رجال في وزن الريشة ... يا بكري وسع الخور !!!

معاناة المرأة لا تقتصر على تربية الأبناء , أو العمل داخل وخارج البيت ... ولا تنتهي معاناتها

بالطلاق العاطفي ولا الحقيقي فهناك يا إخوتي من تخصص في إضافة معاناة جديدة لما تعانيه على مر

الدهور هل تريدون أن تعرفوا من هم هؤلاء ؟ هم رجال مثلكم تماما لا يختلفون عنكم إلا في شيء واحد

وهو إنكم رجال بمعنى الكلمة مالين هدومكم وهم خفاف ولفاف في وزن الريشة ... لا يشاهدون ثوبا

أو طرحة إلا وركضوا وارءها كالحيوان المفترس الذي شاهد فريسة في مكان عام .. هؤلاء الرجال إخواتي

لا يستحون على دمهم كون إنهم سودانيون ومن يلاحقونها هي ايضا سودانية تعيش في الغربة وتحتاج للستر

والغطا وليس للملاحقة والمطاردة البوليسية بدم بارد ... هؤلاء ليسوا برجال بل أنصاف رجال يبحثون

عن موضوع ليكملوا به النصف الآخر من رجولتهم وهم أصناف متعددة الألوان والأشكال فمثلا:

** رجال تخصصوا في ملاحقة النساء المتزوجات فحينما يشاهد أحدهم إمرأة متزوجة لكنها تسير لوحدها

في الشارع يسرع الخطى نحوها ويبادر بالتحية ..مساء الخير ترد مساء النور .. (يتشجع) محتاجة لسيارة

ترد شكرا مشوار قريب ...( يتلايق) ... برضه ممكن أوصلك حتى لو قريب ...( تنفعل) ... ياخي شكرا جزيلا

قلت ليك المشوار ما بحتاج عربية ...( يتجرأ) إنت مش زوجة عوض ..( تتبرم ).. عوض منو؟ أبدا( يتواقح

طيب ممكن رقم نلفونك ؟ ..( ينفد صبرها) ... أسمع هنا أنا قلة الأدب دي ما بتنفع معاي تمشي من هنا

ولا أتصل بالشرطة ... سمع الكلمة الأخيرة فولى الأدبار.

** رجال آخرون تخصصوا في النساء اللواتي يعانين من خلافات زوجية ويكون أحدهم صديقا لزوجها وهو يعرف

جيدا من أين تؤكل الكتف يتصل بزوجة صديقه هاتفيا :

- ألو سهير كيفك ياغالية ؟

* ألو الحمد لله مين معاي لوسمحت ؟

- معقولة تنسي صوتي بالسرعة دي ؟ أنا علي !

* أهلا علي أنا كويسة والحمدلله .

_ أها صاحبنا عامل كيف ؟ ماشي عدل ولا لسة بتلولو؟

* والله غايتو مرة كدا ومرة كدا.

_ (أعجبته الإجابة ) إنت عارفة يا سهير دة زول حيوان ساكت ما بستاهلك بالله في واحد يلقى زي جمالك دة

وثقافتك و رقتك دي ويعمل جنس الحركات العجيبة دي ؟ فعلا يدي الحلق للي مالوش ودان !

* نعمل شنو دي قسمتنا وأهو الواحد قاعد عشان الأولاد ..

- شوفي يا سهير أنا غايتو متعاطف معاك جدا وعارف صاحبنا دة زول مغفل لكن أنا من الليلة مت إيدك

دي لإيدك دي عايزة أي مشوار أنا حاضر .. محتاجة لفلوس ما عندك مشكلة اعتبريني أي حاجة .

* شكرا جزيلا .

- عيب يا سهير الحكاية ما عايزة شكر .. إنت عارفة أنا من زمان معجب ومنتظر الفرصة دي !!!

* ( صمت) ...

* رجال تخصصوا في المطلقات لظنهم أنهن ساهلات ومتساهلات .

_ ألو إزيك يا رجاء كيفك ؟ مبسوطة ولا نص نص ؟

* الحمد لله .. عمر ولا منو المعاي ؟

- إخصي عليك كيف ما تعرفيني وعمر دة منو كمان اللي عايز ينافسناده؟ أنا بدوي!

* أهلا يا بدوي إنشاءالله إنت كويس ؟

- الحمد لله طول ما إنت كويسة أنا برضه كويس ( نفاق) أها عاملة شنو ظروفك كيف المادية والمعنوية!

* الحمد لله ماشي الحال .

- والله الليلة اتذكرتك عشان فلنتاين وقلت حرام تعدي اليوم دة لوحدك قلت أعزمك أو تعزميني أصله

الغربة دي صعبة وعايزة ليهاأنيس فأيه رايك نقضي اليوم دة مع بعض في شقتك أو عندي ؟

* والله أنا آسفة يا بدوي ما قاعدة أدخل رجال في بيتي ودة مبدأ ما بقدر أغيره .

- ( بوقاحة) أنا غايتو ما عندي مبادي وبدخل نسوان في بيتي خصوصا إذا كانو حلوين زيك !

* إنت حر وأنا برضه حرة ( طاخ ) قفلت التلفون في وشه .

* رجال متخصصون في الفتيات اللواتي يعملن في الغربة بدون عائلة .

قابل أحدهم إحداهن في الشارع .. أدى التحية بلهفة ثم وقف أمامها متسمرا كتمثال رميسي الثاني ثم

تململ وتنحنح ليقول .. وينك ياخي لينا زمن ما لاقيناك ( هو يعرفها ولا تعرفه) ما عرفتيني ولا شنو؟

* أبدا والله ما حصل شفتك أبدا!

- ( بسخف ) بس أنا شايفك وعارفك إنت مش سلوى الساكنة في بناية مركز اللولو ؟

* كلامك صاح !

- ومش ساكنة معاك إيمان ؟ وإنتو الأتنين بتشتغلو في شركة أم أند أس ؟

* ( بزهج) فعلا !

- طيب تفتكري أنا جبت المعلومات دي من وين ؟ وليه؟

* والله ما عارفة بس إنت عايز توصل لشنو بالظبط ؟

- عايز أوصل الغاية عندكم يعني أزوركم وتزوروني أنتو عايشين في غربة وأنا برضه والدنيا مصالح .

* ( شخطت فيه بأعلى صوتها) مصالح في عينك نحن لو عندنا مصلحة ما بتكون مع واحد زيك يا مغفل يا

مبهدل ( أسرع الخطى وخلى اللي ما يشتري يتفرج) .

رجال تخصصوا في العوانس دون أن يدركوا أنهن يفضلن نار العنوسة ولا جحيم الزوج لذلك يصبح الإختيار

أمرا صعبا ويحتاج إلى دراسة وأنا أحي فيهن هذه الشجاعة والثقة بالنفس وأقول لهن العرس ملحوق ولا

تستمعوا لهؤلاء لأنهم يعتقدون أنهم يرفعون من معنوياتكن ويحملوكن جميلة .

_ ألو .. مساء الخير... كيف حالك يا لبنى

* الحمد لله بخير

- أها أخبار العرسان شنو؟ معقولة واحدة بحلاوتك دي وأناقتك دي ما تلقى عريس لغاية هسة؟ والله لو ما

كنت متزوج كنت أتزوجتك !

* ومنو القال ليك ما لاقية عريس ؟ العرسان على قفا من يشيل بس ما لقيت اللي يفهمني وأفهمه دي عشرة

عمر ومافي داعي للعجلة.

- ( يتراجع ) كلامك صاح لكن برضه أنا بقول كل واحد في الدنيا دي محتاج لأنيس يونسه ويخفف عنه وأنا

مستعد عارفاني زول ظريف وبحب الونسة والطلعات والقعدات الحلوة .

* طيب ماتونس مرتك وتتطلع معاها!

_ أعوذ بالله ما تطري لي الشياطين عز الضهر بالله دي مرة دي عاملة زي البلدوزر إنت وين وهي وين؟

* طيب لما هي كدا قاعد معاها لغاية هسة ليه ؟

_ تقولي شنو القسمة وكمان هي بت عمي وعيب أطلقها !

* معليش يا محمود أنا وراي شغل كتير والمدير طلبني مع السلامة .

* رجال تخصصوا في رفع معنويات اللواتي لم يحظين بجمال من منطلق القحة ولا صمة الخشم .

_ فتح دفتر تلفوناته وطلع أرقام كل اللواتي يعتقد أنهن شينات جدا واتصل .. ألو مية مسا على

الجمال والهندسة !

* ألو .. عماد ؟ مساء الخير أيه الحركات دي يا عماد نحنا وين والجمال وين ؟ لو كنت جميلة كان

لقيت لي عريس !

_ منو البقول كدا ؟ والله إنت ما عارفة روحك ساكت ( يضحك في سره) كدي أمشي اقيفي قدام المرايا

حتكتشفي مواطن الجمال وبعدين ما سمعت الزول القال كل النساء جميلات والذكية هي التي تعرف كيف تبرز

هذا الجمال ؟

* تضحك والله دة كلام جرايد ساكت لكن غايتو الله يجبر بخاطرك .

- طيب ايه رأيك أنا عازمك الليلة سبنما وبعديها عشا وسهرة ؟

* آسفة والله من جيت البلد دي لا دخلت سينما لا أتعشيت لا سهرت !

- ( بينه وبين نفسه) بالله عليك الله شوف الشينة دي وقت رضيت أطلع معاها عايزة تعمل فيها ليمونة في

بلد قرفانة ؟

* رجال عواجيز تخصصوا في البنات الصغار كل ما يشوف واحدة ستايل يجري وراها.

_ كيفك يا حلوة إنت مش يت محمد أحمد الحاج؟

* لا يا عمو دادي إسمه زهير عبدالله .

- ( لم تعجبه كلمة عمو موع ذلك تمادى) يا أرض أحفظي ما عليك وبتقري وين يا حلوة ؟

* في جامعة السربون .

_ ما شاء الله حاجة تمام وكل البنات البقرو معاك حلوين زيك كدا ؟ مستحيل طبعا إنت حاجة غير!!

* يا عمو أنا مستعجلة عشان مامي منتظراني في المول .

- خلاص ما مشكلة ياحلوة نشوفك مرة تانية .. ممكن آخد تيلفونك ؟

* أسفة يا عمو دادي ما عمل لي تيلفون ( تهرب منه بسرعة الضوء والصوت وتتركه واقفا كعمود الإنارة

الآيل للسقوط ) .

الاخت ام مجاهد تحياتى
هولاء الرجال لاوزن لهم والدليل هو ينهزمون
من فريستهم اذا كانت تعرف كيف تتعامل معهم
يعنى انا ارى من كان عندها خلافات مع زوجها
واتصل صديق الزوج السجم ده وقال اول كلمه
بتعرف منو هو قاصد شنو وعلى ضو ذلك تتصرف
معه وانا ارى ان تديه درس فى الاخلاق تانى
صديقنى ماحايتصل ابدا لانه مهزوم وما وجد
تجاوب من البدايه000
الذى اريد ان اقوله بان هولاء لاوزن لهم وليس برجال
يجب قفل الباب امامهم من اول وهله مافيش اسهل من كده0
اما البنات الصغار ديل المفروض ان لاتستعمل
الا اجره خاصه ودى بى حذر او المواصلات العامه
غير كده لاتلوم الا نفسها 000000

أخي العزيز خالد

مودتي

شكرا على استجابتك السريعة ومرورك الجميل ... فعلا مثل هؤلاء الرجال يحتاجون لدروس وعبر وردود صارمة

توقفهم عند حدهم أما الفتيات الصغار فالمفروض يكون معاهن مرافق ... شكرا خالد ودمت .

العزيزة عواطف

تسلمى ويسلم قلمك الرائع

شكرا لك وانت تنيرين الدرب لناوتضعى اشارات فى مكامن الحفر

تحياتى

موضوعك سمح وملان
واقترح انلا نسميهم رجالا
لانهم فقدو قيمة التسميه
بجميع المفاهم
ومشكوره للتطرق لهذه الظواهر الدنئه
مودتي

أخوي العزيز أحمد

سمح إنت ... ربنا يديك العافية ويعلي مقامك ... هؤلاء فقدوا كل شيء ولا يملكون أصلا أي شيء

شكرا بعد عمري .

الحبيبة مهيرة ...

تسلمي يا عقد الجلاد من كل شر... أنت منيرة ومستنيرة وعقلك يوزن بلد ... معا نحو مجتمع أفضل .

تحياتي ... ومعزتي .

الأخت العزيزة عواطف

الموضوع شائك ومتداخل فهناك من الرجال من لا يؤمن بحتمية التاريخ وتعاقب الأجيال وتقدم السن ، رجال يعتبرون أنفسهم دونجوانات وقد فارقهم الشباب ردحاً.. وهناك بعض يعاني من الفراغ العاطفي رغم أنه تزوج عن حب ولكن الطرف الآخر كان يعتقد أن الحب ينتهي مع أول ضيف قادم في عداد الأسرة ويجب أن يتحول الحب إلى عشرة وحيث أنها أنجبت فبهذا الإنجاب صدرت بوليصة التأمين على عمر الزواج.. هناك من يمضون عمرهم في طلاق إختياري وبرود عاطفي دون أن يكلف أحد الطرفين نفسه البحث عن المشكلة وتعديل المسار!!
البعض الآخر يستمر في الحياة على مضض بحكم التعود ويمضي به العمر في هذه الحال وكأنه في بيات شتوي ثم يصحو فجأة من غفوته ويبدأ في التفكير في كيفية تغيير هذا الحال بعد فوات الأوان ، فلو كان قد فكر مبكراً لكان أنقذ نفسه وكذا شريكته ولكن جاء التفكير متأخراً وبطريقة سالبة فبدأ رغم تقدم العمر الإعتقاد بأنه ما زال قادراً على أن يمارس دور الشاب وحتماً هذا مستحيل وغالباً ما يكون الدافع هنا شهواني جنسي حيث تنشط القدرة الجنسية عند البعض من هذه الفئة العمرية ناتجة عن حرمان وكبت نتج عن عدم توافق عاطفي وروحي.. يبدأ بعض الرجال من هذه الفئة العمرية المتقدمة بعدم القبول أو الإعتراف بأن العمر قد تقدم بهم أو قبولهم بأن لكل فئة عمرية أحكام وضرورات وأن خروج الرجل عن وقاره بالتطفل على من دونه في العمر بكثير أو من هن في عمر بناته فهذا أمر مخزي ومُفقد للوقار!! إنها عودة الشيخ إلى صباه !!.. تفكير مراهق في سن متقدم نتج عن عدم الحوار في الوقت الذي كان يمكن أن يكون مناسباً لتعديل المسار بين الطرفين.. هذا لا يمنع أن هناك نماذج أصلحت مساراتها .. ووفئة غالبة سلبية حولت الزواج إلى حالة من طلاق عاطفي وفئة ثالثة فّرت وبحثت عن الوفاق العاطفي مع من هم في سنها أما الفئة الرابعة فهي إما فئة رجال تقدم بهم العمر ويعيشون حالة من المراهقة الذكورية أو نساء تقدم بهن العمر وبدأت في مرحلة مراهقة عاطفية مع من هم في سن أولادها.
إننا يمكن أن نتمتع بأي مرحلة من مراحل العمر وبما يقتضيه الرشد العقلي والعاطفي .. هناك البعض يتمتع بصداقة أبنائه وهم في مرحلة الشباب.. وهناك بعض الحالات أيضاً كان لها تضحيات معينة يجب أن لا نغفلها

أخي العزيز أبوبكر

مودتي

مشكور يا بعد عمري على المداخلة الطيبة وطبعا مداخلاتك العلمية دايما

بتكون من العيار التقيل والمثل بقول العيار المابصيب بدوش وبعدين

يا أبو بكر دة كله كوم والرجال القاعدين على قمة المسئولية لما تجيهم

واحدة مسكينة معترة عايزة شغل عشان تساعد أهلها ولما يعرف كدا شوف

الابتزاز والمناورات لغاية ما الواحدة تنكسر وتتجاوب أو تترك الموضوع

من أساسه ... أين الرجولة عند هؤلاء؟؟؟ شكرا يادكتور على مرورك الجميل .

الأخت عواطف .. تحياتي

نماذج شهدناها في فترة من الفترات ... وكنت أظن أنها اندثرت لولا هذا البوست. أو على الأقل تطورت الأساليب. وما أقصده هو ما يحدث هناك في ديار الأهل. ولكن هنا؟ وفي غربة يحس فيها الإنسان أن كل أنثى هي شرفه؟ أخته .. إبنة عمه .. إلخ. لا زلت أكضّب الشينة وأقول .. يمكن جمح بيك الخيال شوية .... يمكن ...... مش؟

اللهم لا تؤاخذنا بما فعل السفهاء منا.

تحياتي

الزميلة عواطف لك التحية للسرد الحلو والوصف البديع

شغلك صاح وخيالك خصب وقارية الميدان قراية صحيحة بدرجة عالية من الرصد والتحري يدل على مهنيتك العالية في بلاط صاحبة الجلالة والسلطة الرابعة ،، تابعي فضح المتسكعين والمتسكعات والمتشببين والمتصابيات العزاب والمطلقات والممحونين والممحونات من أولاد أو بنات في أرض الوطن أو دول الشتات.

تخريمة: أقترح عليك فتح منتدى نطلق عليه منتدى (العواطف).

أخي الحبيب عبدالرحمن

أشكرك على هذا العبور الجميل وأتمنى أن أكون عند حسن ظنك .. ومثلما ذكرت لابد من محاربة هؤلاء

بكل الوسائل لكي لا تقوم لهم قائمة وهم يعرفون أنفسهم جيدا ( كاد المريب أن يقول خذوني ) مودتي .

اخي العزيز ابو العزائم ...

مودتي ...

هذا الموضوع لا يحمل أفكارا خيالية بل واقعية تحدث كل يوم ولو كنت بنت لتأكدت بنفسك .. فالأساليب

لم تتطور والناس هم نفسهم والله يا محمد لولا الحياء لكتبت أسوأ من ذلك ولكن هذا غيض من فيض ودمت .

الخور الخور للكرور

الله يجازي محنك يا عواطف .. انت يا ولية صحفية وللا اختصاصية نفسية
وبعدين انت شكلك بتضربي في أمثلة أو نسجت قصص من واقع خيالك الواقعية
(ده كلام شنو القلتو انا ده) .. واظنك بكتبي عن حال سودانيي الإمارات ..
وبالمناسبة دي نماذج لأحداث مشابهة تحدث في كل الأمكنة يعني كان في السودان
كان برة السودان..
ودي مسألة مرتبطة بتكوين الانسان وتاريخو وهي في مجملها (عقدة نقص) ..
ويا عواطف بيني وبينك في واحدات بشجّعن علي كده وبتجاوبن وهن البخلن زي
أرباع الرجال هؤلاء يقدمون على تلك الفعال .. يعني المسألة مشتركة أياً كانت
النسبة ..

على العموم يا عواطف الموضوع مهم جداً والناس مفروض تشوف رادع لهؤلاء .. خاصة في بلاد الغربة
لأنو الوضع بصراحة بكون خطر وحسّاس جداً.

العزيز أمير

الخور الخور للكرور ..... شعار جميل يجب ترديده في كل وقت ... وزي ماذكرت هذه النماذج موجودة

في كل مكان ومشكلتهم يا أمير أنهم ببلعوا الإهانة وكأن شيئا لم يحصل وتلقاهم بعد شوية يقوموا بنفس

العمل وبدم بارد ... شكرا أمير مرورك يسعدني .

المعاكسات موضوع مثير للاهتمام بحق لما نراه من ازدياد هذه الظاهرة في مجتمعاتنا..............
يسعدني ان اشارك معكم في هذا الموضوع والذي يناقش ظاهره غير صحيه انتشرت وبعنف ليس في مجتمعنا فقط بل في جميع المجتمعات بإختلاف اديانها وثقافاتها فالمعاكسات يا أختي ظاهرة اصبحت منتشرة كثيرا ً في مجتمعنا تتمثل في محاولة تقرّب احد الجنسين الى الجنس اللآخر ( سواء الفتاة للشاب أم الشاب للفتاة ) بطرق واسباب غير شرعية وتبتعد كثيرا ً عن آدابنا الاسلامية ..عن طريق الهاتف أو الانترنت أو من خلال التعليق المباشر في المجمعات او الشوارع كما ذكرتي..
السبب الرئيسي لذلك هوالتأّثر بالغرب ونقص الوازع الديني والثقافة الاسلامية وهذا النقص سببه التريبة الخاطئة من قِبل الأهل ..اما الاسباب الأخرى تتنوع , فقد يكون الفراغ المحتاج ملئه بـ فتاة / شاب لسدّه هو من تلك الاسباب ..
وقد يكون ذلك الشي الخبيث الذي يدور في مخيِّلة الفتاة ام الشاب , وهو الحاجة الى فض الغرائز الجنسية مع الجنس الآخر فيقوم الشاب مثلا ً بمغازلة الفتاة للإيقاع بها لقضاء حاجته فيها ..

رأيت الكثير الكثير من هذه المواقف ،، عدم الذوبان في ثقافات الغرب انما الأخذ منها ماهو مفيد ومتناسب مع آدابنا الاسلامية بالإضافة الى محاولة زيادة الوعي لدى الشباب ليفهم ان هذه الظاهرة لا تتناسب مع ديننا وآدابه...

فهؤلاء يا أختي عواطف ادريس اسماعيل جميعهم شباب مراهقون شهوانيون !!!!!
خونة ..
كذبة ..
مشاعرهم مصطنعة ..
وأحاسيسهم الرقيقة ملفقة ..
وعباراتهم وكلماتهم مبالغ فيها ..
تخرج من طرف اللسان لا من القلب ..
ألفاظهم أحلى من العسل ..
وقلوبهم قلوب الذئاب المفترسة ..
هدف كل واحد منهم ..
أن يقضي شهوته القذرة ..
ثم يرميك كما يرمى الحذاء البالي ..
كلهم تهمهم أنفسهم فقط .. !!

شكرا ً لك اختي عواطف ادريس اسماعيل لهذا الموضوع الهادف .. وطرحك للقضية بإسهاب


ولي رجعه

العزيز سن رايزز

تحياتي وشكري الجزيل لمرورك الأنيق وتحليلك الدقيق ... بصراحة أنا أعتقد أن هؤلاء يحتاجون طبيب

نفسي وأخصائي إجتماعي لأنهم حتما مريضين نفسيا ويعانون من خلل اجتماعي .... شكرا يا عزيزي في

انتظار عودتك .

الأخت عواطف..
والله الموضوع قصّر رقبتنا لمن صارت الياقة أعلى من الرقبة..
معقولة في ناس بالسخف والعهر والأبتذال ده؟ طبعا ده سؤال تقريري أو إستغرابي..
لكن زي ديل ما بيقولوا عليهم رجال... لأنو الرجولة ليست فحولة مصطنعة.. الرجولة مواقف..
وإرب.. وإحترام..
صدقيني هؤلاء حتى فيما يرموا إليه ليسوا كما يعتقدون أنهم بلغوا مبلغا من الرجولة.. لأنو حتى مبتغاهم ينظروا إليه نظرة ميكانيكية لا تسمن ولا تغني من جوع (أنا آسف لكن ما بقدر أقرب الصورة أكثر من كده..)

كيف يفعل ذلك من له زوجة أو أخت أو إبنة أو أم؟ هذه تصرفات يندى له جبين كل رجل حر أبي..

أما كل النماذج التي عرضتيها من النساء كانت نماذج حية.. أستطاعت أن تسد طريق الغواية والشيطان أمام أولئك الحيوانات فيما عدا نموذج المرأة التي لها خلاف مع زوجها.. فهي اخطأت أكثر من مرة.. وأول خطأ أن تترك مجالا لصديق زوجها أو غيره أن يتدخل في أمورها الشخصية .. حتى لو كان الزوج هو من أخبر الصديق... ما كان يجب عليها أن تأخذ وتدي معه في الكلام.. كان يمكن أن تعطيه درسا لا ينساه في الأخلاق.. ولكن .. هي مسئولة بدرجة.. وطبعا ربنا سبحانه وتعالى وضع لينا قاعدة فض الخلافات الزوجية وجعل الحكمين من كلا الجانبين (حكم من أهلها وحكم من أهله)... وهما ضدان لا تجتمع مصالحهما في أغلب الظن... وبحضور الزوج.. فيما عدا ذلك لا يجوز أن يخوض أي كان في علاقة بين زوج وزوجته..
مرة أخرى بعتذر على هذا الصنف من الكائنات المحسوب زورا وبهتانا على قبيلة الرجال.. ونبرأ منهم براءة الذئب من دم إبن يعقوب..
والله يحفظ لنا نسائنا من تلك الحشرات القذرة..

كيمو العزيز

كيفك ياراجل يا محترم .. والله انفعالك الواضح يدل على إنك أخو أخوات وحمال أسية كتر الله من أمثالك

ولا تخف فالجندريات قادرات على صد أي هجوم قذر وذو أهداف دنيئة ... وتأكد ان المسلسل سيستمر ولكن

بدون فائدة .. أما الزوجات اللواتي يدخلن الاصدقاء في مشاكلهن الخاصة فقد وقعن في مصائب كبيرة جدا

والمثل بيقول إحذر عدوك مرة وأحذر صديقك ألف مرة فلربما أنقلب الصديق وهو أعلم بالمضرة .. سلمت

يا مقنع الكاشفات ..

الاستاذة...عواطف ادريس
كل التجلة و الاحترام لك
و كل عام و الجميع بخير في هذا اليوم الجميل
مثل هولاء...ليسو برجال و لا وزن لهم
موضوع جميل و سرد ممتع و حقائق واقعة كل يوم
........
شكرا لك علي الانارة و توضيح بعض ما خفي علي البعض
لنا عودة ان امد الله في الآجال

أخي العزيز هواري

تحياتي يا غالي وأشكرك بحرارة على هذه الكلمات الرائعات ... نحاول يا عزيزي أن نلقي الضوء

على سلبيات المجتمع بالقلم وذلك أضعف الإيمان ... كله عيد حب وأنت بألف خير .

الفارسة عواطف،

سلامات

مرات أقرأ بوستاتك ومرات أقول كدي لمن نفضى ليها من المشغلويات.. كتابتك هنا ضو بيتش عين الضلام تششششششششش.. كية في محل الوجع ذاتو وإن شاء الله الكمدة بالرمدة!!

وكما تساءل قبلي كمال كرار: بالله في رجال سودانيين بالعينة دي؟؟ يااااااه..

بس عين الله ما بتنام..

تسلمي

ياسر

أخونا الرفيع د. ياسر

كله عيد حب وأنت والجميلة إلهام بصحة وعافية وما تشوفو شر ويجعل ليكم في كله خطوة سلامة ,, يحفظكم

ويحفظ وليداتكم من كل بلى ... أشكرك على كلماتك الرائعة روعة روحك النبيلة ... لمن تفضى أقرا بالله

شكرا ياسر... مرورك الأنيق يسعدني ... النماذج كثيرة ولكن المكان لا يسع ... شكرا أخوي ... مودتي .

كتب الأخ أبوبكر يوسف

Quote: أما الفئة الرابعة فهي إما فئة رجال تقدم بهم العمر ويعيشون حالة من المراهقة الذكورية أو نساء تقدم بهن العمر وبدأت في مرحلة مراهقة عاطفية مع من هم في سن أولادها

كلامك يا أبوبكر عين العقل ،، وبالمرة كدا يا عواطف أو أي واحد يحدثنا عن لقافة وطياشة وخفة نون النسوة ودورهن في هذا السجم.

الأخت عواطف
تعجبني كتاباتك في الشأن الإجتماعي كثيرا ، فهي بحق مرآة لواقع نعيشه. هذه الأنماط التي ذكرتها في مقالك هنا للأسف موجودة وكثيرة ، لكن هناك نوع نعاني منه نحن حتى داخل أسرنا هنا في الغربة... ومعاناتنا تأتي من ناحية اللوم الذي يقع علينا إذا قلنا الحقيقة والتي لا يمكن أن نسكت عنها لأن في السكوت عنها اجحاف بحق أسرنا ..
النوع الذي يزورك في البيت (الشقة) ثم (يعمل) فيها الحالة واحدة و(توشك) للصالة دون إذن أو إشعار لمن بالداخل حتى (يعدلو) حالهم ... ويبدأ في الضحك (والهذار) الذي لا مناسبة لهوالصوت في (أعلى فوليم) ...
حدث وأن غضب منى اثنين من أقاربي عندما أوضحت لهم أن الشقق هذه ضيقة وانه يجب أن يستأذنوا في الدخول أولا ، وكيف أنني شخصيا وهذا بيتي وزوجتى وبناتي أستأذن قبل الدخول .. لكن كان الرد غير ذلك و(زعل) (شيلة حس) وموضوع للنقاش ....
من يحترم نفسه يحترمه الآخرون .. ومن ينزل بنفسه لهذا المنحدر حتما سوف (يدوه بالجزمة القديمة)
شكرا لك لأنك تعكسي لنا صورنا عسى ولعل أن يتوب مثل هؤلاء

أخي الحبيب كمال

مودتي

والله ياكمال هذه النماذج فعلا موجودة والنوع البدخل توش دة خليه على الله أول حاجة بجيك بدون مواعيد

وأول ما تفتح الباب يجي توش قبل ما يعرف الحاصل شنو يقعد في الصالون ويدخل المطبخ إذا كان في

مناسبة يتونس مع النسوان وهاك يا ضحك وقرقراب فاكر روحه دمه خفيف ومهضوم ولا الناس البجوا يساهرو

معاك لامن تنوم في الكنبة من التعب والخدمة .. عصير ... شاي مغرب .. كيك ... عشا ... شاي بعد العشا

ونسة ... ضحك ... سياسة... قطيعة في الناس... تدخل في شئونك ... وأأأأأأأأأأأأأأه من زي ديلة

واااااااااأسفاي ..

الأخت عواطف
تحياتي
عينتك النسائية غير عشوائية و أختيرت بعناية فائقة
الدليل : ولا واحده منهم فصلت!!!!
أأكد لك لو لم يجد هؤلاء بعض التجاوب لما تطورت هذه الظاهرة....
نتوقع منك بوست اخر عن الطرف الثاني في الظاهرة
لك الود

أخوي العزيز القرادابي

مودتي

اشكرك على المرور الجميل .. لم تقل سوى الحقيقة فعلا هناك حالات خاصة تساهم في انتشار هذه الظاهرة

إما بالمبادرة أو بالتجاوب معها وسوف نتناولها في القريب العاجل بإذن الله ... شكرا يا عطيم ...

العزيزة عواطف

رايت بعضا من هؤلاء كهولا وشياب في مناسبات عامة وهم مع اسرهم وبناتهم واخواتهم ينسونهم وينسوا حرمة ما ليس لهم حين تاتي بنت او شابة في عمر بناتهم واخواتهم ونساء في عمر زوجاتهم وربما كلهن صديقات لهن تصيبهم حالة لا ارادية تحسبها من قبحها كالذي يتبول علي نفسه .. بعض منهم يبدء بدعابة عن جمال وبهاء القادمة ويتدحرج بنفسه الا ما لايليق ..
بعض اخر سمعت عنهم من صديقات فاصابني رعب .. حكن لي بعض من صديقاتي انهن في بحثهن عن عمل ذهبن الي بعض من هؤلاء- نافذين ومن بلادنا او في موقع متقدم في مؤسسة ما- وبتوصية احيانا فتعرضن الي مناورات رخيصة وقبيحة ومساو مات...
بعض من صديقاتي المطلقات حكين لي قصص عن تجاوزات زملاء عمل وجيران –سودانيين وفي الغربة- يتقربو اليهن اولا وكانهم يرجون خيرا ثم يظهرون باوجه قبيحة ...
كلنا بشر وكل ابن ادم خطاء ولكن مثل هذا من قبيح عمل وفعل يتجاوز الخطا الي الجريمة ...
لماذا هذه الشيزوفرينية في تصرفات مثل هؤلاء اليست امهاتهم وزوجاتهم وبناتهم واخواتهم نساء ..؟ هل معني ان تكون انثي استباحة للجسد والعرض ؟؟ هل يرضون بما يفعلون من قبيح بفعل مماثل ينال حرائرهم .... ما الذي فيهم " لتندلق " فيهم كل انثي ؟؟ هل تخيل احدهم – وما علي الله ذلك ببعيد - ان تغيرت اجناسهم الي اناث وكمان مطلقات باحثات عن عمل شريف وحياة شريفة ؟؟ نساء بلادنا عقول متفتحة امكانات وطاقات علمية وانسانية وعملية وادبية وعاطفية وفيهن رجاء مثلما في رجال السودان الشرفاء " عشا البايتات" واكثر .. ابتلاءت السودان سياسية واقتصادية واجتماعية من فعل الرجال ولولا نساء بلادنا الولادات خضرة وامل لكنا في خور كبير ... متي نراعي الله في انفسنا برعاية بناتنا فهن افئدتنا ...

أخي العزيز أبوبكر

معزتي

والله صدقت في كل كلمة قلتها عن الرجال البتكبكبو في النسوان بالذات في

حفلات العرس والعواجيز العينم طايرة الواحد يشوف واحدة داخلة من باب

الاوتيل طوالي يركز عليها من راسها لغاية رجليها وبعدين يقول دي مرة

منو السمحة دي يقولو ليه مرة فلان طوالي يقول ليك العواليق داك ؟ والله

ما بستاهل مرة زي دي والنوع البحب البنات الصغار يتحشر محل ما دخلو

في الحفلة ويعاكس فيهم بلا خجلة ... شكرا أبوبكر النماذج كثيرة جدا

إنتي رائعة وقلمك يظهر لنا عفن مجتماعتنا إلى السطح وتخرج الرؤوس المدفونة في الرمل عنوة لترى واقعها.

وبالتأكيد لو رجال الدنيا كلهم مرو على البوست ده حتلقى تعليقاتهم يسبوا ويلعنو أبو صنف الرجال الذكرتيهم ديل وحيحاول يبرءو نفسهم في حين إنو في الواقع أكثرهم لو لقى فرصة زي دي ما بفوتها إلا من رحم ربي.

لكن نسيتي نوع الرجال البصاحب أخو البت ولسع الأخو ماشي من عندو ويتصل على بيتهم أزيكي يا سمية عمر موجود وأهنداك عمر شايفو ما دخل الشارع التاني ويخشي ليك في وأنتي مالكي ما ظاهرة وما قاعدين نشوفك كتير وموال من ده.

وجزء من المسئولية تقع على راجل البيت أو أخو البت أو خال البت اللي يدخل كل من هب ودب البيت من غير ما يتأكد من أخلاقو ومعرفتو بيهو بيكون معرفة شارع أو شغل وما عدي ليها يومين.

لكن أنا من رأيي إنو نص المسئولية تقع على الفتاة فإذا الإنتهازي ده ما وجد تجاوب منها أكيد ما حيتمادى زي ما قال أخونا المحرب.

وطيب إيه رأيك في النساء اللي بيطاردو شباب في عمر أولادهم وعندهم علاقات معاهم برضو في الغربة وأنا بتكلم عن تجربة وشاهد على أمثلة كتيرة.

لكي مودتي

أخي العزيز سليمان

تحياتي

والله إنت الرائع لقد أصبت الموضوع في مقتل يعني حكاية الأولاد البصاحبو

الأخو عشان الأخت شفتها بنفسي مرات الأخو بكون عارف ويمشي الموضوع عشان

عنده مصلحة ومرات بكون شايل القفة لكن أيه رأيك في حكاية الأصحاب اللي

بصاحبو زوجات أصحابهم يعني تلقى الواحد مساهر معاهم في الكوتشيتة للصباح

يقوم واحد يطلع برة الغرفة بتاعة الكوتشينة ويتصل بزوجة صاحبو ويعاكسها

إذا كانت بت ناس بتوقفو عند حده وإذا كانت عواليق زيه بتتجاوب معاه

وأخونا المسكين قاعد في الكوتشينة يحلف بحياتها...

Quote: والله إنت الرائع لقد أصبت الموضوع في مقتل يعني حكاية الأولاد البصاحبو الأخو عشان الأخت شفتها بنفسي مرات الأخو بكون عارف ويمشي الموضوع عشان عنده مصلحة ومرات بكون شايل القفة لكن أيه رأيك في حكاية الأصحاب اللي بصاحبو زوجات أصحابهم يعني تلقى الواحد مساهر معاهم في الكوتشيتة للصباح يقوم واحد يطلع برة الغرفة بتاعة الكوتشينة ويتصل بزوجة صاحبو ويعاكسها إذا كانت بت ناس بتوقفو عند حده وإذا كانت عواليق زيه بتتجاوب معاه وأخونا المسكين قاعد في الكوتشينة يحلف بحياتها...

والله يا عواطف حيرتينا عارفه كل ده ،، والله صحيح تعيش كتير تسمع وتشوف اكتر واللهم زدنا علما
عموما لا املك إلا أن احييك للطرح المميز والمعلومات الغزيرة والجريئة ونطمح في المزيد وركزي على بيت الكلاوي

أخونا الحبيب عبدالرحمن

مودتي

عندما يصبح إهتمام الأنسان بالمادة أكثر من إهتمامه بالقيم يشهد المجتمع تفككا وانحلالا عجيبا

وتفرز هذه الظاهرة سلوكيات قد لا تخطر على بال أحد مثلا هروب بعض البنات من أسرهم ... عمل بعض

النساء في مهن غير شريفة ... أشياء وأشياء يا عبدالرحمن اللهم أحفظ بناتنا وشبابنا من أولاد

وبنات الحرام .

رجال فى وزن الريشة يا عواطف

عدولي العزيز

وينك يا راجل

والله مداخلتك دائما متميزة ما قل ودل فلا تحرمنا من إبداعاتك المرة الجاية عندنا موضوع رجال

من ورق جهز الصورة .

أختنا عواطف - سلامات
وصافه ما شاء الله التقول (شايقيه) .. ما تستعجلى (جاى) ليكم بالدرب التانى .. وعندى موضوع اتوصى معاك وخلى (الخور) خورين ما واحد.
لكن برضو شوية (عكلته) هنا:-
ديل مش حقو يسموهم رجل .. حقو (يسموهم) باص !!!
وده كلام ما عارف بتفهمى ولا لا ؟؟

_______________

لكن برضو يا عواطف يا اخنى فى (نساء) .. الرجل أخو البنات ، البعمل حساب كل النساء وبيتعامل معاهن زى اخواتو بكل احساس وذوق وأدب ما بيحترمو .. وبيعتبرو زول ثقيل دم .. خصوصا فى بلاد الغربه .. وديل برضهن نساء (وزن ريشه) ولا ما كده ؟؟

ولا ريشة الرجال (اتقل) من ريشة النساء !!

العزيز تاج السر

مودتي

أولادي هم الشوايقة تأثيرهم قوي جدا مرة قلت للكبير إنت يا مجاهد لا بعجبك العجب ولا الصيام في رجب

قال لي ولا في رمضان ذاته !!! أيه رايك ؟ وزي النوعية دي باص شوية عليهم ديل أوتوبيس عديل كدا

وبعدين يا ودأمي أخير يقولو دمه تقيل ولا يقولو خفيف ولفيف مش كدي ؟ حتى النسوان كمان في وزن

الذبابة يعني أخف من الريشة ديل أجارك الله لما تشوفن في مناسبة تمرق تخليها ليهن منتظرنك ما تطول

الغيبة ..

الاخت لك التحية..... رجال وزن الريشة وربما يكون اقل من ذلك فنحن ما ننسى الصنف الثاني نساء لاوزن لهم ايضاً ..... فيا اختى كل ما طرحتيه هو واقع وحقيقي ومعاش في زمننا هـذا...... مع الاسف.


مودتي

امين

الاستاذ عواطف البوست ده يعبر عن واقعنا المرير بكل كلمة و حرف خطها قلمك الواقعى للسودانيين فى الغربة ...اما يا ستى السودانيين فى المهجر او التى استوطنوا بها و حملوا جنسياتها فاوزانهم اخف من الريشة...مثل واحد يجيب صاحبته فى غياب زوجته....و واحد يتزوج زوجة صاحبة....و واحد يقيم علاقة من شابة سودانية و النتيجة طفل مصيرة الزبالة و القصة تبقى بوليس كيس ..و و و و و ..يا ستى الامثلة كثيرة حا احتاج لساعات طويلة لكتايتها لكن لو لقيت طريقة بجيك راجع....


ويا ستى الخور واسع بس انتى كترى من امثال هذه المواضيع

تسلمى يا غالية

أخي الحبيب بكري

صدقت والله فالغربة رغم المعاناة الفيها بتخلي بعض الرجال زي المجانين في واحد عنده صديقة من بلد

مجاور سفر زوجته إجازة وقبال الطيارة ما تطير رجع البيت ومعاه القيل فريند والطيارة السودانية

اتعطلت والمرة جات راجعة تلقى ليك واحدة في أوضة نومها وعينك ما تشوف إلا النور ... وقصص كتيرة

ياأخو البنات تشيب الراس وحكاوي لا حكت لابقت الله يكون في العون ... معزتي .

أخوي العزيز أمين

ما قلت إلا الحق فكلهم في الهم شرق ,,, أجارك الله يا ودأمي ... معزتي .

Quote: رجال تخصصوا في رفع معنويات اللواتي لم يحظين بجمال من منطلق القحة ولا صمة الخشم

ديل مفروض نشكرهم على كدا

(( ديل وزنهم خفيف الوسط ))

الاخت عواطف
ما يدور فى الغربه هو انعكاس لما يدور فى الداخل


وبرغم كبر الماساه نجد ايضا وجهه مشرق
فهنالك رجال فى الوزن الثقيل

ومتابعين موضوعك حتى النهايه

Quote: وبالتأكيد لو رجال الدنيا كلهم مرو على البوست ده حتلقى تعليقاتهم يسبوا ويلعنو أبو صنف الرجال الذكرتيهم ديل وحيحاول يبرءو نفسهم في حين إنو في الواقع أكثرهم لو لقى فرصة زي دي ما بفوتها إلا من رحم ربي.

ومتابعين ياخاله مواضيعك القيًُُمة

عـواطف

الله يمتَعك بالعافية

ويتقَل أوزان الناس في ميزان الحسنات لا المنكرات

كيفك يا عواطف

غايتو النوعيات ديل كوم والنوع ده كوم

Quote: رجال آخرون تخصصوا في النساء اللواتي يعانين من خلافات زوجية ويكون أحدهم صديقا لزوجها

دة إنسان فعلآ يثير التقزز .

موضوعك فى التنك أرجو أن يكون مرايا للخفاف ويستحوا على نفسهم .

تسـلمى


رأفت

أخي العزيز رأفت

اشكرك على مرورك الجميل يل أخو البنات ودة يا بعد عمرى من ذوقك وأصلك الطيب وزي ما قلت البعاكسو

نسوان أصحابهم ديل حاجة مقرفة جدا ... شكرا رأفت ...

اخي الحبيب حيدر

مودتي

اشكرك على هذه الكلمات الجميلة و ربنا يحفظك ويجعلك في كل خطوة سلامة .

يا عواطف كيفك
وموضوعك جميل فعلا وحقيقي
وما نبحث عنه هو الحقيقه وعدم ابتزال المشاعر
لا من النساء ولا الرجال.
حكيتي عن واقع وربما اهملت واقع آخر اخطر وهو مجال التقائنا هنا
وهي المنابر وادئنا كرجال ونساء في هذه المنابر
لذا ساهديك هذا الاقتباس من مقال نشر حول موضوع شبيه بفكرتك.
عن ما اسميتهم بمتسكعي المنابر ومحاولة تدين النساء الفاعلات:

Quote: متسكعي المنابر ومحاولة تدجين النساء الفاعلات.... بليت هذه المنجزات الحضاريه(المنابر الالكترونيه) بعدد من الفيروسات من خلال متسليين لا يعرفون قيمتها,كأداه لنشر الوعي بين العامه بلا تكلفة كثيره. لكن تسلل اليها بعض المترفين و المحرومين عاطفيا ليمارسوا سخفا من خلاله استهدف النساء في المقام الاول ,فقد كنا ولازالنا هن الاقل عددا وخبرة احيانا بالحياة في ضروبها المختلفه,لذلك لازال بعضهن لا يعرفن كشف اكاذيب هؤلاء النفر. سأبدا بكشف هذه النماذج فقط لان خسارتنا نحن النساء ستكون فادحه بتحجيم البعض او ابتعادهن او كفرهن بضرورة التصدي و العمل العام. اشكال التدجين: 1)تخصصت بعض الاقلام الفاجره الفاسقه التي لا ترى في المرأه الا أداة للذه بال(الكبكه) في اي قلم نسائي يتقدم للمنابر,فتبدأ التحايا و محاولة التعرف الظاهره للقاريء الحصيف...بعدها التخصص في المداخلات المنتظمه لذلك القلم ,وتمجيده مهما كان فقر كتاباته..... 2)تبدأ الماسنجرات....وينك وامبارح المنبر مظلم من غير ابداعاتك....وتلفونك ويا ويلها ان كان من المناطق الرخيصة الاتصال ...خلاص صحبتنا يكون تم عزلها وادخالها في صداقات فارغه...بالذات اذا كانت غير مرتبطه او ملتزمه اسريا. 3) من خلال الصداقه وتوطيدها تبدأ محاولة العزل من المعسكر الحقيقي الذي تنتمي له الاخت او الذي تتبنى طرحه....فتجد النسف لناس المعارضه..مع الادعاء بانهم معارضه...يمتد الحديث لاخلاقهم وفسوقها...وانه معارض بس نظيف ويخاف على بنات الناس...يبدأ التحريض ان تكف عن التداخل مع فلان لانه بذئئ وعلان لانه اطروحاته كافره....وعلانه لانه سمعتها غير منضبطه..وفلان لانه اكل قروش حزبه...و.....و....الخ من اكاذيب. 4)تبدأ بعدها الدعوه لفكر الا فكر والدخول لحزب البهجه و المسره و الفارغه وذلك بانزال اشعار غزل مع التأكيد لها في الماسنجر او بالهاتف انها المقصوده وانها هي من اوحت بكل هذا الابداع و العمق وتصدق صحبتنا....ويبدأ التركيز على البوستات الانصرافيه....ونزيل الاغاني....ويستمر الفيلم...الذي ينتهي لللاشيئ عادة واحيانا بظهور قلم آخر نسائي يستحق كل تلك الجهود..... 5) ينشغل صاحبنا....بالقلم الجديد ويبدأ التعلل لاسباب الغياب..والاعتذار بالشغل والاسره و الاولاد (في العاده متزوجين للاسف)...حتى تصدق صاحبتنا وقد تكون فعلا اندمجت في عالم الفارغه..وصارت كالبلهاء تردد يا جماعه اختلفوا بهدؤ...ولماذا هذه اللغه العنيفه..و...و .. الخ مع (البركان) في بوستات الفارغه...فتصير مهجوره من اصدقائها الحقيقين..وابناء معسكرها الفكري فتعمد لاستجداء ناس الحزب البهجه و الدوران في فلكهم. 6)يعود صاحبنا بصيده الجديد لواجهة المنبر وقصائده الجديده او مواضيعه الفارغه مع تبهيرها مرة مرة بمواضيع يقال انها وطنيه من النوع الذي يصور الوطن كأمراه وكفتاة ويركز على الشوق و الهجر...ويواصل اصطياد طرائد جديده من خلال ذلك. 7)تشويه النساء القويات و المدركات لكل اشكال هذا السخف بعينيها,فمثلا ان قالت له تعجبني فلانه,ياسلام عليه مركزه في قضيتها ومدركه لما تفعل و...و.....و..الخ يبدأ صاحبنا الصيد في الماء العكر بالايحاء بانها منبوذه..معقده...غير جميله ما عندها خيار غير البتعمل فيه ده...هي لو زيك كان ما لقت زمن للسخف البتعمل فيه ده...اسالينا نحن الرجال بنقول شنو على الزيها ديل....يستمر في ممارسة تحقير منجزاتها وتشويه صورتها و الاخطر ارسال رساله لها بأن هذا النوع لا يعجب الرجال ,وكأنه مهم ان تعجب الانثى الرجال من اشكاله....وهنا تقتنع صاحبتنا بأنه افضل لها ان تظل كما هي...وتحجم مشاركاتها في التبريكات و التعزيات...وكتابة (المواضيع الخفيفة الهضم)...هذا ما يسميه لها صاحبنا بينما هي تكون مواضيع غبيه لا يتداخل فيها الكتاب الجادين او وانما الفارغين من متسكعي المنابر. المضحك شنو؟؟؟؟؟ انه هؤلاء الاغبياء لا يعرفون انه نصف كتاب المنابر باسماء نسائيه طلعوا رجالً قد يكون هذا بمثابة انذرا لهم الا يكشفوا اوراقهم هذه لنساء المنابر الا بعد التحدث اليهن..ولكن الطرف الآخر ايضا طلع زكي ويسطيع ان يجد اخت او زوجه او قريبه يمكنها ان تمثل انه هو ويستمر المقلب. وفي كل الحالات لا يخلوا الامر من ضحايا...بالذات وسط البسيطات و اللائي لسنا سياسيات وصاحبات تجارب غير ناضجه وسط محاولات التركيع المستمره للمرأه عموما و السودانيه خصوصا..... نشفق على هذا النوع الذي يخرج من التجربه بقلب مكسور..او بقرار بعدم الكتابه الا باسم رجالي!!!!!تخيلوا ..البعض وصلن لهذا القرار حتى يتجنبون سخافات هذه الاشكال المتواجده بكثره في معظم منابر الحوار. التحيه للقويات اللائي كشفن اللعبه واستمر عطائهن واتضاح رؤيتهن ولم ينهزمن للابتزاز العاطفي,رغم تركيز الجهود و الفهلوه لتدجينهن. و التحيه للرجال المدركين لاهمية وجود المرأه بالمنابر بدعمن بعضنا وشجعنا بعضنا ودافعنا عن بعضنا وكانوا ولازالوا نعم الاخوة و الاصدقاء ورفاق النضال لبعضنا. و التحيه للمختلفين مع بعضهم وبعضهن بشرف يحللوا فكر بعضهم/هن بلا لمز او غمز او طعن في شرف او غيره. ولا نامت اعين الجبناء. تراجي

نشر بمبنر السودان الجديد.
تحياتي.
تراجي.

العزيزة تراجي

مودتي

والتحية لك وإنت تصمدين أمام كل الأعاصير التي تهز الجبال ... موضوعك جميل والأجمل من ذلك أن

نختلف على فكرة أو مبدأ ولكن بدون زعل أو فجور في الخصومة ... شكرا مرورك يسعدني ...

العزيزة ام مجاهد

والله صدقتى وهذه النوعية من
الرجال كثيرة وخصوصا فى بلاد الغربه
المهم الواحدة ما تفتح مجال لاى واحد
وانا بقول كلمة رجال دى كتيرة عليهم وما يستاهلوها
وبالمقابل هناك رجال الواحدة تتشرف ان يكونوا ليها اخوان
وعون فى الغربة .

الحبيبة حواء

أسعدني مرورك العطر وقد صدقت فيما ذهبت إليه ولكن تقولين ماذا ؟؟؟ تقولين ويحي وهل كنت افهم حرفا

يمر؟؟؟؟

بخاف العزيز

والله خوفتني بالجد لمن قريت اسمك قلت يا ربي بخاف دا مالو إنشاء الله مافي عوجة ... عموما تسلم

ياالحبيب وتشكر على المرور ومعا سوف ننقذ ما يمكن إنقاذه .

العزيز يوسف الولي

والله هدف ناس الوزن الوسط مش رفع المعنويات بقدر ما هم يلعبون بمشاعر البنات بغرض التسلية

وتقضية الوقت وبعدين ما يدور في الغربة شي وما يدور في الداخل شيء آخر وهو أسوأ مما تتصور

وربنا يجيب العواقب سليمة ... شكرا على المتابعة والإهتمام .. معا من أجل مجتمع أفضل ..

اختنا العزيزة عواطف

سلامات

الله اديك الصحة علي هذا الشغل المتميز والتربوي والارشادي
وهو افضل من مليون خطبة في مسجد يؤديها ملتحي منافق ليس من صلاته ووقاره الا حركات رياضية يوديها والله يعلم ما بين الصدور ولذلك اسميتهم الرجال الجرادل يحملون القيم
والاخلاق والوعي كمثل الحمار يحمل اسفارا...اي حاضنات معارف فقط مثل اي اضبورة تحمل
(خرتمية) مرجع في الفكر ولا تقرا ولا تفهم ولا تعي ما تحمل!
ودي واحترمي

هباني

ود هباني العزيز

تحياتي

مرورك الجميل يشرح الخاطر يعني يدل على أن اهتمامك بالشأن السياسي لا يقل عن اهتمامك بالشأن

الاجتماعي سبع صنايع والبخت أكيد مش ضايع ... شكرا هشام نورت البوست .

استاذه عواطف

مساك الله بالخير
موضوعك جميل والله .. ونشكرك جزيل على تنويرنا بالمكنات البيكبوها الرجال
للبنات بالتلفون والمقابلات الشخصيه ... مبالغه لكن ( وجه ضاحك )

وبعدين دا الوجه التانى للحقيقه وكما تفضلت به بنتنا سلمى صبحى

انقلبت الآية.....البنــــات يغازلن ويطاردن الرجــــال !!!!!!!!!!!!!

أستاذة / عواطف
لك التحية والإحترام أختي الفاضلة
أتابع بقوة ما تكتبين هنا ..
ونعايشه هنا .. وبقوة ..
يحدث بيننا كل يوم .. وفي كل مناسبة ..
ونرى أوزان الريشة ( من الجنسين) ...
ولكني هنا يا سيدتي أشعر بأن أمرنا بخير طالما ( كان الوزن الثقيل موجود بيننا)
ينشر الحق والفضيلة وينور عقول من غابت عنهم حقيقتهم ..
شكراً سيدتي ...

العزيز عمران

مودتي

شكرا على مرورك الرائع لقد أثلجت صدري بهذا الثناء العاطر إنشاء الله دور وزن الذبابة في الطريق

دونت وري ... شكرا يا الحبيب .

أخي الحبيب علي

مودتي

مشكور على المرور الزاهي وزي ما بقول المثل تعيش كتير تشوف كتير أما الوجه الثاني الله لايوريك

يمكن الوجه الأول عنده عذر !!!!

سلام ياأستاذه
والله الموضوع متميز..
كنت أقرأ ليك البوستات في صمت للمشغوليات..
لكن الله يجازيك يا عواطف.. قلمك ده يجر الواحد جر..
ويسرق الزمن.. من أول حرف والمداخلات حتى آخر شئ.. والتعليق رغم أنف من يقرأ..
الله يخليك ويبارك فيك.. ما تركت صفحة يناموا عليها الخفيفون ديل..
تحياتي..
عبدالعزيز

+

Quote: ونرى أوزان الريشة ( من الجنسين) ...

نعم صدقت يا أستاذ عمران، فقد سبقتني.
أن كانت أستاذة عواطف تطرقت للجنسين، لما ظهرت
بهذه الصورة التي لم تخفي فيها انحيازها الجندري.
لي شخصيا تجربة وأمرأة مطلقة ولها أثنين من الأبناء
أحدهم بلغ سن ال18 ولملاحقتها لي دخلت بأحراج عظيم
لأني أعرف أبنها البكر، ورغم حديثي معها صراحة بهذا
الشأن الا أنها ما زالت تصر علي الملاحقة.
أيضا أعلم عن شخص عازب كان يشاركني السكن، ودون شك
يقع تحت تصنيف السيدة عواطف فهو "خفيف ولفيف" وأضيف
خبيث، لأنه صادق سوداني آخر الي أن نال من زوجته وصار
بينهم العجب العجاب، فعندما واجهناه بالحقائق أقر بأنه
يحبها وهي تبادله الحب علما بأن لها أربعة من الأطفال.
الغريب في الأمر أن الرجل أقتنع بفراقها وذهب للسودان وتزوج
بنت عمه أوخاله لا أدري وبعد أن أتي بها الي الغربة، قطع علاقاته
بكل السودانيون الذين كان يتودد لهم ومنهم ضحيته السابقة.
غايتوا مشاكل أهل السودان يعلم الله بيها، المشكلة بعد ده كولو
عندنا لسان أجار الله الأخرين منه.








دنقس.

العزيز دنقس

مودتي

والله أنا ما منحازة لأي حد يعني حتى روحي بنتقدها نقد لاذع ولو بتقرا البوستات الفاتت وبعدين منو

القال ليك الجندريات ما يحنوبن من الحب جانب ؟؟؟ جاياك بالمهلة ... خلي حبل الصبر طويل شوية

والمطارداك دي خليها تستحي على دمها شوية أما الخبيث اللي ضحك على الخفيفة اللفيفة أم أربعة

وأربعين دي ربنا ياخدو وزوجها ليه حق يقطع علاقته بجميع السودانيين ... دمت عزيزي .

العزيز عزو

مودتي

شكرا على ثنائك على البوستات في الحقيقة أنا عايزة أجر رجلك لغاية ما تجي السودان شنو رايك بعد

داك ممكن تقول لي الله يجازيك يا عواطف .

عزيزتي عواطف
لك مودتي وتقديري
والله الشوق للبلد والأهل فايض بي من زمن..
لكن بالجر ما بجي ليك.. أنت عايزة تكوني لي
زي الخالة كلتوم بشر التي كانت تهددنا بالتفصيدإذا
لم نوقف العوم في الترعة..
الآن العوم صار في هذه الفضاءات الكبيرة..
طيور ا تغرد في المنافي البعيدة..
وبلا بلهارسيا..
مع تحياتي
عبدالعزيز

العزيز عزو

نتمنى لك مزيدا من التحليق في الفضاءات الجميلة هو التحليق بقروش ؟؟؟؟

الفاضلة عواطف تحياتى

موضوع شييق جدا ولكن وبما اننى رجلا ورجل حمش كما يقول اخواننا فى مصر وددت ان اطرح عليك سؤالا متفرعا قد تقرئية على انة زعل ولكنى انفى بل واترجمة على انة عنصرية للرجل واقل اننى من يؤمنون بالمقولة التى تقول ات تاكس تو تو تانجو و الان الى السؤال المتفرع
وماذا عن النساء هل لا يوجد فيهن مثلما يوجد بين او فى الرجال ؟
1- الخفيفة ووزن الريشة
2- والتى تتحين الخلافات الزوجية لتنصب حبالها حول الزوج؟
3- والمتقدمة فى العمر وتسعى وتطارد الشباب
4- والوحيدة فى الغربة الساعية الى تقليد مافى القنوات الفضائية
5- والمتزوجة المطاردة لزوج الاخرى وا وا وا وا
وهل هناك نساء فى خفة وزن الريشة وجب توسيع الخور لهم ام لا

وتقبلى تحياتى

هشام امين

أخي العزيز

هشام

مودتي

المسألة ليست تحيز أو عنصرية فمن كان من الطرفين بلا خطيئة فليرمها بحجر بس أنا جاياكم بالمهلة

وكل الأنماط التي ذكرتها موجودة وبكثرة ,, عموما أنا أشكرك على مداخلتك القيمة وشكر خاص على

ثنائك على الموضوع ,,, وخليك قريب محتاجين ليك في كل المواضيع القادمة .... شكرا هشام .

العزيزة عطوفة..
نسيتي أهم نوعية في أوزان الريشة..
تعالي هنا و أقري عنهم...
تحرُش ماسنجري

ممكونة الحبيبة

الشكر الجزيل يا رائعة على هذا المرور البهي أما حكاية التحرش الالكتروني دي هي آخر صيحات التحرش

يعني ولا من شاف ولا من درى طبعا الواحد ياخد بهدلته بدون ما حد يسمع .. شكرا على بوستك الجميل

التحرش الماسنجري .

كل إناء بما فيه ينضح

Quote: وماذا عن النساء هل لا يوجد فيهن مثلما يوجد بين او فى الرجال ؟ 1- الخفيفة ووزن الريشة 2- والتى تتحين الخلافات الزوجية لتنصب حبالها حول الزوج؟ 3- والمتقدمة فى العمر وتسعى وتطارد الشباب 4- والوحيدة فى الغربة الساعية الى تقليد مافى القنوات الفضائية 5- والمتزوجة المطاردة لزوج الاخرى وا وا وا وا وهل هناك نساء فى خفة وزن الريشة وجب توسيع الخور لهم ام لا Quote: انقلبت الآية.....البنــــات يغازلن ويطاردن الرجــــال !!!!!!!!!!!!! انقلبت الآية.....البنــــات يغازلن ويطاردن الرجــــال !!!!!!!!!!!!!

---

Post: #78 Title: Re: نساء في وزن الريشة ... يا بكري وسع الخور !!! Author: عواطف ادريس اسماعيل Date: 02-19-2007, 04:25 PM Parent: #76 عدولي العزيز مودتي جاياك بالمهلة يا سعادة المستشار ... مرورك أسعدني وعايزة أقول ليك الأخت سلمى صبحي تطرقت قبلي لهذا الموضوع لكين عشان ما يقولو متحيزة الليلة أبستف ليك النسوان حنس بستفة وليك علي , عليا .. وعلى أعدائي وتسلم يالحبيب .

---

Post: #86 Title: Re: نساء في وزن الريشة ... يا بكري وسع الخور !!! Author: Adel Sameer Tawfiq Date: 02-20-2007, 09:59 AM Parent: #78 Quote: عشان ما يقولو متحيزة الليلة أبستف ليك النسوان جنس بستفة وليك علي , عليا ..وعلى أعدائي !! ست الكل عواطف.. تسلمي ياست الناس.. يحى العدل.. بالمناسبة..تلفونك رقمو كم ؟!

---

Post: #77 Title: Re: رجال في وزن الريشة ... يا بكري وسع الخور !!! Author: مهند مامون Date: 02-19-2007, 04:20 PM Parent: #1 شكرا الاستاذة عواطف هذا واحد من أروع وامتع البوستات التي مررت بها اهنئك بحرارة على قدرتك المميزة على السرد والتسلسل الذي يجعل القارئ مشدودا حتى النهاية واوافقك على كل ما ذهبت البه وربما زاد ذلك سوءا محاولة تسييسه .. اي محاولة البغعض استخدام تلك الاساليب الوضيعة الحقيرة وسيلة للاستقطاب والجذب للتنظيمات ... بل وربما استخدام ذلك كوسيلة لـ(جمع الصف) في مواجهة العدو الاكبر شكري لك وتقديري ونرجو المزيد Quote: موضوعك سمح وملان واقترح انلا نسميهم رجالا لانهم فقدو قيمة التسميه بجميع المفاهم ومشكوره للتطرق لهذه الظواهر الدنئه مودتي عربي من تحكي عنهم الزميلة عواطف هم بالفعل ليسوا رجالا لأن الرجولة صفات وسجايا وخصال ... نعم هم ذكور وهذا لا نختلف عليه .. لكنهم ليسوا رجالا البتة ... ومن تشابههم تبقى إمرأة لكنها ليست من النساء معزتي

---

Post: #79 Title: Re: رجال في وزن الريشة ... يا بكري وسع الخور !!! Author: عواطف ادريس اسماعيل Date: 02-19-2007, 04:30 PM Parent: #77 إبني الحبيب مهند معزتي بلا حدود الليلة ذكرتني ولدي مهند اللي سافراستراليا قبل أسبوع بالضبط .. جددت لي أحزاني شوية لكن معليش العزاء إنه مشى يدرس .. شكرا يا هنودي على كلامك السمح بحليل وإنشاء الله أكون دايما عند حسن ظنك ويا مهند في أنماط كتيرة لازم نسلط عليها الضوء مش بغرض كشف الحال ولكن من أجل مجتمع أفضل ولا شنو رايك يا الحبيب ؟

---

Post: #80 Title: Re: رجال في وزن الريشة ... يا بكري وسع الخور !!! Author: مهند مامون Date: 02-19-2007, 04:59 PM Parent: #1 Quote: ذكرتني ولدي مهند اللي سافراستراليا Quote: العزاء إنه مشى يدرس Quote: في أنماط كتيرة لازم نسلط عليها الضوء مش بغرض كشف الحال ولكن من أجل مجتمع أفضل آسفين ونعتذر بلطف وربنا يحفظ مهند ويوفقه ويكفيه شرور الأشرار الهايمين وحايمين هناك ويرجعو ليك سالم غانم يا رب واتفق معك اننا لازم نسلط الضوء واكتر من الضوء على هذه الفئات المرضة المنتنة سواء ان كانت من الرجال او النساء معزتي

---

Post: #82 Title: Re: رجال في وزن الريشة ... يا بكري وسع الخور !!! Author: عواطف ادريس اسماعيل Date: 02-20-2007, 08:10 AM Parent: #80 الإبن الحبيب مهند مودتي تشكر على المرور الجميل والكلمات الرقيقة ... معا يا مهند نحو مجتمع أفضل .

---

Post: #81 Title: Re: رجال في وزن الريشة ... يا بكري وسع الخور !!! Author: سيف الدين مصطفى كرار Date: 02-19-2007, 06:30 PM Parent: #1 الاستاذة عواطف كل الترحاب (most welcome) كلام جميل ماقدرش اقول حاجة عنة. صاح...لكى الشكر.

---

Post: #83 Title: Re: رجال في وزن الريشة ... يا بكري وسع الخور !!! Author: عواطف ادريس اسماعيل Date: 02-20-2007, 08:15 AM Parent: #81 سيف عندنا ؟؟؟ يا مرحبا يا مرحبا !!!! سيف العزيز .... مودتي وشكري الجزيل لهذا الكلام الجميل ...

---

Post: #84 Title: Re: رجال في وزن الريشة ... يا بكري وسع الخور !!! Author: othman mohmmadien Date: 02-20-2007, 08:17 AM Parent: #81 تحية طيبة وتقدير عظيمين للجميع،،،، أولاً: رجال في وزن الريشه .... إنتصار للمرأة على حساب الرجل .... أم طرح لتناول صنف محدد من الرجال .... وإدانتهم وتبرئة المرأة بالكامل نعم قد ارغب ان انتصر للمرأة على حساب الرجل، بحكم تربيتنا التي تصنفها كانسان يتطلب الاحترام يحتاج دوما للرعاية والحماية .. ولكن هل أبرئ ساحة المرأة ، فعلاقة الرجل بالمرأة او علاقة المرأة بالرجل لا يمكن لأحدهما ان يلعبها بدون الآخر! وعلى من تقع مسؤولية انحراف الرجل وانبهاره بأي مرأة أخرى على زوجته ... هل على زوجته التي لم تعرف كيف تحتفظ به أعتقد أن انحراف الرجال يرجع في معظم الأحيان إلى جهل النساء "الزوجات" بالأسلوب الذي يجب أن يتعاملن به من أزواجهن لتحصينهم أمام رقة ونعومة أي امرأة أخرى. ومن الأمور الهامة التي يجب أن تفطن إليها كل زوجة، أن سوء معاملة الزوج لا تؤدي إلى انحراف الزوج فإن معظم حالات انحراف الأزواج تأتي نتيجة لجفاف معاملة زوجاتهم لهم. او أكاد أعتقد أن أسباب الانحراف قد تعود لأسباب كبت أو قهر أو العيش في مجتمعات مغلقة أو تعرض الرجل نفسه ... لقهر جنسي لا أستطيع تحديد أنواعه ... علينا تخيله ... فلننطلق من هذه الاليات لتحديد السباب

---

Post: #85 Title: Re: رجال في وزن الريشة ... يا بكري وسع الخور !!! Author: عواطف ادريس اسماعيل Date: 02-20-2007, 08:26 AM Parent: #84 صح لسانك يا الحبيب نجن دائما ما نظلم الرجل ونصفه بأنه عينه زايقة دون أن نبحث عن أسباب الزوغان وكأنه مخلوق يمشي وراء غرازئه الحيوانية فعلا يا عثمان في أغلب الأحيان تكون الزوجة هي السبب الأساسي في هروب الزوج من البيت ولا تدرك ذلك قبل فوات الأوان .. سلمت يا الحبيب .

---

Post: #87 Title: Re: رجال في وزن الريشة ... يا بكري وسع الخور !!! Author: الطيب شيقوق Date: 02-20-2007, 10:33 AM Parent: #85 الاخت الاساذة عواطف تحياتي بالمناسبة اول مرة اقرا هذا البوست وكل النمازج التي اشرت اليها نمازج حقيقية . ولكن دعيني حبيبتي ( ما تصنفيني اوعاك) اقولها ليك بكل وضوح . هذا المفهوم عن الرجال في الغربة بالتحديد جعل من النساء على اى المستويات يفترضن في الرجل انه من هذه النمازج . صحيح قد تكون هذه الظواهر نادرة جدا في السلطنة ولكن المهم ان توطين هذه المفاهيم في نفوس امهاتنا واخواتنا السودانيات جعلتنا نحجم عن التعاون معهن ونحن مكسورو الخاطر متى ما وجدناهن في ضيقة سواء اكانت مواصلات او اى موقف اخر يحتاج لمروءة السوداني . هنالك نساء يحصل ان يصاب ازواجهن بعلة تلزمه فراش المستشفي وتجدها وحدها تنهض قياما وقعودا في مرحلة المرافقة والتمريض فكيف لى كسوداني اقف متفرج امام هذه المواقف . هذه التهمة المفترضة تجلنا مكسوري الخاطر ولا نملك غير تجرع مرارة الالم ونحن نقف على مثل هذه المشاهد . الرجل يا عواطف برضه قلبه قلب الريشه فهو في الغربة يخشى كشف الحال في موطن اقامته وعند تسرب الخبر الى اهله ولهذا ان لم يجد سرعة تجاوب الطرف الاخر فلا اظن سيجرا على التمادي في سخفه . نامل الا تحسب المواقف هكذا على اطلاقها ولا بد من تناول اى حالة وفقا لمعطياتها والملابسات التي حولها . لك معزتي

---

Post: #91 Title: Re: رجال في وزن الريشة ... يا بكري وسع الخور !!! Author: عواطف ادريس اسماعيل Date: 02-20-2007, 12:12 PM Parent: #87 أخي العزيز الطيب تحياتي وآسفة لتأخير الرد ساعات بنحلل المرتب عموما صدقت فيما ذهبت إليه ولكن المرأة في الغربة تتعامل مع الرجب بكثير من العشم لذلك عندما يخطأ في حقها يكون الأمر في نظرها كبيرا جدا وأنا يا إبن العم لا أتحدث عن المرأة في الغربة فقط هناك بعض النماذج موجودة حتى في السودان عشان كدة نحن بنحاول نطرح القضايا الإجتماعية على بلاطة ونجد ليها الحلول فقد يكون الشخص ما عارف إنه مخطيء سلمت يا الحبيب تحياتي للسمحة ...

---

Post: #88 Title: Re: رجال في وزن الريشة ... يا بكري وسع الخور !!! Author: الطيب شيقوق Date: 02-20-2007, 10:33 AM Parent: #85 الاخت الاساذة عواطف تحياتي بالمنا%

---

Post: #89 Title: Re: رجال في وزن الريشة ... يا بكري وسع الخور !!! Author: othman mohmmadien Date: 02-20-2007, 10:39 AM Parent: #85 أختي عواطف،،، تسلمين من كل سوء يا أختي لو كل رجل قالها لأي أمرأة "أختي"... لتوقف قبل ان تبدا العين بالزوغان ... وعندما نصاب بأذى نصيح أخ .... والمعني بلا شك أختي وليس اخ ... أخي ... فماأرحمهن أعيب على الرجل دائماً مبادرته فلا توجد أنثى تبادر لمثل هذه الأعمال وأحياناً أعيب عليها البراءة الزائدة والضعف والعاطفة "خاصة بعض السودانيات منهن" التي توقعها أحايين كثيرة في براثن الجهلة الملعونيين ، ولمبادرة الرجل في الغالب يوسم بان عينه زايغة وليس كل الرجال Quote: فالرجل عموما يوسم بأن عينه زايغة ويفضل اي امرأة على زوجته ويغازل اي امرأة الا زوجته مثله مثل ابو نواس عندما اشتكت زوجته من انه لا يغازلها، فتنكرت بنقاب واخذت تنظر اليه في السوق، وتغازله، فأخذ يغازلها ويتبعها، فخلعت نقابها ووبخته فقالت عبارتها الشهيرة «قبح من وجه وقبح حامله». فرد عليها بعبارته الشهيرة! ما أجملك بالـ..................!!

---

Post: #90 Title: Re: رجال في وزن الريشة ... يا بكري وسع الخور !!! Author: الطيب شيقوق Date: 02-20-2007, 11:45 AM Parent: #89 Quote: الاخت الاساذة عواطف تحياتي بالمنا % ده شنو يا باش