رحبوا بصـديقي سعادة المستشار محمد المرتضى حامد

رحبوا بصـديقي سعادة المستشار محمد المرتضى حامد


15-08-2006, 02:52 PM


  » http://sudaneseonline.com/cgi-bin/sdb/2bb.cgi?seq=msg&board=219&msg=1178347781&rn=27


Post: #1
Title: رحبوا بصـديقي سعادة المستشار محمد المرتضى حامد
Author: هشام هباني
Date: 15-08-2006, 02:52 PM
Parent: #0


اهلا بك ايها القادم الجميل من زمن جميل اخي محمد المرتضى حامد
اضافة نوعية واعدة لهذا البيت الوطن الصغير وبالتاكيد نحن موعودون
بكل ما هو جميل ونبيل من زول شفاف في زمن غائم نحتاج فيه امثالك
ايها الصادق للانحياز للحق والحقيقة مهما كابر المكابرون وتعالى الاثمون.
حبابك ألــــــــــف اخوي ود المرتضى ولي قدام.

هشام هباني

Post: #2
Title: Re: رحبوا بصـديقي سعادة المستشار محمد المرتضى حامد
Author: Ibrahim Adlan
Date: 15-08-2006, 02:54 PM
Parent: #1

نرحب معك يا هشام الاخ محمد المرتضي


اهلا محمد


و

مرحب بيك

Post: #3
Title: Re: رحبوا بصـديقي سعادة المستشار محمد المرتضى حامد
Author: محمد عادل
Date: 15-08-2006, 02:58 PM
Parent: #1

اهلا بالحبيب
محمد المرتضى حامد
حبابك عشرة

Post: #4
Title: Re: رحبوا بصـديقي سعادة المستشار محمد المرتضى حامد
Author: الطيب شيقوق
Date: 15-08-2006, 03:26 PM
Parent: #1

الاخ الصديق هشام هباني

تحياتي وودى

مبروك لجميع الاخوة قراء المنبر العام عامة واعضاء البورد خاصة ولنا بورداب مسقط على وجه الخصوص ولك اخي هشام الف مبروك فالاخ المرتضى انسان يستحق منا ان نتامل في كل ما يسهم به بفكره في هذا المنتدى .

الشكر اولا واخيرا للاستاذ حادى ركب اعضاء هذا المنبر الباشمهندس بكري ابو بكر الذى ابدع في لم شمل مفكرينا ويسر سبل التواصل بينهم عبر هذه النافذة الرائعة .

نتواصل

شيقوق

Post: #5
Title: Re: رحبوا بصـديقي سعادة المستشار محمد المرتضى حامد
Author: صديق الموج
Date: 15-08-2006, 03:33 PM
Parent: #1

اهلا بسعادة المستشار..اضافة نوعية للبورد وطالما من طرف هشام العزيز
فبلا شك زولا دغرى وعديل..وهل تنبت الا فى مواضعها النخل،،،

Post: #6
Title: Re: رحبوا بصـديقي سعادة المستشار محمد المرتضى حامد
Author: ادريس خليفة علم الهدي
Date: 15-08-2006, 04:12 PM
Parent: #5

مرحبتين بسعادة المستشار إضافة للمنير

Post: #7
Title: Re: رحبوا بصـديقي سعادة المستشار محمد المرتضى حامد
Author: Hassan M Saeed
Date: 15-08-2006, 06:22 PM
Parent: #1

ألفين مراحب ياأبوحميد

Post: #8
Title: Re: رحبوا بصـديقي سعادة المستشار محمد المرتضى حامد
Author: Maha Bashir
Date: 15-08-2006, 07:50 PM
Parent: #7

مرحب وسلامات يا مرتضـــي.....

شكرا كتير يا هباني...

مهـــا بشير

Post: #9
Title: Re: رحبوا بصـديقي سعادة المستشار محمد المرتضى حامد
Author: خالد العبيد
Date: 15-08-2006, 08:34 PM
Parent: #1

اهلا بي المستشار
وفي انتظار اضافاتك
تحياتي

Post: #10
Title: Re: رحبوا بصـديقي سعادة المستشار محمد المرتضى حامد
Author: kamalabas
Date: 15-08-2006, 08:38 PM
Parent: #1

مرحبا بالاستاذ محمد المرتضى حامد عضوا ومساهما فاعلا
بالمنبر....
....كمال

Post: #11
Title: Re: رحبوا بصـديقي سعادة المستشار محمد المرتضى حامد
Author: Mannan
Date: 15-08-2006, 10:36 PM
Parent: #1

ايها الفارس الهبانى
سلام
نرحب معك بمقدم سعادة المستشار محمد المرتضى ليملآ الساحات فكرا بعد ان ملآها كثيرون من شذاذ الآفاق هذرا واسفافا..
الف مرحبا..

نورالدين منان

Post: #12
Title: Re: رحبوا بصـديقي سعادة المستشار محمد المرتضى حامد
Author: Khalid Kodi
Date: 15-08-2006, 10:55 PM
Parent: #1

ألف مرحب بالاخ محمد المرتضى...
و هناك الكثير ليقال!

Post: #13
Title: Re: رحبوا بصـديقي سعادة المستشار محمد المرتضى حامد
Author: Tragie Mustafa
Date: 15-08-2006, 10:58 PM
Parent: #12



مرحب بك اخي محمد المرتضى حامد

والبجي من طرف هشام هباني كل طيب...وصنديد.

تراجي.

Post: #14
Title: Re: رحبوا بصـديقي سعادة المستشار محمد المرتضى حامد
Author: غادة عبدالعزيز خالد
Date: 15-08-2006, 11:04 PM
Parent: #13

ترحيب بسعادة المستشار محمد المرتضى حامد

كل الود
غادة

Post: #24
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 09:34 AM
Parent: #14

غاده عبدالعزيز..
إن كان منك لي الود فلك مني كل الود
شكرا سيدتي

Post: #22
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 07:27 AM
Parent: #13

تراجي
شكري للترحيب وأتمنى أن نعمل جميعنا على نشر قيم الفضيلة والتسامح لأن التسامح يأأختي، كما قال أحدهم (أعلى درجات الثقافة) وهو الذي يجب أن يسود على الآقل لأن لا أحد فينا يملك الحقيقة خالصة. شكرا لكلماتك الطيبات عني في مكان آخر من هذا المنبر.
ربنا يحفظك وأولادك

Post: #15
Title: Re: رحبوا بصـديقي سعادة المستشار محمد المرتضى حامد
Author: Dia
Date: 15-08-2006, 11:07 PM
Parent: #12



محمد المرتضى حامد اضافة للمنبر واذا كان المقصود هو محمد المرتضى خريج قانون اسكندرية فاقول ان المنبر قد اضيفت له منارة عالية من القيم والثقافة ورصانة اللغة والادب بالاضافة الى مهنة القانون. ولعل ان صح ذلك يتذكر الجميع كلمته فى حفل تخريج دفعته من طلاب الكليات النظرية بجامعة الاسكندرية وكلمته فى يوم الطلاب الافارقة والتى جعلت مدير جامعة الاسكندرية وعميد كلية القانون بجامعة الاسكندرية يقول ان جامعة اسكندرية تفخر بهذا المستوى من الثقافة والخطابة وبيان اللغة ورصانتها وادبها وفوق ذلك التحصيل العلمى. وتنبابان هذا الطالب سيكون له شان كبير ونامل من اخونا محمدالمرتضى ان يجلب لنا اخ عزيز وقانونى ضليع ورجل مثقف شاعر الا وهو يوسف الحبوب
وكذلك الاخ محمد المصطفى ( ابليس )الى مزيدا من التميز

Post: #16
Title: Re: رحبوا بصـديقي سعادة المستشار محمد المرتضى حامد
Author: بدرالدين شنا
Date: 15-08-2006, 11:08 PM
Parent: #1

Quote: رحبوا بصـديقي سعادة المستشار محمد المرتضى حامد
يازول هوي دا صديقي أنا إنت لقيتو وين؟؟؟

الغالي هشام هباني
سلامي وإحترامي

سؤال إنت قدرت أقنعت الزول دا كيف ؟؟؟ وأنا بحاول فيهو لي زمن

المستشار محمد المرتضى يجمع كل الطيبات بس عندو مشكلة واحدة إنو مشغول على طول وأتمنى أن يجد من الوقت ما يمتعنا ويثري به ساحتنا

فأنا أرحب به ترحيب غير مشروط

وأشكر هشام هباني على هذه الهدية القيمة

Post: #17
Title: Re: رحبوا بصـديقي سعادة المستشار محمد المرتضى حامد
Author: عبدالله
Date: 15-08-2006, 11:28 PM
Parent: #16

Quote: هو محمد المرتضى خريج قانون اسكندرية


وكذلك الاخ محمد المصطفى ( ابليس )الى مزيدا من التميز


الاخ ضياء ياهو زاتو
مرحبا بالاخ محمد المرتضي
ونامل ان نري ابليس في هذا الحوش ايضا

Post: #18
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 05:37 AM
Parent: #17

هشام ... (سعادة) دي معناها شنو؟ والله حاجه تسغرب. ياخ انت منحاز لأصحابك ساى.
أشتاق لضحكة الطفل الجميل فيك ياهباني و، آه ، بيننا (استطال ألف حائط) ونهض (ألف باب)
سنلتقي

إبراهيم عدلان
شكري الغزير لترحيبك بي ياأبو خليل

محمدعادل
مناداتي ب (الحبيب) تهدّني وتهدهدني وهذا لطف من انسان لم أره
شكرا ياحبيب

الطيب شيقوق
أنت وهشام ماكلّمتوني عن القصة دي كويس قبال أجي هنا

الموج ... صديق
أنا متابعك يا (شرتاي) وفقا للرواية الدارفورية ويا (ختيار) كما ينادي أهل الشام كبارهم مقاما
لك شكري

إدريس خليفة
خذ إاليك ياسمين من ضيف جديد

حسن محمد سعيد
شايف يا إدريس ..حسن قال (ألفين) مرحب .. أها أنا أسدد الدين دا من وين؟
شكرا أبوعلي

مها بشير
وأحمد وياسمين .. سنلتقي قريباإنشاء المولى
مرة أخرى لك شكري ياأم أحمد

خالد العبيد
يا خالد ماتسمع كلام هباني أني مستشار أو شئ من تلك المصطلحات الفخيمة أنا جئت أنهل منكم و (أستشيركم) لكن ، على أية حال، شكرى لك وافر.

كمال عباس
بعد الثناء أتمنى ان أكون عند حسن ظنك بي
شكرا ياسيدي

منان
الظاهر إنك زعلان شديد من الحال ، لكن علينا أن نسعى والباقي على الله
والله مخاطبتك لي ب (سعادة) دي بتخليني أمشي المرايه وأقوم أمشي لأي تلفزيون أو جريده وأقول ليهم أعملو معاي مقابله..يامنان أنا بامشي بي ضل الحيطه. شكري لك يا أمير


خالد كودي
طيب ياخالد لما إنت عارف إنو في ( كثير ليقال) مابترد على رسايلي الأخيره ليه؟
أتفق معك على أن هناك الكثير ليقال وأنتظر الرد على الرسائل ، هسّه تكون خمّّرت.
سلامي وودي ومحبتي




Post: #19
Title: Re: رحبوا بصـديقي سعادة المستشار محمد المرتضى حامد
Author: Dia
Date: 16-08-2006, 06:00 AM
Parent: #18


الاخ عبدالله


سعدت جدا بتاكيدك واهلا يامحمد المرتضى بك علما تضى سماء هذا المنبر وادعو الاخوة على جلب الاخ ياسر سيد الامين مصطفى والاخ اسامة حسن دبلوك لهذا المنبر ليزداد القا


مرحبا بك يامحمد المرتضى مرة اخرى

Post: #20
Title: Re: رحبوا بصـديقي سعادة المستشار محمد المرتضى حامد
Author: Mohammed Ahmed Saeed
Date: 16-08-2006, 06:57 AM
Parent: #19

أهلا بالاخ المستشار محمدالمرتضى حامدأضافة للمنتدى ومراحب

Post: #21
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 07:14 AM
Parent: #19

يا Dia..
عندما يطل أحد الاسكندرانيه يرتد إليّ صباي وتعود لي أيامى الخضر.. حفظ الله ارض الكنانة أم جمال أم صابر وأقال عثرة أهلها. ياسلام يا Dia.. سأحكي يوما لبعضهم هنا أن مصر الملايين في الصعيد وبحري من الفلاحين والعمال وملايين الكادحين في صمت..
ياسيدي، دون تواضع زيوف ، أقول لك أنك أعطيتني أكثر مما أستحق وإن كان عميد كلية القانون قد وصفني بما ذكرت فهو رجل متفائل ويحزنني أنه لم يتحقق ما تنبأ به.
صديقي الحبّوب يوسف معنا هنا بمسقط ولا يبين إلا في المنتديات الثقافيةو المحاكم كذلك أخي أحمد المصطفي عبدالوهاب فهو مقل في ظهوره.
أتمنى أن أعرف عنك لأن الأسم أعلاه لا يكفي و (برجاك) في المسنجر.
أبقى عافيه

Post: #23
Title: Re: رحبوا بصـديقي سعادة المستشار محمد المرتضى حامد
Author: صديق عبد الهادي
Date: 16-08-2006, 08:02 AM
Parent: #1

العزيز دائماً هشام هباني

الشكر الجزيل و الله استقدمت رجل و الرجال قليلّ...الصديق محمد المرتضى وقف ذات يومٍ غائظ في مسقط في اوائل التسعينات و في قلب القصر قائلاً للسفاح عمر البشير الذي كان جزلا بالسلطة حينها و بهتاف بعض الارزقية: " هؤلاء هتيفة... هتفوا بنفس الطريقة للدكتاتور الذي كان قبلك"...وقتها كانت الجراح غائرة نتيجة لما كان قد جرى و يجرى علي المستوى العام ـ الوطن ـ و المسنوى الخاص ـ استشهاد محمد الاكرم و علي فضل ـ ...تنفسنا الصعداء بقولته تلك !!!

شكراً عزيزي هشام وشكراً اخونا بكرى ابو بكر ... و مرحباً بصديقي الاستاذ محمد المرتضى حامد.

صديق عبد الهادي.


Post: #25
Title: Re: رحبوا بصـديقي سعادة المستشار محمد المرتضى حامد
Author: هشام هباني
Date: 16-08-2006, 10:12 AM
Parent: #23

الصديق ابراهيم عدلان


كتر خيرك يا زول يارائع وشكرا علي ترحيبك بصديقي محمد المرتضي
ودم بخير.

هباني

Post: #26
Title: Re: رحبوا بصـديقي سعادة المستشار محمد المرتضى حامد
Author: Kostawi
Date: 16-08-2006, 10:33 AM
Parent: #25

الأخ هباني
يا أخي لخبطوا لينا راسنا

محمد المرتضى حامد ده زول صحبي شديد لكن البروفايل بتاعو أظن فيه معلومة ما راكبا صاح و بعدين الإسكندرية دي شنو?

يا محمد المرتضى, لو ده أنت محمد المرتضى حقنا قولينا و لو ما حقنا كمان بنقول ليك مرحب و نورت الديار.


Nasr Haggam

Post: #27
Title: Re: رحبوا بصـديقي سعادة المستشار محمد المرتضى حامد
Author: هشام هباني
Date: 16-08-2006, 10:33 AM
Parent: #25

الاعزاء

محمد عادل,الطيب شيقوق,صديق الموج,ادريس خليفة,حسن محمد سعيد,مها بشير,خالد العبيد , كمال عباس, منان , خالد كودي,تراجي, غادة عبد العزيز,ضياء, عبد الله, بدرالدين,محمد احمد وصديق عبد الهادي( التسلسل بالاسبقية حسب المداخلات).

لكم عاطر التحايا وانتم ترحبون بصديقنا الودود البشوش محمد المرتضي وبالتاكيد بينكم وبرفقتكم الكريمةسيسعد كثيرا ولكم كل الود والاحترام ودوام الصحة والعافية واكرر ترحيبي بالصديق الرائع ( ود المرتضي) ولي قدام يا محمد ارم( الهلب)!!

هشام هباني

Post: #29
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 11:12 AM

صديق عبدالهادي
أنا راجع ليك تاني بس أشوف قصة كوستاوي ده لأنو حالتو بقت متأخره.
ياهشام أخوي هجّام ده مالو؟ قرينا في الأهليه الجنب بيت أزهري خمس سنوات سمان في فصل واحدوسنه في محمد حسين قبل ما أمشى النهود، أها تااااني اتلمينا في الأسكندريه ثم في بيتو في فيرجينيا مع أخي المستشار قريب الله أحمد محمد حامد(الشيخ) وقريبات دي اتكاتبنا وان (مسك الدرب) بذكِّرو بالصور. سلامي لك يانصر كتير. أما البروفايل ده والله والله لاهبشتو ولا شفتو إلا بعد ما نصر جاب سيرتو وإلا كيف ياخ أكتب فيهو single وأنامتزوج ؟ ياخ البورد ده رغم انو كويس لكن في حاجات كده ..ماعارف. هسّه حرمنا لو شافت single دى والله لابعد حيفا ولا خلف الليطاني يحلّني.

صديق.. أنا جاييك stay tuned

Post: #28
Title: Re: رحبوا بصـديقي سعادة المستشار محمد المرتضى حامد
Author: جمال هباني
Date: 16-08-2006, 11:01 AM
Parent: #25

سلام مربع للمستشار

ونقول بوجودكم اذدادت الدار ضياءا

Post: #30
Title: Re: رحبوا بصـديقي سعادة المستشار محمد المرتضى حامد
Author: Mustafa Mahmoud
Date: 16-08-2006, 11:13 AM
Parent: #28

نرحب معك يا هشام الاخ محمد المرتضي


اهلا محمد


و

مرحب بيك
dr mustafa mahmoud

Post: #31
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 02:29 PM
Parent: #30

عبدالله
لك سلامي .. وأرجو أن تعرّفني عنك هنا أو في المسنجر على طريقة (بالدرب التحت)
أنت تؤكد ل Dia أنني (ياهوذاتو) وماتقول لي (الباقي)؟ بالمناسبه، (ياهو ذاتو) دي تبع إبننا الجميل قصي همرورشيخ الدين جبريل (الغتس) في ودنوباوي لي هسه ده...يعني صونا لحقوق الملكيةالفكرية.
شكرا ياعبدالله.

Post: #32
Title: Re: رحبوا بصـديقي سعادة المستشار محمد المرتضى حامد
Author: Kostawi
Date: 16-08-2006, 03:07 PM
Parent: #31

شوف يا مرتضي الزمن بقى زمن بطال (الله ينعل العولمة ظاطه على قول الرفيق هباني) يازول نحن أي زول بجينا في البورد ده لازم نفتشو كويس ....لو صحي أنت مرتضى حقنا, جاوب على هذا السؤال:
ما هي عاصمة Tajikistan?

Post: #33
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 16-08-2006, 03:35 PM
Parent: #32

جمال هباني
شكرا ياسيدي الكريم أنا شاكر لك وداير أتعلم منكم وأحبابي هشام وملاسي وبكري دخّلوني المكان ده وما أدّوني ال manual ، ولا أظنني أحتاجه, لكن لاشك عندي أن الجميل كثير وياجمال أطمع في التعرف اليكم فردا فردا.
لك مني التحايا

Post: #34
Title: رحبوا بصديقي سعادة المستشارمرتضى حامد (هشام هباني): re
Author: فاروق حامد محمد
Date: 16-08-2006, 06:11 PM
Parent: #1



يا أبناء الهبانية لخبطونا كما لخبطنا قريبكم صديقنا الجميل

بدرالدين هباني قبل 30 سنةأطال الله عمره ومتعه بالصحة .........

سبب اللخبطة أن شقيقي الأصغر مرتضى حامد خريج قانون ومن الاسكندرية

كمان ......دي صدفة عجيبة جدا لكنه يعمل هنا في أبوظبي وهو الآن في

اجازة في السودان ... قرأت البروفايل وزعلت قلت الولد ده الوداه

مسقط شنو من غير ما يكلمني ... اتصلت بالسودان ولقيته قااااااعد في

عزاء خاله.........

عموما كسبنا شقيقا اصغر (سنا) جديدا فمرحبا به مليون مراحب ويبدو أن الشقيق

الجديد أكثر ثقافة وعلما من مرتضى القديم وشقيقهما الكبير كما انه يتمتع ب

sense of humour عال جدا وهو دليل ذكاء خارق.

ولكم مني جميعا أقصى الود وكل الحب.


اخوكم الصحفي العجوز جدا المكرتب

فاروق حامد(أبوناصر)

Post: #35
Title: Re: رحبوا بصديقي سعادة المستشارمرتضى حامد (هشام هباني): re
Author: Dr.Elnour Hamad
Date: 16-08-2006, 07:18 PM
Parent: #34

نرحب ونص وخمسة يا هشام هباني!!

ألف مرحبا بالصديق العزيز، والوجيه المسقطي، سعادة المستشار، محمد المرتضى حامد.

مع إطلالتك المفاجئة غمرتني سعادة دافقة. وعادتني الأشواق بغتة لأيام مسقط الندية، التي سبقني في الإشارة إليها الصديق العزيز، الأستاذ، صديق عبدالهادي.
مع إطلالة محمد المرتضى يستيقظ حب خلته قد ثوى لزهرة المدائن لمسقط.، ولأصدقاء أعزاء أبقوا في فؤادي بصمات صحبتني في حلي وترحالي. أخص منهم محمد المرتضى حامد، والشيخ قريب الله، وعصام بابكر محمد فايت، والقائمة تطول. وقد وردتني وأنا في غمرة الفرح أقرأ عبارات المرحبين بك، أصوات موج بحر عمان وهو يلطم صخور شط القرم ،وفاحت في كياني روائح العراقة المنبعثة من التوأمتين مسقط ، ومطرح القديمتين، كما طاف بذهني مرأى "دوار دارسيت"، ساعة السحر، وغشي روحي سحر المساء في "سوق رُوِي". وهذا قليل من كثير كما تعلم، وأعلم.

بفعل حضورك البهي أطلت بلا استئذان من ثنايا الذاكرة وجوه ذلك اللفيف من المهنيين السودانيين، من قانونيين، ومهندسين، وأطباء وإداريين، وأساتذة جامعات، ومدرسين جمعتهم مسقط المرحة المضيافة وجمعتهم دارك العامرة مع غيرها من الدور العامرة بملتقيات السودانيين. فمرحبا بك مرة أخرى، وثالثة ورابعة. وعاطر التحايا للسودانيين المسقطيين ولأسرتك الكريمة. والشوق إليكم متقد أواره، ومعقود بنده، حتى نلقاكم. ومبروك عودة الشيخ قريب الله لمسقط. سأكون في الدوحة بعد ثلاثة أيام، بإذن الله، وسوف نتحدث ونتحدث ونتحدث.

Post: #36
Title: Re: رحبوا بصديقي سعادة المستشارمرتضى حامد (هشام هباني): re
Author: محمد المرتضى حامد
Date: 17-08-2006, 03:11 AM
Parent: #35

محمد أحمد (سعيد)
ومحمدالمرتضى برضو سعيد بإستقبالك
شكري لك يا عزيز

د. مصطفى محمود

مشكور ياسيدي كتير و أتمنى على الله أن أضيف شيئاإن كان لديّ في الأصل شيئا يضاف.

Post: #37
Title: Re: رحبوا بصديقي سعادة المستشارمرتضى حامد (هشام هباني): re
Author: abulinah
Date: 17-08-2006, 03:11 AM
Parent: #35

مرحب بيك محمد في الحوش الواسع
و نتابع مساهماتك

تحياتي لكم و للأسرة،،

وليد أبكم،
جدة

Post: #38
Title: Re: رحبوا بصديقي سعادة المستشارمرتضى حامد (هشام هباني): re
Author: محمد المرتضى حامد
Date: 17-08-2006, 04:30 AM
Parent: #37

كوستاوي هجّّام
والله أضحكتني يا نصر ,هل مازلت تعتقد أنك تحادث مرتضى الثانوية العامه لتسألني عن عاصمة الطاجيك؟ ياسيدي أنا ، وأستغفر الله عليها، نسيت كل العواصم منذ أن قال درويش : كلما آخيت عاصمة..رمتني بالحقيبة. بعدين ياخ قلت لي أي واحد جديد هنا لازم تفتشوه كويس ..إنت ياخوي في حالة طواري هنا وأنا ماعارفا؟ تعرف يانصر صاحبنا محمد زين العابدين ضرب لى تلفون من (مسندم)بعد أن افترقنا قرونا وكانت مفجأة جد جميله وما خلينا زول من (ج) ماقطعنا فيهو.
بنتلاقى

Post: #40
Title: Re: رحبوا بصديقي سعادة المستشارمرتضى حامد (هشام هباني): re
Author: محمد المرتضى حامد
Date: 17-08-2006, 04:55 AM
Parent: #38

فاروق حامد
تعرف قصة إنو في شخص آخر اسمو مرتضى حامد وتخرج في كلية الحقوق جامعة الأسكندرية دي بتذكرني قصيده نسيتا في ديوان شاعر رائع إسمو التجاني سعيد في ديوانه (قصائد برمائية) زمن كنا بنقرا الشعر ( هسّه بقينا نقرا الكف .. والشلّوت أحيانا )، أها الزول اللي في القصيدة دا بيظهر في عدة أماكن في وكت واحد, طبعا ياسيد فاروق شهّيتنى أشوف (قريني) مرتضى حامد شقيقك ،زي لما تقول لواحده : شفنا شريط وكنتي فيهو روعه ، أها انت عارف بعد داك الله يحلّك.
شكرا لك على الأطراء فالسخرية تتجلى حولنا في كل شيْ.

Post: #39
Title: Re: رحبوا بصـديقي سعادة المستشار محمد المرتضى حامد
Author: بدرالدين شنا
Date: 17-08-2006, 04:49 AM
Parent: #1

يا هوووووووي عملتو لينا شنو في الموضوع دا؟؟؟

Quote: :
Quote: رحبوا بصـديقي سعادة المستشار محمد المرتضى حامد


يازول هوي دا صديقي أنا إنت لقيتو وين؟؟؟

الغالي هشام هباني
سلامي وإحترامي

سؤال إنت قدرت أقنعت الزول دا كيف ؟؟؟ وأنا بحاول فيهو لي زمن

المستشار محمد المرتضى يجمع كل الطيبات بس عندو مشكلة واحدة إنو مشغول على طول وأتمنى أن يجد من الوقت ما يمتعنا ويثري به ساحتنا

فأنا أرحب به ترحيب غير مشروط

وأشكر هشام هباني على هذه الهدية القيمة

Post: #41
Title: Re: رحبوا بصـديقي سعادة المستشار محمد المرتضى حامد
Author: Haydar Badawi Sadig
Date: 17-08-2006, 05:00 AM
Parent: #39

مرحباً بالأخ الكريم محمد المرتضى!

Post: #42
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 17-08-2006, 05:26 AM
Parent: #39

بدرالدين الشين عدوك
شوف المشاكل اللي دخّلتونا فيا دي , يعني قبل أن أكمل 24 ساعة نبهني كوستاوي إلى كارثة تسونامية علي باب منزلي حيث ورد في البروفايل بتاعي إنو أنا single وطبعا ده كلام لو قراه (البنتاقون) حايفهم شي ( غير ) أقلّها إنِّي بحاحي واشرِّك، ودي جنحه عقوبتها يوريك ليها أخوي د. محمد إبراهيم قرَض. الشيء الأخر عندي كم موضوع وخايف أكتبهم يقوموا يقولو لي دي كتب عنها فلان سنة كدا يابرلوم وياحرامي القوقل والكلاكلة صنقّعت الخ... بعدين إنت كان تهاتفني من محلت النفط الشالتك مننا دي وتقول لي ألبس كويس و إتريح ثم دخِّل الباسوورد.
ُثالثا أنا عايزك لما تجي مسقط توضح لي (حاجات كده) كنت أتمنى ناس هباني وكوستاوي وملاسي ديل يوروني ليها قبل أن أدخل هنالكنهم ما فاضيين لي شوف ربنا أكرمني بناس بتاعين سياسة مامكن يدّوك دقيقه.
لك شكري ياجميل يامدلل (على ناس مسقط) طبعا ناس النادي عشان يسخّنوا العضويه بيقولوا للناس بدر جاي. لك الحب وما (تفطّني) في عطلة نهاية الأسبوع.

Post: #43
Title: Re: رحبوا بصـديقي سعادة المستشار محمد المرتضى حامد
Author: بدرالدين شنا
Date: 17-08-2006, 06:14 AM
Parent: #42

Quote: وما (تفطّني) في عطلة نهاية الأسبوع.
إنت قايلني شغال في الديوان؟؟؟
قال عطلة نهاية الأسبوع قال

معقول افطَّك يا حبيبي؟؟؟

فُطَّك بعافية

Post: #44
Title: Re: رحبوا بصـديقي سعادة المستشار محمد المرتضى حامد
Author: Tumadir
Date: 17-08-2006, 06:27 AM
Parent: #43

Quote: نتكلم الليلة عن د.هالة ومرتضى


فى اليوم الاول جاءت د. هالة صديقة د. صفية ساتى "ام قصى" وهى تحمل اشياء جميلة فى يدها اهدتها لى وسلمت على وتعارفنا فى عجالة وقالت نشوفكم بكرة فى اللمة .. ونحن فى عز الطرب والفرح فى بيت عشة مبارك وبيرق اتصل محمد المرتضى المحامى من بلد قريب وقال تنتظرينى لما اجى وافسحك..واجمع الكل ان مرتضى هو خير من يفسحنى..وجاء اليوم التانى واتفقنا على المواعيد..

طلعنا انا وهو وعشة مبارك ..ويالها من فسحة..

كان مصطفى البنا يغنى فى جهاز العربية ..وكانت عشة مبارك بكاميراتها اللاذعه تلتقط لى ما غاب عنى ..وكان مرتضى يشق شوارع مسقط ليمكننى من الرؤية ..على اكمل الوجوه

مسقط..

قلت لهم انها مدينة مطرزة وطاهرة ...مطرزة لان العمارة فيها منقوشة على الطريقة الفارسية والاسلامية ..لا تشاهد هذه العمارات الصندوقية الطويلة التى تشاهدها فى كل مدن العالم حتى اختفت من جرائها لمسات التاريخ الانسانى الطويل..كل المبانى تحمل ذوقا واسلوبا متميزاوكلها بيضاء ولا أدرى ان كان اهل مسقط قد نسوا هذا الحوار بين الجبال والبحر بحكم العادة .. ولكنه حوار صعب وقاسى .. البحر لا يلتقى بخط الافق ولكنه يتدفق من الافق مباشرة السفن تظهر وكأنها معلقة فى السماء ألوان البحر والافق والسماء تمتزج فى سحر..الشوارع واسعه ونظيفة ..الجو ساخن ورطب ولكن اى ظل تذهب اليه يذكرك بجنة الخلد مباشرة..كان هناك مرتضى ..وعشة ..عشة بايقاعها الحبيب وقفزات عقلها غير المتوقعه وانفعالها بأننا "مع بعض ف مسقط" برزانته وعمقه..

كان يوما


تماضر شيخ الدين تحاصرها الجبال في مسقط ..



نرحب بك ..وفضلك السابق.

Post: #45
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 17-08-2006, 06:45 AM
Parent: #43

صديق عبد الهادي الجميل..
جيتك صاد
مسقط إفتقدت الكثير ممن عطّروا سماواتها وأفرحوا لياليها وأنت منهم ياسيدي وهذه حقيقة فرغم مامضى من سنين منذ رحيلك الى بلاد اليانكي إلا أنك حاضر في كلام الناس وقلوبهم ياشجر الصندل.
الأحزان كثر فبشير و نبيهة آلمونا بسفرهما الى الدوحة ثم أحرقا قلوبنا حد التفحم برحيلهما الفادح السريع عن هذه الفانية العبوس الكذوب. سأسكت هنا حتى لا تندم على ترحيبك بي في هذاالمنبر.
الحادثة التي ذكرتها في ترحيبك أعلاه, كانت قبل استشهاد أخي الحبيب الشهيدرائد طيار أكرم الفاثح يوسف دفع الله ورفاقه الميامين شهداء رمضان.
سلامي لك أيها النبيل

Post: #46
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 17-08-2006, 08:11 AM
Parent: #45

د. النور حمد
آخر مرة التقينا هربت على عجل من منزلي المتواضع بناءا الشامخ بكم ، الى المطار مباشرة ثم الى الكويت ، والله ياالنور ايامك في مسقط كانت كأيام قرطبة (إنت أيام قرطبة دي كان فيها شنو ما أقوم أغلط ) . ياعزيزي الفنان الشامل بحق وحقيق ، كنت منذ قليل أرد على ترحيب لأخي صديق عبدالهادي وأذكر ماكان عليه جمعنا في تلك الأيام النضره ، مازالت اغانيك بيننا (موثّقة) في المسامع والفؤاد ثم ال DVD شان صوتك الليزر يكون في مكانو ، ومازالت لوحاتك مثبّتة في الأحداق قبل الحوائط. الشيخ صاحبك بخير و عصام في السودان الجميل ( وأنا باكتب ليك اتصل بي وليد حامد من هناك وقال لي في هذه اللحظة المطر يهطل بغزاره). النور ممكن تمر علينا في مسقط بعد أن تكمل مهامك في الدوحة؟ عشمي فيك كبير.
لك معزّتي أيها الأديب الفنان الفيلسوف ..دون ضوضاء

Post: #47
Title: Re: رحبوا بصـديقي سعادة المستشار محمد المرتضى حامد
Author: رأفت ميلاد
Date: 17-08-2006, 08:24 AM
Parent: #46

مرحبا بالاستاذ محمد المرتضى حامد
رأفت ميلاد

Post: #48
Title: Re: رحبوا بصـديقي سعادة المستشار محمد المرتضى حامد
Author: صديق عبد الهادي
Date: 17-08-2006, 08:52 AM
Parent: #1

عزيزي مرتضى

سلام

قبل فترة من الزمن كنت اتهاتف مع احد الاصدقاء العزيزين و ذكرني بانو كان من المفترض ان ابعث اليه بايميل معه بعض الملحقات...قلت له يا اخي ما في اي وعد مني ليك بهذا الامر من قبل ، المهم في نهاية الامر اقنعني بانني قد فعلت و قلت ليهو خلاص معليش و حاقوم بعمل ما وعدتك به. بعد برهة من الزمن قال لي يا اخي انا عاوز اقول ليك حاجة زمان في نهايةالسبعينات و التمانينات كان الواحد لمن يعزمكم علي "شية جمر" في السوق العربي تقولو ليهو دا "مروق طبقي" !!! فقياساً عليهو انت البتعمل فيهو دا "طعون" في السن !!! يعني "كّبر"...!!!

فيبدو يا صديقي محمد ان الرجل كلامه صحيح....شكراً لك علي تصحيح تاريخ حادثة الجنرال الذي لم يخرج من "متاهته"....ام
اما "التسويات" فذلك شانّ آخر !!!.


مرحب بيك مرة ثانية...

صديق عبد الهادي.

Post: #49
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 17-08-2006, 01:16 PM
Parent: #48

الوليد (أبو لينا)
سلامات يا بركه
عساك طيب و إبنتنا والعيال
الطيب (شيقووووووقل) جاب لي أخبارك وأهو بتجمعنا التكنولوجي
سلامي كتير للأهل هناك
المسنجر راجيك

Post: #50
Title: Re: رحبوا بصـديقي سعادة المستشار محمد المرتضى حامد
Author: محمد المرتضى حامد
Date: 17-08-2006, 01:44 PM
Parent: #49

الدكتور حيدر بدوي
شكرا لك ولبساط أحمر فرشته لي
أنا متابع كلامك وعندنا معاك مشاركة قريبه
لك مايليق بك ياسيدي


رأفت ميلاد السوداني الغيور
مبادراتك في ربط الناس كانت ، ومازالت ، تؤتي ثمارها
ياخ أصبحنا زي ما قال الشاعر القامه ود المكي كأننا ( فتلة في الرياح وثرثرة في الصخب )
رد الله غربتنا من هذه الدياسبورا.
لك الود

Post: #51
Title: Re: رحبوا بصـديقي سعادة المستشار محمد المرتضى حامد
Author: Kostawi
Date: 18-08-2006, 03:02 PM
Parent: #50

Quote: ناس هباني وكوستاوي وملاسي


أها شفتا?
قلت ليك البور ده ما تمشي فيه حفيان...فيه شوك لعوت..ما داير تسمع الكلام بعدين ما تجي تقول كاني ماني.

عل لو بتقصد ظلامي تاني..oops أقصد ملاسي تاني.

Post: #52
Title: Re: رحبوا بصـديقي سعادة المستشار محمد المرتضى حامد
Author: محمدين محمد اسحق
Date: 18-08-2006, 03:11 PM
Parent: #51


أخي هشام ..

نرحب معك بالاستاذ محمد المرتضي حامد ..