غريبة يا تماضر ـــــــــ كنته قايل انا براي

غريبة ــــــــــــــــــ كنته قايل أنا براي

زمان لما كنا صغار .. علاقتي مع الطيارات كانت متوترة .. ولما أشوفه في السماء ما كنته بحترمه .. وما أحترمته أي زول كان بيسافر فيها ويتغرب .. اتعلمته أسافر بيها .. ومن لحظته انا زهجان .. زهجان مني انا ... عشان عملته كده .
كان لما النيل يفيض بيتفرع ويدخل تحت كبري أبوعنجه .. يمد لسانو يغيظ ويكاوي حاجه الشول ( حاجه الشول شخصية لطيفه ...الآ أنو لسانه متبري منها ...بتشبه بت الريس في موسم الهجرة إلي الشمال كان أتصادفت معاها أي مرا بتكون في ورطه حقيقية حاجه ( الشول ) لازم تعبر الخور من الناحية الجنوبية ...للشمالية قاصده سوق المورده .. في رحلة التسويق اليومية معاها قفته .. ومجموعة من المقاشيش مصنوعه من سعف النخيل وكانت فنانه جدا في تلوين السعف وتشكيلو بؤس حياته وخستكته الذايده عن اللزوم ... بتخاف من المركب ومن ركوب المركب ... لما تشوف البحر ذاد تسبو .. وتلعنو من ما يبدا مطرو يدفق في الحبشة .. مرورا بالمقرن وكل الجزر إلي محطة الديم – كانت لما تركب معانا المركب تبدأ تسجم في رماد خشمه .. وتسكلب .. أنا أضحك أغير أتجاهي للناحية الموازية ليها أمرجح المركب طالعه ونازلة ... تتشهد حاجه الشول .. وتسجم رماده من جديد ... وأي نوع من السجم تلقاهو تركبو معانا في المركب .. تنده أولياء خاصين بيها من ابو شراء إلي آخر العنقود مرورا بكل القباب والبنايات .. بنيه ..بنيه كانت خرفته عينه ... وكنا لزاز معاها ..
عم عمر زول عاقل جدا ... ما بتكلم كتير بيمارس حياتو الطبيعية بهدؤ عندو محل ألكترونيات وصيانة للراديو والتلفزيونات ..عيونو كبار جدا ولونم ابياااااااااااااااااض ولما يجي ينوم كان بيغمض من العصر .. لما البحر يبدا يذيد وحاجه الشول تتجرس ..كان عم عمر عيونو تبدا موسم الإحمرار ويبدا ينضم كتر ... من غير سبب .. يقفل دكان الصيانة .. ينتقل لي لحظات الجنون البحري .. ولما البحر يبدا ينقص ... كانت عيونو بتبيض تدريجيا . ويفتح الورشة .. ويرجع عمر البنعرفو ..
في الثانوي كنته في وادي سيدنا الثانوية في سوق امدرمان .. ولما الحصة التالته تجي كان راسي بيكبس – بشوف فقاقيع زي رغوة الصابون الكنا بنعمله بي الخرطوش وننفخ عليهو .. بشوفه قدام عيوني .. ابدا اطرشقه بي سن قلم الرصاص .. أكبر واحده ما بتطرشق . الآ أغمض ليها عيوني ..يعني أتخيلي !!! زول بيطعن بالقلم في الهواء .. ويغمض ويفتح من غير سبب .. أصحابي في الفصل فاكرني معتوه كانو بيقولو لي جني – في الحقيقة انا بكون قرفان ومليان زهج .. وبحاول أطلع من المود ده بالحركه دي .. أستاذ مادة الفيزياء بيلاوز مني حسب مرجعيتو بي جنوني الجواي ده ... استغل الفرصة دي .. ارفع أيدي واقول ليهو ::
يا أستاذ :: مواعيد الحبه ..
يقول لي أتفضل
اطلع من الفصل .. الشارع الأول والتاني بلاقي نفسي قدام مستشفي التجاني الماحي للمرتبين عقليا .. والغريبة كنته بلقي واحد من ناس البورد ده هناك .. في نفس الشارع لكن بيكون دايما ماشي بي سرعه وغالبا بيكون شايل كتب وعندو شنطة جلد .. كبيرة انا بعرف اسوى زيها وقاعد أرسم فيها بي اللون الموية ..الراحل مصطفي سيد أحمد .. واوعك تقولي لي سوي لي واحده .. لانو ما عندي جلد واجيبو ليك من وين ذاتو .. كدي حسع خليني في مشروعنا ده .. اها الزول ده كان الاستاذ يحي فضل الله .. وكنته مدمن لي كتاباتو وأعمالو المسرحية في الوقت داك قبل ما السودان يلفظو هو كمان . وكنته بستغرب يا ربي الول ده يكون طالع من هناك ؟؟؟ !! اضحك جنس ضحك .. والضحك ده وين ؟؟؟!! جواي بتلقيهو طوالي ساكن قدام الفقاقيع القبيل ديك الكانت في الفصل متذكراها ؟؟؟؟!!
في المستشفي دي اصحابي كتار .. كونسولت طبي – مميز . عنابر مكتظه بي نزلاء في قمت العقلانية جابوهم اهلم قالومجانيين .. زينب من بنات الحمر – جميلة جمال خرافي .. كانت بتحب ليها واحد تاني أبوهاعرسه لي ودعمها غصب ودعت قلبه وودعت معاهو الدنيا وقالو جنت .. كانت بتحكي لي عنو .. الرضي .. طالب كان في تانية هندسه مليان رياضيات فل .. شطح .. معاهو ورقه وقلم بيكتب معادلات رياضييه ويحلها في لمح البصر .. عرفته أنو أثبت بي نظرية ما أنو 1+1 ما بتساوي 2 وشرحه لي .. والحمد لله ما قدرته افهمه ليهو .. الريح .. كان بيغني لي عبد العزيز المبارك .. اذا ما شفتو بيغني وسمعته صوتو بتقول ده هو ذاتو ..
خفير المستشفي كان صعب عامل زي ويست أستوبر نيجيرياء موية ما بتخش من تحتو .. وشو ضخم جدا .. لما يتكلم كان بيطير من خشمو رزاز .. في خدو اليمين كان مرسوم مربع وفيهو علامة + عبارة عن وشم قبلي .. لما أصل الباب بتكون آخر زرارة في قميصي مفتوحه أكفكف البنطلون إلي حد الركبة في قدمي اليسري انطط عيوني الصغار ديل اكبر من عيون عمي عمر لما البحر يذيد .. أخفي أي ضحكه جواي .. أنكش شعري ..اقيف قدام الباب من غير عقلانية النسوان البجن المستشفي قلوبمكانت بتتقطع عشان جني الصبي ده الشايفنو قدام عيونن اسمع عباراتن العاطفه علي .. يا حليلك يا جنا حشاي .. وسجم خشم أمك .. في سري أقول ليها يا حليلك انتي .. انا عاقل بس مدبرس من الكون ده ومن الناس العامله عاقله دي .. عمي الخفير يفتح لي الباب علي مصراعيه وفهمو واضح ..ده زول مجنون وجاي بي نفسو .. داير حقنتو .. واكون ريحتو من الملاوة والمدافرة ..
اليوم داك دخلته ..لقيت زوله أول مرة أشوفه نضيفه جدا .. لكن طويلة جدا .زكانت واقفه في الماسورة بتتشطف .. مشيت عليها سلمته .. ردت لي ..
اسمعي : دكتورة منار وين ؟؟؟؟؟؟؟
عاينت لي قوي وما ردت ... مشيت .. بعد شوية صاحت لي .. بجعته ليها ... فتحت خشمه كبير جدا .. قالت لي دكتورة منار هنا .. وبي الاصبع الأوسط في ايده الشمال اشارت إلي مكان هنا .. اتماديت دخلته أصبعي مكان هنا قلته ليها كدي انا داير اتكلم معاها .ز ضحكت شديد جدا .ز قالت لي انته مجنون ؟؟؟؟ وأدتني احلي كف في الدنيا لفيت حوالين نفسي .ز ومن اليوم داك فقاقيع الصابون راحت .. طبعا أكيد تكون شايفاني مجنون ...
تعرفييا تماضر نصيحتي ليك .. وأصلي في الكلام الخارم بارم ده .ز وشوفي ليك فقاقيع صابون طرشقيها بالسهم بتاع الماوس .. يا كمان أنتظري البحر يذيد ....
لكن أنا ده البحلني شنو .... عليك الله بس قولي لي ...........


تمبس

بقولو الشرق ازدحم ..ومافى أماكن شاغرة!!!!!!!!!!
عشان اعلان كلنا فى الهم شرق داك..
نحن والزهجانين كلنا قطعنا التذاكر


تحياتى
ودعزة

احجز لي معاك يا ود عزة

بس حول
الهم خليهو يبقي غرب

ونملاهو انا وانته
رايك شنو ؟؟؟
انشاء الله نملاو هواء ذاتو
بس الواحد ..شوية يتنفس من الحاله دي



تمبس

انا معاكم في قطركم ولا طيارتكم ولا انشاء الله كداري
المهم اتخارج من حفرة الزهجة دي

الجندرية

برضو راكبه معانا

شايف دافي برضو داير

وتماضر
وود عزة

يا جماعة الحاصل عليكم شنو .. سحروكم ولا ادوكم عين ؟؟؟؟

يا تمبس قديتنا
عامل البورد زي المكرفون
اثنين
ثلاثة
اربعة
وما عارف خايف من الطيارة
وكنت قايل نفسي براااااي

الليلة غايتو
دايرة لي يدين اخطبوط
يد امسكها سنة قلم
ويد سنة برجل
ويد ابرة
ويد دبوس
ويد شوكة
والم في الفقاقيع فيقيع
واريتو يجيب مريسة التام زينو

الجندرية ياختي
الف سلام
مالك؟ برية انتي من الفقاقيع والفقيع

ما تعملي زي تمبس دة
بتمشي البحر وبترجعي عطشانة
وما بيجيب مريسة تام زين

الله يسهل علينا

حنينة

يا جماعة والله أول مرة أشوف البوست دا

يا تمبس كمان بقيت تغتفت الحاجة السمحة دي مالك

تعرف ، الظريف قرجة عمل موقع جميل ، مواضيوا دائما بجد فيها
تداخل جميل مع نضمك الحلو دا
يا ريت لو تنسقوا تنزلوا حاجة مشتركة كده

الضحك .. وحده ما غيرو
أنا محتاج ليهو شديد يا تمبس يا خوي

الله يديك العافية

رحمابي

غريبة يا تماضر ـــــــــ كنته قايل انا براي


انتا قايل نفسك .. انتا برااااك؟؟؟؟؟؟

لو ما مصدقنا

أسل العنبة ( الرامية ) فوق ب...

رحمابي

رحمابى
البوست مرقتو من وين؟؟
وانا بتذكر لما قريتو الزمن داك...وانتهيت منه...لقيت روحى...رايحه بين محلات كتيره... وملقيت روحى الحقيقه...مره جوه الفصل بفقع فى البتاعات ديل بقلم رصاص استلفنو من الالفه.. ومره خاشه جوه المستشفى لكن متلبه لاسور...ومرة"هنا" بفتش فى دكتور متاور...ومره...دايره اشوف يحي فضل الله اليوم داك غاب من ياتو محاضره

ولما غلبنى الم فى روحى...قفلتو ومشبت...قام البوست مشى...وتانى ما اتلاقينا

تمبس اكتب كتير ياخ

تصلو مشكلتنا دى ما بتتحل ...دايره كتابه متواصله

حسه شوف ليلى بت الدامر دى

الرحمابى وتماضر
مااااااااااااالكم علينا

تمبس
الله يسامحك غايتو
اقول ليك شنو