Post: #1
Title: معقولة دى ياتماضر ؟؟؟؟
Author: Salwa Seyam
Date: 10-01-2006, 08:04 PM
دى زهجة ساكت قلت افتح لى بوست يكونو زوارو الفين فى الدقيقة...
|
Post: #2
Title: Re: معقولة دى ياتماضر ؟؟؟؟
Author: Tumadir
Date: 10-01-2006, 08:52 PM
Parent: #1
والله قلبى قرب يقيف
سلوى صيام بحالها وطول بالها تستنكر وتشجب فعلة عملتها انا ؟ اكون جنيت ولا جانى ظار ولا شى
كنت بقشقش فى دموعى وانا بتفرج على abc
extreme home makeover
الاسرة دى ابوهم بتاع مطافى واتوفى من تاثير الفطريات الموجودة فى البيزمنت بتاع بيتو القديم
عندو سته اطفال اكبرهم بت عمرها اتناشر سنة ..الام والبت ديل دموعهم ما وقفوا كلو كلو
تتخيلى ناس abc ديل جابو ناس المطافى كلهم وكل ناس الحى وسفروا الاسرة فلوريدا قعدوهم فى فندق اسبوع
وبنوا البيت من جديد فى 53 ساعة و54 دقيقة كسروا كل الارقام القياسية فى هدم واعادة بناء بيت
البيت فيه سبعه غرف كل غرفة صمموها على حسب حلم الزول وشخصيته
وجات اللحظة جابوهم راجعين ومايقرب من الالف شخص واقفين نساء ورجال واطفال وكل قوة المطافى فى البلد وشوفوهم البيت
الارملة وقعت ..من ضخامة الانفعال ..داخت ..ويبكوا ويضحكوا و oh my god, this is beautiful دى ما زادوا عليها كلمة
وهم يبكوا ..وانا ابكى ..
لما شفت اسمى فى عنوان بوستك ..قلت ياربى سلوى صيام دى شافت عوارتى وبكاى مع برنامج تلفزيون ولا شنو؟
والحقيقة كنت خايفاك تكونى قريتى افكارى ..قلت الجماعة ديل لو اتصلت بيهم وحكيت ليهم قصة حياتى ..ببنوا لى قصر عديل كدة
الليلة بالذات مقطوعة من العالم وفطور رمضان براى ..
طلعت من الامس بايتة فى الشغلة البايخة دى جيت الصباح ..ويعنى جنس يتم وانجداعة ..مايعلم بيها الا الله ده ..... قال ايه؟ بختكم ساكنين فى امريكا ......
الله كريم غايتو ..
اا ما خففت عليك زهجتك شوية ؟؟
هاك اللنك دى اتونسى بيها ...
http://www.youtube.com/watch?v=AA1Ysky3BcE&NR
|
Post: #5
Title: Re: معقولة دى ياتماضر ؟؟؟؟
Author: فاروق حامد محمد
Date: 10-01-2006, 09:18 PM
Parent: #4
تماضر أخيتي
ليت (أولاد) الكيزان ( المدللين ) أصحاب الافتراءات
يقرؤون هذا البوست ليعرفوا حجم المعاناة والنضال
والسعي لكسب العيش بشرف باذخ..........
ودمت........
فاروق
|
Post: #11
Title: Re: معقولة دى ياتماضر ؟؟؟؟
Author: علوبه
Date: 10-02-2006, 01:05 PM
Parent: #2
عزيزتنا تماضر
البوست ده حايشرف عليهو ناس الزكاة ولا الضرائب
زى ماقلتى ستو جدعتو وكسحت
فى السعودية فى مقولة من واحد مغترب مجهجه معذب
بيقول فيها : السعادة والهللة لايجتمعان
عشان كده الفى السودان حتى لو مفلسين بس غنيانين شديد
لانهم سعداء وكل واحد سيد نفسو
اغلب الناس اقتنعت بى حكاية الغربة مش كده
تحياتى
|
Post: #6
Title: Re: معقولة دى ياتماضر ؟؟؟؟
Author: ست البنات
Date: 10-01-2006, 09:35 PM
Parent: #1
تماضر حبيبة القسا -
تسلمى من العوارة انتى - مالك تحمدى ربك عاقلة ومكملة -
وكلنا فى الهواء سوا -
أسمعى حكايتى :
يوم الجمعة الفاتت نادونى للشغل الساعة 6 مساء - ونحنا فطوزنا الساعة 6 ونص !
مشيت شايلة فطورى ولمان بديت بالبلحة قالوا كدى قالوا نبدأ الشغل - انا وواحد باكستانى بس المسلمين
والصائمين من 15 زول !
والشغل استمر 12 ساعة - لا سحور - لا عشاء !
بس الحمد لله الصباح جيت البيت دايخة من التعب والجوع واترميت فى السرير لحدى اذان مغرب اليوم التانى !
شفتى الأدب الأتعلمناه فى الغربة دى - ما خاتى الزول القال ليها ( يالغربة ان شاء الله تعقرى )
غايتو لو فى بلدنا كنا بنشتغل بالطريقة دى كان كوفى انان بقى من السودان !
وغايتو : مغسة - ويتم - وجوع - وعذاب الله اكبر !
وكلنا يا بت امى فى الهوى سوا !!
ويمكن دا يواسيك شوية .
ست البنات .
|
Post: #7
Title: Re: معقولة دى ياتماضر ؟؟؟؟
Author: Tumadir
Date: 10-02-2006, 10:34 AM
Parent: #6
فاروق حامد
وست البنات لى حدهن
شفتى البقت علينا؟؟
ناس البيت غفروا والجيران كفروا ....
ست البوست جدعته ونحن اتلببناه ..
البوست محروس وستو تكوس
ان شالله هى تبقى طيبة
|
Post: #8
Title: Re: معقولة دى ياتماضر ؟؟؟؟
Author: ست البنات
Date: 10-02-2006, 10:43 AM
Parent: #1
تماضر الحبيبة - سلام -
البقن علينا هن اتنين !
وكيحة الغربة - ووكيحة البوست !
هسع البخارجنا شنو ??
ست البنات .
|
Post: #10
Title: Re: معقولة دى ياتماضر ؟؟؟؟
Author: Tumadir
Date: 10-02-2006, 12:59 PM
Parent: #9
ست البنات ..وكيحة البوست هينة ..حسه شوفى جنس غزال سلمى دى ..مالها عيبيها لى؟
شكرا ياعادل عجبنى غزال سلمك
اها هاك اسمع غزال سلمى انا:
Midival_Punditz_Rebirth__Feat._Anoushka_Shankar_.mp3
لعبها فى ميديا بلير
|
Post: #12
Title: Re: معقولة دى ياتماضر ؟؟؟؟
Author: Salwa Seyam
Date: 10-02-2006, 03:09 PM
Parent: #1
سلام ياتماضر والمتداخلين
ياجماعة صبرا يبل الآبرى مافى ..
انا والله ماجدعت البوست ..لكن انتو عارفين فرق الزمن بينى وبينكم كم ؟ انا فى اقصى غرب الغرب ..بينى وبين السودان حداشر ساعة..
اصلو الحكاية وما فيها انا كنت طالعة من امتحان.. وكان فى مشروع سينما قرب يطرشق..
قلت خلاص كدى ادخل البورد واشوف الحاصل .. وكان عشمى اسمع لى غنية..
لقيت الصفحة الأولى كلها شكل..
عنصرية ..جهوية ...فرانكوفونية...سيموطيقية...جلابة ... عييك ..عاك ...
ملاسى رجعو ...ود الطالب رفدو ....اوووك ...اوروررروووك
مؤامرات ...دسايس....يابكرى الحقنا...الحرابة قايمة..
قلت يابت براحة كده شوفى ليك نفاج امرقي بيهو..
امرق؟؟ امرق ساكت كدى..
لا والله حالفة ومتيمنة ماامرق ساكت .. علا كان اخت لى بوست بوستين .. حتى ان شاء الله ما يقروهن..
ما يقروهن؟؟ ما يقروهن ليه؟؟
طيب ... طيب...طيب عشان يقروهن لازم العنوان يكون فيهو اسم زول... زول ومااااا اى زول..
خلاس اخترنا الزول.. لكن برضو لازم العنوان تكون فيهو ريحة شمار شوية..تخلى المارى مايمر ساكت الايعمل كلك..
اها بقيتى الضحية انتى ياتماضر...انا قلت تماضر دى اضافة لانها معبودة الجماهير كمان مابتتشبك فينى وتقول لى كاتبة اسمى ليه..
بتفهم الموضوع براحة كان عجبها بتقول وكان ما عجبها برضو بتقول ..بس المهم ما بتشاكلنى فى النهاية..
وب كده ختيت البوست ومشيت سينمتى براحة..لامن شاف ولامن درى..الا الفليم طلع بايخ مرقنا من نصو..
لكن حقيقة والله البوست بفك الزهجة..
الزول ده مركب فى يدينو مكنة .. مدهش حقيقة والله .. قمة الابداع ..
ماقلت ليك انا طلعت تفتيحة..كتبت اسمك فى البوست ..جيتي وجبتى لى الحاجات الجميلة كلها..اسا كان كتبت لى اسم زول ساكت كان جا مسخ على البوست والسينما والبيت واى حتة..
شكرا ليك ودمتى واحة للفرح ..
ارقدى اكثر ابداعا..
|
Post: #13
Title: Re: معقولة دى ياتماضر ؟؟؟؟
Author: Salwa Seyam
Date: 10-02-2006, 03:36 PM
Parent: #1
الاعزاء
فاروق حامد
علوبة
ستالبنات
عادل عثمان
طلعتو اسياد وجعة صحى ما بتاعين شمارات تقرو وتفوتو ساكت 
شكرا ياعادل على الأغنية الجميلة..
| Quote: معقولة دى يا تماضر ويا سلوى صيام؟ |
اها شفت ده اسع عنوان بوست جاذب جدا..
خليه للمرة الجاية
شكرا ليكم جميعا ودمتم فزعة للزهجان ..
|
|