تماضر... أيتها المعتوهة...

تماضر ، عينى باردة ، أنا فخور بالأنتماء الى وطن منحك هذه الخصوبة و هذا التدفق. شهر مايو لم ينتصف بعد و تماضر فى قلب العصر و فى قلب البورد تكتب و ترسم بالفصحى و بالدارجى كتابات سودانيات مفرحات و مؤلمات ، صاخبات و هادئات ، شاعرات و ناثرات،.
لقد وضعت مساهمات تماضر الرئيسية منذ بداية مايو 2003 فى مكان واحد. و انظر هذا التنوع البديع فى الموضوعات و تبديات موهبة تماضر حفظها الله لنفسها و لاطفالها و لنا نحن المعجبين بها و بكتاباتها
ــــــــــــــــــــــــــــــــ

1

انور ابو غيداء... ضيف لا يُسكت عنه





عفواً، يا صديقى الجميل، فأنا انشر رسالتك هنا:


From: anwar abu gaidaa
To: Tumadir
Subject: salamaat

هى يا المبروكه كيف حالك
وعمنك طيبه
وعيالك ان شاء الله ما متحسسين من حاجه
اها نحنا طيبين طب
علا كان ختينا المطر ال بلا سبه ده؟؟
نحن هنا بخير ونحاول ان نجعل من الفسيخ دهن لوز وماء سفرجل وياسمين؟
انا انور ود بتول الغناى ؟وده اسم البلد
وود عقد الجلاد وده اسم ناس الخرتوم؟
علا اساسا انا ودعبد الرحمن ود المهل
عذرا ان اقتحمت خلوتكولكن اسعد دوما عندما ارى ناس قبيلتى يحققون اشياء قد تصعب على الغير وانتى تقودين ما اتاحه لنا الفضاء وتستغلين كم من المساحات ادبا ثقافه وعلما وفنا
ليكى الود
نسيت اقول ليك انا فى هولندا وبينى وبين الصادق فريقين بس؟ انا ركن مع بلجيكا؟
معاى زوجتى
وعندى بطنتين
ضكر وانتايه
الانتايه البكر والتنى الجنى اب راس ياسين
اخو غيداء
ليك الود
واسف ان كنت تسببت فى اى حاجه من عطله والله كدى
دحين اعفى لى
ودعتك الله
انور
ـــــــــــــــــــ

2

امرأة لا يأتيها الطلق.....

كيف انزعك من انسجتى؟؟

قالت

كانت ترقد ، وحملها ماثل فى بطنها ، ممدده كجذع شجرة

لم يأتها الطلق فى الميعاد

تشخص ببصرها الشاحب نحو السماء فى شفق المغيب
السماء كانت تجر اثوابا ملونة فى الافق الشفيف

القابلة لم تأت ، ولا جاءت النسوة يحرقن البخور

اعرف كيف تكونت ثمرتك ؟؟؟
قالت

لقحتك البيادر غفوة فى المهاوى السحيقة ، والعصافير صادرت بذرتك الى وديان الصحو والشروق

فى ليلة النهر ،

يوم ان مشت النسوة الحافيات الى النهر واختلطت اجسادهن بجذوع شجر الغابة؟؟أتذكر ذلك المشهد؟؟؟

كن يغنين بصوت دافىء همهممات تروى حكاية البداهة ،

كانت اصواتهن توقظ وحوش الغابات واليفها ، وكانوا يمشون صوب النهر باقدام حافية
بتؤدة ،

خطوة
خطوة

وكانت الكائنات، كل الكائنات تسير خلفهن، بنفس الخطى الصوفية وبنفس الترقب، ترقب لبادرة ما،

وجه عذراء، هلال، نجمة او لملاك او لرسول

" قالت "اعلنتك جنينا، ذات اليوم


ظلت مسجاة فى اللامكان هكذا الى ان اقشعر الظلام فى بدنها

وبعد السفر الاخير

خفق الشىء فى دواخلها ،

وانسكب الدم من بين فخذيها كشوق عارم
دما اسودا كالقار ، ،مفاجىء ومدرار

صرخت حتى ايقظت جيوش الظلام
امسكت بجذوع الاشجار
تندى جسدها بالعرق ،


وانتفخت عروق عنقها وهى تصرخ من فرط بدائية التكوين

واقتربت من جوهر الكائنات

كيف انزعك من انسجتى؟ قالت

اخرج الى الطرقات الليلية ،
اخرج الى بهرة الضوء ، وسدرة المبتدأ
اخرج من اوردتى ،
خلصنى من نبضك الطبل الضارب فى نخاعى
خلصنى من صوتك الداوى فى ارجاء روحى
خلصنى من اكتمالك داخلى ، فأنا بك اذوى واقترب نحو النهايات الحريق
خلصنى من فجيعة الحمل بك

قالت

تمدد هو كسهم، وافرد ساقيه الجنينيتين، فى جداراتها المتمزقة، وتثاءب قليلا ونام

شلال الدم، وحبل الولادة المتدلى من اغوار الاعالى، يتدلى من الاعالى ، والقابلة لم تأت
والكائنات ما زالت تمشى صوب النهر وتغنى حكايات البداهة
مع النسوة الحافيات

وجاءت عرائس الوجد ، حوريات البحر ، يجددن الغناء
اى جنين هذا اى جنين؟؟
اى دمع هذا الذى تسكبين
اى رحمة لاتأتى الى ام فى نذر التكوين
قومى يا امرأة من جذوع الاشجار
صبى ماء فى وعاء المياسم والازهار
واهديها للطير
اهديها للطير
اهديها للطير
يا امرأة حبلى بالليل ، اعطيها للطير
يا امرأة لا ياتيها الطلق
اهديها للطير

وسكتت الجميلات المغنيات
وانسحب المشهد كله

وكأن شيئا منه لم يكن قد حدث

ــــــــــــــــــــــ

3


بوست ...الغلط...لاهل العوض ، الرحمابى.. بدر الين شناه ..ومن لف لفهم

من لف لفكم ديل ناس الملاعمر وبت قضيم ودافى وتمبس وملكة اللف لفكم شيرى



ويا اهل العوض
من ما كتبت ليك غنمى طرعى

فى بوست حصة المحفوظات

وانت كتبت لى : دجاجى يالغيتول حبة

وانا بقرقر

المهم لقيت فى يالغيتول حبات زى دى كتيرة جدا

فى سغافتنا السودانية

وما تخلوا عجب الفيا يتدخل فى الموضوع دة، دة موضوع خاص بى سغافتنا السودانية
يعنى فى ولد بتعلم فى الغنا وبدا يكتب غنا فى نوتته عشان يحفظو،

فكتب اغنية مرت الايام وعمل فيها غلطتين "خالدتين" الاولى
كتب

ما بينها رغوة دموع

قاصد ما بين ارق ودموع

وكتب سميرى يابقلبين

قاصد سميرى يبقى البين

اما عاشق الفنان محمد الامين فكان بغنى فى فى الاغنية البقول فيها " فى انتظارك ياحبيبى"

فلما جة للمقطع : القى فى قربك سعادتى

بدا يأشر والبنات قاعدات فى الصف الاول،

برشاقة شديدة جدا ، يدردم يده فى الهوا ، ويركز على واحدة من البنات ويقول ليها: القفى ....قربك سعادتى

هههههههههههههههههه

القفى... قربك سعادتى

ولا الفنان الحلفاوى البغنى اغنية محمد وردى،

لو بهمسة

وكل ما يقول همسة ، يفرد اصابع يدو الخمسة ، ويرفعهم بمعنى انه عارف الرقم كم؟؟



لو بهمسة


لأ و ايه؟؟؟ يا قول المصريين

لما تكون كلمة اعلان مكتوبة غلط فى محل ، وانت مضطر تقراها طول اليوم او الشهر ، او العمر

الناس لازم تعمل ثورة ضد السغالات دى،

يعنى لزومو شنو فى بص بمشى من الخرطوم لغاية القضارف ، تكون حبيبة السواق ولا المساعد ما عارفه ، اسمها بثينة ، ويكون كاتبها بالسين
بــــــــــــــــــــــــــسينة

وانت تقراها لمن تصل القضارف، زى ما حصل لمريم محمد الطيب ، يعنى دى امكن يشيلوها بى نقالة لمن تصل القضارف ،
لزومو شنو الولد المساعد بتاع اللورى دة ، يكتب فى حيط الموقف كلها

مفى دعى، مفى دعى
، مفى دعى؟؟؟

قاصدا مافى داعى

اخخخخخخ

وسواق التاكسى دة ، ليه يكتب ، فى المرايا

كلمينى ....يا

وواحد يكتب اغنية محمد الامين ، سارحة مالك؟؟؟

وتحتها طوالى يرسم غنماية؟؟؟

ليه كدة ؟؟؟ ليه كدة؟؟؟

ممنوع وقوف على سلم

من الخرطوم لى كسلا؟؟؟ على سلم؟؟؟

انا البوست دة حيعمل لى هبوط
ـــــــــــــــــــــــــــــــــ

4

قول كلمة حلوة...... لتلك المرأة الحلوة

عيد الام


يوم حداشر مايو

الاحد


عبر لهذه المرأة الجميلة عن تقديرك
للبن ثديها
وحضنها الدفىء،
ومهدها المريح،
شيل حجرها،
الاسم الذى نادتك به
واطعام الفم
،وقبلة الصباح
وعين العجب

والمناغاة ،
وحق الفطور،
وبسمة اللقاء
،ودمعة الفراق،
ودعوة القلب،
والتمنيات الصادقة
، والدفاع المستميت،

والحب ، التلقائى ، كضوء

وانها لم تقبل بك غير غزالة فى عينها

وغرة فى راسها ، وفلذة فى كبدها

تامل فكرتها البسيطة العميقة ، تأمل شقاءها من اجلك
فهى تحبك ان فعلت وان لم تفعل

اعطها وردة، او قبلة ، او كلمة طيبة
فانها تقبلك بها او بدونها

اعطها عرفانا او دعوة
فهى تدعو لك ان فعلت ام لم تفعل

ترحم على قبرها ، او على روحها الطاهرة

ان كانت قد رحلت
فهى راضية عنك ان فعلت او لم تفعل

اصغى لصوتها لحظة واحدة ، فهى محبة لك سوى ان فعلت ام لم تفعل

بادلها جزءا يسيرا من حبها لك

فانك لن تستطع ان تبادلها كل الحب

على اى حال

قول كلمة حلوة ، لتلك المرأة الحلوة

فهى تحبك ان قلتها ام لم تقلها

ــــــــــــــــــــــ

5

باب مشكلـــــــــــتك

عزيزتى امل

انا كائن هلامى

انتمى الى بلد غريب



ألسنة الناس فيه من سكاكين صدئة

العين فيه تعلو على الحاجب

الموية فيه لا تكضب الغطاس

والنار فيه لا تولد من شرار


احلامه تموت فى وضح النهار



حاولت ان انفضه فلم استطع

قولى لى بربك ماذا افعل

المعذبة

سين واو دال نون

ــــــــــــــــــــ

6

لعبة المحار... والليل والنسور

ها انت تستعين بمهجتك على المكاره

وتتدفق الامكنة من مخيلتك كالطحالب تتدلى من خصر جبل
تحدق حتى انحناء الشعاع فى النهايات السحيقة
وتصيخ السمع حتى يستحيل السكون الى ضوضاء جديدة

منذ ان فاتك ركب سفينة نوح

لم تكن كفؤا كما كان ركابها، فلم يكن لك مثيل يزاوج ...صنفك

تركوك فى اليم... الغاضب ...وحيدا كنسر

حاولت ان تمسك بحبل او لوحة حتى تنجو ....ولكن اسمك لم يكن مذكورا فى دفتر العبور المقدس ،

ها انت مجهول المنبت ما زلت تبحث لنفسك عن اقبيه مشروعة تختبىء فيها

تسلقت كثيرا من الجدران المتشققة التى نما العشب فى اقدامها
نمت فى حواف الابار المهجورة ، وسهرت مع المحار فى اصداف دافئة احيانا
طرقت ابوابا صلدة ، مفاتيحها الصدئة سرا مدفونا فى بهو النسيان مع البنائين المجهولين

كيف دخلت الى مدن مسحورة ، جدرانها من غيوم، وابنيتها من فقاقيع البلور؟؟

كيف تمشى هكذا بين حدائقها المعلقة ، وتحط فى اوراق ازاهرها كفراشة ملونة؟؟؟

اشد ما يحيرنى فيك الضوء، الضوء فى مدائنك

، كثيف كنهر من زئبق، مثقل بالرطوبة ،

هل رايت حملة احجار الاهرامات

وهم يعبرون نهر الضوء الزئبق هذا وانت ترقب من شرفة غيمتك تلك؟؟؟

هل اتاك حديث موسى؟؟

وانقسام البحر؟؟

قالوا انك خرجت من بطن حوت عند انقسام البحر ، هل جاءت الفرقة بين المائين
وقد صاحبها دوى صاخب ، ام سكون مخيف مطبق ، ؟؟؟

قالوا ان الانسان عندما امر ان يختار جحيمه ، قال ارنى طعامى

فجاءوا له بالخراف التى مضغها ، والاسماك وابقار شرب لبنها واشجار الفاكهة وبرك الماء التى شربها
وتلال القمح والذره ن وحقول البصل والطماطم ، وجبال بقول


فمضى يتوه فى البيداء وطلب ان يصوم للرب

ها انت ذا تستعين بمهجتك على المكاره

تنام فى عيون البحار ، وفى غابات الشجن اللولبى
وتبكى


تحط النسور فى عقر حدائقك

وينام بناة الاهرامات فى غرفك الداخليه

تحدق حتى نقطة انحناء الشعاع

وتصيخ السمع حتى يستحيل السكون الى ضوضاء

ـــــــــــــــــــــــــــــــ

7


برميل الحصحاص ...او.....مبدأ التطفيش

منذ عدة سنين ،والشعب السودانى يعتنى بهموم السمع والمحادثة ، بالهمس والغناء والشدو والنقاش الهادف

فاذا باخرق ، كبير الجته ، يجىء ببرميل فارغ الا من الحصحاص

ويدردقه فى نص شارع الظلط


طبعا انضرس الناس

وبدا عليهم الانزعاج ، وانتظروا حتى يخلص من توصيل البرميل الى مستقر ما...

ولكنه صار يدردق ذلك البرميل جيئة وذهابا ، بلا شغل ولا مشغلة

وعندما استفز ذلك الصوت المطرقع آذان القوم، وبدوا يهرجون ويؤشرون فى احتجاج ، حتى يسكت البرميل ، صار يتناول طوبةً ما كنةً ويضرب بها جضم من استطاع اليه سبيلا...


وعجب بعض المنشزين من اعجاز هذا الرجل فى صن آذان الجمع،

وجاءوا ببراميلهم
وحصحاصهم

وظلوا يتابعونه اينما ذهب ، كرررررررررررررررررررررررررررر ، فى نض الظلط

ولا ينسون ان يفلقوا من يستطيعون اليه سبيلا


واذا مات المفلوق من ضربهم المبرح ، يتزوجون ارملته


وبعد شوية نظموا حكاية الفليق وضرب الكضوم دى، فاصبح طوبهم يصل الى المضروسين فى جبال النوبة ، والبجا، والدينكا ، والنوير والشلك والزاندى


وهلما جرررررررررررررررررررا

وبعدذلك، استعانوا بخبراء الصوت ، فلصقوا لهم اسلاك وكيزان صلصة



حتى تصل الكركبة الى ميضنات الجوامع ، فهم حريصين ان يتذكرهم الانسان


السودانى كلما ذكر ربه



واوصلوهاالى وسائل الاعلام ، فكانت الكركبة متلفزة

ومذاعة ، ومنشورة فى الجرايد




وممسرحة ، ومكتوبة فى الاشعار والحيط ، وعلا صراخهم ،



ولا ينسون فى اوكات الفراغ ، حينما يتهد حيل الوطن،
ان يجلسوا فى نص شارع الظلط وقد كفوا براميلهم التطفيشية، ويبكون على حب السودان وحب الشعب السودان ،وكيف ان هذه البراميل حين تطرقع فى نص الظلط ، فانها "تنقذ" الشعب السودانى من الصنه التى كان ينعم بها

وتسربت الكائنات الصامتة ، واحدة بعد الاخرى، الى ابعد نقطة من السكون

نشدا للصمت وراحة البال

ولكن كل الناس يعرفون ان كركبةذلك البرميل ، لها دوى وصدى فى الدماغ حتى بعد ان تفارقها بآلاف الاميال

كرورورورورورورورورورورورو


وبما ان العالم صار قرية صغيرة

لصقوا سلوك ليصل صوت البرميل الفارغ الا من حصحاص، المدردق فى شارع الظلط


الى هذا المنتدى


ماتجوا نعمل حاجة، ياخوانا، على الاقل للمنتدى

ما انضرستو؟؟؟

عفوا صدمتني عبارة المعتوهة

انني من المعجبين بكتابات تماضر وعلى استعداد ان اشعل معك معارك لن تنتهى اذا ما جعلت مدخلك للاطراء عبارة قاسية على قلوبنا كهذه

إلى المعتوه عادل عثمان

لك الشكر


لماذا سمي أبو العتاهية بأبي العتاهية؟؟ هل لذلك علاقة بالعته والمعاتيه؟؟

يا عادل تماضر عندها قصة مع حرف الزاي، وكتبت عنه أشياء جميلة في بوست.. أرجو أن تضيفه إلى عقدك الفريد لو وجدته..



يا
Tamadur
أشكرك لأنك تكتبين إسمك بالإنجليزي بطريقة تساعد على النطق
تُماضِر
فهل نطقته صحيحا؟؟


وتسلموا بهمسة 5

ماذا اقول لك يا زول واحد؟
ياسر الشريف فهم لطف عبارتى رغم "قسوتها" البائنة! و نعتنى مشكورآ بالمعتوه و هذا شرف لى كبير، أن اكون معتوهآ شأنى شأن المبدعين تماضر و ياسر و غيرهم من الأقلام الباذخة فى هذا البورد المعتوه

و لو كان المعتوهين الحقيقيين مثل تماضر لما حجر عليهم أحد

اقل ما اوصف بهذه هذه الفنانه المبدعه
كلمة فناااااانه شامله
تدهشك كل حين
تأتيك من حيث لا تدري بما هو جميل
راااااائعه روعه من نتمني ان يكن من نساء بلادي
اسهاماتها جميله متنوعه تنم عن قلم ماهر وموهبه ربانيه
حفظها الله

الفلهمة الشديدة...عزاب لى سيدا


هكذا كانت تقول امى، الله يرحمها، عندما "نتفلقص" ونتفلهم وما نقعد فى الواطة


عادل
خلينى اقعد فى الواطة

الا تدرى اننى قد انجبتنى ارض طيبة

اهلها يملوا العين
بها كوادر شا مخة

بنات كتابات وفنانات ومبدعات وخلاقات وصاحبات علم ودراية وتمكن

رجال يسدوا عين الشمش

ويملوا عين الياباهم

انبتتنى حضارة كوش وجرى النيل فى عروقى ماء ودما

احرقتنى التجارب وتشتشتنى نيران الغربة والاملاق ، كما تشتشتهم

شاققت الدروب القاسية ، كما شاققوا

انا من طينتك يا عادل

من طينة من انجبوك ومن انجبوا اهل هذا المنبر

لم آت بجديد او خرافة
يا ترى مالذى يفعله بكرى لنا جميعا ، وقد فتح باب بيته على مصراعيه لسعاد ابراهيم احمد ومهيرة وسودانية وجندرية واشراقة ورباح
الصادق

لموصلى وحمزة وعشة بت فاطنة وبدر الدين شناة والسنجك ودومة وعطبراوى وعادل امين وملة عمر

لابكر ادم اسماعيل ودكتور متوكل وانور ابوغيداء وابو حراز وواحشنى

لى طه ابو قرجة ، حتى يموت بيننا ويرحل كما يرحل شقيق او صديق

لقرشو واساسى ويازول وسمبتيكووسمندل وميرفت وحسن الجزولى

لافواج المبدعين والشباب اليافع وسودانى عجوز
لدينق وابو يسرا

لهدهد وعبد الله جعفر وياسر الشريف وابن النخيل
لجمال السنوسى وسوما واهل العوض

ليحى فضل الله وشيبا ونون وغدى ونها وهالة قوتة والزولة ووجن وهوزى

لودشاموق وود العجمى
لموديك وحسام هلالى وهوبليس؟؟


للاسماء الجميلة
المابتنحصر فى فقرتين او تلاتة ؟؟؟ ليه بفتح لينا باب زى دة؟؟؟

مش عشان نبدع ونكتب
يا ريت نقدر نطول الحلم يا عادل

انا من طينة وطن ممتد على صحراء البؤس وغابة القهر ، والجبال الشم

ترعرعت فى كنف الجباه الشم

وانصهرت فى مرجل المحنة بعطر الولف

انا ليس الا بنت سودانية

وهذا يكفينى فخرا

شكرا لكم
لقد ابكانى الثناء

بس خلونى اقعد فى الواطة الحلوة الجابتكم دى
معاكم فى نفس الصف

والفلهمة الشديدة عزاب لى سيدا

ماأرقى يا عادل عثمان أن نحتفى بالزول وهو فى قمة نضوجه وعطاءه
بوستك جميل وعنوانك طير النوم من عينى وشجعنى أن أساهم بعد ما دخلت
ياخى أقول ليك: أُحيـيك
تماضر تستاهل اكثر من ذلك وعندها عدد كبير من البوستات المجيده
وأها انا خمشت ليكم ده من إرشيفها وبعتبره بوست مختلف
رقصة العروس.. رفاهية العرض... ومنبر التحول

واحلاتى ياناس
إنتى تقرى البوست ده وبس ما تردى ولا دايرين نشوفك

Quote: انا ليس الا بنت سودانية وهذا يكفينى فخرا

وللسودان

ولنساء بلادى


ولنا

ان نفخر بك

ليتنى اجمع الكلمات واختار اعذبها
كى اصف اسلوبك ياتماضر ..واصف حالة
الذهول التى غمرتنى بعد انتهائى من
قراءت نصك ..واصارحك القول هذه لاول
مره اقراء لك...فسيرى وعين الله ترعاك
وفخرنا انك سودانيه اولا...ومن البورد
ثانيا....والى اللقاء فى بوستك الخاص

لتماضر مساهمات عالية القيمه
وراقيه

لك يا تماضر اكتب
مع خالص حبى وتقديرى
حمزة

تماضر حبيبة البي

بصراحه وانا نادرا شوية خالص ما تجليني الصراحه
ورغم انه من الصعوبة بمكان ارضاء كل الناس
عشان الازواق متنافره
لكن حقيقي حقيقي انا غايتو شايفه وانا براي ومخيره فيما اقول وهو انه وبلاش هترشه لو انهم جمعوا كل نخبويين البورد
ومثقفينو .. وقرايينو
وشكالينو(هي انا ماقاصده زول

عشان يوفوك حقك
صعب جدا يرضو معجبينك
وخلوني اقول بس معجبينك
الناس التانيين مالينا دعوة بيهم
ياخواني انا الهترشه دي ازوق منها كيف ؟؟
والله جيت اقول كلمه صغنونه لكن
اكتشفت ان كلمة صغنونه هذه لا يمكن ان تشير الي كلامي البته

المهم : موش عشان انت تماضر الفنانه وبس
لا عشان انت موجودة في اي صفحة في البورد
وصعب جدا لاي زول مهما كان هذا الشخص انو يقدر يداوم على رش عطره وطعمه ونكهته الجميله طوال عمليات شهيقه وزفيره ..
صعب شديد يقدر يوازن بين ان يكتب لانو الناس محتاجين لوجودو ويكتب عشان يقول حاجة تشبهه هو
فيها نكهته هو ..فيها شكل منو
موش للمجامله وبس
صعب لاي زول انو يعدي كدي زي الغيمه ويمنع دعاشه ومطره
ينزل على الناس كل الناس ..

عارفه لو مشروعي الانا جاريه وجاريه وجاريه لمن نفسي اتقطع عشان حققوا دااك
اتحقق لي
وهو فتح كشك في ميدان ابو جنزير
ووضع 12 ساوند سيستم على كامل الجهات
عشان اذيع بياناتي وكثير من هترشتي وهترشة الناس الما ليها صوت
اول حاجة اعملها من الصباح
وقبل ما اولع البخور واصوط التجلط بكوز الليمون
صوطط صوطك صوطك
عارفه الحركه دي يا تماضر بترفع معنوياتي شديده
وبدون مبالغه انا بقوم من النوم بدري في السودان موش عشان احصل اللكشرات ..
لا بس عشان احصل ليك ناس المرطبات الفي ميدان ابو جنزير
لمن يقولوا ياهادي ويقلبوا ليك حلة الليمون والكركدي
والبخور يتصاعد معلنا ممنوع الاقتراب للضبان والنامووس
حركة الكوز داخل حلة الكركدي ولا الليمون
تحرك فيك احساس حميم يمنحك هذه القوة للبدايات
تجعلك متناغما جدا مع ابجديات يومك الصباحيه
تنسيك كم انت مهمل ومرهق بواجبات تفوق حملك
واتفرج واتفرج واتفرج ثم اذهب
مرات كثيرة ما اشرب ادفع القروش واشيل الكبايه اناولها
لاقرب شماشي جمبي
موش لاني كريمه .. بس لانو (كرشي) بتكون مليانه بالرغيف بالشاي
ومحنطره حتى حدود النخره بكبايات الشاي المقنن
وكم انا اعشق واموت في حلة اللبن
خلااااص ياشباب بكيتوا عيوننا
مشتاقه جدا لتلك الصواطه هذه اللحطه
عارفه اول حاجة ح اعملها شنو في الكشك دا
قبل ما اشغل شريط اي واحدة من الغنايات
ح اسجل ليك قصيده الام بتاعتك
بصوتك وكل يوم اخلي كل السودن من اذاعة شيري في ميدان ابو جنزير
تبل عافيتها بصوتك

الأخ عادل أنت رائع ومخيف في آن
أقول ذلك بذهنية الأم- والأم لها في نفسها (حاجة يعقوب) التي جعلته يقول لابنائه ادخلوا من أبواب متفرقة.. قيل خوف العين!
خفت على تماضر كما تخاف أم من تجمع الثناء
ما شااااااااااء الله يا جماعة قولوا ماشاء الله والله لو كنت قريت البوست دة أمبارح ما كنت رشخت تماضر نجم البورد رقم واحد أتاري دا رأي الجمهور كلو
ما شاااااااااااااااااااااء الله
وعشان نكف العين -ما عشان تقعد في الواطة لأنو الزيها ما بنخاف عليه فتنة العجب- بس عشان نكف العين نقول: تماضر دي بت ساكت يا اخوانا
رباح

والله بت ساكت يا اخوانا

اجمل حاجه واروع حاجه انك بت السودان