)


الغنية دي ما اظن قاصدين بيها المعاني الظاهرة
لانو ثمة شي بتخلق بعد نهايتها في حتة جواك..
انا بصراحة مابقدر احكم بقيت بصورة سلمية على الاشياء لاني مطعون في وجداني
وغارق في حالة ريدة ولا اسيطر على تفاصيل الان بيد الغالية..



غايتو انا من شدة اعجابي ل ااملك إلا ان اهيده اليها
فهي تحب مثل هذا الغناء مع انها طالما اعجبت بما لايستحق..
:)

Post: #35
Title: Re: مش عيب عليكي؟
Author: Mahir Mohammed Salih
Date: 05-05-2010, 01:47 PM
Parent: #34

مرحباَ ،،

ولكن هذا:
Quote: إن حالنا لن ينعدل بعد أن تخلينا عن مقدمة إبن خلدون واتجهنا لمؤخرة روبي.

أجمل تعليق قرأته فى السنين الماضية .

ماهر

Post: #68
Title: Re: مش عيب عليكي؟
Author: محمد المرتضى حامد
Date: 05-08-2010, 10:09 AM
Parent: #35

Mahir Mohammed Salih
Quote: أجمل تعليق قرأته في السنين الماضية

شكرا يا ماهر على زيارتك،
الكاتب الذي أشار لمقدمة إبن خلدون هو أحد المثقفين الخليجيين
وقد وردت إفادته التي أعجبتك ضمن مقال بديع تناول فيه أزمة أمة بحالها
وعرض لنماذج إقتصادية وفنية ورياضية وثقافية إلخ .. ورغم كثافة السخرية
التي احتشد بها المقال إلا أنه لم يحيد عن الموضوعية.
تسلم يا ماهر

Post: #36
Title: Re: مش عيب عليكي؟
Author: وليد عبد اللطيف
Date: 05-05-2010, 02:03 PM
Parent: #34

Quote: ولــيـد ياعــــظـيــم

تســــلـم.

ياسعادة البروف عبد الرحمن
العظمة لله وحده ونحن حاضرين لكل طلباتك
بس يظهر دخلنا في مثلث الشيطان (برمودا)
بعد ان اكتملت اضلاعة الثلاث (دكين + شيقوق + محمد المرتضى)
والليله الله يحلنا من ابداعاتهم وتشبيهاتهم

Quote: ياخي في شي غريب في هذا الفديو وهذا الصوت وربما امتد وتعلقت الغرابة بالمغنية نفسها..

استاذ دكين
ماتشوف اسمع بس
دي اسمها الاصوات الجبلية ومنها نجوى كرم وفيروز وهي اصوات نادرة
فيروز لما تصرخ وتقول : حبيتك
او لما تغني في مسرحيتها : جبل الصوان
خلاص الكلام خليناهو ليكم دحين
عايزين نرجع لهوايتنا فقط الاطلاع
sudansudansudansudansudansudansudansudansudansudansudansudansudansudansudan21.jpg Hosting at Sudaneseonline.com

ودي هدية ليكم
الصورة دي من الارشيف الخاص وسبق شلناها من هنا وبها احلى ناس نعزهم نحترمهم نبحث عنهم
وتحياتي عبركم الى ابو الفن (طارق ميرغني )

Post: #37
Title: Re: مش عيب عليكي؟
Author: dardiri satti
Date: 05-05-2010, 02:24 PM
Parent: #36

مولانا ،

يا مخرج الروائع!!!

تحياتي

Post: #38
Title: Re: مش عيب عليكي؟
Author: محمد المرتضى حامد
Date: 05-05-2010, 03:18 PM
Parent: #37

Quote: لكنه عندما يصل هذه المرحله من العمر قطعا سوف يكون
من طرف واحد . ويا لحسرتنا !


منو القال ليك يا ابن خالتي؟
مافي حب من طرف واحد يا كمال ، هذا قول يخالف قوانين الفيزياء
النظرية والتطبيقية والفلكية ، قد يتظاهر الطرف بأنه نسي أو تناسى
لكنه يكذب على خاطره على مختلف الموجات ، تلاقي واحده زي (فيرمينا دازا)
تتظاهر بأنها غسلت قلبها بالكلوركس والإستغفار وطهّرته بالليزر خلية خلية من كل ما
يتصل بالحبيب بل تعلن ذلك اجتماعيا ودينيا فتتزوج غيره
ولكن في الواقع بقيت خلايا الحبيب نائمة في نخاع عظمها وذبذباته رابضة في مجالاتها
المغنطيسية وكل دوائر شبكاتها العاملة ، في وقت يتغاضى فيه الحبيب عن سالفة الكرامة
المزعومة التي تبنتها هي وكانت فاتورتها ملايين السنوات الضوئية من الفراق وغياب الشهد
المُصَفَّى في وضعية وصفها بازرعه ( كانت ذراعاك لرأسي مرقدا) أو أي صورة
رسمها المبدع ماركيز في رائعة زمن الكوليرا فكانا لبعضهما بعد أن تخطيا السبعين ،
وقتها لم يقل أحدهما لرفيقه ما قالته فيروز في مركب الريح ( ولما التقينا لقينا
العمر ولَّى وعبَر).

الريده يا كمال في الجسم الأثيري فهو والروح لايشيخان ،
ياالعزيز الشغل دا موجات وما عندو علاقه بالعضام إلا الحمى البجيبا.

يا كمال ، نحن نقولها تأدبا ( الضرس بيتاور) لكن الموضوع ليس (متاورة) ضرس بل هو انفجار
شرنوبل بعينه ، فقط نحن نخفي نتائجه كما فعل السوفيت وقتها، هم يدارونه تحت شعار الأمن
الوطني ونحن نداريه تحت مانشيت كبير فادح الثمن نسميه الكرامه والإيقو الكذوب .
أية كرامة تلك التي تقيلك عن سجيلك رفيقك صديقك حبيبك من ترى فيه بقايا العمر و( أوهامك) .

من طرف واحد؟

قادر الله زي ما بقول المهاتما عماد عبدالله .

Post: #39
Title: Re: مش عيب عليكي؟
Author: الفاتح ميرغني
Date: 05-05-2010, 03:36 PM
Parent: #38

Quote: منو القال ليك يا ابن خالتي؟
مافي حب من طرف واحد يا كمال ، هذا قول يخالف قوانين الفيزياء
النظرية والتطبيقية والفلكية ، قد يتظاهر الطرف بأنه نسي أو تناسى
لكنه يكذب على خاطره على مختلف الموجات ، تلاقي واحده زي (فيرمينا دازا)
تتظاهر بأنها غسلت قلبها بالكلوركس والإستغفار وطهّرته بالليزر خلية خلية من كل ما
يتصل بالحبيب بل تعلن ذلك اجتماعيا ودينيا فتتزوج غيره
ولكن في الواقع بقيت خلايا الحبيب نائمة في نخاع عظمها وذبذباته رابضة في مجالاتها
المغنطيسية وكل دوائر شبكاتها العاملة ، في وقت يتغاضى فيه الحبيب عن سالفة الكرامة
المزعومة التي تبنتها هي وكانت فاتورتها ملايين السنوات الضوئية من الفراق وغياب الشهد
المُصَفَّى في وضعية وصفها بازرعه ( كانت ذراعاك لرأسي مرقدا) أو أي صورة
رسمها المبدع ماركيز في رائعة زمن الكوليرا فكانا لبعضهما بعد أن تخطيا السبعين ،
وقتها لم يقل أحدهما لرفيقه ما قالته فيروز في مركب الريح ( ولما التقينا لقينا
العمر ولَّى وعبَر).

الريده يا كمال في الجسم الأثيري فهو والروح لايشيخان ،
ياالعزيز الشغل دا موجات وما عندو علاقه بالعضام إلا الحمى البجيبا.

يا كمال ، نحن نقولها تأدبا ( الضرس بيتاور) لكن الموضوع ليس (متاورة) ضرس بل هو انفجار
شرنوبل بعينه ، فقط نحن نخفي نتائجه كما فعل السوفيت وقتها، هم يدارونه تحت شعار الأمن
الوطني ونحن نداريه تحت مانشيت كبير فادح الثمن نسميه الكرامه والإيقو الكذوب .
أية كرامة تلك التي تقيلك عن سجيلك رفيقك صديقك حبيبك من ترى فيه بقايا العمر و( أوهامك) .

من طرف واحد؟

قادر الله زي ما بقول المهاتما عماد عبدالله .

إنا لله وإنا إليه راجعون. والله العظيم يا محمد أنا غلبني ألقى نقطة اوقف فيها الإقتباس او اكتب معلقا على هذا الإسترسال او الفيض الوجداني العظيم.غايتو لو إستعدت بعض رشدي او قواى(سيان) بجيك راجع.
محبتي

Post: #40
Title: Re: مش عيب عليكي؟
Author: rummana
Date: 05-05-2010, 04:38 PM
Parent: #39

الأخ الكريم محمد المرتضى

وصلتني أغنية لدنيا قبل فترة .. "يا دنيا ما كفاية اللي جرى" في ايميل من أخي ..(الروح بالروح)
وبعد سماعها قمت بسياحة في اليوتيوب شملت أغنيات لـ دنيا ...التي سمعتها حينذاك لأول مرة .. واستوقفتني أغنيتان الأولى أغنية نعناع الجنينة الخالية من الآلات الموسيقية وقد تجلى فيها جمال وسحر وقوة صوت هذه الصبية النوبية
فصوتها في هذه الأغنية كان كصوت الـ "كناري" أبدع ما يكون في عدم وجود شركاء.

ولي مع أغنية نعناع الجنينة طرفة أو على الأصح "كسفة".. فقد قررت أن أدفع نحلاتي الجميلة باتجاه الاستماع إلى أغنيات فيها شيء مننا حتى أخرجهم من دائرة البوب والهيب هوب والراب وثقافة المخارج والمداخل التي للأسف تسللت إلى أغاني الجيل الجديد
ولأن محمد منير "خاتف لونين" فكان أن اشتريت مع ما اشتريت سي دي "نعناع الجنينة" ولم أكن قد استمعت إليها من قبل. فإذا بمحمد منير فتحة خشمه يبدأ برمية:
قالتلى بريدك يا ولد عمى
تعالى دوق العسل سايل على فمى
على مهلك على.. ما بحمل الضمى
على مهلك على ..دنا حيلة ابوى وامى
حينها أكتفيت بأن أقول لنفسي: الله!!!! ثم تنازلت عن محاولتي للتدخل فيما يسمعون..

كانت الأغنية الثانية هي "مش عيب عليك" والتي بصراحة استنفرت مشاعري وحيرتي
هي فعلا تضع الحب كحالة عندها expiry date بعدها يرسله الانسان (ولعل المقصود هو المرأة) لأقرب برميل نفايات لعناية البلدية
أو أن لهذا الخافق مفتاح on/off ..ما أن تزوج الابنة أو الابن حتى تضعه على برمنانت أوف
وبالعدم فمستشفى المجانين هو الحل

شكرا أستاذ محمد المرتضى على البوست
و
Quote: وفوق دة كلوو عندنا مطرة اليوم.

Post: #41
Title: Re: مش عيب عليكي؟
Author: باسط المكي
Date: 05-05-2010, 04:42 PM
Parent: #39

Quote: المُصَفَّى في وضعية وصفها بازرعه ( كانت ذراعاك لرأسي مرقدا) أو أي صورة
رسمها المبدع ماركيز في رائعة زمن الكوليرا فكانا لبعضهما بعد أن تخطيا السبعين ،
وقتها لم يقل أحدهما لرفيقه ما قالته فيروز في مركب الريح ( ولما التقينا لقينا
العمر ولَّى وعبَر).


محمد المرتضي
تحياتي سالنا عنك طوب الارض
وين انت ياخ المحل نور

Post: #42
Title: Re: مش عيب عليكي؟
Author: محمد المرتضى حامد
Date: 05-05-2010, 06:13 PM
Parent: #41

Quote: أموت ركن

والله كانت أيام يا العميد ركن،
قسما عظما ليك وحشه يا كوستاوي،
الجماعه اتأخروا لكن ما كتير.
سلِّم لي على محمد الفاتح ابراهيم
قول ليهو ما تشفق .
ياخ الله يبارك في (دنيا) الجابتك.

Post: #43
Title: Re: مش عيب عليكي؟
Author: محمد عثمان
Date: 05-05-2010, 06:18 PM
Parent: #42

ود المرتضى..

الندخل بالاول و نقول سلااااام

ياخى يعلم الله مشتااقين كتير..


اكيد بنجيك راجعين

و تحايا لك و لضيوفك الكرام...

Post: #46
Title: Re: مش عيب عليكي؟
Author: وليد عبد اللطيف
Date: 05-05-2010, 07:11 PM
Parent: #43

محمد المرتضى
Quote: الريده يا كمال في الجسم الأثيري فهو والروح لايشيخان ،
ياالعزيز الشغل دا موجات وما عندو علاقه بالعضام إلا الحمى البجيبا

ياخي الحته دي ربطتني باهات ابوخضرة (خضر بشير)
لما يقول
ياحبيبي أه أه انا خايفك
بالشوق تضيع عمري === وتكوني عليّ الجاني

Post: #78
Title: Re: مش عيب عليكي؟
Author: محمد المرتضى حامد
Date: 05-11-2010, 07:04 AM
Parent: #43

ألفين سلام وزياده يا محمد عثمان،
معليش ,, السفر والشلهتة أعداء للكتابة،

بالله ما تقيف ،

(من جنة هواك أسقي الناس "أغاني")

Post: #44
Title: Re: مش عيب عليكي؟
Author: د.محمد حسن
Date: 05-05-2010, 06:27 PM
Parent: #42

صديقي ذو القميص الحبش
والقلب المريخي
سلام عليك في العالمين
انا متأكد انك لاحظت ان هذه البنت تغني على السلم الحشاشي
حاجة بتنغوش حشايش الروح
مش كدة



مشتاق لي لمة صحاب

Post: #45
Title: Re: مش عيب عليكي؟
Author: عمر علي حسن
Date: 05-05-2010, 07:00 PM
Parent: #41

(سقطت فى الحليب ما بينتلو عكارة )

الا ليت الشباب يعود يوما ...............
لو زدت عنها لخرجت عن اطار الحكمة القائلة (العاقل من اتعظ بغيرة) وربما اصبحت عظة لغيري ..
اما لو امسكت ، فيا حسرتي واسفي علي شخب الحليب الضاوي يرهج في الكبابي ..

عجيبة هذه البنت .. وعجيب صوتها .. وعجيب هذ البوست من اوله لاخره ..

عمر علي حسن

Post: #47
Title: Re: مش عيب عليكي؟
Author: الطيب شيقوق
Date: 05-05-2010, 08:34 PM
Parent: #45

ابو اكرم

وايييييييييييييييييييييييييييييييييييييييي

Post: #48
Title: Re: مش عيب عليكي؟
Author: محمد المرتضى حامد
Date: 05-05-2010, 09:42 PM
Parent: #47

ألفين سلام يا البدري،
في زمن الطلب الجامعي كان لنا صديق يجلس بيننا ويضع راسه بين يديه
وينظر للأرض ويغني ، دون مصاحبة أي آلة ، أغنية (النهاية) لكاتبها
الرائع هاشم صديق :

يوم في يوم غريب
فيهو الشمس لَمَّت غروبا وهاجرت
بانت نجوم متفرقا
زي الدموع في خد حبيب
ودّع حبيتو السافرت ..

تلك الأغنية التي أداها الشاهق سيد خليفه بصوت من السماء،
كنا ننصت ل (النهاية) حتى النهاية لأن صوت (الفاتح يس) الآسر
تحتشد فيه كل الآلات الموسيقية ، وكنت أثق أن هذا
الطرب تفسده مصاحبة أي آلة ،
سبحان الخالق المتفرد.
دنيا مسعود ، تكاد تكون الوحيدة ، بعد الفاتح ،التي تفوقت في إسكاري طربا دون
أن يصحبها في الأداء سوى طبل أذني وغشاء التامور القافل قلبي.

Post: #49
Title: Re: مش عيب عليكي؟
Author: Khalid Kodi
Date: 05-06-2010, 06:03 AM
Parent: #48

تحياتى العزيز محمد المرتضى،

وشكرا لدينا... تابعت تجربتها.. الحديثه...

فأمامها تقاليد الشيخ إمام وأحمد فؤاد نجم الثرية ...

للأسف تجارب أحمد إسماعيل وخالد الهبر لم تجد ماتستحقه من من الاهتمام...

فنحن نعيش زمن (الهشك بشك) وإنحطاط الذوق و التذوق ... كما تعرف...

و الأرض حبلى بالفن الملتزم

هنا صاعدة أخرى... سلام





..

Post: #50
Title: Re: مش عيب عليكي؟
Author: Khalid Kodi
Date: 05-06-2010, 06:09 AM
Parent: #49

والرائعة أمل مرقس!




.

Post: #72
Title: Re: مش عيب عليكي؟
Author: محمد المرتضى حامد
Date: 05-09-2010, 11:12 AM
Parent: #39

Quote: غايتو لو إستعدت بعض رشدي او قواى(سيان) بجيك راجع.

الرجل السمح الفاتح ميرغني ( احد شيوخ الطريقة)
يا سيدي أخونا كمال عايز يستثيرني بطلبه ألا ( نضغط) على روبي
ومن لف لفها، والحقيقه أنا زاتو غلطان أجيب يسرة ناس روبي
عندما يكون الحديث عن دنيا الأصيلة.
راجع ليك بس السفر مجهجهني ومجهجه كتابتي.
محبتي.

Post: #51
Title: Re: مش عيب عليكي؟
Author: ندى عثمان حسن
Date: 05-06-2010, 06:29 AM
Parent: #38

Quote: أية كرامة تلك التي تقيلك عن سجيلك رفيقك صديقك حبيبك من ترى فيه بقايا العمر و( أوهامك) .
.

Post: #52
Title: Re: مش عيب عليكي؟
Author: Khalid Kodi
Date: 05-06-2010, 06:56 AM
Parent: #51

و لك ياعزيزى محمد المرتضى المحاربة القديمة مارسيدس سوسا..

من اوائل الذين أبدعوا فكرة الارتفاع بالشعبى الى الفنون العليا!

والأغنية الملتزمه:








.

Post: #53
Title: Re: مش عيب عليكي؟
Author: محمد المرتضى حامد
Date: 05-06-2010, 08:11 AM
Parent: #52

OSMAN SAYED MOHAMED
الناس الأصائل،
سلامات يا عثمان جمل الشيل،
دنيانا هذه تذخر بالكثير من الناس السمحين والإبداع
فقط نحتاج أن نفتح النوافذ والفلوب وننظر إلى الجوار،
محبتي لك وسلامي للاسرة الكريمة ود.نجاة ولعقيل وكل الذين
يرسمون القلب ويطبونه في الملايو وسنغابور.

ماتنسى تسمع أغنية (جماري) للزولهالسمحه دي.
وش الغالي جمّاري ( من القمر).

ربنا يحفظكم.

Post: #54
Title: Re: مش عيب عليكي؟
Author: هواري نمر
Date: 05-06-2010, 08:50 AM
Parent: #53

يا مولانا..
تحياتي واحترامي...
رغم أنّ البوست مخصص,للزولة السمحة دي..
بس ياخي أعذرني واسمح لي ,أُهديــــــك ,صوت (الناي) الجميل والحزين ده!



Post: #55
Title: Re: مش عيب عليكي؟
Author: محمد المرتضى حامد
Date: 05-06-2010, 10:57 AM
Parent: #54

Quote: حقيقة صوتها رائع رائع فوق الوصف


أستاذنا الجليل جعفر،
بحق هناك أصوات ، كالمذنَّب هالي تمر بكوكبنا مرة كل 75 عاما ،
وكما تفضلت بصدق ، يا سيدي الكريم ، إن صوتها فوق الوصف،
فهناك أصوات تشجينا ولا تضيف إليها آلات الموسيقى إن لم تعكِّرها،
كالنساء الجميلات هن يُضِفن إلى الحُلِي ولا تضيف إليهن الحُلي.
صوت هذه ال (دنيا) كما قال استاذنا عمر علي حسن ، أو هكذا فهمت ،
مهرجان للفرح الضاج غير القابل للتفسير والوصف ولا أخفيك اني ظللت
ردحا من الزمن أستمع إليها وأعاود الإستماع لإزالة الكولسترول بهذا
الطب البديل ، فأنا تكفيني حبة من ( نعناع الجنينة) عند اللزوم.

محبتي المغربله.

Post: #56
Title: Re: مش عيب عليكي؟
Author: Ahmed al Qurashi
Date: 05-06-2010, 02:28 PM
Parent: #55

Quote: مش عيب عليكي؟


خلعتنى يا مرتضى

قايلك رديت

Post: #84
Title: Re: مش عيب عليكي؟
Author: محمد المرتضى حامد
Date: 05-11-2010, 10:25 PM
Parent: #56

Quote: خلعتنى يا مرتضى

قايلك رديت

ود القرشي سلامات،
حرام عليك،
معقوله بس!!

Post: #83
Title: Re: مش عيب عليكي؟
Author: محمد المرتضى حامد
Date: 05-11-2010, 04:05 PM
Parent: #55

Quote: رغم أنّ البوست مخصص,للزولة السمحة دي..
بس ياخي أعذرني واسمح لي ,أُهديــــــك ,صوت (الناي) الجميل والحزين ده!

يا هواري ،
الناي الحزين دا نزِّل لي اللينك بتاعو،
أبى يجيني كلو كلو،
إنت طبعا عارف إنو الناي دا مفروض يكون ماده في منهج الصحه النفسية،
سالتك بالله ما تتأخر علي.

Post: #69
Title: Re: مش عيب عليكي؟
Author: محمد المرتضى حامد
Date: 05-08-2010, 12:45 PM
Parent: #37

dardiri satti
والله يا الدرديري أنا متلوم معاك والسبب غيابي الطال عن نادينا
ياخ أنا بحاول أعوِّض بوست (المعلومة بنت الميداح) اللي راح مع الهكر
وأحاول أعوض بوست (قام إتعزز الليمون) لكنها أشياء لاتعوض لأنو الناس
الكتبوا في (البوستين) إياهم تاني ما بتلمّوا كلو كلو.
أسمع دنيا دي براك
أسمع قلبك.

Post: #66
Title: Re: مش عيب عليكي؟
Author: محمد المرتضى حامد
Date: 05-07-2010, 05:21 PM
Parent: #29

حلوين من يومنا وقلوبنا كويسه
Quote: وفوق دة كلوو عندنا مطرة اليوم.

عارفه يا ندى ، دي زي قصة ( Secret ) المعروفة ونحن بناخد الجانب البيهمنا منها
على خلفية ( تفاءلوا بالخير تجدوه مقنطر راجيكم) المطر والكلام السمح زي الفوق دا
بجرجروا بعض بس النفس زاتا تكون سمحه زي ما بقول صديقنا وحبيبنا د. أحمد طراوه
الذي كانت تُسكره ( حلوين من يومنا وقلوبنا كويسه) لسيد مكاوي أيا كان المؤدي ،
أنا حالف تسمعيها قبال ما أمش.


http://www.youtube.com/watch?v=pvLHD_By230&feature=related

Post: #57
Title: Re: مش عيب عليكي؟
Author: محمد المرتضى حامد
Date: 05-06-2010, 04:05 PM
Parent: #20

Quote: أحب هؤلاء القوم(أهل اسوان)...فهم مننا ونحن منهم....

صدقت يا هواري.

Post: #58
Title: Re: مش عيب عليكي؟
Author: محمد كابيلا
Date: 05-06-2010, 04:54 PM
Parent: #2

محمد المرتضى حامد ...

تحيــــاتى ..

حمد الله ع الســــلامة !!

Quote: وليس بغائب ما قاله المبدع أحمد فؤاد نجم عن المسماة روبي
التي في صددها قال أحد الكتاب : إن حالنا لن ينعدل بعد أن تخلينا عن مقدمة إبن خلدون واتجهنا لمؤخرة روبي.


يعنى فن المؤخرة ولا شنو يا عمكــــ !!

Post: #59
Title: Re: مش عيب عليكي؟
Author: Balla Musa
Date: 05-06-2010, 06:11 PM
Parent: #58

مولانامحمد المرتضى رضى الله عنك

سلام ومرحب

ولكن..
هذا الجمال فى مكانكم هذا من زمانكم هذا من ساعتكم هذه يحتاج لديسنستايزيشن..

الحساسية كمرض يا سيدى لعوبة وغريبة..
تجد نفر يدخن التبغ الردئ ولكنه يصيبه السعال وتضيق كل مسالكه الهوائية عند استنشاق أريج وردة فواحة..

رأيت فيما يرى القارئ أنكم لوثتم ذات يوم هذا المكان بالكلام الجميل فتصدت لكم البلدية..
وأحسست فيما يحس المتابع أن الباتشس التى يستعملها الريس هنا أثبتت أن مايفوح من كبوردكم يصيب هذا المكان بالربو ويجعل رئة النضال تشهق ماتلحق. فتزبد وترغى وبقدرته يبقى الزبد ويذهب ماينفع الناس جفاءا..

يامولانا توخى الصبر وكن صيبا وطلا..
ورأيى فى هذه (الدنيا) وحلاوتها أفضل كتابته بالحبر السرى لنقرأه فى مولد النور بعيدا عن من سلف وجلف!

Post: #60
Title: Re: مش عيب عليكي؟
Author: محمد المرتضى حامد
Date: 05-06-2010, 09:13 PM
Parent: #59

الأميرة بت الشيخ ،
نخلة الدوحة،
يسعدني أن تدخلي معنا دنيا البت السمحه دنيا وهي تؤدي الفولكلور
النوبي بصحبة فرقة ( موسيقيو النيل) لمجموعة رائعة بعنوان (محطة مصر)،

قالوا معظم أعمالها جاءت على السلم الخماسي وليتني كنت أعرف
في الموسيقى لأفسر مصدر الراحه البجيبو صوت البنيَّه دي ، لما أعجز
عن فهم مقام النهوند والنقشبندي والكلام الكبار بتاع ناس الموسيقا
أكتفي بالإستمتاع الباذخ واقول ياود أنسى وخليك في مقام الميكيافيلي
والمتعة تبرر الموسيقى ،
حلِّق بروحك وبس حتى لو كان النقشبندي عضو مجلس وطني.

Post: #61
Title: Re: مش عيب عليكي؟
Author: محمد المرتضى حامد
Date: 05-06-2010, 10:40 PM
Parent: #60

(فى عشق البنات أنا فقت نابليون
طرمبيلى وقف عجلاتة بندريوم
قدمت شكوتى لحاكم الخرطوم
أجَّل جلستى لما القيامة تقوم
)

جنابو عبدالحفيظ حسن،

على الرغم من أن محمد منير رفع صوته عاليا في حفل المسرح القومي
عند منعطف حاكم الخرطوم إلا أن (دنيا) تخلت عن هذا الحاكم ضمن
أبيات أخرى من أغنية التراث ( نعناع الجنينة) في النموذج
الذي أورده الوليد وكافة النماذج لتي استمعت إليها حتى الآن.

على ما أذكر أن أحد الشعراء السودانيين ، ولعله شادول أو المرحوم حسن السر،
له قصيدة غنائية (عاطفية) بعنوان ( إنشاالله القيامه تقوم) ،
يبدو أن شعوب وادي النيل كلها في انتظار القيامه .

ياخ إنشالله الفيديو (فَتَح) معاك،
عارف لما تحصل لي حاجه زي دي ،
ما بَنوم,


كلو كلو.

Post: #62
Title: Re: مش عيب عليكي؟
Author: محمد المرتضى حامد
Date: 05-07-2010, 08:36 AM
Parent: #61

سعادة المستشار عبدالرحمن إبراهيم،

بما أنكم أهل هذا التراث، ولعل ظني في محله، فحديثك عنه لابد أن
يكون حديث خبير ويكون شخصي الضعيف قد حاول بيع المويه في
وزارة موارد المياه نفسها ( كما هو الحال في الخرطوم) وليس فقط
في حارة السقايين .

ياسيدي ناس الجنوب المصري وكل منطقة النوبة ديل ناس الشغل المَكَبرت الماخمج
بعينه، ما أنجزوا شيئا إلا أتقنوه ، هذا نهجهم منذ زمن آلاف السنين ، هم من تركوا
للعالم آثارا قالت لحضارة الهيلين والإنكا والمايا قومن وأنا أقعد مكانكن.
حضارة لو قالت : إبني أمل دنقل ، لكفاها.

(لاتساوم).

ود لاينقطع.

Post: #63
Title: Re: مش عيب عليكي؟
Author: ibrahim kojan
Date: 05-07-2010, 09:34 AM
Parent: #62

يا ديني من هذا صوت بجيك راجع.........
وأراني ساكنا هنا.....




كياديني من دا صوت

Post: #64
Title: Re: مش عيب عليكي؟
Author: خلف الله عبود
Date: 05-07-2010, 11:16 AM
Parent: #63

سعدين بطلتك يا استاذ مرتضى ... وفأنت تأتي بالإبداع دائما.

Post: #67
Title: Re: مش عيب عليكي؟
Author: محمد المرتضى حامد
Date: 05-07-2010, 08:36 PM
Parent: #64

قالت تَقصُد ايه يا اللي انت بتغازَلنا
واقف في طريقنا ان كان طلعنا نزَلنا
مواعدين بعضَنا من صغرَنا وما زلنا
ما نفوت بعضنا حتى التراب يعزلنا

Quote: ثمة ولف يامحمد..
البت دي تحن ليها سااااي ..ماتعرف هل للصوت المعجون بالنوبية ولا لجمالها ولا لي خلعة كده في العيون..
ام انه لقاح النخل بيننا .

Quote: انا بصراحة مابقدر احكم بقيت بصورة سلمية على الاشياء لاني مطعون في وجداني
وغارق في حالة ريدة ولا اسيطر على تفاصيل الان بيد الغالية..

Quote: غايتو انا من شدة اعجابي ل ااملك إلا ان اهيده اليها
فهي تحب مثل هذا الغناء مع انها طالما اعجبت بما لايستحق..

في زول تاني يا اخوانا؟
والله يا دكين ، وما طالبني حليفه ، كلامك الكتبتو كلو في محلو وعبَّر عن (الوضع) تماما في
مسألة الفنانه دنيا دي، بس كمان الإفاده بتاعت إنو زولتك ديك اللي طالما أعجبت بما لايستحق
دي في التمانيات.
بتبالغ يا عزيز ،
وبعدين شايفك بهناك قلت لأمين ما داير جدل ، أنا عندي ريده خاصه دفقتها في مكان عام،
على أية حال طالما دفقت لينا الوله بتاعك في المحطة الوسطى فانتظر كلام المشردين أمثالنا،
عافي منك يا الخمجان.

Post: #70
Title: Re: مش عيب عليكي؟
Author: khaleel
Date: 05-08-2010, 12:53 PM
Parent: #67

حباب اخو الحلويين

لبس البنية لا يتناسب مع الاغنية

لابسة علي الموضة خالص

ول مو هييك

Post: #71
Title: Re: مش عيب عليكي؟
Author: الفاتح ميرغني
Date: 05-08-2010, 07:20 PM
Parent: #70

تعرف يا محمد المواويل والناى والطقطوقات دي فيها قوة جذب زي مثلث برمودا. الطقطوقة، زي الدوبيت، دائما ما ارتبطت في ذهني بنقاء الريف و البوادي وسريرة أهلها.. نقاء تحسو في خضرتهم وتشوفو في وخضرواتهم الما عرفت المعالجة الوراثية او النعجة دولي! عشان كده غناهم بيكون نقي فيه قبسا من مزامير داؤؤد وسحرا من عصاة موسى يتلقف الآذان والوجدان!
كنت عاوز اقول ليك " النعناع سقايتو علي" ، لكن وجدت روحي أكثر ظمأ منه!
"أنا ظمآن ألاقي من حنيني ما ألاقي
أسقني وأملا من النور ليالي البواقي"

والعاقب عندكم في المسرات والحمى!


Post: #73
Title: Re: مش عيب عليكي؟
Author: ملكة سبأ
Date: 05-09-2010, 12:19 PM
Parent: #71

يادينييي انا

صوت وايقاعات تعمل في القلب كدا :

دق .. دق .. دق دللل (بعنف)

اول مرة اتعاطى هذه الدنيا وباين اني ادمنتها خلاص

وهي دي الاخترتها يا محمد المرتضي (مش عيب عليكي)
شغل عجيب .. دلل دلل ... هييييي .. دق دق دق
انتعشت جوانا ياخي
سلمت يداك

Post: #74
Title: Re: مش عيب عليكي؟
Author: محمد المرتضى حامد
Date: 05-09-2010, 08:37 PM
Parent: #73

rummana
أولا (الكسفه) اللي جاتك مع نعناع الجنينه في محاولتك تطوير ما تتلقاه مسامعهم
ليست ب (كسفه) ، الناس ديل يا رمانه البعرفوهو بقى أكتر من العارفنو نحن ذاتنا،
الأطفال لم يعودوا كما كنا ، لهذا فغن دعوة البت الحليوه لابن عمها لينهل من العسل دي
بقت في القنوات الفضائية من المواد المحافظه جدا ، يعني ممكن تجي في برنامج الأسره.

Quote: الأغنية الثانية هي "مش عيب عليك" والتي بصراحة استنفرت مشاعري وحيرتي
هي فعلا تضع الحب كحالة عندها expiry date

(مش عيب عليك) لم يتم تبني الصدق فيها كاملا، فاللواتي يقرِّعن الطاعنات في السن
على الريده (المعتقه) هن أكثر العارفات أن الحب حالة مستمرة رغم تبدل الشخوص الذين
يمرون بحقل القلب المغناطيسي وكأن لسان حالهن يقول الحب من المهد إلى اللحد.
شغل البنات العملن الفولكلور دا شغل مكايده واضح وتصفية حسابات بين من يرددن
ذلك الفولكلور لا أكثر ، مافي ريده عندها expiry date وأكرر هنا ما سردته عن عم
صديقنا في بدايات البوست.
القلب ما بقيف إلا يقيف.
شكرا يا العزيزه

Post: #75
Title: Re: مش عيب عليكي؟
Author: عبدالحفيظ حسن
Date: 05-10-2010, 06:41 AM
Parent: #74

.


Quote: ياخ إنشالله الفيديو (فَتَح) معاك،
عارف لما تحصل لي حاجه زي دي ،
ما بَنوم,


كلو كلو.



يبدو إنو الكمبيوتر بتاعى ده......
لا يفقه لغة العواطف!!!
و لا يأبه للجماليات!!!
ويصم أذنيه عن سماع الفن السامى!!!
ما هو كمبيوتر تبع ال DPK!!!!

سنحاول نوافذ أخرى...لعل وعسى...
أن نشاطركم هذه البهجة...
وتلك الأحاسيس الراقية!!



و ( يا ليـــــل أبقالى شـــــــاهد!!!)


.

Post: #76
Title: Re: مش عيب عليكي؟
Author: Ahmed al Qurashi
Date: 05-10-2010, 08:18 PM
Parent: #75

Quote: و عقبال عودة حبيبنا دكتور قرشي


شكرا عزيزى عبدالمجيد وياهو رجعنا

وصاحبك مرتضى رجع بالتقيل

مودتى

Post: #77
Title: Re: مش عيب عليكي؟
Author: محمد المرتضى حامد
Date: 05-10-2010, 10:58 PM
Parent: #76

يا باسط،
سلامات ياخ وسعيد إنك غشيتني بي جاي،
الغياب ما بالليد ولو بإيدي كنت طوعت حاجات كتيره مع الليالي،
تعرف يا ود المكي الأصوات الأصيله لما تصادف الكلام البسيط السهل
البهبش القلب ، خيارك الوحيد هو الإنشداه الممتع بغير سابق إشعار،
شوف بالله المجموعة في الرابط أدناه وأديني دعواتك.
يمكن ننجو يا ابن الصالحين.


http://www.6rob.com/PreviewSongs/ViewSinger-7/2938.html

Post: #79
Title: Re: مش عيب عليكي؟
Author: محمد المرتضى حامد
Date: 05-11-2010, 09:24 AM
Parent: #77

د. محمد حسن أبو البنات،

كلما استمع إلى مقطع ( هي تقابل الضيوف وهو يرُش المنضره) أضحك سرا،
ياخ دنيا دي بترديدها لمثل هذا الكلام بتعمل لينا مشاكل من حيث لانحتسب،
يعني على سبيل المثال شخص مثلك محاصر بين القوارير الله أعلم يكون
عندو خيارات سوى الإتصال بصديق قديم حتى إن كان مريخي القلب.
تهانَيَ الشخصية يا أبوحميد،

والله من القلب أقول ليك : مافي أجمل من المرأة البتقابل الضيوف
وتكرمهم ، وأما ناس رش المنضره فدعهم.

(اللهم يا من دَلَعَ لسان الصباح بِِنُطْقِ تبَلُّجِهِ، وسَرَّح قِطع الليل المظلم
بغياهب تلجلُجه، وأتقن صنع الفََلك الدوّار في مقادير تبرُّجه، وشعشع
ضياء الشمس بنور تأججه، يا من دل على ذاته بذاته، وتنزه عن مجانسة
مخلوقاته، وجلّ عن ملاءمة كيفياته، يا من قَرُبَ من خطرات الظُنون)
نعوذ بك من رش المنضرة
أو إطالة النظر فيها.

سلامي للتوأم.

Post: #80
Title: Re: مش عيب عليكي؟
Author: محمد المرتضى حامد
Date: 05-11-2010, 10:34 AM
Parent: #79

أستاذنا الجليل عمر علي حسن،

Quote: سقطت فى الحليب ما بينتلو عكارة

الا ليت الشباب يعود يوما ...............
لو زدت عنها لخرجت عن اطار الحكمة القائلة (العاقل من اتعظ بغيرة) وربما اصبحت عظة لغيري ..
اما لو امسكت ، فيا حسرتي واسفي علي شخب الحليب الضاوي يرهج في الكبابي ..

عجيبة هذه البنت .. وعجيب صوتها .. وعجيب هذ البوست من اوله لاخره ..



Quote: اخذته بسطحية المعجب فاستكبرت شيطان شعره .. ومازحته مرارا واصفا شيطانه بانه (ابن فتلة) فكم من مرة تسببت اغنية له
في ان اقطع صلاتي لاسمعها ثم اعود لاكمال صلاتي ..

لم يخطر لي ان شعره شيء سوي خيال فنان يجيد مخاطبة الاحاسيس .. ولكن اصالة الحزن في عينيه كانت مثارا لشك لايبلغ
اليقين ان بالرجل شيء من جراح .. فسألته يوما علي استحياء ان كان لشعره جذور في الحقيقة فصمت وغامت عيناه بشيء كالدموع
فاحترمت صمته ولم اعد لسؤاله ..

وانقطع نبض اشجانه لما علمنا من فرقة بينه وبين وردي .. ولم ينجح الاخرون فيما نجح فيه وردي فخبأ البريق وحلت مكانه اخبار
بيع المزرعة واشعار منشورة في الصحف مشبعة بخضرة الزرع ونضرة الطبيعة في ارياف الشايقية ومختومة بوجه (حد الزين)
الذي ارخي عنده سدوله حتي ذهب في الخلد فبكيناه في مهاجرنا ولم تألف مسامعنا كثيرا من الغناء بعده ..

ليس لي ان اتحدث عن تخليد وتكريم رسمي له ولاسرته فذلك امر ميئوس منه وقد ظل الخالدون من ادبائنا وفنانينا ومبدعينا لا ترفع
لهم الرايات ولا يخلد اثرهم الا في صدور الاوفياء والمحبين من ابناء شعبهم .. قولوا ما شئتم فلن تسمعكم وزارة ثقافة ولا غيرها ..


أستاذنا أبو أمير ويا أخا البدر سناء وسنى،
أصدقك القول إن كان لي أو لأخي شيقوق حسنة في هذا المنبر فهي استدراج قلمك إلى ما ابتدره
عن اسماعيل حسن في (بعد إيه) ثم مشاركتك هنا ،
على أية حال لاتعليق على كلامك في هذا البوست أو في بوست عزيزنا الطيب ،
فبعض مدحنا يُخِلُ بكلامك المائز حرفا ومعنى ، يعني بننسج على نول صالح عبدالسيد ونقول
( إنت بتجلي حُليَك وما بتجليك حُلاك).

Post: #81
Title: Re: مش عيب عليكي؟
Author: انعام عبد الحفيظ
Date: 05-11-2010, 01:47 PM
Parent: #80

Quote: منذ عقدين من الزمان سألت أحد خؤولة صديق لي ، وهو رجل ساخر صادق يحمل في حناياه مخزونا من العشق يكفي لإضاءة بصيرة
حكامنا ، سألته : ياعم (.....) الزول ممكن يحب لحدي ما يصل سن كم؟
أجابني ( وهو يحكي البرق مبتسما) مع إسبال جفون أضناها سهر ليالي الوله الطوال مشيرا إلى فؤاده:
يا مرتضى يا ولدي ، القلب دا ما بقيف من الحب إلا لما يقيف.
سرا هتفت في دواخلي : الله يبشِّرك بالخير.

شغل نهايته اللحد.

القلب لا يشيب طالماالإنسان ينظر للحياة بعين جميلة


ـــــ
إفتقدناك كثيراً

Post: #82
Title: Re: مش عيب عليكي؟
Author: محمد المرتضى حامد
Date: 05-11-2010, 02:48 PM
Parent: #81

(سلام أبو آمنة كان مرة في طفل صغير)
يا سلام عليك يا خالد ،
الفنان الحقيقي لا يحط مراسيه إلا حيث يتواجد الفن الأصيل،
نماذج أمل مرقس ومرسيدس سوزا التي أتحفتني بها وأستمع إليها للمرة الأولى ،
شئ يريح في زمن الكوليرا الذي نعيشه، زمن أصبحت البذاءة والشتم ضرب من الإبداع.
زمن علو صوت الخاوين.
عارف يا كودي ، لما أشوف - عرَضا - النماذج التافهة التي تعرض
بضاعتها في عصر التزوير والتقليد هذا أحس بعدم الأمان، ليست
الأطعمة الفاسدة منتهية الصلاحية وحدها التي تودي بنا إلى الهلاك بل
بل القبيح من ما يطلق عليه إنتاج فني ،
نعم ، دنيا أمامها تقاليد الشيخ إمام وأحمد فؤاد نجم الثرية ... وبالطبع
يتوقع منها إنتاجا في هذا الإتجاه ،
من الغرائب أن طقطوقة دنيا يا دنيا تتطابق في اللحن مع ما كتب أحمد
فؤاد نجم - إن لم تخني الذاكرة - عن زيارة نيكسون لمصر في زمن السادات
وكانت تحمل سخرية عالية ( مرحب بابا نيكسون يا بتاع الووترقيت ..إلخ).

Quote: (فنحن نعيش زمن (الهشك بشك) وإنحطاط الذوق و التذوق ... كما تعرف...)

حتى أصبح باطن الأرض خير من ظاهرها.
لك محبتي القديمة.

Post: #85
Title: Re: مش عيب عليكي؟
Author: saadeldin abdelrahman
Date: 05-12-2010, 05:23 AM
Parent: #82

Quote: وأحاول أعوض بوست (قام إتعزز الليمون)




شئ مؤسف..
قاتل الله الهكر!

-----
Best Regards

Post: #86
Title: Re: مش عيب عليكي؟
Author: هواري نمر
Date: 05-12-2010, 05:49 AM
Parent: #85

Quote: الناي الحزين دا نزِّل لي اللينك بتاعو،


يا مولانا
تحياتي واحترامي....
هاك اللنك..
http://www.youtube.com/watch?v=7BwxkyYwUlo
غالي والطلب رخيص..يا استاذ


______

Post: #100
Title: Re: مش عيب عليكي؟
Author: محمد المرتضى حامد
Date: 05-14-2010, 06:25 AM
Parent: #81

شكرا يا إنعام،
لم أغب وحدي،
أين أنت .
(دنيا) مش؟


وبمناسبة السياسة والغياب في الإنتخابات نغني:
بمقدمك (البوست نوَّر) وتقبلي مني سلام طبيعي ما مزور

Post: #97
Title: Re: مش عيب عليكي؟
Author: محمد المرتضى حامد
Date: 05-13-2010, 11:28 AM
Parent: #71

Quote: كنت عاوز اقول ليك " النعناع سقايتو علي" ، لكن وجدت روحي أكثر ظمأ منه!
"أنا ظمآن ألاقي من حنيني ما ألاقي
أسقني وأملا من النور ليالي البواقي"

والعاقب عندكم في المسرات والحمى!


يا الفاتح ود ميرغني،
(العاقب) دي فيها تفاؤل كثير،
نحن الحمى ما بتفارقنا، قاعده في العضام ساكنه مِلِك ما إيجار.
على العموم ، نعناع الجنينه دا فولكلور سوداني والموضوع دا مافيهو هذار.
sudansudansudansudansudansudansudansudansudan57.jpg Hosting at Sudaneseonline.com

تحت المطر

Post: #92
Title: Re: مش عيب عليكي؟
Author: محمد المرتضى حامد
Date: 05-12-2010, 10:36 PM
Parent: #64

التشكيلي المبدع خلف الله عبود،
شكرا يا سيدي،
هي محاولة لفتح نوافذ على جمال مجاور لم نحاول الإلتفات إليه رغم صدقه وجزالته،
الموده مقيِّله وبايته يا عزيز.

Post: #87
Title: Re: مش عيب عليكي؟
Author: محمد المرتضى حامد
Date: 05-12-2010, 08:23 AM
Parent: #61

Quote: Quote:
Quote: وليس بغائب ما قاله المبدع أحمد فؤاد نجم عن المسماة روبي
التي في صددها قال أحد الكتاب : إن حالنا لن ينعدل بعد أن تخلينا عن مقدمة إبن خلدون واتجهنا لمؤخرة روبي.



يعنى فن المؤخرة ولا شنو يا عمكــــ !!

هذا إن جاز استعمال كلمة (فن) هنا - يا عمك.
سلامات يا كابيلا،

Post: #88
Title: Re: مش عيب عليكي؟
Author: محمد المرتضى حامد
Date: 05-12-2010, 12:43 PM
Parent: #87

Quote: الحساسية كمرض يا سيدى لعوبة وغريبة..
تجد نفر يدخن التبغ الردئ ولكنه يصيبه السعال وتضيق كل مسالكه الهوائية عند استنشاق أريج وردة فواحة..

رأيت فيما يرى القارئ أنكم لوثتم ذات يوم هذا المكان بالكلام الجميل فتصدت لكم البلدية..
وأحسست فيما يحس المتابع أن الباتشس التى يستعملها الريس هنا أثبتت أن مايفوح من كبوردكم يصيب هذا المكان بالربو ويجعل رئة النضال تشهق ماتلحق. فتزبد وترغى وبقدرته يبقى الزبد ويذهب ماينفع الناس جفاءا..

يامولانا توخى الصبر وكن صيبا وطلا..
ورأيى فى هذه (الدنيا) وحلاوتها أفضل كتابته بالحبر السرى لنقرأه فى مولد النور بعيدا عن من سلف وجلف!


د. بله موسى،
(رغم بُعدي برسل سلامي ويحوي شوقي كل احترامي )
الكلام القلتو فوق جميل ومسنود إلى حقائق الطب المحضه، وأعجبني كثيرا وصفك للحساسية
بالغريبة اللعوب .
بالتبادي يا العزيز يفرحني أن يعجبك ما أكتب وأن ترى فيه (تلويثا) للمنبر بالياسمين ،
لكن هذا الياسمين إذا أصاب الغير بالإسفكسيا فعلينا أن نبتعد حتى لايرحل بعض أهل
النضال والواهمين ، وأرى ( فيما يرى القارئ) أن أولئك أبرياء لأنهم في الأصل ضحايا
للجالسين على الجنبات الذين يصفقون لهم ويُزيِّنون لهم فعلهم على أنه نضال وهم في
الواقع يسخرون منهم، ضحايا بحق لخبث المصفقين الذين جعلوا من أولئك الأبرياء مادة
كوميديا موغلة في السذاجة.
كنت أشرت لأولي الأمر ، وأظنك لم تعنهم بمصطلح (البلدية) واستجابوا حتى ولو بتقديم
جرعة أنتيهستامين ونتمنى أن يفيد منها ، إلى جانب المعنيين ، الأكمه و الأبرص وكل من
أتى إلى هنا بقلب غير سليم.

Quote: ورأيى فى هذه (الدنيا) وحلاوتها أفضل كتابته بالحبر السرى لنقرأه فى مولد
النور بعيدا عن من سلف وجلف!

والله والله يا حكيم هذا هو حالي هنا،
الكتابة بالحبر السري للإبقاء على الحبل السري بيننا وبين من سوانا،
ما كنت لأستطع التعبير عن حالي بمثل هذا،
والله تحدثت نيابة عني فأوفيت،
كلامك سمح ..
سمح جد.

Post: #89
Title: Re: مش عيب عليكي؟
Author: mamkouna
Date: 05-12-2010, 12:56 PM
Parent: #87



( من طوٌل الغيبات..عاد بالغنائم )

( دنيا مسعود ) مرة واحدة !!؟؟
( دنيا ) دي يا مرتضى ( الحبة المهدئة ) و ( كبسولة ما قبل النوم ) كلما كان يومي ( كثير الغيومِ,ثقيل النسيمِ,كثير الضجر )...
صوت طبيعي , قوي , ريلاكسنغ..يهدهد روحي, يحملني في جناحِ أغر....
يأخذني حيث لا أمنيات تخيب و لا كائنات تمر...
صوت غريب,عجيب, يتميز فوق ما يتميز بخاصية (فوتوغرافيك)...
تشعر و انت تسمعه بالفلاحات لابسات الجرجار و الطرحة السودا و شايلات القلل و ماشات على الترعة..
تحس بالفلاحين شايلين الشومات و بيدغدغوا المكان...ماعدا طبعاً أبو منضرة داك :)

في ذمتك في ( مش عيب عليكي ) ما شفت مرت الولد ( الممكونة ) و هي قاعدة قدام الفرن و قداما صاج الفطير المشلتت بينما وقفت ( زوزو حمدي الحكيم ) في أعلى سلم (الدوٌار ) و هي تحدر و ترغي و تزبد..

تقولين ( ماذا ) تقولين ( ويحي ) !؟؟



Post: #90
Title: Re: مش عيب عليكي؟
Author: محمد المرتضى حامد
Date: 05-12-2010, 05:26 PM
Parent: #89

Quote: يا ديني من هذا صوت بجيك راجع.........
وأراني ساكنا هنا.....

يا كوجان،
الزوله دي - باستثناء الطقطوقة التي استهللت بها البوست ( دنيا يا دنيا) - لايجوز
أن تسمع بقية أغانيها إلا وحدك ، يعني شروط إستماع للإستمتاع لا أكثر.
أتفق مع كثير من المتداخلين ، بالذات القالوا (ديني أنا) زي حالتك وملكة سبأ ، في إنو
في نوعية من الأداء تتسبب في شطب قائمة مطولة من أدعياء الطرب ، يعني لما تسمع زي دنيا
مسعود دي بتتزود بسوفتوير ضد الفيروسات يكشف ليك النصابين والنصابات المنتشرين في
النواصي والأستوديوهات البيدخلوا إضنين المساكين بطريقة التروجان.
أها زي ديل تاني بتكتشفهم بمجرد ما ينطقوا الحرف الأول ،
هذا إن كان هنالك حرف ثان...

Post: #91
Title: Re: مش عيب عليكي؟
Author: Osman Musa
Date: 05-12-2010, 06:27 PM
Parent: #90

ود المرتضى حبابو
شنو يازول أنت وين أيامك ؟
يا أخى اموت فى أبوسمبل زاتو .
يا ود حامد الصعيد ده حقنا . حقنا جد دم ولحم .
بنت مسعود يا ود المرتضى سمحة من مجاميعو .
شفتها ليك ملبسنها فلاحى عديل .
وبتغنى فى أغنية ( اكذب عليك للفنانة وردة )
والله يا ود المرتضى وقت سمعتها وهى بتجلع فى الأغنية كنت داير ادى
التلفزيون شلوت وانط من الشباك .
يا أخى هادى عندها صوت عجيب .
تحياتى والله يفرهد أيامك .

Post: #93
Title: Re: مش عيب عليكي؟
Author: محمد المرتضى حامد
Date: 05-13-2010, 08:37 AM
Parent: #91

Quote: حباب اخو الحلويين

لبس البنية لا يتناسب مع الاغنية

لابسة علي الموضة خالص

ول مو هييك


خليل السمح،
بالله يا باشمهندس ركِّز في الصوت،
الصوت الصوت يا خِلِّي،
بعدين خفة الروح والحركة التي تشي بذكاء غير عادي،
عارف يا خليل، السماحه دي بتتجلى في حاجات كتيره غير الشكل،
وبعدين ياخ الفن في إنها تلبس آخر موضه وتغني فولكلور،
يعني تأشر شمال وتلف يمين عشان الحلوين الزيّكم ديل يجيهم إحساس
كده زي عفصة التلجه ، لاتعرفا حاره لابارده.
بعدين ياخ سؤال ، حارم وصلي مالك؟

Post: #94
Title: Re: مش عيب عليكي؟
Author: Ahmed al Qurashi
Date: 05-13-2010, 09:27 AM
Parent: #93

Quote: بالله يا باشمهندس ركِّز في الصوت،


فى صوت نسائي أحلى من صوت عائشة الفلاتية

Post: #99
Title: Re: مش عيب عليكي؟
Author: محمد المرتضى حامد
Date: 05-13-2010, 10:11 PM
Parent: #94

Quote: يادينييي انا

صوت وايقاعات تعمل في القلب كدا :

دق .. دق .. دق دللل (بعنف)

dunia.jpg Hosting at Sudaneseonline.com


ملكة سبأ،

دق .. دق .. دق دللل

9.5 بمقياس ريختر..

Post: #95
Title: Re: مش عيب عليكي؟
Author: الرشيد شلال
Date: 05-13-2010, 09:40 AM
Parent: #93


سلام سيدى ود مرتضى والف تحية

استمعت لبعض المقاطع ولم احاول بعد مانصحت به شيقوق خوفا من عرفان الظاهر

ولكن غبت فى الايقاع ممتزجا بهذا الصوت الشجى والذى يحمل ايقاعا منفردا

ان التأمل المثالى الخالى من القرض يجعلنا ندرك الجمال من ايقاع الالة والصوت

صحيح أن العقل يكون خادما أو أداة للإرادة ولكنه من الممكن أن يرتقي فيما وراء الحاجات والرغبات

فينظر إلى الموضوع الجميل لا من حيث كونه موضوعا او منبها لرغبة

ولكن من حيث دلالته الجمالية فحسب وعندئذ يكون الإنسان مشاهدا خالي الغرض

أو مشاهدا نزيها وبالتالي يصبح هناك نقاء منشود لدنيا ومحبب للنفس .

فلنرتفع فوق الكلمات و الصوت والحضور لدنيا وننظر الى ماوراء ذلك نجد الكثير من الجمال

لك منى مرتضى التحية لصفاء الاختيار الجميل ( الايقاع سر الحياة).

كل الود واكيد الاحترام



Post: #96
Title: Re: مش عيب عليكي؟
Author: الطيب شيقوق
Date: 05-13-2010, 11:21 AM
Parent: #95

ود المرتضى

Quote: أستاذنا أبو أمير ويا أخا البدر سناء وسنى،
أصدقك القول إن كان لي أو لأخي شيقوق حسنة في هذا المنبر فهي استدراج قلمك إلى ما ابتدره
عن اسماعيل حسن في (بعد إيه) ثم مشاركتك هنا ،
على أية حال لاتعليق على كلامك في هذا البوست أو في بوست عزيزنا الطيب ،
فبعض مدحنا يُخِلُ بكلامك المائز حرفا ومعنى ، يعني بننسج على نول صالح عبدالسيد ونقول


في انتظارك واستاذنا الفاروق (ابو امير) بهناك

الشهقة ما بتفكك منى يا زول

Post: #98
Title: Re: مش عيب عليكي؟
Author: عمر علي حسن
Date: 05-13-2010, 12:28 PM
Parent: #96

مصيبتي ايها العزيزان انه ان لم يكن الصبر قاتلي .. فإن الشوق قاتلي ..
لاتتركاني لهما .. وعودا بالجديد .. والا فان نعناع الجنينة لن يسلم من شراهتي ..
انا كالنمل بي لهفة لحمل السكر .

عمر علي حسن

Post: #101
Title: Re: مش عيب عليكي؟
Author: محمد المرتضى حامد
Date: 05-14-2010, 11:40 AM
Parent: #95

DuniaMasoud2.jpg Hosting at Sudaneseonline.com

Post: #102
Title: Re: مش عيب عليكي؟
Author: محمد المرتضى حامد
Date: 05-14-2010, 08:30 PM
Parent: #101

Mamkouna الكتّابه البتقعِّد الكلام،
والله ما غبت عن المنبر وما أتيت بغنائم،
إعتبريها استراحة (محارد) ، المقولة التي أسيئ استخدامها،

دنيا الإسكندرانية قامت بعمل يستوجب الإحترام بحق،
الزوله دي ، كما قرأت، تركت الإسكندرية الجميلة وهي في سن الواحدة
والعشرين ولم تترك قرية أو بلدا أو كَفرا أو نجعا إلا زارته في مهمة بحثها
عن الفولكلور في مصادره ومنابعه دون أن تعينها جهة رسمية أو شعبية،
وحملت تلك المسئولية وحدها حتى وصلت بالأصالة إلى ماهي عليه.
هي فنانة شاملة فإلى جانب الغناء والصوت السماوي فهي ممثلة
قديرة ونالت ثناء الكبار في هذا الجانب رغم قلة أدوارها،
المهم، يا ممكونه، الروح الحلوه،
في ناس بكل بساطه بيوفروا لينا أوكسجين ويثروا الوجدان ربنا يخليهم.


تستحق الإحترام ،

مودتي يا ممكونه وتحايا لكل الممكونين.

Post: #103
Title: Re: مش عيب عليكي؟
Author: محمد المرتضى حامد
Date: 05-15-2010, 07:01 AM
Parent: #102

Quote: يا ود حامد الصعيد ده حقنا . حقنا جد دم ولحم .
بنت مسعود يا ود المرتضى سمحة من مجاميعو

بالله يا عثمان شوف الثانيه واحد وخمسين من الفيديو
والطريقة التي أدت بها ( راجل مِلو هدومو في البيت حاكما مرا)..
ياعثمان هنالك بعض الأهداف لايحرزها إلا قلة من اللاعبين.
أهداف كدا ( من مجاميعو).

Post: #104
Title: Re: مش عيب عليكي؟
Author: الطيب شيقوق
Date: 05-15-2010, 09:17 AM
Parent: #103

Quote: في ناس بكل بساطه بيوفروا لينا أوكسجين ويثروا الوجدان ربنا يخليهم.


وفي ناس بودوك ال ICU طوالي

Post: #105
Title: Re: مش عيب عليكي؟
Author: خالد علي محجوب المنسي
Date: 05-15-2010, 10:59 AM
Parent: #104

وعاد الحبيب المنتظر عوداً حميدا مستطاب

وليت كل الغياب لهم عود

من دونكم بندخل لكن
ندحل ونحرج وهي تكسونا
( الإحباط )

نور على نور وربنا يتم نوره
بقدوم منى خوجلي وسماح وسلمى صبحي وسلمى سلامة وغيرهنَّّ كُثر
وعود السنجك وبوبا وايمن وابوالقاسم الجافي ومجافي

تحياتي مرتضى
أفرحتنا

بس نشم ريحتكم يا أعز الناس

Post: #106
Title: Re: مش عيب عليكي؟
Author: الطيب شيقوق
Date: 05-15-2010, 11:26 AM
Parent: #105



ود المنسي


دا بوست اولاد بندر وكدا . بعد تكون ود بندر زينا كدا وتخلي الدوباي بتاعك دا عشان تجي تكتب هنا يا مسنوح

في البوست دا بيعملوا ليك تفتيش في الباب - بفتشوا ضرعاتك لزوم يشوفوك لابس سكين ولا حجبات

Post: #107
Title: Re: مش عيب عليكي؟
Author: محمد المرتضى حامد
Date: 05-15-2010, 12:20 PM
Parent: #106

(استمعت لبعض المقاطع ولم احاول بعد مانصحت به شيقوق خوفا من عرفان الظاهر

ولكن غبت فى الايقاع ممتزجا بهذا الصوت الشجى والذى يحمل ايقاعا منفردا

إن التأمل المثالى الخالى من الغرض يجعلنا ندرك الجمال من ايقاع الالة والصوت

صحيح أن العقل يكون خادما أو أداة للإرادة ولكنه من الممكن أن يرتقي فيما وراء

الحاجات والرغبات فينظر إلى الموضوع الجميل لا من حيث كونه موضوعا او منبها لرغبة

ولكن من حيث دلالته الجمالية فحسب وعندئذ يكون الإنسان مشاهدا خالي الغرض

أو مشاهدا نزيها وبالتالي يصبح هناك نقاء منشود لدنيا ومحبب للنفس .

فلنرتفع فوق الكلمات و الصوت والحضور لدنيا وننظر الى ماوراء ذلك نجد

الكثير من الجمال.

لك منى مرتضى التحية لصفاء الاختيار الجميل " الايقاع سر الحياة"
)

الرشيد شلال الجمال
sudansudansudansudansudansudansudansudansudan59.jpg Hosting at Sudaneseonline.com

Post: #108
Title: Re: مش عيب عليكي؟
Author: خالد علي محجوب المنسي
Date: 05-15-2010, 07:12 PM
Parent: #107

Quote: ود المنسي


دا بوست اولاد بندر وكدا . بعد تكون ود بندر زينا كدا وتخلي الدوباي بتاعك دا عشان تجي تكتب هنا يا مسنوح

في البوست دا بيعملوا ليك تفتيش في الباب - بفتشوا ضرعاتك لزوم يشوفوك لابس سكين ولا حجبات


هههههههههههههههههههههههههههههه
نحن بنعرف طباع الحرباء
لكن الكلام إت كيفك بتقعد تقرأ

مع أولاد المدن نندس في النون وشايلين أيسكريم لولي
وعاملين في الشعر جل وفي الوشيش ساونا وصنفرة ( نرقش )
ولما تجي علي الصي ولا الرفيق الفسل تلقانا
بالصاد صادين وجرابنا ملان دوبيت وتمر وطحنية
والطاقية تحت الحجاب المعقود
هدية أم زين
وما مشرية من السوق
وجفير الخوسة فايت الكوع
وسيرو مع العضل معقود

هييييييع يا السهيت
نحن ولاد العز البنضرب الكأس
البدورنا بندورو
والمابدورنا
بنعمل لي دوماس

وجننا ساكن الموردة

Post: #109
Title: Re: مش عيب عليكي؟
Author: Osman Musa
Date: 05-15-2010, 07:24 PM
Parent: #108

والله يا الطيب شيقوق بتبالغ .
ناس تودى ال ICU عديل ؟ الكترابة

Post: #111
Title: Re: مش عيب عليكي؟
Author: محمد المرتضى حامد
Date: 05-15-2010, 11:59 PM
Parent: #105

خالد المامنسي،
(بقدوم منى خوجلي وسماح وسلمى صبحي وسلمى سلامة وغيرهنَّّ كُثر
وعود السنجك وبوبا وايمن وابوالقاسم الجافي ومجافي
)
ديل ناس ننتظر عودتهم عشان نوقف الكيبورج ونقرأ فقط،

شكرا يا خالد على حضورك أداء الدنيا النجيضه،،
كتبت الصحفية رنا حايك عن مسيرة (دنيا) ما يلي:



«التروبادور» دنيا مسعود

فجأة تعطّل الميكروفون. وضعته دنيا جانباً بهدوء وجلست إلى حافة الخشبة وواصلت الغناء.
كان ذلك في اللقاء الأول الذي جمع المغنّية المصرية دنيا مسعود بجمهور مسرح بيروت، في مناسبة
يوم المرأة العالمي (2001). يومها أسرت دنيا الحاضرين بأدائها التراث الصعيدي عندما اختارت
مربّعات «نعناع الجنينة» مدخلاً الى بيروت. أخذتنا يومها كالعادة في رحلة بين الأقاليم المصرية
لاكتشاف تراثها الغنائي. كانت أسوان نقطة البداية مع بضعة مربوعات من قصيدة «نعناع الجنينة»
الغزلية التي تناقلتها الأجيال حتّى تجاوزت الألف بيت، وتغنّى على إيقاع السلّم الخماسي الذي يميّز الموسيقى
الافريقية.
دنيا مسعود في أمسياتها تتجول دنيا عادة بين مدن الدلتا، لتقدم «الغنى الفلاحي» الناعم الذي تدعو فيه
الفتاة عاشقها إلى التمهل في اندفاعه وتخاطبه في أغنية “روّق القناني”. تصل إلى مدن القناة وبورسعيد
«الصامدة»، فنسمع أغاني الخنادق على إيقاع السمسمية. أما الإسكندرية فتتجلى “كوزموبوليتيّتها” في غلبة
إبداع الفرد على إبداع المجموعة، وتفرز أغاني مثل «من فوق شواشي الدرة» لبدرية السيد.
يوم رمت دنيا الميكروفون في بيروت قبل سنوات، كانت تقف عند أقرب نقطة ممكنة من مفهومها لـ“الفولكلور”
كفنّ شعبي حيّ وتفاعلي. ذلك الفن الذي «تعلّبه للأسف مؤسسات رسمية أو خاصة مدعومة بتمويل أجنبي، لتحتكر
تسجيلاته وتكتفي بعرضه في إطار سياحي استشراقي يضرّ بجوهره»، كما تقول. واليوم تعود الى بيروت، كأنها
لم تغادرها. عاشت من بعيد العدوان على لبنان، فأعادتها المعاناة إلى مأساة بني سويف التي سرقت منها
بعض أقرب الأصدقاء الصيف الماضي.
بدأت جمع الفولكلور ذات يوم من 2001، واستمرت كل هذه السنوات من دون أي دعم. في تلك الرحلة المتواصلة
الى أعماق الثقافة الشعبية المصرية، كان عتاد دنيا بسيطاً: جهاز تسجيل وورقة وقلم، وحفنة من الجنيهات
للتنقل بالقطار بين منطقة وأخرى. ليس لدى هذه الفنانة الشابة، الآتية من المسرح، هاجس جمع التراث
والحفاظ عليه. كل ما في الأمر أنها التقطت من الفولكلور جانبه الحيّ الذي يشرّع الغناء على مادة حسية
صريحة «أصبحت ممنوعة في مجتمعاتنا الوهابية»، وهذه المادة تنتظم عادةً في قالب درامي وجدت فيه دنيا
صدى عشقها للمسرح. مثّلت دنيا في أعمال مسرحية في القاهرة، بينها «جنون البشر» للينين الرملي (1996)،
و«مساء الخير يا مصر» لناصر عبد المنعم (1997) الى جانب سوسن بدر ومحمد منير. وفي التلفزيون،
كان لها أدوار صغيرة آخرها في مسلسل خيري بشارة «قلب حبيبة» الذي يعرض في رمضان المقبل. ونشاهدها
قريباً على الشاشة الكبيرة في «شقة مصر الجديدة» من إخراج محمد خان وفي «جعلتني مجرماً» لعمرو عرفة.
لكنّ الغناء كان له الحصة الكبرى في مسيرتها، هامت على وجهها كالتروبادور في حارات مصر للملمة نثار
الذاكرة الجماعية. ومشوار دنيا كان صعباً. اضطرّت للعمل نهاراً في محلات ملابس أو «جزارة» أو حلاقة...
ومع نهاية يوم العمل المضني، كانت تعود إلى بروفاتها المسرحية وحفلاتها الغنائية.

Post: #110
Title: Re: مش عيب عليكي؟
Author: محمد المرتضى حامد
Date: 05-15-2010, 08:36 PM
Parent: #104

Quote: ان لم يكن الصبر قاتلي .. فإن الشوق قاتلي ..


استاذنا عمر علي حسن.

Post: #112
Title: Re: مش عيب عليكي؟
Author: Ahmed al Qurashi
Date: 05-16-2010, 03:31 PM
Parent: #110


شوفوا الزول دا بيعزف المقطوعة الحبشية دي كيف

Post: #113
Title: Re: مش عيب عليكي؟
Author: Osman Musa
Date: 05-16-2010, 04:29 PM
Parent: #112

د / أحمد القرشى
سلامات
الرئيس كلينتون هو الرئيس الأفضل فى التاريخ مافى كلام .
ال PRESIDENT CLINTON زول ذكى جد يا أحمد . شوف فى الدعاية الانتخابية حقتو
جاب الفوز بالسكسفون بالفن مش بالخج .
حايم 50 ولاية يعزف ويشتت فى الفرح للمساكين . يا سلام .
والله يا أحمد يوم سمعتو يتحدث عن الة السكسفون وعن البلجيكى الذى اخترع
الآلة سنة 1844 . ودخول الالة أمريكا . غايتو رئيس فنان وحريف ومك فى السياسة
.. وين ناس قريعتى راحت ؟
شفتو بجضم شغل الحبش ده كيف ؟
تحياتى

Post: #114
Title: Re: مش عيب عليكي؟
Author: تبارك شيخ الدين جبريل
Date: 05-16-2010, 05:22 PM
Parent: #113

عثمان موسى ....

Quote: شفتو بجضم شغل الحبش ده كيف ؟


قول بسم الله ... فيديو احمد قرشى دا وهمة سااااكت ...

والله شغل الحبش دا ... ما يجضموهو إلاّ الحبش زاتم (وغاندى) ...

يا هو دا اللحن الأصلى العزفو "كلينتون:







... المهم ....

Post: #115
Title: Re: مش عيب عليكي؟
Author: Ahmed al Qurashi
Date: 05-16-2010, 05:36 PM
Parent: #114

Quote: قول بسم الله ... فيديو احمد قرشى دا وهمة سااااكت ...



من خدعنا انخدعنا له

Post: #116
Title: Re: مش عيب عليكي؟
Author: تبارك شيخ الدين جبريل
Date: 05-16-2010, 05:58 PM
Parent: #115

احمد قرشى ...

Quote: من خدعنا انخدعنا له


ديل ناس "إنتو" ...

نحن غايتو ... من خدعنا ... We investigated his a





... المهم ....

Post: #117
Title: Re: مش عيب عليكي؟
Author: Osman Musa
Date: 05-16-2010, 05:59 PM
Parent: #115

بيل كلينتون معد الكلمات المتقاطعة لجريدة "نيويورك تايمز"



نشرت وكالات الأنباء عام 2007 م أن جريدة «نيويورك تايمز» نشرت مسابقة الكلمات المتقاطعة اليومية في أحد أعدادها ولكنها لم تكن من إعداد العبقري "بيل شورتز" الذي يعد الكلمات المتقاطعة بصفة يومية في الجريدة منذ 17 عاما .. ولكنها كانت في ذلك العدد من إعداد "بيل كلينتون" الرئيس الأميركي الأسبق بمناسبة صدور عدد ممتاز عن الـ«بيبي بومرز» (جيل الاميركيين الذين ولدوا بعد الحرب العالمية الثانية) ، وقررت هيئة التحرير في وجود بيل كلينتون بينهم ان تكون الكلمات المتقاطعة فيها عن ذلك الجيل ، واقترح كلينتون ان يعد الكلمات المتقاطعة في هذا العدد واحد من ابناء ذلك الجيل وجاء الإختيار على بيل كلينتون نفسه بعد ان اعترف لهم الى ادمانه على حل وإعداد الكلمات المتقاطعة ، وليس سرا ان كلينتون يهوى حل الكلمات المتقاطعة منذ ان كان في البيت الابيض خاصة تلك التي كانت تنشر في جريدة «نيويورك تايمز» والمعروف عن كلينتون انه متعدد الهوايات والمواهب فهو يعزف على آلة الساكسفون بمهارة ويعزف على الغيتار، ويتحين الفرص للاستمتاع بلعبة الغولف ، وقد زاد عشق كلينتون للكلمات المتقاطعة بعد ان خرج من البيت الابيض وقال في الفيلم التلفزيوني الوثائقي "ويرك بلاي- " لعب العمل - عن الكلمات المتقاطعة: «في سني هذا (ستين سنة)، اخاف من امراض الشيخوخة خاصة الزهايمر ، ولهذا أقوم بحل الكلمات المتقاطعة بكثرة حيث أن ابحاث علمية نُشرت مؤخرا أكدت على ان الكلمات المتقاطعة تساعد على منع هذا المرض او التخفيف من اثره بعد بدايته" ، وقام بيل كلينتون بالفعل بإعداد الكلمات المتقاطعة في ذلك العدد وجاءت ناجحة للغاية ونالت إعجاب الجميع ، ويقال أن قسم الكلمات المتقاطعة بالجريدة كان قد وضع التصميم – خاصة وأن كلينتون ليس محترفا في إعدادها - ثم ارسل القسم تصميم شبكة الكلمات المتقاطعة الى كلينتون وطلب منه وضع الاسئلة والاجوبة طبقا للتصميم ، وجاء إنجاز كلينتون في الكلمات المتقاطعة بذلك العدد ناجحا للغاية وقد قام ملايين القراء بزيارة موقع الجريدة على شبكة الانترنت لحل كلمات كلينتون المتقاطعة وأبدوا إعجابهم المتدفق بها . وقال بيل شورتز كاتب الكلمات المتقاطعة في جريدة "نيويورك تايمز" في حوار لجريدة الشرق الأوسط نشرته في أحد أعدادها عام 2007 ، انه كان يعرف ان الرئيس السابق بيل كلينتون يحل كلماته المتقاطعة منذ ان كان رئيسا، وانه دعاه الى البيت الابيض اكثر من مرة، وتحدثا عن تاريخ وفن واسرار الكلمات المتقاطعة.

..
عزيزنا تبارك
سلامات
يا أخى الرئيس كلينتون ده زول فنان فنان .
والله يا تبارك انا تابعتو أيام الدعاية الانتخابية كان عاريف يهبش
الناس فى ياتو مكان . اقتصاد ودوبيت وسكسفونات وكلمات متقاطعة وكلو .
يا أخى تحياتى





Post: #118
Title: Re: مش عيب عليكي؟
Author: محمد المرتضى حامد
Date: 05-16-2010, 06:16 PM
Parent: #115

Quote: والله شغل الحبش دا ... ما يجضموهو إلاّ الحبش زاتم (وغاندى) ...

طبعا يا القرشي المقطوعة التي أوردتها فيها دمج ومزج غير متقن من
صانعها لأنو حركة (جضوم) صاحبنا أثناء النفخ على الساكس لاتواكب الصوت
وذات الأمر ينطبق على حركة الأصابع على المفاتيح وتفريعا على هذا يكون
الكليب الذي أتى به (المهم) شيخ الدين أقرب إلى الحقيقة ، هذا إن أبقت
لنا التكنولوجيا شيئا من الحقيقة،

مسألة إنو كلينتون (بجضِّم) الساكس دي ما غريبه عليهو ،
حريف مش كدا،
حريف جدا.

عثمان موسى ، يقال أن كلينتون وكارتر ونيكسون وكيندي ( ناس كاكا) أو
( مجموعة الكونكاكاف) ديل أقرب إلى نفوس الأمريكان من غيرهم قبل أن يأتي
ولدنا الفرده الفريد في عصرو.


دنيا .. معليش للتخريمة.

Post: #120
Title: Re: مش عيب عليكي؟
Author: Osman Musa
Date: 05-16-2010, 06:39 PM
Parent: #118

أستاذ ودالمرتضى
سلامات
ولدنا الفريد فى عصرو .
معصور فى حدريب والدنيا شوك . الا برضو اهو بدافس
مع المكاجرين ديل .
شايف اليومين ديل شعر رأسو شاب من عصر الكجار . بس ولدنا برضو
زول فنان وبجضم الكلام والغناء وعندو فهم كتير فى شعر عمنا LANGSTON HUGHES
وحريف فى الباسكت بول .

Post: #119
Title: Re: مش عيب عليكي؟
Author: عمر علي حسن
Date: 05-16-2010, 06:30 PM
Parent: #113

QUOTE
استاذنا عمر علي حسن (بالاخضر)
UNQUOTE

استلذي محمد المرتضي حامد

( هوي) .. ايوه .. نعمين ..
وكلها ادوات اجابة واستعداد للسمع .. وانا لست مستعدا فقط وانما متلهف للسمع ..

دخل عليّ اللواء حسين حمو المكتب في ليلة كانت مقمرة .. ونسمة من النيل تندفع رقيقة من نافذة المكتب
فاتلقاها بصدر عاشق .. وعيناي في عمق موجة يرقد القمر علي صدرها ويبثها حبا وعشقا مرسلا اليهما
معا من قلبي الذي كان وجيبه (يجيب الضهبان) ..

في ذلك الغياب الكامل كان صوت الفنان وردي يكمل اللوحة من المسجل (الاكاي) الواقف طولا علي المكتب
وهو يردد رائعة اسماعيل حسن "لو بهمسة" .. وانا غارق في النيل وسابح مع القمر وطائر مع الشعر واللحن ،
فَصَدَ صوت اللواء حسين غيبوبتي واسال دم وحدتي وانفرادي بهذا الجمال الذي ما كان يري الا من مكتبي في
الطابق الاعلي لوزارة الداخلية .. وساذكر لكم يوما انني احببت هذا المكتب واتحذته خليلا ....

صاح العم حسين "ياولد انت سماعة ؟! " فأجبته معاتبا : "نشفت البحر وطفيت القمر وقطعت الوتر سعادتك ! "
فرد ضاحكا " كمان فيها شعر "

انا مولع بالجمال علي اطلاقه (رغم تعميشة) لم تفلح معها العدسات ومباضع جراحي البصر .. والجمال (علي اطلاقه)
لايري الا بالعين المجردة حتي ولو كان مسموعا او محسوسا او مكتوبا .. أو أو أو .. والله الذي وصف ذاته بانه "يديع
السموات والارض" لم يغب عنه جل وعلا ان يهبنا من الحس ما يرتقي بنا لنتذوق ما ابدع هو .. وما ابدع عباده وخلقه ..

فاذا غنت مش عيب عليكي .. ولكزني احدهم بقوله (استاذنا عمر علي حسن) .. وزاغ .. فلا بد ان افيق (مخضوضا) وبي
من الشك ما يخلط حقيقة (مش عيب عليكي) بخيال المناداة من حضن الجمال في (كون) الحقيقة الدافئة دفء الصوت والنغم
والكلمة ..

تاني .. ياسلام علي هذا البوست من اوله لاخره .. وياسلام عليك ..

عمر علي حسن

Post: #121
Title: Re: مش عيب عليكي؟
Author: Ahmed al Qurashi
Date: 05-16-2010, 08:31 PM
Parent: #119

Quote: ديل ناس "إنتو" ...

نحن غايتو ... من خدعنا ... We investigated his a


الأخ العزيز / تبارك

دائما أحسن الظن بالآخرين

الأمر لا يستحق كل ذلك

وسنتحقق في المرات القادمة

أعذرني أنا بتاع حقيبة لا اعرف في هذه التقنيات كثيرا

ومنكم نتعلم

فلنستمتع بهذا البوست

مودتي وتقديري

Post: #122
Title: Re: مش عيب عليكي؟
Author: تبارك شيخ الدين جبريل
Date: 05-16-2010, 08:36 PM
Parent: #121

Quote: دائما أحسن الظن بالآخرين

الأمر لا يستحق كل ذلك


تمام سعادتك ...








... المهم ....

Post: #123
Title: Re: مش عيب عليكي؟
Author: Manar Mahsoub
Date: 05-17-2010, 09:39 AM
Parent: #122

ود المرتضى سلام ....و الله عيب علي و عيب كبير كمان المالقيت فرصة للاستماع الى صانعة الحياة و سلندر الاوكسجين ....

Post: #124
Title: Re: مش عيب عليكي؟
Author: عمر علي حسن
Date: 05-17-2010, 03:39 PM
Parent: #123

UP

الم اقل لك (لكزني) وزاغ ؟

Post: #125
Title: Re: مش عيب عليكي؟
Author: محمد المرتضى حامد
Date: 05-18-2010, 11:41 AM
Parent: #124

Quote: الم اقل لك (لكزني) وزاغ ؟

أستاذي الجليل أبو أمير،
قطعا لست أنا المعني بهذا الخطاب،
وبحق من سمك السماء بغير عمد مداخلتك قبل الأخيرة
تحتاج مراجعة وجدانية قبل أن يُرَد عليها أو بالأحرى
الإسترسال معها والإنجراف السعيد الجزل في تيارها،
لكن زي ما قال التجاني سعيد ضاع الكلام وماتت حروف
اللقيا قبال أهمسا في ساعات نحِسات وظروف مناخة
غير مواتية.

دام صفاك يا سيدي.

Post: #126
Title: Re: مش عيب عليكي؟
Author: عمر علي حسن
Date: 05-18-2010, 07:23 PM
Parent: #125

يا مولانا
انت وايم الله المعني بقولي لكزني وزاغ .. ومعك صديقك الطيب شيقوق .. من الباطن !!

ولكزني وزاغ ليست من فصيلة ضربني وبكي .. رغم انك وأخانا شيقوق لم ترأفا بشيبتي واستدرجتماني (باعترافكما المسجل)
للسير حافيا عبر نصف قرن من الزمان بين بعد ايه ومش عيب عليكي .. فمددت لسانا طويلا لوقار لازمني فاقلعت عن صيحات
الطرب التي كانت تتقافز من عمق وجداني في حضرة الشعر واللحن الجميل والصوت الملهم ..

تتدافع صيحاتي (هلاّ هلاّ) كزغرودة مشدودة الوتر .. وتنطلق مني (هفّا هفّأ ) معبرة عن (اسفاي) و(ملة يدي) علي متعة فاتتني ..
وتصيبني رعشة وانا اسمع ورعدة وانا اقرأ وهزة وانا اري .. فيتهامس اصيحابي بما لا يودون أن اسمع ، ولكنني استنطق
عيونهم فتفضح لي شغفهم بتعبيراتي الاثيرة ..

دخل علي احدهم وانا اردد قول الحق (وإن كلّ لمّا جميع لدينا محضرون) وفوجئ بي اسأله أن ياتيني من الشعر وغيره خارج كتاب
الله بعبارة دقيقة وجامعة وموزونة ومموسقة وفيها مافي هذه الاية من قول لايفبل التراجع امام اي مقال .. فتراجع صديقي وقال
"والله لا يقول مثل هذا الا الله الملك الحق" ثم اردف في تلقائية (هلاّ هلاّ) ..

اخرجتماني ولا ادري ماذا اوقفكما عن الاسترسال بعد ان غرقت في بحر كلمات ولحن وصوت من عسل مصفي فصرت اتحلق
عليهم كالنمل .. ولا اراجع سواهما في المنبر .. وعندما لا اجد احدكما ارجع وعيناي تغرورقان من الدمع الا اجد ما احملكما علية
ليتواصل فيض الشهد ..

لماذا لم التقيكما في مسقط .. ايام ترددي المتواتر عليها .. هفّا هفّا .. فقد فاتني مغنم .. ولن اضيعه بترككما تتغيبان لاي سبب ..

عمر علي حسن

Post: #127
Title: Re: مش عيب عليكي؟
Author: الطيب شيقوق
Date: 05-19-2010, 09:51 AM
Parent: #125

الزعيم ابو الامير

Quote: ولكزني وزاغ ليست من فصيلة ضربني وبكي .. رغم انك وأخانا شيقوق لم ترأفا بشيبتي واستدرجتماني (باعترافكما المسجل)
للسير حافيا عبر نصف قرن من الزمان بين بعد ايه ومش عيب عليكي .. فمددت لسانا طويلا لوقار لازمني فاقلعت عن صيحات
الطرب التي كانت تتقافز من عمق وجداني في حضرة الشعر واللحن الجميل والصوت الملهم ..



لقد دابت منذ الانضمام الى هذا المنتدى الاسفيري التنقيب عن الجميل والرائع من الكتابات مستدرجا ومحرضا ومستفزا احيانا غير اني لم اجد محرك بحث في قامة (بعد ايه) التي اهدتنا اليك فدعنا يا العزيز نروّض تلك الخلايا لنخرج منها حبا( بفتح الحاء وضم الحاء ) ونباتا.


لنا عودة

Post: #128
Title: Re: مش عيب عليكي؟
Author: هواري نمر
Date: 05-19-2010, 11:26 AM
Parent: #127

Quote:
ولكزني وزاغ ليست من فصيلة ضربني وبكي .. رغم انك وأخانا شيقوق لم ترأفا بشيبتي واستدرجتماني (باعترافكما المسجل)
للسير حافيا عبر نصف قرن من الزمان بين بعد ايه ومش عيب عليكي .. فمددت لسانا طويلا لوقار لازمني فاقلعت عن صيحات
الطرب التي كانت تتقافز من عمق وجداني في حضرة الشعر واللحن الجميل والصوت الملهم ..

تتدافع صيحاتي (هلاّ هلاّ) كزغرودة مشدودة الوتر .. وتنطلق مني (هفّا هفّأ ) معبرة عن (اسفاي) و(ملة يدي) علي متعة فاتتني ..
وتصيبني رعشة وانا اسمع ورعدة وانا اقرأ وهزة وانا اري .. فيتهامس اصيحابي بما لا يودون أن اسمع ، ولكنني استنطق
عيونهم فتفضح لي شغفهم بتعبيراتي الاثيرة ..

دخل علي احدهم وانا اردد قول الحق (وإن كلّ لمّا جميع لدينا محضرون) وفوجئ بي اسأله أن ياتيني من الشعر وغيره خارج كتاب
الله بعبارة دقيقة وجامعة وموزونة ومموسقة وفيها مافي هذه الاية من قول لايفبل التراجع امام اي مقال .. فتراجع صديقي وقال
"والله لا يقول مثل هذا الا الله الملك الحق" ثم اردف في تلقائية (هلاّ هلاّ) ..

اخرجتماني ولا ادري ماذا اوقفكما عن الاسترسال بعد ان غرقت في بحر كلمات ولحن وصوت من عسل مصفي فصرت اتحلق
عليهم كالنمل .. ولا اراجع سواهما في المنبر .. وعندما لا اجد احدكما ارجع وعيناي تغرورقان من الدمع الا اجد ما احملكما علية
ليتواصل فيض الشهد ..



يا الله يا الله...
كل البوست ومن فيه, عالم من الجمال والروائع

Post: #129
Title: Re: مش عيب عليكي؟
Author: محمد المرتضى حامد
Date: 05-19-2010, 05:41 PM
Parent: #128

Quote: و الله عيب علي و عيب كبير كمان المالقيت فرصة للاستماع الى صانعة الحياة و سلندر الاوكسجين ....

منار الكفيله،
سلامات وحمد الله عالسلامه،
لازم تكون في بدايه ولاشك أن البعض دخل دنيا (دنيا) الفنية
من خلال هذه المساحة والتي أردت منها لفت الإنتباه إلى ما تقوم
به هذه الشابة البسيطة الذكية الصادقة .
شكرا يا منار على (كل شئ).


Post: #130
Title: Re: مش عيب عليكي؟
Author: saadeldin abdelrahman
Date: 05-30-2010, 05:05 AM
Parent: #129


Post: #131
Title: Re: مش عيب عليكي؟
Author: محمد المرتضى حامد
Date: 06-05-2010, 03:04 AM
Parent: #130

شكرا سعد..

بالله مش كفايه اللي جرا