الـقـنـعـانـين

حاجة تجيب النفسيات ...
انا قنعان من زمان ومتاكدان حال البلد وناسها ما حيتصلح ابدا ..



اتصلت السودان باحد الاصدقاء القدامى ..
لقيتو محبط ومدبرس وزهجان لغاية ما بديت
اقول ليهو استغفر يازول ..
وصل به الحال ان قال لى ان البلد دى تستحق
ان تمسح من وجه الارض بما عليها ..
وياريت لو قنبلة نووية جات وانتهت منها...

قلت ليهو انا من زمان قنعان لكن ما كنت متصور ان فى ناس
زيك كده يصلو للحالة المتاخرة دى من الاحباط ...

واحدة من ميزات الناس القنعانين انهم ما بالضرورة
بشاركو فى عملية التغيير ...


يعنى باختصار انو الزول القنعان رفع يدو من الشئ
وهو ليس فى حالة انتظار..او امل فى افعال ياتى بها الاخرين....

الزول القنعان زى "الصفقة" بتاعت الشجر فى الهواء
لا تلوى على شئ ..
محل الريح تهب بتمشى ..


لا تلعب اى دور فى تحديد الاتجاهات ..
مستسلمة تماما لقدرها ..
لا تحتج..
ولا تشكى
ولا تتالم...
و لا تقاوم ..

سلامات يا النصرى...
عارف انا دى...اللى (الان) علاقتى باخبار ساس يسوس فى السودان ذى علاقتى بالـطب ( انا ما عندى اى علاقة بالـطب). زماااان..... فى الابتدائى...كنت بشترى الجرائد و اقراها كلها...من الميدان لالوان ... للوطن. فى الانتخابات الفاتت (ما كان عندى حق النصويت ) لكن ساعدت اخوى ( الشيوعى سابقا...و صوت الان للبشير) فى تعليق بوسترات الاستاذ كمال الجزولي فى دائرتنا الانتخابية فى بحرى الصافية. انا اول من صرح ان البشير كوز و هو بيزيع فى البيان رقم 1. ناس بيتنا عاينو لى باستغراب و قال لى : امشى اقرى ماجد.
فى الجامعة كنت بصوت فى الانتخابات و اقيف فى الصف بالساعات. و انتظر النتيجة لوقت متاخر. فى عز جبروت الكيزان انا كنت بجيب الميدان السري عشان اعرف الحاص شنو.
المختصر المفيد...ما كنت ناشطه سياسية...لكن I used to care
الان...انا قنعانة....ما بسمع احبار نهائى. و موضوع الانتخابات ده بالذات فقع مرارتى. فى بداية الانتخابات....رجعت اهتميت (شويه كده) و جاء انسحاب عرمان و قضى على اى عدم قنع حاصل.
اما المصيبة الكبيرة هى امى الله قبل 24 سنة فى الانخابات الفاتت كانت ما بتكره حاجه فى الدنيا ذى الكيزان...الان بتقول لى : فى منو احسن من البشير ?
و ده طبعا ما فقع مرارتى بس....ده كان ح يدخلنى فى غيبوبه
اما نتيجة الانتخابات فدى مش تخليك تقنع...دى تخليك تنسي تماما انك سودانى...طبعا لاحظت ان البرلمان (قبل انتخابات الهنا و السرور دى) كان فيه ناس من احزاب اخرى غير المؤتمر الوطنى. الان....ما فيه غيرهم.
المصيبة كمان ان النتيجه دى ما كلها تزير (التزوير حاصل)...لكن الجماعة ديل قعدوا 20 سنة غسلوا فيها كل امخاخ الشعب السودانى.
و للناس البقولوا ما فى تزوير ...بقول ليهم: الكيزان ديل كتلوا الطلبة فى انتخابات اتحاد جامعة الخرطوم. اتحاد لمدة عام واحد لطلبة جامعة. ما عنده اى سلطة او صلاحيات. تتخيل ممكن يعملوا شنو فى انتخابات للبد كلها.
معليش يا النصرى على البرى....لكن انا بالجد قنعانة

سلام يااسمارت
ياريت لو بس المشكلة فى النظام السياسى واحتكار الكيزان
للسلطة والثروة...
انا قنعان لانو كل شئ شايفو (حسب وجهة نظرى) غلط فى غلط ..
احتمال لانو الزول شاف باقى العالم بعيشو كيف..

بس اديك مثال صغيرونى وما حصرى ..
العالم كلو بشوف انو التغييرات المناخية والبئيية خطرة جدا على
مستقبل الاجيال القادمة... نحن فى السودان الزحف الصحراوى والجفاف وتلوث
المياه تعتبر قضايا هامشية ولا تخصص ليها اى ميزانية...
مع انو السخانة فى الخرطوم تصل لمعدلات خيالية..

مثال تانى ومن صميم المشكلة.. شفتى الناس بقت كيف؟
ناس زى الوحوش تتربص بضحاياها ...

مثال تالت..
شفعنا واطفالنا ..بطريقة تربيتهم وفرزهم بين اطفال ابناء اغنياء وفقراء(معدمين)
تفتكرى ممكن يكبروا ويكونوا منظمومة اجتماعية متناسقة تعمل مع بعض لتنمية البلد ؟ الله اعلم ..

مثال رابع ..
تدين الناس وخوفهم من رب العالمين كان ممكن يكون ستار واقى ضد الانحرافات والتحلل الاخلاقى
ويحفظ المجتمع من شرور الزمن ..
الان اصبحت مظاهر التدين مثار للشبهات وتساؤل بين الناس ..هل هذه المظاهر حقيقية ولا لغرض ما ..

مافى شئ يا اسمارت يدعو للامل..
والمصيبة انو القنعانين ديل ما انا وانت بس ..
الله يعلم كم معانا ..

القنعانين اشد وطاة من المحبطين واليائسين

والله ما بنقنع ولو اي زول يشيل مترو ويمتر

سلامات يالنصري

الإحباط موجود
لكن اصلو ما بنقنع من الامل .

Quote: مثال تانى ومن صميم المشكلة.. شفتى الناس بقت كيف؟ ناس زى الوحوش تتربص بضحاياها ...

حبيبنا العزيز النصرى ,, تحياتى وأشواقى ,,


شـفت الحته دى بـس هى الخلتنى أكون من القنعاين وليس
لأى سبب آخر .
فالسودان بالرغم من المصائب التى أحاقت به كان أجمل ما
فيه إنسانه ,, ومع التردى ذهب الإنسان أيضا ويا له من
ذهاب ,, ذهاب بدون عوده .










حسن سالم معنا هذه الأيام وهى يبلغك تحياته ,,

Quote: سلام يااسمارت ياريت لو بس المشكلة فى النظام السياسى واحتكار الكيزان للسلطة والثروة... انا قنعان لانو كل شئ شايفو (حسب وجهة نظرى) غلط فى غلط .. احتمال لانو الزول شاف باقى العالم بعيشو كيف.. بس اديك مثال صغيرونى وما حصرى .. العالم كلو بشوف انو التغييرات المناخية والبئيية خطرة جدا على مستقبل الاجيال القادمة... نحن فى السودان الزحف الصحراوى والجفاف وتلوث المياه تعتبر قضايا هامشية ولا تخصص ليها اى ميزانية... مع انو السخانة فى الخرطوم تصل لمعدلات خيالية.. مثال تانى ومن صميم المشكلة.. شفتى الناس بقت كيف؟ ناس زى الوحوش تتربص بضحاياها ... مثال تالت.. شفعنا واطفالنا ..بطريقة تربيتهم وفرزهم بين اطفال ابناء اغنياء وفقراء(معدمين) تفتكرى ممكن يكبروا ويكونوا منظمومة اجتماعية متناسقة تعمل مع بعض لتنمية البلد ؟ الله اعلم .. مثال رابع .. تدين الناس وخوفهم من رب العالمين كان ممكن يكون ستار واقى ضد الانحرافات والتحلل الاخلاقى ويحفظ المجتمع من شرور الزمن .. الان اصبحت مظاهر التدين مثار للشبهات وتساؤل بين الناس ..هل هذه المظاهر حقيقية ولا لغرض ما .. مافى شئ يا اسمارت يدعو للامل.. والمصيبة انو القنعانين ديل ما انا وانت بس .. الله يعلم كم معانا ..

حبيبنا النصري كيفك وكيف العيال وامهم
كل الذكرته صحيح واكثر منه ..ومنظر واحد
زي الاطفال الفي اشارات المرور بياعين
للمناديل والفواكه وغيره..والشحادين
بكل صورهم من مكسرين لي نساء يحملن
اطفال يقال انهم بيستأجروهم للشحده..والله انا
يوميا وانا ماشي الشغل اشوف المنظر ده بجيني
احباط يومي وخلاص قنعت وداير ارجع عندكم لكن
قالو الlayoff زائد في البرتا وانه كل المشوا رجعوا لي سانتكاثرينز..
دايرين اكيده منك عشان نركب نجيكم..
تحياتي للعيال وامهم وقول ليها مافي نابسكو في كالغري؟؟

ولكم مودتي

سلام يا عبدالمنعم

Quote: والله ما بنقنع ولو اي زول يشيل مترو ويمتر

حكاية الامتار دى ياها زاتها البتبوظ اعصابنا..
مع امتارك ده القنعان حيتحول لخايف..
ودى تبقى مشكلة لانو الخوف لمن يصل حده
بتحول الى عنف وشراسه ضد الاخرين ..
خلينا عليك الله قنعانين كده لا بنودى لا بنجيب ..

سلام يا كيمو
مرحب بك فى سفينة نوح للقنعانين...
مرة قريبى ضرب لى تلفون وسالنى انت حترسل لفلان الفلانى قروش؟
قلت ليهو لا ..ابدا ماحصل وما حيصل..
بدا يضحك ..سالته مالك فى شنو ؟
قال لى فلان الفلانى طلب منو دين ووعده بالتسديد لمن القروش الحايرسلها النصرى تصل ..

بالله دى حاله ...
حتى فلان الفلانى بقى حبرتجى ..سبحان الله مغير الاحوال ...

الناس جنت يا كمال وبقت تطقع ..


سلم لى على حسن ..انا ماقابلته فى زيارتى للدوحة...
وتحياتى لبقية الاسرة

والله يا النصرى
أنا مستغرب فى الناس البقولوا ليك ياخى أنظر للنصف المليان من الكوب وهم عارفين الكوب كلو فاضى ومامحتاج حتى لغسيل.

Quote: الزول القنعان زى "الصفقة" بتاعت الشجر فى الهواء لا تلوى على شئ .. محل الريح تهب بتمشى .. لا تلعب اى دور فى تحديد الاتجاهات .. مستسلمة تماما لقدرها .. لا تحتج.. ولا تشكى ولا تتالم... و لا تقاوم ..

بالعكس يا النصري
ديل حزب الأغلبية الموجودة في كل المجتمعات
وهم ناس مختلفين
فيهم من الرومانيسية الكتير
ويحبون السياسة باعتبارها لعبة غير قذرة ( أو هكذا يتخيلوها )
هم من يحلمون ويحبون المدينة الحالمة ( أو الفاضلة المندثرة ) ..
هم لو اجتمعوا ( واتلموا ) مع بعض حا يشكلو تغيير مختلف ..

سجل عندك

المفروض يسجلوا 25 مليون

السجلوا 16 مليون

ديل 9 ملايين قنعانين تب

الصوتو فعلا 60% من ال 16 مليون يبقي حوالي 6 مليون متضامنين مع المقاطعين

يبقي عندك 15 مليون قنعان

يا عزو

Quote: حبيبنا النصري كيفك وكيف العيال وامهم كل الذكرته صحيح واكثر منه ..ومنظر واحد زي الاطفال الفي اشارات المرور بياعين للمناديل والفواكه وغيره..والشحادين بكل صورهم من مكسرين لي نساء يحملن اطفال يقال انهم بيستأجروهم للشحده..والله انا يوميا وانا ماشي الشغل اشوف المنظر ده بجيني احباط يومي وخلاص قنعت وداير ارجع عندكم لكن قالو الlayoff زائد في البرتا وانه كل المشوا رجعوا لي سانتكاثرينز.. دايرين اكيده منك عشان نركب نجيكم..

طالما انت منتبه وملاحظ للناس التعبانين ديل فده معناتها انك لسه
you care وهى الخصلة اللى معظم الناس فى السودان بحاولو يتخلصو منها
لانها عبء ثقيل وتقييد وعذاب للنفس ... الشئ الطبيعى الان ان تركز فى نفسك
واهلك الاقربين فقط اما باقي العالمين فيمشوا فى ستين داهية who cares
الناس فى السودان الان كل زول فى روحه ..
كل زول داير يعيش ويربى عياله
ولا شئ اخر ...










بالنسبة لالبرتا ..الناس الرجعت سانت قاشرين معظمهم عندهم ظروف اسرية قاهرة ..اما
الباقين فهم سنة ناعمة ودايرين الترقد والحياة الساهلة ....

اركب تعال على مسئوليتى وكان خايف من recession خلاص قرب يكمل دورته ويتخارج ..
تعال وما تتردد ..
راسلنى فى الايميل بديك تفاصيل اكتر ..
ياخ الفرص متوفرة هبطرش لكن دايرة زول حربى قلبو حار جمرة .. يقابض يمين شمال ....
بقوم ويقع تانى يقوم ويقع..

مثال سريع ..لو داير ممكن تبقى driving instructor بشوية مجهود وامتحانين صغمبوتيات..
تعال وما تتردد
الله فى ..

سلام يا دكتور بلة
الناس البتقول انظر للنصف المليان من الكوب ناس متفائلة
اما بسبب انتماء سياسى او مغيبة وما عارف العالم وصل وين اليوم او شعوب مستهلكة ..

انا شخصيا بعتبر نفسى زول متفائل لمن غلط ...
كل البحتاج ليهو لصناعة التفاءل سبب او اسباب محفزة...
بدون التحفيز مافى تفاءل ...
بالنسبة لحالة السودان ...
انتفت تماما (بالنسبة لى) مسببات التحفييز...

لكى تصنع متفائل جيد فى السودان عليك انتظار الاجهزة الاعلامية الحكومية التى تصنع انواع
جيدة وومعلبة من المخفزات ...
وجاهزة للاستهلاك ..
يبلعها المواطن مرتين تلاته اربعة خمسة فى اليوم وتووووووش يطلع مظاهرة مؤيدة للبشير..

انا مسببات تفاءلى يجب ان يصنعها نافوخى ده بعد عمليات حسابية معقدة ..

سلام يا عمران
كيفك؟
الفرق الكبير بين "قنعنا" ومجموعات اخرى مثل قرفنا انو
ناس قرفنا بقولو انو الروح وصلت الحلقوم وانو لابد من تغيير

ناسنا ناس قنعنا مافارقة معاهم ...
فهم زى ماقلت فوق رفعوا يدهم من الموضوع ..وانبطحوا ..


الوضع يا عمار من السوء بحيث انو ما بتلحق ..على الاقل فى حياتنا وحياة اولادنا,,
الوضع سئ للغاية والبزيدو سوء المحاولات الجبارة لاخفاءه واظهاره بانه انجاز وتطور
وما عرفش ايه .....

لو دايرنى اتفاءل شوية على الاقل خلينى احس انو الناس (كل الناس) اعترفوا بحجم
الكارثة ومسبباتها ...ولان الاعتراف ده مستحيل فانا
قنعان تب

سلام ود الخليفه
ياخ مالك علينا؟
كنا ماشين كويس ..
قنعانين وراضين بالقسمة والنصيب..
تجى انت تجيب لينا سيرة الانتخابات..
اها بقينا قنعانين ومعاها اكتئاب كمان
حرام عليك

القنعانين او الحركة المتحدة للقنعانين(حمق)
حركة سودانية تسعى لصناعة مواطنين سودانييين
خاليين من امراض الضغط والسكرى و النفسيات وكل الاعراض التى
تصيب الجهاز العصبى..

حمق من اجل مواطن صحى ومعافى وكامل العقل ..
حمق مثل therapy يذهب المريض الى طبيب الامراض النفسية
لينفس عن نفسه وهمومه ..
لاتحتاج عزيزى المواطن للذهاب للطبيب
ندعوك للانضمام ل حمق وحنخليك مخدر و relaxed حتى لو شفت
وزير بسرق فى خزينة وزارته ستبتسم عزيزى المواطن ولن تغضب
ولن تمرض ولن يضرب فيك عرق ..سترجع لاطفالك فى كامل قواك العقلية ..

حمق للتنفيس
حمق لل therapy
حمق لها مفعول ال ecstasy
مواطن صحى معافى and don't give a damn