إنت طيّب ؟

أمي الحنون وفي كل اتصال يكون سؤالها :
- " يا ولد انت صوتك ده مالو ؟؟؟ إنت كويس ؟ "
* اي والله كويس يا امي ما عندي أي عوجة إنتي كيف؟
- خليك مني انا كويسة المهم انت كيف ؟؟

لك يا ست الحبايب أقول :

إيش في صوتي ما في صوتي أي شي..
كنت ساكت نامت عيوني شوي..
كنت أحلم بي معك ..وانت تحكي واسمعك ..
ما في صوتي أي شي ..

ولتكن هذه المساحة مساحة للتطمين وبدل ما تخسروا تلفون لي مراسي الشوق أو برنامج ألو مرحبا تعالو هنا طمّنوا أهلكم وحبايبكم (حبايبكم دي من الزوجة ولي فوق) يعني ما تهدي للجكساية ولا لي الخطيبة زاتو ..

تخريمة :
هذه الأغنية تذكرني دوماً بأغنية

لا شوفتن تبل الشوق ولا ردّاً يطمن..
اريتك طيب إنت وانا البي كلو هين ..

عليه اقول للفنانة صاحبة الصوت الحنين " نوال" ماذا لو اسميناك " النعامة ادم "

- يابت مالك ضعفتي كده ؟؟
_ أمي !! إنتي أسي شايفاني ؟؟
_ آآي شايفاك من صوتك ظاهرة ضعفتك




إنتا طيّب ..وغير هذا مايهم.

الله إخليهم ستات الحبايب ..

عمر مانجو البورد ممكن أهدي ؟؟

عزو إنت طيب وأولادك طيبين وبتى سحر وينه

إنت ما عايز تجي أشوفك قبل ما..... ودمعه تكاد تراها من عبره فى الحلق تخنق الكلام ..

قلبى على جناى وقلب جناى حجر!!

ـــــــــــــــــــــ

ياود الفاروق أخوى أريتك انت طيب

وينك وين زمانك؟؟

وأنا بهديك البوست ده ولو ما سمعت الباقيات أعمل بحث بأسم عزيز فى إرشيف 2007 وكمل سماع الزول السمح ده المعاكم هناك فى جده

عادل الصديق .. ربيع الدنيا.. د.متوكل محمود، موصلى، خطاب...الجنيد، سلمى والجميع

كامل محبتى واشواقى

عزيز

تماضر الخنساء :

Quote: أمي !! إنتي أسي شايفاني ؟؟

اعملي حسابك يا تماضر مع التكنولوجيا الحاصلة دي ممكن تكون شايفاك ..
ياخ اسة في خواجة شاطح كده شغال في مشروع إنو من خلال التلفون تقدر تعرف نفسية الشخص البيتكلم معاك يعني هل بيتكلم معاك من طرف لسانو ولا بيتكلم معاك وهو في وادي تاني (ما وداي فاطمة ولا وادي لبن) ..

Quote: آآي شايفاك من صوتك ظاهرة ضعفتك

إنتي إظنك لمن تتكلمي معاها بيكون كلامك كلو من نوع :
ميييو ويييو وهيييو ..

Quote: عمر مانجو البورد ممكن أهدي ؟؟

إتفضلي ..
بس وطّي صوت التلفزيون ..

يرفع لقربه من حافة الخور

يا عمر الفاروق
قلت لي داير تسميها النعامة (آدامه) نعامه تسبقك جري إن شاء الله – وأهو ده نوع الكلام البيصنف فارغ يا فاروق ناهيك عن أنه يمثل إهدار للحاجات بتاعات السيرفا ديك خاصة وأننا كلنا مشتركين ملح وما بندفع ولا قرش أحمر واحد لدعم المنتدي وحتى إعلان موقع الدكتور الشاعر الزين عمارة تم إيقافه لإنتهاء العقد وعدم تجديده بين الطرفين – وأنا عن نفسي أعتبر المسألة هواية عشان كده ما بدفع ولمن الحكاية تكون إحتراف وأعامل معاملة المحترف عندها تتم محاسبتي على أن أتقاضي أجراً مقابل كل بوست وعشرة بالمائة مقابل كل مداخلة تتعدي التلاتة أسطر في أى مقال فأعمل حساب تصنيفات الفيفا وما تفرح لي بإنه الهلال السوداني من ضمن أحسن 200 فريق كرة قدم في العالم ده المفروض وقياساً على الأقدمية يكون من الخمسة الأوائل يعني شنو لمن تطلع التلاته وتلاتين من فصل فيهو خمسه وتلاتين ، الكلام ده بعجب صاحبك كيقا الأحمر شديد والعجب حبيبي.
الأم دي يا فاروق أعظم مخلوق في الدنيا – لكين نحن في السودان لصقاناها لي رقيقه وفتفت وتكشو ناهيك عن بده ودرمان وبادر وروابه.
ده الكلام البودي ليك بوستك الخور بحسب قوانين المنتدي وقيل أنه ربما يجمد عضوية كاتب المقال وكل المتداخلين علقوا علي المقال أم عاينو فضحكوا فجروا فجاءوا راجعين – وخلينا نكون أكثر صراحة لو شرحنا مقالك هذا حا يفيد الوضع السياسي الراهن في شنو وحا يحل الضائقة الإقتصادية الحاصلة في البلد وهل حا يساهم في تهدئة التوتر الحاصل بين الحركات المسلحة والنظام الحاكم ، وهل حا يعيد بعض الثقة المفقودة بين الحكومة وشريكها الأكبر في الحكم.
أنا عارف إنني طلعت من الموضوع لكن ياها طريقتي من الله خلقني وبقيت عضو في هذا المنتدي ولو ما نفعت مع الجماعة فبكل بساطة خليهم يبلو الباسوورد خاصتي ويدفقوها مع موية البلاعة في نص الشارع وأنا قادر على أن ألملم كرامتي وأفوت بعيد يا فاروق.

عزيز دنيانا:

Quote: إنت ما عايز تجي أشوفك قبل ما..... ودمعه تكاد تراها من عبره فى الحلق تخنق الكلام ..

طيلة هذه الخمس سنوات هي فترة اغترابي وبالرغم من انني ارجع كل سنة في إجازة ولكن لم أكمل تلفون واحد مع الوالدة ..
في كل مرة تسمع العبرة في صوتا وتكتفي بي مد السماعة لي الاخوان ..

تخريمة :
انت الوين الحي بيك ياخ مختفي وليك مدة مت بنت ..

أخي عمر الفاروق
لك التحية وإنشاء الله سيتأهل الهلال على حساب ناساورا

Quote: طيلة هذه الخمس سنوات هي فترة اغترابي وبالرغم من انني ارجع كل سنة في إجازة ولكن لم أكمل تلفون واحد مع الوالدة .. في كل مرة تسمع العبرة في صوتا وتكتفي بي مد السماعة لي الاخوان ..

أخي
أسأل الله أن يمتع والدتك بالصحة والعافية وأن يجعلك دائماً مصدر فرحها هنا في الدنيا وهناك أمام الجبار العزيز الرحمن الرحيم والملك كمان.
والسلام والحب والشوق والمحبة لأم الصادق في مدني حي مايو40 والله يديها العافية والصحة لنا.

أبوفتحية

الملا عمر :
إنت طيب ؟

تعرف يا ملا يا ابن عمر بقينا اسة نتلاعب بي القوانين والواحد فينا لو عايز يخت ليهو أغنية يقوم يربطا يا بي الام يا بي الوطن عشان ما تتحسب مع الفارغات وكمان بقينا لو عايزين نخت لينا اغنية نقوم نخت معاها اي شي لي عمر احساس ولا احمد شارف ان شاء الله تيلم تيلم ..
اجمل ما في هذا المنتدى هم الفارغين والفارغات وهم سبب وجودنا هنا ..
يعني الفارغ الملا عمر على الفارغ علي الحلاوي على الفارغ سامي على الفارغ راكوبة والفارغ احمد الريح والفارغة تماضر الخنساء والفارغة مايا والفارغة سوميتا ..
اجمل ما في هذا المنبر الفارغون والفارغات وعليه يا الملا ابن عمر ادعوك لتكوين رابطة الفارغين والفارغات في هذا المنتدى على ان تكون انت الرئيس وانا السكرتير التنفيذي ووضع رسوم رمزية فئة الاف دينار لدعم الرابطة ..

أقعد باريني من بوست لي بوست ونط لي أونلاين و أوف لاين بدون سبب ، إنت ما بتسمع كلام الحبوبات " البباري الجداد بوديهو الكوش ، ده كان زمان زمن الديك لمن يأذن في حلفاية الملوك يسموعوه ناس أب كدوك ولمن الجداداه تكاكي في المزاد يسمعوها ناس شمبات وزمن الكوشة أرجل من أى برميل زبالة في دول الخليج الغنية بالنفط والفضلات زيها وزيها سفينة نوح لامه الكديسة والغنماية وحمار سيد اللبن لو الحاج دقس ساكت وأداها تعسيله في الضل ده غير الكلب والجداد وفلانه المجنونه والضبان طبعاً ، وهسع الجداد زاتو بقي يودي لي حتات أبعد من كوشة الجبل (وهي مكب النفايات بلغة الطبقة المستنيرة) والتي كانت تقع شمال مدينة الخرطوم بحري الجميلة حيث سقط رأسي أول ما سقط هناك ولم تقم له قائمة من يومها وكوشة الجبل أيضاً لم تعد هناك بسبب التوسع العمراني والإمساك عن رمي الفضلات ليس تأدباً ونظافة ومحافظة على البيئة لكن للشدة وضيق ذات الشامه.
إنت طيب ومعها إبتسامتك دي يعني أنني وهم أى زول عوير ساكت ، وأنا ما كنت سأقبل بأن أكون عوير لولا أنني كذلك ومع كل هذا إنت بطريقة مباشرة نبزتني أو قل شتمتني وإحتقرتني من منطق الشكرو قدامو نبزو ، لكن لإعتبارات كثيرة يأتي في مقدمتها أنك لا بتخاف ولا بتر قدام الشاشات الحمر تنازلت عن حقي الخاص وبقي الحق العام وهو ما سوف تقرره لجنة الإنضباط فلا تلمني في ما لا أملك.
ناس الفارغة هم ناس نحنا ، ناس الفارغة والمدودة هم قوم أكثر فراغاً مننا فإذا كنا نكتب على سطر وننط سطر فهم يكتبون على صفحة وينطون صفحتين وهي تماثل القانون العرفي في زراعة البصل وهو ما يعرف بحق الوابور أى طلمبة الموية فتزرع أنت أرضك وأسقي أنا بوابوري فتحصد أنت حوضين بصل وتترك التالث وهكذا – الغريبة أن هذا القانون معمول به منذ أيام سيدنا سفرجل وهو قانون وضعي وغير مكتوب وغير مشهود عليه من قبل الـ un ولم يذاع على الفضائيات أو الـ cnn ومع ذلك هو قانون نافذ ومحترم ولم أسمع طوال إمتهاني لزراعة البصل أن أحداً تمرد وشال طوريتو ورفض أن يدفع حق البابور. وهناك ناس لا لا وهم قوم لو رأيت في كلامي هذا منفعة سوف أكتب عنهم بإسهاب وتوسع شديدين

لعمري ما قلت إلا الحق يا شيخ العرب سيدنا الملا بن عمر (وحذفت الإلف لأنها توسطت إسمين ولم تكتب في نهاية السطر أو كما اخبرونا في النحو والقواعد)..
الطيبة في زماننا هذا مشكلة وكل من نعتوه بالطيب فهو عوير (وهنا لا أعني الأسود والباذنجان وإن كنت لا أدري ما هي العلاقة بينهم)..
ولعل أكبر دليل على هذا القول تلك المقولة التي توضح أن الرجل الطيب أو المسكين حتى الغنماية تأكل عشاهو و لا إدرى لماذا اختارت هذه الغنماية أكل العشاء من المسكين دون الغداء أو الفطور أو حتى ان تشرب الشاي !!!
وما هي علاقة المسكين بالغنماية ؟؟؟
لماذا لا يقولون الفيل مثلاً أو الأرنب أو حتى وحيد القرن أو الكنغارو ؟؟
أما بخصوص الجداد يا صديقي فإنه أصبح يودّي إلى ابعد من الكوشة وأصبح يودّي إلى التوج (والتوج في معجم ابداموكة هي مكان شبرين في شبرين مظلم كنيته ود اللحد )..
فهذا الجداد لديه الإمكانية أن يصيبك بداء الرشح أو اقحة أو كما يقولون الإنفلونزا وعلاجه الكبسولات أو المضادات الحيوية ..
ثم يا صديقي حتى الجداد فهو خشم بيوت فهل انت من جداد البيت أم انت من جداد الخلاء ؟؟
ولعمري إني أجدك من جداد البيت فهاهو جداد الخلاء يحاول أن يطردكم من امكانكم ويتوهط في منتداكم بعد ان اصبح دجاج البيت فارغاً لا يبيض لا ذهباً ولا جنى جداداً بينما هاهو جداد الخلاء يبيض وولا يفقس إلا دجاجات بعباءة وعقالات وعمامات والبيض في وطن كثير ؟؟
وعلى ذكر البيض تجدني أكثر إسغراباً بوصف الناس الكعبين بأنهم ناس "بيض" ولا أدري ما علاقة الكعوبية بالبيض فالبيض عندنا من الوجبات الفاخرة والرفاهيات ويكفي أنه عندما يوصف لك شخص أنه كان مدعو لوجبة فطور أو عشاء فاخرة فإنه يقول لك " يا زول جابو لينا سمج ودجاج وسجق وبيض" لتجد هذا البيض يتوسط الوجبات الدسمة ..
وما يحيرني أكثر أن الجدادة نفسها في مرة سألوها لماذا تخليت عن أولادك ؟ فردت لهم لأنهم " بيض "..

أخي عمر الفاروق سيد الفارغة والمقدودة

Quote: المقولة التي توضح أن الرجل الطيب أو المسكين حتى الغنماية تأكل عشاهو و لا إدرى لماذا اختارت هذه الغنماية أكل العشاء من المسكين دون الغداء أو الفطور أو حتى ان تشرب الشاي !!!

أنا أدري وأنت لا تدري وإن كنت تدري فإن ذلك إستنارة وإن كنت لا تدري وتسأل فالإستنارة حتماً أعظم ، لقد أختاروا الغنماية لإسباب يأتي في مقدمتها أن العنز هي من أكثر الحيوانات الأليفة مسكنة وهي تسكن معنا في بيوتنا في العاصمة القومية ففي آخر إحصاء لسكان المدن الثلاث وإمتداداتها وتمددها إتضح أن من بين السكان حوالي المليون وسبعمائة أربعة وستين غنماية وتيسا – والغنماية تعتبر من الأثاث كما يحدث في بيوت اشلاق فتقوم الحكوم ببناء البيت ويتكون من أوضتين وكلب وغنماية ، والغنماية هي أكثر الكائنات المظلومة في بلادي فنحن عادة لا نعطيها قش أو برسيم أو علف إلا مرتين عند اللزوم وربما مرة واحدة ناهيك عن ستعمالها لإعادة تدوير قشر البطيخ وعيدان الخدره وجميع مخلفات حلةالملاح عندماتكون الحالة تمام ومع ذلك نطالبها بنص رطل لبن في الصباح ونص رطل عند الغروب وهي عادة لا تحتج. لذلك أصبحت الغنماية مسكينة شديد.
هذا في شأن الغنماية أما في شأن القول المأثور أعلاه فأقول مستعينا بالله أن الغنم أنواع فهناك غنم الإشلاق وأكثر تواجدها بالقرب من أسواق الخضار ومحلات البرسيم والأمباز وتشتهر بالنطح وتسلق الأسوار وهرش كلاب الحنكوشات وهناك الغنم الأمريكانية 6 شنكل ويقال ن أصولها حلبية من الشام وعادة ما تتواجد بالقرب من الطواحين وزرايب العيش وهناك غنم الكوشة ، وعطفاً على المثل فإن الغنم موضوع مثلنا لا تخرج عن نوعين إما الأمريكانية طويلة التيلة وأحسب أنها إنقرضت وأختفت من المجتمع بسبب تردي الأوضاع الأمنية وسؤ العلاقات بين البلدين ناهيك عن تحويل الكثير من الطواحين إلى محلات قدر ظروفك وإتصالات وبالتالي هي خيار غير مبرر ، أما غنم الإشلاق فباقية ما بقي الإشلاق وأولاد الإشلاق بوليس كان أم سجون ، صحيح أن بعض المجمعات الإشلاقية تم تحويلها من العساكر إلى الضباط وضباط الصف لكين في ناس كده لمن تدخل بيتهم تقول داخل كركون – الولد رقيب والأخو نقيب والأب عريف والأخت بي شريط
الغنماية التي تأكل العشاء هي إما ثائرة وناغمة على الأوضاع في بيت إختلت فيه القوانين فتجيب حقها بي رأسها ونطحاتها وحشر قدومها في أى ماعون وإما مجنونه حتى تتجرأ وتهاجم عشا صاحبها حتى لو كان شاي بي لبن بي عيش –وعليه أجد أن هجومها مبرر في الحالتين.
أما لماذا نصف الشخص الثقيل بالبيض ، فالأمر يحتاج إلى البحث والتقصي فالبيض أو جنا الجداد هو وجبة طيبة من الوجبات التي تضع الإنسان من ضمن الطبقة المستنيرة سواء كان هذا البيض مح - أي بيض بلدي – أو حتى بيض بيطري.
أيضاً عندما يمرر اللاعب الكرة من بين رجلي لاعب الخصم يكورك جمهور النظارة من السابلة والدهماء أمثالي مرددين ووووك ووووك بيضا ليهو ، وهو قول مغلوط في تقديري لأن كل ما فعله المهاجم المشاغب أن مرر الكرة من بين قدمي المدافع الرجافة وهو أمر لا يصل لمرحلة البيضة فالبيضة تخرج من أغوار غير مسبورة (التعبير للعلامة أبا جهينة).

صباح بطعم السُكّر ورائحة الليمون أهدي فيه لكل سوداني يستمع الان لبرنامج ايقاع الصباح في الإذاعة السودانية ولكل أم الان في المطبخ والرادي في احد اركان المطبخ وهي منهمكة في اعداد الطبيخ والشاي وغسيل العدة ..