الديماجوجي عمر الفاروق والأربعين حرامي ..لا توجد نوتة!!

اخونا وحبيبنا طارق الأمين ..
قبل كل شي عايزين نتفق على حاجة واحدة عشان انا ما بحب الخبط الكيمان ..
انت زول مبدع دي ما فيها كلام ..مبتكر ما عايزة درس عصر..بتكييف لكل ما تقدم هيلاهوبيّاً ما بنكر ..وفوق كل ده انت زول فنان ..
حلو الكلام ؟
نقطة ..سطر جديد ..أقلب الصفحة ..أنظر الشكل ..راجع صفحة 48 أو أي شي بيتكتب في كتاب العلوم باب التكاثر الجنسي منه والخضري وكمان اللاخضري عشان الدرن ما يزعل مننا !!
لا افهم في النوتة الموسيقية وما أظن أفهم ولااااا عايز أفهم وربما يكمن السبب في إنو هذه المدعوة النوتة بتذكرني بي كرّاس الإنجليزي وما أدراك ما الإسبلينق ودكان البرقاوي بي العصر عشان اشتري كراس مسطر سطور خاصة لا تشبه سطورنا في الكراس أبو قلب ذو اللون الأخخخددددر أوالبمبي ..
ماشين كويس؟
طيب خلينا نقول إني بديت أسمع غنا بغض النظر عن الإستيعاب من عدمه وانا عمري 6 سنوات ..أننننني وأنننننييييين ..صفر معاك التسعة يعني يا قريبك نقول بسمع غنا صاااافي كده لي مدة 25 سنة وفي رواية ربع قرن ونيف (نيف دي قاعدة تريحني في كنكوجي وما تسألني الكنكوج هو شنو)..
يعني يا طارق 25 سنة غنا دي بيكون فيها زي جغلومية شريط لي طفشطاشر فنان بتطلع ليها بي زي خرتومية أغنية ..يا طارق ياخ انا من شدة ما فاض بي كنت بشتري شريط هندي عديييل كده وبسمعو ..
رقصا مع الزايري مع غسالين العربات في البحر ..ونططت في دلالة الجمعة في امدرمان مع بتاعين الاورنيش على أنغام شابرانكس ..بسمع حقيبة الفن تنقش..ترش..تنقش.. ترش..وبسمع علوية حواجب..
سمعت الكاشف وسمعت فاطنة الجمكو ..وسمعت ابراهيم عوض وبسمع حماده بت ..بستمتع بي مهلة العابدية وبموووت في هاجر كباشي...والله بحب ليك فيروز وام كلثوم ديل جنس حب وبسمع ليك موسيقاهم التحت تحت ديك وحافظا زي ما عبد الوهاب والرحبانية عملوها ..وفي نفس الوقت جاضم ليك كل كسرات عازف الاورغن الربع مع نجاة غرزة ..
تعرف يا طارق بالجد بقيت ما سائل في اي زول قاري موسيقى وما ادراك ما النوتة ودو وما ادراك ما مي ..
كان للعيون مشيت مستشفى النهري وكان للنخرين جيوبي الأنفية تحلف تقول جيوب بنطلون جيمز إدوين وكان للسنون كلها كم شهر واركب الطقم.. فقط الحمد لله أضاني هي الوحيدة اللي سلمت من زيارة طبيب طيلة الفترة دي الوقت ده وربنا ما يحوجنا نمشي بيها ..
يبقا يا طارق خلّي الركيزة الأساسية بتاعتك وانت بتتكلم معاي إنك بتتكلم مع زول يعتمد على الأضان وبس ..الأضان فيط ..إضنيني الكبار ديل ..
نمشي لي قدام ؟
رد الفعل بتاعك يا طارق والشي الممكن يكون (سخّن) معاك هو إتهامي ليك بي كلمة (سرقة) اللحن ..ويبدو لي انت لمن قريت كلمة (سرقة ) إتبادر لي ذهنك عصابة الثلاثة وإتخيلت نفسك لابس ليك بنطلون اسود وفنيلة مخططة اسود بي ابيض وفي عينيك عصابة سوداء مربوطة ويتدلى من جيبك خمشة مفاتيح وشايل في كتفك بقجة وانت تتسلق حيطة في الحلة !!!
الملحنين والفنانين مرات بيقنعوا نفسهم بي حاجة ويقول ليك (سمكرة) اللحن !!
يجيب ليهو لحن مشابه ويبدا يوهم المستمع بي بعض الجمل الموسيقية أو تغير الالات أو تهبيش نهاية الجملة الموسيقية إما بغرض تضليل المستمع وربما إعجاباً باللحن السابق والحوجة لتكراره تاني أو كمان كسل من الملحن ..
بتكون مقبولة نوعاً ما إنو الفنان أو المحن تكون عندو لونية في التلحين ويستعير بين الحين والحين جملة بسيييطة مثلاً بداية الدخلة للأغنية أو في الختام أو حتى لمحة صغيييرة كده داخل النص الشعري ..لكن يشيلا بي الكربون ده بيكون كسل ..
وكمان بيكون مبلوعة نوعاً ما إنو صاحب اللحن يعيد اللحن في واحدة من أغانيه عشان ما نسميها (ٍرقة) لكن لمن زول يشيل ليهو لحن حق زول ويقنع نفسو بي(السمكرة) وما يعترف بيها دي بتكون (سرقة) بغض النظر عن إنو ده طارق الأمين ولا النعام ادم ..
زمان شعراء وملحنين الحقيبة كانت عندهم المدرسة دي وما بيدسوها بيكون اللحن واحد وتتم المجاراة في الكلمة وما ناكرنها والأمثلة كتيييييييرة وما اعتقد إنك محتاج اقولها ليك ..
النوتة الموسيقية اللي نزلتها لينا هنا يا طارق ما كافية عشان تقنعني بي إنو في إختلاف في اللحن لأنو يا عزيزي وبي كل بساطة لو نانسي دي عندها حفلة في القرير وغنّت الأغنية دي أي زول حا يفتكر إنو دي أغنية يا مولاي اللهم إلا إذا إنت صوّرت ليها زي 750 نوتة في ورق A4 ووزعتوها مع كرت العرس للمعازيم إضافة للكوركي لي بيت العرس مع وضع علاة (*) تحت الورقة في شكل ملحوظة تكتب فيها :
دي أغنية ( بلداً هيلي انا ) لاحظ الفرق في السطر الخامس السلم الرابع وتابع أين تم وضع السي ..سيتم تقديم الأغنية في الفاصل الثاني فقرة رقم 3..
فقط وفقط في الحالة دي ممكن محمد احمد المسكين ده لمن يقوم يرقص يكون فاهم إنو ما بيرقص في يا مولاي ..
وأزيدك من الشعر بيت كمان إحتمال كبييير جداً لو مشيت بي أغنية (بلداً هيلي انا) أوروبا وأمريكا تلاقي تجاوب كبير جداً بسبب إنك برضو سمكرت مقطوعة ياني Yanniالشهيرة(With Attraction) والمستمع لو ركّز شوووووويييييييييية كده (هي ما ظاهرة شديد) حا يلاقي إنك لاطش منها ودخلتها في اللحن بتاعك ..وهنا بتمنى من الدكتور صلاح محمد الحسن يكتب ليك النوتة بتاعت اللحن ده أو ممكن تتصلوا بي الفنان Yanni على رقم الموبايل 0912388996 (ياني مشترك مع موبيتل زين حالياً) رافضاً سودنة شبكته سوداني وخلييييييييييييك سوداني..
تعرف يا طارق العملتو إنت ده بيذكرني بي شنو ؟
انا قريت كمبيوتر وكانوا بيطلبوا مننا كاعمال سنة تقديم برامج بلغة البرمجة باسكال Pascal أو فيجوال بيسك Visual Basic أها يا قريبك نحن اليوم كلو نكون خالطين في الكافتريات ونتابع ليك في حفلات محمود عبد العزيز ولمن يجي وقت التسليم بنكون الحببببة دي ما عملناها !!!
اها بنقوم نعمل شنو ؟ بنشوف لينا زول شااااطر أو زولة شاااطرة إشتغل البرنامج ده وبنقوم نعمل منو نسخة ..
يلا كمان لو إكتشفوك إنت عامل تتريس للبرنامج ولاطشو من زول ممكن يفصلوك من الجامعة فبنقوم نشيل الكود بتاع الزول ده بي صمة خشمو لكن نغيّر في الألوان بتاعت الأزرار أو خلفية الشاشة وحجم الخط ولو هو كاتب كابيتل نحن نكتب إسمول ..
يعني بإختصار كده البرنامج جوووة ياهو زاااااااااتو والكود ياهو زااااااااتو بس بنغير نحن في الشكل الخارجي !!!
طيب نفترض إنو موضوع الكمبيوتر ده ما تخصصك عليك تتذكر زمااان لمن كنت في الإبتدائي ؟ مش أستاذ العربي بيقول ليكم يوم السبت كل زول يجيب موضوع في الإنشاء عن الأم ؟ أها إنت بتكون يوم الخميس والجمعة مع الدافوري ولمن تجي بالليل تنوم تتذكر موضوع الإنشاء قلبك يتقبض كده والدنيا بتبقا ليك بمبي وتقعد ترجف وتتخيل الخرطوش الأسود في ضهرك وكف كفين وفجأة كده بتقوم تتبسم براااك لمن تتذكر إنك قاعد جمب ثامر في الكنبة وحصة العربي التالتة يعني بعد فسحة الفطور وثامر بيخاف مني حا اشيل كراسو واكتب منو ؟
اها بتقوم عشان ما تتكشف بتشيل موضوع ثامر ده لكن تعمل فيها حريف ثامر كاتب إمو (نانسي) إنت بتكتب أمك( الرضية) ثامر كاتب :
وكانت ماما عندما تأتي لي بكوب من الحليب أقول لها يا ماما أشعر ببعض من الغثيان ..أريد شطيرة لحم..
تقوم إنت تكتب:
يمة لااامن جابت لي كورية اللبن قلت ليها يا أمي ياخ عندي وجع بطن ممكن أطرش في أي لحظة ..جيبي لي عيشة ..

اها يا طارق أخوي انا شايف ده العملتو في أغنية (بلداً هيلي انا) ..
جبت يا مولاي وأضفت ليها بعضاً من (With Attraction) وطلعت لينا بي الحاجة دي..
العمل جميل أو ما جميل دي ما نقطة خلافنا عشان ما يجونا الناس البتنطط ساي ويعوسوا لينا الابري بي الحلو مر ..

وهاكم الألحان التلاتة وشوية تركيز منكم وحا تلاحظو الشبه :

يا مولاي بصوت الجيلي الشيخ :

ياني Within Attraction :

بلداً هيلي انا بصوت نانسي :

ودي هدية فوق البيعة :


بالمناسبة التشابه بين يا مولاي وبلداً هيلي انا يبدأ مع الكوبلي التاني بعد المقدمة بينما التشابه بين وز إن أتراكشن وبلداً هيلي انا عايز ليهو إحساس عالي وملاحظة دقيقة
تخريمة :
مسعول من الخير طارق أخوي الديماجوجي دي عندها علاقة بي الديما نافر؟

Quote: مسعول من الخير طارق أخوي الديماجوجي دي عندها علاقة بي الديما نافر؟

والله يا ود الفاروق إنت زول سُكر..
النقد المفيد هو تكريم وإحتفاء للعمل المنقود؛ فإن لم يطوِر النقد أو يساهم في تغيير (العمل المعني) إيجاباً، فلا شك سوف يساعد على تثبيت ذلك العمل؛ ويعتمد علي قوة العمل وحجة النقد..
المهم يا صديقي تحاشا الكلمات من عينة (لاطشها)، عشان يُحظى نقدك بالنقد المقابل..




والتحية ليك ولي الفنان الشامل طارق اللّمين

طيفور يا حبيب:

Quote: النقد المفيد هو تكريم وإحتفاء للعمل المنقود؛ فإن لم يطوِر النقد أو يساهم في تغيير (العمل المعني) إيجاباً، فلا شك سوف يساعد على تثبيت ذلك العمل؛ ويعتمد علي قوة العمل وحجة النقد..

ده كلام جميل يا صديقي ..

Quote: المهم يا صديقي تحاشا الكلمات من عينة (لاطشها)، عشان يُحظى نقدك بالنقد المقابل..

تصدق الكلمة دي إستخدمتها ما عشان معناها بقدر ما استخدمتها عشان بتكلم مع المطرطش طارق الأمين ..

الديماجوجي الديما نافر الديا دافوري القايم سداري
اخونا عمر ود الفاروق
ياخي كان مافي شبه بي رصتهم التلاته مع بعض
بقوا بتشابهو
كده فرزون لينا
واحده واحده ونشوف الفرق
لكن بيني بينك السمع متعة انا زيك بسمع اي حاجة لامن
اتلبش واتلبش واتلبش
وابقى الديما لوووشييييي

الديما سُنّي (وفي رواية الديما شيعي):
يا اخوي اضغط من طرف ما بتفرق التلاتة الحان دي احمد وحاج احمد والبيت جمب الجامع ..
تخريمة :
اها ما لفيت لسة ؟

قال ليك ..
لو توفيق الحكيم ماشى مع علوية سُست في الشارع ..
الناس كلها حتاشور وتقول مين اللي ماشي مع سُست دا ..

حميدة :
الكلام ده وييييييييييييييييييييين لي ساوث هامبتون ؟
تخريمة :
توفيق الحكيم ده ياهو توفيق الدقن ولا داك توفيق براهو ؟

سلام عمر الفاروق ..

بالجد الحوار رغم إختلاف وجهات النظر فهو صحي جدا ..
نتمنى نقرا ليكم إنت وطارق كلام جميل زمناظرة تفيدنا كلنا في موضوع الكاسيت ..

السني :

Quote: ياخي كان مافي شبه بي رصتهم التلاته مع بعض بقوا بتشابهو

D

بي طريقتك دي يوم بتكتل ليك زول

Quote: ياخي كان مافي شبه بي رصتهم التلاته مع بعض بقوا بتشابهو

يا ناذر الفنان ود السني ذكرني بي حكاية الزول الجوهو ناس المطافي وقالوا ليهو وينها الحريقة؟
قال ليهم مافي نار هنا، لكن طالما جيتو ما بنرجعكم فاضين؛ ثم أردّف: قوم يا ولد ولع ليهم الزريبة




___
ود السني يا جميل، سلام

أبو النييز يا حبوب:

Quote: بالجد الحوار رغم إختلاف وجهات النظر فهو صحي جدا .. نتمنى نقرا ليكم إنت وطارق كلام جميل زمناظرة تفيدنا كلنا في موضوع الكاسيت ..

بالنسبة لوجهات النظر حول الموضوع قد لا تلتقي لأنو انا بعاين للموضوع سماعياً وإحساس بينما طارق الأمين بيعاين ليها علمياً و نوتتيّاً (عارفة ما صاح )..
بالنسبة لموضوع الشريط الكاسيت كمان اتوقع غنو طارق الأمين روّج للكاسيت بذكاء عبر الموقع والضجة المثارة وعدد البوستات المفتوحة والمتعلقة بالموضوع أوفت بالغرض ..
تصدق يا ناذر ما سمعت الكاسيت عشان ما اكضب عليك فقط إستمعت لي عملين (شقي ومجنون) و (بلدا هيلي انا)..
البت نانسي فيها فكرة حلوة في غناها وممكن تمشي لي قدام لو خلّت معط الغنا بي طريقتا دي لأنو ده ما إستايل ده معط ..
البت دي لمن تغني بي صوتها السااااي قاعد يكون جمييل وقطعاتا دي لمن تدخلا في مكانها الصحيح بتكون جميييلة جداً وأجمل ما سمعت في (بلداً هيلي انا) هي الأهااات اللي بدت بيها قبل ما تخش في الاغنية ..
طارق الأمين قد يحسب ليهو إكتشاف صوتها أو خلينا نقول تقديمها للجمهور أكثر لكن بعيب على طريق تقديمه لننانسي بنوع من الإحتكارية مع فرض نوع معين ولونية معينة تشبه طارق كثيراً ولحدي اسة طارق ما قادر يفرز بين طارق الأمين بتاع هيلاهوب وطارق الأمين الملحن او كاتب الأغاني ومنتج الكاسيت ..
لونية الهيلاهوب تنفع في ان تقدم كما يقدمها في قوالب دراميا لكن الغنا بيختلف كتيير ..
ونانسي لو عاشت في جلباب طارق بس حا تتورط بعد تجربة سقوط شروق ابو الناس من جلباب بروف معز ..
التجربتين ديل بيتشابهو شدييييييييد في كل التفاصيل مع إختلاف نوعا ما في إنو نانسي يرجى منها وفي أمل لي قدام تمشي للأحسن ..

ياسر وناذر:
كنت بتمنى تدوني رأيكم (السماعي) في المقاطع النازلة في البوست ومدى تشابهها من عدمه وبعد داك نشوف الباقي..

النوتة الموسيقي لـ (بلداً هيلي أنا) مقارنة بـ (يامولاي بشكيلكـ شكاي و غلبي)


الموضوع اثير وتم حسمه في الرابط اعلاه راجع بوست فيصل نوبي

Quote: الموضوع اثير وتم حسمه في الرابط اعلاه راجع بوست فيصل نوبي

أثير ..نعم ..
تم حسمه ..لأ

عزيزي عمر الفاروق

تحياتي

Quote: ياسر وناذر: كنت بتمنى تدوني رأيكم (السماعي) في المقاطع النازلة في البوست ومدى تشابهها من عدمه وبعد داك نشوف الباقي..

أما بعد :

أنا علاقتي بالموسيقى تكمن في ( الأذن الموسيقية ) و بعض الآلات الموسيقية التي أعزفها ( منفردا ) بغرفة معتصم و تمبس و دراستي بمعهد الموسيقى التي لم تدم إلا أياماً لألحق بركب الجامعة الفرع حسب نصيحة أحد أشقائي

كلامك كلو 100% و تحليل جميل.
و لكن

هل تولد الموسيقى أياً كان نوعها .. هل تولد يتيمة لا فروع لها ؟
أليست الموسيقى هي نتاج هذا الزخم و الكم الهائل من المشاعر الإنسانية التي تزدحم في وجدان الفنان لتنطلق عبر إبداعه الذي يعبر عنه ( تماما كالشاعر و القاص ).

بمعنى لو راجعت مكتبتنا الموسيقية السودانية ، ستجد أن فنانين كثيرين برعوا في التلحين مع وجود هذه السلالم التي تنتمي إلى جينات بعضها البعض و لا يلقطها إلا رادار مثل راداركم الكامن في أذنك الموسيقية عالية ( التكنيك ) ...

مثلاً : خذ أغنية الريلة ثم قارن الجزء الخاص بأغنية ( سواة العاصفة في ساق الشتيل الني ) و هو الكوبليه الأخير الذي يتدرج فيه صوت وردي عندما يقول ( هيْ أقدلي .. هيْ أقدلي و سكتى الخشامة ) ، فإنه يسبح سباحة في الدليب المدوزن من زمن الريلة و ما قبلها.

الأمثلة كثيرة ..

و ما قطعة ( أتراكشن ) للموسيقار ياني إلا ولادة بعد إستماعه لألحان أفريقية كثيرة.
و ستجد فنانين أمريكان و أوربيين برعوا في إقتباس ألحانا أفريقية و آسيوية و وضعوها في قالب حديث ، و ستجد أن نكهتها رغم ما طرأ عليها من آلات و تقنية عالية ، إلا أن نفَس و روح النص الأصلي يبقى كجذوة تحت الرماد.

طارق الأمين لم يضع نفسه في ( برواز ) يا مولاي ، و لكنه وجد أن كلمات الأغنية ( متشعلقة ) كنبات اللبلاب في فرع من فروع الدليب ، فإذا بلحنه وجها لوجه مع ( يا مولاي ) .. و ستأتي أغاني أخرى كاسحة من نفس المعين ، و يبقى الأصل ( الدليب ) يغذي آذانا موسيقية لتضخ ألحاناً مثل يا مولاي و ( بلدا هيلي نا) ..

دمت ( هولنا و هيلنا ) و التحية لطارق الأمين و نانسي

الريس ابو جهينة :

Quote: أنا علاقتي بالموسيقى تكمن في ( الأذن الموسيقية ) و بعض الآلات الموسيقية التي أعزفها ( منفردا ) بغرفة معتصم و تمبس و دراستي بمعهد الموسيقى التي لم تدم إلا أياماً لألحق بركب الجامعة الفرع حسب نصيحة أحد أشقائي

والله يا ريس إنت عامل زي الأثار والأحجار الكريمة الواحد ما بيكتشفك إلا لمن يبدا يبحّت ويحفر فيك ..
وكل مرة نعرف لينا حاجة ..وزي ما بيقول المرحوم خوجلي عثمان ..حبببة حببببببببة ..

Quote: كلامك كلو 100%

بالرغم من إنو لا فائز ولا مهزوم في البوست ده لكن انا كنت بفتش للحتة دي ..مش عشان 100% دي لالالا بس عايز نسبة تديني إحساس إنو في حاجة صاح من كلامي وممكن يوافقني عليها زول وطالما انك طلعت خبير يا ريس فنسبة 5% منك نعادل 200% من إندييينا..

Quote: هل تولد الموسيقى أياً كان نوعها .. هل تولد يتيمة لا فروع لها ؟ أليست الموسيقى هي نتاج هذا الزخم و الكم الهائل من المشاعر الإنسانية التي تزدحم في وجدان الفنان لتنطلق عبر إبداعه الذي يعبر عنه ( تماما كالشاعر و القاص ).

ده كلام سليم يا ريس..

Quote: طارق الأمين لم يضع نفسه في ( برواز ) يا مولاي ، و لكنه وجد أن كلمات الأغنية ( متشعلقة ) كنبات اللبلاب في فرع من فروع الدليب ، فإذا بلحنه وجها لوجه مع ( يا مولاي ) .. و ستأتي أغاني أخرى كاسحة من نفس المعين ، و يبقى الأصل ( الدليب ) يغذي آذانا موسيقية لتضخ ألحاناً مثل يا مولاي و ( بلدا هيلي نا) ..

في دي بختلف معاك وبقول ليك طارق وضع نفسه في قالب يا مولاي وعموما المتابع لرحلة طارق اللحنية بيلاحظ إنو طارق بدا وفي كتيير من الاحيان بتقليد الحان معروفة سواء كانت هذه الالحان الحان الشارع(الاغاني الخفيفة المنسوبة للتراث جزافا) والألحان العربية مقلداً للفنانين العرب في قالب فكاهي..
ده ما بيمنع انو طارق عندو افكار لحنية جميلة جدا وللحد البعيد وفيها نوع من الخيال البيخاطب الاذن الموسيقية السودانية خصوصا العمية منها ..
طارق الامين بالرغم من غنه شخص مبدع ومحترف في مجال الكوميديا إلا أنني أصنفه في خانة غير المحترفين في كتابة الاشعار وتأليف الالحان الإحترافية ..
طارق ممكن يكتب شعر اليوم باليوم ..وكذلك يلحن لحن اليوم باليوم يساعده في ذلك الارضية الصلبة اللي بناها لي نفسو بتقبل الاخرين لكل ما يقدم ودي حاجة كويسة شديد بتخليك تقدم اي شي بي اي شي والناس تقبلك ..

تحياتي يا ريس..
تخريمة :
امبارح جيت مبنى التعاوينة وما لميت فيك ..الله مرقك من عزومة غدا ربما تكلفك ال100 ريال ونيف..

الديماجوجى عمر

سلام وبعد التحية وكدا !

يا جوجى ياخ النوته مهمة ... و اى ى ى زول ما دارس مزيكا ما يفتح

خشمو بالله ؟؟ بعدين ليه لاتوجد نوتة القدام يان القدر الضربة دى شنو ؟


انت كمان يان دا قايلو علوية بطاطير؟ !!

دينا خالد :

Quote: يا جوجى ياخ النوته مهمة ...

الكلام ده كان قبل ما يطلع اختراع إسمو الموبايل والإكسل شييت ..
النوتة دي كانت زمان وانتي الصادقة ..
كنت بكتب فيها تلفونات الناس مع وصف لبعض بيوت الاصدقاء ولا بأس بي شخبطات أوهم بيها الجكس نظام الود شاعر وكده واذكر إنو اخر نوتة كنت كاتب فيها من ورا :
الحب ليس رواية شرقية بختامها يتزوج الأبطال ..
هو الإبحار دون سفينة والشعور بأن الوصول محال..
هو أن تظل على الأصابع رعشة وفي الشفاه المطبقات سؤال ..

ويبقى السؤال عنك يا ............... وعملت لي نقاط كده فاضية إضافة لي قلب مخروم ..
النقاط الفاضية دي عملت لي شغل جميل جداً بحيث إنها أخدت قيم في مجموعة عناصر كاملة لكل بت تفتح النوتة دي واقول ليها النقاط دي اسمك ..

Quote: و اى ى ى زول ما دارس مزيكا ما يفتح خشمو بالله ؟؟

طيب ممكن يفتح محل تركيب عطور؟

Quote: بعدين ليه لاتوجد نوتة القدام يان القدر الضربة دى شنو ؟

أسة في ذمتك معقولة بس تكون العند ياني دي نوتة العملا دكتور محمد الحسن ديك نوتة ؟
يعني اسة ياني بيكون كاتب فيها رقم موبايلو ؟
لحدي اسة حكاية رقم الموبايل الفي النوتة دي ما وقعت لي ..يعني الحنك شنو بالضبط ؟ اي زول عايز ليهو نوتة الرجاء الإتصال على هذا الرقم ..

Quote: علوية بطاطير؟ !!

لو سمحتي .. الأستاذة علوية بطاطير..

Quote: الديماجوجى

عُمر

عاين

موش في مرات كده بتكون عارف معنى الكلمة وبتتختا في ياتو سياق

لكن مابتكون قادر تشرحها لزول معناها شنو لو سألك منها ؟!!

طيب أها إيمو الإبنة الوحيدة ( الغتيتة) سألتني من الكلمة دي لما لقتني ( لي شلاقتي) فاتحة بوستك ده

أها قلت ليها أعملي لي عصير ليمون باااااااارد في الكوز التيفال داك وتعالي أشرحها ليك

وبما إني ماعارفة أشرحها ليها بشكل مبسط وهي قربت تخلص صواطة كوز الليمون فبالله قووووام وريني المصطلح ده معناه شنو ودخلو لي في جملة مفيدة قبل بتي تجي بكوز التيفال ملئ بالليمون المثلج .. ولو غلبك إستعين بعمك قوقل .. بس أسرع أختك موقفها حايكون حرج مع إيمو الغتيتة واللايوقة في آنِ وأحد

وتاني رسلتها تجيب مرقة جداد من سوبر ماركت البرنس وبعدين أشرحها ليها لما لقيتك إتاخرت

شوفي يانادية
كان الله قاسم ليك شرح من هسي

احسبي ساعتين ونص حتى تتوقعيه

الله يعين البنية على المراسيل

زول ساكت

Quote: الله يعين البنية على المراسيل

والله يعيني أنا من لياقتها الشافعة دي مابتنسى المشكلة ولو رسلتها مائة مرسال حاتلف وترجع تسألني


أنا إتخيل لي عمر حايم برة البوست ده ولا حردو عديل لأنو هو زاتو ماعارف المصطلح معناه شنو .. إنت برضو ماعارف ؟!!

نادية بت عتمان :

Quote: وريني المصطلح ده معناه شنو ودخلو لي في جملة مفيدة قبل بتي تجي بكوز التيفال ملئ بالليمون المثلج

أكل الديماجوجي النبق ..

بالمناسبة ذكرتيني بي حكاية الجملة المفيدة دي الأستاذ سأل ليهو طالب قال ليهو أدخل لي كلمة هطل في جملة مفيدة ..
قال ليهو لكن يا أستاذ هطل دي معناها شنو ؟
الأستاذ قال ليهو معناها نزل ..
الطالب قال ليهو :
هطل الولد من الشجرة ..


تخريمة :
أقترح عليك ترسلي البت العليفون تجيب ليك غبار ضب مسافر و كراع سحلية عزبا ..

غلطانة أنا البسألك ياديماجوجي يامكفائلي يابراغماتي ياعمر الفارق ( وش كيف كيف) !!

أمشي يا ما عندك سوء تفاهم ..

أمشي إنت يا الماعندك حنكة !!










عاجباني حنكة دي كيف

Quote: الأضان فيط ..إضنيني الكبار ديل ..

وطيب دا ما ياهو ناس ياجوج وماجوج, ذاتم

البجو آخر الزمن, قالو واحد فيهم اضانو

من شدة ما كبيرة,باليل بفرش جزء منها ينوم

فيهو والباقي بتغطى بيهو.

اذا فأنت ياجوجي وماجوجي
وما جاني وما جيتو

أسي موسيقى ياني الجبتها دي مش ايقاع دليب?

وكمان اظنو سارقا من اغنية مزيكة الحواري

حقت مصطفى.

يا عمر ..
البوست دا جاب ( حقه ) ولا لسع .. عشان دايرين نلم ( الكراسي ) ..!!

عمر الفاروق

مرحب بيك

قراءت لاحدهم دعوة صادقة لصاحب احد البوستات ( ان شاء الله ما يعتر ليك محمد اى سليمان ) ضحكت للمداخلة وقتها لا أدرى لماذا تذكرتها الان

ياخى بتنجض النقد نجاض قبورة ( صحى هو نجاض قبورة ولا أنا قشرت بالمثل دا ساكت )

بالجد إنتا قاري نقد ولا ما أنت بقاري

لانو شغلك نضيف يعنى ( عدل و مكاواة )

Quote: كنت بكتب فيها تلفونات الناس مع وصف لبعض بيوت الاصدقاء ولا بأس بي شخبطات أوهم بيها الجكس نظام الود شاعر وكده واذكر إنو اخر نوتة كنت كاتب فيها من ورا : الحب ليس رواية شرقية بختامها يتزوج الأبطال .. هو الإبحار دون سفينة والشعور بأن الوصول محال.. هو أن تظل على الأصابع رعشة وفي الشفاه المطبقات سؤال ..

الاخ الديماجوجي عملا الفاروق

ح ابدا ليك من الاخر واوريك اللياقه البتحبها دي حدها وين

نوته مابتعرف اوكي مافي مشكله

لكن اضانك السمعتا بيها الفنانين الكتار القلتهم فوق ديل

والعاوز تفرضا كمقياس استاندر علي اليشريه دي

مانبهتك اضانك دي ولا ايقاعك الداخلي ولا سماعك دا كلو

للشتاره والموسبقي المختله في بيوت الشعر الاوردتها فوق دي

ماتقول لي انو الزمن طال وانا نسيت الابيات الموضوع ماهو حفظ

ولا تقول لي غلطات مطبعيه لانو قريتا وليها يومين واتكررت مرتين

انه امر داخلي له علاقه مباشره باختلال الجرس الموسيقي الداخلي عندك

نزار قباني لو كتبا كده ماكان بقي نزار قباني

واليك التفاصيل

كتبت

الحب ليس روايه شرقيه بختامها يتزوج الابطال

الوزن التفعيلي

مستفعل متفاعل مستفعل متفاعل متفاعل متفاع

وحسب ابجديات الخليل بن احمد الفراهيدي

فالقصيده علي بحر الكامل بالتفصيل التالي


الحب لي مستفعل

س روايه متفاعل

شرقيه مستفعل

بختامها متفاعل

يتزوج ال متفاعل

ابطال متفاع


ثم كتبت بعده

هو الابحار دون سفينه والشعور بان الوصول محال

والصحيح حسب النص وموسيقاه الداخليه

لكنه الابحار دون سفينه وشعورنا ان الوصول محال

لكنه ال مستفعل

ابحاردو متفاعل

ن سفينه مستفعل

وشعورنا متفاعل

ان الوصو متفاعل

ل محال متفاع


كل صاحب جرس موسيقي معافي لايمكن ان يورد بيتاشعريا مختلا كما فعلت

بالعكس ان الخلل هنا يضرس صاحب الجرس الموسيقي السليم

وكتبت ايضا

هو ان تظل علي الاصابع رعشه وفي الجباه المطبقات سوال

والصحيح

هز ان تظل علي الاصابع رعشه وعلي الشفاه المطبقات سوال

صاحب الايقاع السليم لايمكن ان يكون لديه مثل هذا البيت مبلوعا

فدخول (في) بدل (علي) يجدث خللا كبيره لدي المتلقي صاحب الجرس السليم

خاصه في الشعر وان كان لا يوثر في النثر

عليه فالاخ الديماجوجي عمر الفاروق يدعي الحساسيه الفائقه كمتلقي وناقد

وهو ما استطيع ان ابصم بالعشره علي عدم وجوده وعلي انه مدعي ليس الا

سيدي الديماجوجي

حبوبتي حاجه زينب عطيه تحس بهذه الاوزان في الشعر

وتكتبه دون ان يدرسها احد ذلك

وتعرف القصيده الموزونه والمشتوره مجرد سماعها

اتعرف لماذا لانها حسها سليم

واذنها سليمه كما انها ليست مكابره

ولا ديماجوجيه

انك غير موهل ياصديقي للحكم علي اعمال الاخرين وتخليلها

ولا حتي اناشيد الروضه

عجبتك اغنيه تقول سمحه ماعجبتك تقول ما سمحه ماعجبتني

لكن تحليل وتمحيص ونقد سيجعلك اضحوكه لانو النقد لايتماشي مغ المكابره

ساورد هنا الاسياب النفسبه الحقيقيه في تقديري لكل مواقفك العدائيه تجاه بعض الاشياء

دون تبريرات مقنعه الا خفايا النفس وثقافه التكريه( من نشر الكراهيه) التي تريح اعصابك

ماعارف ليه ذكرتني مبارك البلال اللهم اجعلو خير

اقعد رايق

بجيك صادي












هذا مع محبتي

Quote: اقعد رايق

طارق الأمين :

Quote: ولا تقول لي غلطات مطبعيه

Quote: هز ان تظل علي الاصابع رعشه وعلي الشفاه المطبقات سوال

لو وريتني البيت الفوق ده من ياتو بحر من بحورك اكون شاكر ومقدر ويا ريت تختار واحد من البحور دي :
بحر ابيض..
طارق بحر..
بحراً هيلي انا ..

وما تقول لي إستعجلت وغلطة مطبعية وانا وانا لأنو كاتب من امبارح إنت ..
وما تقول لي( ز) جمب ( و) وأصبعي كبيير وبيضرب حرفين ياخ اقول ليك حاجة بلعتها دي وموافق ...لكن سبب وااااحد يخلّي (و) والحرف الثاني (ؤ) جمب بعض ماف !! واحد في الجريف شرق والتاني في الجريف غرب ..
يا حبيبنا المقصود وبإختصار كلامك القلتو بي خصوص الشعر والبحر وما ادراك ما الفيضان كلللو صاح وتصدق أو ما تصدق انا اكعب زول ممكن يحفظ قصائد وما حا اقول ليك نسيتا ولا الزمن طال لأنو إحتمال كبير جداً أكون من زمان بكتبا كده وقاشر بيها للجكس بي صورتها دي ..
يا صديق موضوع الكتابة الغلط والنجر وتبديل الكلمات ده لو راجعت لي مداخلات كتيييرة لي ورا بتلقاني ناجر لي حاجات طن لمن انت تستغرب بعوس الابري مع الحلو مر عااااادي..
لكن كعب انت الجيت في اللحظة دي تطرح لي نفسك مصحح لغوي وجبت ميزانك وشايل ليك وقيتين ورطل و 3 كيلو عشان توزن لي لكن ميزانك طلع ضارب يا قريبك ما عشان شي بس عشان إستعجلت وعشان موهت القضية الاساسية وعملت ليك كلمة حق واردت بيها باطل ..

Quote: حبوبتي حاجه زينب عطيه تحس بهذه الاوزان في الشعر وتكتبه دون ان يدرسها احد ذلك وتعرف القصيده الموزونه والمشتوره مجرد سماعها اتعرف لماذا لانها حسها سليم واذنها سليمه كما انها ليست مكابره ولا ديماجوجيه

عليه وبكل بساطة أتمنى منك يا طارق تجيب لينا رأي حبوبتك عن أغنية "بلداً هيلي انا" وانسانا من دكتورك ابو موبايل في النوتة ده ..
بالمناسبة برضو قول لي حبوبتك إنك كتبت "سوال" بدل "سؤال" فهل ده يا حبوبة أشتر ولا عاااادي ممكن تبلعيها ؟

Quote: عجبتك اغنيه تقول سمحه ماعجبتك تقول ما سمحه ماعجبتني

المشكلة إنو انا الأغنية عجبتني وسمحة وأيوووووووووو شي (على قول السودانيين) لكن بس انا قلت اللحن مسروق دي فيها حاجة دي؟

Quote: ساورد هنا الاسياب النفسبه الحقيقيه في تقديري لكل مواقفك العدائيه تجاه بعض الاشياء

وانا حا أقرا أفكارك وأقول ليك انت عايز تكتب شنو وبرضو ممكن تضيفها لي الحاسة السابعة عندي لأنو إنتو يا قوم بني سودان دراسة نفسياتكم ساااهلة وقراية تفكيركم وعقلكم الباطن أسهل ..
حا تجي وبي كل بساطة يا طارق تقول عمر الفاروق خلط ما بين طارق الأمين ملحن بلداً هيلي انا وبين طارق الأمين صاحب الصراع العنيف مع صلاح إدريس ..
عمر الفاروق هلالابي مرضااان وكورنجي وصلاح إدريس رئيس نادي الهلال وما بعيد كمان يكون عمر الفاروق بيصفي في حسابات تراكمات مشاكل صلاح ادريس وطارق الأمين عن طريق الزوبعة العاملها دي !!!!
حلو الكلام يا مان ؟
بالرغم من إنو ده إفتراض مني ساي وتأويل قابل للخطأ وقابل للصواب وما كان محتاج تبرير لكن يا قريبك اقول ليك وبكل إختصار راجع الأرشيف بتاعي وشوف عمر الفاروق كاتب كم بوست عن صلاح إدريس لو لقيت فيهو كلمة إيجابية وااااحدة عن الرجل تعال حاسبني هنا ..تعرف يا مان في كل مرة بسمع أو بشاهد حاجة عن صلاح إدريس قاعدة تتملكني رغبة إنو أمشي اضاربو عشان انا بحب الهلال وصلاح ادريس ده بيعامل الهلال زيو زي اي شقة او ممتلكات من ممتلكاتو ...
يا عمك انا بحترم رئاسة الهلال ككرسي وبكره صلاح ادريس الشخصية الإستبدادية وصدقني طول عمري ما اتوقع اني انحاز ليهو مالم يكون الشأن هلالي بحت ..
وقع ليك ولا اعيدو ليك (أو كما تقول نفيسة بابور)..
يبقا يا عمك لو ده كرتك شوف غيرو لأنك غلطان ..والله غلطان يا طراق..

Quote: ماعارف ليه ذكرتني مبارك البلال اللهم اجعلو خير

لأنك لسة شايفني بي منظار مشاكلك مع الدار وصلاح إدريس عبر بوابة نانسي ومفتكر إني متأثر بي الحاجات دي ..
لكن وانت الصادق يا طارق الكلام ما عندو أييييييي علاقة بي البلح(أو كما يقول عادل امام)..

نرجع لي موضوعنا الأساسي (او كما قيل في ركن النقاش بجامعة الخرطوم - شمبات)..

معروف سند:

Quote: وطيب دا ما ياهو ناس ياجوج وماجوج, ذاتم البجو آخر الزمن,

عشان كده يا قريبك حسّن أعمالك كلها كم كده والمسيح الدجال يظهر ..
والله بيني وبينك مع صورتك الجديدة قلبي أكلني وبقيت اعاين في عينك الشمال

نورسنا الحزين :

Quote: بالجد إنتا قاري نقد ولا ما أنت بقاري

وبحسب بحر طارق (ده شقيق جبل طارق) فمفروض تقول لي :
بالجد إنتا قاري نقد ولا ما قاري ) لأنها على وزن مستفعل متفاعل فعلول فعلل فاعل ..
وصيغتك دي بتدخلنا في الغار وتعيدنا للعهد الأول من الإسلام ..

يا زول قراية شنو النقد ده داير ليهو قراية مش النقد ده نبز بس؟؟ومشاترة ساي؟؟ وعجبتك عجبتك ما عجبتك تقفل قدومك ؟
تحياتي ...

الديماجوجي عمر الفاروق


الخطأ المطبعي لم يلغي الجرس الموسيقي كما حدث عندك هاك

الوزن رغم الزاي بدل الواو وغياب الهمزه

هز أن تظ مستفعل

ل علي الاصا منفاعل

بع رعشه مستفعل

وعلي الشفا متفاعل

هي المطبقا متفاعل

ت سوال متفاع


لا اتحدث عن الاخطاْء المطبعيه

بطل لف ودوران

حتي تغير الحروف في نقلي لم ينفي سلامه الجرس الموسيقي

اتحدث عن امر داخلي عميق وشديد الدقه وواضح

ان كنت تعرفه وتتسفسط فانها مصيبه

وان كنت لاتعرفه او لم تفهمه فالمصيبه اكبر

وانا ساتوفر لفضح الوهمه الابداعيه العندك دي

كما عند كابو والبلال وصلاح ادريس

وبدات منذ مده اعتقد ان هذا جزء من رسالتي

فالذي يريد ان يبني لابد له اولا من تنظيف المكان

وطرد المتطفلين النائمين في المكان المراد بناءه

نائمين علي العسل دون وجه حق ودون وجه علم او معرفه او موهبه

اما بالمجامله من الناس حتي تدلعو وانتفخو بالدلع ومسكتن الوهمه

او تخويف الناس بالعنف اللفظي لقله الحياء عندهم

او لدوافع حب الشهره والبقاء في الاضواء باي سبب

او اسرافا وتبديدا لمال لم يتعبو في جنيه

انه جزء من الخواء الروحي والمعرفي والانساني

غالبا ما تشعله الغيره ولسان الحال يقول

نعم انا لم اتبوأ مركزا في الوجدان كبيرا عند العقل والوجدان الجمعي للناس

لكن من فعل ذلك لم يفعله لانه اشطر مني

لا لالالالالالالالالالالالالالالالالالالالالالالالالالالالالالالالالالالالالالا هذا امر يخيف امثالكم

والصحيح عندكم ان فلانا تفوق لكن لانه لص او ليس له اخلاق او انه

ارتضي لنفسه شيئا لا ارتضيه انا

شخصيه اكلاشيه معروفه نموذج قديم اضر بالبلاد والعباد في كافه اوجه الحياه

في السياسه والثقافه والرياضه والفنون

لا تتورع في استخدام اساليب الاثاره والفتن من امثال جلباب طارق الامين

اي جلباب هذا يارجل واين هو هذا الجلباب في قصيده يحيا فضل الله التي لحنها ضياء ميرغني

قبل ان اعرف نانسي او التقي بها اصلا واين جلبابي يارجل ايضا

في شعر محجوب الذي عالجه شمت محمد نور بالالحان اين جلبابي في اغنيه كرومه والكحلاوي

كل مافي الامر انها استمعت لاغنيه من كلماتي وطلبت اداءها هي لا انا ووافقت بناء علي رغبتها

انه القاء الكلام هكذا لاثاره الضجيج من تركيبه نفسيه معروفه مدرسه اولاد البلال ونموذجهم في الصحافه

حتي ايرادك هنا لعباره ( طارق الامين المطرطش) خارج صياغها الذي ذكرت فيه اعتبره سئ النيه

وسيكون ردك الساذج المعلب ( انت ماقلت كده في البوست البي هناك) يالبؤس الفكره عندك وسذاجتها

طيب انا اقول مطرطش انت لا ماتقول رايك شنو يعني اسي انت قلت انك كنت بتسرق اعمال السنه من زملانك

هل هذا يناسب ان اطلق عليك مثلا الاخ الحرامي عمر الفاروق؟

بطل استهبال واعتذر لي عن ابراد الحديث خارج صياغ النكته وفورا

وقد قيل قديما

ووضع الندي في موضع السيف مضر كوضع السيف في موضع الندي

او لكل مقام مقال

وللقراء الاعزاء الذين قد يدهشهم اسلوب مواجهتي هذا والذين لم يتعودو مني

الا الحديث المرح والبعد عن المواجهات اقول لهم

ان امثال عمر الفاروق ومدرسه صحافه اولاد البلال هم من الذين يظنون ان الصمت عنهم خوف

وضعف حجه وسكتو ليك ويسخرون من الاخرين تهكما كما لايطيقون الحوار المنطقي ويكرهون العلم والمعرفه

كمثل من يدعي ان اذنه موسيقيه ثم يسخر من ايراد النوته الموسيقيه او علم البحور في الشعر عند الخليل ابن احمد

سيظل اي ديماجوجي يكره العلم والمعرفه والموهبه لانها ببساطه تكشف الخواء والسطحيه والادعاء

ةالديماجوجي الفاخر عمر الفاروق الذي يحلل الظواهر الفنيه في حياتنا لم يستطع ان ينطق بكلمه في الحان

الملحن صاحب الحنبوكه صلاح ادريس اسي في ذمتكم ما هي الظاهره الادعي للنقاش غناء شروق ونانسي ام غناء صلاح ادريس

والفاروق الذي لم يترك حتي علويه بطاطير في نقده الجربندي الحاقد الهدام صعب عليه هذا الناقد الفز ان ينطق

بكلمه في الحان الرجل صاحب الحنبوكه العظيم شد حيلك الرجل اصبح مغنيا ايضا

انهم قوم اذا لحن فيهم الشريف تركوه واذا لحن فيهم الضعيف اقامو عليه الحد

ساعود




واستطيع ان اكتب لك لسته باسماء من سيهبون لنجدتك من الصحفيين من اصحاب عداد الدفع المقدم

ستراهم هنا قريبا بجوارك

وانكرب فشلاقتك هذه المره قد رمتك في الطريق الذي لايؤدي الي شروق ابو الناس

Quote: وعموما المتابع لرحلة طارق اللحنية بيلاحظ إنو طارق بدا وفي كتيير من الاحيان بتقليد الحان معروفة سواء كانت هذه الالحان الحان الشارع(الاغاني الخفيفة المنسوبة للتراث جزافا) والألحان العربية مقلداً للفنانين العرب في قالب فكاهي.. ده ما بيمنع انو طارق عندو افكار لحنية جميلة جدا وللحد البعيد وفيها نوع من الخيال البيخاطب الاذن الموسيقية السودانية خصوصا العمية منها .. طارق الامين بالرغم من غنه شخص مبدع ومحترف في مجال الكوميديا إلا أنني أصنفه في خانة غير المحترفين في كتابة الاشعار وتأليف الالحان الإحترافية ..

عمر الفاروق سلام


حقيقة اعشق الموسيقى والالحان واصنف نفسي مستمع محترف
واستطيع ان اصنف الاعمال بعقل وروح فى تزامن يفوق حد
الوصف.

لا الاخ طارق ولا اي متخصص يستطيع ان ينفي ما ذهبت اليه
كون الاغنية محقونة من شريان ياني (With Attraction).
تعرف دي انا ما بسميها سرقة بس دائما بقول نحن بحاجة
لمدد وبعتبر طارق كان شجاع اكثر من متخصصين سودانيين
كثيرين مع احترامي الشديد لهم،دخل التحدي
وكان جرئ لحد الدهشة. واعتقد ان ماساعده على ذلك
ما ذكرته فى تقيمك لرحلة الاخ طارق الامين مع التلحين(خاصة
ان اعامله لم تصنف بمعزل عن القالب الكوميدي الذي درج
عليه به من قبل)كونه كان مقلدا لاعمال لحنية ولم يكن ملحن
محترفا.
اخي عمر
رحلة طارق الامين كنت اشك فى كونها قد تثمر عن روعة كهذه
ولكن قد حدث ومثل ما قلت لك فى اول حديثي نحن بحاجة لمدد
موسيقي لحني شخصيا لاول مرة استمع لاغنية سودانية جديدة وتملأ روحي
هكذا منذ سنين. وفي النهاية تبقى
بلداً هيلي انا
an ARK
ONE ACT OF RANDOM KINDNESS AT A TIME
كسر رتابة نعيشها فى اللحن والكلمة منذ حين

اتمنى ان تتكرر حتى ولو بمدد تاني التواصل جميل
وفيه روعة.والرفقة حلوة يا عمر

تحياتي

السنجك

المطرطش طارق الأمين :
وبالمناسبة لو جينا بعدين نحتكم للقضاء انا بقول ليهم الزول ده برااااهو قال مطرطش وما اظن انت البتحدد فلان يقولا ليك وفرتكان ما يقولا ليك !!!
والله بالجد زكرتني اولاد المغتربين في الحتة دي ..الواحد يجيب الكورة ويقول لي اولاد الحلة هيثم يلعب وعوض يلعب لكن اللمين ما يلعب والطاهر ما يلعب !!

Quote: وانا ساتوفر لفضح الوهمه الابداعيه العندك دي كما عند كابو والبلال وصلاح ادريس

طالما إنها وهمة فصدقني ما حتقدر تفضحا لأنو انا اسسسة دي وعلى رأس الأشهاد بقول ليك إنو فعلاً دي وهمة ووهمة في شكل كيس مقدود كمان ..
قصرت معاك ؟
بالمناسبة يا طارق المطرطش بي نفس المعيار البتشوف بيهو اللستة الفوق ديك موهومة إبداعياً كمان ممكن تضيف نفسك معاهم لأنو برضك موهوم إبداعياً في نظر ناس تانيين ..
اللستة الكتبتها فوق دي انا عندي فيها راي وكتبتو زمااان في جريدة هبشت كابو وهبشت صلاح ادريس وراي فيهم زي رايك ده تصدق ؟؟
لكن ما كنت خاتيك في اللستة معاهم بس اسة لمن قريت كلامك المطرطش ده فكرت جادي اضيفك ليهم ..
والقصة ما رد فعل بقدر ما هو وضوح رؤيا إمكن كانت ضبابية وكنا بنشوفك بي منظار كما تكتب شركة التايوتا (الأبعاد في المرايا ليست حقيقية)..

Quote: وبدات منذ مده اعتقد ان هذا جزء من رسالتي فالذي يريد ان يبني لابد له اولا من تنظيف المكان وطرد المتطفلين النائمين في المكان المراد بناءه نائمين علي العسل دون وجه حق ودون وجه علم او معرفه او موهبه اما بالمجامله من الناس حتي تدلعو وانتفخو بالدلع ومسكتن الوهمه او تخويف الناس بالعنف اللفظي لقله الحياء عندهم او لدوافع حب الشهره والبقاء في الاضواء باي سبب او اسرافا وتبديدا لمال لم يتعبو في جنيه

تصدق يا طارق المطرطش ما لقيت اي وصفة بتشبهني في الوصفات دي ؟ فلا انا مدلع ولا انام على العسل إمكن أكون منتفخ بعض الشئ بسبب كرش ودهون عشان بحب الرز والبيبسي والبطاطس المحمر وما مشهور او عندي دوافعا واما الأضواء فيكفي إني قاعد في السعودية ما حصل الكهربا قطعت وطوااااااالي في حالة نور ..
لكن كان ممكن تضيف حاجة تانية وتقول إنك جايي تنضف الناس الحا تترصد سرقاتك اللحنية و والحا تقعد ليك في حلقك شوكة حوت لا تتبلع لا بتفوت ..انت هنا طارق الامين زيك زي تراجي وااااحد وزيك زي عبد الرازق الطالب وزييك زي اساسي تاخد على راسك زي الما حصل شي ..
طارق الأمين بتاع الخيم الرمضانية وإعجاب الجكس وتوقيعات الأوتوغراف ده هنااااك يا قريبك في المواصلات وفي السوق العربي لمن زول يدفع ليك ويقول ليك ما تديو ..

Quote: انه جزء من الخواء الروحي والمعرفي والانساني غالبا ما تشعله الغيره ولسان الحال يقول نعم انا لم اتبوأ مركزا في الوجدان كبيرا عند العقل والوجدان الجمعي للناس لكن من فعل ذلك لم يفعله لانه اشطر مني

تعرف يا قريبك عاجباني فيك حكاية الغيرة دي وكما تقول الست أم كلثوم (جرّب نار الغيرة) ..طارق انت لسة ما وصلت قلوب كل الشعب السوداني ..نعم وصلت مرحلة شهرة نسبية لكن صدقني ممكن عادي جدا تمشي ليك في مجتمع وتقعد زيك زي باقي المعازيم يفطوك في العشا ما يتنسوا معاك كده يعني ..
مرحلة الغيرة لسة بدري عليك لكن انت ماشي صاح في طريق الشهرة وأهو بديت بي النكتة ونطيت للمنلوج وخشيت للتلحين واسة بقيت منتج ومحتكر ..

Quote: والصحيح عندكم ان فلانا تفوق لكن لانه لص

طارق انت اشتهرت قبل كده ياخ ولا تزعل وإن شاء الله الشهرة تضوي ليك ولمن تمشي تشتري خروف الضحية يقوم سيد الخرفان يقول ليك حررررم ما بتدفع مش انت طارق ؟؟
ما ياها دي الشهرة في السودان ؟ إستغلال للشعب المسكين وتمليح الأمور وتقديم التساهيل !!!
بخيتة وسعيدة عليك يا كابتن ..
لكن يا طارق تزعل تتطرشق تفنجط تنطط تكورك تجعر تزبد ترغي إنت سرقت لحن الأغنية بتاعت "بلداً هيلي انا"..
ووالله لو جبت لي قوندراني نوتات (وفي رواية نوّت) برضو ما بقتنع ليك ولا انت جوة نفسك حا تقتنع ..

Quote: لا تتورع في استخدام اساليب الاثاره والفتن من امثال جلباب طارق الامين اي جلباب هذا يارجل واين هو هذا الجلباب في قصيده يحيا فضل الله التي لحنها ضياء ميرغني قبل ان اعرف نانسي او التقي بها اصلا واين جلبابي يارجل ايضا في شعر محجوب الذي عالجه شمت محمد نور بالالحان اين جلبابي في اغنيه كرومه والكحلاوي كل مافي الامر انها استمعت لاغنيه من كلماتي وطلبت اداءها هي لا انا ووافقت بناء علي رغبتها

طارق ياخ انت قايل هنا في قمبور !!!!!
يا اخوي ورع شنو وإثارة منو ؟؟
الشغلانة واضحة وما دايرة درس عصر ..وما عيب والله يا طارق ..
الرحبانية ديل إحتووا فيروز وما ناكرنها ..
عبد الوهاب بعد لقاء السحاب حاول إحتواء الست ..
يا زول حقك والله ما تزعل ..
ما تشخصن القضايا يا طارق ..
وما تكضب على نفسك ..
غنت طارح نفسك متعهد حفلان نانسي عجاج وانا بالرغم من اني بعيد من السودان لكن ما بتخفى علي حاجة زي دي لأنك يا قريب مظهرها عااااااملة ..لكن ما عارف ليي انت ناكرها !!
العالم كلو شغال بي الإحتكارية وكتير من الفنانين في العالم بيكونوا ممسوكين من رقبتهم بي واسطة الناس ديل ..
الشغلانة أرزاق يا طارق وسيبنا من وهمة الفن والرعايا وما ادراك ما الصوت الجميل وخدمة الفن ..
ويا زول ربنا يزيد ويبارك وجلبابك ده ما تكون فيهو نانسي بس جيب تانيين واحتكر جيب حرم جيب ندى القلعة جيب محمود جيب البتجيبو لكن ما تنكر يا طارق عليييك الله ما تنكر ..
ذكرتني نكتة الحمار جا هارب من الصعايدة قالوا ليهو مالك جيت هنا قال ليهم والله في الصعيد الجماعة ديل قاعدين يضبحوا الجداااد ..
قالوا ليهو طيب وإنت مالك ؟
قال ليهم : البيقنع الناس ديل إني ما جدااادة شنو ؟

وقع ليك يا عمك ؟؟؟
مبدئياً كده انا إقتنعت وااااااادي نانسي نمرقا من جلبابك ..إنت مقتنع ؟

Quote: يعني اسي انت قلت انك كنت بتسرق اعمال السنه من زملانك هل هذا يناسب ان اطلق عليك مثلا الاخ الحرامي عمر الفاروق؟

أكييييد ..وأيووووووووة كمان ..حقك والله ..
ما عندها تعريف غير كده ..
عايز تغلفا وتقول عليها مساعدة زملاء والله ما بلومك ..عايز تسميها تتريس برضو ما بلومك لكن في النهاية سرقة يا عمك ..والله سرقة ..
ابقا شجاع زيينا كده وقول انا سرقت اللحن ..غلفا طيب وقول انا عجبني اللحن وسمكرتو ..غشنا حبببة وقول نفس المدرسة اللحنية مع اختلاف في بعض الاشياء ..
لكن تجيب لي نوتة فيها رقم موبايل زيها زي كروت الطباخين البيعملوا العشا وتلاقي ارقامهم تحت البيضة والعيشة لأ يا اللخو يفتح الله ما بتخارج معانا والله ..

Quote: ان امثال عمر الفاروق ومدرسه صحافه اولاد البلال هم من الذين يظنون ان الصمت عنهم خوف وضعف حجه وسكتو ليك ويسخرون من الاخرين تهكما كما لايطيقون الحوار المنطقي ويكرهون العلم والمعرفه

طارق قول بسم الله ..
تصدق إنت الخسران في المعركة دي ..ولو أسة شهدنا أي إتنين حا يقولوا إنت الغلطان لأنو انا بديت معاك بحسن نية لكن وبما إنك قارئ الكف فجاي تبرز عضلاتك وتقطع لساني من لغاليغو (بالله يا شباب اي زول يجي داخل البوست ده يعمل حساب لغلوغو )..
اموت واعرف انا سخرت منك وين يا طارق ؟
ياخ انا قلت انت سرقت لحن ..فوين السخرية هنا ؟ سميهو إتهام سميهو حوار سميهو إختلفا وجهات نظر حاد لكن ياخ ما ليك الحق تقول سخرية !!

Quote: كمثل من يدعي ان اذنه موسيقيه ثم يسخر من ايراد النوته الموسيقيه او علم البحور في الشعر عند الخليل ابن احمد سيظل اي ديماجوجي يكره العلم والمعرفه والموهبه لانها ببساطه تكشف الخواء والسطحيه والادعاء

ياخ انا خاوي وسطحي ومدّعي كمان لكن برررررضو كلامي صاح اللحن مسرووووق يا ود الأمين ..والله مسروق ..
إعترف وانا بعتقك ..وده طرفي منك والموضوع بسيط ..لكن ما تلاوي وتجي تردم ليك معلقات وبحور وأنهار وما ادراك ما خور امبدة ..

Quote: واستطيع ان اكتب لك لسته باسماء من سيهبون لنجدتك من الصحفيين من اصحاب عداد الدفع المقدم ستراهم هنا قريبا بجوارك

والله ما بتعرفني كويس يا طارق ..
صحي مطرطش ..
عليييك الله لو عارفهم الصحفيين ديل قول ليهم عمر الفاروق قال ليكم النبي فوووووووقكم كان تقيفوا معاهو ..
يعرررررررض ليكم كان دعمتوهو ..
انا وانت بس يا قريبك راس بي راس والفورة مليون ..
وصدقني بعد شويةحا يجوك انت ناس ويشبكوك يا طارق ما تنزل للمستوى ده ويا طراق انت هرم ويا طارق انت ابو الهول ويا طارق انت مشهور ويا طارق اعمل حساب شهرتك الخروف المجاني بيضيع منك ..

Quote: وانكرب فشلاقتك هذه المره قد رمتك في الطريق الذي لايؤدي الي شروق ابو الناس

هيييييييييييييييييييييييييييييييع ..مكروووووووووب والله الحبببببة ما بتيجين ..
وساككني كويس صدقني صلعتك بتقوم ..

تخريمة :
لم أجتهد في معرفة معنى الديماجوجي لكن جاني إحساس إنو معناها مطرطش عشان كده يا طارق تجد كل ديماجوييياييا واحدة تقابلها طرطاااااشايا ..وحدة ..
كلّ لك خيراراراراراراراراراراراااااااااااايا وححددددة بس ..
إنت ما بتقيش لييييه ؟؟ مش تبأ تييييييييييقي..

أستاذ عمر

وكل الحلوين اللي معاه


والله قلنا نسلّم بس

لأنو للأسف جهازي صورة بس ما فيه صوت

لكن كلامكم لذيذ والله بنقّط عسل؛

بس رغم شرحك الكتير أنا ما عرفت الفرق بين

الديماجوجية


وبين البراقماتية

ممكن تشرح لي يا استاذ انت يا اللّي بتحب المدرسين

شكراً على هذا البوست الجميل

الذي سندمن قراءته وبي مهلة

السنجك يا حبيب:

Quote: تعرف دي انا ما بسميها سرقة بس دائما بقول نحن بحاجة لمدد وبعتبر طارق كان شجاع اكثر من متخصصين سودانيين كثيرين مع احترامي الشديد لهم،دخل التحدي

ياخ أول حاجة بحييك كونك جبتها مباشرة وبدون تغليف إنو كلامي صاح وده كان الغرض يا السنجك ودي الحاجة الكنت عايز طارق يفهما ويجي يقولها وبعد داك يجي يورينا إنو دي فلسفة منو إنو دي شجاعة وتجربة جديدة تستند على افكار ناس هو سمكرها ..
لكن وإنت الصادق زولك ده قال الكلام ده من بنات أفكارو وأفكار النوتة الموسيقية المدعمة بي رقم موبايل..

Quote: وكان جرئ لحد الدهشة.

جددددددددددددددددددددددددداً ..
وزي ما جاء في المثل اليوناني القديم :
صحيح الإستحوا ماتوا ..

تحياتي ليك يا زول يا حلو ..

Quote: ولو ما رجع بنجر ليك فيها معلقه تنسيهو العلم الموسيقي الواسع الفي راسو دا واذا ما ارعوي بعتزل والله الاعتزال يشمو قدحه المره دي

_
النوتة الموسيقي لـ (بلداً هيلي أنا) مقارنة بـ (يامولاي بشكيلكـ شكاي و غلبي)

فاتني أن أشيد بذكاء المطرطش طارق الأمين ووجوده المكثف هذه الأيام بالمنبر وتزامناً مع إنتاجه لشريط رفقة ودي نظرة تسويقية عالية جداً ماف زول جايب خبرا طبعاً والناس تشيل وتطبل وتشيل وتصفق وتشيل وتداخل ..
والله يا طارق ياخ إنت حبابك ..
بالجد انا مبسوط منك بسطة الشريف لي ندى القلعة ..
واصل يا قريبك وإنت الكسبان ..وسيبنا من العزف على وتر الفن رسالة وما ادراك ما تنظيف الساحة من الرجرجة والدهماء ..
إنت صاح ..

تخريمة :
حاولت الإتصال على الرقم الموجود في النوتة عشان عندي بعض الأغاني العايزة أنوتها لكن بتجيني الدوائر مشغولة ..

انتو طارق الامين دا فقد المنطق مالو ..

..
..

يا بكري حقه تدي البلال وصلاح ادريس باصورد هنا ..
عشان يردوا علي الزول دا ..
لانه بالجد الموضوع دا ما عندو علاقة بالبلح ..!!

حميدة يا صديقي:

Quote: انتو طارق الامين دا فقد المنطق مالو ..

حاجة أستغرب مش كده ؟
لكن هو ماااااااااااااااااااااااالو ..؟