بحب الدنقــــــــلاوية

بحب الدنقــــــــلاوية


05-17-2005, 05:33 AM


  » http://sudaneseonline.com/cgi-bin/sdb/2bb.cgi?seq=msg&board=17&msg=1135898570&rn=0


Post: #1
Title: بحب الدنقــــــــلاوية
Author: ودقاسم
Date: 05-17-2005, 05:33 AM

أحب الدنقلاوية
اريد لونا المعطّر
بي رذاذ النيل
يلف يحضنها من تاني
بعد ما ينقلب ويميل
يِبلل فرعها النامي
يطول يمتدَّ زي الليل
وأحب كلماتا تهزمني
وتغازلني
نغيمًا يشبه التهليل
أحب اللكنة في لسانا
وكت تحكي وتكلمني
وتِتأمّر علي بلحيل
وبي كل الصلف والعز
تقوم تعلن ، تعنّفني
وتفاخر في علاها سهيل
أنا الجاية من معدن التاريخ
سليلة عز ممالك النيل
أنا الوارثة من ترهاقا
بستان الفرح قُنديل
أنا المحروسة
بالتُقّابة والترتيل
أنا اتوشحت
بي سيفاً سنين وأصيل
بت ناساً عزاز
راكزين للحمل والشيل
فرسان الدميرة
الما هزمهم سيل
واقول يا السمحة شيشك
يا مهيرة الخيل
وأنا القايلك سحابة تيه
ونزوة ليل
لقيتك في الأصول مغروسة
في جرفاً سقاهو السيل
لقيتك سابقة كل الكان
مأصّلة في لعبنا شليل
لقيت لونك سمار بلدي
حملتك راية أفخر بيها جيل ورا جيل
نقشتَ جمالك المنساب
وفاق نقشك خيال إزميل
وقفت أقول في وسط الكون
بحبك دنقلاوية
بحبك يا مهيرة الخيل

Post: #2
Title: Re: بحب الدنقــــــــلاوية
Author: مريم بنت الحسين
Date: 05-17-2005, 05:36 AM
Parent: #1

الله الله...


بالغته يا عم ود قاسم...


بنت الحسين

Post: #5
Title: Re: بحب الدنقــــــــلاوية
Author: ودقاسم
Date: 05-17-2005, 06:13 AM
Parent: #2

ابنتي مريم
أهلا بيك ،،،
وبنات رفاعة كمان ما هم هينين ... والعجب الحصاحيصا

Post: #3
Title: Re: بحب الدنقــــــــلاوية
Author: حمزاوي
Date: 05-17-2005, 06:04 AM
Parent: #1

نعم يا اخوي
انت متاكد
شنو الحكاية

انا كمان اقول ليه صاحبي دا
حاضر اجتماع رابطة ابناء دنقلا

كدا قول معاي
يا ليت الشباب يعود يوماً

ونتعلم سرن اقمندو
وايوووي يوووي ان دار تبيل
صفقه دليبن ان دار تبيل
وتنجيله
وتنجل تنجلن دادني

Post: #4
Title: Re: بحب الدنقــــــــلاوية
Author: manubia
Date: 05-17-2005, 06:12 AM
Parent: #3

ابشر يا ودقاسم

Post: #7
Title: Re: بحب الدنقــــــــلاوية
Author: حسن الملك
Date: 05-17-2005, 06:24 AM
Parent: #4

ود قاسم احييك ..
بس لو سمعتها بترطن كان قلت فيها قصيدة خليل فرح:
ياأم لسانا لسع معجن
كلمة كلمة وحروفها ضجن
ديل خدودك غير داعي وجن
ديل عيونك من غير سبه لجن
ديل دموعك من نظرة شجن
ده دلال ايه,ده دلال معجن

Post: #18
Title: Re: بحب الدنقــــــــلاوية
Author: ودقاسم
Date: 05-17-2005, 11:57 PM
Parent: #7

حسن ود الملك
كيفك أيها الدنقلاوي القح؟
خليل فرح محسي ، وكان يمكن أن يحب من أهله ( النوبيين ) لكن ودقاسم أهل عوض ، بس أمانة ما وقع راجل ،،، بت السلطان الليلة قالبة معاي جلد ،، الله يستر ،،، وقامت قالت لي حسن الملك ذاتو ما جايب خبر ، خليل فرح شعره كله في ناس أم درمان ، وأم لسانا لسع معجّن تعني أنها صغيرة ،،، المهم شيل شيلتك لما تلاقي أم طلال في لقاء الجمعة إن ربنا سهّل ..
وتلوح في الأفق بوادر نسب ،،،

Post: #9
Title: Re: بحب الدنقــــــــلاوية
Author: ودقاسم
Date: 05-17-2005, 06:58 AM
Parent: #4

مانوبيا
الله يبشرك بالخير والنعيم وكل أهلي النوبيين ...

Post: #6
Title: Re: بحب الدنقــــــــلاوية
Author: abuguta
Date: 05-17-2005, 06:17 AM
Parent: #3

ياخال
القصيدة اية
عمر الفاروق
برضو بداء نفس
البداية...
حب الشمال
وشرق كمان
وحكى عن الجنوب
حكاية...
وجلس فى الوسط
واتملى زفاية...
ولما قام غرب
اخد المقلب
وشرب المحاية...

يا خال..بحب الدنقلاوية عشان من دنقلا
بحب المحسية عشان من المحس
بحب الجزيرية عشان من الجزيرة
بحب الشراقية عشان من الشرق
بحب الجنوبية عشان من الجنوب
لكن ليش الناس بتنشرط زعل
لو ابقوتة قال بحب الغرابية...عشان من الغرب
معليش لو انا حرفت هدف البوست
لك خالص
مودتى
ولقدام

Post: #12
Title: Re: بحب الدنقــــــــلاوية
Author: ودقاسم
Date: 05-17-2005, 07:41 AM
Parent: #6

أبوقوتة
ليس هناك من يمنع أحدا أن يحب من غربنا الحبيب ، وخير مثال خالك ودقاسم ،،، فأم طلال جدها السلطان علي دينار ، وبهذا فهي تنتمي إلى قبيلة الفور. وقد أحببتها وتزوجنا ، ورزقنا بنين وبنت ، ونتج عن ذلك علاقات عديدة مع أهل الغرب ،،،
وقد أعلنت من قبل عن حبي لدارفور ، بل عشقي لها ، ولم يرفض أحد هذا العشق ،،، فدارفور جزء من الوطن ، وترابها جزء من ترابنا الوطني ، وأبناء وبنات دارفور هم أبناء وطننا لا فرق أبدا ،،،
دارفور ..... تلك الوريفة التي وهبتني عشقا لا ينتهي

Post: #8
Title: Re: بحب الدنقــــــــلاوية
Author: ودقاسم
Date: 05-17-2005, 06:34 AM
Parent: #3

حمزاوي
تصدّق أنا ناسي حكاية حضور اجتماع رابطة دنقلا دي ،،، يعني الواحد ما ممكن تحفظوا ليهو سر خالص ؟؟

Post: #10
Title: Re: بحب الدنقــــــــلاوية
Author: عبد المنعم سيد احمد
Date: 05-17-2005, 07:28 AM
Parent: #8

الصديق
ودقاسم
ياصاحب الحديث الطاعم
والشعر العذب
الله يا الحصاحيصا..هل من عودة هل

Post: #19
Title: Re: بحب الدنقــــــــلاوية
Author: ودقاسم
Date: 05-18-2005, 00:41 AM
Parent: #10

صديقي الحميم عبد المنعم
يسعدني أن ألقاك هنا ، فزيارتك قمة الطعامة ،
صدقني أشتاق إلى الحصاحيصا كما أشتاق لأمي ،،،
وإن أنسى لا أنسى ......
وبين الحصاحيصا ورفاعة بنطون يحمل الإخاء والموجة ويصل القربى ،،، ويكفي أن تجلس يوم خميس أو جمعة بالمشرع ، لترى السودان في أجمل صوره ،،،
الله يقطع الغربة ،،

Post: #11
Title: Re: بحب الدنقــــــــلاوية
Author: ود المايقوما
Date: 05-17-2005, 07:36 AM
Parent: #1

العزيز / ود قاسم

لك التحية




وانا احب المحسية



Post: #13
Title: Re: بحب الدنقــــــــلاوية
Author: نادية عثمان
Date: 05-17-2005, 07:42 AM
Parent: #11

الله ياود قاسم المبدع

قلت لى كيف!!

بجيك تانى !

Post: #14
Title: Re: بحب الدنقــــــــلاوية
Author: garjah
Date: 05-17-2005, 08:58 AM
Parent: #13



ود

قاسم

خايفك تاكلك التركين ...تغير رايك



وهاك القراصة دي

لامن واحداً من رفقاي دنقلاوي .. هسي بقيت عدو من أعدائي .. قام عزمني وأصر علي إنو أجي أتغدأ عندهم قراصة .. وأنا لي الزمن والتاريخ قلت أشوف القراصة البياكلوها بي الملاح واللحم دي كيفن .. باقي نحن عندنـا القراصة دي (تحلية) بنأكله بي السكر بس .. وفي قمة الرفاهية بنأكله بالسمن والسكر ده لامن يكون عندنا ضيوف.
أهان وكان معزوم معاي صاحبنا إسمو (لؤي) وطبعاً من اللسم ممكن تعرفوا الزول ده زول قراصة وله لا .. أنا غايتو متوكد إنو ماسمع بي القراصة دي إلا في (معرض تراث سوداني) أو في برنامج (صور شعبية...) ده من النوع البستحم يومياً .. وشاقي شعرو كمان .. أقول ليكم شنو ما ببالغ إن قلت ليكم (قاعد يلبس كرفته ) قمنا إندرجا ومشينا علي الناس ديل أنا وأخوي (المكندش ده..) طايبونه وسالمونه سمح .. وهم ناساً طيبانين خلاس .. وأخدنا قعدتنا وجابوا الشربات إتشربتنا سمح وإتونسنا زين .. أهان بعد داك صاحبي قام جاب صينية الغدا .. عليك أمان الله الصينيه (بوخه) يجيب المطافي .. فيها قراصة تكفي (معسكر دفاع شعبي كامل) ختوها في الواطه .. وقالوا أتفضلوا صاحبي لامن شاف (البوخ البلوي داك) قرب يتفضل يمشي أهلو ... أنا في خاتري شلت هم تب وقلت دي أكان خلوها تبرد لي العشاء ماهي بارده .. القراصة زاته مقاس 11 (ماهي سفنجة) ... مقاس (مخدة) عدييل .. تبارك الله لو بردت (تصلي) فوقه عدييل .. وتاني قالوا أتفضلوا .. أها صاحبنا (sud) سيد البيت قام مد يده دخله في القراصة أشوف ليك (وشو) حمر وطير عيونو (حرقتو لكن أكله في خاترو...) قلت تبارك الله ( قراصة بالريموت كنترول) من (اليد للوشي مباشرة..) أهان ده صاحب البيت ومتعود عليها أنا وأخوي (الكاشف) ده يحصل لينا شنو .. غايتو إتوكلت علي الله ودخلت يدي في الصحن (وودعت أصابعيني لي وداعة الله..) غايتو (ختت أصبعي حسيت بي راسي ينتح وطاقتي وقعت من راسي ودموعي يجرن...) إستغربت قلت (قراصة الدناقلة) دي الظاهر ما بتمشي المعدة بتمشي (المخ) طوالي .. غايتو (إتجوعلت) وعملت فيها (سجيمان) ولقمة في الخشم ونبرد يدنا في صحن الشطة سبحان الله الشطة بقت لينا (تحلية) عدييل. وإتمنيت في الوكت داك لو خشمي العريض ده سويت ليهو (مروحة سقف..) لحدي ما كلمت القراصة.. أنا حمدت الله إنها كملت لكن .. الراجل حلف ومشى يجيب زيادة .. وتبارك الله التقول (الكانون) بتاعهم ( Pentium4 غايتو الله يدي أمو العافية) وفي أقل من دقيقة وجاب القراصة الحارة زاته .. والمصيبة إنهم قاموا وقعدوا يحلفوا علينا نكمل القراصة .. صاحبي (لؤي) بعد ما شعرو كان مسبسب وشاقيهو (كل شعره قامت علي حيله) و (أزرق عيونو راح) وبقى ( يقح و خنق..) أنا قلت الزول ده لو جابو زيادة تاني ح نجيب ليهو الإسعاف عدييل ... قعدنا بعد داك وجابو التحلية (بتيخة) قلت لي صاحبي .. ليه ما (سلقتو) البتيخة دي وجيبتوها لينا (شوربه) نشربه .. وعرفت إنو (إذا جاورت بنو دنقل في الفردوس فعجل بالرحيل إلى لظى ..) لأنو لو عزموك قراصتم الحارة دي في الجنة .. ح تبقى ليك الجنة (لظى) عديييييييييل ..

Post: #15
Title: Re: بحب الدنقــــــــلاوية
Author: عبدالماجد فرح يوسف
Date: 05-17-2005, 09:21 AM
Parent: #14

ونحن بنحب دنقلا كمان
الأخ ود قاسم شكرا للشعر الجميل

Post: #16
Title: Re: بحب الدنقــــــــلاوية
Author: على اسماعيل
Date: 05-17-2005, 10:01 AM
Parent: #15

استاذ ودقاسم

التحايا النواضر وشكرا على هذه الكلمات الجميلات - صدقت يا استاذ فى وصفك - كلنا بنحب الدنقلاوية وبالتحديد (التيتاوية).
شكرا جزيلا عزيزى

Post: #17
Title: Re: بحب الدنقــــــــلاوية
Author: ابو جهينة
Date: 05-17-2005, 11:48 PM
Parent: #16

أبوطلال

Quote: وأحب كلماتا تهزمني
وتغازلني
نغيمًا يشبه التهليل
أحب اللكنة في لسانا
وكت تحكي وتكلمني
وتِتأمّر علي بلحيل
وبي كل الصلف والعز
تقوم تعلن ، تعنّفني
وتفاخر في علاها سهيل
أنا الجاية من معدن التاريخ
سليلة عز ممالك النيل
أنا الوارثة من ترهاقا
بستان الفرح قُنديل
أنا المحروسة
بالتُقّابة والترتيل


بكل صراحة .. الكلمات دي أكثر من رائعة .. و ربما تكون شهادتي مجروحة لسببين :
للعلاقة التي بيننا
ثانيا لأني فيني عرق دناقلة
و لكن الحق يقال .. لو أمكنني سرقة بعض مقتطفات منها لأكتبها غزلا في واحدة لكنتها مكسرة ( سرقة أدبية أو إقتباس )
تسلم

Post: #28
Title: Re: بحب الدنقــــــــلاوية
Author: ودقاسم
Date: 05-18-2005, 11:56 PM
Parent: #17

أبوجهينة
يعني ممكن نكون نسايب ،،،
والله تبقى غضافة جديدة لتمكين العلاقة ،،

Post: #26
Title: Re: بحب الدنقــــــــلاوية
Author: ودقاسم
Date: 05-18-2005, 07:34 AM
Parent: #16

الأستاذ علي اسماعيل
نحن طبعا أهل عوض ، يعني بين قوسين عرب ، وزي ما بيقولوا كله عند العرب صابون ،،،
لكني مرة قرأت سيد أحمد الحردلو يكتب عن ( ناوا ) وهي قرية بضواحي دنقلا كما أعلم ،
وأذكر أنه يقول
مثل بنات ناوا
مثل نخيل ناوا
وقد التقيت أناسا من ناوا ، وسألتهم عن الحردلو ، فقالوا أنهم يعرفونه ،،، لكن بعضهم لا يعرف أنه يكتب شعرا ،،،
مش تكتب لينا عن التيتاوية شوية ؟

Post: #24
Title: Re: بحب الدنقــــــــلاوية
Author: ودقاسم
Date: 05-18-2005, 04:59 AM
Parent: #15

الأستاذ عبد الماجد فرح يوسف
وبنحب كلّ ذرّة من تراب الوطن ،،،
ربنا يجمعنا كلّنا هناك ، لا نحتاج غربة ، لا يغشانا الهوان ...

Post: #23
Title: Re: بحب الدنقــــــــلاوية
Author: ودقاسم
Date: 05-18-2005, 03:08 AM
Parent: #14

قرجة
إنك لن تصدق ،،، في حياتي لم آكل القرّاصة إلا بالملاح ،، أرفضها بالسمن والسكر بالرغم من أن أهلي يفضلونها كذلك ،،، وقد أكلتها أول مرة بملاح سلج بايت قبل حوالي 40 عاما ، عند زملاء شايقية ينتمون إلى المنطقة المحايدة بين الشايقية والدناقلة ، فأعجبتني ومن يومها صارت واحدة من الأكلات المفضلة عندي ، خاصة إذا كان إلى جانبها بصل مشقق كبار ، وشطة بالليمون ،،، ولم أجرب التركين ، لكني أكلت الفسيخ أول مرة وأنا طالب بالجامعة ، ومن يومها وأنا أحب الفسيخ ،،،
ثم بعد زواجي أكلت في منزل اهل زوجتي ملاح المرس ، وهو أيضا ملاح طيّب إن وجد من تجيد عمله ،،،، ونحن أهل العوض لدينا من الملاحات العديد ومنها أم تكشو ، والويكاب ، والتمليكة ، وخدرة الخلا ، وملاح الروب وملاح اللبن ، وطبعا الشرموط الأبيض ( الخالدي ) والأحمر ( التقلية ) ،،،
وفي كل مرة هو السودان ، نحبه ، ونجلّه ، ونقدس ترابه ،،،
شكرا لك على القصة اللطيفة ..

Post: #21
Title: Re: بحب الدنقــــــــلاوية
Author: ودقاسم
Date: 05-18-2005, 01:15 AM
Parent: #13

نادية قالت :
Quote: بجيك تانى !

والأبنودي على لسان فاطنة أحمد عبد الغفار زوجة حراجي القط قال :
والنبي عارفاك كدّاب ،،،
وما كانت تقصد غير أن تقول له اصدقني فإني سأنتظر ...

Post: #20
Title: Re: بحب الدنقــــــــلاوية
Author: ودقاسم
Date: 05-18-2005, 00:55 AM
Parent: #11

ود المايقوما
أهلنا ( أهل العوض ) بيقولوا :
كل زول بيعجو الصّارو ..
وأنا صرّتي المرة دي فيها دنقلاوية ،،،

Post: #22
Title: Re: بحب الدنقــــــــلاوية
Author: عمران حسن صالح
Date: 05-18-2005, 01:17 AM
Parent: #20

عمنا كيفنك

Quote: وتِتأمّر علي بلحيل

أنا حولتها إلى ( تتآمر ) يا ود قاسم لأنها ذكرتني قصة إحدى أمهاتنا (الشايقيات) عندما حدثها ولدها الوحيد بأنه ينوي الإرتباط بدنقلاوية (مكسره عضامو) ورفضت بشكل هستيري وعندما أصروا عليها لمعرفة السبب قالت ليه يا ولدي كان ساكت إتآمرت عليه بلغة أهلها ما بتعرف تتحله
هذا مع الإشارة إلى أن المداخلة دي ما فيها أي علاقة بالعنصرة عشان ما يطلع علينا حمزاوي برطانة تحيّرنا

Post: #25
Title: Re: بحب الدنقــــــــلاوية
Author: نادية عثمان
Date: 05-18-2005, 07:32 AM
Parent: #22

Quote: والنبي عارفاك كدّاب ،،،


حلو وكدااااااااااب

ليه صدقتك؟!!

الحق عليا

الحق عليا

الحق عليا انى طاوعتك

كداااااااااااااااااب

حلو وكداب

لييييييييييييه صدقتك..؟!!


ماقال بجى ..واهو صدق وجا

بسوى الجداد وانجض الرز وبجيك تاااانى!!

Post: #27
Title: Re: بحب الدنقــــــــلاوية
Author: munswor almophtah
Date: 05-18-2005, 09:14 AM
Parent: #25

ودقاسم والله أحسن لك ما تمضع فى الميرم بروح لك ملاح تقلية السلاطين وما بتقدر على التركين يوت فى عز الصيف.....




سلام/منصور

Post: #31
Title: Re: بحب الدنقــــــــلاوية
Author: ودقاسم
Date: 05-19-2005, 03:14 AM
Parent: #27

أخوي منصور
بيني وبينك الميرم مالية علينا الدنيا ، وسادّة عين الشمس ، بس الدنقلاويةدي صاحبتها ...

Post: #30
Title: Re: بحب الدنقــــــــلاوية
Author: ودقاسم
Date: 05-19-2005, 01:37 AM
Parent: #25

بس يانادية حراجي القط ما رجع ،، وطلع فعلا كدّاااااب ،،،
يمكن لأنه رجل ،،،
أوعى جنس الرجال يقلبوا عليّ ..

Post: #29
Title: Re: بحب الدنقــــــــلاوية
Author: ودقاسم
Date: 05-19-2005, 01:12 AM
Parent: #22

عمران
كيفك ؟
مسألة التآمر بلغة لا تعرفها ممكنة ، لذا كان أهلنا باستمرار يحذرونا من الغرباء . لكن حالة الحب تقلب التآمر إلى تأمُّر ، فتصبح الحبيبة أميرة عليك وعلى قلبك الكبير ،،،
لك التحية