الزمـن غلــبـنا يـامـــا ..

من ديم مدينة ... وديم عرب ... وديم اب حشيش
للمينا... لي رامونا... او من اربعات لتراب هدل
ومن انقوياي ميل جاي وشيل عند الاصيل لمصفى شل
بالله هل...
شفت الورد في باقة ماشي وفي شفافيو بيندي طل
او لمحة من شباك اطل
شباكو شيش
ياقلبي دق لكن بشيش
لا ينفضح للناس هواك
قول ليه ناشدك من هناك
شايلني ليك براق شلع عبادي
شققني الاراك
دوخ شذاه الفجري من الاتبراوي
لحد جبيت
وقفني فوق جبل اركويت
قال لي دير عينيك تحت
شوف السما النزلت
وعامت في البحر
خذ ليك نفس املأ
شعاب رئتيك بشر
واسجد وطوف من بيت لبيت
تلقى الامل بالفرحة قوم ليهو ريش
اهدي الجواهر والحرير
بنت الامير
شقيانة في الحر لابسة خيش
نقرش قليبك بس بشيش
كم فيهو قاطع ليك وتر
قل للملاك وقتين سفر
سيد مهجتي الما ساد سواك
جاييك اموت مرتاح حداك
سميهو حب، سميهو جن ، سميهو طيش
اموت وتسلم لينا يا غالي وتعيش
اموت لبسمة تضوي في الثغر الجميل
زي نيل تبهرج بالقمر
الرملة والقيف والشدر
ليلك طويل بالغربة جاريها السهر
مانسيت مواثيقنا القبيل
اصدح بفرحتنا القلوب تصدح معاك
واموت وفي شفتي غناك
قرقورة لاصقة على الحجر
عصفورة ضاميها الوكر
مطمورة فضت ليها عيش
شبورة نازلة على الاراك
شبورة نازلة على الحشيش

من قصيدة يا قلبي دق لكن بشيش - صلاح أحمد إبراهيم

الفارس معتصم


حبلك جميل ومريح

جرّ ابو القدح الى عوالم بعيده

الكاردينا محمد الشيخ ..

تعرف أبوالقدح دا حبلو طوييييييييل ..
لكن أنا زاتي محتار في الحبال المعاي دي أسوي ليها شنو ؟..
يلا حبلي وحبلك نمدها طويييييلة ..
بالحب والشوق والسلام ..

وسيظل حبلنا ممتداً إلى يوم الدين ..

دم صديقي وأخي ..

العزيز معتصم

نهارك ود

شكرا علي الحن الجميل

ويطرب ايامك

محبتي

الغالية عالية ..

سيدة الرياحين والورود ..
شكراً لهذا الحضور الجميل ..
كم أنتِ رائعة يا صديقة ..

محبتي وودي ..

معتصم
تعال لي في الماسنجر
[email protected]

امير الكرم معتصم دفع الله
تحيه واحترام
اخبرني صديق واخ عزيز مشترك عنك...
واختفى لا ادرى اين هو احتاجه...
بحثت عنه ولم اجده...
ان عرفت طريقه اخبرنى....
[email protected]
مع تحياتى لك سمو الامير

الحبيب هشام مدني

شكراً ليك إنت يا أمير ..
وتحياتي العطرات ..
ما أسعدني بك وبصديقي ..
أكيد ستصلك أخباره وأكيد سنلتقي سوياً ..

لك ..
حبي ..
وتقديري ..

---

ياسلاااااااااام يامعتصم ياخي الواحد يستفتح يوموا بإبداع ذي دا تاني داير
شنو؟؟ لو حة موسيقية غاية في الجمال أنت الحاضر الأول فيها وآداء رائع وجميل
يديك العافية يامعتصم

تخريمة يامعتصم:
ود الشيخ ماتباري أبو القدح بتاعك دا بغطس حجرك في صحراء نجد

ود دفع الله حبابك 10
ليك وحشة يا مان
............
اهدي هذا اللحن للعزيز اساسي

............
والي ودعقاب

انشا الله يكون ساجورو انفكا

وليك وحشة كبيرة مثلها يا شمهروش ..
أساسي خلاس دخل تابوته ..
وبقى كمان فيها ضبيح كدايس ..
الزول ما عريس ..
هديتك مقبولة أنا زاتي بهديها ليهو ..

وبرضو لي ودعقاب الزول الجميل ..
بس إن شاء الله يكون حلّ وعده ..
وساجورو إنفك كمان ..

محبتي يا صديق ..

يا سلاااااااااااام عليك إنت يا بدري ..
ما أجمل أن يكون كل الحلوين معاك وبجانبك ..
سيكون حبلنا أمتن ضد عاديات الزمان ..
وسيمتد ما دام هناك حبال من الحب والتواصل والشوق ..

أها يا بدري كان علي أبوالقدح دا يحلك الله من حباله ..
دي لولوه جميلة من الحب ربنا ما يحلك منها ..
جميل هذا الكاردينال ..
وجميل هذا الأبوالقدح ..
وجميل أنت يا رفيقي ..

دم صديقي ..

حاجة ما تخلص
سؤال:
في زول قبل كده قال ليك انت رااائع وراقي كمان?
اها اكان ما في إتلوموا تب واعتبرني الأول والتاني و....
معليش الجهاز مافيهو عربي عشان كده انا بعاني والداير اقولو كتييير وإن الله قال خير بتسمع بيهو قرييييب (ده اكان ماقريتو براااك)
***ودالمسيكتاب***

الحبيب سيف الدين ..

شكراً يا جميل ..
كلماتك أخجلت تواضعنا ..
والله أنا ما قدر دا ..

ياخي إنت الأول وإنت التاني وكل الحلوين ..
أهلاً بأهل المسيكتاب وناس المسيكتاب ..
أظنك بتعرف جيداً صديقي على المسيكتاب ..
لاعب المسيكتاب والأهلي الخرطوم ..
وكذلك صديقي الباقر وهو زميل علي في النادي والسبب في تسجيله عندكم ..
أها ديل أصدقاء مقربين لي شديد وفرد كورة كمان ..

شكراُ جميلاً ..
وسعيد جدا بك ..
وبوجودك هنا في هذا الوطن الجميل معليش جات متأخرة شوية ..

دم أخي ..

جميل يامعتصم دفع الله

الرائع وحيد

أشتاقك يا صديقي ..
سعـيد بوجدك هنا ..

دم أخي ..

الاخ معتصم
سلام
القصيدة رائعة والاغنية جميلة جدا جدا.
لك الشكر وانت تمتعنا كل يوم بجديد فريد.
انا ما زلت اكرر طلبى بمحاولة وضع لنك للحفظ لانه هذه الاغانى من النادر الحصول عليها ونود ان نحفظها.
المرة دى الطلب من عريس والعريس طلباته دايما مجابة.
لك الود
والف باقة ورد

المعتمد العريس

حرّم تبشر وطلبك جاهز ..
ربنا يقدرنا ونجي نهز ليك في عرسك كمان ..
أها شن قولك ..

أضغط على اللنك دا ..



البلوم في فرعه غنى .. الرائعة نسرين

العزيز معتصم
السلام عليكم ورحمة الله وبركاته
الدنيا هنا عندنا صباح
اول حاجة عملتها : خشيت النت ,فتحت sol ,المنبر العام ثم الزمن غلبنا ياما
عارف ليه? لسببين اولهم اسمع وتانيهم بخلي في سري
بس طلب واحد ياريت اقدر اعمل download واحفظها في الجهاز
شكرآ لمعرفتك بالمسيكتاب (وشفوت كورة المسيكتاب)
الله يديك الصحة والعافية
***ودالمسيكتاب***

الحبيب سيف الدين

صباحك ود وورد ورياحين..
تعرف طلعنا معرفة يا حبيب ..
اليوم سألت علي المسيكتاب منك ..
وقال لي سيف دا السبب في تسجيلي للمسيكاب ..
أها المرة الجاية جيب معاك سرك ..

وضعت لنك الحفظ في المداخلة الفوق دي ..
أضغط عليها وأحفظها عندك ..

محبتي ..

يا موو

Quote: الفارس معتصم حبلك جميل ومريح جرّ ابو القدح الى عوالم بعيده

الحاجات د الا اسمعه انا في البورد؟
بعد كده بندخل يدنا ونقلع
يا نجيب حبنا معانا..

ياخ بتقدر تديني الزول الجميل الفوق ده .. على وزن ابو القدح
امشورو ليك نقاهه واجي
حرام عليك يا معتصم .. ملف زي ده اكتب ممنوع دخول محمد الشيخ
انت عايز تقرضو لينا اون لاين..
نجيب ابو القدح من وين تاني
..
.

دامت ايامكم الجميلة ياحلوين..

Quote: ياخ بتقدر تديني الزول الجميل الفوق ده .. على وزن ابو القدح امشورو ليك نقاهه واجي حرام عليك يا معتصم .. ملف زي ده اكتب ممنوع دخول محمد الشيخ انت عايز تقرضو لينا اون لاين.. نجيب ابو القدح من وين تاني

تعرف يا تامبا أمس صدر قرار إمبراطوري بليل ..
بأنك والمدعو شتات لا علاقة لكما بهذا الأبوالقدح ..
وخارج دائرته ..
ودا صدر تحت توقيعي وبحضور كل من الكاردينال شخصياً والوليد399 ..

عشان تاني تعمل خيانات يامنقا ..

ستظل هذه الحبال ممدودة يا صديقي ..
وسنظل نحبكم حتى يرث الله الأرض ومن عليها ..

قطعت مشوار طويل قلت ارتاح شوية هنا

البيت بيتك يا هشام ..

ألف مليون مرحب بك وبمقدمك علينا يا حبيب ..


تسلم ..

جميل يامعتصم وربي يخدر عود ضرعاتك






تمبس تمبس بسكويت وينك ياصديق

صديقي الجميل خضر ..
هل إبتلعتك هذه المدينة بزحمتها ؟؟ ..
مشتاقين ياخي ..

سنكون على وعد اللقاء ..

ينصر دينك يا معتصم ...

تحياتي وأشواقي ...

كنتُ قد أوردت القصيدة قبل فترة طويلة في بوست منفصل لكنها لم تكن مكتملة

فقد كنت أختزنها في سراديب الذاكرة الخربة منذ العام 1988م حيث وردت في عدد

لجريدة الأيام وقتها ...

وطلبت من الأخوان مدي بالنص كاملاً ... وها قد أتى منك ..

فالجميل دائماً يأتي بالجميل ...

للأسف الشديد يعاني جهازي من أنفلونزا حادة منعتني من الدخول للنت زمناً ..

من مشاكل جهازي أيضاً أنه أصبح أبكماً ...

لذلك لم أستمع للحن ولم أكن أعلم أصلاً أنها قد غُنيت ..

يا حبذا لو تكرمت بإيراد صاحب اللحن والصوت ...

ولك ودي ..

الحبيب عبدالباقي
وينك ياخي الشوق كاتلنا عديل كده والله ..
مالك ما ظاهر أوعى تكون دي فترة بيات صيفي ..

عارفك زول شفيف وذواق ..
الراحل صلاح أحمد إبراهيم شاعر يكتبك وكلماته تسلب الألباب ..
معليش هذه القصيدة لم تغنى على ما أعتقد والأغنية النازلة هنا ..
أغنية البلوم في فرعه غنى بصوت الواعدة نسرين ..
معليش إذا خيبت ظنك ..

Quote: للأسف الشديد يعاني جهازي من أنفلونزا حادة منعتني من الدخول للنت زمناً .. من مشاكل جهازي أيضاً أنه أصبح أبكماً ...

جهازك دا خليهو علينا نحن عندنا علاج لكل الحالات المستعصية ..

شكراً كتير يا صديق على رقيق كلماتك ..
خلينا نشوفك ونملي عيونا منك ..

تسلم يا حبيب ..

Quote: من ديم مدينة ... وديم عرب ... وديم اب حشيش للمينا... لي رامونا... او من اربعات لتراب هدل ومن انقوياي ميل جاي وشيل عند الاصيل لمصفى شل

والله يا معتصم ..
مما قريت الاسماء دي
وشفتها .. قلبي دق دق
لا بشيش ولا عرف البشبشه ..

ذكريات جميلة جداً في مدينة بورتسودان
اثارت شجوني هذه القصيدة الرائع
للشاعر الدبلوماسي المرهف
صلاح احمد ابراهيم رحمه الله
و يا دوب عرفت انو الزمن غلبنا ياما
حرمنا شال الابتسامة ..
شال الابتسامة عدة مرات يا موووو
وما زال يضمر الكثير بداخله لنا ..
حرمنا لما شال رائعنا صلاح احمد ابراهيم
وحرمنا لما ودعنا البورتسودان ..
وحرمنا من كل الاحباب
وحرمنا لما الحرمان اشفق علينا ..

ديم مدينة وديم عرب وسلبونا
ابوحشيش، ترانسيت، الثورة
ديم النور، كوريا، سلالاب
سنقانيب، توارتيت
الموانئ ومسرح الثغر
الركـن الهادئ..
وها هنا ساحط رحلي
وأغفــو..
آآآآآآآآآه
تصبح على خير ..

ورمــتنا..
كان في داعــي

''من ديم مدينة ... وديم عرب ... وديم اب حشيش
للمينا... لي رامونا... او من اربعات لتراب هدل
ومن انقوياي ميل جاي وشيل عند الاصيل لمصفى شل
بالله هل... ''.

و


"البلوم في فرعو غني
طرانا ياالحبان اهلنا


يا المسفارين بالسلامة
بلغوا الحال لاهلنا






الزمن غلبنا ياما





معتصم الرائــــــــــــــــــــــــــــــــــــــــــــــع


تصفحت بوست الزهج قبلا
وكنت جد زهجانة من حر القاهرة وزحمتها_أمضيت اليوم قرابة الساعتين في التجمع.

وما أن استرسلت في القراءة
اذا بالزهجة "تطير علي كف عفريت"


الزهج موجود في كل مكان
ولكل شعب طريقة تعبير تتناسب والبيئة المحيطة
كطبيعة الجو مثلا
بل وحتي نوعية الاكل والشرب

أسفة دا ما موضوع البوست دا
لكن الغنية دي حلوة جــــــــــــــــــــــــــدا

يعني بوست الزهج علي دا
ينفعوا وصفة لي عدل المزاج


لكن بتتطلع من حفرة الزهج الغنية مع القصيدة بوقعوك في حفرة تانية



شكرا يا معتصم

محبتي

كيفك أميمة الفرجوني ..
تحيات كتاااار ..

يااااااااااه ذكرتيني بعض أيام قضيتها هناك ..
بكل تفاصيلها الجميلة والمحزنة ..
إلتقيت فيها بأحباب لا يزال حبل الود ممتد بيننا ..
تعرفي مرات لما تجيني الزهجة ديك بقوم أمشي على النيل ..
رقم أن نيلهم لا يشبه نيلنا حزين وكيئب ولكن فيه شئ من الكبرياء أو قولي الحياة ..
وبعض الحسان هنا وهناك ..
وفيه يشتغل شريط الذكريات والحنين للوطن والأهل والأحباب ..
شفتي الزهجة بتكون حاكمة كيف ؟ ..

أتمنى أن يكون مزاجك إتعدل ..
والزهجة طارت ..
وإن شاء الله الحفرة التانية دي ما تعوق ..
عشان ما نقع في مشاكل ويجونا ناس حقوق الإنسان ..
يطلعونا إرهابيين ويقولوا لينا عذبتوا الناس ديل ..
قطعتوا قلوبهم وقومتم عليهم المواجع ..

تسلمي يا صديقة ..
لك محبتي وتقديري ..

الجميل وليد أربعمائة إلا لمن الجماعة يجو من السودان ..
يا لها من ذكريات وشجون ..
أذكر وأنا أول مرة أزور فيها هذه المدينة الساحرة ..
سحرتني بجمالها وبطيبة إنسانها ..
عشقت فيها البحر وتمنيت لو جاورته ..
زرت فيها أماكن كثيرة ..
وأكثر ما زهلني ناديي الهلال وحي العرب يكونا الحيطة بالحيطة ..
يعني واحد فيهم لو غلب التاني " يفلقوه " بالحجار ..
ولكن دي الرياضة ودا إنسان هذه المدينة الرائعة ..
وفيها أيضاً أحي صديقي الأدروب محمد عبدالقيوم أبوشامة وأرسل ليهو تحياتي عبرك ..
أها في هدل دي عندي فيها أهلي والزمن غلبنا فيها ياما ..
ومن ديم لي ديم ومن صديق لي صديق تقابل كل الحلوين ..

مالك علينا يا وليد ..
أشكيك لي منو عليك الله هسي ..
ولا الشاعر الراحل صلاح دا بوست واحد لا يكفي للكتابة عنه ..
تكفي كلماته وأشعاره التي لا تزال تسري في وجداننا ..

محبتي ..

الحبيب معتصم
سلام
ارجو وضع كود الحفظ
لك الود
********************

Thank you Mutasim
After I requested
the link I found it above
Thank you again
God bless you

الحبيب ياسيكو ..

سعيد بهذه العودة الجميلة ..
وهذا الحضور الأنيق ..
يا رائع من زمن الناس الروائع ..
فلتكن معنا يا صديق ..
إلى نهاية المشوار ..

محبتي وتقديري ..

شكرا اخي معتصم
الراحل الفنان(احمد الجابري) من اعذب واجمل الاصوات في تاريخ الغناء
احساسي ان صوته غير قابل للتقليد مع العملاق (ابراهيم عوض) اتمنى يا معتصم ان تسمعنا اغنيات بصوته
مع تقديري

لا ياود الحاصل شنو ما فتك كويس........حبيت تاني ولا شنو..اوعا الحب حبلو طويل ودايرهذ اكتاف..سيدي عموما انا اشتاقك حتى النخاع......شفت كيف
لكن الله في.....
طبعا لحن حكاية يرجع الزول لي الكاملين ومدن اخرى في طي النسيان..
لا اخبار المتمة شنو............
عموما مولاي سالتقيك بعد ان احصل علي نفسي الضائعة لحين .....
حتى ذلك الوعد....الي لقااااااااااااااااااااااااا
مولانا الذي

صديقي الجميل الطيب حسن ..

كما تركتني آخر مرة يا مولاي ..
لم يتبدل الحال ويبقى على ما هو عليه ..
سنتذكر معاً كل التفاصيل الجميلة ..
أظنك لم تنساها ولن تنساها ..
وأشياء كانت في تلك الذاكرة الخربة ..

سنلتقي دوماً يا صديقي ..
وسنبقى معاً ..
ما دام في العمر بقية ..

دم صديقي ..

الأخ NAZIM IBRAHIM ALI

تحياتي ..
أحياناً يكون التقليد مشوهاً ..
ولكن نحن بطبيعة الأشياء نحتاج للتجديد ..
ونحب أن نسمع القديم بصوت القادم الجديد ..
ولا إختلاف على صوت الفنانة نسرين في أدائها لهذه الأغنية ..
وأنا شخصياً أفضل الغناء من " خشم " سيدو ..
ودا ما بمنع أن نحفز الجدد ونعطيهم حقم ..
على وعد مني أن أنزل ليك بعض أغنيات الراحل الجابري بصوته ..

محبتي وتقديري ..

الغالي المعتصم
دخلت اسلم وارفع معنوياتي شوية كمان,برضو قلت الدنيا صباح احسن نبتهج عشان الزمن مايغلبنا
بالمناسبة سيف الدين المقصود هو ابن عمي محمد الحاج السيد (خريج لأهليه -بالسعودية الآن)
ما بعدت يا غالي, تحياتي لي علي


***ود المسيكتاب***

يامعتصم بوستاتك راقية زيك

الغالية نادية

شكراً على رقيق كلماتك ..
يا رائعة يا ست الذوق ..

محبتي وتقديري ..

العزيز سيف الدين ودالمسيكتاب

تحية الصباح الندي ..
شكراً لحضورك الأنيق فينا ..
والتحية عبرك للأخ محمد الحاج ..
ولكل أهل المسيكتاب الحلوين ..

تحياتك لعلي وصلت ..

محبتي ..

سأظل أفتح نوافذي مشرعةً ..
وأستقبلكم بداخلي يا أصدقاء الجرح ..
سنمضى معاً إلى دروب الأمل ..


والوعد الجميل ..