Post: #1
Title: ... تيسيــر عوووضة ..إلخ . بالمزيكــا ( 2 )
Author: tmbis
Date: 04-02-2007, 10:13 PM
ودرملية .. جني .. ناجي الملك .. عبد الله وداعة الأمين .. معاوية الطيب .. ثابت محمد .. خالده . د. فيصل محمد .. د. محمد علي المشرف .. إبراهيم الجريفاوي .. د. ياسر الشريف .. نور الهادي عوض .. عمدة الأصلي .. نهال كرار .. حليمة عبد الرحمن( الحاجات ح انزله هنا برضو ) .. نهــال الطيب .. عبود أحمد النصيح ... هيثم عبد العزيز .. لنــا مهدي طبعا اسمك سقط سهوا قبيل  والله ما حقاره وما قاصدين .. ماجدة عوض خوجلي .. اسعد .. علي محمد علي بشير .. حسام يوسف ..
شايفه الناس الفوق ديل كلهم .. انا بعتذر ليهم يا تيسير ..
لكن انت مطالبة بالاعتذار ..
وفورا طبعا ما في طريقة تغني لينا راسنا ده بنخسر عليهو قروش ..
الآعتذار لعدة اسباب:
- مرت اتنين وسبعين ساعة .. ( ونص ) وكسرتي في اضانك قشة .. وطلعتي بتاعت اعلام ساكت.
- في البوست موضوع النقاش  ما حددتي لينا الفــورة كم ..؟ وإنت زي ما عارفه اهم حاجة عندنــا مسالة الفورة دي ..
لما تجي بنحدد المسالة دي ..
في حفل وداع فيصل الصحافة بالرياض .. نظم شباب الصحافة ليلة جميلة .. تجلى فيها فيصل الصحافة .. عجبتني روح شباب الصحافة جدا والتعامل الراقي بيناتهم .. عجبتني أغنية فيصل دي .. وعجبني اكتر لما لقيتهم كلهم بيرددوا فيها معاهو بي صوت واحد ..
سؤال .. الاغنية دي شاعره منــو ؟؟
العضو تمبس .. أنت مطالب بالإعتذار فوراً !
|
Post: #2
Title: Re: ... تيسيــر عوووضة ..إلخ . بالمزيكــا ( 2 )
Author: Soumeta
Date: 04-02-2007, 10:16 PM
Parent: #1
YYYYYYYYYYYYES..
Tinbis ja!
|
Post: #3
Title: Re: ... تيسيــر عوووضة ..إلخ . بالمزيكــا ( 2 )
Author: tmbis
Date: 04-02-2007, 10:23 PM
Parent: #2
يا سمسم ..
عامله كيف؟
عارفه مفروض الكود بتاع الحفظ ده يجي تحت الملف مباشرة الحصل عليهو شنو يعني ..؟
بلاي يا سوميتا ما تذكرني اني كنت مافي ..
رايك شنو في الاغنية دي ؟
قبلما تيسير تجي .. عارفه ما بيعجبه العجب ولا الصيام في رجــب .. وكان الاغنية سمحه ح تطلعه لي اي كلام
|
Post: #5
Title: Re: ... تيسيــر عوووضة ..إلخ . بالمزيكــا ( 2 )
Author: tmbis
Date: 04-02-2007, 10:37 PM
Parent: #3
تنكر جمال عشرتنا ديك ..تمشي وتفوتنا وما عليك
إنت البتدي الناس أمل
وإشراقة
من ضحكة عينيك
يـــــــــــــــا .. بهجة الورد المنّور لي إبتسامات الصباح
من بدلك ؟
ومين شال حنانك يا حنين خلانا راح ؟
خلاك وحيد في سكتك ...
ليلك توسدو بالجراح
أعزي حسنك بالدموع .. يحليل ضميراً ما استراح ..
ســــــــــاعـــــات .. أتوه بالليل أنا وأرحل ..
مع النجمات بعيـــــــــــــــــــــــــد
واتأمل الزمن اللي راح .. من عمري
في عيونك سعيد
انــا من فقدت الإبتسامة الحلوة ما صادفت عيد
كل ما السنين داوت جراح يظهــر مكانه جرح جديد
نــاكر الجميل ما بلقى حق . وكيف تبقى ناكر للجميل .
بدلّت أحبابك خلاص ما كان ده عشمنا فيك
نحن البنينا عليك أمل وأشتقنا للريد ...
في عينيك
كتبت لي ريدنــا النهاية وتقول صلاتنا حرام عليك
ناكر الجميل ما بلقى حق وكيف تبقى ناكر للجميل
عشرة زمان يحليله فيك ..
وإيه بدّل الإشراقة
ليك..
|
Post: #16
Title: Re: ... تيسيــر عوووضة ..إلخ . بالمزيكــا ( 2 )
Author: تيسير عووضة
Date: 04-03-2007, 02:46 PM
Parent: #3
Quote: رايك شنو في الاغنية دي ؟
قبلما تيسير تجي .. عارفه ما بيعجبه العجب ولا الصيام في رجــب ..
وكان الاغنية سمحه ح تطلعه لي اي كلام |
ياخ الأغنية سمحة
وبالأوركسترا مبالغة
لكن قبل ما أقرا الكلام دا كنت دايرة أجي أقول ليك
لوسمعت تسجيل للأغنية دي بالعود بتقوم جاري
مبالغة شديد
Quote: الاغنية جديدة لنج علي،،
لكن اكان ما عجبت تيسير
فكها فيني بعرف اجيهها ليك زينتك،، |
سوميتا ياخ ماممكن ..
الغنية دي من أنا في أولى إبتدائي بسمع فيها (ماتسأليني يعني متين  )
|
Post: #4
Title: Re: ... تيسيــر عوووضة ..إلخ . بالمزيكــا ( 2 )
Author: Soumeta
Date: 04-02-2007, 10:37 PM
Parent: #1
الاغنية جديدة لنج علي،،
لكن اكان ما عجبت تيسير
فكها فيني بعرف اجيهها ليك زينتك،،
غايتو بعد ده اظنك عرفت إنو الناس دي بتحبك قدر شنو،،
و قدر شنو إنت زول مهم في في تماسك الناس الهنا ديل،،
ف بلاهي تاني الحركات المبشتنة دي ابعد لينا منها،،
بعد ده منكن اواصل حمبكتي منك عادي،،
|
Post: #6
Title: Re: ... تيسيــر عوووضة ..إلخ . بالمزيكــا ( 2 )
Author: tmbis
Date: 04-02-2007, 10:41 PM
Parent: #4
| Quote: بعد ده منكن اواصل حمبكتي منك عادي،، |
تحمبكي بكلم ليك أمك مباشرة ..
الايامات دي عندنــا مشروع مشترك .. وأعملي حسابك
بلاي تحمبكي مني انا يا سوميتــا ..؟
|
Post: #7
Title: Re: ... تيسيــر عوووضة ..إلخ . بالمزيكــا ( 2 )
Author: عبدالله وداعه الامين
Date: 04-03-2007, 03:48 AM
Parent: #6
تامبا يا جميل
ياخ
ينصر دينك ودين ابو اهلك ودين ميتين ميتينك
ياعولاق الشوق الساكن في الاعماق خليني ادينك
يا الفجرت الحب الساهي ويا الصحيت جوايا حنينك
فرتق عقد الريد يا سادن وفي الاشواق خليني رهينك
اقطع وهج الشوق بي وشك ياخي تعال وادينا سنينك
اعطن وش الناس التسال في الافراح نسيها انينك
وشوفا دوام عن حالك تسال وخايفة تكون فطستا معينك
يا موهوم
يا موهوم بي وهم الحاضر وشايلة الدنيا محنو ايدينك
سجم امات القلب الرادك لو بـيكوس ويخلي معينك
العن كل الشوق العفّن وما اداني معاني تصينك
وينصر دين ميتين ابو امك ودين ميتين ابو ام ميتينك
وينصر دينك
ابيت اتمها حقارة بث
وجد سعيد جدا انك هنا حبيبنا
شكرا جميلا يا قامة واستقامة
ويديك الف عافية
وشكرا تاني لانك هنا
يا طاعم جدا وماسخ زي الشهد النقط منك
ياممسوخ بالفطرة مندي وهاري الناس ساقيهم حنّك
شدد لي على النون في حنك واكسر الحاء عشان ما تتقري حنك بفتح الحاء والنون
وينكسر حنكي انا
|
Post: #8
Title: Re: ... تيسيــر عوووضة ..إلخ . بالمزيكــا ( 2 )
Author: Soumeta
Date: 04-03-2007, 04:03 AM
Parent: #7
عبدوووووووش،،
بعد ما مشتاقين،،
ياخ انا قصيدتي دي ما بقبل إدوها ساااااااي كدي،،
في حقوق سمع اول و في حقوق ضحك و حقوق ذكريات زاتو،،
تنبس ما تتحسس الموضوع عادي،، :P
|
Post: #10
Title: Re: ... تيسيــر عوووضة ..إلخ . بالمزيكــا ( 2 )
Author: حمد اسماعيل
Date: 04-03-2007, 04:18 AM
Parent: #8
تمبسكو ازيك
كنته عايز اقول ليك لما تجى راجع شوف
ليك بدله تانيه لانه صاحبك ياسر كرهنى
لو ماشى الدكان يقول لى دقيقه اشك بدلة
صاحبى قبل ما يجى .
بركه الجيت وبركه الجيت اصلك ما مشيت يا جميل .
حمد
----
|
Post: #11
Title: Re: ... تيسيــر عوووضة ..إلخ . بالمزيكــا ( 2 )
Author: عبدالله وداعه الامين
Date: 04-03-2007, 04:19 AM
Parent: #8
Quote: عبدوووووووش،،
بعد ما مشتاقين،،
ياخ انا قصيدتي دي ما بقبل إدوها ساااااااي كدي،،
في حقوق سمع اول و في حقوق ضحك و حقوق ذكريات زاتو،،
تنبس ما تتحسس الموضوع عادي،، :P |
سوميتا
البت السارقة الضو من عينا
وراسمة محبة الدنيا وريدة
بعد الشوق كيفنك انتي؟
وكيف الحال ان شاء الله شديدة؟
نشتاق ليك يا روح العافية
بنعفي الروح لو تبقي وريده
والله يا عزوزة قصيدتك يستاهله الود علاء دا
وعشان جيتو السمحة دي نديهو كل شيئ جميل
لانو بدينا جمال اكتر من ما بنديهو
ود كتير وتسلمي يا ستهن
|
Post: #9
Title: Re: ... تيسيــر عوووضة ..إلخ . بالمزيكــا ( 2 )
Author: lana mahdi
Date: 04-03-2007, 04:14 AM
Parent: #1
تمبس
عارفاهو سقط سهواً هو كان بيقدر يسقط ما سهواً في منظومة الأخوة الحبيبة دي؟
Quote: الآعتذار لعدة اسباب:
- مرت اتنين وسبعين ساعة .. ( ونص ) وكسرتي في اضانك قشة .. وطلعتي بتاعت اعلام ساكت. |
عينت نفسي موكلة عن تيسير لحين عودتها من مهامها((((لاحظو مهامها دي))))
وعليه لا إعتذار لموكلتي
|
Post: #12
Title: Re: ... تيسيــر عوووضة ..إلخ . بالمزيكــا ( 2 )
Author: Emad Abdulla
Date: 04-03-2007, 06:56 AM
Parent: #9
إنت طوااااااااااااااالي شايل حنانك و خاتيهو ؟؟
جارسيا ماركيز يا فك الجزر .
لكن فيصل غناي و الله ..
قال ورث الصوت ده من حبوبتو ( شوف المكنة التعبانة ) ..
قال لي مرة حبوبتو دي راقدة تسمع الشعراوي في التلفزيون , تنوم و تصحي و الشعراوي شغال زي الترتيب , قالت ليهم بعد ما قفلت معاها من النقة : إنتو يا بُطان .. الراجل المن زمن الصحابة ده الله ما كتبلو سكات ؟؟
فيصل ده خلي يخش السندباد و يغني ليك يا طير يا ماشي لأهلنا ..
شي بديع يخليك طوالي تكب حنان لمن تآآآآآآمن ( بتنفع معاك الإنشكاحات دي ) .
ما ح تعجب تيسير الأغنية دي , ده جيل ناس ( ياني ) الإغريقي ..
إضافة لطول لسانها ( الذي هو متبري منها ) و فقرية ما بيعجبها شي ..
و ح تدخل ليك بالسيناريو " الإفتراضي " ده : الأوركسترا زي ما هارمونيزيد , دونت يو ثينك ؟؟ , الصوت في الخلفية دايع ( ضايع ) بس ما بتال ( ما بطال ) .. و الكلمات يعني , لكن فيسل ( فيصل ) إز دوينق قوود .. آي لايك إت إني ويز , وونت ديس أبوينت يو .. ثانكس تامبا ( و معاها جدعة الشعر بطرف السُباع " الصباع " لورا ) 
تجي تقول ليها خليهو في حنانك و ماعارف كيف كيف ؟؟
أهدي الأغنية لصديق الموج مثلا ..
صلاح غريبة .. برضو مثلا
|
Post: #13
Title: Re: ... تيسيــر عوووضة ..إلخ . بالمزيكــا ( 2 )
Author: عماد محمود علي
Date: 04-03-2007, 07:16 AM
Parent: #12
أخي الحبيب تمبا
سلامات كتيييييير ، ، ،
ألف حمد لله على السلامة ، وبعدين يا راجل بطل بخل ، لما تلاقي اتصال من زول أتصل شوفوا مالو اتصل ، هسه ده لو كان جكس كان شحنت الموبايل من اقرب بقالة . تسلم .
| Quote: في حفل وداع فيصل الصحافة بالرياض .. نظم شباب الصحافة ليلة جميلة .. تجلى فيها فيصل الصحافة .. عجبتني روح شباب الصحافة جدا والتعامل الراقي بيناتهم |
شكراً تمبس .
|
Post: #18
Title: Re: ... تيسيــر عوووضة ..إلخ . بالمزيكــا ( 2 )
Author: تيسير عووضة
Date: 04-03-2007, 03:07 PM
Parent: #12
عماد يا أصلي ..
أنا من الصحافة ومافي زول من الصحافة وضواحيها (الديم مثلاً)
ما بيعرف الغنية دي وما إتربى عليها وقطعت فوقو عِرِق ..
تقول لي ما حتعجبا الغنية ياخ ؟
* يا عماد عشان أوريك حق الدناقلة :
لي ساعة بكتب في كلمة (ضواحيها) وبمسحا
ضواهيها
ضواحيحا
ضواهيحا
أبت تتكتب لي لغاية مافي النهاية كتبتها كدا
كدي شوفا لي صاح ولا غلط
|
Post: #17
Title: Re: ... تيسيــر عوووضة ..إلخ . بالمزيكــا ( 2 )
Author: تيسير عووضة
Date: 04-03-2007, 02:54 PM
Parent: #9
يا لنا ..
Quote: عينت نفسي موكلة عن تيسير لحين عودتها من مهامها((((لاحظو مهامها دي))))
وعليه لا إعتذار لموكلتي |
أيوة كدا الكلام ..
بس لو تبقي (شيوعية) يبقى زيك مافي
|
Post: #14
Title: Re: ... تيسيــر عوووضة ..إلخ . بالمزيكــا ( 2 )
Author: تيسير عووضة
Date: 04-03-2007, 02:04 PM
Parent: #1
علاء منصور ..
إعتذارك مابفيدك .. العملتو كان بإيدك
case closed
|
Post: #15
Title: Re: ... تيسيــر عوووضة ..إلخ . بالمزيكــا ( 2 )
Author: تيسير عووضة
Date: 04-03-2007, 02:13 PM
Parent: #1
| Quote: مرت اتنين وسبعين ساعة .. ( ونص ) وكسرتي في اضانك قشة .. وطلعتي بتاعت اعلام ساكت |
ومالو الإعلام , عيبو لي ..
يا عثمان عووضة تعال شوف تمبس دا
| Quote: في البوست موضوع النقاش ما حددتي لينا الفــورة كم ..؟ وإنت زي ما عارفه اهم حاجة عندنــا مسالة الفورة دي .. |
هاهاهاهاهاها
كان زمان
هسي كان قلت الفورة عشرة تكون ما قصرت
واي يا بطني ..
|
Post: #19
Title: Re: ... تيسيــر عوووضة ..إلخ . بالمزيكــا ( 2 )
Author: غادة عبدالعزيز خالد
Date: 04-03-2007, 03:17 PM
Parent: #15
الى تمبس و تيسير
و كل جميل
لكم الود أكملة
غادة
|
Post: #20
Title: Re: ... تيسيــر عوووضة ..إلخ . بالمزيكــا ( 2 )
Author: نهال الطيب
Date: 04-03-2007, 07:09 PM
Parent: #19
إنت البتدي الناس أمل
وإشراقة
من ضحكة عينيك
يـــــــــــــــا .. بهجة الورد المنّور لي إبتسامات الصباح
يا سلام جابني الغناء العذاب ده لكن ما دايرين التسجيل بالعود كفاية جرس نبقي في طور بكاء كمان
تمبس بركة الجيت
|
|