ما شفتوا عوض؟؟

ما شفتوا عوض؟؟


25-12-2007, 08:54 PM


  » http://sudaneseonline.com/cgi-bin/sdb/2bb.cgi?seq=msg&board=213&msg=1252554210&rn=23


Post: #1
Title: ما شفتوا عوض؟؟
Author: Munir
Date: 25-12-2007, 08:54 PM
Parent: #0





Post: #2
Title: Re: ما شفتوا عوض؟؟
Author: سلمى الشيخ سلامة
Date: 25-12-2007, 10:00 PM
Parent: #1

يا ريت لو شفت عوض
حزنت حزن ما عادى
اول مرة اسمع هذه الاغنية
واحزننى خروجه
ذكرنى الزين فى رواية عرس الزين
يبدو انه نفس التركيبة
لكن عوض شخصية حقيقية وهذا هو الفرق

Post: #3
Title: Re: ما شفتوا عوض؟؟
Author: نادية عثمان
Date: 25-12-2007, 10:37 PM
Parent: #2

من أجل عوض

شكرا نبيلا منير

عيدك مبارك

Post: #4
Title: Re: ما شفتوا عوض؟؟
Author: خالد علي محجوب المنسي
Date: 25-12-2007, 11:36 PM
Parent: #3

الأخ الفاضل منير
تحية وطيبة وسلااااام
كل سنة وانت طيب وعيد مبارك عليك
حملتنا في هذه اللوحة الجميلة الحزينة التي تعتصر القلب ألماً والتي أبدع في تصويرها وتوثيقها الشاعر الجميل المرهف حاتم الدابي.

درويشاً من يادوبو سغييير عشرة أعوام
الزول زول الله من الصُلاح الرفْعِت عنهم الأقلام
دي تركت الرسل الدارّوا الآخرة ام خيراً دام
التركوا نعيم الدنيا الزايل لي العبدوها لي الحُكام

لك التحية والاحترام أخي منير

خالد

Post: #7
Title: Re: ما شفتوا عوض؟؟
Author: Munir
Date: 26-12-2007, 02:30 AM
Parent: #4


الأخ العزيز المرهف خالد
تحايا معطرة وكل سنة انت والاسرة بألف خير ..
Quote: حملتنا في هذه اللوحة الجميلة الحزينة التي تعتصر القلب ألماً والتي أبدع في تصويرها وتوثيقها الشاعر الجميل المرهف حاتم الدابي.
نعم إنها صورة حزينة وثقها الرائع الشاعر الشفيف حاتم الدابي وستكون نداءآ دائمآ للبحث عن عوض إلي أن يجمع الله بنا عوض ..


ياساري الليل انا داير اوصيك واديك كلام
الروح إن صعدت لبارئيها وفي جنات الخلد مقام
لو كان لاقيته في أي مكان في أي زحام
روح كلمه قول له الحلة بكت تغريك سلام



Post: #6
Title: Re: ما شفتوا عوض؟؟
Author: Munir
Date: 26-12-2007, 02:18 AM
Parent: #3


Quote: من أجل عوض
إنه حقيقة يا اختي نادية .. حقيقة !!!!

تري أين أنت ياعوض ..

كل سنة وانت طيبة ..

Post: #5
Title: Re: ما شفتوا عوض؟؟
Author: Munir
Date: 26-12-2007, 02:11 AM
Parent: #2


Quote: يا ريت لو شفت عوض
حزنت حزن ما عادى

الأخت سلمي ..
إنها فعلآ حزينة تفطر القلب ..

ماشفتوا عوض ياناس؟؟


يبقالي نجه متوجه قاصد ارض الشام..
ماشفته هناك مع الحجاج لابس الإحرام..
في مكة ويثرب وفي بيت الله المكسي رخام..
يبقالي هناك يكون مندسي مع الخدام..

ماشفت عوض يا ساري الليل؟؟..



Post: #8
Title: Re: ما شفتوا عوض؟؟
Author: اسعد الريفى
Date: 26-12-2007, 06:41 AM
Parent: #1

الاخ منير
اسعد الله صباحك كما اسعدتنا
و شكرا .. لانك خليتنى اعرف انو انا ذاتى عوض !!

Post: #13
Title: Re: ما شفتوا عوض؟؟
Author: Munir
Date: 26-12-2007, 05:15 PM
Parent: #8



الأخ أسعد .. مرحبآ بك وجعل الله كل أوقاتك سعيدة ..

Quote: و شكرا .. لانك خليتنى اعرف انو انا ذاتى عوض !!
كلنا عوض في متاهات هذه الدنيا ..

كل الود .


Post: #9
Title: Re: ما شفتوا عوض؟؟
Author: haroon diyab
Date: 26-12-2007, 07:08 AM
Parent: #1

منير
عيدك مبارك

حنلقي عوض....
وحيرجع عوض...
حامل البسمة لكل بيت....
وكل طفل.....
وكل زوجة....
وكل ام.....
عوض انت...
عوض انا....
عوض هو ....
عوض نحنا ....
تحياتي ياعوض ( اقصد منير ....!)
هارون دياب

Post: #10
Title: Re: ما شفتوا عوض؟؟
Author: خالد علي محجوب المنسي
Date: 26-12-2007, 01:17 PM
Parent: #9

سليم الزوق منير
تحياتي سلااااااام
درويش من صغره ... وما أكثرهم في بلادنا
يولد الطفل يعاني من خلل في العقل ويهمل ويطلق عليه انه درويش. وحكمة الله يشب شاقاً طريقه وعادة ومايلتصق بأهل الخير .. يجد منهم الحب والحنان وعطف والرحمة.

عوض وكما سمعت أنه كان يتيم وربته خالته أخت أمه ...

مُتجلبب بي تيبان الرحمة غُتا وهِندام
متنعلت بي ارض الله الواسعة خطى الأقدام
متزود شايل خير الزاد وحي وإلهام
ماشفتا جِناح جبريل غتاهّو بقالّو مظلة جلوس وقيام

ساري الليل هو نوع من الطيور تنشط ليلاً نسأل أن يجمع أن كان عايش

تحياتي ومودتي منير



Post: #15
Title: Re: ما شفتوا عوض؟؟
Author: Munir
Date: 26-12-2007, 07:05 PM
Parent: #9


العزيز هارون دياب كل سنة وانت طيب ..

اللهم أجمع بعوض وأهله يا جامع يا رقيب ..


Post: #11
Title: Re: ما شفتوا عوض؟؟
Author: maman
Date: 26-12-2007, 03:21 PM
Parent: #1

Quote: عوض وكما سمعت أنه كان يتيم وربته خالته أخت أمه ...


الأخ منير والأخوان الكرام

تحياتي لكم

(ما شفتو عوض)... هذه الأغنية أرخت لفيضان 88م الذي زار حلتنا وهي حلة عوض أيضا ، زراها بليل فصبحها في خبر كان... لم أكن حاضرا لتلك المأسأة ولكني سافرت بعد ذلك ووجدت أطلال مراتع الصبا... منزلي لم يبق منه غير البوابة... منازل الأعمام والأخوال والعمات والخالات. حاولت توثيقها بالكاميرا...

للعلم والد عوض هو محمد الأمين علي الحاج من حي القلعة بالقرير وكان يعمل بالشرطة ببورتسودان ومازال بها وهو حي يرزق ووالدة عوض أيضا حية ترزق.. وكان عوض يعيش في البلد مع عمته (الروضة بت علي ود الحاج) التي لم يرزقها الله بأطفال فاعتنت به خير عناية، الى أن كانت كارثة فيضان 88م واختفى عوض ولم يظهر له أثر منذ ذلك التاريخ

هذه صورة لبقايا منزل جد (عوض) لوالده


وهذا ما تبقي من منزلي الذي لا يبعد كثيرا عن منزل (عوض)



تحياتي لكم جميعا
مامان

Post: #12
Title: Re: ما شفتوا عوض؟؟
Author: خالد علي محجوب المنسي
Date: 26-12-2007, 03:39 PM
Parent: #11

للعلم والد عوض هو محمد الأمين علي الحاج من حي القلعة بالقرير وكان يعمل بالشرطة ببورتسودان ومازال بها وهو حي يرزق ووالدة عوض أيضا حية ترزق.. وكان عوض يعيش في البلد مع عمته (الروضة بت علي ود الحاج) التي لم يرزقها الله بأطفال فاعتنت به خير عناية، الى أن كانت كارثة فيضان 88م واختفى عوض ولم يظهر له أثر منذ ذلك التاريخ
الأخ مامان تحية طية سلااااام
كل سنة وانت طيب
كنت في السودان في عام 2000 وكانت هذه القصيدة الحزينة يرترنم الكل في مرة كنت راكب في حافلة وكان هناك همس وأصوات حديث خافتة بين الركاب وبعدها شغل السائق كاسيت فيه هذه الأغنية فبدأ الوجوم والحزن يكسو وجوه الركاب وكانت أول مرة أسمع فيها هذه الاغنية.
سمعت انه يتيم لكن لك الشكر على تصحيح المعلومة وهو اليقين منك وانت جار عوض ربنا يجمع شمله

Post: #14
Title: Re: ما شفتوا عوض؟؟
Author: الطاهر ساتي
Date: 26-12-2007, 05:56 PM
Parent: #12

ما شفت عوض ياعوض يا ساري ..

تابع النجمات ..............................

الزول زول من الصلاح ال...........
رفعت عنهم الأقلام

Post: #19
Title: Re: ما شفتوا عوض؟؟
Author: Munir
Date: 28-12-2007, 02:21 AM
Parent: #14


الأخ الطاهر ساتي ..
تحياتي ..


Post: #16
Title: Re: ما شفتوا عوض؟؟
Author: Munir
Date: 26-12-2007, 07:30 PM
Parent: #11



الأخ العزيز الفاضل مامان.. سلام معطر ..

شكرآ علي هذه الإضافة القيمة التي أكملت الصورة وأعطتنا المعلومة الشاملة عن قصة الابن عوض محمد الأمين علي الحاج .. وقد كنت أنوي أن أناشد من يعرف القصة كلها أن ينورنا بها فسبقتني بفضلك وتكرمك بها موثقة بالصور .. فالشكر أجزله لك ..

وبمناسبة بيتك لم يبق منه غير الباب هذه حكي لنا يومآ مديرنا في العمل أن صديقه في ذاك الفيضان (وهو كان أيضآ عام السيول في الخرطوم) أن الراجل بيته كله وقع وما فضل فيهو غير زي بابك الفي الصورة ده .. وكان الباب مقفولآ بالمفتاح ـ ما فاتح ضلفة زي بابك ده ـ فأصر الراجل وحلف ما يدخل إلي بيته (الذي كان) إلا من خلال الباب !!! .. ويشيل ويفتش في المفتاح والجماعة يحنسوا فيهو ، يازول مفتاح شنو ؟ وحيطة الحوش زاتها رقدت مواصة .. فأبي يدخل إلا بالباب !! ..
.
.

الله يعوض الجميع ويلم شمل عوض بوالديه ..



Post: #17
Title: Re: ما شفتوا عوض؟؟
Author: خالد علي محجوب المنسي
Date: 26-12-2007, 08:53 PM
Parent: #16

قد وثق لعام كثُرت فيه الامطار والفيضانات الشاعر الجميل محمد طه القدال بقصيد خمسين سنة
وهذه مقاطع منها .. كلما أقرأ هذه القصيدة أحس بالمطر وجو المطر في السودان.

ومترجيك
علي ميعادنا مترجيك
إذما البيت لبخ جالوص
ومزبّل لي الخريف عِمّا

وكان جواهو محبوبين
وهبابين
وخمسة عيال وسحارّا
وكان في البيت عقاب مِعزايّا
لي الشفع
وكان الدنيا يا الضلمّه
وكان القبلة جهارّّا
وكانت غيما درارّا

سبلوقاتنّأ ما صبّن
سبلوقات جارنّا سوّن جوووووو
ويادميع السِحاب نوّح
ويامِعز اللبن دغّن
ويا البقر الطلق بوّح
جفل في الزيفا ديك روّح
وياالكللاب يسوّن هوو
وقام حتى الجاد كيك
ويا مرق الصنت سيك
وتسمع وردلوب حيطة
ويا ابومروة ياابومروة
بيت حاجا امخريف دركان
تجيك من الفريق عيطّا

Post: #18
Title: Re: ما شفتوا عوض؟؟
Author: خالد علي محجوب المنسي
Date: 26-12-2007, 09:02 PM
Parent: #17

وتقرأ ام احمد
البسم الله في الأولاد
وتقرأ ام احمد
البسم الله في الأولاد
وكان أب أحمد المهجوم
بيقرأ الفاتحة في سرو
وبقول الجات علي مالك
مليح كان جات علي مالك
تعال آ جني
وكنكش فوق كتف خيّك
قلت أمرقي آ بنية
فرشاً إطير
هو شن هباب وشن كراب
وتسمع رُب يا المعِزا
وقعت ناشفا
بين الشعبتين والباب

وقام أحمد يَحَاوطْ البيت
أسرع يابا
شقوق ام سيسي والفارة
وأصبح بيتنا لي تولاتنا كفارة
ويا الحوش الصبح ميضّا
وبدور مركب
دحين إبقى البلد خرّف
دحين إبقى السرف نعمة
أقيدي اللمبا يا ام أحمد
بدور أضهب
واكسر الحوش عشان الساس
وكان الساس
حتل وإنماص حتل وإنماص
دميع السما ودمع الجُهال واحد
دمع الجُهال
في الضلما كان مالح
وكانت الدنيا
في عينيهم دوارة
وكان القبلة جهارا
وكانت غيمة درارة

Post: #20
Title: Re: ما شفتوا عوض؟؟
Author: dabeep
Date: 28-12-2007, 02:38 AM
Parent: #18


Post: #21
Title: Re: ما شفتوا عوض؟؟
Author: الزوول
Date: 28-12-2007, 04:43 AM
Parent: #20

السلام عليكم
ده شنو يا دبيب؟
الطعن طعن أبي محجن ، والكر كر البلقاء
الفنان الفي الفيديو ده من أهلنا الدناقلة /المحس
والصوت صوت عبد القيوم الشريفي
أظن انها دبلجة
بس دبلجة غير صحيحة
تحياتي
.............................
وما الناس إلا هالك وأبن هالك *** وذو نسب في الهالكين عريق

Post: #23
Title: Re: ما شفتوا عوض؟؟
Author: Munir
Date: 28-12-2007, 10:15 PM
Parent: #21



يا سلام يا دبيب .. يالروعة الأداء في هذا الفيديو وكأنما الفنان ليس ذات عبدالقيوم الشريف الذي في الفيديو الأول !!! .. الصوت رائع وصوت الكورس أكثر رونقآ !! .. كما أن المشاهد رغم عدم سبكها تمامآ مع الاغنية إلي إنها كأنما تنقلك في أجواء البحث عن عوض ..

وإللا رأيك شنو يا الزوول ؟؟


Post: #22
Title: Re: ما شفتوا عوض؟؟
Author: Munir
Date: 28-12-2007, 10:07 PM
Parent: #18


الأخ خالد المنسي، يا سلام عليك يا جميل .. وشكرآ علي إضافة هذا النص للقدال والذي زاد من عمق البوست ..


Post: #24
Title: Re: ما شفتوا عوض؟؟
Author: طارق جبريل
Date: 28-12-2007, 10:16 PM
Parent: #1


منير كيفنك
الله يجمع عوض بي اهله

محبتي الاكيدة

Post: #25
Title: Re: ما شفتوا عوض؟؟
Author: Munir
Date: 29-12-2007, 01:11 AM
Parent: #24



ودجبرين مرحبتين حبابك ..

Quote: الله يجمع عوض بي اهله

آمــــين يارب العالمـــين..
.
.
كل الود


Post: #26
Title: Re: ما شفتوا عوض؟؟
Author: jini
Date: 29-12-2007, 01:26 AM
Parent: #1

Quote: وبمناسبة بيتك لم يبق منه غير الباب هذه حكي لنا يومآ مديرنا في العمل أن صديقه في ذاك الفيضان (وهو كان أيضآ عام السيول في الخرطوم) أن الراجل بيته كله وقع وما فضل فيهو غير زي بابك الفي الصورة ده .. وكان الباب مقفولآ بالمفتاح ـ ما فاتح ضلفة زي بابك ده ـ فأصر الراجل وحلف ما يدخل إلي بيته (الذي كان) إلا من خلال الباب !!! .. ويشيل ويفتش في المفتاح والجماعة يحنسوا فيهو ، يازول مفتاح شنو ؟ وحيطة الحوش زاتها رقدت مواصة .. فأبي يدخل إلا بالباب !! ..


نسال الله الذى جمع يوسف بابيه يعقوب بعد غيابة الجب ان يجمع بين عوض واسرته
قول آمين يا منير


دهب مهمد سالح ذكر بانه الوحيد اللى استفاد من فيضان 88 ! كيف يا دهب فرد قائلا بيتى كان تالت ناصية صحيت الصبح لقيتو ناصية وفاتح على ميدان!!
جنى

Post: #27
Title: Re: ما شفتوا عوض؟؟
Author: Munir
Date: 29-12-2007, 02:06 AM
Parent: #26


Quote: نسال الله الذى جمع يوسف بابيه يعقوب بعد غيابة الجب ان يجمع بين عوض واسرته
قول آمين يا منير
آمــــين يارب العالمـــين ..

عوض ده ياجني (اللهم أجمع شمله بأهله) سيكون عمره الآن 29 سنة ياجني .. 29 سنة .. يا إلهي!!.. اللهم أفرحنا وافرح أهله بعودته ..

تعرف يا جني قصص الزول الرايح دي عندها وقع خاص معطون بالرهبة وروح الاحاجي السودانية ..

عندنا قريبنا صغير أخوانه استورد لهم أخوهم الكبير المغترب لوري أو شاحنة لست متأكدآ .. فأشتغل بإدارتها هذا الأخ الاصغر وقد كان توآ تخرج من الجامعة ـ فانهمك بسفرياته مع هذه الشاحنة حتي فقد أثره وأختفي لعدة سنوات فتفطر قلب والدته عليه حتي انتقلت إلي بارئها .. فقد كان شابآ دمث الاخلاق بشوشآ وسيمآ وجيهآ ضحوكآ ودودآ لدرجة بعيدة .. بعد عدة سنوات من البحث المتواصل في البوادي والصحاري والعتامير قيل أنه تاه مع طاقمه في الصحراء وقتلتهم الصحراء !! .. لقد بكيته كثيرآ عندما سمعت خبره وأنا في غربتي لأني لا أذكر عنه إلا وجهآ ضاحكآ بشوشآ كان يمر علينا يوميآ صباحآ ومساءآ ونحن جلوس علي رؤوس الطرقات فيحيينا واحيانآ يقف معنا وهو ذاهب الي شغله أو عائد الي البيت .. عليه رحمة الله ..
والله الواحد ماعارف يقول شنو؟ فكم من حبيب وقريب لفته واحتوته رهبة الغياب الأبدي وسار في درب اللاعودة !!! ..


Quote: دهب مهمد سالح ذكر بانه الوحيد اللى استفاد من فيضان 88 ! كيف يا دهب فرد قائلا بيتى كان تالت ناصية صحيت الصبح لقيتو ناصية وفاتح على ميدان!!



Post: #28
Title: Re: ما شفتوا عوض؟؟
Author: dabeep
Date: 29-12-2007, 03:11 PM
Parent: #27

الطعن طعن أبي محجن ، والكر كر البلقاء

الاخ العزيز الزوول سلامات ياخى
و كل سنة وانت طيب

تعرف كلامك سليم مية فى المية

الفنان الفى الصورة هو الفنان الدنقلاوى عبد الرحيم شاهين والصوت للفنان عبد القيوم الشريف
اما الفديو فهو محاولة بائسة لربط حاجتين محببات الى النفس او كما ذهب اخونا منير
والحاجتين هم اغنية (ما شفتو عوض) و برنامج لتلفزيون السودان (رحلة النيل و الشراع) اعده الاستاذ سيف الدين حسن تناول منطقة الدناقلة و السكوت والمحس والشوايقة والشريط جميل مادة وصورة يالاضافة الى قيمتة الادبية عندى
المهم انا بحاول اقول ليك انو حسن النية متوفر بالاضافة الى انوالدناقلة والمحس ديل اهلنا برضو وبراحة ممكن اقول ليك عبد الرحيم شاهين من الفنانين المفضلين يالاضافة الى الفنانة منال حسب الرسول وثابت تيد ووفاء متولى
فياسيدى لك العتبى حتى ترضى اذا رأيت فى اى تغول او تجاوز
and is all just for fun
اما اعتراضك فلا يجد منا غير الاحترام والتقدير ومن فوقو كان الف كان الفين
وكان سمح لينا اخونا منير اهديك الفنان عبد الرحيم شاهين فوق البيعة
مع خالص الود

دبيب




من يوم البحر الجانا وتسب وقام
يوم دخل الحلة وهدا بيوتا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق فى سفره طويلة مع الأيام
ثم يسترسل في أوصاف عوض
درويشاًمن يادوبو صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل
غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل
أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب
ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إن صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام


Post: #29
Title: Re: ما شفتوا عوض؟؟
Author: خالد علي محجوب المنسي
Date: 29-12-2007, 04:07 PM
Parent: #28

Quote: متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل
غتاهو بقالو مظلة جلوس وقيام

تلك الأبيات أعلاها تكشف عن عمق عميق متأصل في شعرية حاتم الدابي دثرها بثوب ديني يخلب العقول
فكانت التورية......
التي تفصح عن أنه
كان حافي القدمين
من غير زاد ومتوكل على رب العرش العظيم في رزقه في هذه الرحلة التي طالت وليت العودة ما تطول.
غتاهو من برد وحر كان من فضل كريم عالي في سماه .

قد أبدع حاتم الدابي في هذا المقطع ( كلمات بسيطة وعميقة)

مع خالص تحياتي المبدع منير

Post: #32
Title: Re: ما شفتوا عوض؟؟
Author: Munir
Date: 07-01-2008, 00:04 AM
Parent: #29


Quote: متنعلت بي أرض الله الواسعة خطى الأقدام


يا خالد المنسي أنا حيرتني مفردة "متنعلت" دي .. الشاعر حاتم جاب تصريفها من وين وكيف ؟؟ !!! ..

طبعآ الكلمة متصرفة من نعال .. وأظن تصريفها يكون منتعل أو متنعلل !!..
أم تري أنه أراد أن يباعد بين حرف النون وحرف التاء في الكلمة حتي لا تختلطا ويغيران الكلمة فتعني معني مغايرآ ؟؟!!!..


Post: #30
Title: Re: ما شفتوا عوض؟؟
Author: الزوول
Date: 29-12-2007, 06:32 PM
Parent: #1

السلام عليكم
دبيب أخوي
كل سنة وانت طيب
يا خوي ما تاخد فيها حاجة
التصحيح ما ني قاصد منو شي
عِل نحن غنانا ده عزيز علينا بلحيل
وحاجة تانية
كويس التصحيح الجاب لنا فيديو عبدالرحيم السمح ده
وكدي النقيف هني شوية
اهلنا الدناقلة ديل والله طوروا طريقتم في الغنا تطوير تمام
وبالذات طريقة الصفقة
وأصلاً ايقاعم مميز جداً
وأسهل على أذن أهل وسط السودان
أكثر من الايقاع الشايقي
وبقوا منافسين تمام لغنى الشايقية
بس أظن مشكلتم في الرطانة
.......
زمان ايام الداخلية
كانت تضم معظم أهل وقبائل السودان
بقارة ، جنوبيين ، دارفوريين ..الخ
ولكن الغالبية هم اهل المنطقة الشمالية الشايقية ، الدناقلة ، المحس ، الحلفاويين والمناصير
كانت المذاكرة اجبارية
وكان أول الليل يخصص لها
وبالتالي تحول الكهرباء الى المدرسة وتقطع عن الداخلية
بعد انتهاء المذاكرة تحول الى الداخليات
وكان هذا يستغرق بعض الوقت
وفي أحشاء ذلك الظلام
يختفي الخجل الطبيعي و تظهر المواهب
وكنا ندخل وسط أي مجموعة تمارس فنها المحلي
نغني كما يغنون ، ونرقص كما يرقصون
ومنها عرفنا معظم أغاني الرطانة
وحفظناها ...
ومنها خرجت بأن القولة المأثورة
إن المرء لا يحب ... حتى يفهم
ليست بالضرورة صحيحة دائماً
شكراً على الأغنية الجميلة
.......
تصحيح جديد
بعض الكلمات في القصيدة
والله اقولك
مافي داعي بعد تفصيلك الجميل لمراحل القصيدة
حتى لا نفسده
شكراً أخي دبيب
وخالص الود لك وللأخ منير وضيوفه

............................
وما الناس إلا هالك وأبن هالك *** وذو نسب في الهالكين عريق

Post: #31
Title: Re: ما شفتوا عوض؟؟
Author: Munir
Date: 31-12-2007, 08:55 PM
Parent: #30

جاييكم ..