شكرا يا ود الصائم واساسي وسيف كامل.....(الهكر وراني معدنكم)!

شكرا يا ود الصائم واساسي وسيف كامل.....(الهكر وراني معدنكم)!


19-06-2010, 03:24 PM


  » http://sudaneseonline.com/cgi-bin/sdb/2bb.cgi?seq=msg&board=193&msg=1276976073&rn=0


Post: #1
Title: شكرا يا ود الصائم واساسي وسيف كامل.....(الهكر وراني معدنكم)!
Author: Tragie Mustafa
Date: 19-06-2010, 03:24 PM



شكرا لانكم كنتم هنا لاجلي
رغم اني لم اقرأ البوست
لكن البركه في الحبايب الحفظوا لي اسمائكم.



تخيلوا الزول يصحى مبسوط و اليوم عطلة نهاية اسبوع
ويفاجأ بتلفون صباحي من احد ابناء الشعب
ليقول نشجب وندين ونستنكر ما تم بحقك!!
تقول له شنو الحاصل يا ود العم يقول لك الحقي البلد مقلوبه في المنبر
كله شتائم لك...قرابة ال 10 بوستات تحمل اسمك وكلها شتيمه لك!




عارفين الاسؤ من الهكر شنو؟؟؟
هو الزملاء و الزميلات العاملين تعودوا على ده
وخلاص تراجي ما قويه وبتتحمل!!

فيتكاسلوا حتى عن تسجيل ادانه!




ومبرطعين اغلبهم...وقاعدين ومتفرجين كانوا!!




المهم شكرا
لاخوتي

اساسي
وود الصايم
وسيف كامل





وساظل تراجي الجبل الذي لا يهزه ريح....

وطبعا الهكر ليس اتفه ولا احقر من عضويه هنا كتبت ماهو اسؤ منه بحقي!!
ويظلوا مجرد حشرات لا تنال مني مثقال ذره.



ايعتقدون بانهم سيعطلون مسيرتي؟؟
ام القيم التي انا هنا لاجلها؟؟؟

بعدهم!!ولما يشفوا حلمة اضانهم.



انا قاعده وساظل....رغم المرجفين...مدافعه عن كل ما نذرت نفسي لاجله


شكرا مره آخرى.للاحبه الاسمائهم فوق.
وللاخ المتصل....و للعزيز الصور لي الصفحه وحفظها لي بناء على طلبي.

Post: #2
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Tragie Mustafa
Date: 19-06-2010, 03:36 PM
Parent: #1

طبعا وستصمت الغالبيه
وتعمل ما شايفه؟؟!!

ولا يعرفون بانهم يقننون سقوطهم الاخلاقي.

Post: #3
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Mohamed E. Seliaman
Date: 19-06-2010, 03:40 PM
Parent: #2

السلام عليكم ورحمة الله
الحاصل شنو يا أخت ؟
أنا بس شفت واصل مالي الدنيا ملي .
------------------------
عموما شكرا على بياض لود الصائم وأساسي وسيف كامل .
والشكر مقدما أيضا للأخت الكريمة دينا خالد .
شكرا لك يا دينا .

Post: #4
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: اساسي
Date: 19-06-2010, 03:41 PM
Parent: #3

ما بنحتاج شكر ,, اخت كريمة

Post: #13
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Tragie Mustafa
Date: 19-06-2010, 04:38 PM
Parent: #4

يا اساسي تسلم يا اخي
Quote: ما بنحتاج شكر ,, اخت كريمة

و كفاره يا اخي قالوا شايلها معاك ثقيله برضو الهكر يتجازى هذا الفارغ!


تسلم اخي ودمت لي اخ فاضل.
كن بخير.

Post: #7
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Tragie Mustafa
Date: 19-06-2010, 04:07 PM
Parent: #3

شكرا اخي محمد اي سليمان
Quote:
السلام عليكم ورحمة الله
الحاصل شنو يا أخت ؟
أنا بس شفت واصل مالي الدنيا ملي .
------------------------
عموما شكرا على بياض لود الصائم وأساسي وسيف كامل .
والشكر مقدما أيضا للأخت الكريمة دينا خالد .
شكرا لك يا دينا .

يا حبيب الحصل جاء الهكر وعامل فاتح له ميت بوست هنا
باسم تراجي...وبانها ع ا ه ر ه !!

والجماعه علموا فيها اضان جلدا!! الا القلة الذكرتها.

كن بخير وشكرا لحضورك.

ودينا خالد لم اقرأ ما كتبت ...ولكن بناء على شهادتك شكرا لها ايضا.

Post: #5
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: طارق الكوتش
Date: 19-06-2010, 03:44 PM
Parent: #1

الاخت تراجى سلامات
Quote: ومبرطعين اغلبهم...وقاعدين ومتفرجين كانوا!!


والصاح انهم يتجاهلوه لانو قبل كده انا باريت الهكر ودانى الخور
وبسببه مفرمط جهاز الكومبيوتر 3 مرات > الكلام ده بالجد والمفروض يتعمل
من كل الاعضاء

التجاهل
التجاهل
التجاهل
+ تغيير كلمة السر خصوصا للناس الكانو اونلاين فى وقتها


وبعد الامور تستقر ممكن اى عضو يفتح بوست اذا اراد
يدين و يشجب هؤلاء الرجرجه و خفافيش الظلام



تحياتى

Post: #6
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: عبدالعزيز حسين عبدالرحيم
Date: 19-06-2010, 04:04 PM
Parent: #5

تراجي سلامات


غايتو نحنا ما عاوزين شكر منك وأظن الأخوان الذكرتيهم برضه ما محتاجين شكر لانو عملوا واجبهم ودي فطرتهم البتصرفوا بيها


يا تراجي الكلام الاتقال ما كويس وعيب والله والزول قدر ما يزعل ويغضب منك ما ممكن يحصل لدرجة الإساءة الزي دي والواحد يقعد يحاجج فيك ويفند كلامك بالمنطق وبعض الخشونه الممكنه

لكن في ناس يا تراجي أسلوبهم في عاجز وما بتعرف تعبر وياهو دا أسلوبهم وأنتي قاعدة تغلطي وتكوجني كتير وتتعدي على الناس يعني هسع انت فاتحه ليك بوست متعرضه لي واحده من النسوان المره عندها اخوان واهل وقرايب والكلام دا بزعلهم وفيهم ناس أسلوبهم عاجز ممكن يتصرف معاك اي تصرف

راجعي كتاباتك وكت بتزعلي لمن يتعرضوا ليك وأعرفي انو كلامك بضايق كتير من الناس وخافي الله برضه وأتقيه

Post: #8
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: عبدالعزيز حسين عبدالرحيم
Date: 19-06-2010, 04:18 PM
Parent: #6

تراجي


Quote: والجماعه علموا فيها اضان جلدا!! الا القلة الذكرتها.


ما تظلمي الأخوان

أنا كنت موجود اللحظات ديك والحضور من الأعضاء كان اقل من 40 شخص من الأعضاء وأغلبهم محجم عن التداخل خوفا من الهكر ومعاهم حق

Post: #9
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Elfadil Sabeil
Date: 19-06-2010, 04:20 PM
Parent: #6

سلامات أم حازم

أيه الحاصل، هل الهكر مر من عندك. أم تم تهكير أحد الإخوة و من ثم إستخدم إسمة للإساءة إليكي.

في كلتا الحالتين نقول حسبي الله و نعم الوكيل. فالذهب يزيد لمعاناً كلما تصهر و تطرق.

و لاتنسوووووووا وصية الأخ وليد

Post: #10
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: عزام حسن فرح
Date: 19-06-2010, 04:27 PM
Parent: #9

Quote: طبعا وستصمت الغالبيه
وتعمل ما شايفه؟؟!!

ولا يعرفون بانهم يقننون سقوطهم الاخلاقي.

يا تراجي الكلام ده مِنك ما صاح ... أنا مثلاً شُفت البوستات الفتحا الهكر لكِن أي بوست بعمِلو الهكر ما بدخُل فوقو لأن جِهازي مُمكِن جِدًا يُصاب وحصل لي كِده قُبال ده ... وما شُفت بوست الإدانة ... يبقى مُش كُل مَن لم يدين يبقى ساقِط أخلاقِيًا ... إنتي مُطالبة بِالإعْتِذار للأغلبِية القصدتيها

Post: #11
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: سيف الدولة كامل
Date: 19-06-2010, 04:27 PM
Parent: #9

تسلمي يا ام حازم والعيب عيب وعداك العيب ولعن الله الهكر.

والواجب ما عليه شكر يا تراجي ,,, ربنا يحفظك واولادك يا رب.


تقديري

Post: #12
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: طارق الكوتش
Date: 19-06-2010, 04:32 PM
Parent: #11

تانى نقول

الصاح انهم يتجاهلوه لانو قبل كده انا باريت الهكر ودانى الخور
وبسببه مفرمط جهاز الكومبيوتر 3 مرات > الكلام ده بالجد والمفروض يتعمل
من كل الاعضاء

التجاهل
التجاهل
التجاهل
+ تغيير كلمة السر خصوصا للناس الكانو اونلاين فى وقتها

وبعد الامور تستقر ممكن اى عضو يفتح بوست اذا اراد
يدين و يشجب هؤلاء الرجرجه و خفافيش الظلام



تحياتى

Post: #14
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: abas
Date: 19-06-2010, 04:43 PM
Parent: #12

العزيزه تراجي

انا كنت موجود ومن اول الناس الذين ادنت تصرف الهكر واسالي ود الصايم واساسي زاتهم

وفتحت بوست لي الهكر خصيصا للموضوع ده وقبل ما يبدا بالاساءه اليك

فانتي اختنا وبنخاف عليك زي ما بنخاف علي بناتنا واخواتنا

ونومي قفي مافي زول بيصدق كلام الهكر ده

عارفينك

Post: #15
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: حواء سليمان ابراهيم
Date: 19-06-2010, 04:45 PM
Parent: #12

تراجى سلامات
الحاصل شنو؟؟؟؟؟ يا زولة واصلى وما تتلفتى

Post: #16
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: DKEEN
Date: 19-06-2010, 05:21 PM
Parent: #15

Quote: تقول له شنو الحاصل يا ود العم يقول لك الحقي البلد مقلوبه في المنبر

والله انتي وهم..والقال ليكي الحقي وهم زيك
والهكر النبذ فيكي ده ذاتو وهم..



انتي ماعندك طريقة تكتبي بي اي لغة تانية؟؟

Post: #17
Title: Re: شكرا يا ود الصائم واساسي وسيف كامل.....(الهكر وراني معدنكم)!
Author: Hassan Makkawi
Date: 19-06-2010, 08:22 PM
Parent: #16

Quote: وعامل فاتح له ميت بوست هنا
باسم تراجي...وبانها ع ا ه ر ه !!


المناضلة تراجى
على الرغم من ( الكرت الأصفر ) تجدينى فى صفكم
ومدافعاً عن شرفكم ضد إفتراء الهكر الجائر
والذى يخلو من الرجولة والأنوثة معاً
فما هو إلا خفاش ظلام قذر
يضرب ويهرب ..... من دون هوية
وكل من يأتى بأعراض الناس زوراً وبهتاناً فهو هكر.... وسحقة واجب
ولكن ليس بطريقة هذا الهكر الجربوع


تقبلى كامل التضامن
وعفى الله عما سلف أو دلف