Post: #1
Title: كفرت بصور اعضاء المنبر بما فيهم نفسي..
Author: عمر الفاروق
Date: 01-16-2007, 11:07 AM
من اول يوم سجلت في المنبر وبقيت اتواصل مع الناس من خلف الكيبورد(رجال خلف الكيبورد) وانا ارسم شخصية لكل متداخل أو متداخلة..
ومشيت لي ابعد من كده وبقيت اتخيل الزول البيرد علي أسة لابس شنو وفي اللحظة دي شكلو كيف وعامل كيف أو عاملة كيف..
ناس كنت راسم ليهم لوحة جميلة ووجه صبوح ووسامة فوق العادة وجكس نضيف من إصدارة هيفاء وهبي واليسا وزينب العسكري..
وناس تانيين بقرررررب اخت ليهم صورة مصاصي الدماء وشخصية دنجل وفنجاط وتنقو وزوجته العازة ..
في بادئ الأمر الناس كانت كاشّة من وضع صورها على المنبر ربما لشحتفة الناس وتشويقهم وذهبوا لأبعد من ذلك حتى صار الواحد من هؤلاء لو ذكر له شخص إسمه الحقيقي لوصفه بالجاسوسية
وكأنه ينادى خارج المنبر بنفس هذا الإسم..
فجأة كده ظهرت ليك موضة الشجاعة الأدبية والهاشمية التي شالت معظم الأعضاء والصور بقت تطاقش شي احمر وشي اصفر وشي سادة وشي بي لبن
وأخيراً زالت عني كل التخيلات الكنت ظالم بيها الناس دي ساي ..
واخيراً قلت في سري طيب ما أهو نحن ناس سمحين خلاص وبما إنو سودانيز يمثل كل السودانيين (كما يقول اخوانا المناضلون) فده معناهو إنو كل السودانيين سمحين ..
وكدي خلونا من حنك السوداني سمح بي طبعو وسمح بي دواخلو فانا هنا اقصد سماحة الخلقة ...
اي والله طلعنا سمحين خلقة عدييييييل كده بي صورنا البنختها هنا دي ..
الواحد مننا ينكت ويبحت يمنة ويسرة(ما يسرى بتاعت عادل امام) ويقلب الارشيف ويمشي يسأل أمو يا أمي انا ما عندي صورة لمن كنت صغير؟؟؟
يا حبوبة ما عندك لي صورة لمن كان عندي شعر؟؟؟
يا عمو تتزكر الصورة الصورتوني ليها لمن جيناكم زيارة وطلعت صورة سمحة ؟؟؟
يا اريج وين الصورة الاتصورتها معاكم لمن جيتكم في الجامعة ؟؟؟
يا هاني ياخ صور رحلة وارسو ديك وين ؟؟؟
يا داليا عليك الله رسلي لي صورتي معاك ووشي ما كانت ظاهرة فيهو الحبوب..
يا سوزي وين صورتي الكنت لابسة فيها اسكيرت بيجي وبولزة بودي كبدي وكاوية فيها شعري...؟
ويتم تجميع حصيلة من الصور بعد عناء طويل وانتظار يدوم ويدوم ويدوم كما نظافة "صابون ايريل"..
العجيب في الأمر إنو الواحد بيكون عندو في دولابو أو الأبوم بتاعو اكتر من خرتومية صورة ليهو لكن ياباها مملحة ويسكها قروض..
فمعظم صورو الخاصة بتكون من النوع الفيهو شعرو منكوش أو مغمض عيونو " ضارب الكباب" أو لابس ليهو شارلستون والكرعين غبش..
أما اخوات نسيبة فحدث ولا حرج ..
الألبوم يكون فيهو الصورة المن النوع البيكون جضوما داخلة لي جوووووة وضعيييييييييفة ولابسة ليها فستان احمر وحزام ابيض في الخصر ..
وأخيراً وبعد جهد جهيد كل واحد مننا قدر يلم ليهو في صورة سمحة شديد تجمع كل مواصفات الوسامة وتترك كل الانطباعات عن الترطيبة والروقة والوجاهة والوسامة والشرط للأرض
إضاءة تغنيك عن استخدام الفير اند لوفلي والكيلي المكسور بي ديانة ..
ادوب فوتوشوب يشيل كل الكلف والنمش وحب الشباب والتجاعيد ..
بدلة اجبرك ارباب عملك بلبسها عنوة وكرفتة تشحط رقبتك كما ينشحط الديك..
أو جو أوروبي مع خضرة وماء ووجه حسن ...
برمودة وسايد كاب ونضارة وجدت نفسك تلبسها مجاراة لموضة البلد الذي تقيم فيه..
كاميرا ديجيتال تكفي لإخراج إسماعيل يس يشابه رشدي اباظة ..
ويا مواقع تحميل الصور جاك بلاء..
ويا اللينك الحا احوم بيك كل الأسفير صدددددددددددددقني تعبت معاي...
في المسنجر زول قال ليك عايز اشوفك :
كوبي بيست للينك ..
في بوست واحد قال ليك يا ريت صورتك جميلة زي كتابتك :
كوبي بيست للينك ..
جكسوية لامست حروفك وتراً حساساً في قيثارة قلبها:
كوبي بيست للينك ..
واحد قال ليكي يا فلانة جمال هذه الحروف لابد ان تكون صاحبته انيقة ورقيقة :
كوبي بيست للينك ..
وقووووووووووووووووووووومي كده يا الصدفة لميني في معظم البورداب ..
العلاقة ما بين الصورة والشخصية زي العلاقة بين جوليا روبرتس وكبري الفتيحاب..
الزول الأصفر في الصورة يخش ليك في دور الحربوية وتلقاهو بقا ليك اخدر...
الزول الشعرو ناعم وحدّو العينين ينافس ود اللمين في الصلعة إن لم يزاحم كوجاك ..
الرشيق وانيق تلقاهو لازي ليهو كرش مترين وتخاف عليه من القيصرية في اي وقت ..
الانيقة ولبيسة تفاجأ بيها جايكم الاحتفال بي اسكيرت بنفسجي وبلوزة حمرا وشبشب اصفر..
صاحبات الحمية واكلات الخضروات تلقى العيون مدفنة والمشي الهوينة كما يمشي الوجى الوحل..
كفرت ساداتي بصور الاعضاء وفصلت التعامل بين الشخصيات الاسفيرية والشخصيات الحقيقية في حدود الخلقة وليس الاخلاق ..
يعني فلان الخاتي صورتو في المنتدى زول والبلاقيهو برة زول تاني ...
وكذلك كفرت بصورتي التي وضعتها يوما ما في المنتدى فهي كانت من الزمن الجميل والنسخة التي احتفظ بها كتبت فيها من الخلف:
ايام ما كنت جاهل ما بعرف الهموم .. كأني ما عرفت السعادة ما بتدوم ..
وليااااااااااااااااااالي يا ليااااااااااااااااااالي لياااااااااااالي العودة تااااااااااااااااااااااااااني...
هاااااااااااااااااا فووووووووووووووووووووق..تمااااااااااااااااام ..تمااااااااااااااااام ..حتتتتتتتتتتتتتتتتتي ..
تخريمة :
حسين ملاسي هو الشخص الوحيد من الذين قابلتهم وصورته تشبه شكله. ..
وكذلك ابراهيم بقال..
|
Post: #2
Title: Re: كفرت بصور اعضاء المنبر بما فيهم نفسي..
Author: عمر الفاروق
Date: 01-16-2007, 11:34 AM
Parent: #1
|
Post: #4
Title: Re: كفرت بصور اعضاء المنبر بما فيهم نفسي..
Author: abuguta
Date: 01-16-2007, 11:48 AM
Parent: #2
صورتى كيف لما قابلتنى؟؟؟
انت نفس صورتك...
تمبس نفس صورتو..معتصم نفس صورتو ونفس القميص كمان
ود الطالب ..نفس الصورتة..تانى مييييين
دكين نفس الصورة..ونفس الهيلمانة..
|
Post: #3
Title: Re: كفرت بصور اعضاء المنبر بما فيهم نفسي..
Author: waleed500
Date: 01-16-2007, 11:48 AM
Parent: #1
ده بوست صباحى رائع
فعلا ملاسى هو نفس الشكل وبقال كمان
ناذر بيختلف بعض الشى لكن البقيه حدث ولا حرج
اختلاف فى الخلقه والاخلاق الخلقه مش ولا بد
لكن الاخلاق اروع بكتير مما هم عليه فى البورد
بس احب اطمنك صورتى فى الواقع احلى بكتير من فى المنبر
حتى اسال فيصل نوبى ......
|
Post: #5
Title: Re: كفرت بصور اعضاء المنبر بما فيهم نفسي..
Author: عاصم ابوبكر حامد
Date: 01-16-2007, 11:54 AM
Parent: #1
اخونا عمر
كيفك يا زول
تخيلت صورتى ولا لسة ...
تسلم
|
Post: #6
Title: Re: كفرت بصور اعضاء المنبر بما فيهم نفسي..
Author: محمد عبدالرحمن
Date: 01-16-2007, 02:24 PM
Parent: #5
| Quote: يا حبوبة ما عندك لي صورة لمن كان عندي شعر؟؟؟ |
| Quote: الزول الشعرو ناعم وحدّو العينين ينافس ود اللمين في الصلعة إن لم يزاحم كوجاك .. |
..
والله الشعر تانى يسمك فيهو ...بس تقعد تهضرب بيهو زى هضربتك دى ...
|
Post: #7
Title: Re: كفرت بصور اعضاء المنبر بما فيهم نفسي..
Author: عاطف عمر
Date: 01-16-2007, 02:59 PM
Parent: #1
يوماً داعبني إبني ( محمد الأمين ) الذي تزين صورته اسمي في ( تشريم ) أعاد لي بعض ذكريات طفولتي :-
" بابا إنت قاشر بي صورتي دي الوكت دا كلو . إنت ماعندك صور كتيرة ما تخت واحدة منها "
فلو أراد الله تعالى وتقابلنا فأرجو ألا تظنني كنت أخادعكم
سلامات الفاروق عمر
|
Post: #8
Title: Re: كفرت بصور اعضاء المنبر بما فيهم نفسي..
Author: ghariba
Date: 01-16-2007, 03:09 PM
Parent: #1
واناااااااااااااااا
مش ياني انا ذاتو
اي والله الخالق الناطق
صلاح غريبة - الرياض
|
Post: #9
Title: Re: كفرت بصور اعضاء المنبر بما فيهم نفسي..
Author: ناذر محمد الخليفة
Date: 01-16-2007, 03:48 PM
Parent: #1
|
Post: #10
Title: Re: كفرت بصور اعضاء المنبر بما فيهم نفسي..
Author: خالد
Date: 01-16-2007, 04:07 PM
Parent: #9
ناذر جنيت مالك شايل الختم ده ولافي بيو من بوست لي بوست؟
|
Post: #11
Title: Re: كفرت بصور اعضاء المنبر بما فيهم نفسي..
Author: نادية عثمان
Date: 01-16-2007, 04:08 PM
Parent: #9
ياعمر .. انت اصلك شيل الحال ده مابتخليه ياشليق ؟!! (شليق دى حاجة سمحة) ؟!!
شوف
وليد 500 ياهو وليد زااااتو زى فى الصورة !!
ومعتصم دفع الله ياهو زاااااااتو زى فى الصورة !!
صلاح غريبة .. فى الصورة دى اصغر كتيير من الان (بصراحة وماتزعل ياغريبة) !!
ناذر الخليفة فى الحقيقة اقيف مليون مرة من الصورة الهنا دى !!
ملاسى هو ملاسى وان كان فى الاصل اوسع ابتسامة من مايظهر فى الصورة (فى الصورة ابتسامتو مقتضبة زى بوستاتو لكنها معبرة عن الواقع ومواكبة الغموض الذى يسود هذا المكان احيانا ) !!
منى خوجلى كما هى زهرة بل واجمل !!
انعام عبد الحفيظ .. ماشاء الله عليها !!
نهال كرار .. عينى باااااااارد ربنا يحفظها !!
عنيدة .. شرط للارض !!
نجود شهادتى فيها مجروحة !!
سجيمان هو سجيمان (زى رودا مردا هى رودا مردا البقولها حسين ملاسى وماعارفة قاصد بيها شنو دى ) !!
بكرى ابو بكر ايضا هو بكرى ابو بكر وان كانت (جلحاته) فى الحقيقة اكثر اتساعا !!
وتانى منو يااااااااااااربى ؟!!
بخلص حلة البطاطس دى ولو اتزكرت زول شفتو فى الواقع ومن خلال صورتو هنا فى اثناء ماانا بعمل فى الرز برجع ليك تانى .. سمح ؟!!
|
Post: #12
Title: Re: كفرت بصور اعضاء المنبر بما فيهم نفسي..
Author: sudania2000
Date: 01-16-2007, 04:12 PM
Parent: #9
السلام عليكم
اتفق معك في فكرة البوست ولولا المشاغل كان نزلت الفكرة برضو
المهم اتفق في الفكرة والموضوع
وكل زول بحب يطلع روحوا احسن زول صايبريا خلقة واخلاق
انا غايتو كتلت في ناس كتارات علي قول الصغيرة الامورة
ولو ح اعدهم ليك هنا ح اقفل البوست بالحردانين
بس هكذا هي الحياة فرقة ولقاء
وتفاعل وانتشاء
وحين تذهب الدهشة تبقي الحسرة
اول لقاء بورد كان لي مع البنوتة الامورة حبيبة سودانية من سودانت سنة 2002
وكان اللقاء في حديقة عامة وجمع عدد كبير من البورداب من بيت الضرة ((دا)) وسودانت معاذ
ومن ديك خلاص من اللقاءات ببورداب مش لشئ اكثر من المشاغل والجري الكثير
بس قابلت افراد في داخل و خارج السودان
الزول بكون صورة ساي وفكرة
بعدين في الواقع تجد الحقائق
وناس طلعوا كذابين وناس طلعوا برسموا صور كرتونية
وناس ما جادين اصلا في التعامل
والفكرة مخيفة جدا
لكن يبقي العزاء في ان الدنيا تحوي الانواع كلها
وفي واقعنا نلتقي بالجمال والقبح صبح مساء
اما الصور فهي بوتقة للروح الاشياء
لا اهتم للاشكال وان كنت اجد الاخلاق والتعامل الواضح اهم
ربنا سبحانه وتعالي ينظر الي القلوب فلما لا نتمثل الفكرة
لايهمني من يكون جميلا او قبيحا او اسودا فكلنا اولاد 9
ولا فرق بيننا الا بالاخلاق والتقي
وضحكتني بدي
Quote: الانيقة ولبيسة تفاجأ بيها جايكم الاحتفال بي اسكيرت بنفسجي وبلوزة حمرا وشبشب اصفر..
صاحبات الحمية واكلات الخضروات تلقى العيون مدفنة والمشي الهوينة كما يمشي الوجى الوحل..
|
|
Post: #13
Title: Re: كفرت بصور اعضاء المنبر بما فيهم نفسي..
Author: عمر الفاروق
Date: 01-16-2007, 05:07 PM
Parent: #1
العريس القديم ابقوتة :
والله انت عامل زي الغول وزي طائر االعنقاء ..
حاجات كده من الخرافة (دي ما من خروف)..
كل مرة تقول للناس وموعدنا استراحة فلان وفندق علان ومحلات فرتكان ونجي نفتشك وسط الزحام وما نلقاك
وارجع أغني:
وأقول إمكن انا الما جيت ..
تخريمة :
غايتو طالما لقيت زولة وافقت بيك فقطع شك انت النوع الفي الحقيقة أجمل من الصورة 
|
Post: #14
Title: Re: كفرت بصور اعضاء المنبر بما فيهم نفسي..
Author: عمر الفاروق
Date: 01-16-2007, 05:15 PM
Parent: #1
وليد 250+250:
دي يعني 50% كده و50% كده ..
طالما خليت الموضوع في يدين فيصل نوبي فأبشرك بي إنو موضوعك مستحمي ومن أسة الراجل ده حا يوديك في إتجاه اخونا الما حسين ملاسي(واخد بالك ياحج إبراهيم؟)
شفت الزول من يجيب صورتو ويختها جوة إطار ويعمل ليها زخارف انا طوااااااااالي بعرف اوديهو ياتو سايد
الحق نفسك وشيل الصورة من الإطار ..
وقول معاي Cheeeeeeeeeeeeeeeeeeeeeeeeeeeeeeees
|
Post: #15
Title: Re: كفرت بصور اعضاء المنبر بما فيهم نفسي..
Author: وليد محمد المبارك
Date: 01-16-2007, 06:41 PM
Parent: #14
كُر عليّ يمه
النفسيات قامت عليك
انا ما كلمتك قلت ليك مويت السعودية بتحت الشعر
اها الليلة الا تزرعو
|
Post: #16
Title: Re: كفرت بصور اعضاء المنبر بما فيهم نفسي..
Author: Marouf Sanad
Date: 01-16-2007, 06:57 PM
Parent: #15
والله انا كان ختيت ليكم صورتي الصحي صحي الاّ يأجزلوكم
|
Post: #17
Title: Re: كفرت بصور اعضاء المنبر بما فيهم نفسي..
Author: tmbis
Date: 01-16-2007, 07:59 PM
Parent: #16
والله يا عوض احمودي بقيت بالجد ظاهرة تستحق الوقوف عليها كثيرا
أنت كان عندك مشكلة مع زول/ة ( ) قول عديل كدا
..
..
|
Post: #19
Title: Re: كفرت بصور اعضاء المنبر بما فيهم نفسي..
Author: عمران حسن صالح
Date: 01-16-2007, 08:19 PM
Parent: #16
ود الفاروق شيخ الدين
إنت بس "" كرشت"" وصلعتك كبرت
وقايل الناس كلهم حصل ليهم الحصل ليك ...
|
Post: #18
Title: Re: كفرت بصور اعضاء المنبر بما فيهم نفسي..
Author: Salah Waspa
Date: 01-16-2007, 08:12 PM
Parent: #1
والله ياعمر هذا البوست روعته تكمن في وصفك المبالغ فيهو لأنه
صور (بتشديد الواو) إحساس وخبال كل البورداب بخصوص البروفايلات
الخالبة من الصور .
وأشير هنا طالما جات سيرة الصور إنو الصورة الفي بروفايلي هي
ليست لشخصي وإنما أضعها كتخليد لفقيد عائلتنا وفقيد الرياضة
والفن إبن خالتنا الحبيب عثمان طنون والذي مات مغدورا وقد رحل
ونحن قبلها لم نراه لسنوات طويلة بسبب الغربة وكم هي باهظة
هذه الضريبة التي تثقل قلوب ومشاعر كل متغرب ناء عن أحبته .
لك الشكر على هذه الأريحية والصراحة المتناهية
و لك من وعد بأن تنزل صورتي وضمان بأن لا أعطيك فرصة تخوف بيهاالعيال
صلاح واسبه
|
Post: #20
Title: Re: كفرت بصور اعضاء المنبر بما فيهم نفسي..
Author: عمران حسن صالح
Date: 01-16-2007, 08:42 PM
Parent: #18
ودي لمن كان وزنك "في القرن الماضي " أقل من الحالي بخمسة وعشرين ( كجم ) 
|
Post: #21
Title: Re: كفرت بصور اعضاء المنبر بما فيهم نفسي..
Author: صديق الموج
Date: 01-16-2007, 09:41 PM
Parent: #1
لكن يا عمر صورتك ما منقة ...بتذكرنى بى شفع الزوارة بس ناقص حجاب،،،،
|
Post: #22
Title: Re: كفرت بصور اعضاء المنبر بما فيهم نفسي..
Author: رأفت ميلاد
Date: 01-16-2007, 10:56 PM
Parent: #21
تعرف يا عمر كلامك صح فى الإنطباع عن الإنسان من واقع صورتو
مثلآ عبد المنعم سـليمان
كنت راسم ليه شـخصية من المداخلات
لما شفت صورتو لقيتو زول تانى
ولما إتكلمت معاهو فى التلفون لقيتو زول تالت
أنا ما بتصور كتير رغم هوايتى التصوير
عندى صورتين فى المنتديات
الفى لبرفايل ختتا بتى الحنكوشـة
والتانية ختتا بتى الجادة
أها أنا ياتو فيهم
|
Post: #24
Title: Re: كفرت بصور اعضاء المنبر بما فيهم نفسي..
Author: عمر الفاروق
Date: 01-17-2007, 08:11 AM
Parent: #1
كل المتداخلين الفوق تحياتي وادوني صنة بجيكم..
بس توضيح مهم وجب لفت الإنتباه له :
حسين ملاسي وابراهيم بقال يمثلان مدرستان متناقضتان في تأكيد تطابق صورة الشخص بي شخصيته..
سمح؟
|
Post: #25
Title: Re: كفرت بصور اعضاء المنبر بما فيهم نفسي..
Author: عمر الفاروق
Date: 01-17-2007, 10:43 AM
Parent: #1
يا عاصم:
يا مان اعمل حسابك انت من الناس الأنا خاتي صورتهم بتاعت مصاصين الدماء وعمك تنقو ..
عشان كده الحق نفسك وورينا الحاصل ..
والله يستر ما تطلع من مدرسة ناس بقال ..
وكل التمنيات لك بالإنضمام لمدرسة ملاسي
محمد يا ود عبد الرحمن :
الشعر ده يا مان باروكة بتجيب خبرو ...
أو زراعة وكده ..
لكن يا حبة في حاجات كده عند ناس كده والله إلا يبقوا زي ناس اليسا ونانسي واحلام حتى يتحلّوا منها
الأستاذ عاطف:
يا زول نحن ماشين معاك بي نظرية هذا الشبل من ذاك الأسد وطالما ده الشبل فالأسد الله يستر يكون مركب عدسات لاصقة
|
Post: #26
Title: Re: كفرت بصور اعضاء المنبر بما فيهم نفسي..
Author: الملك
Date: 01-23-2007, 05:40 PM
Parent: #1
يا زول
خلى الطابق مستور
|
Post: #27
Title: Re: كفرت بصور اعضاء المنبر بما فيهم نفسي..
Author: Hani Arabi Mohamed
Date: 01-24-2007, 10:53 PM
Parent: #1
شنو ياعمر يا أخوي .... كفرت و آمنت ......
ممكن تنزل لينا صورتين لشخصك الكريم
واحدة من أيام لاب زيرو و واحدة من أيام العزوبية في السعودية؟
و صورة ثالثة لليوم ؟
|
|