شوفوا البت نجلاء دى... كتابه كيف..ياناس

تاقيت الباب



تاقيت الباب و استنيتك

صيفين و شتاء و رشة مطرة.

ما حسك كان صاحى و بي خير

..الوانك واضحة ومختصرة

وكتين ما جيت ....

ضايرت الخوف ,

حزّمت التوب ,

وصيت الغيمة تلاوح البيت وما تسد الباب .....

جايين راجعين .

متيمنة بيك وشاردة معاك ؛

ح افتش ليك:

براة الضل

جواة الدم,

ما بين النار وصراخ جمرة ......... ح اجيك ..ح اجيك .

وبراى هل كنت براى قايل ؟

رحيتك جواى

والفكرة الخاصة

المجنونة ,

ونستنا ف آخر الليل ,

والليل .

ومشيت .....

عديت كم ساحة .............. ح القاك .

سجمانة ورازة ونطاحة ,

متعكننة بشـتـنـت الساعات

ودقايق الروح المتراوحات

والزمن المابى يكون منحاز

ويلمنى بيك ....

رحيتو دقيق

نسوان السوق عاسنو فطير ميتان حيلو

ما زمنك لا بقبل غيرو ....ولا غيرك غير .

سكران بالهم ؟

ما وعّـيـتـك .

مطعون جرحك مسربل دم ؟

ما داويتك .

غبـيـت ...احترت ومرق الصبر الشايل حيلك مال بالحيل ....

ضللت عليك بى قولة الحق ,

ما عارف انى معاك بسواك

لكين وحدك ..........متغابى وطيب وغايظنى .

عدن كم حول ؟

مستنى اقول ....؟

ياخى بحبك ....

واتآمر ضدك انا والشوق ,

تسريحة بت الجيران ,

وغنا الصبيان ساعة المطرة ,

وريتم اسمك فى الشجرة ,

بى خط فرحان

منقوش اسمك

قوسين ..... وفلان .

حتكسر الليل ولا افوتك

للشوق والبيت ,

تاقيت الباب

استنيتك ,

صيفين وشتا

واول مطرة....

ذاعت اخبارك فى دمى... وانحسرت تواً لفحة حر ,

كبرت فجاة ضلالة البيت ...

يا هل طليت ؟

نجلاء عثمان التوم

الخرطوم 1997


شكرا نجلاء على المرسال السريع...

وطبعا دى القصيده الانا حاكون غيرانه..لحدى اموت..من انها ما كاتباها انا....


ده يقولوا عليه شنو؟؟

تماضر نجلاء عثمان

علم علي رأسه نار

كانت قصائدها ضمن تلك القصائد التي اكلت وشربت معنا ( حينما كان هنالك اكل ) ونامت علي الارض وشاركتنا احلامنا وافكارنا ...

كتابة كلمة لا تعطيها حقها

مرحبا نجلاء واظن انو دعوات نصار اثمرت

أوعدك يا تماضر في المستقبل أسمعك ليها ...
القصيدة لحنها و أداها الفنان علاء سنهوري..

شكرا ابو امنه..على مساعيك..وجهدك بتوصيلنا ببعض..

ويا مانديللا .. متى هذا الوعد؟؟

i can't wait

تما ضر

اسه يعني انتي قصدك تنصحيني بشنو مع نجول دي؟

ما دايرين لف ودوران؟!!!

لكن البت دي ذي الطل ذي المحفضه

انا برضو بعمل ياتماضر ... بس بعد شوية ...بترضي ؟؟

شويه دى قدر شنو يا تمبس؟؟؟ معاك لغاية تلاته دقايق..


وجريفاوى..انت بس تحبها معانا

لا لا ده نص غريب حقيقي

بعدين انا متأكد انو من النصوص الخالده المستمره الجديده
في السودانيه

قريت مره لمحجوب شريف ,,قال لي فرحتني فرح صيفين وشتاء

تماضر : أنا موافق الدور والباقي علي احمد؟!!

الجريفاوي

عارف التعبير الرايح مني لي زمن طويل هو


بعدين انا متأكد انو من النصوص الخالده المستمره الجديده
في السودانيه

حقيقي من النصوص الخالدة

مع تحياتي

بصراحه بصراحه ياتماضر
انا حاسدك عشان انتي النزلتي النص ده خليك من كتابتو
ياخي نجلاء دي فنانه
ياسلام علي الجرأه
علي سلاسة الحداثه
ماشاء الله

جريفاوى
ابو امنه
موصلى..

قالت غنوه اكتر من خمسه فنانين..ونحن ما سمعنا ولا واحد..شفت الغربه دى؟؟


شكرا لدخولكم ..وانفعالكم بنص عاجبنى..

وارجو الا تكونوا قد دخلتم هنا بدافع "الارهاب" والشلليه..وجابكم النص

هاهاها..

نجلاء
القمر الذى يضى ويدلنا على الرايحه رغم الدرب الذى دخل المويه
قصاصت اتر الفرح
لها منى التحيه الحميمه والشوق لرؤياها
كنا نلتقى وفى مره قالت هذا النص وهو معى منذ زمن بعيييييد
لحنت منه جزء وغناه كورال الاحفاد
لك التحيه يا شفيفه
ادعوا الله بان يحفظك
وشكرا تماضر

شكرا ياحمزه يا فنان..

وياريت نسمع لحنك واداء الكورال ليه، ممكن؟؟

استاذ حمزة ؟ ياخى سلامات وكل سنة وانت والعائلة طيبين . ياقيت الباب ما جديدة عليك ولازال احساسك بها طازج . انت فنان وهذه اسرار , لو سمحت ممكن تسمع ناس تماضر والبقية الحبيبة لحنك لجزء من القصيدة ؟ يا ريت واتمنى انو ما تكون منزعج من انو القصيدة بغنيها اكتر من فنان . عنى قلت لهم مرارا القصيدة مرقت منى لمن كتبتها وكل واحد حاسى انو الصيدة تورت عليهو مزاج لحنى ما فليكن , هل اتوق الى الحرية واحجر على قصيدة يشتهيها لحن ؟ لصالح من سيكون ذلك ؟

الاستاذ الموصلى : انت لو عارف قدر شنو بحب مزيكتك ما كان اوغلت كده فى الانطراب لتاقيت الباب . اول مرة افرح لانى كتبت حاجة . اول مرة القى بنفسى الى سعادات حضور الشعر واتجاهل نداءاته الجارحة . الله يخلييييييك .تانى مرة يا استاذ لانو رسلت ليك السؤال ده فى الميل : اين استقر السهم الطائش ؟

نجلاء لا شك انك شاعرة
ولك صوتك الخاص والمتميز

هنالك ملاحظات سنتناقش حولها بالماسنجر حتى لا نزحم الناس بنقاش الشاعرات والشعراء

عندي طلب بسيط

هل يمكن ان تعطينا ملخص بسيط عن حياتك

ارقدي عافية

المشاء

العزيز اسامة الخواض :سلامات .انتظر محادثتك على الماسنجر لنتبادل الرؤى والافكار .اتفهم طلبك معرفة المزيد عن شخصى وهذا قصور تسببت فيه باهمالى لادراج معلومات كافية فى البروفايل . اعدك انى ساقوم بمعالجة الامر حالاً . لكنى اتصور ان ما ترغب فى معرفته ليس خاضعا لترتيب السيرة الذاتية وحشدها فى اسطر محدودة على الاقل بالنسبة لى اذ ان انجازاتى الملموسة ( من النوع الذى يدرج فى السيرة الذاتية ) جدا ضئيل فحتى الان لم انشر اية مجموعة وهذا حديث اخر لا وقت له الان . المشكلة فى هذا البورد انه لا وقت فيه لاى شىء وكلما وجدت فى نفسى ميل للاسترسال يقمعنى الوقت وضيق اظنه عائد لطبيعة المنبر و مع ذلك لا مدى لفرحى بلقائكم فيه وبنشر بعض اعمالى ايضا .شكرا

العزيزة نجلاء التوم،،
مرحبا بك معنا في المنبر الوطن.. وارجو ألا تتسبب طبيعة المنبر حسب ما ذكرت سابقا في عدم اطلالتك هنا..
الحبيبة تماضر..
لك الشكر وانت تجلبين لنا الجمال والورود..
ولنعمل جميعا من أجل واقع أفضل في المنبر..

شفتي يا طمطم
بهرتني البت دي لمن نشر ليها سمبتيكو في البورد قبل اكتر من سنة
هي وهالة عبد الله خليل
هسي قدر ما القى اسمها في حتة
عيني تجري عليها

بالمناسبة قدرت ما فتشت لبوست سمبتيكو قلت اختو هنا ما لقيت ليه اثر

ديل بنات مدهشات
ميرفت
اشراقة
نجلاء
ليلي بت الدامر
ايمان احمد
وغيرهن
جيل يا تماضر جيل
طلع ونحن في كهوفنا ما جايبين خبر
بس البركة في البورد وبكري ابو بكر

اشهد الله ياتماضر باننى....

قد

طربت

ومسنى

شيئ

من


جنونها

نجلاء

العزيزات مريم الطيب ورجاء والجندرية : انا ابتديت اخجل , يا شباب والله انتو الجميلين ويا جندرية كويس انك فتحتى الموضوع بتاع الكتابة والجندر انا رايى نهتم بمبادرة الاخ اسامة الخواض فى طرحه الجاد والذى يتطلب تناول مختلف ومتعمق للامر . عنوانى البريدى فى البروفايل لو حابين نتراسل .شكرا

رجاء وشتات : ارى ان الكتابة اخذتنا من تلابيبنا والقت بنا الى هذه الورطة : ان تكون محاطا بالحب دون ان تعرف ما الذى عليك فعله حيال ذلك . انا فقيرة الى هذه المعرفة ومرتبكة كون نصوصى تملك الجراة لاختراق مناطق داخلكم ليس بوسعى ابدا وانا خارج الشعر المجازفة بالاقتراب منها . شكرا

جازفى
الناس دى كلها عايشه مجازفه (كما يقال فى الرندوق)
تعرفى يا تماضر انو انا ونجلاء اهل وجدآ كمان
عشان ما تقولو براكم اسرة فنانين
و تماضر بتجازف بالمسرح...ومعها الاخريات/الاخرين بمحاولات جعل الارض مكان اكثر جمالآ...لذا لا يحبهم/ن من خلا قلوبهم من الجمال...الموصلى يجازف بالموسيقي وبكرى ابوبكر بفتح منبر كهذا..وتمبس بالاغنيات اللطيفه وابوامنه باسبوع الشعر ومعظمنا بالاحتفاء ببطولة الاستاذ محمود..او الجريفاوى بسربعات تحيي البسمه التعبى قليلا..او..او..
الحياه مشروع يستحق المجازفه لجعله افضل
يا نجلاء بت النعمه

نجلاء
اخترقت حلمنا بنص .. فاجاتنالحظة ان شردت منا كل الالحان الممكنة.. فيأتنا تحت ظل التخفى والتجلى والابهار ... كل الكلام عنك قليل .. ارفع قبعتى احتراما وانحنى لنص اتنفسه لحظة بعد الاخرى واشهق
شاك

الخ شاك ,
شاك انا والله ممتنة كتير . شكرا

عصام جبر الله
والله بركة فى الشوفة , تعازى ّ والعائلة فيمن لا عزاء فى الدنيا جدير بقسوة غيابه . شكرا لانك هنا واحساسى انو اهل الحوش كلهم اهلى اتعزز بيك جد . ما شفت فرح امى وبت التوم لمن قت ليهم عصام راسلنى فى الانترنت او " الخرابة ده " على حد قولهم . المهم انت كيف؟ الشباب ديل حابين يسمعوا صوتك فى التلفون , حاول شوف ليك قروش تلفون من اى حتة وسلم . الرقم عندك فى الماسنجر حق البورد . شكرا لتماضر لانها اتسببت فى هذا اللقاء المودرن . خليك دايما قريب .

نجلاء العزيزة
طبعاً بوست اسامة ما قصرنا وصلنا ولسة لينا رجعات
نتوقع مشاركتك هناك
مشيت البروفايل لانه فعلاً محتاج للتواصل
لقيتو خلا
فااااااااااااضي

بس عنواني اهو
[email protected]

العزيزة الجندرية
لك كل الود.موضوع اسامة ده لازمو كلام كتير.ارجو ان نتواصل0 ايميلي [email protected]
مع محبتي

up

تماضر .. اقحوانة البورد

هي كتّاية كتابة نصاح!!
شكرا لهداياك الديمة جميلة دي
ومبروكة علينا نجلاء

شكرا يا ميرقت..

زيارتك..لها وقع خاص..على قلبى،

هى تعنى انك "غفرت" لنا..انسحاب ليلى من المشهد...

وانك تحبين معنا نجلاء..

فشعرها كشعرك وليلى: بذات الادهاش والايلام..


وشكرا لكل ضيوف نجلاء ..هنا..

الحزن ، يا تماضر ، لا نهاية لمشهديته في الدواخل
بس الحياة بتمشي ، صاح
وكل يوم بتمدّنا بعناصر الدهشة الجميلة
لو الدهشة دي بقت مافي ، الحياة بتقيف
انعدام الدهشة ، بس ، هو ما يعني لي أن الموت أقوى مننا
وطالما ليلى تركت لنا حصّتها مما يدهشنا
فهي حية ترزق بيننا
أما نجلاء ،، فهي واحدة من ( عناصر الدهشة الجميلة) ال قاعدة
تمدنا بيها الحياة .. وبالخصوص :الحياة السودانية ـ القالوا ماتت من زمان ـ
فعلا عاجبني شعر نجلاء . فعلاً بحبه
وتسلمي يا اقحوانة

فوووووق
ندى

اي والله يا تما ضر كتابة وصادقة وقريبةمن القلب ، وهكذا دائما الكلمة لمن تجي من انسانة تحمل صفة الانوثة ، كمان انتي يا تماضر ما هينة ، لانكدائمابتقيفي وتنحازي لبنات جنسك بدون حسد ولا ولا غيرة بل بكل الاعجاب والاحترام تناصري وتشجعي المبدعات ، .
قريت بوست قبل فترة فيه الكثير من التساؤل حول لماذا هي تماضر تاخذ اكثر من حيز في البورد ؟؟؟ ليتهم يعرفون ان سر هذا التفوق والالق والجازبية التى تميز تماضر هي قربها من الاخرين ودفن همها مع همهم ، اسفةلاقحام هذا الكلام لكنه يموج في صدري فكم واحد منا يستطيع ان يقدم غيره او غيرها وبكل هذا الفرح .
ويا نجلا انتي كتابة .

بت فاطنة

ميرفت ، ندى ، عشة وطبعا تماضر ... الله يسلم قلوبكن الخدرا.

UP

نجلاء التوم

هل قراتى اكثر من مرة فى برنامج اصوات وانامل



غاتو لو دى انت كنت رايحة وفتشت عنك فى القرى النائية وبعيدة



وما عارف لقيتك ولا قربتا

الاخ محمد : لم اكن ابداً من ضمن المشاركين فى اصوات وانامل ، اتامل الا يكون ذلك مدعاة لخيبة امل . عموا ها نحن نلتقى فى حوش بكرى الرحيب والله لا جاب الروحة تانى . شكرا على سؤالك عنى .

والله قريت ليها فى البداية فى موقع الاخ المهندس
هوارى حمدان هجو الغابة والصحراء ولمن مشيت السودان
اصحابى كلهم شابكنى تاكيت الباب تاكيت الباب وجيت قريتا ياخى دى علاقة بتفاصيل مدهشة ونمنمة خطيرة
هللويا

**

عمرى كله أستاذه / تماضر ، قايل (الحريم ديل) هم سبب الجن ، لكن ان تكون امراة مجنونه للدرجة دى ... يا حليلك يا الكحلاوى.

up

"ودقايق الروح المتراوحات"
it's an exquisite poem ya Najla, i have a very old poem for you that i printed out a few years back -can't remember from where- but today after reading Telal's article the name sounded familiar so i dig out the old one and what was so striking to me is how it's a different style, both poems are by all means strong this one being mellower and so sweet
one verse stuck with me until now although i don't have the poem's name
" فى كل مرة يبدأ العد من الجرح"
i can type it but it will take forever as i'm using the board's clicking method

wanted to add my voice to Telal's and the rest of the list.
Rabana yahfazik and please keep on going you are beautiful .

Now, this is really beautiful, and the Sudanese girls and boys are really surprising. Good luck

زمراوى

الجندرية

تاج السر

عصام جبرالله

الن

نصر

كل التحايا..بالنيابة عن الشاعرة ..ولنبحث عنها سويا..فهى تسجل غياب غير مفهوم...وانا افتقدها كثيرا.