ضابطة الجوازات : ووووب على.... جاني أجنبي

ضابطة الجوازات : ووووب على.... جاني أجنبي


07-31-2011, 10:24 PM


  » http://sudaneseonline.com/cgi-bin/sdb/2bb.cgi?seq=msg&board=144&msg=1324337628&rn=0


Post: #1
Title: ضابطة الجوازات : ووووب على.... جاني أجنبي
Author: النصرى أمين
Date: 07-31-2011, 10:24 PM

ووووب علي جاني أجنبي! .. بقلم: كمال الهِدي

الحالة ت*ـعبـانة.

والبلد وس*خانة.



والناس هلكانة.

ورغماً عن ذلك هناك من يحدثونكم عن تفاصيل وأمور لا أظنها تهم إنسان السودان في شيء.

مظاهر الترف التي تعكسها بعض قنواتنا الفضائية لا علاقة لها بما يجري هناك.

المتابع لهذه القنوات من الخارج يظن أن سودان العز والكرامة بلغ مصاف الدول المتقدمة في كل شيء.

مذيعات حسناوات مبالغات في وضع المكياج وباذخات في ارتداء أغلى الثياب.

لا أدري كيف يملكن القدرة على خداع الناس بحديثهن المستمر عن التقدم الذي شمل كافة مناحي الحياة في سوداننا المكلوم.

ينقلن صورة غير حقيقة دون أن يطرف لهن جفن ويبدو أنهن سعيدات بالظهور المكثف عبر الشاشة البلورية فهذا مبلغ هم جلهن.

بالطبع لا يقع اللوم عليهن وحدهن، فبعض القنوات التي يعملن بها استمرأت خداع أبناء هذا الوطن.

يحتفون بالزيجات الجماعية وينقلون لنا أفراح الناس لنسمع المذيعات المتأنقات يتحدثن عن الحياة الزوجية وعن
عشها الهانئ السعيد رغم أن بعضهن لم يدخلن هذا القفص الذهبي.

كل من يشاهد الصالات المترفة التي ينقلون لنا منها الحفلات وجلسات السمر يظن واهماً أن البلد صارت عال العال.

لكن ما أن تطأ أقدامنا أرض الوطن نواجه بالحقيقة المرة مرارة الحنظل.

نرى أناساً أنهكهم الركض المستمر وراء توفير لقمة عيشهم.

نشاهد وجوهاً كالحة مليئة بالوجوم غير تلك التي تصورها قنواتنا الفضائية.

نلاحظ أن كل من يخرج صباحاً للبحث عن معاشه اليومي تبدو عليه علامات الضجر والسأم والملل.

معظم المظاهر الحياتية التي وقفت عليها خلال إجازتي السنوية الأخيرة لم تكن تفرح أو تسر.

بدأت تلك الصورة الحقيقية والمؤلمة تتشكل منذ لحظة وقوفي بصف الجوازات بمطار الخرطوم للحصول على تأشيرة الدخول!

لحظتها تقدم الصف الآخر أحد الأجانب فسمعت مسئولة الجوازات في النافذة الأخرى تقول " ووووب على جاني أجنبي".

أي والله قالتها بكل هذا الفزع وكأن حظها العاثر قد أتاها بـ ( ود أم بعلو) وليس كائناً بشرياً لا يرغب سوى في تأشيرة
دخول لهذا البلد الظالم أهله!

قلت لنفسي " ترى هل تخوفت البنت من الأجنبي لعدم معرفتها بلغة أخرى سوى العربية، أم لأن إجراءات دخول الأجنبي
أكثر تعقيداً!"، مع أنني كسوداني وقفت مع أولادي لفترة طويلة إلى أن بادر الضابط المهذب طالباً مني أن أدع أولادي
يدخلون ليجلسوا على الكراسي وأنتظر لوحدي لحين انجاز الإجراءات الطويلة.
وهذا يعني أن الإجراءات في الحالتين طويلة ومعقدة.

على كل لم أجد لتلك الفتاة عذراً يبرر فزعها الغريب.

Post: #2
Title: Re: ضابطة الجوازات : ووووب على.... جاني أجنبي
Author: النصرى أمين
Date: 07-31-2011, 10:36 PM
Parent: #1

بقية المقال هنا
http://sudanile.com/2008-05-19-19-50-58/908-2...-07-31-18-51-15.html

Post: #3
Title: Re: ضابطة الجوازات : ووووب على.... جاني أجنبي
Author: HAYDER GASIM
Date: 07-31-2011, 10:37 PM
Parent: #1

النصري ... كيفنك يا حبيب,

وحمدالله على السلامة,

كنا دايرين نقول ليك, إن شاء الله
البلد عجبتكم ... لكن ... مفهومة.

المهم ... الأهل كيف؟


ووووب على دي ما أصلا بتاعتم ... بس
تكون طولت ما سمعتها.


... رمضان كريم ...


وتقبل وافر أشواقي وتحياتي

Post: #4
Title: Re: ضابطة الجوازات : ووووب على.... جاني أجنبي
Author: النصرى أمين
Date: 07-31-2011, 10:43 PM
Parent: #3

والله يا حيدر
بعدما نزلت المقال انتهبت لحكاية الكاتب دى
كنت ناوى انزل المصدر فى المداخلة التانية ...
بعد دقيقتين من نزول البوست لقيت القراء اكتر من 30
معظمهم افتكر اننى كاتب المقال (ياريت)

قبل سنوات شفت كاركاتير لمضيفة سودانير تقول للمسافرين
"اغرف ليكم الغداء"



الحال ياهو نفس الحال مع قليل من الخوف والرهبة من رمضان اب 18 ساعة ده

Post: #5
Title: Re: ضابطة الجوازات : ووووب على.... جاني أجنبي
Author: حسين نوباتيا
Date: 07-31-2011, 11:30 PM
Parent: #4

النصري سلام ..

والله السودان دا ابداع..

في مرة من المرات وانا عائد لارض السودان وفي زحمة صالة الوصول
والناس واقفة صفوف امام ضابط الجمارك وانا في اَخر الصف شايف الضابط
مبتسم - قلت اخيرا الناس دي اتعلمت الابتسامة لكن لمن قربت لقيت الراجل سافي
سفة دفعت بشفته السفلى بعيدا عن عن اسنانه والقت بها على حنكه وكان بين الفينة
والفينة يخرج نافورة حادة من بين فلاجات اسنانه العليا ويصيب بها ركن قصي
تحت طاولة عرض العفش في دقة متناهية وهو الشخص الوحيد الكان شغال
بهمة وحماس الايامات دي قالو منعوه هسي زي دا يمنعوا منو السعوط يركز في شغلوا كيف؟

سلام يا صاحبي ورمضان كريم..

Post: #6
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-02-2011, 03:09 AM
Parent: #5

سلام حسن
رمضان كريم
تصوم وتفطر على خير..
Quote: وكان بين الفينة
والفينة يخرج نافورة حادة من بين فلاجات اسنانه العليا ويصيب بها ركن قصي
تحت طاولة عرض العفش في دقة متناهية

اتخيلت المنظر ....
اظن انها طريقة سودانية خالصة فى التفنن فى البصق .....
تلقى صاحبك ده فى رمضان بيكون زى الوحش الكاسر ..يشاكل ضله....
افتكر (وده استنتاج خاص بى ) انو الصعوط ساهم فى تهديئة النفسية السودانية
وجعلها اقل حدة و More tolerant .....
لو افترضنا ان نسبة السفافين 15%
الصعوط ساعد فى تهديئتهم بنسبة 50%
اذن السعوط يساعد بنسبة 7.5% فى كبح جماح سرعة الغضب عند السودانيين

Post: #7
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-05-2011, 06:45 PM
Parent: #6

البوست هدية لقناة النيل الازرق (وبنات ام لعاب)
ضابطة الجوازات : ووووب على.... جاني أجنبي

Post: #8
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 02:57 AM
Parent: #7


Post: #9
Title: Re: ضابطة الجوازات : ووووب على.... جاني أجنبي
Author: nazar hussien
Date: 08-07-2011, 08:18 AM
Parent: #8

السودان عالم جميل...فأنظروا الي النصف الممتليء
بي ناسوا الحلوين...اللي لسه حلوين...

Post: #10
Title: Re: ضابطة الجوازات : ووووب على.... جاني أجنبي
Author: Tarig Sidahmed
Date: 08-07-2011, 09:28 AM
Parent: #9

صف السودانيين وصف الأجانب

ويكون كل صف الأجانب سودانيين إلا ما ندر

والبعض إلا ينبهوه حبا في الزحمة أو تأكيد إحساس بأنه غير مختلف (صفك هناك)

رمضان كريم

Post: #11
Title: Re: ضابطة الجوازات : ووووب على.... جاني أجنبي
Author: محمد حيدر المشرف
Date: 08-07-2011, 12:52 PM
Parent: #10

قال لمضيفة الخطوط الجويه السودانيه.. وبمنتهى التهذيب وابتسامه تعلو وجهه : لو سمحت ممكن مويه
فردت وبامتعاض شديد عليه : بالله ما تفتح لينا باب زى ده !!


..
رمضان كريم يا النصري
والله كريم ..

Post: #12
Title: Re: ضابطة الجوازات : ووووب على.... جاني أجنبي
Author: محمد زكريا
Date: 08-07-2011, 04:37 PM
Parent: #11

ووب ووووووب اح حى يا الروب (هلوسات صائم فى يوم سخن وطويل)
وخليك سودانى

Post: #13
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 05:15 PM
Parent: #12

سلام نزار
بالتاكيد السودان جميل بناسو الحلوين
اهلنا واصحابنا وجيراننا وزملاءنا......
ولكن اذا كتب الناس عن حلاوة هذه العلاقات لن يجدو من يقرا لهم ....

Post: #14
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 05:21 PM
Parent: #13

سلام طارقق
يفترض يكون فى صف تالت للناس العندها ازدواج الجنسية او يجمعوهم مع صف السودانيين
شعور غريب وانت داخل بلدك ومن قولة تيت تقيف فى صف الاجانب
بالطريقة دى نضمن ان صف الاجانب يضم فقط ود ام بعلو

Post: #15
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 05:25 PM
Parent: #14

سلام محمد
حصل لى موقف مشابه فى سفرية بين تورنتو و فانكوفر على متن طيران
منتهى اعلن افلاسه بعدها طوالى
قلت للمضيفة ممكن رغيفة زيادة
نهرتنى وبصوت حاسم NO
والله يا محمد بقيت زى السمسمة
غلبنى حتى اشاكلها وارمى ليها دولارين فى وجهها واقول ليها
اجرى جيبى رغيفة .....

Post: #16
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 05:50 PM
Parent: #15

سلام محمد زكريا
قبل 3 يوم ...
طلعت من الشغل حوالى الساعة خمسة مساء والفطور 9:22
عطشان وجعان والاهم عقلى مشغول بامور كثيرة وبعضها يجب
انجازها فى بضع ساعات ..
المهم وانا مارق من مكان الشغل وسرحان لقيت تلاجة موية
وقفت فيها وانا سرحان ..
نزلت راسى ومديت شلوفتى وفتحت الحنفية وانا لسه سرحان
شربت ورويت تمام التمام .....
فجاة اتزكرت انى صايم
لاحولا ولا قوة الا بالله .....
ضربت لزوجتى ..قلت ليها ركزى على الاكل وانسى الشراب .....
حكيت لاصحابى عن الحادثة
قالو لى ده خير جاك

Post: #17
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 05:53 PM
Parent: #16

البوست ده محيرنى جدا
كمية رهيبة من ال traffic
ما عارف السبب شنو
غالبا العنوان ...
نتمنى انو ما نكون خزلنا الناس بعنوان جذاب وبوست مخستك...

Post: #18
Title: Re: ضابطة الجوازات : ووووب على.... جاني أجنبي
Author: محمد زكريا
Date: 08-07-2011, 06:13 PM
Parent: #17

Quote: النصرى أمين
البوست ده محيرنى جدا
كمية رهيبة من ال traffic
ما عارف السبب شنو
غالبا العنوان ...
نتمنى انو ما نكون خزلنا الناس بعنوان جذاب وبوست مخستك...



والله النصرى اااخوى بوستيك ده روعه
ياخ ده هو الالهمنى بوست الخستقه.........والهلوس بى فى اليوم الطويل ده
هو الناس بتهلوس بالليل ولا بالنهار؟ والغريب موضوع الهلوسه كلو عضه وشراب.........شىء عجيب
قصتك بتاعت المويه البارده حصل هنا لواحد صاحبنا بس شويه محتلفه
طبعاً هنا مافيش اذان الصبح الاول ولا المسحراتيه بتاعين الصفايح واحياناً كن دقست وما قمت للسحور معناتوا افطر اليوم واعتق رقبه ولا اى تعويض ممكن
صاحبنا قال لى امبارح نمت وما اتسحرت
هو البخليك تنوم شنو بعد الفطور زاتو؟ ماتفطر وتتعشى وانتطر شويه واتسحر وانجدع اتخمد

Post: #19
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 07:31 PM
Parent: #18

الله يطمنك محمد زكريا
انا قلت الكاسورة للبوست حتودينى التوج....
خفت تانى مهما اعمل عناوين جذابة مافى زول حيشتغل بى الشغلة....
البورد ده لو الزول عمل ليهو بوستين تلاته مخستكات بعناوين جذابة
تانى ما فى زول حيهببو ليهو ...

Post: #20
Title: Re: ضابطة الجوازات : ووووب على.... جاني أجنبي
Author: HAYDER GASIM
Date: 08-07-2011, 11:29 PM
Parent: #19

Quote: والفطور 9:22


ده فطور ولا عشا...

طبعا نحن في تورنتو قريبين منكم, وأظن الفرق بينا
وبينكم حوالي الساعة تغريبا... وهذا مما يعنى أننا في
كندا نصوم 18 ساعة في اليوم, يعنى تلاترباع اليوم
صيام... وهذا وضع كان يحتاج إلى فتوى من باب
الرحمة المستدرة من مناخ قصي ... لكن وحاتك ما في زول هببنا.

سألتني بنتي الصغيرة { وهي صوامة جدا بالمناسبة } ألا تظن أن
تمنتاشر ساعة إز تووو متش ... فما كان متوفرا لي من رد سوى,
الله يعظم الأجر ... وبالإنجليزي كمان ... شوفت كيف.

أبعد من الحنفيات الباردة دي باللهي, وروائح الشواءآت وما
تعمل شوبنق وإنت صايم.

النصري ... تسلم يابا, وتشكر على التوضيح سالفه وما في مشكلة
يا حبيب.... أها حفلة العيد كيف.

... وكن بخير

Post: #21
Title: Re: ضابطة الجوازات : ووووب على.... جاني أجنبي
Author: النصرى أمين
Date: 08-07-2011, 11:55 PM
Parent: #20

سلام يا حيدر
تعرف؟
انا الفطور اب الساعة 9:22 ما عندى معاهو مشكلة ...
على الاقل الواحد بشوف الشمس بتغرب قدامه ...
لكن مشكلتى فى الامساك بتاع الساعة 3 صباحا ده ....

الساعة 3 دى فيها ضلمة ممكن تتكل فيها العجلة (على قولة د شهاب)
وقالك ايه الشمس تشرق الساعة 6 صباحا ..
3 ساعات بين الامساك وشروق الشمس !!!!
معقولة بس ......

اكيد فى حاجة missing هنا .....

ناوى اقضى اليوم داك فى شهر فبراير
الامساك الساعة 8 صباحا
والفطور 3 عصرا
اذا ربنا كتب لينا عمر