Post: #1
Title: الخريف... قول يا لطيف
Author: اسامة الخاتم
Date: 07-05-2008, 08:25 AM
Parent: #0
مشاهدات خريفية من مدينة زراعية( أو هكذا من المفترض أن تكون) ود- مدنى الرائعة.. و من قلب مدنى السوق الكبير اكتب لكم, أرى امامى حافلة متهالكة تحاول أن تجد لها موقف عشوائي ( طبعا الموقف الاصلى هو أيضا عشوائي) مكتوب على جنبها – مدنى شلعوها-- فاضل يتم الناقصة و يكتب الكيزان.. ما علينا
أول البارحة نزلت مطرة مصحوبة برعود أو في الحقيقة كانت ونسة السوق اليوم التالي انها رعدة و صاقعة واحدة نزلت على أجزاء رحمة من رب العباد بعبيده
تلك الرعدة جهجهت الكبار قبل الصغار.
مدنى طين و دا ما نبز انا اقصد انو واطاتها طينية و هاك يا زليق.
الساعة 6 مساء و اما بتاع الخدار و الطعمية – قدام مطاعم حسن جاد الله انزلق امامى شاب محترم يلبس جلابية كانت نضيفة—بتاع الخدار و سيد الفرن و أنا على استحياء ضحكنا... مدنى لزيزة يا جماعة
و نواصــــــــــــــــــــــــــل
|
Post: #2
Title: Re: الخريف... قول يا لطيف
Author: خالد العطا
Date: 07-05-2008, 08:36 AM
Parent: #1
واللواري كيف مع الخريف
المثل الجديد
يجي الخريف الركشااااااااااات تطفح
|
Post: #4
Title: Re: الخريف... قول يا لطيف
Author: اسامة الخاتم
Date: 07-05-2008, 08:46 AM
Parent: #2
خالد ود العطا سلام
طبعا احنا لسة فى البداية
الركشات هسى قاعدة تتطاقش
الموية لمن تكتر بطلع الكعونج و بزاحم الركشات
مثلك ظريف يا ظريف
الاسمنت طبعا فى السما و اغلب الناس ما قدرو يصلحو البيوت
شفت كيف.. يعنى احتمال تحصل كارثة فى البلد شى وارد تماما
اللهم انا لا نسالك رد القضاء و لكن نسالك اللطف فيه
و قول يا لـــطــيــــف
|
Post: #3
Title: Re: الخريف... قول يا لطيف
Author: مجاهد عبدالله
Date: 07-05-2008, 08:41 AM
Parent: #1
يا سلام عليك يا محترم أولاً تحياتي لك ..
مدني وكما اسميها نفاج كبير ذلك الذي يربط أواصل الناس ببعضهم البعض طريق صغير يوصل الدردشة بالمساعدة أو هكذا كما عرفه أهلنا في الزمن السابق ..
ونفاج مدني هو تواصل اهلها مع كل كائن كان زائر او عابر أو مقيم وأنا كنت بها مقيم ولازالت مدني بي مقيمة ما حييت ..
وليس كل ما يتمناه المرء يدركة ولو كان في ذلك حقيقة لكنت في خبر آخر غير الذي به اليوم ..
تلك المدينة وخريفها الصاخب ومع كل خريف نسيم عليل تتنفسه..
النسيم الذي ما زال يتمختر داخل تجاويف صدري ..
مدني مدينة اقل ما يمكن أن يقال فيها أنها مدني ..
خالص الود اخي أسامة...
|
Post: #5
Title: Re: الخريف... قول يا لطيف
Author: اسامة الخاتم
Date: 07-05-2008, 02:27 PM
Parent: #3
| Quote: مدني مدينة اقل ما يمكن أن يقال فيها أنها مدني |
اوصفت و ما قصرت يا مجاهد
لك التحية
انا ارشح هذا الخريف الذى بدات تباشيره انو ح يكون خريف ابن كــلــب
فيضان ربما .. وربما اكثر
البحر فى ازدياد يوم بعد يوم مع انو لسه القصة فى التمارين
عموما حاليا كتمة تقيلة و سخانة الف
لازال الخطر بعيدا
و الوالى نور شارع بيتم
و الياسمين... لكم.
|
Post: #6
Title: Re: الخريف... قول يا لطيف
Author: Alshafea Ibrahim
Date: 07-05-2008, 05:41 PM
Parent: #1
الأخ أسامة :
ما لقيت حافلة تعبانة غير حافلة شلعوها ؟ حافلات شندي فوق وين ؟ طيب أنت شايف المواقف في مدني أصبحت ساحات مسورة وعليها بابان باب دخول وباب خروج - باب الدخول موجود فيه دائما عسكري مرور لزوم المخالفات المرورية .. وباب الخروج عليه (المسجل)أو (المتحصل)وهو يتحصل الرسم المعلوم اليومي الواجب للاتحاد والحكومة عن كل حافلة شحنت وخرجت عادت أو لم تعود . بعدين التحصيل مستمر وقديم قدم والي الجزيرة وبدون أدنى خدمة لأصحاب هذه الحافلات .. ولا حتى حمام ناهيك عن المساجد ... والتحصيل مستمر ما دام الوالي هو هو ...
المحيرني الشوارع المسفلتة في مدني هي هي بس شارع بيت الوالي الجديد .. ومع ذلك لا صيانة عليها وكان الله في عون ناس الأمجاد والركشات ...
يالله كل خريف ومدني وما جاورها من غرق إلي غرق
الشفيع إبراهيم
|
Post: #7
Title: Re: الخريف... قول يا لطيف
Author: اسامة الخاتم
Date: 07-06-2008, 02:24 PM
Parent: #1
| Quote: طيب أنت شايف المواقف في مدني أصبحت ساحات مسورة |
جدا يا الشفيع و لكن انا قاصد مواقف عشوائية برة الموقف الكبير
لجا اليها اصحاب القرى البعيدة لانو السواقين ما بقدرو على تكاليف الموقف الكبير
و برضو انا مصر انو الموقف الكبير جايط و العسكرى القتو دا ابو الجوطة و المتحصل... غايتو انسى بس
الفوضى حاصلة فى كل مرفق و لو ما مصدق تعال ازورك مواقعنا الاثرية
دا برضو لايمنع انو فى نفس جمال فى الناس.. ناس مدنى
و نواصــــــــــــــــــــــــــل
|
Post: #8
Title: Re: الخريف... قول يا لطيف
Author: اسامة الخاتم
Date: 07-07-2008, 02:37 PM
Parent: #1
كـــــــــــــــــتمـــــــــــــــــــــــــــــــة
شديــــــــــــــــــــــــــــــــــــــدة
|
|