The Entry HAS NOT BEEN SELECTED

..
.
Based on the information provided
شكرا ليكم يا ناس
U.S. Department of State
Bureau of Consular Affairs
Electronic Diversity Visa
DV-2010 Entrant Status Check

يعنى 15 سنة نشيل ونقدم فى الموضوع دا .. ونسمع واحد جزار وقعت عليهو القرعة
والمكوجى الفلانى وما عارف منو داك جاتو مرتين .. وفلان اخوها قدم ليهو هناك من اول مره وقعت القرعة عليهو !!
ياخى من زمن الفورمه
بنعملها برانا اللاسم والعنوان والصورة
وجو ناس الامن قالو دا برنامج بتاع غسيل مخ وسيطرة على الشعوب ممنوع على السودان
بقت الجوابات بتصادر من مكتب البريد
بقينا نشوف زول مسافر بره عشان يرميها لينا فى البوسته
تانى جرينا لناس الوكالات خارج السودان .. ودفعنا لينا 75 $
لوكالات البرنامج فى امريكا .. وبقينا نرسل لادم وريم ومحمد وعزاز ومازن
ومنو ما عارف عشان يقموا لينا من هناك قال من امريكا بتصدق ..
ومره نقدم سنغل ومره نعقد اتفاقيات مع البنيات عشان نتخارج وهم يتخارجوا
وبرضو ما نفع ..
قلنا برضو ناس بره ديل ديل ما بشتغلو بالموضوع ودى وعود ساى ما بقدموا لينا
قنعنا من الشغلة عديل وقلنا ياخى والله سودانا دا سمح ..سمح بناسو وبمعاناته دى
سمح بناس المؤتمر الوطنى العاصريننا ديل .. سمح بعنصريته وركشاته الحايمه دى
سمح بالبنات السمحات ديل .. سمح بقفشات الجرايد ومحرريها ..
سمح بالمليون ميل مربع دى وقطعه الواطه اغلى من فيلا فى مانهاتن ومزرعة فى فرجينيا
ولا حتى شقة فى بفيرلى هيلز ..
البلد دا لو ما سمحه حاجات تكون اغلى من ناس كاليفورنيا ديل ..
بلدنا سمحه وسمحه تب .. سمحه بخالاتنا وعماتنا وحفلاتنا زاعراسنا
برحلاتنا وسمكنا ودعوات ود العوض وجلسات الزقازيق ومصر ولمات الاعراس
وونسه شاى المغرب واحتيالات ارض الحيازات ..
المهم ..
والله من كى بوردى دا انا خلال الفترة الماضية قدمت لحوالى 20 شخص
7 منهم وقع ليهن الشئ دا . الا انا .. دا ظ شنو المنيل دا ..
شهر حداشر الفات قالو التقديم للموضوع دا بقى بنفسك مباشرة مع السيستم
قدمنا وطبعت الورقة المكتوب عليها
Submission ConfirmationL Entry Received
Success!
واخدنا كونفرمشن نمبر .. وكنت حالف والله امريكا دى ما بلد هجرة
دى بلد اغتراب .. الواحد بس يضمن الستيزن دى ليوم الحارة
اصلو الحارة فى بلدنا بقت ما مرتبطة بشمس ولا باوكامبو
فجاة تصحى تلقى فى حارة .. وخليل ابراهيم فى البلد ..
قلنا لو ربنا كمان رزقنا ذرية صالحة نضمن ليهم حاجة للظروف وكدا ..

لكن تصل بيهم الجراة ويقولو لى ( ززس انترى هاس نوت بين سلكتد )
والله تزعل .. قدمت لى ومعاى ثلاثة اخدو واحد .. ما حاجة تمغص يمين هو بقرا كلامى
دا وما كان عارف فى شئ اسمو لوترى وهجرة .. حسي يقع ليهو ..
المسالة دى فيها انه ولا حاجة ..

_______________

غايتو يا دانيا الظاهر حأرسل
الصور نجرب من كمبيوترات فرجينيا

تبلدينا تحياتي

عسى أن تكرهوا شيئا وهو خير لكم .....

تبلديكم
يا ولدي إستهدي بالله و أطلع من المكتب ده أخد ليكـ واحد شامبيون وقافي في نص الزلط
يمكن تستعدل معاكـ و تمشي لي قدام ..




_
بس ما تتعود علي الشامبيون ده باقي لي لسه تحت التجربة و العوض ما خلانا نشوف باقي نتائج الاستطلاعات ياخ ..

..
.

Quote: تبلديكم يا ولدي إستهدي بالله و أطلع من المكتب ده أخد ليكـ واحد شامبيون وقافي في نص الزلط يمكن تستعدل معاكـ و تمشي لي قدام ..

نوبينا
والله اخوك مستهدى بالله ..
والحمدلله والله رضا ماشة لقدام لمن حاسي
انو الابنص الإلاهى دا زايد شوية ..
لكن قلنا ياخى عشان الواحد يملاء عينو
من ناس الاوسكار ديل

__________

والله لو شفت الجمعة الفاتت الشامبيون الكتحناهو
مع بكرى والعوض ياخى مع البافاريا .. عجيب

..
.

Quote: عسى أن تكرهوا شيئا وهو خير لكم .....

سلام يا عمر
والله نحنا لو القرآنوايمانياتنا دى
كان زمان ارتدينا ..
ياخى حسي صبرنا على طقس السودان دا
مش ياهو عسي ان تكرهوا شيئا وهو خير لكم ..
احتمال لو جانى الاسنو ولا الاهمبريب الهانك دا تجينا مصيبة اكبر
انا غايتو عشان موضوع البوى فريند والغيل فريند قلت امريكا
دى كتارغيت نخليها اغتراب لكن هجرة دى ..الا اشرد بوليداتى
لو المرا ما شردت خلتنى ..

___________

والله لو الواحد كان سلكتد قبال 15 سنه
كان ضاع شمار فى مرقة

تبلدينا
حالتك هذه نفس حالتي
أنا من زمن التقديم في ورقة بيضاء
مرت الأعوام وأصبح التقديم عن طريق النت والحظ ياهو نفس الحظ الِمنيل
أتمنى لك حظاً أوفر في اللوتري القادم

ياخي سبقتني .. بس من زاوية معكوسة

واحد قريبي قدَم لي من الداخل

تخيَل ظبطت 100%

عمري ما قدمت للشغلانة دي والله

ورغما عن كده مادايرها والله




_
يوجد بيع

..
.

Quote: واحد قريبي قدَم لي من الداخل تخيَل ظبطت 100% عمري ما قدمت للشغلانة دي والله ورغما عن كده مادايرها والله

حيدر يا حنين ..
طيب انا ما بتظبط معاى ليه ؟؟
والله صدقنى اخوك ما زول امريكا ..
ياخى انحنا عندنا حاجات كدا نهائيا ما ممكن تظبظ
معانا ونعيش هناك ..
ومسالة المجتمع وناس ولدك لو جلدتو بسبب السجاير ضرب لـ 911
او البوى فريند دخلت لقيتو ببوس فى البنية فى الاريكة
دا والله مابنقدر عليهو ..
ومرتك البتهرب مع صحبك لولاية تانية ..
دى صعبة خلاااص
يا دخلنا سجن يا رحلونا يا اخدو الاولاد ..!!

___________

التربية صعبة يا حنين هناك
لكن الفسحه سمحة والجواز مع المؤهلات
تقيمه مع الربش ديل ما ساهل ..

ارمى قدام؛

Quote: لكن تصل بيهم الجراة ويقولو لى ( ززس انترى هاس نوت بين سلكتد ) والله تزعل .. قدمت لى ومعاى ثلاثة اخدو واحد .. ما حاجة تمغص يمين هو بقرا كلامى دا وما كان عارف فى شئ اسمو لوترى وهجرة .. حسي يقع ليهو .. المسالة دى فيها انه ولا حاجة ..

والله يا تنقـا لو عارفك متأزم كدا دا .. كان عملت وصلت ليك سلك ارضي والناس ديل انسترو معاك ..
ياخ البرنامج دا صدقني انا نقشتو ليك من زمان مجلي ساكت ..
كنت زيك كدا بعبي للشباب الفورمات وبتخارجو .. لانو عارف حظي عامل كيف.. واي فورم بعبيهو لي نفسي انا متأكد كمبيوتر الجماعة ديل بيفرزو براهو ويوديهو الفرن ..
لكن إنت قايل النجيضة شنو؟؟ قامت اللوتري جاتني تقدل .. يللا بي نفس الفكرة بتاعت الفرن القبيل ديك .. شلت ليك الورق ورزعتو في الدولاب قبل سنتين تلاتة كدا لي ورا ..
معقولة يا تنقـا امشي امريكـا عشان اتصور مع كوستاوي .. إلخ
انا لو عارفك مؤزم من الموضوع دا .. والله كان رسلت ليك الاوراق .. إن شاء الله ( تحك ) محلات الاسم بي موس

الأخ تبلدينا
سلامات
تجربتك ما فريدة وغالبية الناس الدخلوا أمريكا ما دخلوها باللوترى يا يعنى ما بالحظ... قلع يد... زيهم وزى ناس الدول الماعندهم لوترى.. أول ما تخرجنا من الجامعة كان همنا نمشى أمريكا ... فى ناس مننا حاولوا الشورت كت وفى ناس كان محاولاتهم مؤسسة...
اللوترى شغل بتاع حظ وحقو الزول المصمم أمشى أمريكا ما يعول عليه.. حاولوا الوسائل المشروعة التانية زى بقية خلق الله..
وعشان أديك مثال مشجع نحن من فصلى فى الجامعة فى حوالى سبعة فى منطقة واشنطون براها فيهم أتنين بس جوا لوترى... قيس بنفس النسبة على الفصول التانية فى نفس الكلية والكليات الأخرى والجامعات الأخرى... أمكن دا عشان الناس الجو فى زمننا كانوا معصوريين أكتر... هسة العصرة شكلها خفت وفى نفس الوكت حتى الناس البقدموا للوترى بقدموا بى كسل لامن يحيروك خصوصا الأجيال الجديدة..
يعنى أنا مثلا أولادنا وبناتنا الصغار عايزين يمشوا أمريكا وفى نفس الوقت ما بعملوا البتقولوه ليهم... ياخى أنا بعرف شباب أقرباهم دفعوا ليهم عشان يحسنوا أنجليزتهم وينجحوا فى التوفل أمكن يلقوا بيهو قبول. زاغوا.. زى ديل أنت تسألهم يقولوا ليك ياخى أحسن لينا اللوترى.. ولمن زمن اللوترى يجى تسكهم سك عشان يرسلو الصور والمعلومات الصحيحة.. والله لا وراك التعب البتعبوه ليك لمن يصلوا هنا.. ياخى نحن ثقافة الهجرة لى أمريكا حقتنا مثالية وما عندها أى علاقة بالواقع..

نحن فى زمننا، أول حاجة عملناها أنو أمتحنا التوفل.. حتى عندى صاحبى وهو عضو بالبورد دا أمتحن كمان الجى آرإى ولقى منحة فى واحدة من أرقى الجامعات هنا.. وإنشاء الله يقرأ كلامى دا ويدلى بدلوه...
كلامى الكتير دا كلو قصدى أنو الناس المصممة تهاجر تعمل أكتر من الأعتماد على الحظ...

ناس المكسيك والناس البجو عبرها بدفعوا الآلاف عشان يهربوهم عبر السلك الشائك ووبموتوا بالعشرات فى الصحراء والبرجعوه بحاول تانى...

الصيينيين بدفعوا الالاف برضو عشان يهربوهم فى الحاويات عبر الموانى.. والماعندو قروش بيشتغل سنين عشان يسدد حق تهريبو..

نحن قدامنا طرق مشروعة كتيرة والمجتهد بلقى طريقة...
أخوى تبلدينا ..
أتمنى ليك التوفيق ومستعد أوفر ليك أى معلومة للطرق البديلة ودى بتعتمد على أنك مغروض فى الهجرة قدر شنو..
بالمناسبة ويشهد الله ولمدة طويلة أنا كنت فاكرك قاعد فى أمريكا..
تحياتى
سيف

سلام

دا فلم انا كنت كتبت عنو مقال..

ممكن يبرد ليك بطنك شوية لو حضرتو
امريكا وما ادراك ما امريكا والهجرة
crossing over



ياخي فيهو مواطنة استرالية ما قادرة تلقى ليها قرين كارد (تقول لي نحنا)



__________
التعديل لاضافة الصورة

Quote: Based on the information provided شكرا ليكم يا ناس U.S. Department of State Bureau of Consular Affairs Electronic Diversity Visa DV-2010 Entrant Status Check يعنى 15 سنة نشيل ونقدم فى الموضوع دا .. ونسمع واحد جزار وقعت عليهو القرعة والمكوجى الفلانى وما عارف منو داك جاتو مرتين .. وفلان اخوها قدم ليهو هناك من اول مره وقعت القرعة عليهو !! ياخى من زمن الفورمه بنعملها برانا اللاسم والعنوان والصورة وجو ناس الامن قالو دا برنامج بتاع غسيل مخ وسيطرة على الشعوب ممنوع على السودان بقت الجوابات بتصادر من مكتب البريد بقينا نشوف زول مسافر بره عشان يرميها لينا فى البوسته تانى جرينا لناس الوكالات خارج السودان .. ودفعنا لينا 75 $ لوكالات البرنامج فى امريكا .. وبقينا نرسل لادم وريم ومحمد وعزاز ومازن ومنو ما عارف عشان يقموا لينا من هناك قال من امريكا بتصدق .. ومره نقدم سنغل ومره نعقد اتفاقيات مع البنيات عشان نتخارج وهم يتخارجوا وبرضو ما نفع ..قلنا برضو ناس بره ديل ديل ما بشتغلو بالموضوع ودى وعود ساى ما بقدموا لينا قنعنا من الشغلة عديل وقلنا ياخى والله سودانا دا سمح ..سمح بناسو وبمعاناته دى سمح بناس المؤتمر الوطنى العاصريننا ديل .. سمح بعنصريته وركشاته الحايمه دى سمح بالبنات السمحات ديل .. سمح بقفشات الجرايد ومحرريها .. سمح بالمليون ميل مربع دى وقطعه الواطه اغلى من فيلا فى مانهاتن ومزرعة فى فرجينيا ولا حتى شقة فى بفيرلى هيلز .. البلد دا لو ما سمحه حاجات تكون اغلى من ناس كاليفورنيا ديل .. بلدنا سمحه وسمحه تب .. سمحه بخالاتنا وعماتنا وحفلاتنا زاعراسنا برحلاتنا وسمكنا ودعوات ود العوض وجلسات الزقازيق ومصر ولمات الاعراس وونسه شاى المغرب واحتيالات ارض الحيازات .. المهم .. والله من كى بوردى دا انا خلال الفترة الماضية قدمت لحوالى 20 شخص 7 منهم وقع ليهن الشئ دا . الا انا .. دا ظ شنو المنيل دا .. شهر حداشر الفات قالو التقديم للموضوع دا بقى بنفسك مباشرة مع السيستم قدمنا وطبعت الورقة المكتوب عليها Submission ConfirmationL Entry Received Success! واخدنا كونفرمشن نمبر .. وكنت حالف والله امريكا دى ما بلد هجرة دى بلد اغتراب .. الواحد بس يضمن الستيزن دى ليوم الحارة اصلو الحارة فى بلدنا بقت ما مرتبطة بشمس ولا باوكامبو فجاة تصحى تلقى فى حارة .. وخليل ابراهيم فى البلد .. قلنا لو ربنا كمان رزقنا ذرية صالحة نضمن ليهم حاجة للظروف وكدا .. لكن تصل بيهم الجراة ويقولو لى ( ززس انترى هاس نوت بين سلكتد ) والله تزعل .. قدمت لى ومعاى ثلاثة اخدو واحد .. ما حاجة تمغص يمين هو بقرا كلامى دا وما كان عارف فى شئ اسمو لوترى وهجرة .. حسي يقع ليهو .. المسالة دى فيها انه ولا حاجة .. _______________ غايتو يا دانيا الظاهر حأرسل الصور نجرب من كمبيوترات فرجينيا

إذا كان دي طريقتك كده أحسن تقعد في السودان من ما تجي أمريكا وتدخل السجن .

..
.

Quote: إذا كان دي طريقتك كده أحسن تقعد في السودان من ما تجي أمريكا وتدخل السجن .

انت ما عارفينى انا مرتاد سجون ومزوراتى
وبتاع شيكات طايرة ..
الخوف انت زاتك تطلع امر القبض على بحكم عمالتك وعملك تحت
اسيادك ..الحسي انحنا ساكين اللوترى حقهم وبرنامجكم الجهجهتونا بيهو
دا لا خليتونا نجى .. ولا انت جيتو ريحتونا من الهم والغم ..

______

غايتو يا حنكوش العمارات وصيص اوزون
السمتر دا ببقي ليك طوووويل خلاص الا تقول
يا بكرى حلنى ووقف الزوول دا ..

Quote: غايتو يا حنكوش العمارات وصيص اوزون السمتر دا ببقي ليك طوووويل خلاص الا تقول يا بكرى حلنى ووقف الزوول دا ..

كلمات زي حنكوش وصيص دي أنت أتعلمتها جديد ولا شنوا يا ولد ؟
مافي زول في سنك ده بستعملها ، تكون عندك طفولة متأخرة ولا شنوا؟

..
.
إنت زعلت يا كومندر
دى بستخدموها الكمندانات الفى رتبتك ..
مش قلت ليك السمستر دا ببقى ليك حار
حسي من البداية سخنت ..

أعصابكـ

________

اها حسي خلصت عمليات فى العراق
ومشيت الكويت لا لسه ؟؟

..
.
الاخ سيف مصطفى ..

والله قلن ما ارد على كلامك دا الا انجز حاجة

Quote: اللوترى شغل بتاع حظ وحقو الزول المصمم أمشى أمريكا ما يعول عليه.. حاولوا الوسائل المشروعة التانية زى بقية خلق الله..

غايتو عملنا الوسائءل القانونية دى ..
خطاب من الشركة جواز سته شهور واستيت منت
وعنوان هناك وفورمات خليها سااى ..
المهم حسي قالو بتحدد ليك الانترفيو بغرض الزيارة
غايتو انا كتبت عنوان واحد اخونا كدا لو زغت ياهو العكشوهو :)

Quote: ياخى نحن ثقافة الهجرة لى أمريكا حقتنا مثالية وما عندها أى علاقة بالواقع..

والله يا سيف انا ما زول هجرة
بس الواحد كان دايما يتمنى يشوف 4 عجائب
الكعبة - ومضيق البسفور - وتمثال الحرية وحدائق فرجينيا
اها انتهيت من اتنين بقت على ناسكم ديل

Quote: أخوى تبلدينا .. أتمنى ليك التوفيق ومستعد أوفر ليك أى معلومة للطرق البديلة ودى بتعتمد على أنك مغروض فى الهجرة قدر شنو..

غايتو اشتغلت بوصيتك اما قبلو الطلب يا رفضوهو
تصدق قبل ا 4 سنوات كنت مغترب كحيان فى الرياض قدمت للسفارة الامريكيكة
هناك مرتين باوراق ومستندات رسمية وخطاب الشركة وحجز وخطاب من هناك
لكن فى واحد سودانى _ تافه_ للاسف فى السفارة اتغاتت على ...
ومعاهو قنصل مغربية قريبة طارق جبريل ياخى دى .. خليها ساااى
والاعجب كانت محجبة شوف التناقض محجبة فى سفارة امريكية مسلمة
وترفض للعدي المسلم دا ..

Quote: بالمناسبة ويشهد الله ولمدة طويلة أنا كنت فاكرك قاعد فى أمريكا.. تحياتى سيف

شايف اخوك شرب الولايات شراب
يعنى ممكن اسوق ليك من نيويورك لفرجينا وابيت نيوجرسى
وانا مغمض .. قرقر قرقر قرقر

مودتى يا سيف ..
غايتو لو ختمو الزيارة بديك خبر بأذن الله ..

..
.

Quote: لكن إنت قايل النجيضة شنو؟؟ قامت اللوتري جاتني تقدل .. يللا بي نفس الفكرة بتاعت الفرن القبيل ديك .. شلت ليك الورق ورزعتو في الدولاب قبل سنتين تلاتة كدا لي ورا .. معقولة يا تنقـا امشي امريكـا عشان اتصور مع كوستاوي .. إلخ

لام يا تامبا
ومرحب بيك فى دارنا دار الاحباط ..
يازول والله البرنامج دا ما مجلى .. والمشكلة
بعد سنه سنتين يقولوا خلاص الاستراتيجية بتاعت التعايش
النسبي ومعادلة الاقليات والخبرات والمزيج الانسانى تم الاكتفاء
منها ويجى البنتاغون ومجلس الشيوخ وادارة الهجرة والتامين الاجتماعى
يوقفوا الشغلة.
بعدين ياخى اجمل ما تتصور مع كوستاوى ودينق وتاج السر الملك فى
ياخى دينق دا زول طيبان ايوه اشتر لكن على شهادة الرواوه ..
كوستاوى دا زاتووو داير ليهو اخو يسند ليهو ضهرو الغربة تلتلوا ..
لا عرف يتخارج لا عرف يقيم للابد ..

___________

هى لو الشغله سهلة وداير موس
كنا طهرنا كل المستندات .. وشلنا جوزاز
من غير دخول زاتووو ..
اديك قصة فى حكه الموس دى
طبعا زمااان بعرف ليه شله كدا _ ما عارف اين قادتهم الاقدار ..
ناس تفايتح ودقوسات فى نفس الوكت ..المهم لموا ليهم فى زول
من الافريكان ولا اللاتين ديل .. ووقعوا ليك شهادات ميلاد
من فيرجن ايلاند .. شوية كدا شباك الهجرة اتملا سودانيين
كلهم مولودين فى فيرجين ايلاند وابهاتم كانو فى الصليب الاحمر ..
يا زول موظفه الهجرة طوالى عقدت تحقيق وشئ سفارات دول وشئ مراقبة
وشئ FBI شغلة .. وتعال شوف الهروب والمخارجه
طبعا اخوك لانو حظو منيل اها كانت ورقتى جاية فى الطريق .. شوية
كدا قنعت وليك ليك الشباب كل زول فى بلدا طيرها عجم ..
والله زعلت قلت بقت على انا ..
بس طوالى قلنا عسي ان تكرهوا شيئا وهو خير لكم ..
كان ممكن اروح شمار فى مرقه ..

ياخى دخول الاستيت دا فيهو جنس طرائف
والعجب قصص شباب الاسكا ناس سفن السمك والبرد القارص
مآسي غايتو ..

..
.

Quote: مرت الأعوام وأصبح التقديم عن طريق النت والحظ ياهو نفس الحظ الِمنيل أتمنى لك حظاً أوفر في اللوتري القادم

والله يا عبدالرازق ..
حظنا دا خليهو ساى ..

___________

غايتو انا القادم ما بنتظرو بسوق معاى
عاصم البنا وبشيل دعوة من ناس الرد سى
وبدقش السفارة المصرية

..
.
يا محمد يوسف
بمناسبة فلم كروسنغ اوفر دا ..
صراحة الواحد مرات بتخيل نفسو فى موقف زى بتاع توماس هانكس دا
فى فيلم
The Terminal
الجد دا ما اجمل الافلام البتوريك الوفاء - الشعور الانسانى - الاخاء
والاحساس بالترابط - ومعاناة المهاجرين و الوائح مع
القوانين للهجرة ومعاها ملطشة











____________

غايتو حقو اضيفو لمجموعة نادى السينما
ناس اسمارت _ انا وبت الحسين ..
ما عارف طنشوهو ليه ..

مودتى ..

..
.

Quote: ياخي فيهو مواطنة استرالية ما قادرة تلقى ليها قرين كارد (تقول لي نحنا)

دى اكيد ما مواطنة دى لاجئية يا ود الزين

_________

احتمال تكون مواكنة كورية :)

كامل تضامني مع اللوتري

Quote: كامل تضامني مع اللوتري

أو قل مع حدائق فرجينيا وتمثال الحرية