تاملات في حال واحوال الاخطبوط بول..!!!!!!

تاريخيا وطقوس الخج الكروي في الامر السوداني في عهود الاسطوري الراحل (___) كانت تتم في (هزهزة) وخج طشت وقيل (من المقربين لهذا الفكي الاسطوري ) بانك تستطيع روية بعض ملامح الكورة ان كانت ما بين فريقي الهلال والمريخ ويتم هزهزة الطشت ان كانت الهجمة ذاهبة في مرمي الفريق المشغل الفكي لكي تخرج الكورة الي الاوت او كورنر وهكذا,,,
والفرق ما بين الاخطبوط بول وهذا العمل الطلس ملصي هو ان بول يتنباء بالاشياء قبل حدوثها بينما هذا الطلس ملص المحلي يتم فيه معالجة الكورة وهي لايففففف والتعامل مع جزئياتها مع قليل من التكديك عبر الحجابات والديوك والكدائس التي قد تطلق في الملاعب بقية اداء بعض الاعمال الشاقة ههههههه
من الاشياء المحيرة ومحيرة جدا..
1-كيف تمت الية التنبوء الصادق عن بول 80 في المية في السابق ومية مية حتي الان
2-كيف تم الربط ما بين هذا التنبوء والحدث المتواجد علي بعد فراسخ شاسعة من المانيا
3-وهل تلك التنبوات التي حدثت هي اختيار بول الحقيقي ام تدخلت ايادي بشرية عبر اضافة اشياء يحبها بول للطعام الذي يتماشي مع الاختيار الانساني..؟؟
اسئلة للتفكير والحيرة... وبول عجيب بالجد ويموخل الراس..!!

وسنعود

الاخطبوط بول والذي وصف بانه انجليزي الاصل والمقيم الان في احدي المتاحف الالمانية
صار هو الشغل الشاغل للعالم المحب والمربوط بكرة القدم تلك المستديرة التي شغلت العالمين.
هذا الاهتمام الشديد المفاجي لم ياتي من فراغ بل هو سليل تنبؤات الاخطبوط التي صدقت بنسبة مية في المية في كل المباريات التي قدم اليه فيها اعلام الفرق المتبارية في شكل وجبات اخطبوطية مغلفة باعلام تلك الدول..وكان القاسم المشترك في كل هذه الوجبات هو العلم الالماني بالوانه المميزة..بالاضافة الي مبارة اسبانيا وهولندا التي افتي فيها بول قبل انطلاق صافرتها...!!!
بول في الية تكهناته تشابهت علينا الاشياء وتداخلت عوامل شتي...
- قانون الصدفة والاحتمالات
- بيولوجيا الاحياء المائية والاخطبوط تحديدا
- الامور المربوطة بما وراء الطبيعة
- الخرافة
- والدين
- ثم المادية التي وكما يبدو بانها تفتت في الوعي الالماني والخواجاتي الذي جلس طويلا امام شاشات التلفاز في انتظار قولة بول التي تشابهت بقرها مع ابقار كل المباريات التي التهم وجباتها..!!!
- ------------
- تاريخا وحتي نمسك بتلاليب الاخطبوط بول في سياحتنا في امره قيل بان الاخطبوط مارس التنجيم في مباريات كاس الامم الاوربية ونجح في عمله الاخطبوطي بنسبة 80 في المية..؟؟

وعلي هدي الاخطبوط بول سار التمساح (هاري) الذي يبلغ وزنه 700 كيلو والذي خرج من حوضه لكي يلتهم جدادة مسكينة موشحة بالعلم الاسباني...!!!
- وهنالك البغبغان الذي ايضا دخل بورصة التنجيم المونديالي ورغم ان هذا البغبغان قد ارتكب فاول تكتيكي ببتحديده للفريق الهولندي في المرة الاولي عندما اختار الفريق الفائز من ثمانية فرق لكي يعود ويختار اسبانيا ويؤيد حزب السيد الاخطبوط (بول)...!!

1- بول في حالة كونه رائد لاركلوجيا الصدفة..
- هنا تطل فكرة الاحتمالات المبينة علي قوانين محددة ومعروفة..
- وفي اي مباراة اتية هنالك بالتاكيد الاحتمالات الاتية
- 1- فوز الفريق (ا)
- 2-فوز الفريق (ب)
- 3- تعادل الفريقيين
- 4- عدم اقامة المباراة لاي سبب من الاسباب..
اذن بول اشتغل وطيلة فترة سفسفته لتلك الاعلام علي نسبة 25, او (ون اوفر فوور)...!!!
وهذا الامر للمبارة الواحدة ولكن عندما نجمل المباريات الثمانية التي نجح في ابو البوابيل نجده قد نجح في تحقيق نسبة نجاح في نسبة (ون اوفر اييييت) اي0(,بوينت 125 من الف) وهي نسبة يعلم الله صغيرة وهامش تحقيقها في كل مرة صغيرة ......_________
اذن نجاح هذا البول في كل مرة وبهذه الطريقة الناجحة في اختيار مربوط بحدث معين يغزي الخيال ويفتح شبايك لبلاوي ومصايب عجيبة شوية...!! وخاصة اذا علمنا بان نسبة الخطا عالية وعالية جدا في مثل هذه الاختبارات الشختك بختكية الرعديدة

2-الجوانب البيولوجية المربوطة بالاخطبوط كحيوان ...هل هذه الجزئية ذات دلالة..؟؟؟
يطل هذا السؤال ويقرا في اطار ات كثيرة...؟؟
هل لالوان الفرق التي يختارها الاخطبوط بول علاقة بمزاج بيولوجي تتواجد ضوئياته في ذلك العلم الذي يختاره بووول..؟؟ وهل بول له المقدرات البصرية التي تتيح له الفرز بين الالوان (بيولوجيا يا جماعة الخير) وخاصة بانني قد سمعت معلومة مفاداها بان (ال: ك.ل.ا.ب) ليس ليها مقدرة علي الاطلاق في الفرز بين الالوان وقاعدة تشوف الاشياء كلها رهاب رهاب..ولون كسراب بقيع..!!
فهل الاخطبوط هذا له المقدرة علي فرز عيشة الالوان الزاهية التي توشحت به وجباته التي اكلها واكلتها معه اروبا والعالم المتابع بشغفة واثارة.....؟؟؟
واحد من كبار علماء الاسماك في العالم افتي بان الامر الاخطبوطي صدفة بحتة (اذن الدلائل تشير الي غياب الاثر البيولوجي في اختيارات بوول)...!!
اسئلة شتي وعلينا اولا ان نتامل اعلام الفرق التي اختارها بول في كل من المرات الثمانية الناحجة..
وسنعود للاعلام وبالالوان

واذا افترضنا جدلا بان الاخطبوط بول يقوم باختيار وجبته الدسمة استنادا علي لون يحبه ويعشقه ويذكره اعماق البحار والمحيطات في ذاكرته الاخطبوطية فكيف لنا ان نفسر الماتشنغ ما بين اختياراته وهو بعيدا في فراسخ بعيد عن ارض مانديلا ..لفرق تحقق النتائج وكما قالها (بول)...!!
ولك ان ننتامل حالة مباراة (المانيا وصربيا) والفرق الواضح في المستويات بينهم والهزيمة المفاجئة التي تنباء بها ابو البوابيل...!!
وايضا مبارة (اسبانيا والمانيا) التي ايضا هزمت كل التوقعات وخاصة بعد المستوي الباهر للفريق الالماني في المباريات التي سبقت هذه المباراة...؟؟؟

بول حيوان يعيش في نقطة ذات احداثيات بعيدة جدا من مركز وزمان وماهية الحدث..
بول يتحدث باكرا عن مباريات ازمنتها لم تدور الشمس دورتها حتي تاتي مدة اقامتها وهي في المجهول او الغيب...!!!
الخيال العلمي فتح خياله ولو علي مستوي الافلام وروايات الخيال العلمي في امر (السفر عبر الزمن) ذهابا الي التاريخ وعبورا الي المستقبل..!!
اذن المسافة..!!
وغياب معلومات احصائية ضخمة ودقيقة عن الفرق المتبارية قادرة علي استخراج نتيجة مباراة والتكهن بها
تظل حلقة لا نستطيع الجزم بتوفرها عند بول القابع في حوضه الالماني مالم تكون هنالك (خجة) لشي ما وراء الطبيعة يسرب هذه الاشياء عبر ذبذبات كروباوية عجيبة...!!
ايضا يطل سؤال اساسي عن كيف عرف بول بان امر العلمان مربوط بمباراة لكرة القدم...؟؟
وهل لو قدم لبول علمان لمباراة بين فريقين في مجموعتين مختلفات وليس هنالك امكانية لعبها مباراة مع بعض في كاس العالم هل سياكل بول ام سيحرن الاكل...؟؟؟
امر بول عجيب وغريب (وحي الصديق عصام ابوبكر الغمام)...!!

يا ممراح

دعني اشكك في مصداقية بوول

لو ذهبنا هسع ووضعنا علم السودان وعلم جزر المالديف

وجبنا الاكل سيتوجه بول نحو احد العلمين

مع العلم ان هذه الدول ليست مشاركة

وعليه هذا (الاخربوط) وليس الاخطبوط

اوت سايد لعبة قوون

Quote: وهل لو قدم لبول علمان لمباراة بين فريقين في مجموعتين مختلفات وليس هنالك امكانية لعبها مباراة مع بعض في كاس العالم هل سياكل بول ام سيحرن الاكل...؟؟؟

Quote: دعني اشكك في مصداقية بوول لو ذهبنا هسع ووضعنا علم السودان وعلم جزر المالديف وجبنا الاكل سيتوجه بول نحو احد العلمين مع العلم ان هذه الدول ليست مشاركة وعليه هذا (الاخربوط) وليس الاخطبوط اوت سايد لعبة قوون

نعم يا جردقو فالافتراضان اعلاه يهدمان ركن اساسي من اركان العمل الاخطبوطي بووول..!!
مالم تصل تاكيدات بان بول سيحرن ويرفض اكل العلمين ويعمل فيها مضرب عن العمل الاخطبوطي..
ولسسسسع صحبك بول ده لقدام نطلع ليهو فيهو جنس دخنات لوووووول

نتامل اعلام الفرق التي اختارها بول في كل من المرات الثمانية
- 1- العلم الالمان والوانه
- 2- العلم الغاني
- 3- العلم الانجليزي
- 4- العلم الارجتيني
- 5- العلم الصربي
- 6-العلم الاسترالي
- 7- العلم الاوراغواي والوانه
- 8- العلم الاسباني
- 9- العلم الهولندي

Quote: An octopus has two eyes. Each one is highly developed and has excellent vision. It forms 3-dimensional images, and is believed to have color vision. It is very much like the human eye in its form and construction, but more efficient than a humans. It has a wide field of clear vision and has good resolution and sensitivity.

http://wiki.answers.com/Q/How_many_eyes_does_an_octopus_have




بول عجيب ومحير يا كيكي ومثير للتساؤل.

بالله راجع الرابط التحت ده يا كيكي وبالذات حتة الذكاء:

Quote: Intelligence Main article: Cephalopod intelligence Octopuses are highly intelligent, likely more so than any other order of invertebrates. The exact extent of their intelligence and learning capability is much debated among biologists,[5][6][7][8] but maze and problem-solving experiments have shown that they do have both short- and long-term memory. Their short lifespans limit the amount they can ultimately learn. There has been much speculation to the effect that almost all octopus behaviors are independently learned rather than instinct-based, although this remains largely unproven. They learn almost no behaviors from their parents, with whom young octopuses have very little contact. An octopus has a highly complex nervous system, only part of which is localized in its brain. Two-thirds of an octopus's neurons are found in the nerve cords of its arms, which have a remarkable amount of autonomy. Octopus arms show a wide variety of complex reflex actions arising on at least three different levels of the nervous system. Unlike vertebrates, the complex motor skills of octopuses in their higher brain are not organized using an internal somatotopic map of its body.[9] Some octopuses, such as the mimic octopus, will move their arms in ways that emulate the movements of other sea creatures. In laboratory experiments, octopuses can be readily trained to distinguish between different shapes and patterns. They have been reported to practice observational learning,[10] although the validity of these findings is widely contested on a number of grounds.[5][6] Octopuses have also been observed in what some have described as play: repeatedly releasing bottles or toys into a circular current in their aquariums and then catching them.[11] Octopuses often break out of their aquariums and sometimes into others in search of food. They have even boarded fishing boats and opened holds to eat crabs.[7] In some countries, octopuses are on the list of experimental animals on which surgery may not be performed without anesthesia. In the UK, cephalopods such as octopuses are regarded as honorary vertebrates under the Animals (Scientific Procedures) Act 1986 and other cruelty to animals legislation, extending to them protections not normally afforded to invertebrates.[12] The octopus is the only invertebrate which has been conclusively shown to use tools. At least four specimens of the Veined Octopus (Amphioctopus marginatus) have been witnessed retrieving discarded coconut shells, manipulating them, and then reassembling them to use as shelter. This discovery was documented in the journal Current Biology and has also been caught on video.[

http://en.wikipedia.org/wiki/Octopus

ده كلام مهم واساسي جدا يا شول وخلينا كدي نشوف علم المانيا واستراليا..
ونواصل في الاعلام لكل المباريات وبعدها نشوف الحكاية حتودينا لوين لووووول

المانيا استراليا




لاحظ اللون المشترك هو الاحمر..
مع تفرد العلم الالماني بالاسود والاصفر...
ولسع ماشين حبة حبة مادام بول بقي يشوقف الوان

Quote: In laboratory experiments, octopuses can be readily trained to distinguish between different shapes and patterns

يا شول ده كلام عجيب تاني ويرسل ملامح اشارات خجية في الحركات البعلمها الاخطبوط ده مادام يمكن تدريبه
وكدي نشمي لقدم في امر الاعلام وهل للعلم الالماني لون ذو ميزة تم تدريب بول علي التقاطه
ولكن ياربي القصة دربها خشي للاخطبوط في الموية في صربيا واسبانيا لييييييه..؟؟
كل هذه الاسئلة سنعود اليها ونحير مع مستر بول

كيكي
قيل إنو عمكـ بول ده بشوف الخطوط الأفقية و ما بشوف الخطوط الرأسية لذلكـ أختار علم إلمانيا ذو الخطوط الأفقية مقابل بقية الأعلام لكن لما جات الحتة بتاعت علم أسبانيا و صربيا كانت الخطوط في العلمين برضو أفقية و بعد كده تساوت الكفتين و قام عمكـ بول أختار الألوان البراقة على حساب الألوان الميتة ..

عمكـ ده دجال ساكت و أخير منو قسطنطين بتاع خالي خليل

Quote: يا ممراح دعني اشكك في مصداقية بوول لو ذهبنا هسع ووضعنا علم السودان وعلم جزر المالديف وجبنا الاكل سيتوجه بول نحو احد العلمين مع العلم ان هذه الدول ليست مشاركة وعليه هذا (الاخربوط) وليس الاخطبوط اوت سايد لعبة قوون

حسادة ناس ال....

جريت كرسي وقعدت

يأخي ده ألذ بوست عن الأخطبوط بول

وأصل يا هندسه

بس قبل ما شكيرا تبدأ تغني

لأنها لو بدأت بنفز من البورد ده

Quote: جريت كرسي وقعدت يأخي ده ألذ بوست عن الأخطبوط بول وأصل يا هندسه بس قبل ما شكيرا تبدأ تغني لأنها لو بدأت بنفز من البورد ده

هلا يا فدياس وشرفت كثير ياخي مدارات الاخطبوط العجيب بول
والذي سيحلو السفر في عوالمه العجيبة ان فازت اسبانيا اليوم وسيتمخول العالم كثيرا في امره الجلل
وكل الود والتقدير

Quote: حسادة ناس ال

لووووووووووووول يا محمد عبدالرحمن يا اي لاند

الأخ عبد الكريم تحياتي

Quote: 1- بول في حالة كونه رائد لاركلوجيا الصدفة.. - هنا تطل فكرة الاحتمالات المبينة علي قوانين محددة ومعروفة.. - وفي اي مباراة اتية هنالك بالتاكيد الاحتمالات الاتية - 1- فوز الفريق (ا) - 2-فوز الفريق (ب) - 3- تعادل الفريقيين - 4- عدم اقامة المباراة لاي سبب من الاسباب.. اذن بول اشتغل وطيلة فترة سفسفته لتلك الاعلام علي نسبة 25, او (ون اوفر فوور)...!!! وهذا الامر للمبارة الواحدة ولكن عندما نجمل المباريات الثمانية التي نجح في ابو البوابيل نجده قد نجح في تحقيق نسبة نجاح في نسبة (ون اوفر اييييت) اي0(,بوينت 125 من الف) وهي نسبة يعلم الله صغيرة وهامش تحقيقها في كل مرة صغيرة ......

الواحد نسي الاحتمالات .
ما فهمت نسبة الــ 25,
ولا فهمت نسبة ال (ون اوفر اييييت)
يا ليتك تشرح لنا كيف تحسب هذه النسب؟

Quote: الواحد نسى الاحتمالات

هلا يا محمد
ولو نسيت ممكن تمشي تتذكر في حتة تاني ولو اكتشفت خطا في اثناء مذاكرتك تلك تعال صلحنا وسنقبل منك ذلك بكل تقدير وامتنان
وشكرا علي مرورك

Quote: قيل إنو عمكـ بول ده بشوف الخطوط الأفقية و ما بشوف الخطوط الرأسية لذلكـ أختار علم إلمانيا ذو الخطوط الأفقية مقابل بقية الأعلام لكن لما جات الحتة بتاعت علم أسبانيا و صربيا كانت الخطوط في العلمين برضو أفقية و بعد كده تساوت الكفتين و قام عمكـ بول أختار الألوان البراقة على حساب الألوان الميتة .. عمكـ ده دجال ساكت و أخير منو قسطنطين بتاع خالي خليل

الوش ده لحكاية قسطا بتاع ابو خليل..
واما امر الخطوط الافقية والراسية والممكن يكون امر وارد بشدة كده خلينا نشوف الثلاثة اعلام بعض



الصربي


اسبانيا


نظريتك ياخالد اكثر وجاهة واللاخطبوط الظاهر عليهو تشابهت عليه الخطوط التي تدرب عليها والله اعلم

العلم الاسباني ده لو ماظهر تبقي مشكلة اخطبوطية من بول ده وبس

العلم الاسباني

Quote: لووووووووووووول يا محمد عبدالرحمن يا اي لاند

المجد والخلود لشيطان الهامش والكوش قسطنطين


الويل والثبور لشيطان غرف الزجاج بوووول

الالماني

Quote: عمكـ ده دجال ساكت و أخير منو قسطنطين بتاع خالي خليل

ود اختي خالد

الهلال بلعب الاسبوع القادم اعتقد يوم الاحد 18 يوليو

ما تجي تقول لي الكورة كم كم

معليش يا قسطا عالم ما عندها عشرة

يا عبد الكريم نذاكر هنا
المشكلة شنو ؟
أنت كتبت :

Quote: بول في حالة كونه رائد لاركلوجيا الصدفة.. - هنا تطل فكرة الاحتمالات المبينة علي قوانين محددة ومعروفة.. - وفي اي مباراة اتية هنالك بالتاكيد الاحتمالات الاتية - 1- فوز الفريق (ا) - 2-فوز الفريق (ب) - 3- تعادل الفريقيين - 4- عدم اقامة المباراة لاي سبب من الاسباب.. اذن بول اشتغل وطيلة فترة سفسفته لتلك الاعلام علي نسبة 25, او (ون اوفر فوور)...!!! وهذا الامر للمبارة الواحدة ولكن عندما نجمل المباريات الثمانية التي نجح في ابو البوابيل نجده قد نجح في تحقيق نسبة نجاح في نسبة (ون اوفر اييييت) اي0(,بوينت 125 من الف) وهي نسبة يعلم الله صغيرة وهامش تحقيقها في كل مرة صغيرة ......

ما فهمت نسبة الــ 25,
ولا فهمت نسبة ال (ون اوفر اييييت)
يا ليتك تشرح لنا كيف حسبت الاحتمالات دي
عشان الفائدة العامة .

Quote: يا عبد الكريم نذاكر هنا

مافي ايتها مشكلة يا محمد ذاكر مذاكرتك طوالي
وكن بالف خير

Quote: المجد والخلود لشيطان الهامش والكوش قسطنطين الويل والثبور لشيطان غرف الزجاج بوووول

والله يا ابو خليل
كل الدلائل وحتي الان تشير علي ان الاخطبوط بول مخجوج مالم تظهر اشارات جديدة
فان الاوان للود قسطا ابن العالم الثالث ان يقدل ويعود الي خمج سوقه المحلي
ولكن حذاري

Quote: والله يا ابو خليل كل الدلائل وحتي الان تشير علي ان الاخطبوط بول مخجوج مالم تظهر اشارات جديدة فان الاوان للود قسطا ابن العالم الثالث ان يقدل ويعود الي خمج سوقه المحلي ولكن حذاري

ولدنا عمر سعد

عندو شيطان خور ابو عنجة

تنبا بفوز هولندا

Quote: ولدنا عمر سعد عندو شيطان خور ابو عنجة تنبا بفوز هولندا

استغربت جدا لاني عرفت معلومة بان الود عمر سعد مسكون ايضا الاخطبوطية
وخليهو بالله ينتظر مباراة هولندا واسسبانيا اليوم وبعدها سنجله في اللستة الدولية للتنجيم المعتمدة من الفيفا بتاعتي

Quote: ما فهمت نسبة الــ 25, ولا فهمت نسبة ال (ون اوفر اييييت) يا ليتك تشرح لنا كيف حسبت الاحتمالات دي عشان الفائدة العامة .

ايوا يامحمد اى سليمان ..

اقبض الجماعه ديل ..شكلهم شغالين بدون معايير ...
قايلين البلد فوضى ...

Quote: يوا يامحمد اى سليمان .. اقبض الجماعه ديل ..شكلهم شغالين بدون معايير ... قايلين البلد فوضى ...

يا محمد عبد الرحمن

كيكي ملك الماسماتك ياخ ود ام نخيل

كيكي وضع اربعة احتمالات اي احتمال نسبته ربع والربع يعادل 25 في المائة

Quote: كيكي وضع اربعة احتمالات اي احتمال نسبته ربع والربع يعادل 25 في المائة

شكرا يا خليل على الشرح
طيب الواحد على 8
دي اتحسبت كيف ؟

Quote: كيكي وضع اربعة احتمالات اي احتمال نسبته ربع والربع يعادل 25 في المائة

وماذا عن الاخطبوط يا أخانا خليل ؟
هل هو كذلك يختار من بين أربعة احتمالات متساوية ؟

Quote: وماذا عن الاخطبوط يا أخانا خليل ؟ هل هو كذلك يختار من بين أربعة احتمالات متساوية ؟

هلا ولدنا محمد اي سليمان

الاخطبوط عبد لقمة ياخ

لو وضعنا علم السودان وماليزيا

ايضا سيذهب لاحدهما

Quote: شكرا يا خليل على الشرح طيب الواحد على 8 دي اتحسبت كيف ؟

وانت قايل نحن خريجين قاردن ستى ..؟
تعال ياخليل ورينا الواحد على 8 دى
جات من وين ؟..وبطل استهبال ..

**

تانى بول دا تشمو قدحة ...

Quote: هلا ولدنا محمد اي سليمان الاخطبوط عبد لقمة ياخ لو وضعنا علم السودان وماليزيا ايضا سيذهب لاحدهما

هذا يعني أن الأخطبوط يختار من بين خيارين وليس من بين أربعة خيارات
لذلك فإن نسبة ال 0.25 غير صحيحة .

Quote: هذا يعني أن الأخطبوط يختار من بين خيارين وليس من بين أربعة خيارات لذلك فإن نسبة ال 0.25 غير صحيحة .

الاخطبوط يختار بين فريقين صحيح

لكن نسبة الاحتمال ربع صحيحة في علم الاحتمالات

عدد الاحداث اربعة

فوز هزيمة تعادل الغاء

مع انو انا ما مقتنع بحكاية الالغاء دي

Quote: تعال ياخليل ورينا الواحد على 8 دى جات من وين ؟..وبطل استهبال ..

لو فازت هولندا سيذهب هذا البوست للخور

ابلع يا بوول

علم غانا
وده يا خالد علم مسطر بنفس اعلام صربيا واسبانيا والمانيا
وبكده برضو النظريةبتاعة الاعلام المسطرة افقيا بتكون خش دربها في الموية

وياشباب بالنسبة لموضوع النسبة نتمني ان يطل الاخ عمار يس ويفتينا في امرها
والقول ما يقوله عمار...
فالسفر صوب ظاهرة الاخبطوط لسسسسع فيهو نقة كثيرة وطويلة

العلم الانجليزي

العلم الارجيتني ايضا يهدم نظرية الخطوط الافقية المسطرة

كيكي
الموضوع ليس موضوع خطوط أفقية فقط و لكن ألوان هذه الخطوط و هل هي براقة أم باهتة أو كما نظر أحد المنظرين الخواجات ذات برنامج ...



خالي خليل
حال الهلال و الكرة السودانية عموماً جعلنا لا نحتاج لعمكـ قسطا كثيراً فالهزيمة لا تحتاج لكثير عناء للتنبؤ بها

هلا خالد وخاله خلي
وياخليل الامور وكما قلت انت تدور في مداراين
مدار الاخطبوط في المانيا ودي فيها احتمالان مع امكانية بالمناسبة لاحتمال ثالث هو انو الاخطبوط ده ما ياكل الاعلام دي ويرفضها
ولكن مادام كل العملية تمت في اطار اكله الاكيد لاحد العلمين فممكن نثبت الاحتمالين فقط...
المدار الثاني وهو مدار الحدث الذي يتنباء به الاخطبوط وده مدار له ايضا تعقيداته وافرازاته من هزيمة وتعادل وفوز والالغاء ايضا يمكن ان نضعه في الاعتبار لانو احنا مش عارفين البحصل شنو (ظروف طبيعية- اشياء خارجة عن الارادة ...والخ)
------

هلا يا ابو الخلد
وعشان كده قلنا نرص الاعلام التي مرت علي بول كوجبات ونتاملها جميعا بالمقارنة بالعلم الالماني وبالتاكيد فروقات الالوان بكون فيها ايضا شواهد قد يكون هذا الاخطبوط ده خجاها

Quote: experiments have shown that they do have both short- and long-term memory

ومعاك لسع يا شول حبة حبة
ودي جزئية ببتوري انو بول ده عندو هارد دسك قادر به ان يخزن اشياء ومقدرته علي تفريز الالوان تجعل من التكهن في امكانية تخزينة لالوان في راسو العجيب ده

Quote: لو فازت هولندا سيذهب هذا البوست للخور ابلع يا بوول

لو فازت هولندا طبعا بول والذي خلف بول بكونو عملو نسبة اعلي من نسبتهم في البطولة الاوربية
وبرضو حيقشروا بيها الالماني...

والبكون اتمقلب هو البغباء الذي رشح هولندا عندما عرضت لها الفرق الثمانية
ثم عاد ورشح اسبانيا عندما عرض عليه الفريقين فقط... وبكون اكل نيم هذا البغباء

اما التمساح العشاري (لول) هاري فانه فوز اسبانيا سيفتح له الطريق لكاس العالم الجاي لو ربنا مدا في ايامه لانو في الفترة ديك قيل بان بول حيكون مافي بعد سنتين
ودي فرصة لقسطا يا خليل يلحق السوق مع باقي الليل ده ويدخل حمارو مع حمير الكتبة ديل

والله ياكيكي الأخطبوط المرة دي ظنيتو حا يجلي

اسبانيا فرصتها أكبر .. لكن نرجع نقول الكورة مدورة

لامن تبقى علي منتخبنا نحنا ياكافي البلا تصبح الكورة مربعة ......

Quote: ودي فرصة لقسطا يا خليل يلحق السوق مع باقي الليل ده ويدخل حمارو مع حمير الكتبة ديل

قسطا فقط يحتاج للترويج والاعلام لو قدرنا نجيب ليهو مذيعة لبنانية

من مذيعات الفضائيات ديل

ممكن يتنبا بغنماية ولدت سخل في هونولولو زاااتا

Quote: والله ياكيكي الأخطبوط المرة دي ظنيتو حا يجلي اسبانيا فرصتها أكبر .. لكن نرجع نقول الكورة مدورة لامن تبقى علي منتخبنا نحنا ياكافي البلا تصبح الكورة مربعة

هلا يا متنصر وحبابك
والاخطبوط بول ولحدي الان مودي اداء ابن لذينة وحقو ياخي تجيب ليهو الفكي بتاعك داااك
يكعبلو لينا شوية لانو بالطريقة دي بكرة من نلقي المريخ شايل كاس افريقيا مع قروش جمال الوالي سابقا دي
--------
كورتنا يا منتصر لو دخل الاخطبوط ولعب لناسنا في الدفاع والهجوم والوسط معا ما اظن حنجيب حاجة مع الفوضي دي
وتحياتي

Quote: قسطا فقط يحتاج للترويج والاعلام لو قدرنا نجيب ليهو مذيعة لبنانية من مذيعات الفضائيات ديل

تعرف قسطا فعلا محتاج لاعلام والخواجات ديل بعملو توم وشمار لحاجتهم
شي فضائيات وشي فلاشات وشي علماء وخبراء اجانب ينضمو الليل والنهار
فحسع انت او لميت كورة قسطا ومنذ ايامات (بورد الهندسة ) والتنبو بالمربتين ومرورا بالهلاليات والمريخيات ومشيت لناس السي ان ان تاني الناطوس الالوسي ما يلحقك..!!
وممكن تيمم ايضا صوب الجزيرة وتعمل برنامج اسمو قسطنيطيات

الشوتة والعشاء الاخير للاخطبوط الان في لاييييييف
وسنري ثم نعود ونتابع

كيكي

شايف الاخطبوط "قبقب" ليك الحبشي بايدينو التمانية وما أظنو الحبشي حيفرفر تاني

وفاز الاخطبوط بكأس العالم

نعم يا الصادق فاز الاخطبوط بكاس العالم واخد الاخطبوط بول النمرة الكاملة مية مية
وعلي السادة الاخطبوط قسطنيطين ان يرعوي
فبول ده يا زول شيطان ما ساهل تببببببببببببب

وماذا سنتابع يا الصادق ولم يعد في الكاس بقية

يا ربي بكون رايو شنو في كورة هلال مريخ؟؟؟

الاخطبوط بول يهزم الاخاطبيط الاتية اسمائهم
1- عمر سعد
2- خليل قسطنيطن
3- البغبغاء الي ركب الموجة موخرا وانصاع لتعاليم الاخطبوط بوووووول

والتحية للاخطبوط معبود الرياح الذي اضاف لهذا الكاس لمحات وتامل

Quote: يا ربي بكون رايو شنو في كورة هلال مريخ؟؟؟

هلال مريخ دي حمي خفيفة يا سوميتا وخالك خليل قسطنطين ممكن يباصرها
اصلو بقي بتاع محليات بعد ظهور البعبع بووووووووول....

وهل نتوقع عمل مشترك ما بين خليل وعمر سعد للتكهن بهلال مريخ بعد فشلهما الكبير في امر اسبانيا هولندا

وسنتابع

Quote: الاخطبوط بول يهزم الاخاطبيط الاتية اسمائهم 1- عمر سعد 2- خليل قسطنيطن 3- البغبغاء الي ركب الموجة موخرا وانصاع لتعاليم الاخطبوط بوووووول

بالإضافة إلى "جهجهة" باكات الحبشي لحدي ما نساهو الحساب ولخبط ليهو "الكربتلوجيا الفى راسو.

سنتابع الحبشي يعني نعمل شنو

Quote: بالإضافة إلى "جهجهة" باكات الحبشي لحدي ما نساهو الحساب ولخبط ليهو "الكربتلوجيا الفى راسو. سنتابع الحبشي يعني نعمل شنو

لوووووووووووول
وانا يا الصادق منذ هذا اليوم ساعلن عن اسمي الجديد الذي سيكون هو الاخطبوط كيكي
وسنتابع

شايف عمك بول بيقدل كيف حتي حط الرحال في بلاد الاسبان. سمعنا تحت تحت سيتم تكريمه في اسبانيه مع الفريق للدوري النفسي الذي اداهو في حسم النتيجه

Quote: وهل نتوقع عمل مشترك ما بين خليل وعمر سعد للتكهن بهلال مريخ بعد فشلهما الكبير في امر اسبانيا هولندا

أضيف ليهم الخال كوستاوي
و سفيان بشير نابري،،عندو بوست شايفاهو فشّ غبينتو في الاسبان و طول لسانو
و اسبانيا ورت هولندا الوجع و اللعب الصاح..

Quote: أضيف ليهم الخال كوستاوي و سفيان بشير نابري،،عندو بوست شايفاهو فشّ غبينتو في الاسبان و طول لسانو و اسبانيا ورت هولندا الوجع و اللعب الصاح..

ايوه كلهم ديل خلاااص يجب اعارتهم للشوؤن للدوريات المحلية والليق السوداني..
والغربية سفيان بعد خروج فريقه شيلي
وكوستاوي بعد راسية قلب الاسد انا ماعارف لقو نفس وين يشجعو بيهو كورة تاتي لووول

Quote: شايف عمك بول بيقدل كيف حتي حط الرحال في بلاد الاسبان. سمعنا تحت تحت سيتم تكريمه في اسبانيه مع الفريق للدوري النفسي الذي اداهو في حسم النتيجه

هلا يا اسامة
وتحياتي
وبول سوف يصبح بطل قومي في اسبانيا واحتمال يصرف الاسبان دم قلبهم حتي ياتي بول الي بلادهم حتي يتم تكريمه تكريم الابطال
وحكاية عجيبة خلاسسسس حكاية اخونا بول ده

رغم أني هولندي الهوي وحزين لعدم حصولهم علي الكأس لكن مبروك للاسبان وما خيبوا ظني فيهم لأنو رشحتهم للبطولة قبل بداية الكأس وحتي بعد البداية التعبانة كنت مصر علي فوزهم بس ما كان يكون علي الهولنديين

Quote: رغم أني هولندي الهوي وحزين لعدم حصولهم علي الكأس لكن مبروك للاسبان وما خيبوا ظني فيهم لأنو رشحتهم للبطولة قبل بداية الكأس وحتي بعد البداية التعبانة كنت مصر علي فوزهم بس ما كان يكون علي الهولنديين

اسبانيا تستاهل فعلا فلقد قدمت كورة متقدمة وراقية جدا يا اسامة
وتيم مافي معاه اي حلول ولديهم حماس عالي وانضباط تكتيكي اعلي

Quote: الاخطبوط بول يهزم الاخاطبيط الاتية اسمائهم 1- عمر سعد 2- خليل قسطنيطن 3- البغبغاء الي ركب الموجة موخرا وانصاع لتعاليم الاخطبوط بوووووول والتحية للاخطبوط معبود الرياح الذي اضاف لهذا الكاس لمحات وتامل

مباااااالغة اول مره اشوف البوست ده


يا كيكى عمك قسطنطين لمن اتصل بى تلفونيا لينقل لى توقعات عمر سعد > تتخيل كتاشه كان راح ينوم
بس بعداك اتذكرت ليك زعمطت مستر بول للالمان وعندها فقط تناولت ليك كباية شاى ما خمج مع ابتسامة زرقاء
ورجعت استمتع من جديد بفنيات انيستا و تشافى و مستر بول > لوووووووووووولز

ياخي في فريق كبير يتغلب في اخر دقيقة

زيو وزي الهلال

ما عارف غلبو البرازيل كيف

Quote: يا كيكى عمك قسطنطين لمن اتصل بى تلفونيا لينقل لى توقعات عمر سعد > تتخيل كتاشه كان راح ينوم بس بعداك اتذكرت ليك زعمطت مستر بول للالمان وعندها فقط تناولت ليك كباية شاى ما خمج مع ابتسامة زرقاء

اساسا انا ما بعرف كورة ناس الغرب ولم اشاهد الدوري الاسباني

ولا افلامهم ولا غنائهم عشان كدة ما مثقف

بعدين بول شنو وزفت شنو

اسبانيا دي مرشحة من قبل كل خبراء العالم قبل ثلاثة اشهر للفوز بكاس العالم

وانت يا كوتش اظنك قريت الكلام دا

بس اخونا طلحة سبق الناس وفتح البوست

Quote: اساسا انا ما بعرف كورة ناس الغرب ولم اشاهد الدوري الاسباني

لا حول الله يا خليل

يأخي إنت هلالابي أصيل ونحن شايفنك رأس الرمح لينا هنا

لمن تقول ما متابع البارسا والريال وفالنسيا

بتشمت فينا الأعداء

هسه يا أبو الخل بقت من موجبات الثقافه إنك تتابع الدوريات دي

وتقول أسماء الفرق بالطريقه دي البارسا... البلوز ... المدفعجيه .. الريدز

الريال .. الخفافيش ... وكمان تحفظ ليك زي كم إسم للملاعب بتاعت الأنديه

لزوم باقي الوجاهه يعني تحفظ الكامب نو السنتياغو بيرنابيو والميستاي

والمدرغال والأولددرافورد وحاجات زي دي

شفت كفايه يا خليل يا كبيرنا في تشجيع أبو الهل


الأخطبوط كيكي

بالله بعد تخلصو هنا إفترعوا لينا بوست لنظريه الإحتمالات

والنسب البيقول عليها الأخ محمد e سليمان

Quote: يا كيكى عمك قسطنطين لمن اتصل بى تلفونيا لينقل لى توقعات عمر سعد > تتخيل كتاشه كان راح ينوم بس بعداك اتذكرت ليك زعمطت مستر بول للالمان وعندها فقط تناولت ليك كباية شاى ما خمج مع ابتسامة زرقاء ورجعت استمتع من جديد بفنيات انيستا و تشافى و مستر بول > لوووووووووووولز

هلا يا الماتدور
والبوست ده كرباوي عملناه قبييييييل العصر كده..
وتعرف زولك ابو خليل انا برضو ضرب لي وقال لي توقعات عمر سعد وقلت ليهم انا يا زول تبع الاخطبوط ده بس
وان قال الاخطبوط شيئا قلتو
وحسع في انتظارهم الاثنين يجو مارقين

Quote: لا حول الله يا خليل يأخي إنت هلالابي أصيل ونحن شايفنك رأس الرمح لينا هنا لمن تقول ما متابع البارسا والريال وفالنسيا

يا فدياس يا صاحب الازميل

انا عندي ريسفير بتاع dream box

وهو بشتغل بالانترنت طبعا والنت في البيت كان مقطوع عندي فترة طويلة وما كنت بشوف الجزيرة

الرياضية السنة دي حضرت بعض مباريات كاس الاندية الاوربية

وعرفت انه اذا تم مراقبة نيستا واكسافي اسبانيا انتهت

مثلما فعل مورينهو مع الانتر

وامس لولا طردة هاي تنقا

كان الاخطبوط لحمه يتوزع بين القبائل

هلا يافدياس وحباب ابو خليل ذلك القسطنطين الذي صار في امرا ضيق
ونسافر معا صوب مدارات الاخطبوط التي صارت اكثر دهشة ونقول

هكذا فعلتها اسبانيا وقضت علي هولندا بالضربة الفنية القاضية ثم هكذا ايضا فعلها (الاسطوري بول) وصدقت جل توقعاته وخلانا فاغرين الخشوم مترين ونص في هذه الجلسكة الالمانية عبر الاخطبوط بول الذي كان جرئ وواثق الخطا وملتهما للاعلام بمهنية اخطبوطية عالية تحسدها عليها اخطابيط مياه عديدة لم تجد المجد والخلود الذي وجده الفتي الاخطبوطي المدلل (بول جان بول)...!!
هنالك اشارة الان وبعد نجاح بول 100 في المية المية في كاس العالم جديرة بان نتاملها وهي نسبة ال 80 في المية التي تكهن بها في البطولة الاوربية..!!!
فهل هي مهارات بول ومقدراته علي تنفيذ توجيهات وتكهنات مدربه قد ارتفعت الي اعلي مستوياتها وخاصة ان الفترة ما بين البطولة الاوربية وكاس العالم فترة كافية للتدريب والتجويد للعمل الاخطبوطي...واعلاه افتراض جدلي ان سلمنا بان خلف قيصر (بول) يوجد خلفه قيصر (الماني) يسخر بول كمنصة لاعلان تكهناته.....!!!

وتتفاقم المحنة والحيرة لتذهب في الامكانية التي استطاع بها ذلك الشخص او الاشخاص الموجودين خلف (بول) في الوصول الي هذه النتيجة هل هي عبر وسائط روحية....!@!!!ام عبر تسخير للبرمجيات وتغذيتها بمعلومات الفرق المنافسة بدقة تكاد ان تحصي حتي الجاهزية الفنية والتكتيكية واللياقية والطقس والجهمور وموقف الفريق في البطولة وتاريخه وامكانيات لاعبيه وعييييييييييك من المعلومات التي يمكن الحصول عليها ثم العمل عليها تقنيا لاصدار نتيجة لحدث ما.... وكلو وارد والخواجة زول شفت وما نستبعد منو اي حاجة في الزمن المنفلت التطور ده....!!!

العلم الخواجاتي اتطور بدرجة عالية ومخيفة وبرنامج كمبيوترية عديدة ودقيقة يمكن صناعتها لتنفيذ مهام ذات خصوصيات ومواصفات قد تتغير ما بين الفينة والاخري وبدقة عالية وانضباط تقني مهييييييب..؟؟؟
فهل تم تسخير العمل التقني وتم ارساله عبر الاخطبوط بول حتي يبدو اكثر اثارة ودهشة ومتعة وهيلمانة...؟؟؟ سؤال للتامل والحيرة
....
بول ذلك الاخطبوط سيدوم الجدل حوله كثيرا وعميقا وسطحيا في كراكير كثيرة من كراكير هذا الدنيا و بني خواجة وثقافات وعوالم اخري
وسيغذي اوعية كثيرة بترسيخ الايمان بالقوي الخارقة وسيخترق جدارات فلسفات واديان عند اخريين قاعدة علي الهبشة وسيروج سوق
التكهانات في كورة القدم عبر وسائط جديدة وسيضع الاخطبوط كحيوان تحت مجهر التشريح البيولوجي والنفسي والبيئي والمزاجي

وعلي هامش الاسطوري بول وكل زخمه لابد لنا ان نحلق ولو قليلا عن وعي الاشياء المشابهة لتلك الحالة البولية مع ما يجري في واقعنا الكروي في السودان تحديدا...
وما يفعله بول هو بالتاكيد (تكهن) وهو الشي الذي يمكن تثبيته علي الارض عبر النقل الحي لبول وهو يلتهم بلذة ومتعة اخطبوطية احدي علمي الفرق المتبارية...وفي السودان وفي عهود سابقة راجت فكرة التوتو كورة الي كنا صغار ونري اكشاكها تملاء المساحات والكبار يحملون كبوناتها المميزة ويتكهن الانسان الساكن في جوبا بمباراة لنيل شندي او هلال القضارف او مريخ الدمازين والعصمة الكاملين ممني نفسه بالفوز بقطعة ارض او لوري هينو والكثير من الجوائز التي كان اللعاب يسيل اليها بالتاكيد..!!!
ويمكننا اثبات تقاطعنا مع بول في امر التوتو كورة عبر الممارسة المشتركة...؟؟
ولكن تظل نافذة الحيرة في ربط العمل الاخطبوطي بالممارسات الاخري في الكورة السودانية التي هي بالتاكيد اكثر شيوعا كالتكديك وربط المباراة بكل نتيجتها في كراع كديس او كراع طائر مرتحل عابر الاجواء السودانية...!!!

العمل الكالوشي مالوشي في ميادين كرة القدم السودانية ياخذ اشكال شتي وفيرشنات عديدة...!! والغريب في الامر هو انه واجد رواج ما عادي وتصرف عليه القروش والكنجيلات الهبطرش..!! والمحطات الارضية التي تمارس هذا العمل ظلت قبلة ومزار دائما ومنذ سنين عديدة وتشهدالقري النائية في احدي اقاليم السودانية الوسطانية تحركات ماكوكية لكبار الشخصيات الرياضية التي تعني بامر الادارة الكروية... قبل المباريات المهمة وبالذات لفريقي القمة الهلال والمريخ..!!

عشان نعرف مصداقية هذا الإخطبوط يجب إعادة التجربة أكثر من مرة و حساب ال p-value

و يكون فرض العدم the null hypothesis إنو إسبانيا فائزة بكاس العالم و الإفتراض البديل (the alternative) أنها لن تفوز

بعد داك ممكن نحدد هل هذا الإخطبوط يعتمد علي (الخج) أم مركب مكنة قسطنطينية بالرغم من أن ماكنات خليل القسطنطينية لم يتم قياس المصداقية لها حتى الان.

كيكي الأخطبوطي

السؤال المحيرني:

كيف بدأت حكاية الأخطبوط، يعنى منو الفكر في الموضوع وأداهو الأكل ومعاهو الأعلام، أعتقد أن السر في الموضوع دا.

كيكي الأخطبوطي
سلام

تم إهداء بول الأخطبوط نسحه طبق الأصل من كأس العالم

تقديراً لجهوده وتنبأته العظيمه إبان كأس العالم
والتي كانت بنبسه ميه في الميه

Quote: دخل الفنان الإماراتي عبدالله بالخير منافسا قويا للمشجع الإسباني، الذي عرض 30 ألف دولار لشراء الأخطبوط الألماني بول، والذي راهن على فوز الماتادور الإسباني في نهائيات كأس العالم على حساب الطواحين الهولندية، وأعلن بالخير استعداده لشراء الأخطبوط بـ 40 الف دولار. جدير بالذكر أن جميع توقعات الأخطبوط "بول" والذي يسكن أحواض أوبرهاوزن الألمائية كانت صائبة، خلال توقعاته لست لقاءات أثناء البطولة.

من عكاظ السعودية وده الرابط > http://www.okaz.com.sa/new/Issues/20100713/Con20100713361316.htm

Quote: تم إهداء بول الأخطبوط نسحه طبق الأصل من كأس العالم تقديراً لجهوده وتنبأته العظيمه إبان كأس العالم والتي كانت بنبسه ميه في الميه

هلا يا فدياس وبول يستاهل ياخي كل خير فقد اداء اداء رهيب وخطف الاضواء وظهر اسمه في المدرجات وفي القنوات ووذكره كل المعلقين علي الهواء او في استديوهات التحليل وايضا لقد عمت سيرته بوادي وحضر كل العالم
وجضم تكهن ابن لذينة وصرع العالم بالدهشة..!!
ويستاهل الكاس الاصلي زاااااتو

فبول لعاب يا هلالاب

Quote: السؤال المحيرني: كيف بدأت حكاية الأخطبوط، يعنى منو الفكر في الموضوع وأداهو الأكل ومعاهو الأعلام، أعتقد أن السر في الموضوع دا.

هلا يا متابعة
وفعلا ده موضوع يا الصادق ده اساسي ومهم جدا في معرفة اسرار الاخطبوط بول...
وكيف تم معرفة مقدرات بول التكهنية تلك وباي طريقة هل هي الصدفة ان تم اختيار هذا البول من وسط مجموعة من الاخاطبيط
هل لو كان هنالك اخطبوط اخر غير (بول) في هذا المكان سيقو بنفس الاداء..؟؟
وهل هذه الخاصية مربوطة بالاخطبوط في روحه ولا يمكن لاي حيوان مائي او برئي اخر ان يقوم بهذا التكهن..

يا زول موضوع بول ده فيهو حكاية بالجد ما راكبة عدلها

عموما سنتابع

Quote: عشان نعرف مصداقية هذا الإخطبوط يجب إعادة التجربة أكثر من مرة و حساب ال p-value و يكون فرض العدم the null hypothesis إنو إسبانيا فائزة بكاس العالم و الإفتراض البديل (the alternative) أنها لن تفوز بعد داك ممكن نحدد هل هذا الإخطبوط يعتمد علي (الخج) أم مركب مكنة قسطنطينية بالرغم من أن ماكنات خليل القسطنطينية لم يتم قياس المصداقية لها حتى الان.

هلا يا ماسمتك والاشواق والله...
وبول غريب وعجيب يا عمار وفعلا يحتاج ان يتم تقليبه وتفتيشه تحت وفوق رياضيات ..وفيزياء وبيولوجيا احياء مائية...
وحتي الان الاشارات التي احرزها في البطولة الاوربية ذات ال 80 في المية ثم ال 100 في المية هي القياسات الوحيدة التي تسربت الينا..
وبدات الان اكثر اقتناعا في النظرية التي تفيد بان بول (يعتمد علي الخج) بواسطة خواجة شفت يعمل خلف الحيطان الاخطبوطية وهو من يتنباء عبر وسائط بنت لذينة ثم يدرب بول علي الافصاح عن هذه التكهات في الموتمر الصحفي الذي يعقده بول في حوضه الكائن في احدي كراكير المانيا ويعلن النتيجة بكل ثقة اخطبوطية..
ومكنات صحبك ابو خليل يكفينا ما فعلته بنا في امر البرازيل فهي تجربة تغني عن اي قياس ل (بي -فاليو)

Quote: استعداده لشراء الأخطبوط بـ 40 الف دولار

هلا يا كتاشا
و40 الف دولار مبلغ ياخي بسيط جدا جدا بالنسبة لاخطبوط نحرير زي صديقنا بول ده
والدلالة دي لو دورت صاااح الاخطبوط ده سعرو احتمال يفوق ديون السودان زاااتو.. لوووولز (علي قولتك المطلوشة)

الأخطبوط كيكي

هسه تأثير شغل بول ده على مكاتب المراهنات كيف ؟؟

يعني لو قام إشتغل في دوري أبطال أوربا الراح يحصل شنو ؟؟

ولو هو متخصص كأس عالم وأمم أوربيه

تحياتي

Quote: الأخطبوط كيكي هسه تأثير شغل بول ده على مكاتب المراهنات كيف ؟؟ يعني لو قام إشتغل في دوري أبطال أوربا الراح يحصل شنو ؟؟ ولو هو متخصص كأس عالم وأمم أوربيه

هلا يافدياس
وحبابك وحباب الاخطبوط بول..
بول بالتاكيد بكون ساعد الكثيرين في خمج الدولارات في سوق المراهنات.. واتخيل بان امر الاعتماد عليه كمصدر تنجيم عند الكثيرين قد اتي
لاحقا وخاصة عندما مرت تكهناته بسلام في المباريات الثلاثة الاولي..
وهنالك بالتاكيد من هم علي دراية بمقدرات بول ومنذ البطولة الاوربية فزي ديل بكون حسسسع الكنجال الدولاري جاري في يدهم حسع جري شديد
وبول يجقلب والكينجال للخواجات المراهنين...

لو قدر لبول ان يلعب (ماتشات ) في ابطال اروبا فان الغالبية قد تذهب الي ما قاله بول
وسيكون بول هو السلطان اذا ما قال شيئا قال مثله حرفاء المراهنات والذي يخالف بول سيجد نفسه ماكلا لنيم اروبي ابن لذينة

قريت معلومة تفيد بان بول عمرو قصير في ملاعب الدنيا وسيرحل قريبا
وغايتو الخواجة الما غنا من بوول ده تاني لحدي عيال عيالو ما بغني
وشكرا يا فدياس علي الباصات وشكرا علي الخانة

الأخ عبد الكريم وضيوف تحياتي مجددا

كتبت :

Quote: بول في حالة كونه رائد لاركلوجيا الصدفة.. - هنا تطل فكرة الاحتمالات المبينة علي قوانين محددة ومعروفة..- وفي اي مباراة اتية هنالك بالتاكيد الاحتمالات الاتية - 1- فوز الفريق (ا) - 2-فوز الفريق (ب) - 3- تعادل الفريقيين - 4- عدم اقامة المباراة لاي سبب من الاسباب.. اذن بول اشتغل وطيلة فترة سفسفته لتلك الاعلام علي نسبة 25, او (ون اوفر فوور)...!!! وهذا الامر للمبارة الواحدة ولكن عندما نجمل المباريات الثمانية التي نجح في ابو البوابيل نجده قد نجح في تحقيق نسبة نجاح في نسبة (ون اوفر اييييت) اي0(,بوينت 125 من الف) وهي نسبة يعلم الله صغيرة وهامش تحقيقها في كل مرة صغيرة ......

الآن فهمت نسبة الــ 25, بعد شرح الباشمنهدس خليل
(نظريا مقنعة، لكن تطبيقها على طريقة الأخطبوط ونظام المنافسة محل نظر)
لكن فهمت نسبة ال (ون اوفر اييييت)يا ليتك تشرح لنا كيف حسبت الاحتمالات دي
عشان الفائدة العامة ، وطبعا أنت قلت :

Quote: هنا تطل فكرة الاحتمالات المبينة علي قوانين محددة ومعروفة..

يا هندسة لازم تشرح لنا طريقة حساب الاحتمال الذي قيمته واحد على تمانية دا .
شكرا أخانا محمد عبد الرحمن على المثابرة .

الصادق إسماعيل
سأعتذر لك عن تصحيحي أخطاء محسن خالد
إن شئت في بوست منفصل .

Quote: الآن فهمت نسبة الــ 25, بعد شرح الباشمنهدس خليل (نظريا مقنعة، لكن تطبيقها على طريقة الأخطبوط ونظام المنافسة محل نظر) لكن فهمت نسبة ال (ون اوفر اييييت)يا ليتك تشرح لنا كيف حسبت الاحتمالات دي عشان الفائدة العامة ، وطبعا أنت قلت :

هلا يامحمد
وكون نظرية (الربع) بقت مقنعة هذا لعمري اختراق مهم وحاجة ايجابية ومكسب لقوي الاخطبوط بول
وطبعا اكيد قر يت فووق الراي بتاعي (الفيهو انت تمشي تذاكر وتتذكر في فجة تاني وتعال مرحب بيك وحبابك)..
وحتي ولو قدم للاخطبوط علمين واحد فيهو(كيكي حيشرح لمحمد) والتاني (كيكي ما حيشرح لمحمد)
وقام الاخطبوط اكل العلم الفيهو كيكي حيشرح لمحمد .. فهنا سيكون الاخطبوط توقع شي لن يحصل علي الاطلاق..!!
وببساطة لانو لا حوار ايجابي سيتم بيننا ولافائدة عامة سوي الكركبة والاحتقان ...!!!
فالامر الان في ملعبك
1-عاوز تمشي تذاكر وتجي تصلح مرحب وحبابك وبكل تقدير للمعلومة التي صلحتها
(او تقنتع بالمعلومة زي ما اقتنعت بالربع) برضو حبابك وبكون مكسب وتقفيل للثغور الاسفيرية السوداء السلبية في هذا المنبر
2-عاوز مصلحة عامة فضروري تفهم وتعي بان لا مصلحة عامة امر حوار اوجدل ارضية تقدير الاخر مفقودة تماما بيننا
3- عاوز تمارس الكركبة ووعي الدشمنةالاسفيرية المغلفة برضو حبابك بكان ما قبلت وسينظر ويفاد في امرك بالتاكيد

Quote: ارضية تقدير الاخر مفقودة تماما بيننا

ليه كدا عبد الكريم ؟
صحيح نحن ما قدر المقام ، لكن هذا لا يجعلكم
تعدمون تقديرنا تماما.

بعدين يسا هندسة إنت قمت حسبت احتمالات بطريقة لم نفهمها
ونحن عاوزين نعرف ونتعلم ونفهم كيف اتحسبت .
دا علاقته بتقدير الآخر شنو ؟
الموضوع د متعلق بتقدير المعرفة نفسها

Quote: ليه كدا عبد الكريم ؟ صحيح نحن ما قدر المقام ، لكن هذا لا يجعلكم تعدمون تقديرنا تماما.

لا يا محمد لا تقلب الاية..ارجوك
انعدام تقدير الاخر موجود من قبلك انت وموثق توثيق اسفيري مبذول في بوستات كثيرة (ولو عاوزها نجيبها ليك)..!!
وانت القيمت ووانتهيت من الموضوع ده بدررررري ومن اول مقابلة اسفيرية بيننا (او كما قلت)...!!
المعلومة التي تريد الحديث والحوار في رحاها احترامي لها هو من يجعلني اعرض تماما في الدخول معاك في جدل وحوار حولها
كوني وعبر وثائق اسفيرية موثقة عارف فسلفتك والقول بتاعك الفصل في امر من اوردها..
اذن يا محمد لو كنت بتحترم المعلومة ولديك ما يفيد بانها خطا فالينا بها في مظلة الاحترام والتقدير التي ذكرتها لك في بواكير مداخلتي معك..!!
واحترام الاخر والفلسفة الجدلية تجاهه ياتي قبل احترام المعلومة التي يفترض النقاش والجدل حولها ولاشنو.؟؟؟

Quote: الصادق إسماعيل سأعتذر لك عن تصحيحي أخطاء محسن خالد إن شئت في بوست منفصل .

والله يا الصادق ما عجبني ليك

كيفك يا كيكي .. يا خي عليك الله البوست متابعو ومستمتع بيهو جدا جدا ..
أشرح لي أخونا الحبشي المسألة دي خلينا نمشي لي قدام مع أخونا الأخطبوط بول ..

يا هندسه أنا مع كلام أخونا ناذر ده


يأخي فكونا من فلت البوستات

وأرجع لينالبول

يأخي البوست ده كان ماشي كويس

سلام يا ناذر وفدياس
وشكرا علي الحضور والبوست بتاعنا باذن الرب لن يصيبه شي..
واتمني ان لا تنزعجوا فالبوست ماشي الي مقاصده وعلي هامشه يمكننا ان نناقش بعض الاشياء التي اعتقد جازما بانها اساسية ومهمة وبتساهم مستقبلا في نقاش او بوستات غير مفتولة مع محمد اي سليمان تحديدا...
الراي بتاعي في الشرح لمحمد قلتو فووق يا شباب ولا تراجع عنه تماما مالم تستجد اشياء علي ارض هذا البوست او بوستات اخري
تصنع ارضية تتيح لي انتاج معرفة للمصلحة العامة في تحاور مع محمد ...!!
وهذا البوست مقاصده لا تتوقف فقط علي هذه الجزئية محور الكركبة مع محمد التي قد تحسم هنا او في بوست اخر ولكنها حتما ستحسم علي ارضية تحترمها اولا كمعلومة يجب احترامها وتشيد مسرح تداولها بمظلة احترام الاخر..!! او تظل معلقة حتي يجد الله لنا مخرجا من هذا الكون

ولايزال ليل البوست طفلا يحبو وسنعود ونتابع

يا هندسة

Quote: (او تقنتع بالمعلومة زي ما اقتنعت بالربع) برضو حبابك وبكون مكسب وتقفيل للثغور الاسفيرية السوداء السلبية في هذا المنبر

أنا الربع اقتنعت به -أوبصحته نظريا- بعد أن تبرع
الأخ خليل مشكورا بشرح طريقة الحساب.
أنتظر منك شرح طريق حساب الثمن .

Quote: الراي بتاعي في الشرح لمحمد قلتو فووق يا شباب ولا تراجع عنه تماما مالم تستجد اشياء علي ارض هذا البوست او بوستات اخري تصنع ارضية تتيح لي انتاج معرفة للمصلحة العامة في تحاور مع محمد ...!!

يا هندسة أنت قدمت المعلومات التي نرجو منك شرحها
قبل تداخلي معك في البوست، وموقفي منك أو موقفك مني ليس
عذرا للتهرب من بيان منطقك في حساب الثمن .

يا محمداي سليمان:
يا خي ربنا يهداك سيب المماحكه البتعمل فيها دي, الطريقه الحسب بيها كيكي النسب بتاعتو دي واضحه - واضحه لا تعني انها صحيحه-
1/ وضع اربع احتملات للتكهن لكل مباره
يبقي احتمال الاختيار هو 1/4 = 0.25
2/ الاختيار كان من تمانيه مباريات
يبقي الاحتمال لكل مباره
1/8 = 0.125
تعال اذا اصلا انت عايز معرفه وعايز تفيد الناس قول لكيكي ياخينا حسابك ده خطأ لانو الاحتمالات في هذه الحاله لا تحسب هكذا انما الطريقه الصحيحه هي كذا وكذا.
بالمناسبه طريقه حساب كيكي ده تنقصها كثير من الدقه اذا ارجعناها لقوانين الاحصاء البحته لكن مافي زول دقق و عكلت في الموضوع لانو القصه اصلا ما درس عن الاحصاء انما عن ظاهره الاخطبوط بول الذي شغل الدنيا

تحياتي يبا أستاذ عمر بوب
وشكرا للتعقيب
الجزء الأول نظريا واضح وقد تفضل خليل بشرحه
شكرا لزيادة شرحك كدا
دي ( 1/4 = 0.25 ) بقت واضحة شديد
والأخ عبد الكريم وضح فضاء الاحتمالات:
(فوز الفريق الأول /فوز الفريق الثاني/التعادل/إلغاء المباراة)
بافتراض أن هذه النقاط لها فرص حدوث متساوية، وأن الأخطبوط
سيختار نقطة واحدة من بين نقاط الفضاء الأربع.

Quote: 2/ الاختيار كان من تمانيه مباريات يبقي الاحتمال لكل مباره 1/8 = 0.125

والله ما فهمتها الحتة دي
اختيار شنو ؟
ما هي النقاط الثماني في فضاء الاحتمالات في هذه الحالة ؟

Quote: ما هي النقاط الثماني في فضاء الاحتمالات في هذه الحالة ؟

النقاط التمانيه في فضاء الاحتمالات هي
ان يختار نتيجه المباره الاولي والثانيه والتالته والرابعه ...... والثامنه صحيح

Quote: والله ما فهمتها الحتة دي اختيار شنو ؟ ما هي النقاط الثماني في فضاء الاحتمالات في هذه الحالة ؟

محمد اي سليمان

كلامك صحيح حكاية الثمن فيها شوية دخنة وما ظابطة

الثمانية مباريات في علم الاحتمالات ينطبق عليهم قانون الربع

ايام الجامعة كان تلت علي ما اذكر فوز هزيمة تعادل

فعليه نرجو من الممراح كيكي تعديل حكاية الثمن دي

ومن ثم المواصلة في موضوع شيطانو المدلع دا

يا وليد:
من الواضح انو كلام كيكي بتاع الاحتمالات ده ما كلام علمي دقيق واخونا محمد عارف الكلام ده وفايت اضانو بهناك يعني كان ممكن بكل بساطه يجي يقول ليهو ياخي الكلام بتاعك ده غلط احصائيا والصحيح كده كان افادنا وذاكرنا الاحصاء معاهوبدل المماحكه البيعمل فيها دي.

___________________________________________
يا خونا محمد الحسن يا خي انت قبل فتره قصيره ذكرت انك الان لا تعمل بالتدريس و بتعمل في مجال عندو علاقه بالاحصاء*
يبقي قصه ان الاحتملات نسيتها دي ما تركب الراس


* بالله ما تقول لي جيب كوت للكلام ده يكفي ان تقول انو تقول انا ما كتبت كلام بهذا المعني وانا بصدقك

Quote: يا وليد: من الواضح انو كلام كيكي بتاع الاحتمالات ده ما كلام علمي دقيق واخونا محمد عارف الكلام ده وفايت اضانو بهناك يعني كان ممكن بكل بساطه يجي يقول ليهو ياخي الكلام بتاعك ده غلط احصائيا والصحيح كده كان افادنا وذاكرنا الاحصاء معاهوبدل المماحكه البيعمل فيها دي.

كلامك صحيح يا بوب

انا قلت كدة عشان نشوف (نيو براقراف )

Quote: يا هندسة أنت قدمت المعلومات التي نرجو منك شرحها قبل تداخلي معك في البوست، وموقفي منك أو موقفك مني ليس عذرا للتهرب من بيان منطقك في حساب الثمن

خلاص سميتها تهرب وقعدت يا محمد..!!!
اولا يا سيدي طالما كتبت انا معلومة او تضريبة هنا فهي بالتاكيد مسئوليتي دون شك ودي ما فيها قولان..
صحيحية ستبقي صحيحة...وان اصبحت خطا فلتصحح وعلي المصحح كل الشكر والتقدير. وعلي الاعتذار بكل تجرد عنها مرجعة امري فيها فكلنا معرضين للخطا..!!!

ودوما نتعلم بكل تواضع ونكران ذات..!!
ولكن ان تاتي انت محمد من طرف المدينة فانني لن اخذك كمداخلة فقط في هذا المنبر (معزولة العمق والتاريخ بيننا) فانت يا سيدي خطاب اسفيري واستايل
ولديك راي مسبق موثق عن فروقات المعرفة واعتقد بانك لن تنسي حديث الفراهيدي ولا تسطيع انكار دلالته ودوره في تناول المعرفة...!!
وحديث غياب ارضية للتحاور بيننا وتلخيصك لذلك المبذول في المنبر ..!!
فباي فلفسة واي وعي يا محمد تطالبني بان اشرح ليك عملية حسابية او تتوثق مني في جزئية علميةوانت سلفا واضع راي كبير وعريض
وكبير كبر المساحة ما بين الفراهيدي واي زول جنقو جورو زي حضرتي كده..!!

القصة يا محمد ما سمبلة وممحكات هنا وهناك...القصة بالنسبة لي علي الاقل وضع اشياء في نصابها
مبداء

من الاشياء التي هطلت الي الذاكرة ونحن في راكوبة الاسطوري بول رائد الشختك بختك العالمي هي سيرة ذلك الشخص الذي برع بصورة خرافية في التنبوء بالارقام التي تفتح عليها (ظهرة الليدو) عندما يتم تحريكها وهي مغطاة بفنجان في اللعبة الشعبية الشهيرة (الكشكوش)..فلقد كانذلك الرجل فيرشن متقدم جدا من الاخطبوط بول وكان في استطاعتة الفوز مرات عديدة وخرافية مما جعل اصحاب تلك الترابيز التي كانو ينصبونها في الاعياد الرسمية ان يتجنبوه ويزجروه كونه كان يمارس الخرت ووضع قروشه في الارقام التي كانت تكسب طوالي وبدون ادني كركبة مما جعل الاخريين يشفون منه ويضعون قروشهم اينما وضع ذلك الاخطبوط الانساني الرهيب الذي لم يجد المجد والخلود الذي وجده (بول) بل اكتفي فقط بتلك القروش في ضرب المرايس والقمار الحي وبعض الاشياء الملغوسة الرعديدة جدا..!!!

Quote: الانساني الرهيب الذي لم يجد المجد والخلود الذي وجده (بول) بل اكتفي فقط بتلك القروش في ضرب المرايس والقمار الحي وبعض الاشياء الملغوسة الرعديدة جدا..!!!

يا تلاقح الاخيلة

شائف الاخطبوط اختار البرادعي لرئاسة مصر

حسب افادة واحد مصري معانا في المكتب

خليل قسطنطين وبوب
وسلامون
وطالما انتو الاثنين مهندسين عدول ونحريريين قلتو فيها دخنة (التضريبة) دي
فاذن انها الدخنة بدون شك
وانا من هنا اعتذر اعتذار صريح وواضح عن هذه التضريبة
___
ولا مكابرة في المعرفة علي الاطلاق..
وسنعود

Quote: يا تلاقح الاخيلة شائف الاخطبوط اختار البرادعي لرئاسة مصر حسب افادة واحد مصري معانا في المكتب

انا اتمني ان يدو علمين واحد فيهو اوكامبو والتاني فيهو البشير
ونشوفو حياكل منو فيهم

وطالما نحن ايضا في رحي شكوك روحية صادرة عن بول في وسط غموض امره فالغموض والدهشة وسيرة الاشياء تجعل من سرد ذلك الحدث الذي كنت شاهد عيان علي امره واجبا ملحا كوننا في هذا الكون نمر باشياء يعجز العقل البشري في تفسيرها ولو الي حين..؟؟
احتفلنا وهججنا وهيصنا حتي الثمالة في زواج بلدياتي الجميل (اكس) علي احدي الحسناوات ذات الجمال الافريقي الاخاذ وكان هو قد اقتلعها عنوة واقتدارا من براثين منافسين خطيرين ومريشين وغير مريشين وذهب الي الخراطيم في شهر العسل مثله ومثل الكثيرين من عرسان تلك البقعة وقضي علي دون العادة ثلاثة ايام ثم عاد بلدياتي هذا وهو في غاية الدبرسة والسرحان والقرف والاحباط...ومالك يا زول.هوووووي..؟؟؟
افاداته المرتبكة افادت بان الامر الذي جري معه امرا غريب وعجيب شوية...!!فقد قال بان كل اموره تبدو تمام التمام والياته الذكورية تعمل باقصي طاقتها ولكن وبمجرد ان يقترب من عروسته كانت الاشياء ترقد القش وينخفض تياره الكهربائي وتموت اسده في الغابات نوما تقيل...؟؟
اليوم الاول
واليوم الثاني
واليوم الثالث...!!!

وبعدها قرر ان يعود الي ادراجه وكنا قد عزينا معه هذا الامر كحالة نفسية او مجرد خوف من ماتشات لعريس لم يخبر من قبل تلك الدروب والكراكير فقد كان الرجل بكرا ولم يمارس مثل هذه الاشياء في خارج اطار الشرعية علي الاطلاق...!!
ولكن طل من طرف القرية احد المقرمين باخبار وسير تلك البقاع من افاد وبالحاح شديد بان هذا العمل (شغل كواديك) وعمل بتاع فكي قد يكون قد قام به احد المنافسين الذين قضي عليهم بلدياتي هذا بالضربة القاضية وكاووش علي الفتاة ذات الجمال الافريقي الاخاذ...!!
ولذا قرر القوم بضرورة الذهاب الي فكي تندل (والفكي التندل هو الفكي المسجل خطر والمجرب تجريب علي مستوي احداث كبري) ويمتلك مقدرات طلس ملص عالية...!!!
كان يمكن ان تبدو كل الاشياء اعلاه والتوصية بالذهاب الي الفكي التندل كعمل من اناس ذو وعي قليل بالاشياء العلمية والمادية والنفسية المحيطة بهم...ولكن افادات الفكي التندل هي من جعل هذا الامر غامضا وارسله الي خانة الاشياء المحيرة جدا...!!!
فلقد افتي الفكي التندل بالتالي: (ايووووووووووه) هنالك عمل معمول لهذا العريس ومتواجدة كواديك وحجابات في الجهة الفلانية والعلانية من( بيته) وامشو ابحتو وطلعو الحاجات وستعود الي ابنكم كهربته وساعتها يمكنه الاستمتاع بحلاله وعروسته وهو بكامل لياقته وقوته الهورس بورية....!!

وفعلا والله علي ما اقول شهيد ذهب القوم وكنت حاضر لعملية الحفر وتم استخراج (بيضة وسبيب وطائر ميت ومصايب كده ما بعرفها ولا شفتها علي الاطلاق).... وفي ذات الليل عادت الي بلدياتنا قوته وسلكت مواسيره ولم تمت اسوده علي الاطلاق وعاش وحتي الان في ثبات ونبات وبنون....!!!
المسافة ما بين بين الفكي ومنزل بلدياتي لم تكن قليلة حتي يقوم الفكي بارسال من يدفن هذا الاشياء
في تلك الايام لم تكن هنالك وسائل اتصالات وموبيالات حتي يناغم الفكي احد اعوانه وجواسيسه
افادات اهل البيت افادات بان عينهم لم تقع علي احد غريب في هذا المنزل ولم يهوب ناحية تلك الامكنة انسان...
هذا الحادث ظل عالقا في ذهني ومنذ سنين طويلة واتمني دوما ان اجد له تفسيرا منطقي يروي فضولي ولكن هيهات هيهات..
وسنعود

كيكي ..

Quote: وقضي علي دون العادة ثلاثة ايام ثم عاد بلدياتي هذا وهو في غاية الدبرسة والسرحان والقرف والاحباط...ومالك يا زول.هوووووي..؟؟؟ افاداته المرتبكة افادت بان الامر الذي جري معه امرا غريب وعجيب شوية...!!فقد قال بان كل اموره تبدو تمام التمام والياته الذكورية تعمل باقصي طاقتها ولكن وبمجرد ان يقترب من عروسته كانت الاشياء ترقد القش وينخفض تياره الكهربائي وتموت اسده في الغابات نوما تقيل...؟؟

واحد قريبي برضو عرس وداير يجي الخرطوم .. سألوهو : أها يا زول حا تجي متين ؟
قام بي كل براءة رد عليهم : إن قضيت باكر بجي ..!!

صنفرة :

الغريبة زولي دا إتأخر في الخرطوم وكل شوية الناس يضربو ليهو يسألوهو : أها يا زول : لسع ما قضيت ؟، لسع ما قضيت ؟

Quote: الغريبة زولي دا إتأخر في الخرطوم وكل شوية الناس يضربو ليهو يسألوهو : أها يا زول : لسع ما قضيت ؟، لسع ما قضيت ؟

زولكم زااتو شفقان ياخي شفقة زهرة
بلدياتنا ده لو شفتو جاء راجع عينو منططة وحالتو بالبلاء تقول ما ياهو عريسنا الزينة القبل ثلاثة ايام كان
بجبجب وبرقص القرد والنبق ومبسوط بسطة شديدة
يازول الكواديك او (كما قيل) رقدتو ليك سلطة وبطاطيرو لو عملو ليها شرز من بطارية تركتر استير النوع(ابو جيقلا) دااك ما بتقوم

كيكي متذكر ياخي النكتة الرسلتها ليك في الماسنجر قبل كم شهر بتاعت الفكي القال بيبيع العروق داك وباع لي صحبي واحد ولمن صحبي زعل منو وقايل روحو إتدقس قال ليهو كدي طلعو نشمو

هلا يا ليون واضحك الله سنونك ياخي

Quote: كيكي متذكر ياخي النكتة الرسلتها ليك في الماسنجر قبل كم شهر بتاعت الفكي القال بيبيع العروق داك وباع لي صحبي واحد ولمن صحبي زعل منو وقايل روحو إتدقس قال ليهو كدي طلعو نشمو

هلا يا ناذر
والنكتة
وفكيك داك الله لا وقع حبيب في سكتو ياخي

Quote: الصادق إسماعيل سأعتذر لك عن تصحيحي أخطاء محسن خالد إن شئت في بوست منفصل .

يا لبؤس الحبشي

يُكَذِّب ويُصَدِّق كذبته

وما زال محسن خالد هو الكابوس الأعظم بالنسبة للحبشي للدرجة التى تنازل فيها عن "معركته" مؤقتاً مع كيكي ونسي قوله المشهور

أن كيكى سيهزمه في أي حوار.


هل غيّر الحبشي تكتيكه

أم ان دخول البديل ملاسي أعطاه بعض الجرأة ليقود "هجمات خجولة ضد كيكي"، خصوصاً بعد إتفاق محسن وملاسي على نفس الرأي حول عمود (ع ع أ).

سنتابع وربما نستعين بالأخطبوط في التنبؤ بمآلات الحبشي

ناذر يا حبيب

كيفك،

يا خي الحبشي دا عاجبني جداً وحتى تعليقاتو بتعجبنى وخصوصاً أخوك بقى فاهم ليك التكتيك بتاعو، وأنا بعمل في دراسة إسمها "الربشي في فهم تكتيكات الحبشي"، والغريبة يا ناذر هسة رصدت ليك حوالى 17 تكتيك مختلف للحبشي، أخوك بقى خطرى، يعنى أول ما الحبشي إتداخل مع محمد البشرى، عرفتو ليك طوالى إنو حيجيب موضوع الصورة بتاعتو "باقى أكتر شئ حارقو موضوع صورتو". وغالباً حأعمل ورق علمية صغيرة عن الحبشي بعنوان "تعسكات الحبشي" وهي عبارة عن تنبؤات اخطبوطية لمعارك الحبشي في المستقبل القريب.

تخريمة:

يا خي زولك بتاع كسلا دا عجيب كتر لينا منو بالله عليك.

سلامات يا هندسة
..
كيكي دخلت في موضوع الكواديك والرتنزات
وعرجت على دهاليز فيها السهل الممتنع
فوقف الكيبورد لايريد الدخول .. ولا يريد الانصراف
وانا اتمتع بالدهشة المباحة والخارج النص !!
متعك الله بكل ما تريد
...
اليوم الحار منتظركم انت ووليد
تعالو اتاوقو شوية في هذا الارث لكيلا يندثر

Quote: كيكي دخلت في موضوع الكواديك والرتنزات وعرجت على دهاليز فيها السهل الممتنع فوقف الكيبورد لايريد الدخول .. ولا يريد الانصراف وانا اتمتع بالدهشة المباحة والخارج النص !! متعك الله بكل ما تريد ... اليوم الحار منتظركم انت ووليد تعالو اتاوقو شوية في هذا الارث لكيلا يندثر

هلا يا باشمهندس حمد
وحبابك يا حمد في مدارات الاخطبوط التي قمنا بكسرها بحكاوي الكواديك والرتيزنات
كون بول في عمل الاخطبوطي المهيب قد طلت منه اشارات قد تفسر بانه كادويكية
واليوم الحار وبالجد مقصرين معاهو جدا وعلينا بالتاكيد ضريبة واجب نتمني ان نوفق قريبا في المواظبة علي صفحاته
الملانة بسيرة المهندسين والهندسة وتلك الكلية الحنونة الرائعة

وكل التقدير يا حمد وتحياتي

الصادق ...

إنت قايل الحبشي إستفاد من منو في قصة التكتيكات دي ..؟!!

إستفاد من بحث عملتو أنا في المنبر دا قبل كم سنة وأظنك متذكرو ولو دايرو بتلقاهم في مكتبتي ..

الحلشي ذاكر البحث وحفظو صم وجا طبقوا فيكم هنا ..!!

يا خي أنا سيد البحث ما قدرت أطبقوا بالطريقة الكتبتها بي خط يدي وهو قدر ..!!

حكمة ربنا ..!!

هلا ناذر والصادق
وكورة الحبشي كورة محفوظة عن ظهر قلب..!!
كورة عالية من القون للقون وباقي اللعيبة عليهم بالفرجة بس

Quote: هل غيّر الحبشي تكتيكه

هلا يا الصادق
الحبشي نفس خطة لعبه التقليدية القديمة ومافي فنيات جديدة تذكر
تصيد ومن ثم
انزال عمودي مصحوبا بكوت مطبوق كربون ثم كتل حيل في المداخلة الاولي
ومن ثم الهجوم الضاغط
وهو في وسط هذه الوليمة الدسمة يتناسي عمدا مثل هذه الشعارات البراقة التي التي رفعها ذات بوست اسفيري قديم
كشعاره الاتي نصه

Quote: أن كيكى سيهزمه في أي حوار

كيكي يا هندسه

زولك ده لولسه قاعد

عليك الله أخوك محتاج ليهو شديد

داير لي عرق محبه لياسمين عبدالعزيز

أو جيسكا آلبا

مافارقه بس البيقدر عليها

ومستعد أدفع لحدي مليون جنيه بالقديم

يا هندسة صاحبك طلع معاش
المشكلة واحد من الطفابيع ديل يمشي يشتريه ويرجعو الخدمة في السودان!

Quote: الصادق ... إنت قايل الحبشي إستفاد من منو في قصة التكتيكات دي ..؟!! إستفاد من بحث عملتو أنا في المنبر دا قبل كم سنة وأظنك متذكرو ولو دايرو بتلقاهم في مكتبتي .. الحلشي ذاكر البحث وحفظو صم وجا طبقوا فيكم هنا ..!! يا خي أنا سيد البحث ما قدرت أطبقوا بالطريقة الكتبتها بي خط يدي وهو قدر ..!! حكمة ربنا ..!!

كان كدة انا من مكاني دا على مكتبتك عِدِل، طبعاً حيكون كلامك دا مرجع اساسي في الكتاب، وشكراً لك مسبقاً على هذا المصدر

الأخ كيكي أرجو أن تبطل اللولوة وتعود لموضوع البوست الأساسي وتشرح لنا كيفية حسابك لل 1/8


مشتاقين

Quote: يا هندسة صاحبك طلع معاش المشكلة واحد من الطفابيع ديل يمشي يشتريه ويرجعو الخدمة في السودان!

هلا يا ابوالشوش
وصحبي يا حليلو قالو حيمشي يقعد في علبو ويمنح الاطفال البهجة او كما قيل
..
طبعا ناسنا ديل متعودين من زمان يجيبو (الكباري) والمصايب الخردة من دار خواجة
فما تستبعد يقومو يشتروا عشان يكدك او كمابو ده
او يجيب للسودان كاس العالم كما صرح البشير قبل يوم
واحتمال يكون اسمو (الاخطبوطي الرئاسي)
ويرشو ليك بوهية كيزانية حرررررم امو الانجليزية ما تعرفو لو لاقتو

Quote: زولك ده لولسه قاعد عليك الله أخوك محتاج ليهو شديد داير لي عرق محبه لياسمين عبدالعزيز أو جيسكا آلبا مافارقه بس البيقدر عليها ومستعد أدفع لحدي مليون جنيه بالقديم

هلا يا فدياس
وزولي ده قاعد ولكن حصلت ليهو تطورات رهيبة يا زول
وشوف عيني الاجازة الفاتت ممتطي عربية يا النبي نوووح منها وقيل بان احد النافذين في امور السلطة والثروة في البلد هو من اهداه هذه العربية عقب عملية كادوكية ناجحة..
فدحين يا صديقي كبر الجيب ووانا بديك احداثيات تكوينه
واحتمال القصة تلفق معاك وتاتيك هيفاء وهبي او بالعدم مادلين طبر..
بس الخوف يقوم يشتغل ليك في الامر الخواجاتي ويبرك بنعوم كامبل
وحتبقي حكايتك بايظة لانها قالو شكااااااااااااالة خلاص

كيكي الأخطبوطي

لا يأخي هيفاء وهبي دي ما من إستيالي

مقدمه إبن خلدون عندها زايده عن اللازم

وناعومي كامبل دي البتفلع بلبلاك بيري

عشان الخادمه إتاخرت تجيب ليها البتاع داك برضو ما بتنفع

لكن حته كبر الجيب دي ما معانا

غايتو لحدي مليون ونص ممكن نجازفها لزولك ده

بس أظنه بعد ما ضاق قروش السلطه ما راح يفضا لينا


إعتبر دي دعايه إعلانيه في مسلسل الأخطبوط بول وتجاهل الرد ووأصل

الناس منتظره باقي المسلسل

Quote: الأخ كيكي أرجو أن تبطل اللولوة وتعود لموضوع البوست الأساسي وتشرح لنا كيفية حسابك لل 1/8

هلا يا مورتا
و حكاية الرجوع للموضوع الاساسي دي كان الاسطوري عمر اومو في الجامعة عندو فيها جلكسة عجيبة
ولمن يكون عاوز يجوط الشغلانة بيديها صنة كده وبقول يا جماعة يلا نرجع للموضوع الاساسي والموضوع الاساسي البكون قاصدو عمر اومو
هو موضوع موغل في الشخبطة لو تم كتابته في منبر بكري ده

واشواق بطعم الكاكاو يا مرتضي

Quote: إعتبر دي دعايه إعلانيه في مسلسل الأخطبوط بول وتجاهل الرد ووأصل الناس منتظره باقي المسلسل

هلا يا فدياس
دعاية الهناء والسرور يا فدياس الكلها نعومي كامبل وهيفاء وهبي دي
وبكرة باذن الله طالبني حكاية (غنماية امبررو)
وحكاية الاسطوري ابكر قروش او ( ابكر سركن كوتي) اوكما يرددها اهله الهوسا
ودي حكايتين من الضروري مهابشتهم علي خفيف في رحي الاخطبوط بول كون الاثنين (قروش والغنماية) يمكن برااحة تصنيفهم
كحالات اخطبوطية اثارت الغموض والحيرة ...

وكن بالف خير

أها بكره جاء

مستنيك

يا خليل كلامك صاح
منطق الربع ينطبق على تخمين نتيجة
أي مباراة من المباريات الثماني .
يبقى السؤال :
بأي منطق حسبت قيمة الثمن ؟

Quote: أها بكره جاء مستنيك

هلا يا فدياس وحبابك وعدنا وبكرة بتاعي يا دوبك
وهاهو ابكر قروش ياتي كالبرق كما هو في اخطبوطيته الشهيرة ويحييك..


والاخطبوط بول هو من يحرك اللعب صوب عوالم الطلس ملص والاشياء الغميسة والمدغمسة التي تولد الدهشة
والحيرة نجد انفسنا اليوم حاطين الرحال في مدارات وعوالم رجل غريب الاطوار وصنع الحيرة والغموض وصار كالاسطورة
في فيافي ووديان ربوع كردفانية عديدة انه العجيب الغريب الشهير( ابكر قروش) او( ابكر كووتي )وهي وصفية موغلة في الفصاحة عند اللسان الهوساوي في غرب افريقيا التي قيل بان هذا الابكر قد اتي منها...!!
اولي الجلكسات التي تسربت عن ابكر قروش هي حركاته التي فعلها في (حراسات بوليس) احدي المدن الكردفانية الكبري وفقد قبض عليه بتهمة ممارسة الدجل والشعوذة والقي به في غياهب جب حراسة البوليس وفي صباح الليل التالي اصابت كل قوي البوليس الحيرة
والخوف والارتباك عندما وجدو كل المساجين ومعهم ابكر قروش قاعدين خارج الحراسة تماما وابواب الحراسة مقفولة بالطبلات السميكة كما هي والحراسة خاوية علي عروشها...!!!
وعندما تكرر هذا المشهد في الليلة التاليةقررت السلطات وعلي اعلي مستوي في تلك المدنية نفي وطرد هذا الاخطبوط الانساني من تلك المدينة والمخارجة من شروره المتوقعة وقد فعلوا...

ليحط برحاله في مدنية مجاورة عشت ردحا من الزمن فيها وتحدثت كثيرا مع العديدين من الذين عايشو وعاصروا حضور الاسطوري ابكر قروش وبعضهمممن اثق في دلوهم بدون شك او تردد...!!
التجار الكبار وعلية القوم في سوق تلك المدينة هم من استقبل الشهير قروش وهيئو له سبل السكن والاستقرار وكان هذا الاتفاق مقابل خدمات (اخطبوطية جمة) قدمهم لها في شكل عطور وثياب وحتي الاكل الساخن من فيافي مطاعم الخرطوم الفاخرة وهو جالسا في احدي دكاكين مدينة المجلد....!!
ولكن اعظم اللقطات والجلسكات التي تحدثنا عن مقدرات وامكانيات (ابكر قروش) الاسطورية هو ذلك الحفل الكبير الذي منعه احدي المنظمين من الرقص فيه ربما و لشي من قبيل وعي التهميش والاقصائية ولكن قروش لم يستطيع بلع مثل هذا الزجر
بسهولة فقد وجدها فرصة نادرة لترعيب القوم وجعل الحفل يتلخبط من عاليه الي واطيه ...فعندما وجد فرصة في غفلة من رقباء الحفل للرقيص رقص قليلا ولكنه عندما هم بالخروج من الحلبة وفي لحظات قيل بانها مرت كالبرق رمي باكبر قعونجة شهدتها اعين انسانية حتي الان وهكذا اعتقد فقد شاهدها ممن اثق في حديثهم بانها في حجم (الكديس) لووووووووول ثم خرج وترك القوم خلفه يهربون من الحفل هروبا كبيرا وسط هلع وس######ة نسائية عالية الصيت...!!!

قروش فيما تسرب عن قصصه ومن عدة مصادر موثوقة وعاصرته كان امره بالفعل مثير للحيرة والغموض وهو شخص جدير بتقصي قدراته ودروبه للذين يريدون معرفة مثل هذه الظواهر في ارتباطاها بالانسان فهل الامر سحر او مقدرات روحية كامنة في النفس البشرية اما هنالك شي خفي ام انها مجرد شعوذة ودجل...وفي كل الاحوال فهي جلسكات قيل بانها كانت مثيرة وغامضة...!!
كانت الغالبية في ذلك المكان يرحبون ويحتفون ويسعون لكسب ود (ابكر قروش) ماعدا تاجر وصف بانه صعب المراس وعالي التدين فقد علم بامر طرد قروش من تلك المدينة وسعي بحماس ومثابرة علي طرد هذا الاخطبوط من مدينة المجلد وكانت بينه وبين قروش معارك شهيرة تفنن قروش في اظهار مقدراته الشريرة فقد كانت المساحة الواقعة خلف بيت ذلك التاجر الرافض لوجود قروش في المدينة ساحة تمتلي بالحيوانات الميتة من كل الانواع ولليالي كثيرة (ك ا لا ب)..(بقر)..(خراف) ..(كدايس) وحتي الثعابين الميتة كان ابكر قروش يجد لها الالية التي يجعلها تقبع في داخل اسوار بيت ذلك التاجر لليالي طويلة دون ان يدري احد حتي الان كيف اتت تلك الفطايس الي ذلك المنزل...

..

أوع تقول لي الزول ده مات

يأخي الواحد لو قدر يجيب الزول ده الخرطوم مابعيد أبقى وزير دوله

أظني لسه صغير على حكايه وزير كامل الدسم

هههههههههههههههههههههههه

Quote: أوع تقول لي الزول ده مات

هلا يا فدياس
ويا حسرة لقد رحل ابكر قروش ومات في مدينة ود مدني في اخر الخبريات التي واتتني وانا اتقصي اثر هذا الرجل العجيب والغريب الاطوار..
وترك ابناء بعضهم في حاليا في ود مدني واخرين لا يزالو في ربوع وبوادي كردفان
وعمك قروش ده لو جضم ليك شغل بتاع شخارم بخارم لاجلسسسسك في مكان عمر البشير شخصيا


وسيطته بالمناسبة تسمي ميمونة وقد قيل بانه يخابرها بلغة الهوسا ويامرها بجلب الاشياء التي يطلبها وتنصاع اليه فورا وبدون تردد
وسنعود الي جلسكة جلسكتين كده من سيرةابكر قروش وبعدها سنسافر الي الشهيرة (غنماية امبرروو) ودي كمان موضوعها اخير منو موضوع ابكر قروش ده لووووول

وتحايا وود يا فدياس

الي حين عودة وعود الي مدارات الاخطبوط بول وتداعياتها

فوق

من القصص الاغرب علي الاطلاق والتي تسربت عن ابكر قروش وتجعل الانسان يفكر مليون مرة قبل يصدقها من افواه ناس ورغم انهم كثر وموثقين
ويتفقون جميعا علي نفس التفاصيل وباصرار عجيب.. هي الحكاية الاغرب والمخيفة علي الاطلاق في امر ابكر مي كووتي..
فقد تجمع كبار اعيان المدينة وذهبوا لمنزل قروش لاقناعه بالخروج والسفر من هذه المدينة حتي لايفسدها بحركاته وجلكساته التي وجدت رواجا وصرعت المدينة وصارت حديث مجالس جبناتها ومجالس الاسواق فيها..
فقد قيل بان الرجل استقبلهم استقبال حار ودافي وهيا لهم مجلس في صالون منزله وعندما بداء النقاش وزنقه القوم وثار عراك لفظي حاد
وقاموا بزرزرته في اختفاء بعض الاسوار الذهبية من خزائن احد التجار والبيوتات ...وفجاة وبدون ادني مقدمات وجد القوم انفسهم وهم يجلسون مع ابكر قروش الذي تحول في لمح البصر الي ثعبان ضخممممممم شدددددددددديد(وصف بانه ثعبان ام كرو كرو)ولم يجد القوم حلا سوووي الجري والهروب واليااااااع من هذه المصيبة التي تحولت من انسان الي ثعبان
والقصة دي قا فدياس انا حكوها لي ناس حضرو الجلسة دي والله علي ما اقول شهيد


و يالنبي نووح من ابكر قروش ده ياخي

Quote: والقصة دي يا فدياس انا حكوها لي ناس حضرو الجلسة دي والله علي ما اقول شهيد

هندسه

تعرف السحر ده مذكور في القرآن وهو شئ غامض وغريب

لكن ما يحيرني هو أمر هؤلاء السحره

فلو كنت لي مقدرات كصاحبك لفعلت في هذه الدنيا العجب

لماذا لا نجد لديهم المال والسلطه وتجدهم غالباً في أوضاع عاديه

يأخي الواحد لو لقى نص مقدرات صاحبك ده

أسكت ... بس

Quote: تعرف السحر ده مذكور في القرآن وهو شئ غامض وغريب لكن ما يحيرني هو أمر هؤلاء السحره فلو كنت لي مقدرات كصاحبك لفعلت في هذه الدنيا العجب لماذا لا نجد لديهم المال والسلطه وتجدهم غالباً في أوضاع عاديه يأخي الواحد لو لقى نص مقدرات صاحبك ده أسكت ... بس

هلا يا فدياس وحبابك ياخي..
وفعلا بتفق معاك بان الحكاية محيرة جدا.. فالسحرة ديل دائما بتلقاهم حالتهم بالبلاء وامورهم اصلو ما ماشة دغري
وحاصل ليهم تشتت في كل اشيائهم حتي علي مستوي لبسهم وسكنهم...
ورغم مقدراتهم الفذة التي هي قادرة علي تطويع اشياء عديدة بما فيها القروش والجاه والسلطان
ولكني اعتقد بان الامر مربوط بالنيفاشا ما بين الجن والساحر
بكون فيها بنود سرية زي
والله اعلم

وها نحن علي علي الوعد وفي راكوبة الاخطبوط بول رائد الشختك بختك المعاصر والذي فتح نفافيج صوب مدارات عجيبة فكان لابد من الوصول الي محطة غنماية (الامبرروو) والامبرروو قبيلة رعوية جوالة وتجوب دول كثيرة في بحثها للعشب والماء لابقارها واغنامها المميزة في اشيائها
ولهم مهارات رعوية بالجانب مهارات موغلة في اشياء يمكن ان تصنف في الما طبيعيات
فالامبرروو لو عاوز يكرمكم وبقي مبسوط طواالي برشك بحجاب او تعويذة يعتقد هو جازما بانها قادرة علي توضيب امورك مهما كانت تلك الامور وعصلجتها
ونعود

يا هندسة تحياتي
يبقى السؤال :
بأي منطق حسبت قيمة الثمن ؟

Quote: يا هندسة تحياتي يبقى السؤال : بأي منطق حسبت قيمة الثمن ؟

هههههههههههههههههههه

يا حبشي إنت أظن كنت مفصول بسبب إصرارك على السؤال دا