قاسم ابوزيد: خيلك تشيل خيرك

قدمته نسرين سوركتي الآن في قناة شروق: المخرج التلفزيوني والشاعر الذي يمارس السياسة عبر فنونه المبدع قاسم ابوزيد .
مقتطفات:
" لا اجلس لكتابة القصيدة ولا اصنعها"
" التصنيف للقصيدة مجحف في السودان"
" ابحث عن الشكل الذي يخلق أثر وجمهور ، وياتو نوع من الصور يترك أثرا"
إشكالية انصياع وركوع المثقف للسلطة.
وقال :السياسي هو أجندة المجتمع فربما يكون أناني ويمرحل القضايا حسب فهمه ،أما الفنان فلا يتردد في أن يقول رأي شعبه ويكون صوت حقيقي وينحاز لشعبه. فمفهوم التنظيم السياسي قد اتخذ توجه مختلف.
"تغيير الأنظمة لن يغير ثوابت متفق عليها "
"الإيمان بالتعدد الثقافي،الحوار،احترام حقوق الآخرين والأقليات والاثنيات.
فالسياسي يجب أن يتسلح بالثقافة."
"في مرحلة من العمر يصبح الشعر مسئوليه وحوجة الجمهور في تلقي تجارب جديده مرتبطة بمواقف ومتعة خاصة."
"من اولويات المجتمع وجود الجو الديمقراطي فالفن يبحث عن الجو والفن سوف لن يؤدي رسالته في جو غير ديمقراطي فبمجرد حدوث انقلاب عسكري يتراجع الفن ."
شدتني ومضات في القصائد مثل:
" حلمان بتاكل في الشبع والناس نيام"
" خيلك تشيل خيرك"
" يا خير تعال يا جوع امش"
" والحوش قناديل قمحه مطعم للحمام"
وفي النهاية اختتم الحلقة بقصيدة " آه يا خفوت"
الف كتر خيرك اخي قاسم ابوزيد فانتم ومضه في الزمن الصعب وشعله في عتمة الاحباطات.

قاسم ابوذيد شاعربارع ومسرحي و فنان سياسي ومثقف عميق

للأسف كحال كثيرين في بلادى داسهم قطار الإهمال عرفته عن قرب

وكنت أخترته ليكون مشرفا لبحث رأيت اكثر من يفيدنى فيه هو

كان عنوانه أغنية مصطفي سيد أحمد ودورها في الإتصال الجماهير


لم يكتمل البحث لضيق العام الدراسي ونحن علي أعتاب التخرج

ومابين ذهنية الطالب المهاجرة الي الخارج فضلت إستبداله ببحث

آخر أختصر فيه الزمن ولكن يبقي الحلم باق صديقنا قاسم

لإتمام المشوار..

تلتمس في شعر قاسم كلمات ذات حكم ويمكن ان يكون شطر بيت معبرا

عن حال يحتاج لمقال وأحاديث طوال

قال قاسم

واصفا الحال الذي وصل اليه السودانيين في ظل الهيمنة الامنية لنظام

الكيزان وفي زمن بيوت الاشباح وكثرة ناقلي الحديث والمتجسسين

وفي زمن تغير فيه الناس

ضلك وراك مابشبهك

طفلك معاك مابتعرفو

وقال قاسم

إدفقي

ماتبقي رقراق ابقي ياضل ياشموس

غطى ..المساحات.. بالــــوضــوح

اخي معتصم مشكلتنا ان اعلامنا يحرم الكثير من المبدعين بحجة الميول السياسية ولو ركبوا الموجة لتغير حالهم ....ولفتحت لهم ابواب الفرص ونواصي الاعلام وهم.. هم نفسهم......ولكن سنظل نستمع الي الابداع الحقيقي وسوف نجده اينما كان...

إدفقى ما تبقى رقراق
أبقى يا ضُل .. يا شموس
غطى المساحات بالوضوح
إستنهضى الشوق .. الجروس
وهجك شوارع ذاتى
فى ليل اليباب
ما تشفقى العطش .. الرحيل
النيل ركيزة
ودمعة الأحباب سِحاب
ما تخافى من دم الغروب
لو رتّش الّلوحة الضباب
مادام ضمير الفينا .. حى
مادام عِريق العِشق .. حى
ملحوقة يا مدن السراب
نديانة بى فرح التساب
أدفقى فيضان عمار
أتربعى .. وفجّى الوجع
دمع الألم .. ما يدفّقك
ما خاب غناك
فارسك رجع
إتوهجى وإنتى الشمس
إتلهجى نورك سطع
نوّر بوادينا الكساح
رقصت مزامير الصباح
مبكية قرية وقنبلة
متكية دمعة .. وسنبلة
الليلة فى إيدنا السلاح
ريشة وكدنكة .. ومطرقة
نبنيكى أحسن يا ظروف
مخضرة .. دانية القطوف
نطوى المسافات .. نسبقا
أدّفقى بلدك فِداك
إتوهطى
ورّى البنيات العديل
محمية بى عرق الترابلة
ونغمتك مسقية بى الريد العتيق
أنغام رباباتك تشيل
معزوفة الليل .. والرفيق
ما تصغرى
تكبر أمانى السنبلة
هَىْ أكبرى
تصغر معانى القنبلة
ما ترجعى الصد لى المداين .. والقرى
شيلى الشحوب والإصفرار
أدى البويتات منظرا
إدفقى فى كل شارع .. وكل بيت
فى روابينا المحنّة
وفى ضمايرنا السهول
إدفقى
فى كل حتة .. وكل زول
أبقى .. شان تحيا الفصول

Quote: ضلك وراك مابشبهك طفلك معاك مابتعرفو

يا سلا يا سلأأأأأأأأأأأأأأأأأم بالله اخي معتصم المزيد من كتابات الفنان قاسم .

تحياتي استاذ حيدر
الله الله ادعو الله ان تتاح لك فرصه وتلاقي قاسم وتتنوس معاهو دا حاجه تانيه موسوعه ثقافيه اجتماعيه سياسيه متحركه
مصادم قوي شجاع منحاز لقضايا شعبه
سيق وان اجري معه المخرج اديب لقاء اذاعيا بجانب الهادي الجبل بعد هذا اللقاء اوقف اديب من العمل بالاذاعه لمده طويله لان قاسم لم يتردد في نقد سياسات مدير الهيئه وكان ساعتها في السعوديه لاداء العمره واذكر ان قاسم اظهر سخطه علي ذلك المدير الذي يحج ويعتمر وموظفيه لم يستلموا مرتباتهم
التحيه لقاسم ابوزيد وهو علي راس الصامدين

الهوامش زمن الانبياء



بلدك وين؟؟

سارح مذهول .. لا سما .. لا ارض

مين يحميك

حوليك هدام

أحلام تترض

أتنفى فى الذات

فى الوش بندق تظهر تقرض

أنضم لالوب

بيتك نفسك

من هنا مسحوب

حيموت حسك

راجيك قدام

والشر مزروب

أكل المحبوب تمرات وقرض

ديل الاذهار

ديل ناس الله

اهل الباطن

أهل الظاهر

صوتك ناقص ما كان لعلاع

ما زى هسع

عينك فى الشين

عايش بالدين

بالقوى والجوع

والكان بصلك

يديك شمسك

توقدا فانوس والضو يشلع

يا مات

يا فات

او طنطن

نقنق فى الخاطر جاط

أو حام فى الذات

اتلفح قرفو

حام اتسكع

مين كان قايل_ بجى يوم زى ده

أطفالنا تحوم

ما لابسه هدوم

ما لاقيه الدوم

وأطفال ناس ديك

فى عالم ايك

شايلين فى قلوبهم راحه ونوم

ولعب بالكوم

مستنى شنو؟؟

زمنك هارب

حلمك ضايع

راسك ضارب

يا مستنى

صبرك وخوفك

ما بجيبن شئى

الساعه تقول .. انتصف الليل

بتك ما جات

ولدك مسجون فى شلة كاس

الساعة تقول انتصف الليل

سافى وحيران

متغطى ..برد

نومك فات وين

نومك عند زول

فى مخزن غول

مطبول مقفول

صوتك مسروق؟؟؟

سرقو الكضاب

غناى صايع .. بدلو بى فول

الصوت النجدة.

ما الصوت ما الصدى

ما برجع

ما برتده

لا بجيك على تكيه ليل محموم

الساعه تقول

انتصف الليل

بتك ما جات

ولدك مسجون فى شلة كاس

والظالم والمظلوم

بتمنو الليل ما يكمل

ما تطلع شمسو عديل

التانى بخاف من هم باكر

المويه الكهرباء حق المدرسة والكراس

خدر النوم

بينسى هموم

بتشيل زهليل

والاول خايف الضوء يكبر

يظهر عيبو

ما اصلو سبق

معروف للناس

الضو شيال للشيل

_______________________

وللقصيدة بقيه

لك ولقاسم التحية

اولا يا اخت هاديه عايزين بفية القصيده

Quote: مين كان قايل_ بجى يوم زى ده أطفالنا تحوم ما لابسه هدوم ما لاقيه الدوم

مين كان قايل؟؟؟؟؟؟؟؟؟؟؟؟؟


اخي نيازي مرحوم لي عظيم الشرف للتعارف والتعرف علي المبدع قاسم ابوزيد لو عندك مدخل باصي لينا , بعدين صحي انت منو حيدر ده؟؟؟