Post: #1
Title: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 01:13 PM
Parent: #0
تمبس ود الحلة اللى بيقعد فى اللستك مكفكف جلابيتو السمنية وخاتى السفة بمزاج ويقوم سدارى لاولاد الحلة البعيدة اللى بيجوا يشاغلوا بنات حلتو
تمبس نجار, ينشر احزان الناس ويرميها فى تلج النفس المطمئنة
وطلبة بناء, يناول طوبة وراء طوبة ويبنى بيت للسكينة
تفقدو بالليل وتلقاهو مافى,
تعرف بعدين انو كان بيحفر فى الجابرة لمثوى الحبوبة الاخير
تمبس, سواق الحافلة, يشغل ليك الغنا السمح
تلقى الحافلة كلها صبحية عرس
تمبس – كمسارى بص ابورجيلة-
يضارى فى البنات من الواقف سدارى هناك يشاغل فى الصبية الناهد فيها شوق الحياة
تمبس مافارقة معاهو, يودو البص كلو للنقطة, المهم مافى زول يغلط على بنية
تمبس الخدرجى, يفرش خضار روحه ويديها للمساكين
ويرجع البيت غابة انسانية,
تمبس سيد الدكان, حلاوة حربة شوق طفولته يديها للصغار,
والطحنية للبنيات,
والبن للجارات,
مافرقت معاهو, كان جردوا الدكان وخسر,
المهم تمبس كسب نفسو..
تمبس, طالب فى الجامعة, طالب معرفة وعلم وطريق لبكره
قلمو فى جيب جعفر
وكراسو فى شنطة البت الحلوة ديك
جعفر ده منو مافارقة
والا البنية ديك فارقة
لانو تمبس بيعملها مع كل الطلبة, وبينحاز بشكل خاص لبنات الضهارى واولاد الريف
تمبس اللى بيسك الحرامى,
يقبضو ويجيبو البيت ويقاسموا العصيدة اللعملتها امو فى يوم ماطر
يقسم معاهو السفة ويخمس معاهو السيجارة ويقولو ليهو قوم فرتق,
تمبس تلقاهو فى نص المظاهرة..
يهتف عشان الناس الطيبة وفقرانه
وعشان تخدر ضرعات البلد ويتملى شطرها حليب عداله
يمشى الجامع يصلى وتلقاهو بالليل فى الحلفة عجاجة فرحو قايمة فى دارة الحلة
الحفلة اللى بيرص كراسيها,
بيرش ترابها لاقدام الحمام,
بيدق الصيوان, ويعرشو بقش روحو للامهات, اللى بيجهزن فى اكل العرس
يتفق مع الفنان, ويحاججو بمنطق الفرح, ويشرف شخصيا على عشاء الفنانين
تمبس يخلى عرضتو ويقوم بعضلات تبش السماحة يجر الولد اللى جنو يعبى الشكلة فى الحفلات,
تمبس يدق فيهو شواطين شرو,
يقوموا من الواطة وينطف معاهو بنطلونو
ويجى معاهو راجع يشاركو الرقصة والضحكة
تمبس يمشى الحجاز,
يشتغل ويرسل القروش عشان البيت والاخوات
ويشترى فى الهديمات والتياب لنسوان الحلة
وفى قلبو تلمع دبلة الحبيبة,
آمانة ماجاك بلد ياحبيتو, بلد ليهو مليون وش اسمو تمبس
يقعد يناقشك,
لايوق زى ويكة حقول خريفها تريان بمحبة ناس الريف
تزهجو يقوم بكش الولد يكاوش على كوتشينة حراق روحك
تلقاهو بيلعب فى {الضمنة} وضمانة حياتو وسط الناس
يلعب وخاتى باقى سيجارة وراء اضانو ويصحى فيهو شوق النجار
يخمسها مع الوليدات ويخمش سفة ويكفكف جلابيتو السمنية ويغنى ويعبيك فرح
شرامى نحو الحياة
ومقرم نحو الناس ودروبهم
مليون وش= مليون ميل مربع
تمبس لاقيتو فى دروب كتيرة مشيتها
شفت فيهو اخوى, ود الجيران, النجار, الخدرجى, وبتاع الطبلية الجاى من ضهارى البلد
شفت فيها الصديق اللى بتلقاهو وقت الضيق
وشفت فيها اخوى ود امى وابوى
تمبس عندو مليون وش.... ليها منحازة, بكل تناقضاتها الجميلة وحية..
|
Post: #2
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 01:27 PM
Parent: #1
تمبس عندو مليون وش....
ليها انحاز بكل تناقضاتها الجميلة وحية..
|
Post: #3
Title: Re: تمبس عندو مليون وش ياعصام....... ده السبب!!
Author: ابو جهينة
Date: 04-11-2009, 01:33 PM
Parent: #2
إشراقة
سلام مليوني
Quote: شرامى نحو الحياة
ومقرم نحو الناس ودروبهم
مليون وش= مليون ميل مربع |
إنت كدة شككتيني ... إنت ساكنة في فيينا ولا في المعذر* ال في نص الرياض ..
غايتو كاميرتك الديجيتال دي خطيرة جدا
تسلمي و تحياتي للأسرة و خصوصا الوالدة
* المعذر حي من أحياء الرياض يسكن فيه هذا الشرامي مع مقرم إسمو عبد الله داش
|
Post: #4
Title: Re: تمبس عندو مليون وش ياعصام....... ده السبب!!
Author: osman righeem
Date: 04-11-2009, 01:42 PM
Parent: #3
مليون وش وكل وش
محبوب ومطلوب اكتر من التاني
تمبس مختزل سوداني كامل الدسم
|
Post: #8
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 02:04 PM
Parent: #4
| Quote: تمبس مختزل سوداني كامل الدسم |
لانو فيهو ريحة الزول العادى
بنى آدم وطيب وحبوب
هو كما قلت يا عثمان...
فيهو كل تناقضات الانسان السودانى
بجمالها وطيبتها وحنيتها ومغائصها
|
Post: #11
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 02:15 PM
Parent: #4
.
|
Post: #5
Title: Re: تمبس عندو مليون وش ياعصام....... ده السبب!!
Author: nazar hussien
Date: 04-11-2009, 01:42 PM
Parent: #3
ودائما عندو الفورة 1000
|
Post: #7
Title: Re: تمبس عندو مليون وش ياعصام....... ده السبب!!
Author: Raja
Date: 04-11-2009, 01:56 PM
Parent: #5
إشراقة السمحة جوًة وبرًة..
بتكبيفيني شديييد لما تفلفلي الناس بالطريقة العميقة دي..
تمبس زي ما بيقول أهلنا المصريين: أجدعها جدع..
تميلي عليهو بكل ثقة وإنتي عارفة إنه "حيطة" آمنة وقوية
لازم يرجع
|
Post: #13
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 02:31 PM
Parent: #7
رجوية قالت القول الفصل.....
تمبس ابو مليون وش...
يساوى المليون ميل المربع فى قلب رجاء الشايله البلد حلم
|
Post: #15
Title: Re: تمبس عندو مليون وش ياعصام....... ده السبب!!
Author: معتز القريش
Date: 04-11-2009, 02:44 PM
Parent: #7
| Quote: تميلي عليهو بكل ثقة وإنتي عارفة إنه "حيطة" آمنة وقوية |
أجمل ما يمكن أن تكتبه أو تقوله إمرأة لرجل
شكرا رجاء
شكرا اشراقة
تمبس لازم يرجع
|
Post: #24
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:39 PM
Parent: #15
Quote:
Quote: تميلي عليهو بكل ثقة وإنتي عارفة إنه "حيطة" آمنة وقوية
أجمل ما يمكن أن تكتبه أو تقوله إمرأة لرجل
|
صدقت يا معتز وصدقت رجاء
السند يحتاجنا جميعنا...
ان تسندك اختك
او يسندك اخوك..
فهى الانسانية التى لابدّ ان نكافح لاجلها
واثق فيما قالته رجاء..
اثق فى وجوه تمبس المليون..
ليس اثمر من ان تجد انسانا يسندك تحت كل الظروف...
السند هو الاسمنت الطبيعى اللى بتستند عليها طهر اى علاقة انسانية نبيلة
|
Post: #9
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 02:06 PM
Parent: #5
| Quote: ودائما عندو الفورة 1000 |
الفورة دى غايتو ذكرتنى عجنة روحو اللى بتفور بخميرة الناس
تسلم يا اخوى
|
Post: #6
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 01:51 PM
Parent: #3
Quote: إنت كدة شككتيني ... إنت ساكنة في فيينا ولا في المعذر* ال في نص الرياض ..
غايتو كاميرتك الديجيتال دي خطيرة جدا |
كيف حالك يا صديقنا ابو جهينة...
ليك وحشة..
لم التقى تمبس وجها لوجه
ربما لا احتاج لذلك,
بقراهو, بحس انسانو وطيبتو
تناقضاته اللى بتشبة تناقضاتى وتناقضات ناس كتارغيرى
ناس هنا بقرأ ليهم وبكون صورة ليهم
صورة بحسها بتتحرك قدامى, زى صور تمبس دى
من روح جميلة ونبض انسانى
امس تسببت - غرغرينة الحنين لجبريل- فى سهادى
بكيت
قريت..
غنيت
كتبت...
وكان ماخفت من كاميرا تكون معلقة فى باب العمارة وانو الاسعاف يجى ويدونى مستشفى {المجانين}
كنت اظنى رقصت {الاطباء مهما تخصصوا مابلقوا للريد الدواء}
قريت تانى,
دخان سيجارة محمد شكرى تملأ رئيتى
كتبت حين ضجت ضحكة هيبة ووشوش تمبس فى الليل الفيناوى..
تصدق يالله!!
قلت يا زولة بطلى فلسفة وسيبى قصة {نحن} و {الآخر} دى فى رفوف المكتية
وانزلى الجابرة مع الناس
اكتبى مشاعرك زى ماحسيتيها واهرقى اسئلة الآخر فيك وفى الآخرين
اها كنت مارة باللستك اللى تحت عمود حلتنا
وتمبس مكفكف جلابيتو وشايل فى يدو صابونة فنيك ومعجون ابو صفقة
وعجاجة الحفلة اللى شفتها امس
اللى رقص فيها تمبس كانت مالية غرفتى..
صوت ابو رجيلة ولبعة تمبس فى الولد اللى اتحرش بالبنية سمعتها دووووووول
شفتو صفق الخدرة اللى اشترتها امى منو..
شفتو ببيع فى اللبن
وشفتو راعى راجع بالغنم
اها قامت طلعت الكتابة العفريتة دى
بعض من جنون.....
فليعزرنى تمبس ابو مليون وش...
|
Post: #10
Title: Re: تمبس عندو مليون وش ياعصام....... ده السبب!!
Author: حنين للبلد
Date: 04-11-2009, 02:14 PM
Parent: #6
تمبس عندو مليون وش يا شروق....وانتي كل وشوش الدنيا الحلوة إختزلوها في وشك...
|
Post: #14
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 02:43 PM
Parent: #10
| Quote: تمبس عندو مليون وش يا شروق |
كانت لمن تقفل معاى..
برجع للغنا اللى بينثر درره الود تمبس..
بتذكر اغنية نزلها لفنانة بتغنى اغنية ام كلثوم- فكرونى-
اليوم داك اتخجيت بالبكاء..
اغنية بتغزل توب الليل وبتزيدو طول..
بقراهو..
بيعجبنى لمن يكون قايم عليهو الوش الشرامى
كان ما اخاف الكضب سمعت ناطى فى حيطة جارتى ساكى الحرامى..
الدنيا دى واسعة لو عاوزناها واسعة
وبنضيقها برضو لو عاوزين
المهم المليون ميل مربع بيسع تمبس بوشوشو المليون
المهم يرجع وترجع معاهو الاغنيات الحنينة ياحنين
|
Post: #12
Title: Re: تمبس عندو مليون وش ياعصام....... ده السبب!!
Author: Gaafar Ismail
Date: 04-11-2009, 02:20 PM
Parent: #6
نعم
تمبس لازم يرجع ..نفتقده كثيرا.
|
Post: #16
Title: Re: تمبس عندو مليون وش ياعصام....... ده السبب!!
Author: وليد محمد المبارك
Date: 04-11-2009, 03:03 PM
Parent: #12
تمبس عنده وش وااااااااحد
وش سوداني ضكران
|
Post: #18
Title: Re: تمبس عندو مليون وش ياعصام....... ده السبب!!
Author: Al-Sadig Yahya Abdall
Date: 04-11-2009, 03:19 PM
Parent: #16
Dr. Ishraga
Regardless of the acceptability of his propositions, Timbs remains the best to make his written arguments
hang together. I always thought of him as a Sudanese Bernard Shaw, so to speak.I strongly support appeals to reinstate him
|
Post: #25
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:47 PM
Parent: #18
اهلا بيك يالصادق فى رحاب وشوش تمبس المليون...
حسع شوف الناس اللى دخلت هنا..
مختلفين فى رؤيتنا وافكارنا...
لكن جمعتنا خوتنا لتمبس...
كما جمعتنا بيك...
تسلم يا اخوى
|
Post: #19
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:19 PM
Parent: #16
وليد كيفنك..
| Quote: تمبس عنده وش وااااااااحد |
تمبس عندو مليون وش = مليون ميل مربع
والمليون مربع بحلم انو يبقى واحد......
اذن نحنا فى سرج الحلم سواء يا اخوى
|
Post: #21
Title: Re: تمبس عندو مليون وش ياعصام....... ده السبب!!
Author: خالد حامد الجزولي
Date: 04-11-2009, 03:31 PM
Parent: #16
أختي اشراقة مصطفى
كل دا وما شفتي تمبس وش لوش
على العموم احييك على القطعة النثرية الجميلة
في حقه إنابة عنه
وبحق كل الناس افتقدت تمبس
نرجو ان يراجع الاخ ابوبكر موقفه
ويفسح له المجال للعودة
حتى نستمتع بكتاباته
تمبس ابن حلتي
تمبس اخ صديقي ودفعتي عماد
تمبس الاخ الاصغر للموسيقار عمر
تمبس لعب معانا الكرة
رغم الفارق العمري بيننا
تمبس اخوي
تحياتي لك
وشكراشراقة مرة أخرى
خ
ا
ل
د
|
Post: #27
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:54 PM
Parent: #21
Quote: كل دا وما شفتي تمبس وش لوش
على العموم احييك على القطعة النثرية الجميلة
في حقه إنابة عنه
|
مساك طيب ياخالد..
تمبس بحس بيهو زى اخوى..
الاخو اللى بيصاحب اخواتو...
كم مرة حزرتو مايقوم يحدر - للوليد- اللى بيجر نور فى اختو فى الحفلة
وكلو مايشنط طاقيتو ويقوم يلبع الولد...
مابيرضى الحقارة..
لكن كمان ياعلاء ماكدى....
الحفلة دى لشنو..
ماياهو عشان الناس تطرب وقلوبها كمان تلقى حمامها الزاجل...
ود الجيران اللى بيودينا السنما
نشوف فاتن حمامة ونسرح فى عيون عمر الشريف
اخوى اللى بنقى معاه شوق عمرو عيش ريف لحبيبة عمرو
اها عاد شكر على شنو ياخالد؟
وشوف شنو تانى بعد يشوف القلب؟
القلب اللى فى بطن الواطة- الواطة امنا كلنا..
شفت كيف انك برضك اخوى؟ اها الايام دى شغال فيلم لنجلاء فتحى... اختك من ناس زمان فما تستغرب..
ناس التلفزيون الابيض واسود..
|
Post: #17
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:17 PM
Parent: #12
| Quote: تمبس لازم يرجع ..نفتقده كثيرا. |
هذا المكان هو اختبار لمقدرتنا على تقبل الآخر..
نختلف مالو...
لكن بمحبة..
تمبس ابو مليون وش.... كيف امسيت يا اخوى
|
Post: #20
Title: Re: تمبس عندو مليون وش ياعصام....... ده السبب!!
Author: Ishraga Mustafa
Date: 04-11-2009, 03:29 PM
Parent: #17
تمبس الخدرجى, يفرش خضار روحه ويديها للمساكين
ويرجع البيت غابة انسانية,
|
Post: #22
Title: Re: تمبس عندو مليون وش ياعصام....... ده السبب!!
Author: معاذ حسن
Date: 04-11-2009, 03:32 PM
Parent: #17
اشراقة
تمبس كل ما ذكرتي
ملك وامير وحبوب والله اني احبه في الله
بس يا تمبس بالله
بحق المودة حق الهوى والريد
لما ترجع بالسلامة
عندنا طلب واحد
يا اخي انا عارف انك ما كوز ولا مستفيد من نظام الكيزان البغيض
وعارف انك سوداني وبس لا متحزب ولا متلون
فيا اخي ما تحكها شديد مع اخوننا المناضلين ديل
صاح في ناس معارضتهم زي وشهم
لكن برضو هذا النظام يستحق ان يعارض.
والا شنو؟
|
Post: #23
Title: Re: تمبس عندو مليون وش ياعصام....... ده السبب!!
Author: فتحي الصديق
Date: 04-11-2009, 03:34 PM
Parent: #17
Quote: الحفلة اللى بيرص كراسيها,
بيرش ترابها لاقدام الحمام,
بيدق الصيوان, ويعرشو بقش روحو للامهات, اللى بيجهزن فى اكل العرس
يتفق مع الفنان, ويحاججو بمنطق الفرح, ويشرف شخصيا على عشاء الفنانين
|
ولن أزيد يا دكتورة..لو منعو بكري من الدخول هنا أو سمح ليهو.فالرجل كما وصفتي..يغطي عين الشمس..
|
Post: #26
Title: Re: تمبس عندو مليون وش ياعصام....... ده السبب!!
Author: إسحاق بله الأمين
Date: 04-11-2009, 03:51 PM
Parent: #23
الباشمهندس تمبس
ضحكة فرح ، وش فال حسن ، يقابلك بحنية ، ويسالمك بطيبة ويضمك زي "حبوبتك".
زول نادر .. زول سمح .. زول فريد
الباريء يحفظك يا تمبس أخوي
|
Post: #29
Title: Re: تمبس عندو مليون وش ياعصام....... ده السبب!!
Author: ismeil abbas
Date: 04-11-2009, 03:57 PM
Parent: #26
تمبس..
.
|
Post: #28
Title: Re: تمبس عندو مليون وش ياعصام....... ده السبب!!
Author: doma
Date: 04-11-2009, 03:54 PM
Parent: #23
اشراقه البت السمحه ام كلاما سمح
تمبس عو ج الطندب
النار الهبلت ما بتعدلوا .
له حبي الاكيد
|
Post: #30
Title: Re: تمبس عندو مليون وش ياعصام....... ده السبب!!
Author: esam gabralla
Date: 04-11-2009, 04:19 PM
Parent: #28
ياخى انتو سغيلات عديل
احتكرتو هيبة "بتاعكن" ده ... قلنا مافي مشكلة خلينا ليكن كان ينفعن
حتى زولنا العفين ده جايات تضايقننا فيهن؟
عامله كتابتك السمحة دى , اسه ده كلو في تمبس الواحد ده؟ تمبس البنعرفو ده و لا واحد غيرو؟ "حرم" تمبس ده نص وشيش ما تاميهو و كمان سلفه
هووووووي يا بنات هوووووى , كلامكم اللذيذ ده "انحنا" ما بنقدر عليهو (الحقوق محفوظة لمحمد حسبو باللفة), "انحنا" لما خلاص نتكيف من واحد نقول ليهو "عفن والله" و معاها ام دلدوم تهد حيطة , كده بتكون عبرت عن محبتك و اعجابك بيهو. الجرعات التقيلة دى بتخرب رصتنا , خففوها شوية. اسه بيكون في جماعة مدورين في وهبة بي هناك "احى انا و ده شنو ده و واك و اك وتك"
حسادة عشان بورتى لى بوستى اب سفة داك ... و عاشت الجلافة الجارية في الدم
|
|