وثيقة الزواج المُعدّلة ..

بنود الوثيقة بشكلها الحالي:


صراع السلطة والثروة
يعتبر صراع السلطة والثروة هو أساس الصراعات التي تأتي لاحقاً، فمن بيده الثروة مؤهل أكثر لأن تكون بيده السلطة وليس هنالك أوضح من مقولة (من لا يملك قوته لا يملك قراره) في هذا الخصوص، لذلك يسعى كل من شريكي المؤسسة الزوجية لإثبات أن الكلمة العليا كلمته وأنه فقط من لديه كامل الحق في التصرف في الثروة سواء كانت أصول ثابتة كالعقار المشترك أو السيارة أو حتى قطعة أرض درجة تالتة أو كانت أصول متداولة كالنقود الحية أو حلي الزوجة والتي تعرف إصطلاحاً بـ (دهب المرة) ..
صراع الموارد
يكون الصراع شديداً هنا نظراً لتعدد الأفراد وشح الموارد الإقتصادية (الماهية) خصوصاً في حالة الزوجة غير العاملة والتي نجدها تحاول بجميع السبل إثبات حقها في الإستفادة من أو إستغلال هذه الموارد بالشكل الذي تراه مناسباً رغم الإعتراضات المتكررة من الزوج الذي يرى أنه صاحب الحق في إستغلال هذه الموارد وإدارتها مبرراً لذلك بأن: في زول فيكم شغال الماهية دي معاي !
صراع الحضارات
وينشأ غالباً بين الزوجين المتحدرين من مناطق جغرافية مختلفة أو حتى من قبائل مختلفة عندما يحاول كل من الزوج والزوجة أن يفرض رأيه ويبسط هيمنته الثقافية(من Culture وليس من Intellectuality) على الأسرة، وذلك بإعلاء قيمة ما إستقاه من بيئته قبل الزواج وبتبخيس وإنتقاد قيم ومصطحبات الآخر والحوار أدناه نموذج مختصر لذلك:
الزوجة بغضب: ستين مرة قلت ليك ما تقول الكلمة دي قدام الأولاد إنت دايرهم يطلعوا زيك إنت وأهلك؟
الزوج بخلعة: يا مرة إنتي جنيتي؟ الكلمة دي من ما عرفتيني أنا بقولا هسي بقت كعبة؟ وبعدين ما لم أهلي؟
الزوجة بإستهزاء: مالم أهلك؟ أكبر مقلب أخدتو في حياتي
الزوج مبتسماً تحت تحت: زي المقلب الأخدتو أنا فيك وفي اهلك
الزوجة محذرة: أوووووعك تجيب سيرة أهلي على لسانك هسي أهلي سألوك
(!!!!!!)
إنتهاك الحريات
ونجده متمثلاً بشكل واضح في منع حرية التعبير للزوجة والتي سرعان ما يتم دمغها بوصف (النقناقة) فقط لأنها تتكلم وتشتكي وتتذمر 25 ساعة في اليوم (بحسب معظم الأزواج) مما تعتبره الزوجة إنتهاكاً لحرية التعبير وتكميماً للأفواه. من جهة أخرى نجد الزوج يشتكي من المساس بحرية الإتصال والتنقل فما أن تلمح الزوجة أي علامة تدل على أنه بصدد الخروج من المنزل إلا وتبادره بالسؤال الخالد: ماشي وين؟ وقبل أن تسمع الإجابة تتبعه بـ : وحا تجي متين؟ لتختم الملاحقة بأن (يجيب معاهو عيش للعشا) ودا طبعاً تكنيك نسائي متّبع وشائع جداً تضمن به الزوجة عدم تأخر الزوج كثيراً بحجة أن ناس البيت مستنينو بي عيش العشا، دا كلو كوم و وحرية الإتصال كوم تاني حيث يجد الزوج نفسه مطالباً بتبرير أي إضاءة للموبايل سواء كانت مسكول أو رسالة أو مكالمة عديل أما الكارثة بحق فهي عندما لا تلاحظ الزوجة أي حركة لتلفون الزوج طيلة فترة مكوثه بالمنزل والذي يكون مغلقاً في تلك الأثناء منعاً للهوا واللبش ..
حق تقرير المصير
وهو ورقة الضغط التي يشهرها كل من الزوجين للآخر من وقت لوقت تذكيراً بالحقوق المهضومة أو إحتجاجاً على موقف معين (صغر أو كبر) أو أحياناً قرفة ساي كدا بس!. وعليه تتكرر حالات حردان الزوجة في بيت أهلها في خطوة أولية منها لتهديد الزوج بإمكانية ممارسة حقها في تقرير مصيرها أو أن يتطوع الزوج من نفسه بإرسالها لبيت أهلها مهددأ بممارسته لنفس الحق إن لم ترعوي وتمسك الدرب العديل متناسين هم الأثنين وحدة المصير المشترك وكلام جيراننا بأن: دخول (أي مكان) مش زي خروجو ..
الحرب الباردة
وهو ذلك النوع من الصراع بين الزوجين الذي لا يظهر للعلن في شكل كلمات مباشرة أو أفعال ملموسة
ليستمر مدة زمنية طويلة متلفاً لأعصاب الطرفين والذي يأخذ عادة شكل أن تحرق الزوجة قميص زوجها الذي يفضله جداً بالمكوة عن قصد أو يقوم الزوج بإيقاظ الطفل الرضيع باكياً في الوقت الذي تكون أمه قد فرغت من (خت حنتها) للتو! وعادة ما يتطور الأمر ليمتد خارج حدود المؤسسة الزوجية متضمناً الأهل من الجانبين و لابد أن نشير إلى أن الحرب الباردة هنا قد تمتد لسنين طويلة تنتهي عادة بتفتت إحدى أطراف الصراع وتحرره من التكتل والهيمنة المحيطة ..
التدخل العسكري
هل تريدون تعريفاً له؟

نصيحة أم لابنها

إن بقيت بخيت ربنا يديك مرا هدية ورضية

السماحة ماضروري لأنو بعد شوية ماحتكون سمحة...حتكون عادية

نصيحة ليك النسوان البقولن ليك ديل أوعك تعرس منهن واحدة!!


1/الفنانة والحنانة والحردانة:


أ/الفنانة: دي حتمرق معاها وتقعد تحوم في الحفلات وتشوف ليك كرسي قداااام
تقعد فيهو شايل عكازك وسكينك في ضراعك وعينك عليها إن راجل بشر ساكت تتحنفش وتقوم إلا يهجروك إتنين مانعين علي الكرسي وتجو نُص الليل راجعين أهلكم والنهار كلو نايمين...



ب/الحنانة: طول النهار برة البيت تحنن في نسوان الرجال وهي كرعيها يكون ماشافن الحنة من سنة ستة والنهار كلو إنت تحاحي في الشفع مايلمسوا الصبغة...



ت/الحردانة: دي حتكرهك حياتك!!! أقل كلمة تتلفح توبها وتجري بيت أبوها وتلحقها إنت وتلقي أبوها...تقعد في طرف العنقريب تطقطق في أصابعيك ومدنقر في الواطة داير تراضيها وترجع البيت...أحسن حل إنكم تسكنوا مع ناس أبوها أو تجيبوا ناس أبوها يسكنوا عندكم عشان توفر المشاوير والجري..



2/ المدرسة والمدبرسة والمفلسة:



أ/ المدرسة: أول حاجة دي مابتقدر تفرق بينك والطلبة !!! وحتقعد تعيد وتكرر في الكلام مليون مرة وما بعيد في الأخر تقول ليك فاهم ياشاااااااااااااطر...



ب/ المدبرسة: تلقاها طول النهار زهجانة وأخلاقها في طرف نخرتها ولو كلكلتها ماتضحك..في النهاية دي حتوديك التيجاني الماحي نزيل إكتئاب...

ت/ المفلسة: دي مادايرة أي شرح!!!



3/النوامة والحوامة واللوامة:



أ/ النوامة. تجي من الشغل نص النهار زهجان تلقاها تانية المخدة وخاتة إيدها تحتها وتشخر وريالتها سايلة وحالتها بالبلا تكرهك اليوم الفكرت فيهو تعرس...



ب/ الحوامة: طول اليوم فوق كرعيها زي عربة الوساخة لايصة الحلة من بيت لي بيت وتدخل البيت قبل رجوعك من الشغل بي خمسة دقائق تجري تولع النار وتديك القطر قام وأول ماينتهي الغداء تدخل في سفنجتها إستعدادا لجولة جديدة...



ت/ اللوامة: ده نوع مزعج جداً لو جبيت سيرة أخوك ساااااااكت تفتح فيهو:
الله يسألني سنتا ديك وكت إنت سافرت وخليتنا بلا قروش وسافرت يدخل علينا ويمرق مدلدل إيديهو ولا كيس موز ساكت ماجابو لينا...والعجب أمك ....هييييييييييي والله أمك دي أصلها مابتريدني ومن تشوفني تنطلق فيها النيران وتمد قدومها...


4/ البوبارة والكوبارة والخبارة:


أ/ البوبارة: دي تحملك فوق طاقتك وتشريك المابنشري ولو جونكم ضيوف في البيت تجري علي علبة الدهب وتتعنكش كلها وتقعد تنضم بي إيديها وكرعيها ورقبتها وأضنيها عشان توري الناس الدهب...



ب/ الكوبارة: دي تكبر ليك أي موضوع وتسوي ليهو توم وشمار وتقول ليك (ناس القبور دقوا الطنبور) ولو شافع من شفعك عتر ووقع!!! هيييييييييي تخُت إيديها في نص رأسها وتصرخ وووووووووب علي ووووووووووب علي الولد مااااااااااات والمصيبة لو كنت نايم وسمعتها تقوم مخلوع وتمرق من الأوضة جري ولو كان عندك قلب تمرق من المهد إلي اللحد طوالي...



ت/ الخبارة!!!: دي بتحب الخبورات والشمارات زي عيونها ولو في نضم تلقاها سكتت الشفع عشان تسمع الجيران!!! مالهم بيهرجوا وصوتهم عاليولو كانت بتكوي ليك في قميص ولا جلابية قطع شك حيكون أو تكون من أعداد ضحايا مصنع الشفاء وممكن الملاح يحرق, الجردل يكون تحت الماسورةيتملي ويغرق البيت وحرمكم المصون واقفة فاتحة خشمها زي التمساح في نص الليل تتصنت علي الجيران.



5/ الممحوقة والمطلوقة واللايوقة:


أ/ الممحوقة: دي لو جبيت ليها دكان كاااااامل ختيتو في البيت تكملو في يومين..


ب/ المطلوقة: واضحة وضوح الشمس في السوق العربي ومادايرة أي شرح


ت/ اللايوقة: دي حكايتها تانية!!! تمسك في موضوع يحلك منو الجليل الرحيم: يادا....هوووووي...الليلة يايمة طرشتَ؟؟؟....وقدُر ماتطنش أنت هي تزيد إصرار وممكن لو عدمت الحيلة تجي جنبك وتخجك خجة جااااااااامدة عشان تنتبه للنقة...

مرحب بيك يا دودي ..

وشكراً على المشاركة اللطيفة




ــــــــ
حذفت جزء من المداخلة ..

Quote: وينشأ غالباً بين الزوجين المتحدرين من مناطق جغرافية مختلفة أو حتى من قبائل مختلفة عندما يحاول كل من الزوج والزوجة أن يفرض رأيه ويبسط هيمنته الثقافية(من Culture وليس من Intellectuality) على الأسرة، وذلك بإعلاء قيمة ما إستقاه من بيئته قبل الزواج وبتبخيس وإنتقاد قيم ومصطحبات الآخر والحوار أدناه نموذج مختصر لذلك:

تيسير ازيك... انا عايزه اديك مثال على الهيمنة الثقافية.... طبعا الحوار ما بكون بالشكل الشيييييييييييين المكتوب ده... .. المثال هو القراصة.... نسابتي المحس ديل بحبوا القراصة شديد... وانا اهل ابوي جعليين بحبوا الكسره شديد... في بيت اهلي كان ولا زال الوالد ممشي برنامج الكسره ده... وطلعنا كللللللللللللنا بنحب الكسره... وما بناكل القراصة لانه الوالد ما بحب القراصة..... لما جيت بيتي.... قراصتي اول شي ما مرّت من الامتحان بتاع المحس... إلا قبل شهور قليل... يعني اشتغلته training اربعة سنين حتى بقت تنفع... اها ده ساعدني إنه ادخّل ثقافة الكسرة والعصيدة في البيت.... محمود طلع بحب الحاجات دي كلها ومعاهم القراصة.... أما انا، يومنا اليكون غدانا قراصه.... يا قعدت اتفرجته عليهم وهم بياكلو، يا عملت لروحي حاجه مخصوص.... يا جابو لي من برّه.... لكن ما بدخّل يدي فيها....

عندي صاحبتي راجلها محسي برضه، بياكلوا القراصة دي زي المقرر... كلللللللللللللللللللللللللل يوم

وبرجع للمزيد

Quote: أما انا، يومنا اليكون غدانا قراصه.... يا قعدت اتفرجته عليهم وهم بياكلو، يا عملت لروحي حاجه مخصوص .... يا جابو لي من برّه .... لكن ما بدخّل يدي فيها

ملاسي هسي الصفقة دي لتصرف مريم الدبلوماسي
ولا عشان إنت زاتك ما بتريد القراصة وبتعمل زيها

Quote: صراع الحضارات وينشأ غالباً بين الزوجين المتحدرين من مناطق جغرافية مختلفة أو حتى من قبائل مختلفة عندما يحاول كل من الزوج والزوجة أن يفرض رأيه ويبسط هيمنته الثقافية(من Culture وليس من Intellectuality) على الأسرة، وذلك بإعلاء قيمة ما إستقاه من بيئته قبل الزواج وبتبخيس وإنتقاد قيم ومصطحبات الآخر Tayseer

you win some and lose some

اهااا يااا هنتنجتون و فوكوياما
انتي عارفة الوالدة جعلية و الوالد شايقي، احب الكسرة و اموت في القراصة، او تطلعي زي اخوي، لا بيحب دي لا دي، و طلع لينا حضارة تالتة اسمها حضارة الاكل من غير نشويات. او لو بااااالغ و جا علي نفسه، ياكل حاجة خفيفة (يعني ما القراصة) و ما مخمرة (يعني الكسرة و اخواتها)
يعني رغيف كويس

و حاليا في البيت، نفطر تقلية و نتعشي ساور كراوت :)

Quote: أدناه نموذج مختصر لذلك: الزوجة بغضب: ستين مرة قلت ليك ما تقول الكلمة دي قدام الأولاد إنت دايرهم يطلعوا زيك إنت وأهلك؟ الزوج بخلعة: يا مرة إنتي جنيتي؟ الكلمة دي من ما عرفتيني أنا بقولا هسي بقت كعبة؟ وبعدين ما لم أهلي؟ الزوجة بإستهزاء: مالم أهلك؟ أكبر مقلب أخدتو في حياتي الزوج مبتسماً تحت تحت: زي المقلب الأخدتو أنا فيك وفي اهلك الزوجة محذرة: أوووووعك تجيب سيرة أهلي على لسانك هسي أهلي سألوك Tayseer

شوفي طريقة الكلام بالله!
مافي من فضلك، لو سمحت، لو بتقدر حاول تتجنب، بلا بلا بلا
غايتو يا تيسير، مثلك القاطعاهو من سفنجتك ده، ما جا زاااتو جنب الحضارة
لووووول

Quote: اهااا يااا هنتنجتون و فوكوياما

لن أرضى بغير المغربي صاحب نظرية صراع الحضارات داك (المنجرة) ولا اسمو منو هو؟
"طبعاً المنجرة دي اسم الدلع بتاع الأكل أو العضة بلغة الراندوق يا رحاب"

وبعدين صراع الحضارات ما إلا يكون في المنجرة بس
في إستعمال مفردات معينة في الآكسنت وجرجير الكلام في اللبس وحتى في العبادة وأكتر من كدا
لو بقت على الأكل هينة ..

Quote: و حاليا في البيت، نفطر تقلية و نتعشي ساور كراوت :)

نموذج حي للتعايش السلمي وحوار الحضارات برضو
حضارات شنو دا تعايش عابر للقارات عديل

Quote: شوفي طريقة الكلام بالله! مافي من فضلك، لو سمحت، لو بتقدر حاول تتجنب، بلا بلا بلا غايتو يا تيسير، مثلك القاطعاهو من سفنجتك ده، ما جا زاااتو جنب الحضارة لووووول

يا رحاب شكل الحوار الماعاجبك (وما عاجبني أنا زاتي دا) قاعد يحصل
وأنا سمعتو شخصياً بالصدفة من زوجين أنا ما بعرفهم ولغاية الآن مندهشة

إنتي قايلة الوثيقة دي إتعملت من شوية؟

كيفك يا مريم ..

نفس الحكاية عندي مع ملاح الويكاب لمن كنا معرسين أنا وواحد من بلدكم
يوم يشتهي الويكاب دا إلا يمشي ياكلو في بيت أسرتو وأنا يوم التركين إلا في بيت أسرتي
لكن مدورين عصيدة وقراصة وكسرة عادي
ما تفرزي الجعلي من الدنقلاوية

حوار حضارات وكدا

سأعود لباقي البنود ..

إدارة الصراعات
فض النزاعات ودرء الكوارث
وتدويل القضايا

Quote: نفس الحكاية عندي مع ملاح الويكاب لمن كنا معرسين أنا وواحد من بلدكم يوم يشتهي الويكاب دا إلا يمشي ياكلو في بيت أسرتو وأنا يوم التركين إلا في بيت أسرتي

على نفس القياس، قيسي ملاح الروب الابيض (البي بصله صاحية داك)، انا بمووووووووت فيه... واول ما امشي اهلي، اول طلب بطلبه..... والفسيخ... انا الزول الوحيد الممكن يوزّعه مجاني... وعندي فسيخ في الفريزر ليه سنتين.... نادر بياكله بالقطّاعي.... لانه الفسيخ ما ممكن الزول ياكله براه ههههههههههههههههه

رحاب الخليفة.... غايته المابي النشويات ده مرتااااااااااااااااااااح، انا مشكلتي في الحياة اني بحبها (عيش، باستا، كسره، رز... ) you name it، ولما اكل اي واحده منهم سمرا، بحس بروحي في المستشفى كده...

Quote: وعندي فسيخ في الفريزر ليه سنتين.... نادر بياكله بالقطّاعي.... لانه الفسيخ ما ممكن الزول ياكله براه ههههههههههههههههه

فسيخ شنو فسيخ دا محترم خالص مقارنة بطيب الذكر التركين
غايتو دا لو نادر أكلو وجا تلاتة يوم ما حتخليهو يدخل البيت

التركين دا إحدى موروثات الحضارة النوبية العظيمة تقول لي شنو ..

يا نسوان سلام

رايكم شنو لو تفتحوا لينا بوست جميل كدا عن الفرق بين صواني الأكل بتاعت قبائل السودان
يعني الجعلية تتكلم عن صينية الجعليين والمحسية عن صينية المحس والدنقلاوية وكدا
عشان نعرف الفرق واحل اكل من بما انو كلو حلو ما دام طبختوا سودانية فلابد وانه يحمل
راتحتها الطيبة.


كسرة:
في واحد كان داير يعرس هندية
كلم شيخوا
شيخوا قال ليهو
والله الهندية ما تجي ضفر السودانية

---------------

ولكن التحية

الصادق

Quote: رحاب الخليفة.... غايته المابي النشويات ده مرتااااااااااااااااااااح Mariam

يا مريم، هو طبعا قلبها بروتينات
قال البروتينات غذاء العضلات :)

Quote: يا رحاب شكل الحوار الماعاجبك (وما عاجبني أنا زاتي دا) قاعد يحصل وأنا سمعتو شخصياً بالصدفة من زوجين أنا ما بعرفهم ولغاية الآن مندهشة Tayseer

بصدق انه حصل حقيقة

و نمشي بعيد ليه؟ في سودانيزاونلايلنا ده تشوفي العجب العجاب :)

المهم الزول يلقى ليهو زول يوقع معاهو العقد دا .. ما يبقى ايجار من الباطن ..

Quote: المهم الزول يلقى ليهو زول يوقع معاهو العقد دا .. ما يبقى ايجار من الباطن ..

يا حميدة ..

توقيع العقد أو الوثيقة بشكلها الحالي في غير مصلحة أي طرف

Quote: التدخل العسكري هل تريدون تعريفاً له؟

أيون







plz

اختنا تيسيير وباقي الحريم

وطيب .

انتو الكلام كلو في ايديكم .

مودات كبيرات

Quote: انتو الكلام كلو في ايديكم . Mohamed

اللــــــه
ده النوووووم البيجيب اللووووم يا محمد
كله في ايدينا و حتي لمن تبوظ في ايدينا
وين ال ?partnership

مرحب بيك يا الصادق سلمان ..

Quote: يا نسوان سلام رايكم شنو لو تفتحوا لينا بوست جميل كدا عن الفرق بين صواني الأكل بتاعت قبائل السودان يعني الجعلية تتكلم عن صينية الجعليين والمحسية عن صينية المحس والدنقلاوية وكدا عشان نعرف الفرق واحل اكل من بما انو كلو حلو ما دام طبختوا سودانية فلابد وانه يحمل راتحتها الطيبة.

أنا غايتو دي مشاركتي في الموضوع دا
مفردات وأكلات كتيرة ليها علاقة بالمطبخ السوداني

أنضف الكمونية (للنساء فقط) ..

ونشوف باقي البنيات حيجيبوا لينا شنو ..

داليا ..





نموذج سريع للتدخل العسكري

والبعض يا داليا يعتبر حضور الـ mother-in-law أكبر تدخل عسكري يهدد أمن المؤسسة الزوجية

أهلاً بيك محمد الواثق ..

Quote: اختنا تيسيير وباقي الحريم وطيب . انتو الكلام كلو في ايديكم . مودات كبيرات

كلامك دا ممكن يكون صحيح حسب نظرية الراس والرقبة