أم عطية .. اللانمطية

أم عطية .. اللانمطية


21-06-2003, 01:12 PM


  » http://sudaneseonline.com/cgi-bin/sdb/2bb.cgi?seq=msg&board=2&msg=1056201127&rn=0


Post: #1
Title: أم عطية .. اللانمطية
Author: ابو جهينة
Date: 21-06-2003, 01:12 PM



يقولون أن مرض ( السارس ) أجاركم الله و إيانا ، هو مرض ( لا نمطي ) أى أن أعراضه و مسبباته تختلف عن بقية أعراض و مسببات الأمراض التي تصيب الجهاز التنفسي ، و بالإضافة إلى ذلك هو مرض ( عصبي ) يتنرفز بمجرد أن يتعاطى المريض الدواء ، فيجن جنونه ، و يلبخ ما شاء له التلبيخ ، يعني ( مرض نتشة ) .

و الزول ( النتشة ) أو الذي تستفزه أصغر الأمور ، يا إما عصبي أو أحمق ، و العصبية و الحماقة عملتان بعدة أوجه و لكن ( بسعر صرف مختلف ) يتفقان في بعض التفاصيل و يختلفان في البعض الآخر.

لانمطية أم عطية تكمن في أنها رغم كبر سنها تحمل روح عصر الألفية الثالثة و تشوب هذه الروح عصبية و في بعض الأحيان ( حبة حماقة ) محببة إلى النفس و خاصة إن كنت تعرفها و تعرف طيبة قلبها.

كنت مساهرا عند بعض الأصدقاء و معي عائلتي ، و ضحكات النساء تصلني من فترة لأخرى من داخل البيت ، فقال صاحب الدار :

أم عطية بي جوة عاملة عمايل.

فقلت له : هي عندكم هنا ؟ فقال : هي هنا و إنت الحتوصلها معاك في سكتكم لمنزل ولدها لأنه في طريقك.

و شرفتني أم عطية في السيارة و أنا أتوقع جملة مفاجئة منها في أي لحظة ، و جلست في المقعد الخلفي تلاحقها ضحكات ست الدار و هي تقول لها : كان تبيتي معانا يا أم عطية.
فردت عليها : مرة تانية يا بتي ، ولدي عطية بكرة موديني الدكتور ، عندي اليومين ديل حساسية في العينين الحلوة دي.

و صارت ( تهترش ) طوال الطريق بطريقة فاقت بها ( شيري و بت قضيم ) ، و فجأة صاحت بي : هوى يا جنا ، إنت البنزين دة داير تقيف ليهو في الصف ؟

قلت لها : ليه يا حاجة ؟ فقالت : إنت ماشي براحة كدي ليه ؟ أدعك البنزين دة و خلى اللساتك ديل يكوركن في الأسفلت دة التقول داعكنو بي طايوق .

ضحكت أم العيال طويلا قبل أن تستطيع الرد عليها قائلة : إنت يا حاجة عاجبك التفحيط حق الشباب في الشارع ؟

فقالت و هي تضحك كالفاضل سعيد عندما يتقمص شخصية بت قضيم : لا يا بتي ، لكين راجلك دة سايق كدي زى الماشي في الكورنيش. أنا السواقة البراحة دي بتحرق روحي. أنا ولدي عطية كان ما خلي العربية وكت يفرمل ، أدقس جنب مسجل العربية و أرجع مابتكيف.

حكيت ما حدث لإبنها ، فقال :

دة كلو كوم ، و العملتو في الحج كوم تاني.

قال : عند الطواف ، طافت شوطين و وقفت و قالت : كفاية كدي شوطين.
فقال لها : لاكين يا يمة لازم سبعة أشواط. و إنت أبيتي السرير يشيلوك عليهو
قالت و هي تضع كلتا يديها على خاصرتها : أنا ما بقدر على الدفر و العصر دة ، و السرير ما بطلع فوقو زى الجنازة أبرا و إستبرا من شيل السراير.
ثم قالت : ما ممكن أكملن مرة تانية ؟
قال لها : ما ينفع
قالت روح أسعل ، إنت شن عرفك بالفتاوي.


بعد جهد جهيد أكملت الأشواط المتبقية ، دون أن تردد الدعاء ، يقول عطية أنها كانت
( تقنت ) بصوت عالي و كل من يمر بقربها و ينظر إليها تقول له : تعال أكلني ، حج حجك يا أب عينا زايغة.

و ذهبا إلى السعي بين الصفا و المروة ، فقال لها بعد أن إستأجر لها عربة يجرها أحدهم : يمة ، هنا برضو سبعة أشواط ، لمن تنتهي تنتظريني هنا ما تتحركي خطوة.

قالت و هي تلوي شفتيها على جنب : برضو سبعة ؟

عند منتصف ممر السعى و في الممر الذي تمر فيه العربات ، وجد جمهرة من الناس و سمع صوت أمه عاليا يتعالى من وسط الجمهرة ، فقد كان صوتها مميزا :

شوفو الغبيان دة عليكم الله ، خج بطني المليانة موية زمزم خج لامن بقيت زى البطيخة اللاقة، بالله تقول سارقني ، بعدين تعال هني ، مش قالوا هرولة ، إنت الساكيك منو جاري كدي ؟

يقول عطية و هو يمسح دمعاته التي سالت من كثرة الضحك : أرادت أن تسف الصعوط أثناء أداء مناسك الحج فقلت لها : يمة ، على الأقل أيام الحج سيبي الصعوط ، فقالت و هي تنفض يديها من بقايا سفة ماكنة إستقرت داخل فمها :
أنا وكت أكون متقريفة ما بقدر أرد على السلام الهين دة ، عاوزني أقول وراك اليوم كلو في الدعاء دة و راسي زي الطاحونة ؟

من المعروف و المتبع عندنا في السودان ، أن أهل العريس و العروس يوم قولة خير ، تكون بينهم مجاملات و إنتقاء الكلام بعناية و كرم في الضيافة و تعريف بالأهل ، و كانت أم عطية يومها من ضمن أهل العروس ، و بعد أن كالت أم العريس المديح لإبنها ، قالت أم عطية :

خلينا عليك الله من البوهية و الديكور دة ، ولدك نحن عارفنو كويس ، و لو ما البت قالت دايراهو و ما دايرة غيرو ، و الله أنا كنت دايراها لي ولد حاج عبد القادر ، و ما كان محتاج للشهادة دي كلها.

و تأزم الجو و تكهرب ، و أشارت إحداهن بحركة من يدها فهم منها أهل العريس أنها إمرأة ( بتتكلم أي كلام ). فهدأت النفوس ، بعد أن غيروا إنتباه أم عطية بكوب كبير من الآيس كريم الذي تضعه في المرتبة الثانية بعد الصعوط.

لا تحب أم عطية الجلوس مع من هم في سنها ، لذا دائما تتوسط ( ونسات ) الشابات في أي مناسبة . سألتها أحداهن بخبث :
أم عطية إنت الإخترت أبو عطية ، مش ؟

قالت و هي تطلق زفرة حارة : أنا يا بتي ما شفتو إلا ليلة الدخلة ، شنباتو سبقنو في دخول الأوضة ، أنا قايلاهم قرون تور

و تضج البنات بالضحك يطلبن المزيد ( أها عليك الله قولي يا أم عطية ، و بعدين ؟ )

و تواصل أم عطية : وكت قال لي كيف أمسيت يا ست البنات ، بالله زى البيتكلم جوة صفيحة فاضية ، أمانة عليكن صوتو زيو ، جهامة و غليد. وكت يقول يا ست البنات ، اللقمة الفي الحلق تقيف قبلا. و أنا عيني على السوط الشايلو يجر بالواطة. هو ينضم معاى و أنا خايفة يديني سوط سوطين في نص ضهري ، أصلو كان زعلان مني عشان سمع أنا قلت ما دايراهو و طنطنت كتير في حقو.

يعني كنت بتخافي منو يا أم عطية ؟


هو خوف ساكت ، مرة رصعني كف ، جضمي متعسم أسبوع ، إلا مسدوهو لي بي قرض و حلبة و عجين. بس كنت أنا غلطانة ، غلطت في مرة العمدة ، لساني طويل من يومي.

علبة الفازلين تستهلكه أم عطية في أسبوع ، فهي ( تجلبط ) جسمها كله ، و عندما تؤنبها زوجة إبنها تقول لها :

هوى ، عطية لو جاب لي الفازلين دة بالبرميل ، برضو ما بمرقنو من حق الوالدين ، أنا القشف الفي جسمي دة من خدمة أبوهو في عز البرد وسط الزراعة يخلنو يجيب لي الكريمات دي أشكال و ألوان.

ما زالت أم عطية تقيم بيننا ، أطال الله عمرها و بقاءها ، آخر حكاويها اللانمطية عندما ردت تلفون أحد المغازلين :
آلو ، إزيك يا جميل يا أم عيون فتاكة؟
ردت أم عطية و مزاجها ( مش ولا بد ) : عويناتك بالرمد إن شاء الله ، إنت منو ؟

مش مهم أقول أنا مين ، المهم إنك يا غزالة يا حلوة يا قمر ، يا أم صوت ملائكي ، تتكلمي و أنا أسمع ، تغردي و أنا أنصت ، إنت في أحلامي يا أحلى وردة من أحلى جنينة.

( هنا إبتسمت أم عطية ، فقد صادفت هذه الصفات هوى في نفسها ، و لسان حالها يقول يا ليت الشباب )
قالت أم عطية و هي ترهف السمع لتسمع المزيد :
بس إنت منو ؟
ممكن تقابليني الليلة الساعة سبعة عند ....................

و عندما أتى عطية قالت له أم عطية :

الليلة واحد ما عندو أدب قعد يغازل في التلفون ، لكين يا عطية ، بري من شبان الزمن ديل ، تقول سحاحير ، بالله الجنا دة وصفني جنس وصف.

Post: #2
Title: Re: أم عطية .. اللانمطية
Author: شرير والبرتقاله
Date: 21-06-2003, 01:52 PM
Parent: #1

اسياتكم بنكهة
ايام تسجل فينا
الفرح
الباهر


الله يديها العافيه ام عطيه
بقدرما اسعدتني

شكرا يا ابو جهينه

Post: #3
Title: Re: أم عطية .. اللانمطية
Author: قرشـــو
Date: 21-06-2003, 02:00 PM
Parent: #2



ابو جهينة

لك التحية

والله يا سيدى انت فت شيرى لى غادى
بالله بتجيب الحكاوى دى من وين

والله ضحكت ضحك لامن دمعت والله

الله يجازى شيطانك وشيطان ام عطية

عليك الله زيدنا من حكاويها نحن ياخى لينا زمن من الضحك ده

الله يديك العافية

Post: #4
Title: Re: أم عطية .. اللانمطية
Author: ابو جهينة
Date: 21-06-2003, 02:01 PM
Parent: #2

الأخ شرير و البرتقالة

تحياتي و تقديري

و عودا حميدا و نتمنى أن تكون قادم أيامك كلها سعادة و يجبر كسركم. آمين

Post: #5
Title: Re: أم عطية .. اللانمطية
Author: ابو جهينة
Date: 21-06-2003, 02:03 PM
Parent: #4

قرشو الحبيب : لك كل المودة و أضحك الله نواجذك دائما بالأخبار الزينة. أخوك مدمن يفتش على العجائز وين قاعدين و يقعد ينكش فيهم عشان يطلعو الجواهم.

عافاك الله

Post: #6
Title: Re: أم عطية .. اللانمطية
Author: بت قضيم
Date: 21-06-2003, 02:41 PM
Parent: #1

شكلي حادمن بوستاتك يا ابو جهينة
يديك العافية

Post: #7
Title: Re: أم عطية .. اللانمطية
Author: ابو جهينة
Date: 21-06-2003, 02:44 PM
Parent: #6

بت قضيم : تحياتي الأخوية الصادقة

أنا خايف تدمني و بعدين يكملن البوستات و ما نلقى ليك حاجة.

تسلمي

Post: #8
Title: Re: أم عطية .. اللانمطية
Author: بدرالدين شنا
Date: 21-06-2003, 04:57 PM
Parent: #1

بسم الله الرحمن الرحيم

المحبوب أبو جهينة
سلام عليك وعلى أم عطيّة

يعني ياكا إنت النمطي؟؟؟

Post: #9
Title: Re: أم عطية .. اللانمطية
Author: عبدالأله زمراوي
Date: 21-06-2003, 07:16 PM
Parent: #1

أسمع يا أبو جهينة
استمر فى تناول شخصيةأم عطية
واضغط نفسك حبة فى اجازة الأولاد...
واكرب نصك...
وأنشر....
في كتاباتك، أحس نكهة موسم الهجرة وعرس الزين...
فربما يصعد من بيننا أديب، أريب ....
فى قامة الأديب العالمى الطيب صالح...
من يدري؟؟

Post: #10
Title: Re: أم عطية .. اللانمطية
Author: الفاتح يسن
Date: 22-06-2003, 02:02 AM
Parent: #1

العزيز ابوجهينة عندنا برنامج من ساحات السارس تجد مقدم البرنامج يتجه لسكنات العجايز زي ناس ام عطية وتكون في الشوط الاضافي الثاني من العمر وبعد يومين تدق الدلجة والليله سار ساااااار يعني مافي طريقه نطلع من هنا ومافي طريقه ليكم تجونا واصل في عطيه الارهابيه واقلبو مسلسل زي دكان ود البصير وتهديه لي اذاعة جبل مرة

Post: #11
Title: Re: أم عطية .. اللانمطية
Author: Hozy
Date: 22-06-2003, 04:08 AM
Parent: #1

LOOOOOOOOOOOOOOOOOOOOOOOOOOOOOOOOOOOOOOOOOL

مباااااالغة والله
ضحكت لمن غلبني اقعد في الكرسي

الله يديها العافية يا ابوجهينة
ويطول عمرها

بروحها الجميلة المرحة

تشكر على ما اتحتفنا به
تحياتي

Post: #12
Title: Re: أم عطية .. اللانمطية
Author: HOPELESS
Date: 22-06-2003, 04:47 AM
Parent: #11

استاذي الفاضل
ابوجهينــــة
سـلام واحترام

في كل يوم تبث فينا الأمل بوجود سلاله لعمالقه الكتاب
ربنا يديك العافيه

وطبعا عندنا برضو واحده قريبتنا لانمطيه جات تحج .. وعندها مشكله في الحركه .. وعندنا واحد قريبنا زول ظريف جدا اقترح عليها تتطوف فوق السرير المحمول بتاع الخشب وطبعا زي ما معروف الجماعه البيشيلوا السرير ديل بيسرعوا بصورة مبالغه وسط الزحمه
وقفت تعاين مسااااافه في الجماعه ديل وهم بيطوفوا في الناس العجائز المابيقدروا علي الحركه... وأتلفتت علي قريبنا وقالت
بري واكان عترو الناس ديل؟؟
رد عليها صاحبنا
والله إن عتروا يرموك زي (السفه) هناااااك
وطبعاً شالت الفكره من راسه خالص .. وطافت علي الكرسي

Post: #13
Title: Re: أم عطية .. اللانمطية
Author: garjah
Date: 22-06-2003, 06:07 AM
Parent: #12

الحبيب ابو جهينة

ايها الجميل.....أضفت لظرف ام عطية

طلاوة الحكي

وحلاوة الجذب

دمت لنا.....ودامت كلماتك ظل نتفيأه

في كل حلة وقرية هنالك ام عطية

في حلتنا امونة

والنساء من هذا النمط رجال في شكيمتن

لا يمر العوج من تحت اعينهن الا وقد طبزنه طبزا



دمت ايها الجميل

Post: #14
Title: Re: أم عطية .. اللانمطية
Author: ابو جهينة
Date: 22-06-2003, 06:23 AM
Parent: #13

عزيزنا و قريبنا عبد الإله زمراوي : تحياتي : أين نحن من قامة ذلك الديناصور الطيب صالح ؟ شكرا على المداخلة. و أين وعدك ؟

الفاتح يسن : تحياتي لك و للأسرة الكريمة. المسلسل جاي في الطريق و هو تحت الطبع.

هوزي : جعل الله أيامك كلها سعادة و هناء.

هوبلس : تحياتي و تقديري : شيل العناقريب دة في الحج كل عجايزنا رفضوه ، و أكيد لسببين : الأول هو التشاؤم و الثاني هو الخوف من الرمية زي السفة. تسلم.

قرجة : أخو الأخوان : كيف حالك . تمام ، زي ما قلت إنت ، في كل قرية من قرانا توجد أم عطية ، و الما عندو كبير يشتري كبير.

تسلموا يا حبايبنا و دمتم.

Post: #15
Title: Re: أم عطية .. اللانمطية
Author: بت قضيم
Date: 22-06-2003, 06:40 AM
Parent: #1

جراب الحاوي لا يخلو اخي ابو جهينة

Post: #16
Title: Re: أم عطية .. اللانمطية
Author: ابو جهينة
Date: 22-06-2003, 06:49 AM
Parent: #15

بت قضيم : قلت كدي ؟ مادام العشم موجود ، الله يعين و يخلي الجراب عامر. و على كل حال الجراب عامر بتشجيعك و تشجيع الحبايب الباقين.

تسلميلي

Post: #17
Title: Re: أم عطية .. اللانمطية
Author: اسامة الخاتم
Date: 22-06-2003, 01:42 PM
Parent: #1

ابو جهينة حلوة شديد
و ذكرتنى قالوا زمان حبوبتى مشت الحج: و لمن رجعت سألها القوم: اها كيف لقيتى السعودية يا حاجة
اجابت: حلاتن بنات السعودية لابسات طرحن. ها ها ها
و عندما سئلت عن ماء زمزم و كيف لقيتيها قالت: الله يعلم مسيخة الا ما نقدر نقول شى......!
ناس زمان ديل والله كانوا لزاز او لا نمطين على قولك
لك الياسمين

Post: #18
Title: Re: أم عطية .. اللانمطية
Author: ابو جهينة
Date: 22-06-2003, 01:48 PM
Parent: #17

أخي المفضال : أسامة الخاتم : لك التحايا و التقدير و كل المودة.

أضحكتني كثيرا هذه العبارة عن موية زمزم. بالمناسبة ، أحب كثيرا أن أكون بالقرب من عجايزنا ، فهن كنز غير موثق ، و أنا واثق أن الكثيرين لهم حكاوي لا تقل روعة عن لانمطية أم عطية، فيا ريت يتحفونا بها.

تسلم أخي

Post: #19
Title: Re: أم عطية .. اللانمطية
Author: maia
Date: 22-06-2003, 08:33 PM
Parent: #1

الاخ ابوجهينة
شكرا لك لقد اتحفتنا فعلا بقصص ام عطية الا نمطية فعلا
شخصية جميلة حقا ، ذكرتني ببت مجذوب في موسم الهجرة للشمال
اطال الله في عمر ام عطية ومتعها بالصحة

Post: #20
Title: Re: أم عطية .. اللانمطية
Author: ابو جهينة
Date: 23-06-2003, 07:23 AM
Parent: #19

مايا : لك التحايا و التقدير

شكرا على الطلة. و إن شاء توصلي لضعف عمر أم عطية و تهترشي وسط شابات الأسرة. ٌولي آمين

Post: #21
Title: Re: أم عطية .. اللانمطية
Author: shiry
Date: 23-06-2003, 08:59 AM
Parent: #20

سلام مربع

في هذا الوقت من البورد
تظل كتابات مثل تلك
هي ريحانتنا
ونكهة نضاري بها
رذائلنا
وخيباتنا
وكراهتنا
التي دلقناها
على هذا البورد

سلمت يا ابو جهينه

Post: #22
Title: Re: أم عطية .. اللانمطية
Author: ابو جهينة
Date: 23-06-2003, 09:12 AM
Parent: #21

اللواء أركان هترشة شيري :

لك التحايا و التقدير . شكرا على هذه الطلة الصباحية التي نعتز بها كثيرا ، رغم إستعجالك و ما بتقعدي كتير ، إلا أنني أعذرك كثيرا ، فالكلام جواك يدغدغ أطراف أصابعك لتحتضني الكي بورد و هات يا هترشة.

عطية أخبر بالأمس أمه أنني كتبت عنها ، لم تهضم أولا معنى الكتابة عنها ، ثم نادتني قائلة : كتبت عني وين ؟ في الجرايد ؟
قلت لها : حاجة زى كدة .
فقالت و هي تضع يدها على رأسها : يعني بقيت مشهورة زى البنية ديك البترقص متل الدبيب ( شاكورا )
طبعا تقصد شاكيرا.

لها حكاوي كثيرة. أصبري لي بس ، الجايات كتار.
تسلمي أختي العزيزة

Post: #23
Title: Re: أم عطية .. اللانمطية
Author: AlRa7mabi
Date: 17-12-2003, 10:38 AM
Parent: #1

كيف أخبار أمنا دي يا أستاذ جلال

البورد دا كان حلو بشاااااااااكل

تسلم

رحمابي

Post: #24
Title: Re: أم عطية .. اللانمطية
Author: maia
Date: 17-12-2003, 12:26 PM
Parent: #1

استاذنا ابوجهينة

ام عطية اللانمطية ما تنسوها ، هي ضمن بورداب الرياض

ودمت

Post: #25
Title: Re: أم عطية .. اللانمطية
Author: ابو جهينة
Date: 17-12-2003, 02:17 PM
Parent: #24

الرحمابي العزيز
تحياتي و مودتي
هل تصدق أنني أختزن لأم عطية عشرات القصص القديمة و الحديثة
و لكن لفترة ليست بالقصيرة ، قفزت قصص أخرى من قاع الذاكرة ، قصص أيام التسكع في أوروبا و أمريكا ، فأندفعت أكتبها و ركنت أم عطية على جنب.
سوف آتيك بجديدها ان شاء الله نزولا عند رغبتك و رغبة مايا العزيزة
تسلم رحمابي

Post: #26
Title: Re: أم عطية .. اللانمطية
Author: ابو جهينة
Date: 17-12-2003, 02:23 PM
Parent: #25

مايا
ام عطية حتكون في حفلة ساطور باكر باذن الله
كانت تعبانة شوية
و لكن جبت ليها قرض و حرجل و يقت تتعافى
تسلمي