ود شيقوق وبت الحسن في قلب العاصفة

ود شيقوق وبت الحسن في قلب العاصفة


06-05-2007, 12:35 PM


  » http://sudaneseonline.com/cgi-bin/sdb/2bb.cgi?seq=msg&board=202&msg=1188886931&rn=0

Post: #1
Title: ود شيقوق وبت الحسن في قلب العاصفة
Author: محمد عمر الفكي
Date: 06-05-2007, 12:35 PM

الاخت سمية الحسن طلحة والاخ الطيب شيقوق والكثير من الاخوان السودانيين يقيمون بمسقط التي من المفترض وحسب التوقعات الجوية ان تتعرض مساء هذا اليوم واجزاء من سواحل السلطنة لاعصار جونو المداري.
والمتابع لتلفزيون السلطنة يدرك مدي الخطر الذي تشعر به السلطات هناك تجاه هذا الاعصار مع تمنياتنا ودعواتنا الصادقة ان يجنب عمان واهلها الكوارث والمحن.
اخونا الطيب واختنا سمية خلوا بالكم وابقوا عشرة وخصوصا علي الاولاد، واخونا الطيب بنكرر له المناشدة ما يمشي يعمل فيها جعلي ويقول كدي النمرق لبرة يمكن القي لي زول داير مساعدة ولا كده. تولا دي واحدة يا شيخ الطيب اوعي من اللعب فيهاوما تشيلك الهاشمية لمن تلحق امات طه وتحيرنا فيك وتقطع راس ود المحرب.
تمنياتنا لكم بالسلامة من كل شر.
Post: #2
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 12:45 PM
Parent: #1

هيييييييييييييييع ود الفكي ابشر بالخير حرم اخوك قلب بيتو غرفة عمليات للفزع والعربية جاهزة وما عندى مرة بشاورها بقلع سااااااااااااى بتلهم الشينة .

اخبار بت طلحة في امان الله الليلة بت طلحة مرقت سبحة اللالوب كلنا محميون ببركتها .

لكن الشئ شين طاااااااااااب

صورة من مظاهر الاعصار في اللنك ادناه

Re: يا ناس مسقط طمنونا
Post: #3
Title: Re: ود شيقوق وبت الحسن في قلب العاصفة
Author: هاشم أحمد خلف الله
Date: 06-05-2007, 12:48 PM
Parent: #1

يا محمد أخوي ربنا يكضب الشينة وإنشاء الله يسلم حبيبنا الطيب شيقوق وتسلم

اٌختي سمية وبقية المسلمين في مسقط , اللهم الطف بهم وانجيهم من العاصفة .
Post: #4
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-05-2007, 12:54 PM
Parent: #3

هاشم
ربنا يحفظك يا هاشم ويحفظ السلطنة وشعبها، انا بمشي بعد شوية اصلي العصر في الحرم وادعي ليهم.
ود شيقوق والله بتكلم معك جد والله الموضوع خطير وما تجازف وعشان انا عارف طبعتك كتبت البوست دا مخصوص.

تحياتي
Post: #6
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 01:03 PM
Parent: #4

الاخ هاشم

كتر خيرك وياها المحرية فيك الامور لسع مستقرة

الحبيب ود الفكي

الموت كمو يا زول حرم ما بتسوى سمعة تضحك فيني ود المحرب - هسع يتلقى يضحك ساااااااى بضحكته الطويلة ديك وقت يكون مفرهد !!! ولقى ليهو بيعه سمحة
Post: #7
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 01:07 PM
Parent: #4

محمد كيف حالك

ما تنساني من الدعوات الصالحات في الحرم
وربنا يسمع منك
من البارح انا احاحي من جنيات البطاحين ديل ( الشيخ وعبدالعزيز ) قلت ليهم ادخلوا لي جوة من الكتاحة و الدهاريب ديل ما تلحقوا امات علي
ولدي الصغير قاللي:
امات علي ديل قاعدات وين؟ خلينا نمشي نلحقن نجيبهن قبال ما تطقهم الكتاحة ...
Post: #5
Title: Re: ود شيقوق وبت الحسن في قلب العاصفة
Author: ود محجوب
Date: 06-05-2007, 12:59 PM
Parent: #3

الأخ محمد عمر الفكى


زى ما قال ليك الطيب

الجماعة ديل معاهم بت الشيخ تنده ابواتا شيخ الحسن وعبد الباقى جبل الحديد العصار ده يطلع شمار فى مرقة



وقاهم الله وحفظهم
Post: #8
Title: Re: ود شيقوق وبت الحسن في قلب العاصفة
Author: فضيلي جماع
Date: 06-05-2007, 01:10 PM
Parent: #5


الأخ محمد عمر الفكي

صلاتك في الحرم كربها شديد..أحبابنا في السلطنة كتار بالحيل..وبورداب مسقط بقيادة ود شيقوق والملكة سمية الحسن طلحة والشاعرة سومة بت الجنيد وغيرهم كتيرين ومن أنبل خلق الله. السودانيين في عمان سمعة طيبة وكفاءة والوطن في احداق عيونهم..أسألني منهم سمح يا ود الفكي.

ويا شيخ العرب ود شيقوق أبقى عشرة على كل اخوانا واخواتنا في مسقط..عارفك تمام..التجي من السما بالحيل الأرض بتشيلها. وطمنونا عليكم!
Post: #9
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-05-2007, 01:12 PM
Parent: #5

ود محجوب
بت الحسن عقاب شيوخ وصالحين وربنا يحفظ عمان بحفظه ويشملها برعايته
غايتو يا الطيب موقفك دا بقي عود عشر يا تولا رايحة يا ود المحرب يضحك فيك
Post: #10
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-05-2007, 01:34 PM
Parent: #9

بت الملوك
ابشري وربنا يحفظكم، والانباء المتواترة لديكم عن تحويل الاعصار لمساره اخبار لا يعتمد عليها، خلوا بالكم
Post: #11
Title: Re: ود شيقوق وبت الحسن في قلب العاصفة
Author: maia
Date: 06-05-2007, 01:42 PM
Parent: #1

ربنا يسلمكم جميعا

لي اشقائي وجزء من اسرتي المقيمة هناك
عدا انه اقامتي في مسقط لمدة 15 سنة بتخلي حتى لو ما عندي اسرة هناك اني ادعو بسلامة كل اهل عمان الحبيبة وتلك البلد الطيبة ويسلم اهلها من كل شر
Post: #12
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 03:16 PM
Parent: #11

ود محجوب كيفك يا زول

Quote: الجماعة ديل معاهم بت الشيخ تنده ابواتا شيخ الحسن وعبد الباقى جبل الحديد العصار ده يطلع شمار فى مرقة


حرم يا ود محجوب السحاب المتروكب داك طلع تخا سااااااااى - كمان جابت ليها اجازة 4 يوم هييييييييييع
Post: #13
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 03:24 PM
Parent: #12

الاستاذ فضيلي جماع

حباب شيخ العرب شوقتنا ليك بالحيل
Quote: ويا شيخ العرب ود شيقوق أبقى عشرة على كل اخوانا واخواتنا في مسقط..عارفك تمام..التجي من السما بالحيل الأرض بتشيلها. وطمنونا عليكم!


حرم اولاد البندر اتضايروا بقوا كويمات كويمات ركزت فينا يا شيخ العرب
Post: #14
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 03:29 PM
Parent: #13

ميا كيفك ربنا يخليك ويحفظك واهلك كلهم بخير


ود الفكي

Quote: بت الحسن عقاب شيوخ وصالحين وربنا يحفظ عمان بحفظه ويشملها برعايته
غايتو يا الطيب موقفك دا بقي عود عشر يا تولا رايحة يا ود المحرب يضحك فيك


حرم مو عود عشر نحن البركة خاتمانا وعاقبانا بت طلحة وشيخ الزبير
Post: #15
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 03:37 PM
Parent: #1

كل دول الخليج العربي ما عدا الكويت ستتاثر بالعاصفة ولذا لزم التنويه ....اها يالعرريب ودشيقوق اها جاء زمن الاستفادة من الموهبة الحتاتية اهو جاك الحت المجاني اما الرطان من زمن برووق ورعد خشم القربة حالتو حالة وقمنا رحلنا الي صحراء تابط شرا وبرضو ما في حلل اها استسلمنا عواصف عواصف انا بس خايف تجي وقت الشغل وانا في البورتاكبن اها ياني الطاير وكان شفتو ليكم مكتبا طاير ياهو انا جواهو ... اما الملكة فراسية ..
Post: #16
Title: Re: ود شيقوق وبت الحسن في قلب العاصفة
Author: فضيلي جماع
Date: 06-05-2007, 03:43 PM
Parent: #15


تسلم يا هندسة ..وياخي قلل من الخروج اليومين ديل ..دا حتى سياد البلد اتضايروا وضايروا وليداتهم عليهم.
Post: #17
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 03:49 PM
Parent: #15

Quote: كل دول الخليج العربي ما عدا الكويت ستتاثر بالعاصفة ولذا لزم التنويه ....اها يالعرريب ودشيقوق اها جاء زمن الاستفادة من الموهبة الحتاتية اهو جاك الحت المجاني اما الرطان من زمن برووق ورعد خشم القربة حالتو حالة وقمنا رحلنا الي صحراء تابط شرا وبرضو ما في حلل اها استسلمنا عواصف عواصف انا بس خايف تجي وقت الشغل وانا في البورتاكبن اها ياني الطاير وكان شفتو ليكم مكتبا طاير ياهو انا جواهو ... اما الملكة فراسية ..


اها الليلة الرطانة بتضاروا بالحيط والحيط ذاتها صارت آيلة للسقوط تمشوا وين _ انا الليلة لابس سروالى الطويل والعراقي ومشنق الطاقية وقادل ساى في المدنية للفزع واحد الليلة بقول لي لابس كده ليش مافي .

بت طلحة الليلة طلعت السبحة حقت اللالوب عشان تتكي السحابة في دبى وفعلا السحاب اتلهمكم شدوا حيلكم ده الليلة بساويكم مع الواطه .
Post: #18
Title: Re: ود شيقوق وبت الحسن في قلب العاصفة
Author: فضيلي جماع
Date: 06-05-2007, 04:04 PM
Parent: #17


يا ود شيقوق والباشمهندس ابوبكر..مناقرة حتى في الكارثة؟! يا ود شيقوق حقوا لسان حالك يكون:
أنا والرطان ود عمي على الإعصار !!
وبعد تنتهي الأزمة أرجعوا اتخانقوا علشان تضحكونا!
Post: #19
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 04:34 PM
Parent: #1

يالعرريب ودشيقوق انا دحين جالس مقابل باب وشادي نبلة في اتجاه الجنوب الشرقي وموصلا بالكمبيوتر وخاتي شبكة في البلكونة بشان الاعصار لما يشيلك ويجيبك طاير وانت لابس العراقي اها بالماوس احرك النبلة يمين شمال واديلك في طاقيتك المشتقة تجي واقع في الشبكة ... اها خلي عم فضيلي يكتب فيك قصيدة عصماء باسم "العرريب الطائر وقع في الشبكة "
Post: #20
Title: Re: ود شيقوق وبت الحسن في قلب العاصفة
Author: WadAker
Date: 06-05-2007, 04:39 PM
Parent: #1

هيععععععع ود شيقوق كيفك من ديك وعييييييييييك ..
ود الفكى وناس الحرم بالله ماتفطونا فى صادق الدعوات
______
للتصويب
Post: #25
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 05:48 PM
Parent: #20

شكرا أخي هاشم شكرا استاذ فضيلي شكرا ود محجوب شكرا ميا شكرا ابوبكر شكرا لكل من سأل ومن يسأل عنا , قمت بجوله على كورنيش مطرح ذات السوق الاثري التراثي العظيم بمسقط , ما اجمل تكاتف هذا الشعب العماني العظيم ! الشرطة و الشباب والشيب و الاطفال كلهم على قلب واحد ويد واحدة شعب مثقف واعي و متفهم , مما حدى برئيس جهاز الشرطة ان يفخر بهم ويقول : انهم يمثلون 80% من درجة الاستعداد القصوى وحالة الطوارىء المعلنة في السلطنة ، رغم التغيير السريع المتواتر لحالة الجو
والأمواج العاتية والريح المتسارعة تسوق سحب داكنة ، إلا أننا نشعر بالأمان فى ظل هذا الوعى والتفهم
Post: #21
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 05:21 PM
Parent: #1

Quote: تسلم يا هندسة ..وياخي قلل من الخروج اليومين ديل ..دا حتى سياد البلد اتضايروا وضايروا وليداتهم عليهم.


ياعم فضيلي ..
اها يا سد عالي يا سد كجبار يا سد مروي يا مطرة خشم القربة الاصلها قاصدانا عدييل وهسع اعصار جونو (جنو) ..اها نضاير وين ؟
Post: #22
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 05:36 PM
Parent: #21

الفضيلي - شيخ العرب يطول عمرك ات متابع

Quote: يا ود شيقوق والباشمهندس ابوبكر..مناقرة حتى في الكارثة؟! يا ود شيقوق حقوا لسان حالك يكون:
أنا والرطان ود عمي على الإعصار !!


شيخ العرب لا لا ايمين انا والاعصار على الرطاني - الليلة حالف اجرو اغطس ليك بيهو جوة تنيرة انا اصلي مارق للربا والتلاف .

هسع انا حائم جوة مدينة مسقط جاري عكازى المضبب وشايل الكوريق وموبايلي وبطاريتي في يدى للداير الفزع .
Post: #23
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 05:36 PM
Parent: #21

الفضيلي - شيخ العرب يطول عمرك ات متابع

Quote: يا ود شيقوق والباشمهندس ابوبكر..مناقرة حتى في الكارثة؟! يا ود شيقوق حقوا لسان حالك يكون:
أنا والرطان ود عمي على الإعصار !!


شيخ العرب لا لا ايمين انا والاعصار على الرطاني - الليلة حالف اجرو اغطس ليك بيهو جوة تنيرة انا اصلي مارق للربا والتلاف .

هسع انا حائم جوة مدينة مسقط جاري عكازى المضبب وشايل الكوريق وموبايلي وبطاريتي في يدى للداير الفزع .
Post: #24
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 05:44 PM
Parent: #23

Quote: يالعرريب ودشيقوق انا دحين جالس مقابل باب وشادي نبلة في اتجاه الجنوب الشرقي وموصلا بالكمبيوتر وخاتي شبكة في البلكونة بشان الاعصار لما يشيلك ويجيبك طاير وانت لابس العراقي اها بالماوس احرك النبلة يمين شمال واديلك في طاقيتك المشتقة تجي واقع في الشبكة ... اها خلي عم فضيلي يكتب فيك قصيدة عصماء باسم "العرريب الطائر وقع في الشبكة "


حلاتك ات قايل الليلة في كهرباء - اجهزتك الليلة تبقى زى التيمس حقنا البارك ورابطين فيهو الغنم - حاسوبك سويهو ليك شنطة ورسل لى الوير بتاع الماوس محتاج ليهو قلادة .
Post: #26
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 05:49 PM
Parent: #24

ود عكر

ابتسامتك سكر

Quote: هيععععععع ود شيقوق كيفك من ديك وعييييييييييك ..
ود الفكى وناس الحرم بالله ماتفطونا فى صادق الدعوات
______


يا اخوى اخر اخبارنا الاعصار ببدأ بعد ساعتين في مسقط .
Post: #27
Title: Re: ود شيقوق وبت الحسن في قلب العاصفة
Author: Alshafea Ibrahim
Date: 06-05-2007, 05:54 PM
Parent: #1

ودشيقوق
وناس السلطنة مواطنين ومقيمين بدون فرز ، نساءل الله لكم السلامة، وربنا يستر عليكم ويحفظكم ، قلبونا معكم
تصبحوا وتمسوا بألف خير
الشفيع
Post: #28
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 06:01 PM
Parent: #27

الشفيع اخوى كيف حالك منك طولة

كتر خيرك بالحيل نحن تمام وزى ما قالت بت طلحة السلطات العمانية متابعة بوعي وتفهم شديدين وكل الاحتياطات اتعملت حتى طائرات الاجلاء جاهزة لو اقتضى الامر ذلك -


معزتى

Re: يا ناس مسقط طمنونا
Post: #29
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 06:15 PM
Parent: #1

Quote: اجهزتك الليلة تبقى زى التيمس حقنا البارك ورابطين فيهو الغنم -


العرريب ودشيقوق انا ما زييك افندي شغلي كلو في الصحاري والليالي السودا كحلي والاجهزة بتشتغل ببطاريات والاتصال اقمار صناعية وبشوف في الضلمة (شفت كيف ؟ عين القط ليلا اها زي دة )..
هسع الاعصار في درجة اللون البرتقالي يعني ما تشغل بالك وللاحتياط اربط روحك مع العمود في الفرندة واللا بيتك كلو تسطيح ؟؟ عموما اها لو الاعصار جاء يمكن تسافر مجاني الي تايلاند شايف الاتجاه اتحوا جنوب شرقي ..بختك رحلة الي بتايا محمولا علي بساط الريح
Post: #30
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 06:24 PM
Parent: #29

هذا الفيديو يوضح الحالة الراهنة لمدينة مسقط

http://v11p.com/up//download.php?filename=c736be8a78.zip
Post: #32
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 06:31 PM
Parent: #29

Quote: هسع الاعصار في درجة اللون البرتقالي يعني ما تشغل بالك وللاحتياط اربط روحك مع العمود في الفرندة واللا بيتك كلو تسطيح ؟؟ عموما اها لو الاعصار جاء يمكن تسافر مجاني الي تايلاند شايف الاتجاه اتحوا جنوب شرقي ..بختك رحلة الي بتايا محمولا علي بساط الريح


يا باش الاخبار خطيرة جدا جدا - يقال ان سرعة اعصار كاترينا كانت 140 ك في الساعة والجايينا ده 250 ك - نودعكم بس الشى لا كوريق ولا طورية بتمسكو .

عليك الرسول ابقوا عشرة على المبادئي واوصيك بالاتية اسماؤهم

بت طلحة
منى خوجلي
وصال العالم
سلمى صباحى
ماجدة خوجلي
عواطف اسماعيل
شادية الطيب
سناء جعفر
وعادل سمير

البقية هييييييييييييييييع
Post: #31
Title: Re: ود شيقوق وبت الحسن في قلب العاصفة
Author: أحمد طراوه
Date: 06-05-2007, 06:29 PM
Parent: #1

... شى لله يا اهل الدايرة .. يا الفي الكون اسراركم سايرة .. ارخو السِر في ( العاصفة الغايرة ) .. خلو الدار التصبح نايرة .. معاك يا بت طلحة بسبحة ود حاج الماحى ! اللهم احفظ ناس مسقط ، فهم بعض من القليل الذى تبقى لنا !
Post: #33
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 07:18 PM
Parent: #1

Quote: البقية هييييييييييييييييع


انا مع دييل ...
ما تخاف يا عرريب الاعصار برضو عندو نظر ؟؟
Post: #34
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 07:31 PM
Parent: #33

Quote: ما تخاف يا عرريب الاعصار برضو عندو نظر ؟؟


دى كارثة ما عندها نظرة بس اعمل بوصيتي كتيييييييير
Post: #36
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 07:53 PM
Parent: #34

ود عكر كيف الحال
يبدو إنك فى السلطنة
لكن وين ؟ فى مسقط ؟
لك التحية

الشفيع إبراهيم شكرا لسؤالك عنا
تسلم من كل سوء إنشاء الله

د. أحمد طراوة
ماتخاف على ناس مسقط حسناتم بتوقيهم
وقلوبم الصافية ونفوسم السمحمة
وكمان الصلاح جميع وأهل الله
ناس ودالقرشى والشيخ قريب الله
ودعوات الناس الطيبين زيكم
Post: #35
Title: Re: ود شيقوق وبت الحسن في قلب العاصفة
Author: ود محجوب
Date: 06-05-2007, 07:50 PM
Parent: #33

Quote:
يا باش الاخبار خطيرة جدا جدا - يقال ان سرعة اعصار كاترينا كانت 140 ك في الساعة والجايينا ده 250 ك - نودعكم بس الشى لا كوريق ولا طورية بتمسكو .

عليك الرسول ابقوا عشرة على المبادئي واوصيك بالاتية اسماؤهم




شيخ العرب أثبت وحات سيدى الحبة ما بتجيكم
Post: #37
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 07:59 PM
Parent: #35

Quote: شيخ العرب أثبت وحات سيدى الحبة ما بتجيكم



د. عمر بتشوف زولك البندوروا يتقلناويطمننا كتب وصيتو خلاس

عارف يا أبوبكر أكان الله مالى النهر الجاف فيضان إعصار جونو دا بملاهو تب
Post: #39
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 08:03 PM
Parent: #37

صورة من المنطقة الشرقية بسلطنة عمان

http://trtoob.net/i39arpic.jpg
Post: #40
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 08:06 PM
Parent: #35

ود محجوب

Quote: شيخ العرب أثبت وحات سيدى الحبة ما بتجيكم


انت عارف يا ود محجوب اخوى انا اتصلت باولادى في السودان وحياتك ولا يهمهم طبعا قايلين زى عصارنا البنعمل ليهو اصابعنا وبنقول ( محمد معانا ما تغشانا)

وقت لقيتهم ما ناقشين قلت ليهم ده هبيب ساى ما تخافوا من اعلام الناس ديل
Post: #38
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 08:03 PM
Parent: #1

Quote: شيخ العرب أثبت وحات سيدى الحبة ما بتجيكم


العرريب ودشيقوق

اهو بختك ياعم ودمحجوب اداك ترقية وبقيت شيخ ؟ اها تفلزع مع الهواء وانت شيخ
Post: #46
Title: Re: ود شيقوق وبت الحسن في قلب العاصفة
Author: فضيلي جماع
Date: 06-05-2007, 09:48 PM
Parent: #38

الطيب شيقوق يقول في أول البوست:

Quote: هسع انا حائم جوة مدينة مسقط جاري عكازى المضبب وشايل الكوريق وموبايلي وبطاريتي في يدى للداير الفزع
.

شيخ العرب بعد ما الواطا ضلمت كتب لصديقه اللدودالباشمهندس ابوبكر يقول:

Quote: يا باش الاخبار خطيرة جدا جدا - يقال ان قسرعة اعصار كاترينا كانت 140 ك في الساعة والجايينا ده 250 ك - نودعكم بس الشى لا كوريق ولا طورية بتمسكو .
عليك الرسول ابقوا عشرة على المبادئي واوصيك بالاتية اسماؤهم:


وزي ما قال ود محجوب يا شيخ العرب أركز..وخلي عكازك المضبب وبطاريتك والكوريك قريب منك! صاحبك الرطان ما يشمت عليك. أنا لسة موصيك على الرفقة في مسقط ألقاك تكتب وصيتك للرطان ؟ دا كلام شنو يا شيخ العرب ؟ شوف بت طلحة بتقول ليك :
Quote: شيخ العرب أثبت وحات سيدى الحبة ما بتجيكم


ويا ود شيقوق لو إنت ما ركزت باقي ليك منو البركز تاني...هيييييييييع .. قول ليهم أنا اخوك يا السمحة !!!
Post: #47
Title: Re: ود شيقوق وبت الحسن في قلب العاصفة
Author: خالد المحرب
Date: 06-05-2007, 10:04 PM
Parent: #38

ها ناس على الطلاق لى زمن انا منقطع عن العالم لاتلفزيون ولا نت
اليومين ديل احمد ولدى مسافر وايجار البيت وحاجات تانيه حاميانى
الطيب ربنا يستر لكن الوصيه بى المهله حول لى القروش انا برس فيك ومحتاج والله
ماتموت محل القروش مانعرفن. وكان مامت اعتبرن دين على. دحين من الصباح حول القروش
وانا عارفك اخو اخوان .
Post: #56
Title: Re: ود شيقوق وبت الحسن في قلب العاصفة
Author: munswor almophtah
Date: 06-06-2007, 03:35 AM
Parent: #38

اللهم يا حافظ السيف فى الجفير وحافظ المى فى البير تحفظ آل عمان حفظك للذكر آمين آمين آمين

أبقو عشره وقلوبنا معاكم والألسنه تلهج أدعية للغوث والحمايه

لكم السلام أجمعين أيها الأعزاء

ود المرتضى وسوما وشيقوق وبنت فاطنه وسميه وآلهم وذويهم وكل الناس قاطبة باعاجمهم ربنا يحفظهم ويحفظكم


منصور
Post: #57
Title: Re: ود شيقوق وبت الحسن في قلب العاصفة
Author: Ahmed Yousif Abu Harira
Date: 06-06-2007, 06:19 AM
Parent: #38

الأعزاء/سمية والطيب شيقوق ، سلامتكم وربنا يغطي عليكم وعلى اهلنا أجمعين في مسقط

يا ناس عصار شنو وكتاحة شنو وضليماء(ت) شنو؟

نحن ما جايبين خبر..

طيب العصار ده فات ولا لسه جاي في الطريق..؟

على العموم ما تخاف يا ود شيقوق...اثبت زي ما قالك ود محجوب ما تجيب لك حدسه!!

وبعدين هسع الهبايب الكان بجنلكم زمان ديلك (شئ اصفر وشي احمر وشي بني) وبعضهن له رؤوس ومخالب ، تلقاهن معبيات لا فوق متل يوم القيامة ، الكان خابر سرعتهن منو؟ وانت ما كُت بتقطعهن في قعر شدره؟

ثم ان مسقط مدينة حصينة (حدوة حصان بين الجبل والبحر) قدر ما يضرب فيها الاعصار مو ماشي يمرقك بعيد من مدينة روي ، الخوير أو كان ابعدك لا عند السيب. المسافة كلها قريبة ... اتنفض واستغفر وانقر عكازك تعال راجع..


تسلموا من كل شر
Post: #59
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-06-2007, 08:24 AM
Parent: #38

ناس السلطنة
صباحكم خير وانشاء الله اصبحتوا طيبين

نرجو ان تزودونا باخبر اخباركم وان تنقلوا لنا الوضع الان عندكم، ماذا حدث فجرا عند راس الحد وما هو متوقع في مسقط وكيف الاحوال هي في مسقط وخل سينقطع التيار والتلفونات كما حدث في المناطق الشرقية؟

نسال الله لكم السلامة

ود شيقوق
والله انا لما تصب مطرة لازم اقلع العراقي وابقي بالسروال واخد لي وقفة فيها دقيقة نص دقيقة وارجع اقيف في باب الاوضة لمن المطرة تكمل والعجب وقت تلملم السحب وبداية الهواء الاحمر داك البجي من قدام وفي نص 8شهر لما بدل الهواء الاحمر داك يجيك الدعاش البنسميه هواء المطر والله يا عم الطيب الوكت داك انا بكون في عالم تاني (ملحوظة : لابتاع شربة ولا سجارة عشان ما تمش لبعيد)
بس اول المطرة ما تنهي وتجيك حرة الليل ديك بكره لك يوم المطر.
قلوبنا معكم ودعواتنا لكم واقولها ليك صراحة ما دام معاكم احفاد جبل الحديد خلوا قلبكم من حديد.
Post: #73
Title: Re: ود شيقوق وبت الحسن في قلب العاصفة
Author: وصال عالم
Date: 06-06-2007, 03:43 PM
Parent: #38

بسم الله الرحمن الرحيم

شيقوق

تسلم من كل شر يارب !!

ويغطيك من كل بلاء وإبتلاء ... والله قلت بكون قلمي جرا ليك كوارث ياود أهلي .. وبالجد توجست وتهجست !!



لكم ودي وإمتناني

وصال عالم
Post: #41
Title: Re: ود شيقوق وبت الحسن في قلب العاصفة
Author: abubakr
Date: 06-05-2007, 08:08 PM
Parent: #1

Quote: عارف يا أبوبكر أكان الله مالى النهر الجاف فيضان إعصار جونو دا بملاهو تب


اهم ما في الموضوع انو العرريب حيسافر الي النهر الجاف علي بساط الريح بعدما كان زمان بيمشي كداري ؟ بختك ياعم حتبقي "منقول علي الهوا مباشرة "
Post: #42
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 08:20 PM
Parent: #41

Quote: بختك ياعم حتبقي "منقول علي الهوا مباشرة "

حلوة دى...
إحدى صديقاتى رسلت لى رسالة وكانت خايفة ومنزعجة
قلت ليها أطلعى بره وخلى جونو يشيلك محل ما ماشى ..
Post: #43
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-05-2007, 08:25 PM
Parent: #42

Quote:
اهم ما في الموضوع انو العرريب حيسافر الي النهر الجاف علي بساط الريح بعدما كان زمان بيمشي كداري ؟ بختك ياعم حتبقي "منقول علي الهوا مباشرة "


والله النقل صار عندكم سااااااااااااهل هسع بكري ده ناقلنا للصفحة التانية ليش هو بوست جدييييييييد في داعي ينقلنا للصفحة التانية سريع كده ولا كمان مظاهر حصار ارضا وجوا واسفيريا .
Post: #44
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-05-2007, 09:02 PM
Parent: #43

دا عهد السرعة ياالطيب ياخوى
سرعة رياح أعاصير أى حاجة
هسع المياه دخلت اليابسة فى منطقة البستان
شفت السرعة دى ؟ ربنا يستر ..
Post: #45
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-05-2007, 09:14 PM
Parent: #44

والله يا ود شيقوق واقف من الصباح في البلكونة

وبعاين تحت ومتأكد إنه الاعصار حيشيلك يجيبك جنب

بيتنا وكل ما أشوف واحد بشبهك أجري تحت ألقاه هندي !!!!

ألف سلامة ليك إنت والملكة سمية .. وكونوا دوما بخير ,,,
Post: #48
Title: Re: ود شيقوق وبت الحسن في قلب العاصفة
Author: خالد المحرب
Date: 06-05-2007, 10:09 PM
Parent: #45

[]ها ناس على الطلاق لى زمن انا منقطع عن العالم لاتلفزيون ولا نت
اليومين ديل احمد ولدى مسافر وايجار البيت وحاجات تانيه حاميانى
الطيب ربنا يستر لكن الوصيه بى المهله حول لى القروش انا برس فيك ومحتاج والله
ماتموت محل القروش مانعرفن. وكان مامت اعتبرن دين على. دحين من الصباح حول القروش
وانا عارفك اخو اخوان . الطيب ماتنسى الوصيه والاقربون اولى من بنوك عمان
على الطلاق اعزك عزه رفاتك كان مرقت فى الهند اجيبه ودفنه فى الدندر.
Post: #49
Title: Re: ود شيقوق وبت الحسن في قلب العاصفة
Author: tmbis
Date: 06-05-2007, 10:19 PM
Parent: #48

طمنونا عليكم يا جماعة ..
ودشيقوق .. وبت الحسن
قولو حاجة
Post: #50
Title: Re: ود شيقوق وبت الحسن في قلب العاصفة
Author: ود محجوب
Date: 06-05-2007, 10:47 PM
Parent: #49

يا ابو بكر يا أخوانا ودشيقوق اختفى


يكون وصل عندكم؟





يا بت الحسن طمنونا
Post: #51
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-06-2007, 01:27 AM
Parent: #50

الفضيلي وابوبكر والفاروق وتمبيس وشيخنا ود محجوب وكل من يسأل عننا

الآن تهطل على مسقط امطار غزيرة ووصلتنا رسالة على الهاتف من الارصاد الجويه ان
الاعصار المداري ( جونو ) عبر منطقة رأس الحد مصحوبا بأمطار غزيرة وعواصف رعدية شديدة
وامواج عالية جدا
الحمد لله الوضع مطمئن هنا حتى الآن ولكم الشكر و دعواتكم
Post: #52
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-06-2007, 01:37 AM
Parent: #51

الف سلامة ليكم آالملكة ...

بالله الطيب ده ما تخلوه براهو ...

الولد ده يتيم ولا مرا ولا أولاد معاه
Post: #53
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-06-2007, 02:03 AM
Parent: #52

عليك الرسول ابقوا عشرة على المبادئي واوصيك بالاتية اسماؤهم

بت طلحة
منى خوجلي
وصال العالم
سلمى صباحى
ماجدة خوجلي
عواطف اسماعيل
شادية الطيب
سناء جعفر
وعادل سمير
البقية هييييييييييييييييع


!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!؟؟؟؟؟
Post: #54
Title: Re: ود شيقوق وبت الحسن في قلب العاصفة
Author: abubakr
Date: 06-06-2007, 02:51 AM
Parent: #1

Quote: الحمد لله الوضع مطمئن هنا حتى الآن ولكم الشكر و دعواتكم


الحمدلله...
Post: #55
Title: Re: ود شيقوق وبت الحسن في قلب العاصفة
Author: abubakr
Date: 06-06-2007, 02:58 AM
Parent: #1

Quote: يا ابو بكر يا أخوانا ودشيقوق اختفى
يكون وصل عندكم؟


الاعصار جونو جاهو بلا ... اكيد ودشيقوق هسع عامل للاعصار حفلة حت
Post: #58
Title: Re: ود شيقوق وبت الحسن في قلب العاصفة
Author: Ahmed Yousif Abu Harira
Date: 06-06-2007, 06:44 AM
Parent: #55

الأخوة الأعزاء/


إتصلت قبل قليل بالأخ الزبير الطيب والاخت سمية الحسن ويبدو ان مسقط فعلا تواجه مشكلة حقيقية وارسال التلفزيون والانترنت مقطوع..


هم بخير لكن المدينة غرقانة وممطورة ، ويتوقع وصول الاعصار حوالي الساعة 4 بتوقيت مسقط.


نسأل الله لهم ولاولادهم ولجميع السودانين واهل السلطنة عموما السلامة وربنا يحفظهم من كل شر
Post: #60
Title: Re: ود شيقوق وبت الحسن في قلب العاصفة
Author: maia
Date: 06-06-2007, 08:50 AM
Parent: #1

ربنا يلطف بالجميع

اتصلت بي اختي قبل ساعة تقريبا تحسبا قبل ان يداهمهم انقطاع الاتصال الهاتفي

الامطار غزيرة منذ الفجر مع رياح شديدة والخوف من الزيادة المتواصلة

ناس مسقط وكل من يتصل بهم افيدونا وطمنونا طمنك الله
Post: #61
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-06-2007, 09:16 AM
Parent: #60

اشاهد الان علي الانترنت تلفزيون السلطنة، امواج غزيرة وسيول وامطار غير عادية وانقطاع للتيار الكهربائي عن بعض مناطق مسقط، من المتوقع ان يصل الاعصار مداه في خلال ثلاث الي اربع ساعات.
Post: #62
Title: Re: ود شيقوق وبت الحسن في قلب العاصفة
Author: maia
Date: 06-06-2007, 09:26 AM
Parent: #1

الاخ محمد الفكي

اكتب لينا عن الاخبار اول باول

نسال الله اللطف
Post: #63
Title: Re: ود شيقوق وبت الحسن في قلب العاصفة
Author: عواطف ادريس اسماعيل
Date: 06-06-2007, 10:12 AM
Parent: #62

ياناس السلطنة وعلى راسكم شيخ العرب ود يشقوق ما تشوفو شر إنشاء الله قلوبنا معكم !!
Post: #64
Title: Re: ود شيقوق وبت الحسن في قلب العاصفة
Author: على احمد النعيم
Date: 06-06-2007, 10:40 AM
Parent: #63

الاخ ود شيقوق والاخت بت طلحة وعموم ناس مسقط ربنا يكتب سلامتكم جميعا ويغطى عليكم بغتاهو الجميل آمين آمين.
Post: #65
Title: Re: ود شيقوق وبت الحسن في قلب العاصفة
Author: خالد المحرب
Date: 06-06-2007, 11:05 AM
Parent: #64

اتصلت بالاخت سميه قبل ثوانى فذكرت لى يان كل المناظق الفريبه من الشاطى
فمرتها المياه تماما بما فيها القباده العامه للشرطه.اخونا الشيقوق يتمتع بصحه جيده جدا. دار الحديت بينى وبينه فى موضوع التحويل ولكن امله فى الحياه مازال كبيرا .
الوضع مطمن الحمد لله نسال الله ان يسبل عليهم ستره ويكفيهم شر الكوارس كل اهل سلطنة عمان بدون اثتثناء. يارب .
Post: #66
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-06-2007, 11:15 AM
Parent: #64

في خبر عاجل
انقطاع بث التلفزيون العماني علي الانترنت ولا اعرف عن بثه علي الاقمار الصناعية
Post: #67
Title: Re: ود شيقوق وبت الحسن في قلب العاصفة
Author: maia
Date: 06-06-2007, 11:27 AM
Parent: #1

الاخ خالد المحرب

المنطقة الذكرتها الاخت سمية حيث غمرتها المياه هي المنطقة التي تسكن في شقيقتي
( منطقة القرم)

نسال الله اللطف والسلامة
Post: #68
Title: Re: ود شيقوق وبت الحسن في قلب العاصفة
Author: abubakr
Date: 06-06-2007, 11:51 AM
Parent: #1

اتصلت بسمية الان وقبل ذلك بالطيب والجميع بخير والحافظ الله ( دبي الساعة 2:35 ظهرا)
Post: #69
Title: Re: ود شيقوق وبت الحسن في قلب العاصفة
Author: Ahmed Yousif Abu Harira
Date: 06-06-2007, 12:00 PM
Parent: #68

Quote: ضرب اعصار جونو الاستوائي القوي سلطنة عمان وتسبب بهطول امطار غزيرة فوق العاصمة مسقط.

ويتجه الاعصار الان نحو الشمال الغربي، لكن تراجعت سرعة الرياح المرافقة بالاعصار الى 175 كم في الساعة.

وكان الآلاف من سكان جزيرة المسيرة العمانية، وفي المناطق الساحلية، قد تم اخلاؤهم قبل ان يضربها الاعصار.

كما اغلقت السلطات العمانية مطار العاصمة لكن لم تتوقف حركة الملاحة البحرية عبر مضيق هرمز الذي يمر عبره ربع واردات العالم من النفط.

وصرح مسؤولو الارصاد الجوية ان هذا الاعصار هو الاقوى الذي يضرب المنطقة خلال السنوات الستين الماضية، وتوقعوا ان تتراجع حدة الاعصار قبل ان يضرب السواحل الجنوبية لايران.

وصرحت وزارة الدفاع الامريكية انها تتوقع ان يتراجع هذا الاعصار ويصبح اعصارا "ضعيفا جدا" خلال الساعات 48-72 القادمة.



Quote: اجراءات احترازية
وكانت السلطات العمانية قد طلبت من المواطنين البقاء في منازلهم، وتم اخلاء المدارس والابنية الحكومية لايواء المرحلين.

كما تم الطلب من سكان المناطق الساحلية في العاصمة مسقط المكوث في بيوتهم، وقطع التيار الكهربائي عن منازلهم.

وتقول مراسلة بي بي سي في الخليج جوليا ويليز ان الاعصار يترافق بأمواج بحرية يبلغ ارتفاعها 12 مترا وبرياح عاتية.

وصرح رجال الدفاع المدني في عمان ان ارتفاع الأمواج بلغ 12 مترا وهطلت أمطار غزيرة على مدينة مسقط وغيرها من البلدات القريبة واصبحت الشوارع خالية من المارة.

وقال عبد الله الحارثي الناطق باسم مؤسسة الإغاثة الحكومية أن الاعصار لم يؤد إلى وقوع ضحايا أو اضرار كبيرة، إلا أنه لم يستبعد حدوث أضرار في وقت لاحق.

وتم اغلاق محطة السور التي يتم منها تصدير 10 ملايين طن من الغاز السائل سنويا لمدة 48 ساعة. وكان قد تم اغلاق ميناء السلطان قابوس الذي يستقبل المركبات والحاويات.

وأغلقت السلطات أيضا محطة ميناء الفحل وهو الميناء الوحيد الذي يتم منه تصدير حوالي 650 ألف برميل من النفط الخام يوميا بعد أن ضرب الاعصار المنطقة.

وقال رشيد البرواني، المسؤول في وزارة النفط إنه تم اعادة فتح الميناء وإن هذا سيؤدي إلى بعض التأخير في العمليات لكن هذا التأخير لن يستغرق وقتا طويلا، غير أن القائمين على الناقلات قالوا إن الظروف غير مواتية حاليا لتحميل الناقلات بالنفط وإن الحركة قد توقفت في المحطة.

ونتيجة للإعصار ارتفع سعر النفط مقتربا من 71 دولارا للبرميل يوم الأربعاء وهو أعلى سعر له في أسبوعين.

وقالت وكالة الأنباء الفرنسية إن السلطات العمانية نشرت قوات من الجيش والشرطة والدفاع المدني تحسبا لما يمكن أن ينجم من أضرار عن إعصار جونو.

ونقلت الوكالة عن مفتش عام الشرطة والجمارك في سلطنة عمان مالك المعماري، قوله إن سكان جزيرة مصيرة في بحر العرب وسكان مناطق الساحل الشرقي قد لجأوا إلى مناطق أكثر أمنا بناء على تحذيرات الأرصاد الجوية.

وأعلنت السعودية التي تقع إلى الغرب من سلطنة عمان أنها لن تتضرر من الاعصار.

ويتوقع أن يبلغ الإعصار أوجه في عمان يوم الخميس قبل أن يصل بعد ذلك إلى إيران.


المصدر: http://news.bbc.co.uk/hi/arabic/middle_east_news/newsid_6721000/6721591.stm

نسأل الله السلامة للجميع
Post: #70
Title: Re: ود شيقوق وبت الحسن في قلب العاصفة
Author: فضيلي جماع
Date: 06-06-2007, 12:12 PM
Parent: #69

كنت قبل قليل على الهاتف مع بت طلحة والأخ الزبير الطيب وشيخ العرب ود شيقوق..كلهم بخير. ويا مايا منطقة السي سي (مركز العاصمة التجاري) في القرم هي الأكثر تأثرا بالفعل لكن ما في أي أضرار بشرية..كنت على الهاتف قبل شوية مع أحد أقربائي في نفس المنطقة..الكل بخير. اطمني.

يا ود المحرب عشمك في وراثة ود شيقوق زي عشم ابليس في الجنة. الراجل بقول لي يا استاذ قول للجماعة أنا تمام التمام وعكازي المضبب قبل راسي !
Post: #71
Title: Re: ود شيقوق وبت الحسن في قلب العاصفة
Author: maia
Date: 06-06-2007, 01:38 PM
Parent: #70

استاذنا العزيز فضيلي جماع

فعلا اكثر المناطق المتاثرة في القرم هي منطقة مركز القرم او سوق القرم وكذلك حديقة الرقم الطبيعية
وذكرت لي اختي انه رغم وجود بيتهم في منطقة مرتفعة في القرم الا انه الموية غمرت الشارع المرتفع باكمله!!
يعني ده اعصار شديد جدا
وربنا يستر ويسلم الجميع ويعدي بدون مزيد من الاضرار

كنت متابعة تلفزيون عمان على النت لكن ما عارفة فجاة اتقطع الارسال
اتمنى ما يكون في ضرر حصل

تسلم استاذنا وتسلم عمان و يسلم كل اهلنا فيها وربنا يطمن الجميع
Post: #72
Title: Re: ود شيقوق وبت الحسن في قلب العاصفة
Author: انعام حيمورة
Date: 06-06-2007, 03:32 PM
Parent: #1

طمنونا عليك والله متابعين الاخبار والاتصالات مقطعة والله تحياتنا وسائلين عنكم
Post: #74
Title: Re: ود شيقوق وبت الحسن في قلب العاصفة
Author: خالد علي محجوب المنسي
Date: 06-06-2007, 03:53 PM
Parent: #72

Quote: اللهم يا حافظ السيف فى الجفير وحافظ المى فى البير تحفظ آل عمان حفظك للذكر آمين آمين آمين

أبقو عشره وقلوبنا معاكم والألسنه تلهج أدعية للغوث والحمايه

لكم السلام أجمعين أيها الأعزاء

ود المرتضى وسوما وشيقوق وبنت فاطنه وسميه وآلهم وذويهم وكل الناس قاطبة باعاجمهم ربنا يحفظهم ويحفظكم


ديل ناس حارة والواعي مابوصو
يغطيهما الله برحمته
ويحفظ كل قاطني السلطنة من كل شر وبلاء

ولك الشكر والتحية الفاضل ودعمر

خالد
Post: #75
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-06-2007, 06:28 PM
Parent: #74

حباب عولي كلكم وكتر خيركم بالحيل ودى المحرية فيكم - اعفوا لى تاخرت لزوم اعمل الاتي :

اتصلوا فيني ناس بقرهم متوحل في الميعة مشيت لحقتهم نشلناهو بالسلب
واتصلوا فيني ناس عندهم واحدة حامل اتوجعت ومشيت اتلافيتها . رجعت البيت اتصلوا فيني ناس قالوا محاصرين بالموية مشيت لقيت طابقهم الارضى متمسح طاااااااااب وطالعين في الطابق التاني ما لقيت طريقة اخارجهم بلغت نا س الدفاع المدنى جوهم لقطوهم واحد واحد . اتصل فيني واحد عندو سكري قال ما عندو انسولين احتياطي دورت اتناولت ليهو الانسولين .


هنالك انباء عن محاصرة الامطار لمنازل مجموعة من السودانيين فيهم قضاة ومحامون . حاولنا الاتصال بهم ولكن تعذر الاتصال بكل منطقة اقامتهم .

ربنا يستر

ود المحرب حرم مدراء البنوك ذاتهم الموية .............اهلن طاااااااااااااب - حرم تخمش ساى وتمش الحق البلد طلقت
Post: #76
Title: Re: ود شيقوق وبت الحسن في قلب العاصفة
Author: abubakr
Date: 06-06-2007, 06:34 PM
Parent: #1

Quote: واتصلوا فيني ناس عندهم واحدة حامل اتوجعت ومشيت اتلافيتها . رجعت البيت اتصلوا فيني ناس قالوا محاصرين بالموية مشيت لقيت طابقهم الارضى متمسح طاااااااااب وطالعين في الطابق التاني ما لقيت طريقة اخارجهم بلغت نا س الدفاع المدنى جوهم لقطوهم واحد واحد . اتصل فيني واحد عندو سكري قال ما عندو انسولين احتياطي دورت اتناولت ليهو الانسولين .


منظمة درء الكوارث الشيقوقية ...
اها جبت الانسوليين منيين ياشاطر ؟؟؟
Post: #77
Title: Re: ود شيقوق وبت الحسن في قلب العاصفة
Author: Ahmed Yousif Abu Harira
Date: 06-06-2007, 06:50 PM
Parent: #76

تراكم طيبين طالما الشيقوق ظهر


شيقوق يا ود المحرب قصد بي ظهوره المفاجئ ده وسط العواصف والأنواء وتوصيفه لنشاطاته الكتيرة دي ان يقول لك (هم هم هم كمن لا يستطيع الحديث ويمجمج راسه دلالة على عدم القبول) حتى يقطع عشمك مرة وللأبد في وراثته، وللتأكيد حولك على البنوك.
Post: #78
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-06-2007, 07:07 PM
Parent: #77

Quote: اها جبت الانسوليين منيين ياشاطر ؟؟؟


كيف جبتو من وين افو افو افو ات قايلني رطاني

حرم جريّت المضبب ومشيت لصيدلي بنغالي جبتو ليك في المطرة فتح الصيدليه وقال لي اعزل الانسولين البيعجبك حرم مليت جيوبي انسولين وما اديتو قرش واحد منتظر فزع ناس السكري في بيتي .


شيخ احمد ابو حريرة

حرم مدراء البنوك كلهم محاصرين بالمياه وود المحرب عارف امهم ........... هيييييييييييع
Post: #79
Title: Re: ود شيقوق وبت الحسن في قلب العاصفة
Author: abubakr
Date: 06-06-2007, 08:09 PM
Parent: #1

Quote: اعزل الانسولين البيعجبك


اها يشمو واللا يضوقو واللا يوزنو ؟؟
ات ما اتطورت من زمان دكان عمك وقروانة الطحنية ,, ياخي الانسوليين دة دوا ما حلاوة بللي ؟
Post: #80
Title: Re: ود شيقوق وبت الحسن في قلب العاصفة
Author: عبد المنعم ابراهيم الحاج
Date: 06-06-2007, 08:14 PM
Parent: #79

غايتو في ناس شايفم بعد يوم يومين تلقاهم زي وصلة السير
على الشاطئ كايسين القروش المطفحات..
Post: #81
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-06-2007, 08:18 PM
Parent: #79

Quote: ات ما اتطورت من زمان دكان عمك وقروانة الطحنية ,, ياخي الانسوليين دة دوا ما حلاوة بللي ؟ [/QUOTE

يا اخي انت فظيع اضحك لحدى ادمع على الطلاق انا في بالي انك ترد بنفس الكلام
Post: #82
Title: Re: ود شيقوق وبت الحسن في قلب العاصفة
Author: محمد أبوالعزائم أبوالريش
Date: 06-07-2007, 05:59 AM
Parent: #1

الأخت سمية ..... الأخ الطيب ..... وكل الأخوة بمسقط

لم أر هذا البوست إلاّ الآن .. وقد كنت متابعاً من الأمس في بوست (مايا) ... ولكن يبدو أن الأخبار هنا وهناك إنقطعت .... طمنونا

وربنا يحفظكم من كل شر
Post: #83
Title: Re: ود شيقوق وبت الحسن في قلب العاصفة
Author: Adel Sameer Tawfiq
Date: 06-07-2007, 08:15 AM
Parent: #1

Quote: تمنياتنا لكم بالسلامة من كل شر.
Post: #84
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-07-2007, 08:56 AM
Parent: #83

مراسل الجزيرة في مسقط تحدث عن خسائر بالمليارات، تحدث عن حصر الضحايابين قتيل وجريح وقال انه سيعطي ارقاما بعد ساعتين (الان) وان كانت حالة الوفاة الوحيدة المؤكدة هي التي حدثت هي في ايران.
من جانب اخر نقلت الشرق الاوسط ان الملك عبد الله وضع كا امكانيات المملكة تحت تصرف السلطنة.
نسال الله اللطف بعباده
Post: #85
Title: Re: ود شيقوق وبت الحسن في قلب العاصفة
Author: Adel Sameer Tawfiq
Date: 06-07-2007, 11:50 AM
Parent: #84

إتصلت الآن بالأخ الطيب شيقوق..

هو بخير و الحمد لله..
Post: #86
Title: Re: ود شيقوق وبت الحسن في قلب العاصفة
Author: abubakr
Date: 06-07-2007, 01:46 PM
Parent: #1

اتصلت الان بالاخت سمية طلحة وابلغتني بانها هي واسرتها وكافة السودانيين بالف خير واوصتني بنقل جزيل شكرهاوامتنانها لكل من سال عنهم من كل اطراف الدنيا
Post: #87
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 08:35 AM
Parent: #86

السلام عليكم ورحمة الله وبركاته
مسقط / الساعة 11 صباح الجمعة الموافق 8 يونيو 2007م
سكون تام جراء الشلل الذى أصاب تلك المدينة الجميلة من آثار الإعصار المدمر ، لاشىء يرى تحت الشمس (التى عادت تشرق بعد غياب )، أكثر من الدمار الهائل مد البصر (المبانى، الطرق ، الجسور والسيارات)
الحمدلله الذى لايحمد على مكروه سواه
الحمدلله على كل حال ونسأله أن يفرج الكرب عن عباده ويلطف بهم
نطمئن الجميع أن كل السودانيين هنا بخير لاخسائر فى الأرواح عدا الخسائر المادية التى لحقت بالبعض
وإنقطاع الماء العام والكهرباء عن بعض المناطق وسوء وسائل الإتصال ، منطقة روى فى قلب العاصمة مسقط التى أقطنها لم تتضرر سوى إنقطاع الإرسال التلفزيونى وسوء شبكة الإتصالات وإنقطاع الماء هذا الصباح (سمعنا من خلال الإذاعة إنه يجرى ضخ المياه الآن فى الصهاريج)الكهرباء لم تنقطع هنا بفضل الله
بلغت الخسائر فى الأرواح من الجنسيات الأخرى أكثر من ستين بين متوف ومفقود حسب إحصائية هذا الصباح .
أزجى لكم أجزل الشكر وأسمى آيات الثناء والعرفان ، وقوفكم إلى جانبنا قلب النغمة إلى نعمة وأعطانا
إحساس الترابط الذى نفتقده فى ظل الشتات الذى نعيشه، تشرفت ومن معى بإتصالات أعزاء تعرفت إليهم فى هذا المنبر ستظل مصدر فخر وإعتزاز لى شكرا لكم جميعا وشكرا لمن بادر بالإتصال شكرا لمن لم يتمكن من الإتصال لظروف خاصة ونسأل الله أن لايريكم مكروه وأن يحفظ الجميع من كل سوء .
Post: #88
Title: Re: ود شيقوق وبت الحسن في قلب العاصفة
Author: هاشم أحمد خلف الله
Date: 06-08-2007, 09:02 AM
Parent: #87

سمية اختي ربنا يطئمنك كمان وكمان والله عايز اتصل عليك تلفونياً لكن فتشت في البروفايل حقك لم أجد

رقم تلفونك , لكن ما زلت متابع مرة من التلفزيون ومرة من المنبر ده , تحياتي لك ولاسرتك الجميلة

وإنشاء الله نسمع عنكم كل خير , اخوك دائماً وابداً هاشم .
Post: #89
Title: Re: ود شيقوق وبت الحسن في قلب العاصفة
Author: فضيلي جماع
Date: 06-08-2007, 09:32 AM
Parent: #88

الملكةالحسن طلحة، هذا تقرير صحفي أغنانا عن كثير من الأسئلة وألوان الحيرة ، خاصة سلامة ارواح السودانيين المقيمين بالسلطنة. نتابع باستمرار الفضائية العمانية والتي تعمل على مدار الساعة وترصد كاميرتها الأحداث بصورة جيدة جدا.

نحن الذين اتيحت لنا فرصة العمل والإقامة ذات يوم في سلطنة عمان وفي عاصمتها مسقط بالذات نعرف طيبة وأصالة الإنسان العماني واحترامه للغريب المقيم في بلادهم، ونعرف فوق ذلك كيف أن جاليتنا هنالك تحظى باحترام كبير هي اهل له.
حفظكم الله وذلك البلد الطيب من كل سوء.
Post: #92
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 10:23 AM
Parent: #89

Quote: نحن الذين اتيحت لنا فرصة العمل والإقامة ذات يوم في سلطنة عمان وفي عاصمتها مسقط بالذات نعرف طيبة وأصالة الإنسان العماني واحترامه للغريب المقيم في بلادهم، ونعرف فوق ذلك كيف أن جاليتنا هنالك تحظى باحترام كبير هي اهل له.
حفظكم الله وذلك البلد الطيب من كل سوء

آمين يارب تحفظ الجميع
أستاذ فضيلى ماقلت هو عين الحقيقة
شكرا أخى لإتصالك الذى كان له بالغ الأثر تحياتى للأسرة الكريمة وتقبل سلام الجميع هنا.
Post: #91
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 09:58 AM
Parent: #88

أخى دائما وأبدا هاشم
سلمتوا من كل سوء أعرف مدى أهتمامكم أطمئنوا نحن بخير سأرسل لكم هاتفى عبر المسنجر
للعلم فقط أرجو أن لاتشغلوا بالكم ، تحياتى للأسرة الكريمة
أختك سمية
Post: #90
Title: Re: ود شيقوق وبت الحسن في قلب العاصفة
Author: Muna Khugali
Date: 06-08-2007, 09:41 AM
Parent: #87

حمدلله علي السلامه..ربنا يلطف بالجميع ويطمنا عليكم..

احيانا يا سمسم وشيقوق الزول ما بيقدر يتكلم..لكن قلوبنا معكم تماما..

والحمدلله علي سلامتكم..
Post: #93
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 10:34 AM
Parent: #90

Quote: احيانا يا سمسم وشيقوق الزول ما بيقدر يتكلم..لكن قلوبنا معكم تماما..


الحبيبة منى

أجمل الكلمات سرت إلى مسامعنا عبر مهاتفتك التى مسحت عنا الحزن وأعادة لنا الإبتسام
سلمت ودام عليك الهنا والسرور .
Post: #94
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-08-2007, 12:23 PM
Parent: #93

والله يا جماعة أهم خبر اننا اطمنا على الملكة ..


واذا سلمت الملكة,,,, سلمت الرعية . ربنا يحفظك


يا ست سمية انت وعيالك وكل من نحبهم .........
Post: #97
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 03:38 PM
Parent: #94

الأخ الكريم الفاروق
ربنا يحفظك ويسلمك من كل سوء أعلم مدى إهتمامك ولايحتاج لبينة
نحن بخير طالما بيننا أناس فى قاماتكم السامقة
دمت شامخا ولا لانت لك قنا
Post: #95
Title: Re: ود شيقوق وبت الحسن في قلب العاصفة
Author: abubakr
Date: 06-08-2007, 12:49 PM
Parent: #1

في محنتها التحية لسلطنة عمان والقائميين عليها
Post: #96
Title: Re: ود شيقوق وبت الحسن في قلب العاصفة
Author: nourelhadi awad
Date: 06-08-2007, 01:12 PM
Parent: #1

الحمد لله الذي لايحمد على مكروه سواه
اللهم ياخفي اللطف
أشملهم جميعا بنعيم لطفك
يامن لطفت بالاجنة في بطون الأمهات
هي أرض لك وسماء
لم يكن هذا السينامي على أهل مسقط فحسب
بل ران على قلوبنا جميعا
لأن من هناك جمعا عزيز (محل القلب ومجرى العاطفة)
حبسنا أنفاسنا واتجهنا بمهجنا وقلقنا الى الله
بضعف العبد
وزل السوال
للقوي المتين
المجيب
والرءوف الرحيم

حمدا للسلامة
وألف حمد
متعكم الله بالصحة
والطمأنينة
نورالهادي
Post: #98
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 03:52 PM
Parent: #96

نور الهادى
سمع الله منك ومن كل الصادقين
والحمد لله على سلامة الأرواح
التحية لجونو الذى أعادك
بعد أن ظنناإنك خلعت كل شى مع العمامة
متعك الله بالأمن والسلامة .
Post: #99
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 04:29 PM
Parent: #98

أبوبكر فعلا هذا الشعب الراقى أذهلنى فله ألف ألف تحية :
سلام من الله ورحمة وبركات وتحية
دعاء من رسول الله بالخير والرزق الهنيا
سلام من السودان لعمان درة الشرق القصيا
يابهاء الحسن ياشمس الربوع السندسية
فيك قابوس
أضاء فى الدياجى منك فيا
هو قبس من ضياء
فى المنارات العلية
به يسعد ثم يهنأ
بائس الحظ الشقيا
لك يا أم الرجال المبرزين
أسمى آيات التحية
مع تراتيل المساجد
كلما صاح المؤذن
ياعباد الله حيا
مع طيور الجو
تغدو فى الصباحات البهية
مع شراعات المراسى فى العشية
من فؤاد هام حبا
كلما هب النسيم حاملا طيبك ريا

يحفظ الله هذا البلد الذى دخل أهله الإسلام طوعاوسلماومنهم الصحابى مازن بن غضوبة الذى دعا له الرسول صلى الله عليه وسلم ولأهل عمان : (اللهم أرزق أهل عمان من بحرهم ولاتسلط عليهم عدو من غيرهم) آمين .
Post: #100
Title: Re: ود شيقوق وبت الحسن في قلب العاصفة
Author: فضيلي جماع
Date: 06-08-2007, 04:45 PM
Parent: #98


حمداً لله على السلامة يا ملكة. محنة وعدت بإذن الله . ويا ملكة بسأل من أخبار صاحبا لي إسمو الطيب بن شيقوق ، شيخ عربا مو هين..وحصل أخونا فاروق كتب فيه كتاب عنوانو الشمارالمدقوق في سيرة العريبي الطيب بن شيقوق)..حاجة من النوع دا . والسمعتو قالوا الكتاب دا يمكن يضيفوه للمقرر بتاع الثانويةالعامة. نحن خايفين على زولنا تشيلو الهاشمية ويكون طلع بعكازو المضبب وبطاريتو في اليومين المابتشكروا ديلاك لنجدة الناس..ويكون من ديك وعيييييييييييك !!! الله يكضب الشينة!

مطلوب منك تتفقدي الرعية. في حالة يكون حي وعايش نقول الحمدلله ونقوم نضبح ليناعجل ولا خروف كرامة..باقي الزول مو هين !! وكان بقى مع المفقودين نتصبر ونكلم أخونا ودالمحرب قال أصلا في النية وراثتو !
Post: #101
Title: Re: ود شيقوق وبت الحسن في قلب العاصفة
Author: abubakr
Date: 06-08-2007, 05:17 PM
Parent: #100

الان الثامنة والربع مساء (دبي) اتصلت بالعرريب ودشيقوق وهو في اتم صحة ولسانه يعجز عن شكركم جميعا ( اتخيلو لسان العرريب يعجز ؟؟ شفتو معزتكم كيف) ولقد عاد بعد رحلة بحث عن زميل ما زال مفقودا والحافظ الله....
Post: #102
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-08-2007, 08:42 PM
Parent: #101

Quote: مطلوب منك تتفقدي الرعية

دا واجب يأأستاذ فضيلى وفعلا يوم الليلة دا لميت فى مجموعة كبيرة من الناس كنت شفقانة عليهم والحمد لله الجميع بخير ، ربنا يجمع بالشخص المفقود دا ، الآن تحدثنا لإبن شيقوق وها أنا أسمع صوته على الهاتف مع الزبير وهو يواجه مشكلة فى النت
Post: #103
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-09-2007, 09:06 AM
Parent: #102

توجه وفد من نادى الجالية السودانية بمسقط لأجهزة الإعلام العمانية لتقديم العزاء والمواساة للشعب العمانى الذى تدافع شيبا وشبابا لغوث وعون كل محتاج بكل ما أوتوا من قوة غير مكلفين من قبل أحد سوى مايمليه عليهم الواجب والنخوة والشهامة ، فضربوا مثالا فى الإيثار والتفانى والعطاء اللامحدود يجب أن تحتذى به الدول التى تدعى الرقي والحضارة وأن تتعلم منه تلك التى لاتعرف معنى الرقى والحضارة ولاتوجد فى قاموسها هذه المفردات أصلا ...
فكانوا كالبنيان المرصوص وعاملوا الناس كأسنان المشط سواسية ، بمساواة منقطعة النظير.. كونوا مجموعات متتالية لتوصيل المؤن على أكتافهم( للمناطق التى لاتستطيع وسائل النقل الوصول إليها) عن طريق المبادلة ، كالطريقة التى نراها فى الألعاب الأولمبية ، مجموعة تسلم الأخرى فالأخرى ثم الأخرى حتى بلوغ الهدف بأقصى سرعة ممكنة ، وهكذا سائر الشئون الأخرى من أعمال تنظيف وجرف مخلفات الدمار وفتح الطرق المطمورة ... الكل هنا كخلية نحل ، يعملون فى نظام بديع كالعادة .
Post: #104
Title: Re: ود شيقوق وبت الحسن في قلب العاصفة
Author: abubakr
Date: 06-09-2007, 09:26 AM
Parent: #1

Quote: فكانوا كالبنيان المرصوص وعاملوا الناس كأسنان المشط سواسية ، بمساواة منقطعة النظير.. كونوا مجموعات متتالية لتوصيل المؤن على أكتافهم( للمناطق التى لاتستطيع وسائل النقل الوصول إليها) عن طريق المبادلة ، كالطريقة التى نراها فى الألعاب الأولمبية ، مجموعة تسلم الأخرى فالأخرى ثم الأخرى حتى بلوغ الهدف بأقصى سرعة ممكنة ، وهكذا سائر الشئون الأخرى من أعمال تنظيف وجرف مخلفات الدمار وفتح الطرق المطمورة ... الكل هنا كخلية نحل ، يعملون فى نظام بديع كالعادة .


الملكة ...الحديث عن ارث وتاريخ وحضارة سابقة يكون سردا وحكاوي الم ينعكس علي تصرف البشر والاجيال اللاحقة .. وعمان لها تاريخ قديم وعريق واليوم اثبت العمانيون للعالم انا تاريخهم وحضارتهم السابقة لم تكن سردا وحكاوي وانما عملا واقعا اثبتو بعض منه في مواجهتهم للعاصفة واثارها هذا الاسبوع .. في الكوارث تعرف معادن واصول وحضارات الشعوب
Post: #105
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-09-2007, 10:09 AM
Parent: #104

يا سلام على أهل عمان الحلوين ...
Post: #106
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-09-2007, 12:33 PM
Parent: #105

Quote: .الحديث عن ارث وتاريخ وحضارة سابقة يكون سردا وحكاوي الم ينعكس علي تصرف البشر والاجيال اللاحقة

أبوبكر أصبت .. و لذا
يجب علينا ألا نكثر من الحديث والبكاء على الأطلال ، بل العمل فى صمت وندع الأعمال تتحدث ...
Quote: يا سلام على أهل عمان الحلوين ...

وياسلام لوكان جفاك بحسن نية ...
الفاروق نار الفريق والحلة
تسلم
لكم وعليكم السلام .
Post: #107
Title: Re: ود شيقوق وبت الحسن في قلب العاصفة
Author: محمد عمر الفكي
Date: 06-09-2007, 02:26 PM
Parent: #106

الاخوان والاخوات السودانين المقيمين بالسلطنة
فتحنا هذا البوست لمؤازرتكم ابان المحنة التي نسال الله الا يعيدها عليكم ولا يراها احد في المستقبل. بعد ان هدأ الوضع واستقر الحال ان ان نقول لكم جميعا حمد لله علي السلامة واسمحوا لنا عبركم ان اتوجه بالتحية الي قيادة عمان الحكيمة والي شعب عمان ونوجه اليهم بخالص العزاء والمواساة بالشهداء الذين سقطوا في اعصار جونو سائلين المولي ان يرحمهم برحمته وان يمن بالشفاء علي المصابين في هذه الكارثة الطبيعية وان يعيد لعمان عافيتها والقها في اسرع وقت ممكن.

بت الحسن
تحية لك خاصة ولاسرتك وحمد الله علي السلامة

انت يا ود شيقوق البوست دا مفتوح باسمك وشايفك مشيت تعزي وتؤكد وقوفك مع شعب عمان تحين من هنا ولقدام رسالتي دي ما ترميها اووري العمانين انه وراءك قبائل.
Post: #108
Title: Re: ود شيقوق وبت الحسن في قلب العاصفة
Author: ود محجوب
Date: 06-09-2007, 08:36 PM
Parent: #107

الملكة سمية بت الحسن

الأخ الزبير الطيب


لكم منى التقدير كله

شكرا لكم لما قمتم به من عمل ليس بمستغرب منكم فأنتم بيت ورث الشهامة والكرم كابر عن كابر


لسانى عاجز

ولا أملك لكم الآن الا الدعاء
Post: #109
Title: Re: ود شيقوق وبت الحسن في قلب العاصفة
Author: محمد أبوالعزائم أبوالريش
Date: 06-10-2007, 06:36 AM
Parent: #1

الأخت سمية .. الأخ ود شيقوق

ألف حمد الله على السلامة

ظللت متابعا بالتلفون عبر شقيقي (السني) طرفكم وأحمد الله على سلامتكم

ما تشوفوا شر
Post: #110
Title: Re: ود شيقوق وبت الحسن في قلب العاصفة
Author: محمد أبوالعزائم أبوالريش
Date: 06-10-2007, 08:07 AM
Parent: #1

الأخوة الأعزاء ..

لقد أبت الأحداث أن تمر دون إحداث النتائج التي لم نكن نرجوها .... فقد ورد أن أحد أبناء الجالية السودانية (مفقود) في منطقة إبراء، وهو القانوني نابت شيخ الدين

اللهم لا نسألك رد القضاء .. ولكنا نسألك اللطف فيه
Post: #111
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-10-2007, 08:58 AM
Parent: #110

منى عوض

Quote: احيانا يا سمسم وشيقوق الزول ما بيقدر يتكلم..لكن قلوبنا معكم تماما..


قلوبكم بس يا منى !! كلامكم لا .


محمد عمر الفكي

جاييك يا عشاى اشوفك ساى واحكي ليك بود المحرب وام احمد والاولاد اتصلوا فيني لقيتهم عاملين غرفة عمليات لتجميع الاخبار عن اعصار جونو .

كما احييي واثمن الاتصالات الهاتفية التى وردتنى من الاخوة الاخوة :

ابو بكر سيد احمد ( خمس مكالمات المكالمة الواحدة نصف ساعة وواحدة اخيرة ساعة كاملة)
الاخ الفاروق حامد ( عامل غرفة عمليات للاتصالات لكن ما بطول في المحادثة بضحكنى وبديني عرض اكتافو طوااااالى ) ايضا وردتنى من الفاروق مجموعة رسائل SMS بعضها يحمل شمارات .
الاستاذ الكبير شيخ العرب الفضيلي جماع : والله يا اخوانا كلكم اسألوا ربنا يحفظوا لينا ويحفظ اولادة كان اتصالوا على الدوام وعلى كل اعضاء الجالية بمسقط .
الاخ خالد ود المحرب والاخت عفاف ابو حريرة والاولاد = بيتصلوا على الدوام وعيونهم ما غمضت وعاملين غرفة عمليات لتلقى الاخبار .
الاخت منى عوض خوجلي = دى اربابة عدييييييييييل وزى ما قلت ليكم هى سفيرة المنبر العام للتواصل الانساني والله كل يوم بتسال عن جميع السودانيين المقيمين في السلطنة .
الاخ احمد حماد ادريس : اتصل وكان شفقان علينا شدييييييييد انا احمد بعرفه حنيييييييييين لانو كانت الحشرجة ظاهرة من نبرة كلامه .

على ود النعيم : هييييييييييييييع زول باردة سااااااااى ما اتصل الا بعد هجست كلنها برضها كبيييييييييرة يا ود النعيم اخوى .
الاستاذ عادل سمير : كان على الدوام متواصل ومتابع الاخبار .

نواصل بعد قليل قائمة المتصلين وبعد ذلك قائمة الحاريين اتصالهم وما اتصلوا.

ابقوا معنا
Post: #112
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-10-2007, 09:10 AM
Parent: #110

Quote: بت الحسن
تحية لك خاصة ولاسرتك وحمد الله علي السلامة

الأخ محمد عمر الفكي
ربنا يسلمك ويعافيك والتفقد وقت الشدة وساعة الحارة شيتا مو جديد عليك دى شيمتكم وإرثكم .

{الملكة سمية بت الحسن

الأخ الزبير الطيب


لكم منى التقدير كله

الأخ الكريم ودمحجوب
لاشكر على واجب
لك ولأسرتك منى ومن كل الأسرة أطيب التحايا

الأخت سمية .. الأخ ود شيقوق

ألف حمد الله على السلامة
الأخ أبو العزائم
تسلم من كل سوء حمد الله على سلامة السنى
وربنا يجمع بالمفقود.. آمين .
Post: #113
Title: Re: ود شيقوق وبت الحسن في قلب العاصفة
Author: ابوبكر يوسف إبراهيم
Date: 06-10-2007, 12:24 PM
Parent: #112

العزيز الأخ الطيب
العزيزة الأخت سمية

محفوظين بإذن الله ومشيئته .. طمنونا.. أنتما في القلب والوجدان مقيمَين
Post: #114
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-11-2007, 06:18 AM
Parent: #113

Quote: محفوظين بإذن الله ومشيئته .. طمنونا.. أنتما في القلب والوجدان مقيمَين

أخى العزيز /د. أبوبكر يوسف
نحن بخير الحمد لله سوى أننا نفتقد أحد الأخوة وهو المحامى نابت الذى مازال البحث جار عنه حتى اللحظه ، وسوف يصل شقيقه اليوم من السودان لينضم لأبناء السودان هنا الذين شرفونا حقا، وليس المجال مجال تفاخر ، بل وقت شدة وكرب نسأل الله الفرج القريب وأن يجمع بشتات الشمل إنه وحده ولي ذلك والقادرعليه .
نرجوكم صالح الدعاء
ولكم أطيب المنى
Post: #115
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-11-2007, 06:57 AM
Parent: #114

الاخ ابو بكر يوسف - سيد الناس كلهم

Quote: العزيز الأخ الطيب
العزيزة الأخت سمية

محفوظين بإذن الله ومشيئته .. طمنونا.. أنتما في القلب والوجدان مقيمَين


انت راجل وود رجال الله يحفظك انت ويحفظ الفاروق ود حامد سمح الرجال

يا اخوانا والله ابو بكر ده صار بعذبنا بغيابه - يا زول تعال مارق الدنيا دى ما فيها غير الكلمة الطيبة وإن كان منك ما محرية
Post: #116
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-11-2007, 10:01 PM
Parent: #115

Quote: نواصل بعد قليل قائمة المتصلين وبعد ذلك قائمة الحاريين اتصالهم وما اتصلوا.


اللوم بجي بالغفلات ياشيخ الطيب وكترة العتاب بتقلل الأصحاب
والناسيك ... أنساه والسابك ... سيبو .
Post: #117
Title: Re: ود شيقوق وبت الحسن في قلب العاصفة
Author: Abdelmuhsin Said
Date: 06-11-2007, 10:02 PM
Parent: #1

الأخت سمية .. الأخ ود شيقوق

ألف حمد الله على السلامة
Post: #118
Title: Re: ود شيقوق وبت الحسن في قلب العاصفة
Author: abubakr
Date: 06-12-2007, 03:25 AM
Parent: #1

Quote: كما احييي واثمن الاتصالات الهاتفية التى وردتنى من الاخوة الاخوة :


يا عرريب انت بتاخد كوميشن من اومانتل واتصالات ؟في الظروف دييك قاعد تعد المكالمات ؟
Post: #119
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-12-2007, 04:36 AM
Parent: #118

Quote: نواصل بعد قليل قائمة المتصلين وبعد ذلك قائمة الحاريين اتصالهم وما اتصلوا.
"الطيب بن شيقوق"




Quote: اللوم بجي بالغفلات ياشيخ الطيب وكترة العتاب بتقلل الأصحاب
والناسيك ... أنساه والسابك ... سيبو . "الملكة سمية"



أخطأ الطيب وأصابت "الملكة"
Post: #120
Title: Re: ود شيقوق وبت الحسن في قلب العاصفة
Author: محمد ابراهيم قرض
Date: 06-12-2007, 04:39 AM
Parent: #1

أبوبكر ..
سمعت أن ود شيقوق قال لهم:
سآوي إلى جبل يعصمني من الماء ..
Post: #121
Title: Re: ود شيقوق وبت الحسن في قلب العاصفة
Author: abubakr
Date: 06-12-2007, 04:54 AM
Parent: #1

Quote: سآوي إلى جبل يعصمني من الماء ..

فرعون ....
اول يوم طلع السطوح وخت سرير ودخل تحتو ..
Post: #122
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-12-2007, 05:18 AM
Parent: #121

الفاروق
Quote: أخطأ الطيب وأصابت "الملكة"


هذا هو دأبكم يا مواطني دول العالم الثالث فساركوزيكم لا نصيب له في ديموقراطياتكم المشوهة
Post: #123
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-12-2007, 05:22 AM
Parent: #122

ابو بكر
ود قرض

Quote: سمعت أن ود شيقوق قال لهم:
سآوي إلى جبل يعصمني من الماء ..


حرم الجات في عمان دى عندنا همبريب ننتكي ليها بره في الهباب هييييييييييييييع
Post: #125
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-12-2007, 05:34 AM
Parent: #123

Quote: هذا هو دأبكم يا مواطني دول العالم الثالث فساركوزيكم لا نصيب له في

ديموقراطياتكم المشوهة



يا أبوبكر حصل صاحبك بقى يهضرب !!!
Post: #124
Title: Re: ود شيقوق وبت الحسن في قلب العاصفة
Author: على احمد النعيم
Date: 06-12-2007, 05:33 AM
Parent: #121

Quote: على ود النعيم : هييييييييييييييع زول باردة سااااااااى ما اتصل الا بعد هجست


لقد ظلمتنى يا ود شيقوق ظلما فادحا... وليتك تعلم انه لو كان الامر بيدى لقلت لذلك الاعصار اللعين "كفى" ولا تمر بارض فيها الطيب وفيها بت طلحة!! اناس عشقتهم اذنى قبل عينى ولا غرو "فالاذن تعشق قبل العين احيانا" وصدق او لا تصدق يا شيخ الطيب لقد حاولت الاتصال عليكم وانتم فى قلب المعمعة وكان ذلك قبل ان تاتينى رسالتك... واخبرتك بذلك حين اتصلت عليك بعدها.
وقبل ذلك كله تداخلت فى احد بوستات الاخوة متمنيا لكم انت والاخت سمية ولجميع ساكنى السلطنة السلامة والحفظ.
اما الاخت بت طلحة فلها العتبى حتى ترضى لاننى لا املك لها وسيلة اتصال.

مقبولة منك يا شيخ الطيب وحمدا لله على سلامتكم جميعا، وبركة الشفنا مداد اقلامكم مرة اخرى.

اخوك
ود النعيم
Post: #126
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-12-2007, 05:59 AM
Parent: #124

ود النعيم

Quote: لقد ظلمتنى يا ود شيقوق ظلما فادحا... وليتك تعلم انه لو كان الامر بيدى لقلت لذلك الاعصار اللعين "كفى" ولا تمر بارض فيها الطيب وفيها بت طلحة!! اناس عشقتهم اذنى قبل عينى ولا غرو "فالاذن تعشق قبل العين احيانا" وصدق او لا تصدق يا شيخ الطيب لقد حاولت الاتصال عليكم وانتم فى قلب المعمعة وكان ذلك قبل ان تاتينى رسالتك... واخبرتك بذلك حين اتصلت عليك بعدها.
وقبل ذلك كله تداخلت فى احد بوستات الاخوة متمنيا لكم انت والاخت سمية ولجميع ساكنى السلطنة السلامة والحفظ.
اما الاخت بت طلحة فلها العتبى حتى ترضى لاننى لا املك لها وسيلة اتصال.

مقبولة منك يا شيخ الطيب وحمدا لله على سلامتكم جميعا، وبركة الشفنا مداد اقلامكم مرة اخرى.

اخوك
ود النعيم


لولا هذه اللكيزة ( تصغير لكزة او شوته ضفاري) لما حصلنا على هذه الدرر واللالي . كلامك كان مسكولات سااااااااى كنت تضن علينا بحلو حديثكم هذا . تاني ما بنريحك اشمر ساااااااااى وجيب معاك ود المحرب يجيب ............... اهلو كلهم .
ناديهو قولو ود شيقوق قالك تعال فك الشفرة دى .
Post: #127
Title: Re: ود شيقوق وبت الحسن في قلب العاصفة
Author: فاروق حامد محمد
Date: 06-12-2007, 06:24 AM
Parent: #126

Quote: فساركوزيكم



ساركوزي ده اعصار يا الطيب ؟


ولا عصيييييييدة حاااااااااااااااااااارة بوخها يلوي
Post: #128
Title: Re: ود شيقوق وبت الحسن في قلب العاصفة
Author: الطيب شيقوق
Date: 06-12-2007, 06:34 AM
Parent: #127

Quote: ولا عصيييييييدة حاااااااااااااااااااارة بوخها يلوي


انا عارفك انت بلوى عايز تدودرني للكلام البريح بالك وانا حرم ما بنتظر المدودرة اقول ليك بالعديل - ساركوزى الفرنسي الفاز في انتخابات الرآسة الفرنسية على البنية خفيفة الظل الزيك يا يا ابا ناصر - وحياتك انا وقت سقطت تلاتة يوم عيني ما غمضت .
Post: #129
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-12-2007, 12:50 PM
Parent: #128

أبوبكر
الطيب
فاروق
فعلا دى هضربة( من باب غريق البحر ولا جراي الحصان ) أحسن منها عصيدة حارة
( شنو الجاب ساكوزى الفائز لشيقوق المهزوم ، وماهو وجه الشبه بين البنية المهزومة والفاروق ؟)

قرض
نحنا ماصدقنا جونو فطانا مالك داير تجيبو لينا راجع ...

ودالنعيم
تقديرا لهذا الكلام الذى ليس بمستغرب منك سأتصل بك وأطمئنك علينا وتسلم من كل سوء .
Post: #130
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-13-2007, 08:57 AM
Parent: #129

Quote: الأخت سمية .. الأخ ود شيقوق

ألف حمد الله على السلامة

عبدالمحسن سيد ربنا يسلمك ويعافيك

وقد عادت المياه الحمد لله بعد إنقطاع من يوم الكارثة
ونسأل الله أن يعود كل شىء لآحسن مما كان عليه .
Post: #131
Title: Re: ود شيقوق وبت الحسن في قلب العاصفة
Author: سمية الحسن طلحة
Date: 06-13-2007, 11:05 AM
Parent: #130

ولفت نمة
ياقلبى الشجيع خاتى المهمة
أنا أتحصنت بى يس وعم
ترى التمساح بشيل الأجلو تما
ودالفراش