Post: #1
Title: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 04:04 PM
Parent: #0
العزيزة تماضر
شريط مسلسل وادي ام سدر معاي
ما زغت بيهو-لكن نسيت أرجعو ليك
خليتيهو في الفيديو كاسيت-إكتشفت دة الليلة الصباح
لجميع اخواتي وإخواني بالبورد
عايزة اشرككم معاي بالفرجة لو سمحتوا
قعدت ساعتين متواصلتين وما قدرت أزح-قبال يكمل
وإستمتعت أيما إستمتاع
خليكم معاي- ونواصل
حنينة
|
Post: #2
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 07-15-2003, 04:06 PM
Parent: #1
حنينة
شكرا على "الاعتراف" اتفرجى ورجعى
العنوان معاك
لك الود
|
Post: #3
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 04:19 PM
Parent: #2
الفنانة الرقيقة تماضر
صباحك خير
نحنا صبحنا قبيييل وكملنا الشريط
برجعوا ليك-إنشاء الله- نسخة أمريكية
المسلسل عجبني شديد-حأشرك الجميع في الفرجة
وإن غلطت في شئ-- اها عليكي تصلحي
إتفقنا؟
نواصل
|
Post: #4
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 07-15-2003, 04:21 PM
Parent: #2
ها يا حنينه
لي قدام
وادي ام سدر
مليان ..مليان ..بس كيف نشوف
اسعفونا يا حنينه ويا تماضر ...النجده ..
انا غايتو كان ما سألوني برسل عنواني داير لي نسخه
داير نسخه
داير نسخه
|
Post: #5
Title: Re: اعتـــرااااااف--فيديووادي ام سدر--يا تماضر وللـجميـــع
Author: sympatico
Date: 07-15-2003, 04:22 PM
Parent: #2
الاخت حنينة
تحياتي
هذا اعتراف جميل لا يقود الى السجن وانما الى مرافيء ابداع تماضرية
فلتهنأي بالشريط رؤية ومشاهدة واستماعا
الاخت تماضر
كنت طلبت منك بعد رحلة اسبانيا ان تأتينا في البالتوك لتحكي لنا
وعدت
لم تخلفي - لكنها ظروفك ومشاغلك
الآن
هل من امكانية لأن تحققي رغبة كثير من معجبي فنك
ورغبة كثير ممن لم يرونك تؤدين
في ان تخصصي لنا يوما في البالتوك ومعك شريط الفيديو وكاميرا لنرى بعض ابداعاتك
ولك بعد ذلك ان تضيفي
مشاهد جديدة
نشاط فرقة البراعم
ستكون ليلة جميلة
ولتكن في عطلة الاسبوع
لن نحدد لك يوما معينا
بل انت حددي اليوم
يمكن ان تقوم الاخت حنينة بعرض جزء من الشريط اذا لم تكن لديك نسخة اخرى
هي دعوة لمشاهدة تماضر
لا اظنك ستبخلين على معجبيك واحبائك في المنتدي
هل ستضنين ؟
|
Post: #6
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 04:41 PM
Parent: #5
تمبس الفنان
هو ملان ساكت-ده مدفق إبداع
ما أتيحت لي الفرصةأشوفه لما إتعرض في التلفزيون بحكم أشياء كثيرة
الشريط العندي من الحلقة الرابعة-السادسة
تماضر عندها البقية علي ما أظن
ال3 حلقات دي سمروني جنب الشاشة
أصبر لي لما ابتدي الحكي
تسلم
|
Post: #8
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 04:53 PM
Parent: #6
sympatico
تحياتي
استمعت شديد والله-الشريط قديم لكن الموضوع والتمثيل وووو
يشدك غصب عنك
عن البالتوك-تماضر ترد-
بس عايزة جهابزة التكنلوجيا في البورد يساعدوني في التنزيلات وكدة
وتدوني خبر قبلهاللإستعداد
والباص وورد ماجاني لغاية حسع-رغم سالت عنه من6 أسابيع
لكن بتتحل
تحياتي
|
Post: #7
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 07-15-2003, 04:50 PM
Parent: #5
يا سمبتيكو
البالتوكهو الغدر بى ما انا الغدرت بيكم
اسفى
الشريط لوفى زول بعرف ينزل منه اجزاء فى المنتدى انا ما عندى مانع
لكن طبعا الصفة التجارية ممنوعة وغير مشروعة لانه من انتاج التلفزيون السودانى وفى حاجات كيرة بتتعلق بحقوق الاخرين لازم تتخت فى الاعتبار
انا ذكرت فى بوست لندن انه فى شريط اتسجل ن النادى السودانى لاعمالى القدمتها هناك وهو جاهز للتسويق
عايزة اضيف ليه مادة من الاعمال الاتقدمت فى امريكا حتى يجىء متنوعا وجذابا
وحأعلن عنه قريب هنا فى المنتدى للبيع
معليش حكاية البيع دى لكن اظنها احسن وسائل نشر الشريط خصوصا اذا ختينا فى الاعتبار الصرف المادى البتتطلبه مثل هذه الاشياءات
حلوة اشياءات دى
عموما شكرا للاهتمام
تمبس وحنينة والجميع
ويا تمبس استنى لى
|
Post: #9
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 07-15-2003, 05:06 PM
Parent: #7
ههههههههههه ياتماضر
غايتو شوفي ليك زول يستني ليك غيري ..غايتو الشريط ده علاقتي معاهو غريبه جداوناس التلفزيون ما قدرته اطلعوا منهم اتاريك نايمه بيهو وكاتله حيلك ..ياخ ده عمل غريب جدا بمستوي حاجت كتيرة في تاريخ الدراما السودانية وتوثيق لي جيل خرافي جدا ..غايتو انا بتذكر فيهو بي طريقتي الخاصة
وما زلت مصر علي الصلبطه والنسخة ..اها بتاعت القروش دي لما تجي يحلها ربنا
يا حنينة ..اعترفي .ّّتاني مصبنه شنوووو؟؟
|
Post: #10
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 05:15 PM
Parent: #9
تمبس
ابدآ والله-ما عندي شئ تاني
غير شريطين كاسيت نستهم تماضر برضو في العربية
وديل زاراني فيهم شديد
وبرضو برجعهم
تري إنت عارف وادي ام سدر-خلاص تم لينا الناقص مع تماضر
إتفقنا؟
نبدأ
|
Post: #11
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 07-15-2003, 05:22 PM
Parent: #10
ما شريطين
تلاتة
ساورا
شباب الفين
وخليل اسماعيل
|
Post: #12
Title: Re: اعتـــرااااااف--فيديووادي ام سدر--يا تماضر وللـجميـــع
Author: sympatico
Date: 07-15-2003, 05:24 PM
Parent: #9
الاخت حنينة
اذا كنت تسألين عن تنزيل برنامج البالتوك فيمكنك تحميله من الرابط التالي
http://www.paltalk.com/paltalk10/download/download.htm
وهذا رابط التسجيل
http://www.paltalk.com/paltalk10/index.htm
وبعد التحميل سيطلب منك التسجيل حيث تختارين اسما وكلمة سر الخ
بعدها يمكن الدخول الى الغرف السودانية وهي عادة ما تكون في فئة الشرق الاوسط وستجدي اسماء الغرف السودانية مربوطة بكلمة السودان في مشتقاتها المختلفة لسهولة الوصول اليها
وكل ما تحتاجين بعدذلك هو تهيئة المايك والسماعات واذا كانت لديك كاميرا فيمكنك توجيهها نحو جهاز العرض لعرض جزء من شريط الفيديو
او بالصوت فقط اذا لم تكن لديك كاميرا
-----
الاستاذة تماضر
ما عاش من يغدر بيك حتى لو كان البالتوك
معقول البالتوك يغدر وفيهو الوافر البعطر ليالينا كل يوم باغانيهو الجميلة ؟
نسقي مع حنينية واتوكلي على الله وفي انتظار
SHAMAR
|
Post: #13
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 07-15-2003, 05:34 PM
Parent: #12
shamar_5_1
كدى اضيفنى ليك امكن اعرف ادخل تانى
ويا حنينة احمد جاويش
برضو
الشرايط دى كترت مالها؟؟
|
Post: #14
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 05:55 PM
Parent: #12
مسلسل وادي ام سدر
أنتج عام 1985 وعرض في تلفزيون السودان-العصر الزهبي للتمثيل والإبداع
مثلت به مجموعة من صفوة الممثلين المبدعين
من بوردنا-تماضر شيخ الدين و الأستاذ يحي فضل الله
الممثلين حسب ترتيب ظهورهم في تترالفيديو(بالضبط حتي لا نجور علي حق أحد) كالآتي
البطولة:
أنور محمد عثمان
فايزة عمسيب
عوض صديق( رحمه الله
بلقيس عوض
مني الطاهر--الفرهيد
عبد العزيز العميري(رحمه الله) ---أحمد
تماضر شيخ الدين --- تم الريد
مريم محمد الطيب
أحمد البكري
يحي فضل الله
عبد العظيم قمش
حاكم سلمان
الريح عبد القادر
وتمثيل آخرين-لا يسع المجال لذكرهم كلهم
التأليف: محمد خوجلي مصطفي
موسيقي والحان:محمدآدم المنصوري
غناء و دوبيت
المبدع المرحوم:عميري
إخراج: الشفيع إبراهيم
في إبداع أكتر من كدة
نواصل
|
Post: #15
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 06:04 PM
Parent: #14
تماضر يا غالية
خلي الصلبطة
شرايطك دي مالها حصل ليها تضخم اقتصادي زي الجنيه السوداني
لوول
خليك معاي في المسلسل-حقك بصلك
يلا إيديك معاي-يا حبيبة البي
علي قول شيري
واصلي
|
Post: #16
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 06:27 PM
Parent: #15
المسلسل عن وادي ام سدر الذي تسكنه مجموعات من البدو الرحل-القصة
تدور في ايام الجفاف الشهيرة التي ضربت السودان وافريقيا بين الاعوام
1984 -1985
وتأثيرها علي هؤلاء الرحل-ومواشيهم وطبعآ الكلأ والماء
لكنهاتنفع ان تكون لكل زمان ومكان
الوادي قبلها كان يغشاه المطر المدرار
وكان خصبآمملؤآ بالزروع
والمواشي ممتلئة الضروع
تبدل الحال -فدوام الحال من المحال
أصاب الوادي الجدب وغطته الرمال والحصي
أصبحت العيشة صعبة وقاسية-فما هو الحل؟
نواصل
|
Post: #17
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 07:41 PM
Parent: #16
آآآآخ
كتبت وكتبت وكتبت
وفجأة حصل disconnection
كلو راح- لازم نبدأ من جديد
الكلام زاتو طار
اواصل
|
Post: #18
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 08:12 PM
Parent: #17
اهل ام سدر ما عارفين يسوا شنو
كل البوادي أصابها القحط والجفاف يمشوا وين؟
معرضين للجوع والعطش والموت
مافي حل غير النزوح-لكن لي وين؟
للبندر الما متعودين علي عيشتوا و ما ماخدين علي ناسوا-وكيف العيشة هناك؟
الوادي قعدوا فيهو زمن طويل اتعودوا عليهو
الفراق صعب
واصعب علي المحبين؟منو هم؟
قصة حب رقيقة-نظيفة بين
أحمد(عميري) و
والفرهيد(مني الطاهر)و
نواصل
|
Post: #19
Title: Re: اعتـــرااااااف--فيديووادي ام سدر--يا تماضر وللـجميـــع
Author: sympatico
Date: 07-15-2003, 08:17 PM
Parent: #18
الاخت الاستاذة تماضر
انتي غيرتي اسمك ولا شنو؟
Quote:
shamar_5_1
كدى اضيفنى ليك امكن اعرف ادخل تانى
|
انا عامل اضافة لي
shamar_6_1
|
Post: #20
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 07-15-2003, 08:23 PM
Parent: #19
لا داك معصلج
عملت دة جديد
|
Post: #21
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 08:25 PM
Parent: #19
sympatico
اضيفني برضو
haneena1
تشكر
|
Post: #22
Title: Re: اعتـــرااااااف--فيديووادي ام سدر--يا تماضر وللـجميـــع
Author: sympatico
Date: 07-15-2003, 08:33 PM
Parent: #21
الاخت تماضر
الاخت حنينية
عملتا ليكم اضافة
اعملوا اضافة ل
sanaric
|
Post: #23
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 08:39 PM
Parent: #21
نرجع
من أجمل ما شفت في المسلسل هو مشاركة هؤلاء البدو في لقطات حية
واضح إنها كانت لقطات معاشة حقيقية-يعني من غير تمثيل
رغم مشاركة تماضر وغيرهامعهم
خاصة منظر تفكيك الخيام عند الرحول
بتتزكري دي يا تماضر؟؟
مناظر الحياة اليومية بتاعتهم بتفاصيلها
اطفال علي ظهر حمير او بيساعدوا الامهات
عجائز يقومون باعمال يدوية
مشاهد تحس فيها بالصدق-ولحظتها يفوت عليك انو دة مسلسل
وتبدأ أنت بالتعاطف مع الناس دي
نواصل
|
Post: #24
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-15-2003, 09:00 PM
Parent: #23
من اكترالحاجات الضحكتني
منظر تماضر وهي راكبة الحمار
وقال إيه-بتعرعر كمان
دى من عر-بفتح العين وتسكين الراء
الما بعرفو عر -دي بنهزو بيها الحمار
وكان ما بتعرفوا ينهزوا
يبقي محتاجين معجم سوداني
نهايتو-والله حلاتها تماضر وهي راكبة الحمار
وكانت سغنتوتة-عمرآ وحجمآ
وبراءة الاطفال في عينيها
سبحان الله-زمن
نواصل
|
Post: #25
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-16-2003, 01:55 AM
نواصل
من اكثر ما شد اهتمامي ما شدابه عميري من دوبيت
في غزل محبوبته الفرهيد قال
المتل فر البرق بسيمها
تليفتآ عليها دلق سحاب رزيمها
دي المنقسمة وا قسمي من قسيمها
تمعن في الوصف-لابد انه من شاعر من فحول البطانة
يعطيك دقيق الوصف في كلمات بسيطة من عمق البيئة
ولنتابع تأثير تغييرالبيئة والجفاف علي ما يليه من دوبيت
اواصل
|
Post: #26
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 07-16-2003, 09:42 AM
Parent: #25
نطلع بي أغنية وبنجي راجعين
|
Post: #27
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-16-2003, 12:48 PM
Parent: #26
تمبس
يا فنان
تشكر -البوست بقي صوت وصورة
في الإنتظار
تسلم
حنينة
|
Post: #28
Title: Re: اعتـــرااااااف--فيديووادي ام سدر--يا تماضر وللـجميـــع
Author: جدو
Date: 07-16-2003, 02:17 PM
Parent: #27
يا سلام عليك يا حنينة
ويا سلام عليك تماضر
وادي ام سدر
هذا المسلسل الذي فتننا ونحن صغار
لا نفهم اغلب ايحاءاته وان كنا نستمتع
بمتابعة ابطاله ...فترانا متحلقين حول التلفزيون الوحيد
في قريتنا ..نتابع الفرهيد وتم الريد والنديانة
واحمد ...المبدع الفنان المتكامل (العميري) له الرحمة
وتم الريد تسمع دقات قلب الفرهيد وهو يردد
احمد جا ....احمد جا
واحمد هنا بتحريك الحاء والميم بالفتح
وليس بتسكين الحاء كما ننطقها نحن
والله كان لقينا لينا لمة في الشرايط دي
تمبس ما تجي نعمل ابو القاسم
|
Post: #29
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-16-2003, 02:30 PM
Parent: #27
نواصل
من ملاحظاتي هي تغيير اللغة وتغير النظرة التفاؤلية في دوبيت أحمد(عميري)
قبل وبعد تصحر واديهم
عندما طلب منه صديقه(حاتم مصطفي) أن يدوبت من شعر جده-ايام الرخاء
قال الآتي:
الليلة البرق لا سافل أمسي يرحل
و عم فوق دكة من الرديس متوحل
السبب الخلة الجسم منو اللحم متنحل
بسمات المدغس للقموم متكحل
أردفها بقوله (هسع بقينا في شحتة و طلب إعانة و حالنا بقي كدة) و
الليلة البرق لازاتو لمسة يكتح
عقبان السيد يجود يمكن عيونا تفتح
الحمرية في طرف الصديرة تلتح
ما أبلغه من وصف!
نواصل
|
Post: #30
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-16-2003, 02:52 PM
Parent: #29
جدو
مرحب بيك بعد غيبة
غيب و تعال-تسلم إنت والله
بالله شوفتو في وقتها-بختك والله
فعلآ المسلسل بيشدك للآخر -مع إنو بادي معاي من الحلقة الرابعة
طبعآ أداء مدهش للغاية
و حاجة تزعل إنو كان عندنا ممثلين بالمستوي دة
لكن وينهم هسع؟
منهم من تزكره ربي رحمة به- والآخرين مشتتين في كل أركان الكرة الأرضية
أما القاعدين لسة في السودان،فحدث و لاحرج
قهر مادي ومعنوي-عايشين تحت مستوي الفقر بكثيييير
بلد ما بتعرف تكرم مبدعيها--نقول إيه تاني؟
ايوة تمام
عليك الله إتحالف مع تمبس
وكان وريتونا تكنلوجيا التنزيل ننزل ليكم منو
تسلم
حنينة
|
Post: #31
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-16-2003, 10:08 PM
Parent: #30
نواصل
ليلة الرحيل من الوادي
الفرهيد -حزينة,شاردة و ساهمة, تنهمر دموعها تبلل جفاف الوادي
تنتظر أحمد الذي ذهب إلي البندرعشان يلقط رزقه
تخاف أن يأتي بعد رحيلهم-وعندها لن يعرف لها دربآ
تسألها أمها-بلقيس عوض- بشفقة الأم عن سبب بكاؤها
الفرهيد: مبكيني فراق الوادي يمة
الأم: فراق الوادي يا بنية ما بمطر الوشي بالدموع
الفرهيد: شنو يا يمة البمطر الوشي بالدموع عاد؟
الأم:فراق راحة البال يا بنية
الفرهيد:راحة البال تاني وين يمة, في ام سدر و لا واديآ آخر؟
الأم: وادي ام سدر يا بنيتي ما بريح البال كان ما جاهو شوفآ يبل عفاره
هنا تبوح الفرهيد بأنها في إنتظار احمد وتخاف أن تفقده بعد الرحيل
و جافاها النوم
نواصل
|
Post: #32
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 07-17-2003, 12:10 PM
Parent: #31
د.جدو
معاك في ابوالقاسم ..بس كدي نلقا لينا طريقه في الاشرطه القاعده تتنسي دي
متابع معاك يا حنينة
Quote: الفرهيد: مبكيني فراق الوادي يمة
الأم: فراق الوادي يا بنية ما بمطر الوشي بالدموع
الفرهيد: شنو يا يمة البمطر الوشي بالدموع عاد؟
الأم:فراق راحة البال يا بنية |
هنا في حاجات سودانيه جميلة جدا
وين ناس الوادي الفي البورد ديل ؟؟؟؟
|
Post: #33
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-17-2003, 04:31 PM
Parent: #32
نواصل
في هذه الأثناء وبينما الفريق يستعد للنزوح-مشهد للعميري(احمد) مع صديقه الذي يعيش في البندرالكردي(حاتم مصطفي) تحت راكوابة متواضعة قاعدين في عناقريب متهالكة- بيت جالوص و شوية سعف ،هذا هو بيت الكردي في اطراف البندر
اليس هو حال النازحين في بلادي؟اليس مكانهم السكن العشوائي في اطراف المدن الأسمنتية؟
الكردي نزح للبندر وراء لقمة العيش بعد موت البهائم والجفاف
الحوار
الكردي:أختا البندر يا خوي--بفتح الالف والتاء و الخاء
دة لا بيسترلو حال ولا بيريحلو بال
ومحنوا اكتر من سبيب الراس
ويتكلم عن نساء الوادي النزحو للبندر
العميري: عملوا شحادات !!؟؟
الكردي: اريتن كان شحادات بس -ديل(إتقمحن في شبابن) والواحدة تعاين ليها تتغابي فيك العرفة
هنا يصاب احمد بالقلق ويسرع بالقيام ليلحق بفريق الفرهيد قبل الرحيل وحديث الكردي يطن ويطن في أذنيه
نواصل
|
Post: #34
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-18-2003, 11:49 AM
Parent: #33
تسلم يا تمبس
الحوار فيهو كلام عميق شديد
ودة اكتر شئ شداني للمتابعة
اما عن ناس الوادي البتسأل عنهم
اقول القدم ليهو رافع ياخوي
ونواصل
|
Post: #35
Title: Re: اعتـــرااااااف--فيديووادي ام سدر--يا تماضر وللـجميـــع
Author: عشة بت فاطنة
Date: 07-18-2003, 03:35 PM
Parent: #1
يالله يا حنينة ويا تماضر من وادي ام سدر والعميري وتماضر يا ريت كنت معاكم لرؤية هذالشريط وابقو عليهو عشرة تفزيون السودان الله اعلم اقدر هذه الاشياء ، تماضر امانة نسخة من غير حقوق مالية وانشا الله نتلاقى ، انا ما اشتغلت معاكم في وادي ام سدر لكن لا انسى ايامكم وذكرياتكم فيها كل المجموعة والعميري خاصة ، واسقيك نداك اسقيك نداك يا حنينة زي ما رويتينا من هذا المنهل العذب .
|
Post: #36
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-18-2003, 11:12 PM
Parent: #35
الفنانة عشة بت فاطنة
سعيدة كل السعادة بطلتك علينا في البوست
وكلامكم دة البديني دفعة للإستمرار
المسلسل انا باعتبره علامة لا يمكن تجاوزها في تاريخ الدراماالسودانية
وما عارفة عد كدة كيف بالساهل
بحييك وبحيي فيك كل فنانات بلدي الما لاقين حقهم كامل
لكن إنشاء الله الحق برجع وبنتلم في سودانا الجديد والكل راسو مرفوعة
وفنانينا في المقدمة
أما عن دعوتك السمحة الدبل دي
آآآآمييييييييييين
سلمتي
حنينة
|
Post: #37
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-19-2003, 01:03 PM
Parent: #36
نواصل
عميري يغادر البندر في طريقه لوادي ام سدر يحاول ان يلحق بفريق الفرهيد قبل ان يغادر
ليستقر بالبندر
يتملكه القلق مما سمع من صديقه الكردي عن تغير سلوك بنات الوادي في البندر تحت ضغوط الحاجة و العوز
و هذا هو النزوح اخوتي, تتفرق وتتشتت نظم إجتماعية
تتخلخل مجتمعاتهم,وتتضطر الفضيلة للإنزواء إضطرارآ
يواصل أحمد دوبيته وهو علي ظهر ناقته في صحراء جدباء بلا نهاية
يشكي حالهم و يصف حزنه لما آل إليه حال واديهم-
الوادي المكرب كربو
انا بريد ناسو ودباسو و عرضو
السبب المرض قلبي و خربو
ندر مالو و بهايمو و عرضو
ويقول في الفرهيد-
كل ما اشوف لي برريبا افيد ويريد فيني
أشرع في النمين من حيني
الزول الساكن عقلي و الشاقيني
منو بقيت اعاكس ضلي لا يباريني
ها رأيتم شعر بسيط وبليغ زي دة- الزول الساكن عقلي و الشاقيني منو بقيت اعاكس ضلي لا يباريني
نواصل
|
Post: #38
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 07-20-2003, 12:31 PM
Parent: #37
**
نواصل
|
Post: #39
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-20-2003, 11:01 PM
Parent: #38
نواصل-بعيدآعن السياسة
بينمااحمد في طريقه للوادي يحاول ان يلحق بفريق الفرهيد
يدور المشهد التالي في ليلة الرحيل ( ونسة بنات) بين الفرهيد ،تم الريد و النديانة, الفرهيد يبدو عليها الهم و الشرود من تأخر وصول أحمد للوادي قبل نزوحهم
تم الريد: اها يا النديانة,زولتك عقلها لملم وقام
النديانة: هوي يابت ها الفرهيد بت حماد
تم الريد: وكتين عقلك سرح في الوديان كايس لي مكان ليمو, خليهو يغشي وادي ام سدر يشوف لي علي (محبوب تم الريد) في الليل الضلمة دة(وتضحك باستخفاف)و
الفرهيد:علي مبيتو ماهو معروف وانتي تضحكي متل المافي شئ يا ام قلبآ ميت؟
تم الريد:يعني دايرات قلبي يسرح يومو كلو بالوديان ويعوم في السراب؟
الفرهيد:القلبو بريد ياختي,عمرو ما عام لو في سراب و لاخاض في هاب
النديانة :كلاااااام يا واحد اللة-وتلتفت لتم الريد:شوفو الريدة عند الناس يا أم ريدتن مايلة
تم الريد:يعني ديراني اسوي لي جنحين واطير فررر كدي وأرك عندو؟
الفرهيد:اريتني لو كان لقيت لي جنحين ياختي,كنت
افضيهم في قعيدتك دي وفررر حلقت في السماء
تم الريد: في الضلمة الكاسية الوديان دى؟
الفرهيد: وفي ضلمة منعتلها طيران ياختي؟
النديانة: وبتشوفي الدرب كيفن يا الفرهيد؟
الفرهيد: بشوف القلب ياختي ما بتشوف العين
هنا تقوم تم الريد وتحثهم للذهاب للنوم حيث سيتحركون صباحآ
نواصل
|
Post: #40
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-23-2003, 01:12 PM
Parent: #39
ح اواصل
تستحق يا وادي ام سدر
يا معلم الصبر
حنينة
|
Post: #41
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-26-2003, 02:52 AM
Parent: #40
عشة بت فاطنة
بمناسبة سفرك للسودان
امانة في زمتك كان ما مشيتي ناس التلفزيون وقلعتلينا المسلسل دة
بالكامل
هم صحي يمكن ما بعرفوا قيمته
عشان كدة دايرينوا نحنا ديل البنعرفها
امانة- امانة -امانة
وتمشي وتجي بالسلامة
|
Post: #42
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 07-26-2003, 11:35 PM
Parent: #41
نواصل قريبآ
|
Post: #43
Title: Re: اعتـــرااااااف--فيديووادي ام سدر--يا تماضر وللـجميـــع
Author: قرنفل
Date: 11-21-2003, 03:13 AM
Parent: #42
haneena سلام
سوف نواصل معك
لان هذا المسلسل فيه ابداع و كل الشخصيات قدمت الجميل
|
Post: #44
Title: Re: اعتـــرااااااف--فيديووادي ام سدر--يا تماضر وللـجميـــع
Author: أم سهى
Date: 11-21-2003, 03:39 AM
Parent: #1
تحياتي العظيمة لكم يا ناس تماضر وحنينة وتمبس - وانا بقرأ في البوست دة بتذكر بالحتة تفاصيل المسلسل الرهيب دة والله العظيم ما ابالغ لو قلت ليكم حتى نبرة (تم الريد )والنديانة في اضاني كاني بسمعها الان
يا حليل زمنا جميل بالحيل وناسا رائعة بالحيل - وحتما سيعود الفرح لينا ونغني انشودة الحب مع بعض وناس تماضر يرجعوا المسرح ونحن نجي المسرح سرابات ووحدانا نتفرج ونتونس وناكل التسالي ونضحك بدون خوف ونتفرج ونتناقش في الاستراحة البين الفاصل والاخر ونرجع البيت كداري بدون خوف من يلاقونا ناس الطواري او بكاسي الورديات
قولوا امين
|
Post: #45
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 11-21-2003, 03:54 AM
Parent: #44
يا قرنفل
البوست نكته من ويييين
لا حول الله بعد 4 شهور
لكن بيني وبينك المسلسل يستاهل
تسلم اخي
|
Post: #46
Title: Re: اعتـــرااااااف--فيديووادي ام سدر--يا تماضر وللـجميـــع
Author: إيمان أحمد
Date: 11-21-2003, 03:59 AM
Parent: #44
Wow
ده المسلسل الرهيب
بأمانة ما عرفته إلا لما حنينة كتبت تم الريد والفرهيد.
كمان الفنان أنور محمد عثمان تمثيله رائع
I need to know how to join the paltak ya haneeeeeeeeeena
سلام
إيمان
|
Post: #47
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 11-21-2003, 04:12 AM
Parent: #44
Quote: يا حليل زمنا جميل بالحيل وناسا رائعة بالحيل - وحتما سيعود الفرح لينا ونغني انشودة الحب مع بعض وناس تماضر يرجعوا المسرح ونحن نجي المسرح سرابات ووحدانا نتفرج ونتونس وناكل التسالي ونضحك بدون خوف ونتفرج ونتناقش في الاستراحة البين الفاصل والاخر ونرجع البيت كداري بدون خوف من يلاقونا ناس الطواري او بكاسي الورديات
قولوا امين |
آآميييين يا ام سهي
يلا ورينا ذكرياتك الجميلة بالتفصيل عن المسلسل
كلنا آذان صاغية
تشكري يا ستي
|
Post: #48
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 11-21-2003, 05:28 AM
Parent: #47
العزيزة ايمان
فعلا مسلسل جميل وذو مغزي كبير
وين نحنا الليلة من الملسل دة-كلو اسفاف في اسفاف
عن البالتوك
نزليه من الوصلة التالية واختاري اسم لنفسك
http://www.paltalk.com
اتصلي بزولة 123 عشان تضيفك للستة الاعضاء-ردي في غرفتنا في البالتوك
تسلمي يا جميلة
|
Post: #49
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 11-21-2003, 05:36 AM
Parent: #48
يا تمبس
غنية عميري وين الكنت نزلتها اول ما نزل البوست؟؟
أصحي
دي عشة الفلاتية!!!
انت قايلني ناسية؟؟؟
|
Post: #50
Title: Re: اعتـــرااااااف--فيديووادي ام سدر--يا تماضر وللـجميـــع
Author: ahmed saeed
Date: 12-02-2003, 02:41 PM
Parent: #49
haneena سلام تانى جيتك غايتو شبكه
تحية لكل الممثلين فى هذا المسلسل وادى ام سدر
كيف كان يمثل هؤلاء .......ام توقف الابداع التمثيلى عندهم ....ام ماذا حصل
هذه بعض من المسلسل وفى تحضير لقطات فيديو من المسرحية
( اقلبن الحديس .....)
|
Post: #51
Title: Re: اعتـــرااااااف--فيديووادي ام سدر--يا تماضر وللـجميـــع
Author: ahmed saeed
Date: 12-02-2003, 05:45 PM
Parent: #50
اها ودى زيادة
|
Post: #52
Title: Re: اعتـــرااااااف--فيديووادي ام سدر--يا تماضر وللـجميـــع
Author: Tumadir
Date: 12-03-2003, 00:16 AM
Parent: #51
من زمان انا بعاين للبوست دة وازوغ منه
لانى ما عارفه اقول شنو
ولسه
|
Post: #53
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 12-03-2003, 02:43 AM
Parent: #52
يا احمد سعيد
عملتها كيف دي؟؟
دي مفاجآآآآت منك
عارف حقه تعملها مسابقة
شوف الناس حتتعرف علي الشخصيات ولا لا
بس اياك والخرخرة العملوها ناس الرياض
اكلوا علي جايزتي
وبما انك واحد منهم
يا ناس احترسوا
|
Post: #54
Title: Re: اعتـــرااااااف--فيديووادي ام سدر--يا تماضر وللـجميـــع
Author: tmbis
Date: 12-03-2003, 04:35 PM
Parent: #53
صلحناها ليك ياحنينة
كان مكتوب لي في الازل ..اقابلك وابني عليك امل ..
كيف معاك ؟؟
قرنفل .. واصل كفاحك . كمل الحكاية
يا تماضر ..
بلاهي شوف ليك شنا .. زي دي
|
Post: #57
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 12-04-2003, 09:46 PM
Parent: #54
الغنية سمحة يا تمبس
يصلح ليك طريقك ياخوي
|
Post: #56
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 12-04-2003, 07:35 PM
Parent: #53
يا تماضر
لسة؟؟؟
عاد لمتين؟؟؟؟
فهمتيني؟؟؟
|
Post: #59
Title: Re: اعتـــرااااااف--فيديووادي ام سدر--يا تماضر وللـجميـــع
Author: ahmed saeed
Date: 12-05-2003, 05:50 PM
Parent: #53
haneena سلام
تماضر قالت زايقة كيف العمل ....
يا حنينه من الفيديو قمت بحفظ جزء من المسلسل فى الكبيوتر وهذا يتطلب وجود كرت فيديو
متخصص فى نقل الفيديو
لا المسابقة دى اكيد بى جوائزها
منو الممثلين فى المسلسل.....؟؟؟
ومين كاتب المسلسل ...؟؟؟
ومين هو مخرج المسلسل ولنتاج من .....؟؟؟
تماضر شوفى الصور دى تانى المرة دى غيرناها شوية
|
Post: #55
Title: Re: اعتـــرااااااف--فيديووادي ام سدر--يا تماضر وللـجميـــع
Author: nada ali
Date: 12-03-2003, 04:38 PM
Parent: #1
حنييينة،
شكرا لامتاعنا ببعض حلقات هذا المسلسل الجميل، اذكر اننى تابعته حين عرض بالسودان و اعجبنى كثيرا.
و ماعارفينك تانى "مدكنة" شنو؟
احمد سعيد، جبت الصور دى من وين؟
ندى
|
Post: #58
Title: Re: اعتـــرااااااف--فيديووادي ام سدر--يا تماضر وللـجميـــع
Author: haneena
Date: 12-04-2003, 09:59 PM
Parent: #55
ندي
شكرآ ليك..شفتي المسلسل دة مليان معاني كيف؟؟؟؟
وياما في الجراب يا حاوي
يا احمد سعيد
الحوش قشاه سيده
الصور راحت
نزل غيرها لوامكن
انا زاااااتي شبكة
|
|