يــــا زول يـــا حبيب ... !!!

يا زول يا حَبيب


يَا زُول يا حَبيب
وَكِت طََشَّت مَعَاني الإلْفَة
فِي الزَمَن البِسَاسَق مِنَّنا وفِينا
وشُوك الدَربْ
مَغَزَّز في رُجُول أَحرُفنا
حَافيات القَصِيد
كَاشْفَات الأَنين رِئتين
والغُنْيَة
بتْدَندِن وَجَع أشْوَقنا
زَفَرات الفُراق للخِير
جَهْجَهَة المَطر
أحلام صُغار للنُوم
وخِير بَاكِر مَلَبَّد
فِي حَشَا المُوية التَشَاوِر
فِي سِحَاباتا النِزول
يَا زُول
مَسَوَّا مِن الغُنَا البَرَّاد حَشَا الغُربة
المَلَتَّقَة بي صَبُر حَبّوبة
لي شُوفَة جَنَاها الزين
خَريف الخُوُّة قَرَّب وَكْتُو
واتْهَادَن نِسِيمَات فَجْرو
بَطَّلن الرَحيل مِنِّي
وجَايات لِيك
كَارْبَات الخَوَاصِر حِِنْ
مَشَلْهَت خَاطِر الفَرحَة
مَشَحْتَف صَبْري
حَرْفِي
عِوينَات البَصِيرة تَشُوف
مَسَافَة طَلَّة مِنَّك
إضِينَات الغِيوم
سِمْعَت مُنَاجَاتك
فَتَر حِيلي
دَخَرْتَك رِيقْ
يَبِل حَلْق المَشَاوير المُسَتَّفَة كُل دُروبا
أنِينْ
ويَا زُول يا حَبيب
أَقِيفْ
خَلِيني أَحْكِيلَك
سَاسَاق البَحَر
بِين مَواجِعنا وهَجِيرَك
طَاف صَرير قَلمك
مَسَامِعْ بُكْرَة بالأَلحَان
وغَنَّى .. طيرَك
يَا بَلَد واقِفْ عَلي حَافَة صَبَاح أُمْبَارح !!
إِيشْ رَاح يضِيرَك
إِذا بَرَحَتْ بطَل الوَرْدَة
كيمَان من سَفِيرَك ؟
قَدَل الحَريق
ضَاع الطَريق
بَشْتَنَتْ حَال الفَرِيقْ
كَتَّاحَة الخُوف مِن مَصِيرَك ؟
إِيشْ رَاح يضِيرَك ؟
إِذا كَان الخَريف
رَسَمَتْ عِوينَاتو المَوَاعيد
لي بِنَيَّات الخَلا
صَفَّقَنْ
وإِنْدَلَّلنْ
راجْيات قُدوم الغِيم عِصير
إِنْهَلَّلنْ كُل الوُجُوه
وكتين تَسَاب الشُوق قَدَل
كَاحِل عِوينَاتو الخَدَار ..
مَلْهُوف قِليبك لِيشْ ؟؟
مَتْكُول هَوَاك
عَلي حَافَة مَسَاك
مُسْتَنِّي إِيشْ ؟؟
ما الغُنْيَة شَارَفَت الخِتَام
وإِنْوَقَّفَنْ هَزَّات أصَابع الدَنْدَنة
نِيلَك
بَرَّدَنْ لهْفَاتو لي عِناق المَصَب
ضِيق المَشَاوير الطُوال

ويَا بَلد واقِفْ علي حَافَة صَبَاح أُمْبَارِح
الليلَة مَا زَيّ كُل يُوم
شَقِّق جِيوب الفَرحَة
وألطُم خُدود الضَحكة
وإنْوَشَّح غِفَار
مُتْلَهْفِنَّك كَم حَبيب
رَافعين أَيَادي الإلْفَة
سَانْدِنَّك جِرَس
باكيِّين أَنِين
سَاكْتِين طَنِين
شُوفُم طَشَاش
مُتْلَفِّحِين رِيحتَك دُعَاش
ومَا عِرْفوا إنّو القَمْرَة قَفَّت
تَال بِنَيَّات الخَلا الإِنْبَرَجَنْ
كَشَفَنْ سويقَاتِنْ قَصِد
فَتَحَنْ جِيوبِنْ لي وَعِد
سَاعة يَقِلْدَنْ فِي شَبَقْ
دَفْق المَطَر واتخَصَّبَنْ
وحِبْلَنْ فُجُور

مَا رَاح يضِيرك غِير حُزُن
قَيَّل قُصَادك وبَاقِي حِلْم
ضِليلو واقِف مِن أَمِس
مِتْمَدِّي فِيك
فَرَّش مِلايات لي ضِيوف الدَّمْعِ
واسْتَقْبَل أَنين
مَكْسُور خَوَاطِر إِنْتَكَا
مَجْرُوح مِن الزَمَن القَدِيم
دَنْقَر عَليك
مَا بَاقي ليك
غِير هَذا وشِويَّة أَنين
مَا بَاقي فِيك
غِير دَهْشَتَك
أَفْتَح خِشِيمَك وإنْشَدِهْ

ويَا زُول يَا حَبيب
لَمْلِمْ حَبَايبك وأَبْقَى ليهُم
وَنِّسُم بالإلْفَة والحُب الكَبير
بَاكِر بيتْوَلِد الحَنين
وتَغَنِّي لِيك كُل البِنَيَّات بالسَمِحْ
والَّلمَة فِي نُصْ الفَريق
لا عَبْرَة بِتْسِد الحَلِق
ولا حَرِيق
قَدَال علي قَلْب الطَريق
ولا السَفِير
بِجْرَح خَوَاطر
وَرْدَتَك


يوليو 2007 م




مر فق:
حبي الكبير
بـــادي

Quote: ويَا زُول يَا حَبيب لَمْلِمْ حَبَايبك وأَبْقَى ليهُم وَنِّسُم بالإلْفَة والحُب الكَبير بَاكِر بيتْوَلِد الحَنين وتَغَنِّي لِيك كُل البِنَيَّات بالسَمِحْ والَّلمَة فِي نُصْ الفَريق لا عَبْرَة بِتْسِد الحَلِق ولا حَرِيق قَدَال علي قَلْب الطَريق ولا السَفِير بِجْرَح خَوَاطر وَرْدَتَك

مهند حمدالله علي سلامة الرجعة
كلام ما لقيت ليهو رد غير رايع

سارة يا بت عمي ،،


كل كلمة بتكتبيها
باقية لي زي الرتاين
تمسح من الليل الوجع
وتوفي شوقي
وتفتحك
وردة خريف
تنفح بريحتا فرحتك


مرفق :
كل الود والشوق

يا زول يا جميل
باكر بغنن لك حبيبات الغنا الطاعم
وبدنك حليب
وزي كل نيل
بتمد براحات الشمس عينا
وتشيل القمرة من ايدا
ويباريك النجم مبسوط
ويلقاك زي حبيب
وينشدّ حيل
بلد العصافير التقاسم الموية
وتباري الشجر يابس
وتسقي جناها من صدر الغريب
او بي القليل
تلقاها تلفح ريشا توب
يا واردة سايقا علي حجاك
ماعونك الفاضي ونشف
جواكي مليان كلو طيب
زي كل ليل
بتغتي ضل البحرسك
خايف وما خايف عليك
منك و وما منك براك
ومعاك وما قادر يطيب
لو شدّ حيل
الغربة ,, طاعم نيلنا
شالت الخضرة بلت ريقا
نادينا القريب
الشمس بتكون الدليل
لي عافية
وتغني الشوارع الفيك
تغنيك المدن
قيف الصحاري يبشرك
وتعبي جيب
تبقى الاصيل
والناس و شارات الفرح
شال الحبيب ... الابرة,,, والمشرع ضحى
والضحكة في قلب القريب
يا زول تعال.

عبد الله الحبيب ،،


وسقينا قيفك
أنا وإنت
شادوف الولف
وساقية البت الخريف
تاوقت فيك
ما شفت غير زولاً نضيف
يفرد ضليل كلمات ضحى
بتقهوج الكيف بي مزاج
وتشاور الشجر الحِضِر
قعدة تفاصيل الشمس
لامن تعامد راس مواجع النيل ضُهُر
كِمِِل الضليل
روحنا جواك نستجم
فرهدنا بي رشح الرزاز
والغنية سالمت السمع
هزينا روسينا فطرب
طقطقنا فرطاق الأصابع
دفع النهار
تذكرة تجوال هواك
وأظنو داقس وما قصد
أو ما فهم
طربي وجماعة الإلفة قسَّمت الضحك موزون
خجل النهار وإنكسر
دَنْقَر رويسو وإنكسف
ميَّل شميستو وراح غروب
ونحن ..
أنا
وأشواقي
وأفراحي بيك
والشُلة
رواحنا لضفاف
غنت تفاصيل السهر
نحكي المساهرين
سر غنياوتنا ومجيك
يا صافي
وأصفى المطر

تاوقناك قصادين
وفرحانين
وتاوقتنا
وهزينا كلنا للرؤوس
طرب المسا
بعد النهار
لملم تفاصيل دقستو
وروَّح مع شمسو الغروب


يا جميل ،،

حيرني حرفك
وكيف أغني
وصوت حبال صوتك
صدوح


مرفق :
حبي الكبير
بــــادي

سلام أستاذ مهند .

Quote: ويَا بَلد واقِفْ علي حَافَة صَبَاح أُمْبَارِح الليلَة مَا زَيّ كُل يُوم شَقِّق جِيوب الفَرحَة وألطُم خُدود الضَحكة وإنْوَشَّح غِفَار مُتْلَهْفِنَّك كَم حَبيب رَافعين أَيَادي الإلْفَة سَانْدِنَّك جِرَس باكيِّين أَنِين سَاكْتِين طَنِين شُوفُم طَشَاش مُتْلَفِّحِين رِيحتَك دُعَاش

ما أروع هذا النظم المتفائل .

شكرا لك على طيب الكلام .


عاطر التحايا .

فدياس ،،


أصلو التفاؤل
زي لميم من الغيوم
يفرح الشافا وبقول:
مليانة بالخضرة ورحيق


وإن شاء الله ماليانة
وما تخيب ظن حبيب

تسلم إنت على شوفتك


مرفق :
حبي الكبير
بـــادي

كان طشّت معاني الالفة
في كل الدروب
ماكان بجيبك لينا .. شوق
كيفن تروح الالفة من زولا حبيب
وسّد رويحتو حُجا الأهل
صابحنا حسّو مع الشروق

تعال أدّي الزمن ..ضِحكك
شان نلقى بين بَسمك بلاداً
فيها باكر..
لونو معطون بالبروق
ومابضيرك ..
لو كان تزيد فرحك شويّة
وأوعى حزنك..ليك .. يسوق
لسّه منتظرين مطيرتك
لما يشلع فينا صدقك..
كل البجوط جوايّ زمن..
بلقاهو عندك ..جد..بِروق.

الخنساء تماضر ،،


شلتي من الأرض
ريحتا والحنين
وشلتي خضرتا والصبر
وتاني إلفتا والجبر
وشلتي من عالي السماوات
كوم نجوم
دعوات ملك
تسبيح شموس
وإنتي بيناتم فجُر
تاوق علي ليلاً تعيس
وفضل يحنس شفتين الإبتسام
للضحكة شان تجفي الحزن ..

يا سحابة ..
أصلي طمّاع ليهو جودك
إنتي صابّة
ولسة داير موية تاني
وياريتني لو سويتا بير
أو حت حفير
فيهن أوفر دفق حنِّك
شان أسقي شتلي وكت تغيبي
يا الله ...
سميت عليك
كل البنيات البمرن بي حداي
ورسمت شبهك
في الوريقات البماسني ومعاي
وفضلت أسرح في جدايلك
ولسة طامع وما كفاي
بت يا سما
أقصد
بت يا أرض
أو
بت يا سماوات يا أرض
أديني جواك كم متر
خليني أبني
أوضة صالون للضيوف
حوش زي مسيد
أردح وكت
تنشر حالة حضرتك
أسرح وكت ينزل مساك
وأفرح مع طير الصباح
ساعة شروقك وبسمتك

بت يا أرض
بت يا سما
بت يا سماوت يا أرض
بت يا وطن
بت يا أنا
لسة فارد للرويحة
مفرودة ليك ورقا
تصدقي فيهو كل الاقتراحات
التخليك في حداي
أو
أنا في حداك
ما فارقة
بس إتنين سوا



يا ربيييييييييييييييييي


مرفق :
ما عارف
بس هادي نقط
أمليها زي ما تشتهي
..................
..................
..................
..................
بــــادي

Quote: شلتي من الأرض ريحتا والحنين وشلتي خضرتا والصبر وتاني إلفتا والجبر وشلتي من عالي السماوات كوم نجوم دعوات ملك تسبيح شموس وإنتي بيناتم فجُر تاوق علي ليلاً تعيس وفضل يحنس شفتين الإبتسام للضحكة شان تجفي الحزن ..

شلت من كل المساحات
أيّ شئ..
اخضرارا .. وامتدادا
وارتحالي اليك طبعا ..مُنتشي.

خلّيهو هذا الليل .. يفوت
لو كان بشيل الابتسام
فرحي ببقالك ..وشي.

Quote: يا سحابة .. أصلي طمّاع ليهو جودك إنتي صابّة ولسة داير موية تاني وياريتني لو سويتا بير أو حت حفير فيهن أوفر دفق حنِّك شان أسقي شتلي وكت تغيبي يا الله ... سميت عليك كل البنيات البمرن بي حداي ورسمت شبهك في الوريقات البماسني ومعاي

ياود يابحر
انتظرتك في حِداي
شلت كل.. دفقك .. معاي
حلّقت فوق حدّ السما
فوق اشتياقك نام ..هواي
سالم وجيهك ..إشتهاي
قول ليّ لو غابت عيونك
مين بِشوف بعدك رِضاي؟؟
قول ليّ لو ايديكَ بِعدت
كيفن بعيش أحضِن أساي؟؟
قول ليّ لو فاتت نجومك
يرضيك أصابح فيك شقاي؟؟

Quote: ولسة طامع وما كفاي

لو كنت طامع في المزيد
يكفيني فوق طمعك .. أزيد.

Quote: بت يا سما أقصد بت يا أرض أو بت يا سماوات يا أرض أديني جواك كم متر خليني أبني أوضة صالون للضيوف حوش زي مسيد أردح وكت تنشر حالة حضرتك أسرح وكت ينزل مساك وأفرح مع طير الصباح ساعة شروقك وبسمتك

شيل كل مساحات الدواخل
وأبقى أفرِد فيها ريدك وكل غُناك
يامراحب بي ضيوفك
قادر أشيل حزنك ..معاك.

Quote: بت يا أرض بت يا سما بت يا سماوت يا أرض بت يا وطن بت يا أنا لسة فارد للرويحة مفرودة ليك ورقا تصدقي فيهو كل الاقتراحات التخليك في حداي أو أنا في حداك ما فارقة بس إتنين سوا يا ربيييييييييييييييييي

ولسّه ح نتظر اقتراحك؟؟
ووين حتجمعنا الأماني
أو ترسِل الأقدار ..ميعاد؟
أنا في حِداك
من قبل لحظات الميلاد
من قبل ماتخت الحروف
أو حتى يتشابوا النِقاط.

Quote: مرفق : ما عارف بس هادي نقط أمليها زي ما تشتهي .................. .................. .................. .................. بــــادي

ولو قلت ليك :
خليتا فاضية ومامهم
لو كان بعبيها .. الفرح ..
أو حتى بملاها البعاد
هذي النقط ماعادت البتشيل هواي..
ده كان كلامو
راضي بمشيئتو .. وما أراد؟؟

مهند

إنت قاصدنى ولاّ شنو؟؟؟

يـــا زول ،،


مالك بتحنِّس
حالة إنك ما مقصود
ومسردب ليش
لي حالة إنك دايما لابد
مالك يا زول

تسلم يا حبيب علي تداخلك
وإلا تكون مقصود عشان تجي؟؟


مرفق :
كل الإعزاز
بـــادي

وغَنَّى .. طيرَك
يَا بَلَد واقِفْ عَلي حَافَة صَبَاح أُمْبَارح !!
إِيشْ رَاح يضِيرَك
إِذا بَرَحَتْ بطَل الوَرْدَة
كيمَان من سَفِيرَك ؟
قَدَل الحَريق
ضَاع الطَريق
بَشْتَنَتْ حَال الفَرِيقْ
كَتَّاحَة الخُوف مِن مَصِيرَك ؟
إِيشْ رَاح يضِيرَك ؟
إِذا كَان الخَريف
رَسَمَتْ عِوينَاتو المَوَاعيد
لي بِنَيَّات الخَلا
صَفَّقَنْ
وإِنْدَلَّلنْ

صحيح ايش راح يضيره..
هبشتنا بحروفك
شكرا للمساحة

ها انا لانحنى اقشعر للعباره التى اشعر حيالها بالغيبوبه والاندفاق اكثر من شعورى بالوعى والاستقامه ؛ اتداعى حين اعترف وانشط لاسترسل فى مداعبة الخيال بدفتر الواقع فالمسالة ليست فى يحاءات والابتسامه ولا فى جماليات النيل ؛حين اعتواها اعتزاز بالمملكه وسكنها التمادى فى الاقتدار بحثت عن سلطانها العاطفى الرقراق ؛ وفتشت اوعيتها التعبيريه السائله فقيل لها انها انحازت الى منجم حزن ناضب حيال الفراق ؛ فكان ان رافقت زلزالها الى حيث بركة صغيره من الدموع اسمها النيل ..وعادت الامواج تغازل انحدارها الى اعلى !! الم اقل لك ان الفرح بقوة هو الببكاء بفرحه..

مهند الجيلي بادي
ياخ الله يطلع دينك ، وحاتك مشتاق ليك وين انت ياجن؟!

...

طولتا منك أنا...كلمات مى حسن أمين

الحان مصطفى السنى

..
صابر على المقسوم
راجييك يا حبيب
امكن تعود لى يوم
القا الهناء قريب..!!

تروتسكي الحبيب ،،


وقفت قُبال عوينات السؤال جواك
لقيتني أنا
مرتق شوف عويناتك
بذاكرة المحبة الفيك
وأنا ياني
غياب من عينك
حضور جواي وجواك


يا صديقي القديم ،،

مفتقدك
ومفتقد الحنين منك
سلام الروح
ونسة الليل
وكيف العشق إتحكر
كلاما هيَّ
وكلامي أنا
وكلامك إت
كلام من جوة جواك
ويا سلام
لامن نقيف
نخت هذا الوطن موضوع
ويقطع لي كلامنا حدث
كواريك الكماسرة تشنف الآذان
نطنِّش للكلام قاصدين
ونسترسل
سلام ياخي


والله يا معتذ بحبك جداً
ومفتقدك جدا


ريحتني هدية الميديا جدا
كلمات مميزة ولحن بهبش الروح بالغصب


مرفق :
حبي الكبير
بــــادي

هِنْـــد ،،


ليش الحرف
برسم تفاصيل الرويحات المشحتفة
بالحنين ؟؟
وليش هو دايماً
بطرح الحالة الغرام ؟
وليش وليش ؟؟

تفتكري
ممكن تصطفيهو اللحظة
والحالة الحضور
ولا يمكن ينتشي (الحرف)
ساعة يهبِّش فرحتو
وزهو زاكرتو الصباح ؟؟

سؤال :
وينك ؟


مرفق :
كل المودة
بـــادي

سلامات
وعوافي
مهند ..
هنا يمكن ان تستريح الروح .. من "وعثاء غربتها"..
كن بخير يا صديقي ..
تشتهيك المداين وروعة النيل القديم ...
مرفق:
محبتي
واشواقي..

ود رملية العزيز ،،

مازلت أذكر ترحيبك بي هنا
وصدى أحرفه يعلو كلما داخلتني هنا
فأبيت في الذكرى
ويا ليت الصدى يعدو كما الصوت الحقيقة


يااااااااااااااااه يا شفتة

أسوي شنو
إذا كانت رويحة الشوق
أبت ترقد
إذا كان الصبر مملول
صباح الذكرى في جواي
فرد خدَّر فريعاتو
أقولك إيش
ولسة الصورة في عيني
عقاب شوفتك .. !!


مرفق :
كل المحبة
بـــادي

الخنساء تماضر ،،


يا غايبة
ومادَّة عيون اللقيا تشوف
طفَّرنا من الحدقات نتقاسم
لحظة شوفك
وضليل الشجرة الفيها كتبنا
وكيف سطرنا الإلفة حروف
رابض
في أطراف العقل وقاعد
علي هبشة ذكرى
بطفِّر ..


تاويقة سايّ :

تاوقت شان ألمح وشيك
مديت عوينات البصيرة
تفتشك
حسيت حنينك
وكنت شامم
ريحة التراب
وشفت عينيك
صادفوني
آآآآي صادفوني
في شفع الحلة الملتقة بالصبر جرياتم
وفي حفاهم
كنت بشعر بي رجولك
قادلة جواي
تتحسسي الخطوات بشيش
ما توخذك أشواك أساي
ما تصحي كل النام زمان
حتى ف مشيك
بتحاذري ما تتاوري الجروح

شفت عينيك
ممدود براحا بلا حساب
مكسية بي خضرة خريف
معشوقتو شتلة
مرسالو ليها مع التساب
يا شتلة
منتظرة المراسيل من زمن
ولا مليتي الوقوف
راجية الغيوم
تديك ظروف الحب
من المرجو الخريف ؟؟


كيف إنتي
قيلتي كيف
بعد الهجير طفا فينا كل الاشتهاء
وبقيتي جواي وحَّدِك



مرفق :
حبي الكبير
بـــادي

Quote: يا غايبة ومادَّة عيون اللقيا تشوف طفَّرنا من الحدقات نتقاسم لحظة شوفك وضليل الشجرة الفيها كتبنا وكيف سطرنا الإلفة حروف رابض في أطراف العقل وقاعد علي هبشة ذكرى بطفِّر ..

ياحاضر رغم غيابك
مابتقاسم لحظة شوفك
أصلي بحب القسمة في كل الناس
إلا الشوف .. وكت .. بتشيلو عيونك!
قاسي شديد
أقاسم فيك
وأنا زول حسّااااااس

Quote: تاويقة سايّ : تاوقت شان ألمح وشيك مديت عوينات البصيرة تفتشك حسيت حنينك وكنت شامم ريحة التراب وشفت عينيك صادفوني آآآآي صادفوني في شفع الحلة الملتقة بالصبر جرياتم وفي حفاهم كنت بشعر بي رجولك قادلة جواي تتحسسي الخطوات بشيش ما توخذك أشواك أساي ما تصحي كل النام زمان حتى ف مشيك بتحاذري ما تتاوري الجروح

ماساي.

جيتك قاصد وماني بدس الشوق الشايلو وجايّ.
لاني بخبّي الريد العشت حنينو ..معاي.
وماشفت عيونك أنا بالصدفة ..
كنت بباري خُطاهم وماشي
وهم خُطاهم ..قبل خُطاي ..ساقوا..ضِياي.

Quote: شفت عينيك ممدود براحا بلا حساب مكسية بي خضرة خريف معشوقتو شتلة مرسالو ليها مع التساب يا شتلة منتظرة المراسيل من زمن

هذا البراح شايلو بس شوقك براك.
الشتلة ماعِشقت خريف ...إلا شان حاضِن ..سماك.
لو كل المراسيل كان تجينا كما التساب
كان هواي شال الأرض
حضنو اتنينم .. سحاب.

Quote: كيف إنتي قيلتي كيف بعد الهجير طفا فينا كل الاشتهاء وبقيتي جواي وحَّدِك

زيّك تمام.

أظِن مرايتك وماك داري
شوق انعكاساتك هناك.

تعرفي يا تماضر
قدر ما اتاوق تجاهك
يشلع سماك
براقو يخطف شوف قلب
ملهوف مرتب
وما مرتب
شوقو ليك
جايط
شوقا يمد كرعينو شان يوصل مداك
يطول لحاف الإلفة ميل
أو قولي :
يقصر قوام الشوق قدم
وما يطول صداك
وزن الحرف
مجبول عليك
مقسوم علي حلقك غناك
مفروض علي حبال صوتك
نداك
وأنا هسة سامع
وشوشة شوقك
وبرهف خاطر الكلمة التجيك
تقعد مهذبة في حداك
تكتف يدينا وتقشعر
تخفض حواف الشوق أدب
في شان حنينك
ديمة سابق وما براك
دايماً معاك
أجمل حروف
تفرض ضليلا عشان أقيف
ولي بتبرد كم هجير
أنجم في ساساق غناك
ما بين حروف المد
وما بينك سكون
يا إلفة
يا لهفة
يا صدفة أجمل من قدر
ويا قدر
صادف دروب شوقي وخطاك
ويا خطى
ملهوفة دايماً
شان تشوفك قدرتا
ويا قدرتاً
بتجيني شان أكرب خاطي
وفي النهاية
اللهفة زاد
والشوق ميعاد
رغم البعاد



ولسة ما كمل الكلام
بس تاوقي
ح يجيك الحنين
دراااااااااااااب
دراااااااااااااب


مرفق :
كل المحبة
وقهوتك
بـــادي

Quote: تعرفي يا تماضر

لأ.
عرّفني انت.

Quote: قدر ما اتاوق تجاهك يشلع سماك براقو يخطف شوف قلب ملهوف مرتب وما مرتب شوقو ليك جايط شوقا يمد كرعينو شان يوصل مداك يطول لحاف الإلفة ميل

شوق قلب؟؟
أنا قلت ليك
أنا قلبي مااستنى السماح

لقيتو شايل شوق إليك
وإعلانو ريدتو عليك .. براك.


احتكر احساسي ليك.
ياملك.
هاك قليبي إليك قصور
أدّاك صك ملكيتو ..جد ..وحيّرني مع باقي الشعور .
قول ليّ كيف أعمل معاك؟؟
انتابني مع طولك ..قصور.

Quote: أو قولي : يقصر قوام الشوق قدم وما يطول صداك وزن الحرف مجبول عليك مقسوم علي حلقك غناك مفروض علي حبال صوتك نداك وأنا هسة سامع وشوشة شوقك وبرهف خاطر الكلمة التجيك تقعد مهذبة في حداك تكتف يدينا وتقشعر تخفض حواف الشوق أدب في شان حنينك ديمة سابق وما براك دايماً معاك أجمل حروف تفرض ضليلا عشان أقيف ولي بتبرد كم هجير أنجم في ساساق غناك ما بين حروف المد وما بينك سكون

أنا شِن أقول ؟؟
ريدي ماقدر الحروف
ماعونو أوسع من غرام
تعبيرو فاق لحن الغُنا
ورسمو أرفع من ..كلام!
ماتقوليّ ياعالي المقام
أجمل حروف؟؟
برضو تقصر من مقامك
براها خِجلت
براها لبست
كم لجام.
هاك السكات.
أصلو السكات .. تعبيرو ..خام.
أيّ شيتاً في أصولو ..دايماً مباشر وياسلام.
لمّا يبقى الحِس أكبر .. من تلابيس الكلام.

Quote: يا إلفة يا لهفة يا صدفة أجمل من قدر ويا قدر صادف دروب شوقي وخطاك ويا خطى ملهوفة دايماً شان تشوفك قدرتا ويا قدرتاً بتجيني شان أكرب خطاي وفي النهاية اللهفة زاد والشوق ميعاد رغم البعاد

مالقيت أيّ وصِف أختو فوق رسمك .. هواك.
قلت أنده ليكَ بيو ..
فــ
يا انت.
وانت كان تعرف .. عُلاك!
كنت حنيت للأرض
ونزلت بي شوقك هناك
سالمت ريد اتشابى ليك
قالدت قلبو شديد عليك
فردت ليهو لِحاف .. سماك.

الخنساء تماضر ،،


مين علَّمك
تبقي في حالة هجِر
تايهة وتشبحي في البلود
روحك ترِك
وتفر رجولك
في البكانات البشيلن ذكرتك
يا نبرتك
واضح سفر روحك عليها
وشحتفة حرفك جرس
دق في شان اجتماع
كل الغنيوات التباريك بالنغم
ولسة مازالت عوينات الكلام تبراك
تنفتح
تهري روحي وتندلع
جواي نيران اشتياقك
ينزل وزن حرفك مطر
تفتق الروح كم عشق
يبكي حالة حالة افتراقك
وكيف مسافاتك بطولن
يا سحاب
واقف بحَنْدِك في الارض
وهي تتمطق
طعم ذرة تراب مبلولة بيك


يا بت وطن
ما تجي
وخلينا نفرد لي حبال الصوت
نكورك
ننده الزول الحبيب
ونقعد قريب
ونميل فرح
تال القصائد وننتشي
ونرقص علي أنغام سقوط قطر المطر
سقف الرويحات المشحتفة ليهو غصبا عنها
ونبلل العشق العطش
ونمرق نطش
أنا وانتي والنيل المعاي
انتي وبراي
انتي والنيل في حداي
تال البنيات المواسيهن أساي
ونغني لامن يفرحن
أو يطرحن فكرة هواك
(وإن كانت متل ريدة الارض للغيمة
بفضل بحنِّس طلتك
يا إلفة يا بنية خريف)


مرفق :
حبي الكبير
بــــادي

زول يابلد
خلاني أحرد اغترابي
أشتاق أواصل في السفر
لما ياباني السفر
يديني لي أرضك رجوع
رجوعي ارهاص .. بالخطر.

تقدر تخاطر بي بلد؟؟

Quote: مين علَّمك

علّمني حرفك
أدمن الجيّات هنا
ولمّا بتقول ليّ نايمة
انتِ فوق روح القصيد.

أنا صاحية بي جيتك هناك
نايمة عن كل المعاي
وانا المعاي يازول .. كتير
لكنّي ..بشتاق..ليّ..معاك.

Quote: واضح سفر روحك عليها وشحتفة حرفك جرس دق في شان اجتماع كل الغنيوات التباريك بالنغم

واضح إني مامختار ..حنينك
أصلو ماخليتلي مهلة إختيار
قبال أجيك
أجراس حروفي علي بيوتك..إنتظار
دقّت وماإستنيت..اخش
انت من جوّاي بتفتح
كل طاقات النهار
كان الغنا البيشيل خُطاي
قبلو الحنين سوّالي في عينيك ..ديار.
ولو مامسيّر ..وإختيار
برضي بختارك أنا
ليّ

وطن

بمتدّ في كل الزوايا
خالي من عمري .. إنكسار.

Quote: يا إلفة

أكتر من حنينك .. وإشتهاي؟؟
ماآلفتو ..زول
أو عشتو بي لهفة خُطاي..

إلا ..واحد

كان:
وجودك في حِداي.

حالة إغتراب
حالة قُراب
أو ما قُراب
حالة بعيدة وما سراب
حالة ملايكة
ومن تراب
حالات قدر خلق الله فيك
والحالة فيني الدروشة
الشوف قدر مد البصر
زايد بصيرة شوقي ليك
يا إني فيك
يا إنتي في قلب السمع
تاويق حرف
شادي حيلو وقدرتو
ملهوف يجيك

حالات قدر خلق الله فيك
والحالة فيني الدروشة
الوشوشة
صوت الغنيوات التجيك
والنقرشة
طرب المسامع
لي حروفك

كان الخريف
ممكن يطابق وصف حسك
بس هسة ما قادر أقيس
طول المسافات البيجريها المطر
أطول
ولا هزة حس بتذكرك الصباح ؟؟
بتروي أمطار السما
ولا شوقك
لم يسقي الروح ولف
أمشي وألف
ألقاك قدر جواي تمام
وأكبر شوي
بت يا ولف
مالك عليّ ؟؟


مرفق :
ما عارف
بـــادي

حالة انعدام لي كل شيتا كان سِواك
حالة مافي زول بشبه غُناك
حالة كونك انت يازولا براك

مخلوق من الكنت أوّل زول ومنو
ومافي باقي ولا بِفضل منو لي غيرك ..هناك.

حالة وجود وانعدام
فقدان وزِن ويمكن عقل مرات كمان
طيران مَلَك
فوق الجاذبية
وأعلى من هذا المكان.

جريتها من وش
الغنا البارد
نتقتها بي عصا
الشوق النتح

في الروح..

وهزيتها شدرة
نم أصيل
"نيمتنا" ديك
جفلن عصافير
النغم..
ركن على سلك
القلب...

يازول مخضر
زي وريد

او زي ضراع
زي نخلة
فارده عليك جريد..

سنسنت من كأس
القميرة حرف
رهيف..
وقفت لط..

نافقت زين
لامن تسلقت
الجرف..

والنيل يوحوح
ضمة ما نام
من أزل..
جارحاهو طورية
الزمن..
رابط كراعو
علي النخل..

سلام بادي سلام خنساء

بلد العصافير التقاسم الموية
وتباري الشجر يابس
وتسقي جناها من صدر الغريب
او بي القليل
تلقاها تلفح ريشا توب
يا واردة سايقا علي حجاك
ماعونك الفاضي ونشف
جواكي مليان كلو طيب
زي كل ليل

مهند.. تماضر .. هند
وإنا سيجناكم سحرا بالبيان وسيجناكم سراً وجهرا نابضا..أحد ..احد..أجران فضة ترن بأجراس القلب والصيحة الخصيبة للشعر !!

مرور تحية وإبداء إعجاب وقد طربت من هذا الدفق الذي جاء كما الدرر الثمان.. رهافة حس خاصة تعبير " وتسقي جناها من صدر الغريب" مجاز ومزية بصورة غير المألوف وهذا هو الجمال في التصوير